رواية عشق لا يروض الفصل الخامس عشر 15 بقلم حنين محمود
اهلا بكم في مدونة مكتبة حواء نقرأ لكم ونكتب من اجلكم
عشق لايروض
الحلقه الخامسة عشر
بقلم:حنين محمود إبراهيم
______________________
اما بره وقف مصدوم من اللي عملته وقال: اه يابنت المجنونه دا بدل ما تستري عليا بردو انا راجل وليا سمعتي
زين: الله الله وانا اللي اقول مين اللي كان بيتسحب زي الحراميه في مكان زي ده و طلعت وراه عشان اعرف مين يطلع عريس الغفله بنفسه هه بتعمل ايه هنا في نص الليل يا قلب امك
رائد اتنفض وبص وراه وقال: انت ايه اللي مصحيك يلا
زين: انا اللي كنت بسأل على فكره متقلبذ الترابيزه واقف قدام جناح البنات بتعمل ايه في نص الليل
رائد: انت هتتصاحب عليا بروح امك اجري على جوه يلااا
زين وهو بيضحك: خلاص خلاص ياعم داخل اهو متزقش بس عارف لو سمر هانم شافتك كانت هتسمعك اسطوانه في الاخلاق اللي اشك انها عندك
رائد: تعرف انت بقى انك لو ما إختفتش من قدامي حالا هعمل فيك
زين: اعتبرني مشيت لا اعتبرني ايه انا دخلت اصلا خلاص
خلص كلامه ودخل وهو بيجري وبيضحك
رائد مسح على شعره بضيق وقال: منك لله يا نيروز الكلب بقيت بتسحب في نص الليل عشان اشوف سيادتك والله لاطلعه كله بكره على جتتك
خلص كلامه ودخل الجناح هو كمان ونام
تاني يوم الصبح كان الكل صحيوا وفطروا عشان يجهزوا
اما رائد كان واقف بيتكلم مع الاستف بتاع الفندق وقال: هنزل كمان شويه مش عاوزه ولا غلطه كل حاجه زي ما انا قايلكم عليها بالظبط
العامل قال: كله جاهز والفرقه كمان زي ما حضرتك امرت والفندق بقى خالي من الناس
رائد: تمام خلي حد من البنات يطلع الفستان على جناح 55
العامل: تحت امرك يارائد باشا
قفل معاه واتنهد وبص لصاحبه اللي واقف جمبه وقال: انا مرعوب ده لو نزل ومعحبهوش اللي اتعمل ممكن يهد الفندق ده فوق دماغنا
صاحبه: انت هتقولي دا هحجز الفندق بالكامل ليهم عشان مش عاوز اي ازعاج من حد
بعد شويه باب الجناح اللي فيه البنات خبط فتحت منال واتصدمت اما لقت بنتين واقفين وماسكين العربيه اللي بيتنقلوا فيها في الفندق وعليها علبه كبيره جدا ومتغلفه بطريقه جذابه
منال: بسم الله الرحمن الرحيم ايه ده يا بنتي
واحد من البنات: بعد اذنك يا هانم سيبينا ندخله وابقي حضرتك اعرفي في ايه
منال: اه اه طبعا يا حبيبتي
وسعتلهم السكه ودخلوا ونزلوا العلبه في نص الجناح وباقي البنات كانت بتبصلهم بإستغراب
واحده منهم قالت: فين نيروز هانم؟
نيروز: انا اهو
قربت منها واديتها ظرف ابيض وقالت: رائد باشا باعت ليكي دا ووصاني محدش يقرأه غيرك والعلبه دي محدش يفتحها قبلك
نيروز بإرتباك: ها خلاص تمام ماشي شكرا ليكي
خرجوا البنتين من الجناح وقفلوا الباب وراهم ونزلوا
جوه قالت منال: افتحي يختي ورينا جوزك المجنون ده باعت ايه
ندى بحماس: ما تيلا يا بنتي انتي متوتره كده ليه
فتحت الظرف بإديها اللي بترتعش وطلعت الورقه وبدأت تقرأ الكلام اللي فيها:
إلى أميرتي نيروز
يمكن النهارده يوم فرحنا لكن بالنسبالي هو بداية عمري الحقيقي.
من يوم ما دخلتي حياتي وأنتي غيرتي كل حاجة جوايا بقيت أخاف عليكي أكتر من نفسي وأفرح لضحكتك وازعل لزعلك
أوعدك إني طول العمر هكون سندك وأمانك وهعوضك عن اي حاجه وحشه حصلت ليكي وهحبك كل يوم أكتر من اللي قبله
ولو سألوني عن أجمل هدية أخدتها من الدنيا هقول “نيروز”
بحبك وهفضل أحبك لآخر نفس فيا يا فراوله
زوجك وعاشقك للأبد رائد
نيروز عنيها دمعت من الكلام أيسل قربت منها وربتت على كتفها بحنان
وقالت: مفيش حد فينا محتاج يسألك ايه اللي في الجواب عشان الجواب باين من عنوانه
بس عاوزه اقولك اه معرفتكيش اوي وما اتعاملتش معاكي كتير لكن ربنا يعلم معزتك عندي عامله ازاي
وعاوزه اقولك كمان انتي اخدتي احن واحد في الدنيا كلها واغلى ما ليا ف مش هوصيكي تحافظي عليه
نيروز حضنتها وهي بتمسح دموعها وقالت: بس يا هابله احنا اخوات قبل اي حاجه وبعدين مش هتوصيني على جوزي
سمر حبت تخرجهم من المود ده وقالت: يلا يا نيروز افتحي العلبه اكيد ده الفستان وانا واثقه انه هيطلع يجنن لإن رائد ذوقه حلو اوي في الاستايلات
قربت نيروز من العلبه وفكت الشريط الأحمر الكبير اللي كان عليها وبدأت تشيل الغطاء اللي كان كبير جدا وساعدتها ندى وأيسل انهم يرفعوه
واول ما عنيها وقعت على الفستان اتصدمت
كان فستان أبيض ملكي مبهر مطرز بحبات الكريستال اللامعة وذيله طويل بشكل خطف أنفاسهم ومعاه تاج رقيق وشبكة ناعمة وفوق الفستان كارت صغير مكتوب عليه:
“أنتِ تستحقي تكوني أجمل عروسة شافتها عيني النهارده هتبقي أميرتي رسميًا.”
ندى سقفت بحماس وقالت: اقسم بالله اقسم بالله رائد ده جامد
ضحكوا كلهم عليها اما نيروز كانت مش عارفه تتأقلم معاهم بسبب كم المشاعر المتلغبطه اللي جواها
في الوقت ده الباب خبط وكانت الميكيب ارتست والفريق بتاعها بدأ الكل يجهز
بعد كام ساعه كان الناس كلها اتجمعت في القاعه تحت والكل جهز
نيروز كانت قاعده على السرير وبتفرك في اديها من التوتر
سمر بحنان: اهدي يا حبيبتي الموضوع مش مستاهل كل التوتر ده
نيروز كانت هتعيط
أيسل قالت: لالالا وحيات امك الميكب هيبوظ ورائد
هيعلقك من قفاكي على باب القاعه
نجحت انها تضحكها وقالت: انا خايفه اوي.!
ندى: اهدي انا عارفه انك قلقانه عشان الناس اللي هتكون موجوده والتصوير والكلام ده كله بس انتي هيئي لنفسك ان مفيش اي حد حواليكم خالص
في جناح الشباب كان رائد واقف بيلبس چاكت البدله وزبن بيسرح شعره وكل واحد بيظبط نفسه
ومؤمن كان بيظبط الببيونه لهيثم
قرب ياسين من رائد وقال وهو بيعدله چاكت البدله: احلى عريس تشوفه عيني الف مبروك يا قلب اخوك
حضنه رائد وقال: الله يبارك فيك يا حبيبي
أدهم قرب منه وحضنه وقال: الف مبروك يا حبيبي
ابتسمله رائد بهدوء وقال: الله يبارك فيك يا بابا
زين بمشاكسه: طب وعليا النعمه يا ابني انت لو بنت كنت اتجوزتك حالا بسم الله ماشاء الله عليك يعني من العين
ضحكوا كلهم عليه وبعد ما باركوه ليه الباقي قرب منه مؤمن وشد البنطلون بتاعه وهو بيقول: عمو رائد انزل انزل
نزل رائد لنفس مستواه وقال بإمتسامته الجذابه: قول يا حبيب عمو رائد
هيثم: زي ما اتفقنا هتجوزني بنتك
رائد ضحك وقال: ياسلام دا من عنيا الاتنين وانا هلاقي عريس احسن منك فين المهم هتعرف تصرف عليها ولا مستقبل البت هيضيع؟
هيثم: لالالا عيب عليك على فكره انا راجل ويعتمد عليا باخد المثروف من بابي وبحوشه عشان اعلف اجيب اللي انا عاوزه ومش هخليها محتاجه حاجه
ضحكوا كلهم عليه ورائد قال: خلاص موافق انت كده طمنتني
خلص كلامه وقام وقف وقال: احنا اتأخرنا جدا ولازم ننزل القاعه دلوقتي الاستف بلغوني ان المئذون وصل والمعازيم كلهم في القاعه
ياسين: انزل وزي ما متفقين كل حاجه هتمشي متقلقش وانا هجيبها وهنزل
بعد، شويه كان واقف ياسين قدام الجناح بتاع البنات وخبط
فتحت أيسل الباب وهو اول ما شافها تنح أيسل اتحرجت من نظراته وقالت: ااا اتفضل العروسه جاهزه
ياسين حاول يستعيد تركيزه من تاني وحمحم بإحراج ودخل
واتصدم من جمالها وقال: بسم الله ماشاء الله ايه الحلاوه دي
نيروز قامت وقفت وحضنته وقالت: ياسين انا خايفه اوي
ياسين خرجها من حضنه وباس راسها وقال: ليه يا حبيبي مش انتي بتحبيه وعاوزاه؟
نيروز: مش عارفه بس انا متوتره اوي بجد
ياسين: لا اهدي يا حبيبتي عاوزك تنسي اي حاجه ومتركزيش غير معاه وبس وبعدين انا مش مصدق ان البنت الصغيره ام ضفاير اللي كبرت على ايدي هسلمها لعريسها دلوقتي.!
نيروز: انا بحبك اوي ربنا يخليك ليا وما يحرمنيش منك ابدا يا ياسو
حضنها وقال: ولا يحرمني منك يا نور عين ياسو
وبعدين مسك اديها وقال: يلا لازم ننزل حالا الواد خلل تحت
ضحكوا كلهم وخرجوا من الجناح
بعد وقت انوار القاعه كلها انطفت واتسلطت على السلم الملكي الطويل وظهر ياسين وهو واقف ونيروز في ايده اشتغلت( اغنية العروس غزالة) وكان رائد واقف تحت في نهاية السلم وفي ايده بوكيه الورد بتاعها وواقف جمبه باقي الشباب
بدأ ياسين ينزل بيها على السلم وندى وأيسل كانوا ماسكين فستانها عشان متقعش
ومع كل خطوه كانت دقات قلبها بتزيد اما عن العاشق المُتيم اللي واقف تحت ده كان لا حول له ولا قوه مع كل خطوه كانت بتقربها منه كانت بتلعب زي النغمات على اوتار قلبُه
واخيرا وصلوا قدامه سلمها ياسين ليه وقال: النهاردة بسلمك اغلى حاجه في حياتي ف عاوزه تكون قد الوعد وتحافظ عليها
رائد: في عنيا قبل ما تكون في قلبي
بصلها بمنظرها اللي يخطف الانفاس وقال: حوريه من حوريات الجنه بس نزلت هنا على الأرض
نيروز كانت هتعيط من الإحراج وهو
مسك اديها وراحوا عند الترابيزه اللي عليه المئذون واللي بدأ في مراسم كتب الكتاب وانتهى بجملته الشهيره
بارك الله لكما وبارك عليها وچمع بينكما في خير وعلى خير بالرفاء والبنين ان شاءلله
تعالت الزغاريط وهو قام بسرعه وقرب منها وشالها ورفعها لفوق وقال: اخيييرااااا وحشتيني اوي
وبعد كده نزلها في حضنه وفضل يلف بيها جامد وهو بيقول بصوت عالي اكنه قاصد يسمع كل واحد قاعد:
بحبك بحبك بحبككك قدام الناس دي كلها والدنيا كلها شاهده على حبي ليكي
عنيها دمعت من كل اللي عمله عشانها وهو نزلها ومسح دموعها ب ايده وقال: لالالا مش عاوز اشوف دموعك دي خالص
اشتغلت اغنيه رومانسيه وبدأو يرقصوا عليها سوا وكان شكلهم حلو جدا
رائد كان كل شويه يقربها ليه جامد اخر ما زهقت قالت: راااائد ابعد عني مينفعش كده الناس بتتفرج علينا
رائد: وحيات امك امال هيتفرجوا على مين مثلا امك واخوكي
نيروز كانت هتعيط: طب وسع كده انت بتتلزق فيا كده ليه
رائد: لا ياقلبي الليلة دي كلها تلزيق اصلا
نيروز: رائد والله لو ما احترمت نفسك همشي واسيب الفرح
رائد: هو فرح خالتك يابت
الاغنيه خلصت قالها: يلا حظك جه معاد الفقره بتاعت انا والشباب
مسك اديها وقعدها في المكان المخصص ليهم وبعدها وقف والشباب طلعت على الاستدچ معاه
شاور لاصحاب الديچي ف الانوار اتسلطت عليهم وقال رائد: بقولك ايه انت وهو وحيات امك غلطه واحده هتطلعوا على الفضائيات انتو حرين
مره واحده اشتغلت اغنيه معينه وبدأو يرقصوا عليها بإحترافيه وكان الكل مبهور من شكلهم الجذاب وفي نهاية الاغنيه كل واحد جاب مراته وقفها جمبه ورائد شال نيروز وبدأ يلف بيها ومؤمن عمل زيه اما يامن شال ايسل
ياسين همس لزين وقال: يا خساره ملناش في الطيب نصيب
زين: وهي جت علينا شيلني يلا
ياسين شال زين وبدأ يلف بيه هو كمان والكل اتوجهت انظارهم عليهم والضحك دوى في المكان
بعد شويه من الضحك والرقص والمرح كل واحد قعد مكانه والاغاني انطفت ووقف رائد وهو ماسك المايك وبيقول:
اول حاجه حابب اشكر كل الناس اللي نورتني النهاردة تاني حاجه بقى حابب اقدم حاجه صغيره لحبيبتي
الكل كان بيبصله بفضول
اتفتحت ابواب القاعه ودخل واحد من الاستف وهو معاه علبه صغيره قطيفه وصل عند رائد وقدمه ليه ورائد اخده منه ومره واحده نزلت صور كتير من فوق لنيروز ملت القاعه
والكل كان مبهور من المنظر والورد بقى بيتساقط عليه وملى المكان
انا هو اتقدم من نيروز ونزل على ركبته قدامها وما اهتمش لشكله قدام الكل او لوضعه من الاساس وفتح العلبه وظهر فيها شبكه من الالماس وقال:
كل حاجه جت بسرعه ومجبتش ليكي دهب زي باقي البنات بس عمري ما انسى حاجه مهمه زي دي وعشان حرم رائد المغربي لازم تكون مميزه ميليقش بمقامك الا الألماس
تعالت التهاني والتسقيف والتصفير في المكان وهو لبسها الخاتم في اديها والاسوره وقرب منها لبسها السلسه في رقبتها وقال: بحبك يا نبض قلبي وكل حياتي
نيروز عيطت من كم المفاجأت اللي قدمها ليها وقالت: وانا بموت فيك
حضنته جامد وهو شالها ولف بيها تاني والكاميرات كانت بتصور مشاهد من اجمل المشاهد اللي ممكن اي حد يشوفها نزلها على الارض
وجم الشباب وشدوه وبدأ يرقص معاهم من تاني وبعد كدا شالوه وبدأو يرفعوه لفوق وينزل تاني
وبعد كام ساعه الفرح انتهى قبل ما حد يتحرك رائد قال: استنو بس والله ما حد متحرك من مكانه
وشاور للامن اللي واقف على باب القاعه وقال دخلوه
بصوا كلهم للباب بفضول عشان يشوفوا ايه هيحصل اتفتحت ابواب القاعه على اخرها ودخل زين وهو سايق توكتوك في القاعه ومشغل اغنية:
العريس وصللللل تيت طب تيت سلام كبير للعريس تيت تيت سلام كبير للعروسه تيت تيت
بعض الناس كانت مصدومه من كم الحاجات اللي حصلت والبعض التاني اتفاعل مع زين وبقوا بيسقفوا ورائد مسك ايد نيروز ونزلوا من على الاستدﺟ
وراح عند التوك توك وقال: اركبي يلا
نيروز: رائد ايه اللي انت بتعمله ده الناس بتصور
رائد: وانا هتكسف من ايه مش فاهم اركبي يا ماما اركبي
ركبت معاه بذهول وهي مش مصدقه اللي بيحصل وزين بدأ يلف في القاعه بحماس وخرج بيهم بره وباقي المعازيم خرجوا وراهم لحد ما خرجو من الفندق كله
وتعالت اصوات المفرقعات وضرب النار واتعملت زفه كبيره
بمرور الوقت كان رائد ونيروز في الاسانسير وكانت نيروز متوتره جامد اول ما باب الاسانسير اتفتح اتصدمت من اللي شايفاه قدامها
وقالت: ررر رائد.!
رائد: رُوحه
سحبها وراه وقال: يلا يا ماما مفيش وقت هو انتي لسه هتتصدمي
وصلوا قدام الباب ونيروز قرأت اللي مكتوب وقالت بدموع: انا بحبك اوي اوي
رائد: لا بقولك ايه اهدي عليا الله يسترك كده مش هستتى ندخل حتى
نيروز اتحرجت اما فهمت قصده وهو فتح الباب وميل عليها شالها وهي شهقت بصدمه وقالت: رائد نزلني ايه اللي انت بتعمله ده
رائد: وهو انا لسه عملت حاجه ياقلبي
خبت وشها في صدره وهو ضحك عليها ودخل بيها ونزلها في نص الاوضه وقال: قبل ما تلفي عاوز اقولك ان اي حاجه عملتها عشانك ف هي خارجه من قلبي واي كلمه عشق قولتلهالك ف هي عدت كل الحدود
بصتله بدموع وفهمت انه قصده على اللي حصل ده بس هو لف جسمها وبقى ضهرها مقابل صدره
واتصدمت اما شافت البوكيه الكبير اللي في نص الاوضه قدام السرير والصور الكتيره اللي متعلقه في كل مكان وقالت: كل ده عشاني
رائد: وانا عندي مين اغلى منك عشان احاول اعمل حاجه تسعده
بصتله بدموع وحضنته جامد وقالت: انا بحبك اوي بجد ربنا يخليك ليا
غمض عينه بسبب حضنها ده واللي هي لحد الان لسه متعرفش تأثيره عليه عامل ازاي وحاول يهدى عشان ميخوفهاش وقال: ادخلي يا حبيبتي غيري يلا عشان نصلي انا فتحتلك الفستان عشان ننجز وقت
خلص اخر كلمه وهو بياخد الهدوم عشان يخرج من الاوضه وهي اتصدمت بسبب إنها محستش ب ايده على ضهرها وقالت: اه يا قليل الادب.!
غمزلها بمشاكسه وهو بيقفل باب الاوضه: لا ياروحي انا كل ده لسه مؤدب على الاخر
هي بصت للباب بغيظ واخدت هدوم ودخلت الحمام غيرت هدومها ولبست الاسدال وطلعت
هو خبط على الباب وقال: حبيبي خلصتي؟
نيروز: ايوه
دخل وبص عليها بإبتسامه عريضه اكنه لحد الان لسه مش مصدق انها معاه قرب منها وقف قدامها على المصليه وبدأ يصلي بيها
بعد ما خلص قرأ دعاء الجواز عليها وقالها تعمل زيه وهي عملت كده
قال: اخيرا يا فراوله بقيتي حلالي؟
نيروز: ها.. اه اه بقولك ايه اخرج بقى يلا كده عشان خاطر عاوزه انام
رائد قام وقف وقال: وحيات امك اخرج فين انتي عبيطه يابت
نيروز وقفت على السرير وقالت: وحيات ربنا يا رائد لو قربت مني هنط من هنا
رائد بص على المسافه اللي بين السرير والارض وضحك جامد لدرجة ان راسه رجعت لورا وقال: لا ياقلبي ميرضنيش طبعا تنطي من هنا واشيل انا ذنبك
نيروز: اه طب شطور اخرج بقى يلا يا راائد عاوزه انام
رائد: لا تنامي ايه الليله دي اصلا مفيهاش نوم وبعدين انا صاحي طول الليل ومذاكر كويس اوي ولازم امتحن حالا
نيروز شهقت بصدمه من وقاحته وقالت: انت ايه اللي حصلك مكنتش، كده.!!!!
رائد: اعمل ايه مش انتي اللي جننتي امي بجمالك ده يا فراوله؟
خلص كلامه وهو بيقرب منها وهي ملحقتش تجري كان مسكها ووقعت على السرير في حضنه وقالت بدموع: رائد سيبني عشان خاطري انا خايفه.!!
رائد: مني؟
نيروز هزت راسها وقالت: حاسه اني اتسرعت وما اتعرفتش عليه بالشكل الكافي
رائد اتنهد وقال: طول ما انتي معايا وفي حضني وبين اديا خليكي واثقه اني عمري ما هأذيكي ابدا اما عن كلامك ف قدامنا العمر كله يا حبيبتي هتعرفي اللي نفسك فيه
نيروز: بس… بس…
رائد: مفيش بس مش انتي بتحبيني؟
نيروز بخجل: ايوه
رائد: طب تعالي بقى وانتي ايوه طالعه منك زي السمنه على العسل كده
خلص كلامه وقرب منها وسكتت شهرزاد عن الكلام المُباح
يتبع…..
