رواية عقارب ذوي القربي الفصل الرابع عشر 14 بقلم انين الليل
هذا البارت بي مفاجأه والخاطركم نشرته
/////////////////////
مها
عرفت بيبي بعد ما تحچي وبعد فقدت حتى يمكن ما صارت تعرفنا حتى صارت عاجزه وبس تباوع بعيونها
وانا اشوف بيبيتي الي چانت رغم مرضها لكن الها حس بالبيت والها شخصيه هسه اشوفها تعبانه ومو بحالنه
صارت عاجزه عاجزه كلش بيبي الطيبه هلگد الدنيا اذتها واذتنا بعد ما چانت كلمتها سيف وتمشي ع الكل
وصوتها يملي المكان هسه بس فاتحه عيونها وما تتحرك ومن طلعت من المستشفى انملا البيت بالاقارب الي
جاي يتشافولها
وانا وروان نركض منا ونروح منا مره ناخذ ماي ومره جاي واحنه بس للاوامر
وبعدها بايام كل واحد التهى بنفسه وصارو بس عمامي سليم ومعين يجونه بيومها كملت بيبي وخليتها على جربايتها
وروان نظفت البيت دخلت سبحت لان احس بروحي كلش تعبانه ومجرد ما طلعت من الحمام ورحت الغرفه بيبي
اريد امشط اندك الباب راحت روان فتحته لفيت الخاولي على شعري وسمعت صوت عمي سليم هوه وزوجته
وياهم معين وابنهم سهيل دخلو سلمو وانا رحت باوست عمتي كفايه ومعين طلب چاي رحت خدرته
واخذت الهم دولكة ماي خليتها ورجعت وكفت بالباب سليم سالني // حليم فووك
هزيت راسي بعدها باوع المعين وساله // يمته تنتقل للبيت
معين هز راسه // هالايام
حلا // اشتريت الاثاث
معين // اي كملت كل شي
كفايه بضحك // باقي بس المره
معين // بهاي الاوضاع
سليم // شبي وضعك
معين // ما تشوف امي
حلا صارت سيدة الموقف هيه وتحچي وتتحكم بكل شي // شنو يعني ما تتزوج
معين // لا مو هيج بس وضع امي مو تمام
حلا // باالله امي بقت عشر سنين شنو هم راح تبقى هالشكل لا معين بخلال شهرين تلاثه شوفلك بت حلال نخطبها الك
هز راسه وابتسم // – ان شاء الله
سليم طلع راح للحمام وانا رحت صبيت الچاي و قدمته ابوي نزل مر بغرفة بيبي وانا واكفه بالباب
هوه سلم واتقرب على بيبي باس راسها وكلها // اشلونج يمه
هيه ما منتبهه او يمكن ما صارت تعرفه وانا اشوف ابوي مكسور خاطره تلقائيا نزلن دموعي كفايه شافتني گالت
كافي عمي استهدي بالرحمن بيبيتج الله كتبلها هالشكل صيري قويه
حلا بشمخره // ليش شبيها وهيج تحچيين. وياها
كفايه // ما تشوفينها عمت عيونها من البچي
حلا // كلنه عمينه عيونه بعد هاي حال الدنيا
اجه سليم وشافني اشهگ هو گال // شبيها تبچي منو وياها
كفايه // هاي من طاحت عمتي وهيه بس تبجي عليها
ابوي // كافي بابا مها هذا الي مقدر عليها
سليم حضني وهوه ايكلي // اسكتي حبيبتي لا تبچيين شو ياالله امسحي دموعج
هو لزم اكتافي وباوعلي وهو يكول // اسكتي لا تبجيين صيري قويه
هزيت راسي ودموعي ينزلن ابوي راد يطلع سليم استوقفه // اوگف حليم رايدك
ابوي // ها ابو سهيل خير
ان شاالله بس الخير (گعد وصار يخوط بالاستكان كفايه سالته ) برد چايك
هوه باوعلي وگلي // بدلي
رحت رجعته للقوري وصبيتله وابوي عاد سواله // ها ابو سهيل
اخذ الاستكان مني وجاوبه // على كيفك شكو مستعجل
– لا بس رايد اعرف
سليم شرب من الجاي وكال // على مود امي
ابوي //شبيها امي
سليم // امي مو مثل گبل تحتاج علاج مكثف ومداراة وحفاظات حالها حال الطفل الجاهل
– اي
حلا // شنو اي تره فلوس اجار المحل وراتب الرعايه يادووب ايكفيها
ابوي // اي وشنو
حلا بقلة صبر // هم كال شنو اف…
قاطعها سليم // يعني لازم تشيل مصرفك ومصرف بناتك
ابوي باوع الهم حلا حچت // گبل امي راتبها شلون ما چان مگزره بي بناتك واجار المحل للعلاج هسه اختلف
الوضع ما صرنا نلحك
ابوي هز راسه // ان شالله
سليم // والنعم باالله بس انت اشتغل
-انا ما مقصر من يجيني شغل اشتغل
حلا // اي والفلوس تروح تشرب بيهن عرك
ابوي بعصبيه // انتي ما عليج منو انتي حتى تحاسبيني
حلا // ما احاسبك وما عليه بيك بس هذني (وتاشر عليه ) هذني يراد الهن اكل ولبس لو ناسي عدك بنات
ومن احد يحچي وياهن تگلب الكائنات
ابوي // بناتي ما مسويات شي حتى احد ايحاچيهن
حلا // هسه مو هذا حديثنا امي يراد الها علاج وخدمه وانا ابحدي ما اگدر
ابوي // شنو قصدج
باوعت ولملمت حلگها // قصدي مثل ما هيه امي امكم ولازم كلنه نتعاون على خدمتها انتو تعرفون عظم البني ادم شگد ثگييل وانا ما بيه اشيل
واخلي واغسل هم مره صحتي على گدي لا وهم عدي دوام
كفايه هزت ايدها حلا سالتها // شنو ام سهييل شو هزيتي ايدج كلامي بي شي
كفايه // لا ياعيني بس حلا تره للامانه انتي ما مسويه شي كله على مها وروان
حلا اتاشر اب ايدها // لا متوهمه كله عليه هنه ايساعدني شنو اخلي امي بايد الزعاطيط
كفايه // ليش زعاطيط والله انتي گاعده وهنه شايلات بيبيتهن على راسهن
حلا //. ام سهيل انتي تحچيين هيج خاف نگول اخذيها يمج
الكل اتفاجئ من كلام حلا الي اكتفت بهزراسها وتغيير ملامح وجهها
معين // شلون يعني تاخذها يمها
حلا // اي هيه مو بس امي ابحدي سليم ياخذها عشر تيام وانته هم معين تاخذها البيتك بعد تجيب الها خدامه
تريد انته تدير بالك عليها شي راجعلك وانا هم عشر تيام ومها واخواتها عشر تيام ونداور لو كلامي بي شي
كفايه // شنو هوه بكيفج حلا ناسيه عمتي گاعده ابيتها شنو ناخذها
حلا // خوش چا كل واحد بيكم يداريها هوه مرته بناته كل واحد بيكم ملزم بيها مثل ما انا ملزمه بيها
معين // هذا شلون حچي عيب لحد ايسمعج
حلا وگفت وچتفت اديها //انا هذا العندي
ابوي // حلا انتي عوفي كل شي ماعليج غصبن ما على بناتي هنه ايدارن بيبيتهن
حلا // انا ما قصدي شي امي اخليها بعيوني بس انتو هم ديرو بالكم عليه تره البيت والبنات والدوام مسؤوليه تكسر الظهر
كفايه // مها واخواتها ما مقصرات
سليم // خصم الحچي حلا امي ما محتاجه احد عدها راتبها واجار المحل وحليم يدير باله على بناته واحنه
هم ما راح انقصر
حلا هزت راسها // مو باچر تجون اتسالوني وين الاجار لو وين الراتب بعد هاي يمكم هل تشوفوها وتشوفون
شگد يرادلها علاج وشغلات
سليم // اي اي ندري ومحد ايحاسبج
وصار الاتفاق انو راتب بيبي وايجار المحل تاخذهن حلا اتجيب الها بيهن علاج او هيه هالشكل تكول
ومرت الايام انا وروان نغسل البيبي رغم تذمر روان ومرات تكول تلعب نفسي لكن انا ساكته وخليت
روان بس اتساعدني اشيلها واگعدها بالحمام اغسل الها واغير حفاظتها وملابسها وحلا من يجي احد تصير
هيه الي مشلوع گلبها وظهرها يوجعها من الشيل والحط ومو بس هيج لا وتربيتنا الصعبه بعد ما امي ذبتنا
وانا مضطره اسكت حتى ما تخلصها علينه عياط وصياح ومسبه وما اريد نتاثر بكلامها أقلمت نفسي على انو
اخدم بيبيتي وانا ساكته وهذا جزء بسيط الرد جميلها خصوصا عليه وهم ما اريد شي اياثر على دراستنا
ابوي صار يطلع للشغل ومن يجي ينطينه خمس تالاف ومرات ينطينه تلاثه ايگلي مشي حالج بيهن وبالليل
يطلع يروح يسكر ويرجع يصعد فووك وانا احتار شنو اسوي بيهن اكثر المرات نتغدا من الشوربه الي تبقى
من بيبي ومرات يقتصر غدانه على تمن خالي ويا تمر ودائما چنا نجيب بتيته وطماطه لو باذنجان وطماطه
ما صرنا تشوف اللحم او الدجاج لو السمج اله وين او وين
عمامي يجون ويطلعون بدون ما يسالون وسليم مرات يجيب مسواك واكثر شي فواكه اعصرها البيبي وحلا تاخذ
نصهن الها والابنها الي دووم تودي يجيب الها واله لفات كباب او دجاج شوي من المطعم واحنه نشم بس الريحه
الي تقهرني رهف تحب تاكل وصرنا مو دائما نلگى اكل
بقينه نفس ما احنه شغل وكراب وبيبي علينه وحلا يا بالدوام يا طالعه وروان دائما متاففه وانا بين البيت وبين بيبي
ابوي مو يمنه يجي وره الظهر ينطينه افلاس گوه ندبرهن للاكل وهو يصعد ينام ويطلع بالليل ما يجي اله نص
الليل ويجي سكران واذا حاچته حلا تصير تغلط علي وتسبه وتفشر على امي فهوه يجي يضربنه يعني
يطلع حركته بينه
محد انتبه على لبسنا واصلا محد بحالنه معين ملتهي ابيته الي اسمعهم يكولون بنا قصر حتى احلى من بيت سليم
وحلا بين الدوام والطلعه والتحكم بينه وسليم ملتهي بشغله واملاكه وحتى اشترى الابنه سياره جديده
اله احنه محد سأل علينه وصار من تجي عمه كفايه تجيب ملابس بتها القديمات تلبسهن روان لو رهف
ومن طلبت من ابوي ايجيبلي ملابس راح للبالات وجابلي ولبستهن اصلا فرحت من لبستهن لان ملابسي اتشگگن
چان يوم خميس عشيت بيبي ورحت خليت النه عشا جايبين فلافل وسويت چاي وگعدنا ناكل لمن ما اجه
سليم ومعين وعمه كفايه حلا سالتهم يتعشون بس همه ما قبلو كالو متعشين ابوي راد يطلع استوقف
رنت التلفون هوه باوعله وكال // رقم يتصل عليه
سليم // رد يجوز شغل
ابوي // ان شاالله الو
شفت ابوي اتغيرت ملامح وجهه وحتى رجف
اي وشتردين
باوعلي وگلي // هاچ هاي امچ تريد تحچي وياج
الكل باوعلي انا اخذت التلفون وحلا صارت تغلط وتسب لكن سليم سكتها
جريت نفس وگلت = الو
هلو ماما حبيبتي اشلونج
= زينه
– – ليش هيج تردين عليه ناسيه انا امج
اهنا اتذكرت كل شي كلامها واستفزازها وعدم خجلها اتذكرت كلام معين وسليم رديت بنتر
= لا ما ناسيه بس انتي الي نسيتي احنه بناتج
– – وشسويلچن اذا ابوچن ما يقبل اشوفچن
جاوبتها بقلة صبر = وهسه شتردين
– 0 انچبي وسكتي ما اريد منج شي ياحيوانه انطيني روان
ما اعرف ليش عيوني صارن يجرن عبالك حنفيه انطيت التلفون الروان الي گالت الها // الو
روان ما خلتها تكمل // واذا صار عندج ولد شي ما يخصنا مثل ما انتي نسيتينا احنه هم ما نريدج واصلا
الي يسالنه نگول امنه ماتت
روان سدته بوجهها وسط ذهول الكل
كفايه سالتني // شحاچتج وهيج صرتي تبچيين
ما جاوبتها سليم بنتر // اي غير اتفهمينه ليش تبچيين
ما جاوبتهم رحت للغرفه حضنت ملاك ورهف وفكرت بكلام روان لمن گالت احنه يتيمات وامنه ماتت من زمان
شلت ملاك واجيت يمهم وانا اباوع البيبي شلون تباوعلي لكن ما تگدر تحچي حلا ملتهيه تحچي بدون توقف
— —-شلون صلافه مخابره البنات شتريد منهن تريد اتعلمهن على دربها حتى ايصيرن مثلها
كفايه // تسكتي حلا كافي ما شفتيهن ما انطنها وجه
– – يمعوده لا يقشمرنكم هاي بس گدامنه
كفايه // گدامكم شنو منين تتصل بيهن
رن تلفون ابوي مره ثانيه وشافه گال // هسه هاي اليوم شتريد هم رجعت اتصلت
حلا باستهزاء // خاف اشتاقت
رد ابوي //ها انتي شتردين مو حچيتي ويه البنات
ها هلا بيج ام جود
ها هذا رقمج
الله يسلمج
عرفت هاي خالتي رابعه ابوي گال // بعد هنه بكيفهن شفتي بس خابرت انا انطيتهن التلفون ابو جود شلونه
الله يرزقكم اي هاي (باوعلي ) تعاي بابا مها حاچي خالتج رابعه
اخذت التلفون وبنفس رجفتي // الو
اشلونج مهاوي
= الحمد لله زينه
مها خاله تره مو عبالج ناسيتچن بس اكثر من مره اخابر بيبيتج وتاخذه عمتج ما تخلينه نحچي وياچن وهاي امي
شگد مشتاقه الچن
ما رديت عليها هيه استردفت // خاله مها الصار صار وامج الله ما كاتب الها تعيش ويه ابوچن بس ما يصير
هيه هم من حقها تشوفچن
ما ادري منين اجتني الشجاعه = بس احنه ما نريد انشوفها لان هيه تركتنا وما سالت علينه
– – لا مها انتي العاقله شلون هيج تحچيين
ردت اصرخ واگللها لان احنه اتعذبنا وانبذنا واحنه نشوف الناس ما متقبلتنه رديت عليها
= خاله احنه ما عدنا ام امنا ماتت افهمو امنا ماتت وما يربطنا اب اي احد من اهلها اي شي
ما سمعت شنو ردت انطيت التلفون الابوي الي كال
— ام جود البنات مصدومات حتى نسن امهن فليش اتفتحين مواضيع قديمه
ما اعرف شنو ردت بعدها ابوي جاوبها // لا يبقن بنات اختج يمته ما تحبين اتصلي عليهن
— لا والله ما عدهن جهاز خاص
— اتصلي وره المغزب انا موجود
— الحمد لله زينات انتو شلونكم
—ها يعني شلتو
— زين تسوون
— الله يسلمج
سدا ابوي وحلا سالته // شعدها اخت المسعده
ابوي هز راسه // ما عدها شي
فرت ايدها باستهزاء // شنو سر مو سمعنا كل شي
— اي ما طول سمعتو ليش تسالون
سليم //سمعتك اتگللها زين تسوون شكو شصاير
ابوي // مو هيه واهلها تركو ديالى وهيه استقرت ابغداد هيه ورجلها
سليم //واهلها ؟
– – بايعين املاكهم مشترين بالعماره
سليم // اي اتذكر من زمان راد ابو سجاد يرجع للعماره
حلا باستهزاء //والمسعده المتذكره اليوم تخابر بناتها
ابوي // هيه مخابره من رقم اختها
حلا //ياا مسويه على روحها زحمه (باوعت الروان ) صدك ولج شگلتلج منو هذا الي تكليلها مو اخونه
روان بتشفي // عمه هيه امي تگول صار عندي ولد وصار الچن اخو وسند من يكبر ايدافع عنچن وانتي سمعتي شنو رديت عليها
حلا وهيه تعض بشفتها عضات سريعه // اي سمعتج عفيه عليج
بقو يسولفون وانا وروان رحنه للغرفه وابوي طلع وهمه الساعه بالعشره راحو ورجعت لميت الاستكانات ونظفت
الغرفه بذيج الليله ما نمت انتظرت ابوي نيمت ملاك وانا اتمددت ومن سمعته اجه وصعد صعدت ورا دخل الغرفته
وهوه يبجي ويعاتب اب امي // هسه اليوم اتذكرتي تخابرين بناتج
– – ما تدرين من سمعت صوتج روحي ردتلي ياخاينه
– – اي انتي خاينه وكلشي مو زين بيج بس انا احبج احبج (صار يختض من البچي ) احبج وما اكدر انساج
صدك حقدت عليها لان هيه السبب بعذابنا واتمنى يصير عندي فد شي انتقم منها واشربها من العذاب الي شربنه منه
وبقينا هذا روتينه وايامنا كلها تشبه بعض شغل ودراسه ومداراة البيبي شفت بعيون روان التمرد والحقد وشفتها
هيه وعمي معين داىما يسولفون ويضحكون
اما رهف فملتهيه تقرا وترسم وملاك دووم تريد (عم يعني اكل ) وابوي زاد بالشرب صار مدمن ويمكن صار
يشرب حتى بالنهار ومحد يحچي ويا
معين انتقل البيته ويجي يمر علينه وبعدها عرفنا خطب بت اخت عمه كفايه
بيوم چنت رايحه للمدرسه ولان صرنا انا وروان نداوم سووا چانت رهف تجي ركض حتى تبقى يم ملاك واحنه
نروح للدوام نركض ومرات روان تروح قبلي وصلت للمدرسه شفت ست سهام واگفه سلمت عليها
هي ردت وگلتلي // انا اليوم ما رجعت البيتي انتظرتج
انا مستعجله = خير ست بس لازم اروح للصف
لا استاذنت من مديرتج تعاي رايده احچي وياج
= نعم ست
– – ماما انا ما قبلت احاچيج گدام عمتج لان رقيه مسولفتلي عنها وعن اجرامها بيچن تعرفين رهف صديقة رقيه
وما تضم عليها شي
جاوبتها باستغراب = اي ست شصاير
– – ماما شعر اختج رهف كلش وصخ يعني بي گمل وصواب ليش
دگيت على خدي = والله ست ما منتبها اله
– – حرامات شعرها حلو وانا متاكده من تدري عمتج …
قاطعتها وانا دموعي بعيني = فدوه ست الله يخليج من تدري عمتي تگصه ومو بعيده تزينه الها
– – زين ماما نظفي
هزيت راسي = اي ست اليوم بس ارجع انظفه بس لا تكولين العمتي
هزت راسها باسف وراحت وانا طول الوكت افكر بكلامها رجعت ولاكتني حلا
– – ياالله بسرعه بدلي وتعاي غسلي البيبيتج وغيريلها
هزيت راسي وانا حاقده عليها يعني حتى ما تخليني ارتاح رحت نزعت ملابسي ورحت اخذت بيبي للحمام
وغسلت الها وغيرت ملابسها ورجعتها وانوب گالت //مو تنسين اغسلي ملابسها ونظفي الحمام وسويلها عشا
– – وانتي اروينه شوفي شتجيبلجن عشا ابوچن خلى عد رهف فلوس
روان جاوبتها باستهزاء // عاد من زود الفلوس الخلاهن
سالتني روان // ابوج مخلي خمس تالاف شنجيب بيهن
= كيلو طماطه وكيلو باذنجان وبالف بيض وصمون
ها
= اي الطماطه والباذنجان للغدا والبيض نتعشى بيهن
روان // وشنتريك ؟
= صمون وچاي شنتريك يعني
راحت روان وجابت المسواك ورجعت الف انا رحت الرهف هاي الج خمسميه وانتي روان ربع وملوكه ربع
روان // لا خليهن الملوكه خطيه انا چبيره اتحمل
كملت شوربة بيبي وجبتها وكلتها وروان خبطت بيضتين وفوك طماطيات اثنين وجابتهن وهيه اتگل الرهف
– – ياالله حبيبتي رهوفه سويتلج عشا وضميت لج بيضه للصبح تتريكين بيها ام بطن
رهف لمعن عيونها اقلها ضمنت ريوگها بعد ما كملنه العشا ابوي طلع وحلا بغرفتها طلبت من روان تبقى يم بيبي
وتاخذ ملاك ومن سالتني سولفت الها هيه صارت تحك بشعرها لا ارادي // يجوز حتى عاديتني وعاديه ملوكه
= ما ادري خلي اشوفها وبعدين افتش شعرج وشعر ملوكه
وجبت جرجف قديم وجبت نفط والمشط وروان بالبدايه خافت ما قبلت بس من هددتها بحلا وممكن تزين شعرها
قبلت فتحته وخليت نفط باطراف المشط وصرت امشط شعرها لمن ما نظفته الها وبعدها اخذتها وغسلته بالتايت
وكتلها يوميه نغسله بتايت حتى ينظف
وثاني يوم شفت شعر روان الي ما بي لكن ملاك چان بي يعني عاديتها رهف وهم نظفته الها وانا احس انو فعلا
كلام ست سهام انا مسؤوله عن اخواتي وانا بمثابة امهن وخليت روان تشوف شعري وكالت ما بي لكن ما صدكتها
صرت اغسله بتايت وامشطه بالحمام
انا مو مثل باقي البنات يعني بعمري اي بنيه تشوف نفسها صارت مرغوبه وتفرح من تسمع كلمة حلوه لكن انا
حتى ما عندي وكت اسمع كلمة ثناء او نظره لان كل وكتي سريع يعني لازم اطلع فايت وكت واروح بسرعه
للمدرسه ولازم ارجع بسرعه حتى اتحاشى عياط حلا
بيوم رجعت من المدرسه شفت ابابنا طابوك وباب حديد كبير ما سالت لان ما اعرف المن هذني
بالليل اجه معين وسليم ودزو روان على ابوي اجه وسلم معين ساله بنفس نبرة الاستهزاء مالته
– – ها شعجب بعدك الهسه ما طالع
ابوي جاوبه // لا هسه اطلع
حلا // ههههه مو خطيه يشتغل حارس
ابوي بعصبيه // انتي الى متى تبقيين ما تستحيين شعليج بيه
حلا بعصبيه // وانا شگلت اكلتني بكشوري
سليم // كافي حلا حليم ليش وديت علينه
– – اريد اعرف شنو هذا الطابوك
سليم //انا ومعين انريد ناخذلنه محلين من البيت
ابوي باستغراب // – شلون محلين ؟
معين // البيت چبير وانا محتاجلي محل وابو سهيل هم ايطلعله محل
ابوي // محليش
سليم // محل مثل المخزن ليش عدك اعتراض
ابوي هز راسه // اي عدي شنو البيت مو انا كاعد بي
سليم // البيت چبير واحنه راح ناخذ الگراج والطارمه اشو ظالات فارغات
ابوي // بس هيج البيت يختنك
سليم // ما علي شي اقلها نستفاد منه
ابوي // – – وانا ؟
سليم // انته محد لازمك اذا عندك فلوس افتحلك محل
– – وانا منيلي
سليم // طبعا منيلك اذا انته اربعه وعشرين ساعه سكران ليش العرك يبقي عدك فلوس
ابوي بقلة صبر //اهوو سليم هسه درت عليه بكيفكم ما عليه انا سوو الي تردونه
عمتي حلا اول مره اشوفها ساكته ما عقبت وابوي طلع سليم باوع الها
– – شعجب ما حچيتي حلا منچ من الشيطان
– – شحچي انتو جبتو الطابوك والسمنت ومقررين بعد شحچي
– – حلا لاتنسين هذا بيت ابونه والنه حق بي
حلا // لا سليم بيت امنه لاتنسى هذا الشي بس اكول انتو ما عايزين ليش
سليم // شنو ليش
حلا // ليش راح تبنون صلوات عدكم خير
سليم // اي واذا عدنا خير نزيده ما انقصه وبدل ما باقي الگراج والطارمه شكبرهن خلي نستفاد منهن
خو ما عندج اعتراض
حلا // لا عليمن سوو الي تردونه
معين // خاف يعني تردينه نفتح محل الحليم
سليم // اي حتى اسبوعين ويگلبه خماره وشهر ايبيعه
حلا // مالي شغل شنو تردون سوو
اتعجبت من برود عمتي حلا الي اعرفها هيه تموت الف موته ع الفلس لكن هالمره ما حچت وبدو العمال يشتغلون
وبيتنا حتى الشمس ما صارت تدخله كل هذا وانا مكسور ظهري بين بيبي وشغل البيت والدراسه اكثر من مره
حاولت حلا وياي ابطل بس انا ما قبلت چان كلام بيبي ونصايحها الي بكل خطوه اخطوها
فديوم العصر حلا كاعده بالصاله الداخليه خابرت كفايه // الو اشلونج ام سهيل
– – هلا بيج حبيبيتي
– – امي زينه
– – اگلج كلش ضايجه ومختنكه ما تخلينه نروح للحديقه نشم هوا
– – امي يبقن يمها البنات
– – ياالله نص ساعه وامر عليج
سمعنا كلام حلا روان ورهف اجن يمها وصارن يتوسلن الها بس تاخذهن وهيه ما تقبل بحجة منو يبقى يم امي
جاوبتها = عمه الله يخليج اخذيهن
حلا بعصبيه // وانا منيلي مو يراد الهن عشا
= عمه هسه دقايق واسويلهن معكرونه وياخذنها وياهن ما يكلفنج بس كروة السياره
اتصل سليم وهيه ردت علي // هلا ابو سهيل
– – اي والله خابرت كفايه انوب هذني لزن ويانه
– – روان ورهف وياخذن ملاك
– – تبقى يم امي مها
– – ياالله زين طال عمرك
– – چا وانته
– – زين ما نتاخر ساعتين ونرجع بس نتعشى
باوعت النه وهنه مترقبات وكالت // عمچن سليم راح يجيب عشا كباب وسهيل ياخذنه بسيارته ولو راح نتحاشك بس ياالله
ما اوصف فرحتهن راحن بدلن بسرعه وطلعن وهنه يمكن الدنيا ما سايعه فرحتهن وانا بقيت يم بيبي سويت
الها شوربه وكلتها وانطيتها دواها وفرحانه لان اخواتي طلعن يتونسن
نزل ابوي خليتله عشا سويت شعريه حلوه وعندي خبزات من البارحه صبيتله اكل شويه وسال
– – شو اليوم البيت صنطه وين اخواتج
= بابا راحن ويه عمه حلا وبيت عمي سليم للحديقه يتعشون ويجون
– – شوكت شو ما ادري
= قبل ساعه وهسه منا وهيج يجن
– – وبس انتي باقيه يم امي
= بابا ما عليه شي
باوعلي ابوي وگلي //. گومي سرگي الباب انا طالع خو ما تخافين
هزيت راسي وابتسمت = لا بابا منين اخاف
زين انا رايح
طلع ابوي وانا بقيت اباوع ع التلفزيون ويمكن بيبي نامت اندك الباب اتعجبت معقوله اجن بهالسرعه
طلعت سالت = منو
– – انا سليم افتحي الباب
فتحت الباب =هلا عمو
– – هلا بيج بس انتي بالبيت
= اي عمو البنات راحن وياكم
– – اي اي ابوج طلع مو وامي وين
جاوبته وانا اشوفه مو على بعضه = نايمه عشيتها ونامت
– – عفيه بالسباعيه
دخل الغرفة بيبي گعد وگلي // روحي سويلي چاي
= صار عمو
رحت للمطبخ وخليت ماي بالقوري وبقيت واگفه منتظره يفور الماي دايره اريد اطلع قوطية الچاي وحسيت اكو
واحد متقرب عليه باوعت نزيت شفته عمي سليم وهوه مقرب جسمه عليه باوعتله وانا اشوف عيونه حمر
ما اعرف ليش خفت بلعت ريگي وجاوبته = هسه شويه ويخدر الجاي
لزمني من ايدي وكلي عوفي الجاي (طفى العين ) ولزمني من ايدي اخذني ودخلني الغرفة معين باوعتله
= ها عمو شكو
اتقرب مني وگلي // مها اريد احجي وياج
=خير عمو
– – كل الخير
سد الباب بقيت اباوعله اتقرب مني // مها شبيج ليش اشوفج خايفه
حاولت ما ابين خوفي = لا عمو اكو وحده تخاف من عمها
ههههه عفيه (گعد ع الجربايه وحاطني بايده وهو يضغط على چتفي وكال ) بس انا مو عمج
صدك خفت خصوصا وهو مد ايده على صدري انا انتفضت = عمو انته شجاي اتسوي
وگف مقابيلي وخلى اصبعه على حلگه // – لا تكولين عمو اموتج اذا سمعت هاي الكلمه منج
اتقرب مني صار ايشم برگبتي ويقرب جسمه وهو يمرر ادي
= عمو الله يخليك انا بت اخوك
هو ولا يمي وانا احس بانفاسه خنكتني صرت مفرفحه جوا احاول ادفعه ماكو وهوه حاصرني وايده تتلمس بيه
– – انتي بس طاوعيني وانا كل شي اسويلج ادللج
= عمو حرام عليك هدني عمو الله يخليك
– – اشش صوتج
= عمو انا بت اخوك
هوه باوعلي وصفن بوجهي وهو ضاغط على جسمي
– – بت اخوي لو جنتي بت اخوي ما افكر لحظه اتقرب لج انتي بت نهله نهله وبس تعرفيها نهله
منو الگ…الي تطلع ويه الزلم فانتن مو بنات اخوي
اتقرب اكثر اللحظه حسيت نفسي انتهييت وصوتي اختنك لكن ما اعرف شلون خليت ايدي على عيونه فكستهن وهوه
صاح //ااخ
رحت اركض الغرفة بيبي قفلتها عليه
اجه وانا واكفه وراها صار ايگلي //قفلتيها بت الكلب وين ترحيين الزمج الزمج
= عمو الله يخليك انا بت اخوك
– – انچبي انتي بت نهله نهله الت…وشوف منين جابتچن انا الج وين ترحين
= والله اعيط والم عليك الناس
– تسوينها بت الگح…
صرت ابچي = عمي روح الله يخليك
– – رايح بس وين ترحين وراج وراج وغصبن عليج اخذ الاريده منج واذا فكيتي حلگج اخطفج انتي واخواتج
واغتصبجن وحده وره الثانيه وتدرين بيه اسويها
سمعته يسب ويفشر ويتوعد حسيت بي طلع لكن انا ما فتحت الباب بقى جسمي يختض من الخوف وفكري متشوش
ليش هيج معقول عمي سليم يتحارش بيه انا اصير بت اخو هوه عمي واخو ابوي معقوله يتحارش بيه
لعبت نفسي من اتذكرت الموقف اتقيأت بالغرفه لزمت خاولي مسحته من على ملابسي والكاع وانا اتخايله
شلون مد ايده عليه وصار يمرر بيها على جسمي صرت ابچي واباوع البيبي الي نايمه وانا اكول
1
= ياربي شلون بيه وين اروح والمن اشكي
قررت الصبح اروح المرته واگللها اي هوه هذا الي راح يصير لو احچي الابنه سهيل لو احچي المعين
= ياربي ليش هيج انا شمسويه ياربي ساعدني
اندك الباب ما گمت اندك مره ثانيه قوي رحت گلت = منو
– – انا افتحي الباب
عرفت حلا واخواتي اجن فتحت الباب شفت الفرحه على وجهن باوعتلي روان استغربت //شبيج مها
= ما بيه چنت نايمه ومن سمعت الباب يندك فزيت مرعوبه
///////////////////////////////////يتبع
