رواية عقارب ذوي القربي الفصل العاشر 10 بقلم انين الليل
بيبي صاحت بصوت // انچب سليم
ابوي // اسكتي يمه خلي افتهم ولك سليم انت شتكول
سليم //شگول الي اتسوي هيچ شي كل شي تسوي
ابوي بعصبيه // ما الك حق بيناتنا مشاكل ماالك حق تتهم مرتي
سليم اتقرب على ابوي وگال // ياحق هذا ولك تگلي انا عفته لان هوه مو رجال ولك مو گدامك شنو حجت
بيبي // كافي سليم اتخبلت
سليم صار ايعيط //اي اتخبلت ياناس ياعالم مره باگت رجلها ومشت بظهريه عبرت نص الكره الارضيه
والبارحه اجينه وهيه گدام الناس تصيح ما اريده مو رجال وبعدنا ما واصلين طلعت مقدمه قضية تفريق شنو
بعد گلولي الهيج تسوي شريفه
ابوي اتقرب على سليم وكمشه من زيگه // لا مو شريفه بس البنات بناتي
سليم عت ايد ابوي وگله // بدل ما تزنگني وتصير رجال عليه شوف ذني البنات منين ملگطتهن مرتك يارجال
بيبي // كافي ولك سليم كافي
ابوي من سمع الكلام طلع وسد الباب ورا حييل بيبي گالت بعتب // ليش يمه ليش هالشكل فوك الضيم العلي انوب انته
سليم يحجي وهوه فحطان //يمه احسن هاي المره مستزوجتنه كلنه وانتي التدرين بيها
بيبي بعتب // بس ما يرادلها هيج اتگله البنات مو بناتك
– ليش يمه انتي عدج شك
– والله ما ادري يابني بس الي ادري بي اخوك خطيه
سليم // لا مو خ…
قطع كلامه رنت الموبايل جاوبه // هلا ابو علي
عليكم السلام
ها وما عرفت شيريد منك
زين شوفه شيريد ولا تنطي وجه
شلون خاف يريدك تروح ويا منا منا ابد لاتقبل
اي هذا قصدي
مشكور وبلغني شيصير
الله وياك
سدا وبيبي سالته // منو هذا
ابو علي
شيريد
ابنج الشفيه مخابره وگايله جاي عليك
ما عرفت شيريد منه
شوفي لو يريد يداين منه فلوس لو يريد ياخذه ويروح يتوسل حتى يرجعونها اله حتى تن…براسه
بيبي جرت نفس سليم جاوبها // ها زعلتي على گرايبج
بيبي // ولك شو من اجيت ليجاي متخبل شنو گرايبي احسن من ابني
سليم // مو اشوفج ضجتي
بيبي // على هالمسكين لو البنات الي ما اعرف شنو مصيرهن
سليم بنتر // يولن يرحن الامهن
بيبي // امهن لو تريدهن ما خلتهن
اي لان تدري مو بناتنا وين توديهن
يمه اتقي ربك مو زين عليك هذا الحجي
هههههي هوه شنو المو زين جاي اكلج المره برعه تن…
بيبي تهز براسها // بس البنات ما الهن ذنب
سليم // ذنبهن نهله امهن هسه هذا الحجي مو وكته انا اروح واي شي يصير خابريني
بيبي // شكو شيصير بعد ياستار
سليم // يعني خاف تسمعين شي منا منا يجي احد خابريني
ما سمعت رد بيبي لان رحت للمطبخ وطلعت تمن صرت اغسل بي حتى انكعه بدون ما اخذ راي بيبي
من سمعت الباب انسد طلعت ورحت الغرفة بيبي ردت اشوفها واشوف ردة فعلها لگيتها لازمه بايدها
السبحه ومدنگه وهيه تلملم بحلگها
وحتى ما انتبهت الكلامي گتلها = بيبي نگعت تمن شسوي بعد
ما جاوبتني وصلت يمها // بيبي نكعت تمن. شنسوي غدا
هيه باوعتلي وكالت // نسوي مركة بيتنجان
هزيت راسي وانا متعجبه من هاي المره الي رغم المشاكل لكن لازمه البيت وما فد يوم زگحت لو حجت
بالمشكله حتى لو متعايشه وياها ورحت اشوف ملاك شفتها نايمه وروان متمدده وتباوع للسگف ورهف
ترسم گعدت وانا كلام سليم يرن باذاني واحچي ويه نفسي = يعني همه ما حاسبينه بنات ابوي
بذيچ اللحظه عرفت امي چانت وحده رخيصه ورخيصه هواي
بقيت گاعده وفاتحه عيوني وتفكيري مشوش رجعت عليه كل الايام وانا اشوف امي شلون تضوج من
تشوف ابوي واتذكره شلون هوه يفرح من يلگاها فرحانه ويحتار شيسويلها وشلون چانت من تشوف معين
تروح تبدل وتحاول تحچي ويا وهيه تتقرب علي كل هذا الشي صار وكانما جاي اشوف مسلسل
صرت اهز براسي واحچي ويه نفسي = اي امي تروح للسوك وما تاخذني وياها واذا صادف واخذتني
چانت ترجعني اتكفخ ليش ما اعرف بس من چانت تاخذ روان ترجع بايدها علاليك هواي وروان جايبه
حلويات اشكال وانا ما تطيعني نفسي اخذ واكل منهن لمن ما هيه تزمخ عليه وتامرني اخذ
= معقوله روان تعرف اب امي مو زينه وقابله عليها
=لا مستحييل روان شعرفها اصلا روان تحب ابوي
الي سمعته كبرني هواي وفتح عيوني على اشياء ما چنت اعرفها
اندك الباب ورحت گلت = منو
اجاني صوت حلا وهيه اتكلي //افتحي الباب
فتحته دخلت وكلعاده تخزر بيه وسالتني //وين امي
جاوبتها == بالغرفه
راحت الها واسمعها تسلم //اشلونج يمه
– – هلا يمه
بوستها وبيبي باست احمد انا رحت للمطبخ ترست الدولكه ويا گلاص وجبته هيه باوعتلي واخذت الدولكه
صبت ماي وصارت تشرب وسالت بيبي // هاا يمه شصار ما صار
– – ما صار شي على حطة ايدج شعجب ما رايحه للدوام
– – داومت درسين وبعدها اخذت اجازه وطلعت
– – واحمد شو هم وياج
– – اي يمه رحت هم طلبتله اجازه شسويتو
بيبي // بشنو
حلا // ويه هاي البر…سمعت مشتكيه
بيبي وهيه تتحسر //اي مشتكيه
بت النعال من اكول گ… محد ايصدكني وهسه شنو
بيبي رفعت امتونها وتفر اب ايدها //ما ادري طلعو
حلا وهيه تستهزأ //خو حليم لو بيده ايرجعها
– – كافي حلا
– – ها يمه منين تخافين من بناتها وداعتج لاتخافين سنه سنتين ويصيرن مثلها گدامنا حبوبي سكوني ومن ورانا
كل شي يسون
بيبي ما دافعت ولا ردت لان يجوز مقتنعه بكلام حلا باوعتلي وكالت // مها
ا== ها بيبي
– – هاج روحي جيبيلنه خضره وروبه لو اگلج خلي روان تروح
حلا //چا شعجب ما راحن للمدرسه
– – ابوهن بطلهن
– – زين ايسوي خلي يحكرهن بالبيت بلكي يگدر عليهن
رحت اخذت الفلوس ولگيت روان نفس ما هيه بعدهي متمدده انطيتها الفلوس
= هاج رونه روحي جيبي خضره وروبه
روان جاوبت بدون ما تگعد // لا مها روحي انتي هاي حليوه من اشوفها حتى نفسي تلعب
ابتسمت رغم ضايجه = بيبي تكول انتي روحي
گعدت واتمغطت وباوعت الرهف //ياالله رهوفه امشي وياي
هيه لبست الجبه مالتي بدون ما تخلي الشال على راسها ورهف لابسه بجامه مرت على الغرفه
– – اشلونج عمه بيبي انطيني ربع الي وربع الرهوفه
بيبي مدت ايدها على جيبها وطلعت ربعين وانطتهن الروان حلا //چا يمه ما تنطين الحمودي لو بس البنات نهله
بيبي //شنو حمودي عايز شو امه راتب وابو راتب
روان باوعت الحلا بنص عين وهيه متشمته وطلعت حلا اتعاتب ابيبي //شدعوه عليج يمه اتفرقين وكبرتي راسهن
– – حلا ما الي خلگج عبالي انتي من سمعتيها تطلب عبالي تفتحين جنطتج وتنطيهن الف
حلا //. انطيهن سم
بيبي // اووو شيخلصها
حلا // ها يمه بعدج اتدافعين
بيبي وهيه رافعه ايدها // بسج حلا البنات ما الهن ذنب كافي
حلا تهز براسها // هنه امهات الذنب يشوفن شتسوي امهن ويسكتن
حلا // شيفهمج الله يهديج
بقيت منتظره بيبي تكمل المرگه ما طلعت وحلا يمها بس تحچي مره على امي مره ع المعلمات الوياها بس
ما جابت طاري زوجها اجيت يمهن وكلت البيبي
= بيبي كملت وحتى الطماطه خلطتها
بيبي هزت راسها // اي شويه وكايمه
حلا //. شنو يمه انتي تبقيين تطبخين وتنفخيين (باوعتلي ) شوفي ولج مهيوه بعد ترحين ويه امي للمطبخ
وتتعلمين الطبخ مو ابوج بطلچن خو مو تاكلن وتروثن
بيبي // هو هذا منطق احچي عدل
حلا // ليش مچذبه شنو انتي مره چبيره
بيبي // بس انا احب اطبخ وانتي تدرين بيه
حلا // اي ما گلت شي علميها يمه يجوز يوم انتي طالعه يوم ما بيج حييل عاد هيه تسويلها الها والاخواتها قابل
يودن من المطعم
بيبي هزت راسها // هم صحيح كلامج
بقيت افتر بالبيت واجت روان هيه ورهف سالتهن = ليش اتاخرتي
ماكو شي
= شبيج ليش ضايجه
ما ردت لزمتها من ايدها واخذتها للغرفه ويانه رهف سديت الباب وسالتها = گليلي شبيج
لاگتني بشرى هاي صاحبة امج لاگتني يم الدكان
= اي وشتريد
وگلتلي صدك امج مشتكيه على ابوج وتريد تتطلك وهيه شارده وبايكه مية مليون
بگلبي گلت = بسرعه سووهن مية مليون
جريت نفس وحاچيتها = وانتي شگلتيلها
انا ما جاوبتها اكتفيت رفعت امتوني وابو الدكان فتح كل عين شكبرها وگلها // بايگه مية مليون
وهيه جاوبته //اي عمتهن گالت
ابو الدكان ابو حسين گللها // لو عدهم مية مليون مو هذا حال البنات
بشرى //ليش همه فقره تدري شگد املاك عدهم بس همه هيچ گايلين وصمت ايدها بعدين ردت علي
هيه امهن منين شردت من الضيم والجوع حسره عليها الفلس وهذا ابوهن بس يشرب عرك ويلعب قمار
ابو حسين //. انتي كلتيها يشرب عرك ويلعب قمار بعد منيله المية مليون
بشرى // مو من عنده انا سالت عمتهن تكول فلوس سليم وامها منطينهن اله حتى يشوفله قطعه بيت عاد هيه
بايگتهن وطافره يم اهلها
جاوبتها = ما عليج روان اسمعي بهاي الاذن واشمري من الثانيه
هزت راسها باوعت الرهف = رهوفه ديري بالج اتسمعين شي لو وحده اتگلج على شي وما تحچينه الي لو
الروان وابد ما تحچينه الكل واحد بس الي لو الروان افتهمتي
رهف // وليش
= لان احنه اخواتج والي انسمعه ونسوي لازم يبقى سر ابيناتنا ما يطلع
روان //اي رهوفه اي شي نسمعه ما نحجي تره ابوي يذبحنه بالسچين
– بالسچين بالسچين
= اي رهوفه
– بس انا اريد اروح يم بيبي
روان // يمها خرعه
= شنو
روان هزت راسها // اي خرعه ما ادري ليش بيبيتي مسميتها حلا شنو على حلاتها
ابتسمت = اسكتي لا تسمع
روان //انا گايله خرعه هيه اسمها خرعه لو حلا ؟
= حلا
روان // خلص انا جاي احچي على وحده اسمها خرعه مكروهه
هزيت ايدي وكتلها =ديري بالچ على ملاك رايحه للمطبخ
ورحت شفت بيبي توها دخلت للمطبخ رحت يمها وشفتها بدت تطبخ صرت انتبه الها واشوف المقادير وشلون
اتكلب بالچدر
وبعدها انتبهت شلون تطبخ التمن هيه انتبهت الي شافتني صافنه عليها سالتني //ها شو صافنه
هزيت راسي = اي جاي اباوع الج شلون تطبخين
– تردين تتعلمين
هزيت راسي = اي اريد اتعلم الطبخ
بيبي // الطبخ ما يرادله شي اهم شي النفس
باوعت الها باستفسار اريد اعرف قصدها هي ردت
– يعني لازم من تجين اتطبخيين تجين وانتي راضيه ولازم اتممينه على اكمل وجه مو مجبوره لو متململه افتهمتي
= اي بيبي
واهم شي ما تبذرين يعني عينج ميزانج والمره السباعيه هيه الي تسوي من الكلشي ماكو اكو
ابتسمت = شلون يعني
بيبي // يعني يجوز يوم ما عدها مسواك او ماكو مصرف لازم ما تضوج ولا تتململ تدخل للمطبخ وتحاول تسوي
شي من الموجود عدها
صرت انظف بالخضره ونكعتها واجت روان بايدها ممة ملاك خليت الها ملح وخضيتها وبيبي سالتها
ملاك گعدت
روان // اي بيبي وجاي اسويلها ممه
اجت رهف // تعاي مها ملاك گعدت
روان // مو انا راح اسويلها ممه بعد انتي اجيتي اتصيحين المها ليش
رهف // لان مها امها
جريت نفس وبيبي صفنت على كلام رهف الي باوعت البيبي واتقربت منها بيبيتي مو مثل قبل من تشوفنا
تفرح لا رهف اتقربت اكثر وكالت
– – بيبي اريد اداوم بالمدرسه الخميس يطلعوني فارسة الصف
بيبي كانما ما سمعت رهف صارت تلزم بدشداشتها // بيبي
زمخت عليها //وخري لا يطيح عليج الجدر
رهف صارت تبچي وهي اتگل البيبي // اريد امي اريد امي
اجت حلا على صوت رهف الي تبچي وهي تسمعها تعيط وتگول اريد امي
حلا // شتريد تريد امها روحي حبوبه دوري امج شوفيها بيا شارع
رهف صارت تصرخ اتقربت منها حلا وگلتلها // اس اسكتي ولا نفس
رهف زادت بالبچي وحلا ضربتها راشدي انا خزرت حلا وهيه باوعتلي وكالت
– شوفي شلون عين صلفه تخزرني ولج نزلي عينج
انا ما نزلتها واخذت رهف للغرفه ولگيت ملاك بايد روان الي تكلي // بعدهي جوعانه
اخذت الممه ورحت اغسلها يمكن سويتها حجه اريد اسمع بيبي تحجي ويه حلا
– – ليش ضربتيها
حلا بعصبيه // واكسر راسها وراس الخلفتها
– – هيه الخلفتها يمج
حلا // اي دايحه وديحت بناتها
بيبي // – – كافي حلا الي بينه مكفينه
اخذت الممه وحلا اتاشر عليه وتكل البيبي //شوفيها چانت تتصنط شنحچي
طلعت وسويت ممه الملاك الي چانت هادئه ما تشبه الاطفال ولگيت روان صايره نار لان رهف گلتلها
انو حلا ضربتها باوعتلي وكالت // انتي جبانه شلون تخلين حلا تضرب رهف شلون
ما خلتني احچي طلعت وانا خليت الممه الملاك اعرف بروان ما راح تسكت رحت وراها شفتها صاحت الاحمد
ابن حلا واخذته وصعدت للسطح ادري بروان راح تضرب احمد واذا اروح وياها معناتها حلا راح تكول
كله من جوه راسي
رحت للمطبخ شفت بيبي جاي تطبخ التمن اجيت يمها واخذت الخاولي وصرت امسح بالكاونتر هيه سالتني
– – شنو ملاك نامت
هزيت راسي = لا بيبي خليتها يم رهوفه وانا اجيت اساعدج
بيبي ما ردت عليه بس كلتلي // اخلطي لبن ولا تخلين فوكه ملح
هزيت راسي وطلعت جدريه غسلتها واريد اطلع السطل لمن ما سمعت حلا تعيط وهيه لازمه روان من شعرها
وتغلط عليها وتفشر طلعنه انا وبيبي الي گالت الها // شبيج حلا
حلا بعصبيه /|يمه لكيتها لازمه الولد وطايحه بي ضرب
بيبي اجت يمها // تهديها كافي
– – ما اهدها اله اچويها حتى تجوز بعد ما تمد ايدها على ابني
– كافي حلا استهدي بالرحمن
– وين السجينه خلي احميها بت الگ… تضرب ابني وتردين اسكت الها
روان اتعت بايد حلا // هديني
– ما اهدج اله اچويج يابت الجايفه
بقت لازمتها وبيبي اتگلها عوفيها بس هيه ابد انا شلت السجينه بدون ما تشوفني اجت حلا وفتحت الجدر وهوه يفور
وتريد اتمد ايد روان بي الي صارت تصرخ ورهف اجت وهم صارت تصرخ وهيه اتگللها
ولج انا من زمان محمله منج اليوم اموتج
باوعت البيبي الي بس تحجي وتگلها عوفيها وروان تحاول اتخلص نفسها منها لكن هيه عباره عن غول لازم ارنب
اشوف رهف ترجف وتصرخ اتقربت من حلا ولزمتها من ايدها حييل وگتلها
= عوفي روان ضربت ابنج مثل ما انتي ضربتي رهف عوفيها
ما اعرف منين القوه اجتني وانا اخلص اختي من بين اديها اتفاجات وصارت تغلط عليه وتسبني وتگلي
– ها ولج اثاري كله من جوه راسج الخوينسه اليوم اموتج
خليت روان تاخذ رهف ودرت عليها حاچيتها وانا ارجف
= شوفي انتي صح عمتي اخت ابوي بس ما الج حق تضربيني لو تضربين اخواتي اخذي ابنج واطلعي لا والله
اروح واحچي الرجلج واخلي هوه يجي ويتصرف وياج
صارت تحچي بصوت اعلى وهيه تگول// انتن منين اتطلبنها امچن ياهيه اكيد راح اتطلعن عليها (باوعت البيبي )
يمه اتلاحكي ابنج خلي يذبحهن لا يجيبلكم طرگاعه ما تطلعون منها والله اينزلن راسكم للكاع
بيبي ما جاوبتها وهيه صارت تغلط // بت نهله الشريفه تحچي ما حچيتي ويه امچ من تروح للسوك وتكضيها
من محل المحل بس انا الچ ياساقطه يا دايحه يا لقيطه
ما هانت نفسي عليه جاوبتها = شوفي انا راح اطلع واروح البيتج واتاني رجلج وراح كل شي اسولفله كل شي
هيه ردت //اموتج غيير اذا توصلين
رحت للغرفه ولبست الجبه وخليت الشال وشلت ملاك وگلت الروان الزمي رهف وطلعنه شافتنا بيبي
– وين وين رايحات
حلا //خليهن ايلحگن امهن ايديحن
باوعت البيبي //. راح اروح اكعد يم بيتها وانتظر رافد واسولفله كل شي واخلي يجي اهنا يشوفها شجاي تسوي
بيبي تتوسلي // ارجعي بيبي عيب الي تسوينه
حلا //خليها اتولي شنو جاي اتخوفنه
– ارجعن بيبي
= ما نرجع اله هيه تطلع
بيبي باوعت الحلا // حلا اخذي ابنج وروحي اتكفي الشر
– – منين خايفه يمه من هذني
بيبي // ولج خايفه عليج من يسمع رافد ايذبج ذبة الچلب
حلا صارت تتنفس قوي كالت // الگ… الچبيره منعتني ادخل بيت ابوي وهسه سلمت الرايه البناتها
ما جاوبتها لان حتى انا متعجبه من الي سويته حلا لزمت ابنها وهيه تتوعدني // انا الچ شوفي شراح اسوي
من طلعت حلا رجعت انا واخواتي للغرفه اذن ورحت اتوضيت وصليت من كملت اجيت يم بيبي سالتها
= اصبلج غدا
هيه ما ردت عليه عرفتها زعلانه
طلعت ورحت للمطبخ خليت بصحن تمن وخليت بطاسه مركه ويمها خبزه وخضره ودولكة لبن وخليتهن
بصينيه وشلتها ورحت الغرفة بيبي وخليت الاكل گدامها وطلعت بدون ما احچي وياها ولا كلمه ورجعت للمطبخ
صبيت النه غدا واخذته للغرفه اتغدينه يعني اكلنه الحمد لله بعدها رادت روان تشيل الصينيه انا ما قبلت گتلها
= اگعدي بالغرفه وانا راح اغسل المواعين بسرعه وارجع
هي ما ردت عليه گعدت رحت اخذت الصينيه ومريت بغرفة البيبي وشفتها ماكله ومتمدده افتهمت ما تريد چاي
بسرعه غسلت المواعين ورجعت للغرفه شفت روان اتهز بملاك الي من شافتني رفعت اديها انا شلتها وانطيتها
الي بقى من الممه
چنت اخاف هواي على ملاك ومداريتها ودائما اغسل الها واغيرلها والممه دووم اغسلها بملح وماي ايفور
وهيه كلش هادئه
بس من تشوفني لو ترفع ايدها لو تطلع صوت اعرف تريدني اشيلها وقله چانت تبچي
رجعتها الكاروكها ونامت وانا هم اتمددت يمها واهز بيها واتساءل ويه نفسي
= معقوله بيبي صارت تكرهنا
= معقوله ما تريدنا
= يعني صدگت كلام سليم ومعين يعني اكيد راح تقنع ابوي ايودينا النهله لو يذبنا بالشارع
صرت اتخايل نفسي وانا بالشارع وياي البنات واتساءل = اذا ودونه النهله هيه ما تريدنه واذا خلونه بالشارع شراح نسوي
بقيت هالشكل افكر وياها زاد تفكيري وانا اتخيل حلا هسه شنو تحچي او شلون تتصرف
يمكن سهيت شويه او نمت گعدت على دگة الباب شفت رهف طلعت انا جاوبتها = گولي منو
هيه راحت وسمعت ابوي ايگله //اتفضل ابو علي
اجت رهف سالتها = بس بابا وابو علي
هيه هزت راسها انا درت وجهي يمكن خايفه ما اعرف اصور حالتي اجه ابوي للغرفه چان هادئ گلي
نايمه مهاوي اگعدي سوي چاي
گعدت وگتله = الله يساعدك بابا
– هلا بابا اگعدي سوي چاي عدنا عمج ابو علي
اباوع لعيونه ومن نبرة صوته مبين باچي وكفت بدون ما ارد علي ورحت للمطبخ چانت مشاعري مزيج من
خوف وترقب ويمكن هذا الشي خلا دمعتي بطرف عيني يعني بس ارمش توگع بلعت ريگي وخليت دولكة
ماي بارد وكلاص نظيف واخذته خليته يمهم بعد ان سلمت على ابو علي = اشلونك عمو
هوه رد عليه // هلا عمو شلونج
= الحمد لله
وطلعت هاي المره ما كعدت بالصاله حتى اسمع شنو يحجون رحت للغرفه سمعت الباب يندك ابوي صاح عليه
– افتحي الباب مها
رحت سألت = منو
سليم // انا افتحي الباب
عرفته صوت سليم فتحت الباب شفته جاي هوه ومعين الي سالني // حليم جوه
هزيت راسي = اي ويا عمو ابو علي
دخلو للغرفه واسمعهم ايسلمون وانا كملت الچاي وصبيت خمس استكانات اخذتهن الهم من دخلت
سليم // هذا هوه زين تسوون بلا محاكم بلا روحات وجيات ولو هيه متعوده ع المحاكم
ابو علي // هسه هذا الكلام ما اله داعي خابرت اخوها ابو سجاد وگتله اختك تريد تتطلك تتنازل عن البنات واي شي ما تاخذ
معين // كافي الي اخذته
ابو علي // مو گلنه ما علينه
سليم //بس ليش بناتها تاخذهن وتفضنا
ابوي // هوه هذا شلون حچي شنو تريدني اتنازل عن بناتي ما اتنازل
ابو علي // شنو ابو سهيل تحچي صدك شنو يتنازل ناسي البنات جاي ايكبرن وشگد راح اتطالب بنفقه وسكن
معين باستهزاء //ليش هيه راح تبقى
ابو علي // اي ما راح تبقى ولو ترجعهن لو يبقن عد خوالهن وغصبا ما على حليم يدفع نفقه وناسيين مسؤولية البنات
ابوي // اسمعوني هاي گدام ابو علي ما اتنازل عن بناتي لو تنگلب الكائنات (سمعته يصيحني )
مها بابا مها
اجيت وانا عبالك چنت اركض = ها بابا
– – تعاي اسمعيني مها انا طلگت امج امچ بعد ما تجي ولا تشوفنها عمامج يردون اوديكم يمها وانا ما اقبل بابا
مهاوي من اليوم ورايح انتي مسؤوله عن اخواتج عن كل شي اكلهن وشربهن وملوكه انتي ربيها ها مها
هزيت راسي وانا الدمعه بعيني
ابو علي // عفيه بيج عمو عفيه بالسباعيه
ما عرفت شنو الي صار الكل سكت بعدها سمعت الباب انفتح وانسد ما اعرف منو طلع وراها هم سمعت نفس الشي
عرفت طلعو وبقت بس بيبي الي من رحت اشيل الاستكانات شفتها متمدده على فراشها
ما سالتها اخذت الاستكانات ورحت غسلتهن وجبت مكناسه كنست غرفتها ادري بيها تباوعلي وزعلانه عليه
لان طردت بتها ولان اتجسرت عليها بس بوكتها چان لازم هالشكل اسوي لان احنه ما النه احد
رجعت للغرفه اتمددت وانا بين الفرحانه وبين الخايفه وصرت اخطط شلون لازم ادير بالي على اخواتي
واول شي قررته لازم اخلي ابوي يرجعنه للمدرسه ولو بس روان ورهف وگلت من يجي راح اگله
رهف شافتني وگالت // مها اريد اروح يم بيبي اباوع تلفزيون
هزيت راسي وصيتها= روحي بس اگعدي ساكته لاتسوين شي لو تلعبين بغراضها
راحت رهف واتقصدت اروح وراها شافتها بيبي // ها شرايده
– – بيبي اريد افتح التلفزيون اشوف افلام كارتون
– – لا انا تعبانه وشويه ويصير غروب اريد اصلي
– – والله انصي بيبي ضايجه خلي اشوف توم وجيري
بيبي بعصبيه //جاي اكلج تعبانه وراسي دايخ وشويه واصلي روحي يم اخواتج
اجيت لزمت رهف من ايدها وگتلها = تعاي رهوفه تعاي امشي فووك عدنا تلفزيون وافتحه الج
بيبي // ولج مها صايره السان وما تنردين
= بيبي البنيه تبچي وانتي ما تقبلين انا شسوي
اخذت رهف ودخلت الغرفة ابوي فتحت التلفزيون ودرته الها على سبيستون ما چان طالع توم وجيري بس شفتها سكتت
طلعت وانا احس ابطني لويات وراسي يوجعني نزلت روان كالت //ها مها شبيج
= شبيه
– وجهج اصفر
= ما ادري راسي يوجعني حييل
– زين ارتاحي
= خلي اروح اسلك بتيته واجي
– انا اسلك هيه شنو يراد الها
انا كعدت واحس براسي حيل يوجعني ونفسي تلعب اتمددت وانا اضغط بكف ايدي على راسي اذن ورحت
اتوضييت وصليت وبعدها كشرت البتيته وحمستها وبيبي طلعت الفين گالت الروان روحي جيبي صمون ،
راحت روان وجابت بسرعه ورجعت سوينه العشا والوضع مو جديد علينه لان احنه اتعودنا على انو امنا ما
تكون يمنا وحتى من چانت موجوده تره نفس الشي كله علينه انا وروان
سويت لفات الرهف وروان واخذت صحن بي شويه بتيته مسلوگه وكوب چاي وخليته گدام بيبي
وانا سويتلي لفه صرت اكل رغم ما اشتهي
واندك الباب وراحت روان سمعت صوت معين وهو يعيط ويگول //وينها الهاي بت الجايفه
بيبي طلعت وهيه مستغربه هوه اجاني للغرفه صار يضرب بيه ويرفس وهوه ايكول
– لچ بت الگ… بت القندره انتي تتجاسرين على حلا وتطردينها ولج بت انهيله الي ما خلته بنفس واحد
صار يضربني بكل مكان وروان تصرخ وحتى ملاك صارت تبچي وبيبي اتگله //عوفها معين
معين // – لا اله اموتها الهاي بت العار اموتها واشوف منو يطلع الها
اجت روان وصارت تحاول تفكني منه وهيه اتگله //عمي ما سوت شي حلا رادت تحرگني عمي هدها
دفع روان وصار يزيد بالضرب ويفشر ويسب وهو مره يرفسني مره يلزمني من شعري ويضربني بالحايط
وبيبي تكله // عوفها البنيه ما سوت شي لا تموتها
معين // – خليني اموتهن وحده وره الثانيه خلي نتلاحك روحنه لا يجيبلنه العار
بيبي وخرته لكن بعديش بعد ما كسرني صرت ابچي وارجف روان اجت يمي حضنتني وصرنا نبچي
ونيمتني وغطتني لان الرجفه صارت بكل جسمي
بوكتها ما نمت بقيت جوه البطانيه وانا ارجف وروان اخذت ملاك غسلت الها وغيرت حفاظتها وسوت الممه
وصعدت جابت رهف الي اجت وهيه تكول //خلوني ابقى ع التلفزيون
ما سمعت رد روان وانا عبالها نايمه بعدها بشويه سمعت انسد باب الغرفه وروان اتگل الرهف
نامي وباچر افتح لج التلفزيون
اجت يمي سالتني //مها انتي زينه
ما رديت عليها هيه عبالها نايمه لكن انا الرجفه والمغص موتني بقيت الليل كله وانا اتگلب وراسي بي وما يزيد وجع
حسيت على ابوي اجه من بره وهو يحچي ويضحك ضحك هستيري عرفته جاي سكران من طريقة كلامه
وشلون يبجي وهوه ايعاتب ابيبي ويگلها
حتى انتي ردتيني اطلگها وانا احبها
هيه كلتله // گوم اصعد الغرفتك واسكت ليل ومنا العالم
هوه رد عليها // العالم ياعالم خلي ايعرفون اهلي امي واخواني جبروني اطلك مرتي اطلك روحي جبروني
اعوف حبيبتي
بيبي بقلة صبر // ولك ياحبيبتك منو الجبرك مو هيه عافتك وره ما باگت فلوسك واقامت عليك دعوه كافي حس على نفسك
ابوي // لا لا هيه اتحبني بس انتو تكرهونها وانتي تفرقين كلهم بنو بيوت شنو بيوت قصور وانتي مگعدتها بهاي الخرابه
وتالي جبرتوني اطلكها على مود احليوه تقبل كلكم تكرهونها وتغارون منها
هيه تحبني بس تكرهكم اي هيه تحبني وراح ترجع وتشوفون
بيبي //دي كافي كافي بدل ما تسكر دبر نفسك واشتغل واخذلك مره اتلمك وتلم بناتك
صار يبجي ويگول // يمه ما اخذ مره يمه احبها احبها النهله
بيبيتي // امدااك اي والله امدااك ما تصيرلك چاره
بقيت اسمع كلامهم وصرت بغير عالم واتاكدت انو ابوي مستحييل بيوم من الايام يگدر ايدافع عنه
ما ادري بيش الساعه غفيت ومن گعدت شفت نفسي فايضه
/////////////////////////////////يتبع
