رواية رماد الاعتراف الفصل الحادي عشر 11 بقلم زهراء سعد
꧁ذنـــــب꧂
طلعت مجتفة و كامشيني اثنين من النساء برتبة الضابط
انتبهت على ضابط يمسح بكصته بتوتر
و الثاني لازم ركن يخابر بصوت ناصي..
عرفت هنا حانت لحظات النصر..
اشر الضابط الي، حتى اجي اكعد كبال المحامي
يلي جان مبتسم
استرسل حديثة ويه الضابط
_كل الأوراق سيدي كدامك موكلتي اليوم اخر يوم الها بسجن
_يومين نتحقق و تطلع
_القانون و أمر من السيادة الأعلى حضرة القاضي
موكلتي سمارة گطع حليم خالية من اي جريمة
قتل و اي جريمة اخرى تنسب لها. موكلتي الأن بريئة تمامًا.. و حسب القانون موكلتي الصبح تكون خارج السجن.
_لازم ادز الاواق اول
_كدامك الاواق الأصيلة وين متريد ادزهن دزهن
عندي من كل نسخة اصلية موجودة نسخة اصلية ثانية، للأحتياط حتى متضيع..
قدم الضابط ورقة كبالي، كلي وقعي
باوعت على ورقة و الفرحة غامرتني، بس ايدي متتحرك
جاوبته: ما اعرف شلون اوقع
باوعلي بنظرة استغراب: متعرفين توقعين
_والله ما اعرف شلون اوقع؟
جابلي حبر ازرق كلي ابصمي بصمت و المحامي طلع مسودة و انطاني القلم كلي وقعي هنا و ارجع وقعي نفس التوقيع بالورقة الأصيلة، علمني شلون اوقع
و وقعت بالورقة الأصلية و الفرحة قليل شلون اوصفها بس خجلت ارفع عيني على المحامي و اتشكره
طلعوني من المكتب و رجعوني لتوقيف مرة ثانية
جريت وحده من البنات و حضنتها بكل قوتيي
و اني اصيح و اطفرر من الفرحة..
حتى سجدت سجدة الشكر الربي يلي خلصني من هذا البلاء
ليلة كاملة ماعرفت انام بيها ولو لحظات و اني ادعي شوكت يحل الصبح شوكت يصير الصبح
البنات يضحكن علية يكلك صارلي سنين بسجن
لو نحكمت اعدام و هسه طلعت افراج..
صارت الساعة بسته الصبح فتحو باب الزنزانة
ودعت البنات وحده وحده بعد ما تعلمت من قصصهن و حياتهن المختلفة و بيئتهن
اخذت كلشي ممكن يفيدني بعدين…
دخلت الضابط اخذتني للمكتب رجعت وقعت و بصمت و انتظرت برا ساعة بعدها دخل المحامي
يمشي بكل ثقة رحب بية و اخذني بالترحيب و الكلام الحلوو
دخلنا على مكتب ثاني هم حقق وياية و رجع بصمني مرة ثانية
و طلعنا من السجن و بعد فترة طويلة اشميت الهوى النعمة يلي رب العالمين ناعمها علينا
الجو ابرودته حلو و جماله الشمس.. احس راح اطير من الفرح
صعدت وياه بسيارة و اخذني على بيت جبير حلو
دخلت جوا لكيت امي و اختي واكفات بطارمة ينتظرني
فتحت الباب و شمرت روحي بحضنها و اني ابجي بحركة
_ساعديني يمة محد رحم بحاالي يمة ليش محد بضهري ليشش يمة
لفتني بحضني و تعطرت روحي بعطرها و دموعها تجري مثل الشلال على خدها
_اني سندج اني امج يبعد اهلي يابعد امج انتي
ابنيتي انتي شلون اتخلى عنج شلون تغمضلي عين
بدونج بدون ما اسمع صوتج و شكلج الحلو
تقربت رضية جانت تبجي بعيدة علية تقربت مني و هي ترجف مثل السعفة مو مصدكة
كعدت يمي و حضنتني و هي تبجي وياية روحي احسها تگطعت و اني اشوف وين وصلت نفسي
و وين وصلتهم
_يمه ابوس ايدج اخذيني اريد اختفي منا ما اريد اشوف احد بعد كرهت روحي أذيتكم و أذيت نفسي اهواي، بس والله مو بيدي يمه والله مو بيدي
_كومي ارتاحي و غيري ملابسج بعدها نكعد انسولف
تلمست شعري بحنية
: ليش هيج شعرج واگع شنو هاي الفراغات البي
_مادري شنو اكلج بس يمه دمروني حيل دمروني
صرت قطعة سهلة كل شخص ضايج يلزمني يأذيني لا اكل لا شرب جنت اندعي اموت ولا هذلة
جنت احسب ساعة ساعة بالكي تجوني وبالكي اطلع و اشوفكم واني ادري هل شي مستحيل جان
ادري كل يوم بمركز و كل ساعة بسجن ثاني
دمروني الله لا يوفقهم
دخل المحامي علينا تحم حم، سمحتله امي يدخل
دخل و بأيدة كارتونه صغيرة مسلفنه خلاها كبالنه
و طلب من رضية تجيب صينية و اماعين من المطبخ لان جايب كباب شوي و طماطة شوي هم
و صمون
تشكرت منه امي لان زحم نفسه هو خجل و طلع
_يمه شعجب اجيتو البيته
_سالفة طويلة
_دحجيلي شكوو شصار بغيابي..
_كولي شنو يلي ما صار تبهذلنه من بيت البيت و من شارع الشارع تعرفين احنا كعدنه ابيت الضابط فارس يلي طلعج و طلع يصير اخو الضابط يلي سجنج
_شهل خربطة هاي
_مصايب سمعنا و غلسنه اني و رضية همزين طلعنا
_زين اذا مصايب سمعتو ليش ضليتو كاعدين يمهم
_والله جانو زينين لحد ما قرر فارس يطلعج من السجن و اخذ قرارة.. صار يطلع من البيت اهواي
و يجي ابداله هذا الرجال الجبير يلي حقق وياينه اسمه ساجر
_عزة العزاني هذا هم يعرفهم
_اصلا طلع ابوهم اثنينهم..
دخلت رضية و جسمها يرجف خلت الصينية كدامنه
و راحت قفلت الباب..
_يمه شبيج مو اتفقنه كون محد يدري..
_مو اختج تريد تعرف
_والله اضل بوصاختي و ما اروح اسبح الا تكلولي شصاير
_القصة طويلة افتهمي بس كتلج احنا طلعنا ورا ما سمعنا بالمصيبة الصارت و منريد ندخل
_ اي ميخالف بس مصيبة شنو
رضية: اسمعي.. جنه عايشين يمهم و جانو بنسبة النه نعمة و الله دزهم علينا لحد ما رحنا نستفسر
على طلعتج شوكت وقتها المحامي جلال خطبني
-شنووووو خطبج تزوجتي!!! يمه تحجي صدك لو ناصبين علية
_اي والله شبيج خطبني بس جنه منتظرينج تطلعين و نعقد لهنا القصة تمام..
من رجعنا لبيت فارس دخلنا للبيت هدوء و ام فارس نايمة الحمدلله محد جان بالبيت
تونه سدينه باب الغرفه، سمعنا باب الشارع تكسرت بس ما رحنا فتحنا كلنا احنا شعلينا
ورا عشر دقايق طلعت ام فارس فتحت الباب
ثواني و سمعنا الصوت العالي..
هدى: شكو جاية؟
سرى: هيج تستقبلين ضيوفج؟
هدى: غير اكو سبب خلاج تجين، ولو خلي اكلج تفضلي هاي زيارتج الاولى للبيت
وكفت تباوع للبيت: خوش عقيل يشتغل
_ابني اسمه فارس
_صحيح هو ابنج الج من السنين و هسه كبر ما شاءلله صار رجال و ان شاءلله هم يتزوج حتى هو و مرته يعينوج من تكبرين وحدج
_جاية تسمين بدني، ترا مو ناقصة سم منج
_المفروض متعلين صوتج علية بنظري تبقين خدامتي يلي جنت اعطف عليها و انطيها وين جرد الملابس يلي عتگن و اني شبعت بيهن لبس
_فقيرة جنت و مو عيب بس العيب من انام يومية بحضن و اخذ رجال متزوج
_تحترمين نفسج لو الم عليج الجيران كلها و متخلصج من ايدي و تعوفين سالفة رجعتج للبيت
تالي وكت اتساوى ويه خدامتي بالبيت
_ولا اني ارضى اتساوى وياج اني.. شريفة.
رادت تهجم بس ابتعدت رجعت خطوتين ليورا
_والله العظيم لو تسوين شي اسحل بيج الگاع
شنو حسبالج نفسي اني مثل گبل! تكتليني و تسحليني اضل ساكته
_ ترا محترمة شيباتج و ما اسوي و انتي احترامي
ترا والله كلمة مني اخلي يطلگج و اندمج انتي و ابنج سمعتيني لو لا؟
ثاني شي ساجر تعوفينه لا تضلين تركضين ورا مثل المراهقات هل وكت تركضين ورا الزلم
سمارة: لحظه لحظه احنا شمالنه مراهقات هل وكت يا هو اليجي و سبنا شعلينا بيكم احنا
رضية: اي شمدريني شبعتنه رزايل، دسمعي المصيبة الصارت بالاخير
سمارة: كملي كملي اصدميني طلعنا نركض ورا الزلم..
_سرى دفعت ام فارس و طبت للبيت هداده و تتعارك و جميع ماعون الها كسرته
راحت ام فارس جرت التلفون و اتصلت على زلمتهن حتى يجي يحل المشكلة
اشو ورا دقايق دخل رجال الجبير و تعارك ويه مرته سرى
و حطها كتلها كتلة تفشل و هاي عايفته و تتعارك ويه ام فارس
عاد ام فارس حلت المشكلة و طردتها من البيت
هي و رجلها..
بس سلطان و فارس اجو اثنيهم و اهنا علگت
دخل سلطان شاف امه مكتولة و متورمه تورم و تبجي يم الحمامات! صارت عيونه بكصته راح تعارك ويه ابو
و فارس دخل شاف ابو كامش ايد امه حتى يساعدها تكوم كام يتعارك وياه لان دخل للبيت بدون علمه
و المصيبة الصارت ما انحلت الا ورا ساعتين
ساجر تخربط ارتفع عنده الضغط و نقلو البيتهم الثاني لان سمعت عدهم ابنيه اسمه هند هي دكتورة..
و ام فارس دخلت للغرفه تبجي و فارس تعارك ويه امه و طلع من البيت ضلينه احنا المتفرجين محبوسين بالغرفه. بليل ورا الساعة ١٢ كلنا نايمين و فارس ماهو بالبيت..
ما حسينه الا صوت رج البيت رج مثل صوت الانفجار تكسر البيت و شبابيج وكعت بالگاع
قنينة الغاز الخارجية نفجرت كمنه انصيح و ام فارس انغمى عليها و وكعت بالگاع
التمو علينا الجيران و طفو النار بالبيت..
طلعو اثنين ولد بدراجة شمرو قناني نفط تتشعل
حركت نص البيت.. و ام فارس اخذوها للمستشفى
دخل فارس مفزوع و وجهه اصفر يدور على امه ماكو
شافنه بخير مابينه شي بس مفزوعين من الصار
و بس ايدي تضررت لان كاعدة جنت يم الشباج
و وكع علية الحمدلله امي جانت بعيدة..
عاد هنا الناس ادخلت و اخذو ورا امه بعد مادري شصار بالبيت بس اني متأكدة هاي البومة مرة ساجر الاولى الها علاقة
_ و يمكن ابنها العاق لان هذا يسويها..
و انتو شسويتو ضليتو يمهم لو شنو
_ لا وين ثاني يوم الصبح رحنا للمحامي و كال هسه جنت بالمركز بتكم باجر تطلع و طلبنه منه يستأجرلنه بيت بهاي الفترة بس هو كال بيتي فارغ محد بي انتو اكعد بالبيت و اني اضل بالمكتب لحد ما اعقد على رضية اذا وافقت
_وانتي وافقتي؟
_وكلت امري الرب العالمين و وافقت
_بس شفته اني جبير بالعمر
_المهم عندي يشيل مسؤليتي و يحترمني و هو الحمدلله بي هذني الصفاتين
_بكيفج اني افرح لفرحج، زين شوكت تتزوجين
_جنه متفقين ورا ما تطلعين من السجن و هسه طلعتلي يمكن على باجر لو الثلاثاء بين ما اخوانه يلتمون بالبيت و انسوي كعده
سمار: هاي هية الحمدلله.. التفت على امي
يمه اني ما اريد ابقى هنا خلصيني بس اليوم طلعت. من ايدهم بأعجوبة باجر يمكن ما اطلع
ام رضية: حياتي تبهذلت من يوم يلي طلعت من بيت اهلي
لليوم اني ما استقريت ولا شفت الراحة بحياتي
رضية: ناوية ترجعين و تعوفيني يمه اذا تردين ترجعين ارجع وياج و ما اتزوج
_اذا اهلي استقبلوني و استقبلو بناتي يلي خلصن حياتهن بشارع!
رضية: ليش يمه شبينا؟
_اهلي اعرفهم سادة ملتزمين يمكن لو رجعت راح يستحون مني و من شكلي و من شغلي
مادري بيا وجه راح ارجع هاي اذا اندليتهم
_ماكو اهل هيج يعيرون خلينا انروح الله يخليج يمة المهم ما اريد ابقى هنا والله اخاف يتهموني بشي و ارجع لسجن هل مرة اعدم نفسي ما ابقى عايشة..
_كومي طبي سبحي و اني احجي ويه جلال و اشوف رجعتنه شلون تصير..
„جمانة‟
رجعت للبيت و ملامح الفرحة تسيطر على وجوهم
نفاخ، و اطفال تهجم على جگليت، صوت المّلا يرج البيت
النسوان كلها ملتمة بالبيت، استحيت ارفع راسي
طببوني بالغرفة لبسوني فستان قصير تفاحي منقط بكرات حمر، و بت خالي تخليلي مكياج
مالحكنه اسوي شعري عافته مفتوح على كفشته
كعدت برا و كلها تباوعلي كأني لوحة قديمة و عليها غبار كلها تريد تعرف ليش ما اضحك
ولا اركص ليش صرت جسد بلا روح بدقايق معدودة..
ساعات انهدمت بيها اجمل احلامي يلي بنيتها
بسبب ابوية جنت اشوفه انسان جبير و عادل بينه
جنت اكول ابوية يحبني بس اليوم احس ابوية انسان مختلف عن كل مرة جنت اشوفه بيها!
مرت ساعات و انتهت الحفلة و كلها رجعت لبيتها بقيت وحدي امثل النوم و احاول تغفة عيني
بس وين لا نوم ولا حركة ولا اكل..
ثاني يوم استغلت ماكو احد بالبيت امي بيت عمي
و اخواني بشغل و خواتي نايمات
اخذت مبايل امي و خابرت امير ضليت احجي وياه لحد ما طفى التلفون شحن شحنته صار بي درجتين فتحته و حذفت كلشي حتى محد يحس بيه
اجتي امي من برا التهت بشغل و طبخ ما حسابتني على شي..
ابوية التحق راح الدوام بقيت اني و امي اخواني بكد الشغل يلي عليهم بصدفة اشوفهم باليوم
اخذت التلفون و رحت الامي كتلها فتحيلي المبايلج اريد احجي ويه يسار كتبت رقم يسار كدامها و خابرته
رد علية بأستعجال مبين يريد يطلع
_الوو منو؟
_اني جمانة
_بت عماد مو
_اي
_هلا هلا، شلونج
_الحمدلله بخير
طبيت بالغرفة بحجة احجي وياه و قفلت الباب..
و انت شلونك؟
_على الله الحمدلله
_امي تصيحلي خلي اشوفه شتريد
_الله وياج روحي
سديته مباشرة بوجهه و خابرت امير و رجعت احجي وياه ساعة تقريبا و سديت الفون قبل لا تجي
امي و تسمع شكم كلمة و انكشف..
ضليت يومية اتصل بالاسم بيسار و ارجع اسدة و اتصل امير لحد ما مر اسبوعين
دخل ابوية و ابن خالة ابو يسار و انتفقو العرس
بعد ايام بس
يعني بعد ماكو اي ترجيع شكد تمنيت تنزل معجزة و يخرب الزواج بس ما صار مثل ما اريد..
بليل انفجرت بالبجي سمعتني امي اجتي شافتني
كالت كومي روحي الاخوج سجاد احجي وياه
بالكي يحرك من نفسه و يخرب الزواج او يحجي ويه ابوج حتى يأجل السالفة..
صعدتلة اني و امي دكيت الباب طلع مبين نعسان
دنگت على ايدة و بستها واني ابجي
_الله يخليك خلصوني من يسار مااا اريدة والله ما اريدة نفسي تجزز منه الله يخليك احجي ويه ابوية حتى يسد هذا الموضوع
_اي يمة كلمتك مسموعة يم ابوك الصبح انزل و احجي وياه كله مو مناسب ميشيل مسؤلية اي شي المهم خرب السالفة..
_واني شعلية!!
رفعت راسي مصدومة و الدموع تتغلغل بعيني باوعت الامي بصدمة و رجعت جاوبته
_اني اختك
_اي و اني شعلية، هذاك ابوية و احجي وياه
_انت احجي وياه اني اذا حجيت وياه يموتني والله
_انزلي جوا اريد انام
بعدنه واكفين سد الباب بوجهنه و راح كمل نومته
هنا انتهى كلشي راح يزفوني بالجفن مو بدلة بيضة
والله اموت ما ابقى عايشة، ليش محد يفهمني من اكلهم ما اريدة يعني ما اريدة..
رجعت للغرفة منهارة ملخت نفسي شعري خسرت صحتي كل هذا بسببهم همه.
سحبت التلفون من امي بدون علمه و اتصلت
على امير اتصلت اكثر من مرة بدون اي استجابة
احس كلبي بدا يعتصر من الخوف، رحت صعدت فوك السطح و اني طول الطريق اتصل و تخلص المكالمة و امير ميرد
وصلت الحافة السطح، تفكيري مغلق اريد اي طريقة
انهي هاي المهزلة بهذا العمر و تفكيري على كدي
بس اشوف كل ديصير وياية مهزلة ما فرحت بشي
اني ليش لازم اتزوح بهذا العمر ليش اني بتحديد
لازم اعيش كل هذا اني مو بس ما اريد يسار
اني ما اريد اي احد، رجعت رنيت اخر مرة و قررت
خلاص انزل
جاوبني بأول لحظة يلي اتصلت بيها صوته لهفته
كلها تغيرت و ماعرفت شنو السبب
بلغته بعد اسبوع زواجي بس اني ما اريدة والله ما اريدة
احجي ويه ابوك حتى يحجي ويه ابوية و يبطلون العرس بحكم هو شريكة بشغل و صديقة المقرب
رفض!!
_امير اكو شي؟
_جمانه افتهمي سالفتنه انتهت لا تحاولين
_منو كلي باقي وياج للموت
_يا موت و انتي راح تتزوجين غيري
_ليش هو بأردتي؟ شفتني بيوم موافقة؟ عفتك اني؟
اشو طوول الوقت بحجة احجي ويه خطيبي و دا احجي وياك
_و السويتي غلط المفروض متنطيني مجال اني مابيدي شي عليج و ابوية اصلا رافض فكرة زواجي
و الأتعس هسه دخلت معهد راح ابدي ادرس
اني مو فارغ يادوب دالحك اشوف اهلي لو اشوف
شكلي بالمراية طول الوقت عندي دراسة حتى نفسيتي تعبانه، اسمعيني اذا الله كتبلج هل نصيب وافقي و روحي و انتي بين فترة و فترة اذا صار عندج مجال راسليني و طمنيني عليج مستحيل اعوفج و ابقى اسمع صوتج بين فترة و فترة
لان اني صدك اعزج و احترمج عندج كلام ثاني؟
رديت بكل انكسار: سلامتك بس
_الله يسلمج و يستر عليج، في أمان الله
_الله وياك.
جانت اخر كلمات الي بذاك اليوم يلي حطمتني أخر تحطيم
بوقت واحد حسيت كلها ضدي الشخص الوحيد
يلي جنت احارب الخاطرة هو انسحب بحجة الدراسة
كعدت على حافة السطح و عيني على سما لحد ما صبح الفجر و اني على كعدة وحدة ما حسيت بشي
جنت كل ثانية بفكرة و ما انكرة وقته أيماني ضعف
و قررت انتحر بس اعرف القصة متنهي هنا
و عندي رب يلي راح يحاسبني وقتها
قبل لا يكعدون اخواني سلمت امري لرب العالمين
و استسلمت! مابيدي قرار ولا بيدي حيلة اكدر انقذ بيها نفسي..
نزلت جوا و قفلت الباب اكذب على نفسي لو اكول غفيت اني ماكدرت اغفى
بعد مصار الصبح و اهلي كعدو يتريكون اسمع تخطيطاتهم.
اسمع امي تخابر الاهل و صديقاتها و گرايبنه و تعزمهم
و سمعتها تاخذ فلوس من ابوية حتى تكمل بيهن احتياجات العرس..
و اني وين رأي ما اعرف..
كعدت و رحت يم امي اسمعها تحسب و تنقص و تعزل لفلوس..
خابرت على ام يسار و راح يجون اليوم حتى ياخذوني يصبغون شعري
رفعت كصيبتي حلوة و طويلة ليش يردون يغيروها؟
تريكت و بقيت يم اخوتي و الظهر بدلت و اجتي ام يسار اخذتني لام صالون قريبة على بيتهم و ام الصالون تعرفهم يعني گرايب
وصلنا يمها، دخلنا جوا، دخلت عمتي سلمت عليها
و رحبت بيها عرفتني على ام الصالون و هي تشرحلي هاي بت فلان يلي اجت بيوم الخطوبة
و اني اهز براسي و ابتسم ما مفتهمة شي حتى رد السلام ما اعرف ارد
كملت شغل اوحده ثانية قبلي و بدت بية
سوت تست تجربة خصلة شافت اذا شعري استجاب الون
بعدها جابت مكص و كصته لحد ركبتي!
انصدمت هاي ليش خالة ليش كصيتي
_واني شعلية غير عمتج كلتلي
باوعت العمتي و سألته: عمه شعري مابي شي ليش كتيلة تكصه؟ احجي و دموعي و حدهن تنزل
ردت علية بصوت حنون و هي تقنعني بالكلام
_ميخالف ماما على مودج. و على مود زوجج
هو يحب الشعر القصير و انتي كصي على مودة
حتى يحبج بعد اكثر و يطلعج و يشتريلج
_بس عمه اني احب شعري ليش هيج
_لا تكلبيها بواجي بنص الصالون النسوان تكوم تضحك عليج
دنكت راسي شريد احجي بعد، باوعت بعيون النسوان صدك عيب ابجي كدامهن و استحي اسوي اي تصرف
مسحت دموعي و استسلمت للواقع المر يلي اعيشة
صبغتلي شعري واني كاعدة بهل مكان بساعات انتظر
شوكت اخلص احس روحي تعبت و خلصت طاقتي
انوب بطني انمردت من الجوع و استحي احجي
ويه عمتي و هي ملتهية تسولف عن ولدها النسوان
بعد ساعات خلصت و اخيرا شسورتلي شعري
باوعت على روحي بالمراية احس كلش تغيرت
لون شعري شي مختلف جنت اشوفه شي جديد
اول مرة هيج يطلع شكلي بس مقهورة على شعري يلي انكص حييل مقهورة..
اجتي عمتي من ورا شافتني، و صلت على نبي
_بسم الله ما شاء الله والله تخبلين طلعتي
جنج گمر، كولي بعد عمتج عجبج الشغل
_هزيت برسي اي
رجعت صارت تهلهل فوك راسي، خلصت و بعدها تحاسبت ويه ام صالون
و اني لبست حجابي و عباتي و رجعتني للبيت بتكسي
ما قبلت تدخل كالت تاخرت كلش عود من تدخلين سلميلي على اهلج كتلها اي ان شاءلله
نزلت و طبيت وحدي للبيت لكيت امي و اخواني و خواتي كاعدين ينتظرونه نجي و محضرين الضيافة
الها على اساس تدخل بس ما قبلت تدخل
سألتني امي جاوبتها مثل ما كالت عمتي ام يسار
رجعت لان تأخرت كلش
اخواني ما قبلو على تصرفها لان ما احترمتنه و ما قدرتنه المفروض من اخذتني من بيت اهلي
هي ترجعني بنفس الطريقه
و همه ديحجون نزعت حجابي و امي شافت شعري
انصدمت شهگت بصوت عالي
_ هاي وين شعرج شمسوية ولج
_مادري يمة والله بعدني ما كعدت ع كرسي ام الصالون هي كصته
_شنو بكيفها تشتغل ولج شنو هل كصة
_لا عمتي كالت الها تكصه و من بجيت و عاتبتها تكلي يسار هو هيج يريدها و خربو شعري على مود ذوقه
_الله لا يوفقهم ان شاءلله
باوعت على اختي ورود الصغيرة كالت الها روحي صيحي الأبوج كاعد يتعلعل بيت عمج و عايفني بهل بالوة
الله لا ينطيهم على هل سالفة شلون فرفحو كلبي
ولج ما عرفتي اتمنعينم ما عرفتي ترفضين
_ماكدرت استحي والله
ورا عشر دقايق دخل ابوية يمشي بهداوة مبين ميعرف بسالفة
لزمته امي من باب المطبخ تشكيلة على سوالف ام يسار
باوعلي ابوية و ابتسم كال شعرها مرتب و مابي قصور
و اذا طلب زوجها يكون شعرها قصير حقة هذا صارت مرته
انتي بس ابتعدي ولا تهجمين بيت بتج احسن ما تجيج مطلگة
باوعلي و رفع أيدة بتحذير: ديري بالج تسمعين كلام امج هاي اني احجي كدامها مخربه بيتها و صايرة مكفخة و اذا نصحتج تأكدي هي تريد تهجمة البيتج
باوعت الأمي بحزن و دمعتها بطرف عينها اعرفها متكدر حتى تبرر نفسها و تحجي لان مراح يعترف
بغلطة و راح يرجع يضربها و يأذيها، استسلمت للواقع
و كعدت و هي ساكته..
ثاني يوم امي بدت تاخذني لسوك تجهيز الملابس
النيشان تعبنه و ثاني يوم رجعنا انكمل
و بعدها طلعنا على مود الكيك و التوزيعات و العزومات يلي ماعدنه رقمهم انروح لبيته نعزمة
اخوتي صبغو الباب و الحايط من الشخبطات القديمة
حتى تترتب واجهية البيت و بعدها اجه ذاك اليوم
يلي ما تخيلت نفسي راح اعيشة..
كعدت الصبح على صوت امي تريكت و بدلت و من العشرة الصبح طلعنا لصالون نفسها يلي سوتلي شعري
انتظرنه ساعة و بعدها لزمتني سوتلي وجهي و رتبت حاجبي و بعدها بربع ساعة خلتلي مكياج
تمنيت اسوي تسريحة مفتوحة بس كلتلي شعرج قصير ميصير كامت رفعتليا اني ما حبيتها بس امي تكلي كلش حلوة
قبل لا تجي الزفه بربع ساعة جابولي البدلة البيضة
اجتي ام يسار جايبتها
فتحتها امي جان تباوع بصدمة، هاي مو بدلتها
ام يسار: لا عيني هي مثل يلي وصفتولياها رحت جبتها
_ لا والله مو نفسها ذيج جديدة حتى ما ملبوسة
هاي وين حتى رمادية صايرة من الوصخ
_مو يلي اختاريتوها مستأجريها اليوم و هم شفت سعرها غالي شدعوة هي بدلة ساعة وحده ليش هلكد ياخذ
_لا عيني سعرها زين و نضيفة و بعدين مو بكيفه يأجرها ما اخلي بتي تلبسها
_ و هسه شلون تردين ترجعيله
_اي طبعا ارجعلة و اكلب المحل فوك راسه مو دفعنا افلوس هو بيا حق ياخذ و يأجر بكيفة
_عيني ام جمانه استهدي برحمان الزفه راح تجي هسه وانتي موكفة بتج بدون متلبسيها بدلتها
اذا اجت الزلم شدكولليهم وله البدلة مو الها
و الله بدلت بتي مو حلوة ما عجبتني؟
اني مو على مود شي فدوة الها هسه اكدر اجيبلها احلى بدلة و اغلى منها تعرفينه ولد خير احنا
بس هسه اني على مودها حتى لا تتفشل
اني اكول لبسيها و خل تجي الزفه تاخذها لبيتكم و اني و ابني انروح اجيب بدلتها احسن ما نخلي الوادم كلها تضحك علينا
باوعت الامي شبه اقتنعت بكلامها بس بعدها مو راضية على يلي صار لان نعرفها بخيلة متنطي
جابتلي بدلة خرگة تعبانه لونها اصلا مو ابيض رمادي فاتح حتى سعرها يصير رخيص..
لبسونياها واني ساكته بدون ما انطي اي ردة فعل
بعدهم يلبسوني الطرحة سمعنا الهورنات صارت باب
الصالون
لبسوني البرنص و عباية و طلعوني كوة امشي
و النظر عندي شبه معدوم كلشي ما اشوف
كعدوني بسيارة و اخذوني لبيتنه و من كل عقلي
راح تروح صدك و تجيبلي البدلة بس وين
هذا بس كلام ينگال حتى تسكتنه..
وصلت للبيتنه متروس ترسس ناس و الجهال و الصرراخ موقف لا يحسد علية المعازيم يلي من كرايبهم اكثر من كرايبنه جايين و الجهال كاعدين
جوا البدلة و يضحكون بدت المُلا تلحن و تغني و تهوس و الجكليت ماخذ دورة بالفشخات كل شوية وحده فاشختني على كصتي
مجرد ما اذكر شصار بيه من يوم ما بطلت لسه كلبي يعتصر.. اشوف صديقاتي كاعدات سوية و يسولفن
اتمنى اروح يمهن و اسولف وياهن و نطلع نلعب برا
ليش ابوية انطاني ليش ميردني و يكرهني.؟
حسيت بنفسي انفجرت من البواجي و مدا اكدر اوكف كلما تمر علية المواقف الصار بهاي الفترة
ارجع ازيد بالبجي تجي امي تشوفني ادور وجهه هي الوحيدة يلي تعرف اني على شنو ابجي
اما باقي المعازيم حسبالهم ابجي لان راح افارك اهلي
بس اخ محد يعرف كسرة كلبي شنو..
ساعات مرت و اجتي الزفه دخلو اخوتي و ابوية و يسار و اخوانه اثنين لكبار و ابو هم دخل
المكان انترس زلم لبسوني و طلعوني من البيت و اني جسمي كلة يرجف يسار طالع يفشل لا لبس ولا زيان و مربي لحية طويلة كلش و هو بالاساس ضعيف و اسمرر حييل
شكله ابدا مو مريح و يخوف..
صعدوني بسيارة الزفة و كعد الشيخ بصدر و يسار يمي و السايق صديق ابو يسار رجال جبير..
حاولو يطلعون السيارة من الطرمة مالتنه ماكدرو..
بدفع ما طلعت هم
عاد اجه اخوية و عمي و صديق اخوية كسرو المقدمة مالت الباب الخارجي و هم ما طلعت
رفعت البرنص حتى اشوف شصاير صار بساعة احنا هنا واكفين
باوعت على معازيم كلها تصور و تضحك على هذا الموقف
اخر شي نزلو يسار و الشيخ بقيت اني وين السايق
و كسرو الباب و كلهم دفو السيارة من ورا يالة
طلعت برا بس وين بعد ما شبعو بينه ضحك بعد
ما طلعنا و اجه يسار يريد يصعد سمعنا صوت كفران مو طبيعي و غلط و تهديد
راحت الزلم كلها تركض و اني بقيت وحدي حتى النسوان ما تكعد راحة ما ضلت واكفة راحت تشوف
ما احس الا اخوية سجاد اجه يركض شلع بوري من ملات البيت وراح يركض صحت ورا كومة ما سمعني
فتحت الباب اريد انزل طلع شعري و رجلي انسحلت بالبدلة توني خليت رجلي بالگاع و جان رجلي تنلف
و اوگع ابركة الطيين،سمعت وراية صوت عالي و سمعتهم يركضون اكثر كلمة رجفت خوف منها
العروس تفرعت دروحو سترووها..
……
_استاذ ماكتلي ما وصلت الحل؟
_ياريت كلمة استاذ نعوفها اليوم انتي بمقام اختي
و باجر عگبة اني النسيب مو صح ام رضية
_اكيد صح ان شاءلله
جلال: اي شي من اليوم لحد ما اموت اي شي تحتاجو اني موجود و ان شاءلله ما اقصر وياكم
ام رضية: متقصر والله ربي يرزقك اني طلبت منك بس تشوفلي اهلي وين ما اريد ابقى من بيت البيت
جلال: و شنو اليضمنلي متاخذين رضية وياج
ام رضية: حجينه بهذا الموضوع و كتلك بتي الك و انطيتك كلمة مراح اسافر الا بعد زواجكم حتى اني هم أأمن عليها
جلال: عندي ورقة تثبت انتي انطيتي بتج و استلمتي المهر المقدم كامل بتج تعرف بهذا الموضوع
ام رضية: لا متعرف و ياريت متوصل الها خبر
اني احتاجيت و اخذتهن
رجع ضهرة على ميز و تكلم بمكر: ادفع الفلوس مرة ثانية بس بشرط تقنعنين بتج باجر العرس و بدون ميجون اهلي. للحقيقة ما اريدهم يكلفون نفسهم و همه صاحبين دوام و ألتزامات و شغل
ام رضية: زين وين تلحكون باجر تعقدون قران و محكمة؟
جلال: ما اعقد عليها محكمة لحد متخلفلي طفل
بس اذا وافقتي باجر العقد و العرس نفس اليوم
واني ما اقصر وياج ما ادفعلج بس فلوس العرس
انطيج فلوس كروتج للبصرة و اسلمج بيد اهلج
وانتي بعد بكيفج
ام رضية: يعني تندلهم؟
_و اعرف كلشي عنهم والله خوش ناس ينحلف بيهم
كامت من مكانها..
_اعتبر باجر العرس تم و بنفس ليلة اني اطلع من البيت
_اعتبري تم تجيج سيارة هي توصلج للگراج وانتي مناك اركبي و روحي للبصرة و العنوان اسلمه بيدج
و اذا تحبين من توصلين انطيني خبر حتى ابلغ بتج وراج
_متفقين
_المبلغ يلي تردي اطلبي حتى يجهز لخاطرج..
الثاني عشر من هنا
