رواية بين غمد السيوف الفصل الخامس 5 بقلم زهراء السلامي
اعاين للضوه الملموم
حدر الباب هلبت ظلچ يكسره..
━━━━━━ ⚔︎ ━━━━━━
“مِــسك”
فركت وجهي بيدي متوترة ولميت العبايه على جسمي وطبيت، مشيت بطيء وكلما اتقرب من فتحة المنور الثانية الي توصل للترك گلبي يدك اكثر، توترت سميت بسم الله وشلت البردة المغطية الفتحة وشهكت من غمج روحي واني اشوف كحلاء واكفة منطيتني ظهرها وكبالها واكف زلمة لابس شفقة اجنبية..
من الصدمة رجليه ما شالتني بعد ردت اطيح وسندت روحي على الحايط، انتبهلي الزلمة وتغيرت علومه وبنفس الوكت اندارت كحلاء تعاين عليه وفكت عيونها..
-كحلاء: مـ.. مـ.. مِــسك
الكلمة متطلع من حلكها ووجهها صار اصفر، كوة عليه وكفت عدل وركضت عليها جريتها من ايدها اطلعها من المنور ارجف رجف وهي ترجف وياي ودموعها تنزل وحدة وره الثانية..
-كحلاء منو هذا كحلااء ولج ولج يمة ولج منو هذاا
طلعت من المنور وركضت طلعتها من باب المطبخ اركض اريد اخذها واطلع لسعد ابلغه اكو رجال غريب طاب لبيت عمتي وكحلاء ما رضت ظلت تجر بأيدي وتهمس..
-ابوية هنا مِــسك ابوية
-اي وينه وينه امشي نكعده امشي ولج تصخمتي امشي
-لا مِــسك اوكفي اوكفي افهمج صبري عليه
نترت ايدها مني تختض كلها واني احس بروحي راحت من الخوف، وكفت اعاين عين عليها وعين على باب المطبخ اخاف لا يطلع الرجال ويجينه، ركضت على الباب طبكتها ودورت على قفلها مابي قفل ظليت اللطم على وجهي وهي اجتني كضتني من چتافي وحجت بصوت يرعش..
-لا تخافين فدوة اروحلج بس على كيفج مِــسك
-ولج مسودنة انتِ؟؟ زلمة طاب منوركم وتكليلي على كيفج!!
-صوتج حبابة نصي خليني افهمج على كيف
ابلع بريگي وعيني ما وكعت من شباج المطبخ كل ساع أكول راح يطلع منا وينهبنا ويكتل ابو كحلاء وهي باقية ترجف كبالي وتمسح على وجهها..
-ما تسولفيننن تره هسة اطلع لسعد احجيله
-مِــسك هذا الرجال اجه بالغلط، يعني مو بالغلط اوكفي بس اصطبريلي خليني اجر نفس حبابة
صبري خلص ويه دموعها ماتحملت اسكت وعفتها ورحت لغرفتها اجيب عبايتها حتى اخذها وياي واكعد ابوها نبلغه بالصار وما خلتني وكفت بباب الغرفة وجرتني من ايدي وكالت بسرعة..
-هذا رجال مهزوم من العسكر العثماني وطفر على بيتنا خايف من شافهم يلحگوه وويه طفرته وكعت دبة الطرشي وتكسر الگزاز وطلعت اشوف شكو عبالي عتوي واخترعت من شفته رجال..
ظليت فاكة حلكي اباوعلها وهي كوة تحجي روحها رايحة والهبطة بعدها بيها، جرت نفس وكملت..
-من شفته صحت خايفة وهو توسل بيه ما احجي لاحد كال بس ينتظر العسكر يروح وهو من وحده يرجع يطفر ويطلع من البيت بس بقيت خايفة منه ورجعت ليوره وبالغلط ضربت دبة طرشي ثانية وطاحت بالكاع تكسرت وانتِ طبيتي للمنور وشفتينا
اسمعلها واحس مصدكة وما مصدكتها بنفس الوكت، سوالف المهزومين والفرارية هواي وصحيح يطفرون على البيوت حتى ينهزمون بس بنفس الوكت خايفة لا كحلاء جاي تجذب ويطلع شي ثاني..
-مِــسك: ليش ما كعدتي ابوج؟
-ما قبل توسل حتى ما احجي كال بس واحد يفتهم بي هنا يبلغ الجنود ويجون يعتقلوه لان محد يتحمل هيج مسؤولية
عضيت على اصبعي بكل قوتي متحلفتلها وهي بس تبجي وتمسح بدموعها، ماعرف شسوي خفت يظل هذا يتردد هنا من يشوفها منطيته وجه وتساعده وتلفيلها مشكلة وتروح بين الرجلين..
-لازم نبلغ ابوج
-نبلغه اي اي بس مو هسة خلي يروح وبعدين اني احجيله
-كحلاء كلبي ما مرتاح كحلااء
-مِــسك بداعتي حرام هذا الرجال اكيد بريء والعسكر مچلوب ياهو يشوفوه بالشارع غريب اعتقلوه خطية لا نسلمه للموت بأيدنا الله ميرضاها
سكتت عاجزة ماعرف شتصرف عيني ما طاحت من باب المطبخ وهي واكفة بصفي وتتوسل بالهمسة تسولف، استقتلت حتى ما احجي ولا اكعد ابوها ولا اسولف لسعد واني واكفة على اعصابي.. شتت تركيزي صوت حمحمة سعد وهو يطب للحوش شهكت كحلاء خايفة من شافته وهو بس صارت عينه عليها دنگ واندار ينطينا ظهره..
-سعد: عذريني خيتي طبيت بلا صوت بس مِــسچ تأخرت وظل بالي خفت بيكم شي
-مِــسك: لا لا ماكو شي اءء.. طالعة اني هسة بس شوية انتظرني
هز راسه اي وطلع من الحوش، اللتفتت على كحلة واكفة على جهة وتاكل بأظافرها..
-ورطتي روحج كحلة ورطتيها
-شسوي مِــسك
-امشي نشوف طلع الزلمة لو بعد
هزت راسها مدنكة عيونها مستحية، ذبيت البوشية على وجهي وهي اجت وياي طالعة بطرك الدشداشة والشال على راسها رفعت البوشي فاكة حلكي واعاين للبسها وهي انتبهت وطبت للغرفة تركض لبست عبايتها واجت وراي..
-مِــسك: لو نجيب سـعد عاد لو شاف زلمة يخاف
-لا مِــسك حرام هو امني وانتِ عبالج سـعد من يفتهم بي هنا يعوفه وميبلغ عليه؟
تحسرت ومشيت كدامها مكمشة بيدها حيل وطبيت للمطبخ وبوجهي للمنور، انداريت عليها لكيت وجهها زين مو خايفة چا شبيه انه راح اموت..
مديت راسي كوة للمنور ادوره بس ماكدر اشوف للترك البردة سادته، توترت من عبرتني وطبت قبلي مشت على كيفها وراحت للبردة وخرتها من الباب وكالت..
-راح
-متأكدة؟ دوري منا منا خاف خاتل بمكان
-ماكو مكان يختل بي راح طفر
-الحمدلله والشكر
-مو كتلج هو كال بس يرحون العسكر يطلع بس راد مكان يحتمي بي من عيونهم
عفتها ما مقتنعة وطلعت من المنور وهي وراي، وكفت بنص الحوش وهمست..
-كحيله اياچ تعيدين هالسالفة اموتج وعلي اذا لكيتج فازعة ومختلة زلمة غريب ببيتكم شني انتِ ما رايدة روحج
-لا لا التوبة ماعيدها بعد
-تعاي وياي لبيتنه كحلاء ما مرتاحة
-لا مِــسك ابوية ماكدر اعوفه
-فدوة امشي نكعده ويجي ويانه
-لا حبيبتي لا تخافين عليه والله ماكو شي شبيچ
-خوش، انه صح گلبي بعده يلعب بس لازم اروح تأخرت على البيت انتِ هم طبي لغرفتج وقفلي الباب عليج واول ما يكعد ابوج باجر سولفيله تره انه اسولف
-احجيله اكيد احجيله
هزيت راسي وطلعت من حوشهم والله ما ودي اعوفها وحدها خايفة عليها بس شبيدي، طلعت وانه اتلفت عليها وهي هم من خرعتها ما سألتني ليش اجيتها وشلون طبيت بدون لا ادك الباب.. طلعت شفت سعد واكف وعاكد حاجبه مستغرب ليش تأخرت عليه..
-كحلة جانت عدها سالفة مهمة وياي واحتاجتني
-خوش امشي يلا
-المفتاح لازم نرجعه اوكف
-رجعته بالزرعة امشي
مشيت بصفه وكل شوية يلتفت عليه يمدلي ايده ويحركها، ابتسمت وحطيت اصابعي بين اصابعه ياله ارتاح ومشى طبيعي.. ظليت مختنكة وبالي ويه كحلاء بس حاولت ما اكبر الموضوع وانسى بس شينسيني فكرة اشوف رجال غريب ببيت بت عمتي وهي وحدها مخوفتني، ابوها ينام مثل الاموات وره علاجه لو يدكون طبول يم راسه ما يكعد المسكين..
-سعد
اندار ونصى اذنه يم حلكي، همست بصوت ناصي محد غيره يسمع..
-اخذني للنهر حباب
-تأخر الوكت مسوكة لا يظل بال امي عليج
-فدوة بس شوية كلش مختنكة
تحسر ضايج وغير طريقنا على جهة النهر، كمشت بأيده حيل وضغطت بأيدي الثانية على زنده فرحانة وهو الخبيث لازم يفشلني صاح بصوت ناصي..
-ااخخ ااخخ بووية چلبة وكضت بزندي
-اني اعلمك سعيدان
-اااخ انزرفت ايدي مو اظافر تكول سچاچين
-اصلاً ماعندي اظافر يا جذاب
ضحك وجرني لجهة الحايط يمشيني لحدما وصلنا للبساتين ومناك للنهر.. انشرحت روحي من شفته وبلا شعور رفعت البوشية من وجهي وجريت نفس قوي..
-سعد: بعد بعد بس عوزچ تطيرين
-اسكت لا تضوجني
نزعت العباية من راسي وانطيتها بيده خزرني ما عاجبه ورجع حطها على راسي..
-لا تنزعين العباية
-سعد ابوي يرضى انزعها هنا لان ماكو احد بهيج وكت
-ميخالف لبسيها
ضجت ورجعت لبستها بس ما خليتها تأثر عليه لميتها هي والدشداشة على جسمي ونزعت الشحاطة وطبيت اطبش بالماي واشهك من برودته..
-تعال طبش وياي
-يمعودة لا نتأخر
-هههههه تعال تعال
ضحك ونزع حذاءه وطب وياي يطبش ما كف بنطرونه، ظلينا نلعب بالماي وواحد ينكع الثاني ونتذكر طفولتنا شكد چنه نلعب هنا اني واخواني وامي وابوي يوكفون يتفرجون علينا ويضحكون..
-سعد: مِــسك
-ها
طلع من النهر منزل عيونه واني لحكته، كعدنه على الجرف ثنينه وهو تحسر گبل لا يكول..
-كحلاء شبيها؟
خرطت العافية من جاب طاريها وخفت اكثر من نبرة صوته الهادئة، بلعت ريكي احاول ابين روحي طبيعية واللتفتت اباوع لوجهه مبتسمة..
-مابيها شي ليش تسأل؟
-هيج انسي
-لا كول شبيك
هستوه جاي يحجي وطفر من مكانه على صوت اجه من ورانه، گمنا ثنينا واللتفتنا نباوع منو وجفلت من شفته عسكري عثماني، انطيته ظهري بساع مدنكة عيوني من وكف كبال سعد وكال..
-السلام عليكم
-سعد: عليكم السلام ورحمة الله
-اعتذر اذا جاي اقاطعكم بس ردت انبهكم راح يعلنون حظر تجوال
-هاا رحم الله والديك سيادتك
من كال سعد سيادتك عرفته مو جندي عادي، ظليت دايرة وجهي بس جاي احس بحركتهم واكدر اشوف شنو جاي يسوون بطرف عيني، ابتسم الزلمة ومد ايده لسعد وكال..
-صيحلي كمال الدين
رجع صافحه سعد يحييّ بس حسيت بأخوي مستغرب ومنحرج من الرجال كلت يجوز لاني واكفة بصفه وما حب يورجني لزلمة تركي..
-سعد: چا احنه بعد نروح نترخص منك
-كمال الدين: ما تعرفنا على اسمك؟
-ها العفو اسمي سعد
-انتَ من سكان المدينة سعد؟
-اي ابوي شيخ مكي جواد الـ^^^^^
-اهلاً وسهلاً عرفت والدك الله يحفظه
-الله يسلمك ويحفظك، يلا بوية
جرني من ايدي واني على وكفتي لبست البوشية ومشيت وياه وظل كل ساع يلتفت على الزلمة مبتسم ويرفع ايده يودعه..
صار عندي فضول اشوف شكله فـ اللتفتت لفتة سريعة وما ركزت بملامحه عيني طاحت على ابتسامته الي.. خرطت روحي من لاحظته منتبهلي اعاين عليه وسعد هم انتبه وعصر ايدي بين ايده ونتر..
-عيننج عينننج
مشيت عدل منزلة عيوني وطلعنا من يم النهر مستعجلين علمود الحظر، وكفت بمكاني اتنفس حيل ما منتبهة على روحي كاتمة النفس الا من اختنكت وسعد وكفني يم نخلة خايف..
-شبيچ مِــسك شبيچ
-مابيه بس اختنكت من البوشية
-رفعيها ماكو احد
هو مد ايده رفعها الي وظل يهفيلي بيده وينفخ على وجهي انوب لزمتني كحة وهو مستمر ينافخ، دفعته مني اكح واضحك وهو يعيب ويكول..
-هاا اختنكتي من ريحة البصل حگچ حگچ
-هههههه لا ولك
ضحك وعصر خدودي اصلاً ما ياكل البصل هو، ظل واكف يخليني اتنفس على راحتي وكل ساع يتلفت يخاف واحد يتعده..
-مِــسك: صاير تاكل بصل؟
-سعد: لا طبعاً، بس لا صدك شميتي بيه ريحة بصل؟
-لا بس من كلت حسبالي اليوم ماكل
-حشى نعمة الله
-اممم، سعودي هذا منو الاجه سلم عليك تعرفه؟
-لا
-اي مو شفتك حيل مستغرب
-ولج هذا واصل بالدولة
-عليك الله؟
-والله اظن لان عنده رتب هواي اول ما شفته كلت بكلبي انلاصت عليك يا سعد اليوم انتَ واختك مخبوزين
-چا لعد ليش اجه يسلم عليك ويعرف عن نفسه؟
-مادري انه هم مستغرب ما شفتيني رأساً فلتت بيج
-ولك خاف هذا مو زين وناويله نية؟
-لا ما اظن لان عرف ابوي
-هاا
-اي، يلا امشي مو حلتلچ السوالف بالشارع
ضحك وجر البوشية على وجهي ومشينه نرجع للبيت، فرينا على جهة مشتمل شجاع حتى نسلم عليه ووكفنا ندك الباب هواي وما فتح..
-مو هنا شجاع
اندار سـعد على الرجال الصاح من وراه وضحك ضحكة عالية وراحله يسلم..
-سـعد: لك هلا بـ عـبد هاي وين الغيبة
درت وجهي متوترة من صاحله عـبد، راحله سـعد حضنه وتباوس وياه چن صارلهم هواي ما متشاوفين.. عيني يبست عليه ماشوفه زين واكف بجهة ظلمة بس حاولت اركز شكد ما اكدر معقولة هذا الملثم ابو قميص الرصاصي؟ بس شو عبالك مو هو مادري اني صايرة ثولة..
-سـعد: وين كاطع لا تجي لا تسأل لا تلتم ويانه چــفل زعلان عليك
-عـبد: شغل والله ماشوف دربي ماعول شوكت ارجع للبيت اكلي لكمة وانام
ظلوا واكفين على جهة وعيني ما طاحت منه مكابلين بعض يسولفون بالشغل واني واكفة افصل بجسمه چتافاته نفس چتافات ابو الرصاصي لو هذا اعرض، زين طوله نفس ذاك؟ استغفر الله شجان صار لو هم لابس رصاصي اليوم حتى اكدر افكر عدل..
-سـعد: يلا خوية كتلك بعد الخميس عرس بشير مو تسويلك سالفة وما تجي
-عـبد: لا اجي حتى اكل
حچاهة بضحك وسعد عافه ورجعلي يضحك حلكه مشروك من الاذن للاذن، حط ايده على چتفي ومشاني للبيت طبينه واستقبلتنه ريحة الگلي امي جاي تگلي نواشف..
-سعد: السلام على الجنة الجوه رجليچ
-فوزية: عليكم السلام يا عيني
وكف يبوس بيها ويداهرها ويضوجها ويعضها ويدغدها وهي ساعة تضحك ساعة ترزل بي، ضحكت على سوالفهم وهو شافني اضحك لو ابتليت على عمري لزمني وشبعني عض ويقرقر بيه خلاني ابجي واضحك ردت اموت لولا تدخل چــفل ورزاق طبوا للمطبخ وصاحوا بي ياله وخر مني..
-چــفل: چم مرة ابوي متوبك من هالسالفة
-رزاق: الشيخ مل گدما ينصح بي وماكو فائدة
-سعد: امشي لك انتو بس راح تموتون من الغيرة لانها ما تحبكم مثلما تحبني
-مِــسك: ولك منو كال ما احبهم مثلما احبك كلكم اموت عليكم
ظلوا واحد يباوع بوجه الثاني وكوة كاضين ضحكتهم عرفت وين راح بالهم لان امي رأساً شالت المس وصاحت بيهم..
-فوزية: كالت تحبكم كلكم لا تسوولكم سالفة
ضحك چــفل يهز راسه لا ورزاق كعد على الميز وكال..
-رزاق: اشك والله، مِــسك بشير هم تحبي؟ اذا طلعتي تحبي اتبره منج
-فوزية: كوم من الميز كووم خسفته
كام منه وظلوا يضحكون وواحد يذب حجاية على الثاني لحدما طب ابوي للمطبخ مبتسم، سلم علينا كلنا ومد ايده لواحد واحد بينه يصافحه مثل عادته لحدما وصلني..
-شلونها مِــسك الختام
-مِــسك: تعبانة والله
ضحكوا امي واخوتي وابوية فتح عيونه وايده سوه وكال وهو يضحك..
-شيخ مكي: كالعادة مِــسك شوكت ما شفتها وشافتني كالت تعبانة
-مِــسك: والله تعبانة ليش ما تصدكون عليك الله يابه جرب تشتغل من الصبح لليل غسل وكنس وطبخ وتعزيل وترتيب ومِــسج تعاي ومِــسج روحي ومِــسج ركضي ومِــسج وينج ومِــسج…
-شيخ مكي: هذا هو بابا العفو منج خاتونه حقچ كل التكولي حقچ بس سكتي
يحجي مبتسم وامي تسويلي بيدها اني اعلمج، انتبهلها ابوية وكال وهو رافع حاجبه..
-هاا ام بشير چنچ متعبة بنيتي
-فوزية: جا شعندي غيرها هي اديه ورجليه بهالبيت
هز راسه متفهم ومثل كل مرة من اشكيله عن شغل البيت يكول يجيب وحدة تساعدنا وامي تتسودن عبالك كايللها راح اخذ عليج مرة دكت ولطمت ورادت تشك زيجها الا شوية..
-فوزية: يممة انه تجيبلي مره تعزلي وتغسلي يمممة مكي تريد تسويني علج بسنون التسوه والما تسوه ويكولن عليَّ ونيدة وخوثة
-شيخ مكي: يابه لا ونيدة ولا خوثة بس البيت ما شاء الله جبير وگبل جانت مـودة وياجن وتزوجت الله يستر عليها بقيتي انتِ ومِــسك الختام خو هم تعب عليجن
-فوزية: لا لا ماكو تعب انه اشتغل كله مِــسچ بعد ايدج ما تحطيها بالبيت دامه يتعبج خلي عليه
-مِــسك: لا يمة شهالحجي شلون اخليج، باوع يابه تعرف شنو الحل؟ اني عندي الحل
-شيخ مكي: شنو الحل
-مِــسك: اخوتي يبطلون يوصخون ويرتبون غرفهم بيدهم
-شيخ مكي: وهذا خوش حل يلا يا ولد روحوا نظفوا غرفكم كدامي
-مِــسك: لا لا يابه منظفتهن اليوم اني عود باجر ينظفوهن
احجي واباوعلهم خازريني ومنفوخين راح يطكون من القهر، كوة لزمت ضحكتي من ابوية اندارلهم وشاف سـعد يسويلي بيده بسيطة بساع كال..
-شيخ مكي: هاا تتحلفلها مو شيخ سـعد؟ من اليوم شغل البيت يتوزع عليكم حالكم من حالها مِــسك شنو الشغل اليتعبج اكثر شي شمري على اخوتج
-فوزية: مكي صدك تحجي الويلاد يجون مهدود حيلهم من الشغل هم تريد تشغلهم بالبيت
-شيخ مكي: معليج ام بشير همه سباع ويتحملون
وهيج نهينه النقاش واحس روحي رفرفت من الفرح واخوتي وجوههم تلاطمت، رحت لغرفتي اضحك مكيفة ومقررة اقسملهم جدول للشغل بس مو كلشي اخلي عليهم همه هم يتعبون بالمحلات خطية صايرين حمالين ظهرهم ينكسر..
**
“فضـة”
وصلنه واثق لبيت عمو مكي وطلع ويه بشير يكمل تجهيز العرس، بالباب تلاكيت ويه جليلة هم جايبها اخوها وطبينه سوه نسلم على اهل البيت، كعدنا بالهول واشوف جليلة تلوب كامت مِــسك تجيبلنه جاي وهي اجت كعدت يمي وهمست..
-جليلة: امشي نروح نشوف باجي سوسن
-فضة: يمة منج يمة هيج كاتلة روحج على باجي سوسن
ضحكت تحرك بحواجبها وكامت گبل لا تخليني انطيها جوابي، راحت لباجي فوزية كالتلها راح نروح نشوف باجي سوسن وبنين ونرجع..
ترخصت منهم وكلت لـ مِــسك تهدر الجاي ما نطول شوية وراجعيلها، طلعنا من حوش عمو مكي وطبينا لحوشهم حايط على حايط همه حتى الباب يعوفوها مردوده علمود جهال راهي يلعبون بره..
شفنه بنين لافة ربطة على راسها وتغسل بالحوش من شافتنا ذبت من ايدها واجتنه مكيفة وجليلة اللوكية اكلتها وشربتها بالسلام خلت البنية ما تندل دربها منين..
-بنين: تعالن نفوت جوه
لمينه عبينا لا تتبلل وطبينه وياهة للهول كاعدة باجي سوسن وبيدها سنارة جاي تحوك، انخبصت بينه من شافتنا هلت وسهلت بينه وصاحت على هدى مرة راهي تجي تكعد ويانه بس اني ما ارتاحلها وكيفت من كالت بنين نايمة..
-سوسن: هلا بقداح البيت نورتن بناتي
-جليلة: نورج هذا باجي
تحجي على كيفها ومنزلة راسها عود مستحية، ماتحملت اعبرها الها وهمست واني انزع بعباتي..
-فضة: نهجم بيت البانية اول تالي تستحين
-جليلة: انجبي ههههههه اي باجي شلونكم شلونها صحتكم الولد شلونهم
-سوسن: بخير بخير الف الحمدلله كلنا زينين انتو شلونكم شوكت ناويات ترجعن للدراسة؟
-فضة: والله باجي هسة عطلة علمود ترميم عدهم فـ يجوز على اسبوع الجاي نبدي لو بعد يأجلونا على الشتا
ظليت اسولف وياهة وبنين اجت جايبة بيدها شربت برتقال حطته وكعدت ويانه وباجي كامت تعوفنا براحتنه، ندستني جليلة وترخصت تروح للحمام..
-بنين: همزين اجيتوني فضة والله روحي رادت تطك
-فضة: ليش شصاير وياچ
-بنين: مرة وسام زعلانة ويومية تكب ببيتنا امي متقبل يعوفها هناك تريده يرجعها بس احسه ميريدها اصلاً ومكيف على غيابها
-فضة: هذا اخوج هم ساطره العباس اذا ما رايدها المن تزوجها وورط البنية وياه
-بنين: اووووف فضة وهي فد تحبه تموت عليه وترحف رجف من الغيرة وهو ولا يمه عايش بغير عالم
-فضة: سكتي سكتي لا تضوجيني اكثر عوفينه من وسام سولفيلي ما ناوين تخطبون لـ سيف؟
-بنين: امي ناوية ورايده بس هو ما مقتنع
-فضة: لازم اكو وحدة ببال امج تريدها لسيف
غمزت مكشرة حلكي وره حجايتي ضحكت بنين وتربعت تعدل كعدتها، مدت راسها تباوع للباب كأن راح تكول سر وهمست..
-اي اكو وامي كالتله عليها وهو سكت ما علق
-عليج الله منو
-اكول بس ما تزعلين؟
-يااا ازعل ليش ولج سولفيلي بالعكس افرحله
-تريد تخطبج الج
لطمت على صدري شاهكة، ضحكت بنين اكثر تهز براسها اي وكملت تسولفلي..
-صار اسبوع تسولفله عنج خابصته خبص بالطبة والطلعة تحجيله تكله حلوة ومرتبة وام بيت وكد المسؤولية وبيتهم يم بيتنا شمرة عصا حتى اذا رادت تروح لاهلها ما تتبهذل بالروحة والرده
تحجي واني معدتي كامت تكلب وعيوني احسه تريد تطلع من وجهي، دهر دهرني شنو هالمصيبة ياربي وين جايني هذا يبووو جليلة تموتني والله تموتني وتموت وراي، روحها من هالدنيا سيف تعشگه بخبال حتى حلم تتحلم بي..
-بنين: ها فضة شتكولين
-فضة: لا داده لا عفية لاا اني اصلاً ما افكر بالزواج ابد ابد اصلاً ماكدر اعوف واثق وخواتي محد الهم غيري لا تفكرون بيه اصلاً ولا تسولفوله عني
-بنين: ولج ندري بيج انتِ المهتمة بأخوانج بس احنه جوارين متلحگين تشتاقيلهم
-لا لا بنونة عليج الله سدي الموضوع ولا چنچ فتحتي وياي ولا تحجين لاحد امانة اذا تعزيني هالسالفة تنسد مو قصور بأخوج بالعكس رجال والنعم منه والف بنية تتمناه بس ما مفكرة بالسالفة شوفوا غيري
-غيرج منو عندج وحدة ببالج؟ لا تكولين مِــسك لان لو تموت متوافق خاطبيها من قبل مرة لوسام وحتى لسيف امي ذبت حجاية لباجي فوزية واعتذرت منها كالتلها مِــسك متقبل تتزوج
-خطبوا جليلة
صفنت بوجهي ساكتة ما حجت شي، جريتها من ايدها اقنع بيها واصبغ بجليلة وما ملحكة..
-فضة: والقران تخبل طول جسم جمال شعر رتابة نظافة كشخة ولج والله بس يشوفها يتسودن عليها جليلة بس عيونها كافية تصفن
-والله هي جليلة تخبل واموت عليها اني بس..
سكتت مستحية متعرف شتكول، رجعت تباوع من جهة الباب تخاف لا ترجع جليلة وتسمع واني عيوني تعلكت على حلكها من كالت..
-امها فضة امها واخوتها مصيبة راهي يسولفلنا عنهم يكول بيت شر ويدورون مشاكل وطلايب وسيف ما يتحمل هيج هو يريد حياة هادئة سكينة لا مشاكل ولا وجع راس وهذا السبب امي تريدج اله
-لج هي تختلف عنهم والله العظيم البنية متشبه امها اصلاً جليلة….
سكتت بسرعة من سمعت صوت سيف جاي من المطبخ ورجعتلنه جليلة تركض فرحانة واني ادري فرحتها هاي لان اكيد تلاكت وياه وشافته، كعدت بصفي تباوعلي وتباوع لبنين وتوزع ابتسامات مكيفة سودة بوجهي شگللها شلون افهمها العاشگته وميته على حروف اسمه يردون يخطبوله اقرب صديقاتها….
**
“رجــب”
طبيت للبيت دايخة وتعبانة ما صدكت شوكت ظلمت الدنيا اريد بس احط راسي على مخدة وانام واستقبلتني امي من الباب..
-صولاغ: شو ذولة بعد ما رجعوا ولج؟
-رجــب: مادري يمة
-لازم مسويتلج فد مكسورة والزلمة چزت روحه منج؟
-يمة شمسوية شو كاعدة وساكتة هنا يمج
-صايرة تراددين ولج رجيبة!!
سكتت بدون لا اجاوبها اذا احجي حجاية لخ تسويلي عركة، نزعت العبايه من راسي ودنجت انزع الحجل من رجلي وطفرت على صوت ايدها تضرب باب المطبخ حيل..
-مو وياچ اني!!
-رجــب: ها يمة مو كتلج لا طالعة ولا طابة وماعرف ليش الخطابة ما رجعوا يجوز ما عجبت الرجال عادي
-شنو شنو؟ ما سمعت؟؟ ما عجبتي الرجال؟؟ حاصله ياخذ هيج بنية ترد العافية شوفتها
-يمة انطي مجال اذا قسمتي يرجعون
هزت راسها اي متحلفة وتعصر بأصابعها حييل، دعيت من كل كلبي الخاطب الي البارحة اجه وشافني شوفة شرعية يرجع يخطبني بس حتى اخلص..
-صولاغ: وين وين شو نزعتي وين العجين؟
-رجــب: ماعدهم يمة افتريت على كم بيت كلهم مخلصين
-تخلقيلي
نزلت راسي ساكتة ماعرف شسوي اخاف اتحرك لا تسمع صوت زايد وتضوج اكثر واخاف لا اجاوبها لا تنزعلي شحاطتها اليابسة..
-صولاغ: امشي ولي دبريلنه عجين ولا ترجعين للبيت بدونه فهمتي لو لا
-بس…
-شنو بس ولج؟؟ شنو بس؟؟ شنو بس
-ولا شي والله ولا شي هاي طالعة هسة
لبست العبايه مرة اللخ وركضت كدامها اطلع اشوف منين اجيب عجين، ذبيت البوشية على وجهي وطبكت باب الحوش وراي وظلت عيوني تراقب الفرع شلون لو مرت دورية هسة وسوولي شي.. الدنيا هندس طير ماكو بالشارع شنو من گلب مطلعتني بهالوكت علمود عجين خبز..
عبرت چم بيت الرحتلهم گبل شوية و تنازلت ودگيت باب جوارينه ام عدنان المرة الخطبتني لابنها النذل گبل فترة وامي طردتهم من بيتنا بعركة، طلعلي عدنان عاكد حواجبه معصب حگه يعصب منو يدگ الباب هالوكت غير العسكر..
-السلام عليكم
-عليكم
-اگلك خوية خالة ام عدنان موجودة؟
-منو انتِ
-بت جوارينكم
-يا جوارين بالضبط
-بيت الثالث على ايدك اليمين
-ماعدكم اسم؟!
-هم يسمونه هيج
گلب عيونه ضايج ووجهه عصب زيادة، تچه جسمه على الباب وگال وروحه طافرة..
-من يا بيت ولج انتِ وشعندج طالعة بهالليل وحدج؟!
-راح تصيح لامك لو لا؟
-رفعي النقاب اشوف وجهج
-شيخصك بوجهي يوووه وخر
عفته واكف ودرت وجهي جاي اروح وفزيت من جر عباتي من وره حيل ونتر بيه..
-منو انتِ ولج!
-هدني
-منو انتِ احجي
مد ايده غصب ورفع البوشيه من وجهي وتغيرت علومه، تغير وجهه الحقير وتغيرت ملامحه المعصبة واستبدلها بملامح احقر واوصخ..
-رِجــب!
-لك هدني
-هههههههه شوف شوف منو اجتني
ضربت ايده ودفعته مني شكد نذل شكد حاولت ما اخلي يعرفني بس حقير من يوم يومه وعينه وصخة وما يهتم لا لحرمة مرة ولا لأحترام بشر، على صوتنه طلعت امه وطلعوا الجوارين خرب وكتها شنو واكفين وره الباب ذولة!
-ام عدنان: شكو شصاير
تسائلت امه وتسائلوا الزلم الطلعوا من بيوتهم وعدنان واكف يتفرج مبتسم، الله لا يوفقك يا عار الزلم شلون موقف خلاني بي منو راح يصدك اجت بنية شابة وحدها تاخذ من بيتهم عجين بهالليل..
-رجــب: اجيت اخذ عجين منج خالة امي تكول ماعدنا طحين وبلكت اللگه عدكم شوية عجين للخبز
-ابو حيدر: جاية بهالليل حتى تاخذين عجين؟
-ابو وفاء: ههههه حلوة هاي النكتة
-ام عدنان: روحي يمة روحي ماعدنا عجين
كوة لزمت روحي ما اتعارك، هزيت راسي بهدوء وعفتهم ورجعت لبيتنا اول ما فتحت الباب لكيت امي واكفة وبيدها سعفة نخل مكطعة السعف منها وباقية الجريد عبالك منتظرتني ومتأكدة ما راح اجيب شي وياي.. حلگي ما فتحته لا بررت ولا حجيت ولا ذكرت الموقف الصار گبل شوية لا تصير كتلتي عمل شعبي اليوم..
-ما جبتي وياچ شي مو؟
-ما لكيت يمة
-ما لكيتي؟ خوش ما لكيتي.. خوش.. خوش حجي خوش
نزلت دمعتي وطبيت للبيت اركض، ما لحكت انزع العبايه من راسي وانجلدت بأول جريد (العودة)، صحت متوجعة وركضت اشرد بالمدخل واجت تركض وراي..
لبدت بالزاوية ابجي واتوسل بيها تعوفني بس ما سمعتني ولا رفلها جفن..
-رجــب: يمة فدووة والله اجيبلج هسة اطلع لبيت جليلة يمة فدووة عوفيني يمة
-صولاغ: وصمممة وصمةةة ولج بلااااء انتِ على گلبي بلاااااء ياربي شنو هالبلية ليش انطيتني بنييية ياربييي ليييييش
-اااخ يمة لاا اااخ عيني يووم بداعة وحيدج عوفيني
كلما اصيح تضربني اكثر لحدما تكطع الجريد على جسمي وانقسم نصين، بجيت مخنوگة اخاف يطلع صوتي وتذبحني بس ما يفيد وياهة شي حتى لو ساكتة تكتل لحدما تتعب وتعوفني..
-بت الجلب الله ياخذج ربي امانتك اخذها ماريدها اخذ هالبنية وخلصني منها لاا اذبحها واخش بخطيتهاا
-يمة
-لا تحجين لااا تحجين
لزمتني من شعري تهلس بي احس نصه صار بيدها، تشيل شعري وتركع راسي بالحايط وتضرب حيل على صدري ومتوني متت طلعت روحي حتى نفسي ضاع وعيوني انطفت ماشوف بيها..
-ولج يمة وينج يمممة
شهكت خايفة من سمعت صوته، صوت اخوي مضحي صخام الصخم حالج يا رجــب رحتي بين الرجلين اليوم، وخرت امي عني واللتفتت عليه تأهل بي وتحرك بيدها وتسهل..
-صولاغ: وهلا هلا هلا هلا هلا بالجاي لينا ومرحبا هلا بهالطول هلا هلا بهالحسن هلا بهلي وريحة هلي هلا بوليدي ووحيدي
-مضحي: يا هلا يا لطام بعينج وعينها بتج شمصخمة ولج يمة
-صولاغ: اي يبعد امك ما خبزت اليوم وجاي اكتلها والله
-مضحي: خبز شنو؟؟ بنات الجلب بتج فضحتنا رايحة لابن ام عدنان تتمضحك وتتماوع عليه تكله ليش ما ترجع تخطبني من اهلي بلكت ينطوك اليوم انعل والديها واطيح حظج وياهة
بجيت ميتة خوف اچلب بدشداشة امي من جوه اتوسل بيها تصده عني بس ما اهتمت ورجعت تكتل بيه واجاني مضحي نزع نعاله وگطعه على ظهري خلوا صريخي يوصل لسابع جار، تعبت امي ووخرت عني راحت وعافت مضحي يمي لصم حلكي واخذني يسحل بيه من شعري يجرني للغرفة.. نزلت على رجله ابوسها واتوسل..
-بروح ابوك عوفني بروح اهلك بداعة الله عوفني ابوس رجلك راح اموت
-مضحي: اني اريدج تموتين.. وينننج يمممة
-صولاغ: جاية يمة جاية
-رجــب: لا لا فدوة اروحلكم لاا يمة حرام عليج يممة لااااا
اجت وبيدها التالو (شمع حيواني) طفرت من رجلين مضحي وركضت للمطبخ ولزمتني من شعري وشمرتني بالكاع.. چتفني مضحي وهي اجتني ظليت ابجي وارافس برجليه اخاف من التالو ماريدها اخاف..
-مضحي: يلا فضيها لا تتفهين
صحت من غمج روحي من مدت ايدها جوه دشداشتي وطفت الشمعة بظهري.. احس بروحي راحت والنظر طفى عندي ما احس بشي بس بصوت مضحي وهو يضحك ويكول لامي يشعلها مرة ثانية وتطفيها بيه بعد.. من تعب الكتل وروحي الي اشتعلت بطفية الشمعة استسلمت الهم وبعد ما حسيت..
فزيت الصبح على صياح امي ويه مضحي، تلفتت لكيت روحي بالمطبخ بعدني محد شايلني وماخذني للغرفة..
ظليت بمكاني مابيه اكوم واسمعها تصيح وتفشر وهو يرجعلها الفشار والمسبات ويغلط عليها وعلى اهلها وعلى عشيرتها كلهم، مافتهمت شنو سالفتهم الا من كالت امي..
-وين الذهب والفلوس مضحي المن اخذتهن؟؟ المن احجيي ليش الصندوك فارغ احجيي
-مضحي: جاي اكلج ما اخذت بت الكلب مااا اخذت
-صولاغ: جذاب جذاب الصندوك فارغ قطعة ذهب مابي وين وديته وانتَ سكران طافي وييين؟؟
-مضحي: مو كلتي فاتنة باكتهن؟ شو تغير حچيچ هسة
-صولاغ: جذب ولك جذذب ما باكت شي تتصور فاتنة النص عقل تكدر تبوك كل هالفلوس والذهب؟؟ سولف ليا ساقطة اخذت فلوسي احجييي
-مضحي: وخري من وجهي لا اطلع كل قهري بيج وخري
صاحت امي تبجي واسمعها تدك على صدرها ووجهها وتدعي على روحها وعلى ابوية الله يرحمه كل دعاء يكزبر الجلد ويوجع الكلب.. عافها مضحي وطلع من البيت وحسيت بيها اجتني للمطبخ بساع سويت روحي بعدني نايمة..
فزيت على ضربة قوية صارت براسي، فتحت عيوني واشوفها واكفة كبالي تريد تكعدني..
-صولاغ: كومي شبيچ فضيها
غطيت عيوني بيدي استوعب الوجع المو طبيعي بجسمي بس ماعرف وين بالضبط، انكلبت على ظهري وصحت شايغة روحي من فطنت الوجع جاي من حرك ظهري..
-رجــب: اااخ يمة
-وصمه انتِ تعاندين تستاهلين الكتلة
سكتت ما جاوبتها وكوة سندت روحي على ايدي وكمت من الكاع وهي واكفة وتتحسب على ابوية وتلعن بي وبيه وبروحها مضحي ولا تدعي عليه ترجف رجيف تخاف لا الله يعاقبها بي..
-صولاغ: الذهب والفلوس راحن ولج رجيبة راحن
-ااخ شلون
-اخوج الاثول يجوز منطيهن لوحدة وهو سكران ما حاس وناسي
-يجوز انباكن؟ اول البارحة مو شفتي وحدة من نسوان بيت جليلة تنط على بيتنه؟
-ما يبوكن ذني صح ساقطات وبنات شارع بس ما يمدن ايدهن ويسرقن شي
سكتت ما جادلتها وهي بقت تنوح وتلطم ساعة على وجهها ساعة على صدرها وخدودها ميتة قهر ودموعها تجري منهارة..
-صولاغ: اااخ يا يمة انلعب بحالي وضاع حلالي
-رجــب: شفتي ابنج الشفيه؟ هذا التزامطين بي ووين ما ترحين تشهكين بأسمه ضيع حلالج الله يعلم بيدمن ضيعه
خزرتني ما راضية بس كلبي مورم منه هالسكير النذل، مسحت دموعها بيدها ونترت بيه..
-حضري نفسج نروح لبيت عمج مكي بلكت هو يساعدنا
-رجــب: شيسوي عمو مكي يروح يدورلنا على الفلوس لو نكدي منه ينطينه
-سكتي معليج انتِ
-ماروح
-اي مو هو بكيفج
-ماريد متوجعة ومزوركة شعندي رايحة وياج حتى انفضح كدام البنات؟
-انجبي وولي بدلي
غمضت عيوني ميتة قهر منها وطلعت من المطبخ رحت للحمام غسلت وطلعت لغرفتي وفتحت الصندوك اختارلي لبس وسمعتها تصيح من الحوش..
-كشخي بأحلى شي عندج بلكت يشوفج بشير وياخذج
-اووع
همست لعبانة روحي وطلعتلي نفنوف طويل ومخصر بس حرت شلون اللبسه والحرك يسعر بروحي، بجيت ومسحت دموعي وصحت من مكاني بجزع..
-ماكدر اللبس وجع بظهري راح امووت
شوية وطبتلي للغرفة تدردم وبيدها وصلة ومحلول تعقيم، مسحت دموعي وكالت تمددي على بطنج، لبست بجامة جوه ملابسي وصعدت الدشداشة اطلع ظهري وتمددت وهي اجت تعقملي الحرك واحس بروحي تريد تطلع من الوجع..
-رجــب: كاافي كاافي ماريد يمممة
-وصمه لو ما مستهترة ما يحركج هيج
-ما سويت شي والله ولا حاجيت عدنان هذاك الجلب جذاب بعده ميت قهر ليش رفضناه
-اي يلا لا تلغين
سكتت بس ابجي وارفس برجلي كلما كشطت الحرك، روحي انمردت وگلبي يرفرف مثل الطير المذبوح انتهيت وهي مستمرة تعقملي وتلفه بالوصلة..
-كومي خلصت
-ماكدر
غمتني براسي وكامت طلعت من الغرفة وعافتني وحدي وبعد ما اجت حتى نروح لبيت عمو مكي، بجيت بحس مبحوح وعضيت على البطانية وصحت بكل صوتي اطلع الحركة الي بكلبي والقهر الخانكني..
ثاني يوم من الصبح اجتني تلوب عرفتها ضايجة من الخطابة الاجوني ليش ما رجعوا جواب عفتها تفتر بالهول وشردت اسوي ريوك.. ثالث يوم العصر لابت بعد الا هسة تكومين حتى نروح لبيت عمي مكي مادري شبيها شايشة عليهم كاتلة روحها تريد تروح..
-هااا بدلتي؟
كمت كوة على روحي ويه صوتها جاي من الحوش ادري اذا ما كمت وياهة تلعب بيه فلك، بدلت هدومي ومشطت شعري وعفته مفتوح، باوعت لوجهي تعبان كلش جريت ديرم حطيت خفيف لشفتي وكرصت خدودي وتكحلت واخذت عباتي ورحتلها..
لبسنا وطلعنا بعدنا بالطريق نمشي وشافت صاحبتها خرب حظي شلون عرفن بعض وهنه منقبات، وكفن يسولفن بنص الشارع لا ساعة ولا ساعتين واني شايلة رجل وحاطة رجل..
-صولاغ: والله رايحة هسة لبيت حماي شيخ مكي
-ها علمود حنة بشير؟
-صولاغ: منو بشير
-بشير ابنهم الجبير شبيچ
-صولاغ: لعد شنو حنته مافهمت
-معقولة ما تدرين باجر عرسه؟
صفنت امي ومن صفنتها عرفتها مصدومة صدمة عمرها، كوة على روحها ضحكت وكالت..
-هااا بشير ابن شيخ مكي والله عبالي تحجين ببشير ابن ابو وسام
-هههه لا داده دنحجي على ابن حماج شودانه لذولاك
ضحكت امي تجاملها وترخصت منها وجرتني من ايدي بكل حيلها، ايدها نار صخنت من الخبر تمشي وتعت بيه واسمعها تدردم بس ما افهم شتكول لان صوتها ناصي..
وصلنا لفرعهم وبعد ماكدرت تظل تمشي صارت تركض واني بيدها اروح منا واجي منا واتلفت مستحية لا يجي احد ويشوفنا بهالحال.. وكفت بباب حوشهم لكتها مفتوحة دفرتها برجلها حيل وطبت، رفعت البوشية من وجهها واشوف وجهها مصبوغ احمر دم وعيونها ناطة..
-رجــب: يمة
ما جاوبتني وطبت تلاكت وجه بوجه ويه بشير وامه واخوه رزاق وعمة نرجس هم واكفة، ضحكت بالجذب من شافتهم وصارت تهوس بعبايتها وتكول بعلو صوتها..
-صولاغ: كللللوووش كلللووووش كلللوووشش الف الصلاة والسلام عليك يا رسول الله محمد كللوووشش
طبيت البيت مدنكة من الفشلة حتى البوشية ما شلتها من وجهي، محد بيهم حچه شي چنهم مصدومين من امي وجيتها..
-صولاغ: صلوات على النبي ويا عوينه تجنبي وصلوات على النبي.. مبروك مبرووك يا بعد روحي مبروك
راحت لعمة نرجس وباجي فوزية تسلم عليهن وتبوس وتهلهل ويه كل حجاية ولزمت رزاق هم تريد تبوسه بس ما رضا وجرت بشير من خده باسته حيل بوسة ام الصوت وهو بساع وخر منها يمسح مكان البوسة..
-عمة نرجس: هههه هلا بيج خية ام مضحي والله من تأخر الوكت كلت ما تجي بعد
-صولاغ: ياا ياا يااا اني ما اجي؟ عيب عليج نرجسه شلون افوت عرس الغالي ابن الغالية
-فوزية: الله يسلمج خية
-صولاغ: بس ما كتولي على عرسه فوزية لازم العروس تكسر الوجه؟
-بشير: خير؟؟
-فوزية: شني تكسر الوجه صولاغ؟ تتوقعين ازوج بچري وحدة ما بيها خير؟
-صولاغ: شمدريني داده كلت ما عزموا مستحين من الماخذيها
-بشير: شو انتِ ما تعرفين تسولفين ولج صوچ امي الملفيتچ ببيتها
-صولاغ: لا يمة مو قصدي بس لان محد عزمني اجت افكار سودة براسي اعذرني يبعد امك
-نرجس: هههه لا عيني اني نسيت انطيج خبر خطية ام بشير كالت عزميلي صولاغ ما كدرت تجيچ خطية ملتهية
-صولاغ: هااا مو اكول فوزية ام الاصول ما تنسى تعزم مرة حماها
سكتت باجي فوزية ما جاوبت وعمة نرجس اجتني بوستني وكالت..
-طبي ويه البنات جوه حبيبة عمتج كاعدات بغرفة مِــسك
-صولاغ: شيلي البوشية من وجهج رجــب
وخرتها من وجهي وطبيت جوه للبنات لكيتهن كلهن كاعدات يتعدلن ويتزينن وبس شافني كلهن سكتن.. حسيت روحي غريبة بوسطهن بس ما بينت ونزعت العباية بالباب وطبيت سلمت..
-انيسة: عليكم السلام هلا رجــب شلونچ حبيبتي
-رجــب: زينة الحمدلله
طبيت بوستهن كلهن وعبرت جليلة الحقيرة واخير وحدة رحتلها مِــسك واستغربت من استقبلتني بأبتسامة وكالت..
-تفضلي كعدي ويانه
كعدت وياهن بس بعدها الغربة محاوطتني وجليلة كل ساع ذابتلي حجاية تسممني..
-جليلة: شعجب صاير عندج شخصية وما مقلدة نفنوف مِــسك
ضحكت فضة وكوة كتمتها والباقيات ظلن ساكتات واني هم غلست عليها هالنذلة ولا اجاوبها، رجعت كالت..
-جليلة: هاا هاا تذكرت لازم ما لحكتي تبوكين النفنوف لان ما تدرن بالعرس
-رجــب: ندري بالعرس وانعزمنا هم
-جليلة: يمة الجذب يمة
-انيسة: جليلة كافي
-جليلة: كليلها تبطل جذب وتكوم تولي منا
-رجــب: نجبي ادبسز اني ببيت عمي انتِ الدخيلة الجاية هنا
-جليلة: امشي لللج بت صولاغ الصايعة
-رجــب: اطيح حظج جليلة
تكامشنا وحدة كفشت الثانية وانيسة والبنات بيناتنا يفاككن بينه، لزمني مِــسك وبنين يجرني بعيد وذيج بعدها تهد وتغلط وتسب بيه وبأمي..
-جليلة: والله الحشيمة بس لابوج الله يرحمه خالي رسول والنعم منه شلون رجال مرتب حرامات عليه خلفته كلهم خياس
-رجــب: نجبي لا اجي افرك حلگج بقندرتي يا طايحة الحظ
-انيسة: ولجن كافي ما تستحن انتن!!
صاحت بينا واخيراً ذيج الچلبة انردت وسكتت واني هم سكتت لخاطر انيسة، رجعت جليلة تكعد بمكانها ولزمت المراية والكحل بيدها تكحل عيونها وتكول..
-جليلة: خلوني اتكحل واتحمر وانعل ام الخربت مزاجي
هستوني جاي اردها واجتني انيسة تسكتني وتمسحلي على وجهها عود مسحيها بوجهي، اختنكت منهن لبست عباتي وطلعت من الغرفة رحت للمطبخ غسلت وجهي ومسحت جوه عيوني خاف الكحلة سالت..
وكفت وحدي شوية اهدي روحي لا اروح اطلع حركتي بجليلة، ضميت شعري جوه العباية عدل وطلعت من باب المطبخ وصرت وجه بوجه ويه زلمة صفنت بوجهه وهو صفن ثواني ونزل عينه عني ووخر يوكف على جهة..
طلعت اركض ارجع لغرفة البنات بس ظليت اتلفت واعاين وهو ابد ما دار وجهه بعد طب للمطبخ وظل هناك، صفنت استذكر هذا منو شايفته من گبل بس ما جاي يجي على بالي.. رجعت للغرفة وكعدت بصف انيسة وهمست بيني وبينها..
-اكلج منو من الولد بالبيت؟
-انيسة: بس اخوان مِــسك
-هاا اي شفت رزاق وبشير بس گبل شوية صرت وجه بوجه ويه واحد ماعرفته منو
-شلون شكله؟
-شعر لرگبته وسرح لونه جوزي وشوية جسمه خشن..
-هاا هاا هذا چــفل
-صدك هذا چــفل؟
-اي
-ولج شلون صاير متغير كلش ما عرفته
-ليش شوكت اخر مرة شفتي؟
-مادري گبل اربع مدري خمس سنين ابد ما اتلاگه وياه من اجي هنا
-اي لان دوم بالمحلات ما يلفي بالبيت هواي
سكتت وظليت اباوع للبنات شلون مكيفات ويجهزن بنفسهن علمود الحنة بالليل، شوية واذن المغرب وبدوا اهل باجي فوزية يجون وانترس الحوش بيهم محد بيهن اجت مبوشة كلهن كاشفات وجههن استغربت وسألت انيسة مرة اللخ..
-اكلج ليش اهل باجي فوزية ما مبوشات؟
-انيسة: لانهم جنوب والجنوبيات مو كلهن يتبوشن
-لعد شمعنى احنه مبوشات؟
-لان احنه بنات الوسط
-شسالفة شنو الفرق
ضحكت وعدلت كعدتها وشرحتلي على كيفها..
-باعي، عدنا بنات الجنوب ذيچ من ذيچ التتبوش من وره شغلهم وطبيعة حياتهن زرع وفلاحة وتعب ما يكدرن يسون كل هذا بالبوشية اما بنات الوسط الخاتونة تنعرف من بوشيتها واصلاً عدنا عيب البنية ما تضم وجهها وشكلها ينشز بين الباقيات حتى لو جانت ما محجبة
-هاا واني اكول ليش المسيحيات واليهوديات هم لابسات عباية وبوشية
-اي لانهن خاتونات
-الخاتونة هي بت العز مو؟
-اي تقريباً، الخاتونة هي المرة المحترمة والي الناس يستحون يصيحون بأسمها، يكون ابوها او اخوانها معروفين والهم اسم وجاه مهم بالمكان الساكنين بي والناس مسويتلهم قيمة فـ يصيحون لنسوانهم “خاتون”
قاطعها دخول خالة مِــسك لزمت انيسة تبوس بيها وتهوس وياهة وتهلهل واني بس صافنة عليهن، عجيبة هالبنية شلون هيج الكل يحبها ويريدها تكون حاضرة بكل مناسبة وبكل كعدة وكل عرس..
شفت امي تخزرني من بعيد حتى اكوم اهوس وياهن بس موجوعة ومالي واهس لشي، ما ادري بروحي مبين على وجهي مطنكرة الا من اجتني تركض وتگرص بيدي گرصات شلعت بيهن لحمي..
-صولاغ: فكي وجهج لا تظلين مطنكرة لا تشمتيهم بينه
-رجــب: ليش يتشمتون بينه
-صولاغ: لان ما صارت قسمتج ويه بشير بس ميخالف نشوف چــفل بداله
-يمة شو انتِ مينعرفلج مو تنوحين على ذاك الخطبني شو هسة متردي؟
اندارت تخزرني سكتت بسرعة قبل لا تفشلني هنا وتسويلها سالفة كدام النسوان، عوجت اصبعي بيدها وهمست بنتر..
-تجيبين ذاك العثماني لولد عمچ مكي؟ ولج ما يجي لاظفر من اظافرهم
-ماريد أي واحد بيهم
-انچبي حاصلچ تاخذيلج واحد منهم
سكتت كوة على روحي والحمدلله من اجتني بنين اشرتلي اروحلها، كمت بسرعة وياهة وجرتني تصعدني فوك وتضحك ماعرف شعدها، همست بصوت ناصي بيني وبينها..
-جاي تسمعين صوت الزلم بره؟
-اي سمعت من گبل شوية
-بدت حنة العريس وصعدن البنات كلهن يباوعلهم من السطح تعالي ويانه نشوف
ابتسمت اهز راسي فرحانة لان كلتلي حتى اروح وياهن، صعدنا الدرج ووكفت اراقبهم من فوك الحايط ويه البنات الاجواء تخبل والولد كلهم لابسين دشاديش ويهوسون لبشير وواكفين دوائر كل مجموعة سوه..
ضحكنه كلنا عليهم شلون اللتموا على واثق وشالوا من ايده ورجله يهوسوله “يوم الالك وثوقي” وهو يشمر برجله ويوكع شحاطته على سـعد وبلال.. ما لحكت اتونس بشوفتهم لان صعدتلي بنية صغيرة تكول..
-منو بيجن رجــب امها تريدها
عفتهن ونزلت اشوف شتريد، تلاكينه يم الحوض شفتها واكفة وعيونها حمر حابسة دموعها وترجف، خفت من شفتها بهالحال ومديت ايدي اللزم ايدها وهمست..
-يمة شبيچ صاير شي؟
-عمج الچلب فشلني وما قبل ينطيني شي
-رحتي لعمو مكي؟
هزت راسها متحلفة ومسحت عيونها بشيلتها، انقهرت واستغربت بنفس الوقت عمو مكي ماكو يوم احد طلب منه شي وما ساعده شعجب فشل امي..
-يمة يمكن اكو سوء تفاهم والله عمو مكي ماكو منه
خزرتني متقبل ابررله وظلت تاكل بروحها وتعض على اصبعها متحلفة وتكول..
-لوما حركت گلبك وبچيتك دم يا مكي ما يطلع اسمي صولاغ
سكتت ماعرفت شكول وبقيت يمها جوه ما صعدت بعد يم البنات، دك گلبي بخوف من راحت جابت عبايتها وبوشيتها وطلعت من بيتهم ركضت وراهة اريد اسألها وين رايحة ودفعتني رجعتني جوه ونترت..
-طبي ما اتأخر
عقلي ظل يمها وايدي على گلبي، بده الوكت يتأخر واني على وكفتي بالحوش انتظر رجعة امي، نزلن البنات من فوك يفرشن للنسوان كلهن بياتة اليوم لان جايات من مناطق بعيدة ومو مال يرجعن باجر للعرس..
-عمة نرجس: رجــب وين امج؟
-رجــب: راحت بشغلة هسة ترجع
ويه حجايتي انفتحت باب الحوش وارتاحيت من شفتها امي جاية وبيدها بقچة، رفعت البوشية من وجهها وكالت بضحكة لعمة نرجس..
-صولاغ: ها عيني نرجوسة جبت نفنوف رجــب من البيت وتلاكيت ويه اخوتي خطية جايين يردون يشوفوني ما يدرون باجر عرس بشير عاد كلتلهم يرحون لشيخ مكي يأدون الواجب ويباركون
-عمة نرجس: زين تسوين عاشت ايدج
ابتسمت امي تهز براسها وجرتني وياهة تمشيني بصفها وتهمس بنتر..
-منو حس على غيابي غير عمتچ؟!
-محد بس عمة نرجس سألتني عليج
-خوش طبي نامي يلا
-شعدنا بايتات هذا وينه بيتنا
خزرتني واشرتلي بعيونها اطير من وجهها، ما ناقشتها زايد ورحت وين البنات ملتمات كلهن بغرفة مِــسك، شفت فراشات ممدودة اخذت مخدة ونمتلي على واحد هستوها جاي تغفى عيني وفزيت مخترعة على وجه صاير بوجهي خازرني..
-جليلة: هذا مكاني كومي
-رجــب: ولي نامي بغير مكان
-جليلة: وعلي اللعب جولة كومي
-رجــب: يا يمة شكد نحسة هاي البنية شبيچ بابا شبيچ الله يشفيج
طبت امها للغرفة وشافتنه ثنينه مخنزرات على بعض عبالها تكامشنه وبدون لا تفتهم شي ضربتني راشدي غلطت عليه وسبت ابوية..
-رجــب: اكص لسانج لو جبتي طاري ابوية والله العظيم
-ولي ولي الدايحة بت صولاغ
حجاية مني حجاية منها كبت مرة الثانية وتدخلن النسوان وامي هم اجت هستوها جاي تمد لسانها تتعارك وصاحت بيهن بيبية مِــسك (ام امها) لصمت الكل على حلكه وهي مبينة من ذني النسوان الچحنتيات المدگدگات وبيدها عوچية خشب متينة رفعتها وهددت الكل..
-بعلي الاهيس صوتها اچفص بفادها ازوعها حليب امها
سكتن كلهن وبسرعة تفرقن وامي جرتني خلتني انام يمها وايدي انمردت مرد من تكرصها وتهديداتها خلتني حتى بالنومة احلم بيها..
**
“بـنين”
رجعت لبيتنا علمود فلوس سيف عازل اجار المحل وحاطهن على گلبه وفلوس چــفل ورزاق هم عنده ضمهن من عرفوا النسوان راح يباتن بغرفهم..
شكد چلبت بيه باجي فوزية ابقى ويه البنات بس من كلتلها على الفلوس عافتني اروح، دورت على مفتاح باب غرفة سيف ما لكيته رحت لامي اسئلها عنه لكيت نسوان كاعدات يمها جايات من بيت عمو مكي من شايفات المكان ما مكفيهن اجن يمنه وقسم نامن بالهول وقسم بغرفتي بس غرف الولد امي ما رضت وحدة تطبلهن..
طلعت هدى مرة اخوية راهي من الغرفة ضايجة وتنافخ ما عاجبها الوضع والهوسة، شدت راسها بالربطة وكالت..
-هدى: شنو هالهوسة الجهال موتوني ياله ناموا
-بنين: خطار علمود عرس بشير
-هدى: واحنه شكو لو ابتلينا بيوتنا حايط على حايط
-بنين: يا ولج الناس لبعضها شنو السالفة
هزت بيدها ما عاجبها ورجعت لغرفتها، رجعت لغرفة سيف محتارة الفلوس هنا شلون اخليهن وانام بغرفتي امي متقبل اعوف النسوان وحدهن هناك.. رجعت لـ هدى دكيت الباب عليها طلعت لابسة دشداشة نوم..
-بنين: هدى راح اجيبلج امانة ضميها يمج بالغرفة وانتبهي عليها
-هدى: امانتيش؟
-فلوس سيف وولد عمي
-هدى: لا لا اني معليه بنين اخاف يصير شي وسيف عزيز ماريد تصير مشاكل بيناتنه
-بنين: لعد وين اوديهن والله حرت
-هدى: وديها لمرة وسام لو ذيج على راسها ريشة
-بنين: من رجعها وسام من بيت اهلها الصبح لحد هسة هي ما طالعة من غرفتها قافلة على روحها كسرت الباب عليها ما فتحتلي
-هدى: ختولي شكد تتقنعر
حدر الباب هلبت ظلچ يكسره..
━━━━━━ ⚔︎ ━━━━━━
“مِــسك”
فركت وجهي بيدي متوترة ولميت العبايه على جسمي وطبيت، مشيت بطيء وكلما اتقرب من فتحة المنور الثانية الي توصل للترك گلبي يدك اكثر، توترت سميت بسم الله وشلت البردة المغطية الفتحة وشهكت من غمج روحي واني اشوف كحلاء واكفة منطيتني ظهرها وكبالها واكف زلمة لابس شفقة اجنبية..
من الصدمة رجليه ما شالتني بعد ردت اطيح وسندت روحي على الحايط، انتبهلي الزلمة وتغيرت علومه وبنفس الوكت اندارت كحلاء تعاين عليه وفكت عيونها..
-كحلاء: مـ.. مـ.. مِــسك
الكلمة متطلع من حلكها ووجهها صار اصفر، كوة عليه وكفت عدل وركضت عليها جريتها من ايدها اطلعها من المنور ارجف رجف وهي ترجف وياي ودموعها تنزل وحدة وره الثانية..
-كحلاء منو هذا كحلااء ولج ولج يمة ولج منو هذاا
طلعت من المنور وركضت طلعتها من باب المطبخ اركض اريد اخذها واطلع لسعد ابلغه اكو رجال غريب طاب لبيت عمتي وكحلاء ما رضت ظلت تجر بأيدي وتهمس..
-ابوية هنا مِــسك ابوية
-اي وينه وينه امشي نكعده امشي ولج تصخمتي امشي
-لا مِــسك اوكفي اوكفي افهمج صبري عليه
نترت ايدها مني تختض كلها واني احس بروحي راحت من الخوف، وكفت اعاين عين عليها وعين على باب المطبخ اخاف لا يطلع الرجال ويجينه، ركضت على الباب طبكتها ودورت على قفلها مابي قفل ظليت اللطم على وجهي وهي اجتني كضتني من چتافي وحجت بصوت يرعش..
-لا تخافين فدوة اروحلج بس على كيفج مِــسك
-ولج مسودنة انتِ؟؟ زلمة طاب منوركم وتكليلي على كيفج!!
-صوتج حبابة نصي خليني افهمج على كيف
ابلع بريگي وعيني ما وكعت من شباج المطبخ كل ساع أكول راح يطلع منا وينهبنا ويكتل ابو كحلاء وهي باقية ترجف كبالي وتمسح على وجهها..
-ما تسولفيننن تره هسة اطلع لسعد احجيله
-مِــسك هذا الرجال اجه بالغلط، يعني مو بالغلط اوكفي بس اصطبريلي خليني اجر نفس حبابة
صبري خلص ويه دموعها ماتحملت اسكت وعفتها ورحت لغرفتها اجيب عبايتها حتى اخذها وياي واكعد ابوها نبلغه بالصار وما خلتني وكفت بباب الغرفة وجرتني من ايدي وكالت بسرعة..
-هذا رجال مهزوم من العسكر العثماني وطفر على بيتنا خايف من شافهم يلحگوه وويه طفرته وكعت دبة الطرشي وتكسر الگزاز وطلعت اشوف شكو عبالي عتوي واخترعت من شفته رجال..
ظليت فاكة حلكي اباوعلها وهي كوة تحجي روحها رايحة والهبطة بعدها بيها، جرت نفس وكملت..
-من شفته صحت خايفة وهو توسل بيه ما احجي لاحد كال بس ينتظر العسكر يروح وهو من وحده يرجع يطفر ويطلع من البيت بس بقيت خايفة منه ورجعت ليوره وبالغلط ضربت دبة طرشي ثانية وطاحت بالكاع تكسرت وانتِ طبيتي للمنور وشفتينا
اسمعلها واحس مصدكة وما مصدكتها بنفس الوكت، سوالف المهزومين والفرارية هواي وصحيح يطفرون على البيوت حتى ينهزمون بس بنفس الوكت خايفة لا كحلاء جاي تجذب ويطلع شي ثاني..
-مِــسك: ليش ما كعدتي ابوج؟
-ما قبل توسل حتى ما احجي كال بس واحد يفتهم بي هنا يبلغ الجنود ويجون يعتقلوه لان محد يتحمل هيج مسؤولية
عضيت على اصبعي بكل قوتي متحلفتلها وهي بس تبجي وتمسح بدموعها، ماعرف شسوي خفت يظل هذا يتردد هنا من يشوفها منطيته وجه وتساعده وتلفيلها مشكلة وتروح بين الرجلين..
-لازم نبلغ ابوج
-نبلغه اي اي بس مو هسة خلي يروح وبعدين اني احجيله
-كحلاء كلبي ما مرتاح كحلااء
-مِــسك بداعتي حرام هذا الرجال اكيد بريء والعسكر مچلوب ياهو يشوفوه بالشارع غريب اعتقلوه خطية لا نسلمه للموت بأيدنا الله ميرضاها
سكتت عاجزة ماعرف شتصرف عيني ما طاحت من باب المطبخ وهي واكفة بصفي وتتوسل بالهمسة تسولف، استقتلت حتى ما احجي ولا اكعد ابوها ولا اسولف لسعد واني واكفة على اعصابي.. شتت تركيزي صوت حمحمة سعد وهو يطب للحوش شهكت كحلاء خايفة من شافته وهو بس صارت عينه عليها دنگ واندار ينطينا ظهره..
-سعد: عذريني خيتي طبيت بلا صوت بس مِــسچ تأخرت وظل بالي خفت بيكم شي
-مِــسك: لا لا ماكو شي اءء.. طالعة اني هسة بس شوية انتظرني
هز راسه اي وطلع من الحوش، اللتفتت على كحلة واكفة على جهة وتاكل بأظافرها..
-ورطتي روحج كحلة ورطتيها
-شسوي مِــسك
-امشي نشوف طلع الزلمة لو بعد
هزت راسها مدنكة عيونها مستحية، ذبيت البوشية على وجهي وهي اجت وياي طالعة بطرك الدشداشة والشال على راسها رفعت البوشي فاكة حلكي واعاين للبسها وهي انتبهت وطبت للغرفة تركض لبست عبايتها واجت وراي..
-مِــسك: لو نجيب سـعد عاد لو شاف زلمة يخاف
-لا مِــسك حرام هو امني وانتِ عبالج سـعد من يفتهم بي هنا يعوفه وميبلغ عليه؟
تحسرت ومشيت كدامها مكمشة بيدها حيل وطبيت للمطبخ وبوجهي للمنور، انداريت عليها لكيت وجهها زين مو خايفة چا شبيه انه راح اموت..
مديت راسي كوة للمنور ادوره بس ماكدر اشوف للترك البردة سادته، توترت من عبرتني وطبت قبلي مشت على كيفها وراحت للبردة وخرتها من الباب وكالت..
-راح
-متأكدة؟ دوري منا منا خاف خاتل بمكان
-ماكو مكان يختل بي راح طفر
-الحمدلله والشكر
-مو كتلج هو كال بس يرحون العسكر يطلع بس راد مكان يحتمي بي من عيونهم
عفتها ما مقتنعة وطلعت من المنور وهي وراي، وكفت بنص الحوش وهمست..
-كحيله اياچ تعيدين هالسالفة اموتج وعلي اذا لكيتج فازعة ومختلة زلمة غريب ببيتكم شني انتِ ما رايدة روحج
-لا لا التوبة ماعيدها بعد
-تعاي وياي لبيتنه كحلاء ما مرتاحة
-لا مِــسك ابوية ماكدر اعوفه
-فدوة امشي نكعده ويجي ويانه
-لا حبيبتي لا تخافين عليه والله ماكو شي شبيچ
-خوش، انه صح گلبي بعده يلعب بس لازم اروح تأخرت على البيت انتِ هم طبي لغرفتج وقفلي الباب عليج واول ما يكعد ابوج باجر سولفيله تره انه اسولف
-احجيله اكيد احجيله
هزيت راسي وطلعت من حوشهم والله ما ودي اعوفها وحدها خايفة عليها بس شبيدي، طلعت وانه اتلفت عليها وهي هم من خرعتها ما سألتني ليش اجيتها وشلون طبيت بدون لا ادك الباب.. طلعت شفت سعد واكف وعاكد حاجبه مستغرب ليش تأخرت عليه..
-كحلة جانت عدها سالفة مهمة وياي واحتاجتني
-خوش امشي يلا
-المفتاح لازم نرجعه اوكف
-رجعته بالزرعة امشي
مشيت بصفه وكل شوية يلتفت عليه يمدلي ايده ويحركها، ابتسمت وحطيت اصابعي بين اصابعه ياله ارتاح ومشى طبيعي.. ظليت مختنكة وبالي ويه كحلاء بس حاولت ما اكبر الموضوع وانسى بس شينسيني فكرة اشوف رجال غريب ببيت بت عمتي وهي وحدها مخوفتني، ابوها ينام مثل الاموات وره علاجه لو يدكون طبول يم راسه ما يكعد المسكين..
-سعد
اندار ونصى اذنه يم حلكي، همست بصوت ناصي محد غيره يسمع..
-اخذني للنهر حباب
-تأخر الوكت مسوكة لا يظل بال امي عليج
-فدوة بس شوية كلش مختنكة
تحسر ضايج وغير طريقنا على جهة النهر، كمشت بأيده حيل وضغطت بأيدي الثانية على زنده فرحانة وهو الخبيث لازم يفشلني صاح بصوت ناصي..
-ااخخ ااخخ بووية چلبة وكضت بزندي
-اني اعلمك سعيدان
-اااخ انزرفت ايدي مو اظافر تكول سچاچين
-اصلاً ماعندي اظافر يا جذاب
ضحك وجرني لجهة الحايط يمشيني لحدما وصلنا للبساتين ومناك للنهر.. انشرحت روحي من شفته وبلا شعور رفعت البوشية من وجهي وجريت نفس قوي..
-سعد: بعد بعد بس عوزچ تطيرين
-اسكت لا تضوجني
نزعت العباية من راسي وانطيتها بيده خزرني ما عاجبه ورجع حطها على راسي..
-لا تنزعين العباية
-سعد ابوي يرضى انزعها هنا لان ماكو احد بهيج وكت
-ميخالف لبسيها
ضجت ورجعت لبستها بس ما خليتها تأثر عليه لميتها هي والدشداشة على جسمي ونزعت الشحاطة وطبيت اطبش بالماي واشهك من برودته..
-تعال طبش وياي
-يمعودة لا نتأخر
-هههههه تعال تعال
ضحك ونزع حذاءه وطب وياي يطبش ما كف بنطرونه، ظلينا نلعب بالماي وواحد ينكع الثاني ونتذكر طفولتنا شكد چنه نلعب هنا اني واخواني وامي وابوي يوكفون يتفرجون علينا ويضحكون..
-سعد: مِــسك
-ها
طلع من النهر منزل عيونه واني لحكته، كعدنه على الجرف ثنينه وهو تحسر گبل لا يكول..
-كحلاء شبيها؟
خرطت العافية من جاب طاريها وخفت اكثر من نبرة صوته الهادئة، بلعت ريكي احاول ابين روحي طبيعية واللتفتت اباوع لوجهه مبتسمة..
-مابيها شي ليش تسأل؟
-هيج انسي
-لا كول شبيك
هستوه جاي يحجي وطفر من مكانه على صوت اجه من ورانه، گمنا ثنينا واللتفتنا نباوع منو وجفلت من شفته عسكري عثماني، انطيته ظهري بساع مدنكة عيوني من وكف كبال سعد وكال..
-السلام عليكم
-سعد: عليكم السلام ورحمة الله
-اعتذر اذا جاي اقاطعكم بس ردت انبهكم راح يعلنون حظر تجوال
-هاا رحم الله والديك سيادتك
من كال سعد سيادتك عرفته مو جندي عادي، ظليت دايرة وجهي بس جاي احس بحركتهم واكدر اشوف شنو جاي يسوون بطرف عيني، ابتسم الزلمة ومد ايده لسعد وكال..
-صيحلي كمال الدين
رجع صافحه سعد يحييّ بس حسيت بأخوي مستغرب ومنحرج من الرجال كلت يجوز لاني واكفة بصفه وما حب يورجني لزلمة تركي..
-سعد: چا احنه بعد نروح نترخص منك
-كمال الدين: ما تعرفنا على اسمك؟
-ها العفو اسمي سعد
-انتَ من سكان المدينة سعد؟
-اي ابوي شيخ مكي جواد الـ^^^^^
-اهلاً وسهلاً عرفت والدك الله يحفظه
-الله يسلمك ويحفظك، يلا بوية
جرني من ايدي واني على وكفتي لبست البوشية ومشيت وياه وظل كل ساع يلتفت على الزلمة مبتسم ويرفع ايده يودعه..
صار عندي فضول اشوف شكله فـ اللتفتت لفتة سريعة وما ركزت بملامحه عيني طاحت على ابتسامته الي.. خرطت روحي من لاحظته منتبهلي اعاين عليه وسعد هم انتبه وعصر ايدي بين ايده ونتر..
-عيننج عينننج
مشيت عدل منزلة عيوني وطلعنا من يم النهر مستعجلين علمود الحظر، وكفت بمكاني اتنفس حيل ما منتبهة على روحي كاتمة النفس الا من اختنكت وسعد وكفني يم نخلة خايف..
-شبيچ مِــسك شبيچ
-مابيه بس اختنكت من البوشية
-رفعيها ماكو احد
هو مد ايده رفعها الي وظل يهفيلي بيده وينفخ على وجهي انوب لزمتني كحة وهو مستمر ينافخ، دفعته مني اكح واضحك وهو يعيب ويكول..
-هاا اختنكتي من ريحة البصل حگچ حگچ
-هههههه لا ولك
ضحك وعصر خدودي اصلاً ما ياكل البصل هو، ظل واكف يخليني اتنفس على راحتي وكل ساع يتلفت يخاف واحد يتعده..
-مِــسك: صاير تاكل بصل؟
-سعد: لا طبعاً، بس لا صدك شميتي بيه ريحة بصل؟
-لا بس من كلت حسبالي اليوم ماكل
-حشى نعمة الله
-اممم، سعودي هذا منو الاجه سلم عليك تعرفه؟
-لا
-اي مو شفتك حيل مستغرب
-ولج هذا واصل بالدولة
-عليك الله؟
-والله اظن لان عنده رتب هواي اول ما شفته كلت بكلبي انلاصت عليك يا سعد اليوم انتَ واختك مخبوزين
-چا لعد ليش اجه يسلم عليك ويعرف عن نفسه؟
-مادري انه هم مستغرب ما شفتيني رأساً فلتت بيج
-ولك خاف هذا مو زين وناويله نية؟
-لا ما اظن لان عرف ابوي
-هاا
-اي، يلا امشي مو حلتلچ السوالف بالشارع
ضحك وجر البوشية على وجهي ومشينه نرجع للبيت، فرينا على جهة مشتمل شجاع حتى نسلم عليه ووكفنا ندك الباب هواي وما فتح..
-مو هنا شجاع
اندار سـعد على الرجال الصاح من وراه وضحك ضحكة عالية وراحله يسلم..
-سـعد: لك هلا بـ عـبد هاي وين الغيبة
درت وجهي متوترة من صاحله عـبد، راحله سـعد حضنه وتباوس وياه چن صارلهم هواي ما متشاوفين.. عيني يبست عليه ماشوفه زين واكف بجهة ظلمة بس حاولت اركز شكد ما اكدر معقولة هذا الملثم ابو قميص الرصاصي؟ بس شو عبالك مو هو مادري اني صايرة ثولة..
-سـعد: وين كاطع لا تجي لا تسأل لا تلتم ويانه چــفل زعلان عليك
-عـبد: شغل والله ماشوف دربي ماعول شوكت ارجع للبيت اكلي لكمة وانام
ظلوا واكفين على جهة وعيني ما طاحت منه مكابلين بعض يسولفون بالشغل واني واكفة افصل بجسمه چتافاته نفس چتافات ابو الرصاصي لو هذا اعرض، زين طوله نفس ذاك؟ استغفر الله شجان صار لو هم لابس رصاصي اليوم حتى اكدر افكر عدل..
-سـعد: يلا خوية كتلك بعد الخميس عرس بشير مو تسويلك سالفة وما تجي
-عـبد: لا اجي حتى اكل
حچاهة بضحك وسعد عافه ورجعلي يضحك حلكه مشروك من الاذن للاذن، حط ايده على چتفي ومشاني للبيت طبينه واستقبلتنه ريحة الگلي امي جاي تگلي نواشف..
-سعد: السلام على الجنة الجوه رجليچ
-فوزية: عليكم السلام يا عيني
وكف يبوس بيها ويداهرها ويضوجها ويعضها ويدغدها وهي ساعة تضحك ساعة ترزل بي، ضحكت على سوالفهم وهو شافني اضحك لو ابتليت على عمري لزمني وشبعني عض ويقرقر بيه خلاني ابجي واضحك ردت اموت لولا تدخل چــفل ورزاق طبوا للمطبخ وصاحوا بي ياله وخر مني..
-چــفل: چم مرة ابوي متوبك من هالسالفة
-رزاق: الشيخ مل گدما ينصح بي وماكو فائدة
-سعد: امشي لك انتو بس راح تموتون من الغيرة لانها ما تحبكم مثلما تحبني
-مِــسك: ولك منو كال ما احبهم مثلما احبك كلكم اموت عليكم
ظلوا واحد يباوع بوجه الثاني وكوة كاضين ضحكتهم عرفت وين راح بالهم لان امي رأساً شالت المس وصاحت بيهم..
-فوزية: كالت تحبكم كلكم لا تسوولكم سالفة
ضحك چــفل يهز راسه لا ورزاق كعد على الميز وكال..
-رزاق: اشك والله، مِــسك بشير هم تحبي؟ اذا طلعتي تحبي اتبره منج
-فوزية: كوم من الميز كووم خسفته
كام منه وظلوا يضحكون وواحد يذب حجاية على الثاني لحدما طب ابوي للمطبخ مبتسم، سلم علينا كلنا ومد ايده لواحد واحد بينه يصافحه مثل عادته لحدما وصلني..
-شلونها مِــسك الختام
-مِــسك: تعبانة والله
ضحكوا امي واخوتي وابوية فتح عيونه وايده سوه وكال وهو يضحك..
-شيخ مكي: كالعادة مِــسك شوكت ما شفتها وشافتني كالت تعبانة
-مِــسك: والله تعبانة ليش ما تصدكون عليك الله يابه جرب تشتغل من الصبح لليل غسل وكنس وطبخ وتعزيل وترتيب ومِــسج تعاي ومِــسج روحي ومِــسج ركضي ومِــسج وينج ومِــسج…
-شيخ مكي: هذا هو بابا العفو منج خاتونه حقچ كل التكولي حقچ بس سكتي
يحجي مبتسم وامي تسويلي بيدها اني اعلمج، انتبهلها ابوية وكال وهو رافع حاجبه..
-هاا ام بشير چنچ متعبة بنيتي
-فوزية: جا شعندي غيرها هي اديه ورجليه بهالبيت
هز راسه متفهم ومثل كل مرة من اشكيله عن شغل البيت يكول يجيب وحدة تساعدنا وامي تتسودن عبالك كايللها راح اخذ عليج مرة دكت ولطمت ورادت تشك زيجها الا شوية..
-فوزية: يممة انه تجيبلي مره تعزلي وتغسلي يمممة مكي تريد تسويني علج بسنون التسوه والما تسوه ويكولن عليَّ ونيدة وخوثة
-شيخ مكي: يابه لا ونيدة ولا خوثة بس البيت ما شاء الله جبير وگبل جانت مـودة وياجن وتزوجت الله يستر عليها بقيتي انتِ ومِــسك الختام خو هم تعب عليجن
-فوزية: لا لا ماكو تعب انه اشتغل كله مِــسچ بعد ايدج ما تحطيها بالبيت دامه يتعبج خلي عليه
-مِــسك: لا يمة شهالحجي شلون اخليج، باوع يابه تعرف شنو الحل؟ اني عندي الحل
-شيخ مكي: شنو الحل
-مِــسك: اخوتي يبطلون يوصخون ويرتبون غرفهم بيدهم
-شيخ مكي: وهذا خوش حل يلا يا ولد روحوا نظفوا غرفكم كدامي
-مِــسك: لا لا يابه منظفتهن اليوم اني عود باجر ينظفوهن
احجي واباوعلهم خازريني ومنفوخين راح يطكون من القهر، كوة لزمت ضحكتي من ابوية اندارلهم وشاف سـعد يسويلي بيده بسيطة بساع كال..
-شيخ مكي: هاا تتحلفلها مو شيخ سـعد؟ من اليوم شغل البيت يتوزع عليكم حالكم من حالها مِــسك شنو الشغل اليتعبج اكثر شي شمري على اخوتج
-فوزية: مكي صدك تحجي الويلاد يجون مهدود حيلهم من الشغل هم تريد تشغلهم بالبيت
-شيخ مكي: معليج ام بشير همه سباع ويتحملون
وهيج نهينه النقاش واحس روحي رفرفت من الفرح واخوتي وجوههم تلاطمت، رحت لغرفتي اضحك مكيفة ومقررة اقسملهم جدول للشغل بس مو كلشي اخلي عليهم همه هم يتعبون بالمحلات خطية صايرين حمالين ظهرهم ينكسر..
**
“فضـة”
وصلنه واثق لبيت عمو مكي وطلع ويه بشير يكمل تجهيز العرس، بالباب تلاكيت ويه جليلة هم جايبها اخوها وطبينه سوه نسلم على اهل البيت، كعدنا بالهول واشوف جليلة تلوب كامت مِــسك تجيبلنه جاي وهي اجت كعدت يمي وهمست..
-جليلة: امشي نروح نشوف باجي سوسن
-فضة: يمة منج يمة هيج كاتلة روحج على باجي سوسن
ضحكت تحرك بحواجبها وكامت گبل لا تخليني انطيها جوابي، راحت لباجي فوزية كالتلها راح نروح نشوف باجي سوسن وبنين ونرجع..
ترخصت منهم وكلت لـ مِــسك تهدر الجاي ما نطول شوية وراجعيلها، طلعنا من حوش عمو مكي وطبينا لحوشهم حايط على حايط همه حتى الباب يعوفوها مردوده علمود جهال راهي يلعبون بره..
شفنه بنين لافة ربطة على راسها وتغسل بالحوش من شافتنا ذبت من ايدها واجتنه مكيفة وجليلة اللوكية اكلتها وشربتها بالسلام خلت البنية ما تندل دربها منين..
-بنين: تعالن نفوت جوه
لمينه عبينا لا تتبلل وطبينه وياهة للهول كاعدة باجي سوسن وبيدها سنارة جاي تحوك، انخبصت بينه من شافتنا هلت وسهلت بينه وصاحت على هدى مرة راهي تجي تكعد ويانه بس اني ما ارتاحلها وكيفت من كالت بنين نايمة..
-سوسن: هلا بقداح البيت نورتن بناتي
-جليلة: نورج هذا باجي
تحجي على كيفها ومنزلة راسها عود مستحية، ماتحملت اعبرها الها وهمست واني انزع بعباتي..
-فضة: نهجم بيت البانية اول تالي تستحين
-جليلة: انجبي ههههههه اي باجي شلونكم شلونها صحتكم الولد شلونهم
-سوسن: بخير بخير الف الحمدلله كلنا زينين انتو شلونكم شوكت ناويات ترجعن للدراسة؟
-فضة: والله باجي هسة عطلة علمود ترميم عدهم فـ يجوز على اسبوع الجاي نبدي لو بعد يأجلونا على الشتا
ظليت اسولف وياهة وبنين اجت جايبة بيدها شربت برتقال حطته وكعدت ويانه وباجي كامت تعوفنا براحتنه، ندستني جليلة وترخصت تروح للحمام..
-بنين: همزين اجيتوني فضة والله روحي رادت تطك
-فضة: ليش شصاير وياچ
-بنين: مرة وسام زعلانة ويومية تكب ببيتنا امي متقبل يعوفها هناك تريده يرجعها بس احسه ميريدها اصلاً ومكيف على غيابها
-فضة: هذا اخوج هم ساطره العباس اذا ما رايدها المن تزوجها وورط البنية وياه
-بنين: اووووف فضة وهي فد تحبه تموت عليه وترحف رجف من الغيرة وهو ولا يمه عايش بغير عالم
-فضة: سكتي سكتي لا تضوجيني اكثر عوفينه من وسام سولفيلي ما ناوين تخطبون لـ سيف؟
-بنين: امي ناوية ورايده بس هو ما مقتنع
-فضة: لازم اكو وحدة ببال امج تريدها لسيف
غمزت مكشرة حلكي وره حجايتي ضحكت بنين وتربعت تعدل كعدتها، مدت راسها تباوع للباب كأن راح تكول سر وهمست..
-اي اكو وامي كالتله عليها وهو سكت ما علق
-عليج الله منو
-اكول بس ما تزعلين؟
-يااا ازعل ليش ولج سولفيلي بالعكس افرحله
-تريد تخطبج الج
لطمت على صدري شاهكة، ضحكت بنين اكثر تهز براسها اي وكملت تسولفلي..
-صار اسبوع تسولفله عنج خابصته خبص بالطبة والطلعة تحجيله تكله حلوة ومرتبة وام بيت وكد المسؤولية وبيتهم يم بيتنا شمرة عصا حتى اذا رادت تروح لاهلها ما تتبهذل بالروحة والرده
تحجي واني معدتي كامت تكلب وعيوني احسه تريد تطلع من وجهي، دهر دهرني شنو هالمصيبة ياربي وين جايني هذا يبووو جليلة تموتني والله تموتني وتموت وراي، روحها من هالدنيا سيف تعشگه بخبال حتى حلم تتحلم بي..
-بنين: ها فضة شتكولين
-فضة: لا داده لا عفية لاا اني اصلاً ما افكر بالزواج ابد ابد اصلاً ماكدر اعوف واثق وخواتي محد الهم غيري لا تفكرون بيه اصلاً ولا تسولفوله عني
-بنين: ولج ندري بيج انتِ المهتمة بأخوانج بس احنه جوارين متلحگين تشتاقيلهم
-لا لا بنونة عليج الله سدي الموضوع ولا چنچ فتحتي وياي ولا تحجين لاحد امانة اذا تعزيني هالسالفة تنسد مو قصور بأخوج بالعكس رجال والنعم منه والف بنية تتمناه بس ما مفكرة بالسالفة شوفوا غيري
-غيرج منو عندج وحدة ببالج؟ لا تكولين مِــسك لان لو تموت متوافق خاطبيها من قبل مرة لوسام وحتى لسيف امي ذبت حجاية لباجي فوزية واعتذرت منها كالتلها مِــسك متقبل تتزوج
-خطبوا جليلة
صفنت بوجهي ساكتة ما حجت شي، جريتها من ايدها اقنع بيها واصبغ بجليلة وما ملحكة..
-فضة: والقران تخبل طول جسم جمال شعر رتابة نظافة كشخة ولج والله بس يشوفها يتسودن عليها جليلة بس عيونها كافية تصفن
-والله هي جليلة تخبل واموت عليها اني بس..
سكتت مستحية متعرف شتكول، رجعت تباوع من جهة الباب تخاف لا ترجع جليلة وتسمع واني عيوني تعلكت على حلكها من كالت..
-امها فضة امها واخوتها مصيبة راهي يسولفلنا عنهم يكول بيت شر ويدورون مشاكل وطلايب وسيف ما يتحمل هيج هو يريد حياة هادئة سكينة لا مشاكل ولا وجع راس وهذا السبب امي تريدج اله
-لج هي تختلف عنهم والله العظيم البنية متشبه امها اصلاً جليلة….
سكتت بسرعة من سمعت صوت سيف جاي من المطبخ ورجعتلنه جليلة تركض فرحانة واني ادري فرحتها هاي لان اكيد تلاكت وياه وشافته، كعدت بصفي تباوعلي وتباوع لبنين وتوزع ابتسامات مكيفة سودة بوجهي شگللها شلون افهمها العاشگته وميته على حروف اسمه يردون يخطبوله اقرب صديقاتها….
**
“رجــب”
طبيت للبيت دايخة وتعبانة ما صدكت شوكت ظلمت الدنيا اريد بس احط راسي على مخدة وانام واستقبلتني امي من الباب..
-صولاغ: شو ذولة بعد ما رجعوا ولج؟
-رجــب: مادري يمة
-لازم مسويتلج فد مكسورة والزلمة چزت روحه منج؟
-يمة شمسوية شو كاعدة وساكتة هنا يمج
-صايرة تراددين ولج رجيبة!!
سكتت بدون لا اجاوبها اذا احجي حجاية لخ تسويلي عركة، نزعت العبايه من راسي ودنجت انزع الحجل من رجلي وطفرت على صوت ايدها تضرب باب المطبخ حيل..
-مو وياچ اني!!
-رجــب: ها يمة مو كتلج لا طالعة ولا طابة وماعرف ليش الخطابة ما رجعوا يجوز ما عجبت الرجال عادي
-شنو شنو؟ ما سمعت؟؟ ما عجبتي الرجال؟؟ حاصله ياخذ هيج بنية ترد العافية شوفتها
-يمة انطي مجال اذا قسمتي يرجعون
هزت راسها اي متحلفة وتعصر بأصابعها حييل، دعيت من كل كلبي الخاطب الي البارحة اجه وشافني شوفة شرعية يرجع يخطبني بس حتى اخلص..
-صولاغ: وين وين شو نزعتي وين العجين؟
-رجــب: ماعدهم يمة افتريت على كم بيت كلهم مخلصين
-تخلقيلي
نزلت راسي ساكتة ماعرف شسوي اخاف اتحرك لا تسمع صوت زايد وتضوج اكثر واخاف لا اجاوبها لا تنزعلي شحاطتها اليابسة..
-صولاغ: امشي ولي دبريلنه عجين ولا ترجعين للبيت بدونه فهمتي لو لا
-بس…
-شنو بس ولج؟؟ شنو بس؟؟ شنو بس
-ولا شي والله ولا شي هاي طالعة هسة
لبست العبايه مرة اللخ وركضت كدامها اطلع اشوف منين اجيب عجين، ذبيت البوشية على وجهي وطبكت باب الحوش وراي وظلت عيوني تراقب الفرع شلون لو مرت دورية هسة وسوولي شي.. الدنيا هندس طير ماكو بالشارع شنو من گلب مطلعتني بهالوكت علمود عجين خبز..
عبرت چم بيت الرحتلهم گبل شوية و تنازلت ودگيت باب جوارينه ام عدنان المرة الخطبتني لابنها النذل گبل فترة وامي طردتهم من بيتنا بعركة، طلعلي عدنان عاكد حواجبه معصب حگه يعصب منو يدگ الباب هالوكت غير العسكر..
-السلام عليكم
-عليكم
-اگلك خوية خالة ام عدنان موجودة؟
-منو انتِ
-بت جوارينكم
-يا جوارين بالضبط
-بيت الثالث على ايدك اليمين
-ماعدكم اسم؟!
-هم يسمونه هيج
گلب عيونه ضايج ووجهه عصب زيادة، تچه جسمه على الباب وگال وروحه طافرة..
-من يا بيت ولج انتِ وشعندج طالعة بهالليل وحدج؟!
-راح تصيح لامك لو لا؟
-رفعي النقاب اشوف وجهج
-شيخصك بوجهي يوووه وخر
عفته واكف ودرت وجهي جاي اروح وفزيت من جر عباتي من وره حيل ونتر بيه..
-منو انتِ ولج!
-هدني
-منو انتِ احجي
مد ايده غصب ورفع البوشيه من وجهي وتغيرت علومه، تغير وجهه الحقير وتغيرت ملامحه المعصبة واستبدلها بملامح احقر واوصخ..
-رِجــب!
-لك هدني
-هههههههه شوف شوف منو اجتني
ضربت ايده ودفعته مني شكد نذل شكد حاولت ما اخلي يعرفني بس حقير من يوم يومه وعينه وصخة وما يهتم لا لحرمة مرة ولا لأحترام بشر، على صوتنه طلعت امه وطلعوا الجوارين خرب وكتها شنو واكفين وره الباب ذولة!
-ام عدنان: شكو شصاير
تسائلت امه وتسائلوا الزلم الطلعوا من بيوتهم وعدنان واكف يتفرج مبتسم، الله لا يوفقك يا عار الزلم شلون موقف خلاني بي منو راح يصدك اجت بنية شابة وحدها تاخذ من بيتهم عجين بهالليل..
-رجــب: اجيت اخذ عجين منج خالة امي تكول ماعدنا طحين وبلكت اللگه عدكم شوية عجين للخبز
-ابو حيدر: جاية بهالليل حتى تاخذين عجين؟
-ابو وفاء: ههههه حلوة هاي النكتة
-ام عدنان: روحي يمة روحي ماعدنا عجين
كوة لزمت روحي ما اتعارك، هزيت راسي بهدوء وعفتهم ورجعت لبيتنا اول ما فتحت الباب لكيت امي واكفة وبيدها سعفة نخل مكطعة السعف منها وباقية الجريد عبالك منتظرتني ومتأكدة ما راح اجيب شي وياي.. حلگي ما فتحته لا بررت ولا حجيت ولا ذكرت الموقف الصار گبل شوية لا تصير كتلتي عمل شعبي اليوم..
-ما جبتي وياچ شي مو؟
-ما لكيت يمة
-ما لكيتي؟ خوش ما لكيتي.. خوش.. خوش حجي خوش
نزلت دمعتي وطبيت للبيت اركض، ما لحكت انزع العبايه من راسي وانجلدت بأول جريد (العودة)، صحت متوجعة وركضت اشرد بالمدخل واجت تركض وراي..
لبدت بالزاوية ابجي واتوسل بيها تعوفني بس ما سمعتني ولا رفلها جفن..
-رجــب: يمة فدووة والله اجيبلج هسة اطلع لبيت جليلة يمة فدووة عوفيني يمة
-صولاغ: وصمممة وصمةةة ولج بلااااء انتِ على گلبي بلاااااء ياربي شنو هالبلية ليش انطيتني بنييية ياربييي ليييييش
-اااخ يمة لاا اااخ عيني يووم بداعة وحيدج عوفيني
كلما اصيح تضربني اكثر لحدما تكطع الجريد على جسمي وانقسم نصين، بجيت مخنوگة اخاف يطلع صوتي وتذبحني بس ما يفيد وياهة شي حتى لو ساكتة تكتل لحدما تتعب وتعوفني..
-بت الجلب الله ياخذج ربي امانتك اخذها ماريدها اخذ هالبنية وخلصني منها لاا اذبحها واخش بخطيتهاا
-يمة
-لا تحجين لااا تحجين
لزمتني من شعري تهلس بي احس نصه صار بيدها، تشيل شعري وتركع راسي بالحايط وتضرب حيل على صدري ومتوني متت طلعت روحي حتى نفسي ضاع وعيوني انطفت ماشوف بيها..
-ولج يمة وينج يمممة
شهكت خايفة من سمعت صوته، صوت اخوي مضحي صخام الصخم حالج يا رجــب رحتي بين الرجلين اليوم، وخرت امي عني واللتفتت عليه تأهل بي وتحرك بيدها وتسهل..
-صولاغ: وهلا هلا هلا هلا هلا بالجاي لينا ومرحبا هلا بهالطول هلا هلا بهالحسن هلا بهلي وريحة هلي هلا بوليدي ووحيدي
-مضحي: يا هلا يا لطام بعينج وعينها بتج شمصخمة ولج يمة
-صولاغ: اي يبعد امك ما خبزت اليوم وجاي اكتلها والله
-مضحي: خبز شنو؟؟ بنات الجلب بتج فضحتنا رايحة لابن ام عدنان تتمضحك وتتماوع عليه تكله ليش ما ترجع تخطبني من اهلي بلكت ينطوك اليوم انعل والديها واطيح حظج وياهة
بجيت ميتة خوف اچلب بدشداشة امي من جوه اتوسل بيها تصده عني بس ما اهتمت ورجعت تكتل بيه واجاني مضحي نزع نعاله وگطعه على ظهري خلوا صريخي يوصل لسابع جار، تعبت امي ووخرت عني راحت وعافت مضحي يمي لصم حلكي واخذني يسحل بيه من شعري يجرني للغرفة.. نزلت على رجله ابوسها واتوسل..
-بروح ابوك عوفني بروح اهلك بداعة الله عوفني ابوس رجلك راح اموت
-مضحي: اني اريدج تموتين.. وينننج يمممة
-صولاغ: جاية يمة جاية
-رجــب: لا لا فدوة اروحلكم لاا يمة حرام عليج يممة لااااا
اجت وبيدها التالو (شمع حيواني) طفرت من رجلين مضحي وركضت للمطبخ ولزمتني من شعري وشمرتني بالكاع.. چتفني مضحي وهي اجتني ظليت ابجي وارافس برجليه اخاف من التالو ماريدها اخاف..
-مضحي: يلا فضيها لا تتفهين
صحت من غمج روحي من مدت ايدها جوه دشداشتي وطفت الشمعة بظهري.. احس بروحي راحت والنظر طفى عندي ما احس بشي بس بصوت مضحي وهو يضحك ويكول لامي يشعلها مرة ثانية وتطفيها بيه بعد.. من تعب الكتل وروحي الي اشتعلت بطفية الشمعة استسلمت الهم وبعد ما حسيت..
فزيت الصبح على صياح امي ويه مضحي، تلفتت لكيت روحي بالمطبخ بعدني محد شايلني وماخذني للغرفة..
ظليت بمكاني مابيه اكوم واسمعها تصيح وتفشر وهو يرجعلها الفشار والمسبات ويغلط عليها وعلى اهلها وعلى عشيرتها كلهم، مافتهمت شنو سالفتهم الا من كالت امي..
-وين الذهب والفلوس مضحي المن اخذتهن؟؟ المن احجيي ليش الصندوك فارغ احجيي
-مضحي: جاي اكلج ما اخذت بت الكلب مااا اخذت
-صولاغ: جذاب جذاب الصندوك فارغ قطعة ذهب مابي وين وديته وانتَ سكران طافي وييين؟؟
-مضحي: مو كلتي فاتنة باكتهن؟ شو تغير حچيچ هسة
-صولاغ: جذب ولك جذذب ما باكت شي تتصور فاتنة النص عقل تكدر تبوك كل هالفلوس والذهب؟؟ سولف ليا ساقطة اخذت فلوسي احجييي
-مضحي: وخري من وجهي لا اطلع كل قهري بيج وخري
صاحت امي تبجي واسمعها تدك على صدرها ووجهها وتدعي على روحها وعلى ابوية الله يرحمه كل دعاء يكزبر الجلد ويوجع الكلب.. عافها مضحي وطلع من البيت وحسيت بيها اجتني للمطبخ بساع سويت روحي بعدني نايمة..
فزيت على ضربة قوية صارت براسي، فتحت عيوني واشوفها واكفة كبالي تريد تكعدني..
-صولاغ: كومي شبيچ فضيها
غطيت عيوني بيدي استوعب الوجع المو طبيعي بجسمي بس ماعرف وين بالضبط، انكلبت على ظهري وصحت شايغة روحي من فطنت الوجع جاي من حرك ظهري..
-رجــب: اااخ يمة
-وصمه انتِ تعاندين تستاهلين الكتلة
سكتت ما جاوبتها وكوة سندت روحي على ايدي وكمت من الكاع وهي واكفة وتتحسب على ابوية وتلعن بي وبيه وبروحها مضحي ولا تدعي عليه ترجف رجيف تخاف لا الله يعاقبها بي..
-صولاغ: الذهب والفلوس راحن ولج رجيبة راحن
-ااخ شلون
-اخوج الاثول يجوز منطيهن لوحدة وهو سكران ما حاس وناسي
-يجوز انباكن؟ اول البارحة مو شفتي وحدة من نسوان بيت جليلة تنط على بيتنه؟
-ما يبوكن ذني صح ساقطات وبنات شارع بس ما يمدن ايدهن ويسرقن شي
سكتت ما جادلتها وهي بقت تنوح وتلطم ساعة على وجهها ساعة على صدرها وخدودها ميتة قهر ودموعها تجري منهارة..
-صولاغ: اااخ يا يمة انلعب بحالي وضاع حلالي
-رجــب: شفتي ابنج الشفيه؟ هذا التزامطين بي ووين ما ترحين تشهكين بأسمه ضيع حلالج الله يعلم بيدمن ضيعه
خزرتني ما راضية بس كلبي مورم منه هالسكير النذل، مسحت دموعها بيدها ونترت بيه..
-حضري نفسج نروح لبيت عمج مكي بلكت هو يساعدنا
-رجــب: شيسوي عمو مكي يروح يدورلنا على الفلوس لو نكدي منه ينطينه
-سكتي معليج انتِ
-ماروح
-اي مو هو بكيفج
-ماريد متوجعة ومزوركة شعندي رايحة وياج حتى انفضح كدام البنات؟
-انجبي وولي بدلي
غمضت عيوني ميتة قهر منها وطلعت من المطبخ رحت للحمام غسلت وطلعت لغرفتي وفتحت الصندوك اختارلي لبس وسمعتها تصيح من الحوش..
-كشخي بأحلى شي عندج بلكت يشوفج بشير وياخذج
-اووع
همست لعبانة روحي وطلعتلي نفنوف طويل ومخصر بس حرت شلون اللبسه والحرك يسعر بروحي، بجيت ومسحت دموعي وصحت من مكاني بجزع..
-ماكدر اللبس وجع بظهري راح امووت
شوية وطبتلي للغرفة تدردم وبيدها وصلة ومحلول تعقيم، مسحت دموعي وكالت تمددي على بطنج، لبست بجامة جوه ملابسي وصعدت الدشداشة اطلع ظهري وتمددت وهي اجت تعقملي الحرك واحس بروحي تريد تطلع من الوجع..
-رجــب: كاافي كاافي ماريد يمممة
-وصمه لو ما مستهترة ما يحركج هيج
-ما سويت شي والله ولا حاجيت عدنان هذاك الجلب جذاب بعده ميت قهر ليش رفضناه
-اي يلا لا تلغين
سكتت بس ابجي وارفس برجلي كلما كشطت الحرك، روحي انمردت وگلبي يرفرف مثل الطير المذبوح انتهيت وهي مستمرة تعقملي وتلفه بالوصلة..
-كومي خلصت
-ماكدر
غمتني براسي وكامت طلعت من الغرفة وعافتني وحدي وبعد ما اجت حتى نروح لبيت عمو مكي، بجيت بحس مبحوح وعضيت على البطانية وصحت بكل صوتي اطلع الحركة الي بكلبي والقهر الخانكني..
ثاني يوم من الصبح اجتني تلوب عرفتها ضايجة من الخطابة الاجوني ليش ما رجعوا جواب عفتها تفتر بالهول وشردت اسوي ريوك.. ثالث يوم العصر لابت بعد الا هسة تكومين حتى نروح لبيت عمي مكي مادري شبيها شايشة عليهم كاتلة روحها تريد تروح..
-هااا بدلتي؟
كمت كوة على روحي ويه صوتها جاي من الحوش ادري اذا ما كمت وياهة تلعب بيه فلك، بدلت هدومي ومشطت شعري وعفته مفتوح، باوعت لوجهي تعبان كلش جريت ديرم حطيت خفيف لشفتي وكرصت خدودي وتكحلت واخذت عباتي ورحتلها..
لبسنا وطلعنا بعدنا بالطريق نمشي وشافت صاحبتها خرب حظي شلون عرفن بعض وهنه منقبات، وكفن يسولفن بنص الشارع لا ساعة ولا ساعتين واني شايلة رجل وحاطة رجل..
-صولاغ: والله رايحة هسة لبيت حماي شيخ مكي
-ها علمود حنة بشير؟
-صولاغ: منو بشير
-بشير ابنهم الجبير شبيچ
-صولاغ: لعد شنو حنته مافهمت
-معقولة ما تدرين باجر عرسه؟
صفنت امي ومن صفنتها عرفتها مصدومة صدمة عمرها، كوة على روحها ضحكت وكالت..
-هااا بشير ابن شيخ مكي والله عبالي تحجين ببشير ابن ابو وسام
-هههه لا داده دنحجي على ابن حماج شودانه لذولاك
ضحكت امي تجاملها وترخصت منها وجرتني من ايدي بكل حيلها، ايدها نار صخنت من الخبر تمشي وتعت بيه واسمعها تدردم بس ما افهم شتكول لان صوتها ناصي..
وصلنا لفرعهم وبعد ماكدرت تظل تمشي صارت تركض واني بيدها اروح منا واجي منا واتلفت مستحية لا يجي احد ويشوفنا بهالحال.. وكفت بباب حوشهم لكتها مفتوحة دفرتها برجلها حيل وطبت، رفعت البوشية من وجهها واشوف وجهها مصبوغ احمر دم وعيونها ناطة..
-رجــب: يمة
ما جاوبتني وطبت تلاكت وجه بوجه ويه بشير وامه واخوه رزاق وعمة نرجس هم واكفة، ضحكت بالجذب من شافتهم وصارت تهوس بعبايتها وتكول بعلو صوتها..
-صولاغ: كللللوووش كلللووووش كلللوووشش الف الصلاة والسلام عليك يا رسول الله محمد كللوووشش
طبيت البيت مدنكة من الفشلة حتى البوشية ما شلتها من وجهي، محد بيهم حچه شي چنهم مصدومين من امي وجيتها..
-صولاغ: صلوات على النبي ويا عوينه تجنبي وصلوات على النبي.. مبروك مبرووك يا بعد روحي مبروك
راحت لعمة نرجس وباجي فوزية تسلم عليهن وتبوس وتهلهل ويه كل حجاية ولزمت رزاق هم تريد تبوسه بس ما رضا وجرت بشير من خده باسته حيل بوسة ام الصوت وهو بساع وخر منها يمسح مكان البوسة..
-عمة نرجس: هههه هلا بيج خية ام مضحي والله من تأخر الوكت كلت ما تجي بعد
-صولاغ: ياا ياا يااا اني ما اجي؟ عيب عليج نرجسه شلون افوت عرس الغالي ابن الغالية
-فوزية: الله يسلمج خية
-صولاغ: بس ما كتولي على عرسه فوزية لازم العروس تكسر الوجه؟
-بشير: خير؟؟
-فوزية: شني تكسر الوجه صولاغ؟ تتوقعين ازوج بچري وحدة ما بيها خير؟
-صولاغ: شمدريني داده كلت ما عزموا مستحين من الماخذيها
-بشير: شو انتِ ما تعرفين تسولفين ولج صوچ امي الملفيتچ ببيتها
-صولاغ: لا يمة مو قصدي بس لان محد عزمني اجت افكار سودة براسي اعذرني يبعد امك
-نرجس: هههه لا عيني اني نسيت انطيج خبر خطية ام بشير كالت عزميلي صولاغ ما كدرت تجيچ خطية ملتهية
-صولاغ: هااا مو اكول فوزية ام الاصول ما تنسى تعزم مرة حماها
سكتت باجي فوزية ما جاوبت وعمة نرجس اجتني بوستني وكالت..
-طبي ويه البنات جوه حبيبة عمتج كاعدات بغرفة مِــسك
-صولاغ: شيلي البوشية من وجهج رجــب
وخرتها من وجهي وطبيت جوه للبنات لكيتهن كلهن كاعدات يتعدلن ويتزينن وبس شافني كلهن سكتن.. حسيت روحي غريبة بوسطهن بس ما بينت ونزعت العباية بالباب وطبيت سلمت..
-انيسة: عليكم السلام هلا رجــب شلونچ حبيبتي
-رجــب: زينة الحمدلله
طبيت بوستهن كلهن وعبرت جليلة الحقيرة واخير وحدة رحتلها مِــسك واستغربت من استقبلتني بأبتسامة وكالت..
-تفضلي كعدي ويانه
كعدت وياهن بس بعدها الغربة محاوطتني وجليلة كل ساع ذابتلي حجاية تسممني..
-جليلة: شعجب صاير عندج شخصية وما مقلدة نفنوف مِــسك
ضحكت فضة وكوة كتمتها والباقيات ظلن ساكتات واني هم غلست عليها هالنذلة ولا اجاوبها، رجعت كالت..
-جليلة: هاا هاا تذكرت لازم ما لحكتي تبوكين النفنوف لان ما تدرن بالعرس
-رجــب: ندري بالعرس وانعزمنا هم
-جليلة: يمة الجذب يمة
-انيسة: جليلة كافي
-جليلة: كليلها تبطل جذب وتكوم تولي منا
-رجــب: نجبي ادبسز اني ببيت عمي انتِ الدخيلة الجاية هنا
-جليلة: امشي لللج بت صولاغ الصايعة
-رجــب: اطيح حظج جليلة
تكامشنا وحدة كفشت الثانية وانيسة والبنات بيناتنا يفاككن بينه، لزمني مِــسك وبنين يجرني بعيد وذيج بعدها تهد وتغلط وتسب بيه وبأمي..
-جليلة: والله الحشيمة بس لابوج الله يرحمه خالي رسول والنعم منه شلون رجال مرتب حرامات عليه خلفته كلهم خياس
-رجــب: نجبي لا اجي افرك حلگج بقندرتي يا طايحة الحظ
-انيسة: ولجن كافي ما تستحن انتن!!
صاحت بينا واخيراً ذيج الچلبة انردت وسكتت واني هم سكتت لخاطر انيسة، رجعت جليلة تكعد بمكانها ولزمت المراية والكحل بيدها تكحل عيونها وتكول..
-جليلة: خلوني اتكحل واتحمر وانعل ام الخربت مزاجي
هستوني جاي اردها واجتني انيسة تسكتني وتمسحلي على وجهها عود مسحيها بوجهي، اختنكت منهن لبست عباتي وطلعت من الغرفة رحت للمطبخ غسلت وجهي ومسحت جوه عيوني خاف الكحلة سالت..
وكفت وحدي شوية اهدي روحي لا اروح اطلع حركتي بجليلة، ضميت شعري جوه العباية عدل وطلعت من باب المطبخ وصرت وجه بوجه ويه زلمة صفنت بوجهه وهو صفن ثواني ونزل عينه عني ووخر يوكف على جهة..
طلعت اركض ارجع لغرفة البنات بس ظليت اتلفت واعاين وهو ابد ما دار وجهه بعد طب للمطبخ وظل هناك، صفنت استذكر هذا منو شايفته من گبل بس ما جاي يجي على بالي.. رجعت للغرفة وكعدت بصف انيسة وهمست بيني وبينها..
-اكلج منو من الولد بالبيت؟
-انيسة: بس اخوان مِــسك
-هاا اي شفت رزاق وبشير بس گبل شوية صرت وجه بوجه ويه واحد ماعرفته منو
-شلون شكله؟
-شعر لرگبته وسرح لونه جوزي وشوية جسمه خشن..
-هاا هاا هذا چــفل
-صدك هذا چــفل؟
-اي
-ولج شلون صاير متغير كلش ما عرفته
-ليش شوكت اخر مرة شفتي؟
-مادري گبل اربع مدري خمس سنين ابد ما اتلاگه وياه من اجي هنا
-اي لان دوم بالمحلات ما يلفي بالبيت هواي
سكتت وظليت اباوع للبنات شلون مكيفات ويجهزن بنفسهن علمود الحنة بالليل، شوية واذن المغرب وبدوا اهل باجي فوزية يجون وانترس الحوش بيهم محد بيهن اجت مبوشة كلهن كاشفات وجههن استغربت وسألت انيسة مرة اللخ..
-اكلج ليش اهل باجي فوزية ما مبوشات؟
-انيسة: لانهم جنوب والجنوبيات مو كلهن يتبوشن
-لعد شمعنى احنه مبوشات؟
-لان احنه بنات الوسط
-شسالفة شنو الفرق
ضحكت وعدلت كعدتها وشرحتلي على كيفها..
-باعي، عدنا بنات الجنوب ذيچ من ذيچ التتبوش من وره شغلهم وطبيعة حياتهن زرع وفلاحة وتعب ما يكدرن يسون كل هذا بالبوشية اما بنات الوسط الخاتونة تنعرف من بوشيتها واصلاً عدنا عيب البنية ما تضم وجهها وشكلها ينشز بين الباقيات حتى لو جانت ما محجبة
-هاا واني اكول ليش المسيحيات واليهوديات هم لابسات عباية وبوشية
-اي لانهن خاتونات
-الخاتونة هي بت العز مو؟
-اي تقريباً، الخاتونة هي المرة المحترمة والي الناس يستحون يصيحون بأسمها، يكون ابوها او اخوانها معروفين والهم اسم وجاه مهم بالمكان الساكنين بي والناس مسويتلهم قيمة فـ يصيحون لنسوانهم “خاتون”
قاطعها دخول خالة مِــسك لزمت انيسة تبوس بيها وتهوس وياهة وتهلهل واني بس صافنة عليهن، عجيبة هالبنية شلون هيج الكل يحبها ويريدها تكون حاضرة بكل مناسبة وبكل كعدة وكل عرس..
شفت امي تخزرني من بعيد حتى اكوم اهوس وياهن بس موجوعة ومالي واهس لشي، ما ادري بروحي مبين على وجهي مطنكرة الا من اجتني تركض وتگرص بيدي گرصات شلعت بيهن لحمي..
-صولاغ: فكي وجهج لا تظلين مطنكرة لا تشمتيهم بينه
-رجــب: ليش يتشمتون بينه
-صولاغ: لان ما صارت قسمتج ويه بشير بس ميخالف نشوف چــفل بداله
-يمة شو انتِ مينعرفلج مو تنوحين على ذاك الخطبني شو هسة متردي؟
اندارت تخزرني سكتت بسرعة قبل لا تفشلني هنا وتسويلها سالفة كدام النسوان، عوجت اصبعي بيدها وهمست بنتر..
-تجيبين ذاك العثماني لولد عمچ مكي؟ ولج ما يجي لاظفر من اظافرهم
-ماريد أي واحد بيهم
-انچبي حاصلچ تاخذيلج واحد منهم
سكتت كوة على روحي والحمدلله من اجتني بنين اشرتلي اروحلها، كمت بسرعة وياهة وجرتني تصعدني فوك وتضحك ماعرف شعدها، همست بصوت ناصي بيني وبينها..
-جاي تسمعين صوت الزلم بره؟
-اي سمعت من گبل شوية
-بدت حنة العريس وصعدن البنات كلهن يباوعلهم من السطح تعالي ويانه نشوف
ابتسمت اهز راسي فرحانة لان كلتلي حتى اروح وياهن، صعدنا الدرج ووكفت اراقبهم من فوك الحايط ويه البنات الاجواء تخبل والولد كلهم لابسين دشاديش ويهوسون لبشير وواكفين دوائر كل مجموعة سوه..
ضحكنه كلنا عليهم شلون اللتموا على واثق وشالوا من ايده ورجله يهوسوله “يوم الالك وثوقي” وهو يشمر برجله ويوكع شحاطته على سـعد وبلال.. ما لحكت اتونس بشوفتهم لان صعدتلي بنية صغيرة تكول..
-منو بيجن رجــب امها تريدها
عفتهن ونزلت اشوف شتريد، تلاكينه يم الحوض شفتها واكفة وعيونها حمر حابسة دموعها وترجف، خفت من شفتها بهالحال ومديت ايدي اللزم ايدها وهمست..
-يمة شبيچ صاير شي؟
-عمج الچلب فشلني وما قبل ينطيني شي
-رحتي لعمو مكي؟
هزت راسها متحلفة ومسحت عيونها بشيلتها، انقهرت واستغربت بنفس الوقت عمو مكي ماكو يوم احد طلب منه شي وما ساعده شعجب فشل امي..
-يمة يمكن اكو سوء تفاهم والله عمو مكي ماكو منه
خزرتني متقبل ابررله وظلت تاكل بروحها وتعض على اصبعها متحلفة وتكول..
-لوما حركت گلبك وبچيتك دم يا مكي ما يطلع اسمي صولاغ
سكتت ماعرفت شكول وبقيت يمها جوه ما صعدت بعد يم البنات، دك گلبي بخوف من راحت جابت عبايتها وبوشيتها وطلعت من بيتهم ركضت وراهة اريد اسألها وين رايحة ودفعتني رجعتني جوه ونترت..
-طبي ما اتأخر
عقلي ظل يمها وايدي على گلبي، بده الوكت يتأخر واني على وكفتي بالحوش انتظر رجعة امي، نزلن البنات من فوك يفرشن للنسوان كلهن بياتة اليوم لان جايات من مناطق بعيدة ومو مال يرجعن باجر للعرس..
-عمة نرجس: رجــب وين امج؟
-رجــب: راحت بشغلة هسة ترجع
ويه حجايتي انفتحت باب الحوش وارتاحيت من شفتها امي جاية وبيدها بقچة، رفعت البوشية من وجهها وكالت بضحكة لعمة نرجس..
-صولاغ: ها عيني نرجوسة جبت نفنوف رجــب من البيت وتلاكيت ويه اخوتي خطية جايين يردون يشوفوني ما يدرون باجر عرس بشير عاد كلتلهم يرحون لشيخ مكي يأدون الواجب ويباركون
-عمة نرجس: زين تسوين عاشت ايدج
ابتسمت امي تهز براسها وجرتني وياهة تمشيني بصفها وتهمس بنتر..
-منو حس على غيابي غير عمتچ؟!
-محد بس عمة نرجس سألتني عليج
-خوش طبي نامي يلا
-شعدنا بايتات هذا وينه بيتنا
خزرتني واشرتلي بعيونها اطير من وجهها، ما ناقشتها زايد ورحت وين البنات ملتمات كلهن بغرفة مِــسك، شفت فراشات ممدودة اخذت مخدة ونمتلي على واحد هستوها جاي تغفى عيني وفزيت مخترعة على وجه صاير بوجهي خازرني..
-جليلة: هذا مكاني كومي
-رجــب: ولي نامي بغير مكان
-جليلة: وعلي اللعب جولة كومي
-رجــب: يا يمة شكد نحسة هاي البنية شبيچ بابا شبيچ الله يشفيج
طبت امها للغرفة وشافتنه ثنينه مخنزرات على بعض عبالها تكامشنه وبدون لا تفتهم شي ضربتني راشدي غلطت عليه وسبت ابوية..
-رجــب: اكص لسانج لو جبتي طاري ابوية والله العظيم
-ولي ولي الدايحة بت صولاغ
حجاية مني حجاية منها كبت مرة الثانية وتدخلن النسوان وامي هم اجت هستوها جاي تمد لسانها تتعارك وصاحت بيهن بيبية مِــسك (ام امها) لصمت الكل على حلكه وهي مبينة من ذني النسوان الچحنتيات المدگدگات وبيدها عوچية خشب متينة رفعتها وهددت الكل..
-بعلي الاهيس صوتها اچفص بفادها ازوعها حليب امها
سكتن كلهن وبسرعة تفرقن وامي جرتني خلتني انام يمها وايدي انمردت مرد من تكرصها وتهديداتها خلتني حتى بالنومة احلم بيها..
**
“بـنين”
رجعت لبيتنا علمود فلوس سيف عازل اجار المحل وحاطهن على گلبه وفلوس چــفل ورزاق هم عنده ضمهن من عرفوا النسوان راح يباتن بغرفهم..
شكد چلبت بيه باجي فوزية ابقى ويه البنات بس من كلتلها على الفلوس عافتني اروح، دورت على مفتاح باب غرفة سيف ما لكيته رحت لامي اسئلها عنه لكيت نسوان كاعدات يمها جايات من بيت عمو مكي من شايفات المكان ما مكفيهن اجن يمنه وقسم نامن بالهول وقسم بغرفتي بس غرف الولد امي ما رضت وحدة تطبلهن..
طلعت هدى مرة اخوية راهي من الغرفة ضايجة وتنافخ ما عاجبها الوضع والهوسة، شدت راسها بالربطة وكالت..
-هدى: شنو هالهوسة الجهال موتوني ياله ناموا
-بنين: خطار علمود عرس بشير
-هدى: واحنه شكو لو ابتلينا بيوتنا حايط على حايط
-بنين: يا ولج الناس لبعضها شنو السالفة
هزت بيدها ما عاجبها ورجعت لغرفتها، رجعت لغرفة سيف محتارة الفلوس هنا شلون اخليهن وانام بغرفتي امي متقبل اعوف النسوان وحدهن هناك.. رجعت لـ هدى دكيت الباب عليها طلعت لابسة دشداشة نوم..
-بنين: هدى راح اجيبلج امانة ضميها يمج بالغرفة وانتبهي عليها
-هدى: امانتيش؟
-فلوس سيف وولد عمي
-هدى: لا لا اني معليه بنين اخاف يصير شي وسيف عزيز ماريد تصير مشاكل بيناتنه
-بنين: لعد وين اوديهن والله حرت
-هدى: وديها لمرة وسام لو ذيج على راسها ريشة
-بنين: من رجعها وسام من بيت اهلها الصبح لحد هسة هي ما طالعة من غرفتها قافلة على روحها كسرت الباب عليها ما فتحتلي
-هدى: ختولي شكد تتقنعر
-بنين: عوفچ منها وهسة سولفيلي وين اودي الفلوس
-هدى: معليه اني داده شوفيلج مكان الايد ما توصله وضميهن
عافتني بحيرتي ورجعت لغرفة سيف ضميت الفلوس نفس مكانهن وظليت بالغرفة انام هنا لعد شسوي، نمت على فراشه وغمضت عيوني شكد ردت اغفى ولا كدرت ظليت اتكلب وعيوني تحركني اريد انام بس قلقة..
كمت طلعت من الغرفة لغرفة امي النسوان كلهن نايمات عفتهن ورحت لغرفتي هم النسوان كلهن نايمات بس ثنين كاعدات يبسبسن يسولفن سوه.. عفتهن ورحت للحمام غسلت وتوضيت حتى اصلي صلاة الليل بلكت ارتاح..
اخذت سجادتي من غرفتي ورجعت لغرفة سيف وتفاجأت من شفت شباج غرفته مفتوح ويلعب بالبرده الهوا، كلبي وكف ركضت على الفلوس فتحت الصندوك ادور وارتاحيت من لكيتهن موجودات..
عفتهن وكمت للشباج سديته بس القفل مالته مزعج ما ينسد عدل ويجوز الهوا العالي خلاه يفلت وانفتح، شكد تمعچلت بي اريد بس اسده ما انسد وياي عفته مردود وحطيت عليه مخدة تسده ورجعت نمت حتى صلاة الليل ما صليتها..
الصبح كعدت على صوت امي تصيح بيه، گبل لا اروحلها ركضت للصندوگ اتأكد من جنطة الفلوس وذبيت نفس من شفتها بمكانها.. عفتها ورحت اشيل المخدة واكعة من الشباج رجعتها لمكانها ورتبت الفراش وطلعت اشوف امي..
-سوسن: ماما بنينه سوي ريوك
-بنين: بعيني يمة بس راح اجيب الـ.. هذيج السالفة يمج
ابتسمت مفتهمة وهزت براسها، رحت جبت الجنطة وحطيتها يمها ورحت اسوي ريوك للنسوان، اجوني انيسة وجليلة يساعدني ونركض منا ومنا بس كملنا ريوك لبسنه ورجعنا لبيت عمو مكي الدنيا مكلوبة هنا..
وره اذان الظهر اجوا الولد جابوا جدورة الغده، وكفنا نصب ونودي للنسوان ومِــسك ومـودة خالاتهن ما خلنهن يشوفن دربهن كل شوية لازمات وحدة يسولفن وياهة وصوت ضحكهن النا واصل..
-فضة: ماحبيت خالة مِــسك الصغيرة هواي داست بالحجي
-بنين: شكالت؟
-فضة: چانن يسولفن على موضوع النقاب وتگلها حاچي ابوج حتى يخليج تنزعي من تطلعين على شنو حامسة روحج وضامة وجهج شنو مستحي منج
-جليلة: هاي شكد تمسلت لخاطر الله
-كحلاء: ومِــسك شنو جاوبتها؟
-فضة: مادري ماسمعت بعد لان صاحتلي فرح تريدني
-انيسة: بنات لا تدخلون بين البنات وخالاتهن احنه مالنه علاقة همه اهل وبيناتهم يتفاهمون
سكتنا وكملنا صب الغده وكعدنا بالمطبخ ناكل احنه حتى وراهة نروح نبدل ونتجهز، كملنا ووكفنا نريد نغسل الماعين وما قبلن بنات خالة مِــسك فرن المطبخ فر كله هنه اشتغلن وجليلة وفضة مكيفات وحلفن الا يزوجن لاخوانهن وحدة منهن..
راحن من البنات ويه امي يجيبن العروسة واحنه طبينه لغرفة مِــسك نبدل ملابسنا محد بينا خيطت شي جديد ما لحكنه بس مِــسك امها اخذتها لام مهدية الخياطة علمود نفنوف..
سولفتلنا مِــسك صايرة حجاية بيناتهن باجي فوزية لامت ام مهدية ليش تنطي نفنوف مِــسك لـ رجــب بحنة لمياء وخطية المرة شحالها صارت حتى بجي بجت وحلفت بمية امام مو هي منطيه الفستان وباجي فوزية ما لحت وياهة عرفت بتها مهدية ام المشاكل والمصايب وهي النطته بدون علم امها..
لبست مِــسك فستان ستن ازرك طوخ مخصر من فوك لحد الخصر وينزل كلوشة لحد حجلها، كله شغل ناعم وكصة الصدر مربعة وهي لابسة خناكي ليرات ذهب وياه طلعت كلش حلوة..
ظليت بس كاعدة واتفرج عليها شلون تتجهز، فتحت شعرها على طوله وتكحلت وتحمرت ووردت خدوها واخير شي تعطرت ولبست تراجيها ومحابسها، صارت عينها بعيني على المراية وضحكت من شافتني اباوعلها..
-بنين: الف ما شاء الله عليج مِــسك
-مِــسك: بعد روحي بنيني كومي بدلي لا يروح عليج الوكت
**
“مِــسك”
كملت تجهيز نفسي واللتهيت ويه يمامة وفاتنة واكفات ينوحن ويدردمن على شعرهن ليش مو سرح ولازم يلفنه، وكفت اقنع بيهن واللفه الهن يخبل صار سكتتهن بعطر وكل وحدة ضحكت عليها وعود حمرتها بس جذب ما صار لون طلعن مكيفات من الغرفة..
-كحلاء: مسوكتي احبج
جيتت تحضني من وره وحطت راسها على جتفي ضحكت عليها كابة عدها الرومانسية من البارحة كل شوية حاضنتني وتبوس بيه مادري شعدها، وخرتها مني مبتسمة وهي مسحت عيونها المدمعة..
-مِــسك: شبيچ كحيلة شو بجي واحضان لازم راح تموتين
-هههههه طاحظج اموت عليج
-بعد روحي بس مو وكتها عدنا عرس عود بعدين حبيني
كرصتني وطلعنا على صوت الهلاهل، ابتسمت من شفت البنات وباجي سوسن جايات وبيدهن العروسة شروق ملفلفيها بعباية وبوشية والبركع فوك البوشية، تلگنها النسوان يهلهلن ويصفگن بالباب بعبيهن حرگن الدنيا بگفلاتهن وهوساتهن..
-جبناها واجت ويانه بت الشيخ لابن الشيخ جبناها
وصولاغ من يمها تشمر بيدها وتحجي بحركة..
-منيلها داده منيلها يمته صارت بت شيخ هي حتى اصلها ما معروف
-مِــسك: باجي البنية يتيمة حرام عليج
-نرجس: لا تضوجيني منج صولاغ لا تكسرين خاطر البنية بيوم عرسها
لطمت على حلكها صولاغ حيل وكالت..
-اهه اهه سكتت يا كلمة ردي مكانچ
طببوا شروق ورفعوا عنها البوشية ورجعولها البركع صلوات على محمد شكد حلوة طالعة وبدلتها هم كلش حلوة تعجبت انيسة شلون امي لحكت تخيط لشروق بدلة بهالسرعة هي ما تعرف امي محضرة لعرس بشير صارلها سنتين تتمنى يتزوج حتى البدلة جاهزة..
طببوها للهول كعدناها على القنفة مغطيها بجرجف ستن ابيض ومزينتها جليلة بورد احمر وابيض صناعي كلش حلوة ونازكة.. هوسنالهة هواي وركصنه هواي ردت كلشي يكون مثالي وحلو هذا اول اخ عندي يتزوج وچبيرنا حتى لو هو نحس بس ابقى احبه واتمناله الخير..
شوية وصاحوا راح يطب العريس ركضت حطيت شال على چتافي صدر فستاني مفتوح شوية والنسوان كلهن تگبعن.. طب وطبته خير ان شاء الله خبصته خبص بالهلاهل صار ما يندل دربه وبس يضحك مصدوم بيه..
-مِــسك: بشير رايد رادته وعايف بنات ولايته وبشوري رايد رادته
والنسوان وياي يهوسن وبنات عمي وعماتي وخالتي كلهن تكابلن وياي نهوسله ونهلهل وهو بس مبتسم ومنزل عيونه ووجهه كالب احمر ضحكت اول مرة اشوف بشير هيج خجلان..
-انيسة: عزيزة وغالية ام بشير كل احنه حبايبها عزيزة وغالية ام بشير كل احنه حبايبها
تقدمت امي عليهم تبجي وتمسح بعيونها بوست بشير وبوست شروق وكلشي ما تحجي مهضومة وبس دموعها تجري.. جرها بشير من راسها باسه وباس ايدها وهمس شي بأذنها وهي تهزله راسها..
-صولاغ: شكو شكو كل هالبواچي هاي وانتِ مزوجة وليد وانتَ المختارة چنتچ
حچتها عود تشاقه والنسوان ضحكن بس اني وامي وكل التعرف صولاغ عرفنها ما تشاقه وحچتها بس حتى تغث امي..
-بشير: فدوة اروح لدموعها امي الحنينة
باسها من راسها مرة الثانية واندار على شروق وكال بأبتسامة ما عرفتها مجاملة لو حقيقية..
-وفدوة لاختيارها
عوجت حلگها صولاغ ما عاحبها وظلت العرس كله كل ساعة وذبتلها حجاية يم النسوان وتدردم عليهم واشوف رجــب تكض ايد امها مادري مأيدتها لو ما راضية على حچيها..
صاحت بيه عمة نرجس اجيب الذهب ركضت لغرفة امي جبته ورجعتلهم انطيته لبشير يلبسها، طلع الجبينة (مثل الگلادة بس ثگيلة كلش وتنحط على الراس) من الصندوك ولبسه على راس شروق ونزلت شراشيبه على گصتها وراهة طلع المعاضد لبسها وطلع المرية لبسها (گلادة ليرات عثمانية) واخير شي حط بيدها المحبس وغير مكان الحلقة لاصبعها اليسرة..
-فضة: جبنالك وردة تشم بيها بس كون الوردة تداريها
باس راس شروق وراد يطلع وعمة نرجس چلبت بي الا يبقى بعد شوية وتهوسله وهو ابتسم وكعد ويه شروق ساكت بس هي حتى ابتسامة ما ابتسمت عبالك كوة عليها، وخرت من يمهم من صارت خنكة ورجعت يم جهة صولاغ وكفت وهم سمعتها تدردم وتكول للمرة البصفها..
-گبور تلف هالغرور شدعوة هالكد ذهب جايبلها شفتي الجبينة مالتها شثگلها
والمرة تجاوبها على كيف..
-اللهم صل على محمد وال محمد عدهم خير من الله ليش ما يدللون نسوانهم يا ام مضحي شكو بيها لو جابلها ذهب ودندشها
-صولاغ: ولج ما تستاهل تره هاي بت فگر ما شايفة وراح تشوف ببيت الشيخ ما يصير يعلموها هيج من البداية هم على كيفهم شجاهم خو ندري عدهم بس مو هيج
انحمست حمس من حجيها تمنيت اجاوبها جواب اللصمها بس كلت هسة تسويني جاي اتسنط عليهم وتفضحني هنا، وخرت من يمهن رجعت يم العرسان وشفت شروق ما مرتاحة تلوب بمكانها وتهفي على وجهها، توخر الجبينة من كصتها تعدل بيها وترجع على عيونها بزعت منها نزعتها وانطتها لامي شمرتها شمر..
استغربت منها وبشير ضحك يلطف الاجواء وعصر ايدها كله كدام النسوان، وكفت شروق على حيلها وكالت وصوتها يرجف..
-اريد هوا
-بشير: شنو شبيچ
وكف وياهة يهدأها بس البنية ترجف وعيونها مدمعة توترت وامي هم ظلت تتلفت على النسوان تلهيهن واشرتلي اتصرف، اخذت ايدها من بين ايد بشير اريد احاجيها وما لحكت البنية تهوعت وتقيأت على بدلتها وعلى الميز وعلى بشير تلفت الدنيا..
صاحن النسوان خايفات عليها واني بعد ماعرف شسوي لازمة شروق التتهوع و اباوع لبشير مخبوصة، ركضتلنا مـودة جرتها من ادينا ومشت بيها تطلعها تغسللها ومحد من النسوان تحركت تسويلها مجال صرنا فرجة للكل وبشير تخبل..
-بشير: ما تتحركن ما تشوفن حالها وخرري ولج
صاح بوحدة كاعدة سادة الطريق الا من عاط ياله وخرت من طريقهم، بشير لزم شروق من ايد ومـودة من الايد الثانية وامي وياهم ركضوا بيها للمطبخ يغسلولها واسمع الحجي يتطاير من كل جهة..
-ياا ياا ليش زاعت البنية خاف بيها شي
-ولجن خاف ساحريها
-لا ما اظن يجوز مريضة
-صولاغ: استغفر الله من ذنبها استغفر الله من ذنبها بس يمكن حامل
صاحت من مكانها بعلو حسها تخبلت اسمعهن وارجف عصبية اريد بس وحدة تردهن ماكو كلها انلصمت على حلكها.. اللتفتت على انيسة ميتة قهر افتهمت عليه وصاحت بكل صوتها بين الموجودات..
-انيسة: صلن على محمد عيوني صلن على محمد البنية من البارحة مريضة مستبردة وبس تتقيأ شنووو محد بيچن استبردت من گبل ومعدتها تعبت
تحجيها بضحكة حتى ميتحسسن وهنه هم يحبنها لانيسة وظلن يضحكن وياهة بس بقت كم وحدة مسمومة من جماعة صولاغ تحجي وحدها..
رجعت امي بيدها شروق وضعها احسن مغسلاتلها ومغطين بدلتها بجرجف ابيض، طبت وراهن مـودة تهلهل وتهوس من مكانها..
-مـودة: اخونا خوش اخو يستاهل الهوسة اخونا خوش اخو
روحي رايحة وكوة عليه اصفك وياهة وانيسة وفضة يهلهلهن والنسوان وياهن، عبرن شروق من يم النسوان وفوتنها لغرفة بشير وصاحن لعمة نرجس..
صاحلي بشير يريد يهدوم ركضت لغرفته فتت عليهن لكيت شروق متمددة على القريولة ومغطية عيونها وامي تلوب وتصفگ بيدها محتارة ومـودة وعمة نرحس يهدون بيها، اخذتله ملابس ورجعت انطيته اخذهن وطلع بعد ما رجع..
حجي النسوان تعب نفسيتي بس حاولت ما اخلي ببالي ورحت للمطبخ وبدينه بهوسة العشة صبينه لجماعتنا وفرشنا السفرة قسم كعدن بالهول وقسم بالصالة وقسم بالحوش ياكلن على الواكف واني والبنات نتساعد على الهوسة نلملم وراهن..
وكفنا نغسل ماعين والصواني الفرغت وشفت كحلاء اجت للمطبخ لابسة عبايتها مبينة تريد تطلع..
-جليلة: ها كحيلة وين موليه
-كحلاء: راح ارجع.. ارجع للبيت ابوي.. صار وكت علاجه
تحجي مرتبكة ووجهها اصفر، استلمنها البنات يضحكن ويضوجن بيها حتى متروح وهي اصرت الا تطلع ولامة جنطتها الجبيرة الجابتها وياهة على كلبها..
-مِــسك: صبري كحلاء خليني اشوف واحد من اخوتي يرجعج
-كحلاء: لا لا ابد ماكو داعي خية هاي اطلع وحدي لا تزحميهم تلكيهم مخبوصين ويه بشير
-مِــسك: على الاقل اشوفلج شجاع اوكفي هنا لا تتحركين هسة راجعتلج
ذبيت من ايدي وركضت لغرفتي لبست شالي وعباتي وغشيت وجهي وطلعت من باب الديوانية لجهة مشتمل شجاع، اباوع الدنيا مكلوبة هنا من جهة البستان كله زلم حرت شلون اطلع..
ضميت وجهي كله ومشيت اتسحب للمشتمل امشي ويه الحايط لا انشاف، دكيت باب المشتمل ما جاوب دكيتها مرة اللخ وظليت انتظره واتلفت اخاف لا يلكفوني اخوتي طالعة والله يحركوني..
-شجاع: مِــسك؟
اللتفتت على صوته من وراي واكف ومضيك عيونه يعاينلي مستغرب..
-شمطلعج بهالوكت؟
-اجيت اشوفك، تكدر توصل كحلاء لبيتها عمو؟
-شجاع: اي تدلل شوكت تريد هسة؟
-اي حباب
-صار من عيوني
اشر على عيونه وسوالي بيده روحي من سمع صوت زلم جاي يتقربون على جهة المشتمل، رجعت للبيت جوه نزعت عباتي ولزمني نسوان يسولفن وياي وانشلع گلبي كلما اريد اروح لكحلاء ابلغها شجاع جاي ينتظرها يلزمني غيرهن لحدما وصلت يم بيبي وحبايبها امي كاعدة يمهن وهم لزمنني يسولفن..
-شوكت نحضر عرسج مسوكة
ابتسمت مدنكة اسوي روحي مستحية والحقيقة انه لعبانة روحي من هالسؤال كل شوية وحدة لازمتني تسولف بهالموضوع، حجت وحدة من يمها بضحكة..
-عندي شلون ولد شوفته ترد الروح اذا اخطبج اله توافقين؟
ظليت منزلة راسي ووجههي مشتعل احمر، انتبهت لامي ضاجت من اسلوب المرية لانها خطبتني هالشكل وبسرعة ردتها وغيرت الموضوع..
اشرتلي بيبي اروح وفلتت نفسي منهن ورجعت للمطبخ دورت على كحلاء بعيوني ما لكيتها سألت انيسة عنها وكالت متعرف وين راحت.. افتريت البيت كله ادور مالها اثر حتى بالسطح طلعت هم ماكو وين راحت هاي..
نزلت جوه شفت بنين كاعدة بين مجموعة بنات يسولفن وهي ساكتة، اشرتلها بيدي تجيني كامت تضحك..
-بنين: همزين صحتيلي استحيت اكوم من وحدي راسي راد يطك
-مِــسك: وين كحلاء شفتيها؟
-بنين: طلعت كحلاء
-يمته طلعت؟
-من زمان كالت تأخر علاج ابوها ورجعت لبيتهم تنطيه
لطمت على رجلي محتركة منها وكلبي يلعب، عفتها ورجعت يم انيسة اريد اسولفلها احساسي ومترددة لو بس اخلص من هالتردد ارتاح..
ظليت افتر بالحوش وحدي اسمع نسوان يحاچني واوكف ابتسم بالجذب بس عقلي مو وياهن بالي كله يمها، كلما اريد اضحك على عقلي واهدأ روحي واتذكر البارحة شلون اجت وبيدها جنطتها وكضت اليوم كله تحضن بيه وتبوس وعيونها تدمع..
ماتحملت ابقى واكفة اتفرج رحت لغرفتي اخذت بوشيتي وعباتي شامرتها على سكملي بالحوش عفتهن بيدي وطلعت اتسحب من باب الديوانية لـ شجاع لكيته على وكفته متاني، لبست العباية والبوشية يم الباب خاف واحد يشوفني وصحت..
-مِــسك: شجاع
اللتفتلي ساكت تقرب يوكف يمي وانتظرني احجي، رفعت البوشية من وجهي وهمست..
-شجاع تاخذني لبيت كحلاء؟
-چا مو كلتي اوصل كحلاء لبيتهم؟
-اي بس.. اووف استغفر الله
-شبيچ مِــسك صاير شي؟
-ما صاير ولا شي بس اريد اروح لبيتهم بعدين اسولفلك
ظل واكف ما يقبل يتحرك ومن سمع صوت طكطكة وره المشتمل جر البوشية على وجهي يغطيني وهمس بنتر..
-شجاع: ما اخذج رجعي للبيت مِــسك
-عمو والله اسولفلك بعدين بس خلينه نروح فدوة
-شجاع: ماكدر شلون اطلعج هيج كدام الزلم اخوتج واكفين وولد عمج والدنيا كلها انتِ تردين تورطيني وياهم
صفنت افكر واتلفت منا ومنا شلون اطلع بدون لا يشوفني احد، اجت براسي فكرة وهمست بسرعة..
-اخذني بالكروسه
-شجاع: واذا سألوني منو بالكروسه؟
-گلهم نسوان من جماعة ام بشير
سكت يفكر وضاج لان ما يكدر يعترض هذا احسن حل نطلع منا بدون لا يشوفني احد ولا يكدرون اخواني يميزون طولي ومشيتي راح اصعد بالكروسه (عربة تجرها خيول) چني وحدة من صديقات امي وشجاع جاي يوصلني البيت..
هز راسه ما موافق بس اشرلي افوت جوه بينما يجيبها، طبيت للديوان وكفت وحدي اطكطك بأصابعي متوترة وادعي من كل گلبي كحلاء بخير وراحت فعلاً حتى تنطي علاج ابوها مو لشي ثاني..
-شجاع: مِــسك مِــسك
طلعت اتسحب على صوت همساته شفته جايب الكروسه والفرس يتحرك بمكانه متحضر يريد يمشي، فتحلي شجاع الستاره ولميت عباتي وصعدت ورجع نزلها عليه يغطيني بالكامل وهو ركب ليكدام يقود الفرس..
مسحت وجهي متوترة واحس بگلبي يدك حيل، ماشوف شي الغطا حاجب عني الضوه والنفس هم، من تتحرك الكروسه الهوا يلعب بالستارة وتتحرك شوية اكدر اشوف الشارع وشكد اكو زلم واكفين، لمحت ابن خالي كاظم من بيناتهم وسأل شجاع عن الكاعدة جوه وشجاع جاوبه بنفس حجايتي “وحدة من جماعة ام بشير”..
خف الضجيج والاصوات شبه انعدمت عرفت ابتعدنا من بيتنا ونجحت بالطلعة بدون لا يعرفني احد، ظليت ساكتة وبالي يمها لحدما وصلنا كدام بيتهم نزل شجاع وجر الغطا مني ومدلي ايده حتى اللزمها وانزل بدون لا اطيح..
نزلت وبوجهي رحت للزرعة ادور على مفتاح بيتهم الاحتياط طلعته ولمحت شي وياه، حفرت شوية اكثر بأصابعي وطلعتها ورقة مطوية كم طوية وصايرة صغيرة.. ترددت وخفت افتحها كدام شجاع حسني كلبي بيها بلا، ضميتها جوه ردن العباية والتفتت عليه وهمست..
-انتظرني شجاع ما اتأخر
-اخذي راحتج خاتونه انه افتر هنا شويه
عفته وطبيت للحوش لكيت اللوكس مشعول، ركضت لاتجاهه وطلعت الورقة من ردني افتحها بأيدين ترجف گلبي يدگ حيل ونفسي يخرخش بصدري.. بلعت ريگي اهدأ نفسي وثبتت عيوني على الكلمات اقرا واحس بعقلي فصل عن كلشي موجود..
“مسك بنت خالي الاحبها اكثر من روحي، اختي الما جابتها امي اني متأكدة انتِ اول من راح يلگه هالرسالة ويقراها لانج دوم وراي ظلچ فوگ ظلي وتخافين عليه من الهوا الطاير.. امانة ماريدج تبجين وتنقهرين عليه اني اختاريت طريقي بقناعة تامة، مِــسك اني عشگت وگلبي تلوع بحب رجال اجنبي غريب تقدملي وقبلت اتزوجه واسافر وياه للبلد العايش بيها واكون وياه عائلة، اعرف بيج راح تلوميني والكل راح يتبره مني ويكرهني بس انتِ بالذات اتمنى من كل گلبي تجربين العشگ حتى تعذريني مثلما دائماً تعذريني وتلكيلي تبرير، امانة ديربالچ على ابوية وانتبهيله گلبي يوجعني لان عفته بس مو بيدي والله مو بيدي”
**
“بنـين”
خفت هوسة النسوان وره العشا بس الزلم بعدهم حاركين الدنيا ظليت اللوب اريد اصعد للسطح اشوف بس اريد اخذ وحدة ويايه، رحت لوحدة وحدة اسئلها كلهن ما كدرن مشغولات بشي ما شفت بس رحب كاعدة وحدها تتصفن..
رحتلها كعدت يمها اسولف وهي عبالك ما مصدكة اجيت احجي وياهة كلش فرحت وظلت تاخذ وتنطي وياي وتبتسم مكيفة كسرت خاطري..
-بنين: ما لحكتي تشوفين حنة الولد البارحة امج صاحتج تعاي خلينه نتفرج عليهم هم عالكيها بره والاجواء تخبل
هزت راسها مبتسمة وصعدنا بس اني وياهة مكيفات، مدينه روسنا من سياج السطح نباوع منا الولد واكفين وره البيت على جهة البستان الدنيا مكلوبة شكد شباب ووجوه ما شايفتها من قبل وكلهم يركصون ويهوسون لبشير فرحانين بهالعرس..
-رجــب: بنين يمكن هاي الزفة مو؟
-بنين: اي الزفة عمو مكي اخذ الزلم الكبار لبيت عمو ابو نديم الله يرحمه كال ادري بولدنا رعنين يفشلوني كدامهم
ضحكنه ثنينه ورجعنا نباوع، طبوا بلال وسعد يهزون ويهوسون بالنص وراهي وكاظم حاطين دبات يدكون عليهن مثل الدنبك وبعد واحد ولد حاط صينية وخواشيك يدك بيهن وواثق يجيب ويحط بجيوبهم فلوس يحمسهم حتى يدكون بعد وكلما چــفل يجيهم ميقبل واثق يحط ايده على ركبته ويگله برگبتي الحرام..
نباوعلهم اني ورجب متونسات على الوضع والله حياة الولد احلى من حياتنا، ظلينا واكفات هواي وما تحركنا الا من سمعت صوت جاي من يم الدرج جريت ايد رجــب وركضت اني وياهة نلوف من جهة السطح الثانية بعيد عن الولد..
-رجــب: شنو شصار
-سمعت صوت يمكن باجي فوزية صعدت والله اذا لكفتنا هنا تحير شتسوي بينه
خنسنا ثنينه هنا حتى النفس گطعناه، شوية ومديت راسي اشوف راحت لو لا ورجعت بسرعة من شفتها بعدها واكفة، مادة راسها من السياج تباوع للولد..
-بنين: چنها باجي فوزية هم عجبها تتفرج على هوسة الولد
ضحكت رجــب بالخنسة ووكفنا ننتظر علما تروح، ظليت احوص اريد انزل تعبت وبردت ورجب نعست.. سندت ظهري على الحايط اريح رجلي ودرت وجهي على رجــب من شميت ريحة غريبة..
-رجــب: شنو هالريحة بنين تشمين؟
-بنين: اي عبالك نفط
اشرتلها وتمشينه اني وياهة لجهة باجي فوزية وين واكفة واستغربت من شفتها مغيرة مكانها واكفة على الجهة ثانية بالزاوية وبيدها شي مدا اميزه منا، درت عيني لـ رجــب استفسر بنظراتي وما لحكت احجي كلمة وشهكت من شفت البيدها تحول لشعلة نار وبرمشة عين ذبته على الولد وگبت بيهم جوه….
**
“بلال”
اجتنه اوامر من عمي مكي نستچن ونتأدب ونزف بشير ونولي لبيوتنا لا يجي يكسر عصاته على ظهورنا..
-واثق: هذا يا سرسري ابن سرسري فتن علينا
-وسام: اني فتنت يلا شتسويلي
هجم عليه واثق يتلاوه وياه بالضحك يتشاقون واجوا ولد جماعتهم يردون يفاككون بيناتهم عبالهم صدك يتعاركون، صياح وضحك وواحد مطل الثاني وبشير واكف مكيف يتفرج عليهم ويشجع بواثق حتى يكتله صدك..
-سـعد: بلال جاي تشم الريحة لو بس اني؟
-بلال: ريحتيش
-سـعد: نفط ريحة نفط كابة اختنكنا
-بلال: اي ولك هاي دبات النفط هنا جابوهن البارحة راهي اشترى ورزاق لكه واحد منهن مثقوب وجاي يكت جابهن هنا بعيد عن الولد خاف واحد يشمر جكارة وتشتعل بينه
-سـعد: جا هنا يخليهن انثولنا من الريحة
-بلال: هي صدك الريحة كابة بس عادي يمعود خلينه شردنا هنا نتونس بعيد عن المعقدين
-سـعد: منو معقدين ولك بس لا تقصد ابوي
ضربني كله وطفر عليه يضحك وانداروا الولد علينا يفاككون.. جانت لحظات كلها ونسة وعركات جذب وهمبلة واحد على الثاني.. دفعت سـعد مني اضحك خنكني الساقط وويه دفعتي انهز جسمي هزز بصوت قوي وانرديت ليوره..
طش الصياح بالمكان واشوف النار كبت وصارت تمشي وتاكل كلشي تلوحه، صحت خايف على سـعد وركضتله اتأكد هو زين بس عيوننا ثنينه راحت على اخويه سيف واكع بالكاع والولد محاوطي وچــفل حاطه بحضنه ويصيح متخبل..
-چــفل: سييف ولك سييف حاجيني سييف
ركضت كعدت على ركباتي يمه متسودن اخويه لا يحرك ايد ولا رجل بس جسمه كلشي مابي، درت اصيح لاخوتي وسام وراهي وصوتي ما يطلع اشوفهم يتصايحون يردون بس يطفون جهنم الي اشتعلت هنا وواثق اخذ بشير ورزاق وركضوا على بيت عمي مكي على صريخ النسوان..
چــفل يضرب بوجه سيف واني بس صافن ماعرف شسوي عيوني جحظت واديه ورجليه مكطعات، خضني چــفل حيل يصيح بوجهي ياله كدرت اتحرك وكمت مثل المخبل اركض اجيب مساعدة..
اركض والنار تتسابق وياي كل الولد تحزموا وكفوا ردانهم يردون يطفوها ومحد جاي يسيطر عليها، وصلت يم كاظم جريته من ايده وصحت بي يجيني بس ملتهي يطفي بالنار ما يسمع.. جريت عـبد الواكف بصفه من ايده حيل وصحت بوجهه..
-سييف اللحك سيييف
فك عيونه مصدوم وعاف من ايده ورجع يركض وياي على جهة سيف وچــفل ارتاحيت شوية من شفت سيف كاعد على حيله وحاطه راسه بين ايده..
-عـبد: چــفل شصار شبي سيف
-چــفل: مادري مادري چنه ما يسمعني سيف حاجيني ولك لا تموتني سيييف
واخوي بغير عالم ولا چنه ويانه، رجع راسه بالكاع وغمضت عيونه وبعد ما فتحها، كعدت يمه احجي وياه واتوسل بي يكعد كلبي مات النفس ضاگ بيه والدنيا ظلمت بعيوني..
-بلال: سيف اكعد سيف ولك لا تعوفنيييييي…….
يتبع
….
━━━━━━ ⚔︎ ━━━━━━
نكدر نكول بدت الاحداث السبايسي
-هدى: معليه اني داده شوفيلج مكان الايد ما توصله وضميهن
عافتني بحيرتي ورجعت لغرفة سيف ضميت الفلوس نفس مكانهن وظليت بالغرفة انام هنا لعد شسوي، نمت على فراشه وغمضت عيوني شكد ردت اغفى ولا كدرت ظليت اتكلب وعيوني تحركني اريد انام بس قلقة..
كمت طلعت من الغرفة لغرفة امي النسوان كلهن نايمات عفتهن ورحت لغرفتي هم النسوان كلهن نايمات بس ثنين كاعدات يبسبسن يسولفن سوه.. عفتهن ورحت للحمام غسلت وتوضيت حتى اصلي صلاة الليل بلكت ارتاح..
اخذت سجادتي من غرفتي ورجعت لغرفة سيف وتفاجأت من شفت شباج غرفته مفتوح ويلعب بالبرده الهوا، كلبي وكف ركضت على الفلوس فتحت الصندوك ادور وارتاحيت من لكيتهن موجودات..
عفتهن وكمت للشباج سديته بس القفل مالته مزعج ما ينسد عدل ويجوز الهوا العالي خلاه يفلت وانفتح، شكد تمعچلت بي اريد بس اسده ما انسد وياي عفته مردود وحطيت عليه مخدة تسده ورجعت نمت حتى صلاة الليل ما صليتها..
الصبح كعدت على صوت امي تصيح بيه، گبل لا اروحلها ركضت للصندوگ اتأكد من جنطة الفلوس وذبيت نفس من شفتها بمكانها.. عفتها ورحت اشيل المخدة واكعة من الشباج رجعتها لمكانها ورتبت الفراش وطلعت اشوف امي..
-سوسن: ماما بنينه سوي ريوك
-بنين: بعيني يمة بس راح اجيب الـ.. هذيج السالفة يمج
ابتسمت مفتهمة وهزت براسها، رحت جبت الجنطة وحطيتها يمها ورحت اسوي ريوك للنسوان، اجوني انيسة وجليلة يساعدني ونركض منا ومنا بس كملنا ريوك لبسنه ورجعنا لبيت عمو مكي الدنيا مكلوبة هنا..
وره اذان الظهر اجوا الولد جابوا جدورة الغده، وكفنا نصب ونودي للنسوان ومِــسك ومـودة خالاتهن ما خلنهن يشوفن دربهن كل شوية لازمات وحدة يسولفن وياهة وصوت ضحكهن النا واصل..
-فضة: ماحبيت خالة مِــسك الصغيرة هواي داست بالحجي
-بنين: شكالت؟
-فضة: چانن يسولفن على موضوع النقاب وتگلها حاچي ابوج حتى يخليج تنزعي من تطلعين على شنو حامسة روحج وضامة وجهج شنو مستحي منج
-جليلة: هاي شكد تمسلت لخاطر الله
-كحلاء: ومِــسك شنو جاوبتها؟
-فضة: مادري ماسمعت بعد لان صاحتلي فرح تريدني
-انيسة: بنات لا تدخلون بين البنات وخالاتهن احنه مالنه علاقة همه اهل وبيناتهم يتفاهمون
سكتنا وكملنا صب الغده وكعدنا بالمطبخ ناكل احنه حتى وراهة نروح نبدل ونتجهز، كملنا ووكفنا نريد نغسل الماعين وما قبلن بنات خالة مِــسك فرن المطبخ فر كله هنه اشتغلن وجليلة وفضة مكيفات وحلفن الا يزوجن لاخوانهن وحدة منهن..
راحن من البنات ويه امي يجيبن العروسة واحنه طبينه لغرفة مِــسك نبدل ملابسنا محد بينا خيطت شي جديد ما لحكنه بس مِــسك امها اخذتها لام مهدية الخياطة علمود نفنوف..
سولفتلنا مِــسك صايرة حجاية بيناتهن باجي فوزية لامت ام مهدية ليش تنطي نفنوف مِــسك لـ رجــب بحنة لمياء وخطية المرة شحالها صارت حتى بجي بجت وحلفت بمية امام مو هي منطيه الفستان وباجي فوزية ما لحت وياهة عرفت بتها مهدية ام المشاكل والمصايب وهي النطته بدون علم امها..
لبست مِــسك فستان ستن ازرك طوخ مخصر من فوك لحد الخصر وينزل كلوشة لحد حجلها، كله شغل ناعم وكصة الصدر مربعة وهي لابسة خناكي ليرات ذهب وياه طلعت كلش حلوة..
ظليت بس كاعدة واتفرج عليها شلون تتجهز، فتحت شعرها على طوله وتكحلت وتحمرت ووردت خدوها واخير شي تعطرت ولبست تراجيها ومحابسها، صارت عينها بعيني على المراية وضحكت من شافتني اباوعلها..
-بنين: الف ما شاء الله عليج مِــسك
-مِــسك: بعد روحي بنيني كومي بدلي لا يروح عليج الوكت
**
“مِــسك”
كملت تجهيز نفسي واللتهيت ويه يمامة وفاتنة واكفات ينوحن ويدردمن على شعرهن ليش مو سرح ولازم يلفنه، وكفت اقنع بيهن واللفه الهن يخبل صار سكتتهن بعطر وكل وحدة ضحكت عليها وعود حمرتها بس جذب ما صار لون طلعن مكيفات من الغرفة..
-كحلاء: مسوكتي احبج
جيتت تحضني من وره وحطت راسها على جتفي ضحكت عليها كابة عدها الرومانسية من البارحة كل شوية حاضنتني وتبوس بيه مادري شعدها، وخرتها مني مبتسمة وهي مسحت عيونها المدمعة..
-مِــسك: شبيچ كحيلة شو بجي واحضان لازم راح تموتين
-هههههه طاحظج اموت عليج
-بعد روحي بس مو وكتها عدنا عرس عود بعدين حبيني
كرصتني وطلعنا على صوت الهلاهل، ابتسمت من شفت البنات وباجي سوسن جايات وبيدهن العروسة شروق ملفلفيها بعباية وبوشية والبركع فوك البوشية، تلگنها النسوان يهلهلن ويصفگن بالباب بعبيهن حرگن الدنيا بگفلاتهن وهوساتهن..
-جبناها واجت ويانه بت الشيخ لابن الشيخ جبناها
وصولاغ من يمها تشمر بيدها وتحجي بحركة..
-منيلها داده منيلها يمته صارت بت شيخ هي حتى اصلها ما معروف
-مِــسك: باجي البنية يتيمة حرام عليج
-نرجس: لا تضوجيني منج صولاغ لا تكسرين خاطر البنية بيوم عرسها
لطمت على حلكها صولاغ حيل وكالت..
-اهه اهه سكتت يا كلمة ردي مكانچ
طببوا شروق ورفعوا عنها البوشية ورجعولها البركع صلوات على محمد شكد حلوة طالعة وبدلتها هم كلش حلوة تعجبت انيسة شلون امي لحكت تخيط لشروق بدلة بهالسرعة هي ما تعرف امي محضرة لعرس بشير صارلها سنتين تتمنى يتزوج حتى البدلة جاهزة..
طببوها للهول كعدناها على القنفة مغطيها بجرجف ستن ابيض ومزينتها جليلة بورد احمر وابيض صناعي كلش حلوة ونازكة.. هوسنالهة هواي وركصنه هواي ردت كلشي يكون مثالي وحلو هذا اول اخ عندي يتزوج وچبيرنا حتى لو هو نحس بس ابقى احبه واتمناله الخير..
شوية وصاحوا راح يطب العريس ركضت حطيت شال على چتافي صدر فستاني مفتوح شوية والنسوان كلهن تگبعن.. طب وطبته خير ان شاء الله خبصته خبص بالهلاهل صار ما يندل دربه وبس يضحك مصدوم بيه..
-مِــسك: بشير رايد رادته وعايف بنات ولايته وبشوري رايد رادته
والنسوان وياي يهوسن وبنات عمي وعماتي وخالتي كلهن تكابلن وياي نهوسله ونهلهل وهو بس مبتسم ومنزل عيونه ووجهه كالب احمر ضحكت اول مرة اشوف بشير هيج خجلان..
-انيسة: عزيزة وغالية ام بشير كل احنه حبايبها عزيزة وغالية ام بشير كل احنه حبايبها
تقدمت امي عليهم تبجي وتمسح بعيونها بوست بشير وبوست شروق وكلشي ما تحجي مهضومة وبس دموعها تجري.. جرها بشير من راسها باسه وباس ايدها وهمس شي بأذنها وهي تهزله راسها..
-صولاغ: شكو شكو كل هالبواچي هاي وانتِ مزوجة وليد وانتَ المختارة چنتچ
حچتها عود تشاقه والنسوان ضحكن بس اني وامي وكل التعرف صولاغ عرفنها ما تشاقه وحچتها بس حتى تغث امي..
-بشير: فدوة اروح لدموعها امي الحنينة
باسها من راسها مرة الثانية واندار على شروق وكال بأبتسامة ما عرفتها مجاملة لو حقيقية..
-وفدوة لاختيارها
عوجت حلگها صولاغ ما عاحبها وظلت العرس كله كل ساعة وذبتلها حجاية يم النسوان وتدردم عليهم واشوف رجــب تكض ايد امها مادري مأيدتها لو ما راضية على حچيها..
صاحت بيه عمة نرجس اجيب الذهب ركضت لغرفة امي جبته ورجعتلهم انطيته لبشير يلبسها، طلع الجبينة (مثل الگلادة بس ثگيلة كلش وتنحط على الراس) من الصندوك ولبسه على راس شروق ونزلت شراشيبه على گصتها وراهة طلع المعاضد لبسها وطلع المرية لبسها (گلادة ليرات عثمانية) واخير شي حط بيدها المحبس وغير مكان الحلقة لاصبعها اليسرة..
-فضة: جبنالك وردة تشم بيها بس كون الوردة تداريها
باس راس شروق وراد يطلع وعمة نرجس چلبت بي الا يبقى بعد شوية وتهوسله وهو ابتسم وكعد ويه شروق ساكت بس هي حتى ابتسامة ما ابتسمت عبالك كوة عليها، وخرت من يمهم من صارت خنكة ورجعت يم جهة صولاغ وكفت وهم سمعتها تدردم وتكول للمرة البصفها..
-گبور تلف هالغرور شدعوة هالكد ذهب جايبلها شفتي الجبينة مالتها شثگلها
والمرة تجاوبها على كيف..
-اللهم صل على محمد وال محمد عدهم خير من الله ليش ما يدللون نسوانهم يا ام مضحي شكو بيها لو جابلها ذهب ودندشها
-صولاغ: ولج ما تستاهل تره هاي بت فگر ما شايفة وراح تشوف ببيت الشيخ ما يصير يعلموها هيج من البداية هم على كيفهم شجاهم خو ندري عدهم بس مو هيج
انحمست حمس من حجيها تمنيت اجاوبها جواب اللصمها بس كلت هسة تسويني جاي اتسنط عليهم وتفضحني هنا، وخرت من يمهن رجعت يم العرسان وشفت شروق ما مرتاحة تلوب بمكانها وتهفي على وجهها، توخر الجبينة من كصتها تعدل بيها وترجع على عيونها بزعت منها نزعتها وانطتها لامي شمرتها شمر..
استغربت منها وبشير ضحك يلطف الاجواء وعصر ايدها كله كدام النسوان، وكفت شروق على حيلها وكالت وصوتها يرجف..
-اريد هوا
-بشير: شنو شبيچ
وكف وياهة يهدأها بس البنية ترجف وعيونها مدمعة توترت وامي هم ظلت تتلفت على النسوان تلهيهن واشرتلي اتصرف، اخذت ايدها من بين ايد بشير اريد احاجيها وما لحكت البنية تهوعت وتقيأت على بدلتها وعلى الميز وعلى بشير تلفت الدنيا..
صاحن النسوان خايفات عليها واني بعد ماعرف شسوي لازمة شروق التتهوع و اباوع لبشير مخبوصة، ركضتلنا مـودة جرتها من ادينا ومشت بيها تطلعها تغسللها ومحد من النسوان تحركت تسويلها مجال صرنا فرجة للكل وبشير تخبل..
-بشير: ما تتحركن ما تشوفن حالها وخرري ولج
صاح بوحدة كاعدة سادة الطريق الا من عاط ياله وخرت من طريقهم، بشير لزم شروق من ايد ومـودة من الايد الثانية وامي وياهم ركضوا بيها للمطبخ يغسلولها واسمع الحجي يتطاير من كل جهة..
-ياا ياا ليش زاعت البنية خاف بيها شي
-ولجن خاف ساحريها
-لا ما اظن يجوز مريضة
-صولاغ: استغفر الله من ذنبها استغفر الله من ذنبها بس يمكن حامل
صاحت من مكانها بعلو حسها تخبلت اسمعهن وارجف عصبية اريد بس وحدة تردهن ماكو كلها انلصمت على حلكها.. اللتفتت على انيسة ميتة قهر افتهمت عليه وصاحت بكل صوتها بين الموجودات..
-انيسة: صلن على محمد عيوني صلن على محمد البنية من البارحة مريضة مستبردة وبس تتقيأ شنووو محد بيچن استبردت من گبل ومعدتها تعبت
تحجيها بضحكة حتى ميتحسسن وهنه هم يحبنها لانيسة وظلن يضحكن وياهة بس بقت كم وحدة مسمومة من جماعة صولاغ تحجي وحدها..
رجعت امي بيدها شروق وضعها احسن مغسلاتلها ومغطين بدلتها بجرجف ابيض، طبت وراهن مـودة تهلهل وتهوس من مكانها..
-مـودة: اخونا خوش اخو يستاهل الهوسة اخونا خوش اخو
روحي رايحة وكوة عليه اصفك وياهة وانيسة وفضة يهلهلهن والنسوان وياهن، عبرن شروق من يم النسوان وفوتنها لغرفة بشير وصاحن لعمة نرجس..
صاحلي بشير يريد يهدوم ركضت لغرفته فتت عليهن لكيت شروق متمددة على القريولة ومغطية عيونها وامي تلوب وتصفگ بيدها محتارة ومـودة وعمة نرحس يهدون بيها، اخذتله ملابس ورجعت انطيته اخذهن وطلع بعد ما رجع..
حجي النسوان تعب نفسيتي بس حاولت ما اخلي ببالي ورحت للمطبخ وبدينه بهوسة العشة صبينه لجماعتنا وفرشنا السفرة قسم كعدن بالهول وقسم بالصالة وقسم بالحوش ياكلن على الواكف واني والبنات نتساعد على الهوسة نلملم وراهن..
وكفنا نغسل ماعين والصواني الفرغت وشفت كحلاء اجت للمطبخ لابسة عبايتها مبينة تريد تطلع..
-جليلة: ها كحيلة وين موليه
-كحلاء: راح ارجع.. ارجع للبيت ابوي.. صار وكت علاجه
تحجي مرتبكة ووجهها اصفر، استلمنها البنات يضحكن ويضوجن بيها حتى متروح وهي اصرت الا تطلع ولامة جنطتها الجبيرة الجابتها وياهة على كلبها..
-مِــسك: صبري كحلاء خليني اشوف واحد من اخوتي يرجعج
-كحلاء: لا لا ابد ماكو داعي خية هاي اطلع وحدي لا تزحميهم تلكيهم مخبوصين ويه بشير
-مِــسك: على الاقل اشوفلج شجاع اوكفي هنا لا تتحركين هسة راجعتلج
ذبيت من ايدي وركضت لغرفتي لبست شالي وعباتي وغشيت وجهي وطلعت من باب الديوانية لجهة مشتمل شجاع، اباوع الدنيا مكلوبة هنا من جهة البستان كله زلم حرت شلون اطلع..
ضميت وجهي كله ومشيت اتسحب للمشتمل امشي ويه الحايط لا انشاف، دكيت باب المشتمل ما جاوب دكيتها مرة اللخ وظليت انتظره واتلفت اخاف لا يلكفوني اخوتي طالعة والله يحركوني..
-شجاع: مِــسك؟
اللتفتت على صوته من وراي واكف ومضيك عيونه يعاينلي مستغرب..
-شمطلعج بهالوكت؟
-اجيت اشوفك، تكدر توصل كحلاء لبيتها عمو؟
-شجاع: اي تدلل شوكت تريد هسة؟
-اي حباب
-صار من عيوني
اشر على عيونه وسوالي بيده روحي من سمع صوت زلم جاي يتقربون على جهة المشتمل، رجعت للبيت جوه نزعت عباتي ولزمني نسوان يسولفن وياي وانشلع گلبي كلما اريد اروح لكحلاء ابلغها شجاع جاي ينتظرها يلزمني غيرهن لحدما وصلت يم بيبي وحبايبها امي كاعدة يمهن وهم لزمنني يسولفن..
-شوكت نحضر عرسج مسوكة
ابتسمت مدنكة اسوي روحي مستحية والحقيقة انه لعبانة روحي من هالسؤال كل شوية وحدة لازمتني تسولف بهالموضوع، حجت وحدة من يمها بضحكة..
-عندي شلون ولد شوفته ترد الروح اذا اخطبج اله توافقين؟
ظليت منزلة راسي ووجههي مشتعل احمر، انتبهت لامي ضاجت من اسلوب المرية لانها خطبتني هالشكل وبسرعة ردتها وغيرت الموضوع..
اشرتلي بيبي اروح وفلتت نفسي منهن ورجعت للمطبخ دورت على كحلاء بعيوني ما لكيتها سألت انيسة عنها وكالت متعرف وين راحت.. افتريت البيت كله ادور مالها اثر حتى بالسطح طلعت هم ماكو وين راحت هاي..
نزلت جوه شفت بنين كاعدة بين مجموعة بنات يسولفن وهي ساكتة، اشرتلها بيدي تجيني كامت تضحك..
-بنين: همزين صحتيلي استحيت اكوم من وحدي راسي راد يطك
-مِــسك: وين كحلاء شفتيها؟
-بنين: طلعت كحلاء
-يمته طلعت؟
-من زمان كالت تأخر علاج ابوها ورجعت لبيتهم تنطيه
لطمت على رجلي محتركة منها وكلبي يلعب، عفتها ورجعت يم انيسة اريد اسولفلها احساسي ومترددة لو بس اخلص من هالتردد ارتاح..
ظليت افتر بالحوش وحدي اسمع نسوان يحاچني واوكف ابتسم بالجذب بس عقلي مو وياهن بالي كله يمها، كلما اريد اضحك على عقلي واهدأ روحي واتذكر البارحة شلون اجت وبيدها جنطتها وكضت اليوم كله تحضن بيه وتبوس وعيونها تدمع..
ماتحملت ابقى واكفة اتفرج رحت لغرفتي اخذت بوشيتي وعباتي شامرتها على سكملي بالحوش عفتهن بيدي وطلعت اتسحب من باب الديوانية لـ شجاع لكيته على وكفته متاني، لبست العباية والبوشية يم الباب خاف واحد يشوفني وصحت..
-مِــسك: شجاع
اللتفتلي ساكت تقرب يوكف يمي وانتظرني احجي، رفعت البوشية من وجهي وهمست..
-شجاع تاخذني لبيت كحلاء؟
-چا مو كلتي اوصل كحلاء لبيتهم؟
-اي بس.. اووف استغفر الله
-شبيچ مِــسك صاير شي؟
-ما صاير ولا شي بس اريد اروح لبيتهم بعدين اسولفلك
ظل واكف ما يقبل يتحرك ومن سمع صوت طكطكة وره المشتمل جر البوشية على وجهي يغطيني وهمس بنتر..
-شجاع: ما اخذج رجعي للبيت مِــسك
-عمو والله اسولفلك بعدين بس خلينه نروح فدوة
-شجاع: ماكدر شلون اطلعج هيج كدام الزلم اخوتج واكفين وولد عمج والدنيا كلها انتِ تردين تورطيني وياهم
صفنت افكر واتلفت منا ومنا شلون اطلع بدون لا يشوفني احد، اجت براسي فكرة وهمست بسرعة..
-اخذني بالكروسه
-شجاع: واذا سألوني منو بالكروسه؟
-گلهم نسوان من جماعة ام بشير
سكت يفكر وضاج لان ما يكدر يعترض هذا احسن حل نطلع منا بدون لا يشوفني احد ولا يكدرون اخواني يميزون طولي ومشيتي راح اصعد بالكروسه (عربة تجرها خيول) چني وحدة من صديقات امي وشجاع جاي يوصلني البيت..
هز راسه ما موافق بس اشرلي افوت جوه بينما يجيبها، طبيت للديوان وكفت وحدي اطكطك بأصابعي متوترة وادعي من كل گلبي كحلاء بخير وراحت فعلاً حتى تنطي علاج ابوها مو لشي ثاني..
-شجاع: مِــسك مِــسك
طلعت اتسحب على صوت همساته شفته جايب الكروسه والفرس يتحرك بمكانه متحضر يريد يمشي، فتحلي شجاع الستاره ولميت عباتي وصعدت ورجع نزلها عليه يغطيني بالكامل وهو ركب ليكدام يقود الفرس..
مسحت وجهي متوترة واحس بگلبي يدك حيل، ماشوف شي الغطا حاجب عني الضوه والنفس هم، من تتحرك الكروسه الهوا يلعب بالستارة وتتحرك شوية اكدر اشوف الشارع وشكد اكو زلم واكفين، لمحت ابن خالي كاظم من بيناتهم وسأل شجاع عن الكاعدة جوه وشجاع جاوبه بنفس حجايتي “وحدة من جماعة ام بشير”..
خف الضجيج والاصوات شبه انعدمت عرفت ابتعدنا من بيتنا ونجحت بالطلعة بدون لا يعرفني احد، ظليت ساكتة وبالي يمها لحدما وصلنا كدام بيتهم نزل شجاع وجر الغطا مني ومدلي ايده حتى اللزمها وانزل بدون لا اطيح..
نزلت وبوجهي رحت للزرعة ادور على مفتاح بيتهم الاحتياط طلعته ولمحت شي وياه، حفرت شوية اكثر بأصابعي وطلعتها ورقة مطوية كم طوية وصايرة صغيرة.. ترددت وخفت افتحها كدام شجاع حسني كلبي بيها بلا، ضميتها جوه ردن العباية والتفتت عليه وهمست..
-انتظرني شجاع ما اتأخر
-اخذي راحتج خاتونه انه افتر هنا شويه
عفته وطبيت للحوش لكيت اللوكس مشعول، ركضت لاتجاهه وطلعت الورقة من ردني افتحها بأيدين ترجف گلبي يدگ حيل ونفسي يخرخش بصدري.. بلعت ريگي اهدأ نفسي وثبتت عيوني على الكلمات اقرا واحس بعقلي فصل عن كلشي موجود..
“مسك بنت خالي الاحبها اكثر من روحي، اختي الما جابتها امي اني متأكدة انتِ اول من راح يلگه هالرسالة ويقراها لانج دوم وراي ظلچ فوگ ظلي وتخافين عليه من الهوا الطاير.. امانة ماريدج تبجين وتنقهرين عليه اني اختاريت طريقي بقناعة تامة، مِــسك اني عشگت وگلبي تلوع بحب رجال اجنبي غريب تقدملي وقبلت اتزوجه واسافر وياه للبلد العايش بيها واكون وياه عائلة، اعرف بيج راح تلوميني والكل راح يتبره مني ويكرهني بس انتِ بالذات اتمنى من كل گلبي تجربين العشگ حتى تعذريني مثلما دائماً تعذريني وتلكيلي تبرير، امانة ديربالچ على ابوية وانتبهيله گلبي يوجعني لان عفته بس مو بيدي والله مو بيدي”
**
“بنـين”
خفت هوسة النسوان وره العشا بس الزلم بعدهم حاركين الدنيا ظليت اللوب اريد اصعد للسطح اشوف بس اريد اخذ وحدة ويايه، رحت لوحدة وحدة اسئلها كلهن ما كدرن مشغولات بشي ما شفت بس رحب كاعدة وحدها تتصفن..
رحتلها كعدت يمها اسولف وهي عبالك ما مصدكة اجيت احجي وياهة كلش فرحت وظلت تاخذ وتنطي وياي وتبتسم مكيفة كسرت خاطري..
-بنين: ما لحكتي تشوفين حنة الولد البارحة امج صاحتج تعاي خلينه نتفرج عليهم هم عالكيها بره والاجواء تخبل
هزت راسها مبتسمة وصعدنا بس اني وياهة مكيفات، مدينه روسنا من سياج السطح نباوع منا الولد واكفين وره البيت على جهة البستان الدنيا مكلوبة شكد شباب ووجوه ما شايفتها من قبل وكلهم يركصون ويهوسون لبشير فرحانين بهالعرس..
-رجــب: بنين يمكن هاي الزفة مو؟
-بنين: اي الزفة عمو مكي اخذ الزلم الكبار لبيت عمو ابو نديم الله يرحمه كال ادري بولدنا رعنين يفشلوني كدامهم
ضحكنه ثنينه ورجعنا نباوع، طبوا بلال وسعد يهزون ويهوسون بالنص وراهي وكاظم حاطين دبات يدكون عليهن مثل الدنبك وبعد واحد ولد حاط صينية وخواشيك يدك بيهن وواثق يجيب ويحط بجيوبهم فلوس يحمسهم حتى يدكون بعد وكلما چــفل يجيهم ميقبل واثق يحط ايده على ركبته ويگله برگبتي الحرام..
نباوعلهم اني ورجب متونسات على الوضع والله حياة الولد احلى من حياتنا، ظلينا واكفات هواي وما تحركنا الا من سمعت صوت جاي من يم الدرج جريت ايد رجــب وركضت اني وياهة نلوف من جهة السطح الثانية بعيد عن الولد..
-رجــب: شنو شصار
-سمعت صوت يمكن باجي فوزية صعدت والله اذا لكفتنا هنا تحير شتسوي بينه
خنسنا ثنينه هنا حتى النفس گطعناه، شوية ومديت راسي اشوف راحت لو لا ورجعت بسرعة من شفتها بعدها واكفة، مادة راسها من السياج تباوع للولد..
-بنين: چنها باجي فوزية هم عجبها تتفرج على هوسة الولد
ضحكت رجــب بالخنسة ووكفنا ننتظر علما تروح، ظليت احوص اريد انزل تعبت وبردت ورجب نعست.. سندت ظهري على الحايط اريح رجلي ودرت وجهي على رجــب من شميت ريحة غريبة..
-رجــب: شنو هالريحة بنين تشمين؟
-بنين: اي عبالك نفط
اشرتلها وتمشينه اني وياهة لجهة باجي فوزية وين واكفة واستغربت من شفتها مغيرة مكانها واكفة على الجهة ثانية بالزاوية وبيدها شي مدا اميزه منا، درت عيني لـ رجــب استفسر بنظراتي وما لحكت احجي كلمة وشهكت من شفت البيدها تحول لشعلة نار وبرمشة عين ذبته على الولد وگبت بيهم جوه….
**
“بلال”
اجتنه اوامر من عمي مكي نستچن ونتأدب ونزف بشير ونولي لبيوتنا لا يجي يكسر عصاته على ظهورنا..
-واثق: هذا يا سرسري ابن سرسري فتن علينا
-وسام: اني فتنت يلا شتسويلي
هجم عليه واثق يتلاوه وياه بالضحك يتشاقون واجوا ولد جماعتهم يردون يفاككون بيناتهم عبالهم صدك يتعاركون، صياح وضحك وواحد مطل الثاني وبشير واكف مكيف يتفرج عليهم ويشجع بواثق حتى يكتله صدك..
-سـعد: بلال جاي تشم الريحة لو بس اني؟
-بلال: ريحتيش
-سـعد: نفط ريحة نفط كابة اختنكنا
-بلال: اي ولك هاي دبات النفط هنا جابوهن البارحة راهي اشترى ورزاق لكه واحد منهن مثقوب وجاي يكت جابهن هنا بعيد عن الولد خاف واحد يشمر جكارة وتشتعل بينه
-سـعد: جا هنا يخليهن انثولنا من الريحة
-بلال: هي صدك الريحة كابة بس عادي يمعود خلينه شردنا هنا نتونس بعيد عن المعقدين
-سـعد: منو معقدين ولك بس لا تقصد ابوي
ضربني كله وطفر عليه يضحك وانداروا الولد علينا يفاككون.. جانت لحظات كلها ونسة وعركات جذب وهمبلة واحد على الثاني.. دفعت سـعد مني اضحك خنكني الساقط وويه دفعتي انهز جسمي هزز بصوت قوي وانرديت ليوره..
طش الصياح بالمكان واشوف النار كبت وصارت تمشي وتاكل كلشي تلوحه، صحت خايف على سـعد وركضتله اتأكد هو زين بس عيوننا ثنينه راحت على اخويه سيف واكع بالكاع والولد محاوطي وچــفل حاطه بحضنه ويصيح متخبل..
-چــفل: سييف ولك سييف حاجيني سييف
ركضت كعدت على ركباتي يمه متسودن اخويه لا يحرك ايد ولا رجل بس جسمه كلشي مابي، درت اصيح لاخوتي وسام وراهي وصوتي ما يطلع اشوفهم يتصايحون يردون بس يطفون جهنم الي اشتعلت هنا وواثق اخذ بشير ورزاق وركضوا على بيت عمي مكي على صريخ النسوان..
چــفل يضرب بوجه سيف واني بس صافن ماعرف شسوي عيوني جحظت واديه ورجليه مكطعات، خضني چــفل حيل يصيح بوجهي ياله كدرت اتحرك وكمت مثل المخبل اركض اجيب مساعدة..
اركض والنار تتسابق وياي كل الولد تحزموا وكفوا ردانهم يردون يطفوها ومحد جاي يسيطر عليها، وصلت يم كاظم جريته من ايده وصحت بي يجيني بس ملتهي يطفي بالنار ما يسمع.. جريت عـبد الواكف بصفه من ايده حيل وصحت بوجهه..
-سييف اللحك سيييف
فك عيونه مصدوم وعاف من ايده ورجع يركض وياي على جهة سيف وچــفل ارتاحيت شوية من شفت سيف كاعد على حيله وحاطه راسه بين ايده..
-عـبد: چــفل شصار شبي سيف
-چــفل: مادري مادري چنه ما يسمعني سيف حاجيني ولك لا تموتني سيييف
واخوي بغير عالم ولا چنه ويانه، رجع راسه بالكاع وغمضت عيونه وبعد ما فتحها، كعدت يمه احجي وياه واتوسل بي يكعد كلبي مات النفس ضاگ بيه والدنيا ظلمت بعيوني..
-بلال: سيف اكعد سيف ولك لا تعوفنيييييي…….
يتبع
….━━━━━━ ⚔︎ ━━━━━━
نكدر نكول بدت الاحداث السبايسي
