رواية عشق لا يروض الفصل السادس عشر 16 بقلم حنين محمود
اهلا بكم في مدونة مكتبة حواء نقرأ لكم ونكتب من اجلكم
عشق لايروض
الحلقه السادسة عشر
بقلم: حنين محمود إبراهيم
______________________
تاني يوم العصر صحي رائد من النوم وكان حاسس بحاجه تقيله على جسمه
بص للي كانت نايمه على صدره ومش دريانه بأي حاجه حواليها باس راسها بعشق مش بينضب ابدًا
وقال وهو بيبعد خصله شارده من شعرها عن وشها: خليتيني بقيت بتنفسك يا فراوله
خلص كلامه واتنهد جامد وحاول انه يمسك نفسه وميصحيهاش رغم انها كانت واحشاه جدا بس فضل انه يسيبها ترتاح
بعد راسها عنه بالراحه وعدلها على المخده بحنان وقام اخد بنطلون ودخل اخد شاور عشان يحاول يهدي النار اللي كانت مولعه في صدره
بعد شويه خرج من الحمام وهو شعره مبلول وكان شكله يسحر العين
و كان عاري الصدر ومش لابس غير بنطلون بس اخد الفوطه وبدأ ينشف بيها شعرها وبص للصغيره اللي كانت لسه نايمه
وقال بضيق: هي البت دي نومها تقيل كده ليه دي نايمه ولا نومة اهل الكهف
اخد موبايله من على الكوميدينو ودخل البلكونه عشان يتكلم فيه
في نفس الوقت صحيت نيروز من النوم وملقتهوش جمبها بصت على البلكونه شافته بيتكلم في الفون
افتكرت اللي حصل امبارح واتكسفت وقالت بخجل: دا طلع قليل الأدب بشكل.!!!
خلصت كلامها ولبست قميصه ودخلت على الحمام بسرعه عشان تاخد شاور
عند رائد فتح الموبايل وجاله رسايل كتيره جدا بالهبل وكان اغلبيتها من صحابه ويامن وزين
طلع رقم يامن واتصل عليه وجاله الرد بعد ثواني قليله: ايوه ياعم العريس اللي مُحتل الفوريو كله دا انت ولا چاكي شان يا جدع
رائد: هو ايه اللي بيحصل انا مش فاهم حاجه وايه كل الرسايل دي
يامن: مش فاهم ايه ياباشا انت ڤيديوهات الفرح بتاعتك انت والمدام
مُكتسحه الفوريو انتو طلعتو تريند وكمية ناس شيرت ڤيديوهاتكم مش طبيعيه والكل بيتكلم عليكم
رائد بعد استيعاب: وليه كل دا
يامن: ليه ايه برنس انا حمدت ربنا وبوست ايدي وش وضهر انكم ما اتنشتوش عين جابتكم الارض اصلا
ضحك رائد وقال: طب يا اخويا كلكم كويسين
يامن: زي الفل المهم انت طمني هتشرفنا ولا ايه حكايتك
رائد: ليه وهو انت فاكرني زيك يلا ولا ايه
يامن: وليه الغلط ده بس يا دنچوان عصرك الحق عليا يعني بطمن على مستقبل اخويا اخص عليك اخص قاسي وجارح وعديم المشاعر بصحيح
رائد: لا يا حيلة امك خليك في بوزك لما نعوزك
يامن: ياعم خلاص خلاص متزقش ابو دي صلة قرابه يا جدع
رائد لمح نيروز وهي خارجه من الحمام وقال: طب طير بقى يلا عشان انا مش فاضيلك
يامن: ايوه ياعم حقك عريس بقى وكده اهم حاجه عاوزك ترفع راسي يا خلف
رائد: ده انا مش هرفعها انا هفتحلك راسك يا ابن الجذمه يلا ياض من هنا
خلص وقفل في وشه اما يامن فضل يضحك جامد عليه
عند نيروز نسيت تاخد هدوم لفت الفوطه على جسما كويس وفتحت الباب فتحه صغيره وبصت على رائد اما اتأكدت انه لسه في البلكونه اتنهدت براحه
وقالت: طب الحمدلله دا سافل وكان هيستغل الفرصه كالعاده انا عارفاه
خرجت بسرعه على امل انها تلحق تلبس هدومها قبل ما يخلص المكالمه لكن وهي بتاخد هدوم من الشنطه اللي كان محضرها
حست بإيده الصلبه بتحاوط وسطها ولفها ليه وقال: صباحية مُباركه على اجمل عروسه شافتها عنيا
نيروز وشها احمر وقالت: رائد ابعد كده خليني البس
رائد: طب مفيش رائد قرب مره هو كل اما اشوف وشك تقوليلي رائد ابعد
نيروز: ما انت اللي قليل الادب
رائد: تؤتؤتؤ لا ياروحي انا لحد دلوقتي مؤدب وعمال اقول اصبر عليها يا رائد البت بسكوته ومش هتستحملك وانتي زي الطور ولا بتفهمي حاجه
نيروز: بقى انا مش بفهم حاجه يارائد؟؟ طب وسع كده بقى واخرج بره خليني البس
رائد: اخرج مين صلي على النبي بس كده ياقلبي هو بمنظرك ده شكلها مفيهاش خروج من الاوضه النهارده اصلا
نيروز ضمت الفوطه اكتر لجسمها وكانت هتعيط من الخجل وهو قال: بتداري ايه يامدام ما انا شوفت كل حاجه امبارح خلاص
نيروز الدموع نزلت من عنيها وقالت: وسع كده انت قليل الادب اوي
حضنها بحنان وشالها وقعد بيها على السرير وقعدها على رجله وقال: بتعيطي ليه دلوقتي؟
نيروز: عشان انت قليل الادب.!
رائد: انتي بجد لسه بتتكسفي مني يافراوله؟
نيروز: ايوه لسه بتكسف منك وانت بتتعمد تكسفني اكتر بكلامك
رائد: بتعمد اكسفك اكتر عشان معدتيش تتكسفي مني تاني نيروز يا حبيبتي انتي تتكسفي من ابوكي الله يرحمه لكن انا لا
نيروز: طب ممكن تطلع بره عشان خاطري عاوزه البس
رائد: ييي شوف انا بقول ايه وانتي بتقولي ايه
نيروز: رائد بقى بالله عليك اخرج على الاقل سيبني براحتي لحد ما اخد عليك
رائد اتنهد بضيق وبعدها عنه وقال: تمام يا نيروز هخرج بره بس اعملي حسابك انها اخر مره
ومتخديش على الكلام ده كتير والبسي هدومك عشان هنرجع القصر
خلص كلامه وخرج من الاوضه وقفل الباب وراه
________________________________
في بيت احمد
كان نايم على السرير وجسمه كله متلفف بالشاش ووشه مليان كدمات وآثار الضرب من وقت اللي رائد عمله
دخلت هانم وهي ماسكة موبايلها ومتعصبه وقعدت على طرف السرير
أحمد فتح عينيه بالعافية وقال بتعب: في إيه يا اما مالك داخله علينا بزعابيبك كده ليه
هانم بصتله بغل وقالت: قوم شوف المصيبة اللي حصلت يا حليتها وانت نايم زي النسوان
ناولته الموبايل وأول ما شاف الفيديو اتجمد مكانه
كان فيديو رائد ونيروز وهما بيرقصوا في الفرح
أحمد قبض إيده بغضب وقال: يعني إيه؟! اتجوزته بجد؟!
هانم بغل: اما ايه يا حصره هو بعد اللي عمله فيك ده ومش هيتجوزها يا خسارة تربيتي فيك والله كل اللي خططنا ليه بقى بلح اخدها منك في لمح البصر وڤيديوهاتهم بقت ترند الموسم
أحمد رمى الموبايل على السرير بعصبية وقال: مستحيل نيروز كانت ليا! أنا اللي كنت هتجوزها!
هانم : هيهي بعد ايه يا خلفة الندم كل حاجه راحت والورث كله هيتكتب بإسمها واحنا مش هنطول حاجه
أحمد: ما خلاص يا اما بقى سيبيني افكر هنهبب ايه في المصيبه ظي
هانم: يا خسارة مجهودي وتربيتي ليك كنت سيبتك مرمي زي الكلاب في الشارع اخدتك وربيتك مكان ابني الله يرحمه وفي الاخر بنت منال هتكوش على كل حاجه واحنا بلح روحنا في ابو بلاش
احمد بصلها بضيق من معايرتها ليه كل شويه بإنه مش ابنها الحقيقي
هانم سكتت شوية وفجأة لمعت فكرة شيطانية في عينيها
وقالت : لقيتها
أحمد بإستغراب: في إيه؟
هانم ابتسمت بخبث وقالت: الموضع جه بسرعه ورائد ده اتجوزها في اقرب فرصه عندًا فيك وهي وامها مفكروش يبلغوا الجد وانت عارف طبعا لو عرف ايه هيحصل
أحمد بصلها لثواني بسبب تفكيرها اللي فاق كل توقعاته وقال: بس جدي بيحبها ومش هيعملها حاجه
هانم: بيحبها اه لكن جدك بيهتم كده بالعادات والتقاليد ف لو عرف انها اتجوزت بدون علمه هيفركشلهم الجوازه دي
أحمد: قصدك نبعتله الڤيديوهات؟
هانم: ايوه طبعا ابويا اه مش بيكلمني بسبب اني اصريت اربيك وخلاني امشي وجيت قعدت بيك هنا بس دا ميمنعش اني ابعتله الڤيديوهات صدقني هيفرح بيا جدا
أحمد: يخربيت دماغك سم
هانم ضحكت بشر ومسكت موبايلها وبعتت الڤيديوهات لابوها
وكتبت تحتيهم: ازيك يا ابا عامل ايه اتمنى تكون بخير اتفضل اتفرج على حفيدتك اللي طردتني من الصعيد بسببها بتعمل ايه اتجوزت من غير علمك لا وكمان ولا بنتك فكرت تعرفك ولا حتى اخوها
انا مش بسخن الدنيا لا لسمح الله بس ده مينفعش يا ابا هما كده مستصغرينك والناس في الصعيد لما تشوف ڤيديوهاتهم اما مكانوش شافوها اصلا هياكلو وشك
انا حبيت اكسب الثواب وبعتلك
________________________________
كان زين ماشي في الشارع وبيتكلم في الفون مع أيسل
وقال: ها يا اخرت صبري عاوزه ايه
أيسل: بص يامعلم ورقه وقلم واكتب ورايا
زين: لالالا بالراحه عليا حد قال لأهلك اني قاعد على بنك
أيسل: ياعم اسمع بقى ميبقاش خلقك ضيق المهم المهم ندخل في المفيد
عاوزه اندومي كوري وشيبسي وبيبسي وعصاير كتشير كتشير بقى وشوكلاتات اكتر وكل ما تكتر نزيد محبه اكتر
زين: انتي عازمه صحابك بروح امك؟
أيسل: متبقاش جلده يا زيين بقاااا انا ثانويه عامه ياعالم المفروض تهتموا بيا لان امتحاناتي قربت خلاص والمفروض اتعامل معامله 5 نجوم
زين: خلاص يا مصيبه هجيبلك وامري لله
أيسل: الله يسترك دنيا واخره ياشيخ روح وصباع رجلي الصغير راضي عنك
زين: وانا شعر رجلي وقف احتراما لكلامك
أيسل: ايه العلاقه المقرفه دي
زين: مش تربية الباشا مستنيه ايه يعني
أيسل: اه ياض يازين فيديوهاتهم طالعه ترند وقالبه السوشيال ميديا
وشكلهم تحفه اوي ولا وهو بيقولها حرم رائد المغربي لازم تبقى مميزه
حسيت اني كنت هريل من قشعرة الموقف هيييح امتى هيجي قرة عيني بقى
زين: ما تتظبطي يابت واعدلي كلامك وراعي اني مش مركب قرون قدامك
ايسل: ياشيخ ابو اللي يفضفض معاكم روح روح امشي وانت شبه ضرفة الدولاب كده
زين: بقى انا ضرفة دولاب شبر ونص طب غوري بقى منش جايبلك حاجه
أيسل: لالالا وحيات امك بهزر معاك ايه مبتهزرش يا زينو ولا ايه
زين قفل السكه في وشها وهي بصت للموبايل بصدمه وقالت: اه يازين الكلب طب يارب تتزحلق في قشر موزه وانت ماشي لو مجبتليش الحاجه
عند زين حط الموبايل في جيبه بس قبل ما يكمل طريقه سمع صوت عياط طفله صغيره
بص لمصدر الصوت بإستغراب شاف بنوته ما تتعداش الخمس سنين كانت قاعده على الرصيف وبتعيط بخوف
بص على هيئتها واللي باين عليها انها بنت ناس نضيفه
راح عندها ونزل لنفس مستواها وقال: مالك يا عسوله بتعيطي ليه
البنت: ابعد عني انت عاوز مني ايه
زين: اهدي انا مش هعملك حاجه متخافيش قوليلي بس بتعيطي ليه
زين: انا كنت مع مامي وبابي وتوهت منهم ومش لاقياهم
زين: طب تعرفي اساميهم او رقم تليفونهم اي حاجه
البنت بدموع: لا
زين مسح على شعره وقال: طب انتي اسمك ايه
البنت: اسمي ليان
زين: طب قومي معايا يا لولي اجيبلك حاجه حلوه وندور عليهم سوا اشطا؟
ليان بحماس: اشطا
اخدها ودخلوا السوبر ماركت جاب الحاجات اللي أيسل طلبتها منه
وشاف هي عاوزه ايه وطلبت ايس كريم ف جابلها حاسب على الحاجات وخرجوا
كانت ليان بتاكل الايس كريم وهي فرحانه
قبل ما زين يتكلم جت شذى وهي بتجري عليها ووراها عمر جوزها
شذى حضنتها ومأخدتش بالها من اللي واقف جمبها وقالت: نور عيني روحتي فين ياقلب مامي قلبي وقف من الخوف انا كنت هتجنن عليكي
عمر: انتي كويسه يا حبيبتي حصلك حاجه
ليان شاورت على زين وقالت: انا كنت خايفه اوي بس عمو ده جابلي ايس كريم وقالي متعيطيش هندور عليهم سوا
بصوا الاتنين عليه واتصدمت شذى نفس صدمة زين بالظبط لما شافها
وعمر قال: شكرا ليك جدا انا مش عارف اقولك ايه بجد او اشكرك ازاي
زين كان في دنيا تانيه خالص كان بيبص عليها وعلى البنت وبيتمنى ان اللي فهمه يطلع غلط
اما شذى اتخشبت في الارض من الموقف اللي هي فيه ومتوقعتش في عمرها من وقت اخر مره شافته فيها انهم يقفوا قدام بعض بالشكل ده تاني
عمر بإستغراب: هو في ايه انتو بتبصوا لبعض كده ليه.؟
زين قال بمراره وهو بيتمنى ان الاجابه تكون لا: دي بنتك؟
شذى بصت على عمر وعلى ليان وقالت بخنقه: اه
زين الكلمه وقعت عليه زي السكاكين بتنهش في قلبُه معقوله.!!! معقوله خانت الوعد اللي كان بينهم واتجوزت.!
زين حاول يستجمع الكلمات وقال: ليه.!
شذى: من غير ليه يا زين انت كنت فتره في حياتي وراحت لحالها خلاص
وانا دلوقتي ست متجوزه وبحب جوزي وبقى عندي بنوته يعني خلاص مفيش داعي للكلام ده دلوقتي
كمل حياتك يا زين وانساني وربنا يوفقك وتلاقي اللي تحبك بجد
خلصت كلامها ومسكت ليان وايد عمر ومشيت
عمر: ممكن افهم مين ده يا هانم؟
شذى: دا.. دا.. دا الشخص االي كان في حياتي زمان اللي حكيتلك عنه
عمر: وهو ميعرفش انك اتجوزتي ازاي يعني
شذى: عرفت انه من بعد اللي حصل دخل في حالة اكتئاب وبقى مدمن بس شكله اتعالج
عمر: تمام ياهانم عموما لو صادفت وشوفتيه تاني في اي مكان ملمحكيش بالغلط واقفه معاه عشان صدقيني ياشذى تصرفي وقتها مش هيعجبك
اما عن زين مشيت من قدامه وعينه فضلت ثابته مكانه واكن الهواء خلص من حواليه وقلبه اتكسر مليون حته وقال: بعد كل ده تطلعي متجوزه.!
طب ليه وانا كنت عملت ايه كل ذنبي ان ادهم يبقى ابويا.!؟ كل ذنبي انه شخص ديموقراطي وبيفكر غلط.!
حاول يتماسك وحرك رجله بصعوبه وركب العربيه ورجع على القصر
بعد شويه خبط على اوضة أيسل اللي سمحتله بالدخول
دخل وحاول يبتسم وقال: الحاجه اللي طلبتيها اهي يا حبيبتي
أيسل سابت الكتب وقامت حضنته بحماس وقالت: بجد بجد بموت فيك يا زيينو ربنا يخليك ليا
لاحظت انه ما بادلهاش الحضن بل كان شارد في نقطه قدامه وهي حست ان في حاجه وقالت: مالك يا حبيبي فيك ايه؟
انتبه على كلامها وقال: روحي كملي مذاكرتك يلا
كان لسه هيخرج بس هي مسكت ايده وقالت: استنى يا زين مالك فيك ايه
زين فقد السيطره على اعصابه ووقع على الارض والدموع اللي كان حابسها طول الطريق خانته ونزلت منه
وقال: في اني نفسي امووت.! في اني تعبت.!! في اني بقيت كاره حياتي ومش عاوز اعيش تاني
نزلت لنفس مستواه بسرعه وحضنته بحنان وقالت: شششش بس بس بس ليه الكلام ده
بصلها وهو حاسس ان الدنيا كلها خنقاه
حط راسه على رجليها وقال: اتجوزت يا أيسل.!
أيسل: هي مين
زين: شذى
أيسل لوهله ما استوعبتش الكلمه وبلعت ريقها بتردد وقالت: عرفت ازاي
زين: شوفتها مع جوزها وبنتها بس ليه ليه عملت فيا كده
أيسل: زين يا حبيبي خلينا واقعيين هي ابوك كان رافضها بكل الطرق اكيد مش هتوقف حياتها عليك
زين: بس انا وقفت حياتي عليها وكل حاجه حصلتلي كانت بسببها ودورت عليها كتير جدا.!!! وفي الاخر تتجوز وتسيبني.!!
أيسل كان قلبها بيتعصر على اخوها
وقالت: لا يا حبيبي هتقوم وهتبقى كويس وهتحب غيرها وهتشوف حياتك زي ما هي شافت حياتها ووقتها بس هتعرف ان كل اللي انت فيه ده اسمه تعلق مش حب
زين مردش عليها بس كان بيعيط فضل يعيط كتير لحد ما هدي في حضنها وهما على نفس وضعهم
اتعدل بعيونه الدبلانه وقال: انا لازم انساها
ايسل: هتنساها والله يا حبيبي هتنساها وبكره هتيجي اللي تشغل قلبك وعقلك وهتقول أيسل قالت
مسح دموعه ب ايده وبصلها وقال: انتي كبرتي امتى كده.! انتي الصغيره ام الضفاير اللي كنت بلعب معاها وهي صغيره
دلوقتي بعيط في حضنها وانا راجل ملو هدومي.!
أيسل: كبرت من زمان انتو بس اللي مش عاوزين تفهموا ده
زين: عشان مهما كبرتي هتفضلي في عنينا بنتنا الصغيره
ايسل: واهو ياعم بنتكم كبرت وبقت بتتدخل في مشاكلكم كمان
قام زين وقف وقال: طب يلا مش هعطلك اكتر من كده قومي كملي مذاكره
قامت وقالت: لو ورايا هموم الدنيا كلها افضالك مخصوص يا حبيبي وهو انا عندي كام زينو يعني
زين: قلب وروح زينو من جوه
أيسل: انت تمام دلوقتي
زين باس راسها وقال: احسن يا حبيبتي الحمدلله ربنا يخليكي ليا كلامك خلاني افوق لنفسي من الوهم اللي حطيت عقلي فيه
أيسل بمرح عشان تفك الجو: انا اصلا اصلا يعني خساره في البلد دي ومش عارفه من غيري والله كنتوا هتعملوا ايه انا مفيش مني اتنين
زين ضحك وقال: ما الحمدلله ان مفيش منك اتنين ياقلبي كانت البلد خربت
أيسل حطت اديها في وسطها بتذمر طفولي وقالت: بقت كده هي يعني تصدق بالله انك عامل زي الفراخ بتاكل وتنكر يا ياعم هوينا من هنا يلا بره هنرش مايه
زين مسكها من قفاها وقال: بت انتي بتجيبي طريقة كلامك دي منين
أيسل: وده سؤال بردو من اخوك يا حبيبي
زين شتم رائد في سره وقال: طب اتظبطي يا حبيبتي عشان منكدش عليكي وملكيش داعوه بأخوكي دا معداش على بابه التربيه
ضحكت ايسل وقالت: ولو سمعك دلوقتي هتقلب زي البطه البلدي
زين: استري عليا بقى يستر عليكي ربنا
ضحكوا الاتنين بحب
__________________________________
في مكان اول مره نروحه وفي احدى محافظات الصعيد وتحديدا داخل دار عيلة المصري
كان الحاج نُعمان المصري قاعد في المندرة بيشرب الشاي
رن موبابله بصوت وصول رساله اكتر من مره
مسكوا وفتح الخط واستغرب اما لقاه رقم هانم
فتح الرسايل وبعدها فتح اول ڤيديو قدامه
ظهرت نيروز قدامه بفستان الفرح جمب رائد
اتجمدت ملامحه بصدمه من اللي شايفه وقام وقف وضرب عكازه في الارض وهو بيقول:
نيروز اتجوزت؟!
فتح باقي الفيديوهات بسرعة ومع كل فيديو كان غضبه بيزداد اكتر
وفي النهاية قبض على الموبايل بقوة وقال بصوت زي الاعصار:
بت بتي تتجوز من غير ما يخبروني؟!ليه شايفيني مت ولا عيشة مصر نسيتهم ان ليهم كبير انا لازم افوجهم واوجفهم عند حدهم زين.!!
يتبع….
وبكدا بتخلص حلقتنا للنهارده
عاوزه اعرف رأيُكُم فيها ايه
وتحليكم وتوقعاتكم للحلقه الجايه
دُمتُم في حِفظ اللهِ سالمين♥
يتبع….
