رواية يتيمة المشاعر الفصل الرابع والعشرين 24 بقلم الكاتبة نور ال زيادة
يام: اصعب ايام حياتي هو اليوم شفت بهل يوم ألم وانكسار اختي كدام عيني ومن اقرب الناس ألنا
والمشكله ماكو شي بيدي اسوي كنت من اشوف حالها اموت الف موته، لكن ماتصورت، بعد كل هذا هي ألي تموت مااتخيل حياتي بدونها…
گلبي محروگ عليها، بعدها شابه ماشافت شي من حياتها،
افكر ويا نفسي شنو القادم شنو راح يصير بعد ؟
كل هل الكلام يتردد بذهني وأني اباوع على الدم ألي مله ارض الغرفه،،غرفة نورزان ألي حبسوني بيها بعد ماأخذوها وراحوا للمستشفى
ضليت ادعي ربي يحميها وميصير بيها شي
اعرف ألي سوته اكبر غلط بس ماحسيتها كانت بعقلها وصلوها درجة تهسترت وفقدت عقلهه خبلوها رسمي لأن نورزان متسويها وهيه بعقلها
اعرفها انسانه مؤمنه احسن منه كلنا
من هي وصغيره تصلي وتصوم وحتى هي وتمشي بأي مكان تقدم المساعده للناس حتى يوميتها كانت تنطيها للمحتاجين
اني اعترف مو مثلها ولا حتى زيد لأن احنا ماكو احد علمنا وحتى الصلاه نورزان علمتني،بس اني اصلي واقطع مو مثلها ملتزمه
نورزان علمها رافي من هي وصغيره،رباها على أيده كل شي تعلمته بحياتها كان عن طريقه لأن فعلا امي وابويه يعاملوها معامله مختلفه عنه من كنت صغيره كنت افرح من اشوف امي وابويه يفضلوني عليها كنت عقلي عقل طفله
لكن من كبرت ووعيت فهمت الأمور وعرفت تفكيري غلط واهلي هم تصرفاتهم غلط كان المفروض ميفرقون بينا تصرفاتهم جبرتها تروح تبحث عن الحب والأهتمام والأحترام يم غيرهم ورافي كان هذا الشخص هو ألي قدملها كل هل الأشياء احتواها ولوما هو يمكن كان صارت نورزان عباره عن أنثى مليئه بالعقد النفسيه وحاقده على كل الناس وأولهم احنه
اااخ يارافي وينك؟ تعال شوف شنو صار بحال نورزانتك وعزيزة گلبگ لو شايفها بدمها شنو كان صار بيك يمكن يموت لو شافها بالمنضر ألي شفتها بي
لوبس تدري شنو سووا بيها ولوين وصلوها حتى طلعوها من دينها
قررت اكوم اتوضى واصلي وادعي ألها وان شاء الله نذر عليه بس ترجع سالمه مااترك صلاتي ابد
*****
نورزان: فتحت عيوني بتعب احسها وارمه من البجي ومجرحه لكيت نفسي على سرير بالمستشفى وأيدي ملفوفه بشاش طبي
ومعلكيلي مغذي
ألتفتت شفت امي موجوده هي وزيدمن شفتهم تذكرت كل ألي باوعتلهم بغضب شكد كرهتهم،
صرت اشوفهم وحوش موبشر
بلحضتها اجتني لحضة ادراك وتذكرت اني شنو سويت بروحي؟ وين ايماني؟ وين خوفي من رب العالمين؟
تكلمت بصعوبه ،….
_حسبي الله عليكم، وصلتوني حتى اغضب ربي
زيد: يمه بله زحمه روحي صيحي الدكتور
عندي كلام ويا اختي
نورزان: ههه،،، اخته لا ومصدك روحك،
لك اني مااتشرف بواحد مثلك يصير اخويه
امي طلعت من الغرفه حتى ماباوعت عليه نفذت كلامه من دون نقاش وكأنما ساحرهم يمشون ورا مغمضين عيونهم
زيد: والله لو ما الناس چان عرفت شلون اخليج تتشرفين بيه خلي أبالج اخاف عبالج من تموتين نفسج راح تخلصين،؟
لا حبابه لو ميته اول شي اخلي المايتسمه الحبيب يلحگج لاسجن ولاشي طلقه بالراس وأخلص منه بطلي هاي تفاهتج حتى الموت ميخلص رافي من مصيره اخاف عبالج تريدين تحمي بهل طريقه ؟
لا غلطانه،،،، تتزوجين حسام وحلكج متفتحي لأي احد، وهسه يجي الدكتور يسأل ديري بالج تطلع حجايه جري عدل ،،،اصير عدل وياج وأي غلط، كولي رافي في خبر كان
نورزان: اي مو هيه بهل بساطه؟ انتحار يعني سين وجيم وشرطه
زيد: اي ترا اعرف كلش زين وحتى أئكدلج اني مو قليل كلها فضيتها ماكو اي اجراءات حتى تعرفين
اخوج مو قليل
نورزان: ماكول غير حسبي الله ونعم الوكيل لتتصور خلصت ونفذت ألي تريده لتنسى الله موجود وهو ياخذ حقي منك
ابتسم مستهزء بكلامي… حتى الشيطان يخاف ويحترگ من نذكر اسم الله والله صار عندي فضول اعرف هل شخص من يا فصيله
دخل الدكتور للغرفه هو وممرضه ويا اباوع هذا الطبيب شاب ثلاثيني يطلع بكد رافي، تذكرت رافي ونزلت دمعتي
الدكتور طلب من اهلي يطلعون برا زيد خزرني وطلع هو وامي
الدكتور : اني دكتور خالد ألي سويتلج العمليه
شلون صرتي شتحسيين ؟ شلون وضعج؟
نورزان: زينه بس ايدي توجعني
د، خالد: اي اكيد هاي عمليه مو لعبه،جرحج عميق
هسه اخليهم ينطوج مسكن ويروح الوجع
اسمج نورزان مو؟
نورزان: اي،، نعم
د.. خالد: نورزان وضع ايدج يدل على محاولة انتحار واهلج نفوا هل شي وأني صراحه مامقتنع بكلامهم أحجيلي الحقيقه اني اكدر اساعدج،
نورزان؛ كان جوابي السكوت وبس دموعي تنزل
د..خالد: احجيلي شنو الصاير اهلج يكولون بالغلط صار هل شي كوليلي بنيه مثلج ماناقصها شي ألي افتهمته تدرسين صيدله ومن عائله مرتبه وماشاء الله عليج ماناقصج جمال ومخطوبه حسب ماافتهمت يعني ماكو اسباب تخليج توصلين لهل مرحله ساعديني واحجيلي حتى اساعدج لأن اني مامقتنع بكلام اهلج وواجبي الأنساني يجبرني من اشوف شي غلط مااسكت عنه
نورزان: دكتور كلامهم صح اني عندي كل شي
بس ماعندي اهل بيهم خير عايشه بنص ناس مجرده من الانسانيه ذيابه تنهش بيه
د.. خالد: شنو ألي سوا؟
نورزان: ميفيد الكلام لأن صدكني ماكو احد يكدر يساعدني لاانته ولاغيرك اني هسه محتاجه بس رحمة رب العالمين وبس
د، خالد: زين،، انتي حسب كلامج مؤمنه وتذكرين الله لعد ليش حاولتي الانتحار؟
نورزان: غلطت ماكنت بوعيي بالغلط صار هل شي
د، خالد: راح اقتنع انو انتحرتي بالغلط بس انتي صاير عندج انهيار عصبي، تدرين صارلج٢٤ ساعه نايمه
نورزان: اني نايمه كل هل وقت؟
د، خالد: ههه يعني عفتي كل كلامي واستغربتي هلكد نايمه،
نورزان: حاولت اغير الموضوع حتى ليضل يلح بأستجوابه وأخاف اضعف واحجي كل شي لأن اعصابي تعبانه وهل شي مو بصالحي لهذا جاوبته بتفاهه…
_موعلى شي بس المسلسل ألي متابعته مالحكت علي ومتواعده ويا صديقتي نطلع هم راحت الطلعه هواي مخططات خربت خلال هل ٢٤ ساعه
د.. خالد: انتي مصيبه الضاهر ماراح اخذ منج لاحق ولاباطل صدكيني اني مو قصدي اتدخل ردت بس اساعدج….اني بحكم وضيفتي هواي حالات تمر عليه واساعدها وانتي احد هاي الحالات
نورزان: شكرا دكتور وممنونه منك،، يكفي انته شخص غريب وحسيت بيه اكثر من اقرب الناس ألي لكن صدكني ماكو احد يكدر يساعدني
اني الوحيده اكدر اساعد نفسي
د، خالد: على راحتج واذا تريدين اكدر احولج دكتوره نفسيه تساعدج،،، شتكولين؟
نورزان: شكرا ألك مااحتاج لأن هم ماراح تغير شي…واقع مفروض عليه ولازم اعيشه واتقبله
فحص ايدي وخلتلي الممرضه مسكن وطلعوا
_ردت بس شخص واحد استنجد بي حتى يساعدني قبل كم يوم ومالكيت وبعد مافات الأوان
اجاني الغريب يحاول مساعدتي واعرف اذا دخلته اورطه واورط نفسي لاأكثر لأن خلص الموضوع محسوم وما كو حل
اليوم قررت اختار،، صح الاختيار كان صعب
لكن حياة رافي بالنسبه ألي اهم من حياتي
ولو هو بمكاني ماكان فكر ولو لحضه وكان اختارني
اصلا سواها سابقا كم مره وكف ويايا واهمها بموضوعي ويا امير
اعرف راح اخسره للأبد واعرف راح أئذي
بس اكيد راح يجي يوم وينسى ويعيش حياته
وهذا اهم شي عندي يعيش،،،، واني ألي الله
ضليت بالمستشفى لحد ثاني يوم والدكتور خالد
المشرف على حالتي هواي اهتم وساعدني صح استغربت سر هل الأهتمام الزايد لكن بعدين فهمت من الممرضه سامع امي وزيد وفاهم الموضوع تقريبا،لهذا تعاطف ويايا وحاول يساعدني
صحتي تحسنت والمفروض يسجلولي خروج اجه يچيك وضعي قبل ليسجلي خروج و سألني
د.. خالد:وضع ايدج ممتاز لكن هل فتره حافضي عليها ممنوع يوصل ألها مي وسجلتلج علاج تاخذي بوقته ميحتاج اكلج تفاصيل العلاج بعد انتي صيدلانيه وتعرفين
نورزان: شكرا دكتور ماقصرت ويايا
د..خالد:ماكو داعي للشكر هذا واجبي،،،، هذا بالنسبه لأيدج وبالنسبه لصحتج النفسيه اريدج تبتعدين عن اي ضغوط حتى لتتكرر هل حاله عندج مره ثانيه ولو اذا عندج اهل مثل هذوله مين ترتاحين ماشاء الله مافيات وكاعدين يخططون الام والابن
نورزان؛ سمعتهم وعرفت كل شي موو؟
د.. خالد: سمعت يريدون يزوجوج وواضح هل شي غصب لكن لابد اكو حل او تكدرين تطلبين من شخص قريب يدخل ويمنعهم
نورزان؛ مع الأسف ماكو حل ولااكدر اطلب المساعده من احد مجبوره اوافق وألا شخص عزيز على گلبي ينضر وأخسره للأبد واني مستعده اموت ولا يصيرله شي
د.. خالد: هيج مهم عندج هل شخص الى درجة تضحين بسعادتج علموده؟
نورزان؛ اعز من روحي اضحي بعمري كله مو بس سعادتي علموده
د..خالد: والله عمي هنياله عليج
نورزان: على شنو تحسده وهو كل مصايبه بسببي
د.. خالد: اذا هيج الكلام اسحب كلمتي وراح اكول الله يساعدج ويسعدج والله يكون بعونه
نورزان: شكرا دكتور هواي شكرا تصرفك خلاني احس الدنيا بعدها بخير ومو كلها ذيابه
رجائي عندك تنسى ألي سمعته وتتكتم علي
د…خالد:لاشكر على واجب وبالنسبه لموضوعج اكيد ميطلع هاي اسرار مرضى
نورزان: سجلي خروج رغم هل شي صار العصر لكن اهلي طلعوني ب الليل بساعه متأخره
اعرف ليش هيج سووا حتى ماكو شخص يشوفني
وصلنا لبيتنا نزل زيد يفتح الباب حتى يدخل السياره باوعت على بيت عمو نبيل، تمنيت ألمح رافي لأخر مره لكن كانت الساعه متأخره وماكو احد بالشارع
بلحضتها تسائلت ويا نفسي معقوله ماحس ولاسأل عليه كل هل فتره؟
اول مادخلت البيت استقبلتني ريام خطيه حالها مو احسن من حالي وجها اصفر وشكلها وحده مرعوبه اخذتني من أيدي تمشيني
باوعت على ابويه صح ماوصل يمي لكن شفت بعيونه خوف وندم لكن اجه هل ندم هواي متأخر
وماعاد أله لازم لأن ألي يندم يكفر عن غلطه ويتراجع عن قراره وابويه مصر على قراره للأن
، من هل دقيقه صرت جسد بلاروح خلص روحي راحت نورزان ماتت بقت بس جسد
ضليت لااكل ولانوم ضعفت اكثر، كل شويه اتخربط ويجيبون المضمد يخليلي مغذي، والكانونه مقيمه بأيدي
وراها بعد تهديدات زيد وتحذيرات امي وابويه
اجه حسام وأهله رحنا عقدنا،بالمحكمه اول مارجعت تخربطت ورجعت ساءت حالتي
ضليت على هل الحال الى ان اجه اليوم
المشؤوم
الناس تفرح بيوم عرسها امااني هذا يوم موتي
طبعا كل شويه قبلها يجي زيد يحذر ويحجي
وامي عود جايه تعلمني بالخير بالتالي صارت ام وتعلم، تريد تعلمني امور الزواج وحقوق الزوج وشلون اراعي زوجي شايله هم نسيبها التحفه
هنا متحملت طلعت ضيم گلبي بيها حتى صوتي ارتفع عليها لأن زيد وافتهمت شنو يريد لكن هاي امي والمفروض تحس بيه ماكو مبرر على افعالها ويايا
هوست وعيطت وحجيت وكل شي سويت بالأخير جاوبتني بكل برود وطلعت
ام زيد؛ انتي وحده مخبله وعار همزين لكيتيلج رجال ياخذج ونخلص منج
جمله كانت بسيطه بالنسبه ألها من كالتها اما بالنسبه ألي فكانت خنجر نبت بنص گلبي
على اثرها من حرگت گلبي دعيت عليهم وتحسبت
اجه موعد العرس بيوم الحنه ماسوو اي شي تحججوا للأقرباء تعبانه ووضعي الصحي ميسمح،
خطيه مهتمين لصحتي ولو على أساس لو مسويلي راح يتغير شي
********
سمر
_
مر كم يوم على كلامي اني ورافي ونورزان ماكو
ورافي متشعوط كل شويه يريد يروح لبيت ابو زيد وأمنعه
اخر شي ماتحمل كلي…
رافي: اذا ألي خاطر عندج روحي انتي والبنات بحجة زياره شوفي الوضع لأن مامرتاح مامعقوله لسه هي بيت جدها
سمر: صدكني راحت براء كالت ام زيد البنات مو هنا،للأن مارجعن
بس مع ذلك راح اخذ امي ومنال وبراء زياره ألهم وندخل للبيت حتى نتأكدبنفسنه
.
.
_رحنا واستقبلتنه ام زيد بس وجها كان ثكيل
ماحسيتها مثل كل مره،
من دخلنا لكينا ابو زيد هم موجود كعدنا شويه وسألت على البنات ابو زيدجاوبني كال…
ابو زيد: البنات يم بيت جدهن
كعد شويه واترخص ضلينا نسولف وياام زيد صارت تبرر
ام زيد: البنات راحن لأن عرس بنت عمتهم
واخذها ابن عمهم يعني من الجهتين، كرايب
وكلت للبنات روحن تونسن وساعدن بنت عمتجن
بالتجهيزات منا للعرس،
براء:زين خاله اشو اتصل على ريام جهازها مغلق
ام زيد: اي مو جهازها انكسر، قبل لتروح كلنا من ترجع نشتريلها جديد وبعدين هنه هسه سوالف ولمه بنات اكيد مو بحال تلفونات
ام رافي: اي شكو بيها خصوصا انتو بعد تصالحتوا ويا بيت عيالج ولازم العلاقات ترجع تقوه
ام زيد: اي عفيه
سمر: ام زيد شصار بموضوع خطوبة نورزان
شلونه خطيبها؟
ام زيد: الحمد الله، من رخصتكم دقيقه اطلع هدوم لأبو زيد لأن راح للحمام، ونسيت اطلعله
سمر: تهربت من الموضوع وراحت ساعه وهي ماكو كاعدين وحدنا نصفن واحد على الثاني اخذنا على نفسنا وقررنا نطلع، من وصلنا للباب يله رجعت شفناها لاأعتذرت ولابررت بس كالت
ام زيد: الله وياكم وسلمولي على الكل
.
.
هذا كل ألي صار باع رافي الضاهر صدك هنه بيت جدهن البنات لأن ماألهن حس بالبيت
رافي: ليش ماقانع
سمر: ولااني صراحه بس هذا مو حل شوف حالك شلون صاير صار فتره وضعك ابد موطبيعي حتى شغلك هامله اكلك هامله وانتبهت صاير تدخن
رافي: سيف كلج موو؟ هذا حاطي جاسوس يمي
سمر: ياعيني غير نهتم لأمرك ولصحتك وانخاف عليك انته بحياتك مامدخن تخاف على صحتك
هي فتره وتمر وتصير سوالف وتصير نورزان ألك ونفرح بيكم
رافي: مااعرف ليش بديت احس هذا حلم بعيد
لكن مابيدي غير انتضر رب العالمين يساعدني
لأن فعلا والله مااكدر بدونها
المشكله ، اني هنا مشعوله صفحة الخلفوني وهيه دتغير جو وتتونس ببيت جدها وحتى متتصل معقوله متكدر نهائيا؟ معقوله ماكو وقت فراغ عدها تفكر يمكن رافي مشغول باله معقوله هيج هنت عليها؟اني هنا ميت واكل بروحي اكل وهي ١٠دقايق من وقتها متكدر تتصل تطمني عليها
سمر: كلامه صح واني هم مامطمئنه بس مااكدر اخوفه هو ألي بي مكفي
،بيومها بتت يمه بالبيت مالته وثاني يوم كاعدين اجا مسج من نورزان فرح وطفر من مكانه بلهفه
وراها تغير شكله…
كتله شكو؟؟انطاني الموبايل قريت الكاتبه
(هلو رافي، اكتشفت ابوك، حاجي ويا امي كايل ألها ابعدي بنتج عن ابني ولهذا امي كلبت عليك وعليه هم وصراحه حقها ولهذا همه بكل الاحوال رافضين ننجمع واني اكول الحرب ألي نهايتها الخساره الافضل منخوضها، لااهلي ولااهلك موافقين واني هم تعبت من المشاكل، فخلي نأجل كل شي الى ان الكل يهدء، وهل الفتره منتواصل، لأن اني هم كرامتي انمسحت بالارض من ورا كلام ابوك)
سمر: شنو معنى هل الكلام؟
رافي: مو كتلج احس اكو شي،احس نورزان مو هيه نفسها دتتهرب وتتحجج عليه، وتكوليلي لتضوج ولتخاف،،، زين بنضرج هل الكلام يطمن؟
سمر: وشنو الحل؟
رافي: مااعرف بس ليش دا احس هذا مو كلام نورزان
سمر: انته دائما تبرر افعالها ، اتركها فتره مثل متريدخلي نشوف شنو تاليتها وياها،
سكت بس حسيته يريد ينفجر وحقه الوضع كله موتمام
مرت ايام والحال مثل ماهو ونورزان ماكو خبر
نتصل ماكو رجع جهازها انغلق،
و رافي يكلي مامرتاح، احس نورزان بيها شي،
روحه لايبه عليها
رجعت لبيت اهلي، الاربعاء اجانى اتصال من ام زيد
كلب كل الموازين
كانت صدمه ،بكل ماتعنيه الكلمه من معنى ماعرفت شنو اسوي
اتصلت تعزمنا على عرس نورزان ألي هو الخميس
يعني باچر، من حركة گلبي كعدنه اني وامي تكابلنه نبجي،
خطيه البنات مروه ومنال وبراء، هم شبعن قهر
كلتلهم…
_هسه فهموني شنو راح نسوي؟شنوراح اكله لرافي؟زين شلون راح يستقبل الخبر؟
اني من نورزان راسلة رافي اخر مره وقريت كلامها كلت استسلمت ووكفت ويااهلها وخلص باعت رافي
حبيبي هو چان حاس وروحه لايبه طول الوقت يكول مامرتاح،
مروه: خلي احمد وسيف يروحون يمه ليروح يوصله الخبر وهو وحده هناك،اذا ماسامع يبقون يمه يلهو لحد ما شويه شويه يوصلوله الخبر
سمر: اي هم صح، بس والله خايفه
منال: لتخافين رافي جبل ميهزه ريح يضوج شويه
وينساها هي باعته ورافي كلشي ولاكرامته
ام رافي: يمه يابعد عمري هاي تاليتك، اخذوا عزيزة گلبك منك،،، ااااخ يانبيل كله سببك
شحجي وشدعي عليك وانته ابو بيتي
منال: يمه كولي ياالله كل شي قسمه ونصيب
سمر: ناس تهدء بناس واني افكر شلون راح انهدء رافي وشلون نوصله الخبر،، وصلنه الصار للولد وهمه راحوله لبيته
*****
سيف: هسه شلون شنو راح نسوي؟
احمد: خلي نروح يمه هسه والباجر نمهدله الموضوع، وبعد باجر نكله يكون خلص العرس وراحت،حتى لتصير مشاكل، شنو بيدنا هي اختارت طريقها
سيف: وصلنا لبيت رافي العصر، استقبلنه …
رافي: ياهله اليوم ثنينكم يمي، شكلكم مطرودين
وجايين يمي
احمد: اي اني مرتي طردتني تكول صاير تشخر
واني اضوج من الشخير فتعاركت وياها واجيت
انته مو تكول هذا بيت الچنايين الزعلانه؟
رافي: هههه ضحكتني واني مالي خلك،
ولك مرتك حامل هي مال تتزعل وياها،
كلها فتره قصيره وتجي بنتك شويه اكبر
احمد: لاوالله يعني شنو حامل مجبور اتحمل خبالها،، تريد تقنعني انته عندك عادي، تتحمل والله شنو حامل؟
رافي: اااااخ هيه هسه خلي تصير بس ألي، واني مستعد مو اتحملها من تصير حامل وتتخبل عليه
حتى اتخبل وياها،، ياربي هم يجي هل يوم ؟واحس بهل شعور وانتضر طفل منها؟
(ها خيركم اشو واحد يباوع على الثاني،اكو شي؟)
سيف: ها، لا هيج بس مستغرب من كلامك
يعني رايح زايد زواج وجهال، هو انته وين تحب الاطفال؟
رافي: كل شي ويا نورزان احبه
سيف:همست ويانفسي…. ياربي هسه هذا شلون راح نوصله الصار
ثاني يوم للضهر واحنا نحاول نريد نمهدله الموضوع لكن ، اجا اتصال من وسن كلب كل الموازين
_عطت بي… لترد عليها خلي تولي
رافي: هاي شبيك تصيح طبعا مارد على هل حيه
سيف: ارتاحيت لأن اعرف خباثة وسن يجوز واصل ألها خبر وتريد تغثه
وراها وصل مسج على جهاز رافي فتحه وطفر من مكانه،،، عاط بصوت عالي….
رافي: لااااامستحيل،!!! كذب،!!! نورزان متسويها بيه
سيف: شبيك رافي شنو صاير؟
رافي: وسن ارسلتلي رساله تكول بيها
(اليوم عرس نورزان اكيد باركتلها موو؟ بما انو انت عمها)
سيف هاي الحقيره تريد تغثني مووو؟
سيف: اهده رافي، ماكو داعي للعصبيه
رافي: لك شهدددده،؟؟؟؟ انته مستوعب الكلام خلي اتصل على نورزان احجي وياها
اتصل عليها بس كانت ايده ترجف بقوه
رافي:شنو السالفه جهازها للأن مقفل
سيف: رافي بس اسمعني، خلي احجي وياك
احمد: هدي روحك، واسمعنا
رافي: شوفو انتو من اجيتوا واني ماارتاحيت لوضعكم احجوا بسرعه لأن أعصابي منتهيه
احمد: رافي نورزان متستاهلك، اختارت اهلها
ووكفت وياهم …ويعني اليوم….اليوم،،، فعلا عرسها
سيف: من حجه احمد هل الكلام رافي صفن بوجهنا
رافي: انتو تتشاقون موو؟ نورزان متسويها؟
سيف: مع الأسف سوتها، يااخي باعتك وانته هم بيع ألي يبيعك
تصورت راح يكسر ويفلش ويغلط ويلطم لكن ماسوا أي شي من هذا اخذ تلفونه وفات للغرفه بكل هدوء مو مثل ماتصورنا،ضلينا اني واحمد واحد يباوع على الثاني
*******
نورزان: اليوم يوم العرس وبالنسبه ألي يومي
المشؤوم،
من الصبح جابو بنات اثنين يشتغلن بالصالون، اني هنا تخبلت، مااريد حتى ارتب نفسي
كل عقلهم، حاسبيني عروس طبيعيه ولازم ارتب نفسي،للأستاذ حسام
طردتهم من الغرفه، اجاني زيد بلش تهديداته
وصحاني على واقعي المرير، لازم اتقبل كل شي واسكت من كد القهر والألم احس گلبي تجمد
صرت مثل لعابه ويمشوها مثل ميريدون بدون مشاعر،
ريام هي سبحتني، وحضرتني وهذني البنات
بلشن يسرحن بشعري وحده ترتب شعري والثانيه تخليلي مكياج،
يخلولي مكياج ويسيح بسبب دموعي اللبنيه ضاجت بس ساكته تخاف لااطردهن مثل اول مادخلن
خلصني، باوعت على نفسي، طالعه، عروس حقيقيه رغم التمثيليه ألي داامثلها
اسمع جوا المعازيم اجوي، واني تعبانه والدنياطالعه من عيني،وحيلي وجسمي كله يرجف،
نزلوني جوا، وكلها اول ماشافتني صلو على النبي، وبدت المباركات
اني بغير عالم، كاعده وانتضر موتي يجي ياخذني
مو زوجي جاي ياخذني،
تفاجأت بجية عمه ام رافي وبراء باركلي بس نضراتهن كلها عتاب
شويه واجت سمر حتى ام رافي تفاجأت بجيتها الضاهر ماكانت ناويه تحضر، سلمت وباركتلي
بس وجها ثكيل
شويه وأجاها اتصال تكلمت بالموبايل واجت عليه
سمر: هذا الأتصال ألج اكو شخص يريد يباركلج
على زواجج
يتبع….
