رواية الم احل لك بعد الفصل الثامن 8 بقلم الكاتبة بتول

وارث و الاربـعين يـوم

جـان حـالي مثل طفل توه يتعلم المـشي

يخطي خطوات ومجلب بالحايط مستند بخوف ورهبة وحماس حتى يشوف شنو بعد اكو وراه هاي الخطوات

هيج حالي

دورت نفسي دورتها بكل مجان لجن جنت مغمض عيون گلبي بوكتها ومن فتحتها لـكيتها تستراح يم مصلايتي وعطرها يم صوت للهُ اكبـر

دورت راحة گلبي ولكيته تستراح يم

((الا بذكر الله تطمئن القلوب))

مو بس انه هجي حالي لا كل انسان انخلق بهل الكون راح يلـكه راحته بقرب رب العالمين

لو شني ما جانت الطـريقة حتى يوصل لـ رب العالمين بس المهم راح يوصل

…. يتعب اي هيه النفس اتعب من تجاهدها وتقاومها وما تنطيها على مرامها بس لمن توصل لـ رب العالمين وتلتمس الراحة بقرب ذكره

راح تعرف هذا الطريق يستاهل التعب والشگه

وبذل النفـس

بهاي الاربعين يوم

اول شي سويته طلعت ورق وقلـم وسويته نفس ما كال السيد

كتبت شكو ذنب انه مدمن علي لو اكرره هواي

ومن صفنت بيهن لكيتهن اشياء من الهوامش ولا منتبه الهن اصلاً ولا جايات ببالي فد نوبه

كتبتهن وبديت اجنب اسويهن يوم… يومين… ثلاثة… اربعة… اسبوع…. عشر ايام….. لكيت روحي خالي من عدهن

تعلمت الصلاة الصحيحة من خلال الصلاة الجماعة وكتيب زغير اخذت من المكتبة مالت الاصدرات للعتبة الحسينية

واضبت على زيارة عاشوراء ومن صفنت وي روحي لكيت نفسي احجي وي الامام الحسين سلام لله عليه

بديتها السلام ومثل ما احجي وي الناس التلاكيني بالشارع

….. نسلم بمحبة وابتسامة

وراها نبدي نسولف وتبدي السوالف بحجاية يا (يا ابا عبد لله)

نشكي ونحجي شكد مصيبته عظيمة وهزت السماوات گبل الارضين

…. وراها نتبرأ من اعدائه واتباعهم (وهاي تذكرني بالسلف عدنه لمن تصير مشكلة وي عشيرة ثانية احنه نذب تبرائه من الفاعل اذ ماجان بي صلح ولا حاول يطخ راس حتى تنحل المشكلة)

…. ونطلب من عده نصير انصار واعوان حتى ناخذ ثاره وي الطالب بي الحجة بن الحسن عجل لله فرجه

…..نسئله ونطلب منه التقرب من لله و رسوله واهل بيته بتعظيم مصابه واللعن عدائه

….سوالف… سوالف وي ابو علي بيها يرتاح الگلب وتهدئ التفس وترتخي الاعصاب وتنسه الدنيه وهمومها ولكيت نفسي اختم الحجي واكله

….. مولاي ما غيرك عرف لا لا تضيعني

…. قراية القران الكريم وجنت ما افوت فرض اذ ما اقره وياه صفحتين….. صفحتين انه قاري قران گبل لجن مو بتركيز بس عالمره صممت عالروحي وغصبتها مو برضاها اقره واتمعن بالحجـي ويا محلات الحجي وهو من لله… كلام لله….

…. جان روتيني بسيط وما بي كل تعب الي اشياء روحانية ترست دنيتي وهيه ما تاخذ من وقتي غير الـ١٠ دقايق

… تعلمت مثل ما اكو امراض جسدية تصيبنه

ونروح احنه نركض للدكاترة حتى نتعالج

المفروض منه نتعامل وي امراضنه الروحية

ومن هاي الامراض……

نفور الصلاة والكسل لمن نسمع الاذان

نفور من قراية القران

نفور من سماع نصيحة من عالم او مجتهد

وغيرها من الامراض التارسة مجتمعنه بس احنه ما نلتفت الها ولا ندير الها بالي

… لـمن يجي وكت الفلاونزا الموسمية اشوفن الاهلي تنخبص وتتخاف على اطفالها وتاخـذ الحذر منهم ويخافون على ارواحهم وعلى اطفالهم

بس العجيب محد ملتفت وادير بال لوگت الشياطين اليومية مو الموسمية وهو

…. بعد صلاة الظـهر هذا الوگت يكلك بي تهجم جنود ابليس بالمليارات عالبشر وبي خير وحظ وبخت اليشرد منهم

ويحصن نفسه ورب العالمين انطانه وصفة العلاج وهو تكرار ذني الحجايات عشر مرات

((بالله اعتصمت وبالله اثق وعلى لله اتوكل))

وهذا يسمه بالغذاء الروحي

….ومثل ما اكو شغلات الطبيب يوصينه نسويها حتى نقوي المناعة ونتقوه مثل

اكعد مقابيل اشعة الشمس فد ربع ساعة….

يو اكل الاكل الفلاني بي فوائد….

واشرب ماي هواي….

نام زين وابتعد عن السهر….

والعب رياضة….

هاي كلهاا الاموار والاشياء وغيرها حتى اقوي مناعتي الجسدية

هم مره فكرنه شلون نقوي المناعة الروحية

اجاني الجواب بـ اختصار وبدون تكلف

تتقوه المناعة بذكر الله

ومن الاذكار المهمة البيها يتصحن الانسان وعلى طاري المناعة اكو رواية تكول

من قراء اية الكرسي مره واحده… وكل لله به ملكً يحفظه

ومن قراها مرتين….. اثنين ملائكة

ومن قراها ثلاثه…..ثلاثة ملائكة

ومن قراها اربعة…. اربع ملائكة

ومن قراها خمس…. يقول لله سبحانه وتعالى لملائكتة

…. تنحـوا عن عبدي فانه بحفظي

كعـدت الصبح ومثل كل يوم بس فتحت عيوني قريت اية الكرسي خمس مرات

خليت ايدي على صدري وحجيت

السلام عليك يا اباعبدلله بـ ابي وامي انت

حضرت هندامي كويته وطلعت وكت دوامي

لحد ما خلصت فتت للحضرة ما باقي شي لصلاة الظهر اصليها واردن للبيت اتغده واخذلي غفوة حتى اردن للحوزة

صليت ومريت اخذتلي تمن وفاصوليه من مطعم وطلعت بوجهي لداري فجيت الباب ودخلت

حطيت العلاكة عالكاع غمضت عيوني ورديت فجيتها اكوو ريحة اي ولله ريحة مو غريبه عليه

ريحة مسج

وريحة هذيج الكاع الملحة الحنينة

اتبمست وفتت

…. اشوفن الخاجية معلكة وهو واكف بهيبته وطوله يبعد طولي يصلي

وراه واكفين يصلون عگاب وفارس حطيت الغده بالمطبخ وكعدت عالكرسي اعاين الهم يبو يبعد حيلي كلكم هاكثر مشتاك الكم ولـ وكفتكم

اعاين الهم وحتى خاايف ارمش وتضيع صورتهم گبال مني

…. وكفتهم ولمتهم سوالفهم وغيرتهم حنينه حيل وجذب واحد يسد مكانهم

خلصوا وانداروا الي كلهم كمت اشبگ بيهم واحد وراه الاخر

ومامصدك وكفتهم گبال من عيني عگب هاي الاشهر كلها لحد ماا بزع مني عگاب دفعني عالـ جدي وحجه

عگاب….خاايب كافي شماالك تسودنت عالمشابگ جنك حرمه وتبووس

وارث….اانجب ولك وعلي ماامصدك انتم حذااي ليمت اجيتوو وعليش ما دكيتو عليه كتولي

غياد….بويه عوود كلنه ندخل عليك مسابگ لجن ما جنت هنانه ودريت بيك بالشغل كتلهم خلوا عالراحته لميت ما يجي يلكانه متانينه

وارث….كل الهلا وعلي توه نورت داري شنهي متغدين يو لاله

فارس….ولك كاتلنه الجووع وعلي من نهد الريوك وجماله جدي جاب الكباب وخلاني عالريحه جني جلب اشمشم متانينك

وارث….يموت ويخسه الجووع هساعة اصبن ونتغده

سحلت عگاب من ياخة الدشداشة

امش يله نحط الغده

عگاب….وولك خطاارك انه

وارث…يمعوود اخووي انته اخذ هاي السفره حطها بالهول

عگاب…ووريث ولك اوول مره افوتن لدارك تخليني امدن سفره واعزب ويااك

وارث….چاا المن اسمك اخووي اذ ما تعزب وياي

يله بسااعك جدي جايع

… اخذها يمدها ويدردم عليه جنه حرمه عجوز ماكلين عشاهاا

حطينه الغده وكعدنه كلنه فرد كعده متريس الكعده جدي

مكابلهم اشبع عيوني من شوفتهم واذني من سوالفهم واسمع اخبار الربع هناكه و اوضاع الحصاد والمحصول هالسنة

وهمه هم ينشدوني عن الخدمة بالعتبة وشون امشي ايامي وي الدراسة بالحوزة

…. ضلوا يمي يومين و راحوا جدي وعگاب واخذو روحي وياهم تعودت عليهم حيل

تالي بليل صفه الجـو اليه ولفارس

خلصت صلاة العشائيين

لميت مصلايتي نزعت دشداشتي علكتها بصف مصلايتي

… واعاين اله صافن وحسره تجر حسره فاتح الشباج مال الهول ويدخن بشراهه هوه ما دخن ولا رفع الجكاره جدام من جدي

….. خدرت جاي صبيت النه بـ كوابه واخذته يمه جريتلي كرسي وجعدت جدام منه مكابله

اريدن اعرف شنهي سالفته هو من اجه ومن عاينت بوجهة عرفت موش خالي مهموم وجن الدنيه ضايكه بي

وارث….اي فاارس لله بالخير

…. باوعلي ومرد الجكاره بالمطافه هز راسه وما حجه شي حول عالجاي كام يسفت بي ويعاين للضوه الكمريه من الشباج

وارث….شمالك فيرس الحال مكلووب شجاك

فارس…مامش لا تحط عگلك وياي

وارث….اخووك انه شنهي ما اعرفنك حتى تكلي مامش شي وجهك مكلوب وحال موش الاولي

فارس…ما كالك جدي ما حجه الك

وارث….لا وعلـي ما فج حلجه بسالفه الك شنهي الصاير

فارس…خطبت

وارث….اي يالله عالخير والبركة چاا شمالك غير هيه نفسها البت التريدهاا وهاويها

فارس…اي

وارث…چاا شنهي سالفتك

فارس…مووش طلع ابن عم الها وونهئ عليهاا

… فكيت عيني واعاين اله شون عيونه تحجي بهظم

نزلت كوب الجاي عالطبله كدامي وجني تهيت الحجي اريدن الحروف تجمع واحج حجايه وياه بيها خيـر ماكوو

فارس…تدري القهر شنهي بالسالفه هذا الناهي فوك ما هو….. و….. لجنه مووش ابن عمه اللح

عمامهم من بعيد ومن سمع خطبتها تذكر ينهي

وارث…يعين لله كلبك وتالي

فارس…شتالي يـ اخوي عوود شديت روحي وكلت اروحن احجِ وياه بلكن من يشوفني اريدنها يبطل النهوة شوو من شاافني تخبل زايد ويصيح وصووته شعلوه خله المايشتري ضل يعاين علينه

بنص البستان

تالي فنك طلع يااهوو

….. بلعت ريجي وعيني علي محروك گلبه ومسحون سحن مكسور خاطر

وارث….يااهو….وانته شنهي تعرفه

فارس…ااي اعرفنه لجن لله يشهد عليه ما تذكرته اله لمن كالي وذكرني هوه

وارث…اي يااهو احج شلعت افاادي

فارس…تذكر محمود وياانه جان بالمدرسة

وارث….ابو الجكاير والمصايب

فارس…ايي بعد عيني عينك هو هذا فد نوب حاقد علي من فتنت علي يم المدير مالت المدرسة ومن سامع بيه انه خاطب بت عم ابن عم ابوو جااي ينهي ويطلع مراجله عليه

رفعت حاجبي ومتقين هذا الاسد الجدام مني ما سكت عن حگه واخذه مربع وبرد گلبه وطلع حگ النهوة من عيونه

وارث…وانته شنهي سوايتك وياه

فارس…خليته يتفل سنون وحگ ربك خليته وصله مسح ومسحت بي طينه بستانهم

وارث…سبع مااتكلي عليمن طاالع انته

فارس…اعجبنك بس وعلي گلبي مكسور عبني من صدك ردتها حلالي وكضيت نهار وليل اتخيلها حالي ومالي بس اليه مااردت شي وياهاا لجن ماصارت

وارث….نعمة الله ورحمته واسعه يـ اخوك لله يعوضك بـالاحسن منها

فارس….وهذا انه جدام منك شاارد من امي

وارث….يبوو عمتي ام عگاب شمالهاا

فارس…خاايب فعصت گلبي فعص وعلي رغلت ببطني على بت اختها وبت اخوهاا بويه ما اريدن تتزوج هساع ما اريدن اتورط وانه گلبي مووش خالي بس هيه شوون تخليني اارتاح

عاد انه شسوويت لميت غريضااتي واجيتك شاارد

وارث…ينعل غيرتك اضن عمتي ماا تدري بيك جاي اليه

فارس…ولا واحد من اهل الدار يدري بس جدي وعگاب شردوني گبل بيوم من الدار و همه على اساس ما الهم كل غرض بيه طلعوا وجايين يشوفونك ويعاينون احووالك

… ضحكت وهزيت ايدي على حاله الدنيه ما مخليته مرتاح معثرته تعثر

وارث…كل الهلا بيك خوويه شوو هو انه بحيدي انته خوش ونس اليه

ارتجيت عالحايط صفنت عالجمره الجكارة وعالدخانها من اطشر من حلكه

جريت نفس وحجيت

اخطـبت قبلوا

اندار اليه تبسم وعيونه مدمعه

فارس…مشتاگ لحجيك ورريث

هزيت راسي وكمل حجيي

وارث….. اخطبت قبلوا…. رحت بايس يد امها…. بستها وكلت فرحتها يدومهة….. ابن عم خال ابوه يد (جد) امها….. نهئ وقبلوا نهوته وكصوا بيه

فارس….الله واكبررررر اي وعلي كصوووا بيه هل….

وارث….بهداي فيررس وتاني عوض ربك شووف شنهي ضااملك

فارس….ونعم باالله

وارث….تمش نطلع

فارس…وين

وارث….نفتر بكربله اخذنك لمقام صاحب الزمان يو لمجان طيحت علي الاكبر سلام لله علي

فارس…خوش حجي بس ابدل سلاباتي

وارث….عالراحتك

فتت للغرفة طلعتلي دشداشة رصاصية عدلت كسرتهاا اخذتلي جفية وكفت جدام المراية الفها جراوي عماني

طلع فارس هم بيده جراويته

فارس…اكلك تعاال لفها اليه

وارث….خاايب شكبرك تصير وبعددك ماا تلفها مثل الاوادم

فارس….وداحي باب خيبر اعرفن الفنها لجن ساعة ساعتين وتزحلط من راسي

اشوفنك انته وعگاب النهار كله بروسكم وحتى ما تتحرك

تگربت طويتها من يم كصتها والفنها اله واحج وياه

وارث…ملزوم تتعلم يله امش

فارس….سدلي ساعتي

وارث….جيب بوويه جيب

سديتها اله وهو اندار يباوع لروحه بالمراية

فارس من دونه احنه ولد العمام طلع موش النه اشكر وعيونه شهل تسلب عگل اليعاين الها

ويختلف عنه حتى بطبايعنه يهتم لروحه على اخر حبايه

وما يطلع من باب الحوش اذ مو يعاين شعره مرتب ومصفط اصفط عطره وساعته ذني مستحيل يستغني عنهن حتى يو طالع للكاع عده زرع لو حصاد كلنه نتحزم مجلحين متربين اله هو يلج لج من بعيد ويصلف من يجبل علينه

…. جدي يكول جنه عمي ابو مليكه لله يرحمه هم هيج ويوم دخل وصار بالجامعة ووحده حبته وهو لله يسلمه جانت الكاع ما شايلته وما يعاين لوحيده وهيه مو من مواخذينه ولا عدها من طبايع اهلنه ولا هي من دينه

…..اجت لبيت جدي وجانت من بنات الولاية خاطر تتعرف على اهله ومن يومها هاي السالفه طشت بالسلف وعمي بطل من الجامعة ماا كمل جيف صار الحجي هواي علي وذموه وهوه ما جان يتحمل حجايه من واحد والبت ماا صارت اله تزوج العلوية ام مليكة ونسته الدنيه وما بيها لجن هم ماتهنه ولا شاف من عمره خير وراح بيها ضحية غدر وضاع دمه وما نعرف ياهوو جتاله

فارس…يله بسااع وارث ووين صفنت يـ اخوي

وارث….يله امش

طلعنه من الدار واخذته لمقام سقوط علي الاكبر عليه السلام جان مجان بين داربين ومحصور

اخذته لشارع محمد الامين وطلعنه لمقام صاحب الزمان عجل لله فرجه الشريف

كعدنه هناك بالساعتين ببروده المكان وماكو ناس هواي شوويه بي مكان راحة نفسية ماكو اله مثيل

طلعنه اشتريت اله كاسة ازبري

فارس….نكعد عالرصيف

وارث….لاله يمعود عوايل منا تمر وحتى نسوان بحدهن نكعد على كعدات شوي منا موش بعيدات

فارس….وريث تذكر

وراث…شنهي

فارس….تذكر من جدي كتلني وانته شاكفت عني العكل

انداريت علي بطرف عيني عاينت اله

وارث….وماا تذكر عليش كتلك شنهي السبب

فارس…لا ااتذكر ااكدر انساهاا انه يو تروح من بالي

من رافجت صااحب السوء واخذني انااطر البنيات بركن المدرسة

وارث….بس نااطرت فيررس

فارس….اي وداحي باب خيبر بس نااطرت بس هاي البت مفجوعه بالعباس انه لا بصوبها لا بكربهاا وهيه اجت تتشكه لجدي مني تكله يتغامز الية ويذب حجي

وارث….وكوون انته ماا مسويهاا

فارس….لا وابو فاضل كوون معاااين الهاا بس بعد هاي جدك تووبني منها ومن غيرهاا هذاك وهذا يوم وانه كل ماا اشوف بت ادنك رااسي وافكس عيوني يوو صديت لوحيده

بس هاي المرمره وتاالي نهووا عليهاا وكصووا بيه

خلوني لايب گلب

وارث….مووش الك ياخوي يوو مقسومة الك تصير لجن موش الك ولا هيه من ضلعك

فارس….صاادك ووريث وهذا حجي جدي هم

بس شيقنع گلبي وولك تدري الهاظمتني شنهي

وارث…شنهي الهاظمتك

فارس….ولك اانه طبيت للحوش دمعتي بعيني وداحي باب خيبر وامي تلكتني تهلهل تكلي هااي ما توفكت بيهاا عبني ماا راضية عالزيجتك

شبيت وانطفيت وعلي امي هجي تكوول چاا الغريب من يسمع شيحجِ

وارث…سهلة يـ اخووي سد اذانك عن حجيها لوو شما حجت وشما كالت تضل اامك وانته ملزوم تتأدب وياها اسمع واسكت

فارس….ماامش غير حل

وارث….تمش للمخيم يوو تعبت

فارس….لا يـ اخوي اريد انام وعلي نعست كلش

وارث…امش نصلي بالصحن الحسيني ونرد للدار انام

فارس….تعبتك وانته باجر وراك كعده من الغبشة

وارث….لا تنعثل بالحجي انه متعود اسهر واضل افتر بحيدي عااد انته ويااي ونس وان جان عالكعده انه من زمان متعود على الغبشة حتى يو نايم ساعة بس شنهي نسيت كعدتنه غااد بالحوش الجبير

فارس…لا ولله ماا نسيت يـ اخوك وگلبي طااك وصاير هاكبره عليهم بس لزوم اسكت امي واخليها اتووبها من بت خالي

وارث….ومليكه شحاالها شكثر مستفكدهاا وعلي

فارس….نعمة لله عليهاا هاي تجايه جدي من بعدك مكابلته ليل ونهاار ويو شاافتك دكيت علينه تنخبص وتفزع البيت كله ويو كنالها احجي ويااه ما رضت تكول استحي

ضحكت ودخلنه لمكان الوضوء

وارث….لله يستر عليهاا دنيا واخرة ويكتب الها زلمه يستاهلها ويسندهاا

فارس…. ماا تاخذهاا وارث

وارث….لاله فاارس وين مشه عگلك رده بمجانه يـ اخوي و البت اخيتي ومن زغرهاا مداريهاا انه واشوفن بيها روحي موو غير شي

توضينه وفتنه نصلي بالصحن خلصنه زرنه من بعيد وطلعنه للدار بس وصلنه شمر روحه على القريولة وناام مجفي عالوجهة

وارث….كاالها جددي فيرس موو صاحب تعب وشگه

ذبيت عليِ غطه وانطرحت بمجاني نمت ثلث ساعات وكعدت اخذت هندامي لبست وطلعت حتى جاي ما لحكت اشرب يله بشارع اشرب الي استكان جثيرين يبيعون گريب الامامين

اخذتلي استكان سفري ودخلت لبين الحرمين

دخلت للكيشوانيات وبديت بشـرف الخـدمة

……. مليكه

لمينه مواعين الريووك وغسلناهن توني اريد افوتن اسبح واسمع هلاهل من حجرة حبوبتي مشيت صوب الحجره طلع عگاب منهاا فرحان عاين اليه مبتسم ووراها عگد حاجبه كاال

عگاب….سلاباااتج

رفعت عيوني اله حجيت بفهاوة وثوول

مليكه….شنهي

مد ايده على ملابسي سحب الخاولي وذبه فوكاهن ومشه يهزز ايده رفعت الخاولي اشوفن شغطه بملابسي لانهن الداخليات طكيت كصتي بيدي عاابج لله مليكه وثول كون الج الزلمه شااف سلاباتج العيب ماا يصير واحد يشوفهن

مشيت للحمام وادمغ برووحي امي جم مره كاايلتلي لفيهن بدشداشتج لا واحد يشوفهن بس انه اذن من طين والثانية من عجين

جني حماار لو تنحرت…. تنحرت بعد ماا اسمع الجلمه

علكت هدومي بالحمام وفتت سبحت ونشفت شعري وطلعت لافه شعري بالخاولي والشال على ركبتي مغطيتها ادور على امي تمشط الي شعري

شكبرني وامي بعدهي تمشط شعري ما اعرفن اسوي عدل اذ سويته كصيبه اسويها عوجة ويوو كرن هم اعوج ويتشلع شعري منه

وراسي يصير بكبر الطابوكة

دخلت لحجرتنه انه و سدن ووحيده من بنات عمي زغيره

فتت ولكاهاا تسرح بشعرهاا وتغني تطرب لروحهاا والضحكة شااكه حلكها من الاذن للاذن

شاافتني اجت شبكتني وتبووس بخدي وتعصر بوجهي

مليكه….ياا سدن لااا لله عليج خدودي انجعصن وعلي

سدن….ااحبج مليكه وعلي ااحبنج

مليكه….وانه هم ااحبنج بس شصاير شنهي المفرحج

ابتعدت بخجل واديها على خدودهاا عيونهاا تلمع جنهاا گلوبات

سدن….عگاب حجه وي جددي علموودنه وجدي وافگ

ضحكت واجيت اهلهل سدت حلكي

سدن….اششش ما مش وحيد يدري بس حبوبتي وجدي وعگاب

بستهاا وفرحانها لفرحتهاا شمرت الخاولي من شعري نطرب ونركص سوه فرحانين بحجااية

انگالت انه وياهاا ما بينه مستحه وشاايلات الكلافه للتالي كل سوالفنه سووه حتى المصايب والوكاحة نسويهاا سووه ومن تزوج ابوها امي صدك صاار امها ماا تحبني لا انه ولا امي ولا تكبلنه بعيشة لله

لجن سدن ضلت هيه نفسها سدن اخيتي وبت عمي

وصاحبتي ابد ماا تغيرت عليه وبالعكس صرنه كريبات زيادة وحيده من الثانية

دخلت امي وشافتنه نركص حجت علينه ورزالتنه واحنه الضحكه بوجهنه ولا اهتمينه انوب اجت اخذتني من كفشتي وتحجي

….يله بله هسه هذااا شيمطشه االيه لمن خليتي يعطب ويجبن

مليكه….ولله دوورت عليج ماا لكيتج

…..جنت فووك يالمفعوصه بحجره عمج عتااد

مليكه…. ليش شبي عمي

…..ما مش بس تنسيم تعبانه شووي

مليكه….ياا خطيه اصعدد يمهاا

طكتني بالمشط عالظهري وحجت

….حتى اجسرر رجليج شعددج صااعده لحجرتها

مليكه….اشوفهاا شبيهاا

….ماا بيها شي انجبي يله وكوومي رتبي حجره حبوبتج

ضميت كصيبتي حدر ثوبي وشالي فوك من شعري ورحت لحجره حبوبتي نظفتها ورتبتها ورحت يمها بديوان النسوان جانن اكو خطـار فتت سلمت وجعدت حذه من حبوبتي نبزت وحده من الخطار

….ام فهيد هااي البت الكم

صفيه….ايي خيه هاي بت باهر لله يرحمه

….الف رحمة ونور علي ان جان هااي بت العلوية

صفيه….اي ام شاهر هاي بت العلوية

….ياا فدوه لـ لله شحلاتهاا تشبه اامهاا جثير ام فهيد يوو اجو عليها اوادم تطونهاا

صفيه….ولله يا ام شاهر البت يتيمه انتي تعلمين بالبير وغطاه و شورهاا بيد جدها الشيخ

…..وجدهاا يـ ام فهيد ماا يفوت حجايه من عدج وعلي عدي شااهر خو انتي تعرفينه جال ومال وشاغول ونعمة لله علي هوو الشايلي البيت بالصلوات وصارلي شكدد ادور اله مره مااكو وحيده تجي مرامه وهو موصفها اليه توصااف

وكلهن ما شاءلله ببـنيتكم اريدن منج تحجين وي جدهاا بعد عيني عينج

صفيه….يصير خير ام شاهر احجِ وياه واردن الج خبر

كوومي حبووبه امج تصيح عليج

طلعت من الديوان وانه مخفوكه صخاام بوجهي بس لا تصير صدك واتزوج لا وعلي ماا اريدن انه اخافن وجدي يكوول بعدج زغيرونه موش صاحبه زواج وزلمه

فتت للهول عمتي كريمه توها جايه من السوك والبنيات ملتمات يمهاا جايبه وياها دشاديش النه وزعتهن عالبنيات انداريت اليه كالت

كريمه….تعاااي مليكه جبتلج ثووب بلون عيونج يضووي عليج

ركضت يمها فرحانه وهيه طلعت الثوب لونه زيتوني وبالنص بي بزونه وجيوب وكبووس بي فرو ابيض يخبل حيل

مليكه….يخبل عمه

كريمه….تستاهلين يبعد عمتج

…. انطت نسوان عمومتي كل وحيده حاجتها وكامت للمطبخ انه لميت العلاليك والجياسه للزبل

لليل جاعدين كله نشرب جاي بوراه العشه وفجت الموضوع حبوبتي عود انه نسيته لوو شلته من بالي جذب

…. وما ناسيته فرح لا خووف مدري عليش انرعب من اسمع باسم عرس وبدووا عمومتي كلمن ينطي رايه وحتى نسوان هم يحجن بس امي ساكته عاينت اليه بتفكير وعيونها عليه حد ما كال جدي

غياد….علووية انتي شنهي رايج البت بتج وانتي ابخص بيهاا وتعرفينها زين تشوفينهاا حمل مسؤلية زلمه وبيت وعمه وحموين يو لاله

….عمي ما دامك رخصتني احجي واطي رأيي هم ارخصني وكون تقبل مني الرفض وياريت من يمك تسد السالفه

غياد…عليش يـ بويه غير تكلينه شنهي السبب

….عمي ولله البت زغيره وماا ادبر روحهاا لحالها وان جان اطيتهاا ولله لتطلع بسواد الوجه وانته تعز عليه وما ااريدنها تفشلك وي الوادم

البت بعدهي شعرهاا انه امشطنها الها وموش حمل بيت وعمه مثل ما حجيت بالسانك

….. وهيه عالحجيكم تصير اوول جنة والجنة الاولى دووم متعوبه وكلشي عالراسها يطيح وذاك من ذاك اليحط لله بين عيونه ويرحمها وانه ما اطلع رايك والشور شورك انته ربيتها وانته تعبت عليها وانه حطيت عيوبها جدام منك وانته براحتك

غياد….لا بويه انه صدك تعبت لجن موو بكد تعبج عليها ولا بكد شگاج بيهاا والحجاايه حجايتج وانتي ابخص ببنيتج ودامج تكولين البت مو حمل مسؤلية هاي هيه ولا جن السالفه انحجت

حبني جدي براسي كال

غياد….اي يبوويه بنيااتي كبرن وضلن يجيبن العين الهن امس سدن وليلة انتي لجن وعلي لو ما حلال وحرام لله كون انطيجن اريدجن مدللات معززات دام راسي يشم الهوه

كال عمي ابو سدن

ضهد….هاا بويه جاان من كوون سدن محجي بيهاا وانه مااادري

غياد…الحاجي بيهاا مووش غريب يضهد من لحمك ودمك زلمه متعووب علي

ضهد….هاي هيه چاا انه انطيت بدون ماا اعرفنه ياهو دامه بعينك يستااهلها

غياد….يستاهلها وتستاهله ابن اخيك عگاب خووش خياال للمهره العدك

…. انگلبت الكعده ضحك ومباركة لعگاب وانه عيوني بعيون سدن اعااين لفرحتها وبكلبي اكولن

عساها داايمه هالفرحة يختي عسااج مهنايه صبرتي ونلتي وعووض رب العالمين يا محلاه

وبدو يتفقون عالعقد والسوالف المهر وغيرهاا وفرحة…. فرحة ترست البيت

لجن لثاني يوم يا فرحة ما تمـت ولله ماا قاسم الها ادوم

اجاانه خبـر وفاة ابن عم جدي وهم شيخ جبير ومعروف حيل

حزنه علي والاسود صاار لبسنه رحنه للفاتحة وبيتنه والمضيف فررغن ضل بس الكهوجي هناك

وصلنه و تحزمنه البنيات واحنه شايلات الفاتحة عبن اهل المصاب مصابهم جبير وعزاهم ثجيل والمفكود عزيز وغالي عليهم وحدتهن ما بيها تشيل روحها من لطـم والنوح والثغيب

….. وهاي عاداتنه من زمان اهل المصاب ما يجيسون شي الكرايب والعرف همه اليشيلون الفاتحة

كالولي صفي التمن من الماي ووكفت اصفي عالمغسلة جدر شكبره افرغنه بالمصفي غااد واسمع صوت عگاب صااح بواحد جان واكف يم شباج المطبخ لمن انداريت يله شفته لجحني اغسل التمن واجه هااد اجتافه تهفي جنه غوريلا من يطك على صدره بـ اثنين ادي صااح

عگاب….وولج اانتي شعدددج هناانه

انداريت ومن خبصتي طااح الجدر من ايدي ونعمة لله جاان فارغ والمطبخ معزول عن جادر نسوان

عگاب….ااحجي ياا من غسل كوون شعددج هناانه بااب الحووش مفجووج وانتي تصاالفين من بعيد

مليكه….اغسل التمن

عگاب….كوون غسلووني عالفهاووتج وولج الزلم تمرگ منااا وانتي ثووبج خفيف جنج كززاز من بعيد

مليكه….عگاب ولله ااغسل التمن شجااك وماا ادري بزلم تمر من جان سديت الباب

عگاب….اامشي تدفسي يم اميمج ومن لله المحنج طالعه برره

مليكه…..بس اوودي التمن

….. اجه يصيح وايده على زيجه دشداشته ينكث بيهاا طفرت من المطبخ وطلعت منه خل اسلم عالرويحتي شنهي ماا رايدتها وصيت وحيده من البنيات تجيبه بس تسد الباب لان زلم تمر

وضليت داخل جاي مااي بالطبخ ما عليه

سمعت من امي وعماتي وارث محضر مناك للدفنه والكبر و جااي وياهم من دافنين الجنازة وداخل مسلم على حبوبتي وعماتي وحاضر اول يوم الفاتحة وماشي عبـن عده امتحانات وفارس جاي وياه وضل هنانه ما رد وياه

…… حزت بخاطري ماا شفت وارث بس عذرته عالسريع جااي وراد لكربله

وخلصنه الفاتحه للسابع يله ردينه لحوشنه

لجن ما فضت الفاتحة عدنه ليوم كله الديوان متروس ناس تعزي جدي وعمامي

والخميسيات نروح هنااكه نحضرهاا وطلع الاربعين ورحنه كوسترات كومه ومن النجف طلعنه لكربله حتى نشوف وارث بس موش كلنه انه وحبوبتي وجدي وعگاب والباقي ردو ردود من النجف للكوت

….. رحنه يم وارث واول مره ادخل حوشه جان يخبل مجكلم وململم عالكده وهو طاير بينه يحير شيجيب النه ويحط جدامنه جنه وادم غربة عنه

فرحت لفرحته ودريت بـ ابن عمي مرتاح وعاجبته العيشه هنانه

عساك مهنه يوارث

…. وانفجت سالفه مهر عگاب وسدن وجدي انطه جف على شكل حجايه للـعگاب لمن اادور السنة المرحوم يله تمهر عالبنيت عمك والزلمه صووفر خطيه

وانه هم شلت هم يبوو سدن يوو سمعت تنصب فاتحة حراماات عود جنت فرحانه راح يصير عدنه عرس وعرس تالي خربت السالفه

لله يرحمك يالمرحوم

وارث ما جان راضي وحاول وي جدي بس عقد سكته حتى تحل كعدتهم وسالفتهم وضحكتهم سوه بس جدي ماا رضه وانطه تنبيهة لـ عگاب

غياد….ااسمع وولك عگيب علم يووصلك ويتعادك ان شفتك يوو سمعت موطوط يم بت عمك رجلينك احشهن حش وعلي مووش تكول جدي ماا كال وانتي بوويه مليكه

مليكه….هاا جدي

غياد….بويه عينج عالبنيت عمج ان جانج شفتيهاا الها نيه وتريد تكصد عگاب بس اطيني خبر ماا اوصيج بعدد

رفعت عيوني اباوع لـ عگاب والكاه عيونه تخوزر بيه ونظرات عيونه تسحكني وتمحقني

هزيت راسي بطاعة لجدي

مليكه….صار جدي

غياد….نززل عيوونك ولك شنهي باالك تخووف البت من تخوزر

وارث…عااد جددي ما لكيت بس مليكه توصيهاا وهاي تخاف من خياال عگاب

غياد….لا يـ ابوك ان جانك انته تخااف وتهااب عگاب بتي ماا تخااف منه

ضحك وكال حاط راسه بحضن حبوبتي وحبوبتي تفلي راسه وتصكع بي يحب هاي السالفه

وارث….ااي انه كلش اخاافن من عگاب واتراجف من عده

لليل وسير على وارث صاحبه دخلنه انه وحبوبتي لحجرته عگب ما جهزت الهم الجاي والكيك

بيدي وصله مسح ورشاش جام مسحت رفوف الكتب مالاته والمرايا

صفيه….اي حبوبه بعد ايدي مسحي اله بيته ورتبي علـ ايدج عبنه خطيه هوه زلمه يو شماا ينظف ويمسح موش مثل المره من تحوف الحوش حوف عالايدهاا

مليكه…..اي حبووبه انه نظفت ذيج الحجره ضلت بس هاي حتى المطبخ مسحت الكاونتر والطباخ جلفته اله

صفيه….بعد شووي ونسوي اله كبه ومروكات عمت عيني ماا اخلي بعد على اكل المطاعم رايحه رويحته

مليكه….ولله حبوبه لا رايحه رويحته ولا شي اصلاً صااير حليوه گبل الشمس تصكع بي بوراه الكاع هساع صاير اابيض جنه العافية

….. ضلوا يتعللون للـ هدعش بليل يله راح و وارث اخذ عگاب وجدي يزورهم المخيم ومجانات ما شايفينها بكربله عبن احنه لو اجينه نزور بس الامام الحسين والعباس عليهم السلام غيرها ما نروح

…فتت للمطبخ سلكت تمن وبرغل جهزت الحشوة وحبوبتي هيه واكفه فوك راسي وتكول سوي هجي وسوي هجي سوينه اله كبه ومروكات بانيه وفاصولية وعدس وحمص حتى عجينه كباب عروك سوينه ما خلت شي حبوبتي خليناها بالمجمده واعاين للساعة بـ٣ بليل صارت الصلاة فاتت حبوبتي تصلي واجوا جدي وعگاب ووارث

وارث….تقبل لله

صفيه….منا ومنكم حبووبه

وارث….تمشن ازوركم يوو ما بيجن حيل

عگاب….لا بوويه فوت ناام انته انه اخذهم بوراك دوام باجر

صفيه….ولله يمه انه ما اليه حيل امش اله هاي البت خطية انحبست ويااي

غياد…..عليمن خطية يا ام فهيد هسه عگاب ياخذهاا ويزورهاا

عگاب….يله بسااعج لبسي خل نمشي دام مامش وادم هوواي عالمزارت

غياد….عينك عليهاا عكيب

عگاب….شنهي جددي زغير جددام عينك

وارث…يو تيهت دك عليه

عگاب….شنهي قضيتكم منا جدي ومنا انته

جريته من ايده ومشيت بي اسحلي بكرين مووش بشر فوته للحجره الثانية كلت

وارث….شجاااك عگااب كبريت ما تتحاجه

عليمن بوويه

عگاب….چاا انته ماا سمعت حجي جددك يريدني اتااني سنة ليجدام

وارث….اصبر جم شهر وانه اجي اقنعه هساعة مصاابه حاار ولا تنسه هو صااحبه وبني عمه عزيز علي وان جان ما الك خلك تودي البت خلها انه اوديهاا لا تصيح بيهاا ولانها مجفيه عالوجها

عگاب….شنهي ووحش جدامك

وارث….نعمة لله عالوحش جدام منك

صاح علي جدي كال

عگاب….في امان لله

صفيه….حبووبه حطي ذني الفلووس بيدج اخافنج تشوفين حاجة تعجبج وجيبي للبنيات وياج

عگاب….جدده ماامش عدج لهاايه اليه بعدد شنهي الماخذته وياهاا زلمه يوو خرخاشه

اامشي مليكه بسااعج

اخذني من ايدي ونزلنه من العمارة

امشي بصفه وعيوني شايهه عالشوراع الدنيه فجر وولا عبالك الناس تروش بالشوراع كال بصوت ناصي

عگاب…عينج مليكه

نزلت راسي وكلت

مليكه….العفوو

وصلنه للمخيم تگرب يمي همس

عگاب…..تصلين يو لاله

مليكه….چاا شنهي ماا اصلي كافره

غمص عيونه رفع راسه كال

عگاب….ياااصبر زينب وولج طاهره يو لاله يعني تفوتين تصلين بالحرم يوو لاله

رجعت خطوة لوراه مستحية من عنده مدنكه واحج وي روحي

صخاام بعيني شو هذا ولا يستحي

عگاب….اهاا شنهي هجي يراد الها تفكير

اشرت اله برفض

عكاب…چاا لا تكربين يم الشباج بس من بعيد باوعي وسلمي واطلعي انه متانيج يم خيمة ابو الفضل سلام لله علي

مليكه….موو تروح لله عليك اخاف اتيهه

عگاب…لا بويه روحي براحتج انه هنانه واكف متانيج……

____

وارث والاربعين يوم

عنوان البارت مالت اليوم واتمنى تستفادون منه مثل ما اني استفاديت واخذت مفهموم حجيه وركزت وي كل كلمه اكتبها

البداية ليوم مو بس لوارث ولا توبة اله بس

لا بل النه كلنـه ونستفاد ونتعض من كل اخطائه بالبارتات الجايه وناخذها عبرة النه يمكن تشوفونها اخطاء بسيطة والاكثر من هذا كله احنه نسوي الاخطاء هاي كل يوم ومستمرين عليهاا لكن لو تركانها تستقيم حياتنه ونشوف فرق كلش جبير وواضح