رواية عقارب ذوي القربي الفصل السابع عشر 17 بقلم انين الليل
مها
اتوقت بيبي اتوفت الانسانه الي رغم مرضها لكن احسها شي چبير شي ممكن يساعدني وممكن يحميني اتوفت
الي رغم مرضها لكن بوجودها احس بالامان الي ما لكيته عد ناس بحيلهم وما بيهم شي من هي موجوده
چنت قويه رغم الخوف بوفاتها حسيت انو خلص اخر خيط يربطني بااهل ابوي انقطع وحتى اب اهل امي
اتوفت وانا اعرف بيها مقهوره على نفسها وعلينه انا واخواتي
اتوفت ويمكن بعد تريد اشياء من عدنا او هيه الها رغبه تسوي اشياء لكن المرض والضعف والقهر خلوها
تكون مكسورة خاطر ومخذوله من اقرب الناس الها
اتوفت بهدوء وعلى فراشها من غير ما تنتكس حالتها وياخذوها للمستشفى ويبقوون يمها لا اكتفت بمرضها
وسلمت روحها البارئها ورحلت بهدوء
2
من گعدت الفجروانا ما مرتاحه احس اكو شي راح يصير صليت وخدرت الچاي رحت يمها حتى اگعدها واشيلها
اخليها بالعربانه وصلت يمها وانا اكللها
= ياالله بدوور خلي نروح للحمام
هزيتها =بيبي بيبي اكعدي
صار كلبي يدك يريد يطلع من مكانه لزمت ايدها شفتها حييل بارده حييل اتخوفت وحسيت بيها ميته خليت اذني
على گلبها ما حسيت اكو نبض
بلحظتها الالاف الالاف الاشياء اتخايلتها صرخت حييل صرت اصرخ واصرخ واصرخ بحيث بدقايق البيت انملى
ناس شالها ابوي واخذها للمستشفى بسيارة جيرانه ولحكته حلا ورجعو وهمه يبچون چنت مصدومه اول مره اشوف
واحد ميت گدامي
اخذو بيبي ايدفنوها بالنجف راح سليم هوه ومرته وابنه وسوو الفاتحه ابيتها النسوان يجن وحلا هيه سيدة الموقف
تبچي وتلطم وتتامر علينه انا كاعده على صفحه وابجي واسمعها اتكلهن البارحه
ما بيها شي چنها ورد بقيت الوين يمها وبعدين رحت نمت
ام ماجد // اي من عيطت البنيه دخلنه وانتي وين ياالله طلعتي اصلا طلعتي تردين تتعاركين وياها چي تصرخ
حلا فلت وجهها // ها اي مو چنت تعبانه
ام ماجد // هيه ام سليم هم اتعب حتى بمرضها ما شالتها اله بت حليم الله يرضى عليها
ام كفايه جاوبت // صحيح شيجازن منها خلتهن على گلبها ربتهن وتعبت عليهن
اجني جوارينه گومني وكعدني يمهن وهنا يثنن عليه وكل حجيه تكلي //عفيه عليج ما خليتي بيبيتج بحاجة احد
والي تگلي // الله يرضى عليج ويجازيج الخير
وهواي كلام عمه كفايه جابتلي دشداشه سوده الي والروان لبسناهن وخلينه شال على شعرنا اما رهف فبقت ما لابسه
اسود لان محد جابلها وكملنه الثالثه وراحو النسوان واجو سليم ومعين وابوي دخلو الغرفتها وصارو يبجون عليها
وحلا تجاوبهم
– – كافي گولو الله يرحمها تعبت هواي الله يرحمها
راحو وانا وروان بقينه نستقبل النسوان الي يجن نسوي چاي ونجيب ماي بارد وحلا كاعده وتتامر بالفاتحه
احنه شبعنا لان يجيبون اكل ويسوون ثواب ويوم خامس راحت رهف وروان يستلمن نتائجهن رهف سادس
ابتدائي وروان موزعين النتائج يوم ثاني وفاة بيبي عاد راحت تستلمها
رهف استلمت نتيجتها واجت فرحانه لان ناجحه الاولى ع المدرسه وگايليها راح ايكرموها
اما روان فواگعه باثنين وبيومها محد رزلها لان الوضع ما يتحمل بس انا رزلتها وحجيت عليها وهيه تجاوبني
– – انا ما احب المدرسه اداوم بس حتى افتك نص الوكت من ميساء الساحره
وانا اجاوبها = انچبي هذا مو عذر اذا ما تنجحين ابوي راح ايبطلج وراح تبقين وجهج بوجه ميساء الي ما راح تعوفج
وبس تكرب عليج
روان // لا يامعوده ادرس وامتحن وانجح ولا ابقى يم هاي خرعه
ابتسمت رغم حزني وصرت انتظر النتيجه ومترقبه رغم اعرف بنفسي مجاوبه وراح انجح
وبالسابعه سليم سووا عزيمه للرياجيل وهم اجن نسوان للقرايه واكثرهن بقن ع العشا
حلا چانت گاعده وانا وروان ونور نغسل بالمواعين ونظف البيت واولاد سليم غسلو الصياني والجدوره لان سليم
جاب طباخ بيومها كلش تعبنا
وبدينا حالنه من حال الناس نرجع الوضعنا وانا يوميه المغرب افتح شمعه وبخور بغرفة بيبي واقرا قرآن الروحها
ومن اروح انام افكر انطي المخده اقصد الفلوس الي بالمخده انطيهن الحلا لو السليم وبعدين اتذكر من بيبي كالت هنه الج
من اموت اخذيهن
صار البيبي عشر تيام واشوف يوميه سليم ومعين يجون يكعدون بالديوانيه وانا اسوي چاي وماي نقدم للناس الي يجون
ابوي دووم يطلع بالليل يرجع فايت وكت وكالعاده يرجع سكران ما يدري بنفسه واشوفه دووم يبچي
بيومها راحت حلا للديوان بعد ان فرغت من الناس وبقو بس سليم ومعين ومن رجعت همه طلعوا وراها
ثاني يوم الظهر طبخت تمن وسويت مرگة بطاطا وصبيت النه غدا اجت حلا وشافتنا ناكل كعدت ع الكرويته وكالت
واشوف بعيونها حقد // ها مها بعدج تردين فلوس عن خدمتج الامي
باوعتلها شفتها تخزر بيه خفت من نظراتها ما جاوبتها بقيت اوكل بملاك هيه هزت ايدها وراحت
انا كملت الغدا اخذت ملاك غسلت الها وصار لازم اگل الابوي حتى ناخذها للطبيب لان هواي نسوان بالفاتحه
خوفني ليش البنيه ما تحچي وما تنتبه
وره الظهر اجه ابوي انا گمت صبيتله غدا وكعد ياكل من كمل سالته = بابا تريد چاي
– – لا ما اريد اروح انام شويه تعبان
هزيت راسي واندك الباب راحت روان گالت // منو
– – انا افتحي الباب
سمعته صوت سليم وانا شلت ملاك اريد اروح للغرفه شفته دخل هوه ومعين گال // السلام عليكم
ابوي رد // عليكم السلام
سليم وهو يباوعلي بتوعد // وين حلا. (باوع الغرفتها ) حلا حلا وينج
هيه طلعت شافتهم ابتسمت // ها اجيتو
معين // اي اجينه خير
هيه اتاشر // اكعدو(باوعتلي ) روحي جيبي چاي
رحت للمطبخ حسيت اكو شي ويمكن شي چبير وما متوقعته ما اعرف ليش حسيت بخوف فضيع وانا اردد = الله يستر ياربي سترك
صبيت تلث استكانات لان ادري بحلا ما تشرب جاي
قدمته وسليم يباوعلي بنظرات بس انا فاهمتهن // اي حلا هاي احنه اجينه شكو
– – ماكو بس الخير (راحت الغرفتها واجت اب ايدها ورقه ) هاك معين اقرا هاي الورقه
معين قراها وگف وهوه يكول // من يمته هذا الشي من يمته
حلا وهيه تبتسم // من زمان وتگدر تروح للمحكمه وتتاكد
سليم // شكو شصاير
معين // هاك اتفضل
سليم اخذ الورقه واحنه مثل الاطرش بالزفه سليم باوع الها وهوه رافع حواجبه // ها حليوه لعبتيها
ردت // شنو لعبتها ورقه اصوليه لا لعبتها ولا ابدا
معين بعصبيه // شنو اصوليه بكيفج
– – اي بكيفي
ابوي // غير اتفهموني شنو صاير
معين راد يجاوب وحلا سبقته // ما صاير شي بس امي الله يرحمها من سنه كتبت البيت اب اسمي بيع وشرا
ابوي // يابيت
– – هذا الكاعد بي انته وبناتك
سليم // شنو بكيفج ولج صدكي اموتج وما اخلي الج
هي وكفت // الزلمه الي ايمد ايده عليه اله اسجنك انا ما مسويه شي لا بايكه ولامزوره
سليم // البيت النه كلنه
هزت راسها // لا مو الكم انتو اخذتو ورثكم البيت امي كتبته الي وتردون روحو للمحكمه واتاكدو
ابوي جاوبها // وانا والبنات
هيه رفعت ايدها // شنو احنه كفيلين بيهن انت اخذت حقك المحل مال الكهربائيات الي صرفته على الخاتون
وعلى العرك والقمار
ابوي // ذاك حصتي من ابوي البيت باسم امي والي حصه بي
هيه بزمخه // محد اله بي البيت امي كتبته اب اسمي وهيه راحت للمحكمه وسوتلي التنازل
1
معين // مو بكيفج
هزت راسها // لا بكيفي وكل شي بالقانون وهسه انا اريد ابيع البيت وانت ياحليم شوفلك بيت انا ما مسؤوله عنك
صار لغط وكلام وعياط انطيت ملاك الروان وصرت بالوسطه وحچيت وانا ااشر عليهم
= بس انتو تلاثتكم تدرون البيت الابوي بيبي وصت بي الابوي
حلا باستهزاء // هاي منو التحجي مهيه انجبي لا اخلي النعال بحلگج
صرت ااشر عليهم وانا ارجف = انتو تدرون البيت الابوي (اتقربت من سليم ) بيبي اكثر من مره كالت الك انته بالذات البيت الحليم
ابوي // والله حلا اشتكي عليج واخليج اتقسمين بالقران انو امي سجلتج البيت
حلا // ههههه اشتكي انا اريدك تشتكي لان يجوز انطيك مجال شكم يوم عاد من تشتكي بالمحكمه راسا
احصل امر واشمر غراضك بالشارع
روان // مو بكيفج هذا بيت ابونه يعني بيتنا
حلا // تردن بيت روحن الامچن خلي اتكعدتچن ابيتها انا اهنا (صفكت اب اديها ) خلص الفندق انسد ياالله حليم اخذ جوالاتك واطلع
ابوي بعصبيه // شنو بكيفج اموتج وما اطلع
حلا // هههاي اتموتني ما طول الحجي هالشكل اسمع هسه تطلع انت وبناتك الك منا الساعه لو ماكو اطلعك بالشرطه
ابوي راح يم سليم ومعين // انتو قابليلها
حلا تباوع الهم // اي قابليلي وهمه الي شجعوني تبقى بحاله وحده (اتاشر علينه ) اذا اتسيب ذني وتعوفهن اخليك على راسي
ابوي //. ولج حلا ذني بناتي
– – بناتك مو بناتك انا ما اريدهن واسمعوني البيت يسوه ذاك الحساب انت سليم وانته معين المحلات الكم ما اريد لا
اجار ولا اي شي وانت حليم وصلك حقك ومن زمان اصلا اطلبك بعد
ابوي // ياحق وشتطلبيني ؟
– – الملايين الي انطاهن الك سليم ومرتك باگتهن والبيت الي امي اشترته الي ورافد اخذه وباعه وراح اشترى بي بيت المرتك انت بالذات
ما الك يمي اي شي وهذني النغلات ما اريد اشوفهن بالبيت الك منا الساعه تطلع لا والانبياء اطلعك بالشرطه
اتقربت منها // ليش هلگد حاقده علينه
هيه لزمتني من شعري // اي حاقده عليج انتي واخواتج لان چنتن تدرن اب امچن مصادقه رافد وچنتن اتغطن الها
لمن ما اخذ مني كل شي وراح انطا الها وهسه انا راح اخذ منچن كل شي واخليچن اتجدن بالشوارع
ابوي باوع السليم ومعين // انتو قابلين
ما جاوبو سالهم مره ثانيه //سليم انته ومعين قابلين على الي سوته اختكم
كام سليم // انته گلتها اختنا وهذا حقها البيت اب اسمها واحنه ما ابيدنا شي نسوي الك فاطلع بكرامتك احسن الك
ابوي // الله اكبر عليكم وين اطلع بهالبنات وين اروح
حلا باستهزاء // لا تخاف ع البنات سوگهن ماشي مثل امهن
سليم // ياالله معين نمشي وانتي بكيفج شتتصرفين اتصرفي
حلا // اي خويه اتعذروني منا للعصر اذا ما طلع هوه وبناته (اتهز ابايدها ) ما ادري اگول بناته راح اجيب الشرطه
سليم طلع رحت ورا لزمته من جتفه وانا مشمئزه هوه باوعلي سالته وانا استعطفه = وين نروح
هوه لزم ايدي واخذني دخلني بغرفة بيبي // شتردين گولي
= تدري بالبيت الابوي ليش هالشكل تسوي
اتقرب عليه وهويعض بشفته ونفسه يلفح بوجهي // تردين تبقيين انا اشتريلج احسن بيت بس تعرفين شنو اريد
= حرام عليك ما تخاف من الله ان…
قاطعني بابتسامه خبيثه // انتي ذكيه مثل امج وحرامات تتجهولين واول وتالي تسوين الشي الي اريده منج بس اب ارخص عاد انتي
اسمعي الكلام وصيري مطيعه وبيناتنا ومحد يدري بيج وشنو تردين بس اتامريني اخليج ملكه
مد ايده على صدري ولزمني حييل انا عتيت ايده وجاوبته // چا شكد ناقص وحيوان
هوه لزمني اب ايده وضغط على خدي بحيث حسيت اسناني راح يوكعن وحاچاني باستهزاء
– – هههه اي حيوان عاجبج عاجبج ما عاجبج خلي ست اسراء اتشوفلج بيت اتكعدين بي
طلع وكال المعين // ياالله ورانه شغل
حلا بصوت عالي // هاي گدامكم انا راح ادخل الغرفتي واقفلها عليه منا للعصر ما الگى لا حليم ولا بناته عشتو
ابوي // احچو ويه اختكم لو انتو وياها متراهمين والله اكتلها خلاص
همه ما جاوبو طلعو ولا كان الي صار ايخصهم وابوي صار يتهدد وراح للمطبخ طلع سجين وصار يدفع اباب
حلا وهوه ايكلها // خو مو تبقيين العمر كله ضامه روحج اتطلعيين واذبحج
وهيه اتكله // هسه اخابر الشرطه واگللهم جاي ايهددني
ابوي من حرگته صار يضرب بالباب بوكسات وهوه ضام ايده حتى ايده اتجرحت وهوه يتوعد حلا
انو يكتلها ويكتل ابنها
لزمته انا وروان واحنه نبچي // بابا لا تضيع نفسك وتضيعنه
هوه دموعه نزلن وصار يضرب على راسه // ليش انا ما ضعت انا انتهييت ما بقالي شي اخاف علي
جاوبته = واحنا منو النه من تكتل حلا منو راح يخلينه عنده بابا خلي نطلع لا تجي الشرطه
اندك الباب بقوه واحد بقى ايباوع للثاني عرفنا الشرطه اجت انا گتله = بابا اصعد فووك وانزل على المحل
هز راسه // لا عليمن خلي يجون ياخذوني روحي افتحي الباب
فتحت الباب دخلت ام ماجد جيرانه وياها زوجها وهيه تكول // حلا خابرتنا وتكول حليم ايريد يكتلني انا وابني
روان // چذابه هيه طردتنا من البيت هيه واخوانها
ابو ماجد // شبيك حليم صوتك واصل الاخر المنطقه شصاير
ابوي ودموعه ينزلن // طردوني من البيت انا والبنات ابو ماجد حلا موقعه امي ع البيت ومصدقته بالمحكمه
واخواني انذال صارو بصفها لان انطتهم المحلات
ابو ماجد لزم ابوي // استهدى بالرحمن حليم مو هيج الحجي امشي وياي
ابوي // +وين
– – امشي خلي نگعد بالديوان وخلي نفتهم من اختك
ابوي هز راسه //لا تگول اختي مو اختي ضيعتني وضيعت مستقبل بناتي
احب ابوي من يدافع عنه ابو ماجد // تمشي ياخوي امشي اگعد. وانا اجي واتفاهم وياها
ابوي // ما اروح اله لو كاتل لو مكتول عبالكم اخاف من السجن لو من الموت لا هو انا حياتي كلها گضيتها
ميت ومسجون
اتقربت منه وانا اشهك =. بابا روح ويه الحجي الله يخليك بلكي تراجع نفسها وتسكت
ام ماجد سالتني // شصار
= بيبي طلعت حلا دايره البيت باسمها واحنه ما ندري
وعمامج شكالو
= ما حچو
يعني قبلو عليها
هزيت راسي // اي وطلعو ولا كانه صاير شي
اجه ابو ماجد واشر المرته دگت الباب على حلا // افتحي الباب ام احمد انا ام ماجد وياي ابو ماجد يريد يحجي وياج
حلا // ام ماجد ما افتح الباب وهذا موجود
– – اذا تقصدين حليم راح البيتنه
فتحت الباب وهيه لابسه جبه وخاله شال على راسها ابو ماجد گعد ع الكرويته وهيه تخزر بينه ام ماجد
– – يا حلا صدك چذب لو شنو ابيناتكم تبقون اخوان
هي گعدت ع القنفه وخلت رجل على رجل // انا اخواني بس سليم ومعين حليم لا اخوي ولا اعرفه
ام ماجد // شنو هوه بكيفج شلج بهالحچي
– – ام ماجد حليم راد يذبحني وبمساعدة بناته لوما لحگت على روحي وقفلت الباب
روان // حرام عليج عمه اتچذبين
حلا // امج معلمتج الحرام والحلال وتكليلي حرام عليج
ابو ماجد // مي خالف ام احمد اعذري اخوج اتفاجا بلي صار
– – هوه شنو الي صار امي قبل سنه بعدها ما مجلوطه كتبتلي البيت اب اسمي گالت الدنيا صوت وموت وانتي
وين ترحين اذا صار عليه شي
ام ماجد // عود تحچيين صدك شنو وين ترحين هذا بيتج وعندج راتبج
حلا تهز برجلها // – – شنو ام ماجد قابل اچذب
ابو ماجد // حشاج عمي ام احمد حليم اخوج وحالته ضعيفه وعنده هالبنات من اتطردونه وين يروح وهوه
لا راتب ولا بيت
– – والله ابو ماجد محد گله يگضيها على ست الحسن مرته لو على العرك والكبسله
– -بس ياعمي حليم هم اله حصه بالبيت
– – اخذها ابو ماجد اخذها
– – شلون
– – انا اگلك اخذها حليم لا يصرف ع البيت امي هيه الجانت تصرف ما لم نفسه ما اشتراله بيت
ام ماجد // بس وين يروح بهالبنات
– – مشكلته والخاطركم خلي حليم ايودي هذني الدار الايتام ويجي اهنا بس هوه اخلي على راسي بس ذني
لا يمكن لحظه ما يبقن بالبيت
ام ماجد // حرام عليج انتي هم صاحبة ولد خافي ربج
وكفت وكالت // انا هذا العدي واذا انتي مكسور خاطرج علي شوفيله بيت وكعدي
ابو ماجد // والله لو عدنا بدون ما تكولين بس العين بصيره والايد قصيره والله هو الرزاق
اتقربت منها وانا ابچي // عمه مو ذنبنا رجلج عافج واتزوج امنا ومو ذنبنا امنا مو خوش انسانه عافتنا وباكت
ابونه احنه وين نروح
رفعت چتفها // ما ادري روحن ويه ابوچن وين ما ترحن روحن بس بهذا البيت ما تبقن
ابو ماجد // واذا اگلج الخاطري خليهن اسبوع على ما يلگولهم سكن
– – چان بعيني بس انته شفت شلون لازم السچين ويتهدد يريد يكتلني
– – انا اكفله ام احمد
– – تعذرني ابو ماجد ما اگدر بوجودك خلي يطلعون غراضهم لاتجي الشرطه وتذبهن بالشارع
ام ماجد //. ياالله حجي خلي نروح بس شوفي حلا الله ما راح يعوفج وحوبة البنات وراج لان جهولتيهن
– – انوب اتدعيين عليه تره انا مو امهن خلي يرحن الامهن يعيشن عدها
– – اي صح انتي مو امهن انتي وحده ما تخافيين من الله ما حچيتي گبل ما طردتيهن انا اگلج ليش لان
چانت هاي ( واشرت عليه ) هاي چانت تشيل امج وتغسل الها وتغير ملابسها وتوكلها هسه امج ماتت
صار لازم اتطردينها لان بعد خلاص مو بحاجتها ابنادم بين عازته وبين غناته
حلا // خلصتي ام ماجد اذا خلصتي وگلبج عليهن اخذيهن يمج من رخصتكم ابو ماجد خلي حليم ايجيبله سياره ويشيل
نعاثيله لا تجي الشرطه وتذبهن اله بالشارع واذبه بالسجن وذني ايشوفلهن درب
وگفت وحاجيتها = شوفي حلا انتي فد وحده چذابه ومزوره ولو بيبي صدك كاتبتلج البيت قبل ما تنجلط چان
بذاك الوكت طردتينه بس انتي وقعتي بيبي وهيه عاجزه وخليتيني خدامه شوفي ولج ما راح انسالج
السويتي يجي يووم وارجعلج الصاع ميه خليني على بالج ما راح اسامحج
حلا // اي منين اتطلبينها امج منو
روان // صدكي وياج راح نسوي نفس السوته نهله
هي ضحكت باستهزاء ///هههههه ياالله بسرعه شيلن وصاختجن واطلعن من بيتي
هيه راحت الغرفتها ام ماجد اتقربت منها // اوكفي حلا تره الله موجود ولا تصدكيين راح يعوف حق مظلوم
ما ردت عليها سدت الباب بوجهها ام ماجد حاچتني // ياالله خلي انلم غراضكم
هيه طلعت راسها ///اي لموهن بس غرفة امي ممنوع يوصلنها
رحت جمعت الفراش وخليت المخده بداخل الدوشك لان الي بيها اكيد ايساعدنه وشلت التلفزيون ورحت للمطبخ
لميت المواعين وابو ماجد راح جاب كراتين وجمعنا الغراض الكاونتر اخذنا بس الي بي الغراض لان مال السنك
جان مكسر واخذنا الطباخ والقنينتين ام ماجد ويانه واخذنا الثلاجه وابو ماجد فتح المكيف الي بغرفتنا لان السبلت
الي بغرفة ابوي باعه يمكن بساعتين كملننه كل الغراض واجه ابوي ويه ابو ماجد وابنه وحملوهن بسياره بيكب
وانطى مفتاح المحل الابو ماجد وكله
– الرجال يطلبني 75 اجار نص شهر ادفعهن وانا بس اجي انقل البنات ارجعهن الك
ابو ماجد ساله // وين راح تروح ؟
ابوي حجى والعبره بصوته // راح اطلع من البصره
– – اي وين تروح ؟
– – خابرت صاحبي وكلي تعال وراح يشوف النه بيت اجار
– اي بس وين
– – الارض الله الواسعه
– ما تريد اتكلنه وين تاخذ البنات وتروح ابقى اهنا انا اشوفلك بيت واجره وابقى بمحلك
ابوي هز راسه // لا ابو ماجد ما الي وجه ارفعه كدام الناس مرتي وعافتني وباگتني وراحت واخوتي اتبرو مني مو توك خابرتهم
وگلولك ما النه شغل بي ما گدر ايضب مرته وخاف بناته ايجيبن النه العار مو گدامك خابرت ابن عمي ابو علي كلك ما عليه
ما اتدخل بعد ابقى شسوي
ابو ماجد // خلي ايولون
ابوي اتحسر // واختي شفتها شسوت اذا ابقى اهنا ارتكب جريمه اكتل ابنها گدامها وانوب اكتلها
ام ماجد // وشنو الفايده انت تروح للسجن وسليم ومعين ياخذون البيت ويشردون البنات
ابوي // انتي گلتيها ام ماجد رادوني اكتلها حتي ايسيبون بناتي وياخذون البيت خلي اروح والي الله
ابو ماجد مد ايده على جيبه وطلع فلوس وكله // هاك عمي انطي اجرة السياره
ابوي هز راسه // لا حجي هناك صاحبي ينطي الاجره
– – اخذهن عمي عود من يصير عندك رجعهن واذا ما عندك محولل وموهب
سلم ابوي على ابو ماجد واتشكر منه واشوف الرجال عيونه تدمع وهو يگول
استغفر الله يمكن لو مها ولد چان عرفت تتصرف وياهم
ابوي بحسره // الله كريم
– – عمي حليم انت هم انتبه النفسك وبطل السم الي تشربه
ام ماجد // اي والله يمه انت رايح الديره غريبه وما تعرف شنو ايتانيكم هناك وحملك ثكييل عندك بنات وما تدري
شنو الناس شفت شلون اقرب الناس الك شلون باعو بيك واشترو كله على مود وصخ الدنيا بس وين يرحون
من الله كل ظالم واله يوم
ام ماجد باوعتلي وكالت // مها ابوج تعبان انتي هسه المسؤوله عن اخواتج انتي ديري بالج عليهن من الناس
ومن الذيابه ومن الوكت ومن كل شي
جاوبتها وانا امسح بدموعي = اعرف بيبي لاتوصيني
– – ادري بيچ انتي سباعيه والصار ايخليج بعد اكثر سباعيه وما ينخاف عليج
رحنا بوسنا ام ماجد وحظناها وهيه تبچي يمكن الي صار خوف الناس انو بعد ماكو رحمه والواحد لازم
يحسب الكل شي حساب سلمنه عليها وانطتنا بطل ببسي فارغ بي ثلج وابو ماجد انطانه كيك ونساتل وجبس
كال الملاك
شفت الدموع بعيون الناس الغربه عكس الي المفروض همه اهلنه والي شفت بعيونهم نظرات التشفي والحقد والفساد
سلمنا وابوي ركب بالصدر يم السايق واخذ ملاك بحضنه واحنه ركبنا وره بالبيكب الي مشت واحنه ساكتات
بس دموعنا اتجاوب واحنا نودع المنطقه الي عشنا بيها والي شفنا بيها اشكال العذاب والفقر والضيم لكن
اتعودنه عليها هسه احنه مسافرين للمجهول وما نعرف شنو الي بانتظارنه ولا نعرف وين رايحين
انا انتچيت ع الدوشك والبنات گعدن يمي چنه ساكتات ومصدومات من الي صار بينه باوعتلي روان
– – مها وين رايحين
انا ساكته هيه مسحت دموعها وسالتني // مها وين تتصورين ابوي ماخذنه
= مو سمعتي كال يم صديقه راح ايشوف النه بيت
– – اي يعني ما تدرين وين
= وين ما چان بس اهم شي نبتعد من حلا وسليم ومعين
– – اي الچلاب
رهف // اهم شي اداوم مو
روان // ولج انتي وين واحنه وين لو تسكتين احسن الج
– – انا شگلت
نترت بيهن // بس كافي احنه بيا حال وانتن تتناكرن
سكتنا والسياره مشت بينه واشوف الناس الي اباقي السيارات ايباعولنه وگفتنا اكثر من سيطره والسايق ينزل وبعدها يجون ايباعون للغراض
ويباعولنه ويمشونه وهاي روان ما تنزل عينها وهذوله ايضلون ايباعولها
من تمشي السياره انا احجي وياها = نزلي عينج
– – شلون انزلها قابل احنا نمشي على رجلينه ما تشوفين شلون اهل السيارات بس ايباعولنه
= انچبي واحترمي نفسج
– – ظلي بمثالياتج ما تشوفينها شلون فادتنا
صار ليل والسياره تمشي بينه ورهف نامت على رجليه لمن ما وگفت وحسينه اجه رجال اتسالم ويه ابوي وحضنه
وكال //ياالله امشو عدنا بالبيت
– – لا ابو مصطفى انت بس دلينه وجزاك الله الف خير
– – شبيك حليم بيتي هوه بيتك شنو قليل انت ساعدتني لو انا اجيت البيتكم بتت يمك وامك الله يرحمها تطبخ
وتخلي كدامي
– – كثر الله خيرك ما ناسي المعروف
– – افه عليك ياالله انزل ياخوي بيتي بيتك
ابوي // – – لا والله تسوي عليه فضل تدلينه بالبيت
— البيت يرادله تنظيف والدنيا ليل
— مي خالف نروح نرتاح ونام والصبح البنات اينظفنه
– – بكيفك ياالله امشو بس البيت شويه بعيد
ابوي باستغراب // ها يعني مو يمك
– – حليم البيوت اهنا اجارهن تلثميه واربعميه انا شفتلك بيت تجاوز بي غرفتين ومطبخ وحمام راده صاحبه
125 استاجرته منه اب 75
– – كثر الله خيرك دلينه بي بس كون المنطقه زينه
– – على ضمانتي ناس خوش ناس (اجه الرجال يمنه )شلونچن عمو شفتو ابوجن ما يقبل تنزلون ترتاحن يمنه
احنه ما جاوبنا لان بوكتها چنه تعبانات هواي هو ركب يم ابوي الي انطاني ملاك ومشت السياره تقريبا ثلث ساعه
اكثر اقل نزلنه المنطقه وشفنه ناس طالعه من بيوتها لان صيف نزل ابو مصطفى ودك الباب طلع رجال اتسالم
ويا وابوي هم بعدها الرجال مشى اليم بيته وطلع مفتاح وفتح باب زغير
ابوي اجه وكال انزلن ادخلن للبيت انطيت ملاك الرهف وانا نزلت الدوشك الي لافه بي المخده وروان نزلت
جنطة بيها يمكن ملابسها
ونزلنه چان البيت اشبه بالمشتمل لكن چان تعبان اول ما ندخل كلدور زغير كلش يمه غرفه الها بابين
وبعدين مثل الطارمه بيها مطبخ وغرفه ويمها حمام وصحيات
فتحنه گلوب وابوي وابو مصطفى وياهم ولد شاب اجو نزلو الغراض
ابو مصطفى حجى ويه ابوي // هسه ارتاحو وباجر الصبح رتبو غراضكم براحتكم
ابوي اتسالم ويه السايق واتشكره وانطا اجرته وبعدها طلب من صاحب البيت ماي والرجال راح وجاب ترمز
زغير وگله هذا بي ثلج وماي
الغرف چانن وضخات بيهن تراب وبقايا زباله مال ساكن قبلنه لكن احنه بوكتها التعب ماخذ كل حيلنه بحيث
ما اهتمينه بس المهم نتمدد يمكن بس فرشنا الحصيره وفراشاتنه وابوي هم گعد ع الگاع انا فرشتله يمنه
هوه گال لا انام بالطارمه
رحت مديت الفراش بالطارمه چانت كلش زغيره وره ربع ساعه اندك الباب
ابوي گال // منو
– – انا ابو مصطفى
ابوي فتح الباب الرجال جايب عشا صمون وكباب وگال // اتعشو ونامو وباجر الصبح ان شاء الله اجيكم
ابوي // شنو هالزحمه توفيق
– – ماكو كل زحمه بالبيت ما قبلتو تنزلون اتعشو والصباح رباح
– – الي سويته الي اخوي ما سوا
– – وانا اخوك حليم صدك چذب
احنه رغم التعب والنعاس لكن هجمنا على الاكل لان كلش جوعانات روان تكول
ياريت يوميه ايطردونه ونلگى ناس مثل ابو ماجد ينطينه نساتل وجبس وناس مثل ابو مصطفى يجيب النه كباب
ضحكنا رغم المراره الي نحس بيها نمنا وما حسينه على شي لا الحر ولا التراب ولا الغربه چنه هلكانين من التعب
ويجوز من القهر كعدت الساعه بالسته الصبح احس نفسي متكسره
اتوضيت وصليت رغم ما اندل القبله بس صليت وبلشت انظف بالبيت لكيت مكناسه داخل الغرفه الجبيره اخذتها
وبلشت انظف
نظفت الغرفه واخذت حصيره فرشتها بيها وبعدها رحت للمطبخ جان زغير بس كافي علينه هم كنسته
ورحت زحت الطباخ والقنينه ركبتها ورجعت للكاونتر هو قديم والمنيوم خفيف شلته خليته ابمكانه
وصرت ارتب بالمواعين لمن ما صارت الساعه تقريبا بالتسعه
اندك الباب وانا رحت ندهت ابوي = بابا بابا اكعد
هوه فتح عيونه // هاا.
= الباب جاي يندك
گعد وراح فتحه اجه ابو مصطفى جايب ويا صمون وجبن وترمز چاي
شاف الغرفه نظيفه گلي عفيه بالسباعيه هاج خلي الابوج ريوك والباقي الجن
اخذت من عنده العلاكه ورحت صبيت الابوي كوب جاي وخليتله صمونتين وجبن واخذته اله
ابوي گلي // روحي جيبي العمج جاي شبيج
= والله نسيت
رحت صبيتله كوب چاي وجبته اله وهوه يسال اب ابوي // وهسه شراح تسوي
– – ما ادري علمي علمك
– – شنو من مله ذوله اخوانك
– – بعد هذا الي صار
– – روح النسابتك
ابوي باوعله مستفسر ابو مصطفى استردف // اقصد اهل مرتك
ابوي بارتباك // – – لا قطعنا علاقتنا بيهم من ماتت ام البنات
– – وهسه حليم الدنيا صعبه
– – من باجر اطلع للعماله
– – ياعماله تحجي صدك اهنا نص الناس كاتلها الجوع
– – چا شسوي
– – والله ماادري انا بعد يومين التحق اجيت ابلغك وهذا ابو البيت ما قبل اياجره الي اله انطيته شهرين مقدم
ابوي // ما قصرت بس يصير عدي ارجعهن الك
– – لا ياخي حچيت مو على مود اترجعهن بس اريدك تعرف حتى اتدبر نفسك ابو البيت كال الاجار شهر بشهره
ما اقبل لو يوم تاخير
ابوي // ان شاالله ما اعرف شلون اشكرك
– – احنه اخوان ما بيناتنا اكلك بس بهذا الحر لا بنكه بس بطرك المكيف
– – اي والله ما لحگت اجيب البنكه لان لو ما ابو ماجد جارنا يلحك عليه چان كتلت حلا وابنها
– – تحجي صدك تكتلها مافكرت بذني شنو مصيرهن
ابوي بحسره // هوه شننو الكاسر ظهري غير هذني
– – ولا يهمك هونها وتهون
من سمعت كلام ابو مصطفى ويه ابوي عرفت لازم اتصرف بسرعه وابوي باسرع وقت لازم يشتغل
رحت للمخده فتحتها ما اتفاجات من الشفته لان بيبيتي كلتلي بيها فلوس بقيت افكر اذا ابوي يعرف بيهن اكيد
راح ياخذهن بحجة اشتغل بيهن واعرف راح يصرفهن خلي اتصرف بذكاء چان المبلغ اربع ملايين اله
ميه وخمسين
صرت احمد ربي واشكره على هاي الثروه واترحم البيبي رغم عندي عتب وياها
اخذت مليون ورحت يم ابو مصطفى وانطيته المبلغ وسط ذهول ابوي وكتله
= عمو هاذي الفلوس بيبي خلتهن الي وكالت اكيد تحتاجيهن واريدك تشتري الابوي ستوته يسترزق منها
هو اخذهن وسط ذهول ابوي الي عاتبني بعيونه يعني ليش ما انطيتيهن الي
ابو مصطفى // عفيه عليج ضامتهن
هزيت راسي = اي عمو لان بيبي أمنتني گالت لا تطلعينهن اله اطلبهن منج واذا متت اخذيهن الج الله يخليك عمو لاترجع اذا
ما تشوف الابوي ستوته
ابو مصطفى يباوعلي // عفيه عليج ياالله امشينه حليم خلي نروح انشوفلك ستوته
ابوي // اي بس اغسل اديه
راح ابوي وانا طلعت ورا هوه لزمني من ايدي// هاي من يمته عندج الفلوس وما اتكليلي
= بابا بيبي خلتهن عندي
– – شكد هنه بس ذني
= اي بابا بس ذني ضميتهن وهسه اجه وكتهن
– – يعني منا منا
= ما عندي بابا هذني امنتهن بيبي عندي من انكسرت العام وكالت من احتاجهن اخذهن واذا بقن هنه الج
انا چان بنيتي انطيهن السليم بس ما ادري نسيت وهسه اتذكرتهن وطلعتهن
– – اي لو جايبتهن اليه اقلها دافع فلوس الاجار
= بابا انت رووح ويه عمو اشتري الستوته واشتغل وكل شي سهل
///////////////////////////////////////////////يتبع
