رواية وجمعتنا الغربة الفصل السادس عشر 16 بقلم اماني عمر
لفصل السادس عشر
اخذ اياد مريم على شقة فاخرة فى منتصف باريس تنعم بجميع مظاهر الرفاهية والراحة
شقة مين دي؟
شقتي طبعا
ولما انت عندك شقة حلوة كده ايه اللى كان مقعدك مع محمد
كان لازم ابقى قريب منه اولا عشان اتحصل على الاوراق اللى كان مخبيها عنده فى البيت ثانيا عشان اعرف اراقبه واعرف هو ناوى على ايه
نظرت اليه مريم باحتقار
— واضح انك بتخطط لكل حاجة كويس
— اكيد والا مكنتش هبقى في الموقع اللي انا فيه دلوقتى رغم صغر سنى
– بس كل حاجتي وأوراقي كمان فضلوا فى بيت محمد
– عيب عليكى كل حاجتك هتلاقيها في اوضتك جوا معقول انسى حاجة زي كده
– طب وايه الخطوة اللي جايه؟
– هنروح بكرة السفارة ونقدم طلب للزواج
انصدمت مريم عندما أخبرها بذلك
بس انت وعدتنى انك هتأجل الجواز لغاية ما ترجع اختى في حضني
وانا عند وعدى ولكن فيزه شهر العسل بتطلع أسرع يعنى هى مجرد
اجراءات شكلية عشان نقدر نسافر بسرعة
نظرة اليه بشك وقالت لنفسها
مضطرة اصدقه عشان معنديش حل تانى على الأقل دلوقتى
*****************
بدأ محمد يتناول الشراب بكثرة ويعود كل ليلة الى بيته مترنحا ثم يحبس نفسه فى غرفته
تألم قلبى بنيران عشقك وحتى عندما
غدرتى لم يقوى على نسيانك وهجرك
انا خايفة على محمد اوى يا مروان ده عمره ما كان بيشرب ودلوقتى كل يوم بيرجع وهو بيطوح ومش قادر يقف على حيله
انا شايف اننا نرجع على مصر وناخده معانا يمكن لما يبقى فى وسط اهله وصحابه يقدر يتجاوز اللي حصل
انا مش غايظنى الا البجحه اللي جاية ولبسة الفستان اللي جبهولها محمد وبتقوله بكل بساطة انها بتحب اياد شوفت جبروت اكتر من كدة
واياد كمان كان عارف طول الوقت ان محمد بيحبها ومنطقشى بكلمة زي ما يكون قصدهم يقهروه
سمعا صوت باب الغرفة يفتح فركضت عليه ايمان وضمته
حبيبى يا اخويا حمد الله على سلامتك
نهرها محمد
هو وانا كنت عيان ولا اية
اجابه مروان
طبعا عيان بالحب
قصدك بالوهم لان مفيش حاجة اصلا فى الزمان ده اسمها حب ولا حتى صداقة
نظرا مروان وايمان الى بعضهم البعض بآسي ثم بادرته ايمان
ايمان — طب اى رايك ترجع معانا على مصر
مروان — واديك الحمد لله خلصت الماجستير يعنى قعادك هنا ملوش لازمة
رد بحدة
انا اللي احدد اذا كان قعادي هنا له لازمة ولا ملوش اتفضلوا انتوا سافروا بالسلامة ومتشغلوش بالكم بيا
ايمان – يعنى ازاى عايزنا نسيبك لوحدك وأنت في الوضع ده
ما انا طول عمرى لوحدي لما جيت هنا كنت لوحدي ومن هنا ورايح كمان هبقى لوحدي
تركهم وخرج من المنزل
مروان – انا شايف انه عنده بوادر اكتئاب وما ينفعش خالص نسيبه ونرجع على مصر دلوقتى
معاك حق يا مروان
**************
سوهاج
ليلة زفاف عادل وزينب
الف مبروك يا اخويا عقبال ما تفرح بأولاده
الله يبارك فيكي يا عايدة عجبال مريم انشاء الله تفرحى بيها مع واحد احسن من العجل ده
ردت عفاف محاولة اغاظتها
معلش بجي كل شئ قسمة ونصيب
طبعا يا حبيبتي وصدقينى انا فرحانة لعادل وكأنه واحد من عيالي
طب بعد اذنك هطلع اشوف عروستنا لتكون محتاجة حاجة
همس عاطف فى اذن ابنه
انت ايه اللي مجعدك هنا ما تجوم يله تطلع لعروستك ولا عايز الرجالة تبات هنا
حتى دى كمان بالعافية
قسما بالله لو ما جمت فزيت من مكانك لهنسل الجزمة دى على نافوخك
نهض عادل من مجلسه وهو يبرطم بكلمات غير مفهومة وبعد حوالى النصف ساعة تعالت الزغاريط وتم اطلاق بعد الاعيرة النارية فى الهواء وتبادل الجميع التهاني
**********************
عادا مروان وايمان الى القاهرة بعد أن الح محمد عليهم بالذهاب وقد اطمئنا لاستقرار وضعه بعض الشئ بعد ان عاد للذهاب الى العمل مرة اخرى ثم اتصل به دكتور كارل وأخبره ان جامعة شيكاغو وافقت على طلب المنحة ويمكنه الذهاب فى اى وقت لاستكمال دراسته
شكرا لك كثيرا دكتور كارل فلولا دعمك لى ماكنت حصلت على هذه الفرصة
انت تستحق ذلك يا محمد وأتمنى ان تبقى متفوقا دائما فى حياتك الدراسية والعملية ولكن لما أشعر انك غير سعيدا بهذه المفاجأة
بالطبع سعيد فهذه الفرصة لا يحصل عليها سوى القلائل
حسنا اتمنى لك التوفيق
**************
الولايات المتحدة (شيكاغو)
دخلت منار الحمام وتقيأت كل ما فى جوفها فركضت عليها فاتن
مالك يا منار؟ بقالك فترة مش عجبانى خالص
بكت منار بحرقة
انا تعبانة اوى يا فاتن ويمكن تكون الايام اللي فضلالي في الدنيا معدودة
انتى بتقولى ايه يا منار ومن امتى وانتى عارفة
من زمان من قبل حتى ماجي على هنا.ومش خايفة من الموت بس كان نفسى اموت وانا في حضن امى
أخذتها فاتن فى احضانها
معلش يا منار ده قدرنا وغصب عننا لازم نعيشه بس انتى حاولى تخبى الموضوع ده على قد ما تقدري والا انتى عارفة
صدقينى معدتش تفرق تعدت الأسباب والموت واحدا
دخلت عليهم احدى الفتيات
ماذا حدث لكم هل ستقضوا اليوم بأكمله بالحمام المدير يطلبكم هيا
********************
استعد محمد للسفر وذهب ليودع أشرف والذى أخبره عن زواج اياد ومريم بالسفارة منذ أسبوع
شعر محمد بغصة فى قلبه عند سماعه ذلك
مش عايز ولا بيهمنى اعرف حاجة عنهم
طب ما تأجل سفرك شويه انا شايف انك لسة تعبان
لأ انا كويس اوى اوى ولما امشى من هنا هكون احسن كمان ثم استطرد
متشكر اوى يا اشرف على كل اللى عملته معايا
على اى يا عم ده انا مدينلك بحياتي وبعدين انا كنت بقوم بشغلى مش اكتر
اكيد طبعا متشكر كمان مرة
*******************
سوهاج
مالك يابت جاعدة وشايله طاجن ستك
الله يسامحك يا خالتي يا رتنى ما سمعت كلامك
ليه يختي كنت عملت فيكي ايه
يعنى مش شايفة عادل بيعاملنى ازاى ده مبيكلمش معايا كلمة ولا حتى بيطلع فى وشى ومن ليلة الدخلة وهو مبيقربليش وبيطلع كل يوم ينام على السطح
فى الأول وفى الأخر بجي جوزك ومهما بعد عنك مسيره يرجعلك انا متأكدة انى عملت الصح ليكي ولابني بنت عمته عمرها ما كانت هتحبه ولا هتسعده وبعدين هو انا كنت عملت ايه صحيح حطيتله الحباية في العصير بس انتى لو ما كنتيش عاجباه مكنش اتحرك ولا جربلك
انصدما الاثنتان عندما دخل عاطف الغرفة فجأة
يعنى كل اللي حصل ده كان من ترتيبك انتى
عفاف بتوتر- اسمعني بس يا عاطف انا كنت عايزة مصلحة ابنى
اخرسي مش عايز اسمع حسك والله مانتى بايتة فيها روحي وانتى
لم يستطع اكمال جملته فقد سقطت زينب على الأرض مغشيا عليها
