رواية سر خلف النقاب الفصل السابع 7 بقلم هدوء آل محمد

المصير مظلم ينتظرني

في مستنقع الغدر

حيث البدايات الجديدة

تقود بي من العذاب الى عذاب اكبر

______________________________________

الباب مفتوح على النص كان گاعد على الچرباية بيدة سبحة ويطگطگ بيها ومبين على وجهه علامة الانزعاج وهي واگفة يمه

مشعان:- باسمة اجفي شرج عن البنية عبن انا اعرفچ شنو من ملة

ردت بتمسكن

باسمة:- يا حجي على بختك صدك جذب شلي دخل بيها

رفع عينه عليها وضحك بستهزاء

مشعان:- تعرفن شقصد لمي زبالتج عن البنية وغلاة الي دفنتها بيدي انومج بسدها فهمتي لو لا بس اشم ريحة خباثة اردج لهلج وتعرفين عاد هم شلون يحبوج

باسمة:- هاي هي يجرالك

گالت هيج ورادت تندار بسرعة رجعت وكفت يم باب الحمام عود هسه طلعت بس شنو رجف حيلي وانا اسمعه يحذر بيها هاي بدايتها هيج تاليتها شلون وشنو من ملة هاي شنو ممكن تسوي لي طلعت ومبين عيونها حمر شافتني وانا مثل الثولة ابتسمت الها تجاهلتني ودخلت للغرفة الي تبعد عن غرفتي امتار اخذت نفس ورحت دخلت كان متمدد ومخلي ايدة على عيونة وايد الثانية ماددها ويطكطگ بالسبحة دخلت وسديت الباب رفع ايدة شافني وعدل گعدتة عينة صارت على الوحمة دنگت خجلانة حسيته گام وتقدم الي ايدة صارت على حنچي رفع وجهي

وباصبعة يحرك الوحمة

همس بهدوء

مشعان:- كبيرة مالها حل هاي

خانتني دمعة ونزلت اكثر لحضة كنت اخاف منها شافني بجيت

عگد حاجبة وتكلم بنبرة انزعاج

مشعان:- شحجيت هسه انا؟؟

_ اذا لهل درجة مضايقتك ولايهمك مارح تشوفها بعد اليوم

نزلت ايدة ورحت للجنطة ضليت ادور بيها لگيت علبه المكياج سحبتها وتوجهت للمراية طلعت كريم الاساس واخفي بيها هو متبسمر بمكانة مسحت دموعي وخفيتها بالكريم وحطيت كحل ومرطب شفاه ونداريت عليه اداري رجفة صوتي

_ هيج افضل مو

سكت ماحجة شي ندگ الباب فتحة ودخلت ميس شايلة صينية العشاء ووراها مهجة شايلة صينية اصغر منها دخلو خلوها بالكاع يم الشباك لان كان اكو قنفة صغيرة توسع حگ نفرين ويمها ميز

مهجة:- هذا العشة جاهز لعريسنا الجكليتة

كان صافن منزعج بس من حجت مهجة نتبه الها وتبدل حالة وبتسم وجهه غريب امرة الحب الي بعيونه الها يفوق حب كل اب لبنته يباوع الها وكانها اعضم شي عندة بهل دنيا

مهجة:- هاا مشمش شو ضايج

اطلق صوت ضحكات وتحركت اكتافة

مشعان:- انا حجي مشعان تاليتي مشمش بس مقبولة منج

ضحكت باسته ولحگت ميس الي بس خلت الصينية طلعت گبل بدون كلام سد الباب وراهم وانا وگفت انشف بشعري بالخاولي متجاهلة وجودة تماماً بديت اضفر بشعري صفح اسهل شي كملت وبديت اعزل الهي نفسي واخفف من خوفي تقدم الي سحب شيشه العطر الي كانت بيدي حطها على الميز وحجة

مشعان:- تعاي تعشي عود بعدين عزليهن

سحبني من ايدي ماناقشته گعدت وكان العشاء عبارة عن مشاوي اجة ببالي موقف همام قبل لا يندعم كنا گاعدين وضايجن الدنيا عصر وابوي بالكرسي وسراج يلعب طوبه يشمرها على الحايط وترجع عليه امي تشرب شاي ورونق تلعب بأيبادها

تكلم سراج بملل

سراج:- ضوجة خل نطلع العالم بالعطلة تروح سفرات تتونس احنا واحد يتصفن بوجه الثاني

ضحك همام

همام:- تريد تطلع مو انا عندي الكم فكرة احلا من الطلعة

كلنا گلنا شنو هيه

همام:- نشوي بالسطح ونسوي حفلة شواء ها شرايكم

كلنا ايدنا الفكرة ابوي حز بخاطرة وين يگدر يصعد الدرج

ابو همام:- انتم اصعدوا تونسوا وانا اريد اتمدد بغرفتي

فر كرسيه وراد يروح غمزلي همام وطفر عليه شاله وركض بي للدرج وابوي يصرخ

ابو هام:- ولك وين ملعون الصفحة نزلني تريد تسگطني اكثر من ما انا مسگط

وهمام يضحك شلت الكرسي وصعدت ورا خليته اله وحطة فاحط وتعبان بس مابين اله

ابو همام:- بالله هسه هاي هم سالفة طگ ضهرك وصار بيك شي وين انطي بوجهي

همام:- فدوة الك يابا

وصدك بيومها صعد ادوات الشواء وفرشنا حصيرة حتى شامل الي هو وهمام دوم مشاكل گعد ويانا كانت سفرة من العمر ماتنسي واخذنا صور هواي وهذا اكثر شي غلط من الانسان يوثق لحضات الحلوة بصور لان اذا راحو اصحابها تصير بدال الذكرة حسرة

صحيت من صفنتي على لزمت ايدة الي ويتكلم بستغراب

مشعان:- شبيچ

جاي ابجي!!!ابجي بدون لا احس على نفسي!! حرت شنو اگول اله بس مادري شلون لگيت نفسي اسرد اله الموقف وشهگاتي تتعالى

باوع بعيوني وسحب راسي لصدرة

مشعان:- قيل للإمام علي بن أبي طالب”عليه السلام” «أهناك أشد من الموت؟ قال: نعم؛ فراق الأحبة أشد من الموت»

وصدق والله فراك النحبهم يهد الحيل ويطول الليل وايامنا خلافهم تگضي بالويل

اكتفى بهل كلمات وهو يمسح على راسي اول مرة اكون بقرب رجال غريب بهاي الطريقة دموعي تجري ومامرتاحة اريد ابعد بس اخاف عيب واخاف اضل ويكول هاي ماصدكت شسوي ظهري شنج تالي يمكن حس بعد راسي وتحمحم

سحب الخبز وقدم الي

مشعان:- اكلي يمعودة هي الدنيا تاليتها خلصانا ونروح يمهم

اخذت الخبز بهدوء وامسح بدموعي گمت اكل گوة حتى القمة نسيت شلون تنمضغ من گد الارتباك كملت وكمت حتى اغسل

مشعان:- هسه هذا اكلج لو خجلانة

گلت بگلبي لو تشوفني من اضوج الزم الگرصة اخليها لگمتين بس اخ من الزمن اكتفيت ببتسامة سحبت الشال بطراف اصابيعي ولبسته وطلعت اغسل وبطريق الرجعة صادفني علي ابتسم

علي:- اخوج باله يمج

من كال هيج صارت الغصة ببلعومي وحجيت بلهفة

_يصير اخابرة؟؟

ضحكت على لهفتي

علي:- عادي بس تعاي نبلغ الوالد

ستغربت ليش يبلغ ابو لحگته كان مشعان بعدة ياكل

شاف علي

مشعان:- ها خير ان شاءالله

علي:- سراج باله يم اخيته راح نتصل بي انا وبسمة مدري شسمها

اندار الي وگال

علي:- شنو اسمج يولي

_تسنيم

علي:- اسم مال مثقفين هذا المهم نرجع لموضوعنا يابا راح نتصل

مشعان:- وماتتصل گاضبك انا

علي:- مو خاف الحبايب يلفقون النا تهمة گلت نبلغك

مشعان:- مو غشيم انا روحوا

سحبني من ايدي وطلعنا للحديقة اتصل بي وفتح سبيكر

حجه بضحكة

علي:- ها لك شوف ماانطيك اياها الا تنطيني 25

رد سراج الي مبين من صوته تعبان

سراج:-عمي والله انطيك 50 بس برد گلبي

علي من شافة هيج نطاني ايا وراح يم باب البيت وقف ينتضرني وعينه عليه

همست احاول اخفي نبرة بكائي

_سراج

رد بلهفة

سراج:- ماي عيونة امي انت زينه ضربج ضوجج احجي هسه اجي اخذج نسومة

عضيت حجابي اكتم صوت شهكاتي بلعت ريگي وحجيت

_زينة يروحي والله محد ضوجني انت ورونق شلونكم

سراج:- گولي والله

_والله وغلاتكم عندي

سراج:- زين زين هاي رونق وياج

رونق:- ها نسومة شلونج

_زينة حبيبتي ماكدرت احجي وياج واوصيج بس سراج والبيت امانتج شوفو امكم وين هم وجيبوها وياكم بيت ابو همام مايتطشر خلافة فهمتي

ردت بشهكة وبجي

رونق:- امكم؟ لحد الان تحنين الها

_ يي خيه امكم هاي انا امي ماتت ويه ابويه الي تشوف جهالها متبهذلين وتسكت هاي مو ام هاي والدة واكو فرق بيناتها بس عيب تضل ناندري وينها جيبوها للبيت وهسه عيب من الولد لازم اسدة بعدين اتصل

مانطيتها مجال تحجي سديته ورحت باتجاه علي الي كان گاعد يم الباب من شافني اجالي

علي:- هاا سدة

نطيت اله الجهاز وبتسمت اله بمتنان

_يي شكرا الك

علي:- ولو بدنا خدمة محرزة ياخانوم

ضحكت على لهجتة

_ ولا يگعد راحة العگيد معتز

دخلنا للبيت وهو مادري وين راح وانا دخلت لغرفتي الى مصير مظلم ينتظرني في مستنقع الغدر حيث البدايات الجديدة

تقود بي من العذاب الى عذاب اكبر

.

.

ثاني يوم، فتحت عيني على صوت طرقات الباب صفنت استوعب سرعان مااوعيت اباوعلة نايم عكس البشر راسه بجهه ورجلي بالجهه الثانية رجع الباب يندگ مرة ثانية الي خلت حتى مشعان يفز ويتكلم بانزعاج وعصبية

مشعان:- ادري لواحد ماينطمر بهل مهجوم فوكاها نبهتهم لو تصير الحرب العالمية الثالثة لحد يگعدني

نخلست وسكتت گام هو فتح الباب وسرعان ماتبدل الانزعاج الى ابتسامة من دخلت مهجة گلبة

مشعان:- هلا هلا

مدت راسها مهجة تتبوسم

مهجة:- اعتذر خاف نايمين وگعدتكم بس سويت ريوگ معدل ومنتضرتكم بالحديقة

مشعان:- دقايق لا شنو دقايق لا گولي ثواني وجايين

شمرت اله بوسة بالهوى وراحت سد الباب وراها وهو سحب الخاولي وطلع بكل هدوء ياا غريب امرة لهل رجال شلون يعشق بنته هيج اعزل بالجرباية وافكر كملت ولبست گلابية ردان بيضة وبيها ورد احمر عشتو عود عروس ولغمطت وجهي اخفي الوحمة

كملت وجاي ارش بالعطر دخل هو توجه للكنتور طلع منه علبة وگعد فتحها بدون لايباوعلي گال

مشعان:- تعاي

گمت ومن قتربت كانت علبة بيها ذهب كعدت وهو سترسل بالكلام

مشعان:- هاي هديتج

طلع سنسال طويل وضخم نازل منة ثلاث دوائر باحجام مخالفة ولبسها الي

_بس انا عندي ذهب؟

سد العلبة وخلاها بحضني وگام للمراية رش عطر وسترسل بالكلام

مشعان:- حتى لو هاي من مهرج انا دزيتلج 10 و5 للغرفة وهذا الطقم ب10 حگج هذا مرت مشعان انت الناس لو شافتج شتگول مرته ماعدها ذهب

هزيت راسي واسكتت كمت ويا وطلعنا للحديقة الي كانت مهجة مخبوصة ومسوية ريوك وفارشة حصيرة تقرب مشعان وحضنها

مشعان:- مكلفة روحج بويه

مهجة:- كم شوشو عندي هو بس واحد يالله اروح اصيح عليوي واجي

طفرت تضحك وهو على ضحكتها يضحك كعد بالكاع وانا گعدت المشكلة مادري شسوي متقيدة اسمع صوتها تتناگر وي علي الي طلع وجهه ينگط ماي ومبين طافرة روحه سحبتة وگعدته وهو يدردم

علي:- رجال ومرته مگعدتنا وياهم شكو

مهجة:- ريوووك هذا اكل وسكت عليووي

علي:- يابا ترضاها بنتك گعدتني بدولكة ماي!!!

بتسم مشعان واهو يصب بالچاي

مشعان:- طار نصك؟؟

مهجة:- كلشي ماطار اسكت صير زلمة حوك ولك شبلاك ابن باسمة

نطاني كوب الشاي وبدينا ناكل وسط مناگرات علي ومهجة

علي:- يابا ماكتلك

گامت مهجة تخزر بي وهو يضحك مشتفي

مشعان:- شكو ولك

علي:- النتايج بويه طلعت ومهجة مكملة بثنين

باوع الها باسف بس هي گبل غورگن عيونها

مهجة:- انا فاشلة الله ياخذني زيين هيج!!!

حجت هيج وگامت هنا مشعان تخبل عاف الاكل ولحكها وعلي يهز بيدة

_ليش هيج وياها خطية

علي:- منو خطية مهجة!!! بوياي هاي دموع تماسيح حتى لايعاقبها

انتظري بس خمس دقايق وشوفي

والله صدگت وگعدت انتظر ماطولو دقايق وطلعو ايد بايد ويضحكون فتحت حلگي بصدمة وعلي طگها بضحكة

علي:- شگتلج

لا والنوب مااجو لا ركبو سيارة وراحوا

_يااااا شو راحوا

علي:- راح يراضيها بشي راقي غير نزلن دموعها ذهب هاي مو دموع عند مشعان

رن جهازة وشافة ضحك

علي:- هذا اخوج

ردت وفتح سبيكر

علي:- ها لك كثرانة اتصالاتك

سراج:- ذلني عود ماوصيك

علي:- ال50 مالتي وين

سراج:-اخذهن من ابوك

علي:- هااا تسحب عليه ولك اختك يمي هسه احطها واكتلها عود ذيج الساعة

لسه ماكمل صرخ بي

سراج:- دمدها الايدك وشوف اذا ماخليك بحسرتها طول عمرك

علي:- عنيف اخو نسومة

عصب سراج

سراج:- خر….. بيك وبالي يخابرك بعد

راد يسدة

علي:- ولك اصبر ملكوف هاك اختك من عابت الك والها

_يا انا شعليه

علي:- امووون عليج

گالها وطفر طلع حجيت ويا شوي وبعدين سديته ورحت دورت اله ونطيت الموبايل ورجعت للحديقة شفت لمواعين عيب اخليها شلت قسم منها ودخلت للمطبخ كانو ميسون وولدها وجنتها ميس كاعدين

ومحمود مخلي ابنه بحضنه يوكل بي همست بصوت منخفض

_السلام عليكم

ميسون:- وعليكم السلام ليش انت جبتي الصينية كان خليتها بعدج عروس

بتسمت الها مجاملة مادري شجاوب

_ها لا عادي قابل شصار

اخذتها مني ميس

ميس:- روحي عيني لغرفتج هسه انا اكمل

تحجي وتباوع للگلادة مالتي

ميس:- مبين الحجي خوش مهر جايب الج

رد رجلها

محمود:- ميسسس تعاي اخذي ابنج غسليلة

يا مبين دا نهار اسوود خاف هناك جنت اعرف شامل الوحيد العدو هنا ماعرف عدوي من صديقي توجهت لغرفتي ونفتح الباب طلعت من عدها باسمة تجاهلتني وراحت ولا كان اكو شي او داخلة لغرفة غيرها !!!

.

.

.

وگف يفرفح بلا حول او قوة حتى بهاي ماگعد حضة وگدر يسافر للعراق والسبب هو وجود مشاكل بجواز السفر

ابو نوفل:- ياابني خيرة هاي مابقالك الا فترة ناقش الدكتورا وارجع

يضرب على رجله يريد شي يبرد نارة

نوفل:- اني نوفل هذا النذل يحجي وياي هيج امداني ي والله

هز الاب رأسه بعدم رضا شگد مايحجي ويا بس هو هيج صار اعصاب من ماتو اعزازة

ابو نوفل:- تعوذ من الشيطان يا ابني

ساكت وينافخ وهل توتر والقهر يخلي السكر عندة يرتفع تكلم ابو نوفل بهدوء وحزن على حال ابنه

ابو نوفل:-الغضب مثل عاصفة تهب،تخرب المزاج وتزعزع التفكير تخليك تاخذ قرارات مامدروسة تندم عليها بعدين الغطب يابويه

نار تشتعل في القلب، تحرق الاخضر واليابس الحل ياابني انك تهدا وتتعوذ من الشيطان لان الرسول ﷺ لما رأى رجلًا قد اشتد غضبه، قال: إني لأعلم كلمة لو قالها لذهب عنه ما يجد: أعوذ بالله من الشيطان الرجيم فإذا غضبت؛ فاجتهد في تكرار: أعوذ بالله من الشيطان الرجيم، كررها واذكر الله، وأبشر بالخير -إن شاء الله- يزول، ولا تعجل في تنفيذ الغضب، واحذر

اتنهد وفرك وجه الي مطعون احمر

نوفل:- اعوذ بالله من الشيطان الرجيم

ابو نوفل:- عفيه عليك وليدي وهسه امشي نرجع للشقة هي كلها كم شهر وارجع رافع راسك ومحقق حلم رفيج دربك

طبطب على كتفه گام نوفل مع ابو من لا چارة اذا مايكدر يسافر شنو بيدة يسوي

.

.

.

الايام تركض بسرعة واليوم مر اسبوع على زواج تنسيم الي بطلعتها من البيت انطفئ كل شي گاعدة اكنس بالطرمة ونفتح الباب دخلت امي تمشي على عكازة متحركة وراها شامل من صدمتي مادري شنو اسوي

باوعت عليه

ام شامل:- شبيج شايفة جني

_ها لا بس شسمة نصدمت

ام شامل:- بزرة غمه مابيكم الي گلبه على امه

تقدمت وحضنتها بس اول مرة بحياتي ماحس بحنانها مدري مبالغة مني لو كان معمي على عيوني كل السنين الي فاتت

بتعدت عني وكان اكو كرسي سحبتة وحاولت تگعد علي بهدوء وعلى گيفها ردت اساعدها دفعت ايدي

ام شامل:- الله لايعوزني لبشر

_يا يمه شبيج

باوعت الي

ام شامل:- ييي شخبار اختج

بتسمت بطرف شفتي

_اختي زين سألتي عليها يوم شمرتوها هل شمره هاي علمود لفلوس

ام شامل:- اهووو بدت تتفلسف براسي

شهگت ونزلت دموعي

_ما جاي اتفلسف يوم بس انت ماكلفتي نفسج وحجيتي كلمة شفتي عمي وهو يضرب بسراج مثل لوحش اثار ظربة والزراگ لحد الان بجسمة يمه قبل يومين سمعته يسولف لخالد يگول اله عندي فطر بواحد من عضام القفص بحيث حتى النفس من يسحبة يتألم

سكتت وماردت مد رأسه شامل

شامل:- خلصنا من ذيج تجينا انتِ تتفلسفين براسنا ترا جاييج الدور اصبري

ندك الباب وراح شامل يفتحة دخلوا عمي ومرته ورا بيديها علاليگ گلت بگلبي خير يارب الله اليستر منكم ومن جمعاتكم تقدمت تبوس بيه

ام ماهر:- ها ولج شلونج شخبارج

_الحمدلله

گعدت بالكاع وتربعت وبدت تفتح بالكياس كانت بيها فستان مالت طلعة لونة ازرق بس مبين غالي وىاها طلعت جنطة وحذاء وشال لون بيجي

ام ماهر:- هاي الج رونق حتى تلبسيها من نروح

_وين نولي ان شاءالله

سلام:- ولت روحج ان شاءالله نروح لختج نبارك الها مو السبعة مالتها ليوم

_اهل واجب يبعد حيلي

سلام:- تستهزئين ولو شترجى منج ومن اختج بس يالله نسوي خير ونشمر بالشط مزاجي رايق مارح اتناقش وياج

ام شامل:- جبت الي وصيتك علي

سلام:- يي جبت ثلاجة من هاي لصغار كلفتني 250 والله

ام شامل:- مو هواي من فلوسها مالت المهر

بلع ريك وضحك بالكذب

سلام:- يي شلون هههه تستاهل

كانو جايبين وياهم غدا بدت مرت عمي تحضرة انا تسحبت ودخلت للغرفة وتصلت على سراج اجاني صوته الحزين

سراج:- ها رنو بيج شي

رونق:- سراج الاقزام السبعة ملتمين

سراج:- يا اقزام!!

رونق:- عمك ومرتة واخوك وحتى امك وياهم

تحسر وگال

سراج:- عندي علم هسه اجي

سديت الموبايل وطلعت يمهم حضرنا الاكل لان حتى هم ينتضرون سراج بعد بيتي يحبو الله لايوفقهم موزين ماتسگط الولد بيديهم شوي ونفتح لباب دخل سراج وويا خالد وبدون سلام دخلو للديوان حجيت بگلبي هذا خويلد خوش علي عضلات جابه ويا حتى اذا صار شي نكتلهم ونشرد عدلت شالي وحطينا الغداء وامي على الكرسي حطينا الها صينية بوحدها

سلام:- احم سراج اليوم لازم نروح نبارك الاختك

ابتسم بستهزاء

سراج:- خوش عود شراح تاخذ وياك الها بطل ببسي لو كيلو بقلاوة؟

سلام:- لاتستهزء سراج لان تدري افصم ضهرك

طكطك اصابيعة خالد

خالد:- تفصم ضهر منو خوية؟؟؟

سلام:- متسبع بصاحبك

سراج:- فرد لفرد تختلف الكثرة تغلب الشجعان سويت مثلكم تسبعت بصاحبي بيها شي؟؟؟

سكتو كلهم كمل الغداء على خير ولو ماكو خير من هل شكول جبت الجاي وكعدنا نشرب حجت امي

ام شامل:- يي شصار على تقاعد المرحوم

شامل:- جاي امشي الج بالمعاملة

سلام:- ليش هو تقاعد المرحوم شكثر

خالد:- شاهد عزيزي المشاهد خطة جديدة والصياد يتجول نحو فريسته ينتظر الفرصة المناسبة من اجل الهجوم

ام ماهر:- الا صدك خيه بعد الج شكثر وتطلعين من العدة

خالد:- لازم مستعجلة على الضرة حجية

ام ماهر:- اسم الله الحافظ بيش مفاول عليه

خالد:- والله قهرتيني عليج حجية يراد تدخلين دورة مالت ذكاء وزيادة انتباه

سراج:- ووين هاي الدورة

دگ خالد على صدرة

خالد:- يم اخيك

سراج:- كفو منك ابو الوليد

اخذهم بشراع وميداف مانطاهم مجال

الى العصر جبروني امي ومرت عمي البس الفستان واخلي مكياج رغم شگد رفضت بس خفت على سراج لا يتعارك وياهم تچفيت الشر ولبسته وطلعنا الهم كلنا بس خالد رجع لبيت اهلة

.

.

تمر الايام بهدوء مشعان زين وياي رغم الغموض الي بهاي العائلة ودخلت باسمة لغرفتي بلغت بيها مشعان گال مرة ثانية قفليها من تطلعين كاعدة العصر انا ومهجة الي صارت ونستي بهذا البيت ومشعان گاعد ويمه مجموعة اوراق هو وعلي يشتغلون بيها

مهجة:- نسنس ضوجة گومي خل نسوي كيك

رفع راسه مشعان

مشعان:- لويش تتعبين بنيتي اذا مشتهيته هسه ادز واحد من اخوتج يجيب الج

مهجة:- لا بابا ضوجة خل انسوي

مشعان:- خوش بس تنسيم ديري بالج عليها لا تحترك ترا احاسبج انت مو هي

مهجة:- يااا شعليها هي بطلنا عمي

حجتها ومدت بوزها شبرين وهو يضحك صاح

مشعان:- ضيااااااء وينك ضياااء

نزل من فوك

ضياء:- ها حجي امرني

مشعان:- روح لل(**) وجيب النا منه كيكة كون مليانة ككو ومكسرات گول اله الحجي يوصيك اريدها طيبة وكبيرة لان اكو خطار راح يجونا

عقد حاجبة بستغراب

ضياء:- خير ان شاء الله منو جاي؟؟

مشعان:- اهل تنسيم

هو گال هيج وانا طفرت

_صدك حجي؟؟

مشعان:- يي صدك خابرني عمج وگال يردون يجون يباركون

من گال عمج نغزني گلبي وتذكرت كل شي صار صحيت من تفكيري على سحلة مهجة الي

مهجة:- مو وكت صفناات امشي بدلي اكشخي شجاج

تسحل بيه مثل الخروف دخلنا للغرفة وهي الوحيدة الي اسمح الها تدخل لان رغم لبسها ولكعتها بس فد حنونة كلش وهي الوحيدة الي من شافت الوحمة گالت حلوة عليج لايكتلچ ماكسرت بخاطري گلت شوي شوي اكسبها واخليها تغير لبسها

فتحت الكنتور تنثر بي وتدردم كل ساع رفعت واحد وتكول لا موحلو اخر شي طلعت فستان زهري

مهجة:- يييي هو داااا يالله لبسي بساع انتضرج ورى الباب

نطتني ايا وطلعت لبسته على السريع

_ تعاي كملت

دخلت وصوفرت مثل لولد

مهجة:- يجنن عليج ولج

سحبتني وگعدت تسرح بشعري رغم هو سرح بس بعد عناد كملت ولميته وبلشت احط مكياج طلعت غير شكل لان هاي لمكموعة سوت الي واهس نفتح الباب ودخل مشعان باوع الي بنضرة اعجاب بس سرعان ماا اخفاها

مشعان:- هاي شمسوين شعدنا عرس

راحت يمه مهجة

مهجة:- بالله عليك مو كيكة وياكيكة جبنالك كيكة اها اها كللوش

مشعان:- هسه تذكرتي ابوج عرس؟؟

مهجة:- اعذرنااا حجي كنا بحالة صدمة عبالنا تجيبلنا حية بس طلعت فارة كيوت

هو ضحكت وانا صحت بيها

_هسه انا صرت فارة بسيطة انا الج بعد لاتحاجيني

مهجة:- شكلها زعلت

مشعان:- والله يمكن

مهجة:- يالله يمعودة نشاقة وياج تعاي نطلع

مشعان:- وين تطلع هيج شدي راسج واستري علينا

مهجة:- يا الحجي يخاف من العين

ضحكت وراح يضم اوراقة بالكنتور انا لفيت الشال وطلعت كانو كلهم مبدلين وكاشخين يمكن مشعان مبلغهم شوي واجى مشعان هم مبدل ولابس دشداشة ندگ الباب وطلع هو يفتحة وانا اباوع

من شباك الديوان اول واحد عمي سلام تحاضن هو ومشعان وشتغلت اللواگة دخلو كلهم اخر شي شهگت من شفت امي لازمها شامل ودخلها سد باب الشارع بالله طلعت تجاهلتهم كلهم وحضنت ابن روحي واخيي حاضنتة حيل ودموعي تجري

سراج:- يابعد گلبي البيت اضلم من دونج

حجت رونق بضحكة بس مبين الحزن بوجها رغم الكشخة

رونق:- وانا مالي حضن

سحبتها وضميتهم كل واحد بجهه بمدي اضمهم بگلبي

حجة عمي بفشلة وانا متقصدة اتجاهلهم

سلام:- ههه عمي واحنا شني نسيتينا

بعدت سراج ورونق وسلمت علي بس بيدي وسلمت على امي مجاملة واضحة ردت اسلم على شامل من بعيد بس مدلي ايدة تجفيت الشر ومديت ايدي ماحسيت الا سحبني وحضني تيبس كل جسمي همس يم اذني

شامل:- حليانة عمي هي الفلوس تخلي البگعة كمر

ابتعد ودخلو جوى حاولت اخفي توتري النذل حتى حضنة قذر طلعو ضرايري اخخ على حضي وسلمو واستقبلوهم وگعدو النسوان بالصالة الكبيرة والزلم بالديوان مر الوكت بين سوالف وهم گمت اساعد ميس بالعشاء خطية ورجعت يمهم بس لاحضت اختفاء رونق رحت ادور الها خاف بالحمام رحت وياريتني مارحت كانت…….يتبع

يتبع