رواية عقارب ذوي القربي الفصل السادس عشر 16 بقلم انين الليل

مها

ثاني يوم گعدت تقريبا الساعه بالخمسه الصبح يعني ما عرفت شلون نمت وباي ساعه الليل كله بين الخوف

والتفكير من الي راح يصير اذا اجه للمدرسه وشنو راح تكله المديره وشلون يتصرف وياي

صليت ورحت سويت چاي لان احس براسي راح ايطك من كثر التفكير كملت الجاي شربت كوب واكلت ويا صمونه وبعدها

سويت شويه حليب البيبي رحت شلتها وخليتها بالكرسي غسلت الها ورجعت شربتها الحليب راح تكولون

هيه مره كبيره ومجلوطه ليش هيج اكعدها من وكت لكن انا شنو اسوي اذا بتها نايمه وانا اريد اروح الحك

للمدرسه واساسا يمكن هيه ما تعرف الليل من النهار بعد الله يعلم بحالها وانا استهضم اخليها ما اغسللها لان

اعرفها شكد هيه نظيفه وتحب النظافه لذلك انا اهم شي عندي انو اغير ملابسها واغسل الها واعطرها وانظف

غرفتها وفراشها

طلعتها واخذتها للحمام وغسلت الها وغيرت ملابسها ورجعتها غيرت بس الشرشف والنايلون

الي اخلي فوك فراشها ورجعتها ريكتها جانت تباوعلي واشوف القهر والتعب بوجهها ابتسمت بوجهها

هيه نزلت دمعه من عينها انا مسحتها وحاجيتها

= بيبي ادعيلي اليوم ايعدي سلامات اكيد انتي اتسمعيني تره انا محتاجه دعائج حبيبتي

اشوفها فتحت عيونها واتنفست قوي حسيت بيها دعتلي اتذكرت كلامها من تكلي

– – اذا مريتي بصعوبه او خفتي من شي صلي ركعتين واطلبي حاجتج من رب العالمين ورددي شگد ما

تگدرين سورة الانشراح

خليتها كاعده ع الكرسي ورحت اتوضييت وصلييت وندهت روان الي كعدت وراحت للحمام وبعدها رجعت بدلت

واجت للمطبخ صبت چاي واكلت صمونه وهيه تكول // عفيه بيت ماكو يوم اتريگنا بيض جبن كله لو صمونه

وجاي لو خبز وچاي

الصراحه انقهرت عليها لكن شسوي محد ايفكر بينا كل واحد ايفكر بنفسه وابونه هوه والماكو سوى

رحت على بيبي وشلتها نيمتها بجربايتها ورحت على رهف كعدتها حتى تجي تنام يم ملاك

ابوي كعد سالني // بيش الساعه

= راح تصير بالسبعه ونص اصبلك ريوك كبل لا اروح

هز راسه // لا روحي انتي انا اگعد واصب

ابتسمت بوجهه هو گلي // روحي گعدي عمتج خلي تجي يم بيبيتج اتريكها وتغسلللها

روان باستهزاء // صباح الخير بابا مها غسلت وبدلت وريكت بيبي وانت نايم

– – ها شو ما حسيت

روان // بابا مو اكلك چنت نايم

باوعلي ابوي ومد ايده على جيبه وطلع الف // هاج تستاهلين

اخذته وروان گالت // وانا بابا

هز راسه // ما عندي

— لا عندك بابا انطيني

انطاها 500 اخذتهن وشكرته طلعت روان وانا رحت دكيت الباب على حلا

فتحتلي والنعاس بعينها // ها شرايده

= عمه انا كملت كل شي ريكتها البيبي وغسلت الها

اي خوش

= راح اروح للمدرسه ياريت ترحين يمها

حلا // مو اخواتج يمها عود من تگعد بيبيتج رهف اتصيحني

طلعت واشوف روان تمشي گدامي وصلت يمها سالتني //ها گعدت سمو الاميره حلا

= لا گالت رهف يم امي من تكعد اتصيحني

– – والله حياله وكدام النسوان جاراتنا من يجن اتگللهن انا تعبانه اچتافي توجعني ما الحك احك راسي بين امي وبين الدوام

ما جاوبتها بقيت ساكته وانا ما اعرف شنو راح ايصير هيه باوعتلي وكالت

– مها

– مها مو احچي وياج

فزيت = هاا شبيج

– عفيه مهاوي بعد خلي غدانه كله تمن ولو تكلين طماطه لو روبه

= ليش والعشا

– – انجيب اب 500 فلافل وبالف صمون

باوعت الها باستغراب هيه ردت // عفيه مها والصبح جيبيلنه بيض لو جبن ملينه كله خبز وجاي

جاوبتها = كولي الحمد لله

– – الف الحمد لله بس تدرين مرات اشوف بايد البنات لفة جبن اظل بس ابلع بريكي واستحي اطلب

هزيت راسي = ان شاالله الله كريم

هيه بقت تحچي وتگول // هوه شنو ابوي ينطي بس خمس تالاف تدرين حوراء بت جيرانه حارث

بس يوميتها الفين من غير اخوها هم ياخذ مصرف وحتى اختها الي بالروضه ما تشوفين من تجيها

السياره حافظتها مالت الاكل

لو هاي رزان بت عادل شفتيها الظهر اخوها يلحگها يجيب الها غدا امها تدزه بايده من غير المصرف

جاوبتها بحسره = امها روان امها موجوده

روان دنگت عرفت قصدي من الكلام دخلنه للمدرسه وانا ابالي شي واحد هوه شنو راح يكون

ردة فعل سليم من تحچي ويا المديره ست اسراء شنو راح اتگلى وشلون راح يتصرف وياي

هيه اتكول لازم اواجهه وما اضعف

صرت احجي ويه نفسي = اي اواجهه وافضحه الي سوا البارحه ما ينسكت علي واذا ما سوتلي ست اسراء

چاره اروح للشرطه

دخلت رحت للصف گعدت بالرحله والبنات يتوافدن وهنه ايسلمن ويسولفن ويتشاقن ويضحكن اله انا جنت خايفه ومترقبه

اول حصه جان رياضيات شرحت المدرسه وانطتنا واجب وانا ولا يمها وهيه هم ما گومتني ولا سالتني

وثاني حصه انكلش ونفس الشي انا بس فاتحه عيوني وبالي مو يم الدرس اصلا ما شاركت

صارت الفرصه والمديره ما دزت عليه ايجوز ما اجه او يمكن غيرت رايها بس لا هيه وعدتني راح اتساعدني

قبل لا يدك الجرس للصفوف اجت روان بايدها كيكه وعصير // هاي وين ليش گاعده اهنا

= ماكو شي

ليش ما طلعتي واشتريتي مو ابوي انطاج الف

= ما اريد اشتري خليته الرهف وملاك

روان // هاج اخذي هاي الكيكه

ابتسمت = حبيبتي رونه شبعانه انتي اكليها ها وشوفي دك الجرس ياالله روحي

راحت وانا بيني وبين نفسي = اذا ما دزت عليه هالدرس اروحلها بالحصه الرابعه

دخلت مدرسة الجغرافيه وبعدنا جاي نراجع بالماده اجت العامله // ست المديره رايده مها حليم

انا وكفت وكاني منتظره تصيحني المدرسه هزت راسها وكالت // اطلعي

طلعت وانا بين الخايفه لا شنو خايفه يمكن اريد اموت من الخوف والمسافه الي بين الصف وغرفة الاداره

صارت شطولها يمكن مثل المسافه بين بغداد والبصره احس بريگي صار عبالك خشبه يبس بحيث بالگوه

ابلع ريگي ما ينبلع وصرت ارجف وحتى رجليه ماتن من الخوف وصلت وگفت بالباب هوه ما چان منتبه

سمعته ايگللها // اخذي ثرمستون احسن بسرعه يصعد بالبناء

المديره اتجاوبه // عبالي عندك بس بلوك عادي

جاوبها // لا ست عندي بلوك انا اصنعه وهم عندي طابوك وبلوك وكاشي وسمنت اي شي تردي موجود

— ان شاالله بس لازم تراعيني بالاسعار

— الج ابلاش صدك چذب

— تسلم ما تقصر

باوعتلي. وهزتلي راسها // تعالي ماما مها ادخلي

هوه من سمع كلام المديره التفت شافني انا دگيت الباب ودخلت

= نعم ست

هيه گامت طلعت من وره الميز اجت يمي وصاحت ع العامله

– – ام حسن لا تدخلين اي احد علينه حتى لو يجي مشرف لو مدير التربيه خلي يروح الست انتصار المعاونه مفهوم

وسدت الباب گعدت مقابيل القنفه الي كاعد عليها سليم هوه سألها // خير ست شبيها مها

– – ما بيها بس الخير مهاوي خوش ابنيه مؤدبه وشاطره

هوه هز راسه // ايي الحمد لله ( وگف وگال ) ياالله ست انا اترخص وشوفي شنو الي تردينه وحاجيني

ست اسراء ابتسمت //. اي ان شاالله اشوف شنو احتاج واخابرك

سليم // تدللين ست

ست اسراء حچت بثقه // ابو سهيل دير بالك على بنات اخوك ولا تتحرش بمها

اتغيرت ملامح سليم من الابتسامه الى الارتباك وحتى شفايفه صارن بيض جاوبها بارتباك

– – انتي شتحچيين شتردين بالضبط

جاوبته ابرود ما يخلى من العصبيه // سمعتني شنو گلت ما اريدك تتحرش بمها واحسن الك تنتظر ما تطلع لمن ما اكمل كلامي

جاوبها بعصبيه // شنو انتي اتهدديني

هزت راسها // لا ما اهددك بس هاي البني…

قاطعها // هاي چذابه وساقطه طالعه على امها

– – انتبه استاذ وحسن الفاظك ما عليه طالعه عليمن الي عليه بي انو انت تجوز منها

– – جاي اگلج چذابه

– – ها چذابه والاثر

هو عدل ياخة قميصه // يا اثر هذا

ست اسراء // شوف ابو سهيل تره انا كل شي اعرف والبارحه سولفت الزوجي والاخوي والحماي

– – مو چنج اتهددين

هيه ما بررتله جاوبت //اسمعني سولفت الهم حتى ما تسوي شي بالبنيه

سليم // ما مسويلها ولا متدني يمها

– – على كل اتمنى تكون اتچذب (اشرتلي بعيونها )

جاوبت وانا خايفه ومرعوبه // ست انا ما اچذب

هوه باوعلي وعض على شفته بتوعد ست اسراء كالت // لاتخزر بيها ولا تتوعدها ابوسهيل هاي بت اخوك واذا

على فرض مو بت اخوك نعتبرها بنيه يتيمه

رد عليها // شوفي ست انا ما مسوي شي وهاي اليمج لو منو يطلع الها راح اموتها خلاص لان اول وتالي اتجيب

النه العار فخلي انلحك على ارواحتنه ما عايزين فضيحه جديده كافي الي سوته امها

المديره // اسمعني ابو سهيل اگعد استريح واسمعني وبعدين سوي الي تسوي

هوه گعد وهوه يعض بشفته ويحرك برجله ويخزرني

ست اسراء // شوف انا من دزيت عليك ردت انحل المشكله ما ردتها تتوسع والكل يسمع بيها وحتى لو فرضا

انته ما مسوي اي شي وهيه تچذب هم راح ينمس اسمك وتنمس سمعتك لان مها على اعتبار هيه بت اخوك

راد ايجاوبها وهيه سكتته بان رفعت ايدها // اسمعني انا قبل ما اصير مديره انا مدرسه اختصاصي كيميا واعرف

انو بصمات الشخص تروح بالغسل ومرات بالمسح اله شيئيين اثنين ما تروح منها البصمات

والي هنه الاظافر والاسنان هذني لو شكد ما غسلناهن ما راح يرحن البصمات يعني اذا اعرف انت ماس مها

لو بكلمه ثق باالله راح اشتكي عليك واسويك فرجه واخليك ما تسوه فلس بسوك الزلم ولا تكلي هيه مو بت

اخوي وامها مو زينه هم اطلب يسوون تاكيد نسب واذا طلعن مو بنات اخوك راح نوديهن ملجأ بس انت انت

ما راح تشوفك الناس اله انسان دني نفس ومنبوذ لان دنت نفسك على طفله

2

هو راد يحچي هيه قاطعته رفعت اصبعها بوجهها وزمخت علي // اشش ولا كلمه تگول ما متقرب منها ولا ماسها وانا بعدني

ما جايبه كلمة الاثر الي برگبتك عدل قميصك مع الاسف تدنى نفسك على طفله وهيه محرمه عليك وحتى لو مو بت اخوك بس مكتوبه

باسمه المفروض تشكروها جاي اتداري امك العاجزه الي الكل اتخلى عنها المفروض تجرولها راتب هيه واخواتها مو كاتلهن الفقر والجوع

ملابسهن مبهذله وانتم تلعبون بالملايين

— شوف اسمعني السالفه طلعت من مها صارت تخصني الي وهسه ابيناتنا احنه التلاثه يعني مجرد ما تطلع انت منا راح ادفنها

بمكانها لكن اذا انعادت صدكني كل هاي المدرسه ال 500طالبه والكادر والعاملات راح يدرون وينشروها وانت بكيفك قرر

بلع ريكه وصار يتنفس بقوه گال بصوت خافت // ست واذا اجت واتبلت عليه وابتزتني

المديره فتحت عيونها وعكفت حواجبها // ها يعني كلامها صحيح مو چذب (جرت نفس وهزت راسها )

لا ما تتبلى عليك تدري ليش لان هيه خايفه منك انت عمها الي لازم تكون الها سند وهاي گدامها اذا انعاد

الموضوع اضطر اشتكي واخليهن بدور الدوله وانت واختك اتمحنو باامكم وانت بالذات داري فضيحتك

هو دنك وحچى بهدوء // لا ست هيه ساعة شيطان وبعد ما تنعاد واعتبريني اخوج وغلط

– – انا مثل ما گتلك راح اعتبر نفسي اي شي ما صاير بس انت لا تتقرب يم البنيه ويم اخواتها والموضوع صار يمي

هز راسه //ان شالله ما تنعاد اعذريني اروح انا

– – الله وياك

هوه وكف وانا اباوعله شلون يخزرني بلحظه ردت افقد الوعي من الخوف هو مد ايده على كولون الباب

ست اسراء استوقفته // ابو سهيل بس كلمه اخيره

رجع باوعلها هيه رفعت النقال // تره كل الكلام انا سجلته بالجهاز حتى يكون دليل ضدك

هوه اتفاجأ من كلامها رجع اتقرب منها // صدكيني ست هاي (وياشر عليه ) مو بت اخوي لا هيه

ولا اخواتها وصدكيني راح اخليها تندم وتعض اصابعها ندم

ست اسراء باوعتله // لا دير بالك تتعرض الها لان مها هسه صارت تخصني واي شي يصير وياها انا اعرف

شلون اتصرف

سليم // – – مو چنج اتهددين ست

هيه هزت راسها // اي نعم اهددك اسمعني سليم هاي مها حليم اذا تحاول تتحرش بيها او اتاذيها بايدي هاي راح

اوصلك للسجن واسأل عني انا منو وبت منو واخوي شنو يكون يمكن انته تعرفه

هز راسه وطلع وهوه يخزرني انا بوكتها واگفه وعيوني مليانات دموع بس طلع انا انتچييت ع القنفه لان حسيت

الدنيا صارت تفتر بيه لزمتني ست اسراء وگعدتني وهيه تصيح على العامله // ام حسن ام حسن

— نعم ست

— روحي جيبي عصير بارد من الحانوت

راحت العامله وست اسراء اتناوشت البطل مالتها ورشت على وحهي شوية ماي وهيه اتكلي

شبيج ماما كل شي انحل لا تخافيين

اهنا ما اتماكت نفسي بچييت وحظنتها واجت العامله جابتلي باكيت عصير اخذته ست اسراء وقربته مني

– – اشربي حبيبتي ماكو شي

اتساءلت بعيوني هيه هزت راسها // بعد ما يوصل يمج ولا يفكر ايمس شعره وحده منج او من اخواتج

انا صرت اشهك = ش شكرا ست

ست اسراء // لا تخافيين واتصرفي عادي ولج همه محتاجيلج مو انتي

باوعت الها هيه گالت // اي وانتي لازم تكونين گد المسووليه ولازم ما تسكتين على حقج

جاوبتها = ست خفت احجي محد ايصدكني

هزت راسها //اي صحيح لان ايشوفونج ضعيفه والا هاي عمتج الزماله شبيها اشو لبسها ولبس ابنها من الراقي شبيها وياچن

= ست تقبض اجار محل بيبي وراتب بيبي هم صارت اتقبضه

– – ها وهيه راتب ومخليتج انتي واختج للخدمه شوفي مها انا اليوم ساعدتج لكن الى متى لازم انتي اتساعدين نفسج

لازم يكون الج راي وكلمه لان سمعتيني شنو گتله العمج لازم اتشكروها وتجرولها راتب لان اتداري امك العاجزه

همه استغلوج لان انتي ساكته ما تحچيين او خلي انگول اتخافيين ف انتي لازم تتعودين اتشيلين مسؤولية نفسج واخواتج

قبل ما تشيلين مسؤولية غيرج

هزيت راسي هيه ابتسمت // ياالله ياحلوه اشربي العصير وروحي الصفج وكأن شيئا لم يكن وهذا عمج الحقير

بعد ما يوصلج واذا حاول وياج كل الي اريده منج تعيطين او تخليلي بي نيشان عضه او تخرمشينه او تضربينه

بشي حاد اله اخيسه الج بالسجن وفوگها افضحه

كلامها زرع بيه امل واصرار ويمكن كل الاشياء الايجابيه الي صارت عندي السبب بيها ست اسراء

رجعت للصف وبوكتها انتبهت للحصه ومن حلينه رجعنا انا وروان واستوقفتها اشتريت جبس وكيكه الملاك

وصلنه للبيت لگينه حلا منتظرتنا بس دخلنه هيه لزمت ابنها وطلعت وانا انطيت الرهف 500 ورحت سرگيت الباب

وراها ورجعت شفت روان مبدله انطيتها الجبس والكيكه = هاج وكلي ملوكه بين ما ابدل واشوف بيبي

رحت بدلت وشفت بيبي نايمه رجعت اتوضييت وصليت وحمدت الله لان خلصني من شر سليم وطبخت تمن

وگليت طماطيات اثنين وكعدنا ناكل بعدها رحت البيبي الي جانت بعدهي نايمه لكن لازم اغسل الها واغيرلها وفعلا

شلتها وخليتها على الكرسي

واخذتها للحمام سبحتها ولبستها ورجعتها على الكرسي وخليتها بالغرفه ورحت شلت فراشها وجبت الثاني

وخليت النايلون والچرچف وخليت الها عطر ورشيت بالغرفه ورحت جبت الها شوربتها صرت اوكل

بيها شويه شويه وانا ابتسم وره الظهر اجه ابوي سالني شنو غداكم

=تمن

بس

= اي بابا بس

ليش

= لان الخمسه الي تنطيها يادوب اجيب بيها خبز وطماطه للعشا والبارحه خلصنا چاي واشتريت فما

كفت حتى اشتري طاسة روبه

هوه عض ايده واتحسر. وجر نفس صعد للغرفه سالتني روان //ليش هيج حچيتي مو بقى شويه من الطماطه

هزيت راسي اي خليتها الرهف من تجي شتاكل هوه رجال ايدبر اموره

– – اول مره اشوفج هالشكل تحچيين

حاچيتها اب اصرار = ومو اخر مره كافي ملينه

شبيج مها

= الله عليج شگد صار ما ضايگين السمج مو شهر والدجاج مو لمن دزت النه العلويه ثواب اكلنا كبل ما تجي حلا

من بيت سليم لو نسيتي مثل ما همه هيج ايعاملونه احنه هم لازم انعاملهم بالمثل

روان // بس ابوي شبيده فقير

= ابوي يگدر ايسلك نفسه بلفه عادي

ما ادري شبيج اليوم

=ما بيه شي

انا راح انام

= اي روحي ومن يندك الباب اندهج

روان عوجت حلكها // عوود اتخافيين شنو

= لا ما اخاف بس ما اريد افتح الباب ابحدي

لزمت كتابي واجيت يم بيبي صرت اقرا لكن بالي مو يم الكتاب يم كلام ست اسراء انو انا لازم اتحمل مسوولية

نفسي ومسؤولية اخواتي بقيت مره اقرا ومره اتصفن لمن ما اندك الباب انا طفرت بذيج اللحظه اتهيألي سليم اجه

ويجوز جايب معين حتى ايخلصون عليه رحت بدون شعور للمطبخ اخذت السچينه ورحت ندهت روان الي

جانت حاضنه ملاك

= اكعدي الباب يندك

جاوبتني وهيه مغمضه // اي روحي افتحي

=اكعدي خلي انفتحه سووا

فتحت عيونها وعادت نفس السؤال // شبيج مها

= ما بيه شي امشي وياي

گامت وهيه تتافف انا سالت = منو

– – انا بيبي ام ماجد

عرفتها جارتنا وصديقة بيبي جريت نفس فتحت الباب چانت جايه هيه وجارتنا ام مرتضى انا رحبت بيهم سالتني

شنو نايمات

= لا بيبي شنو نايمه بس انا بالمطبخ هلا بيكم اتفضلو

دخلن فتحت الضوه راحن يم بيبي باسنها وام ماجد تباوع وهيه اتكلي // عفيه عليج

رديت = بعد شسوي توني اجيت من المدرسه ولگيتها شحالها اخذتها سبحتها وغيرت ملابسها وعطرتها ما يهون

عليه بيبي النظيفه ام روح العزيزه هالشكل تبقى

ام مرتضى // چا وبتها

= هاي اسالي بيبي ام ماجد ما الهى غرض كله انا واختي وهيه بس تعيط علينه من غير الضرب والغلط

ام مرتضى // يا تضربجن فوگها

ام ماجد // چا هوه الرجال ليش طفش وطلگها وهالتشوفينها ما بيها خير الامها

ام مرتضى // انتي سامعتها من تكعد انا وانا وكله عليه

ام ماجد // هسه مو شفتي بعينج امس مريت بيها وحتى اجت مرت سليم وشافت الوضعيه انوب لاهيه ولا

مرت سليم گامن غسللها وغيرن الها

هزيت راسي = اي بيبي انتظرني لمن اجيت انا واختي ونظفنا وغيرنا ياالله خلي اسويلچن چاي البيت بيتكم

رحت واجت روان وراي //ولج مها هاي اول مره اشوفج هيج تحچيين شصاير وياج

طلعت دولكه ماي وگلاص = هاج اخذيهن للنسوان عيب وانا راح اسوي جاي

رحت خدرت الچاي وصبيته واجيت قدمته شربن وام ماجد انطتني علاكه بيها يمكن كيلو موز وكيلو برتقال گالت

البيبيتج سويهن عصير

اتشكرت منها واخذتهن ام مرتضى سالتني // ماكو خبر من امج

انا باوعت الها ودنكت وهزيت راسي ردت سالت

– – كلش كلش ولا سالت

جريت نفس وحچييت = وما نريدها تسال هيه بالنسبه النه ماتت

– – لا ما يصير هاي هم امچن

= هيه الي ابتعدت عافتنا وراحت فااحنه اعتبرناها ميته

ام مرتضى // ملت من ابوچن يشرب عرك ويكبسل

باوعت الها = ليش مو احنه صابرات على بلوة ابونه وبعدين لو كل وحده رجلها يشرب اتعوفه چان هسه البيوت

بس جهال ما عدهم امهات

ام ماجد تباوع الام مرتضى يعني سدي الموضوع // الله يهديها

گعدن شويه وراحن انا اخذت العلاگه وانطيت الروان موزه اتوكل نصها الملاك ونص تاكلها وانا اخذت موزه اكلت نصها

وخليت الباقي الرهف واخذت برتقالات تلاثه ضميتهن بغرفتنا بالميز الي نخلي فوگه التلفزيون

كل هذا الشي وروان اتباوعلي متفاجىه من تصرفي ابوي نزل انا رحت كتله = اصبلك غدا

– لا ما اشتهي

رحت الثلاجة بيبي وطلعتله موزه انطيتها اله =هاك اكل هاي

منو جابهن

= جارتنا ام ماجد

هو اخذها وصار ياكلها وانا اشوف بعيونه دموع ويكابر ما ينزلهن انطاني الخمسه وطلع

بقينه نقرا الى ان اجت حلا دگت الباب فتحت الها باوعتلي ورهف اجت تگلي // ماخذه ميه بالرياضيات

بستها =عفيه بالشطوره روحي بدلي

غمزت الها ورحت وراها طلعت النص موزه // هاج اكلي

رهف بفرح // لا هالشكل هواي اليوم مصرف وهسه نص موزه لا لاتعلموني انوب اتعود وابقى ابچي

روان // ام بطن اكلي واسكتي

(الفقير والمحروم كل شي عنده اله قانون وقناعه اما باقي الناس فقانونهم الماده وقناعاتهم هل من مزيد )

بدلت حلا واجت تشوف بيبي شافت الاستكانات الي انا اتعمدت ما اشيلهن سالتني //منووچان عدنا

=جيرانه ام ماجد وام مرتضى

هيه فتحت الثلاجه شافت العلاگه //هاي منو جابتها

=ام ماجد

– – ها وام ماجد جابت بس موزتين

= لا عمه انا وابوي والبنات اكلنه تلاثه

– – ها وانتي بكيفج تاكلين

= عمه الموز جابته المره وهيه انطتنه من عنده واحنه شگد صار ما ضايگات الفواكه

– – اي حقچن متعلمات مثل امچن اذا تريدن فواكه وصن ابوچن

= ان شاالله عمه بس انا ردت احچي وياج

– – شكو شعندج

= عمه اريد تحسبيلي راتب

باوعتلي متفاجئه من كلامي //شنو راتب

هزيت راسي // اي راتب اعتبروني وحده جايبيها حتى اتداري امكم

فتحت عيونها //ها هيج

= اي عمه شنو انا من اروح للدوام الى ان ارجع انتي ما متقربه الها شنو بس انا بالبيت

– – اكلي تبن

= خلص ما دام هالشكل انا بعد ما عليه حالي من حالج

– – والله اخلي معين ايطيح خظج

= لا ليش اتگليله انا اكله هاي امكم وانتو مسؤولين عنها وهيه عدها راتب واجار المحل يعني تكدرون

اتجيبولها وحده ليش كله بجيبج وكل شي ما تسويلها مثل ما هيه بيبيتي هيه امكم والي يطيح عليه يطيح

عليكم واكثر واذا تعتبروني خدامه فاانطوني اجره حتى من المدرسه ابطل

– – انچبي ما اسمع صوتج

جاوبتها وانا متخصره = والله هذا العندي ومره ثانيه من اروح للمدرسه والكى بيبي محد امغير الها ولا

غاسليلها ما راح اتقرب منها وادز عليهم اگلهم هيه تاخذ بفلوسها وراتبها وذابه كل شي عليه بعد بكيفهم

ياخذوها يمهم يجيبون عمه كفايه ونور شي راجع الهم

لزمتني من شعري وبعصبيه //اله اگص السانج

عتيت ايدها = وانا گتلج يوميه تنطيني خمس تالاف ماكو انا ما عليه

– – ها تردين خمس تالاف انعال على راسج

= بكيفج عمه بس انا اليوم ادز على سليم ومعين واگللهم لو ينطوني راتب بيبي لو اجار المحل حتى يصير

بالنص انا وياج

هيه اتهز بايدها // بعد عليمن اتطلعين امج نهله اخذت الفلوس وانوب اخذت الرجال والبيت

جاوبتها ابرود = انعل ابو نهله الكلبه بت الكلب ما الي شغل بيها ولا برجلها انا عليه باخواتي ونفسي

جرت نفس وكالت // هنه تلث تالاف ماكو غيرهن تقبلين تقبلين ما تقبلين طبج طووب

عضيت شفتي وهزيت راسي = اي مي خالف يوميه بالليل تنطيني تلث تالاف وهم وصي اخوانج يجيبون مسواك

لان احنه كاتلنه الجوع وتدرين ابوي ابو العرك يادوب شغله ايكفي ها وما تسولفين للناس انتي تعبانه لو تنطينه فلوس

تره الي تنطيهن يوميه تصرفيهن على ابنج جبس وعصير

هيه اتفاجئت من كلامي وعرفت من شافت اصراري يمكن اتاكدت انا ممكن اسوي اي شي حتى ما تحصل الاجار والراتب

لا تعتبرونها انانيه مني اني ازاود على بيبي وعجزها بس مثل ما هيه بيبيتي هم امهم والي حصلو منها ومن جدي مو قليل

بيومها ما اجه سليم اجه بس معين وانا بقيت يمهم وخاله عيني بعين حلا بمعنات ياالله احچي

1

ثاني يوم اجه سليم ومجرد ما دخل انا رحت الغرفة اخواتي وكعدنا ع التلفزيون لكن انا ارجف من الخوف

والسچينه الزغيره خالتها بجيبي هوه ما مر ع الغرفه ولا طلب چاي ولا حتى سالنه وبمرور الوقت صار

سليم ومعين ما يمرون يوميه واذا مرو فما يطولون وحتى كفايه كل وين ياالله تجي وحلا هيه الي دووم تروح الهم

صارت هاي حياتي حلا تنطينه تلث تالاف وابوي خمسه كل شي ما اتغير بس صرنا نجيب ع الريوك بيضات بالف

او قوطية جبن وبالجمعه نشتري سمج زغار (زوري ) وناكله

نجحت من الثاني ورحت للثالث وست اسراء ما عافتني جانت تجيبلي ملابس اعرف بيها البناتها لكن چنت اتشكرها

واخذهن وانا فرحانه بالعطله معين قرر يتزوج واجه وجاب النه ملابس للعرس جابلي انا وروان تنوره وقميص

وحذاء ورهف بنطلون وقميص وملاك بدله

وكال لازم نجيب بيبي وندير بالنه عليها

1

رحنه البيته الي جان اشبه بالقلعه فخم والاثاث فد شي من دخلنه اجه ايوصينه مو تلعبن بالاثاث لو توصخنه

وصانه احنه ما وصى نور ولا جهال اخوات واخوان كفايه لا وصانه احنه لان فقره وما شايفات

گعدنا انا واخواتي يم بيبي وملاك لو بحضني لو بحضن روان كعدنا اربعتنا بنفس المكان ما اتحركنا

عرفنا نفسنا انو احنه ما راح ننتمي الهاي العائله او احنه انتمائنا الها بس بالاسم

1

نشوف الفرحه بعيون الكل الي يتعاملون كانما بيت معين بيتهم اله احنه محد بحالنه والكل ايباوع النه بتعالي لكن من

اجو الناس المعزومين صار السؤال علينه //مني ذني الحلوات

— يخبلن

واسمع مرت اخو كفايه تسولف على وحده اتكلها //هذني لو لاكيات نص دلال نور يمكن صارن ملكات جمال

اجن هواي نسوان يشوفن بيبي الي جانت بس فاتحه عيونها والكل مقهور على حالة بيبي

حلا تركص وتغني ويه البنات واحنه گاعدات لمن ما اجت اقارب الكفايه وگومتنا انا جاوبتها

= بيبي ما نكدر انعوفها

هيه ردت عليه //مي خالف كومن اگعدن ويه البنات صفگن واركصن ما عليها شي بيبيتج

وطلعنه وانا القهره بگلبي من عمه كفايه الي حتى ما كلفت خاطرها تجي وتحجي ويانه ظبعا هسه تگولون

تعرف ابسليم او هيه ويا متراهمين وانا متاكده ماكو هيج شي

المهم طلعنه وگعدنا وهنه مشغلات الدي جي ويركصن لمن نفسها خالة كفايه لزمت ايدي بس انا گتلها

= ما اعرف اركص

ورهف كاعده يمي وملاك تباوع وتدنك هيه راحت الروان وگومتها حتى ترگص بالبدايه كالت ما اعرف

بعدين باوعت للبنات وكالت // ما اعرف ارگص اله ابحدي

وفعلا كعدن وشغلن اغنيه وصارت روان تركص المفاجأه انو روان ركصها فد شي يعني الي يشوفها

يكول راقصه تهز بطنها وركبتها وتنفح بشعرها بعدين شالت طبله وصعدت عليها وصارت ترگص

الكل انبهر واتفاجأ بركصها وانا صرت اخزرها يعني كافي لكن هيه ولا يمي الى ان كملت الاغنيه

ورجعت شاورتها = طايحة الحظ هسه شيكولون عليج

روان وهيه تضحك // الي ايكولونه ايكولونه عود خلي ايكطعون رواتبنا

ضحكت على كلامها بعدها رجعت يم بيبي شفت نفسها خالة كفايه وهيه اتكللها

— خاله اخذي بنات حليم الولدج سهيل ومجتبى مبينات خوش بنات ومطيعات

كفايه // لا خاله سدي الموضوع هم عوزي اخذ بنات نهله الساقطه لو ابوهن ابو العرك

-بس انا اشوفهن خوش بنات وهمه ولد عمهن

كفايه هزت راسها // لا خاله حتى سليم ما يقبل

كحيت ودخلت هنه سكتن واجو الولد جابو العشا وحلا وكفايه واخواتها اينگلن اتعشينا حالنه حال الناس الغربه

بعدها اخذنا بيبي ورجعنا للبيت حتى ما كالو ابقو بالعكس انشوف بعيون الكل لازم ناخذ بيبي ونروح

وبدت المدارس وانا بيومها اخذت فلوس من ابوي واشتريت الرهف صدريه وقميص من العاديات

اما انا وروان فاكتفينه بالقديمات

وره نص السنه روان صارت اتساعدني اكثر بشغل البيت لان تدري بكلوريا ورهف بس عوزها تاكل

الكتب تدرس بكل قوتها

اما ملاك فما الها اي فعاليات بس كاعده ع التلفزيون واحنه نفس ما احنه ما اتغير شي

حلا بنفس عصبيتها لكن احنه متجنباتها وكانما احنه بغير بيت وامتحنه بكلوريا رهف قبلي وانا وراها

روان وگعت مكمله بدرسين وانا عذرتها لان اكثر الشغل عليها وانا ورهف منتظرات النتيجه كعدت الصبح

وصليت وسويت الريوك اتريكت واجيت اشوف بيبي

الي چانت نايمه لزمتها حتى تكعد وردت اشيلها لكن ايدها چانت بارده كلش وجسمها عبالك خشبه خفت لا شعوريا

خليت اذني على گلبها ماكو اي دگه اهنا انا صرخت حييل وصرت اصرخ واصرخ واصرخ

عرفت بيبي اتوفت واكيد بعد وفاتها راح تصير هواي امور اكيد مو بصالحنه

///////////////////////////////يتبع