رواية الم احل لك بعد الفصل الثاني 2 بقلم الكاتبة بتول
ونفتح بااب الحوش ودخلن جدتي ونسوان عماامي وياهن بت زغيره
تجي بـحل بت عمي سدن ١١ سنة اكثر
لاجنها نويعـمه ومامبين عليها
البت تبجي وتمسح بدموعها بجفين اديها
مهضومة ومكسوره خاطر وكسره خاطر اليتيم اعرفها عبن انه مثلها
ركضت لـ حبوبتي جلبت بـ عباتها
وارث…حبوبه ياهي هااي البت
صفـيه…مريت عمك يـبعد حبوبتك واهلها هاايه مريت عمك عتااد
…. انداريت اباوعلهاا تباوع بعيوني وجنها مصدكه لكت اله سالفه تبجي عليها ودموعها تنزل عالخدهاا بسرعة بسرعة
وارث….چاا شمالها تبجي شنهي عمي عتااد يخوف
صفيه…لا حبوبه هيه تبجي من المستحه عبنها فارگت بيت اهلهاا
وارث…عجل امهاا وينها عليش ماجت وياها حتى لاتبجي
صفيه…حبووبه اطني مجاال شمالك ندست فرد دوسه عليه تنشد بيه وماكوو
… كعدت عالحصيره مفروشة جوه نخلة حوشنه وركضت مليكة جابت الها طاسة ماي من الحـب
شرب وتحمدت وذكرت الامام الحسين ((عليه السلام))
وارث…. حبووبه عليش امهاا ماجايه وياهاا
صفيه…يمه امها ميته الف رحمة على روحهاا
وارث…وابوهاا وينه ما مش هنانه هم
صفيه…اي حبووبه هم الزلمه متوكل لـ رحمة ربه لله يرحمهم ويرحم والديك
…. مشيت يمهاا ونسوان عمامي هم دخلت يذبن اعبيهن
والبيهن مشت تشوف فروخها شلاعبين بالبيت
طلعت من جيب الدشداشة مالتي مصغول مجيس جابه الي جدي من الزيارة بالكاظمية
وارث…هااج اخذي هااي ولا تبجين احنه ماانخوف
وهسه بس تكفين بجي اخليج تلعبين وياانه
انتي شنهي اسمج..؟
.. هزت راسهاا ومسحت دموعهاا بـ طرف شالها لابستها مخربط مدري شلونه وطلع منه شعرهاا مامضموم عدل
تنسيم….انه اسمي تنسيم
وارث…حليو اسمج….
…. صاحت جدتي عليهاا ومشت يمهاا كعدتها شواي ولان نسوان عمامي تلاث كعدن يمهاا
وداير مادايرهاا ويحجن وياها
ويفهمنها مدري عالشني ويتشاورن وياها وانه اخذت دعبلاتي و رديت العب وي ولد عمامي
لكيت عگاب مراضي سدن ومطيهاا حلاوة ام الراشي والسمسم
وساكتـه
ضلت عيني علـتنسيم بكسرة خاطر جاهل وجنت مستغرب شنهي المخليهاا تبجي هجي شنهي خايفة من عمي عتاد يحب الفـروخ ومااياذيهم
چاا عليمن تبجي…؟ وعليش خايفه…؟
________ بـعد مـرور ٩ سنين
وتمـشِ الايام واليالي والاشهر والسنين…….
وهذا انه اليوم
واكف بـصف جـدي تجايه اله وبصفي عماامي كلهم
رافع وضهد وعتاد
وغاد مني عگاب وفارس ولد عمـي رافع
وغاد منهم حميد وحمدان ولد عمـي ضهد
واكفين نستقـبل اليجي للديوان عبــن اليوم عيد
والناس تلتـم عدنه بالديوان والريوك يصير يمنه
بالمضيف مالت البيت
وبيهم اليتصابح ويتعايد ويطلع عگب مانصلي صلاة العـيد
فضينه صلاة العيد وخطب بالعالم سيد من سادتنه بالمنطقة
واحنه رحنه نشوف الريوك شصاار علـي
دخلت وصارت گبال مني تنسيم ومامش احد بالمطبخ همسيت الهاا حايف لا واحد يسمع من اهلنه
وارث…يـ بنيه
….. اندارت علـيه مبتسمه لمت شالها من يم ركبتهاا
تنسيم….وارث
وارث…روح وارث
…. ابتسمت ودنكت والوجه ورد
تنسيم….ماشفتك الصبح عود ردت اعايدك اول واحد
وارث…هذا اانه جدام منج عايديني عالراحتج تراا ماعايدت احد
……. رفعت راسهاا فاكه عيونها الماخذه حيلي
تنسيم….عود صدك وارث يعني حتى جدو ما عايدته
وارث… اهاا لا عايدت جدي وجدتي وعمامي والعرب البالديوان كلها
تنسيم…ياا وهاي كلهاا معايده وانوب تگلي ماامعايد احد
وارث…ايي مو عيدي توه ابتده بشوفتج يـ روح وارث
تنسيم….واارث
وارث….سباح گلبه
تنسيم…لا تحجِ هجي لله علـيك
…… جريت حسره وهزيت راسي
وارث…تم ياابه هساعة شنهي ماناويه تكليلي حجاايه تبرد گلبي
تنسيم….كل عاام وانته بخـير وارث
وارث….بس هااي
تنسيم….چاا شتريد بعد
وارث…ماريدن شي هسااعة الريوك جهز يوو لاله تراا الوادم متانيه
تقدمت اليه وكفتهاا
وارث…لاا تكربين تنسيم
….. هزت راسها بطاعة وكفت بمجانهاا
تنسيم….شنهي زعلت مني
وارث…لاله
تنسيم…شنهي تعلمني بيك
وارث… وما دامج تعرفيني شماالج ماتحجين حجاايه تبردين بيها افادي…….
تنسيم…احبنك
….. صديت الها فاكه عيوني وماشفت بس غباارها وطلعتها من المطبخ خليت جف ايدي على گلبي جني راكض سنة ليجدام من دكاته دمامات ترگع بـصدري موش گلب
تمشيت غسلت وجهـي بماي الحنفية مالت المطبخ
ودخلت عمتي كريمه
كريمه…هاا عمه شنهي شماالك عليش تغسل وجهك المااي بارد لاتتمارض بعد عمتك
وارث…. مامش عمه بس راسي شوي
كريمه…اشرب الك ستكين جااي وهوه يهود
وارث…ان شاءلله هساعة شنهي وين الريوك
كريمه…اخذو ولد عماامك من ذاك البااب
وحميد يدور عليك وهلـ اجيت اشوفنك انه
جدك ينهدك
وارث…موش يدري بيه مااحب المسموطة(سمك مجفف) عليش يندهني ويريد اكعد وياهم عالبسااط
كريمه…ياعمه هيه غير شحلات مركتهاا وتعدل المعده وراه صياام شهر كامل
وارث…خوش عمه وعلي حفظتهاا هاي السالفه عبنج كل عيد تكليلي بيهاا
كريمه…خايب شماالك ولك شو صااير ما تتحاجه چاافوك ما اريدنك صاحي
… تكربت يمها بست راسهاا وجتفهاا
وارث…العذر والسموحة منج عمه بس وعلي من اشمن ريحتهاا اكوم انفر
كريمه…يله عوود قشمرني وامش لـ جدك لا تطول علـيِ
وارث…موش زعلانه عليه بـ روح ابوي
كريمه….عمت عيني علي يمه كون عدل ويشوفك صرت زلمه عاارض اجتاافك بعد روحي شنهي انه اكدر ازعل منك
…. هزريت رااسي وطلعت من المطبخ
للديوان مالت البيت بيها زلم مخلصه وجاي تغسل وتطلع
اجاني عگاب الحواجب عاكدهن وجنه هاايج
عگاب…ولك وريث وين جنت
وارث…بالبيت
عگاب…شعددك مووش تدري الوادم ساده الديوان سد ونجدي اليوكف وياانه ويوزع المواجيل
وارث…هسااعة ماصار شي شنهي خلصووا
عگاب…لا متانينك
وارث…اهوو يـ عگاب شجااك عليه ليوم
عگاب…مااتشوف روحك مدوهن وعگلك مووش بـراسك
شعدك ووريث
وارث…شعددي بويه شنهي سلاب لو نهااب شايفني
…. هز راسه متحلف وما فج حـلجه بـشي بعد واحنه بدينه ناوش المواعين للمطبخ والنساوين تغسل بيهـن
فضينه الديوان مالت البيت وفجينه المضيف الجبير
خليتهم ينجبون الغده وصعدت لغـرفتي تكسرت
لاكاني عمي عتاد توه نازل گال
عتاد….ورااث شجاااك بويه مووش وگت غده وين صاعد لحجرتك
وارث….راسي هااج عليه اريد انامن شووي
عتاد…اوصي البنياات يصعدلك غداك
وارث….لا عمي مامشتهي العسل وعلـي بس افوتن انام وللعصر اردن اكعد
عتاد….چاا خوش اخض راحتك للعصر حتى تمشِ ويانه عبن شيخ رشاد يكولون موش گواك نمشِ نشوفه ونتطمن علـي
وارث…ان شاءلله عمي
…… خليت وصعدت فجيت باب الحجـره
وانطرحت على قريولتي
وراسي غده فد نووب كمت عيني ماكادر افجهاا
من وجع راسي
لـ وين وجن عگاب واكف فووك راسي
يحجِ ومالي حيل اردن علـيِ
عگاب…عمي اانجيب اله المضمد يعاين حاله الزلمه صخونته خضته خض
عتاد…اي بويه جيبه بس بسكوت لا جدك يدري وعلـي يتخبل عااد كلشي عده اله وريث العزيز
عگاب…هاي هيه هساعة افوتت اجيبه جدي عد شيخ رشاد مو
عتاد…اي راح هوه وابوك وعمك رافع
امشِ بساعك انه افوتن اكل لـ كريمه تحط اله لكمه بلجن يكعد ويگوي عوده شواي
….. سمعت طبگت باب الحجر واسمع اصواتهم لجن مالي حـيل احجِ ولا افك عيني
شواي وحسيت الباب نفتح عدالي عمي لو عگاب
بس شواي شواي تميز الي الخطوات خفيفه وعلىكيف تمشِ
ايده ناعمه وباردة اتخلت على كصتي
تنسيم….وارث يـعين تنسيم شجااك عليش هجي مريض اروحلك فدوه اذ تكدر حااجيني اسويلك كمادات
…. جريت نفسي من عطـرهاا تلبس بـيه ونعومة ايدها اخذت من حيلي هوواي وفوگ صخونتي حسيت صخنت بـ زيادة
بلعت ريجي وصاايره صحراء بحلجـي
گصيت عالروحي وفجيت عيني
ااشوف دموعهاا تتسابگ على خدهاا التـرف وعيونها محومره كلش
تنسيم…فجيت عينك يبعد عيوني شبيك ليش هجي صخنت
… جليت صوتي كوه وحجيت خايف لا واحد يفج الباب ويلكاها يمي
وارث…شعددج هنانه تنسيم
تنسيم… خفت عليك ولله
وارث…مابيه شي وعلي بس اطلعي منانه هسااعة گبل لا يجي واحد ويشوفج
تنسيم…اي ولله هسه اطلع بس انته زينه فدوه اروحلك انه
وارث…ماعليه شي فووتي يابه اطلعي لا تلبينه بشي
تنسيم…طالعه ولله
….غمضت عيوني ومادريت بشي بعد بس سدت بااب حجرتي وصوت عمي عتاد يم باب الغرفة گمز گلبي خوف لا شافها من طالعه من حجرتي
لان البنيات مايصعدن هناانه اله اذ جنه طالعين
ينضفن ويردن ردود جوه
… وهيه حجره امي وابوي گبل ومسدوده
وحجره عمي وحجرتي وحجره عگاب والباقي الهم حدر كلمن وحجرته
… اسمع الاصوات تروح وترد عليه ومن صحيت وفجيت عيوني
جدي گبال مني يبلل وصله قمااش ويمسح بجف رجلي وايدي
رد ردود على وجـهي يمسح بـ ماي بارد
عاين اليه من فجيت عيوني
غياد…هاابويه شحالك هساعة
…. هزيت راسي بدون ما احجـي
غياد…يله بويه شد عودك واجلك جم لكمه ستند ظهرك بيهن موزين هجي عليك
وارث…جدي
غياد…سبااح گلبي يـ ابوك شنهي مشتهي شي
وارث…لاله اريدن اكوم شوي تكسرت من النومه
…مد ايده اليه وكومني متجيني على اجتافه
غياد…حبوبتك ضاال عليك وعلي مااهودت ولا ارتاحت الها عين
وارث…انزل يمهاا
غياد…براحتك انزلنك جوه
…. هزيت راسي ومستند علي ساندني وشايلني على ظهره من عمري ثـلث سنين وانه هسه ابن ٢٠ السنة
وشايل من راحته ومطيني مامخلي عليه گاصر ولا بيوم حسيت انه يتيم يو فاكد ابوي يو امي
لاكتني جدتي تصلي بالهول
كملت وكامت اليه بساعة
صفيه…يمه سووده عليه حبوبه يبعد هل وطوايفهم شجااك يمه طحت هلطيحة
غياد…كولي يالله ام فهيد خل لوليد يستراح ويكعد بمجانه
كعدت عالمده وارتجيت عالحايط الدنيـه تفتر بيه
صفيه…خاايب يمه شماالك حاجيني وكلي شنهي يوجعـك
……
سوده عليه كون الوجع ينداار بيه يبعد هلي
غياد…سند ظهرك ابووي وريث
واشرب هااي حليبه مفوره
وهسه تفك بلاعيمك وترد صاحي باذن لله
….. سندوني وشربتهاا وانه مغمض عيوني كولت امشي جم خطوة بلكي ارتاح لجن حتى عيوني مافجيتهاا
صفيه…شنهي الگاله المضمد
غياد…ضربة شمـس وجايه براسه
…… وهمه يسولفون يم راسي وانه منتهي ومسلمها لـ لله سمعت فجت باب حجره وصوت خطووات متسارعة…..
