رواية دية الصلح الفصل الثاني 2 بقلم مرج البحر
سولاف:بعد وفاة بابا ٨ اشهر صارت تهتم بنفسها كلش
راحت سوت معامله وسوت راتب مال شهداء
وحولت الراتب بأسمها واخذت تعويض هم
وخلصت وقتها بس على المراكز التجميل
كل يوم تسوي شي جديد يوم شعرها ويوم قص معده وليزر
وهوايه رجعت بنت ١٤ على كولت المثل
وجابت ارقى جهاز موبايل فعلت نت للبيت
اني مجنت اعرف شنو السبب وليش تسوي هيج
بعدني ممفتحه الدنيا
مرت ايام ماما اجيبلي العصير للغرفه
واسمعها تعصب وتصيح بوجه أيلاف و رفل ورهف وتجبرهم يشربون العصير
اني كولش افرح من اجيبلي العصير بيني وبين
نفسي
ماما تحبني وكلش مهتمه بيه
مرت ايام ماما على هاي الحاله
وانتبهت لشي اني من اشربه العصير الصبح
اكعد كل جسمي يوجعني ومبيه حيل
اسوي شي اروح للمدرسه
المعلمه ترزلني لأن طول الوقت ابقى نحلانه ومرات اغفى
وانتبهت على ماما تلح وياي لازم اشرب العصير
استمرت على هاي الحاله ٦ اشهر وصرت صف
اول متوسط يعني صار عمري ١٥ سنة لان اجلت سنه واهلي اخروني سنه
صار عندي وعي طبعا بفضل بنت جيرانه
هيه دائما تحجيلي عن كلشي ومنها تعلمت يخص المرأه والرجال عرفت ماما عدها شي
وقررت اتاكد
احنا متعودين بعد الساعة ٨ تشربنا العصير
ومنعرف شلون نمنا ابد
خواتي رسبو اثلاثتهم برغم جانو متميزات
والمديره جانت تطلب مني اعتني بيهم
بس معندي وقت صرت متوسطة ويادوب
الحك المواد قررت اليوم مااشربه للعصير
تعشيت ودخلت للغرفه ادرس وبعد شوية
اجتي ماما وكالت سولاف
سولاف:نعم ماما
ام سولاف: هذا العصير شربي علمود تركزين بدراستج
سولاف: اوك ماما بس اكمل هاي المسأله واشربه
ام سولاف: عفيه بالشطوره
سولاف: ابتسمت الها وسويت روحي منتبهه على دروسي
لمن طلعت باوعت بالعصير بي فد شي ابيض
مثل الطحين
كمت شمرت العصير من الشباك ورجعته للمطبخ
ام سولاف: ها بنتي شربتي كوله
سولاف: اي ماما شكراً
ام سولاف: اي بنتي هذا بالجزر والبرتقال يقوي نظرج وجهاز المناعه
سولاف : يسلموا ماما
دخلت للغرفه وجنت مقرره ماانام بقيت انتظر
صارت الساعه ٩ ونص حسيت
اجتي ماما للغرفه ركضت للفراش وسويت روحي نايمه
جابت رهف لفراشها وبعد شويه جابت رفل
وأيلاف نايمه يمي بس اخواتي التوائم ينامن يمهه بس هسه جابتهم بغرفتي اني واختي أيلاف
وطفت الضوء وسدت الباب وطلعت
ظليت انتظر سمعتها تحجي بالتليفون بس
مافهمت شي لأن صوتها بعيد
كمت صرت وره الباب ومالحكت اسمع شي
صار عندي اثبات انو ماما
شغلتها مو راحه رجعت لفراشي وجسمي كوله
يرجف صعبه تقترب من الحقيقه ومن اقرب الناس الك دعيت من ربي يكون هذا مجرد حلم ام اني اطلع على غلط
صارت الساعة ١ ونص سمعت صوت باب المطبخ
انفتح كمت على كيفي وانصدمت صدمة عمري
يتبع ٠٠٠٠٠
