رواية امرأة في الاربعين الفصل السادس 6 بقلم نورا الرماحي

‏ويح قلبي من شجي آلحانه ،

من عشقه يهتف النبض باسمه~

وكأن هواه كان لي الدواء!

أين انت الأن…

رغم مرور الزمن و رغم كثرة البصمات التي

وضعها الم الفراق على ملامح وجهي

إلا أن قلبي كما تركته لم يتغير ….

ورة ذيج الزيارة لبيت اهل ياسين… شفت اخواني باهر وساهر يسولفون وية ماما من جوة جوة ومدى يخلونا نسمع احنا بالموضوع اني وماجدة…

المهم مااهتمينا احنا ورجعنا لروتينا القاتل ماجدة بالدوام واني بالبيت و الدراسة.

صار يوم سابع لزواج مثنى وطبعا لازم نروح جنت ماريد اروح بس لا ن مشتاقة لبيبي الي صارلها اسبوع يمهم قررت اروح وهم ابين لمثنى انو اني نسيته خلص حب مراهقة وانتهى والي يبيعني ابيعه

رحت لفيت شعري وحظرت احلى ماعندى ورتبت نفسي وماجدة هم رتبت نفسها وحطت حمرة وردية بناتية ماتبين بس لمعتها وحطت كحل قوي بتحديد…

ونزلنا لكينا ماما لابسة عبايتها وتنتظرنا كدام الدرج نزلنا اخر باية كالت بنترة شيلن رؤسجن خلي اشوف لزمتنى اني الاول وشالت وجهى باصابعها بعصبية شافتنى ماحاطة شي دفعتنى وراها

وراحت لماجدة وماجدة تغطي وجهها بربطتها حتى لاتشوفها بس اجاك الموت ياتارك الصلاة…بس شالت راسها ماجدة كبل امي شهگت وعيطت

وكالت…عزززززا ولج گحل گحل وية الحجاب وانطت ماجدة كف معدل انطلشت ماجدة من الراجدي على محجر الدرج هم زين ماانشك راسها خطية والحجية مستمرة برزالتها وحصلت تفلة معدلة فوك الراجدي وكالتلها صعدي غسلي وجهج ونزلي بسرعة..

ماجدة اتخبلت كامت تصرخ وهي تصعد الدرج كالت..روحوا اني مااروح وياكم والله هذا ظلم.

والوالدة تكوللها…خفةوراحة يعني لوتصخمين وجوهنا لوماتجين…

ماجدة ماردت دخلت غرفتنا وسمعنا ردت الباب قوي

والوالدة تصرخ وتكول خوش خوش اني اعلمج بس ارجع لاتكولين موظفة وكبرت بس ارجع اربيج من جديد

واندارات علية ونترت بية امشي كدامي انتى هم ماكو من وراكم غير الهم اكسرلها ضلع يطلعلها عشرة اني الجن ودفعتنى امشي يلة…

طلعنا واني ساكتة ومهظومة على اختى وهسة اشلون الي نفس اشوف مثنى ومرته..على الاقل ماجدة جانت مثل سند الي..

………………

وصلنا ورحت بعدماسلمت على الاهل ركض لحظن امي الحنون (بيبي)اي هي احن علينا من امي الي يوم عن يوم تحاربنا ..

سألتنى بيبي عن ماجدة شاورتها بأذنها كتلها ماما فشلتها وحجيتلها كلشي…

كالت.. بيبي بسيطة اني اليوم اعرف شغلي وياها..

وطبعا ماما جانت تخازرني طول مااني اكلم بيبي…

وراها اجت العروس مرت مثنى ولابسة بدلة حلوة ومكياج وبدت حفلة السبعة مالتها والكل جانت عيونهم عليها…

وهي تتنعوص كدامنا وام مثنى طايرة بيها وتعرفها بالمعازيم وكامت تركص العروس وية بنات عمي ونسوان اخوانها واستخفت للاخر بحيث ماتريد تكعد بس تهز

وبيبي تصنف وتقلد تالي كالت بيبي كافي صار المغرب طفوا المسجل اندرات مرت مثنى لبيبي وكالت… اوي بيبي خلينا نركص بعدماصاير المغرب.

ردت بيبي… كالت كافي انتى عروس شوية اركدي واكعدي واوكفي استقبلي و ودعي الناس الى تجي وتروح وية خالتج ترى الثگل زينة للمرة موبس تكمزين… قصفتها بيبي خوش .

العروس…. كامت وهي تتأفف وراحت طلعت لغرفتها وذيولتها على كولة بيبي صعدن وراه بنات عمي ونسوان اخوانها..

وبعدماشفناها… وخالتى ام مثنى كامت تباوع لبيبي صفح وتعوج حلكها وعيونها اذب شرارطول الوكت وتخازرنى كلما عيني تجي بعينها حتى كرهت نفسي لان اجيتهم.

………….

وتعشينا يمهم بعدين اجي بابا علينا وكامت بيبي حتى تروح ويانا للبيت جلبوا بيها ولحوا بيت عمي خاصة عمي بس هي

كالت.. اريد اروح لبيتى ارتاح شوية تقصد بيتنا عاد سكتوا واحنا جاي نطلع بالباب ومرت عمي وعمي طلعوا يوصلونا للباب

صادفنا مثنى…. جان وجهه متغير عيونه ذبلانة وحمر مثل الي مانايم ليله..

سلم على بابا وماما اجى وصل يمنا اني وبيبي اني لازمة ذراع بيبي كأني استمد القوة منها وسلم واني رديت سلامه بكبرياء ولاكأنما جان اكو شي بينا وباس بيبي وكاللها….وين بيبي رايحة وتعوفينا

كالت بيبي… كافي ظليت يمكم اسبوع شبع هو لو شبع خلينى اروح لا اصير ثگيلة على احد

بس ام باهر تتحملني هي بنتى الي ماخلفتها

اصيلة وبنت اصول مومثل بعض الناس (قصفت مرت عمي ولاتكعد راحة)

وانت يمة مثنى روح اشگم مرتك خليها تثگل

بس تتمركص وتكمزطول الاسبوع الفات شنو امها من خلفتها…خلفتها يم الگاولية (اويلي قصف ولاينتهي)

مثنى هو وعينه علية وعلى بيبي دنك راسه واتنهد

وكال… صار بيبي اربيها اني منا وبعد…

ورجع اتنهد ولزم ايد بيبي وباسها من راسها

وايديها

وكال وهو عيونه علية .. بس لاتزعلين انتي..

و العمر كله مانشبع منج بيبي انت الهوى وانتى النفس ولاعمري انساج وروحتج منا غصب والله موبرضاتى بس انجبرنا وكامت تلمع دموع بعيونه…

طبعا بيبي عرفت هذا الكلام يوجهه الي ضغطت على ايدي بيدها حتى لا اضعف وهي بحركتها هاي خلتنى اتقوى

وكالتله…يلة الله يرضى عليك وربي يسعدك ويرزقك بالولد الصالح صح مرتك عوبة بس بعد قسمتك هاي بيبي(ماتكدر اذا ماتقصف)..يلة يوم اودعناكم ودفعتنى كدامها وكالت امشي بيبي امشي…

طلعنا من بيت عمي وصلنا للبيت…

رحت اخذت بيبي لغرفتها ترتاح ردت اطلع لزمتنى

كعدتنى يمها وفتحتلي ذراعتها ذبيت نفسي عليها وشبكتها وحطيت راسي على صدرها كالت… شلونج يمة هاى الايام الفاتت.

كتلها… بيبي حمدلله

كالت… بالي يمج جان وعلى عيني ظليت ببيت عمج لخاطرعمج واول فرحة اله سكتت.

كتلها… لا يظل بالج علية بيت عمو ابوياسين وبناته غيرو نفسيتى شوية والتهيت وياهن وكمت احجي لبيبي كل الي صار بغيابها وعن ياسين وفشلاتى كدامه .

كالت بيبي… ياسين واخوه خوش ولد متربين مثل تربية اخوانج شفته اجي سلم علية هو واهله بيوم حنة مثنى.. ولد حليوة وعيونه حلوة تلمع لمع..

شلت راسي وباوعت لبيبي وغمزت وكتلها هااا بيبي تتغزلين بالشباب ماشي الا اكول لبابا

شالت عكازتها وتريد تضربنى وانهزمت منها وهي تتوعدلي وكالت لج اني الج رجعت بستها من راسها ونزلت راسي لرجليها وحطيته عليهن وكتلها نور البيت بيبي جان اظلم بدونج ومابي روح..

كامت تمسد على راسي وكالت.. البيت منور بيكم يمة الله يبارك بيجن وبابوجن واخوانجن وامجن بغيركم الدنيا مالها طعم الله يخليكم الية..

بهل لحظة دخلت ماجدة علينا وهي عيونها مورمة مبين باجية هواية ونايمة وذبت نفسها على بيبي وكامت تحظن وتشبك ببيبي وتبجي كمت ابجي على بجيها

كالت ماجدة…بيبي عفية بعد لاتروحين واتركينا انتى امنا مانكدر بدونج وكامت تشهك وبيبي تحظن بيها وتسكتها..

كالت بيبي… شوفينى خدج شيلي راسج وشالت ماجدة راسها وشافت بيبي خد ماجدة الاحمر وشهكت وكالت يمة انكسرت ايدج ام باهر ياظالمة…

وكامت تصيح بماما واجت ماما على صوت مناداة بيبي الها بس دخلت ماما لغرفة بيبي

نترت بيبي عليها وكالت وهي ادير وجه ماجدة لماما… شوفي.. شوفي.. شمسوية بالابنية يل ماتخافين الله لج باجر شلون اداوم البنت وهي خدها احمر هيج هااا.. ليمتى تبقين هيج انتى.

رادت ماما تحجي وكالت… غير تعرفين شمسوية

نترت بيبي وكالت… اي اعرف حاطة گحل وشكو بيها لج انتى شنو اكو ام هيج تسوي.

كالت ماما… يردن يخزني كدام الاوادم بلة ابنية وتحط مكياج وباجر يمكن تحف وهي مامزوجة شلون الناس راح تعرف بيها ابنية

ردت بيبي وكالت…. لج زمنهم غير زمننا وزمنكم الوكت تغير وبناتج كبرن خاويهن بدل النتر والزمخ والضرب عيب كبرن ماشفتى بنات عمهن شلابسات وحاطات مكياج وياريت بنتج حاطة بودرة لوحمرة هي كحلة يا ظالمة النفس.

بهل اثناء اجي بابا وكال شكو؟؟؟

ماما دنكت وسكتت… وبيبي كالت ماكو شي بس ام باهر الله يسلمها مضوجة البنات ومتعبتهن. ماكالت لبابا علمود مكياج..

بابا اندار على ماما وكال… ليش ام باهر موهذني بناتج ليش اضوجيهن موكاعدات يخدمن بينا وشايلات البيت والناس تحلف براسهن لا تهضميهن هن بركة البيت وهن الاربعة يكفلن الي والج الجنة ياعيني ربيهن ميخالف بس خد وعين.

ماما باوعت النا ولبابا وكالت.. احنا ام وبناتها وهن متعلمات على طبعي وكلشي اسويه لمصلحتهن.

بابا.. اي اعرف بس لا اضوجيهن

ماما… ان شاءالله وهي تتحلف بينا بنظرات عيونها..

طلع بابا واندارات علينا وكالت يلة كومن حضرن عشا لاخوانجن هسة يجون

بيبي باوعت النا وكالت كومن حبيباتي ١٠واكولن گليلات وهي تخازر امي..

بوسن بيبي وطلعنا اني وماجدة.

رادت ماما تطلع نا دتها بيبي وكالت تعاي ام باهر احاجيج.. وانتن سدن الباب طلعنا وسدينا الباب ووكفنا نتصنت

سمعنا كلامهن…

بيبي. لماما… بنتى اشوية فكيها على البنات خليهن يحنن عليج لاتكرهينهن بجفاج وياهن باجر عگبة وراج وگعات هن يشيلنج وكتاب وحساب تتحاسبين عليهن شوفيهن شلون خادماتنا كلنا خطية لاتشدين وياهن بعد حتى من تريدين ترزليهن وتعدلين شي بيهن حاجيهن بالعيني والاغاتي تاخذين گلوبهن قبل عيونهن اعرف بيج تحبيهن ويعز عليج فراكهن بس هاى سنةالحياة ويجى يوم ويتزوجن عاد خليهن شوية براحتهن شوفي هلوكت كلهن البنات حف ومكياج وانتى بناتج متربيات ماتطلع منهن العيبة خليهن شوية يحطن كحل وشوية بودرة وحمرة خفيفة.

سمعنا امنا شهكت وضربت على صدرها وكالت… عزززا عمة شتحجين انتى رادت تكمل بيبي قاطعتها

وكالت… احجي حجي هذا الزمن..ابتهال بنت عمهن خلال هذا الاسبوع بس ٥بيوت اجوا مشاية عليها من ورة عرس مثنى تدرين ليش لان مكرطمة الحواجب وتحط بودرة وكحل وحمرة و يشوفها حلوة والناس كامت ادور هيح

امي شهكت وكالت… عمة صدك تحجين جايين خطابة عليها غير ابني ماهر يروح بيها هو هاويها ويريدها كتله تخرج وصير ضابط اخطبها الك..

بيبي كالت.. هاااا ليش تريدين انتى ابتهال چنة الج؟

ماما.. اي عمة شبيها اشو جنها البخت تخبل

بيبي… هااا تخبل عاجبتج يعني ماكلتى حافةوحاطة مكياج وهي ممزوجة

ماما… اي امها تقبل واحنا ابنا يريدها..

بيبي…. لعد ليش بناتج تحاربيهن من هسةو ادورين لچناينج الاعذار

خوووش.. لعدمناوبعد مالج دخل بلبس بناتج واي شي يسون عليج بس بشغلهن بالبيت واني اتكفل بغير شي فهمتى مالج دخل ويلة كومي من يمي خلينى اتمدد شوية..

بس كملنا تنصت اني واجبة وركض للمطبخ

كمنا نطلع كبب وكباب من المجمدة ونكلي واحنا الفرحة ببيبي ماسايعتنا.

ورة اسبوعين… يوم خميس

جنت كاعدة اغسل بالطارمة واسكي الحديقة

وشايلة الدشداسة واغني من اغاني هيثم ومنطلقة ..

دخلت للحديقة كمت اراقب زرع الي جانت تزرعه ماما من مخضر كرفس ع رشاد ع معدونس ع شبنت مشكل ياحلو .

من شفت الرشاد اذكرت اخويةماهر اليوم يجي وهويحب الرشاد وية النواشف لان جنا محظرين عجين كباب نباتى جنا نسويه بالحصار الي متكون من بتيتة او شجر اوباذنجان وفلفل اخضروطماط وبصل بدون لحم لان اللحم جنا

نذوگه من الراتب للراتب..

ووية الكباب شوربة عدس وكبب مال برغل والتمن هم نگلي وياها لان ماهريموت على النواشف…

رحت للمطبخ جبت سلةوسجينة وكمت احوش الخضرة وطبعا مستمرة بالغناء اغني اغنية هيثم عيونك حلوة…

عيونك حلوة ..

صوبت گلبي…

ماخلانى اندل دربي…

من نظرة… من نظراتك..

من لفتة…. من لفتاتك…

ومن وصلت لمقطع… سمعت صوت كمل وياي الاغنية ولكيت ظل واكف وراية.. وجان يغنيها وياي ويكول…

اتمنى اسمع كل همسااااتك

عيونك حلوة…

صوبن گلبي…

واندار الكى ماهر وكمت على طولي حظنته جان ماهر احسن واحدباخواني… واني ابوس بيه وجان اشوف واحد وراه واكف ولابس البدلة العسكرية هي وقبعتها ومدنك راسه ويضحك وبس شال راسه شفته صاحب العيون الجميلة صاحب النظرات

الحنينة… ياسين… بس شافني ضحك واتقرب وسلم علية.. وسلمت عليه…

جنت مجلبة دشداشتى بالداخلية حتى اتحرك براحتى هاى طريقة كل البنات ماكوبنت ما تسويها…

شفته انتبه وختلت ورة ماهر اعدل بالدشداشة التفت… ماهر علية

وكال… امممم شنوهلريحة الطيبة

كتله ماتدرى ماما تسويلك نواشف يوم جيتك..

كال …امممم ميت جوع وجلبت بياسين وجبته وياي لان عدنا امتحان وماردته يروح لكركوك بعيدة بغداد اقرب لدوامنا.

كتله… ينورالبيت بجيته وابتسمت

رد ياسين علية… منور بيكم بت عمي وابتسملي

دخلنا للمطبخ وماما جانت تكلي كباب وفرحت بشوفةماهر الي تقدم الها ونزل يبوس ايدها وراسها وهي تبوس بيه وياسين هم سلم وفرحت ماما بيه وبجيته ورحبت بيه وراحوا لغرفة بيبي وسلموا عليها…

وصاحنى ماهر حتى احظرالحمام لياسين…

رحت حطيتله خاولي جديد بالحمام وصابون وليفة جديدة وهو اصلا حمامنا دومه مغسول ومتعقم بالقاصر هاى جانت عادتنا وحمامنا جان بخاري (حمام حمي)موكيزر كهربائي جنا نحميه يوم الخميس من الصبح لليل لان نعرف ماهر جيته الخميس وهم الكل جان يسبح ونغسل الهدوم هم…

رحت لماهر دكيت الباب كتله تعال يلة جهزالحمام وانطونى ملابسكم خلي اغسلها هم.

ماهرالتفت لياسين كله… يلة انطيها هدومك الوسخةكلها خلي تغسلهم..

ياسين… لا لا ماعندي هسة اغسلهم اني من اسبح..

رديت عليه اني… شنو تغسلهم انت لعد احنا شنو شغلنا.. انطينى يلة ولا تتعزز علينة

كام يضحك..

وماهر نزل وهو طلع هدومه كلها ومن جان ينطيني شفته يباوعلي بنظراته مثل كل مرة الي تقتلنى كلت بگلبي فدوة صدك اشتاكيت لنظراتك..

وبينما هوينطينى واني اخذ منه الهدوم طخت ايده ايدي بدون قصد منا اني راسا جفلت فهو شال عيونه وباوعلي بنظرة استغراب

واعتذر

دنكت راسي كتله عادي ماصار شي ونزلت ركض ومن دانزل صادفت ماهر يصعد وهو متوضئ يريد يصلي صلاة الظهر.. سألنى

ماهر… اكلج نزل ياسين لوبعده

رديت… لابعده جان ينطينى هدومه روح نزله حتى يسبح…

نزلت رحت للحديقة الخلفية كمت احط الهدوم بالغسالة وافتش بالجيوب لا يصير بيها شي..

لكيت ورقة بجيب ياسين…

مكتوب بيها

الى H…. يا من لكي الفضل في تكوين ذاتي…

ظليت افكر منو H.. كلت اكيد حبيبته هاي..

مادرى ليش ضجت…

خليت الهدوم بغسالة

وشغلتها. ورحت للمطبخ

اساعد ماما وصبينا غدة وخليت القوري على

صوبة علاءالدين…

وماما نادت على ماهروياسين وبيبي وكعدنا نتغدى كلنا احنا الخمسة لان بابا وماجدة وباهر وساهر بالدوام…

طول الغدة يسولفون ماما والولد وبيبي… اني

جنت ساكتة كمت قبلهم رحت احظر استكانات

الجاي حتى رأسا اصب چاي ورةالغدة…

ومن شفتهم كملوا ويغسلون ايدهم صبيت

الچاي ووديته الهم ورحت اغسل المواعين وبعدنى ماكملت اجوا باهروساهر وفرحوا بياسين وبجيته النا ورحت صبيتلهم وبعدهم

يتغدون اجوا بابا وماجدة ب٣ واستمر الغدة بعدين ورةماكملوا كلهم غدة غسلت وخلصت من مواعين.. وماجدة صبت چاي الهم..

صعدت فوك اني كلت خلي ارتاح شوية ومن اكوم اسبح.

اتمددت اجت ماجده دخلت للغرفةوسدت الباب

وغمزتلي كتلها ها خير شبيج.. اشو هاي فتحت حلكها بضحكة الها اول ومالها تالي..

كتلها ولج شبيج سالمين

كوة لزمت نفسها وسكتت كالت عيون ياسين جانن وراج من جوة جوة خوا من صعدتى الدرج لفوك ظلت عيونه وراج واني قطعت نظراته من سألته على خواته وكال بخير ومشغولات بالدراسة..

رجع هوسألنى عنج كتله هيومة هم مشغولة بالدراسة وتواجهه صعوبة بالرياضيات كتله سادس تدري الرياضيات صعبةشوي…

كال… اني زين بالرياضيات اذا تحتاج اني ادرسهااليوم…

كتله.. اي والله تحتاج هسة اكوللها خلي تجي وتكولك على الي ما فاهمته…

هيام… ماجدة لاتكوليلي كاعد ينتظرنى انزل .

ماجدة وبضحك… لج اي ينتظرج نزلي خلي يفهمج

هيام… عزززا لا مو هسة خليه بليل هسةخلي يرتاح الولد وثم همة هم عدهم امتحان ماهر كال

ماجدة… لاعيني هولومو واثق من نفسه مسيطر على امتحانه جان ماكال اني ادرسهااليوم

هيام…. لا.. لا.. عفيةخليه بليل اروح اسبح واشوية خلي هو يرتاح عود نكعد بليل نراجع.

ماجدة وهي تخوصرتلي… وكالت… زين هسة شكول للولد

هيام اتقربت منها وبستها من خدها وكتلها… كولي لكيت هيام نايمة عود بليل راجعلها اوك

ماجدة… ماشي راح اكوله وانتى رؤحي سبحي لان وراج راح اطب اسبح قبل المغرب.

…………..

رحت سبحت ومشطت شعري ولفيته لف ورة ماجففته شوية ورحت سويت كيكة الدبس لان الشكر جان غالي نقتصد بيه من حصة لحصة لليل وسمسمية بالدبس جانت بالحصار هي سنكرز هلوكت…

كملتهن خليتهن يبردن وكمت احظر جان عدنا دجاج نربي بالبيت بقفص جبير…بالحصار ماما سوتلنا تقريبا اكتفاء ذاتي للبيت من زرع المخضر وتربية الدجاج الي جنا نحصل منه لحم وبيض….

فماما من جان يجينا خطار تذبح منهن وتكرم الضيوف…

دجاجات٢ ذبحهن اخوية ساهر وماما نظفتهن واني تبلتهن حتى تشويهن ماما بالتنور الطين الي جان عدنا بالحديقةالخلفية وهم جان عدنا تنور الاستيل الي نستعمله للخبز مرات ومرات تنور الطين من يغلى سعرقنينة الغاز (الي عاشو هاى الفترة من جيلنا يعرفها ويعرف ازمةالغاز والنفط).

جهزتهن لماما ووديتهن الها حطتهن بالتنور وأذن المغرب رحنا نصلي.

تؤضيت وصعدت لغرفتنا صليت كملت فتحت شعري جان كلش حلو ملفلف وطلعت دشداشة قديفة شتوية لونها شوندري صدرها مشغول تطريز حلو كلش ذهبي.. وكفت كدام المرايه اسوي حركات بشعري…

مرة ارفعه مرة احطه على صفحةوحدة مرة ارفع نص وانزل خصلات شفت هاي احلى

بهل اثناء دخلت ماجدة الي جانت جوة يم بيبي نايمة صعدت تصلي.

شافتنى..

وكالت… امممم لواعرف اصوفر جان صوفرتلج شنو هلجمال هاي كله علمود ياسين يوووووه قصدى الدرس وهي تضرب كصتها

كتلها… اي اي ظلي ظلي صنفي علية… لعدتريديني اكعدگباله مبهذلة موعيب

ماجدة… لا.. لا.. مايصير الا البهذلة مو من شيمنا

كتلها… انت وضعج حيل تعبان كافي تبسمرين

ماجدة… لج لا تعكجين وجهج علية لا احرمج من الدرس مثل مااقترحته على ياسين الغيه الج مفهوم

كتلها… عادي مايهمنى متعودة ادرس وحدى اممم

ماجدة.. زين اروح لعد اكول لياسين هيام مدبرة نفسها تكول مايحتاج..

رادت تطلع

وكفت كدامها

وظهري ع الباب

وكتلها… فدوة عفية لاتفشلين الولد هسة يكول موبعينها حتى ادرسها ويروح يشيل بكلبه علينا ويكول لعبن علية.

ماجدة… امممم لج اتشاقي وياج ربي يوفقج وياه ويجعله نسيبنا الزغير

ضحكت وياها خاصةمن كالت نسيبنا الزغير.

وكتلها.. لج لا تعاي اليوم لكيت هاي الورقة بجيبه شوفي وشوفتها الورقة

كتلها.. يمكن عنده حبيبة يحبها اسمهايبدى بحرفH

ماجدة… ضحكت

و كالت… لج ثولة انتي موحرفج همH.

كتلها… حتى لو هو منو يكول قصدنى

ماجدة… نشوف الايام تثبت

كتلها… الله كريم هسة خلي اخلص سادس وباقي سهل…

يلة اروح احظرالعشا هسةاكيد استوت دجاجات ماما. وانتي صلي وتعاي.

……………

نزلت ورحت للحديقة حتى اشوف ماما كملت وجان الكى ماهروياسين كاعدين يمها

وهي تخبز لان جانت عاجنة شوية عجين للعشاء حتى تخبزه حار حار للعشاء ناكله ومطلعة الدجاج من التنور…

من شافني ياسين اروحلهم ابتسملي من بعيد

وصلت يمهم سلمت وعيوننا تلاكت اني وياسين

وماما وماهر مامنتبهين…

وطلبت ماما مني اروح احظر معكرونية وية الدجاج والسلطة وخضرة ولبن جانت ماما تسويه بالبيت من حليب الحصة بالمواد التمونية

طركت اللبن وحظرت وويةصلاةالعشا كعدنا كلنا نتعشى..

ورة ماكملنا العشا سويت چاي..

وصبيتلهم وية الكيك وماجدة كامت تكلي على الصوبة بالمطبخ حب شمسي لزوم السهرة..

وراها رحنا كعدنا كلنا بالهول…

ياسين وجه كلام الي

وكال… هيام بشنو ضعيفة جيبي اشرحلج…

والكل التفتلي وصرت بموقف لايحسد عليه خاصة نظرات امي جانت اتهام الي….

.

.

.

يتبع

.