رواية الم احل لك بعد الفصل الخامس 5 بقلم الكاتبة بتول
مـر الشهـر وانه ما لافي للبيت
كاعد بيت الفلاح بالبستاان
ذبيت روحي علـ قريوله وجف ايدي على راسي
وهذا الشهر تعده يـ وارث شنهي
رايك تـضل هيج معلگ ومعلعـل لا اكله مثل الاوادم لا نومه عدله
بس وغيرة العبااس ماالي گلب يحمل يشوفهاا هيه وعمـي سووه
احط جيله بنص روسهم اثننيهم وانه الحگهم
سمعت طكاات على البااب فز گلبي كبل جدامي
هااي الطگات مالت عصاا جـدي
اعرفنها زين وما تخطي اذني من تسمعهاا
كمت عدلت هندامي
وركضت فجيت البااب
صاار كبـالي بـ هيبته المعتادة
ما تجـرأت اعاين اله
مدري حاقد علـي
بهذيج الساعة ما حطيت عيني بعينه
حجه بصوته الجهوري
غيـاد..شنهـي بوويه مالي مجان بـ بيتك
اطيته مجال دخل والعوجية الهاا وزنها من اطگ بالكاع وي خطواته
مشيت لـلمطبـخ اجيب اله ماي
خذيته بطاسه خليته كدامه وكعـدت عيني ما رفعته علـيِ
شرب
تحمد
ذكر الحسين
ونعل يزيد وگال
غيـاد.شنهي قضيتـگ بويه شوو شديت بقجتگ علـظهرك وطلعت من الدار
جـنگ مره زعلانه من زلمتهـاا
سكتت ما حجـيت
رد حجه ونابزني بـ عصاته على فخذي
غياد.احجي وولك وريث حرمه انته وطالع من الدار زعلان احج بـساعك
رفعت نظري علـيِ وگلبي يكصف گصف يباوعلـي بحنية عگس صوته والنبرة اليحجي بيها وياي بيها زعلان وجنه مغتاض مني
وارث.مالي رده لهذاك البـيت
غياد.ازوجنك وترد
ضحكت بكـسره خاطر واتجيت على الحايط
وارث.هاي هيه ازوجنك وترد هيج تحجيهاا وجن السالفة هينه
ولا جـن گسرتلك گلوب ويتمتهاا وهدمت المحنـه البينهاا
غياد.وريث وحگ تراب ابووك وحگ دمعة عيني الماانشفت علـيي
اذبحـك تعررف شنهي يعني اذبحنكك ومااخليك تحط عينك على مريت عمك
شنهي ولك نسيت يااهو الرباگ وتعب عليگ
يااهو الدارگ ومكابلگ ليله ونهـاره تاالي ماا تالي تجي تجـاازي تحـط عينك على مريته
شنهـي ولك نسيت التربيت علـي
تجاازي زينه بالشيـن منـگ
وارث.جدي..
ما كمليت حجايتي اله وعصته غرست بجتفي
غياد. عدل حلـجگ ولك شنهي جدي ياايوم كتلي هااي الحـجايه
وراث.رده للبيت ماارد
غياد. شنهي بالك وولك
وارث.اطلع لـ بغداد
غياد.شنهيي
وارث.ايي حاجيت ابو رسن وكلالي بخدمتك وحتى حجرتك جاهزة غاد
غياد.ولكك وريث صااير تحجي من شور رااسك ولا جـن وراك اهل
وكفت على حيلي وصحت جن طفح بـگلبي الگيل ومابيه بعد لجمات كاافي عليه صووت الهلاهل صاايره اتصبح واتمسه بـي
وارث.جدي مااكدر وروح اامي وابووي المااشبعو شم الهوه من الدنيه مااكدر
ناار شعلتهاا بصـدري بعملتك وماامش من يطفيهاا
ساالفه ارد للبيت اردود معنااهاا تكلي مووت وانه اشووفن عمي كل حين ويااها
اادري اانه غلطيت وماامش معصوم من الغلط بس ان جاانك تعزني صددك ااعفيني ماالي وجه ولا گلب اليتحمل الرده غااد
وكف على حيله ويااي بااوعلي وانه صاد عنه
كل اعضااي ترجف اي ولله وبعگلي يكلي منهو انته وتوكف بوجه غيااد وتعانده
بس لزوم تصير السالفه هيج حتى وان زعل تاليته يرضه المهم عدي ماا اضلن هناا
تگرب يمي وحجه
غياد.هاي هيه يـ ابوك يجاارلك
يجاارلك يـ بن ابني يااعزيز جدگ
خله وطلـع
رجليه للوكفه مابيهن حيل بعد تلكيت الگاع بجفوف اديه اتسند عليهن
مرن يومـين والوضع مهود بس عگاب يمر يجيب الي سلابات واجل ويرد ومرات يضل يلغي بحده وتالي يمل ويطلع بدون فايده
اله ما ليلة خلصت فرض العشه
ونفتح البااب درت وجهي لانه عگاب
وارث.شنهي ساالفتك مااعدك غيري كلسااعة ونبزت جدامي
عگاب.اوو مال الغسل اي ولله عود حاسبنك اخوي ومايهون عليه اخليك بحيدك بـس ما تستاهل يلـ سگط امش جدامـي يلا جدي صاحك
فريت وجهي وكمت ابلعم بس لا يرد علسالفة الرده للبيت
وارث.وين هووه
عگاب.بالمضيف والناس توهاا طشت فز بسااعك
وارث.هساعة جااي
لميت سجادتي وكف جريت الدشداشة لبستهاا عالسريع وطلعت
وي عگاب الطريج كلهاا يسولف ويهذري وبالي موش رابط وياه خط
وصلت للمضيف واشمن ريحة الكهوة غمضيت عيوني وجنه ريحتهاا عافيه وحنين لـ ايام گبل
خطيت العتبة مالت المضيف
وجلمـه ياعلي مافارجت لسااني
اشوفن جدي كاعد بمــجانه المعتاد
صدر الديـوان
ولا واحد يمه فريت وجهي حتى عگاب ماهوو
سلمـت وضليت علـ وكفتي
غياد.گرب حذااي بـوويه
كعدت بـ صفه وراسي منـزله مالي عــين اباوعله رفعه صوتي ذاك اليوم بوجهة لحـد هساعة ادك بـگلبي
غياد.مااربيت زلم دنگ الـرؤس من تحجـِ
وارث.يـبه…..
غياد.لا يـ ابوك اطنـي مجال و اسمع مني ولون مااعجبـك الحجي الك حگ تعترض
هزيت راسي مطاع اله واسمع شـ نهي اليكوله
غياد.شوف بـوويه انه فكرت بـسالفتك روحتك لـ بغداد
لجـن يـ بزر ابنـي انه مااهاويلك بغداد لونهاا بيهاا مصاايب جثيره
وانه اخــافن علـيك الي حگ بيهاا لو ما الي
وارث.الك يبه الك
غياد….. من كـون الــي حگ بيك يـ ابوك انه روحتك لـ بغداد ما هاويها وسعيت الك بـ طلعه من ديرتنه بس مو لـ بغداد
وارث….چاا وين
غياد… الصبر الصبر يـ ابوك بالتأني السلامة
انه سعيت الك بـ روحة لـ كربله يم الحسين ولعباس ((عليهم السلام))
فكيـت عيني ماامصدك حلـم هذا عندي اكابل الامامين واكعـد
غياد…. هاا وريث شـ نهي رايك..؟
هزيت راسي والعلوم والحجـي كلها طارت من عـدي
غياد….ااحجِ يـ ابوك ان جانك مااهاوي الروحة هدهاا
وارث.لاا يبه ياازين مـااخترت كربله وعيشتهاا حلم عدي
هز راسه وكام على حيله متأجي على العوجيه
غياد….امشِ ويااي لـ دار تحضر غريضاتك حتى تتوكل بـأذن لله
بس هاا عدي شرط موش بكولون اوليته شرط واتفاق اخرته نور
انجـر بووشي وبگلبي كلت كون ماباله اخذلي مره وياي منانه
وارث…. شنهي شرطك
غياد…ما تگطع بينه يـ ابوك انته تدري جدتك عدهاا هواها بالدنيه انته عگب ما غفت عين ابوك
وارث.لاله يبه ولا انه الي حيل افراگم اجيكم ان شاءلله كل اسبوع هجي زين
غياد… براحتك وريث على مرامگ يـ عزيز جدك
وكفت وياه ونكثت الدشداشة ومشيت حذاه وهو يسولف على البستان والزرع وشنهي محصول السنـة وانه اسولف وياه وتمنيت الطريج يطول حتى اسمع سوالفه اكثر واكثر
وصلنه للـ بيت دخل گبلي لاكتني ام عگاب سلمت ووكفت
تعتب عليش طلعت البيت كفضت السالفة
و سلمت عليها واترخصت منهاا طبيت على جدتي لكيتهاا متوسده فراشها ورايده تناام
دنكت حبيت راسهاا وايدها باعتلي وكعدت على حيلهاا شابكتني تعتب وتعني
كـسرت گلبي بـحجيهاا وعتابها علـيه
تعذرت منهاا وكمـت على حيلي من حضنهاا
كال جدي
غيـاد…امش بويه لـ حجرتك ارتااح حتى تجهـز روحك وتتوكل
وارث…تصبحون عالخــير
غيـاد…اجمعين بوويه
…..طلعت من حجرتهم جريت نفس وعيوني اله نيه تريد تصعد وتعااين لفوك لجن ما اطيت روحي مفكـه
فكيت الحجره البصف حجره جدي گال هاي الك حتى وكت اجي من كربلاء تضل هاي الحجـره الـيه
فتت وسديت الباب بـ وراي
شفت جنطة ام الجروخ محطوطة يم ميز المـراية
مالت الغرفة ذبيت الدشداشة وسحبتها فجيتها فارغة
وانه الـنوم مايريد يمر عالعيوني ليلة من التفكـيري
يو رحت هنـاك شنهي اسوي اكمل علمي (دراستي)
يوو اشتغل واصرف عالروحي خوما اتاني جدي يصرف علـيه
…. وانه بحيرتي فجيت باب الگبت وطلعت هدومي اصفط بيهن وبالي يروح يم الراية الحمره
واتخيل روحي كل يوم مصبح بيهاا
اذب همومي وذنوبي واغلاطي كلها بالحضره اصفي روحي وانخلهاا نخل بـحضـرة ابو علـي وهو الحنـين مايرد وحيد يو مد ايده الـه
واخيه ابو فاضل اتكابل كل يوم وي كبته الشامخة ومن اشوفهاا الرجفة تصير بگلبي وجنه شي خارج عن ارادتي
رجفة خـوف وحـب وهيبة
من اشوف اسمه
السلام على ابا الفضل العبــاس وجنه اسمه استـوطن روحي
اكضي الصبح يم الحسـين وليل يم ابو فاضل
… هيج تخيلت حياتي هناكه و روحي فرفحت شيجيب الصبح واطلع واروحن هناك وانسي همـي وغمـي
خلصت غراضي بجنطة ام الجروخ ووحده عالجتف تنشال ساعة بـ٢ بليل فتت توغسلت غسل الزيارة
ونيتي بهاي الغسل اطهر روحي من ذنوبهاا
… ومن اشياء عمرهاا ماجنت حگـي لجن البشر طمااع وانه طمعت بشي مو اليه ولا حلالي وحطيت عيني علـيِ
وخالفت امـر ربي وديني ومبادئي والعادت والتقاليد الربيت عليـها وارجع واكول من ايدك وارث الصاار من ايدك
…. وما الــومن جـدي عالتصرفه جيف الطلبته مايعگله عاگل ولا يصرف بعشيرتنه وشنهي موقفه من اهل البت يو سئلوا شنهي موقف عمي عتااد يو ساامع الحجــي من عـدي حمدت لله عالصار طلعت توضيت وصليت ركعتين گبل صلاة الفجـر
خلصتهن والعصره بگلبي صارت بلا وعـي مني حطيت ايدي عالگلبي من الوجع
….صحت ابو صالح ادركنــي مولاي
حجـايه نطقها گلبي گبل لـساني وما جنت عدي كل المعـرفة بـ امام زمـاني ولا جـنت ادري بـمعنى الحجاية
لجـن كل السترستل بـ عگلي حجي جدي
((يشوفنه ويسمعنه ويحس بيـنه ويألمه الياذينه))
……سمعت الأذان يؤذن لميت مصلايتي وطلعت ليبره بالهـول
شفت جدي وجدتي توهم يطلعون يردون يتوضون
صبحت علـيهم ومديت مصلايتهم
وبديت اسمع اصوات بيبان الحجر من تنفج خليت عيني عالتـربه وشلتها
سمعت صوت
ملكيه….وارث هذا انته
….. رفعت راســي الها ملكيه
واسم على مسمئ ملكيه بالهـدؤء والرزانة والاخلاق
وارث…شوونج ملكيه
ملكيه….انه زينه انته شخـبارك ليش كطعت من حوشنه سمعت عگاب گال مريض هساع شون صرت
وارث…نعمة من لله مابيه شي
ملكيه…الحمدلله بس فدوه بعد لا تبطي واله اكلك لا تطلع من الحووش بعد ولله عبن جدتي تضل عينها للباب متانيه ردتك ودمعتها كلساع صابه
وجدي حتى من نصب المواجيل الغده والعشه هو ماياكل ويانه
وارث…ان شاءلله
غياد….ها ملكيه بوويه شعدج
…. تمشيت بست جتفه وصبحت علي
ملكيه…اعتب على اخوي جدي شنهي مو حگـي
صارله شكد من هاد حوشنه وماشايفينه
غياد…يحكلج بويه وهوه هم ماهاين علـيِ فراككم
يله بساعج روحي توضي وصلي و ردي نامي حتى تكعدين ويانه عالريوك ونتصابح بهالوجه الحسن
…. ابتسمت بخجـل ورحت امشي بخطوات سريعة توضيت وفتت صليت كعدت يم سدن اندهها كالت مااصلي
كمت عنها احذتلي ساهونايه من القوطية واترحم عالـ ابو عگاب وامه عبني احب هاي الحلاوة كلش وهو حسب حسابي وي اخياته الزغار وجابلي منهاا ماا يگصـر عليه بـشي بكلشي يحسب حسابي وياهن بس مو الكبار لا الزغار وانه مكيفه حاسبيني زغيره ومدلله عاد كون اضلن دوم زغيره وما اكبر
نمت بفـراشي واخذتني الغفوة غاد واسمع عمتـي كريمه تندهه بيه
كريمه…كعدي عمه موش تردين تودعين وريث وجدج
ملكيه…ليش عمه وين يردون يرحون
…. جرت حسره وحطت جفين اديها واحد فوك الثاني وكالت بحيره وقهر
كريمه…يردون يطلعون لكربله يله بساعج كومي لا تلهيني هم يله اخلص ريوكهم
ملكيه…اي صار كمـت
….خليت الشال عالشعري وطلعت غسلت وجهي وفتت للمطبخ لكيت عمتي كريمه محضره الريوك شالت الصينيه ومشت وانه بوراها بالخبز حار واكو خبزتين بالسمسم طالعات يموتن
شافني جدي تبوسم وحجه
غياد….كل الهـلا بهالصبااح چاا انه تطمنت اروحن واردن بسلامة دامني تجابلت وي ملكيه
…. ابتسمت ومااعرفت اردن طبعي اخجل كلش واقل شي وصبت دمعتي واخافن من كـلشي
كعدت بصف جدي وعمتي بصفي ووارث غاد منه
وارث…عمه اصبن الج جاي
كريمه…اي يمه صبلي بس لا تحط اليه شكـر
وارث…صاار
….صب الجـاي وقدمه لـ عمتي وجدي واطاني حليب
وهوه هم كدامه استكان الحليب
وارث…ما اصبلج جااي انتي اخافن علـيج
كريمه…ياا وريث بس لا بعدك حاسبهاا بت ٥ سنين
تراا ماعوزهاا بس عريس
وارث…كولي يالله عمه بعدها بزر ظهـر شعدهاا تردينها تتورط من هسه بزلمه يشلع افادها عليش
كريمه…ياا عمه البت طبت بـ ١٦ يااا بزر ظهـر
….. واستمرت السوالف ومن سالفه لـ سالفه يو ما صارت الساعة بـ٨ وكف جدي واشر لـ وارث
اعاين اله حاله موش زين وجنه مگـدر ومتضايگ من شي ماكدرت اسئلنه واستحيت من شفته كام
…. كمت بساعة وياهم مسحت مداسه ولمعته اله ومسحت العوجية مالته وهو طلع يعدل بعگاله وخاجيته
باوعلي وتبسم
غياد…لله يخليج بويه عسااج سالمه
ملكيه….ويخليك النه بوويه
غياد…يله بوويه واارث وين صرت تعطلنه عالزلمه متانينه بالسيارة
ملكيه…راح يسلم على جدتي
جدي هوه راح يبطي يله يرد يو تزورون وتردون
غياد…لا يـ بوويه يريد يضل هناك بكربله يرتااح شواي بين الحسين وابوفاضل يبرد گلبـه
ملكيـه….جدي زور عني بالنيابة
غياد…ان شاءلله بويه والج عليه افرغ روحي واخذنج ونروح نزور عالراحتج بس هساع اعذريني عبني السالفة شواي اطول اريد امن عالوريث واشوفن حجرته اليسكن بيهاا واطمن عليِ
وارث…هاا يبه اجيت يله هساع نتوكل
غياد…اي بوويه بس ودعت عمومتك
وارث…اي بويه كلهم سلمت عليهم بـوراه صلاة الفجـر
غياد…لله يحفظك چاا يالله نتوكل احنه بـ اسم ام البنين
في امان لله
ملكيه…لله وياكم محروسين بعين الرحمان
…. سديت باب الحـوش بـوراهم واتسائل وي روحي شنهي الجـره وخله جدي يرضه وارث يروح عنه بعيد ويطلع من ديرتنه وهو الماي اذ مو من ايد وارث ما يشربه وجنه مابي لذه اله ولا يروي عطشه
سمعت صوت عمتي كريمه فتت للمطبخ
كريمه… تعااي عمه عليش واكفه بالشمس لا تحوشج ضربه مثل وريث وشيكومج من طيحتج
ملكيـه…عمه هوه وراث ليش يريد يعيش هناگه بـ كربله
…جرت حسره وهيه تطيني المواعين غسلتهن وحطيتهن بالسله كدام المغسلة ضاله للكوابة مات اهل البيت
كريمه… ولله مدري يـعمه هلوليد شالع گلبي وانوب ماا يحج ولا يفج حلجه بحجاايه
شهرين ماا لافي للحوش ومن كلت يالله وراح يرد النه طلعت سالفة روحته لكربله وجني عاايزه مفارك ماا كافي عليه فرااك فهد وباسم انووب عليه وريث
ملكيـه…لا اسملله علـي عمه لا تحجين هجـي فدووه ان شاءلله يرد سالم النه
كريمه…ان شاءلله يمه چااا انه شـرايد وعلي غير سلامتكم انتم هلـ اثنين
كاسرين اليه ظهري وعلي
ملكيـه…عليش عمه بس احنه
كريـمه…عبنكم ايتاام يمه انتي يتيمه ابو وهذاك نعمة لله الابو والام اثنينهم لـ رحمة لله
اخاافن من جـور الدنيه عليكم صدك ابوي ماا مگصر وياكم بشي ولا فد نوب حسبتوا ارواحكم ايتام بس تضل عاز الابو والام عازه ومايسد مجانهـا
عودت كلت ازوجنه وامن عليه جدام من عيني شوو صبح عليه الصبح يريد يشرد ويهج من هالدار مدري شماله
ملكــيه…عمه ادعيله حبووبه وعلي شو خوفتيني علـيِ ادعيله يردنه ساالم عكب مايرتاح
كريمه…ان شاءلله يمه فوتي انتي كعدي نسوان عمامج وعمومتج شنهي شمسهم اليوم عالية ما نااوي يكعدون يطلعون عالباب لله يشوفون رزگهم شحـاله
ملكيـه…اي عمه صـار
…. رحت دكيت غرفة امي وعمي ضهـد
ورجعت دكيت غرفة عمي رافع
كعدت جدتـي وكعدت العايلة كلهاا والتموا عالسفره الريوك جمعة اشوفهل بعيني وفرحانه مابيهـا لا حقـد ولا شر ولا وسواس
…. جدتي هيه الجاعده بمجان جدي مترايسه السفره
وانه بصفها ومكابلتني عمه كريمه
عود احنه مساع تريكنه بس عالواهس وعالسوالف كعـدنه وياهم
اعايـن لـ عگاب كلساع عينه تجــي عالسدن اختـي
ودور وجهة يضحك وهيه هم عيونهاا تلمع وعبالك اطلع گلوبات من تباوعله
شحلاتهم سووه جنهم طيور الحـب
… درت عيني لـ امي كاعده حذاه من عمي ضهد وبصفه بالصفحة الثانية ام حميـد مرت عمي الجبيرة
…. وعمي رافع كاعده بصفه عمتي ام عگـاب وولد عمـي هم كاعدين واحد مجابل الاخر والزعاطيط بالنهاية
دعيت بگلبي لله يديم هاي الجمعة ولا يفركهم بس جـن النقص مبين عبن لا جدي ولا وارث
لله يردهم بالسلامة ولا يشوفونه بيهم شـر
___
وارث
….
كعـدنه انه وجدي بالحضـرة الامام الحــسين وويانه صاحبه شيخ من كربله هم ماقصر تلاكانه وعزمنه عالغده وبطالع الروح يله رضه نطلع من بيـته زلمه صاحب واجب وونعم منه
قرينه الزيـارة وكعـدنه واحد مجابل الثانـي
لم السبحة بجـف ايده وگال
غياد… اي بـ ابوك شنهي نااوي تســوي شنهي بالك من جيـتك هنايا
وارث…مدري يبه بعدني ماامفكر ومااحط اولوياتي شنهي خلني ارتاح وارد ردود افكر اكمل علمي
يوو اشوفلي شغلة هنانه
غيـاد…سوهن اثنينهن يـ ابوك شنهي ناگصك وما تكمل علمك كمل عالراحتك ودش للجامـعة وجيب الشهادة رافع الراس ومفتخر بروحك
وان جان بنفسك تشتغل انه ادبرلك شغل عالكدك ماياثر على علمك
وارث…صدك يبه يعني رااضي
غياد… وعليش ماارضه بويه هااي حياتك وانته حر شنهي انه مالكك وما اخليك تقرر بكيفك شنهي تشوفه مناسب سوي لـ روحك وانه واكف بظهرك وتجايتك بويه من بعد لله واهل البيت
… ابتسمت وفريت عيني عالضريح وعيوني شايهه عالجمال المنظر وهالكثر يريح العـين ويهدي الگلب
سمعت صوت جدتي عكب ما فر السبحة بالصلوات المحمدية
غياد…شوف بويه راح اوديلك اوراقك ووثيقتك ونقلك من الولاية لهنا بيد عگاب يو فـارس
وارث…ان شاءلله يبه
صدك يبه
غياد…كول يـسباح گلبي شعدك بعد
وارث….علمود عگاب وفـارس
…فرك سبحتة بجفه وحجه يباوعلي ويدرس علايم وجهـي
غياد…شمالهم ولد رافع
وارث…يبه عگاب يريد يتزوج
….هز راسه ورجع گال
غياد…زلمه ومن حگه وفيرس شماله
وارث…هم يريد يتزووج
…. ابتسم بـ رزانه هز راسه وجـنه يدري وموجديده علي هاي السالفه سامعها گبل
غياد….ادري بـعگاب بس ما كالك يااهي يريدهاا لونه اعرفنه ماايرضه بحـي لله مـره
وارث…اي هو يريد سدن بت عمي ضهد
غياد…خوش حجي وفاارس
وارث…يريد بت ابو فلاح فلاح البستان
غياد…ولله وونعم منه ومن خلفته
وارث…بس يبه عمتي ام عگاب ماتريد البت تكول شنهي يتزوج بت الفلاح
غياد…چاا شنهي بويه الفلاح موبشر موو مخلوق مثلنه وحال من حالنه
وارث…مدري يبه بس انه گلت انته اذ تدخلت بالسالفه محد يفج حلجه بشي بعد
غياد..سهله بوويه بس اريدنهم همه يحجــون حتى اعرفن اتصرف ويو صار ماصار باجر عگبه ما يجوم تحاججون عليـه
وارث….براحتك يبه المهم صاار عدك خبـر
غياد…لا تهتم يـ ابوك سالفتهم مكضيه بحيل من لله
يله تمشنه نروح نشوف حجرتك وشنهي ناگص حتى نجيبه ويامن گلبي عليك
…..طلعنه من الصحـن لحد ما طلعنه من بين الحرمين واختفت الگبه عن عيوونه گرينه سيارة وحجه جدي وي الزلمه واطاه اسمه المنطقة وصلنه واشوف بناايه عالية وشباابيج طالعه منها اليبره
… فتنه والزلمه جان واكف يم كرفان سندويش شاف جدي اجه سلم علي وتلكاه بذاك الملكـه المعـدل جنه يعرفه عشـره عمر سلمت علـي وكال جدي
غياد…ابو احمد هذا وراث وليدي
…. كله الهلا بيك وبي شيخنه العزيز تفضلوو
…. دخلنه الكرفان مرتب ونظيف حيل مكيف يشتغل
وقريوله معزوله
وقنفه كدام المكيف كعدنه وهو جاب الجاي والمـاي
شربنه الجاي وهمه يتنالقون الاخبار بينهم مبينين صحبه لانه يعرف عمومتي بالاسم تالي كال الزلمه
….. ابو فهد بعد انته طلبتني وانه مااكدر اردك لان افضالك مغركتني وعلي وانته وصيتني وانه لكيت للوليد شقه بهاي العمارة شوفها الكدامك وهم كدام عيني وحاسبه حسبة احمد
غياد…مااتگصر ابو احمد وهذا العشم بيك تمش هساع نشوفهاا بلايه زحمه عليك
….اي براحتكم وحتى لو ماعجبته لو ما ارتاح بيها انه اشوفله من معارفي فندق ويحجز حجز دائمي
غياد…بعد هاي انته وياه تصافون منك اله
يله بويه وارث امش جدام منـي
… طلعت جدام منهم صار كبالنه درج ممر ابيض مشخط برمادي
صعدنه ثاني طابق وكف جدام باب جوزي وعلي رقم ٣١٣ بالبداية اتعجبت من الرقم لجـن فرحت بي عبن اتذكرت جدي من كال
((القادة مالت جيش الامام المهـدي ٣١٣))
فززني من صفنتي بالرقم وفرحتي صوت الزلمه
….شووف بويه هاي الشقة وهذا رقمها وهذا مفتاحها افتحهاا بيدك وسمي بـاسم لله الرحمن الرحيم
….كضيت المفتاح اريدن افتح الباب وانداريت لـ جدي اطيته المفتاح
ابتسم وهز اليه راسه گرب وفتحه
غياد…يله بويه فوت يالله بسم الرحمن الرحيم اللهم صلِّ على محمد وال محمد وعجل فرجهم
… فتنه للحجـره يو هول اسميهاا ويمكن بيت زغيرون عالكدي
جدام مني هول ماثثه بقنفات ثلاث وحده مفرده والثانيات كبار بالون سمائي جنه لون السمه
وبالكاع بساط بالنص ودايره ما داثره القنفات هم بالونهن ومشخط بالوان مشتقة من الون الاصلي
مطبخ مفتوح مجهز ومرتب بالون ابيض طافـي
بابين مسدودات يفصل بينهن ممر زغيرون
مشه جدي فج الباب الاول حجـره مجهزه بـگبت وقريولة
غياد…هاي حجرتك بوويه شوفهاا وشنهي الناگص بيهاا حتى نجيبه
…..اي باابه شوف شنو التريده بعد تحط بالغرفة مكتب زغيرون علمود الدارسة محتاج لابتوب كمبيوتر كلي وانه اجيبهن
وارث…عساك سالم عمي وذخر ان شاءلله يبه خليني هساع استقر وبعدين اعاين شنهي معتازه
غياد…براحتك بويه انه خليت فلوس حدر ايد عمك ابو احمد شنهي تريد اطلبه منه احسبه حسااب عمومتك هناكه
…فجيت باب الحجره الثانية وهمه تمشو كعدو بالهول
شفتها هم غرفة خاليه بس كبت بالزاوية مالت الحجره وكاعها مفـروشة
….. هزيت راسي بـ رضا وحجيت وي روحي
هنانه بدايتك يـ وارث ابدي صح حتى تفلــح وما تخيب الظنون بيـك
منانه اريدن ابني روحـي وارتب اولوياتي
رددت بداخلي
((بالله اعتصمت وبالله اثق وعالله اتوكل))
… فتت يم جدي وابو احمد وهمه يسألون عن الدار شلونها ومرتاح الها يو لاله
غياد…بويه انه وصيت عمك يجيبلك ميز وكرسي
ورفوف تندك بالطوفه خاطر تحط كتب اقلام عليها وما تاخذ منك مساحة زيادة
وهم اخيك احمد راح يجـيبلك تلفون تخابرنه بي ومايضل بالنه علـيك
…. لـ ثاني يوم جدي خله المصرف عالقريولتي ووودعني ومشه وابتدت اليه رحلة جديدة
ولزوم مني اعتمد عالروحي بكلشـي مامش واحد يـعاوني بشي ولا واحد بتلكاني اول ما ادش للدار
ولا اسمع لـ لله يساعدك… جوعان عمه… وارث انزل جدك مااتفوت الكلمه بزردومه اذ مو مجابلك
….شمالك يـ اخوي عليش متگدر خاطرك….
… الصلاة بـ وراه جدتي وجدي
…. لمتنه عالريوك وريحة الخبز الحار المسمسم من ايد عمتي
… معارك ومداهر عگاب وحمدان من الصبح من لاشي يتعاركون
… الـ خويه من سدن وملكيــه
… سوالف عمومتي وحجيهم من يتذكرون ايام شبابهم ويجيبون ابوي بالطــاري
اسمع منهم والضحكة عالوجهي تنرسم بحيدهاا عبن بس طاري يفزز گلـبي بالفرحة
لا شايفة ولا اتذكر شي منه لاهوه ولا امـي بس احبن الحجي بيهم وطاريـهم
….. لمتنه للـصيد وطلعاتنه للبـر
…. البستان والهوه اليرد الروح بي
…. الديوان والمضيف وريحة الكهـوة والنـار مالتها
….الهلا والمـرحبا التنحجي عدنه وبينه ما الها مثيل
بـ وراه اسبوع
جنت تونـي نازل من الدار ومريت عالكرفان اسلم على ابو احمد لكيته يصلي وجاعد غاد منه شاب يطلع بحـلي اكبى مني بشواي
ابتسم من شافني ووكف واجه حذاي
احمد…ياا حي لله وارث
….ابتسم ومديت جف ايدي بالسلام
وارث… لله يحيك ياابه
احمد…تفضل اكعد علما يخلص الوالد صلاة
….فتت كعدت عالكرسي جاب بطل ماي واستكان جاي سفري
وارث…كثر لله خيرك انته ابن الحجي
احمد…اي انه احمـد
شونهاا كربله وياك
وارث…نعمة لله عليها الحمدلله
احمد…اي ولله نعمة هيه بس من تصبح وتصير المنارة گبال منك هاي كافيه تخليك تحمد ربك كل يوم
وارث…نعمة فضيلة هااي
احمد…سمعت ادور شغل عاد لكيت لو لا
وارث…لاله بعـدني ادور وجدي امس خابرني گلالي اكو زلمه مواعده بشغل اليه ومتاني رحمة لله
احمد…خوش حجـي لله يسهل
….كام وسحب علاكة بيضة وبيها كارتون خلاها جدام منها
احمد…هذا تلفون الك
وارث…تسلم يابه انه عدي تلفون
احمد…ادري بس جدك موصي ابوك وجبت الك هذا لمس احس الك من ابو الدكم
وارث…يعني من جدي
احمد…اي ولله من جدك افتحه شوفه
….فجيت العلاكة كارتون مغلف بنايلون شلته ونزلت التلفون من الكاتون اعاين اله شاشة صافية
وعليها لازكه شلتها منه اشتغل فريته بيدي
مكتوب علي سامسونج بظهره
احمد…وياه سماعاته وشاحنته تعرف اله مو
وارث…اي خويه اعرفن اله بس اضوج منه مااحبه
احمد…حبه خويه مجبور تحبه لان بيه هواي تسهل امور تكدر تخابر اهلك حتى كامره وتشوفهم ويشوفونك اذ عدهم مثله يساعدك بدراستك اذ جانت طالب
وارث…اي عدهم هناك حمدان وحميد وعگاب ولد عمومتي عدهم منه
احمد…خوش حجي
….هاا بويه وارث شونك
وارث…كل الهلا عمي بنعمة لله انته شلونك امس مريت عليك لكيتك قافل حجرتك
….ولله بويه بنيتي اجت من كركوك وخابروني ورحت وعود بلفت العامل يكلك اذ تعتاز شي تكله شنهي ما شفته
وارث…لاله عمي انه كضيته نهاري كله بالحضرة ومن رجعت بليل شفت حجرتك مقفله
….عليك بالعـافية بويه ومو تكول ترا
فلوس التلفون واصله من جـدك لا تحط ببالك
وارث…اي هاي هيه عمي يله نرفع الزحمة وتصبحون عالخير
….ضل بويه شعدك فوك شو بحدك
وارث…كعددتكم ما تمل بس انه تعبـان شواي واريدن ارتاح
….براحتــك بويه كل الهلا بيك ليمت ماتريد تعال لهنا
احمد…وارث رقمي بتلفونك اذ احتـاجيت شـي بس دكلـي
وارث…ممنون يـله في امان لله خليت وطلعت فوك فجيت الباب ودخلت تعبان ورجليه كوه شايلتنـي ذبيت العلاكة من ايدي فتت للغرفة انطرحت ومادريت بروحي ليمته نمت ومافجيت عيني غير على اذان الفجر
… تعوذت من الشيطان وكمـت صلـيت حطيت الي ريوك
وافكر بـ دراسة الحوزة
انه مالي واهس بالدراسة الاكاديمية واحس روحي هاويه دراسة العقائد والفقه
…. لجن لزوم ارجع خبـر لـجدي وابلغنه حتى احضر المستمسكات المطلوبة
والخـدمة شنهي وراث
خو هيه محلولة الصبح بالخدمة بالعتبة العباسية
والعصر دراسة حوزوية بالعتبة الحسينية
تلقيائيا ابتسمت وانه صافن هيه نعمة ورحمة من لله انه استاهلها…؟
…. حضرت مستمسكات للخدمة بالعتبة
دكيت على جدي حطيت عده خبـر ما كال غير
غياد…مسهل طريجك بوويه بس صفي نيتك وي ابوعلي واخـيه حتى تنال شفاعتهم ورضاهم من گلب و رب
صار الساعة بـ٨ ونص نزلت صبحت على ابو احمد وكملت طريجـي هالزلمه اتفائل بشوفته كلش…..
