رواية الشيطان اختي الفصل الثالث 3 بقلم انين الليل

طال الانتظار والصبر قد مل مني

وقلبي تحجر والعيون كرهتني

صبرا ياحياتي كنت انوي رحيلا

ولكن بلحظة خاب جميع ظني

ساورتني الظنون والدموع رفيقا

في صباي وعند الكبر أتعبتني

أيها الباكي لو تعلم سري

والله ما بكيت الاحزنا لأني

قد قتلت نفسي ولازلت حيا

ودفنت روحي وانفاسي فضحتني

/////||/////////||//////|||/////////////||//////

البارت الثالث

ضياء

ر حت للفاتحه وتلكاني محمد اخو هيفاء وإخوتها الباقيين احمد وعلي ولاگاني ليث ابن اختها وسجاد ابن محمد

ليث حضني وصار يبجي لان هيفاء بعد وفاة اختها هي ربته وصارت تصرف علي من راتبها وحتى من تزوجنا

هي ما عافته الليث هو خوش ولد ومكمل أكاديمية فنون قسم رسم لذلك فتح هو وابن خاله سجاد ورشه للأصباغ

والسقوف الثانوية بمساعدة هيفاء

الحزن مخيم علينه وانا كعدت بركن وانا لابس نظارات سوده لكن رغم هذا ما گدرت احبس دموعي

چنت أتمنى ان يكون الهيفاء ولد وهسه يأخذ عزاها أمام الناس هذا الشئ آذاني تدرون إذا الواحد عنده

ولد أو بنت يعني عنده عزوه

وهيفاء انحرمت من الأمومة والسبب أبوي

أبوي الي كل ما اتذكر الي سووا أكرهه لكن من اتذكر وصيته ودموعه وندمه انقهر

اجه يمي محمد وهو يگلي

محمد //أبو جعفر على كيفك احنا مقدرين الشئ الي تمر بي بس أنت

تعبت هواي

انا باوعتله ومسحت دموعي وكتله

شتعبت اني محمد هيفاء هي الي تعبت واتاذت

محمد //وانت ما قصرت لكن القدر أنطى كلمته والله سبحانه وتعالى

اله بيها حكمه وأراده

:: لا آله الا الله أبوسجاد ارجوك لا تقصرون باي شي

محمد //والله ضياء كل الي گلت علي سوينا بس أنت ما يراد هلكد تدز فلوس تره احنا هم اخوتها وهي الها علينه حق

انا باوعتله :: محمد هيفاء زوجتي ومسؤوله مني والي أنطيته قليل بحقها ……اتحسرت وصفكت أيد بالثانية ……

لو شسويلها ما اوافيها

بقيت الحد الليل وانا استقبل وياهم الناس شكد شفت ناس من منطقتنا القديمة اجو للعزاء بالليل محمد گلي

محمد//ضياء روح ارتاح لان انت كلش تعبت

سلمت عليهم وطلعت ويه أبو منتظر الي من الظهر بقى وياي وطلعنا

وهو يگلي

ابو منتظر//وين نروح أبو نور

انا جريت حسره وكتله :: للسوك

رحنا يم المطعم وأنطيت مهدي فلوس گتله يجيب صينية كباب كبيره ونفر كباب ونفر معلاك بصينيه زغيره وياهن مقبلات

بعدين كتله

:: مهدي اطلع ليكدام بين ما يحضرهن

هو ساق بدون ما يجاوب شفت محل ملابس نزلت وخليت مهدي بالسياره وصلت كتله

:: اريد دشداشتين نسائيه

أبو المحل طلعلي مجموعه انا أخذت اثنين عريضات وردن وحده زيتوني والثانية جوزي وجواريب سود وشال

ورجعت رحنا للمطعم وأخذنا الطلبية وكتله

:: اطلع للبيت الزغير

وصلت سلمو عليه الحماية وانطيتهم عشاهم ودخلت للبيت شفت هدوء رحت بوجهي للمطبخ فتحت الثلاجة

شفتها مأكله شويه گيمر وشفت القوري تقريبا دافئ خليت الصينية وعلاكة الملابس ورحت دكيت الباب مره ثانيه

هي طلعت انا بدون ما اباوع الها كتلها :: الحكيني

ومشيت قبلها كعدت ع القنفه ورثت جكاره وهي أجت مسافة بيني وبينها ما حجت بًقت واگفه كتلها وانا اجر حسره

:: بأجر أجي وأريد اعرف كل شي بدون لا زيادة ولا نقصان

ما خليتها تجاوب وكفت حچيت وياها

:: مضطر اروح جبتلج عشا بالمطبخ وانا اسف لان اليوم ما صارت فرصه

اجيبلج غدا اتعشي ونامي وارتاحي

وطلعت هي ما جاوبت أو بالأحرى انا ما انطيتها مجال طلعت وقفلت

الباب وصعدت بالسياره وكتله :: مهدي اخذني للبيت انت تعبت وياي من امس

– – تدلل ابو جعفر انت شتحجي لا تعبت ولا ابدا

نزلت وكتله :: روح والصبح تعال عليه

وصلت لكيت نور گاعده ابحدها بالصاله انتظرتني هي من شافتني

اجت حضنتني وتگلي // الله يساعدك بابا

:: هلا بابا حبيبتي

– – شلونك بابا مبين تعبان

انا بستها برأسها :: أي والله تعبان

ابتسمت :: زين حبيبي بابا روح أخذلك حمام ونام وارتاح وإذا تريد أي شي بس

صيح عليه تلگاني يمك

هزيت راسي :: شكرا نور اليوم أجت أم راضي

– – أي بابا أجت ونظفت وراحت وانا وايه رحنا للفاتحه مرت علينه عمه سكينه

:: ها أي نسيت اسالكم

– – بابا رحنا وايه ما بطلت بچي

حاولت ابدل الموضوع :: جعفر وين ؟

– – بعده ما جاي

انا خزرت نور واتكلمت بحده : خوش رجال طالع ومخليكم ابحدكم

– – بابا توه طلع وائل موجود بالبيت

:: ويعني حبكت الا يطلع

هزيت راسي ونفخت :: اي بابا نور أنتي صيري مثل بيبيتج الله يرحمها بس دافعي وانطي اعذار

نور بابتسامه/بعد هي حبيبة گلبك أكيد تحبني على محبتها

انا جاوبتها بحسره :: نور تدرين احبج مضاعف لان أنتي تشبهين أمي بطبعج ولان أنتي بنتي

هيه حضنتني // وانا بابا اموت عليك بس ليش اليوم مبين عليك حزين

:: تعبان اليوم ما داومتي

هزت راسها // لا بابا طلبت اجازه ورحنا للفاتحه خطيه همه عطلونه ع الغدا عمه گالت

عيب لازم نبقى ونجامل

انا رديت عليها بحزن :: اي زين تسوون حتى اني هم رحت واستقبلت الناس وياهم لاتنسين احنه وياهم مثل الاهل

صعدت فوگ اريد اشوف ايه دكيت الباب سمعت وحده تحجي بصوت

مكسور //اتفضل

لكيتها نايمه بفراشها ومغطيه وجهها وهاي طريقتها من تزعل وتبقى تبجي ايه حساسه ومن جبت هيفاء الله يرحمها

حتى تدرسها وتدرس وائل ايه تعلقت بيها خصوصا وهيفاء احتضنتها وصارن مثل الصديقات اقتربت من سرير ايه

ورفعت الغطا على كيف وكتلها

:: ايوته حبيبة بابا اكعدي ادري ما نايمه

هي گعدت وحضنتني وگالت وهي تبجي //راحت ست هيفاء يعني بعد ما تجي وما أشوفها صدگ بابا

انا گوه حابس دموعي :: أي بابا هاي حال الدنيا هواي احباب لازم نودعهم

هي بقت تبچي وتگلي//بابا بس انا احبها وما استوعب شلون بعد ما أشوفها

جانت هيفاء تحب ايه ومن خليتها تجي بحجة تدرسها جانت ثاني متوسط وصادقتها وصارو يطلعون وايه ما تلبس

الا على ذوق هيفاء ودائما ايه تاخذ مني فلوس وتشتري الهيفاء هدايا وهيفاء تجي فرحانه بيهن وتراويهن الي

ايه اتعلقت بيها يمكن لان بعيده عن أمها نهايه الي اخر سنتين صارت عصبيه وما تحتمل اعرف نهايه كان

الها علم بزواجي واعرف بيها تخاف مني ما تحجي تصدگون انا كلش جاي أعاقب نفسي ليش ما گلت النهايه

واولادي على زواجي من هيفاء لان ما ردت يزعلون أو ما ردت يسمعون هيفاء كلمه ردت هيفاء تعيش وياي

بهدوء ما حبيت شي ينغص عليها فرحتها واللمعة الي بعيونها من تشوفني بحضنها

كل يوم تحسسني أنو احنا بعدنا ذولاك الشباب الي نتقابل بالختله فوك السطح والي أوصلها يوميه

للمدرسه والي ثاني يوم زواجي من نهايه طلعت من الصبح انتظرها تروح للكلية وما داومت وثاني يوم هم ما داومت

ثالث يوم انتظرتها اباب الكلية وشافتني وبجت حييل وگالت بحرگة گلب

مو عريس ليش عايف مرتك

جاوبتها وانا ابجي :: انتي مرتي وما احب غيرج ولو ما أنتي كلتيلي اتزوج على مود أبويه ما يبطلني ما تزوجت

وتعرفينهذا الشئ ولو هسه تكليلي طلگها اطلگها

هي هدئت وكلتلي //رووح يم مرتك

:: ما اروح أبقى يمج أنتي تعبانه

هي مسحت دموعها باثنين اديها وكالت //شوف ما بيه شي فدوه روح ضياء

وساعات اشوفها يم سكينه الي تعرف بعلاقتي وزواجي بيها جنت اعرف عنها كل شي وهي نفس الشي اتخرجت

واتعينت وانا ذاك انا وهي ابد ما طالبتني بشي بالعكس چانت تفرح من تشوفني هيج ومن عرفت من أبوي انو هو

السبب شفتها بالصيدلية يم سكينه وعاتبتها لان اعرف هي تدري

كالت //أي ادري بس شنو تريدني أجي اگلك وتروح تتعارك ويه ابوك ومن وراي لا والله ما اسويها

هيفاء مو صرت احبها لا اعشقها اموت عليها وره سنتين اتوفه ابوها وبس خلص الأربعينية أمي رايحه وحاچيه

ويه أمها وأسبوع رجعو الخبر اخوانها موافقين واتزوجنا چان اسعد شي بحياتي نسيت كل شي عشت كل لحظه

وكل دقيقه ردت اعوضها عن كل شي. وچنت مستعد أسويلها أي شي تريده بس هي ابد أي شي ما كانت تطلب

مني كان وجودي وياها هو الكنز الي تبحث عنه

انتبهت على صوت نور وهي تگل الآيه //ايوت حبيبي عوفي البابا تعبان وكافي خاله هيفاء راحت الله يرحمها

ايه زادت بالبچي ونور گلتلي// بابا انزل ارتاح بأجر أكيد عندك دوام

ونزلت احس بنور تعرف شي وضامته عليه رحت الغرفتي وغيرت ملابسي بدون ما أخذ حمام وكعدت ع الجربايه

وانا اباوع النفسي شلون كل فتره ادفن عزيز على نفسي ظليت متمدد اندك الباب انا كلت

فوت جعفر لان دگته مميزه هو اجه يمي گعد وگلي

– – أبو جعفر الله يساعدك

انا جاوبته :: هلا عمي اشلونك

لملم حلگه // بيها عمي زعلان عليه

:: طبعا اشلون تعوف أخواتك وتطلع

– – بابا شلقصه مو وائل يمهن وهنه شعليهن والحماية بالباب

:: ولو ما كان لازم تطلع

– – بابا إسلام اخو سووا حادث وخابرني

:: ها وهسه شلونه

– – زين رضوض وأيده مكسوره

:: الحمد لله

اتفاجات من كلامه :: ها ليش باالله

– – عمي دتزوج وفضها شنو باقي على ذكريات أمي صير رجل واقعي عملي ياحبيبي

وضحك وراح وصل للباب وحاچاني // بابا خلي بمعلومك تره جعفر يتزوج اثنين من هسه اگلك

وضحك وطلع انا رغم الحزن بس ابتسمت وحاولت انام والصبح طلعت للفاتحه وبقيت لليل وقررت اروح للبيت

الزغير وأحجي ويه المره الي نقذتها

===////===///////====/////////////

طلعت من الفاتحه وركبت السيارة ويه أبو منتظر وهم مرينه بالمطعم وأخذت عشا للحرس وأخذت الها عشا

وصلت للبيت نفس امس دخلت للمطبخ وخليت الصينية ع الميز وباوعت للمطبخ نفس ما هو يعني حتى چاي

ما شاربه جريت نفس ورحت يم الغرفه دكيت الباب بقيت واگف فتحت الباب رحت قبلها للمطبخ وهي لحكتني

كعدت على الكرسي واجت هي اول مره اباوع الوجهه جانت طويله وبيضه وعيونها كبار وجهه مدور وخدودها

مليانات وشفايفها لونهم وردي چانت جميله بشكل شفتها واكفه ومدنگه وترجف انا كتلها

:: سويلي چاي واگعدي اتعشي

هي ما جاوبتني خلت القوري وخدرت الچاي بقت واگفه على ما خدر طلعت الكوب وصبتلي انا باوعت الها گتلها

:: شمدريج اشرب بهذا الكوب

هي جاوبت بصوت خايف ويرجف = لان شفت هذا الكوب ع السنك مغسول

چان مبين عليها الخوف صرت اشرب الجاي كتلها

:: اكعدي استريحي

هي كعدت اگبالي ومدنكه حاولت أخفف من خوفها حچيت وياها كتلها

:: اگعدي اتعشي

هي جاوبتني = ما اشتهي الظهر أكلت

:: بس اني مصر تتعشين

هي دنت الصينية وفتحت العلاگه وشافت اكو مقبلات وخاشوكه صارت بس تأكل بالمقبلات والزلاطه انا كتلها

:: ليش ما تأكلين كباب معلاك

هي جاوبتني وهي مدنكه = مو الظهر أكلت من البقى البارحة

وگفت فتحت الجراره أخذت ماعون وسكينه زغيره وفتحت الثلاجة طلعت تفاح وبرتقال وخليتها گدامها وكتلها

:: زين هاچ آكلي فواكه

هي قطعت التفاحة وحسيت بيها برطمت وشفت دموعها وهنه يوگعن ع الميز مال الطعام انا ما حاجيتها شفتها

عضت شويه وهي كوه تلوج بيها وبلعتها حچيت وياها بنفس هدوئي المعتاد بعد ان اتنفست بعمق

:: شوفي من اريد اعرف أنتي شنو ومنو ما يأخذ موضوعج وياي ساعتين وكل شي يصير عندي لكن اني

اريد اعرف منج كول شي وشلي خلاج تردين تموتين نفسج بهاي الطريقه ليش؟

هي جاوبتني بانكسار بدون ما ترفع راسها = وراح تصدگني ؟

وكفت وجبت باكيت كلنس من فوك الثلاجة خليته گدامها كتلها

:: امسحي دموعج وكتلج إذا اريد اعرف عنج أي شي اعرفه

هي أخذت منديل ومسحت خدها وخشمها الشئ الي عجبني دموعها شكد يجرن بسرعه وقوه وگفت باوعتلي وگالت

= قبل لا اسولف انا داخله على الله وعليك انا هسه ضايعه واذا ما تگدر تحميني ما الومك خليني اروح وكثر الله خيرك

انا خزرتها شفتها شگد خايفه بس احسها كانت بوقت من الاوقات قويه جاوبتها

:: اسمعي انتي دخلتي على الله وبعدين عليه راح اگلج وصلتي بس شي واحد خلي ابالج اكره شي اسمه كذب

هي هدئت گالت = استاذ منين ابدي

::منين ما تحبين

=قصتي طويله

:: واني اسمعج

= ابدي من البدايه

هزيت راسي :: اي ابدي وكل شي احجيلي

حاوبتني عبالك طفله =كل شي كل شي

جريت نفس :: اي حتى لو من يوم الي انولدتي

= وانت عد وعدك

باوعتلها وغمضت عيوني :: احنا مو جهال انا وعدتج وخلص

حمحمت = انا اسمي سوسن احنا تلث بنات واثنين أولاد الولد الجبير اسمه عماد وهو المدلل والي كلمته ما تصير اثنين

بكيفه لويگول اريد وحده من عدچن تذب نفسها بالشط لازم أنفذ بدون مناقشه

سالتها :: ابوج شنو چان يشتغل

= بالبدايه چان يشتغل حمال بالشورجه يوم يطلع ومن يحصل الي يكفينا

اكل ينتظر على ما يخلص المصرف يطلع

انا حاجيتها :: كملي

= عماد وبعدين هديه وعايده

:: اسمج سوسن

هزت. اسها ==عماد سماني سوسن أمي چانت تخيط عبي بس قليل مو دائما جنت اسمعها دوم وهي تنعى وتبچي

وما نعرف على شنو ودائما چانت تضربنا چانت تكفر بإخواتي إذا لزمتهن وما ندري شنو السبب عكس أبوي چان

هادي وما يحجي ونحس بحنيته أما أمي چانت عصبيه بسبب أو بدون سبب

= حالتنا تحت مستوى الفقر عمري خمس سنوات ريوكنا حليب بقره من جيرانه وچاي وغدانا أي شي

مرات تمن ومرگه فارغه أو تمن ودبس چانت أمي تسوي لحم قليل يأكله أبوي وعماد وإذا صادف سمج فذاك اليوم بمثابة

عيد عدنا أما إذا جابو سمچه كبيره فهاي بس نشوفها بدون ما نضوگها

انا بتعجب :: ليش مو تكولين چبيره

هزت راسها = لان عماد يعزم أصدقائه يتفيك كدامهم فياكلوها احنا نشم بس ريحة الشوي

تعجبت چانت تتكلم باسترسال عبالك دا تقرا بقصه او تستذكر فلم شايفته ومتعلقه بي

= جان عمري خمس سنوات والدنيا صيف اتذكر بيتنا طين وأنام بره بالحوش أبوي وامي على صفحه وانا واخواتي

على جودليه بالگاع وعماد على چربايه لمن ما گعدت من الصبح شفت الكل گاعد وفرحان اول مره ما اسمع أمي

تتناگر ويه أبوي باوعت شفت ابنيه بس جمالها سبحان الخالق ما اعرف أوصفها چانت شابه بيضه وشعرها

احمر طالع من صفحة الفوطه وطويله ورشيقه انا باوعت الها وهي

اشرتلي وهيه تضحك رحت يمها باستني چان بعيوني تساؤل منو هاي وأشوف هديه راحت للمطبخ تگلي بيض

أكيد فرحانه لان راح نتريك بيض بقى التساؤل منو هاي الحلوه لمن ما أمي گالت //روحي غسلي وتعاي

رحت وشفت عايده اختي الثانيه سالتها = منو هاي الحلوه العدنا

عايده //تكول أمي هاي اختنا

انا باستغراب = اختنا يا أخت

هديه //أي اختنا وراح عماد جابها

= منين وهذا الجاهل ألوياهامنو

هديه//وج ياجاهل هذا بكدج أمي تگول ابنها

عايده //يعني انا أصير خالته

هديه بضحك //أي وحتى سوسن بگده وخالته

جابت هديه الريوك وامي خبزت خبز حار بتنور الطين وخدرت الجاي ع الجمر وسوولي لفه بيض انا وعايده

وره الريوك عماد راح نام بالحجرة جانت اكو مروحه ارضيه ولازم من ينام نكطع حتى النفس

عماد شاب حلو كلش تقريبا احنه العائله الشي الي يميزنا جمالنا لكن هاي الي يگولون عليها اختي كانت احلانا

هديه تكنس وعايده تغسل مواعين وامي گعدت يم البنية الحلوه وصارت تسال بيها انا چنت اسمع لان گعدت

يمهن لازمه لعابتي الكطن الي سوتها الي عايده أمي سالتها

– – أي قبيله شلون چانت عيشتج

قبيله //يمه ياعيشه بالعشاير يروح النهار ويجي الليل واحنا بره

امي بحسره //أي بعد هذا ابوج مو بيدي ذبج من طلگني گال ما اريدها ومن رادج ابن عمج شالج وأنطاج الا

قبيله//وأنتي يمه ما صدكتي على الله تفتكين مني

امي //لا يمه شفتي شصار بيه بس كلهم لاموني بت ورادها ابن عمها أنتي شنو وما تنطينها

قبيله//عمه العما محد قبلت تاخذه واجه عليه

امي //بس تره فالح خوش ولد

قبيله باستهزاء //گولي خوش شايب نسيتي اكبر مني بعشرين سنه

امي //لا ما نسيت وكله منج لو صايره زينه ويه الولد چا ابوج ما اجه واخذج

قبيله//يمه ما أريده اكرهه ولو يصح بيدي اكتله واموته

امي //شنو هالحجي انتي بعد لازم تتحملين

اهنأ قبيله ظلت تبچي وهي تگل الامي

قبيله//فدوه يمه من يجي شداد مو تخلينه يأخذني تره والله احرگ روحي

امي وهي حاضنتها وتبجي //لا يمه بعد ما انطيج ولا اخليج ترحين أنت بس استهدي بالرحمن

امي وابوي اقارب وهمه بالحقيقه اصلهم من ديالى جدي ابو والدي كان ساكن بالعماره لان عشك بيبيتي واتزوجها

واهلها شرطو علي يسكن يمهم جانت حلوه كلش من صارو عدها ولد ااقصد ابوي وعمامي وعماتي جدي قرر

يرجع لديالى وهي وافقت بعدين سكنو بغداد وچانت تكره امي وامي نفس الشي تكرهها

امي سكنها ديالى كانت حلوه بشكل بس كانت عصبيه وكنا نخاف منها

اتذكر بيومها أبوي راح للسوك جاب دجاجتين وگل الامي سويهن // غدا الرجعة قبوله

امي جاوبته // هاي شكد صار ما جايب النه دجاج اليوم لان رجعت قبيله

ابوي وهو يبتسم // انتي تعرفيني شكد احبها بنيتي الچبيره الي ربيتها

امي رفعت اليها للسما وهيهتكله // الله يطول عمرك اي والله ما فرقتها عن بزرك

وهاي اول مره اشوف امي تدعي الابوي وهيه مو حزينه

أجت مرت خالي ام محمد الي كلنه نحبها ونحترمها

وسلمت عليها وسوالف وضحك اول مره احس بالفرح ابيتنا وعرفت ليش أمي جانت تبچي

كل بچيها وحزنها وعصبيتها على اختي واتساءلت منو ابوها ما چنت اعرف شي

صبينا الغدا وكعد عماد ومرت خالي بقت ع الغدا أمي طبخت تمن مطبك ودجاج وسوت تشريبة باميا

وصبت الغدا أبوي وعماد بصينيه وامي ومرت خالي وقبيله بصينيه ثانيه واحنا أمي خلتنه الجناحات والرگبه كلينه

واحنا فرحانات وره الغدا طلعت العب حبل ويه بت جيرانه بالباب لمن شفت خالي حمود وعمي كاظم جايين للبيت

وياهمرجال كبير أو ولد شاب دخلو وانا دخلت وراهم تلگاهم أبوي وعماد واهلا وسهلا

خالي باوعلي گلي بلهجة الأمر //روحي صيحي ال امج

ورحت شفت قبيله كاعده وتبجي وهديه بس دموع أما عايده بس تباوع بعيونها أمي عدلت شيلتها ولبست عباتها

واجت سلمت خالي كلها

حميده شمسويه

ها خويه شمسويه

شداد يكول موديه ابنج ورايح جايب قبيله ورجلها ما موجود ومتحاجي هو وحماها

امي //والله أبو محمد عماد راح يشوف اخته وجابها البيت أمها وأبوها الي ربوها عليش بعد تكلي شمسويه

خالي خزر امي او وجه كلامه العماد //عماد شلون يجيبها من وره رجلها

امي//جا ما تنشدون ابوها الما عرفها لمن ما كبرت وحلت بالعين وزوجها الفالح الأكبر منها بعشرين سنه

لاشفنالها حاضر ولا غايب باعها مثل ما يبيعله نعجه واكل فلوس مهرها

خالي //حميده فالح ابن عمها

امي //واحنا أهلها ليش اخذها وهاي سنتين مايخليها تجينا نشوفها وحتى انت ما تخليني اروح اشوف بتي

خالي //بهاي حقج حميده بس هذا شداد احچي گدامه مو ورا هو گلي أختك من تجي تخرب بتي

ابوي جاوب //يابت هاي يحچي صدك الي طلك امها وهي عمرها ست تشهر وذباها وگال ما اريدها

ومن تزوجتها لام عماد البنية لا بيان ولا جنسيه وسجلتها باسمي وربيتها وتالي من كبرت اجيت وأخذتها

وكلنه مي خالف بالشرع ابوها تالي تحرمها ما تجينا وما تقبل احد من طرفنا يروح ايشوفها

عمي كاظم كال //خلف شلك بهالحجي الرجال جاي يأخذ بته وهذا حقه

عماد فز وكف وظل يحجي بصياح //حقه يريده ياخذه بالمحكمة البت بتنا ولاتخلوني اروح اشتكي

واذبه سجن

خالي //شنو هاي خالي ما توقعتها منك شلون هيج تحجي

شداد // انا جاي أخذ بتي مو شفتوها هسه اريد اخذها

عماد //واحنا ما ننطيها وشتريد تسوي سوي

شداد //انت كد هذا الكلام

عماد//شتشوفني كدها لو لا

خالي كال // خويه خلي البت يم أمها وإخواتها ومن يجي رجلها نشوفه وين يريدها تظل يمكم يم أمها هي المره

تتبع رجلها غصبن ما عليها ها شكلتو

شداد //أي مي خالف نتاني رجلها شيكول

أمي //هذا هو بس الا كال رجلها اخذها قبيله تروح ويا وتخلونها تجينا واحنه نروح الها حالنا من حالك شداد

ما تحرمنا منها وإذا كال تبقى يستأجر الها بيت وتكعدزيمنا

خالي //أي إذا تروح للعشاير ترحين وتشوفينها وهي هم تجي تشوف اخوانها

وصار هذا الاتفاق وراح شداد الي عرفت بعدين هو چان متزوج أمي

وطلكها لان عشك بت عمه وعاف أمي هي وبتها

راح شداد أتعشى ابيت خالي ابو محمد والصبح راح البيتهم

ثاني يوم اجه عماد العصر هو طلع من الصبح وامي تلكته

كلتله// ها يمه شفت فالح

عماد هز راسه // اي شفته وفهمته وأسبوع الجاي راح يمر على أساس ياخذها القبيلة

امي //خوش يمه هو ما ضاج ظل يحجي شگال

عماد //لا يمه فالح فقير ومن أهل الله بسرعه يبدل رأيه ومن شافني اجيته للمعسكر فرح هواي وعرفني على جماعته

وانا هم صرت احمد بي واكول گرايبي وماخذ اختي وهو مدللها ومقدرها

جنت كاعده وأراقب شلون قبيله لزمت الطبخ وصارت تخبز جانت تلف ربطه على شعرها تشدها ليروه

ورگبتها. بييضه بشكل

وره خمس أيام من جية شداد الصبح كاعدين وهديه وعايده ينظفن ويغسلن ملابس اجه فالح جنت اول مره اشوفه

چان اسمر وضعيف وطويل شفت أمي شلون تلكته وهي أتأهل وتسهل وصاحت القبيلة الي شفتها انعقج وجهه

وضاجت بس من طلعت للحوش ضحكت وراحت علي باسته وحضنته وأشوف أمي تأشر الها وهي تكله

قبيله //اشتاقيت آلك حبيبي ……وباسته ……

اشوف فالح طار من الفرح يمكن اول مره يسمع منها هاي الكلمه ودخلت هي ويا للغرفه وبالغدا أمي تجيب وتخلي كدامه

وطبعا عماد اجه وبعدين طلع هو وفالح ورجعو بالليل وهمه جايبين جيس بقلاوة فرحتنا ما تنوصف لان ما نأكلها

بس بشهر رمضان جان ابوي يجيب النه مرتين أو تلاثه عاد قبيله أخذت البقلاوة وزعتها بمواعين وأنطتنه انا والبنات

على وحده وحده أمي كالت القبيلة گدام فالح

– – – يمه لمي هدومج وهدوم ابنج خاف بأجر تمشون

هي باوعت الفالح الي جاوب //لا خاله قبيله تبقى اهنأ انتم أهلها وربيتوها وانا بأجر اروح احجي ويه عمي

شداد واگله هي مرتي وبكيفي

أمي //بكيفك يمه موتكول أمها ما رضت تؤديها

فالح //لإخاله أنتي شعليج انا بعد ما أؤديها للعشائر بأجر بسلامه اروح واحمل غراضنا وارجع

عماد //زين لعد اشوفلك بيت تأجره حتى لو غرفه

أمي //لا يمه عليمن هاي عدنا غرفه زا

ابوي //عمي فالح حتى أكلكم وشربكم حالكم من حالنه ابد كل شي لا تصرف

باوعتلي سوسن وأول مره احاول اباوع الوجهه بتمعن صدك جميله وجميله جدا باوعتلي وكالت

= تصدك استاذ انا واخواتي احنا الي فرحنا اكثر شي بجية قبيله

انا رفعت حاجبي :: وليش ؟

= لان حسينا بأمي وعماد ما راح يضربونه التهو بقبيله وبقائها يمنا

بعدين سالتني = استاذ اكمل لو اختصر

انا انشديت الكلامها احس الي تحجي صدك وليش تضم عليه ما بينها وبيني شي ولا تعرفني من قبل گتلها

:: كملي (رفعت اصبعي وحركته ) ابد لا تختصرين اريد اعرف كل شي مفهوم كل شي

هزت راسها واتحسرت = فالح راح للعشاير وبات ليله وثاني يوم اجه جايب بقچة ملابس وجنطه حديد ودوشك ولحاف

وإزار ومخاد تلاثه جابهن ودخلوهن للحجرة وقبيله سالته

– – والحلال شسويت بي

فالح مدنك وكالها //ابوج شداد اخذهن وما رضى يطيهن النه كلي خلي حميده تخسرهم مورادت بتها

أمي هزت ايدها //وهنه نمونه اطيهن لو عدي بس انت تدري يمه العين بصيره والايد كصيره

قبيله ظلت تبجي كالتلها أمي //فداج جنج جبتيهن وياج وماتن بالدرب

انا رحت سالت هديه = شنو هذني الآخذهن هذا الشرير شداد

هديه //ولج سوسن منين جايبه كلمة شرير

= منين جبتها سمعتها بالفلم عد بيت جيرانه أم بشير

عايده //هنيالج ترحين مو مثلي ما يخلوني هسه احنه لو يجيبونه تلفزيون حالنه حال الناس

هديه //ان شالله يجيبونه جا احنا وحد

انا جاوبت = اي وحد لان إستاد عماد بعده ما امر

هديه سدت حلكي //انجبي فصمه لا يسمعونج يسوونه تشريب

عايده //والله هي مال تشريب هالأيام شبعانين دجاج وتشريب واليوم سمج على جية قبيله

هديه //أيا أم بطن تهمين بس ابطنج

عايده //مو اول البارحة أكلنه زلابية وبقلاوه والله مال الواحد يتعلم شلون يسوونها ويصير يسوي ويبيع

انا نشغت = علوا تتعلمين تسوين على مود نشبع بقلاوة

هديه //شوف الثانيه هم همها بطنها

رحت للحجرة وأشوف قبيله تسفط بهدومها وامي تسألها

– – شكد حلالج الاخذه ابوج

يمه انا من رحت وصار عدي(معتز ) عمه شاله نعجه زغيرونه وأنطاها اله وكبرت أو ولدت وصارن تقريبا خمسه

أمي //الله لا ينطي مو كافي أخذ حكج وكل شي ما سوالج

اي والله يمه كل شي ما انطاني

امي//عليج بالخلف وعلي بالتلف الله لا يطي الچلب مو كافي مدولبينج بالعشائر

قبيله باوعت الامي وسلهمت عيونها // يمه شلعو كلبي مو بس مدولبيني

امي//الله يطي العلاوي أبن مغامس لو ما هو جا الله العليم يمته نشوفج

هي ضحكت وكالت //اي يمه الله يطي

امي باستغراب//أكلج قبيله وين شفتي العلاوي كليلي

جاوبتها بابتسامه // يووم اني مو اطلع الصبح وره ما أشجر التنور واريكهم اروح أنكل ماي هو شافني

مرتين وانا ما اعرف شلون

أنكل ولا اعرف اشلون احطب هو يترم على مرته هي تعبيلي الماي وهي تحطبلي

امي//ولج من يدرون اهلج شيسوون وهاي مرته منو يكول تسكت

قبيله //تسكت يمه وإذا حجت علاوي يذبحها

وبقت قبيله عدنا زوجها شرطي يجي كل تلث اسابيع لان يداوم بغير محافظه هي ثاني أسبوع أجاها عماد وكللها

عماد//قبوله فاتحين دورة خياطه باتحاد النساء

هي فرحت وكالت // علوا اتعلم اقلها افيد نفسي

وأخذها عماد سجلها وامي راحت السوك هرج الي يبيعون بي شغلات قديمه جابت الها مكينه نص عمر

صارت قبيله تطلع يوميه العصر أما الصبح جانت تطلع للسوك تجيب قماشات زغار تتعلم بيها بعدين استلمت

المسواك يعني صارت هي تسوك ورجع الشغل مثل قبل وأكثر على هديه وعايده

انا سالتها //ليش اكثر قصدج لان قبيله وابنها عدكم

هزيت راسي = لا مو بس لان قبيله وابنها بس لان صارو خطار يجونه أقارب زوجها والي چنت اشوفه هي عادي

تستقبلهم وأهلي ساكتين

هديه وعايده ينظفن ويغسلن مواعين ويفرشن للخطار ويغسلن ملابس وهي بس إذا عجبها تطبخ وإذا لا لو

أمي لو اخواتي

:: زين وأنتي

= انا چنت زغيره وجنت دوم اگعد يم قبيله بغرفتها اما اهلي جانو يدزوني مشاوير للدكان أو ساعات إذا أمي

ما بيها حيل تخبز اروح اجيب خبز أو اروح اجيب ملابس عماد من الاوتچي وفد يوم اجه عماد وجايب التلفزيون

البيتنا چانت فرحتنا ما تنوصف اتصدك يمكن ذاك اليوم ملكنا إمارة موناكو

انا ابتسمت رغم حزني. :: إمارة موناكو مره وحده

هي جاوبتني بعفويه = وأكثر صرنا نبني أحلام من ذهب لان التلفزيون العادي دخل بيتنا

:: تتذكرين بيا سنه

= يمكن 78بهاي السنه قررو يسجلوني مدرسه

= هديه چانت صف ثالث وعايده چانت ثاني وانا راح اسجل بالمدرسه طبعا والي أخذتني اسجل بالمدرسه هي قبيله

انا بوقتها احس نفسي أميره اخيرا راح اروح للمدرسه واكعد على رحله وينطوني كتب ودفاتر

ما اكذب عليك اول يومين شبعت بواچي جنت خايفه رغم جيرانه

(امينه ) چانت وياي بس انا ابچي

وانا اشوف بنات كباربالعمر چنت اخاف منهن وأكثر خوفي من بنيه چانت سمره كلش وطويله چان الكل يحسب

الها الف حساب وانا من أشوفها اروح بغير طريق چانت شقاوه وچان اعتماد المدرسه بذاك الوكت عليها

الكشافة ورفعة العلم واشياء هوايه

من ارجع يسألوني ها شلونج

أكلهم زينه وزينه كلش وانا شكد ابجي لان اخاف

اتنفست بعمق وانا اتذكر لمن چنت بالمدرسه وضرار وعصابته ياذوني بس انا چنت وحيد ما عندي

اقارب او اخ سالتها

:: ليش ماكو احد من اقاربكم وياج

هي جاوبتني = بوكتها بنات عمامي وبت خالي حمود موجودات وياي بالمدرسه بس مايتقربن مني

انا گتلها :: ليش شنو متعاركه وياهن

= لا بنات عماني سابقاتني بمرحله وبت خالي بتلث مراحل

:: زين مو تكولين أخواتج جانن بالمدرسه

= اي صحيح لكن بغير مدرسه الي سجلتني بيها قبيله شطر من مدرسة اخواتي فهنا بقن بذيج وانا صرت بهاي

:: شلون يعني؟

= يعني بنو بنايه جديده بس شويه بعيده نقلو قسم من البنات بذيج البنايه

:: أما انا سجلتني قبيله بهاي البنايه ومن سالوها اهلي ليش مو ويه اخواتها ردت عليهم احسن ما يرحن تلاثتهن

سوا ويفضى البيت نحتاج شي شيتين منو يجيبه

جنت اشوف بنات عمي يمشن ويه بنات اهلهن طاگين تجار أما بت خالي فچانت متكبره بشكل وجانت اكبر

مني فما تمشي الا ويه هذني الشقاوة والي انا اخاف منهن

من اول أسبوع اثبتت جدارتي چنت كلش شاطره والدرس احفظه رأسا بس تخلص المعلمة من قراءته لان چنت

أراقب بهديه وعايده وهنه يقرن فانا اباوع الهن شلون يقرن واقرا وياهن بحيث اول أسبوع طلعت فارسة الصف

رغم ادري بملابسي مبهذلات لان ما اشترولي ملابس جديده أنطوني ملابس عايده مالات العام وعايده چانت سمينه

شويه وانا كلش ضعيفه فأكيد ملابسها عليه مبهذلات بس هذا الشئ ما يهمني المهم انا سجلت بالمدرسه

= چان مصرفي عشر فلوس او خمس فلوس (عمله معدنيه چانت موجوده الوقت قريب )

چان بيها باكيت بسكت اوسمسميه وحلقومه أو طاسة لبلبي بس انا چنت اضمه لان أخذ لفه من البيت اضمه اشتري

بيها طباشير واكعد من احل لليل وانا اكتب على حايط الغرفه

= اتذكر ثاني أسبوع هم طلعوني فارسه لان صرت اقرأ الدرس قبل المعلمة بسبب معرفتي بالحروف چنت اكتب

اي كلمه تخطر على بالي لذلك اتعلمت بسرعه وأتذكر المعلمة أم الرياضه سجلت اسمي وصاحتلي المديرة

انطتني صدريه وقميص ظليت بيهن اربع سنوات لمن ما گصرن عليه فد يوم اجن اثنين من الشقاوة وكللي

وئام وتغريد بنات عمج

انا جاوبتهن بخوف =لا ما أعرفهن

زين نضال مو بت خالج ليش تجذبين

انا خفت وبلعت ريكي = اي هنه اقاربنا بس من بعيد

جاوبني باستهزاء//اقاربكم

انا رديت بخوف = اي اسالنهن

– – هنه كلنا

= وما كللجن ليش مايسلمن عليه لو يلعبن وياي

ما جاوبني أجت بنيه جيرانه كالت من طلعوج فارسه هنه كالن هاي كرايبنه

انا تقريبا جنت مرحه بشوشة المعلمات يحبني رغم فقر الحال الي احنا بي لكن سبحان الله الكل چان يباوعلي

انو انا فد شي

نجحت الأولى ورحت الصف الثاني وهديه راحت رابع وعايده ثالث بس شنو درجاتها مكسره كلش

حياتنا نفس ما هي أمي مشاكل ويه ابوي ما نعرف على شنو وچانت تضربنا اكثر شي چانت تضرب عايده

ليش ماندري

عماد بوكتها جان بالرابع إعدادي ونجح للخامس العلمي وطلبو موظفين بشركة النفط وقدم وانقبل بتشجيع من قبيله

ابوي كله

– – لو تأخذ شهادة السادس وتكمل كليه

هو ما رد على ابوي

قبيله من يجي زوجها تتمرض وتظل تبجي وتصرخ وهو يحتار شيسوي الها ياخذها للطبيب ويجيب ناس تقرا عليها

ويسوولها طب عرب بس مجرد ما يريد يروح تصير زينه

الي جنت اشوفه قبيله يوميه تطلع إذا مو الصبح العصر وچنت اشوف يجن بنات الها يخيطون بس سرعان ما تطلع ويدخل

عماد للغرفه

استغربت :: ها يعني هي اختج شنو صارت تشتغل

هزت راسها = لا هو عماد چان حلو كلش وبنات ومراهقات وچان يسوي علاقات وياهن

:: استغفر الله زين ابوج أمج

= ابوي يطلع من الصبح ما يرجع الا بالليل وحتى إذا ما عنده شغل يروح البيت عمي كاظم

:: شنو يشتغل عمج

=عنده محلات تصليح سيارات

:: اموره عدله

= كلش

:: كملي

= أما أمي ما جانت تحجي وياهم بس تذب قهرها بينه احنا البنات چانت قاسيه وتضربنا

اهنأ اتصل موبايلي شفت نور ع الخط انا باوعت السوسن وجاوبت

:: هلا بابا نور

هلو بابا

:: خير شكو

بابا عمه سمره اجتنا ومتعاركه ويه زوجها ومن سمع جعفر أخذ وائل وراحو

:: يمته صار هذا الشئ

هسه بابا قبل ما اتصل بدقائق

:: زين اني حتصرف أنتي لا يظل بالج

وسديته من نور واتصلت بجعفر :: الو جعفر

أهلا بابا الله يساعدك

:: انت وين

طالع يم ولد صديقي

:: تمام ارجع للبيت بسرعه عندي شغله ضرورية ما تتقبل التأجيل

خير بابا

::خير أني هسه ربع ساعة وأصير بالبيت أجي الگاك گدامي مفهوم

مفهوم بابا

باوعت الها وحجيت كتلها

:: مضطر اروح بأجر ارجع وتكمليلي بس قبلها سؤال

:: أنتي ليش تحجين باسترسال يعني بدون تحفظ

هي باوعتلي وحجت = لان ما عندي بديل

هزيت راسي :: ماشي انا راح اروح

وكفت اريد امشي هي كالت = آستاذ

انا درت ناحيتها كتلها :: ها رايده شي

= مو مشكله اكل اي شي

:: زين لعد هاي يمج المجمدة والثلاجه كل شي بيهن إذا يعجبج

اطبخي وآكلي

= شكرا رحم الله والديك

:: مع السلامة

= مع السلامة

///////////////////////////////////////////////////////////////

آآمرني ابو جعفر

راح ادزلك اسم واريد معلومات وافيه عنه

صار تدلل

مصعب ابيناتنا مو احد يدري

اعتمد ابوجعفر باچر او عكبه يمك

هاي لمحه من البارت القادم اتمنى يكون عجبكم

انيين الليل