رواية ارواح هائمة الفصل الرابع 4 بقلم آثر توفيق

   الحلقة     4

 وصل حليم ومعه كوثر الى المستشفى وسالوا عن المجند ووصلوا الى حجرته وعندما وصلوا اليها وجدوا امراة شابة تبدو من اهل الصعيد تجلس على الارض وعلى حجرها رضيع وبجوارها طفلة وكان الطبيب يفحص الحالات بالداخل فانتظرا حتى خروجه لتساله كوثر 

كوثر :: ايه اخبار العسكرى حسين يا دكتور 

الطبيب :: مين حضرتك يا مدام ؟

حليم :: احنا اهل الرائد محمود العطار والعسكرى اللى عنده بتر ده كان معاه وهو موصينا عليه 

كانت المراة تهم بدخول الغرفة فتوقفت لتسمع بدهشة 

الطبيب :: المسكين حالته النفسية سيئة جدا بسبب البتر لكن ده امر الله وغيره فقد اكثر من عضو والحياه لازم تمشى 

نعمة :: تمشى ازاى ؟ جوزى كان راجل على باب الله عامل ارزقى بيجيب قوت اليوم بيومه لحد ما دخل الجيش ودلوقت حتى مش حيقدر يشتغل العيال دى تاكل منين ؟

كوثر :: انتى مراته ؟

نعمة :: ايوه يا ست هانم ودول ولاده غير اللى فى بطنى هو انتى مراة الظابط بتاعه ؟

كوثر :: اه وهو اللى باعتنى والشيح عبد الحليم ده اخوه 

نعمة :: طيب خليه يا ست يكلم الناس الكبار يعملوا لحسين معاش علشان يعرف يربى العيال انا مش عارفه حيشتغل ازاى بعد ما ضيع رجله فى الحرب ؟

تاملتها كوثر ووضعت يديها على كتفيها تطمئنها قائلة 

كوثر :: ما تحمليش هم اى حاجه انتى وجوزك وعيالك فى عينينا دلوقت تعالى ندخل نتطمن عليه 

دخلوا جميعا فوجدوا فى ركن الغرفة البعيد شابا فى منتصف العقد الثالث اسمر اللون نامى اللحية يبكى فى صمت وحين رآهم ادار وجهه نحو الحائط فاقتربت منه زوجته تحايله 

نعمة :: يا حسين برضه مش عاوز تكلمنى ؟ طيب وعيالك برضه مش عاوز تكلمهم ؟ طيب بصلى معلش ده امر الله 

ولكن حسين دفن وجهه بين كفيه واستمر فى البكاء دون رد

نعمة :: خلاص يا حسين مش عاوز تكلم مراتك نعمه ؟ كرهتنى طيب بلاش تكلمنى ولا تكلم العيال طب سلم على الضيوف اللى جايين من اخر الدنيا وتاعبين نفسهم علشان يشوفوك انت عارف دى مين ؟ دى مراة الظابط محمود حبيبك 

كوثر :: انا حرم الرائد محمود عبد الرازق العطار يا حسين 

انتبه حسين كلية واعتدل فى جلسته وادار وجهه اليهم وهتف 

حسين :: حضرتك حرم محمود بيه معقول جايه تزورينى مخصوص واللا محمود بيه بعد الشر هنا فى المستشفى 

ابتسمت كوثر وقالت بصوت مبحوح 

كوثر :: لا انا جايه ازورك مخصوص محمود باعتنى وموصينى معقول اللى انت عامله فى نفسك ده ؟ قوم وارفع راسك يا بطل انت عبرت وانتصرت وخليتنا نرفع راسنا من تانى شد حيلك انت راجل شديد وبطل 

دمعت عينا حسين تاثرا وقال شاكرا 

حسين :: كتر خيرك يافندم محمود بيه راجل ولا كل الرجاله شالنى على كتفه تلات ايام ما رضيش يسيبنى حتى وهو واخد طلقه فى دراعه شايلنى لحد ما سلمنى للهلال الاحمر 

كوثر :: طبعا مش ممكن يسيبك مستحيل كان يسيبك لانك بطل ضحيت برجلك علشان نرفع راسنا لا هو سابك ولا احنا حنسيبك ولا مصر كلها ممكن تسيبك لوحدك زى ما اديت لازم تاخد واحنا لو نديلك عينينا مش كفايه عليك 

حليم :: انا ابن عم الرائد محمود وجاى مع المدام علشان ننقلك مستشفى فى اسكندريه وناخدك مع عيالك عندنا زى ما محمود وعدك 

حسين :: بس حضرتك محمود بيه وعدنى قبل ما رجلى تروح انما دلوقت …..

حليم :: يابنى رجلك دى سبقتك للجنه والشغل معانا رجلك مش حتحوشك احنا حنراعيك ومرتبين سكن علشانك انت وجماعتك والمدام ومراتى طول الليل يروقوا فيها علشانكم 

حسين :: طول عمر القائد محمود بيه اب لرجالته ودايما معاهم فى الحلوه والمره ودايما شايل همهم حتى وهو على الجبهه بيحارب 

كوثر :: الحرب خلصت خلاص واحنا انتصرنا انتوا اللى انتصرتوا ورفعتوا راسنا ورديتوا لنا كرامتنا يا رجاله يا ابطال محمود ورجالته هم الابطال اللى جابوا النصر وحرروا الارض ودفعوا تمن الكرامه من دمهم الغالى 

حسين :: يعنى الحرب خلصت ؟ طب ومحمود بيه لسه على الجبهه ؟ 

حليم :: محمود. البطل محمود سبقك للجنه يابنى ربنا اكرمه بالشهاده 

انتفض حسين غير مصدق وهتف وهو يكاد يبكى 

حسين :: محمود بيه مش ممكن ياريتنى كنت مكانه ياريتنى انا اموت فداه 

كوثر :: اخص عليك ليه بتقول كده ده شهيد يعنى تفرحله 

تهدج صوتها وحاولت قدر الامكان ان تحبس دموعها وهى تضيف 

كوثر :: احنا فرحانين علشانه لانه استشهد وهو واقف على رجليه وقبل ما يقابل ربه كان جاب النصر ودمه كان غالى 

نعمه :: ربنا يصبرك يا ست معقول جوزك مات وجايه تتطمنى على عسكرى عنده ؟

التفتت كوثر وهى تحافظ على ابتسامتها بجهد كبير 

كوثر :: ايوه دى وصيته هو بعتلى جواب وهو على الجبهه علشان ادور على حسين معقول اخالف امر جوزى ؟ انا فرحانه علشان جوزى بطل مات شهيد ورد لى كرامتى ورد للبلد كلها كرامتها وقبل ما يقابل وجه كريم سابلى ذكرى جميله سابلى بنت اتولدت يوم ما عبر القناه بس كان نفسى يشوفها قبل ما ……

فقدت تماسكها وانهارت مقاومتها فبكت فاحتضنتها نعمة وربتت عليها فى صمت فتماسكت كوثر واضافت  

كوثر :: انا حاعمل بوصيته واعمل كل اللى يقدرنى ربنا عليه معاكم وانتوا ادعوله بالرحمه وادعولى ربنا يصبرنى ويجمعنى بيه فى الجنه

#ارواح_هائمة    

قضت كوثر ليلتها فى شقة للعائلة بالقاهرة بصحبة نعمة واولادها بينما اخبرهم حليم انه ينوى زيارة سيدنا الحسين وصلاة الفجر هناك وسيلاقيهم صباحا 

كوثر :: الشقه دى بتاعتى انا واختى اللى بييجى القاهره بيبات فيها ممكن الاقيلك هدوم تغيرى فيها بس صعب الاقى للاولاد معلش 

نعمة :: كتر خيرك يا ست مش لازم كلها سواد الليل 

كوثر :: والنبى يا نعمه بلاش ست دى قوليلى يا كوثر انا اسمى كوثر 

نعمة :: الله اسم حلو قوى بس ما يصحش انا حاقول يا ست كوثر 

كوثر :: يوووه بلاش نشفان دماغ تعالى بس اقعدى 

دخلت غرفتها لتجلب ملابس تناسب نعمة وحين خرجت وجدتها جالسة على الارض تجمع اولادها حولها فضحكت 

كوثر :: ايه اللى انتى عاملاه ده مالك قاعده على الارض ومكتفه العيال كده ؟ سيبيهم على راحتهم وانتى خدى غيرى هدومك لو الوقت مش متاخر كنت اشتريت لهم لكن بكره نجيب لهم من اسكندريه 

نعمة :: هو احنا حنروح اسكندرية بكره ؟

كوثر :: اه بكره ان شاء الله حنجيب عربية اسعاف تنقل حسين المستشفى هناك وابن عمى دكتور شاطر قوى حيعالجه وانتوا حتيجوا معانا على البيت حتعيشوا هناك ياللا ادخلى غيرى اسمعى الكلام 

اطاعت فى استسلام ودخلت لتبدل ملابسها وحين عادت كان يبدو عليها الخجل فاشارت لها كوثر لتقترب 

كوثر :: الهدوم جت على مقاسك تعالى اقعدى 

همت بالجلوس على الارض ولكن كوثر امسكت بيدها واجلستها بجوارها على الاريكة قائلة 

كوثر :: احنا حنركب لحسين رجل صناعيه علشان يقدر يروح وييجى وحيبقى الحارس بتاع البيت ووضبنا اوضه كده على ما قسم تعيشوا فيها وانا مش حاقصر معاكى ولا مع عيالك 

نعمة :: طيب يا ست كوثر انا ممكن اشتغل علشان حسين مش حيقدر كده لوحده لو عاوزه خدامه 

كوثر :: لا عيب انتى جوزك راجل حارب وانتصر ده بطل وربنا حيقدره على مسئوليتكم انا مش حاقبل ان مراة واحد من رجالة جوزى تروح تشتغل خدامه حتى لو عندى . انا جوزى وصانى عليكم ومش حاقصر ولو شفتى منى تقصير 

نعمة :: تقصير بعد كل اللى عملتيه ولسه حتعمليه يا ست كوثر انتى ملاك 

وهمت بتقبيل يدها فمنعتها كوثر واحتضنتها قائلة

كوثر :: وبعدين بقى يا نعمه العمايل دى بتزعلنى وكفايه بقى قومى نحضر الاكل علشان العيال اكيد جعانين قوليلى هى بنتك اسمها ايه ؟

نعمة :: اسمها رحمه والواد اسمه محمود اصل حسين سماه على اسم الظابط بتاعه كان بيحبه قوى وبيقول عليه كلام كتير ويحكى عن عمايله وكنت ساعات افتكر انه بيهول 

نظرت كوثر الى الطفل وابتسمت ومدت يدها اليه فناولته اياها نعمة فاحتضنته وقبلته قائلة 

كوثر :: محمود الصغير عاوزاك تكبر وتبقى ظابط فى الجيش زى عمك محمود وتبقى اسد الصحراء الصغير اللى يفكر الناس بيه وبسيرته 

نعمة :: ندر عليا يا ست الكل انى اربيه واكبره لحاجه واحده بس انه يبقى ظابط ويبقى زى محمود بيه فى كل حاجه فى قوته وشجاعته وطيبة قلبه على عساكره 

________________

تم نقل المجند حسين الى المستشفى العسكرى بالاسكندرية وعادوا للمنزل بعد الاطمئنان عليه مصطحبين نعمة واولادها وهناك استقبلتهم ثريا مرحبة 

ثريا :: حمد الله على السلامه البيت من غيركم وحش ايه الاخبار ؟

حليم :: الحمد لله جبنا الراجل هنا ودى مراته البنات فين ؟

ثريا :: فوق نايمين منوره البيت يا … انتى اسمك ايه ؟

نعمة :: نعمة ام محمود

ثريا :: ام محمود اسم غالى اتفضلى تعالى 

اسرعت كوثر تطمئن على البنات بينما دخل حليم لابدال ملابسه واصطحبت ثريا نعمة الى الصالة 

ثريا :: منوره يا نعمه احنا نتغدى مع بعض وبعدين انزل اوريكى الاوضه ان شاء الله تعجبك ولو ما عجبتكيش فيه اوضتين على السطح 

نعمة :: مش عارفه اودى جمايلكم فين يا ست 

ثريا :: ثريا انا اسمى ثريا انا اخت كوثر وانا اللى نضفتلك الاوضه وابقى مراة الشيخ عبد الحليم 

نعمة :: كتر خيركم انا مش عارفه اتكلم من عطفكم عليا انا وعيالى 

كوثر :: سامعاكى . مش قلنا بلاش الحساسيه دى يا نعمه ؟ خدى الامور ببساطه علشان تعرفى تعيشى انا عاوزه افهمك حاجه مش معنى ان جوزك حيشتغل بواب انه اقل مننا ولا انتى اقل مننا انما ده سبب للرزق شغلانه ربنا يبعتله بيها رزق عياله المهم انه رزق حلال 

وهنا دخل حليم مؤيدا كلامها 

حليم :: الله ينور عليكى يا كوثر بصى يا نعمه صحيح ربنا يرزق من يشاء بغير حساب ولكن بسبب لان ربنا قال ( وجعلنا لكل شئ سببا ) يعنى شغله سبب رزقه انما رزقه بايد المولى كتير شويه دى بتاعة ربنا وبعدين ربنا يرزق واحد رزق بسيط ويخلى طلباته بسيطه ورزقه يكفيه ويرزق واحد تانى ويوسع فى رزقه لكن يكتر طلباته ويصيبه بمرض علاجه مكلف ورزقه الكتير ما يكفيش علاجه يبقى مين احسن ؟

نعمة :: اللى رزقه مكفيه طبعا يا عم الشيخ 

حليم :: حاجه كمان ربنا يرزق واحد جنيه حلال ويرزق التانى الف جنيه حرام وييجى فى الاخره يحاسب الاتنين اللى رزقه حلال يدخل الجنه واللى رزقه حرام يدخل النار والرزق الكتير ده ما ينفعهوش بحاجه يبقى مين احسن ؟

نعمة :: اللى رزقه حلال احسن طبعا 

حليم :: وشغلانة البواب حلال واللا حرام ؟

نعمة :: حلال طبعا واحنا راضيين بيها ومعاكم حنبقى مبسوطين ربنا يزيدك من علمه يا عم الشيخ 

 ثريا :: طب ياللا نحضر الاكل انا ما رضيتش اتغدى مستنياكم وطبخت لوحدى حاحضر كمان لوحدى ؟

وبعد الغذاء نزلوا الى الطابق الاسفل وحين دخلت نعمة الغرفة التى كانت تماثل شقة صغيرة بحمام ومطبخ صغير اتسعت عيناها انبهارا وهتفت 

نعمة :: هى دى الاوضه اللى حنقعد فيها 

كوثر :: لو مش عاجباكى فيه اوضتين على السطح 

نعمة :: مش عاجبانى ؟ دى قصر انا حافضل ادعيلكم ان ربنا يستركم واعيش خدامه ليكم لحد ما اموت 

كوثر :: ما تقوليش كده الخير خير ربنا وانتى واحده من البيت اعتبرى نفسك انتى وعيالك من العيله وربنا يقدرنا ويقدرك نربيهم احسن تربيه