رواية عقارب ذوي القربي الفصل التاسع 9 بقلم انين الليل
مها
من سمعت الي سمعته رحت امشي وكأنما مسحوبه من عيوني رحت للغرفه ما اشوف شنو گدامي خليت اديه
على وجهي واتخايل الموقف موقف امي ويه سليم وموقفها ويه معين وصارت گدامي حياتي بس موحياتي
الماضيه لا حياتي القادمه وشنو الي راح يصير بيه وباخواتي
بيومها ما طلعت ولا وحده من اخواتي طلعن ولا عرفت شنو صار ولا اتعشينه حتى رهف وملاك وكأنما عرفن
بالي صار بقن نايمات بس ملاك گعدت بنص الليل وسويت الها ممه ورجعت نامت سمعت حركه ودمدمه
وكلام لكن ما طلعت ولا ردت اعرف شنو شصاير
الصبح گعدت وانا ابد ما نايمه شفت معين نايم بالصاله رحت غسلت واتوضيت وصليت وبقيت بالغرفه
ما طلعت للمطبخ مثل كل يوم اسوي ريوك حسيت هذا البيت مو النه والناس البي غربه ما اعرفهم
او انا غريبه عنهم حسيت ابيبي گعدت واجت تشوفنه لكن انا اتمددت وغطيت وجهي هيه ما حچت
راحت وبعد فتره اسمعها اجت وگالت //ياالله بيبي اگعدن وراچن مدرسه
-مهاوي گعدي اخواتج حتى يتريگن وروحن للمدرسه ياالله حبيباتي اگعدن
كلام بيبي اثر بيه كله حنيه وعطف لكن كلام سليم ومعين خوفني حييل
اتحركت من فراشي وندهت روان خليت حلگي باذنها وگتلها رونه اگعدي راح الوكت
وندهت رهف واخذتها من ايدها للحمام وبعدها غسلت الها وجهها وبللت شعرها واخذتها حتى امشط الها
تلاگيت ويه بيبي الي طلعت من المطبخ وابتسمت وهيه تگلي //صباح الخير اليوم متاخره بالكعده
– – صباح النور نمت وتوني كعدت
نوم العوافي
ورحت امشط الرهف وروان گعدت وراحت غسلت واجت تبدل من كملت رهف رحت للمطبخ حضرت
الهن كوبين حليب وخليت فوگه چاي وصمونات واخذته الهن ما ادري ليش اتصرف هالشكل سمعت بيبي
تصيح عليه //مها مها تعالي
رحت شفت عمي سليم متمدد يمها بالغرفه عرفت هوه ما راح البيتهم وصلت يمها = ها بيبي
روحي صبي ريوك العمج سليم واندهي معين
هزيت راسي رحت للمطبخ احضر الريوك بيبي سالگه بيض گشرتهن وخليتهن بالصحن وخليت بصحن ثاني
جبن واخذت الصينيه للغرفه ورحت على معين ندهته == عمو عمو عمو معين اگعد اتريك
فتح عينه والثانيه مغمضها
=عمو بيبي تگول اكعد اتريك وراك دوام
هو جر نفس واتثاوب كعد وراح للحمام غسل وطلع اجه للغرفه وجبت القوري والاستكانات سمعت سليم گله
—. روح خلي حليم ينزل رايده
راح معين وهوه ساكت وانا خليت الصينيه مال الاستكانات وطلعت من الغرفه للمطبخ ما اعرف شسوي لمن
ما ابوي نزل ودخل الغرفة بيبي وبقو ساكتين عرفتهم يتريگون رحت الغرفة اخواتي شفتهن مكملات
ريوكهن ولابسات جنطهن حتى يرحن للمدرسه من طلعن مرن على غرفة بيبي لان متعودات ياخذن
مصرفهن منها انا وراهن شايله ملاك وصلن روان كالت // صباح الخير
باوعلها ابوي وعكف حواجبه وهوه يگول بعصبيه // وين وين رايحات
جاوبته انا وسط ذهول روان = بابا للمدرسه اليوم دوامهن صباحي وانا عصري
ابوي // روحن انزعن ملابسچن ماكو مدرسه
الكل اتفاجأ بكلام ابوي بيبي جاوبته// حليم شبيك يمه خلي البنيات يرحن للمدرسه
ابوي ايهز راسه // لا ما يرحن والي تطلع اكسر رجلها
شفت نظره متبادله بين سليم ومعين روان جاوبته // بابا ليش ما نروح انا اليوم عندي امتحان
ايوي وكف وقرب على روان ولزمها من شعرها وهوه يگول // گلت ماكو دوام يعني ماكو دوام
روان صارت تگول // اااخ بابا هدني انا شمسويه
وگف معين ابيناتهم وگله //حليم على كيفك ويه البنات
ابوي // لحد ايگلي على كيفي شيسون ايداومن ايگعدن بالبيت احسن
بيبي // انت اتخبلت حليم عوف البنات
ابوي وهو يهز بايده بطريقه عشوائيه // لا لا ما يداومن والتطلع اكسر رجلها هذا هوه ايبطلن ويكعدن
روان صارت تبچي هوه اتقرب مني وكال // البنات يبقن يديرن بالهن على هاي الطفله ياكلن وينچبن منين
اجيب ملابس لو مصرف مدارس
ردت احجي سليم اتقرب مني وگال // اخذي اخواتج وروحي للغرفه ولا تداومن
باوعتله وهزيت راسي ولزمت ايد روان قوي
= ياالله روان جيبي رهوفه وتعاي هذا هوه ابوي كال ماكو دوام خلص
معين اتقرب من روان // ياالله رونه اسمعي كلام ابوج روحي اليوم لاتداوميين
شفت روان عيونها غرگانه راحت وياي وهيه ساكته ورهف اجت سدينه الباب وكعدنه وروان تبدل ملابسها
وبعدين بدلت الرهف اسمع لغط وكلام بصوت عالي واحنه ساكتات ما نعرف شنو الي جاي يصير اندك باب
الغرفه فتحته روان شفت معين واكف كال // لا تزعلن يوم يومين او انا احجي ويا (وكرص روان من خدها ) بس لاتزعلين
روان بزعل // عمو ما شفت ابوي اشلون كمشني من شعري
معين // مي خالف ابوج مقهور وتعبان
راح معين وبعدها طلعو حتى ابوي هم ما بقى بالبيت واحنه بقينه بالغرفه تقريبا صارت الساعه بالتسعه اندك باب الحوش رحت انا سالت =منو
– – انا عمي
=منو انت
– – هذا بيت حليم عبد ريسان
فتحت الباب شفته شرطي جاوبته = اي عمو
– – هوه موجود
= لا عمو ما موجود
– – زين صيحيلي واحد چبير
= اي هسه
رحت البيبي = بيبي هذا رجال شرطي يريد ابوي بس انا كتله ما موجود گلي صيحيلي واحد چبير
طلعت بيبي وهيه لابسها عبايتها وانا وراها // اتفضل يمه
– – حجيه اشلونج
– – هلا بيك
– – حجيه هذا تبليغ الحليم عبد شيعودلج
– – ابني
الشرطي هز راسه // تمام اي حجيه هذا التبليغ تنطي اله ولازم يحضر للمحكمه
بيبي اخذت الورقه // ان شالله يمه
راح الشرطي وهيه تباوع للورقه وتقرا بيها وراحت للغرفه اجيت يمها سالتها // بيبي شنطبخ اليوم
باوعتلي وتلم بحلكها // تمن وعدس ونجيب روبه
هزيت راسي ورحت نگعت التمن وصرت ارتب بالبيت وبيبي بغرفتها گاعده وروان ورهف يم ملاك
روان ترسم ورهف تلعب بلعابتها وملاك نايمه وانا اشتغل لكن الكلام الي سمعته يرن بااذني والخوف من
الجاي بي وما يزيد
اجت بيبي طبخت التمن وانا طلعت باكة كرفس وطماطه وسويت زلاطه ناعمه وراحت روان جابت سطل روبه
وصبيت وبدينه ناكل وانا اشوف بيبي ضايجه وهالمره حتى ما باوعت بوجهنه وكملنه ولميت الصينيه
وروان راحت غسلت المواعين وسالت بيبي اذا تريد چاي هيه هزت راسها بلا
وجبت المكناسه وكنست غرفة بيبي وبديت اكنس بالصاله واسمع بيبي تخابر بعمي سليم وكالعاده فاتحه السبيكر وتگله
جيب حليم وتعال
يمه شكو شصاير
لا ما صاير شي بس رايدتكم بشغله
اجت رهف وفتحت التلفزيون بيبي بعصبيه // طفي اريد انام
رهف // لا ما اطفي اريد اشوف كارتون
روان // رهوفه خلي نشوف المسلسل عفيه
لا اريد كارتون
بيبي اهنا وگفت وطفت التلفزيون وكالت الروان //اخذي اختج وروحن نامن ومن يجي ابوچن گلله ينزل
الچن تلفزيون الخاتون امچن معلمها تلفزيون اهلها
اتفاجأت روان بتصرف بيبي الي اول مره نشوفه منها وراحت هيه ورهف للغرفه وانا كملت التنظيف وبقيت
منتظره وعيني على الباب لمن ما اندك ورحت ركض افتحه لان عرفت ابوي وعمي سليم اجو
دخلو انا كتله = الله يساعدك بابا الله يساعدك عمو
عمي سليم رد ابرود وبابا كال // هلا بابا وين بيبيتج
= بغرفتها يمكن نامت
هم دخلو للغرفه وانا رحت للمطبخ اخذت جكاية ماي وكلاص ورحت يمهم بيبي
– – صبي غدا الابوج وعمج
رد عمي سليم //تونه اتغدينه بس اذا حليم بعده جوعان صبيله
بابا // لا شلقصه اكلت الحمد لله
– – حليم انت ما اكلت
ابوي والعبره خانگته // شبعان ابو سهييل شبعان
سليم باوعلي وكال //روحي سويلنه چاي
هزيت راسي ورحت اركض ولان انا خالته فوك السيبايه ومنصيه العين بس دخلت للمطبخ طلعت واجيت اتسحب
اسمع شنو بيبي تريد من ابوي وعمي
بيبي // اي يمه خابرتكم حتى اگللكم اليوم الصبح اجه شرطي وجاب تبليغ
عمي // تبليغ ماليش
نهله قايمه دعوة طلاك
وطلعت بيبي الورقه // هاك شوفها
ما اعرف منو اخذها لكن سليم رد // چا شگد صلفه يعني هيه ثاني يوم الراحت مسويه الدعوه
بيبي // اي يمه وهسه لازم تشوفون حل
ابوي // شنو الحل ما اطلك لو تطلع براسها نخله
سليم // شنو ما تطلك مره ما تريدك لازك بيها
ابوي // اي لازك بيها اريد فلوسي بعدين يمه انتي ما خابرتيها
بيبي // لا ما خابرتها اذا صبحت بوجه الشرطي جايبلي تبليغ
سليم باستغراب // شنو عليش امي تخابرها
اجه معين وكال // السلام عليكم
عليكم السلام
شكو شصاير
سليم جر نفس // هاي نهله قايمه دعوة تفريق واليوم الشرطي جاب التبليغ
معين // اي عادي مو جديده عليها
سليم // وامي تريد اتخابرها ما ادري شتريد متمسكه بيها
بيبي //. يمه حليم ايگول خابريها وفهميها نبيع البيت ونشتري بيت واسجله نص باسمه ونص باسمها
سليم يباوع البيبي //لا باالله هوه هذا شلون حچي من كل وعقلك انته اتخبلت
بيبي //. ابو سهيل مي خالف الخاطير حليم والخاطير البنات
سليم بنتر // حليم ايطلگها ويطبها مرض ماليش ننطيها حلال ابونه فوك الفلوس الباگتهن
بيبي // على كيفك سليم البيت بيتي وانا اريد ابني ترجعله مرته
سليم //هوه هذا شلون حچي يمه هاي المره داهيه مو مال ترجع حليم ايطلكها وياخذله مره فلت راحت
بيبي // يمه خلي اخابرها واشوف ردها
سليم //انتم بطرانين وانت حليم المثلك ما يگول ارجعها نسيت شحچت گدام الناس
ابوي سكت ما جاوب وبيبي باوعت السليم وسلهمت عيونها واتصلت وانا رحت صبيت الچاي وجبته وخليته
گدامهم وبيبي تتصل بعدها
جاوبت امي //الو
شلونج نهله
– – هلا خاله انتي شلونج شخبارج
بيبي بدون ما ترد السلام // نهله شنو هذا السويتي مو هاي المرجيه منج
والله هذا الموجود ابنكم ما اريده
– – هاا يعني انتي من رحتي منا مبيته النيه
– اي ما اريده
– واذا ما تردينه ليش بقيتي كل هذا الوكت چان اتطلگتي من اول سنه ليش سويتيهن اربع بنات
امي //- گلت بلكت بالعشره احبه بس ما صار بيه وما اكرهه
– هاا تكرهينه وتردين تتطلگين
– اي اريد اتطلك
– بس الخاطر بناتج تدرين ابوهن اليوم بطلهن من المدرسه وصارن يبچن يمه ارجعي ولمي بناتج وان شاالله
الله يرزقج ويصير عندج ولد
– اتعذريني خاله ما الي رجعه
– واذا اگلج نشتري بيت واكتبه باسمج وباسم حليم
امي بقت ساكته بعدين جاوبت – لا عيوني ارجع تشترون بيت اتكتبونه اب اسمي
– – هاا كله تردينه باسمج حتى تبيعينه وتاخذين الفلوس مثل ما اخذتي الفلوس الي انطاهن سليم
امي بصوت عالي // هاي يافلوس اشو ابنج الشفيه الچبير اتهمني بايكتهن وهسه انتي
– – لا تصيحين لا تصيحين كافي اي انتي اخذتيهن بس ما اكول اله علينه بالخلف وعليج بالتلف انتي فگر
وما شايفه جبتج عبالي يصير براسج خير بس انتي وحده طايح حظج
وسدته بيبي وانا اشوفها شلون تجر بنفسها وشفايفها نشفن صبيت الها گلاص ماي اخذت الماي وشربته وسليم كال
– – ها يمه شگلنه ؟
بيبي هزت راسها وجاوبت // مثل ما گلت المره امبيته النيه حتى من كلت اشتري بيت واسجله باسمج واسم حليم
كالت اله اب اسمي
معين // مو هيه صاقطه
ابوي فز من مكانه // انا ما اسمحلك
معين باستهزاء // تسمحلي او ما تسمحلي شتريد تسوي يعني
ابوي //. اطيح حظك
معين // ههههه چان گدرت عليها للدايحه الطلعت وما سالت عنك وين صاير
حليم // انت ما عليك لا تتدخل
معين ايباوع ويضحك وسليم گال // كافي استحو
ابوي // لا خلي خلي ايعير وبعد شعندك معين
بيبي بعصبيه // بس كافي علينه فضيحتنا چنتنا بايگتنا ورافعه علينه دعوة طلااگ والهيچ تسوي اكبر ساقطه واكبر دايحه
ابوي // نعم الله عليچ حجيه ما قصرتي
بيبي // حليم انا ما مچذبه المره جوه راسها علم طلكها لا تجيبلنه سوده
ابوي // ما اطلگ وغصبن عليها لو ترجع لو ترجعلي الفلوس وبذاك الوكت اطلكها
سليم ايهز اب ايده // باالله هذا شتگله شلون اتفهمه
معين // خلي يحچي بكيفه
ابوي اتقرب على معين // شقصدك مخبل انا مو
معين // ما ادري انته شتشوف نفسك
اهنا رهف صرخت رحت اركض اشوفها شفتها هيه وروان متكافشات من الشعر اجيت وهديتهن وانا اگول
= هيي اشبيجن ليش تتعاركن
روان //اكلها هزي ملاك وهيه ملتهيه باللعابه
رهف وهيه تبچي // روان عضتني راح اگول الابوي
ما خلتني امنعها راحت للغرفه وسمعت صرختها اجيتها اركض الظاهر ابوي رافسها شلتها وانا اباوع اله
هوه اتقرب مني ولزمني وصار يضرب بيه بكل مكان وبعدين راح الروان وصار يضرب بينه ويملش ويغلط
علينه ويسب وبيبي اتكله
بيبي // عوفهن ولك اتخبلت
ابوي // لا اريد اموتهن حتى معين ما يعيرني بيهن مثل ما ايعيرني بامهن
معين هز ايده وكال // انا رايح للمعمل
بيبي خلتنه وراها واخذتنا للغرفه وهيه تحچي على ابوي // انته مخبل ليش هيچ اتسوي ابناتك
سليم وگف // اسمعني حليم هذا الي تسوي ما يفيدك نهله ما ترجع اله نشتريلها بيت ونسجله اباسمها وتالي شهرين
تبيع البيت وتطردك ويروح حلال ابوي الوحده مثلها انت گدامك حل ما الك غيره تطلگها وتسد هاي
الصفحه من حياتك بعد يومين لازم تحضر للمحكمه وتطلگها واذا تريد اترجعها روح الها هناك واخذ بناتك
وتنسى عندك اخوان وام
ابوي // شنو تطردني من حلال ابوي
سليم //لا البيت حلال امي حلال ابوك بعته الها والاهلها ونسات ولبس وذهب واكل انطيته الاخوها الحافي
اشتره بيهن البستان الي جان اماجره وتالي مرتك بكل صلافه تگول گضاهن ع العرك هذا البيت حلال امي
وما مستعدين نضحي بي الخاطر وحده عافت بيتها ورجلها وبناتها وما ندري شجوه راسها
سليم باوع البيبي // انا رايح وانت فكر وبكيفك شتريد اتسوي بكيفك بس شغله وحده نهله اذا اترجعها
ما ترجع لهنا سمعت حليم بعد ما ترجع لهنا وهذا البيت ما ينباع اعيدها عليك تريد ترجعها تروح هناك يمها وتنسانه
ابوي باوع البيبي الي هزت راسها وكالت //. اي مثل ما يكول اخوك
سليم // وهواي اكو امور لازم نحجي بيها
راح سليم وانا بقيت اباوع وانا اشهك من البچي لمن ما ابوي سال بيبي
– ليش يمه مو انتي گلتيلي اشتري بيت وارضيها واخليها ترجع لك
– -اي گلت والهسه اكول بس نهله ما ترجع افتهم حليم نهله ما تريدك وما تريد بناتك تريد تقشمرنه انسجل البيت اب اسمها مثل عرايكها وياك على مود
حصتك من الگراج وتالي اخذتهن وانهزمت
– هيه. هم حقها تريد بيت جديد تگعد بي حالها من حال كفايه
– – كافي حليم كافي حس على نفسك
– شبيه انا
– – ما بيك شي وهسه محد يمنه احچيلي الصدك الفلوس انته شربت بيهن عرك لو لعبت اقمار
– يمه حتى لو اشرب ما اشرب بسبعه وعشرين مليون
– – چا گول لعبت بيهن اقمار
– انا ما العب اقمار وانتي تدرين
– – يعني شني يمه فهمني
– والله هيه اخذتهن
– – حليم يمه انته متاكد
– – اي متاكد انا الفلوس ما اخذت منهن لو فلس احمر هيه اتگلي خليهن يجوز نشتري قطعه ونبنيها ومره تكول
لا انعدل البيت وتشتري سياره بالعكس اصلا شنو احصله اخلي فوگهن
بيبي هزت راسها // هذا هوه المره الي باگت رجلها وراحت سافرت من غير محد يدري بيها تره
هاي (اتحسرت ) استغفر الله
ابوي // ها يمه شقصدج
– – ما قصدي شي لو واحد غيرك صدگني يايمه ما راح ايخليها لو ساعه على ذمته
ابوي يترجى ابيبي // خابريها من تلفونج وخلي احچي وياها
ابوي صاح //مها روان تعالن
بيبي //شتريد منهن
اخليهن يحچن وياها ويگللها ترجع
اجت روان وشافتني يم الشباك وسالتني //هذا شيريد من عدنا
لملمت حلگي ورفعت امتوني ودخلنه بيبي شافتنه وگالت
بيبي //حليم راح اتصل خلي اشوف تاليها وياك
واتصلت بيبي انا اعرف بالموضوع لكن روان ما فاهمه شي رن التلفون الي چان بايد ابوي
امي جاوبت // ها خاله شرايده
ابوي حچى بترجي // انا حليم نهله اسمعيني
– شتريد
– اسمعيني نهله ارجعي تدرين بيه احبج وبناتچ يبچن عليچ اذا مو الخاطري الخاطر البنات
امي بنتر // وانا ما اريدك وما اريد بناتك عليمن ايطلعن لو عليك لو على حلا
ابوي بعصبيه // ولچ انا اشرفج واشرف عشيرتج
– – هههههه خوش اذا انته رجال تعال وشوف عشيرتي شتسوي بيك
– نهله وهاي الطفله خطيه منو الها
امي // ما عليه بيها انا ما اريدك ولا اريد بناتك اكرهك واذا انته عندك ذرة كرامه اتطلكني
ابوي // ليش مو تدرين بيه احبج ليش هالشكل اتسوين بيه
– – وانا ما احبك ومن تتقرب يمي تلعب نفسي حس على نفسك وطلگني
– وانا ما اطلگ لو تموتين
امي باستهزاء //هههههاي منو الي تموت انا لا غلطان انتت الي تموت لان راح تتاذى هواي وانا ما اريدك
– – بگتي فلوسي
– اي بگت فلوسك وضحكت عليك تدري ليش لان انته مو رجال
بيبي اخذت التلفون وگالتلها //صحيح من گال عنچ معين صاقطه ولج انتي مو بس صاقطه لا انتي جايفه وخاينه
وسدته بيبيتي وگالت الابوي //هيه كلمه وحده باجر اتطلگها كافي حس على نفسك كافي ولك اليسمع كلامها ايكول
كل شي مسويه براسك
شفت الذهول بوجه ابوي الي طلع وبيبي تباوع النه ونفسها سريع اشرتلي ع الثلاجه طلعت الها بطل ماي شربت
منه روان طلعت راحت للغرفه وانا بقيت اباوع البيبيتي الي اتصلت ما اعرف على منو انا اباوع اتصلت
مره واثنين وتلاثه رابع مره جاوبت بيبي گالت
– – اسمعي ولچ نهله تره شفت رافد من اجه وصعد لج ومحد من بناتج يمج شفت وغلست وادري بيج ساقطه بس ما اتوقعت هيج
– – هههههه اذا شفتي ليش سكتي ما حچيتي
– – ولچ كلت اسكت بلكي اتحسين على نفسج بس انتي بيچ وما تزيدين شنو عبالج ما ادري شسويتي المعين
وشطلبتي منه
امي بنفس نبرة الاستهزاء //اي خاله معين ردته بس هوه ما قبل يگول انتي مرت اخوي تدرين لو بس
نايم وياي ولا عفت البيت بالعكس چان بقيت وبعد خلي اگلج هذا ابنج سليم مصيبه ما ادري شلون ماخذ كفايه هم اشتهيته وداعتج امس من
اجه خليته يرجف بس هوه اعمى وما طوول
بيبي //. ولج انتي عاهر وگ…
امي باستهزاء /// ههههه تدرين بيه گح… شكو ترديني ارجع شنو مشتهيه تشتغليلي (گو…)
// انچبي ياماتستحيين چنت اريدج ترجعين حتى تلمين بناتج بس المثلج ما تتامن على بزونه مو على بنات
روحي ديحي جيبي العار الاهلج ولا تجيبينه النه
سمعت ضحكتها وبصوت عالي بيبي جاوبتها // اي اضحكي هيه الب…شيترجى منها روحي ظلي من
حضن الحضن احنه هم وحده مثلج وصخه ما نريدها
امي //. اي من حضن الحضن هوه انا من چنت عد ابنچ من حضن الحضن ما تشوفيني شگد اكرهه لان ما تارس عيني
سدته بيبي وهيه ترجف باوعتلي وشافتني واكفه لان رجفتي ما تقل عن رجفتها سالتني // ها سمعتي
انا هزيت راسي وكأنما الكلمات راحن من عندي صرت اتصورها بذيچ الصوره المقززه الي ما تقبل اتفارگني
لحد الان ويمكن الى ان اموت وحسيت من ذيج اللحظه انو كل شي بحياتنا اتبدل ومستحييل اي شي يرجع مثل قبل
ولو احنه كل شي ما شايفين ولا عايشات مثل باقي الناس الي عدهم اب وام لكن چنا متعايشات ويه وضعنا
وخصوصا بيبي الي انحسها فد شي چبير
بليلتها ما اتعشينه واجه معين وراح حچى ويه بيبيتي وهوه واگف اباب الغرفه وسمعته ايگللها
يمه هذا هوه خلي ايطلگها ويتلاحك نفسه وعلوا ينطيها البنات
ما اعرف بيبي شنو گلتله لكن هو رد عليها // حجيه ومنو يكول البنات من عنده يمه هاي وحده ساقطه
سكت ورجع جاوبها // اي هم صحيح متسميات باسمنه هيه هاي المصيبه اروح انام احسنلي
عرفت معين رجع ينام بغرفته لان امي ما موجوده بليلتها محد اتعشى وكلامها يرن باذني
چنت مثل الملدوغ كل شويه افز بس مو من الالم لا افز من الخوف ثاني يوم الصبح ما نايمه
ما گعدت بقيت بفراشي بيومها خليت ملاك بحضني بس حتى ما تگعد والصبح سمعت حركه بقيت بفراشي
رهف گعدت //مها اگعدي مشطيلي اريد اروح للمدرسه
باوعت الها وانا ساكته رفعت روان راسها وجاوبتها وهيه تتثاوب //ارجعي نامي رهوفه بعد ماكو مدرسه
رهف جاوبت وهيه مقهوره // ليش اريد اداوم المعلمه گالت يوم الخميس تطلعني فارسة الصف
راحت تمشي تريد تطلع روان لزمتها //وين رايحه
اروح البيبي اخليها تمشطلي واداوم
روان // ولچ نسيتي كتلة ابوي هسه من ترحين يرجع ايموتج ويكفر بيچ
گعدت يم الباب وصارت تشهگ ودموعها ينزلن وروان اتگللها // اي ابچي هسه يسمع ويجي يذبحنا من الكتل
ما اتحملت منظر رهف وخوف روان گعدت وصرت ابچي وياهن الكم تتخيلون المنظر تلث بنات يشهگن
من البچي والرابعه طفله عمرها ست تشهر اتقربت مني رهف وهيه تمسح دموعي وتشهك وتكلي
مها جوعانه
هزيت راسي ردت عليه// انا البارحه ما اتعشيت وهسه جعت
ابتسمت بوجهها وهزيت راسي وانا اكلها = حبيبتي شويه اصبري خلي يرحون وانا اسويلج اكل
– – بس انا جوعانه شگد ترديني اصبر
= هسه شويه
بچت ملاك باوعت الها بعتب =هاا شفتي گعدت ملوكه خلي اسويلها ممه وبعدها اجيب ريوك ونتريك
چنت احچي بس حتى انسى او اتناسى وضعنا اخذت الممه وحچيت ويه روان
= ديري بالچ عليها بس خلي اغسل الها الممه واجي
روان صارت تهزهز بيها وانا رحت للمطبخ شغلت الغلايه وخليت ملح وبمجرد ما غلى الماي صرت اخض
بيها وارجع اغسلها رجعت للغرفه واخذت مايها وسويت الها ممه واخذتها غسلت الها وغيرت حفاظتها
بيبي ابحدها بالغرفه ما ادري ليش ما مريت عليها رجعت حفظت ملاك وانطيتها الروان وانا رجعت للمطبخ
سويت ريوك
شفت جبن بالثلاجه وخبزات خليتهن وصبيت چاي لان حار اعرف بيبي متريكه ويه معين الي راح للكليه
وكعدنا نتريك واحنه كل وحده شايله هم اكبر من عمرها كملنه وشلت الصينيه وخليت روان يم رهف وملاك
وطلعت صرت اغسل بالصحون وانا ساكته ومقهوره لمن ما اندك الباب ورحت فتحته چان عمي سليم
من شافني ما سلم خزرني وكال // امي وين
جاوبته باقتضاب وانا أأشر على الغرفه = بغرفتها
– – وشبيچ تحچيين من وره خشمچ
اتفاجأت من تصرف عمي ليش هيچ يحچي وياي رديت بعد ان بلعت ريگي = عمي سالتني وجاوبتك
هوه دخل يمشي وراح الغرفة بيبي وكلها // صباح الخير
هله يمه صباح النور
معين راح
اي يمه اتريك وراح شكو خير
منين يجي الخير من هاي الدمقسزز
بيبي // يمه سد الموضوع
شلون اسده وهيه عايفه اربع مصايب يمنا
انته شبيك
يمه (جر نفس وغير الموضوع ) ابنج الشفيه وين شو محله معزل
خاف بعده نايم
البارحه يمته رجع
من وكت
باوع سليم ورفع حاجبه // يمه بعدچ تدافعين مثل دفاعج قبل
سليم شبيك
لا تدافعين عن حليم لو راجع من وكت تلكينه مبسط مو الهسه نايم
خاف ما عنده شغل
سليم // واذا تعاي مها
اجيت = ها عمي
اصعدي اندهي حليم گليله اريده
صعدت واسمع بيبي تكله //شبيك سليم ليش هالشكل تحچي ويه مها
جاوبها // والله بطرانه انتي يمه هذيچ الگ… راحت وخلت ذني علل على گلبنه
ما سمعت بيبي شنو ردت علي دگيت الباب مرتين ثالث مره فتحت الباب شفته نايم بملابسه يعني ما مغيرهن وفاتح اديناته
وصلت يمه وگلت = بابا بابا
هو ما رد رجعت گتله = بابا بابا اگعد
هو فتح عيونه ودار على صفحته رجعت گتله= بابا اگعد عمي سليم رايدك
ابوي بتعب //انزلي گليلهم هسه يجي
نزلت وگتلهم = ابوي هسه ينزل
بيبي كالت // تعاي مها طلعي من ثلاجتي بيضتين وگليهن الابوج (وجهت كلامها السليم ) تتريك ويه اخوك
سليم//لا حجيه انا اكل الضحى ويه العمال
بيبي // چا شعجب كفايه ما صارت اتريگك
-على حسب اذا اطلع من وكت اخليها نايمه واذا اتاخر نتريك انا وياها
باوعتلي وكالت // روحي حمي الچاي
رحت للمطبخ سويت البيضات وحميت الخبز والچاي صبيته لان سمعت ابوي نزل رحت اخذت الصينيه خليتها گدامه
سليم گال // انا راح اخابر عمها وننهي كل شي ما النه خلك محاكم وفضايح
ابوي //ها بهالسهوله
– منيلها سهوله بس احنه نريد الستر
بيبي// شنو يمه
سليم //يمه راح اخابر عمها تتنازل عن الدعوه وحليم يطلگها بدون جرجرة الحكومه ويوميه مآجليها
سليم باوع الابوي وگله // حليم طلگها وانتبه النفسك
ابوي باوعلي وگلي // جيبيلي ماي
رحت اجيب الماي من رجعت سمعت سليم ايگله // يابنات ذني علوا تاخذهن
ابوي بعصبيه // تاخذمن تاخذ بناتي انته شتحچي تريدني انطي بناتي الها
سليم // اسمعني حليم انته اخوي وانا احبك بس السوته نهله شي چبير واحنه ما مسؤولين عن بناتها
ابوي // شو تگول بناتها شقصدك
سليم //انطيها البنات وهيه تربيهن
ابوي // تريدني انطي بناتي مستحييل لو ادري اموت ما انطيهن بحاله وحده انطيهن اذا انته شايف شي
او تعرف شي وغير هالحچي ما عدي
سليم يباوع البيبيتي الي دنگت وما حچت ابوي كال //اليوم اطلگها نهله بس بناتي ما انطيهن
سليم // ومنو گال ذني البنات بناتك
///////////////////////////////////وللقصه بقيه
شنو تصوركم البنات تاخذهن نهله لو يبقن عد ابوهن وبيبتهن
