رواية عقارب ذوي القربي الفصل الحادي عشر 11 بقلم انين الليل
مرحبا
اتمنى اتصوتون من تقرؤون اقلها كافئو جهودي كل بارت اكثر من 4000كلمه وبدون اخطاء.
انتم كرام واحنا نستاهل
تحياتي
________________
مها
خفت وانا اشوف الدم بفراشي صرت ارجف بالزايد رحت امشي بسرعه والدم ابين رجليه وكاتلني الخوف
ندهت بيبي وانا ابجي = بيبي بيبي اگعدي شوفيني
هيه گعدت وهيه تگول // بسم الله الرحمن الرحيم شبيج شصاير
انا واكفه وكل جسمي يرجف من شافتني ابتسمت وجرت نفس وكالت
لا تخافيين كل ابنيه بعمرج وازغر يصير بيها هالشكل
انا شويه هدئت وكلتلي// روحي للحمام غسلي وانا جايتج
رحت للحمام غسلت وانا ارجف واجت بيبي دكت الباب انطتني لباس داخلي وقطعة قماش مصفطتها وفهمتني شلون
اخليها مؤقت على ما تروح للدكان تجيبلي حفاظات نسائيه
اخذتها وانا اسمعها تكول
— – – الله يساعدك ياحليم على شنو تريد تلحك حليب لو حفاظات لو البنات الكبرن شگد يراد الهن شغلات
وانت تطلع الصبح الي تحصله تروح بي بالليل تشرب وتسكروترجع تبچي وتصيح احبها
بعدني ارجف رحت للغرفه غيرت دشداشتي ولميت فراشي واتمددت على بساط قديم فارشته بيبي بالغرفه
وعيوني تجري دمع يمكن على نفسي وعلى اخواتي ويجوز حتى على ابوي
مغطيه وجهي بالبطانيه واحس بيبي اجت رفعت عن وجهي الغطا وكالت //كومي اشربي چاي ايدفي بطنج
گمت بدون ما احچي رحت وراها گعدت شفتها سالگه بيض وجايبه صمون حار سوتلي لفه وانطتني كوب چاي وگالت
– – ياالله بيبي اتريگي ولا تخافيين كل ابنيه يصير وياها هالشكل
باوعت الها هيه هزت راسها // اي حبيبتي هذا الشي كلنه مرينه بي من چنا بعمرج ليش تبچيين
الوج بالگمه ودموعي نزلن وشهگت بيبي جاوبتني // كافي هسه اروح اجيبلج حفاظات وانتي ارتاحي اليوم
كل شي لاتسوين ياالله يابيبي اتريكي
شربت چاي وصرت اكل باللفه وبيبي هم اتريگت سالتني // هسه احسن
هزيت راسي وبيبي كالت
– – استغفر الله ياريتج ميته يانهله ولا سويتي السويتي ولچ كون هسه انتي يم بناتج وتعلمينهن الصح من الغلط
ما اكول اله الله يطيح حظج يانذله حسبي الله ونعم الوكيل عليج
اتحسرت بيبي وراحت شالت الصينيه وغسلت ع المغسله وانا ما اعرف اوصف احساسي وحتى خوفي
من انو اتحرك ويصير بيه شي بقيت كاعده واجت بيبي وهيه لابسه عبايتها وحاچتني
انا هسه رايحه للسوك وانتي ما طوول ملاك نايمه روحي نامي وارتاحي ولو انا زعلانه عليج
باوعت الها هيه هزت راسها // اي زعلانه شلون اتطردين عمتج وكدامي هوه هذا هم تصرف وهيه مخابره
سليم ومعين من سمع ما اتحمل واجه ضربج
جاوبتها بعتب = هوه بس ضربني هوه موتني
عيوني غوركن بالدموع // دي كافي بيبي انتي اتعرفينه المعين عصبي وهوه من سمع بيج هيچ مسويه ما اتحمل
حاجيتها وانا اشهك = بيبي مو گدامج عمتي حلا رادت تحرك ايد روان لان ضربت ابنها
بيبي هزت راسها //اي الي سوته اروينه غلط
= ها يعني ابنها يضرب رهف كلش عادي بس احنه لازم ما نحچي ولاندافع عن نفسنا
– – بيبي مها احمد جاهل وحتى مطفي
= ورهف هم جاهل وروان وحتى انا
بيبي جرت نفس بحسره واجت يمي وحضنتني // والله كلامج صح بس كل الصار من جوه راس امج الخاطري
لاتحچيين الابوج يروح يتعارك ويه عمامج وتصير چبيره
هزيت راسي = لا ما احجي
– عفيه ابتي انا راح اروح وانتي من يكعدن اخواتج خلي يتريكن مخليه جبن بالثلاجه مالت المطبخ
= وابوي
– ابوج گعدته من الصبح وريگته حتى يروح للشغل
راحت ورجعت عليه //بيبي مها ديري بالج تحچيين الابوچ تره عمامج اعصاب وانا ما اقبل ايمدون ايدهم علي
وطلعت بيبي وعرفت انو ابوي فقير او خلي نكول بمصطلح هسه انو ضعيف شخصيه وانو بيبي اتحب ابوي وتخاف
علي من عمامي وانا هم لازم اخاف علي
رحت للغرفه اتمددت وغطيت راسي بالبطانيه ودرت وجهي رفعت راسها رهف وهيه اتگلي
مها اليوم هم ما اروح للمدرسه
باوعتلها ونفخت = نامي رهوفه باچر ترحين
هيه گمزت من مكانها واجت بحضني //صدك مها
رغم الالم بس حضنتها ومسدت على شعرها وهزيت راسي = اي صدك باچر تداومين
ليش مو اليوم
= لا حبيبتي رايح الوكت والمديره ما تدخلج للمدرسه
رهف // يعني تضربني
= حبيبتي يجوز اتضربج ويجوز اترجعج
رهف // بس باچر اداوم
= گولي ان شاالله
رفعت ايدها //ان شاالله
روان رفعت راسها وكالت // ولج ارهيفه انطمري خليني اعرف انام لا اگوم اموتچ
رهف باوعتلي وهيه عاكفه حواجبها ابتسمت وشاورتها = روحي نامي وهاي اروينه ما عليج بيها مخبله
هيه شاورتني // بس انا احبها لان هيه ضربت احمد الحقير
= عفيه بالحلوه
واحبج لان انتي طردتي عمه بس اكرهه المعين الشرير لان ضربج
ابتسمت على كلامها // منو گلج
هيه باستني وكالت // انا سمعتج اتصرخيين نزلت وخفت منه ورجعت بعدج متاذايه
هزيت راسي =لا حبيبتي انا زينه بس انتي كومي ارجعي على فراشج
ايي
بقيت افكر وادري برهف ما نايمه وما اكدر اگوم اريگها لان اخاف متلفه دشداشتي دم لكن من شفتها تتكلب
وكفت ودرت دشداشتي شفت ما بيها شي رحت يمها وشاورتها = ياالله رهوفه گومي على كيف خلي اريگج
هيه وكفت وهيه مبتسمه وراحت انا وياها واشرت ع الحمام يعني روحي راحت وطلعت غسلت بالمغسله
وانا اباوع الها واكللها بالصابون اول غسلي اديج وهيه تراويني شلون لازمه الصابونه اجت يمي خليت الها جبنه
وصبيت الها جاي كاسرته بماي صارت تاكل وتسالني // صدك باچر اداوم
هزيت راسي هيه ردت // احلفي
= وداعة رهوفه
وبابا
= انا احچي ويا
اكوم ادرس
= اي بس قبلها جيبيلي ممة ملاك خلي اغسلها ولا تسوين صوت حتى ما تكعد
اي
راحت وجابت الممه وجنطتها وگعدت بالصاله صارت تراجع بالدروس الي ماخذتهن وتقرا بصوت عالي وهيه
تقلد معلمتها // ياالله يابنات منو تقرا الدرسس
وهيه ترفع اصبعها وتوگف //سه سه سه ست
ياالله رهف اقري
وتوگف وتقرا بكتابها منظرها ايضحك ابتسمت وانا اباوعلها شلون گعدت وصفطت اديها وصارت تقراسورة الفاتحه
والاخلاص وتقرا اركان الاسلام
اباوع الها وعيوني دمعت وانا اشوفها كانما كل مشاكلها انحلت بمجرد ما گلت راح اترجعين للمدرسه وقررت استغل
كتلة عمي الصالح اخواتي واخلي بيبي توافق تقنع ابوي حتى يرجعن للمدرسه
اجت بيبي ودكت الباب وراحت رهف فتحته وشافت بيبي جايه من السوك دخلت والعلاكه بايدها باوعتلي شافتني
كاعده بالصاله وارضع ابملاك بالممه بيبي سالتني //اشلون صرتي
هزيت راسي = زينه الحمد لله
روينه وين
= بعدهي نايمه
تعاي وراي
شلت ملاك ورحت وره بيبي الي حاچتني وهيه تشرب ماي من ثلاجتها // هاج هذني الج البسيهن مثل ما علمتج
اخذي وحده وروحي للحمام ومن تطلعين ذبي الوصله خليها بهاي العلاگه وغسلي زين
هزيت راسي وانا احس يطلع من وجهي نار بصراحه استحييت كلش ورحت للحمام سويت مثل ما كالت بيبي
ومن طلعت صرت اغسل باديه بالصابون بعدها رجعت لگيت بيبي خاله ملاك بحضنها اجيت يمها وسالتها
= بيبي شنو نطبخ
جبت باميه وربع لحم هسه اروح اطبخ
= راح اجي وراج
لا انتي ابقي يم اختج انا شويه واگوم اطبخ
= زين بيبي الله يخليج احچي ويه ابوي خلي نرجع للمدرسه
جاوبتني باستغراب //يامدرسه هاي
= بيبي مدرستنا ليش نبطل
– – بيبي المدرسه يرادلها هدوم ومصرف وابوكم ما يلحك
= بيبي احنه السنه عدنا هدوم وما نريد مصرف وسنة التجي الله كريم
– – ابوچن ما يقبل
= بيبي مو احسن الج بدل ما تجي عمه حلا وتتعارك ويانه وعمي معين يجي يضربنه لان محاچيات احميد
ابنها وابوي يسمع ويبقى يتعارك ويه عمي وعمتي
بيبي. بنتر //ولج مو چنج اتهددين
هزيت راسي = لا بيبي انا اگول انتي احسن الج عاد تفتكين من عدنا نص النهار
– ها وهاي مليكه منو الها
= بيبي مثل كل يوم اذا انا صباحي روان واذا انا عصري ابقى يمها
-والشغل كله عليه
= بيبي يمته انتي مشتغله وحتى امي يمته درت بينه لو اهتمت بيبي انا اخلص الشغل وانظف وادير بالي على
اختي وكل شي اسوي بس خلينه ندرس عفيه بيبي الله يخليج (وحضنتها )
هيه هزت راسها وكالت // ياالله خوش بس اسكتي انا احجي ويه ابوچ ما عليج
بستها براسها وايدها وانا اگللها =الله يخليج حبوبه
گعدت روان وهيه تتثاوب وراحت غسلت بيبي من شافتها حاچتها // بعد وكت ليش هسه اتگعدين
– بيبي شوراي انتو مو بطلتونه من المدرسه
هزت ايدها وراحت للمطبخ وانا غيرت الملاك حفاظتها بعد ان غسلت الها ورهف راحت الروان وهيه
تحاچيها بفرح // روان باچر اداوم
روان فتحت عيونها وعكشت وجهها// تداومين منووگلج
مها
باوعتلي وهيه اتاشر على رهف // هاي شتحجي
هزيت راسي = ايي بيبي راح تحچي ويه ابوي
روان // بس انا ما اريد اداوم
اتقربت يمها وانا خاله اصبعي يم حلكي = اششش اياني واياج اسمع هاي الكلمه منج
روان // ليش باالله ؟
= وشتسوين تبقيين اهنا
سكتت انا حاجيتها = تبقيين انتي يبقى عليج كل الشغل وحتى ملاك
روان بقلة صبر // يااا شنو عليه الشغل
= اي لان ما تداومين خو مو تكضينها نوم ونجي احنه انخدمج
روان سكتت وحچيت وياها = بس تكملين ريوك روحي نظفي الغرفه وشيلي الفراشات
هيه هزت راسها وبيبي كملت الغدا ونريد انصب اندك الباب واجه معين چنت گاعده بغرفة بيبي
ع التلفزيون يمي ملاك ورهف من شفته اجه ودخل يم بيبي للمطبخ وهيه اتساله //اشو اليوم جاي على وكت
معين // اي الاستاذ ماجاي وطلعنه شنو طابخه
– – باميه وتمن
– – زين راح ابدل بين ما تصبين
صبت بيبي الغدا وروان فرشت السفره بالصاله واجه هوه يباوعلي صفح انا ما باوعت بوجهه گعد يم بيبي
واجت روان هوه سوالها مكان بصفه باوعلي وكال
ايي مهاوي شلونها الكتله
انا غصيت وبيبي كالتله بعصبيه // معين شنو هالحچي هذا انته شبيك
معين // شبيه يمه سالتها اتعلمت من الكتله لو بعد تريد
– – عوف البنيه
معين // حتى تتعلم ما تطرد اختي من بيت ابوها
بقيت ساكته ومدنگه والدمعه بعيني هو حچى
– – قابل انا اكرهها انا من كتلتها اريد اعلمها ما تتجاوز شوفيني ليش ما مديت ايدي على رونه لان سباعيه وتسمع الكلام
وحضنها من جهة چتفها روان جاوبته //. بس حلا اقصد عمتي حلا رادت اتچويني حتى فتحت الچدر رادت
اتغط ايد بي وهوه ايفور وهاي بيبي اسالها
معين // حتى لو عمتچن وتحترمنها
روان وهيه ترفع ايدها العمي معين //حتى لو غاطه ايدي وحاركتني
هو لزم ايدها وظل يمسح بيها // شحدها اتحرگج هيه رادت اتخوفج مو هيج يمه
بيبي هزت راسها وكالت // كافي معين خلي نتغدا
اتغدينا وروان سوت جاي وغسلت المواعين وانا اخذت ملاك الغرفتنا وبيومها اجه ابوي العصر وبيبي حچت
ويا حتى نرجع للمدرسه هو رد عليها //يمه ما ترهم بعد
ليش يمه
يمه الي ايداومن هذني الي الله فاتحها على ابوهن وامهن فووك راسهن
بيبي // شنو هالحچي هذا حليم الرزق على الله وشنو ماكو بنات بالمدرسه يتيمات وماكو امهن مطلكه وشنو
كل الي ايداومن بنات تجار هنه شيردن ايكلفنك
ابوي // يمه ما عدي تره المحل تجيله ايام محد ايگلي السلام عليكم
بيبي // ما يردن شي خليهن ايكملن السنه عود وسنة التجي انا اتكفل بلبسهن ومصرفهن وهوه تره حتى
هسه ومن اول ما سجلت مها بالمدرسه كله مني وامهن من جانت يمهن ما الها شغل بس بروحها
ابوي اتحسر وجاوب // ادري يمه وانتي ما مقصره بس شغل البيت وهاي الطفله منو الها
بيبي // لاتخاف البنات دوامهن معاكس يعني وحده تروح وحده تجي
وگف ابوي او وجه كللمه البيبي //زين يمه خلي ايداومن بس مو كل ما اجي تكولين تعبانه ومهدود حيلي وهاي
گدامج ياويلهن اذا اجت شكوى منهن لو ايگلولي كسلانات موت اموتهن
– – لا يمه هنه شاطرات ومؤدبات وباچر ايفيدن نفسهن شفت بنات ام عادل شلون فادن نفسهن وكلهن اتوظفن
واحوالهن كلش زينه وشفت شلون دللن امهن واخوهن الوحيد
ابوي هز راسه وجاوب // اي بنات ام عادل امهن فووك راسهن كسرت ظهرها وهيه تلف كبه وتبيع مووع…
بيبي قاطعته // وان شاالله بناتك هم ايرفعن راسك ويزيحن كل التعب والقهر الي مريت بي
صعد بدون ما يجاوب وعيونه مليانات دموع لكن ايكابر بيبي صارت تحچي وهيه العبره متكسره بصدرها
– – الله يبلاج يانهله شگد حقيره وما تخافين من الله حطمتي الولد وكسرتي خاطره
بالليل اجه عمي سليم يم بيبي ويا معين وعمه كفايه وصارو ايسولفون بمواضيع عاديه ولا احد جاب طاري امي
وطلاگها او تركها النه وحتى عمه كفايه صارت تتعامل ويانه ابرود زايد
ابوي نزل وسلم وانا رحت صبيتله عشا وخليته گدامه سليم ساله // شنو چنت نايم
ابوي // اي اجيت تعبان وصعدت نمت
– – خير ان شاالله
ابوي صار ياكل وانا جبتله ماي مجرد ما كمل راح غسل ودار وجهه يريد يطلع عمي سليم وگفه
اوگف حليم وين رايح
– – طالع
– – اگعد يمنا
ابوي بحسره // ضايج ابو سهيل اريد اتمشى
معين باستهزاء اي خلي يروح يتمشى (ويأشر بايده ويدنيها على حلگه كأنما يشرب )
ابوي رجع // شقصدك معين
معين يبتسم بتشفي // ما قصدي شي اكول روح اشرب قصدي اتمشى
ابوي بعصبيه // انته ما عليك ما لك شغل بيه
سليم // تره معين ما حچى شي
ابوي بعصبيه // لا حچى واستهزأ
طلع وطبگ الباب ورا قوي عمي سليم سال بيبي // هذا شبي
– – يمه عوفه الله يساعده البي مكفي
كفايه // حجيه المن ايده الله يزيده
بيبي عوجت حلگها وسالت عمه وهيه تجر بكلامها // شلون يعني من ايده الله يزيده
كفايه وهيه تهز بايدها // شنو ما تعرفينها النهله من اجت ودخلت هذا البيت وهيه بغير عالم شنو ربت نظفت
خو بيوم اذا الطبخ عليها چانت تكلب الدنيا ما نشوف ضحكتها اله من تطلع
سليم // اي مو تروح اتن…وترجع فرحانه
بيبي // استغفر الله
سليم // عليمن يمه تستغفرين شنو مچذب انا لو هيه خطيه فقيره وجاي نتبلى عليها
كفايه باستغراب // شنو هالكلام هذا تره عيب وحرام
سليم // اي حرام اذا مچذب وعيب اذا ما صاير
بيبي // كافي سد الموضوع
معين // سدا ابو سهيل امي ما تقبل على گرايبها
سليم // والله تقبل ما تقبل هذا الصدك
كفايه // سليم انته تعرف شجاي تحچي
سليم // اي اعرف واعرفها وحده كلبه باگت فلوس رجلها والله العليم شجانت تسوي خليها سكته تره مالي خلك
گام سليم وباوع البيبيتي وكلها // وهذا ابنج خلي ايبطل من العرك وينتبه النفسه
بيبي ردت //والله يمه احچي علي هم هوه خطيه مصدووم
سليم هز ايده // ياالله كفايه كومي خلي نروح
– – اي هسه ابو سهيل
وگفت وكالت // صدك عمه سمعت حليم امبطل البنات من المدرسه
بيبي // اي بطلهن بس انا حچيت ويا ومن باچر ايرجعن
كفايه // يا عمه وهاي الطفله منو الها خو مو انتي
– – لا اخواتها يتناوبن عليها خطيه خليهن ايداومن عاد يندلن طريقهن
كفايه // مو خاف انتي اتعبين
بيبي حاجت كفايه ابرود // شنو ام سهيل انتي غريبه عنه تره البنات شايلات ارواحتهن من هنه زغار واذا
على ملوكه فمها حتى تنيمها بحضنها هسه صار الكم ساعتين شفتوها جابتها يمنه سمعتولها نفس
كفايه //اي عمه هنه شاطرات انا عليج انتي خاف اتعبين
– – لا ما اتعب
سليم // وهنه شلهن بالمدرسه ايگعدن اهنا وينثبرن
بيبي بنتر // سليم البنات ايداومن حالهن حال كل البنات
كفايه // سليم خليهن ايداومن عادي شعلينه
اتقرب من بيبي // ومن ايكبرن يسوون كسرة وجه حالهن حال امهن
بيبي بعصبيه // من ايكبرن غصبن ما على ابوهن يلتزمهن
سليم باستهزاء // خلي يلتزم نفسه وينتبه الروحه بالاول ياالله يلتزم اربع بنات
بيبي // ان شاالله ينتبه الروحه خو ما يبقى هالشكل اول وتالي نشوفله بت حلال يتزوجها وان شاالله تستعدل اموره
كفايه وهيه تبتسم // بس عمه هالمره عفيه شوفيله صدك بت حلال مو مثل ذيج هم تجيبله اربعه وتعوفه عاد صدك تصيرون مدرسه
بيبي بعصبيه // ليش انا اشوفله خو انتو عمامه وانطو وحده من بناتكم ولمو هوه مو وحد من الي نطيتو ومعيش
بتكم بمرار وضيم
كفايه بعتب // يا عمه اتعيرين اب صفاء هذا حظها
بيبي هزت راسها // وهم حظ حليم مثل ما صفاء اخذت الها واحد يشرب ويسكر ويلعب اقمار واذا لزمها كفر بيها
وماخلالها ذهبه ولا غرض بالبيت خلف الله عليج انتي واخواتج كل ما تجي اتلملها وعيشتنها ذاك عمر وهذا عمر
هم حليم اخذله وحده عذبته واذته
سليم // لا يمه گولي اخذله وحده ساقطه دايحه
بيبي بقلة صبر //اي مثل ما تگول
كفايه رادت تنهي النقاش // ياالله سليم خلي نروح باجر عندك شغل
وراحو بيت عمي ومن يومها قررت ابرمج نفسي وحتى اخواتي لازم ما ننطي الكل واحد فرصه لو ايفك حلگه
ويحچي لو حچايه وحده علينه ولازم ننسى عدنا ام
وثاني يوم چانت روان ورهف صباحي وانا ظهري بس ما حبيت اداوم گلت خلي اغيب هاي اليومين
واداوم بداية الاسبوع ومن حلن شفت الفرحه بعيون رهف لان طلعتها المعلمه فارسة الصف رغم چانت
غايبه اما روان فالمعلمات مرزلاتها وام العلوم ما قابله اتاجل الها الامتحان وهي ممتحنه وتگول جاوبت
على نص الاسئله
بوست رهف الي شفتها صعدت درجتين ونزلت وشفايفها ايرجفن وهيه تگول
عبالي ماما فووگ ردت اصعد افرحها وتشوف الفارسه مالتي
باوعت الها ما عرفت شجاوبها هيه اتقربت عليه وسالني // مها ماما يمته تجي
هزيت راسي وابتسمت = تجي رهوفه بعد هلگد وتجي
روان گلت الها // رهف امي بعد ما تجي مها اتچذب عليج
هيه باوعتلي بعتب //صتك اتچذبين عليه
جريت نفس وخزرت روان الي ما همها وصارت اتبدل = ما عليج بيها ماما تجي ما عليج ياالله رهوفه بدلي خلي انصب غدا
رحت للمطبخ وصبيت الغدا واجت روان تشيل الصحون وانا شايله الصينيه ودولكة الماي خليتهن ورحت صحت
البيبي الي شفتها
لازمه السبحه وتسبح = ياالله بيبي صبينه الغدا
هزت راسها واجت وانا طلعت الها خبزه خليتها گدامها لان هيه تحب تاكل خبز ويه المرك والخضره
رهف // بيبي اليوم طلعوني بالساحه صفگولي طلعت فارسه
هيه باوعت وابتسمت بوجهها // عفيه برهوفه الحلوه
روان // انتي شخبصتينه مكتشفه القارات
رهف // بيبي شوفيها
بيبي // خلي تولي تغار منج لان طلعوج فارسه وما طلعوها
رهف // وتچذب
بيبي رفعت حواجبها // شلون
رهف // تگلي امي بعد ما تجي بس مها تكلي بعد هلكد وتجي
بيبي باوعتلي ونفخت وهزت راسها // اي بيبي بعد شهر وتجي
روان // صدك
هزت راسها // اي صدك شنو مچذبه عليج ياالله بس اتخلصن روحن نامن
= يعني ما اسويلج چاي
لا خلي شويه انام ومن اگعد عود خدريلي
هزيت راسي = صار
بيبي // اروينه انتي شيلي الصينيه وغسلي المواعين اليوم مها تعبت
روان // اي بيبي
رهوفه هاج (مدت ايدها على جيبها طلعت ربع ) العصر روحي اشتري جبس
روان // چا وانا
انتي ما الچ فوك ما كسولي وما طلعوج تعيبين على رهوفه الحلوه الشطوره (تعض بشفتها الروان يعني اتشاقى وياج )
روان مثلت عود تبجي // لا بيبي ما اقلد عليها انا احبها
بيبي // بكيف رهف انطيها لو لا
رهف //اي بيبي خطيه روان انطيها هيه اتحبني وحتى بالمدرسه اي وحده تحچي وياي تروح تتعارك وياها
بيبي زمخت على روان // ولچ عرمه مگضيتها بس عرايك
روان تضحك //لا والله بيبي بس ما اخلي وحده تاذي رهوفه الحلوه
هاج الج ربع وهذا المهاوي اشترلها بي بس العصر انا رايحه انام واذا اجه ابوج لو عمج معين صبله غدا
ابوي اجه الساعه بالثنتين ونص وانا سالته اذا يريد غدا هوه جاوبني // لا ماكل بالمحل
وصعد فووك العصر دزيت روان ورهف على بنيه بمنطقتنا جابت الجدول الي ومناك اشترن جبس واجن
وبيومها انا وروان حضرنه دروسنا رغم معارضتها وكالت تريد تباوع تلفزيون بس انا فهمتها انو لازم نشد
حيلنه احنه شغل ومدرسه يعني التلفزيون ما نگدر انشوفه اله قليل
روان جاوبتني //مو بيبي اتعرفيها ما تقبل نفتحه عود شويه العصر وبثمانيه لوبالتسعه تكول طفنه لو ديرنه
الي على الاخبار
هزيت راسي وگتلها = ما عليج بس يطلع ابوي نصعد الغرفته نباوع على تلفزيون ما…
ما كملتها للكلمه روان // وهاي نبقى يا صاعدين يانازلين ومن يندك الباب وملاك والشغل
= انا احلها ما عليج
الجمعه گعدت الصبح لگيت بيبي مهدره الجاي وسالگه بيض صبحت عليها = صباح الخير
صباح النور
بيبي اصبلج ريوك
اي انا سلگت اربع بيضات كشري بيضتين وخلي اثنين من يگعد ابوج
اي بيبي
صبيت الها الريوك باوعتلي وكالت //. بعد شويه واروح اجيب سمج ديري بالج ع البيت روحي گعدي ابوج
صعدت وفتحت الغرفه شميت ريحه خنگتني ما اعرف شلون اتحملتها ما اتقيأت وشفت ابوي نايم على وجهه
ع الجربايه وايده نازله منها ويمه بطل عرفت هوه هذا الي يشربه وصلت يمه = بابا بابا
امم
= بابا بيبي تگول خلي ينزل يتريك ويروح الشغله
عوفيني تعبان اريد انام
= يعني اكلها ما تروح
هو جر نفس // ايي
نزلت وكلت البيبي = يكول اريد انام تعبان ما عندي شغل
بيبي // منين تعبان من الشرب استغفر الله ياربي بهالولد
راحت بيبي غسلت وعدلت شيلتها ودخلت للغرفه لابسه عباتها سالتها = بيبي شسوي
– – لا تسوين شي مو البارحه منظفه البيت بس اغسلي ملابس اخواتج
= اي صار
وراحت بيبي وانا دخلت للغرفه مالتنا وطلعت الملابس والصداري غسلتهن ابايدي وشريتهن والملابس البيض
وملابس ملوكه خليتهن بالغساله ورجعت اقرا وبنفس الوقت محتاره شنو اگول للمدرسات من ايسالني ليش غايبه
لازمه كتابي واندك الباب رحت شفت بيبي جايه = ها ما اتاخرتي
هذا السوك بسرعه اشتريت سمج وخضره وطرشي واجيت
شلت المسواك عنها وجبت الها گلاص ماي ونزعتها جواريبها بيبي گعدت وكلتلي
روحي خلي السمچات بصينيه ع السنك
= اي بيبي
رحت وشفتها راحت للحمام غسلت رجليها اندك الباب اجت جيرانه ام عصام
سالتني // وين بيبي
= اتفضلي
رحت البيبيتي = بيبي ام عصام اجت
وينها
= بالصاله
غسلت ايدها // هلا ام عصام
هلا بيج ام سليم هالايام ما اشوفج گلت اسال عليج
اي والله ملتهيه
هم سمعت الله يساعدج
شسوي خيه لعبت بينه جوله وهالتشوفين عافت الها اربع بنات وراحت
خطيه هالبنات كاسرات خاطري امس بت عصام گالت بيبي داومن
بيبي هزت راسها //اي بالشافعات ياالله خليت ابوهن يقبل ايداومن
جبت ماي وخليته كدامها ورحت حميت الجاي وصبيت استكانين خليته يمهن بيبي كالت نكعي تمن
هزيت راسي ام عصام سالت بيبي // والشغل ام سليم
بيبي // شنو انتي عبالج نهله چانت تشتغل لا وداعتج فد وحده كاظيتها نوم وطلعه ومكياج الشغل چان عليه وعلى
مرت سليم وانوب على هاي المسكينه
= مها تعرف تشتغل
بيبي // اي نادره كل شي تعرف بس ما تخبز
ام عصام هزت ايدها ولمت حلكها // خطيه انكسر ظهرها بالشغل وهيه زغيره
بيبي // شتسوي بعد. بلكي اشوفلي بنية حلال وازوجه الابوهن
– – ام سليم ما طولج عدله ديري بالج على البنيات خطيه ما الهن احد بس الله وانتي ولا تكليلي بت حلال وتدير بالها عليهن
بيبي // لا خيه وداعتج ما بيهن كل اذيه ما چنها نهله امهن
ام عصام // الله يبلاها اكو ام تعوف بزرها وانوب بنات
بيبي // بعد شنسوي ما ادري حظ ابني ما ادري حظهن
راحت ام عصام وبيبي هم كامت للمطبخ لگتني منكعه التمن ومنظفه الخضره هيه حضرت حشو السمج وشوينا
وانا رحت شريت الملابس اجه عمي معين فتحتله الباب روان سلم على بيبي وراح للحمام سبح وطلع راح الغرفته
وبيبي كالت اندهو ابوكم راحت روان وهو نزل سلم وغسل وكعدنا ناكل
معين ساله // شنو اليوم ما طلعت للمحل
لا ما بيه حييل وما عندي شغل
حليم تره الشغل يجيك من تفتح المحل مو من انته نايم
بابا // تعبان كلش ظهري حييل يوجعني
كملنه الغدا بيبي گالت سوي چاي وروان شالت المواعين ومعين گال // رايح الغرفتي رونه جيبيلي كوب جاي
روان تغسل بالمواعين وانا كملت الچاي واخذته الابوي وبيبي گالت الروان صبي العمج كوب واخذي اله
وصلت الغرفة بيبي وهيه تكله // ما تبطل من شرب هذا السم ما تباوع الروحك البناتك
ابوي // يمه مو بايدي اريد اموت
بيبي // عليمن على خلك وحده چلبه ما تسوالها نعال
ابوي // اي يمه تدرين بيه شگد احبها
بيبي بنتر // كافي حس على نفسك وانتبه الروحك وبناتك
دخلت خليت الچاي يمهم ولزمت ملاك ابوي سال بيبي // يمه هاي البنيه هادئه ولا تشبه الجهال
بيبي // اي تريد اتداري خبزتها
ابوي // هههه يمه شداري كله عمرها ست تشهر
بيبي // الله مخليها هادىه لو مثل باقي الجهال من صارو چا شلون بينه او وين نوديها
ابوي صفن وضحكته اتلاشت خله وصعد للغرفه شلت الاستكانات ورجعت اخذت ملاك للغرفه خليتها
يم روان دنكت عليها وشاورتها = راح اشرب كوب چاي واحچي ويه ابوي حتى انزل التلفزيون
روان // وليش تشاوريني
= خاف ما يقبل ورهف تلطش وحتى نوم ما تخلينه انام بالليل
هزت راسها ولملمت حلكها // اووف اذا لطشت بويه تطرشنه طرش مستعده تبقى يومين تحچي واسبوع تبچي
ابتسمت = ديري بالج على ملوكه
رحت شربت چاي وغسلت الكوب والاستكانات وصعدت الغرفة اابوي والباب مردود سمعته يخابر اب امي
وهوه يستعطفها // نهله ارجعي تدرين بيه ما اكدر اعيش بدونج
-ارجعي وشنو تردين اسويلج
-اعيش خادم الج
– لا ما تعبت يوميه اخابرج وكل ساع ابوس رجلج كل شي تردين سوي
-اغلطي عليه سبيني فشري بس ارجعي حبابه
-اموت عليج لاتعوفيني احبج ما اكدر اعيش بدونج
– لا نهله لاتسدين التلفون نهله نهله
بهالحظه عرفت ابوي شكد ايحب امي ومستعد كل شي يسوي ويمكن يقبل على تصرفاتها ما انكر بذيج اللحظه
ضجت منه لكن عرفت بعدين انو ابوي يمتلك عاطفه والكل مستغله واكيد بمرور الايام راح يستغلونه اكثر
5
بقيت كاعده بالسطح لا اكدر انزل ولا اگدر ادخل للغرفه بقيت گاعده وانا كلامه يرن اباذني ومقهوره
= ليش ينزل نفسه الوحده مثل امي
وگفت وجريت نفس ودكيت الباب
منو
= انا بابا
فتحت الباب شفته يمسح بدموعه ويداري وجهه سالني // ها مها شرايده
= بابا رهوفه تريد اتباوع ع التلفزيون واحنه هم وبيبي بس ع الاخبار
– – اصعدن اهنا باوعن
= بابا والبيت شلون نهوس غرفتك
جاوبني بقلة صبر // چا شتردين اشتري تلفزيون
= لا بابا انته ما تكعد تباوع كله بالشغل ناخذ هذا انزله جوه بغرفتنا
هز راسه //. بكيفج اخذي
=. زين بابا شكرا راح اشوف وين اخلي واصعد اخذه
نزلت ودخلت الغرفتنا روان // ها بشري
ابتسمت = قبل ما كال شي هسه خلي اشوف وين اخلي
روان // اهنا بس يرادله ميز
= هوه انزل الميز الي خالينه علي
اتمددت شويه واندك الباب راحت روان واسمع صوت حلا // امي نايمه لو گاعده
روان // بغرفتها
اجت كالت // عمي سليم ويا خرعه
= هههه لا تسمعج روحي اخذيلهم ماي
روان // اخذ سم انتي وديلهم
رحت اخذت دولكة الماي وگلاص ودخلت // السلام عليكم
سليم // عليكم السلام
حلا ما ردت بيبي كالت // سوي جاي
سليم // لا شاربين وجايين
انا انسحبت رحت للمطبخ ورجعت گعدت بمكاني ع القنفه اريد اسمع شيحچون بيبي گالت // شبيك سليم شكو بس اتنفخ
جر نفس // البنات
– يابنات
– – هذني مها واخواتها
بيبي / / نصي صوتك شبيهن
سليم // شنو يمه اشبيهن البنات لازم حليم يشوفله صرفه وياهن
بيبي // هوه هذا شلون حچي
حلا // هذا الحچي الصح
بيبي // اسكتي انتي لا تذبين ع النار نفط
حلا //ها چي حچيت الصدك
بيبي // شو كل الي الزمه يگول حچيت الصدك شنو وين تودونهن الامهن مو انت تكول مو زينه يعني
شتسوي بيهن من يروحن الها
سليم // مشكلتها انا حچيت ويه اخوها وگتله مثل ما اختك انهزمت وباگتنا تاخذ بناتها
بيبي // واخوها شگال
– – صار يتهدد وانته تتهم اختي وراح اگعدك للحق ولو انا لو انته
بيبي // يمه اسكت تدري بهذا اخوها طارق فد واحد بس ايدور مشاكل عوف الموضوع هسه مو وكته
سليم // يعني شنو
بيبي // اسكتوما طول انا موجوده البنات باقيات
///////////………/////////يتبع
