رواية ارهقني الفجور الفصل الخامس 5 بقلم نوسه حمد
ام صفيه طلعت ودموعها في عينها من غير ما اشعر لحقتها. وكانت تبكي لمن ترجف قلت ليها يمه صفيه هي مالا قالت لي صفيه من قبل تفتح المدرسه كانت عيانه راقده عندها ملاريا لمن المدرسه فتحت قلنا ليها ارتاحي ما تمشي اصرت انها تمشي وتاني الحمد لله بقت كويسه بس ابوها الله انتقم مننو قلت ليها مالو قالت لي عاوز يغصبها علي ولد اخوهو وهي رافضه تتزوجو اصلن الناس ديل قلبن مافيهو رحمه المره بتزوجوها عشان تخدمهم وبتي شاطره دايره ليها التعليم قبل ما تطلع للمدرسه اتناقشت معاهو قال ليها عقدك بعد اسبوعين ومن لحظتها بتي ما جات راجعه طلعت بي لبسها حق المدرسه انتي بتعرفيها قلت ليها صفيه كانت جنبي في الكنبه قالت لي انتي نسيبه قلت ليها اي انا نسيبه قالت لي حكت لي عنك ويابتي انتي صاحبتها ما قالت ليك حاجه ولا انها ماشه وين قلت ليها لا لا والله ما عارفه اي شي عنها وربنا يجمع بيها يمه قالت لي امين بس عليك الله ساعديني اسالي منها وتعالي وريني انا من دربي دا ماشه ابلغ الشرطه قلت ليها يمه انتي ما بتقدري خلي ابوها قالت لي ابوها حسبي الله ونعم الوكيل فيهو هو فاضي لينا الله انتقم منهم كلهم وفاتت وكانت تبكي بطريقه تقطع القلب انا زاتي بكيت وخوفتا شديد واليوم داك تعبت نفسيا من اي شيء ياربي صفيه فاتت وين وشنو البخليها تصل للوصلت ليهو دا السبب ابوها شكلو بس مهما كان تكبر تصلح ابوها ولا تكبر شايله مصايب وبلاوي الله اكون في العون وقلت احسن اطلع من الموضوع دا لانو لو فتحت خشمي اي شي بقع فيني انا عارفه حظي
مرت الايام والشرطه جات المدرسه وسالو اي زول عندو علاقه بي صفيه وعاوزين طرف خيط بس يعرفو بيهو صفيه طلعت ووين ومالا وابوها متورط اكتر شي لانو ام صفيه رفعت فيهو قضيه قالت انو عاوز يغصبها بس المشكله تبقا صفيه اختفت من المدرسه والمديره بتقول ما جات اليوم داك وبعض الزميلات قالو صفيه جات المدرسه وكانت موجوده السؤال هنا ليه المديره قالت صفيه ما جات ياربي عشان خايفه علي سمعه المدرسه ولا في حاجه هي عاوزه تسترها بس اكيد ما ح تكون هي ورا اختفاء صفيه ياربي اكون استاذ علاء بس كيف يكون سبب هو احتمال اكون حباها فعلا ولا عاوز يخفي اثار جريمتو في شي ما مفهوم وراسي كلو اسئله بس خايفه اتورط في الموضوع بقيت اشاهد من بعيد اسم صفيه ما قاعده ازكرو والشمار ملا الحله وصفيه صورها بقت ماليه الجرايد
ابوي جا من السوق وشايل الجريده في يدو وكانت ظاهره في وشو الخوف والاندهاش وبستغفر وبحوقل امي قالت ليهو ياساتر وشك مالو ما بتفسر الليله قال ليها مافي حاجه بس داير منك بتك دي تصاحبيها البت دي في طور مراهقه كوني قريبه منها شديد اديها الامان ما تخوفيها وخليها تصارحك بي اي شي حتي لو كعب الزمن دا بقا زمن صعب قالت ليهو مالك ونسيبه مالا قال ليها بتي ما مالا شي بس جنس المصايب الفي المدرسه دي مدرسها عمرها ميه سنه ما حصل فيها جنس الحصل دا امي قالت ليهو سجمي كلام السجاير جابوهو في الجريده قال ليها سجاير شنو امي بقت تحكي ليهو بالحاصل ابوي انخلع وبقا ماقادر يتمالك نفسو قال ليها معقوله البحصل دا انا الراجل ما بشرب سجاير وياريتا بقت ع السجاير دي بت ولدت بالحرام في المدرسه وبت تانيه اختفت امي دقت سدرها وقالت ليهو سجمي سجمي نحنا كلنا جينا جارين قلنا ليها يمه المات منو ابوي لاول مره كورك وفينا وقال لينا ادخلو جوه وبقا يكورك في امي وانا سامعه الحوار وقلبي ادق قال ليها دا شنو البتعملي فيهو دا خلعتي اولادك ديل قالت ليهو بري مدام جابت ليها ولاده وسجاير واختفاء نرحل ونودي بتي اي مدرسه تانيه قال ليها انتي مطرطشه نمش وين انا البيت دا بالجلاله بنيتو بالطين ارحل وين مافي رحول نحنا نكون واعين ونعرف انو الزمن اتغير ما زي زمان ونوعيهم ونرشدهم ونحصنهم عوجه ما بتجيهم وبتك تختيها في الواطه وتصارحيها وتفهميها الصاح من الغلط انتي مفتكره الهروب حل ولا في عقلك كان بتخيل ليك مدرسه زي دي يحصل فيها كل الحصل دا وبعدين نحنا نرحل فجاه عشان يقولو نحنا عارفين شي عن البت وبتك تنبهيها انو ما تدخل في الموضوع دا قالت ليهو كلامك عديل انا بتفاهم معاها ما تشيل هم يا موسي نحنا بتنا ربيناها من العدم وانت تقطع في لحمك وتلتقو ليهم مستحيل نسيبه تخزلك لا هي لا اخوانها اطمن ان شاء الله تشوفهم في اعلي المراتب ابوي كان منهار لمن برجف امي بي كلماتا دي خففت عليهو شديد وانا كنت ببكي بكا ما نفسي اشيلهم هم انا واثقه من نفسي بس الحصل دا شي غريب صفيه كانت مسكينه ومحترمه العقل ما بصدق انها تكون حملت بالحرام فجاه جاتني لحظه ويقين انو الولدت دي ما صفيه انا متاكده انها ما صفيه ديل البنات ديل اكونن اتهمنها وعاوزات يلفقو ليها التهمه بس صفيه طلعت مالا حسيت انو صفيه مظلومه ومكسوره نفسي اشوفها واطمن قلبها جاتني فوبيا عديل وخوف ما طبيعي وقلبي ضرباتو زايده وامي جات تعمل القالو ليها ابوي قلت ليها يمه اطمني اقسم بالله انا واعيه جدا وعارفه الصاح من الغلط ومستحيل اقع في الغلط بس يمه انا في مصيبه قالت لي سجمي مصيبه شنو قلت ليها انا زي ابوي ورثت الحاجه دي منو انا حقانيه الغلط ما بتقبلو وحاسه انو صفيه انظلمت كتير قالت لي صفيه منو ومالا بقيت احكي ليها وصارحتها بي اي شي حتي بالاستاذ حسيت امي خافت بس طمنتها شديد قلت ليها يمه احلف ليك انا ما ح اغلط بس يا امي. اسكت علي ظلم صفيه قالت لي تسكتي انتي مالك ومالا رده فعل امي طبيعيه جدا خايفه علي قالت لي موش اهلا بلغو خشمك عندك قلت ليها بس دا حرام ما بيرضي ربنا اتهموها انها ولدت قالت لي والضمنك شنو تكون ما ولدت عندي احساس انها فعلا تكون هي الولدت قلت ليها يمه عليك الله ما تظلميها استغفري انتي قدوتي علميني الصاح والغلط من كل الاتجاهات ما تشككي في زول احتمال اكون برئ من المتهم بيهو ابتسمت وقالت لي انا عافيه ورضيانه عليك انتي ما مفتكره نفسي في اليوم البتقولي لي فيهو دا غلط ويمه ما تقولي كده وما تعملي كده اليوم دا اتمنيتو مني التعليم ليهو اثر يابتي ربنا يكملك بي عقلك بس انا خايفه عليك قلت ليها يمه قل لا يصيبنا الا ما كتبه الله لنا انا عندي يقين انو اي شي بصيبني لو اتكلمت ولا سكتا ح يصيبني بس انتي اديني عفوك ورضاك واعفي لي انا سمعت كلامك انتي وابوي وماقصدي بس كان نفسي اعرف راي ابوي وحسيتو خايف علي ويمه انتي تقولي لي ابوي نرحل صحي نرحل كيف قالت لي خايفه عليك قلت ليها اعرفي قدر ربنا دا بحصل بحصل لو قعدنا او رحلنا والفساد في كل مكان في احتمال الحته البنرحل فيها دي تكون اكعب من دي مافي ضمان نتوكل على ربنا والبحصل احصل قالت لي لا اطمئنيت عليك ربنا يحفظك يا بتي حسيت امي بالا هدا شويه واطمنت شديد بس انا بالي البهديهو شنو بالذات حسيت انو صفيه مظلومه وفي واحده عاوزه تلبسها القضيه واحتمال تكون فعلا دي صفيه
تاني يوم لبست ومشيت المدرسه وطبعا بقا مافي سيره غير صفيه والحصل ليها انا كل ما القا بنات اتكلمو عنها بقوم منهم عشان ما يخلو قولهم ويمسكو في قولي ويختوني في وش المدفع وقررت امتحن علا اشوف رده فعلها شنو وجاتني قناعه انو صفيه ما ولدت طلعنا من المدرسه ماشين في الشارع علا بقت ما بمشي معاها اليوم داك انتظرتها لمن جات قالت لي غريبه منتظراني قلت ليها ما غريب الا الشيطان كنت عاوزاك في موضوع قالت لي ياتو موضوع قلت ليها ع فكره انتي كذابه قالت لي كذابه كذابه فشنو انتي جنيتي وعاوزه تدقني مسكت يدها وقلت ليها احترمي نفسك يدك لو مديتيها لي اقسم بالله اكسرها ليك قلت ليها اصبري اسمعي الكلام للنهايه وتاني مدي يدك ومديها عشان اقطعا ليك قالت لي ما شاء الله من اين لك قوه القلب هذه قلت ليها من مصايبكم المهم يا علا انتي واحده كذابه وربنا ح يعاقبك كيف تكذبي وتقولي انو صفيه هي الولدت قالت لي شنو انتي بتشكي فيني قلت ليها افهميها زي ما تفهميها المهم صفيه ما هي الولدت وانتي عارفه الولدت منو وراكم قصه طويله بس ابقا ما نسيبه كان ما وقعتكم قالت لي توقعي منو انتي هبله والله انتي ما بتعرفيني كويس ما تكون مشت عليك مسكنتي الجيتك بيها ديك لا لا افتحي خشمك دا عشان تلحقي صحبتك وفاتت خلتني قلبي بقا يدق ومن هنا عرفت انو في قصه طويله ياربي وراها علا وشلتها ولا في طرف تالت توقعاتكم شنوو ………..يتبع
