رواية عصابة بنات الفصل الثاني عشر 12 بقلم هاجر ابراهيم
وائل :لا مانك حرة
شمس :وائل … رح اعمل اللي براسي ولا انت ولا ابوك رح تمنعوني
كنان :شمس اهدي بتعرفي انو وائل بيقدر يحبسك
وائل :فهمها هالحكي
شمس :ازا طلع بإيدك اشتكي ولا تقصر
وائل :اي بشتكي خايف منك لأنو
همست شهد لـ ميرا :انتي شايفة انو نحنا رح نروح فيها من ورا شمس
ميرا :وشو العمل
شهد :انا برأيي نشتكي نحنا على شمس وكنان ووائل ونحكي انو هنن العصابة يلي عم ينصبو ونهرب نحنا وننفد بجلدنا
ميرا :اي انا ماعندي مانع بركي بنخلص من هالمناقشة الحامية اصلا نحنا شو دخلنا بمشاكلهن العائلية
وطقوها ضحكة بصوت عالي
اتطلعت شمس عليهن بعصبية … ولما شافوها هيك سكتو.
اخيرا سمعو صوت الجرس وراحت ميرا لحتا تفتح … وطلعت يمنى بوجها …
ميرا :اجت يمنى ياجماعة
وضمتها …وفات كريم وراها … راحو كلن عليها ومسكتها شمس وضمتا وبعدت عنها وبلشت تفتلها مكانها وتتفحصا وهية عم تسألها :اذاكي شي ؟ مد ايدو عليكي هالحيوان ؟
يمنى :لا شمس والله مافيني شي
شمس :اي منيح …
وتركتا وراحت وقفت مقابيل كريم …
شمس :برافو عليك …
وضربتو بوكس عبطنو وبس انحنى رجعت ضربتو. بوكس تاني عدقنو وهوة. اختل توازنو ووقع بالأرض. .
كريم :هي رجعتا ليش ضربتي ؟
شمس :هي لأنك اخدتا …انت مين اذنلك تاخدها ؟
كريم :لأنها…
وصفن كريم شوي بوجه شمس ورجع حكا :انتي … !!هلأ اتزكرت ويين شفتك
شهد :يا لهوييي انفضحنااا
شمس :انا شو ؟
ميرا :لسا قاعدة عم تسأل الهبلة
كنان :ووين شفتا .. ؟
اتطلع كريم بـ يمنى وشافها كيف خايفة وكانت عم اتطلع فيه وتترجاه بنظرتها لحتا مايحكي
كريم :لا يمكن مشبه عليها …
…………………..
بنفس الليلة كانو البنات قاعدين بالغرفة لحالهم وشمس عم تروح وتجي بالغرفة وهية متوترة …
شهد :خلصنا لك شمس لاتحمليها هالئد بعدين حاج تفتلي حولتينا
شمس :كيف ماحملها ووائل صار عندو خبر بكلشي … بس بدي افهم ليش عامر حكالو انو هوة مجرد وكيل ؟ ليش هوة عم يحكي شي وامي عم تحكي شييي انا رح ينضرب مخي من هالقصة
ميرا :انا بقلك شو استنتجت …
شهد :احكيلنا يافطحل زمانك
ميرا :بجوز عامر ما اخد ممتلكات ابوكي .. بجوز هنن لسا بإسم امك وعامر مجرد وكيل عليهن بس
شمس :عالأساس اجيتي بشي جديد … ما انا فكرت بهالشغلة … بس المشكلة انو من اربع سنين سمعت امي عم تترجاه لحتا يرجعهون عإسمها وهوة عم يهددها يرميني ويرميها بالشارع ازا اتفلحصنا شو بتستنتجي من هالحكي ؟
ميرا :معناتا عامر كذب على وائل
شهد :اكيد …محلا ويقلو انا سرقت املاك شاهر بيك
يمنى :بنات الله يوفقكون طفو هالضو ونامو راسي بعدو عم يفتل وتعبانة خيرات الله
ميرا :اي حبيبتي يمنى طالعين ،يالله شموسة خلينا نروح ننام وبكرة بيفرجها الله …
كانو بدن يطلعو لما نادت شهد لـ ميرا
ميرا :اي شهد
طلعت الورقة وعطتا لـ ميرا وقالت :هي من ابو الجود طلب مني سلمك اياها بالإيد
ميرا :اه ..طـ طيب يسلمو
اخدت ميرا الورقة وخبتا ولحقت شمس عالغرفة
ميرا :شو كأنك ولعتي سيكارة وجددتي السهرة ؟
شمس :مو جاييني نوم
ميرا :معناتا طلعي شربيها برة انا بتدايق من ريحة الدخان
شمس :الله يرحم ايام كنتي اتدخني باكيتين باليوم
ميرا :الله تاب عليي والحمدلله
ضحكت شمس وطلعت من الغرفة … اما ميرا طلعت الورقة وقعدت عالتخت وفتحتها وهية ملهوفة تشوف محتواها … كان محتواها «جميلة أنت گ وردة نبتت بين الصخور .. ملاحظة :أنا بحبك … فادي أبو الجود »
ابتسمت ميرا وحطت الورقة عصدرها وهمست :أخيرا اعترفت
حملت جوالها وطلعت رقمو وضلت فترة عم تفكر ترن او لا وأخيرا قررت ورنت … ورد عليها بسرعة :الو
ميرا :كيفك ابو الجود
ابو الجود :صرت منيح بس اسمعت صوتك
ميرا :شوهي يلي باعتها ؟
ابو الجود :انشالله ماتكوني زعلتي
ميرا :لا بس…
ابو الجود :بس شو … ميرا ازا مفكرة بفارق العمر اللي بيناتنا سدقيني انا مو كبير عمري 36 بس وازا خايفة اني كون متجوز …لا انا ماتجوزت وهاد. اللقب كان يناديلي فيه شاهر بيك ابوها لـ شمس …
ميرا :لا مو قصدي ابو الجود …انا بصراحة قاطعة عهد على حالي ما خلي رجال يختلي فيني طول مالي بعيدة عن اهلي
ابو الجود :اااه فهمت عليكي … بس بركي مارجعتي لعند اهلك …رح تضلي طول عمرك بدون جواز
ميرا :اللي الله كاتبو انا رضيانة فيه …انا غلطت وهربت مع شب كنت مفكرتو رح يسعدني بس الله عاقبني وشنططني لأني غضبت اهلي
ابو الجود :بس انتي بشر وكل بني ادم بيغلط نحنا مو ملائكة
ميرا :صح …بس غلطة الشاطر بألف … انا قررت عاقب حالي اني ما ادخل الحياة اللي بتتمناها كل بنت واني عيش وحيدة بقية حياتي هيك رح يكون العقاب العادل الي
ابو الجود :وازا قدرتي ترجعي لعند اهلك بتقبلي تتزوجيني
ميرا :….
ابو الجود :ميرا جاوبيني ،ازا قدرت رجعك عند اهلك بتوافقي تتزوجيني ؟
ميرا :اي … بوافق اتزوجك
انبسط ابو الجود وقلبو طار من الفرحة وقال :بحبك ميرا …والله اني بحبك ومستعد اعمل المستحيل كرمالك
حست ميرا بألبا رح يطلع من مكانو
ميرا :انا بدي نام تصبح علي خير
ابو الجود :وانتي بألف خير … حبيبة قلبي
سكرت ميرا الخط وحست حرارة جسمها ارتفعت وقلبا معد هدي جواتها وكانت مبسوطة خيرات الله
—————-*
كانت شمس قاعدة عالبرندا وعم تدخن سيكارة ورا التانية وهية عم تفكر : اي وبعدييين … اففف شكلا خطتنا كلها مارح تزبط ومارح اقدر حصل غير وجع الراس …اصلا اللي صار اليوم والرعبة اللي اكلناها على يمنى خلتني فكر مليون مرة بالقصة ااااخ يارااسي
رمت السيكارة من ايدها وفاتت … كانت طالعة عالغرفة لما شافت باب غرفة مفتوح وضو خفيف شغال فيها …
قربت شوي شوي وشافت حدا عم يلكبش ورا المكتب ومو مبين عليها … فاتت وبلشت تمشي شوي شوي لحتا وصلت وفجأة مسكت هالشخص من قميصو من ورا وقالت :مسكتك يا حرااامي
…..:لككك لاااا والله ماني حرااامي
شمس :مييين لكان
شغل الضو و رد :اااناااا كناااان شبك
تركتو وسعلت سعلة خفيفة
شمس :يي اسفة فكرتك حرامي
كنان :يخربيتك هي تاني رعبة باكلها اليووم
وقعد عالكرسي
شمس :انت الحق عليك …شو كنت عم تعمل بالعتمة
كنان :اجيت اخد شغلة من مكتبي وراجع عغرفتي …
شمس :اي معناتا تصبح على خير
كنان :وشو اللي مصحيكي لهلأ ؟
شمس :كنت عم فكر … كنان انا قررت بطل هالشغلة …بكرة رح نرجع عبيتنا
كنان :ليش ؟ عم تحكيلي هيك لحتا اترككون بحالكون ؟
شمس :لا موهيك …خلص اللي صار اليوم بكفي ،يمنى انفقدت وابصر شو كان صار فيها وانا كنت رح روح فيها .. ولا تنسى ازا انكشفنا كمان رح ننحبس كلنا …وبعدين مافي اي طريقة اقدر حصل شي منو
وقعدت على كرسي
كنان :مزبوط …بس معقول بهالسرعة فقدتي الامل
شمس :اصلا ماكان في امل من البداية. .. وهلا بما أنو وائل كشف القصة معناتا خرب كلشي كنا مخططينو … ومارح نقدر نستفيد شي من المحاولة
كنان :ماتوقعتك ضعيفة لهالدرجة … يعني من لما عرفتك وشفت فيكي البنت الواثقة من حالها . القوية يلي مابتخاف من حدا ..الـ ..
وسكت ومارضي يكفي
شمس :الـ شو ؟؟
كنان :انسي … اليوم الصبح حكيتيلي كلام غريب …
شمس : ذكرني
كنان :لما كنا عم نحكي عن الخيانة وانتي غيرتي الموضوع وصرتي تحكي بالعادات والتقاليد …
شمس :اااه ههه لا انا ماغيرت الموضوع ،انا كنت عم ناقشك بصلب الموضوع ..
قعد مقابيلها وشبك ايديه ببعض ..
كنان :شرحيلي
شمس : قلتلك انو مجتمعنا اتبع سياسة العيب ونسي الحرام … انا كان قصدي عن اللي بخونو نفسون واللي حواليهم بتفكير متخلف … الخيانة ياكنان مو بالضرورة تكون لبنت حبت على حبيبها او زوج خان مرتو …الخيانة في منها كتير انواع وبعتقد في اسباب معروفة بالنسبة النا … بس في اسباب ازا قعدت تفكر فيها رح تشوف انو الخيانة تصدرت الموضوع ،متل الأهل اللي بيرمو قطعة من روحهم تحت مسمى البنت عار لحتا تتسجل بالميتم لقيطة ، اي يمنى اهلا خانوها وهية لسا باللفة ومن بعدا مدير الميتم اللي باعها لمطعم بتاجر بالبنات … متل الأب اللي بربي بنتو عمبدأ انا ماعندي غيرك وبحط براسها انها ممكن تصير شب شهد ابوها ضحك عليها وخلاها تحلم باليوم اللي تصير فيه شب خيانة للذات … متل الأهل اللي كتمو على نفس بنتن ولما عرفو انها حبت قامو عليها الحد وخوفوها لحتا تركتون وهربت مع اول فرصة تاحت الها مع اول شخص شافتو بطريقها ولو ماكانت قد حالها كان ضحك عليها ..كان رح ياكلها لحم ويرميها عضم اي هي ميرا … متل الأم اللي سلمت رقبة بنتا لواحد همو يحط راسها تحت رجلو ويجردها من كرامتها بس لحتا ماتضل عايشة بدون رجال او حدا يحكي عليها ارملة .. اقتنعت اني ماغيرت الموضوع ..اقتنعت انو عاداتنا خانونا فيها .. وفهموها غلط وطبقوها غلط
كنان «ابتسم »:مو معقول كل هاد كاتمتي بقلبك ؟
شمس :واكتر بس شو بينفع الحكي ،انا اسفة طولت عليك …
كنان :يعني خلص مارح تكفي ؟
شمس :لا لهون وبكفي … بالإزن
وقفت شمس وكانت بدها تطلع لماسمعت كنان بيناديلا …التفتت عليه بسرعة
شمس :اي كنان
وقف وراح اتجاهها ووقف قبالا :انتي جد بدك تروحي بكرة
شمس :مافي شي اقعد مشانو
كنان :ابدا ؟
ركزت شمس بعيونو اللي كانو عم يلمعو وركزت بنبرة صوتو الجدية … وقلبا من جوا معد قدرت تهديه
كنان :شمس بدي اسألك سؤال وياريت تجاوبيني عليه بدون اي لف ودوران
شمس :تفضل
كنان :شو… شو بتحسي لماتكوني معي ؟
تفاجأة بسؤالو وحاولت تخترع حكي لحتا تنفد حالها من الجواب …بس كنان كان مسيطر عليها بنظرتو الساحرة اللي ضيعتها وهية بعدا واقفة مكانها
كنان :شمس ردي ليش سكتي ؟
تمالكت حالها وحاولت تتركو وتمشي بس هوة بحركة فاجأها لما مسكلا ايديها التنتين ولزقها بالحيط …
شمس :كنان انت جنيت ،تركلي ايديي
بس كنان كان عم يتأمل عيونها العسليات الكبار ومسحور فيهن …
شمس :شوف كنان انا انا بضرك والله تركني
كنان :بس لسا ماجاوبتيني
شمس :ماني مجبورة جاوبك .. ليك رح عد للتلاتة مابتبعد عني رح خليك تندم
كنان : ….
صفنت شمس بعيونو وبلشت تعد بهمس :واحد…تنين …
كنان :تلاتة …
وقرب وطبعلا بوسة عشفايفها خلاها تنسى انها كانت عم تتحضر لتضربو …وبلش يتركلا ايديها بهدوء وينزل ايديه على خصرها وبعد عنها أخيرا وهمسلا :أنا بحبك
ورجع خطوتين لورا وهوة ناطر ردة فعلها …
كنان :شو ؟
شمس :….
كنان :اي بحبك شمس … شو ردك ؟
