رواية عقارب ذوي القربي الفصل التاسع عشر 19 بقلم انين الليل

= لا تستهزئيين

روان اتهز ابايدها // ههههي انتي جاي اتحلمين لمن ما نكمل دراسه ونتخرج احنه كاتلنه الجوع اذا ما ميتات من الجوع

جاوبتها = هاي انتي هيج تحچيين لان ما تردين اتدرسين جاي تخلين اعذار

رهف // هاي شبيچن انا گلت جوعانه

= هسه خلي ننتظر ابوي ويصير خير

تقريبا الساعه بالسبعه اجه ابوي دخل وسلم من شاف المروحه معلكه اتساءل قبل لا يحچي جاوبته

= بابا اجت جيرانه ام غسان

– مني ام غسان

= مرت الحجي الي اجر النه هذا البيت

– ها اي

= اي ومن شافتنا لابنكه وشافت ملاك تبجي ع التلفزيون هيه خابرت ابنها اجه وسووا التلفزيون وركب البنكات

– ها هيه جابته ؟

=اي بابا وحتى بقت الى ان كمل ورفع المكيف بس بعد ايجيب له واير ودكمه ما اعرف شنو

ابوي // الله ينطيهم

= ياالله بابا روح اسبح وارتاح

– ها اي حضريلي ملابسي

= صار

اعرف اب ابوي جايب اله مشروب وما يريدني اشوفه وقررت اخذ باقي الفلوس الي بقن من الستوته

رحت خليتله ملابس وهوه طلع بره ورجع دخل للحمام انا خليت خيار وطماطه وخبز وكلت الرهف

= وكليها الملاك وياچ

رهف // بس هذا ما يشبعني مها

= مي خالف بس اليوم لان شفتينه شلون هوسه من باچر راح نسوي غدا وعشا

روان //مو من اكول ام بطن محد يصدگني

رهف // – انچبي انتي انا ما حاچيه وياج

اتقربت منها وانا احضنها = حبيبتي رهوفه احنه هم لازم نتحمل شويه يعني ابونه يوم يجوز يحصل ويوم ما

يحصل يجوز نصير يوم نطبخ ويوم ناكل بس خبز وچاي

روان باستهزاء // وهذا الشي الى ان نتخرج ونتوظف

باوعتلها وعوجت حلكي = انتي ابقي بس استهزئي

رهف // لان كسولي

لزمتها من شعرها وهيه اتگلها // منو الكسولي گولي منو

رهف //هديني روان

– – ما اهدج منو الكسولي

اجيت يم روان وخرتها من رهف وهيه تتوعدها // انا الج اعلمج

ورهف دمعت عيونها وهي تعدل بشعرها // اله اگل الابوي

= رهف اسكتي عن هاي مخبله ما ادري شبيها

رهف // هسه اگل الابوي اخلي ايكسرها

= لا حبيبتي جاي تعبان ومن اتگليله راح يكتل روان ويجوز يكتلنه وما يطلع للشغل خليها اتولي

خزرت روان وطلعت لگيت ابوي بالغرفه گتله = راح اجيبلك تاكل

سالني // شنو عندج

= خيار وطماطه وانت جبت خبز

– – نعمه اي جيبيلي

رحت قطعت طماطيه وخيارتين وخليت شويه ملح وخبزتين وجبتهن ورحت جبت دولكة ماي

= ياالله بابا اتعشى خاف يجي الولد يكمل شد المكيف

– – اي اي

بقى ياكل وانا اباوع اله من كمل كلي // سويلي جاي

رحت صبيتله كوب چاي واجيت يمه قدمته وصار يشرب بالكوب انا حاچيته = بابا

هو باوعلي بدون ما يرد استردفت

= بابا انطيني الخمس تالاف مال يوميه

هو هز راسه وسالني // وبيوم الما احصل

= ثاني يوم اتعوضني

هو مد ايده جوه المخده وطلع جيزدانه وانطاني خمسه اخذتهن وجاوبته =بابا اريد الباقي مال الستوته محتاجين

غراض هوايه للبيت

هو عفس وجهه وحك خده // ياباقي ؟

= شنو بابا مو بقى مية الف واحنه محتاجين مواعين جلكان للماي الحلو سطل للحمام هواي يراد النه غراض

حتى لو نلگى سنك مستعمل

هوه جاوبني بتردد// اي اي بس انا صرفت منهن الستوته بيها عطلات وسويتهن وانا رحت اشتريتلي سروالين

عراض مال شغل

= وينهن

– خليتهن بالستوته

= لا بابا دخلهن لا ينباگن

– – اي هسه

= مي خالف انطيني البقى اكو اشياءمهمه لازم انجيبها

هو طلع الفلوس على مضض وبعيونه عتب اليه انطانياهن جانن خمسه واربعين اعرف بقى من عدهن اله

واعرف اشترى منهن المشروب لكن انا مصره احافظ على كل فلس عندي ما حاجيته اخذتهن وگتله

= بابا مو تكول مشتري سراويل للشغل دخلهن

– – اي

راح ابوي وانا لازمه الفلوس واحچي ويه نفسي = يعني يابابا الى متى تبقى هالشكل كل الي صار ما خلاك تتغير

لو تحاول تتغير

بعدين فكرت وگلت = هذا الادمان كل شي يسوي

سمعت باب الشارع انفتح وصوت ايوي يگول // اتفضلو هلا بيكم

اجه گلي // بسرعه سوي چاي

رحت حميت الچاي وطلعت كوبين وانتظرت ابوي لان ما اعرف منو الي اجه وشكم نفر

اجه ابوي وكلي بهمس هذا جيرانه ابو غسان ويا ابنه جاي يسوي المكيف

صبيت كوبين جاي واخذ ابوي الصينيه وانا طلعت وكفت قريب الباب اسمع ابوي يسال ابو غسان

شنو جايب لايت وياك

ابو غسان // اي ما تدري يمته تطفى الكهرباء وانا بالظلمه كل شي ما اشوف

عرفت يراد النه لايتات لان نحتاجهن صار ابو غسان يسال اب ابوي // بشر لكيتلك شغل

– – اي والله الله ينطيك وينطي ابو مصطفى لكالي شغل عد رجال صاحبه

– – شيشتغل ؟

– – عده علوه سمنت وكاشي وطابوك

– – الله يرزقك

– – رحم الله والديك

ابو غسان // هذا ابني منذر جاي حتى ايكمل الكم شد المكيف

– – اي والله الله يحفظك عمي

منذر //ولو تدلل ما سوينه شي

ابوي طلع شافني واكفه گلي // روحي خلي اخواتج يجن للمطبخ

هزيت راسي ورحت صحت الروان ورهف وشلت ملاك

گعدنا تقريبا نص ساعه واسمع حركه مره فوك السطح مره جوه وبعدها اجه ابوي وگلي //ياالله كملو المكيف

رهف صارت اتطفر وتصفك اب ايدها ورحنا للغرفه ابوي گلي //راح اطلع ويه ابو غسان

= وين بابا

— — مو هوه گلي دووم ايگعدون بره وهم لازم اتعرف ع الجوارين

انا بيني وبين نفسي = علوا يطلع ويتعرف بالناس بلكي ينسى وما يشرب جاوبته

= اي بابا روح وانا راح ادخل افراشك بالغرفه

هو باوعلي وسالني // ليش ؟

= بابا اهنا حاره

– – لا اهنا بقي افراشي الجو زين وبعدين الغرفه زغيره

= مي خالف

– – لا بابا اهنا وافتح الشباك واذا كلش احتر انام بالطارمه

رحنا للغرفه واحنه فرحانات ولان الجو يختلف عن جو البصره والغرفه زغيره فالمكيف بسرعه برد وفتحنه التلفزيون

وصرنا نباوع حسينا بالراحه بقيت متمدده وخاله ايدي على عيوني وافكر

= باجر اروح واجيب سطل ومعجانه ولايت واجيب دولكات فافون للفريز واجيب ترمز

بقن البنات يباوعن للتلفزيون واجت ملاك اتمددت يمي وانا صرت ابوسها واحضن بيها واگللها

= ملوكه حبيبتي فرحانه

هيه تضحك

انا جاوبتها = شنو زغيره گولي اي

هيه ردت // اي

= عفيه بملوكه

صارت الساعه بالعشره وصارن روان ورهف يتناكرن لان رهف تريد توم وجيري وروان تريد تشوف فلم

روان // ارهيفه الزعطوطه يمته تكبرين

– – انتي الزعطوطه مها شوفيها

عطت بيهن = بس صوتچن منا ناس روان دوري على افلام كارتون

روان //شنو بكيفجن يعني لو ملاك على طيور الجنه وكراميش لو رهف على افلام كارتون

گعدت وجريت تفس = روان خليهن ايباعن والفلم ينعاد مية مره

اذا لازماته التلفزيون يمته نشوف النه فلم مسلسل

نفخت = مي خالف رونه زغار خطيه

— هسه ملاك نكول زغيره بس هاي الچنها دب هم زغيره

صارت رهف تبچي // شوفيها شلون تعيب عليه

هزيت راسي وانا الملم بحلكي = اي زغيره

لزمت الريمونت ودرته الرهف الي حست بالانتصار روان هزت ايدها عود انتي مسويه روحج مسؤوله عنه

ما جاوبتها ورجعت اتمددت هيه هم اتمددت ودارت وجهها وهيه تتوعد الرهف بقيت كاعده منتظره ابوي يجي

صرت كل شويه اروح للغرفه اشوفه اجه لو بعده وانا اتصنط للشارع حسيت ما بقى احد بي يعني كلمن راح البيته

ضليت منتظره ابوي وين راح بهالليل صارت الساعه بهدعش وربع حسيت ابوي اجه من دخل عرفت بي چان يشرب

هو اتفاجأ بيه انا ما حاجيته رحت الباب الحوش اتاكدت اتسرگى من داخل ورجعت شفته متمدد على فراشه

وداير وجهه

رحت للغرفه رهف نايمه وروان اب ايدها الريمونت وتباوع على فلم مصري اجيت اتمددت على فراشي

وانا اتحسر واحچي ويه نفسي = ابوي الى متى يبقى هالشكل ما يفكر احنه ما بقى عدنا احد

ظليت افكر وغفيت الفجر گعدت لان هاي صارت عندي عاده طلعت سمعت الاذان اياذن اتوضيت وصليت

ودعيت ورجعت اتمددت تقريبا ساعه بعدها رحت ندهت ابوي

= بابا بابا

همم

= اكعد مو كلت لازم تغبش للشغل

بيش الساعه

= ما ادري

سحبت النقال شفتها بالخمسه

= بابا بالخمسه

هو حك شعره وبقى يمسح على گصته فتح عيونه وگام راح للحمام غسل وكلي // راح ابدل واطلع

هزيت راسي وحاچيته = بعد اشويه اطلع اجيب شغلات محتاجيهن

— اي واتسوكي وياج

=بابا ما عندي فلوس

مو رجعتلج البقن من الفلوس

= يادوب يكفن للغراض هواي محتاجين

اي مي خالف بس اليوم دبري نفسج وانا من باجر اتسوك

= تمام (باوعتله بعتب ) بابا ليش البارحه رجعت تشرب

هوه باوعلي بذهول انا حاچيته = بابا …

ماخلاني اكمل كلي // انا طالع ديري بالج على اخواتج

سركيت الباب ورا ورجعت اتمددت بفراشي حاولت انام ما گدرت كمت نظفت الغرفه ولميت فراش ابوي وبعدها

رحت للمطبخ

نظفته وغسلت الطارمه وغسلت ملابس ملاك جوه الحنفيه لان الغساله عطلت قبل ما تتوفى بيبي باسبوعين

ومحد صلحها واساسا ما جبناها شريت الملابس على شباج المطبخ يعني يراد حبل وقراصات

لبست جبتي واخذت المفتاح وطلعت رحت للدكان سلمت على الرجال واشتريت بيض اب الف واتذكرت

روان تحب الجبن وانا البارحه شويه طخييت وياها خلي اخذ باكيت جبن ارضيها بي

اخذت جبن ابو الولد المثلث واجيت خدرت الجاي وگليت تلث بيضات وطلعت تلث قطع جبن والباقي ضميته

كعدتهن ما قبلن ايكعدن انا حچيت = الي ما تكعد ما الها لا بيض ولا جبن

هنه گعدن عبالك مكوكات

بيني وبين نفسي گلت = هذا الجوع والحرمان الله يساعد اليتيم الي ما عنده احد يشتغل وينطي

اترحمت البيبي الي حتى من ماتت حافظت على كرامتنا بعد ان اقرب الناس النه سحگها بقندرته لان لو ما هيه

ضامه عندي هالشكم فلس شنو جان يكون مصيرنه لكن ما اخفيكم خايفه من شي اسمه باجر

گعدنا اتريگنه واحنه ساكتات بعدها رهف اتمددت وبيدها الريمونت وروان رجعت تريد تنام حاچيتهن

= عيني خواتين راح اروح للسوك اجيب شكم غرض رتبن الغرفه وديرن بالچن على ملاك

روان // عفيه مهاوي خلي اروح وياج

رهف //وليش ترحين وياها قابل انتي ناجحه الاولى اگعدي ادرسي وانا اروح وياها

وگفت وجريت نفس = اسمعني انتي وياها مال كل شويه وحده من عدچن متعاركه ويه الثانيه وصوت عالي

ولسان طويل هاي اتجوزن منها ما رايحه اتونس رايحه اجيب غراض محتاجينهن بهذا الگن مال الدجاج

وماندري باجر شنو الي متانينه اتگعدن وتنثبرن وانتي روان مو زغيره كافي صوتج طالع وتتناكرين ويه رهف

روان ردت // ما تشوفينها متشمخره ما تدري اسحك راسها بنعالي

عضيت على شفتي = اي بعد بعد اتعاركن خلي الناس تتفرج علينه انتن ما اتحسن احنه بيا حال كافي عاد اذا

انتن ما مهتمات اقلها اسكتن

خنكتني العبره هنه وحده صارت تباوع للثانيه واجن يمي // مها لا تزعلين عفيه

رهف //حبيبتي مهاوي بعد ما احاجي روان اسفه

= عفيه عليجن رايحه وما اتاخر (باوعت الروان )

= روان عود اغسلي مواعين الريوك ومن تكعد ملاك اكو باكيت حليب وسويلها خبزه بس دفي مو تنطينه الها بارد

— تدللين

رهف //انا اريگها روان خلي تروح للغرفه البرانيه تقرا

رغم دووم يتناكرن بس وحده گلبها ع الثانيه طلعت رحت للسوك الدنيا صبح امشي بهدوء واباوع للطريق

واشوف الناس اتباوعلي عبالك يعرفوني انا غريبه عن المنطقه

وصلت يم محل ايبيع مواعين وادوات مطبخ احب كل شي اشتري لكن ما اكدر اشتري بس احتياجاتنا

اخذت سطل وطشت ومعجنه واخذت حبل وقراصات ودولكات فافون وترمز حجم وسط ولايتات اثنين زغار

واخذت كيلوين تمن عنبر لان سعره هناك مناسب بسبب ما تشتهر بيها المحافظه من زراعة الشلب واخذت بطل زيت واشتريت كيلوين

سمج زغار (زوري )

خليت شي ابطن شي وشلتهن على چتفي واجيت امشي الى ان وصلت للفرع مالتنه قريب على بيتنا استوقفني صوت

– اساعدج

انا ما باوعتله وما رديت هوه گلي مره ثانيه //اساعدج

حسيت بي قريب من عندي باوعتله شفته منذر اتفاجأت من تصرفه لكن جاوبته = شكرا رحم الله والديك

— اشلونج خويه

= الحمد لله

— ولو انا زعلان عليج

انا خليت الغراض بالكاع وسالته باستغراب = زعلان ليش زعلان

— مو عيب مخليه عد امي فلوس اتگليلها هذا تعبه

= لا هيج ذني اقل من اتعابك

— لا احنه اهل وجيران وانا ما سويت اله الواجب اتفضلي اخذيهن

هزيت راسي // لا ما يصير انت اجيت وتعبت وحتى صحت الجماعتك ايساعدونك

— ما اتكاطعت الدنيا هسه اخذيهن واي شي تحتاجونه انا برسم الخدمه بس دكي الباب

اخذتهن لان اصر عليه واتشكرته ورغم انو كلامه عجبني بس احس بي خفيف وانا حييل اضوج من

اي بني ادم خفيف

دگيت الباب ودخلت شفت روان لازمه كتابها وهيه تتساءل //. سمعت صوتج ويامن چنتي تحچيين

= ويه هذا الولد منذر ابن جيرانه

— شكو تحچيين ويا

= مو انا هوه اجه ايعاتبني ليش مخليه فلوس عد امه

— ورجعهن

= اي رجعهن ما قبل ياخذهن وكال احنه اهل

— نعم الله علي

هزيت راسي وجاوبتها = اقري روان مو تتصنطين للحجي الي بالشارع

— انا ما اتصنط غصبن عليه اسمع قابل اسد اذاناتي

= اي حبيبتي سدي اذاناتج

رحت نظفت السمج ونگعت طاستين تمن واخذت الحبل شديته فوك السطح لان تقريبا الطارمه ما تدخلها شمس

هم زغيره وهم داخليه اباوع للسطح تعبان يتراوالي اب اي لحظه يطيح علينه وحتى الوارش مالته ناصي مو كلش عالي

شديت الحبل ونزلت خليت السطل بالحمام والمعجنه جوه الحنفيه الي بالمطبخ

وترست الدولكات ماي خليته بالفريز وشحنت اللايتات

وبعدها رحت طبخت كملت واذن الاذان صليت وصبيت غدا وكعدنا ناكل واخذت روان المواعين وغسلتهن

واجه ابوي سلم علينه وصبيتله غدا اتغدا وكلي سويلي چاي ومن راد يطلع انطاني الخمس تالاف الي اخذتهن

منه وضميتهن حتى اجمع للايجار

ومشى اليوم عادي اجه ابوي وره المغرب وجايب ويا علاكة اخذتها وشفتها بيها خضروات يعني بطاطا وباذنجان

وطماطه وبصل وخبز وكلي // طلع المخبز يمنا

هزيت راسي واخذت العلاكتين للمطبخ واجت يمي روان سالتني شنو نسوي عشا

نسلك بتيته ونگليها ونسوي چاي

هيه طلعت البتيته چان كيلو سلكته وخدرت چاي وبعدها انا رحت گليتها لان اعرف روان راح تاخذ نص بطل الزيت

صبينه عشا واتجمعنا كلنه بالغرفه وصرنا ناكل شاف الترمز مال الماي

– – اي زين اشتريتي ترمز

هزيت راسي = اي واشتريت هواي شغلات

بهاي الاثناء طفت الكهرباء انا فتحت اللايت هو ابتسم وكال //غرفتچن تبقى بارده لان زغيره

= بابا تعال نام اهنا

– – لا بابا انا مرتاح بنومتي

رهف // بس حاره عليك

– -مي خالف هنه شكم ساعه اتحملها ويصبح الصبح

اشوف المراره بكلام ابوي لكن هوه ما يبين الحزن الي بداخله

كملنه عشا وبقت الصينيه اعرف روان تخاف من الظلمه او بعدهي ما ماخذه على البيت انطيتها اللايت

وانا لزمت ملاك سالت ابوي = اتسوكت من السوك

– – لا رحت اودي اسمنت الواحد وشفت بسطيه اتسوكت منها

= اندليت المكانات

باوعلي وهو عاكف حواجبه // شنو يا مكانات

= اقصد من تاخذ شغلات للناس تندل المكان

– – هاا اي امشي واسال ويدلوني بس الشغل مو هلگد

= نعمه بابا ولا الماكو

اجت روان بايدها اللايت وهيه تكول غسلتهن المواعين بس الماي وين اذبه

= بره اشمري ما سمعتي ام غسان كالت اشمره بره

راح ابوي الغرفته وانا لحكته شفته واكف يعني يريد يطلع سالته

= وين بابا

استغرب من سؤالي // راح اطلع شويه اهنا يم ابو غسان

جريت نفس وسالته = يم ابو غسان لو حتى تشرب

بهاي الاثناء اجت الكهرباء شفته يخزرني انا جاوبته = بابا كافي شرب الله يخليك وانتبه النه

هو رد بعصبيه // شنو انتي تعلميني

جريت نفس = بابا احنه اهنا غربه وبس انت النه مو حلوه الناس تدري بيك تشرب

حك خده // – – ليش انا من اشرب لويش غير من ضيمي من قهري

عرفت لو شنو يصير ابوي ما راح يترك المشروب جاوبته = بابا لا تشرب بره اكعد اهنا واشرب

– – انا ما شارب

= بابا انت البارحه من طلعت ويه جوارينه رجعت وانت شارب

– – اي گعدت بالستوته وشربت

= بابا لا تشرب بره اذا تريد تعال اشرب اهنا بالبيت

هوه ما سمعني وطلع صرت احچي بحنق = بدل ما يفكر بينه شلون نعيش يروح يشرب لان ما يصير نبقى

محترمين گدام الناس

اجت روان // كافي مها ما يفيد الحجي

سالتها = سمعتينه مو

هزت راسها // اي وادري لو مو تحچيين لو شنو يصير يبقى يشرب نسيتي من اتوفت بيبي بليلتها احنه نبچي

ونتصارخ والناس ماليه البيت وهو صعد فوك يشرب وصار معين يتهدد ويسب ويغلط

سكتت وانا بگلبي حركه يعني ابوي بكل هذا الي صار ما يحس بينه ما يفكر ويكول هذني البنات لازم يعيشن

عيشه كريمه

قررت بس يجي احچي ويا لازم ايلاگيله حل رجعنا للغرفه وشفت رهف هيه وملاك گاعدات ع التلفزيون

ما استقريت الى ان سمعت الباب انفتح شفته اجه ونفس تصرفات كل مره

شافني واكفه واخزر بي واباوعله هوه گعد على الدوشك مالته يريد يتمدد وصلت يمه

= شارب مو

هو ما جاوبنبي رديت سالته = يعني لازم تشرب حرام الفلس تصرفه علينه

هو وكف وصار يحچي رغم لسانه ثكيل // شنو انتي اتحاسبيني انتي نسيتي نفسج تره انا ابوج مو انتي امي

هزيت راسي = ادري انته ابوي وانت مسؤول عني بس القبل يصير بالبصره م…

قاطعني // الي يصير نفس الشي

هزيت راسي = لا مو نفس الشي قبل جانت بيبي ضامتنه جوه جناحها ومن اتمرضت جان عدنا بيت ساكنين

بي وسط اهلنه وجوارينه هسه احنه بمنطقه ما نعرفها امس اجينه واليوم سكران ما اتكلي شراح تحچي علينه الناس

رد بزمخه // اكلي تبن شنوشايفتني اتطوطح

= اي هيه هم عايزه تتطوطح

– – روحي مها ما عليج بيه

= لا عليه الفلس الي تصرفه ع السم الي تشربه احنه اولى بي

— — جاي اتحاسبيني ياحقيره منو انتي وتحاسبيني روحي لا احرك البيت على راسج

لا اراديا گلت = ما تنلام امي من عافتك وهجت

هوه صفن.وباوعلي ما لزم نفسه صار يبچي وبحرگه يحچي وهو يضرب على راسه

– – وچ نهله وين وصلتيني حتى بتي اتعيرني بيچ نهللله نهللله يابت الكلب ياريت الزمج واموتج اب ايدي

من شفته شلون يحچي وصوته عالي يعني الناس اذا بالشارع تسمعنا لزمته وحضنته = كافي بابا كافي

هوه عت ايدي // لا مو كافي انتي منيتي عليه لان انطيتيني فلوس الستوته

رجعت حضنته = بابا شنو منيت عليك بس انا خايفه عليك الشرب اياذيك واحنه ما عدنه غيرك حبيبي

لاتزعل اخاف عليك يابابا اذا صار بيك شي شلون بينه

هو يضرب على گصته // – – ياريت اموت ياريت كتلت حلا وانسجنت وانعدمت

= لا بابا لاتحچي هالشكل انته ابونه وخيمتنا ياالله نام وارتاح

– – ارتاح تره انا عمري كله ما ارتاحييت هسه ترديني ارتاح ياريتني اموت

رحت جبتله ماي ومن دخلت للغرفه شفته طلع حبايه وبلعها بدون ماي عرفت ابوي مو بس ادمن على المشروب

لا وع الحبوب همه

خليت الماي يمه ورجعت للغرفه اتذكرت البرنامج الي شفته قبل شهر وشنو تسوي الحبوب بالانسان الي

يتعاطاها واتذكرت شلون ابوي ما خلى شي ما باعه غرفة النوم والمكيف والثلاجه

بقيت افكر شلون راح نكمل حياتنا شسوي اذا صار علي شي لو بقى ما يعرف ليله من نهاره شلون اتصرف

بذيج اللحظه اتمنيت حضن بيبي ودعاءها وتوصياتها ونصيحه من ست اسراء لكن هنه مو يمي واتذكرت

كلام ست اسراء شلون خلتني احمي نفسي من سليم الفرق الي صار انو انا اليوم مو ابحدي وياي تلث

بنات ازغر مني ولازم احمي نفسي واحميهن

جريت نفس ورفعت راسي للسما وحاچيت ربي = ياربي انته تدري بيه وتعلم بحالي ساعدني ياالله

بچييت مثل مل يوم نمت وگعدت ثاني يوم صليت ورجعت اتمددت مامريت بي ولا ندهته هوه كعد من بحده وطلع ورجع الظهر اتغدا

وهوه ساكت وانطاني الخمس تالاف ومن رجع بالليل جاب مسواك وصارت هاي حياتنا

يطلع يرجع الظهر ينطيني الخمس تالاف وبالليل يجيب مسواك مرات مخضر كيلو كيلو ومرات

يعني بالاسبوع مره يجيبلنه ويا نص كيلو برتقال او نص كيلو تفاح ومرات يجيب سمج زغار او يجيب جبن

واذا جاب دجاجه ما يجيب بس الخبز

ومرات يكول ما حصلت شي فكل شي ما يجيب انا باالي موجود عندي احاول اگزر نفسي واخواتي

انا لان علمتني بيبي اشلون ادبر حالي چنت مقتصده بكل شي وصرت اخلي بالاسبوع يومين كل شي ما

يجيب بس الخبزات ومن يرجع بالليل وما جايب شي ويا اكله اذا عندك انطيني تلث تالاف هوه ينطيني

مرات انا اضم الفين والف الصبح اجيب بي جبن او قشطه او بيض للريوك

الالفين اضمهن للغاز يعني انا فكرت بكل شي من ناحية تدبير البيت

بحيث صار ابوي يعتمد عليه ويسالني من يطلع الظهر شنو اجيب مسواك

عمو ابو مصطفى وره اسبوعين اجه وجاب ويا علاگة فواكه بالليل وطلع هوه وابوي وكالعاده ابوي من رجع

رجع وهوه شارب

وره شهر ابوي سامع من العمال لازم ينقلنه ولازم يروح للتربيه الي بالمحافظه ويجيب قبول وبعدها يراجع

تربية البصره و يرجع للمدرسه وروان تقرا ورهف فرحت من سمعت راح ينقلنه من قرر ايسافر سالته

= بابا وين تروح هناك

هوه باوعلي // باجر اغبش الفجر واحاول ارجع بنفس اليوم

= بابا وياك انقل كميتنا تفيدنا

هز راسه // اي ان شاالله همزين ذكرتيني

ثاني يوم الفجر گعدت خدرت الجاي وندهت ابوي هوه بس شرب چاي وطلع راح للبصره واحنه بقينه منتظرات

جيته تقريبا بالتسعه بالليل اجه چان مبين علي التعب اتلگينا جان كلش تعبان شفنا ضايج سالته گال

– – لازم بعد يومين ارجع اجيب الوثايق واروح اصدقهن من التربيه واجيت وبعد يومين تلاثه ارجع اكملهن

= اي بابا ليش ضايج

هز راسه وجاوبني // روان نسينه امتحانها لان ما ندري يمته وفايتها يعني بقت بصفها

انا نشغت ولطمت على خدي وهيه صفنت بعدها كالت // بالاساس انا الانكليزي ما دارسته هلگد يعني ارسب ارسب

رهف //يعني شنو روان بقيتي بصفج

– – اي بقيت عندج اعتراض

رادن يتناگرن انا زمخت عليهن = اشش كافي خلي اكوم اسويلك عشا

رحت گليتله طماطه وصبيتله كوب جاي جبته هوه اكل سالته

= بابا والكميه

– – مريت ع الوكيل وگلي انا امشي بيها بس راد 150 حتى ينقلها

= ليش

مو معامله وركضه وتاخذ ايام

= مي خالف انقلها بابا اقلها نستفاد منها

– – اذا عندج انطيني حتى انقلها من اروح اكمل اوراق نقلجن

سكتت ما جاوبته هو گلي // اريد انام كلش تعبان

اعرف هو ما ينام اذا ما يشرب او ياخذ الحبوب اخذت المواعين وطلعت

بقى تلث تيام ويوم الرابع راح للبصره انطيته ال 150 وكتله

= هاك بابا هذن الميه وخمسين

اخذهن ويباوعلي باستغراب // منينلج

= هذني عندي مجمعتهن من مصرفي الي تنطيني ايا بيبي الله يرحمها

– – شو ما ادري بيهن

= بابا لو تدري جان صرفناهن هسه فادنه ولاتنسى شنو تكدر تجيب من كميتنا الي عند الوكيل جيب

سافر ورجع ثاني يوم وجاب النقل وصار لازم نسجل بالمدرسه هوه سال شاف اكو اعداديه عكسها متوسطه يعني

نتبادل وهذا الشي ريحني ولازم ملابس للمدرسه طلعت من الفلوس ورحت انا ورهف اشتريت الها صدريه

وحذاء وجنطه وحجاب رغم ما قبلت تتحجب بس انا فهمتها ماكو دوام اذا ما تتحجب

وثاني يوم خليناها بالبيت وقفلت الباب عليها ورحت اشتريت الروان ملابس هم اخذت الها صدريه وقميص وحجاب

وحذاء وانا هم نفس الشي ومن رجعت فهمتهن هذني الملابس حتى السنه الجايه هم نداوم بيهن واذا سال ابوي گولن

عدنا ملابس العام لان راح يسال منين الفلوس

وفعلا داومنا بالتناوب يعني روان ورهف سوا وابوي يجي قبل ما يحلون ونتبادل انا وياهن

ابوي بقى على حاله نفس ما هوه وتعودنا على تصرفاته وما صرت اعاتبه لكن چنت مصره يوميه

اخذ الخمس تالاف حتى لو يكول ما مشتغل وحتى لو نبقى بدون اكل المهم اخذهن واضمن الاجار اكثر من

مره ابوي راد يتملص لكن انا ما اخلي ينام ولا يطلع اله ينطيني الفلوس

عشنا ما اگلكم شلون عشنا لازم تفهمون مرات نبقى بدون عشا ومرات ناكل خبز وچاي حتى بالغدا

والبرد ما اسولف الكم شلون انام خصوصا من تمطر الدنيا والبيت يغرك من داخل ويمطر علينه من فوك

وشلون نرجف لكن عشنا ومن تضيق علينه واخواتي يتذمرن ابتسم بوجهن واكول باجر كل شي يتعدل وهاي

تصير ذكريات يمكن انحن الها

من نطلع للمدرسه چانت وصايا بيبي وياي ما ناسيتهن وطبقتهن على اخواتي رهف الي شبت وروان الي يوم

عن يوم تحلى وملاك بهدوئها

نايمين بالشتا وبيومها ملاك مصخنه خليتها بحضني دفيتها وحظنتها ونمت لكن فزيت على صرختها

///////////////////////يتبع