رواية عقارب ذوي القربي الفصل الثالث عشر 13 بقلم انين الليل
مها
سمعت الباب يندك حييل كلنه گمزنا وخفنا ياستار منو. جاي ايدك الباب هالشكل رحت فتحت الباب وانا ارجف
دخلت حلا ومن شافتني دفعتني وهيه تگول // يممه يممه
شفتها ترجف وجهها اسود وشفايفها يابسات عرفت انو هيه ورافد متعاركه واحتمال ضاربها وطاردها او هيه جايه زعلانه
او تشتكي الاخوتها
بيبي واگفه وعاكفه حواجبها // شبيج حلا خرعتينه شصاير
حلا وهيه تضوب على وجهها // مصيبه يمه مصيبه
بيبي صارت ترجف وترد عليها بخوف وتحرك ايدها // ياستار اخوانج بيهم شي رجلج احچي ولچ مو رجليه ماتن
تبچي وتگول // يمه رافد
بيبي اتقربت ولزمتها وتهز بيها // شبي فهميني
حلا تبچي // – يمه رافد الچلب اتزوج نهله
الكل اتفاجئ من كلامها وبيبي لطمت صدرها //ولج شتگولين
هزت راسها //اي يمه مثل ما اگلج رافد اتزوج نهله الگ… وطلگني وانا ما ادري
3
بيبي كعدت وشفت حلكها يبس ركضت جبت الها ماي = هاچ بيبي اشربي
هيه تباوعلي وتلم بحلگها // اي هاچ بيبي خطيه فقيرات
بيبي اخذت الماي وشربته جرت نفس وكالت // على كيفج حلا ( باوعتلي )وروحي جيبي العمتج ماي
حلا وهيه تبجي // يمه ما اريد ماي شفتي شفتي شسوت بيه الله يبلاها
بيبي // وانتي شلون عرفتي تره رافد ما يسويها
حلا // – يمه رافد طلگني غيابي
– شتگولين
هزت راسها // – اي طلگني عد السيد وهسه يريد ايصدقه بالمحكمه
بيبي خلت ايدها على حلگها // – ياايا ولج يمته وشلون
باوعتلي وتخزرني وتاشر عليه // كله من وراهن ذني الگ…مثل امهن وانتي هم يمه كله من وراج
بيبي بعصبيه // اكلج حلا لا تظلين تسربتين شنو من وراهن شنو من وراي
هزت راسها // – اي يمه من لگفتهم لو هنه كايلات الصدك وانتي هم حاچيه چان راحت الاهلها ويجوز كتلوها بس هذني
هنه ايگ…ن الامهن هذ…
بيبي قاطعتها وضربتها راشدي هيه نشغت وبيبي تحجي بعصبيه
– اكلي تبن وحطي انعال بحلكج هوه رافد واحد عينه نكسه وطايح حظه لا تذبين سمج ع البنات
حلا لزمت خدها واتقربت من بيبي وهيه تتوعد //شوفي يمه وداعت هاي حرگتي وداعة احمد اذا ما اخلي تشوفينه
(وتأشر على ابنها ) اذا ما اخلي يغتصبهن وحده وره الثانيه وگدام عينج وانا اضحك انا مو حلا
بيبي // ولج انتي تبقيين جسره وما مكسوره عينج ما تستحيين ذني بنات اخوج
حلا باستهزاء //بنات اخوي منو يگول الله العالم يجوز من رافد ويجوز من غيره
بيبي // – – ايا طايحة الحظ ولج كافي كعي نفسج
حلا وهيه تلطم على وجهها //اي انتي شهامج وهنه شبيهن طاحت براسي
بيبي // انتي وحده ما تعرفين شلون تدارين رجلج عبالج البعبعه تجيب فايده
حلا تبجي // يمه تعيريني
بيبي جرت نفس // كافي اگعدي وهسه يجون اخوانج ونشوف شيسوله
حلا // – شيسووله يمه رافد طلگني لعبت علي الساقطه الما تخاف من الله
بقت حلا تغلط وتسب وتفشر مره على امي ومره علينه وانا رحت وسديت باب الغرفه علينه وطلبت
من رهف ما تطلع لزمت ملاك وبقيت مترقبه وروان تكول // حل هاي حوبتنا
= اسكتي احنه بيا حال
روان // واحنه شعلينه هيه چنها وجه قرد والسانها شطوله عبالك لسان حرباء حقه ما انتحر
ابتسمت رغم الخوف وانا مترقبه الحد ما اجه عمي سليم ويا معين وكفايه اجت وراهم بشويه
سلمو وعمي سليم سأل بيبي // ها يمه خابرتيني خير شصاير وانتي حلا شبيج
بيبي جرت نفس ونفخت // رافد طلك اختك
سليم باستغراب //شنو
اندك الباب طلعت ورحت فتحته اجه ابوي گتله = الله يساعدك
هلا بابا منو عدنا
= عمامي
باوعلي بتساؤل // خير شصاير
رفعت متني يعني ما ادري دخل ابوي // السلام عليكم
بيبي // هلا يمه
وسليم رد ابرود كانما يشاور نفسه // عليكم السلام
ابوي يباوع الهم وبعيونه استفسار حلا كسرت الصمت وكالت // باركلي حليم
ابوي // مبروك صرتي مديره
حلا وهيه تبتسم بقهر / /. لا رافد طلگني
ابوي استغرب وباوع بالوجوه بيبي هزت راسها //اي مثل ما تسمع
سليم // وهاي ليش ويمته
حلا صارت تبچي // يمه كملي ليش سكتي گليلهم رافد ليش طلگني وعلى مودمن
سليم بعصبيه // احجي شنو هو الغاز
حلا // سليم رافد طلگني واتزوج نهله
سليم عكف حواجبه // يانهله
حلا وهيه تهز اب ايدها وتاشر على ابوي // بعد يانهله نهله الشريفه مرت حليم
معين // مو من اكول دايحه محد ايصدگني
سليم // منو الما مصدگك
اشوف بعيون ابوي الخذلان والقهر ما حچه سليم باوع الحلا // وانتي منو گلج
حلا // اليوم اجاني عمه للحقير وجابلي ورقة طلاكي وصار يحچي ويسب بي وگلي تره انا ما اگدر اله
ومن طلع مرته گلتلي اتزوج نهله وراح وراها البغداد
سليم // رجلج وين
حلا مدت السانها تبلل بشفتها // صار شهر من اتعاركنا وطلع اخابره ما يرد ع التلفون لمن ما اجوني بيت عمه وانطوني ورقة طلاگي
سليم // وانتي هسه ياالله تحچيين
هزت راسها // هو دووم يطلع ويرجع من بحده بس هالمره الجلب سواها وطلگني
معين // اي مو عده وحده سوكها ماشي
سليم // هذا هوه ايولي نعال انگطع ذبي بالزباله ولاتنقهرين
معين // شنو هذا هوه اله الزمه وازوعه العافيه بكيفه يطلك
حلا صارت تبجي وهيه مدنگه وتضرب على رجلها وبيبي تحچي وياها
هوه الخسران اكعدي ابيتج وعدج ابنج ربي وغصبن ما علي يدفع نفقه
سليم // هسه اخابره الهذا الجايف وانعل شيب الخلفو
حلا ردت // عوفه سليم خلي ايولي مثل ما كلت انعال لبسته وشمرته
سليم // لا خلي اطيح حظه يعني مستزغرنه
اتصل سليم // الو رافد هاي شنو السويته
– – لك انت واحد ما تستحي بس انته زباله ومتعلم ع الفضايل
– – اسمع ولك احنه البعد ما نريدك وهذا ابنك لو تكتبلنه بي تنازل لو تجي تاخذه
– – انت مو مال وحده اصل وفصل اصلا انته يلوگلك الگرن من تشده
– – انچب ولو انت زلمه بيعه
اتغيرت ملامح سليم وهو يخزر بحلا //ها هيج زين نتواجه
سدا واتقرب من عمتي // ولج من يمته مسجله بيتج اب اسمه
الكل باوعلها هيه اتوترت وصارت تبچي وتأتأ // والله سليم هوه قشمرني صار يطلع ويرجع وكل شويه وكلي
اهلي ايعيروني گاعد ابيت مرتك انته كعيدي
– – ومرات ايكلي عوفي للبيت وخلي نروح نكعد ويه اهلي انا ما عندي قابليه اناجر ويوميه زعله لمن ما جبرني
اداور البيت باسمه
بيبي بعصبيه // ولچ ياغبره داورتي البيت الي اشتريته الج ليش ياچلبه
حلا تبجي // يمه شمدريني هيج يغدر بيه كال البيت بيتج واول وتالي الابنه شمدريني يطلگني ويروح ياخذ نهله
نهله الي محد صدكني گتلكم الرجال عده علاقه بيها بس ما صدگتوني
سليم // انچبي ما النه غرض بي بس هوه يانادره بايعه للبيت وقابض فلوسه وبالعافيه على نهله
بيبي غمت حلا باثنين اديها //يا غمه يامگيره السانج متر ونص وانتي يم رافد فاره ولج ذهبي وفلوسي انطيتهن
الج بس حتى اشتريلج بيت واتكفه السانج تالي قشمرج رافد السگط واخذه منج وباعه
حلا //اي باعه حتى يشتري بيت الست نهله خاتون
كفايه // والله بس هالنهله لعبتها عدل باكت الفلوس وشوف رافد بيش باع البيت وهسه يشتريلها بيت
حلا // وانتو راح تسكتون
…سليم //وشتردينه انسوي او وين نلكا
– – روحو الاهله
– – اهله شلهم غرض
معين // مي خالف سليم نروح نحچي ويه اخو الچبير
سليم بعصبيه // غبيه بس السانها شطوله نروح شنكول اذا هيه حتى سلام ما تسلم عليهم ما رايحه صار سنين
بيتهم ما داخلته هسه من نروح هم يكولون ما ندري
بقت تبچي وهمه طلعو اما ابوي فبقى ساكت واشوف علامات الذهول على وجهه صعد فووك وحلا كالت
– – اي صعد الافندي راح يطلع مسدسه ويروح يكتلها (حچتها باستهزاء )
بيبي وهي تهز ايدها // حلا وينج او وين هالحچي كافي مو تشوفين البي مكفي
حلا وهيه تضرب على رجلها // من ايده يمه
كفايه // لا هيه ذيج بت الكلب لعبتها صح الله يساعده
حلا //كله منها وبناتها گوا…ا
بيبي //كافي لاتحچيين هيج كافي
حلا // لا تگليلي كافي كله منج ومنهن
كفايه // شجاج انوب رجعتي على عمتي دا اسكتي خلي نشوف الولد شيسوون
سكتن وبيبي تستغفر وتكول // گلت اشتريلج بيت حتى تستقرين تالي خوش سويتي الي يشوف السانج يگول
هاي ما تنغلب تستخسرين اتطلعيلج الف
كفايه // عمه على كيفج لايرتفع عدج السكر
بجت ملاك وطلعت اغسل ممتها شافتني حلا // طلعت بت الگ…
بيبي بنتر// كافي شتردين منها
حلا // شريد كله منها ومن اختها بس مو عبالج اسكت الهن شوفي شراح اسوي
كفايه // حلا تره البنات خطيه فقيرات واخوج افقر منهن
حلا // خطيه لا خطالهن هنه ساس البلا لان نغلات
كفايه // شنو هالحچي هذا حرام عليج اسكتي
– اي حرام عليه مثل لمن امي شهدت توه رافد اجه لو هاي الخوينسه من سالتها بقت ساكته شسكت بس
شوفي ما اطلع حلا اذا ما شهرتهن وين يرحن
بيبي // لو بوكتهن حاچيات راسا تاخذه وكدام عينج
كفايه // حلا البنات زغار ومتعودات على رافد دائما يجي
حلا // اي يجي يتونس ويطلع وهنه يتفرجن بس شعبالكم اسكت
بيبي تهز بيدها // شتسوين يا نادره المحد يضحك عليج ويغلبج
حلا //. اي اتكني شوفي وداعتج اطلع مو بت ابوي اذا ما جهولتهن بنات الگ… بس اصطبريلي
رحت سويت ممه الملاك ورضعتها وانا ارجف ما اگدر اسيطر على نفسي وخايفه من تهديد حلا
اندك الباب رحت فتحته وانا شايله ملاك اجو عمامي الي اشوف عيونهم تجدح نار
دخل سليم لزم حلا وضربها راشدي وهو ايهز بيها //ياطايحة الحظ مسويتله بيع وشرا
بيبي // شنو يعني
معين // يعني بايعه البيت علي وهوه ما مقصر بايعه وقابض فلوسه ورايح وره ست الحسن
حلا وهيه تبچي // وانا شمدريني طلعت لاعبه علي مثل ما لعبت على حليم
سليم //تؤ هيه ورافد علاقه وعلاقه من زمان وحتى اهله گالو احنه لاعدنا علم بالي اختكم مسويته گلونه حتى
انتي ما تجينهم ولا واصلتهم بس ابنهم ايمر يسلم عليهم يكولون حتى ما تقبلين تودين الولد ايشوفونه
بيبي // وهسه شلون
معين // شنو شلون يمه بتج مثل اخوها هذاك ضحكت علي مرته وهايه ضحك عليها رجلها
سليم // هااااا هسه عرفت منو كايل النهله نريد انوديلها البنات لازم انتي حاچيه گدامه وهوه ما مقصر
مخابرها وهيه اتصلت وتهدد وما هامها احد
حلا //وراح تسكتون
سليم بعصبيه //شنو شتردين اسوي امشي علي واتوسل بي حتى ايرجعج
كفايه // وابنه
سليم // شوفي حلا رافد طلگج وباع البيت وكلشي بالقانون لان انتي باعتبارج بايعه البيت وقابضه فلوسه يعني
ما النه علي اي شي خصوصا وهو كلي اسال اختك انا منطيها فلوس البيت
بيبي // صدك منطيج فلوس البيت
حلا // چذاب هو گلي عن الحلال والحرام اخذي هذا المليون
سليم //اهنا الحچي حتى من نطعن بالبيع مال البيت نفسه الموظف راح يشهد الصالحه لان هوه سالج قبضتي فلوس
البيت وانتي مجاوبته اي مو
حلا سكتت ومدنگه
سليم // او وجع هسه يكول انا انطيتها فلوس البيت وبكيفي بيتي وابيعه
بيبي // يعني البيت راح
سليم هز راسه // اي يمه راح وبتج اتطلگت بالخير عليج
كفايه // سليم اسكت هيه عمتي بيا حال
هوه نفخ //ساكت ليش انا شحاچي ( باوع الحلا ) اسمعي ولج حلا ترحين للبيت وتگعدين بي ومن يجون
الي اشترو البيت لا تحچيين وياهم وديهم عليه
حلا // اي
هو وكف وكال الكفايه // ياالله خلي نروح
راحو ومعين گال البيبي طالع ويه صحبانه وانا طلعت شفت بيبيتي دخلت الغرفتها اتمددت وابوي نزل طلع بدون
ما يحچي وكانما منتظر يرحون حتى يطلع دخلت للمطبخ وسويت شوربه واجت وراي روان وهيه تسالني
– يعني رافد راح يتزوج امي
رفعت امتوني رغم اعرف الاجابه
بليلتها ابوي رجع نص الليل وبيبي ما حاچته مثل كل مره وهوه لا صار يبچي ولا يحچي صعد بهدوء
يمكن اسبوع واجت حلا للبيت وياها اثاثها البسيط لان اكثره باعته والي جابته وياها خلته بغرفة عمي سليم الثانيه ومن يومها صرنا
خدامات الها والابنها صارت گاعده وتأمر علينه وياويلنه اذا عاندناها لو جاوبناها تكلب الدنيا وتضربنه بكل
شي موجود يمها چنت اشوف بعيونها الكره والحقد علينه
صرت حذره بالتعامل وياها لان اي غلطه تنگلب علينه غوول وصرت اخدم بحلا وابنها انا واخواتي
وهيه بس تسب وتغلط وياويلنه لو غلطنه چان ملاذي الوحيد بيبيتي الي قربتني الها وعلمتني اهواي
امور وصرت شاطره بشغل البيت الي اذب بي كل قهري بس حتى ما اسمع كلام جارح من حلا الي كلمه
والثانيه تگول – – هذني ما يفيدن مثل امهن
– – هذني مو بناتنا حتى ما يشبهنا
– – صلافتهن مثل صلافة امهن
– – منو يگول هنه بنات حليم
وامي ما سمعت عنها اي خبر وصارو ما يجيبولها طاري بس حلا من تگعد ويه كفايه تبدي تسمعنه كلام وغلط
بيبي دووم اتعلمني وانا اتعلمت منها هواي اشياء صار عقلي چبير ما يهمني شي غير بس دراستي وشلون
احافظ على نفسي وعلى اخواتي واخليهن يكملن
كبرنا وشبينه بحيث صرنا شابات وما اعرف هذا الشي رحمه او نقمه
ابوي بي وما يرجع ليوره صار ما يهتم بشغله والشرب اخذ كلشي حلو بي باع الغرفه مالته والثلاجه البيها
وحتى الفراشات ما خله بس دوشك ومخده وبطانيه وصار كل اعتماده على بيبي الي اشوف صحتها بالنازل
ودائما السكر ايعلك عدها
فد يوم اجت عمه كفايه وبوكتها چان دوامي صباحي اتلگيتها وسويت چاي اخذتها الها وشلت ملاك جبتها
طبعا ما اسولف الكم على جمالها عمه باوعت الها وابتسمت وكلتلي
عوفيها كبرت مو كله شايلتها
= ما اعرف اله اشيلها
گعدتها يم بيبي ورحت انظف وعمه كفايه سالت بيبي
عمه امهن ما خابرت ما سالت عليهن
بيبي // لا ابد مره وحده خابرت بيبيتهن واستلمتها حلا بذاك الغلط
– – بس ياعمه هنه خطيه الله يساعد گلبهن
– – بعد شيسون هذا المكتوب عليهن
– – عفيه گلب على امهن. ما فد يوم گالت خلي اروح اشوف بناتي ادز عليهن
بيبي بحسره //حظهن وحظ ابوهن
عمتي كفايه وهيه تهز بايدها // وابوهن شنو تاليته چم دووب گاعد وساكت
– – يكول ماكو شغل وملتهي الي ايحصله يروح يشرب بي عرك
– – هوه بس عرك سليم يگول حتى حبوب
– – ما اعرف حظه ما ادري حظهن
– – والله ياعمتي ايكسرن خاطري انوب شبابهن ايخبل
هزت راسها بيبي // اي بس ما عدهن حظ
كفايه //عمه انتي لازم تحاچيين ابوهن خطيه چم دووب
بيبي بعصبيه // شسوي طلع بحلگي عظم وانا احاجي يمه بناتك يمه شبن دير بالك عليهن ماكو عود
انا براتب الرعايه اصرفه ع البيت گوه مگزرتهن واجار المحل الطبيبي وعلاجي خو ولدي ولا چني
انا امهم ما فد يوم مدو ايدهم على جيبهم
كفايه وهيه تبتسم // ياعمه سليم ايگول ما انطيها لان تصرفهن على حليم وبناته وكافي عليها اجار المحل
بيبي // اي هوه هم هيج كافي عليه وزايد
اجت حلا وهيه عيونها يتطاير منها الشرار ورهف دخلت ومبين عليها باچيه انا بس شفت رهف سالتها
= شبيج رهوفه
ما بيه
= گليلي شكو
اسمع حلا تگول //لو انا لو هيه بالمدرسه فشلتني
بيبي //على كيفج شسوتلج
– – گاعده وتسولف ع المعلمات
كفايه //شتسولف
اتكلهن بيبي الي مربيتنه وهيه تصرف علينه ومن سائلاتها وعمتج اتگلهن بس اتعارك بينه وتضرب وتسب
وتفشر على امي
من سمعت حلا ما قبلت رحت الرهف = ولج صدك انتي هيچ مسولفه للمعلمات
هيه هزت راسها //اي سولفت شنو مسويه روحها بس هيه وبس وكدامهن رهوفه وهيه الربع حسره عليه ما تنطيني ايا
روان // زين تسوين
رهف //- اي تسولف للمعلمات بنات اخوي امهن عافتهن وانا اطلگت من رجلي حتى اربيهن
= وانتي منو كلج يجوز ايچذبن
– – بت ست سهام رقيه هيه سولفتلي وتگلي خطيه عمتج شگد اتحبچن عاد انا سولفت الرقيه كل شي
واجتني ست سهام وسالتني وانا ما قصرت كل شي سولفت
حاچيتها بخوف = وچ ليش ما تدرين بيها اتضمها الج
– – اي جابتني الطريق كله اتهدد وتكلي اچويج
روان // اگعدي وسكتي فنها اتمد ايدها عليچ
– – ما تسمعين هوستها
– – ما عليج بيها والله نلزمها انا ومها انام فوگها وانعنعها الهاي ميساء الساحره
جاوبتها = عيب هذا الحچي روان
روان // لا مو عيب كافي مو جاي نخدم بيها وباابنها هذا الخيخه مو كافي الشغل كله علينه وهيه گاعده تتامر
والله اذا ضربت رهف اسوي بيها شي ما صاير
= اسمعي رهف هسه تگومين تبوسينها وتعتذرين منها
روان // انتي شتحچيين
هزيت راسي = اي تعتذر نسيتي قبل چم سنه من رادت تحرگج بالجدر وانا طردتها شسوه بيه معين
روان // معين ما يحجي
= شقصدج
– – قصدي معين جاي ايجهز بيته يعني مو بحالنه
= مي خالف خلي نكسر عينها گدام كفايه ياالله رهوفه اعتذري
وراحت رهف اعتذرت منها وباستها گدام عمه كفايه الي گالت // حلا اعتبريهن بناتج اذا امهن ما
بيها خير انتي ربيهن
بقينه هاي حياتنا صار اكثر لبسنا من البالات لو من نور بت عمي سليم وهذا الشي ما يهمنا لان احنه چنا نتحسر
نلبس اي شي وناكل اي شي
ما چان عدنا اي خيار وبيوم انا نايمه الفجر وسمعت بيبي تون وتحچي بصوت متعب //الحگيلي مها
فتحت عيوني عبالي احلم وصوتها بتعب //وچ حلا تعاي مها وينج
گعدت ورحت الغرفتها ما لگيتها رحت على مصدر الصوت شفتها اباب الحمام واگعه وهيه اتكلي //بيبي الحگيني
وصلت يمها سالتها بخوف //بيبي شبيج
– – طحت الحكي عليه
رحت دگيت الباب على حلا الي فتحتلي وهيه تكلي //وسم وموت شبيج
ما حاچيتها دگيت الباب حييل على معين فتحه حچييت قبل ما يسال = بيبي بيبي وگعت بالحمام
ركض معين هوه وحلا وشالها وطلب مني اطلع الها دشداشه وفوطه واخذها للطبيب ويا حلا رحت ندهت
ابوي شفته نايم بملابسه وريحة الغرفه تلعب النفس = بابا بابا اكعد
فتح عيونه بتعب وهوه يكلي // شكو شبيج
= بابا بيبي وگعت بالحمام واخذها عمي معين للمستشفى
طفر وبعدها حك شعره وراح ايغسل وهوه ايحك بخشمه ويمشي بتثاقل
راح ابوي وراهم وتقريبا ساعه رجعو وهمه مجبسين رجل بيبي الي شفت بايدها كانوله
اجه سليم وصار ايعيط عليه //وين چنتن عنها
حلا //هوه شنو الوين چنه امي طاحت بالحمام
– – اي لو وحده يمها من گامت چان شافتها دايخه تعبانه مخليتلها هوايش تعلف عليهن وكل فايده ما بيهن
حلا سكتت ما جاوبته وجابو كرسي البيبي وصرنا انا وروان انداريها وحلا بس من تشوف احد جاي عليها اتسوي
نفسها بس هيه وبس صرت بهاي الفتره قريبه من بيبي انام بالليل يمها واخذها للحمام واغسل الها وصرنا انسولف
انا وياها وبعد مرور شهر اخذها عمي سليم ومرته للطبيب وكال لا بعدهي الحجيه يراد الها فد عشر تيام بعد
ونفك الجبس عنها
وره عشر تيام رجع عمي سليم اخذها وهالمره انا رحت ويا وابنه سهيل الي صار بالسادس اعدادي وصار
ايحشش على بيبي
بابا الحجيه تدلع تريد الها رجل
خلي نزوجها خوش شايف الها شايب
صارو ايضحكون ومن ركبت بالسياره ومن ردت اركب وره عمي سليم كال الابنه
اركب يم بيبيتك حتى من انزلها نسيطر عليها وانتي تعالي اركبي يمي
صعدنا وصلنه للطبيب وفعلا فتح التجبيس عن رجل بيبي وگلها // حجيه لازم تنتبهيين من تمشين وتتحركين تره
اعظامج مو مثل قبل خصوصا وانتي عدج سكر هالمره عدت على خير بعد ما اوصيج
وبيومها ما اوصف فرحتي لان بيبي طابت وعمي سليم انطى الابنه فلوس كله اخذ عشا وببسي وفواكه
فرحت لان راح نتعشى مشاوي من زمان ما ماكلين انا واخواتي
عمي سليم بيومها اخذنه نفتر گال البيبي اريدج اتشمين هوا واخذنه المنتزه ونزلت بيبي الي ما قبلت بس من شافتني
اباوع الها هزت راسها ونزلنه وگعدت على مصطبه وسليم اجه گعد يمنه وهوه ايگلها //ها يمه اشلونج
—-الحمد لله زينه
—-عساج دومج
سليم گلي //كومي اتمشي شويه بالحديقه خو مو تبقيين گاعده باالله امي مره چبيره وما تكدر تمشي
بيبي جاوبته // خطيه متمنيه كون اخواتها وياها
جر نفس وگال //شنسوي يمه هالبنات لا من ام بيها خير ولا من ابو بي حظ
سكتت وگمت عنهم وگفت وانا اباوع النافوره بيها ماي ينطي الوان اول مره اشوف هيج شي اجه وراي سليم
– – ها مها عجبتج النافوره
باوعتله وانا ابتسم =اي عمو اول مره اشوف هالشكل
هو باستغراب // ااه ما شايفه هيج شي
هزيت راسي = لا ما شايفه بس عمو منين هذا الماي هيج ملون
– – هههه عبالج الماي ملون لا هاي اناره مثل الگلوبات ومن يشغلوهن يصير بالماي لون
= ها عمو علوا فد يوم نجيب اخواتي خطيه ما طالعات
– – مو تدللين ياالله خلي نرجع لان امي ضاجت
ورجعنا ولگينه الكل بالبيت موجود واتعشينه واحنه فرحانات لان بيبي طابت ومرت شهرين على حادث بيبي
وبيومها طلعت للسوك غابت ساعه وراها اندك الباب دگه قويه فتحته شفت جيرانه ويا واحد وهو يگلي
– – منو بالبيت
طلعت حلا على صوته گللها //الحجيه زلگت بالسوك وانغمى عليها شفتها واخذتها للمستشفى
راحت حلا وانا واخواتي بقينه مترقبات وصار الظهر ومحد اجه بعدها اجه مجتبى وكال يريد ملابس الها
لان راح تبقى بالمستشفى
سالته = بيبي شبيها
جاوبني //رجعت انكسرت رجلها مره ثانيه وهالمره الطبيب گال اله عمليه
= عملية شنو
– – ما اعرف گال يريد ايخليلها بلاتين وهيه لان سكر وچبيره بالعمر فعمليتها صعبه
= اروح وياك
– – لا شتسوين امي وعمتي وخالاتي كلهم يمها انتي ابقي بالبيت
بقينا بالبيت وما نعرف شي ولا احد اجه الوره الظهر اجه عمي معين دخل للغرفه وصاح الروان
– – تعالي اكوي قميصي
راحت وانا التهيت اگلي طماطه الرهف وملاك لان ما سوينه غدا
بالليل اجه ابوي ويا حلا وعمي سليم وانا سالتهم = شلون بيبي
ابوي // الحمد لله سوولها العمليه وان شاء الله تصير زينه
= ان شاالله
سليم // ما سمعتو الطبيب شكال بعد ما تطيب بسبب السكر ولازم نراقبها دووم
ابوي // الله كريم
– – لو اعرف هيه شمطلعها للسوك
حلا // شلون ما تطلع چا ياهو الي يوكل الامه العربيه الفاكات حلوگهن
سليم // هاا
حلا //اي والله هاي كل جمعه تروح تتسوك وتجي قابل ابوهن يروح يتسوك
ابوي // وانتي شنو ما تاكلين
– – من اكل اكل من راتبي مو منك
– – ياراتب هذا ما شفت فد يوم حبتيلج علاگه
حلا // اي هوه هم عوزي بعد اكد على بناتك لان خطيه ما عدهن ابو
رهف // لعد عمه ليش تسولفين للمعلمات اتكليلهن انا اتسوك واشتريلهن الاكل وما الحك اشتريلهن ملابس
هنه اربعه يكسرن الظهر
حلا فلت وجهه ارتبكت وجاوبت // انچبي ولج وين سمعتيني
رهف //سمعتج تسولفين ع المعلمات لمن واكفات ايسالنج ليش ملابسي قديمات
حلا // اي اي بعد اتقولي عليه ياهو امج الي خلت الها دنيا جوه كترها وتالي عافت الدنيا كلها ولحگتني على رجلي
سليم بنتر // كافي حلا
حلا بعصبيه //لا مو كافي ما تسمعها بگد النعال والسانها متبري منها
ابوي وكف وكال // محد السانه متبري منه اله انتي
حلا // اي عيني بعدك اتدافع الست الحسن
ابوي // اهوو بدت مسلسلتج خلي اطلع احسنلي
حلا //على اساس انقهرت لا طالع رايح تشرب وتكبسل
ابوي طلع وعمي سليم گال الحلا //عود باچر روحي الصبح ابدال كفايه
حلا // اي هو هذا الي راح يصير تعاي ولج مها هاج هدووم بيبيتج اغسليهن
اخذتهن ورحت للحمام غسلتهن وثاني يوم گعدت حلا وانا سويت الها ريوك وراحت البيبيتي وبقيت يم اخواتي
طبخت الهن تمن وراحت روان للدكان جابت روبه وكعدنا ناكل لان احمد راح ويه امه تخلي يم ولد عمي سليم
وره تلث تيام طلعو بيبي من المستشفى چان مبين عليها التعب حضنتها وبچيت وحلا وكفايه خلنها على چربايتها
حلا // ها يمه هالشكل مرتاحه
بيبي بتعب //اي الحمد لله
باوعتلي كفايه // بعد ما اوصيج بيبيتج مسؤوليتج
هزيت راسي حلا گالت // اي طبعا مو ربتهن وما قبلت توديهن الامهن غصبن عليها تدير بالها على امي
بيبي بتعب // هيه ما مقصره
حلا // اهو امي انكسرت وبعدها محامي (باوعتلي ) اسمعي ولج مها تبطلين من المدرسه وتدارين امي افتهمتي
باوعت الها بخوف = بس انا ما اريد ابطل
حلا // لا تبطلين منو الها
= عمه انا واخواتي وما نخليها محتاجه شي
هيه زمخت عليه // شنو انتي واخواتج الها للبيت الهاي اختج الزغيره
كفايه // حلا على كيفج البنات وانتي تتناوبن على عمتي
– – ها واختهن
= عمه انا البيبي والبيت وروان الملاك ومن تجيين انتي تستلمين بيبي ورهف الملاك
بيبي // انا ما احتاج شي لحد يتمگطع بيه
– – شنو يمه ما تحتاجين شي
بيبي باوعت بعتب الحلا // تره انتي بتي ومسؤوله مني
– – ليش وذني بس انا
كفايه // حلا عمتي قصدها انتي وهنه وتتساعدن وكافي حجي خلي اگوم اسويلج شوربه
حلا // وانا اروح اسبح واغير ملابسي
اتقربت من بيبي الي احسها تعبانه ومقهوره بستها وحاچيتها = بيبي لا تضوجين الله يخليج والله اداريج بعيوني
بيبي وهيه تمسح بدموعها // مها لاتخليني احتاج حلا تره انا الخاطيرج انتي واخواتج كل شي اتحملت
هزيت راسي = لا ولا اخليج تحتاجين اي احد حتى لو ابطل من المدرسه
بيبي //. ما تبطلين انتي سباعيه وما ينخاف عليج
وصرت اروح للدوام وحلا تتعمد تتاخر حتى اتعاقبني المديره وتحچي عليه وفعلا اكثر من مره المديره حچت
وعاطت عليه وهذا الشي خلاني اسولف للمديره كل شي والي قدرت ظرفي وصارت تتغاضى عني وعن اختي
وبقت بيبي انا شايلتها بكل شي وحتى انام يمها اخلي ملاك بحظني وانام وصارت اقرب اليه دووم تبقى ما تنام
واتسولف عليه وتنصحني ودووم تخوفني من الدنيا والناس الي بيها وتگلي
– – شوفي امج شسوت بيچن وهيه امج ما حنت ولا سالت التهت بنفسها بونستها اتزوجت وعافتچن فديري بالج اتامنين بااحد
ابابوج لا تامنين وهاي الناس كلها اتدور مصلحه ومن تخلص مصلحتهم يذبون البشر ذبة الچلب
جاوبتها = شلون يعني
– – يعني ما اريدج اتثقين اب احد ولا تنطينه سرج شوفيني انا يجوز لو لاگيه محنه من بتي يجوز ما اعلمج
لو اريدج لو حتى خليتچن يمي لو ما شفتج شگد مطيعه وخادمتني
= لا بيبي انتي ما تسوينها
هزت راسها // – – لا مها انا احبج بس ردت افهمج وكتنا هذا قلة بي المروه والغيره ومخافة الله وانتن بنات وابوجن مو كفو
وحدتچن اتطلع ظهرها ورا يابيبي اريدج تديرين بالج على نفسج وتحفظين كل شي اكوله الج اهنا
( واشرت على راسها ) واول شي اوصيج بي انتي مسؤوله عن اخواتج وحتى عن ابوج
صرت احفظ كل كلامها او وصاياها وادري كل الي تكوله صحيح وتنصحني لان تخاف عليه
چنت من اطلع هيه توصيني ومن تريد تروح تقبض راتب الرعايه چانت تاخذني وياها اخليها ع الكرسي وتروح الراتبها
ومن نرجع تطلب مني انمر للسوك اشتري دجاجتين وكيلو لحم وكيلوين سمج نبقى بيهن عشر تيام وبعدها
نرجع على التمن والعدس والروبه لو التمن والدقوس والمقالي والف الحمد لله
ابوي مرات يجيب فواكه ينطينه نشتري طبقة بيض او جبنه وبعد اي شي ما نشوف منه
بيبي طبيعتها نظيفه تحب تسبح يوميه وتغير ملابسها وانا كل يوم احضر الها الحمام واسبحها واغير ملابسها
ومن اطلعها امشط شعرها واعطرها واغير جراچف فراشها وابخرهن
بيوم رحت حضرت الها الحمام ومن رجعت اخذ المنشف والملابس سمعتها تحجي ويه حلا
— يمه مو كله على مها هم شويه ساعديها
حلا بنفس عصبيتها //شنو شمسويه
– – يمه كله عليها وعلى اختها تنظيف ومواعين وطبخ وانا مها انكسر ظهرها بيه
حلا //وطبها طوب هذا الموجود مشتكيه الج حتى افرك حلگها بالنعال
بيبي // عيب حلا مها ما تحجي بس انتي بتي المفروض انتي اتسبحيني وتمشطيني وتغسلين ملابسي
ردت باستهزاء //اي وما تردين هم اسبحهن وامشطهن
– – مو اسمعج من يجون اخوانج تگولين كله عليه وتعبانه
حلا // اوو يمه وهسه شتردين
– – اليوم عطله عاد ادخلي وياي للحمام ساعديني
– – خلي مها اريد اروح الصاحبتي ونطلع للسوك
– – صارت صاحبتج وروحة السوك احسن من امج
حلا ما سمعتها طلعت ما انتبهتلي صاحت على ابنها //ياالله حمودي امشي
شفت على وجه بيبي الالم ودموع بعينها انا ابتسمت بوجهها وكتلها
= ياالله حبيبتي خلي نروح نسبح
سبحتها وصرت امشط شعرها ورحت على فراشها غيرته وغيرت جراچف الچربايه ورحت اريد انزل مخده
من نضيدتها لان مخدتها نزلت وما مرتاحه بنومتها نزلت وحده هيه شافت المخده گالت
– – تعاي مها اتدني يمي
اجيت والمخده اب ايدي = ها بيبي
هيه اشرتلي اتقرب منها دنگت عليها كالتلي //مها هاي المخده اتضمينها يمج ما تخلين اي احد ينام عليها لو يستعملها
استغربت من كلام بيبي هيه استمرت بالكلام //اخذيها وخليها بغرفتجن بيها فلوس ضامتهن خليها يمج من اطيب
اخذهن ومن اموت الج انتي تعبتي واتاذيتي بيه وبتي الي طالعه من بطني ما سوت الي سويتي الي
= بيبي شنو هالكلام
باوعتلي بعتب //عبالج خرفت لو اچذب جيبيبها
انطيتها البيبي الي وخرت الوجه مالتها ومدت ايدها وطلعت علاكه ملفوفه فتحته شفت بيها فلوس بس ما اعرف شگد
بيبي كالت //. هاج مها ضميها يمج وديري بالج عليها
بيبي رجعت العلاكه المكانها واخذتها الغرفتنا ولان روان تنظف ما انتبهت اخذتها وخليتها جوه فراشاتنا
اخواتي مو من النوع الي يسالن منين هاي مقتنعات بالشي الموجود الي بمتناول ايدنا يعني فراشهن ما يبدلنه
وبالاساس منين انبدله لذلك يوميه اتحسس المخده واحاول اخفيها واوصي رهف تنتبه خاف حلا تدخل الغرفتنا
ولو انا مطمىنه ما تدخل الها لان تعرف ما عدنا شي
بقينه نفس ما احنه بيوم اجت رهف فرحانه وهيه اتگلي
المديره دزت عليه وكالت رفعو اسمي حتى ايسوولي عبور من الخامس
ما فهمت وانا اشوف بعيون حلا حسد وقررت ثاني يوم اروح واستفسر من المديره وفعلا رحت هيه كالت
انو جاي كتاب من التربيه الطالبه الي ناجحه بكل الدروس ممكن تعبر مرحله ومختارين رهف بشرط تمتحن
دروس الخامس والسادس حتى تعبر مرحله انا فرحت يمكن لو رهف مطلعه طبيه مو مثل فرحتي بيني وبين نفسي كلت
اقلها الي ويانه ينسون شويه احنه بنات نهله
وفعلا اخذت رهف وراحت تمتحن بعد ان درست لا شنو درست اكلت الكتب اكل
ونجحت انا من الصف الثاني للصف الثالث المتوسط ورهوف نجحت بامتياز وراحت للسادسواخذو اسمها للمتميزين
لكن المديره نصحتني انو تبقى بمدرستها لان المتميزين يريد متابعه ودراسه خصوصا وهمه يدخلون بي اللغات
اما روان نجحت للثاني متوسط لكن درجاتها شويه ضعيفه
مشت امورنا والحمد لله الي صار لا ابوي ولا حتى حلا يحجوون ويگولون بطلو وچان الي يشجعنا ع الدراسه هيه
بيبي لكن اكيد اكو مفاجأه بالموضوع
وبيوم الصبح رحت اگعد بيبي شفتها فاتحه عيونها او وجهها معووج واباوع الاصابع اديها معووجات صرخت
وطلعت حلا وعمي معين واخذنا بيبي للمستشفى وقرر الدكتور انو ضاربتها جلطه قويه بالدماغ
وبعد لا يمكن ترجع تحچي او تتحرك واهنا بدت ماساتنا الحقيقيه
//////////////////////////////يتبع
