رواية عقارب ذوي القربي الفصل الثاني عشر 12 بقلم انين الليل
مها
من سمعت كلام ابوي وشلون يستعطف امي بقيت كاعده بالسطح لا اكدر انزل ولا اگدر ادخل للغرفه بقيت
گاعده وانا كلامه يرن اباذني ومقهوره ليش ينزل نفسه الوحده مثل امي وگفت وجريت نفس ودكيت الباب
منو
= انا بابا
فتحت الباب شفته يمسح بدموعه ويداري وجهه //سالني ها مها
= بابا رهوفه تريد اتباوع ع التلفزيون واحنه هم وبيبي بس ع الاخبار
اصعدن اهنا باوعن
= بابا والبيت شلون نهوس غرفتك
چا شتردين اشتري تلفزيون
= لا بابا انته ما تكعد تباوع كله بالشغل ناخذ هذا انزله جوه بغرفتنا
هز راسه // اخذي
گمت بسرعه فتحت الريسيفر وشلعت الوايرات ونزلت شلت التلفزيون والريسيفر وانا استرق النظر الابوي
الي چان گاعد ويجر بنفسه قوي طلعت من الغرفه وخليت الريسيفر اباب غرفة ابوي ونزلت التلفزيون لان
خفت يوگع خليته بالغرفه وما اوصف فرحة البنات صعدت مره ثانيه واخذت الريسيفر واسمع ابوي يشهك
من البچي ويحچي
– – بت الكلب اتگلي ما اريدك لان تشرب عرك هوه منو خلاني اشرب غيرج منو عذبني غيرج كل شي ما تقبلين
علي ولا يعجبج هسه اتگليلي ما اريدك ما تعرفين انا اريدج واحبج واتحمل كل شي الخاطيرج
نزلت وانا مقهوره من الي سمعته معقوله هلگد ابوي يحب امي ويتحمل كل شي بس حتى ترجع معقوله يريد
ايرجعها بعد كل شي سوته نزلت وبديت اسوي بالتلفزيون رغم مو هلگد اعرف بس لان فتحته اتذكرت شلون
ااركب الريسيفر
خليت التلفزيون على الميز الي بي ملابسنه وكملته وشغلته واشوف الفرحه بعيون رهف
روان // ليش ما نزلتي الميز الي مخلينه علي
= على شنو روان هذا ميز وكلش كافي
روان // صحيح كلامج هذا كلش كافي
اعرف روان ما مقتنعه بلي احنه بي لكن هذا واقعنه ومشت حياتنا هالشكل انا وروان نتبادل على ملاك وشغل البيت اكثر شي عليه
يعني ملاك بالليل من
تگعد انا ارجع انيمها واسويلها الممه واغير الها والطبخ انا اساعد بي بيبي واكثر شغلنه نكمله بالليل واحنه
طبيعتنا ما نوصخ البيت لان اكثر شي گعدتنا بالغرفه بين الدراسه والتلفزيون
ابوي ما صرنا نشوفه اله نادرا واكثر شي الصبح من يكعد يروح للمحل مرات يرجع الظهر يتغدا ومرات لا ما يجي
وبالليل دائما يجي متاخر واسمع بيبي تحچي علي وتگله
بناتك اولى من هذا السم الي تشربه
وهوه مرات يضحك ومرات يبقى ايعيط // شبيهن بناتي شعايزات ياكلن ويشربن
ومرات يبقى يحچي ويسب ويبچي
بيبي اجت جابتلي جبه وگلتلي // هاي تلبسيها فوك ملابسج من ترحين للمدرسه
جاوبتها باستغراب = ليش بيبي ؟
– – كبرتي وصرتي مره الي يشوفج يكول عمرچ ثمنطعش ما يگول بالاول متوسط
رحت اگدر الجبه واباوع النفسي بالمرايه الي بغرفة بيبيتي صدگ كبرت صدري برز وملامح وجهي متغيره
ولبست الجبه فوك ملابسي واتاقلمنه ويه حياتنا وانا واخواتي من النوع القنوع يعني اي شي ناكل وملابسنا
نفس ما هيه مو اله انبدل او نشتري جديد وخصوصا انو ابوي صار اكثر عصبيه ودووم اسمع عمامي يگولون
البيبي ابنج صار مدمن وحتى صار ايكبسل بالبدايه ما عرفت شنو ايكبسل بعدين عرفت انو يتعاطى حبوب مخدره
ومرات يجي حتى ما يعرفنه وثاني يوم يكعد عصبي علينه وياويل رهف لو طلبت من عنده ربع يكفر بيها
امتحنا نهاية السنه ونجحنا رهف الاولى وروان نجحت من الخامس للسادس لكن درجاتها وسط وانا نجحت رحت
الصف الاول المتوسط ودرجاتي بين الثمانيين والسبعين واهم شي نجحنا وصارت العطله الصيفيه وصارت حلا
تجي دائما قبل چان الدوام وبيتها ورجلها هسه صارت اتداوم يمنه تگعد وتصير تتشرط علينه سوي هذا وجيبي هذا
من تجي حلا انا اطلب من رهف تگعد بالغرفه وتدير بالها على ملاك وانا وروان نشتغل ونلبي طلباتها
واجت مرت عمي كفايه وكالت البيبي // عمه نريد نروح للزياره ما ترحين ويانه
بيبي // ياريت بس البنات وين اخليهن
حلا // شنو يمه انتي تبقيين هذا حالج شكالن البنات وشحچن البنات
بيبي // ها حلا وين اخليهن يمج علوا اخذيهن شكم يووم وخليني اروح ازور وانا مطمئنه
حلا // يا ماليش يبقن يمي
بيبي رفعت حاجبها // كافي اسكتي لاتحچيين انا ما اروح واخلي البنات ابحدهن
كفايه // عمه شعليهن البنات ما شاء الله كبار ومعتمدات على نفسهن ومن نروح ابوهن يمهن ومعين
بيبي هزت راسها // عود اشوف الله كريم
وره يومين راحو بيت عمي سليم للزياره وبيبي بقت ما راحت سالتها = بيبي ليش ما رحتي
جاوبتني // ما بيه حيل سفر وتعب
بيت سليم بقو خمس تيام ورجعو وثاني يوم اجونه وعمه كفايه جايبه علاگه خلتها بايد بيبي گعدو شويه وراحو
وسليم مو مثل كل مره يسولف ويه بيبي ويضحك شفته ضايج من راحو فتحت بيبي العلاگه جانت جايبه فوطه
الها وشكالات النه ودهينه بيبي قسمتها علينه وضمت الابوي منها
وراها بااربع تيام العصر اجت حلا وبقت عدنا لليل وبيومها جبنه فلافل وصمون وببسي واتعشينه وهيه
رادت چاي انا خدرت وجبت الها لان ما تشرب الببسي وره ما كملنه كفيت المواعين بسرعه ورحنه انا واخواتي
گعدنا ع التلفزيون اندك الباب وراحت حلا فتحته باوعت من الشباك شفت عمي سليم ومرته وابنه سهيل وعمي
معين راحو الغرفة بيبي وكعدو وحلا جابت الهم چاي
انا ما طلعت رهف ترسم شخابيط وروان اتابع مسلسل وانا يمي ملاك الي چانت هادئه بشكل مجرد ما ترضع تنام
او تسكت حتى مرات من اشتغل انساها ما اجي اشوفها ومن اجيها الگاها بكاروكها ساكته لكن اخذني الفضول
ليش جايين شعدهم طلعت من الغرفه بعد ان وصيت البنات ما يطلعن وصلت يم مكاني المعتاد والي محد منتبه اله
كفايه // چا وين البنات
حلا بونه // بغرفتهن بس انا ما عندي غرفه
كفايه // وليش هالشكل تحچيين
حلا // وشگايله انا اگول بس انا ما عندي غرفه
كفايه وهيه تضحك // طبعا ما عندج غرفه عندج بيت هههه
حلا سكتت ما جاوبت بيبي سالت سليم
شبيك سليم شكو
هو جر نفس قري // البنات
يابنات
هذني مها واخواتها
بيبي // نصي صوتك شبيهن
شنو يمه اشبيهن البنات لازم حليم يشوفله صرفه وياهن
هوه هذا شلون حچي مو گلنه سدو الموضوع
حلا //هذا الحچي الصح
بيبي بعصبيه // اسكتي انتي لا تذبين ع النار نفط
حلا // ها چي حچيت الصدك
بيبي // سليم احنه ذاك اليوم مو حچينه
سليم // شحچينه بعدني ما فاك حلگي وانتي سويتيها قضيه وزعلتي وما رحتي ويانه للزياره
كفايه // عمه على كيفج اگعدو واتفاهمو
حلا هزت راسها // اي يمه اسمعي من ابو سهيل والكلام اخذ وعطا
بيبي // شو كل الي الزمه يگول اتفاهمو ياالله بالله على شنو اتفاهم
سليم // يمه هذني
بيبي بقلة صبر // شبيهن هذني
سليم // لازم حليم يشوف الهن صرفه شنو باقيات اهنا وانتي محتاره بيهن
بيبي بعصبيه // وين تريدني اوديهن سليم تريدني اشمرهن على امهن مو انت تكول مو زينه ومن يروحن هيه
شتسوي بيهن
سليم بنفس العصبيه // مشكلتها انا حچيت ويه اخوها وگتله مثل ما انهزمت وباگتنا تاخذ بناتها
بيبي // واخوها شگال مو صار يتهدد وانته تتهم اختي وراح اگعدك للحق ولو انا لو انته ومو انته نفسك گلت
موضوع الفلوس سدو وبعد لاتحچون بي
سليم // اي گلت بس مقابل الشي الي اخذته تاخذ بناتها ما مسؤولين عنهن
– – مو انتو عمامهن وحليم ابوهن
سليم باوع البيبيبعدم اهتمام وسالها // ومنو يگول ؟
بيبي بعصبيه // ولك سليم شنو هالحچي
سليم وگف واتقزب على بيبي وحچى بهدوء //يمه انا وانتي نعرف كلش زين منو نهله
حلا // ليش تحچي مداسر كلنه نعرف منو نهله ومن چنت احچي انتو ما صدگتوني
بيبي بعصبيه // واذا صدگناج شتسوين ولج انتي وره ما سويتيلج حچايه شكبرها وزعلتي وبعد ما ارجعله
صرتي تتوسلين بكفايه وبيه بلكي سليم ايحاچي رافد وارجع ورجعتي وهو گاعد ابيتج لو نسيتي
حلا فلت وجهها ردت //لا يمه ما نسيت ويبقى رافد رجال والي يسوي ما يعيبه مو مثل المره لو سوت شي تبقى لطخه بيها
طوول عمرها
سليم // يمه ما ادري انتي ليش ملتزمه بالبنات شعدج وياهن
بيبي // ما عدي سليم ولا محتاجتهن بس اريد حليم يتزوج وبعد مالي شغل ابناته
معين // يمه انتي شتحچيين حليم ما يفكر يتزوج
– – وليش باالله
معين // انا سالته هوه گلي ما اتزوج
سليم // وابنج منو اصلا اتفكر تاخذه
بيبي // ليش شبي
سليم // ما بي شي بس تدرين الناس الها الظاهر وهيه ما شاء الله تمشي وتثور اموتني جوع شراب
عرك يلعب اقمار يعني هيه بعين الناس شريفه انهزمت من حليم لان اموتها جوع بعد منو ينطي مره لا
وعده اربع بنات
حلا // وشلون بنات على امهن
بيبي // انچبي حلا
حلا // هو انا كل ما احچي انچبي وانچبي
سليم // هسه عوفونه من هذا الكلام يمه البنات تودينهن الامهن احنه ما مسؤولين عنهن
نزل ابوي شفته وكفت وهوه ما اهتملي سال // سليم منو هذني الي ما مسؤولين عنهن ؟
سليم // البنات مها واخواتها
بيبي رادت اتبرد الموقف // يمه اخوك يگول البنات يرحن يم امهن احسن الهن
ابوي /. ها وانتو تقررون بكيفكم انا وين رحت
سليم بنتر // احنه جاي انبلغك امي مو مربيه البناتك تره ما يصير امهن دايحه وانته متروس
حلكك خ…من وره السم الي تسممه وامي محتاره بيهن
ابوي بعصبيه //احترم نفسك سليم
وگف سليم // محترم نفسي انته انته الي اريدك تحترم نفسك وتحس عليها وتودي البنات الامهن
ابوي // وين اوديهن مو تكول امهن دايحه يعني تريدني اوديهن اتديحهن وياها
سليم //- – خلي شتسويلهن اتسوي ولك كافي افهم انت …
ابوي قاطع سليم ورفع اصبعه // “شوف سليم الكل يسمعني بناتي ما اتخلى عنهن اله من اموت
سليم بعصبيه //اكل تبن وانچب …
بيبي // يمه استهدو بالرحمن سليم شتريد من اخوك
سليم // ما اريد البنات اهنا هذا الي اريده
ابوي //مو بكيفك هذا بيت ابوي الي بي مثل ما انت الك بي وبناتي يبقن عدي
سليم وهو رافع ايده يريد يدفع ابوي //ولك منو يگول بناتك
بيبي // كافي سليم
ابوي // لا حجيه خلي يحجي
– – احچي ما خايف منك البنات ما يبقن
– – وانا گلت ما يطلعن اله انا جنازه
– – وانا اسويك جنازه وما اخلي البنات اهنا
بيبي بعتب // ليش يمه سليم
– – يمه كلنه ندري وانتي اولنه البنات امهن نهله الي تن…والي ما مخليته بنفس واحد احچي لو كافي
بيبي // انچب سليم
– – ما انچب (باوع الابوي كمشه من ياخته ) ولك كافي حس على نفسك انت مو گرن كافي ذني بنات نهله مو بناتك افتهم
بيبي // سليم اسكت
– – ما اسكت اريد افهمه الهذا ابنج الشفيه شنو هيه ولك البارحه شايفينها بالبصره جايه الفندق تگدرون تگلولي
المن جايه مو اهلها بديالى واتطلگت المن جايه اهنا
حلا باستهزاء // جايه تغير جو وتتونس
بيبي // انته شفتها
هز راسه // ما عليج يمه انا مو زعطوط واچذب كافي خلي تاخذ بناتها وتفكنه
صار سكون ابوي راح يمشي صوب الباب سليم // اوگف حليم تودي البنات الامهن وهيه اخذت ثمن تربيتهن وكافي لهنا وكافي
ابوي اتحسر وجر نفس ورجع على سليم وجاوبه وهو اياشر عليهم // اسمعني وكلكم اسمعوني بناتي
ما اتخلى عنهن لمن ما تطير هاي (وضرب على رگبته)
سليم // اذبحك والله
ابوي //اذبحني وما انطي بناتي امهن تن…على نفسها گح… طبها طوب انا طلگتها والعار يشيلونه اهلها انا بناتي
ما اتخلى عنهن افتهمو ما اتخلى عنهن
فتح الباب وسدا ورا بقوه سليم باستهزاء // ضاج الافندي طايح الحظ
بيبي // كافي سليم بنات حليم انا ما انطيهن اخليهن عدي مو لشي لا لان ادري بيهن هنه بنات ابني
حلا // وينه ابنج وين راح يشرب سم ويجيج يتطوطح بنات ابنها على حورهن امهن گح… وابوهن سكير
بيبي //وبعد شعدكم تره هذا البيت بيت حليم وهوه يگدر يطردكم منه
سليم // ظلي دافعي عنه مثل ما گبل تدافعين عن نهله وخوش طلعتي عينها
بيبي // ليش بس ادافع عن نهله وما مدافعه عن مرتك ليش انا مقصره ويه واحد بيكم بس گتلك البنات ما عليهن امهن موخوش
ادميه على نفسها وطلگها وراحت عساها ما ترجع ذني بنات ابني ما اتخلى عنهن
سليم باستهزاء //بنات ابنج منو يكول يمه انتي تدرين وانا اتاكدت ومعين شاف بعينه كافي تره البنات
لا بناتنا ولا النه بيهن صله والدليل واگفه بنص الزلم تگول هوه مو رجال ما بي خيير بعد شتردينها تكول
هاي هيه بينت وضعها تره هوه ما بي خيير وهذني شوف منين جايبتهن
بيبي تنكت صدر دشداشتها //استغفر ربك يمه سليم انته صاحب وليدات وعدك بنيه
سليم // يمه مستغفر ربي وانتي تدرين انا ما جايب شي من عندي
حلا // ها يعني تدرين بمرت ابنج مو زينه وچنتي تدافعين عنها
بيبي بعصبيه // ما ادافع ما شفت بعيني شي ردتها تنتبه البيتها وبناتها ادافع عنها لان حليم يحبها
ويموت عليها ادافع عنها لان ذني بنات ما الهن سند
حلا بتشفي // حل اي والله حل هاي حوبتي كلكم صرتو ضدي وهوه طردني من البيت وهيه شرطت ما ادخل
تالي خوش سوت كلكم لبستكم العمه
بيبي // شنو. ولج انتي متشمته
حلا هزت راسها / / اي ليش الچذب
سليم // هسه خصم الحچي يمه هذني البنات شوفيلهن صرفه ما يبقن اهنا
– – شنو من صرفه اشوف الهن
– – خابري امهن واحجي وياها
– – امهن ما تقبل تاخذهن واصلا انا ما اقبل يرحن
1
حلا // خلص ودوهن دور الايتام
بيبي بعصبيه // ولج شو انتي ما تعرفين تحچيين شنو انوديهم دور الايتام ابوهن موجود وعمامهن
سليم قاطعها // لخاطر دينج لا تگولين عمامهن احنه لا عمامهن ولانعرفهن
بيبي بقلة صبر // وانته سمعت ابوهن شنو گال وانا ويا انتو كلمن بيته وما محتاجينه خلو الرجال ويه بناته
وبلكي يلگاله بت حلال تلمه وتلم بناته ويحصله ولد يسنده ويسند هاللبنات
سليم // عود اذا لگيتي وحده تقبل
– واذا ما لگيت هم اله الله
سليم // كافي خلي نحجي بعقل وهدوء (باوع البيبيتي ) يمه خلي نودي البنات الامهن تحتار بيهن وحتى لو
انا انطيها مبلغ فووك الخذته وخلي نسد هاي الصفحه السوده
بيبي // سليم يمه اتقي الله تره يمكن هيه مشت بطريق مو زين بس الله يدري بيها والبنات ما الهن ذنب
سليم // بس بقائهن اهنا يسويلنه مشاكل
– – مشاكل شنو
سليم //يمه البنات ايكبرن والناس لو مية سنه تتقول عليهن واحنه عدنا ولد وباچر عكبه معين يتزوج وصدگيني
الناس ما راح تنسى شنو مرت اخونه الله يچرم بس من يرحن البنات الناس شهر شهرين وتنسى
بيبي // توك تگول فاضحته ابين الناس اموتني من الجوع ويشرب عرك ويلعب قمار وهسه الناس ما راح تنسى
شچانت امهن
سليم // اي حجيه من تبقى هالشكل تحجي الناس اتصدكها بس الي يعرفونها والي لاعبه وياها اول وتالي
يسولفون افتهمتي
بيبي // وشعلينه بيها تره مو ما صايره مره اتطلگت وراحت بحال سبيلها
1
سليم هز راسه //اي حجيه بس هاي المره الي تصير بينها وبين رجلها مشاكل بينها وبين عيالها مو المره الي
من حضن الحضن استغفر الله يمه انتي جاي اتضحكين على روحج لان اتعرفينها ليش اتغالطين نفسج
بيبي اتحسرت //يمه سليم انته واخوك اتوالمو اذا قبل يوديهن انا ماالي حچايه بس انته سمعته گلك لمن ما
يموت ياالله واحد يعبر على بناته
حلا // ما طول انتي تصرفين عليهن وتوكلينهن وتشربينهن حليم ما يفكر ايعوفهن
– – چا شترديني اموتهن من الجوع
معين // لا حجيه قصد حلا شيلي ايدج منهن خلي حليم يتحمل مسؤوليتهن وهوه ما يگدر اكيد يوديهن الامهن
بيبي // يا صلوات توك ياالله حچييت شعجب ساكت
معين ما جاوبها سليم رد // يمه فكري وقنعي الحليم وخلي تنسد السالفه تره صدگي حتى محد ينطي مره ايگولون
مو گدها ولعبت براسه منو راح ايامنه على بته ويزوجها اله
– – ها ومن يذب بناته راح ينطونه مره
سليم بعصبيه // يمه مو بناته (جر نفس ) من ينطيهن نگول المره موخوش ادميه وما نگدر نخلي بناتها عدنا
لان العرق دساس
بيبي جرت نفس // والله ما ادري شگول
سليم // لا تگولين شي انتي من يجي حليم احچي ويا وقنعي وصدگيني هذا الي اگوله لان المره مو خوش مره
وگف سليم وگال المرته // ياالله خلي نروح
كفايه // هوه احنه اشفنه اشو من اجيتو الهسه شگالن البنات وشحچت امهن
حلا // بعد هذا الي مسجل علينه شنسوي ياالله اخذوني وياكم
طلعو وانا درت شفت روان صافنه وتباوع وحتى ما رمشت همه شافونه واگفات ما همهم طلعو بدون ما يحجون
ما سيطرت على نفسي وانا اشوف حلا شلون متشفيه بينه وبيت عمي سليم ما مهتميين الوجودنا
وصارت دموعي ينزلن مثل الشلال شهگت حضنتني روان وهيه اتگلي
لا تبچيين مها
= مو سمعتي محد ايريدنه
بس ابونه كال ما ينطينه
= وابونه وين يگدر السليم ومعين وحلا
عادي مها عادي وحتى لو ودونه النهله صدگي يومين وتجبرهم ياخذونه انا اعرفها النهله
باوعت الها واشوف روان مو البنيه الي نجحت من الخامس للسادس ابتدائي لا روان وحده چبيره وفاهمه يمكن
اكثر مني سالتها = وانتي منين تعرفين
– – انا الي اعرف امج اكثر من اي احد حتى اكثر من ابوج بس مها شنو قصده سليم يعني احنه مو بنات
حليم شنو قصده
ما جاوبتها ردت عليه // يعني مثل المسلسل الي شفنا الولد من غير واحد وسجلته باسمه
ما جاوبتها چنت خايفه والف فكره براسي
باوعت البيبي شفتها خاله ايدها على خدها حسيت بيها محتاره وما تعرف شتسوي
رحت للغرفه وبليلتها ما نمت وادري ابيبي هم ما نامت انتظرت وانا كل شويه اطل من الشباك
لمن ما ابوي فتح الباب بالمفتاح الي انطته اله بيبي اجه وهو سكران مشيته مو عدله ويحچي بصوت عالي
– – وينج يمممه بدوور وينج
بيبي طلعت وهيه اتگله // اسكت بناتك نايمات لا تصيح
– – واذا گاعدات يعني شيسون يمممممه انا تعبااان (وصار يبچي )
بيبي گومته // لا تبچي واطلع نام كافي
– – شنو كافي
– – كافي يمه ليل وصوتك ينسمع ومنا جوارين
– – ولدج ما خلو بيها جوارين صدك راحو ذوله السفله
– – اسكت واصعد اخوك معين نايم
– – شنو عبالج اخاف منهم لا انا ما اخاف
– – يمه اخوانك يردون مصلحتك
– – هههه مصلحتي السرسريه يردوني انطي بناتي النهله حتى تفتحلها بيت دعاره
طلع معين // يعني تدري بمرتك گ…
ابوي // انته انچب ما عليك
معين بعصبيه // انته التنچب وغصبن ما عليك هذني توديهن تفتح الها بيت دعاره اتشغلهن بالملاهي هذا مو شغلنه
ابوي اتقرب على معين // شوفو لو تموتون ما انطي البنات تدري ليش لان البنات بناتي من صلبي
معين باستهزاء // هههههاي ضحكتني صلبك ولك كافي وحس على نفسك
ابوي كمش معين // شقصدك اخ الگ
معين لزم ابوي من قميصه ودفعه // وخر ساقط لو بيك خير ما تگول عليك مو رجال
بيبي دفعت معين وگلتله // روح ولك روح انطمر وانته اصعد فووك
ابوي // يممه شنو انا شبيه گولي هيه هيچ تحچي لان تدري بيه احبها
– – اي يمه ادري
– – انا والله رجاال وما ناقصني شي
– – ادري بيك يمه اصعد ونام منا الجوارين وصوت الليل مسموع اصعد حبيبي
صعد ابوي وهو يبچي ويكول // ولج نهله انا تگولين عليه مو رجاال انا اله اعلمج
بيبي بقت بالصاله وكعدت ع القنفه وصارت تنفخ ورافعه ايدها للسما وتدعي
– – الله لا يوفقج يانهله منو لعب براسج وخلاج تطلعين من الطريق ولج عدج بنات حديثات ما تخافيين
عليهن يا چلبه
– – ياربي تدري بحالي وحال هالمسكين العاصي ياربي برد الگلوب ساعده ياربي
بجاه محمد وآل محمد
انا اسمعها واگول آميين وامسح بدموعي
طلع معين // ها صعد الهيبه
– – ولك ما تگلي شتريد منه
– – تحچيين صدك ما سمعتي فووك من العالم مره يبچي ومره يغني هوه ما يستحي على حاله
– – يمه اخوكم هذا على كيفكم ويا
– – اخونه ومرته مو زينه وبناتها ما نريدهن
– – على كيفكم وانا اقنعه يوديهن الامهن وسليم گال اطيها مبلغ فوگ الخذته ونتنازل عنهن
معين //قصدج مبلغ فوك الباگته
بيبي تضرب على رجلها //اووف يايمه اخوك يكسر خاطري
– – تره من ايده من اول ما اتزوجها رخالها الحبل وما حاسبها وشفتي شلون طلعت من الطريق
– – رووح نام الله كريم
معين // والنعم باالله بس يمه صدگيني انا المره شفتها بعيني وانتي سمعتي سليم شگال عليها انا ضامن مستقبلي
بيتي راح يكمل وسنه اتخرج واتزوج بس هوه ليش يكسر ظهره على بنات مو بناته
بيبي // شنو مخليكم متاكدين ؟
معين اتنفس // يمه الي تدني نفسها على حماها هاي اغسلي ايدج منها والله صرت استحي من تسالني الناس
صدك طلگتو مرت حليم ومن اجاوبهم اي اعرف بگلبهم ايگولون طلگوها وره ما لعبت براس رجلها طوبه
لو اشوفين شلون يتغامزون
بيبي // يمه شلنه غرض مره وراحت الاهلها رووح يمه نام وارتاح والله كريم
راح عمي معين وبيبي دخلت الغرفتها وانا رجعت لفراشي غطيت وجهي وانا اگول
= ياربي شنو.هذا الي اسمعه معقوله امي هالشكل ليش مو ابوي يحبها معقوله انا واخواتي مو بنات ابونه واذا مو بنات ابونه بنات منو
صرت ابچي ما ادري يمته نمت ويمته گعدت على بچية ملاك عرفتها متضايقه من الحفاظه گعدت غسلت الها
وسويتلها ممه ورضعتها رحت للمطبخ شفت بيبي مخدره الجاي رحت عليها = صباح الخير
صباح النور
=بيبي متريگه
اي متريكه ليش ما كعدتي للصلا
ضربت خدي = يا بيبي اخذتني النومه وهسه گعدت على صوت ملاك ونسيت اصلي
بيبي // اله الصلا انسي كل شي بس الصلا لا تنسينها انطيني ملاك وصلي قضا
باوعت الها هيه هزت راسها // يعني بس تكبيرة الاحرام بدون اذان
هزيت راسي ورحت اتوضيت وصليت بسرعه ورحت الثلاجة بيبي طلعت باكيت البسكت واخذت منه اثنين
نگعتهن بشويه حليب وبديت اوكل بملاك الي چانت تاكل ما شاء الله صحتها زينه خليتها يم بيبي ورحت
اتريكت بالمطبخ صمونه وشويه قشطه وبديت انظف بالبيت وامسح وغسلت المواعين مال الريوك وبيبي
گالت // اليوم نسوي تمن عدس ودقوس
جاوبتها = هاي الاكله احبها كلش واريدج تعلميني عليها
هيه گالت // اي بس خلي روينه تگعد حتى تلزم ملاك انا راح اروح للسوك اشوف شاجيب مسواك
راحت بيبي وبقيت انا لازمه ملاك والعبها واضحكها لمن ما اجت بيبي سالتني //شنو بعدهي روان نايمه
هزيت راسي = اي بيبي
– – روحي گعديها الهاي الخايسه طلعتلي مثل امها بس نوم گعديها لا اجي ارفس ابطنها
رحت ندهت روان = اگعدي
افف مو اليوم عطله شنو احنه عدنا دوام حتى بالعطله
= بيبي تگول خلي تگعد لا اجي ارفس ابطنها
روان بقلة صبر // گعدنا گعدنا ترفس ابطني شمسويه باالله
= انچبي واگعدي ياالله ريوكج بالمطبخ
راحت غسلت وجهها وهيه تتثاوب وعين مغمضتها وعين فاتحتها كملت اجت انطيتها ملاك //هاج خليها يمج
= جيبي ليش انتي شعندج
بيبي //اخذي ملاك واذا نامت اصعدي نظفي غرفة ابوج
روان // صار بيبي
رحت ويه بيبي للمطبخ وصرنا نطبخ وهيه اتعلمني ومن كملنه گالت
ما طول عطله خلي اعلمج تلفيين كبه ودولمه
هزيت راسي وابتسمت = اي بيبي علوا
اليوم جبت ربع لحم العصر نثرمه ونسوي كبة تمن وانتي باعيلي واتعلمي
= اي بيبي
عفيه يابيبي شگد احبچن لان مطيعات
بگلبي = مو تردين تودينه الامي جريت نفس وحضنتها = بيبي واحنه هم انحبج
كافي لواكه وياالله شويه بعد نتغدا ونصلي ونرتاح حتى العصر نتعلم
هزيت راسي وصبينه غدا واتغدينه وروان غسلت المواعين لان بيبي گالت الها مها تسوي العشا وتنظف البيت بالليل
سمعت ابوي اجه وانا ملازمه الشباك بيبي راحت صبتله غدا وما فتحت ويا موضوع هوه صعد وانا رجعت
اتمددت بالغرفه غفيت شويه وگعدت على صوت ضحك رهف وهيه تباوع التوم وجيري گمت غسلت وجهي
ورحت للمطبخ سويت چاي وجبتها البيبي شربت وگالت
يالله خلي نسوي الكبه لكيتها منكعه التمن وفوكه شويه عدس وعلمتني شلون اطبخه وشلون اسوي الحشو وبدت اتلف
الكبه وانا اباوع الها هيه كالت اخذي عجينه كوريها گدامي بدون ما تخليلها حشو انا اخذت عجينه وكورتها بيبي
هزت راسها // لا مو هيج
اخذت عجينه وكورتها گدامي وانا سويت نفسها ولفيتها گالت // يعني بعد يرادلج شويه
اخذت الثانيه والثالثه واخذت ايدي ع اللف بيبي هزت راسها // عفيه هسه جبتيها
كملت وگلينه كبه واتعشينه وصارت بيبي تعلمني شلون الف الدولمه وهواي طبخات وصرت انا اكثر شي اطبخ
اجه سليم هوه ومعين دخل // السلام عليكم
هلا يمه عليكم السلام
– – وينه حليم
– – فووك نايم شكو
– – ما كو شي
وجهك بي كلام
– – هاي البر…
– ياهي
– – نهله خابرتني وكالت تريد تحچي وياي كدام الكل
– – شنو تريد تجي
سليم //- – والله ما اعرف گالت تخابرني كون انتي موجوده وحلا هم موجوده تكول موضوع ضروري
بيبي // ما عرفت شرايده
سليم // ما ادري علمي علمج
اندك الباب وبيبي گالت افتحي الباب رحت شفت حلا هيه وكفايه جايات حلا وهيه تباوعلي // امي جوه
هزيت راسي عمه كفايه باوعتلي // اشلونج مها
= زينه الحمد لله
دخلن جوه وانا رحت جبت دولكت ماي وخليته گدامهن
بيبي // وين چنتي انتي وكفايه
رحت على معلمه وياي اخوها اتوفه وراحت وياي كفايه
بيبي باوعت الكفايه = شنو تعرفينها ام سهيل
كفايه // لا عمه بس حلا اخذتني وياها گالت استحي اروح ابحدي وبس گعدنا خابرنه سليم
حلا // خير سليم
– – كل الخير
باوعلي وكلي // روحي صيحي حليم خلي ينزل گليله رايده بموضوع مهم
هاي اكثر من مره سليم ما ايكلي ابوج يعني يريد يقنع نفسه انو احنا مو بنات حليم
رحت شفته كاعد ويدخن = بابا عمي سليم يكول خلي ينزل رايدك بموضوع مهم كلش
هوه خله الباكيت والنقال اب ايده وانا نزلت واشوف القلق بعيون سليم وحلا كل شويه وكالت
– – شصاير سليم
نزل ابوي وگف بالباب مال غرفة بيبي // خير سليم شرايد
سليم // هيج موضوع هسه تعرف
ابوي // اي غير افتهم
قطع كلام ابوي رنة التلفون وسليم رفعه بعد ان فتح الحاكيه وكال
ما اسمع صوت الو
چان صوت امي عرفته //الو اشلونك ابو سهيل
رد عليها ابرود // هلا بيج
– – بس كون الكل موجودين اقصد امك واختك واخوك
– – اي كلنه واذا تردين مختار المنطقه عادي اجيبه
– – هههه لا ماكو داعي لان حلا اتكفي وتوفي
حلا رادت ترد سليم خزرها.رد // اي نسمعج
نهله // – – شوف من الاخير راح احجي العندي
سليم باستهزاء // اتفضلي
– – شوف سليم انا عرفت انته تريد تودي البنات الي وانا ليش الچذب ما اريدهن ولو چنت مفكره واحد بالميه
اخذهن هسه لا بطلت تدري ليش
هوه باستهزاء // اي ليش باالله
– – لان انتو طعنتو بيهن شوف من الاخير اذا عدكم نيه تودوهن وتكولون مو بنات حليم ثق وحق ربك راح
اشتكي عليكم واخلي يسوون تحليل نسب واقاضيكم واسجنكم واخلي اخوتي يگاومونكم وافضحكم اذا ما سجنتكم
احترمو نفسكم بناتكم عدكم انا ما اتحمل مسؤوليتهن
معين اخذ التلفون // اي مو انتي ساقطه ودايحه
هيه ضحكت بكل برود // اي ما دام تدرون بيه ساقطه ودايحه ما تخافون اسقط بناتكم وانتم اشراف وبعين الناس
معين // اشراف غصبن ما عليج وانتي تدرين
امي باستهزاء // زين يا اشراف ما تخافون على عرضكم انا هذا العندي تودوهن اشتكي عليكم وكل شي اسوي
ما اخاف ولا يوكف اكبر واحد بعيني
سدت التلفون والكل انذهل سليم باوع البيبي وسألها // يمه منو گايل النهله على حچينه
بيبي // شمدريني
معين // اكيد الهرفه اخوك
ابوي // انجب شنو الهرفه اروح اخابرها واكللها يكولون مو بناتي
كفايه //بس شكد صلفه
حلا //گولي گ…وما الها رداد
بيبي صكت اسنانها // ولج حلا احجي عدل منا اخوتج
حلا //شنو يمه انا مچذبه
كفايه // وهسه شنو
سليم //. ياالله خلي نروح
الكل اتفاجا من رد فعل سليم وطلعو من البيت وهمه ساكتين وانا متعجبه من صلافة امي معقوله هيج اكو
امهات وليش حملت بينه وجابتنا اذا ما تريدنه
مر اكثر من اسبوعين على مخابرة امي واحنه نفس الروتين الشي الي اتغير ما صار سليم او معين او حتى حلا
يگولون ودوهن الامهن مو بنات حليم لا الكل سكت والتهى بنفسه وانا تقريبا صرت طباخه ماهره وست بيت مرتبه
بيبي كل شي علمتني الطبخ والتدبير والمحافظه على نفسي وعلمتني الاحترام والصلاه بوكتها والخوف
من الله. وهم علمت روان لكن روان بطبيعتها عجوزيه ما تحب تقرا ولا تشتغل ولا اي شي
چانت بس تساعدني بالتنظيف وتدير بالها على ملاك
بيومها گاعدات بالغرفه واندك الباب بقوه خفت ورحت اركض فتحته واشوف حلا عيونها ناطات وما تشوف
احد گدامها وهيه تگوول // يممه يممه
/////////////////////////////يتبع
