رواية ضحية لمن لا يرحم الفصل السابع عشر 17 بقلم زهراء الحسناوي
،،،،،،،،،
انعم الله اعله الوگف والماوگف بالضيج
هنه ايام يگضن والقصص تبقى 💔
،،،،،،،،،،،،،
زينب،، نذيره طفرت من مكانها تنكث بثوبها شلهت الثوب لفوگ رجليها صار بيهن طگعتين حمر
اني ردت انجلط. من الرهبه بناتها بسرعه گامن لمهن ونذيره مستمره تغلط حتى كفرت من حراره الچاي
عفتهن مخبوصات ردت انهزم ماحسيت غير جنه جرتني من حجابي وضربتني على ضهري
جنه،، ووين شارده ادبسززز والله عرفتج متعمده عليهااا حيوانه
زينب،، نذيره بس تهفي الرجلها گعدت بالگاع صارت تصيح الفصليه اتعمدت تجويني
جنه من ضربتني على ضهري من قوه ضربتها اختنگت وگعدت وره الباب
هنه مخبوصات اجت غفران ضربتني دفره برجلها
ام لواء،، بس تندعي عليه وعلى اهلي تصيح فرثتي عيالي فرث الله لاينطيج
اجه شيخ منهل على صوت خبصتهن من شافها ماحجه بس گالها جويه بسيطه هسه اجيبلج عصاره مال حروق تهدئ
راح ابوها وهي استلمتني غلط ورزايل گاعده ولازمه رجلها انتفخت من الحراره
بس موكلش هواي دائرتين صغار
اجن جنه وغفران عليه وحده تمعشني والثانيه تصگعني علئ راسي نهضت ادفع بيهن مايندفعن مثل الچلاب الي محاوطات بشر لاحول ولا قوة اله
مالگيت روحي غير دفعتهن بكل قوتي فتحت الباب وطلعت اركض للمخزن شارده صار بوجهي لواء
حسيته طوق النجاة الي وبلحضه صرت وراه
عاط بيهن
لواء،، شكووو،؟
جنه، خاالي هاي الحقيره حرگكت رجل امي
زينب،، مااحس غير جرها من ردن ثوبها قربها يمه
لواء،، اذا غلطتي واتجاوزتي حلگج افركه
فهمتي؟
لاكل شويه ذابات شغله براسها شفتني ساكت استغليتن هذا الشي
زينب،، طلعت نذيره تعرج گوه تمشي
نذيره،،، والله يخويه عبالي ادافعلي تالي ترزل بنتي الخاطر الفصليه
لواء،، الفصليه التحجين عنها خادمتج ليل نهار
كافي بعد اخوج تره البينه كافينه
زينب،، التفتلي
لواء،، من هاي اللحضه وجدام الكل تصعدين فوگ
وانتن جنه وغفران وحگ الله الزمجن ارگع راس براس مفهوووم؟
زينب،، التفتلي
التتجاوز تجين تحجيلي
التغلط تجين تحجيلي
جنه وروح حسين واول مره احلف بروحه
اذا مابطلتي سوالفج اخلي طبت هذا البيت تحرم عليج
كافي طلعتنها من ماعونها
وانتي كافي تنطيهن مجال من اليوم جنه وغفران يمدن ايدهن عليج ارگعيهن على حلوگهن
زينب،، احس روحي بحلم موحقيقه الجاي اسمعه
لزمني من زندي
بس اني منتهيه ضربت جنه بضهري من جهة كليتي اذتني
جنه وغفران خنسن بس نذيره اشكال والوان حجت
اخر شي سمعتها تصيح
نذيره،، سحااره
من راحت لهلها باتت اكيد جابتلنه عمل واجت خلت اخوي ساكت ويدافعلها
زينب،، طلع للمخزن گدامي واني وراه دخل واني بعده مدنگه ودموعي تجري بدون صوت
لواء،، اخر مره اگلج تصعدين فوگ ياالله لمي غراضج
زينب،، ماحجيت ولافتحت حلگي
هو وگف بالباب ينتضرني واني لميت غراضي هنه شويه مواهواي بس اخرگ
ملابسي الزينه كلهن شگگنهن عفتهن بمكانهن
اخذت علاگتي وطلعت وراه ذب الجكاره بالگاع ومشه جدامي
دخلت وراه صارت گبالي جنه تريد تنفجر من رزاله خالها عافتنه وطلعت شايطه البيتهم وامها طلعت وراها شايله طرف ثوبها وادردم بس بصوت مسموع
لواء مااهتملها صعد واني صعدت وراه كل شويه اريد اعثر واوگع على وجهي
وصلنه الغرفته فتح الباب وفات
دخلت لازمه علاگتي على گلبي مستحيه وخجلانه وفشلانه من وضعي
دخل وسد الباب التفتلي
لواء، هذا مكانج فهمتي
شوفي زينب كل الجاي يصير مالي علم بي
وماجاي اشوف غير اليصير جدامي
ام سجاد تحجيلي ومرتين گتلها خل تجي يمي ومحد يگدر يحجي وياها
بس انتي تعاندين
اي وحده تاذيج تعاي احجيلي واني اعرف اشلون اخذ حگج
زينب،، ضليت ساكته بس اسمع ماحجيت المشكله بعيوني المايرضن يسكتن تحس روحك ذليل والوادم كارهتك هذا اليرزلك وهذا اليشتمك وذاك اليحتقر وجودك
ضليت واگفه بمكاني
لواء،،، راح تضلين هيج واگفه اليوم؟
زينب،، رفعت راسي شفته گاعد ع الجربايه
اتقربت يم الحايط حطيت هدومي بالگاع وگعدت
لواء،، اني راح انزل هسه لتخافين محد تصعدلج
وانتي رتبي وضعج اهنا عزلي ملابسي بجها واخذي خانه من الكنتور الملابسج
نازل اجيب فراش الج
زينب،، ارتاح گلبي من حجه هيج جنت اضن قبل انام واحد بصف الثاني الحمدالله من گال اجيبلج فراش
نزل شويه ورجع شايل دوشگ وبطانيه ومخده حطهن بالگاع
ماحجه شي عافني وطلع
گمت خليتهن على صفحه
بس محتاره وخجلانه اشلون اعزل ملابسه؟
رحت فتحت الكنتور اكو جها بيها اشياء بسيطه رتبتهن بغير مكان واخذت الخانه حطيت بيها غراضي
ضليت بالغرفه خايفه انزل لايضربني والدنيا صارت تقريبا الضهر واني فوگ مانزلت
انفتح الباب گمزت عبالي وحده منهن
دخل لواء بيده علاگه حطها جدامي
لواء،، اتغدي
زينب،، اتفاجئت جايبلي اكل لفات اثنين وببسي وبطل ماي
ضليت صافنه
رغم اذيتهن بس خفت اضل خاتله ومامسويتلهن اكل خاف يضربني
ردت اگوم
لواء،، وين؟
زينب،، ا اسوي غده
لواء،، ماكو داعي امي وابوي وحسن جبتلهم جاهز ضلت نذيره وبناتها التريد اكل تطبخ الروحها
زينب، جوعانه بس استحي اكل وهو موجود حس بيه عافني وراح للسرير اتمدد وحط بحضنه اللابتوب
فتحه وصار يعاين بي
ادنيت طلعتلي لفه اخذتلي لگمه منها العبره خانگتني
دموعي وحدهن ينزلن
مااكلت شويه وحسيت روحي شبعانه
باوعلي گال
لواء،، كملتي؟؟
زينب،، هزيت راسي بمعنئ اي
نهض من مكانه گال گومي وياي
نهضت ردت اعثر بثوبي مستحيه
هو طلع واني وراه نزلت
دخل الغرفة امه اشرلي بمعنئ اگعدي
طلع موبايله اتصل اسمعه گال جنه جيبي امج واختج وتعالن
سده وحط الموبايل بصفه
شويه واجن كلهن من شافني استغربن
نذيره ضلت عين لمها وعين الي
نذيره،، شكو صايحيلي اني وبناتي والله حلفت ماافوت لهذا البيت دام ادافع للفصليه
لواء،، واني الهذا السبب جبتج اهنا
اسمعني كلجن زين
َمن اليوم مشاكل مااريد
والاسمعها ماده ايدها على زينب ايدها اكسرها
خدامه الجن صاايره ليل نهار اشوفها تفتر وانتن جاعدات لاشغل ولا عمل كافي اتقن الله واستچنن
النهار كله ادرمن عليها هلگمعتن جود بدرمتچن هاي
هو گالها ابو المثل الدرمه لو فراگ لو گطع ارزاگ
نذيره،، كل هاي الهوسه وجايبنه حتى تهينه الخاطر المسعده
لواء،، المسعده مرتي جداَم الله وبشرعه واليهينها يهيني
من يوم الفاتت هذا البيت وانتن محملاتها ذنب
موت حسين
انه موزعطوط ولامخنث حتى اخذ ثاري من مره واعوف چتال اخوي
اخوها چتل اخوي اذا اني زلمه بيه خير اروح اخذ ثاري من اخوها مو منها
وجدام الكل انه گايل اخوها دمه مهدور وين مااشوفه ادفنه بگاعه
الله فوگ راسج نذيره اعتبريها وحده من بناتج
انه ماشايفجن اطگنها قبل بساع وماادري شيصير مايصير وراي
بس ثقن باالله ورسوله انوب التحجي وياها راسها ارگعه بالحايط
حملتنه بسوالفجن اذنوب فوگ طاقتنه
انتي نذيره مو اتصلين وتقرين قرأن؟
ماقاريه كلام الله (ولاتزر وازره وزر أخرى)
لو احنه بس نقره ومانطبق؟
وانتي يمه انتي الجبيره المفروض انتي التصديهن وماترضين بالباطله
مو تشجعيهن يطگنها
هسه اني حذرت واريد وحده تخالف
يالله گومي
زينب،، اشرلي گمت وراه هو يحجي واني دموعي توگع بحضني
طلعت وراه وهنه اسمعهن ماراضيات ويصيحن سحاره اكيد موكلته شي ولاعبه بعقله
هو ماسمعهن لان يخابر بس اني اذني يمهن
اشرلي اصعدي وهو ضل جوه
صعدت للغرفه گلبي فرحان جنت خايفه
حطيت اديه على حلگي بستها ورفعتها للسمه شكررن ياحبيبي يالله
رديت گعدت بمكاني اكو فرحه بگلبي بعد موت جود الله سخرلي لواء يدافعلي
بيومها مانزلت وهو هم ماصعد ولاوحده صعدتلي ومن طبيت بيتهم لسه ماارتاحيت مثل هذا اليوم يوميه اكند من الصبح لليل شغل وكاتلني الجوع
اليوم كاعده واكلي يمي رحمتك ربي حلوه من تلطف بعبادك
بليل فرشت بالگاع وهو بعده ماجاي شايله هم
اشلون اكدر انام بغرفته اليوم
الساعه ب 9تقريبا فات بيده علاليگ هم جايب عشه
جاهز حطهن گدامي
اني مدنگه احسه راح بدل ماشفته شويه واجه گعد گدامي
لواء،، عبالي الگاج محضرته
زينب،، فتح العلاليگ طلع الاكل اشرلي بمعنى اكلي
هو بمجرد وجوده بالغرفه مااعرفت اكل الضهر مو انوب گاعد جدامي
لواء،، اكلي زينب
زينب،، مديت ايدي اكلت بس اللگمه بيها صوت اتگرگع ابلعومي خجلانه
اني يم اهلي من جنت اتعارك ع الخبزه ويه زينه واليوم جدامي اكل عمري ماماكله منه واستحي اكل
گوه كملت نص لفه هو كمل قبلي ونهض طلع يغسل اكو بالطابق الفوگ حمام بنهايه الممر مشترك الكل الاغرف
راح يغسل بمجرد ماطلع رجعت اخذتلي لگمتين دحستهن بحلگي
بگلبي اگول لو شايفني قبل شويه هيج اكل جدامه جان انهزم وخاف لااكله
من سمعت صوت خطواته سويت روحي الم بالاكل واحط بالعلاگه
عفتهن ع الميز وطلعت رحت غسلت
بس بالي يشتغل تفكير احس راسي راح ينفجر من التفكير
كلمته تتردد براسي من گال اخوها مهدور دمه
مهما يكون السواه احمد والحال الوصلنه النه بس يبقه اخوي مايهون عليه يموت مچتول بسبب افعاله
رجعت لگيته متمدد وبيده اللابتوب يگلب ب ايد وايد الثانيه لازم بيها جگارته
مديت الفراش استحي امدد جدامه
ضليت گاعده ع الفراش
لاساعه ولاساعتين هو ساكت وعينه بالشاشه تالي تعبت من الگعده مالگيت روحي غير اتمددت وبعدها غفيت
مافزيت غير نص الليل رفعت راسي مطفي الضوه ومشغل التيبلام داير وجها للجها الثانيه گعدت جوعانه گمت على كيف رحت علئ اطراف اصابيعي فتحت العلاگه على كيف اخذت لفه وبطل ماي ورجعت لفراشي
اكل بدون صوت كملت بطني متروسه اول مره انام شبعانه يوميه الجوع مايخليني انام معدتي تضل تطحن للصبح من الجوع اضل اتگلب
ردت انام ماگدرت احس شبعانه نوم
اباوعله صاير الضوه متسلط على ضهره لابس بجامه نيلي وفالينه سوده
شويه وانگلب نام على ضهره وحط ايده على عيونه جر حسره
خررررب بحضي گاعد واني حسبالي نايم اكيد سمعني واني اعلف نص الليل يافشله الفشله
درت وجهي سويت روحي نايمه من اول امس
بمجرد مانمت على جهتي الضربتني بيها جنه حسيت بألم خفيف
بدون وعي گلت ااخ بويه
لواء،، زينب
زينب،، جمدت اشلون سمعني اني حجيت بصوت كلش ناصي
رفعت راسي شفته واگف يمي عدلت گعدتي
لواء،، شبيج؟
زينب،، هزيت راسي مابيه شي راح فتح الضوه
ورجع يمي
لواء،، اكو شي ياذيج
زينب،، دنگت واشرتله ع المكان بضهري
لواء،، ضربنج اليوم؟
زينب،، رجعت دنگت وهزيت راسي بمعني اي جر حسره
لواء،، ليش ماتجين تحجيلي؟
زينب،، انهضمت عيوني صارت تلمع الدمعه بيها
لواء،، ياالله يابه نامي وانوب مااريدج فاهيه اريد اشوف زينب الوكحه النزلتني بالطين خاطر تعبر
زينب،، رفعت راسي مصدومه شذكره بهذا الموقف واشلون عرفني؟
عافني وراح طفه الضوه ورجع اتمدد
خلاني حايره افكر اشلون عرفني واني بس عيوني طالعه من انزل احش للهاشه
ثاني يوم گال انزلي وشيحجن لتجاوبين وهنه بعد مايتقربلج لان حذرتهن
فعلا نزلت شفت بس جنه بالمطبخ تسوي ريوگ
من ردت اعبر صارت گدامي غمتني وراحت
متعوده على سوالفها رحت عبالي مخدرات اهواي جاي فتحت القوري مابي بس بثل رحت فرغته وسويت جديد
سلگت بيض ل ام لواء وللشيخ وحضرت صينيتهم مثل كل يوم
اخذتها ورحت للغرفه لگيته بس هو وياها گاعدين
هو گعد يم الصينيه ياكل اشرلها بمعنئ تاكلين؟
ام لواء، لا مااريد هسه جنه تسويلي
زينب،، تحجي بدون ماتباوعلي عفتهم وطلعت
رجعت حضرت صينيه وصعدتها لفوگ اتلگاني لواءراجع من الحمام ينشف بوجها بالخاولي
دخلت وراه حطيت الصينيه گعد يتريگ
واني يمه وماادري ليش من هو موجود ماعرف الوج الخبزه
يوم يجر يوم واني ولواء على نفس وضعنه هو ينام فوگ واني بالگاع وحتى كلام مابيناتنه طبع لواء مبين مايحجي اهواي كلامه قليل
نذيره وبناتها مالهن شغل بيه مايضربني مثل قبل بس يسمعن حجي من جوه لجوه
مالي غرض بيهن اكمل شغلي واصعد فوگ
طلع اربعين جود واني وياه بنفس الغرفه بس تحسنه كل واحد بعيد عن الثاني بعد السماء عن الگاع
ام سجاد مااجت بالاربعين رجلها مريض
لواء رجع ياكل يم اهله ونذيره وبناتها هم ياكلن ويزبلن ويرحن البيتهن واني اضل اكرف وراهن
صعدت للغرفه اريد اخذ ملابسي حتى اسبح سمعته يتصل من ضحكته وكلامه عرفته يتصل ب ام سجاد والفهمته باجر تجي
صدگ فرحت من كل گلبي
احسهم يحجون كله بالالغاز وكل شويه يضحك يگلها الگاع محضوره من تجين افهمج
ماصدگت شيجيب باجر وتجي الحنينه شوفتها تخلي گلبي يرتاح واحس الدنيا بعدها بخير
ثاني يوم الساعه ب 12الضهر صعدت اريد اصلي
فتت للغرفه لواء ماموجود صليت وكملت انفتحت الباب وجان تدخل ام سجاد ورفل طفرت من مكاني هي حضنتني مبتسمه بعدتني عن حضنها تباوع بوجهي
ام سجاد،، ولللج صايره خانسه اعله اخوي؟
زينب،، ضحكت
رجعت حضنتني جرتني من ايدي گعدنه بالگاع
ام سجاد،، احجيلي شنو هاي التطورات الصايره
شو جنت اتوسل بيج حتى تصعدين تالي من كضنج اجيتي شارده برجليج هههه
ضلت تحجي وتسأل اخر شي سالتني وين انام اعرف حركاتها ادري متاكده انام بالگاع بس تريد تتاكد اكثر
جاوبتها دمغتني على راسي
ام سجاد،، ولج شگد خوثه والله لو من لواء اكتلج كتله معدله
بس اخوي صابر وياج هنيال خلگه
اليوم مابيها مجال هسه رفل تحفلج وترتبج اليوم لو بالهدف لو بالنجف كافي اني ومحروگه اعصابي الله يساعد لواء اشلون متحمل وساكت
رفل،، يمه ماتشوفين الشعر بوجها يخلي اكبر واحد ينهزم منها
ام سجاد،، هسه تحفيلها وترتبيها تطلع جنها ورده
كلنه قبل مانحف نخوف بس من نترتب نطلع شكل ثاني
زينب،، خاله والله فشله اشلون احف وجود تون طالع اربعينه
اباوعلها عضت السانها طبگته وعضته رفعت ايدها متحاميه تريد تهفني راجدي
ام سجاد،، انوب اني اريد ابسطج اااخ
ولج فتيتي چبدي
كافي يمه مايصير هيج
قابل رفل ام صالون واطلعج عروس؟
بس شويه تعرف تحف واني ارتب حواجبج واطلع عنجن خليج انتي ورفل اهنا
زينب،، حجتها وغمزتلي عرفت شنو قصدها
هي تقصد رفل تحفلي (ج)
گتلها يااا صدگ تحجين خاله اشلون واذا اجه لواء وشاف الباب مقفول؟
ام سجاد،، مايجي سهمج الراحه
زينب،، احس كلامها بي شي محيرني معقوله هو يدري وطلب منها بس لواء صار شهرين يمه مابين اي شي مجرد كلام عادي وطلبات عاديه
رفل بدت تحفلي وجهي وكل خيط اگمز وياه واهفي على وجهي اباوع الشعر اشلون يطير ويه الخيط
امها بس تضحك اتگول فضحتينه وجهج معشعش شعر
بعدها ام سجاد طبگت المخده وگعدتني جدامها اني انطيتهن الخيط والملقط والمگص بدت ترتب بحواجبي ربع ساعه خلصتهن
ام سجاد،، گومي شوفي وجهج اشلون طلع
زينب،، گمت باوعت بالمرايه ادور على زينب القديمه وجهي اتغير جذريا جانن شواربي ينحلف بيهن بكثر ماثخان
ام سجاد،، توه طلع وجهج وين جنتي اوين صرتي
يامسكين ياخويه منيملك زلمه وياك بالغرفه
اگول الزلمه ساكت مايحجي تالي طلع مايشوف اكو انثئ گدامه
زينب،، ضلت تضحك عليه تالي
عافتنه وطلعت استحيت من رفل بس ب اسلوبها خلتني اكسر حاجز الخجل واخذت راحتي وياها
ايدها خفيفه
ساعه وكملنه اندگ الباب طفرت حسبالي هو
ضليت افتر بالغرفه تالي ارتاحيت من سمعت صوت ام سجاد گالت هاي اني افتحن الباب
فتحتلها رفل لبست دشداشتي
ام سجاد،، نعيما يالله بنيتي روحي اسبحي اريد سبحت عروس
زينب،، اخذت ملابس ورحت للحمام سبحت
كملت وطلعت لگيتهن گاعدات بالغرفه والمصيبه لواء يمهن
ارتديت لوره يافشله الفشله اصخام الصخمني
اشلون افوت جدامه؟
اجت رفل جرتني وهي تجر بيه اني انزل بالخاولي على حواجبي مستحيه
باوعلي ابتسم مد ايده حك شعره
لواء،، شعدكم اهنا مااطلعون
زينب،، وجهي غده نار وام سجاد تضحك گالتله اليوم مااعوفكم اليوم لمن تحررون السالفه
لواء، والله ياخويه اليوم ناوي حتى الاندلس احررها
رفل،، خالي اني اهنا تره
زينب،، ردت اگلهم تره حتئ اني بعدني واگفه لاتغمجون تره روحي خرطت ب الب…….
عافنه وطلع ام سجاد گالت الرفل جيبي جنطتنه مال الملابس
راحت رفل جابتها طلعت علاگه صغيره فتحتها
طلعت سيت نوم ابيض
بمجرد ماشفته لطمت على صدري
يااا خاله تردين البس هذااا؟
ام سجاد،، ولج يمه اعقلي ولاتتسودنين
الليله تعتبر دخلتكم تردين ادخلون بالاسود؟
البسي هذا بنيتي بلكت الله يفتحها بوجهج ويحنن عليج الگلوب
زينب،، ماگدرت اتحمل بجيت گتلها خاله اشلون تردين اذب الاسود وجود صارله شهرين من مات
ام سجاد،، ييمه لو نصبغ وجوهنه سود مايرجع الراح موانوب الثوب الاسود يرجعه
وانه ماجاي اگلج ذبي جدامهن حتئ يتسودنن عليج فوگ ماهنه مسودنات
لابنيتي البسي بس يم زلمتج وجدامهن اطلعي بالاسود
اذا تحبيني والي خاطر يمج اليوم لاتعترضين على شي ذبيها وره الله واتوكلي علي وهو ونعم الوكيل الله ايسر حياتج ويكفيج شر بنادم
زينب،، اخذت السيت منها بين المقتنعه والخايفه انفذ كلامها
تالي توكلت على الله وذبيت حملي للباري
بلكت يكون لواء سند الي بهذا البيت
ام سجاد گالت اليوم لاتنزلين جوه ضلي اهنا اني مشتهيه اطبخ العشه
فعلا مانزلت ولواء جان حزنان على جود لحيته صايره شكبرها
من طلع الاربعين ماراح حلق
گاعده بالغرفه وشايله هم شكبره اتمنئ اغمض وافتح الگه كلشي بحياتي كابوس
المشكله ماجاي احس عندي مشاعر للحب احس مجرد جسد يمشي مابي روح تحب
فكرت بيوم العركه من وگع الچاي بحضن نذيره
سبحان الله كلشي وبي صالح يمكن القدر كتب هيج حتى نخطي خطوه بحياتنه اني ولواء
لو ماذاك الوقف بيوم الانجوت نذيره يمكن لسه اني نايمه بالمخزن ويكفخن بيه
انفتح الباب دخل لواء محلق شعره ولحيته محددها
لواء،، السلام عليكم
زينب،، وعليكم السلام حجيتها ودنگت
هو هم ساكت اخذ ملابس وطلع
احس روحي راح انجلط لاام يمي ولااخت
الحمدالله ام سجاد ورفل يخافن الله وگفن وياي
شسوي مااجازيهن
شويه ورجع حتئ مارفعت راسي ولاشفته
حسيته جاي يبدل
لبس دشداشه بيجي مشط ورش عطر
اجه ثنه ركبته جدامي
لواء،، زينب
زينب،، رفعت راسي عينه بعيني هو صافن بوجهي
مد ايده گرص خشمي وابتسم بطرف شفته
ادري جاي يسوي هيج حتى يطمني
نهض من يمي
لواء،، لطلعين ام سجاد راح تجيبلنه عشه
زينب،، فعلا اجت ام سجاد شايله صينيه
بيها تمن ومرگ ودجاج وزلاطه وبرتقال
من الخوف ماجاي اشوف كلشي جدامي
المره تحجي واني ابد موييمها
هي تحاول تلطف الجو وتقلل التوتر العندي بس وين اني؟
من هسه گمت اختض
لواء حس بيه خايفه عافنه وطلع
ام سجاد،، ولج يمه گولي ياالله شبيج غديتي صفره؟
زينب،، اريد احجي صوتي يرجف مااگدر اشرح حالتي
اتقربت مني حطت ايدها على راسي قرت ايات
بس بعدها الهبطه لازمتني
ام سجاد،، ييمه هاي سنه الحياه لو كل النسوان شارده وتخاف مثلج جان من زمان انقرضت البشريه ولا اني صرت ولاانتي
صيري سباعيه المره مالها سند غير زلمتها
احتوي بنيتي تره الزلمه مهما تشوفي قاسي وترهبج رجولته بس يم مرته يصير طفل يدور حنانها وامانها
زينب،، انفتح الباب دخلت رفل بيدها جنطتها
حطتها يمي ع الجربايه
ام سجاد، رفوله حطيلها من هذا الخفيف البناتي مو اطوخين تره يبين الصبح لان فشله من خالتج
هم اتگول ابني ميت وهنه يتحمرن
وانتي يالله گومي البسي السيت الانطيته الج لاتضلين ملفلفه وجهج يبجي
زينب،، گومتني ام سجاد وماطلعت اله شافتني لبست السيت بس شنو اذا جنت قبل خايفه شويه هسه الخوف زاد قاطات
اباوع زروري طالعات والصدر نصه طالع
مااتحملت شلت الشال لبسته ولفيته نزلت الباقي على صدري
اباوع رفل خربانه ضحك سالتها شبيج؟
رفل،، هسه انتي طبقتي المثل اليگول من فوگ هله هله ومن جوه يعلم الله
زينب،، ابتسمت لان صدگ شكلي يضحك لابسه صلوخ وحجاب مستوره من فوگ ومن جوه الزرور طالعه
جرت الحجاب مني رتبت شعري
وحطتلي شويه حمره بناتيه
ومعطر رادت تطلع انفتح الباب دخل لواء
اسمعه يحجي مجرد صوته خلاني ارجع ارجف
دخل وسد الباب سمعت بس طگت القفل
،،،،،،،،،،،،،،،،،،،،،،،،، ،،،،،،،،،،،،،
غصون
إثنينه التفتنه المصدر الصوت
دخل ذياب على وجها ملامح استفهام
سال عذراء
ذياب،، احجي سالفتيش؟
عذراء،، ها هيج سالفه بيناتنه سالفه مال نسوان ماتخصك
غصون،، ضحكت وندستني
اباوعله مبين من شكله ماسمع كلامها بس اخر كلمه سمعها وعذراء طلعت بسالفه جديده تسأله
اذا يعرفله واحد من جماعته يدبر شغل الزوجها لان دوامه متعب وبمكان بعيد
هو هم اندمج وياها يحجي تالي عافتنه وطلعت
اجه يمي
حط ادي بجيوبه اني لافه الخاولي على راسي صاير شكبره اتگول حدبه مال بعير
همس يم اذني
ذياب،، اگلج واليرحم والديج انتي كلساع وسبحانه مخليه الوادم ماخذه علينه نضره موزينه
واحنه مخلصيها يابسه وتمن گفاره كلشي ماكو
غصون،، بمجرد ماسمعت كلامه احس صرت مثل البيب بيب ركضت فتحت باب الحمام وسديته وراي اسمع بس صوت ضحكته
هو اني خايفه من اخته ام ادماغ وانوب اجه هو كمل السبحه
ماطلعت لمن وخرت الخاولي مشطت ولفيت شعري وطلعت
لگيته متمدد بفراشه مبين نايم
لان تاخرت بالحمام
اني هم رحت لفراشي
اتمددت جريت الغطه اتغطيت وغفيت
اهناااك وجان احس اكو ثگل علئ خصري
فزيت واشوفلك الاخ صاعد يمي نايم
من حس بيه طفرت گعد يفرك بعيونه
اعرفه اصلا مبينات عيونه مانايم لان من يگعد من النوم عيونه حمر
مد ايده يتمغط
ذياب،، اني شجابني اهناا
غصون اني شلتك
اباوعله گوه كاتم ضحكته رجع حط راسه ع المخده
مفتح تك عين
ذياب،، ولج النومه اهنا تسوالها شرطي
ليش حارمتني ليش!؟
غصون،، اذا مانزلت اني انزل جوه
ذياب،، واذا نزلتي اني الحگج
غصون،، ضليت فاتحه حلگي
گمت اريد انزل لزم ايدي
ذياب،، نامي نازل بويه نازل ياطلابه الماتخلص
غصون،، نزل رجع لفراشه جر الغطه اتغطه
رفع راسه گال
ذياب،، اكو ارواح شريره تفتر بالغرفه بليل
غصون،، هو اني جبانه انوب حجه هيج دار وجها ونام اشوفه وجها يضحك
هو نام واني ضليت عيني تفتر خايفه
للفجر يالله غفيت وهو نايم خوفني وغفه
ثاني يوم الصبح رفعت راسي ذياب ماكو ماموجود بالعرفه رجعت حطيت راسي ع المخده بعدني نعسانه
انفتح الباب دخلت عذراء نهضت من شفتها عينها ضلت على فراش ذياب بالگاع مفروش
وبسرعه لگفت السالفه گالت
عذراء،، يعني لسه كل واحد ينام وحده؟
غصون،، عدلت گعدتي
عذراء شتردين؟
عذراء،، ماريد شي مجرد حطيتج براسي
لان المثلج ماتستاهل اتكون مره ذياب
انتي وين ونور وين شجاب لجااب؟
غصون،، اتقربت يمي دنگت المستواي رفعت اصبعها بوجهي
عذراء،، والله ثم والله لسوي بيج سوايه بسيطه بس اصبريلي
غصون،، عافتني وطلعت هسه هاي شبيها المفروض تفرح لخوها لاواحد حاجي وياها لاواحد غاثها الها ولحالها خابصه روحها وتتوعد
حسيت من كلامها انو راح توگعني بمصيبه
اجه ابالي احجي لذياب عن سالفه التسجيل السجلنه الي هي ونور بس گلت لا خاف مايصدگني
لان هنه مسجلاتني اذا سمعن التسجيل لذياب اكيد يصدگ بيهن لان اني بعضمه الساني اعترفت الهن احب ابن عمي
عزاا العزااني شسويت بروحي لوساكته احسن
احس بروحي تعلقت بي بس
خايفه لان ماعندي فكره عن الزواج
گمت من مكاني مغندبه خربت نفسيتي عذراء
من الصبح
لميت فراشه حطيته على صفحه
عدلت شعري وفتت للحمام غسلت ونزلت يمهم كلهم گاعدين صبحت عليهم وگعدت
دگ موبايل عذراء رفعته جاوبت وهي تنهض من مكانها راحت للاستقبال تخابر
ذياب يتريگ باوعلي رفع حاجبه ودار وجها لعمتي
ذياب،، يمه صار كم يوم ابوي يفتر بغرفتي
غصون،، اشرب جاي وحجاها غصيت احس الجاي طلع من خشمي
باوعلي مامهتم دنگ اخذ استكانه يشرب
ام ذياب،، اسم الله يمه شكو؟
ذياب،، ماادري حجيه البارحه گوه نمت كل ماارفع راسي اشوف ابوي واگف بالغرفه يمكن هاي روحه نايمه بغرفتي
غصون،، هو يحجي واني بگت طن هوه من الخوف
عافنه ونهض اجت عذراء گالتله اخذني وياك لعيالي
بسرعه لبست ابنها وحضرت نفسها هو ينتضرها بالسياره
راحت تحسها فرحانه
رجعت يم عمتي ردت اصعد للغرفه اخاف اشلون طلابه هاي
انضف بالبيت واتلفت منا ومنا خايفه كل شويه اگول راح اشوف الروح گدامي
ذياب الضهر مارجع واني ابد ماصعدت ضليت يم عمتي خانسه
حتى الضهر نمت يمها
العصر ردت افوت للحمام واني اسبح يتخايلي افتح عيوني اشوف واحد گدامي
سبحت اشلون ماجان وطلعت اركض
بليل رجع متعشي ضلينه اني وعمتي تسولف على ايام قبل واني مسنحه يمها هو گال تعبان اريد انام عافنه وصعد
اخذتنه السوالف اباوع الساعه صارت 12ونص بليل
وام ذياب صارت تحجي وتغفي وترجع تفز
تالي عفتها وگمت اريد اصعد انوب شيصعدني الدرج واني خايفه؟
مديت راسي من باب الغرفه البيت صنننته
رجعت ندست ام ذياب گتلها عمه اوگفيلي بالباب بس خل اصعد اخاف وحدي
خطيه نهضت گوه تمشي نعسانه واني طگيتها ركضه للغرفه فتحت الباب الضوه مطفي مشغل بس گلوب النوم وضواه احمر خفييف
ربي دخيلك عبالك مهيئين الجو حتئ تحضر الارواح
رحت للچربايه نمت رفعت راسي ذياب موكلش مبين ملامحه بس من هدوئه مبين نايم
حطيت راسي ع المخده وغمضت عيوني حيل ردت بس انام حتى ماافكر بس منين يجيني النوم؟
نص ساعه بمكاني ساده عيوني حيل
بس من سمعت صوت ذياب فتحتهن على وسعهن
ذياب،، ها يابه اجيت؟
غصون،، اريد اتحرك مااگدر رجليه ثگلن والساني خدر على ساعه يسكت گلبي
احس دگات گلبي تركض ركض من سرعتها
وبلحضه نهضت ركض لذياب رفعت الغطه ونمت بصفه حضنته كل قوتي دفنت وجهي بضهره احس ابو صاير وراي وراح يلزمني
من خوفي ادفع روحي حيل لزگت بضهره كلش
اسمعه يحجي واتسودن
ذياب،، اي بويه ضل يمي لاتروح بروح موتاك
غصون،، دار وجها التفت الجهتي واني مستمره ادنه يمه اتمنه اضم روحي بين ضلوعه من الرهبه
حط ايده جوه راسي والايد الثانيه لمني الحضنه
باس راسي
ذياب،، رحمه على روحك حجي
غصون،، ولاابالي شي غير الخوف
شويه شويه احس الاخ لمساته بدت تتجرأه
بس اني ووين يالمسات ياعزه كل فكري يم ابو ذياب
لو شيصير مااحس بروحي
بس من بده يتعمق بلمساته دفعته
ذياب،، تره يجيج ابوي استچني
غصون،، حاول راد بس هواي صديته تالي عافني ونهض من مكانه اتحسه راح ينفجر راح فتح الضوه
ذياب،، شنوو. مشكلتج فهمييني؟
غصون،، غطيت راسي ابجي رفع الغطه بقوه شمره
جر ايدي گعدني
ذياب،، اگعدي احجي وياج
لاتبجين فهميني ليش تصديني؟
غصون،، دنگت ابجي مااعرف شنو اجاوبه
ذياب،، مارايدتني؟
احجي ياامه الاسلااام لاتسكتيين
غصون،، ضليت ساكته اشهگ بالبجي
ذياب،، هذا هو وصل جوابج
غصون،، مااگدر احجي وهو هم فسر سكوتي جواب لسؤاله ردت اگله مااعرف شي وماجاي افهم شتريد مني بالضبط بس استحيت وسكتت ودموعي فضحني
عافني وطلع اول مره اشوفه بقمه عصبيته
بليلتها مارجع للغرفه نام جوه واني هم ماگدرت ابقه وحدي نزلت يم امه جريت بطانيه ومخده ونمت بدون افراش
ثاني يوم من گعدت مالگيته موجود استغربت اول مره يطلع من الصبح
مارجع للعصر سبح ونام
بليل گعد بدل وطلع
ومن يرجع ينام بالاستقبال واني يم امه حتى هي سألتني گتلها هيج مشكله زغيره وهي من النوع المايدخل حتى من تحجي على زعل بناتها اتگول بيناتهم مره ورجال يزعلون ويتراضون شعندي مدخله روحي بينهم
ذياب تغير وضعه تماما واكثر وقته مايتواجد بالبيت
وجوده وعدم وجوده واحد حتى من نتشاوف صدفه مايباوع بوجهي يتجاهلني
ايام مرت وهو هذا وضعه صرت أفتقد ضحكه وسوالفه وحنيته واتمنئ يباوعلي نضره وحده
تعبت اعصابي وقررت احجيله شنو المخوفني؟؟ وحتئ على سالفه عذراء ونور ردت احجيله
انتضرته بين مايرجع بس متوتره لكن شوگي اله يخليني اتشجع
العصر سبحت ولبست احلئ ثوب عندي ورتبت شعري
بلكت يرجع مثل قبل
بليل اجه وره العشه اني يم امه گاعده وگف بالباب
سلم على عمتي وگال غصون تعاي
روحي طارت من الفرح من سمعته يحجي وياي
صعدت وراه فتحت الباب شفته گاعد ع الجربايه رجلي بالكاع وساند ادي على جوانبه منا ومنا
رحت وگفت گدامه ميته خجل ردت اگله خلص وعد اقبل بكلشي تريده مني
بس انصدمت صدمة عمري من مد ايده شغل الموبايل سمعني تسجيل صوتي واني اگول احب ابن عمي بس انجبرت على ذياب مثل ماهو انجبر عليه
نشف الدم بعروگي
عيونه حمر دم اشرلي بعيونه ع الموبايل
ذياب،، الهذا السبب ماترديني؟؟؟
يتبع
