رواية عصابة بنات الفصل الثاني 2 بقلم هاجر ابراهيم

شمس :اسمو عامر بيك. ابو حسان وهوة صاحب شركة غدير للإستيراد والتصدير وهالزلمة عندو ولدين والتنين مسافرين برة البلد… واحد بيدرس لسا والتاني متزوج ومستقر برة …ابو حسان حاليا عايش مع مرتو لحالن … وطبعا عندو شركاء شي تنين او تلاتة بس نحنا ما بهمنا غير عامر بيك …
شهد :اي وكيف رح نحتال عشخصية متل هاد ؟ نحنا مابعمرنا ما احتلنا عحدا
شمس :ليش انا كيف بستدرج هالخوريف ؟مو بالاحتيال ؟
ميرا :صح شموسة بس عحسب حكيك هالرجال كبير وشكلو مخلع سنانو بهالقصص ..مو متل هالمراهقين …

شمس :اتطمنو انا حاسبتا عالليبرا ،كل اللي بدنا اياه هوة سند بيع شراء موقع بخط إيدو والباقي بالقانون وهيك بنصير نحنا صحاب الشركة ..ساعتها مابعود يسترجي حدا يجي صوبنا ،لأنو القانون لايحمي المغفلين

يمنى: قصدك بدك تستدرجي متل مابتستدرجي الشباب ؟
شمس :هالمرة مو انا يلي رح نفذ
الكل: ميين لكن ؟
شمس :ميرا
الكل :شووووووو
شمس :اي شبكوون ؟
ميرا :بس ليش انا ؟؟
شمس :لأنك اكتر وحدة بتناسبك هالشغلة
يمنى :وليش مابدك تنفذيها انتي شموسة ،بالعكس انتي انسب وحدة لهالشغلة
ميرا :كلام يمنى مزبوط ،انتي عطول اللي بتنفذي شو عدا مابدا ؟
شهد :انا بقلكون ليش ،هاد ياستي منك الها ،يمنى كلمتين عبعضون مابتعرف تحكي ولسا صغيرة بعمر 18 سنة ومابظن هاد البيك يطلع بخلقتها ،اما انا رح افضحكون من اول يوم لأنو تصرفاتي بتشبه تصرفات الشباب ومابقدر عحركات الدلع هي ، اما شمس يلي شفتو انها بالزور عم تسحب هالعاهات لحتا نسرئون وهية خايفة تفئد اعصابها شي يوم وتليخو ضربة تجيب اجلو للزلمة لهيك مرمر انتي انسب وحدة لهالشغلة لأنك واعية وعمرك مناسب ومتزنة وبتقدري تدلعي
ميرا :

شمس :شبنا مرمر هي شهد اللي هية شهد فهمتها وانتي الذكية ام عقل كبير وبتوزع عبلد ماتفهميها

شهد :نعم نعم نعم لتكوني شايفتيني مضيعة وهربانة من مشفى المجانين 
شمس :شهد خرسي خليني اعرف اتفاهم مع ميرا احسن بتعرفي شو بيصير
شهد :خلص خرسنا تضربو من بين الصحبة 

ضلت شمس ورا ميرا لحتا قنعتا بالآخر لحتا تقبل بالشغلة …

وبنفس اليوم قعدت شمس لحتا تعلم ميرا على شغلها الجديد … وتعرفها على عامر بيك ومرتو عن طريق الصور وعلى شركتو وعلى كم شخص من المقربين الو …
شمس :شو حفظتيون ؟
ميرا :اي بس…انتي شو عرفك بكل هدول الأشخاص ؟؟
شمس :اه…. كـ گكنت عم بعمل تحرياتي من زمان
شهد :لكك شموسة انو ليش هالزلمة بالتحديد ؟
شمس : عادي لا عن التعيين …اي ميرا رتبيلنا خطة مناسبة لحتا تقدري تتقربي منو

ميرا :هلأ انتي قلتي انو عندو ولاد برا البلد ،وعايش مع مرتو لحالون بالبيت !
شمس :اي …
ميرا :لا لا مابتزبط
شمس :شوهية ؟
ميرا :عم فكر بشغلة رح تجيبو كرفتة لهون
شمس :كييف ؟؟ رح تجيبي لهون ؟
ميرا :لا حبيبتي مو انا …سوزي يلي رح تجيبو
شمس :مين سوزي ؟

فاتت ميرا على غرفتها وجابت اللابتوب وقعدت. عليه وبلشت تفتح مواقع
شمس :بس فهمينا شو رح تعملي ؟
ميرا :سوزي البنت الدلوعة بنت صاحب اكبر مشاريع اسكان هون بالبلد …اسمها الكامل سوزان الساحر العمر 29 سنة الحالة عزباء المحصل الدراسي ادارة اعمال بنت جميلة جدا… البنت مسافرة من كزا سنة وعلى ما اظن مارح ترجع …
شمس :اي وشو دخلها بشغلنا ؟؟
يمنى :ميرا انتي عم تفكري تنتحلي شخصيتها ؟؟
ميرا :بالضبط ..هاد اللي رح يصير
شمس :وليش نقيتي هالبنت بالذات ؟
ميرا: رح ئلكون…خدو شوفو صورة البنت
صفرت شهد وقالت :يخربيتا محلاها هلأ هي بنت ونحنا بنات 
شمس :ميرا عفكرة فيها شبه منك
ميرا :هاد قصدي ،الصبية وحيدة لأهلا وهنن حاليا قاعدين برا البلد وانا تقريبا بشبهها مع شوية ميك أب بطلع نسخة عنها مشان ازا حاول عامر بيك يتقص عني ،وانا رح اعمل شوية أوراق ثبوتية مزورة لحتا ماحدا يشك فيني ،وابو الجود رح يساعدنا
سندت شمس حالها عالكرسي ورفعت رجلا عالطاولة …
شمس :والله مانك قليلة مرمرتي
يمنى :بس بركي هالبنت رجعت عالبلد ؟
ميرا :يعني الها عشر سنين برا البلد هلأ رح ترجع ؟ وشهودة جهزي حالك انتي رح تكوني الشوفير الخاص تبعي
شهد :امرك معلم
ميرا :وانتي يمونة … رح تكوني المرافقة الخاصة يعني متل السكرتيرة
يمنى :حاضر
ميرا :وانتي شمس … رح احتاجك انتي وابو الجود لحتا تسهلولي الطريق من خلف الكواليس كرمال فوت عالشركة
شمس :فهمت عليكي ،رح نخسر شوية مصاري بس يلي رح نكسبو اكتر بكتير
ميرا :معناتا اتفقنا

حطت ميرا ايدها ورجعو البنات حطو ايديهون على ايدها وقالو «نحنا عصابة صبايا وياويلو يلي رح يوقع بين ايدينا »
يمنى :ههههه بتكون امو داعية عليه

مضيت فترة الصبح وبلشو البنات يجهزو حالهون من كلشي … الاكسسوارات والمكياج والتياب لحد الأوراق واتصلت شمس على أبو الجود ..
شمس :كيفو احلا معلم ميكانيك
ابو الجود :مشتاق لشوف الشمس بنص الليل 
شمس :ابو الجود اتضبضب احسن ما اجي ورجيك النجوم بعز الضهر

ابو الجود :ههههه لك دخيل دماتك شو خفاف
شمس :اسماع بدي منك خدمة
ابو الجود :انتي بتأمري معلمتي
شمس :بدي منك تدبرلي سيارة مرتبة شغل هاي هاي يعني
ابو الجود :ليش شبها سيارتكون ؟
شمس :مابها شي بس نحنا عاوزينا بشغل …يعني شهرين زمان بس
ابو الجود :بحاول بس ما بوعدك
شمس :بدك تدبرنا وسدقني مارح انساك
ابو الجود :خلص عندي ،تكرم هالعيون
شمس :طيب ردلي خبر ازا صار معك شي
ابو جاد :الله معك…

شمس :وهي السيارة صارت جاهزة …
ميرا :بقيان المسكن …يعني مدموزيل سوزي عايشة بشقة فيها غرفتين مهرهرين وبهالحارة المأنشحة «المعفنة » ؟

شمس :كمان بتدبر …
رجعت حملت جوالها واتصلت على حدا …
شمس :هاي جوجو «جمال »
«للتمويه جوجو او جمال طانط ممدن عكيفكون »
جمال :لك يا اهلين وسهلين بأحلا شموسة بالكون
شمس :جوجيتي بدي اطلب منك خدمة بسيطة
جمال :من عيوني تفضلي
شمس :بدي تأجرني شقتك. الكبيرة يلي عطريق الأوتستراد
جمال :ييي …والله مابينعز عليكي شموسة بس هي الشقة مأجرة لناس كلاس وما بقدر قلون طلعو

شمس «بدلع »:طيب والحل …هيك بدك تزعل شموسة منك
جمال :مافشر يلي يزعل شموسة قلبي ..خلص انا رح أعطيكي الشقة يلي ساكن فيها انا

شمس :يعليي وانت وين تروح بحالك ؟
جمال :شبنا شموسة ما الشقة طابقين انا بقعد فوق وانتي ورفقاتك اقعدو تحت او انتي بتقعدي وين مابدك اصلا الصدر الك والعتبة الي حبيبي

شمس :لكك تقبش قلبي على هالحكيات …قلي اديش بتحب يكون اجارها باليوم جوجو
جمال :موعيب …حبيبي شموسة انتي بترفشي الباب برجلك وبتفوتي وانا ساعتها مابعود الي كلمة. .. عحسابك حبي
اشرت شمس للصبايا انو مشي الحال

شمس :اوك معناتا ،اليوم المسا انشالله بجيب الصبايا وبنجي ..ليك هنن كم يوم رح نقعدون عندك لبين بس ما يترمم بيتنا
جمال :انتي بتقعدي العمر كلو شموستي

شمس :تسلم جوجو …يالله باااي
جمال :بااي يا قلبي..

شمس :وهي الشقة اتدبرت
شهد :وهاد العاهة انشالله بدو يقعد معنا ؟
شمس :قال رح يعد بالطابق التاني وماعندو مشكلة بالايجار
يمنى :بس انا مابأمن نام ببيت فيه رجال
شمس :هههههههه انتي معتبرة جمال رجال ،، لك هاد يمكن يخاف على حالو منا …هلا سمعو بتضبو يلي جهزنا مع كم قطعة تياب مرتبين مشان نتسهل المسا
ميرا :وشو مشان هي الشقة ؟
شمس :حبيبتي هي الشقة مارح نسلمها رح نضل ندفع اجارها احتياطا بس لحتا ازا انكشفنا لا سمح الله نلاقي مكان نختفي فيه … يعني عالأقل محدا بيعرف مكانها …
ميرا :تمام …

———————*

بينما الصبايا كانو عم يخططو … كان كنان غرقان بشغلو …
رن تلفون المكتب ورد :اي ناديا
ناديا :سيد كنان الوالدة اتصلت وقالتلي خبرك كرمال تكون بالبيت عموعد الغدا
كنان :ليش ماحكتني عالموبايل ؟
ناديا :شكلك نسيان تشغلو بعد الإجتماع سيد كنان
سكر كنان الهاتف وحمل جوالو ورجع شغلو …
وشاف الرسائل اللي واصلينو عالوتساب كانو حوالي 100 رسالة من شخص واحد ..
كنان :اسما !! شو لسا بدك ؟ مابكفي يلي عملتي فيني ؟
فتح الرسائل وقرأها … كانت أغلب محتواها
«كنان رد عليي …سدقني انا بحبك … والله مو بقصدي اللي صار …… كنان انا اكتشفت اني اكبر غبية لما فرطت فيك … سدقني هوة اتضحك عليي … ياكنان سامحني »

ابتسم كنان ابتسامة خيبة أمل وقال :سامحك !؟؟ وبكل عين وقحة عم تبعتيلي …
اتصل كنان عالرقم وعطول ردت :اي حبيبي
كنان :سمعيني اسما رح اتغاضا هالمرة عن هالرسائل الزفت اللي باعتيها بس ورحمة ابي ازا بشوف رسالة وحدة او اي شي بخصك …سدقيني بضرك
اسما :تأسفتلك مليون مرة وقلتلك اني ندمانة وحياة الله ندمانة
كنان :ندمانة !؟؟ ههههه يلي بتفرط بحالها لواحد وهي على ذمة رجال بتعرف تندم ؟
اسما :انا بعترف اني غلطت بس…بس انا انا …
كنان :اسمااا …انا نسيتك فهمتي …ولبقا تبعتيلي رسائل وواسطات كرمال رجعك …قلك شغلة انا كرهتك وكرهت كلشي اسمو نسوان من بعدك …وبحمد ربي مليون مرة اني ماجبت ولاد منك لحتا ما اكرهون كمان
اسما :لهالدرجة كرهتني

كنان :واكتر كمان… انتي مانك متخيلة شو كان ممكن اعمل هداك اليوم لما شفتك نايمة جنبو …على تختي ياا اسما على تختي !… بتمنى لو كانت الرصاصة يلي ضاربها هداك اليوم كانت اجت بين عيونك مو بخاصرتك بس الله. بدو يفضحك ويخليكي تشوفي بعينك اديش الناس بتكره الشخص الخاين والكذاب … خلاكي عايشة لحتا تشوفي بعينك انو الموت بئي اهون من نظرات الناس
اسما :بكفي كرمال الله
كنان :وانتي كمان بكفي … هي اخر مرة بتتصلي والا بعمم عرقمك وبشتكي عليكي فهمتي

وسكر الخط بوجها …
كنان :الله يلعنك نزعتيلي نهاري …

رجع رن جوالو …
كنان :الو
…:كيفك سيد كنان
كنان :اهلين عامر بيك …خير
عامر :كل الخير …بس كأنك نسيت موعد اجتماعنا اليوم
كنان :لا ما نسيت بس صار في بالشركة اجتماع طارئ واتطريت غير مواعيدي …انشالله بكرة من كل بد رح مر عليك ونتناقش بالشغل
عامر : طيب بكرة موعدنا
وسكر السماعة …
كنان :منين الله باليني بهالعاهات ،شي اخي كريم ومشاكلو وشي اسما يلي جوزني اياها ابي قبل ما يموت وشي عامر بيك الشريك اللي ابي بلاني فيه …الله يتغمدك برحمتو يا ابي بس …كل مصايبي من تحت راسك

———————-*

كانت شمس قاعدة وعم تتسمع علئ أغنية أجنبية وهية عم تتذكر

«من أربع سنين …»
كانت شمس طالعة من غرفتها بالليل وسمعت صوت امها عم تبكي جوا غرفتها وجوز امها قاعد وعم يشرب
ام شمس :بس هي المصاري لشمس مو من حقك ولا من حق ولادك
….:هههههههه حبيبتي انا جوزك وأوعى منك ومن بنتك وشمس لسا مراهقة وبكرا بتضيع هالأملاك عالعلاك واكل الهوا
ام شمس :بس مو تاخدون بهالطريقة البشعة … يعني هلأ رح ترميني انا وبنتي بالشارع بعد ما خليتني وقع على سند بيع كل الأملاك وحطيتون بحسابك

حطت شمس ايدها عتمها وانصدمت ….
…..:لا اتطمني حبيبتي انا ما بستغني عنك …
ورفعها من شعرا وقال :بس حسك عينك انتي وللا بنتك تتفلحصو …والله برميكون لكلاب الشوارع تنهش بلحمكون نهش فهمانة

بعدت شمس عن باب غرفة امها وهية مو مستوعبة انو املاك ابوها تروح لشخص مافيو لاذمة ولا ضمير متل جوز امها ….

وبنفس الليلة ضبت اغراضها وبدون سابق انذار تركت البيت ومعد رجعت عليه ….
……
فتحت شمس عيونا وابتسمت ابتسامة خبث
شمس :خلص وقتك عامر هي مر اربع سنين وانتة عم تتنعم بمصاري بابا وانا رح رجع كلشي ورح ارميك انت وولادك بالشوارع يا ابن الكلب.