رواية عقارب ذوي القربي الفصل الثامن عشر 18 بقلم انين الليل
مها
بيومها ابوي هو وابو مصطفى راحو حتى يشوفون ستوته الابوي وانا صرت اباوع للاغراض واشوف
شنو محتاجات
وكعدت رهف وروان انا خليت الريوك كدامهن
وقبل لا يسالن جاوبتهن انو ابو مصطفى جابه الصبح من كملن الريوك شلت الصينيه وحاجيتهن
= روان انتي ورهف من تكعد ملاك نظفن الغرفه ورتبنها
روان باستغراب //ليش انتي وين رايحه
=اريد اروح للسوك اجيب مسواك
– – منيلج فلوس وابوي وين
= ابوي راح ويه عمو ابو مصطفى بشغل وانا اريد اطلع اتسوك وارجع بسرعه
روان // اروح وياج
خزرتها = وين رايحه روان احنه بمنطقه ما نعرف اي شي عنها واحنه غربه ديري بالج السوالف والضحك
الي هناك لاتسوينهن اهنا لان محد يرحم
– – هسه الي يسمعج شيگول شنو سوالف وضحك
اتقربت يمها = مي خالف رونه انا اختج الچبيره وجاي انصحج
– – وانتي طالعه باالله ابوي يجي وما يلكاج
= گليله راحت تتسوك وديري بالج اي احد يدك الباب لا تفتحنه اله انا لو ابوي
– – باالله الجوارين
= اي احجو وياهم من وره الباب ومحد يجي كلمن لاهي بنفسه
نكتت الكاب مالتي وطلعت وانا احس الناس كلها تباوعلي مشيت شويه شفت محل مبسط دخلت
= السلام عليكم
چان رجال يجي عمره خمسين سنه // عليكم السلام
= بلا زحمه رايده چيس چاي وكيلوين شكر
– صار (سالني ) شنو من جاي
باوعتله هو استردف //اقصد وزن لو مجيس
= لا هذا
واشرت على چاي محمود هو اخذه وانطاني الشكر وحاسبته من ردت اطلع سالته
= عمو بلا زحمه رايده صحن للدش وين احصل
– بالسوك عد اهل الكهربائيات
= اي وين صاير السوك
باوعلي باستغراب انا استردفت = عمو مو احنه جدد بالمنطقه فما نندل
– هاا اهلا وسهلا باعي بابا بس تمشين بهذا الشارع كبل راح ايلاكيج السوك
= شكرا عمو
طلعت وبايدي العلاكه ورحت امشي وانا احس الكل ايباوعلي وهذا احساس طبيعي كلنه نشعر بي
من نكون نمشي بمنطقه جديده وصلت للسوك شفته حاله حال الاسواق ازدحام وفوضى واصوات ناس جاي
تعرض بضاعتها
اشتريت مخضر وشفت محل يبيع مواد كهربائيه وصلت وعاملته اشتريت مراوح اثنين وصحن للدش وهو كلي
لازم اخذ واير نزال انا اخذته احتياط ورحت يم ابو المواعين اشتريت باديات (انجانه )اثنين وسط
شفت ولد زغيروني عنده عربانه يحمل بيها اجرته ورجعت للبيت دكيت
الباب سمعت صوت رهف وهيه تسال // منو
= انا رهوفه افتحي
فتحت الباب وشلت الاغراض دخلتهن واجت روان // ها اجيتي
= اي اجيت
ما اتاخرتي
=السوك قريب (باوعت الهن ) اسمعو بنات من يسال ابوي (اشرت على روان ) گليله هاي حصالتي فتحتها وانطيتها المها حتى تجيب النه
بيها مسواك
روان // وانا ومنيلي الحصاله
= هوه شمدريه كليله بيبي چانت تنطينه وعمه كفايه هم
– وليش انجذب
= لان هوه سالني وانا كتله ما عندي
– وانتي منيلج
= انا عندي شكم فلس ضامتهن عندي بيبي وهيه گلتلي من يصير عليه شي اتصرفي بيهن
– يعني بس ذني الي جبتيلنه بيهن المسواك
هزيت راسي = لا روان انطيت الابوي فلوس ستوته حتى يشتري ويشتغل
– تتصورين اكو شغل
= اكيد اكو يعني يحمل منا ومنا اكيد الله ما راح يتركنا
رهف //والمدرسه
روان بعصبيه // احنه بيا حال وحضرت جنابج تفكرين بالمدرسه والله يا الله
= شبيج وياها تفكيرها صحيح (باوعت الرهف ) حبيبتي تسجلين ما عليج
وبقينه نرتب بالبيت واندك الباب رحت وانا مخليه شالي على راسي = منو
– – انا حبيبتي افتحي
سمعت صوت مره فتحت الباب شفت مره چبيره يعني بگد او اكبر من عمه كفايه ابتسمت بوجهي وكالت
صباح الخير
= اهلا خاله صباح النور اتفضلي
– انا جيرانكم الي اجرتو من عدنا هذا البيت
= هلا بيج اتفضلي
زاد فضلج دخلت وهيه عيونها منا ومنا تباوع للبيت // ها انتن وابوچن بس
= اي والله خاله
– ابو مصطفى كال الابو غسان امكم متوفيه وبعدين بيبيتكم هم اتوفت
جاوبتها بحسره = اي خاله
– ياعيني وما بقالكم احد
= اي والله
– الله موجود والله يخلي ابوكم امانه شنو تحتاجن ما يردكم اله السانكم
= الله يخليج خاله
ياالله انا اترخص
= بعد وكت حتى ما ضيفناج
لا احبيبه انتن ملتهيات ان شالله غير وكت
راحت تمشي بعدها دارت عليه وكالت // انتي شسنو اسمج
= انا اسمي مها
روان جاوبت // وانا روان وهاي رهف والزغيره ملاك
= الله يخليجن خاله ما عدچن اخ
باوعت الها وهزيت راسي = لا بس احنه الاربعه
ردت عليه //. الله كريم ( باوعتلي ). خاله مها لاتسوون غدا غداكم مطبوخ
= الله يسلمج ما نريد انزاحمج
لا حبيبتي هذا واجب
= ما كعدتي
العصر من تكملن لو باجر اجي اسير عليكم
= هلا بيج
راحت واجتني روان // شفتيها شكد نازكه ولا چنها كاعده ابتجاوز
= اي
– وشفتي السوارات والمحابس
= شبيج روان خزيتي المره بعيونج الله يرزقهم
– مو هذا قصدي اقصد دووم الي بالتجاوز يعني مو هلگد وحالتهم تعبانه
= اكلج ما علينه بالناس تعاي خلي انصفط الغراض البقن
– كل شي كملت هوه احنه شعدنا
= الثلاجه شغلتيها
اي شغلتها
= اخذي المسواك رتبي بالثلاجه
1
روان كانما اتذكرت شي // صدك مها شلون نغسل المواعين واحنه ما عدنا سنك
= نغسلهن اباديه منين نجيب سنك
– – افف ليش ما جبنه السنك خلينه الميساء الساحره
هزيت ايدي وجاوبتها = ولج احنه خلينه بيت شكبره الميساء بقت ع السنك
روان بحنق // كله من ابوج خلانه مدكه للرايح وللجاي
= اسكتي روان مو وكت الحجي هذا
هيه بحرگه گلب //يمته وكته كل ما افك حلكي اتكليلي اسكتي
= اي اسكتي احسن
– شوفي حالنه وين وصلنه صرنا غربه ويم ناس غربه عفنا كل شي
= ليش احنه شنو چان عدنا وعفنا كل شي
– اقلها چنا بمنطقتنا امأمنين على نفسنا
اتذكرت سليم والسوا بيه باوعت الها وكلت = الصار بينه والي راح يصير كله صوج امنا الي عافتنا وراحت اتونس نفسها بفلوس ابونه
رادت تحجي سكتتها = كافي روان الله بس هو الي يعلم شنو راح يصير بينه
ما اتحملت كعدت بالكاع وخليت ايدي على خدي وبچييت بحركه وبقهر هالمره خوف من المجهول اتقربت
مني روان الي هم جانت تبجي وحضنتني وهيه اتكلي
– مها انا اسفه مو قصدي احچي بس من حركة كلبي الله يخليج لا تبچيين حبيبتي بعد ما احچي بس لا تبجيين
اول مره اسمع روان هالشكل تستعطفني واحس بيها خايفه والحچي ابيناتنا انا خايفه اكثر منها لكن اتصنع القوه كدامهن
صارت تشهك بحضني خليت ايدي على شعرها وحاجيتها
= روان الي صار مو اب ايدنا يجوز صوج ابوي يجوز صوج امنا ويجوز صوج الظروف الي خلتنه بهيج وضع
بس لازم اتفهمين اكو هواي ناس تعبانه اكثر من عدنا يمكن عدهم اب وام بس تعبانيين
هيه باوعتلي وتبرطم // لا مها الي عدهم ام واب ما يتعبون لان همه يشيلون عنهم
= يجوز اي ويجوز لا بس افهمي روان اهم شي نحافظ على نفسنا هذا اهم شي
باوعتلي وسالتني // يعني اكو بنات اتعس من حالنه
هزيت راسي = اي اكو واتعس بهواي ما تتذكرين من نروح ونشوف الجهال الي بالزباله يدورون ع القواطي الفارغه
والي تطلع ويه ابوها وهو عنده نعجات وهيه ويا تشوف بقايا الاكل الي يذبونه الناس اقلها صحيح احنه
فقره بس ابوي ما خلانه اندور بالزباله
روان // بس لاتنسين انتي اشتغلتي البيبي عبالك خدامه
كلمتها اذتني واعرف هاي الحقيقه هزيت راسي =اي بيبي الله يرحمها تستاهل نسيتي شكد تعبت علينه لو من
راد ابوي ايبطلنه لو من سليم كال خلي نوديهن الامهن شلون هيه ما قبلت
روان //لو اب ايدي انتقم منهم واحد واحد
= الله ياخذ حقنا
نظفنا البيت والظهر اجت ام غسان وجابت صينيه مغطيتها بسفره نايلون وراحت روان اخذتها وانا اتشكرت
منها وعزمتها تاكل ويانه لكن هيه ما قبلت انتظرنه
ابوي الي ما اجه وريحة الاكل لا تقاوم باوعت الروان وكتلها = جيبي ماعون خلي انشيل الابوي وحتى نتغدا بالباقي
راحت بسرعه جابت ماعون وخاشوكه وخرت السفره شفت جدريه وسط بيها تمن مطبك وفوكه نص دجاجه
وجدريه ثانيه زغيره بيها مرك باذنجان وخضره وزلاطه وروبه شلت شويه تمن واخذت لحمه من صدر الدجاج
وشلت بطاسه زغيره مركه وضميتهن الابوي ع الطباخ وبعدها صرنا ناكل انا خليت ملاك بحضني وصرت اوكلها
وهيه مثل طبيعتها ساكته وتاكل
رهف كالت // تره ملاك كل ساع وراحت للتلفزيون
روان // يعني شنسويله
– انا ما حاچيتج احچي ويه مها
– ولج احچي وياي عدل لا اموتج
زمخت عليهن = هيييي شنو هذا شبيچن
رهف //مها انا جاي احچي وياچ هيه شدخلها
= خلي يجي ابوي واخلي يجيبله عامل يسوي التلفزيون
روان // هيه تتحجج بملاك وهيه كاتله روحها على افلام كارتون
رهف //احسن منج بس تدورينه على افلام وركص لو عبالج ما اشوفج من اتركصين
– – انجبي ولج
= كافي واذا كملتن روحن غسلن
– – وين انغسل
– لو بحنفية الحمام لو بالحنفيه الي بالطارمه يعني وين
روان //يعني لا سنك ولا مغسله
ما جاوبتها شلت المواعين اخذتهن للمطبخ واخذت الباديه جانت وسط مو جبيره وغسلت الصحون ومسحتهن
وخليتهن على صفحه بعدها خليت ماي بالقوري وخدرت جاي شربت زين لاباس بي يعني الاساله اهنا زينه
بس هم لازم اسال ام غسان منين يجيبون الماي الي يشربونه
رحت للغرفه اتمددت وانا جاي اشوف شكد يراد النه شغلات للبيت اشوفها بسيطه لكن مهمه اتلمست المخده وگلت
= الله يرحمج يابيبي لو مسجله البيت اب اسم ابوي ما چان هسه هذا حالنه
صارت الساعه بالوحده ونص وحسيت الباب يندك خليت الشال على راسي وكلت منو
– انا بابا افتحي
فتحت الباب شفت ابوي جاي هوه دخل كلي // اشلونج مهاوي
اشوف بايده سويج ابتسمت وجاوبته = هلا بابا
– -اتغديتو
= اي جيرانه اهل هذا البيت جابت النه غدا وضميتلك
– – اي جيبي انا كلش جوعان
رحت جبتله الغدا وخليته گدامه صار ياكل = بابا بشر شنو سويت
– – الله ينطي ابو مصطفى تعب وياي ولكينه ستوته نظيفه اشتريناها بتسعميه
انا ابتسمت = اي الحمد لله
– – واخذني على رجال سيد عنده محلات اسمنت وطابوك وكاشي وصا عليه وكله صاحبي وعنده بنات يريد
ايعيشهن والسيد ما قصر كلي ابقى اهنا حالك من حال عمالي
رغم كل شي مرينه بي المرار والقهر لكن فرحنه من ابوي كالت اشتريت ستوته جاوبته
= بابا اهم شي يوميه تنطيني خمس تالاف
هز راسه // اي انطيج مثل من چنا هناك
حركت ايدي = لا بابا الخمس تالاف اضمهن اجار والي يبقى منهن كل شي يصير نحتاج طبيب ملابس
هوه فتح عيونه //والمسواك شلون
= بابا انت يوميه من تجي شنو تكدر تجيب جيب
– – بابا مها اهنا الشغل مو مثل هناك تره الناس بسطاء
حچييت ويه نفسي باستهزاء = ليش احنه هناك شنو شايفين من شغلك
جاوبته = مي خالف انت يوميه تضم عندي خمسه وشنو تجيب اكل جيب عسى ما خبز وخضره طماطيات وخبز
المهم يابابا ندفع الاجار وما نتفاشل ويه الناس ويذبون غراضنا بالشارع ما سمعت عمو ابو مصطفى شگال
اجه الابوي اتصال هوه شاف التلفون وكال // هاي الحقيره من الصبح وهيه تتصل
=مني ؟
– – هاي قندره حلا
= اي شوفها شتريد
جاوبها بابا – – الو
اسمعها تعيط وابوي اتغيرت ملامحه وحاچاها // اوكفي اوكفي ولج واحجي عدل يا چلبه
– – انچبي واكلي تبن
– – ولج اذا على الي يبوكن فاانتي اكبر حراميه شوفي المن مطيتهن وجايه تتهميني شوفي ولج انا سكتت
لان هناك الناس تعرفني ومحد يرحم بناتي صدكي چنت اكدر اذبحچ واذبح ابنج گدامج وما يرفلي جفن وحتى
ما انحكم على ابو متعاطي وما ادري بنفسي
وانا هسه بمنطقه غريبه يعني اكدر اجي واخلص عليج وارجع ومحد يدري بيه وبدل الشاهد اجيب مية شاهد انا ما
طلعت من المنطقه بس خاف ذولاك الجلاب يسوولهم لعبه يتهموني وانا انسجن وهمه ياخذون البيت
انا ساكت اريد الله ياخذ حيف البنات يجوز انا مذنب ومو خوش انسان بس بناتي شافن منج اشكال وصدگي
الله ما راح ايفوتها الج واسمعيني ولج ما راح لا اعوفج ولا اعوف ابنج
وسد التلفون وسط ذهولي واخواتي على عياطه اجن سالته = بابا شصاير
– هاي الحقيره
= شبيها
– تكول لو انت لو بناتك بگتو ذهبي وطلعو احسن الكم
هزيت ايدي = هاي من كل وعقلها منين نندل ذهبها
روان // تولي بابا لا تقهر نفسك
– – ياالله روحن للغرفه اريد ارتاح شويه واطلع
راحن روان ورهف لان ملاك نامت وانا اريد اطلع هو صاحني
– – اوكفي مها
=ها بابا
– – انتي ماخذه ذهب حلا
باوعتله باستغراب واشر على روحي واهز راسي = بابا انا ماخذه ذهب حلا شلون اخذته يعني بكته
ابوي //انا بس سالتج
= بابا اذا قصدك على الفلوس هيه گالت الك ذهب انا اذا ماخذه الذهب يمته بعته وسويته فلوس
— — ياريت ماخذته ياريت
هزيت راسي //لا بابا ما اخذته ولو اشوفه كدامي هم ما اخذه
باوعلي ورفع راسه وبعدها اتمدد ما سالته على الباقي شفته نام وانا بقيت افكر بكمية الحقاره الي تمتلكها حلا
يعني معقوله بعد ما اخذت كل شي من عدنا وشمرت غراضنا بالشارع وطلعتنا بالظهريه بالحر
جاي تتهمنا انو احنا بكنا ذهبها
سديت الباب على ابوي ورحت للمطبخ غسلت الصحن الي اكل بي وبعدها لزمت المكناسه وبديت اغسل
بالمطبخ والطارمه الداخليه بوكتها جنت بس اريد شويه الوكت ايمر حتى انده ابوي يروح للشغل
ما خليته يكمل الساعتين ندهته وگعد وهوه النعاس بعيونه =بابا ياالله صار الوكت تروح للشغل انته گلتلي گعديني
– – والله تعبان
= مي خالف يابه رووح على باب الله ياالله
مديت چف ايدي اله وهو لزم ايدي وكام راح غسل وقبل ما يطلع گلي //شاجيب وياي
= بابا بس خبز ما محتاجين شي
هز راسه //اي من اجي اسال وين اكو مخبز واجيب منه ديرن بالجن
وطلع ابوي وانا رحت دخلت للحمام لان بعدنا مثل ما يكولون باترابنه دخلت هو بي بس حنفيه لا سطل ولا اي
شي سحبت الصونده وخليتها بالحنفيه وصرت اصب الماي على جسمي وراسي بالبدايه حسيت ابروده وبعدها
اتكاسر صار مقبول
سبحت وغيرت وبدلت لبست دشداشه سوده عندي وطلعت رحت امشط دورت ما لكيت المشط
سالت روان = ما شايفه المشط
هيه متمدده – – ما تشوفيني نايمه
= هوه وين اكو نوم بهالحر جاوبيني ما شايفه المشط
روان // ولج انا محموسه ومايعه روحي وانتي تدورين على مشط
=كومي اسبحي وانتي شويه تنتعشين
– – اي انتعش مو انا رايحه الشرم الشيخ
= طبج طووب ابقي لاتسبحيين على ما تروحين الشرم الشيخ
– – ارووح ان شاالله اروح
لبست الجبه مالتي وطلعت رحت للدكان جبت مشط وجبت بطل ببسي ابو الالف واجيت ضميته بالثلاجه ورحت
اخذت ملاك سبحتها وبدلت الها باوعت الرهف = ياالله رهوفه اكعدي اسبحي اخاف هسه تجي علينه جيرانه
روان گامت //اوگفي رهف انا راح اسبح كبلج
=مو على اساس ما تردين اتسبحين اله ترحين الشرم الشيخ
– – هسه غيرت رايي عدج اعتراض
انا مشطت شعري وشلته بالقراصه ومشطت الملاك الي شعرها جان يخبل وبعدها طلعت روان وراها دخلت
رهف ومن طلعت من الحمام اجت حتى امشط الها سويت الها گصيبه وروان رفعت شعرها وانا اباوع الها بنص
عين واهز ايدي هي عكفت وجهها واجت سالتني // شبيج هيج اتباعيلي شنو ما عاجبتج
= لا عاجبتني خصوصا التسريحه
– – اشو اذا بقيت وصخه ما عاجبتج واذا سبحت هم ما عاجبتج
اندك الباب باوعت الرهف روحي كولي منو من وره الباب اذا جيرانه ام غسان دخليها للديوان
رهف //وينه الديوان
روان // ولج قصدها ذيج الغرفه
– – ها اي
راحت روان واجت گالت /. اي هيه الحجيه الجابت النه الغدا وانا دخلتها
= عفيه حبيبتي
رحت للغرفه وانا الف بشالي سلمت عليها = هلا خاله هلا بيج استريحي لا توگفين
-هلا بيج حبيبتي كلت اجي عليكم
=بيتج خاله صدك چذب
اباوع الها لابسه دشداشه نظيفه او يمكن جديده وسواراتها ومحابسها وهيه ايدها بيضه طالعه فد شي اجت رهف
وهي جايبه دولكة ماي وكلاص // اتفضلي حجيه
الله يسمع منج
= ان شاء الله مو بعيده الي الله كاتبها اله ان شاالله ينولها
– – ان شالله
اجت روان وهي جايبه كلاص ببسي // السلام عليكم
– عليكم السلام هلا حبيبتي
– هلا بيج خاله نورتينا
– – هذا نورج ياحلوه
– – شكرا خاله عيونج الحلوات
شربت الببسي وسالتني //اي شلونكم ان شاالله مرتاحيين
=الحمد لله
– – عليمن لابسات اسود
=على بيبي
– – الله يرحمها من زمان اتوفت
= لا من مده
– – الله يرحمها خاله وبس انتن وابوجن
انا باوعت الها هيه استردفت // يعني شعجب امكم عمامكم خوالكم
= خاله امنه اتوفت من صارت اختي الزغيره وبقينه عايشات ويه بيبي ام ابوي
– وعمامكم
= ما عدنا بس اولاد عم ابونه وهم كلمن ملتهي بعيشته وجهاله تعرفين العيشه صعبه
-وخوالكم
=خوالنه من اتوفت امنه ما سالو علينه واحنه هم ما سالنه عليهم
يمكم بالبصره
=لا بديالى
– ومنين تعرفو الابو مصطفى
= صديق ابوي من زمان وچان قبل يجي للبصره
– ابوج شنو جان يشتغل
= عنده محل مال حداده
-ها يعني حداد
=اي
– ولا يهمكم احنه اهنا اهلكم وشنو تحتاجون تعالن واخذنه انا مثل امكم وابو غسان عمچن
=تسلمين الله يحفظج خاله
روان // ومشكوره وما قصرتي الله لا يخلينه منكم
هيه ضحكت //ههههه هسه انتي صدك من البصره
باوعت الها جاوبتني
– – يعني انتن تحچن عبالك بغداديات بس هاي اختج من كالت الله ما يخلينه منكم هاي دووم اهل البصره يحچونها
سالتها = تعرفين ناس من البصره
– – لا بس بوكت الزياره هواي يجون ونلتقي بيهم خوش ناس
= وانتم هم والله ناس ونعم الناس
وگفت // انا يمكم واي شي تردنه لا تستحن
اتشجعت وحاچيتها = اي والله خاله ولو اعذبج بس هاي ملوكه اله تلفزيون ونريد واحد يسويلنه الصحن
وهم كتلنه الحر ونريد كهرباىي يشدنه المكيف
– – بس هاي سهله هسه اخلي ابني يجي ويسويهن
=لا خاله ما نريد نسوي عليكم زحمه
– – يازحمه خلي يسويله شغله بيها خير بدل ما رايح راد على هالدراجه يا ساعه يندعم هسه اصيح المنذر ويجي ايسويهن
طلعت تلفونها واتصلت وانا وروان نباوع سمعنا صوته ايكلها // هاا
جاوبته //او وجعا من اتصل كلي ها يمه مو تجعر چنك هايشه
– – ها يمه شتردين
– اكلك انا هسه ابيت جوارينه الجدد
– اي
– او وجعي اسمعني اكلك حبيبي خطيه ميتات من الحر وهاي الزغيره تبچي تريد تلفزيون بلكي تجي تسويهن الهن
– صار تدللين هسه حجيه بس شرط اتعشيني لفتين كباب وقوطية ببسي وباكيت جكاير
عكفت حواجبها // ولك شصار مخترعلي الذره
اتقربت منها وانا ابتسم وهزيت راسي // هيه قوطية ببسي ماكو غيرها
اشرت الها يعني عليه //تعال ولا تطولها ياالله
هيه باوعتلي وهيه تضحك // لا تاخذين ابالج انا ومنذر كله هيج نحچي
= الله يخلي
– – مشيب راسي لا فلح بمدرسه وملتهي راكبلي هالدراجه ويشفط عليها
= الله يحفظه
– – مو مثل اخوانه غسان شلوناته سوده عليه يشتغل ابغداد ويلمهن ويجيبهن يخليهن ابايد ابو ورحمن هذا اسم على مسمى
حتى فلاح يشتغل وحدوري يموت ع المدرسه
روان // مثل رهف
– ها هاي الزغيره
= اي تحب المدرسه تموت عليها
– – بس هذا شالع گلبي
=شعجب
– – كله مني دللته من چان زغير تمرض وشلع گلبي ياالله طاب عاد ما اقبل احد يحاچي لو يضغط علي لمن ما
كبر واتمرد
= يعقل ان شاالله
– يمته رحمن عده تلث جهال وكاعد ابيتنا الي بالولايه ولو تشوفينه صوته ما ينسمع
=ها عدكم بيت بالولايه
– اي بيتنا طابقين طابو وعمج اخذ هاي القطعه بناها گعدت انا والولد والبيت الچبير بي رحمن وزوجته وحوراء بتي
الزغيره واحنه هم نروحلهم
= ها يعني بتج گاعده بالولايه
هزت راسها //اي شنو عبالج بعيده هياتها شويه ربع ساعه بالسياره
=خاله عدج بنيه وحده
– لا خاله اثنين عبير متزوجه وحوراء بصف الخامس
روان // اعدادي
– – لا ابتدائي انا ما اخلي البنيه اتكمل بس تكبر ازوجها
باوعت الروان وسكتت اندك الباب ام غسان گالت يجوز اجه منذر
طلعت وحجيت من وره الباب = منو
سمعت صوت ولد // انا امي كالت هيه اهنا
بصراحه ابتسمت من طريقة كلامه =اي هسه دقيقه راح اصيحها
رحت = خاله اجه ابنج
– اي
كامت وانا وروان رحنه للمطبخ واسمعها تكله // تعال يمه خطيه كاتلهن الحر
اجت للمطبخ // ها انتن اهنا راح ياخذ الصحن ويصعد وراح ياخذ ويا التلفزيون
هزيت راسي // اي خاله احنه اهنا كاعدات
– لا شنو اهنا تعالن يمي بالغرفه هو من ينزل راح يصيح عليه
رحنه يمها انا شايله ملاك باوعت الها سالتني // خطيه ما شايفه امها
هزيت راسي بالنفي هيه كالت // الله يعينچن هسه ناس كبار ونريد امهاتنا
سكتنا ما جاوبناها بعدها سمعنا صوت // يمه
هيه طلعت // هاا
– سويته التلفزيون وراح ابلش بالمكيف بس ما اكدر اصعده ابحدي
– شلقصه هوه مكيف نمونه
– يمه تره انا بشر مو حصان
– حشى الحصان وهسه
– هسه راح اصيح الذوله جماعتي خلي البنات يرحن الغير مكان وانتي ابقي يمنا
– اي ان شاالله
– بس ذولي مو ابلاش
– خايب انچب هسه انا اصيحهم
– لا عليمن انچب انا اصيحهم
رحنا للمطبخ وبذيج اللحظه حسينه براحه لان ملاك كلش متعلقه بالتلفزيون انا طلعت بطل الببسي وگتلها
= خاله ام غسان
اجتني ها خاله
= هذا ببسي وهاي كلاصات صبيلهم وخلي يشربون
ياا انتي عبالج صدك وج هذا يتشاقى
= مي خالف خلي يشربون بالعافيه
اخذته والكلاصين وصبت الهم وبعدها اجت وگالت راح يجيب الدرج من بيتنا حتى يركب البنكات ويكول المكيف صار بس يرادله واير توصاله وتيب
= اي خاله خلي شنو يريد يجيب
اي هسه اكله
وسمعنا دكة الباب وهيه اجت يمنا // هسه راح يجيب الغراض وبعدها يجيب الدرج ويشكل البنكات
= مشكوره خاله تعبناج
العفو حبيبتي ماكو كل تعب احنه جيران واهل
رجع اندك الباب وراحت فتحته // شبساع جبت الغراض
لا يمه وديت كرار راح ايجيبهن وانا اجيت اشكل البنكه
خوش ياالله
اجت سالتني //اكلج وين البنكات
بالديوان اثنينهن بكراتينهن
بقينه كاعدات بالمطبخ وتقريبا نص ساعه او اكثر واجت ام غسان گالت
كمل بنكة الديوان وراح يروح للغرفه
من حسيت بي راح للغرفه طلعنا رحنا للديوان انا وروان وصرنا نشيل بالكراتين والفلين مال المروحه كلت الروان
= الكراتين بالليل اخليهن الهذا الشباك من بره
روان // ليش مو خلينه البرده
= مي خالف استر
بكيفج مها
رجع منذر دخل للديوان الصراحه هوه ما متقصد اتفاجأ وگال //السلام عليكم
ردينه علي بنفس المفاجأه // عليكم السلام
منذر چان شاب تقريبا عمره سبعطعش سنه طويل وضعيف وابيض يعني حلو لاباس بي ملامح رجولته مو هلكد
يعني قريب للطفولي هو اخذ الكارتون الثاني وراح بعدها اجت ام غسان وگالت
كمل البنكه الثانيه وبالليل راح يجي ويشد المكيف ع الكهرباء هسه راح نروح لان وكت مغرب وصلا
اتشكرتها وهوه طلع من رادت تطلع انا استوقفتها = خاله اوگفي
– ها يمه
مديت ايدي وطلعت عشر تالاف هيه سالتني // شنو هذني
= خاله انطيهن المنذر اله
– مو عيب تره يتشاقى
=مي خالف هوه وده على واير وتيب
– لا خاله ما اخذهن شنو نمونه حق الجار ع الجار
=مي خالف لا تخجليني
– والله ما اخجلج بس هوه ما يقبل اذا تردين انتي انطيهن اله يجوز ياخذهن منج
= لا خاله انا استحي انتي اخذيهن گليله من اختك
اخذتهن وكالت //- خلص بالليل من يجي ابوج منذر راح يجي ويكمل المكيف
= اشكرج خاله
العفو ياالله انطيني المواعين
= لا ما انطيهن ما ارجعهن فارغات
– شنو بدل
= لا خاله محبه مو انتي كلتي احنه بيت واحد
روان /= اي خاله تره مها تعرف كل شي تطبخ
– مبينات معدلات الله يحفظجن
///////////////////==//=//////////////يتبع
