رواية ضحية لمن لا يرحم الفصل الحادي عشر 11 بقلم زهراء الحسناوي
ﻣﺎﺑﻴﻪ ﺣﻴﻞ ﺍﺭﻓﻊ ﺟﻔﻦ
ﺫﺑﻼﻥ ﺟﺴﻤﻲ ﻣﻦ ﺍﻟﺤﺰﻥ
ﻭﺍﻟﺪﻣﻊ ﻣﻦ ﮔﺪ ﻣﺎﻧﺰﻝ
ﻣﺎﺧﻠﻪ ﻟﻮﻥ ﺑﺮﻣﺸﻲ
ﻣﺤﺘﺎﺭ ﺏ ﺍﺣﻼﻣﻲ ﺍﻟﺒﻘﻦ
ﺷﻮ ﻣﺎﺭﺿﻦ ﻳﺘﺤﻘﻘﻦ؟
ﻣﺜﻞ ﺍﻟﻴﺸﻮﻑ ﺍﺑﻨﻪ ﺍﻟﺒﭽﺮ
ﻛﺒﺮﺍﻥ ﺑﺲ ﻣﺎﻳﻤﺸﻲ 💔
،،،،،،،،،،،،،،
ﺿﺤﻴﻪ ﻟﻤﻦ ﻻﻳﺮﺣﻢ
ﺑﻘﻠﻢ ﺯﻫﺮﺍﺀ ﺍﻟﺤﺴﻨﺎﻭﻱ
⭐ ﺍﻟﺘﻘﺪﺭ ﺗﻌﺒﻲ ﺍﺩﻭﺳﻬﺎ
،،،،،،،،،،،،،،،،،
ﺯﻳﻨﺐ،، ﻟﻮﺍﺀ ﺭﺍﺩ ﻳﻨﻬﺾ ﻳﺴﻜﺖ ﺣﺴﻦ ﺑﺲ ﻟﺰﻣﻪ ﺍﻟﺸﻴﺦ ﻛﺎﻟﻪ
ﺍﺑﻮ ﻟﻮﺍﺀ،، ﻋﻮﻓﻪ ﺑﻌﺪ ﺍﺑﻮﻙ ﺍﺧﻮﻙ ﻣﺴﺘﻮﻱ
ﺯﻳﻨﺐ،، ﺍﻡ ﻟﻮﺍﺀ ﺍﺗﻌﻀﻠﻪ ﺷﻔﻪ ﺍﻟﺮﺟﻠﻬﺎ ﺑﻤﻌﻨﺊ ﻻﻳﺴﻤﻌﻚ ﻭﻳﻄﺒﮕﻦ ﻋﻨﺪﻩ
ﻭﻣﺪﺭﻱ ﺍﺷﻠﻮﻥ ﻟﻤﺢ ﺍﻣﻪ ﻭﻫﻲ ﺗﻐﺎﻣﺰ ﻛﺎﻟﻬﺎ
ﺣﺴﻦ، ﻋﻠﻴﻤﻦ ﺍﺗﻐﺎﻣﺰﻳﻦ؟
ﺍﺩﺭﻱ ﺳﻤﻌﺘﻪ ﻳﻜﻮﻝ ﻋﻨﻲ ﻣﺴﺘﻮﻱ ﺍﺑﻮﻱ ﻭﻳﺴﺤﻚ ﻋﻠﺊ ﺭﺍﺳﻲ ﻣﻴﺨﺎﻟﻒ ﻣﺮﺍﺕ ﻣﺎﻳﻌﺮﻑ ﺷﻴﺴﻮﻟﻒ ﺍﻧﻌﺒﺮﻟﻪ ﻋﺎﺩﻱ
ﺯﻳﻨﺐ،، ﺍﻧﻲ ﺑﺎﻟﻤﻄﺒﺦ ﻭﺍﺳﻤﻊ ﻛﻼﻡ ﺣﺴﻦ ﺍﻟﻨﺰﻝ ﻉ ﺍﻟﺘﺮﺍﺑﻲ ﻭﺑﻬﺬﻝ ﺍﺣﻮﺍﻝ ﺍﺑﻮ ﺗﺒﻬﺬﻝ ﻛﺪﺍﻡ ﺍﻟﺨﻄﺎﺭ
ﺍﺑﻮ ﻟﻮﺍﺀ ﺷﻤﺎﻳﺮﻳﺪ ﻳﺴﺪ ﺍﻟﺴﺎﻟﻔﻪ ﺣﺴﻦ ﻳﻄﻠﻊ ﺻﻔﺢ ﺧﻠﻪ ﺍﻟﻮﺍﺩﻡ ﻛﻮﻩ ﺳﺎﺩﻩ ﺣﻠﻜﻬﺎ ﻻﺗﻀﺤﻚ
ﻟﻌﺐ ﻓﻨﻮﻥ ﺑﺤﻮﺍﻝ ﺍﺑﻮ
ﺗﺎﻟﻲ ﻣﺎﺭﺍﺣﻮ ﺍﻟﺨﻄﺎﺭ ﺍﻟﻪ ﻭﺍﻟﺸﻴﺦ ﺻﺎﻳﺮ ﻗﺮﻗﻮﺯ ﻳﻢ ﺣﺴﻦ
ﻣﻦ ﺭﺍﺣﺖ ﺍﻟﻮﺍﺩﻡ ﻟﻮﺍﺀ ﻛﺎﻟﻪ ﻓﺸﻠﻪ ﻫﻴﺞ ﺗﺤﺠﻲ ﻋﻠﺊ ﺍﺑﻮﻙ ﻛﺪﺍﻡ ﺍﻟﻌﺎﻟﻢ
ﺣﺴﻦ،، ﻳﺤﺘﺮﻣﻨﻲ ﺍﺣﺘﺮﻣﻪ ﻣﺎﻳﺤﺘﺮﻣﻨﻲ ﻣﺎﺍﺣﺘﺮﻣﻪ
ﻟﻮﺍﺀ،، ﻭﻟﻚ ﻓﺸﺸﺸﻠﻪ ﺍﺑﻮﻙ ﻫﺬﺍﺍﺍ
ﺣﺴﻦ،، ﻭﺍﻧﻲ ﻣﺘﺒﺮﻱ ﻣﻨﻪ
ﺷﻴﺦ ﻣﻨﻬﻞ،، ﻫﺴﻪ ﺻﺎﺭﺕ ﺍﻧﺘﻪ ﻣﺘﺒﺮﻱ ﻣﻨﻲ؟
ﻟﻮ ﺍﻧﻲ ﺍﻻﺗﺒﺮﻩ ﻣﻨﻚ؟
ﺯﻳﻨﺐ، ﻛﻮﻩ ﻛﺎﺗﻤﻪ ﺿﺤﻜﺘﻲ ﻭﻣﺴﻮﻳﻪ ﻧﻔﺴﻲ ﻣﻠﺘﻬﻴﻪ ﺍﻏﺴﻞ ﺑﺎﻻﺳﺘﻜﺎﻧﺎﺕ
ﺷﻮﻳﻪ ﻭﺻﻌﺪ ﺣﺴﻦ ﺍﻟﻐﺮﻓﺘﻪ ﻭﺿﻠﺖ ﺑﺲ ﺍﻡ ﻟﻮﺍﺀ
ﻭﻟﻮﺍﺀ ﻭﺍﻟﺸﻴﺦ
ﻟﻮﺍﺀ،، ﻳﺎﺑﻪ ﺑﻌﺪ ﻳﻮﻣﻴﻦ ﺍﻟﺘﺤﻖ ﺭﺍﺡ ﻳﺼﻴﺮ ﺷﻬﺮ ﻣﺎﻣﺪﺍﻭﻡ
ﺷﻴﺦ ﻣﻨﻬﻞ، ﺑﻜﻴﻔﻚ ﺑﻮﻳﻪ ﺑﺲ ﺍﻧﻲ ﺍﺷﻮﻓﻬﺎ ﻟﻮﺗﺘﺮﻙ ﺍﻟﺤﺸﺪ ﺍﻓﻀﻞ ﺷﻔﺖ ﺍﻧﺘﻪ ﻟﻮ ﻣﺎﻟﻠﻪ ﺳﺘﺮ ﺟﺎﻥ ﻫﺴﻪ ﺍﻧﺘﻪ ﻣﻴﺖ
ﻟﻮﺍﺀ،، ﺍﻟﻴﻠﺘﺤﻖ ﺑﺎﻟﺤﺸﺪ ﺷﻴﺘﻮﻗﻊ ﺣﺠﻲ؟
ﺍﻛﻴﺪ ﻟﻮ ﺍﻟﻨﺼﺮ ﻟﻮﺍﻟﺸﻬﺎﺩﻩ
ﻭﺍﻧﻲ ﻣﺎﺍﺑﻄﻞ ﻭﻻﺍﺗﺮﻙ ﺍﻟﺤﺸﺪ ﺍﻟﻪ ﻭﺍﻧﻲ ﻣﺤﻘﻖ ﻭﺣﺪﺓ ﻣﻨﻬﻦ ﻟﻮ ﺍﻟﻨﺼﺮ ﻟﻮ ﺍﻟﺘﺤﻖ ﺑﺠﻤﺎﻋﺘﻲ ﺍﻟﺸﻬﺪﺍﺀ
ﻭﻟﺘﻨﺴﻪ ﻗﻮﻝ ﺍﻟﻠﻪ ﺗﻌﺎﻟﻰ
( ﺑﺴﻢ ﺍﻟﻠﻪ ﺍﻟﺮﺣﻤﻦ ﺍﻟﺮﺣﻴﻢ )
( ﻭﻻ ﺗﺤﺴﺒﻦ ﺍﻟﺬﻳﻦ ﻗﺘﻠﻮﺍ ﻓﻲ ﺳﺒﻴﻞ ﺍﻟﻠﻪ ﺃﻣﻮﺍﺕ ﺑﻞ ﺃﺣﻴﺎﺀ ﻋﻨﺪ ﺭﺑﻬﻢ ﻳﺮﺯﻗﻮﻥ )
ﺻﺪﻕ ﺍﻟﻠﻪ ﺍﻟﻌﻈﻴﻢ
ﺍﺑﻮ ﻟﻮﺍﺀ،، ﻭﻧﻌﻢ ﺑﺎﻟﻠﻪ
ﺍﻡ ﻟﻮﺍﺀ،، ﻳﻤﻪ ﺍﻛﻌﺪ ﻻﺗﺮﻭﺡ ﻭﺍﻟﻠﻪ ﻛﻠﺒﻲ ﻣﻮﺣﻤﻞ ﺷﻮﻏﺎﺕ ﺑﻌﺪ
ﻟﻮﺍﺀ،، ﻛﻮﻟﻲ ﻳﺎﻟﻠﻪ ﺣﺠﻴﻪ ﺍﺩﻋﻴﻠﻲ ﺍﻧﺘﺼﺮ ﻭﺍﺭﺩ ﻟﻴﺞ ﺳﺎﻟﻢ
ﺍﻡ ﻟﻮﺍﺀ،، ﺍﻟﻠﻪ ﻳﺤﻔﻈﻚ ﻭﻟﻴﺪﻱ
ﺯﻳﻨﺐ،، ﻣﺮﺕ ﻳﻮﻣﻴﻦ ﻭﺍﻟﺘﺤﻖ ﻟﻮﺍﺀ
ﺑﺲ ﻫﻠﻤﺮﻩ ﻧﺬﻳﺮﻩ ﻭﺑﻨﺎﺗﻬﺎ ﺷﺒﻌﻨﻲ ﺿﻴﻢ
ﺻﺎﺭﻥ ﻳﻘﻔﻠﻦ ﺍﻟﺜﻼﺟﻪ ﻋﻨﻲ
ﻫﻮ ﺍﻧﻲ ﻣﻦ ﺟﻨﺖ ﻗﺒﻞ ﻻﻳﻘﻔﻠﻨﻬﺎ ﻣﺎﺍﻣﺪ ﺍﻳﺪﻱ ﻭﺍﻓﺘﺤﻬﺎ ﻻﻥ ﻣﺎﻳﻘﺒﻠﻦ
ﻋﺎﻳﺸﻪ ﻉ ﺍﻟﻴﺰﻭﺩ ﻣﻨﻬﻢ
ﺑﻬﺎﻱ ﺍﻟﻔﺘﺮﻩ ﺍﺷﺘﺎﻗﻴﺖ ﻟﻬﻠﻲ ﻣﻮﺍﺷﻠﻮﻥ ﻣﺎﺟﺎﻥ ﻛﻠﺶ ﺍﺷﺘﺎﻗﻴﺘﻠﻬﻢ ﺻﺎﺭ ﺷﻬﺮ ﻣﺎﺷﺎﻳﻔﺘﻬﻢ
ﺑﻜﻠﺒﻲ ﺍﻛﻮﻝ ﻛﻮﻥ ﻳﻤﺮ ﺍﺑﻮﻱ ﻋﻠﺊ ﺑﺎﺏ ﺑﻴﺖ ﺍﻟﺸﻴﺦ ﻭﺍﺷﻮﻓﻪ ﻳﺮﺗﺎﺡ ﻛﻠﺒﻲ ﻋﺎﺩ ﺍﺣﺲ ﻋﻨﺪﻱ ﺍﻫﻞ ﻭﻋﺎﺋﻠﻪ ﺍﻧﺘﻤﻴﻠﻬﺎ ﻣﻮ ﻭﺣﻴﺪﻩ ﻻﺍﺏ ﻭﻻﺍﻡ ﻭﻻﺍﻱ ﺷﺨﺺ
ﻛﻤﺖ ﻳﻮﻣﻴﻪ ﻣﻦ ﻳﻨﺎﻣﻮﻥ ﺍﻟﻀﻬﺮ ﺍﺗﺴﺤﺐ ﺍﺭﻭﺡ ﺍﻓﺘﺢ ﺑﺎﺏ ﺍﻟﺒﻴﺖ ﻻﻥ ﺍﻋﺮﻑ ﺷﻮﻛﺖ ﻳﺮﺟﻊ ﺍﺑﻮﻱ ﻣﻦ ﺍﻟﺸﻐﻞ
ﻛﻞ ﺿﻨﻲ ﺍﺷﻮﻓﻪ ﻭﺍﺭﺗﺎﺡ
ﺗﻌﺒﺖ ﻧﻔﺴﻴﺘﻲ ﻭﺻﺮﺕ ﺍﺗﻤﻨﺊ ﺍﻟﻤﻮﺕ ﺍﺗﻐﻴﺮﺕ ﺣﺎﻟﺘﻲ ﻭﺻﻔﻴﺖ ﻋﻀﻢ ﻭﺟﻠﺪ ﻣﻦ ﻗﻠﻪ ﺍﻻﻛﻞ
ﻟﻮﺳﻲ ﻭﺟﺎﻛﻲ ﻳﻌﺎﻣﻠﻮﻫﻢ ﺍﺣﺴﻦ ﻣﻦ ﻣﻌﺎﻣﻠﺘﻲ ﻭﺷﺒﻌﺎﻧﺎﺕ ﺍﺣﺴﻦ ﻣﻨﻲ
ﺑﺸﺮ ﻋﺠﻴﺐ ﺍﻣﺮﻫﻢ ﻳﺸﻔﻘﻮﻥ ﻉ ﺍﻟﺤﻴﻮﺍﻥ ﻭﻳﺤﺘﻘﺮﻭﻥ ﺍﻟﺒﺸﺮ ﺍﻟﻤﺜﻠﻬﻢ ﻫﻢ ﻋﻨﺪﻩ ﺩﻡ ﻭﻟﺤﻢ ﺣﺎﻟﻪ ﺣﺎﻟﻬﻢ
ﺍﻛﻌﺪ ﻣﻦ ﺍﻟﺼﺒﺢ ﺷﻐﻞ ﻭﻃﺒﺦ ﻭﺗﻨﻀﻴﻒ
ﻣﻦ ﻳﺎﺫﻥ ﺍﻟﻔﺠﺮ ﻟﺤﺪ ﺍﺫﺍﻥ ﺍﻟﻤﻐﺮﺏ ﺍﻧﻲ ﺍﻓﺘﺮ
ﺳﻮﻳﺖ ﺟﺎﻱ ﺍﻟﻬﻢ ﻭﺩﺧﻠﺖ ﺍﻟﻌﺼﺮ ﺍﻛﻌﺪ ﻳﻢ ﺍﻟﺒﺎﺏ ﻭﺍﺻﺐ ﺍﻟﻬﻢ ﺑﺼﻴﻨﻴﻪ ﻭﻳﺠﻲ ﺟﻮﺩ ﻳﻮﺯﻉ ﺍﻟﻬﻢ
ﺻﺮﺕ ﻣﻮﺯﻳﻨﺐ ﺍﻟﻘﺪﻳﻤﻪ ﺍﻟﺘﺮﺍﺩﺩ ﺍﻭﻛﺤﻪ ﻻﻫﺎﻱ ﺯﻳﻨﺐ ﺍﻟﺨﺮﺳﻪ ﺍﻟﺠﺒﺎﻧﻪ ﺍﻟﺘﺨﺎﻑ ﻣﻦ ﻛﻠﺸﻲ
،،،،،،،،،،،،،،،
ﻏﺼﻮﻥ،، ﻣﺮﺕ ﺍﻻﻳﺎﻡ ﻭﺻﺮﺕ ﺍﻫﺘﻢ ﺑﺎﺍﺻﻐﺮ ﺗﻔﺎﺻﻴﻞ ﺫﻳﺎﺏ ﻏﺮﻓﺘﻪ ﻣﻼﺑﺴﻪ ﺍﻛﻠﻪ ﺍﺻﻐﺮ ﺷﻲ ﺍﻧﻲ ﺍﻫﺘﻢ ﺑﻲ ﺑﺲ ﺍﻛﺜﺮ ﺍﻟﻤﺮﺍﺕ ﻗﺒﻞ ﻣﺎﻳﺠﻲ ﺍﺧﺘﻞ ﻣﺎﺍﺧﻠﻲ ﻳﺸﻮﻓﻨﻲ ﻛﻞ ﻫﺬﺍ ﻣﺎﺍﻋﺘﺒﺮﻩ ﻭﺍﺟﺐ ﻙ ﺯﻭﺟﻪ ﻻ ﻭﺍﻧﻤﺎ ﺩﺍﺍﺭﺩ ﺍﻟﻬﻢ ﺟﺰﺀ ﻣﻦ ﺟﻤﻴﻠﻬﻢ ﻭﻳﺎﻱ
ﻭﻻﻛﺎﻥ ﺍﻧﻲ ﻓﺼﻠﻴﻪ ﺍﻡ ﺫﻳﺎﺏ ﺗﺤﺘﺎﺭ ﺷﻨﻮ ﺗﺠﻴﺒﻠﻲ ﻭﺷﻨﻮ ﺗﻔﺼﻠﻲ
ﻫﺬﺍ ﻏﻴﺮ ﺍﻟﺠﻬﺎﺯ ﺍﻟﻜﺎﻣﻞ ﺍﻟﻲ ﺍﺷﺘﺮﺗﻪ ﺍﻟﻲ ﺑﺲ ﻛﻠﺸﻲ ﺏ ﺍﻟﻠﻮﻥ ﺍﻻﺳﻮﺩ ﻻﻥ ﺣﺰﻧﺎﻧﻴﻦ
ﻣﺎﻣﻘﺼﺮﻩ ﻭﻳﺎﻱ ﺍﺑﺪ ﻭﺣﺘﺊ ﺫﻳﺎﺏ ﺩﻭﻡ ﺍﺳﻤﻌﻪ ﻳﺴﺄﻝ ﺍﻣﻪ ﻳﻜﻠﻬﺎ ﺷﻮﻓﻴﻬﺎ ﺷﻨﻮ ﻣﺤﺘﺎﺟﻪ ﻣﺎﻣﺤﺘﺎﺟﻪ؟
ﺑﺲ ﻣﺎﺟﻨﺖ ﺍﻃﻠﺐ ﺍﻱ ﺷﻲ ﻻﻥ ﺧﻴﺮﻫﻢ ﻣﻐﺮﮔﻨﻲ
ﺑﺎﻟﺼﺪﻓﻪ ﺍﺷﻮﻓﻪ ﻻﻥ ﻣﻦ ﻳﺠﻲ ﻣﺎﺍﻃﻠﻊ ﻛﺪﺍﻣﻪ
ﻫﺬﺍ ﻏﻴﺮ ﻋﻤﺘﻲ ﻳﻮﻣﻴﻪ ﺗﻮﺻﻴﻨﻲ ﺍﻧﻘﻞ ﻣﻼﺑﺴﻲ ﺍﻟﻐﺮﻓﺘﻪ ﺑﺲ ﺟﻨﺖ ﺍﺭﻓﺾ ﻭﻣﻦ ﺗﺮﻳﺪ ﺗﻔﻬﻢ ﺍﻟﺴﺒﺐ ﺍﺑﻮﺱ ﺍﻳﺪﻫﺎ ﺗﺨﻠﻴﻨﻲ ﻋﻠﺊ ﺭﺍﺣﺘﻲ
ﺑﻴﻮﻡ ﺻﺎﺩﻑ ﺧﻤﻴﺲ ﻭﺍﻡ ﺫﻳﺎﺏ ﻣﺴﺠﻠﻪ ﻛﻞ ﺧﻤﻴﺲ ﺗﻮﺭﺡ ﺗﺰﻭﺭ ﺍﻻﻣﺎﻡ ﺍﻟﺤﺴﻴﻦ ﻭﻳﻪ ﺟﻴﺮﺍﻧﻬﺎ
ﺿﻠﻴﺖ ﺑﺲ ﺍﻧﻲ ﻭﺫﻳﺎﺏ ﻃﺎﻟﻊ ﻭﻳﻪ ﻟﻮﺍﺀ
ﻣﺮﺍﺕ ﺍﺷﻮﻓﻪ ﻳﺒﺎﻭﻋﻠﻲ ﺑﺲ ﺍﻛﻮﻝ ﻳﻤﻜﻦ ﺻﺪﻓﻪ
ﺻﺎﺭ ﺍﻟﻤﻐﺮﺏ ﻃﻠﻌﺖ ﻟﺤﻢ ﻣﻦ ﺍﻟﻤﺠﻤﺪﻩ ﺣﺘﺊ ﺍﺳﻮﻱ ﻋﺸﻪ
ﺟﺎﻱ ﺍﻛﺺ ﺑﺎﻟﻠﺤﻢ ﺍﻧﻜﺼﺖ ﺍﻳﺪﻱ ﺑﺲ ﺟﺮﺣﻬﺎ ﻏﻤﻴﺞ ﻋﺒﺎﻟﻚ ﻛﻄﻌﺖ ﺷﺮﻳﺎﻥ
ﺍﻧﻲ ﻣﻦ ﺟﻤﺎﻋﺖ ﻣﻦ ﺷﺎﻑ ﺍﻟﺪﻡ ﻣﺎﻋﺖ ﺭﻭﺣﻪ
ﺿﻠﻴﺖ ﺍﺑﺎﻭﻉ ﺍﻻﻳﺪﻱ ﻭﺍﺭﺟﻒ ﺧﻠﻴﺖ ﻭﺻﻠﻪ ﻋﻠﻴﻬﺎ ﺑﻌﺪﻫﺎ ﺗﻨﺰﻑ ﺍﺷﻠﻮﻥ ﻃﻼﺑﻪ ﻳﺎﻟﺤﻤﻪ ﺍﻟﮕﺸﺮﻩ
ﺍﻧﻔﺘﺢ ﺑﺎﺏ ﺍﻟﻤﻄﺒﺦ ﺩﺧﻞ ﺫﻳﺎﺏ
ﺫﻳﺎﺏ،، ﺍﻟﺴﻼﻡ ﻋﻠﻴﻜﻢ
ﻏﺼﻮﻥ،، ﺩﺭﺕ ﻭﺟﻬﻲ ﻭﺍﻧﻲ ﻣﺪﻧﻜﻪ ﻻﺯﻣﻪ ﺍﻳﺪﻱ ﺭﺩﻳﺖ ﺍﻟﺴﻼﻡ
ﺭﺍﺩ ﻳﻌﺒﺮ ﺍﻧﺘﺒﻬﻠﻲ ﻋﺎﻗﺠﻪ ﻭﺟﻬﻲ
ﺫﻳﺎﺏ،، ﺷﺒﻴﻬﺎ ﺍﻳﺪﺝ؟
ﻏﺼﻮﻥ،، ﻡ ﻣﺎﺑﻴﻬﺎ ﺷﻲ
ﺫﻳﺎﺏ،، ﻭﻫﺬﺍ ﺍﻟﺪﻡ ﺷﻨﻮ؟؟
ﻏﺼﻮﻥ،، ﻋﻮﺭﻩ ﺑﺴﻴﻄﻪ ﻣﺎﺑﻴﻬﺎ ﺷﻲ
ﺫﻳﺎﺏ،، ﺷﻮ ﺧﻞ ﺍﺷﻮﻑ
ﻏﺼﻮﻥ،، ﺑﻘﻴﺖ ﻣﺪﻧﮕﻪ ﻭﻻﺯﻣﻪ ﺍﻳﺪﻱ ﻋﺎﺻﺮﺗﻬﺎ ﺍﺗﻘﺮﺏ ﻣﻨﻲ ﺟﺮﻫﺎ ﻭﺧﺮ ﻗﻄﻌﻪ ﺍﻻﻗﻤﺎﺵ ﻋﻨﻬﺎ
ﺫﻳﺎﺏ،، ﻫﺎﻱ ﻣﺎﺑﻴﻬﺎ ﺷﻲ؟؟
ﻏﺼﻮﻥ ﺿﻠﻴﺖ ﺳﺎﻛﺘﻪ ﻭﻫﻮ ﻻﺯﻡ ﺍﻳﺪﻱ ﺍﻭﻝ ﻣﺮﻩ ﻳﺼﻴﺮ ﻫﻴﺞ ﻣﻮﻗﻒ ﺑﻴﻨﺎﺗﻨﻪ ﺣﺘﺊ ﻧﺴﻴﺖ ﺍﻳﺪﻱ ﻻﻥ ﻋﻄﺮﻩ ﺗﺮﺱ ﺧﺸﻤﻲ ﻳﻤﻜﻦ ﺳﺒﺤﺎﻥ ﺑﺎﻟﺸﻴﺸﻪ
ﻣﺸﻪ ﻭﺍﻧﻲ ﻭﺭﺍﻩ ﺍﺑﺪ ﻣﺎﺗﺮﻙ ﺍﻳﺪﻱ ﻓﺘﺢ ﺍﻟﻤﺠﺮ ﻃﻠﻊ ﺷﺎﺵ ﻭﺗﻌﻘﻴﻢ
ﻛﻌﺪ ﻉ ﺍﻟﻘﻨﻔﻪ ﻭﺍﻧﻲ ﺑﺼﻔﻪ
ﺫﻳﺎﺏ،، ﺭﺍﺡ ﺍﻟﻔﻬﺎ ﻣﻮﻗﺘﺎ ﺑﻴﻦ ﻣﺎﻧﺮﻭﺡ ﻟﻠﻤﺴﺘﺸﻔﺊ ﻳﺨﻴﻄﻮﻫﺎ
ﻏﺼﻮﻥ، ﻫﺎﺍ؟
ﺫﻳﺎﺏ،، ﺷﺒﻴﺞ ﺻﺮﺗﻲ ﺻﻔﺮﻩ
ﻳﺒﻨﺠﻮﺝ ﻟﺘﺨﺎﻓﻴﻦ
ﻏﺼﻮﻥ،، ﻻ ﻻﻣﺎﺍﺭﻭﺡ ﻫﺴﻪ ﺍﺻﻴﺮ ﺯﻳﻨﻪ
ﺫﻳﺎﺏ،، ﻟﻴﺶ ﺩﺍﺋﻤﺎ ﺗﻨﻬﺰﻣﻴﻦ ﻣﻨﻲ؟؟
ﻏﺼﻮﻥ،، ﺍﺣﺲ ﻛﻠﺒﻲ ﺭﺍﺡ ﻳﻄﻠﻊ ﻣﻦ ﺣﻠﻜﻲ ﻋﻠﺊ ﺳﺮﻋﻪ ﺩﻛﺎﺗﻪ ﺳﻜﺘﺖ ﻣﺎﺟﺎﻭﺑﺖ ﻭﻫﻮ ﻫﻢ ﺳﻜﺖ ﺑﻌﺪﻫﺎ ﻛﺎﻝ
ﺫﻳﺎﺏ،، ﺿﻠﻲ ﺿﺎﻏﻄﻪ ﻉ ﺍﻟﺠﺮﺡ ﺍﺫﺍ ﻣﺎﺗﻮﻗﻒ ﺍﻟﻨﺰﻑ ﺣﺘﺊ ﺍﺧﺬﺝ ﻳﺨﻴﻄﻮﻫﺎ
ﻏﺼﻮﻥ،، ﻻ ﻫﺴﻪ ﻳﺘﻮﻗﻒ
ﻋﺎﻓﻨﻲ ﻭﻧﻬﺾ ﺻﻌﺪ ﻟﻠﻐﺮﻓﻪ
ﺍﺣﺲ ﺍﻭﻝ ﻣﺮﻩ ﺍﻧﺘﺒﻪ ﺍﻟﻤﻼﻣﺤﻪ ﻭﺷﻜﻠﻪ
ﺭﻏﻢ ﺻﺎﺭ ﺷﻬﺮﻳﻦ ﻋﺪﻫﻢ ﺑﺲ ﻭﻳﻦ ﻣﺎﻳﻜﻮﻥ ﻣﻮﺟﻮﺩ ﺍﻧﻲ ﺍﻧﻬﺰﻡ
ﺭﺟﻌﺖ ﻟﻠﻤﻄﺒﺦ ﺿﻠﻴﺖ ﻣﺤﺘﺎﺭﻩ ﺍﺷﻠﻮﻥ ﺍﻛﻤﻞ ﺍﻟﻌﺸﻪ ﺷﻮﻳﻪ ﻭﻧﺰﻝ ﻣﺒﺪﻝ ﻻﺑﺲ ﺍﺗﺮﺍﻙ ﺑﻴﺠﻲ
ﺫﻳﺎﺏ،، ﺍﺗﺮﻛﻲ ﻛﻠﺸﻲ ﻃﺎﻟﻊ ﺍﺟﻴﺐ ﻋﺸﻪ ﺟﺎﻫﺰ ﻛﺮﺕ ﻋﻴﻦ ﺍﻣﻲ ﺑﻴﺞ
ﻏﺼﻮﻥ،، ﻣﺎﻋﺮﻓﺖ ﺷﻨﻮ ﻳﻘﺼﺪ ﺍﻧﻲ ﺳﺎﻣﻌﻪ ﻫﺬﺍ ﺍﻟﻤﺜﻞ ﻳﻨﻜﺎﻝ ﻟﻠﺠﻨﻪ ﺑﺲ ﺍﻧﻲ ﻣﺎﻣﺤﺴﻮﺑﻪ ﺟﻨﻪ ﺑﺎﺟﺮ ﻋﻜﺒﻪ ﻳﻜﻮﻝ ﺍﺭﻳﺪ ﺍﺗﺰﻭﺝ ﺣﺒﻴﺒﺘﻲ
ﻭﺍﺭﻭﺡ ﺍﻧﻲ ﺑﺎﻟﺮﺟﻠﻴﻦ ﺧﻮ ﻣﻦ ﻫﺴﻪ ﻣﺎﺍﻓﻜﺮ ﺑﻲ ﻭﻻﺗﻘﺮﺏ ﻣﻨﻪ ﺍﻓﻀﻞ ﻭﺍﺣﺴﻦ ﺍﻟﻲ ﻻﻥ ﺍﺧﺘﻪ ﻛﺎﻟﺖ ﻫﻮ ﻳﺤﺐ ﻧﻮﺭ ﻭﻳﺮﻳﺪﻫﺎ ﻣﻦ ﺯﻣﺎﻥ
ﻧﺺ ﺳﺎﻋﻪ ﻭﺭﺟﻊ ﺟﺎﻳﺐ ﻋﺸﻪ ﻛﺒﺎﺏ ﺷﻮﻱ ﻭﻣﻘﺒﻼﺕ
ﺣﻄﻬﻦ ﻉ ﺍﻟﻤﻴﺰ ﻭﻫﻮ ﺻﺎﺭ ﻳﺮﺗﺐ ﺑﺪﻭﻥ ﺻﻮﺕ
ﺫﻳﺎﺏ،، ﺍﻛﻌﺪﻱ ﺍﺗﻌﺸﻲ
ﻏﺼﻮﻥ،، ﻡ ﻣﺎﺍﺷﺘﻬﻲ ﺷﻜﺮﺍ
ﻛﻠﺘﻬﺎ ﻭﺍﻧﻲ ﺟﻮﻋﺎﻧﻪ ﺑﺲ ﺍﺳﺘﺤﻲ ﺍﻛﺎﺑﻠﻪ ﻉ ﺍﻻﻛﻞ ﻭﺍﻣﻪ ﻣﺎﻣﻮﺟﻮﺩﻩ ﻫﻮ ﻫﻢ ﻋﺮﻓﻨﻲ ﺍﺳﺘﺤﻲ ﺍﺧﺬ ﻟﻔﻪ ﻭﻧﻬﺾ ﻛﺎﻝ ﺻﺎﻋﺪ ﺍﻟﻐﺮﻓﺘﻲ
ﻋﺎﻓﻨﻲ ﻭﺭﺍﺡ ﺍﺗﺬﻛﺮﺕ ﻣﻦ ﺍﺟﻴﺖ ﻓﺼﻠﻴﻪ ﺟﻨﺖ ﻣﺮﻋﻮﺑﻪ ﺍﻛﺜﺮ ﻣﻦ ﺯﻳﻨﺐ
ﺯﻳﻨﺐ ﺗﺪﻋﻲ ﺍﻟﻘﻮﻩ ﺣﺘﺊ ﻟﻮﺑﺪﺍﺧﻠﻬﺎ ﺿﻌﻒ ﻋﻜﺴﻲ ﺗﻤﺎﻣﺎ ﻣﻦ ﺍﻟﺪﺍﺧﻞ ﻭﺍﻟﺨﺎﺭﺝ ﻫﺸﻪ ﻭﺿﻌﻴﻔﻪ
ﻻﻥ ﻣﺠﺮﺩ ﺍﺳﻢ ﻓﺼﻠﻴﻪ ﻳﻌﻴﺸﻨﻲ ﺑﺮﻋﺐ
ﻛﻨﺖ ﺻﻒ ﺛﺎﻧﻲ ﻣﺘﻮﺳﻂ ﻭﻛﺎﻧﺖ ﻭﻳﺎﻱ ﻃﺎﻟﺒﻪ ﺍﺳﻤﻬﺎ ﺳﻠﻮﺉ
ﺷﺎﻃﺮﻩ ﻛﻠﺶ ﺍﻋﻠﻪ ﻭﺣﺪﻩ ﺑﺎﻟﻤﺪﺭﺳﻪ ﺩﺭﺟﺎﺗﻬﺎ ﻛﻠﻬﺎ 100
ﻏﻴﺮ ﺟﻤﺎﻟﻬﺎ ﺍﻟﻴﺎﺧﺬ ﺍﻟﺮﻭﺡ ﺍﺣﻨﻪ ﺑﻨﺎﺕ ﺑﺲ ﻣﻦ ﺗﺠﻲ ﺳﻠﻮﺉ ﻧﻀﻞ ﺻﺎﻓﻨﻴﻦ ﻋﻠﻴﻬﺎ ﻭﻋﻠﺊ ﺣﺴﻨﻬﺎ
ﺑﺲ ﻛﺎﻧﺖ ﻋﺎﺋﻠﺘﻬﺎ ﻛﻠﺶ ﻓﻘﻴﺮﻩ ﻭﺍﺑﻮﻫﺎ ﻭﺍﺧﻮﻫﺎ ﺿﺎﻟﻤﻴﻦ ﺍﻻﺑﻌﺪ ﺍﻟﺤﺪﻭﺩ
ﻛﺎﻧﺖ ﻣﺤﺮﻭﻣﻪ ﻣﻦ ﻛﻠﺸﻲ ﺍﺑﺴﻂ ﺷﻲ ﻣﻼﺑﺴﻬﺎ ﻧﻔﺴﻬﻦ ﺗﻠﺒﺴﻬﻦ ﺑﻜﻞ ﺳﻨﻪ
ﻟﻜﻦ ﻃﻤﻮﺣﻬﺎ ﺟﺎﻧﺖ ﺗﻨﺠﺢ ﻭﺗﺘﺨﺮﺝ ﻭﺗﺘﻮﺿﻒ ﻭﺗﻌﺘﻤﺪ ﻋﻠﺊ ﻧﻔﺴﻬﺎ ﻭﺗﺤﻘﻖ ﻛﻞ ﺍﺣﻼﻣﻬﺎ ﺍﻻﻧﺤﺮﻣﺖ ﻣﻨﻬﻦ
ﻛﺎﻥ ﺍﺳﺘﺎﺫ ﺍﻟﺮﻳﺎﺿﻴﺎﺕ ﻳﺴﻤﻴﻬﺎ ﺍﻟﻌﻤﻼﻗﻪ ﻻﻥ ﺩﺭﺟﺘﻬﺎ ﻛﺎﻣﻠﻪ ﺑﺎﻟﻤﺎﺩﻩ ﻭﻣﺮﺍﺕ ﺗﺸﺮﺡ ﺑﺼﻮﺭﻩ ﺗﺨﺘﻠﻒ ﻋﻦ ﺍﻟﻤﺪﺭﺱ ﺑﺤﻴﺚ ﺗﺒﺴﻄﻠﻚ ﺍﻟﺪﺭﺱ
ﻛﻠﻨﻪ ﻧﺤﺒﻬﺎ
ﻣﺮﻩ ﺍﺑﻮﻫﺎ ﺑﻄﻠﻬﺎ ﻗﺒﻞ ﺍﻻﻣﺘﺤﺎﻧﺎﺕ ﺑﺴﺒﻮﻋﻴﻦ
ﻣﺎﻗﺒﻞ ﺗﻤﺘﺤﻦ ﺍﻣﺘﺤﺎﻧﺎﺕ
ﻳﻜﻠﻬﺎ ﺍﻟﻤﺪﺭﺳﻪ ﻣﺼﺮﻑ ﺛﺎﻧﻲ
ﺑﺲ ﺍﻟﻤﺪﺭﺳﻴﻦ ﻛﻠﻬﻢ ﺭﺍﺣﻮ ﻟﺒﻮﻫﺎ ﻭﺑﺎﻟﺘﻮﺍﺳﻴﻞ ﻳﺎﺍﻟﻠﻪ ﺍﻗﺘﻨﻊ ﺗﻜﻤﻞ ﻭﺗﻤﺘﺤﻦ
ﺍﻣﺘﺤﻨﺖ ﺳﻠﻮﺉ ﻭﻧﺠﺤﺖ ﻭﻛﻠﻌﺎﺩﻩ ﻃﻠﻌﺖ ﻣﻌﺪﻝ ﻋﺎﻟﻲ ﺟﺪﺍ
ﺍﻗﻮﻩ ﻭﺣﺪﻩ ﺑﺎﻟﻤﺪﺍﺭﺱ ﺍﻟﻤﻮﺟﻮﺩﻩ ﺑﻤﻨﻄﻘﺘﻨﻪ ﻫﻲ
ﺟﺎﻧﺖ ﺗﻀﺤﻚ ﻭﺗﺤﺸﺶ ﺍﺗﻜﻮﻝ ﺑﺲ ﺍﻛﻤﻞ ﺍﻋﺪﺍﺩﻳﻪ ﺍﺭﻭﺡ ﻛﻠﻴﻪ ﻃﺐ ﻭﺍﺻﻴﺮ ﺩﻛﺘﻮﺭﻩ ﺑﺲ ﻣﻮﺗﺠﻦ ﺑﺪﻭﻥ ﻛﺸﻔﻪ ﺑﺬﺍﻙ ﺍﻟﻮﻛﺖ ﻣﺎﺍﻋﺮﻓﺠﻦ ﺍﻫﻢ ﺷﻲ ﺍﻻﻓﻠﻮﺱ
ﻫﺬﺍ ﻛﺎﻥ ﺣﻠﻤﻬﺎ
ﺍﻧﺘﻬﺖ ﺍﻟﻌﻄﻠﻪ ﻭﺩﺍﻭﻣﻨﻪ ﺻﻒ ﺛﺎﻟﺚ ﺑﺲ ﺳﻠﻮﺉ ﻣﺎﻛﺎﻧﺖ ﻣﻮﺟﻮﺩﻩ ﻭﻳﺎﻧﻪ ﺍﺳﺘﻐﺮﺑﻨﻪ ﺍﺳﺒﻮﻋﻴﻦ ﻣﺮ ﻉ ﺍﻟﺪﻭﺍﻡ ﻭﻫﻲ ﻣﺎﻛﻮ
ﺍﺟﺖ ﺟﻴﺮﺍﻧﻬﻢ ﻛﺎﻟﺖ ﺍﺧﻮ ﺳﻠﻮﺉ ﺳﺎﺣﻜﻠﻪ ﻭﺍﺣﺪ ﺑﺴﻴﺎﺭﺗﻪ ﻗﺒﻞ ﺷﻬﺮ ﻭﺻﺎﺭ ﺷﻬﺮ ﺍﻟﻄﻼﺑﻪ ﻋﺪ ﺍﻫﻠﻬﺎ ﻭﻧﺎﺱ ﺭﺍﻳﺤﻪ ﻭﻧﺎﺱ ﺟﺎﻳﻪ ﻭﻫﺴﻪ ﺍﺗﻘﺮﺭ ﺗﺮﻭﺡ ﺳﻠﻮﺉ ﻓﺼﻠﻴﻪ ﻏﻴﺮ ﺍﻻﻓﻠﻮﺱ ﻭﻳﺸﻴﻠﻮﻥ ﺍﻫﻠﻬﺎ ﻣﻦ ﺍﻟﻤﻨﻄﻘﻪ
ﻛﻠﻨﻪ ﺍﻧﻘﻬﺮﻧﻪ ﻋﻠﻠﻴﻬﺎ ﻭﺑﻴﻮﻣﻬﺎ ﻣﺘﺖ ﻗﻬﺮ ﻣﻦ ﺍﺫﻛﺮ ﻛﻼﻣﻬﺎ ﺑﺘﺤﻘﻴﻖ ﺍﺣﻼﻣﻬﺎ
ﺻﺮﻧﻪ ﻧﺎﺧﺬ ﺍﺧﺒﺎﺭﻫﺎ ﻣﻦ ﺟﻴﺮﺍﻧﻬﺎ ﻭﻋﺮﻓﻨﻪ ﺍﻧﻮ ﺻﺎﺭ ﺍﺳﺒﻮﻉ ﻣﻦ ﺍﺧﺬﻭﻫﺎ ﺍﻟﻮﺍﺣﺪ ﻣﺘﺰﻭﺝ ﻭﻣﻴﺘﻪ ﻣﺮﺗﻪ ﻋﻨﺪﻩ ﺍﺛﻨﻴﻦ ﺍﻃﻔﺎﻝ
ﺍﺣﺘﺮﻛﺖ ﺍﻋﺼﺎﺑﻲ ﻋﻠﻴﻬﺎ
ﺑﻠﻴﻞ ﻭﻟﺤﺪ ﺍﻻﻥ ﺍﺫﻛﺮ ﺫﻳﺞ ﺍﻟﻠﻴﻠﻪ ﻭﻫﺬﺍﻙ ﺍﻟﻴﻮﻡ ﻭﻣﺎﺍﻧﺴﺎ ﻃﻮﻝ ﻋﻤﺮﻱ
ﺑﻠﻴﻞ ﺑﻄﻨﻲ ﻣﻮﺗﺘﻨﻲ ﻣﻦ ﺍﻟﻌﺼﺮ ﺗﻠﻮﻳﻨﻲ ﻭﺍﺑﻮﻱ ﻛﺎﻝ ﺧﺎﻑ ﻣﺼﺮﺍﻥ ﺍﻋﻮﺭ ﺧﻞ ﺍﺧﺬﺝ ﻟﻠﻤﺴﺘﺸﻔﺊ
ﻋﺎﻧﺪﺕ ﻻﻥ ﺍﺧﺎﻑ ﻛﺘﻠﻪ ﻣﺎﺍﺭﻭﺡ
ﺑﺲ ﺑﻠﻴﻞ ﻫﺎﺟﺖ ﻛﻠﺶ ﻣﺎﺍﺗﺤﻤﻠﺖ ﻭﻗﺒﻠﺖ ﺍﺭﻭﺡ ﻟﻠﻤﺴﺘﺸﻔﺊ
ﺍﻭﻝ ﻣﺎﺩﺧﻠﻨﻪ ﻛﻌﺪﻧﻪ ﻧﻨﺘﻀﺮ ﺍﻟﻄﺒﻴﺐ ﺍﻟﺨﻔﺮ ﺑﺎﻟﻄﻮﺍﺭﺉ
ﻭﺟﺎﻥ ﺗﺪﺧﻞ ﻋﺎﻟﻢ ﻣﺨﺒﻮﺻﻴﻦ ﺩﺧﻠﻮ ﺳﺪﻳﻪ ﻋﻠﻴﻬﺎ ﻣﺮﻩ ﻣﺘﻤﺪﺩﻩ
ﻛﻠﻬﺎ ﻣﺨﺒﻮﺻﻪ ﻭﺻﺎﻳﺢ ﻭﻫﻮﺳﻪ ﺑﺲ ﻣﺎﺍﺩﺭﻱ ﻟﻴﺶ ﺭﺟﻠﻴﻪ ﺷﺎﻟﻨﻲ ﺍﻟﺼﻮﺏ ﻣﻜﺎﻥ ﺍﻟﻤﺮﻩ
ﺭﻏﻢ ﺍﻟﺪﻛﺎﺗﺮﻩ ﺍﻟﺘﻤﺖ ﻭﻋﺎﻟﻢ ﺩﺍﻳﺮ ﻣﺪﺍﻳﺮﻫﺎ ﺑﺲ ﻛﺪﺭﺕ ﺍﻟﻤﺢ ﻭﺟﻬﺎ ﻭﺍﺷﻮﻓﻬﺎ ﻭﺭﻳﺘﻨﻲ ﻻﺷﻔﺘﻬﺎ
ﺷﻔﺖ ﺳﻠﻮﺉ ﻣﺘﻤﺪﺩﺕ ﻭﺍﻟﺪﻡ ﺗﺎﺭﺱ ﺭﺍﺳﻬﺎ ﺑﺲ ﻋﻴﻮﻧﻬﺎ ﻣﻔﺘﺤﺘﻬﻦ ﻋﻴﻮﻧﻬﺎ ﺧﻀﺮ ﻳﺨﺒﻠﻦ ﻗﺒﻞ ﺟﺎﻧﺖ ﺍﻟﺒﻨﺎﺕ ﺗﺘﺸﺎﻗﻪ ﻭﻳﺎﻫﺎ ﻳﺴﺎﻟﻨﻬﺎ ﺍﺷﻠﻮﻥ ﺗﺸﻮﻓﻴﻦ ﺍﻟﺪﻧﻴﺎ؟؟
ﺧﻀﺮﻩ ﻟﻮﺳﻮﺩﻩ؟؟
ﺗﺠﺎﻭﺑﻬﻦ ﺧﻀﺮﻩ ﺗﻀﺤﻚ ﻋﻠﻴﻬﻦ
ﺷﻬﻜﺖ ﻭﺍﺩﻧﻴﺖ ﻳﻤﻬﺎ ﺩﻓﻌﻨﻲ ﺍﻟﺪﻛﺘﻮﺭ ﺟﺎﺑﻮ ﺍﻟﺠﻬﺎﺯ ﻳﺮﻛﻀﻮﻥ ﻻﻥ ﻗﺎﺳﻮ ﻧﺒﻀﻬﺎ ﻣﺼﻔﺮ
ﺳﻮﻟﻬﺎ ﺭﺟﺎﺕ ﻛﻬﺮﺑﺎﺋﻴﻪ ﻣﺎﻛﻮ ﺍﺳﺘﺠﺎﺑﻪ ﻭﻋﻠﻦ ﺍﻟﺪﻛﺘﻮﺭ ﺳﺎﻋﻪ ﻭﻓﺎﺗﻬﺎ ﻭﻣﺎﺗﺖ ﺳﻠﻮﺉ ﻭﻣﺎﺗﻦ ﺍﺣﻼﻡ ﺳﻠﻮﺉ ﻭﻳﺎﻫﺎ
ﺍﻧﻜﻠﺒﺖ ﺍﻟﻤﺴﺘﺸﻔﺊ ﺑﺎﻟﺼﺮﻳﺦ ﺍﻫﻠﻬﺎ ﻭﺍﻟﻨﺎﺱ ﺍﻻﺧﺬﻭﻫﺎ ﻓﺼﻠﻴﻪ ﻫﻢ ﻣﻮﺟﻮﺩﻳﻦ ﻭﺭﺟﻠﻬﺎ ﻳﺒﺠﻲ ﻳﺼﻴﺢ ﻋﺜﺮﺕ ﻭﺍﻧﻔﺸﺨﺖ
ﻛﻮﻩ ﻃﻠﻌﺘﻨﻲ ﺍﻣﻲ ﻭﺍﺑﻮﻱ ﻻﻥ ﻓﻘﺪﺕ ﺍﻋﺼﺎﺑﻲ ﺍﺑﺠﻲ ﻭﺍﺭﺟﻒ ﻣﻨﻀﺮﻫﺎ ﺗﺮﺱ ﺭﺍﺳﻲ ﻛﺎﻧﻪ ﻛﺎﻋﺪﻩ ﻣﺎﻣﻴﺘﻪ ﻣﻔﺘﺤﻪ ﻋﻴﻮﻧﻬﺎ ﻭﺗﺒﺎﻭﻉ ﻟﻔﻮﻙ ﻛﺘﻠﻬﻢ ﻣﺎﻣﻴﺘﻪ ﻭﺍﻟﻠﻪ ﺑﺲ ﺍﺭﺟﻌﻮ ﺷﻮﻓﻮﻫﻪ ﻟﻜﻦ ﻣﺤﺪ ﺳﻤﻊ
ﺭﺟﻌﻨﻪ ﻟﻠﺒﻴﺖ ﻻﻥ ﺣﺘﺊ ﻣﺎﻗﺒﻠﺖ ﺍﻓﻮﺕ ﺍﻛﺸﻒ ﺭﻭﺣﻲ ﻧﺴﻴﺖ ﺣﺘﺊ ﺍﻟﻤﻲ ﺑﻤﻮﺕ ﺻﺎﺣﺒﺘﻲ
ﺍﺳﺒﻮﻉ ﻳﻮﻣﻴﻪ ﻳﻮﺻﻞ ﺧﺒﺮ ﺷﻜﻞ ﻭﻛﻞ ﺷﻮﻳﻪ ﺗﻄﻠﻊ ﺍﺷﺎﻋﻪ ﺷﻜﻞ ﺳﺎﻋﻪ ﻋﺜﺮﺕ ﻭﺍﻧﻔﺸﺨﺖ ﻭﺳﺎﻋﻪ ﻋﻤﺘﻬﺎ ﺍﺗﻜﻮﻝ ﻟﻜﻴﻨﻪ ﻭﺍﺣﺪ ﻭﻳﺎﻫﺎ
ﺑﺲ ﻣﺴﺘﺤﻴﻴﻴﻴﻞ ﺩﻡ ﻣﺴﻠﻢ ﺑﺮﻳﺊ ﻳﺮﻭﺡ ﻫﺪﺭ
ﺑﻌﺪ ﺍﺳﺒﻮﻋﻴﻦ ﻣﺮﺕ ﺣﻤﺎﻫﺎ ﺍﻋﺘﺮﻓﺖ ﻛﺎﻟﺖ ﺯﻭﺟﻬﺎ ﻓﺸﺨﻬﺎ ﺑﺎﻟﻨﻔﺎﺿﻪ ﺍﻟﻔﺨﺎﺭ ( ﻣﻨﻔﻀﻪ ﺟﻜﺎﻳﺮ )
ﻭﺍﻟﺴﺒﺐ ﺍﻣﻪ ﺍﺗﻜﻠﻪ ﻣﺮﺗﻚ ﻣﺎﺗﺸﺘﻐﻞ ﻭﻣﻄﻠﻌﻪ ﻋﻠﻴﻬﺎ ﺍﻫﻮﺍﻱ ﺷﻐﻼﺕ
ﻣﺎﺗﺖ ﺳﻠﻮﺉ ﺑﻴﻮﻡ ﺍﻟﺴﺎﺑﻊ ﻣﻦ ﺭﻭﺣﺘﻬﺎ ﻓﺼﻠﻴﻪ
ﻣﻦ ﻫﺬﺍ ﺍﻟﺸﻲ ﺧﻔﺖ ﻭﻣﺎﺍﺗﻮﻗﻌﺖ ﻳﺠﻲ ﻳﻮﻡ ﻭﻳﻄﺒﻖ ﻧﻔﺲ ﻗﺎﻧﻮﻥ ﺍﻟﻌﺸﺎﺋﺮ ﻋﻠﻴﻪ ﻭﻫﻢ ﺍﺭﻭﺡ ﺿﺤﻴﻪ ﺍﺧﺮﺉ ﺣﺎﻟﻲ ﺣﺎﻝ ﻣﺌﺎﺕ ﺿﺤﺎﻳﺎ ﺍﻟﻌﺎﺩﺍﺕ ﻭﺍﻟﺘﻘﺎﻟﻴﺪ ﻭﺍﻟﺴﻨﺎﻳﻦ ﺍﻟﻌﺸﺎﺋﺮﻳﻪ ﺍﻟﻲ ﺻﺎﺩﺭﻭ ﺣﻘﻮﻗﻬﻦ ﺑﺎﺍﻥ ﻳﻌﻴﺸﻦ ﺣﻴﺎﻩ ﻣﺎﺑﻴﻬﺎ ﺫﻝ ﻭﺍﺫﻳﻪ
ﻓﺰﻳﺖ ﻣﻦ ﺻﻔﻨﻨﻲ ﻭﺩﻣﻌﺘﻲ ﺑﻌﻴﻨﻲ ﻋﻠﺊ ﺫﻛﺮﺉ ﺳﻠﻮﺉ
ﺫﻳﺎﺏ،، ﻟﻴﺶ ﺗﺒﺠﻴﻦ؟
ﺍﺫﺍ ﺗﺎﺫﻳﺞ ﺍﻧﻬﻀﻲ ﺍﺧﺬﺝ ﻳﻀﻤﺪﻭﻫﺎ ﺍﻟﺞ ﻭﻻﺗﺼﻴﺮﻳﻦ ﺟﺒﺎﻧﻪ
ﻏﺼﻮﻥ،، ﺩﻧﻜﺖ ﻛﺘﻠﻪ ﻣﺎﺑﻴﻬﺎ ﺷﻲ ﺍﺗﻮﻗﻒ ﺍﻟﻨﺰﻑ
ﺗﺮﻛﺘﻪ ﻭﺭﺣﺖ ﻟﻠﻤﻄﺒﺦ ﺍﻟﺤﻤﺪﺍﻟﻠﻪ ﻭﻛﻌﺖ ﺑﻨﺎﺱ ﺗﺨﺎﻑ ﺍﻟﻠﻪ ﺑﺲ ﺧﻮﻓﻲ ﻋﻠﺊ ﺯﻳﻨﺐ ﺍﻟﻲ ﻧﻜﻄﻌﺖ ﺍﺧﺒﺎﺭﻫﺎ ﻭﺍﻡ ﺫﻳﺎﺏ ﺣﻠﻔﺖ ﻣﺎﺗﺮﻭﺡ ﻣﻦ ﻳﻮﻡ ﺳﺎﻟﻔﻪ ﺣﺴﻦ ﻣﻦ ﺭﺍﺩ ﻳﺸﻨﻖ ﻧﻔﺴﻪ ﺍﺟﺖ ﻣﺨﻨﻮﻛﻪ ﺍﻟﻤﺮﻩ ﻭﻣﺎﺗﻜﺪﺭ ﺗﺤﺠﻲ ﻭﻣﻦ ﺳﺎﻟﺘﻬﺎ ﻋﻠﺊ ﺯﻳﻨﺐ ﻛﺎﻟﺖ ﻣﺎﺑﻴﻬﺎ ﺷﻲ ﻭﺧﻠﻒ ﺍﻟﻠﻪ ﻋﻠﻴﻬﺎ ﻧﻘﺬﺗﻪ ﺑﺎﺍﺧﺮ . ﻟﺤﻀﻪ
ﺣﺴﻴﺖ ﺍﻛﻮ ﺍﺣﺪ ﻭﺭﺍﻱ ﺍﻭﻝ ﻣﺎﻟﺘﻔﺘﺖ ﺻﺎﺭ ﺫﻳﺎﺏ ﺑﻮﺟﻬﻲ ﺑﺤﻴﺚ ﻣﺎﻳﻔﺼﻠﻨﻪ ﺷﻲ
،،،،،،،،،،،،،،،،،،،،،،
ﺯﻳﻨﺐ،، ﻳﻮﻡ ﻳﺠﺮ ﻳﻮﻡ ﻭﺻﺎﺭ ﺷﻬﺮﻳﻦ ﺍﺑﻴﺖ ﺍﻟﺸﻴﺦ ﻣﻌﺎﻣﻠﺘﻲ ﺍﻧﮕﺲ ﻣﻌﺎﻣﻠﻪ ﺑﺤﻴﺚ ﻳﻌﺎﻣﻠﻮﻥ ﻛﻼﺑﻬﻢ ﺍﻓﻀﻞ ﻣﻦ ﻣﻌﺎﻣﻠﺘﻲ
ﻣﺮﺍﺕ ﻳﺘﺎﺧﺮ ﺍﻟﻌﺸﻪ ﻭﻫﻨﻪ ﻣﻌﻠﻤﺎﺕ ﻳﺠﻦ ﻉ ﺍﻟﻮﻗﺖ ﻳﻨﺒﺤﻦ ﺑﺎﻟﺒﺎﺏ ﻑ ﻳﻨﻄﻮﻫﻦ ﻣﻦ ﺭﺍﺱ ﺍﻟﺠﺪﺭ ﻗﺒﻞ ﻻﻳﺎﻛﻠﻮﻥ ﻫﻤﻪ ﻳﺨﻠﻮﻥ ﻟﻠﻜﻼﺏ ﺍﻛﻞ
ﺍﺗﻌﻠﻤﻦ ﻋﻠﻴﻪ ﻭﺻﺮﺕ ﻣﺎﺍﺧﺎﻑ ﻣﻨﻬﻦ ﻭﻳﻮﻣﻴﻪ ﺍﻧﻲ ﻓﻮﻙ ﺿﻴﻤﻬﻢ ﺿﻴﻢ ﺍﻟﺠﻼﺏ ﺍﺧﺬ ﺭﻳﻮﻙ ﻭﻏﺪﻩ ﻭﻋﺸﻪ ﻋﻮﺯﻫﻦ ﺑﺲ ﺍﻧﻴﻤﻬﻦ ﺑﺤﻀﻨﻲ
ﻣﺮﺍﺕ ﺍﺿﺤﻚ ﻋﻠَﺊ ﻟﻮﺳﻲ ﻣﻦ ﺍﺷﻮﻓﻬﺎ ﺍﺷﻠﻮﻥ ﺩﺍﻳﺮﻩ ﻭﺟﻬﺎ ﻋﻦ ﺟﺎﻛﻲ ﻭﺗﻌﺰﺯ ﻋﻠﻲ
ﺍﻛﻠﻬﺎ ﻭﺍﻟﻠﻪ ﻳﻠﻮﺳﻲ ﺑﻴﺞ ﺍﻧﻮﺛﻪ ﺍﻛﺜﺮ ﻣﻨﻲ
ﺍﻧﻲ ﻣﻦ ﺍﻟﻘﻬﺮ ﻭﺍﻟﺘﻌﺐ ﻭﺍﻟﻀﻴﻢ ﻧﺴﻴﺖ ﺭﻭﺣﻲ ﺍﻧﺜﺊ
ﺍﻟﻜﻼﺏ ﻣﻌﻠﻤﻴﻬﻦ ﻳﻨﻄﻮﻫﻦ ﻭﺟﺒﻪ ﺟﺒﻴﺮﻩ ﺑﺤﻴﺚ ﺑﻌﺪ ﻣﺎﻳﺪﻛﻦ ﺍﻟﺒﺎﺏ ﺍﻟﻪ ﻳﺠﻲ ﻭﻗﺖ ﺍﻟﻮﺟﺒﻪ ﺍﻟﺜﺎﻧﻴﻪ
ﺍﻟﻌﺼﺮ ﻛﻤﻠﺖ ﺗﻨﻀﻴﻒ ﺍﻟﺒﻴﺖ ﻭﺻﺎﺩﻑ ﻛﺎﻧﺖ ﻣﻮﻋﺪ ﺍﻝ ( ﺵ ) ﻓﻜﻨﺖ ﺣﻴﻞ ﻣﺮﻳﻀﻪ ﻭﺗﻌﺒﺎﻧﻪ ﻣﺎﺑﻴﻪ ﺣﻴﻞ ﺍﻛﻮﻡ ﺍﻧﻄﻲ ﺭﻭﺣﻲ ﻣﺎﻱ
ﻣﺮﻳﻀﻪ ﻭﺍﺷﺘﻐﻞ ﻭﺍﺭﻛﺾ ﻣﻨﺎ ﻭﺍﺟﻲ ﻣﻨﺎ ﻭﻛﻞ ﺷﻮﻳﻪ ﺗﻜﻔﺨﻨﻲ ﻟﻮﻧﺬﻳﺮﻩ ﻟﻮﺟﻨﻪ
ﻟﻮﺍﺀ ﺍﺑﺪ ﻣﺎﺷﻔﺘﻪ ﺻﺎﺭ ﺷﻬﺮ ﻳﺮﻓﺾ ﻳﻨﺰﻝ ﻣﺠﺎﺯ ﻛﻞ ﻣﺎﻳﺘﺼﻠﻮﻥ ﺑﻲ ﻳﻜﻠﻬﻢ ﺧﻠﻮﻧﻲ ﻣﺮﺗﺎﺡ ﺍﻫﻨﺎ
ﻭﺗﻨﻤﺮ ﺟﻨﻪ ﺯﺍﺩ ﻋﻦ ﺣﺪﻩ ﺣﺘﺊ ﻣﻦ ﺍﻣﺮ ﻣﻦ ﻳﻤﻬﺎ ﺗﻜﻔﺨﻨﻲ ﻋﻠﺊ ﺭﺍﺳﻲ
ﺍﺟﺖ ﺷﺎﻓﺘﻨﻲ ﻣﺘﻤﺪﺩﻩ ﺑﺎﻟﻤﺨﺰﻥ ﻭﻻﺯﻣﻪ ﺑﻄﻨﻲ ﻣﻮﺗﺘﻨﻲ
ﺟﻨﻪ،، ﺍﻃﻔﺮﻱ ﻋﺰﻟﻲ ﺑﻴﺘﻨﻪ ﻭﻧﻀﻔﻲ ﺯﻳﻦ ﻭﺑﻌﺪﻫﺎ ﺍﻣﻲ ﺍﺗﻜﻮﻝ ﺧﻞ ﺗﺴﻮﻱ ﺗﻤﻦ ﻭﻣﺮﮒ ﺗﺒﺴﻲ
ﺯﻳﻨﺐ، ﻛﺘﻠﻬﺎ ﻭﺍﻧﻲ ﺍﻋﺼﺮ ﺍﺑﻄﻨﻲ ﻓﺪﻭﺓ ﻭﺍﻟﻠﻪ ﻣﺮﻳﻀﻪ ﺑﺎﺟﺮ ﺍﺻﺤﺊ ﻭﺍﻧﻀﻒ ﺑﻴﺘﻜﻢ ﻭﻋﺸﻪ ﺍﻧﺘﻲ ﺳﻮﻱ ﺍﻟﻴﻮﻡ ﻻﻥ ﻣﺮﻳﻀﻪ
ﺟﻨﻪ،، ﻫﻠﻮﻭﻭﻭﻭ ﻋﻴﺪﻱ ﻋﻴﺪﻱ
ﻛﻮﻣﻲ ﻟﻠﺞ ﺍﻟﺒﻴﺖ ﺍﺭﻳﺪﻩ ﻳﻠﻤﻊ ﻛﻮﻥ ﺟﻬﺮﺗﺞ ﺍﺷﻮﻓﻬﺎ ﺑﻲ
ﻭﺍﻟﻌﺸﻪ ﺍﻧﺘﻲ ﺗﺴﻮﻱ ﻻﺗﻀﻠﻴﻦ ﺗﻤﺜﻠﻴﻦ ﻋﻮﻭﺩ ﻣﺮﻳﻀﻪ
ﻳﺎﺍﺍﺍﻟﻠﻠﻪ ﺍﻃﻔﺮﻳﻴﻲ
ﺯﻳﻨﺐ،، ﺧﻠﻴﺖ ﺍﻳﺪﻱ ﺑﺎﻟﻜﺎﻉ ﻭﺳﻨﺪﺕ ﻧﻔﺴﻲ ﻋﻨﺖ ﺭﻭﺣﻲ ﺣﺘﺊ ﺍﻧﻬﺾ ﻫﻮ ﺍﻧﻲ ﺻﺎﻳﺮﻩ ﻣﻮﻣﻴﺎﺀ ﻻﻥ ﺍﻛﻠﻲ ﻗﻠﻴﻞ ﻭﺍﻧﻮﺏ ﺗﺠﻴﻨﻲ ﺍﻟﻤﻬﺠﻮﻣﻪ ﻭﺍﻃﻴﺢ ﺣﻀﻲ ﻓﻮﮒ . ﻣﺎﻫﻮ ﻃﺎﻳﺢ ﻭﻫﺎﻱ ﺍﻭﻝ ﻣﺮﻩ ﻫﻴﺞ ﻳﺼﻴﺮ ﺑﻴﻪ ﻻﻥ ﺍﻛﻴﺪ ﻋﻨﺪﻱ ﻓﻘﺮ ﺩﻡ
ﻃﻠﻌﺖ ﺟﻨﻪ ﻛﺪﺍﻣﻲ ﻭﺍﻧﻲ ﻭﺭﺍﻫﺎ ﺭﺣﺖ ﺍﻟﺒﻴﺘﻬﻢ ﻛﻮﻩ ﺍﻣﺸﻲ ﻛﻞ ﺷﻮﻳﻪ ﺍﺭﻳﺪ ﺍﻭﻛﻊ
ﺑﺲ ﻋﻴﻮﻧﻲ ﺍﺩﻭﺭ ﻋﻠﺊ ﺷﻲ ﺍﺭﻳﺪ ﺍﺭﺗﺎﺡ
ﺍﻭﻝ ﻣﺎﻃﻠﻌﺖ ﺟﻨﻪ ﻟﻠﺤﺪﻳﻘﻪ ﻓﺘﺤﺖ ﺍﻟﺠﺮﺍﺭ ﺍﺧﺬﺕ ﺑﻨﺪﻭﻝ ﻭﻫﺎﻱ ﺍﻭﻝ ﻣﺮﻩ ﺍﻣﺪ ﺍﻳﺪﻱ ﻭﺍﺧﺬ ﺷﻐﻠﻪ ﺑﺪﻭﻥ ﻋﻠﻢ ﺭﺍﻋﻴﻬﺎ
ﺭﻛﻀﺖ ﻟﻠﻤﻄﺒﺦ ﺑﺤﺠﻪ ﺍﻋﺰﻝ ﺷﺮﺑﺖ ﻣﺎﻱ ﻭﺭﻩ ﺍﻟﺤﺒﺎﻳﻪ
ﺍﺧﺬﺗﻠﻲ ﻧﺺ ﺳﺎﻋﻪ ﻳﺎﻟﻠﻪ ﺷﻮﻳﻪ ﺳﻜﻦ ﺍﻻﻟﻢ ﺍﻟﺴﺎﻋﻪ ﺗﻘﺮﻳﺒﺎ 5 ﺍﻟﻌﺼﺮ ﺻﻴﻒ ﻭﺍﻟﺠﻮ ﺣﺎﺭ
ﻣﺎﺻﺪﻛﺖ ﺷﻮﻛﺖ ﺍﻛﻤﻞ ﻭﺍﺭﺟﻊ ﻟﻠﺒﻴﺖ
ﺗﻮﻧﻲ ﺣﻄﻴﺖ ﺍﻟﺠﺪﺭ ﺑﻲ ﻣﺎﻱ ﻟﻠﺘﻤﻦ ﻭﺟﺎﻥ ﺍﺳﻤﻊ ﺻﻮﺕ ﺻﺎﻳﺢ ﻗﺮﻳﺐ ﻣﻮﻛﻠﺶ ﺑﻌﻴﺪ
ﺍﻧﻠﺠﻢ ﮔﻠﺒﻲ ﻫﺬﺍ ﺍﻟﺼﻮﺕ ﻋﺮﺭﻑ ﺭﺟﻠﻴﻪ ﻭﺣﺪﻫﻦ ﻳﻤﺸﻦ ﺍﻟﺼﻮﺏ ﺍﻟﺒﺎﺏ
ﺍﻟﺼﺎﻳﺢ ﺩﻭﻩ ﺑﺎﻟﻤﻨﻄﻘﻪ ﺍﻣﺸﻲ ﻭﺍﺭﺩﺩ ﻻ ﻻ ﻣﺎﻛﻮ ﺷﻲ ﻣﻮ ﺍﻫﻠﻲ ﻣﻮﺻﻮﺕ ﺍﻣﻲ ﻫﺬﺍ
ﺭﺟﻌﺖ ﻟﻠﻤﺨﺰﻥ ﺍﻣﺸﻲ ﻣﻮﻋﻠﻜﺎﻉ ﻣﻦ ﺍﻟﺴﺮﻋﻪ ﻭﻧﻔﺴﻲ ﻣﺨﺘﻨﻚ ﻟﻜﻔﺖ ﻋﺒﺎﺗﻲ ﻭﻃﻠﻌﺖ ﺍﺭﻛﺾ ﺍﻟﺼﻮﺏ ﺍﻟﺼﻮﺕ ﺍﻟﺨﻤﺶ ﻛﻠﺒﻲ ﺍﻣﺸﻲ ﻭﺍﺭﺩﺩ ﺩﺧﻴﻠﻚ ﺭﺑﻴﻴﻲ ﺩﺧﻴﻠﻠﻠﻚ ﺭﺑﻴﻴﻴﻲ
ﺟﻨﺖ ﻓﺎﻗﺪﻩ ﻓﺎﺻﻠﻪ ﻣﺎﻛﻮ ﺷﻲ ﺍﺑﺎﻟﻲ ﻏﻴﺮ ﺍﻟﺼﻮﺕ ﺍﻻﺳﻤﻌﻪ ﻳﻔﺮﻓﺢ
ﺭﻛﻀﺖ ﺍﻟﺼﻮﺏ ﺑﻴﺘﻨﻪ ﻭﻛﻊ ﻛﻠﺒﻲ ﻣﻦ ﺷﻔﺖ ﺍﻟﻮﺍﺩﻡ ﻣﻠﺘﻤﻪ
ﺑﺪﻭﻥ ﻣﺎﺍﻋﺮﻑ ﺷﻜﻮ ﻭﻣﻨﻮ ﺍﻟﻤﺎﺕ ﺻﺤﺖ ﻳﺒﻮﻭﻭﻭﻭﻭﻭﻭﻭ ﺑﻌﻠﻮ ﺻﻮﺗﻲ ﻭﺭﻛﻀﺖ ﺩﻓﻌﺖ ﺍﻟﻌﺎﻟﻢ ﻭﻓﺘﺖ ﻟﻠﺒﻴﺖ
ﻫﺎﺍﻱ ﺍﻣﻲ ﻛﺎﻋﺪﻩ ﺗﻠﻄﻢ ﺑﺎﻟﺤﻮﺵ
ﻭﺫﻧﻲ ﺍﺧﻮﺍﺗﻲ ﺍﺛﻨﻴﻨﻬﻦ ﺍﺗﻠﻜﻨﻲ ﻳﺘﺒﺎﺟﻦ ﺣﺘﺊ ﺯﻳﻨﻪ ﺍﻟﻤﺨﺒﻠﻪ ﺗﺒﺠﻲ ﻭﺗﺎﺷﺮ ﻉ ﺍﻟﺒﻴﺖ
ﺍﺧﻮﻱ ﺍﻣﻴﺮ ﺑﺎﻟﻌﺮﺑﺎﻧﻪ ﻣﺎﻟﺘﻪ .
ﺻﺮﺕ ﻛﻞ ﻣﺎﺍﻓﻮﺕ ﺍﺷﻮﻑ ﻭﺍﺣﺪ ﻣﻦ ﺍﻫﻠﻲ ﻛﺪﺍﻣﻲ
ﺑﺲ ﻭﺍﺣﺪ ﻣﺎﻣﻮﺟﻮﺩ،،،
ﺑﺲ ﺷﻤﻌﺔ ﺑﻴﺘﻨﻪ ﻣﺎﻃﻠﻊ ﻭﺍﺗﻠﻜﺎﻧﻲ ﺻﺎﺭﻟﻲ ﺷﻬﺮﻳﻦ ﻣﺎﺷﺎﻳﻔﺘﻪ ﻭﻋﻄﺸﺎﻥ ﻛﻠﺒﻲ ﻋﻠﺊ ﺷﻮﻓﺘﻪ ﻣﺸﺘﺎﻗﻪ ﻝ ﺍﻳﺪﻩ ﺍﻟﻴﺤﻄﻬﺎ ﻓﻮﻙ ﺭﺍﺳﻲ ﻣﺸﺘﺎﻗﻪ ﻟﻜﻠﻤﻪ ﺍﻝ ﺑﻮﻳﻪ
ﻋﻴﻮﻧﻲ ﻏﻮﺷﻦ ﺍﻣﺴﺢ ﺩﻣﻮﻋﻲ ﻭﺍﻓﺘﺢ ﺑﻌﻴﻮﻧﻲ ﺣﻴﻴﻴﻞ ﺍﺭﻳﺪ ﺍﺷﻮﻑ
ﻓﺘﺤﺖ ﺍﻟﺒﺎﺏ ﻭﻓﺘﺖ ﻟﻜﻴﺘﻪ ﻣﻐﻄﻪ ﻭﻋﻤﺎﻣﻲ ﺍﺛﻨﻴﻨﻬﻢ ﻳﻤﻪ ﻳﺒﺠﻮﻥ
ﺍﺷﺮﺗﻠﻬﻢ ﻭﺣﻠﻜﻲ ﻳﺮﺟﻒ
ﻫﺬﺍ ﺍﺑﻮﻱ ﺍﻟﻤﻐﻄﻴﻨﻪ ﻣﻮ؟
ﻣﺎﺍﻋﺮﻑ ﺷﻨﻮ ﺳﻮﻳﺖ ﻭﺷﺼﻴﺤﺖ ﻭﺷﻠﻄﻤﺖ ﻻﻥ ﻣﺎﺍﺫﻛﺮ ﺍﺣﺲ ﺭﻭﺣﻲ ﻓﺼﻠﺖ
ﻛﻞ ﺍﻻﺫﻛﺮﻩ ﺭﻓﻌﺖ ﺍﻟﻐﻄﻪ ﺻﺮﺕ ﺍﺷﻤﺸﻢ ﺑﺪﺷﺪﺍﺷﺘﻪ
ﻋﻤﺖ ﻋﻴﻨﻲ ﺣﺘﺊ ﻭﻫﻮ ﻣﻴﺖ ﺭﺟﻠﻲ ﻣﺮﻓﻮﻋﻪ ﻣﻦ ﻣﻜﺎﻥ ﺍﻟﺮﻛﺒﻪ ﻻﻥ ﻣﺎﻳﻜﺪﺭ ﻳﻨﺎﻡ ﻣﺜﻠﻨﻪ ﺑﺴﺒﺐ ﻓﻘﺮﺍﺕ ﺿﻬﺮﻩ ﺍﻟﻤﺘﻬﺸﻤﻪ ﺭﺟﻠﻲ ﻣﺎﻳﻤﺪﻫﻦ
ﺩﻛﻴﺖ ﻭﻟﻄﻤﺖ ﻭﻓﻘﺪﺕ
ﺑﺲ ﻳﺮﺟﻊ؟
ﻣﺎﻳﺮﺟﻊ
ﺭﺍﺡ ﻭﺭﺍﺣﺖ ﺭﻭﺣﻲ ﻭﻳﺎﻩ
ﻭﺿﻠﺖ ﺑﻨﻔﺴﻲ ﺍﺷﻢ ﻋﻄﺮﻩ
ﺿﻠﺖ ﺑﻨﻔﺴﻲ ﻛﻌﺪﺍﺗﻨﻪ ﻭﺳﻮﺍﻟﻔﻨﻪ ﻭﻟﻤﺘﻨﻪ ﺍﻟﻌﺼﺮﻳﺎﺕ ﺳﻮﻩ
ﺍﺧﺬﻭ ﻻﻥ ﻫﻮ ﻣﻴﺖ ﺑﺎﻟﺒﻴﺖ ﻭﻣﺎﺟﻨﺖ ﺍﻋﺮﻑ ﺑﻲ ﻣﺮﻳﺾ
ﻟﻠﻴﻞ ﻭﺍﻧﻲ ﻳﻢ ﺍﻫﻠﻲ ﻣﺤﺘﺎﺭﻩ ﺑﻤﺼﻴﺒﺘﻨﻪ
ﻋﻤﺎﻣﻲ ﻭﺍﻟﺠﻴﺮﺍﻥ ﺭﺍﺣﻮ ﻭﻳﺎﻩ ﻳﻐﺴﻠﻮ ﻭﻳﺰﻭﺭﻭﻩ ﺍﻻﻣﺎﻡ ﺍﻟﺤﺴﻴﻦ ﻋﻠﻴﻪ ﺍﻟﺴﻼﻡ ﻭﺑﻌﺪﻳﻦ ﻳﺮﺟﻌﻮﻧﻪ ﻟﻼﻣﺎﻡ ﻋﻠﻲ ﻳﺰﻭﺭﻭﻧﻪ ﻭﻳﺮﺟﻌﻮ ﻟﻠﺒﻴﺖ ﺍﻟﺼﺒﺢ ﻳﺎﺍﻟﻠﻪ ﻳﺪﻓﻨﻮ ﻋﻤﻲ ﺍﺑﻮ ﻣﺜﻨﺊ ﻣﺎﻗﺒﻞ ﮔﺎﻟﻬﻢ ﻣﺎﺍﺩﻓﻨﻪ ﺑﻠﻴﻞ ﺑﺪﻭﻥ ﺗﺸﺸﻴﻊ ﺍﻟﺼﺒﺢ ﺍﻟﺴﺎﻋﻪ ﺏ 8 ﻧﺒﻠﻎ ﺍﻟﻌﺎﻟﻢ ﻭﺍﻧﺸﻴﻌﻪ
ﻛﺎﻋﺪﻩ ﻣﻜﺎﺑﻠﻪ ﺍﻣﻲ ﻭﻣﺮﻳﻢ ﻣﺨﻠﻴﻪ ﺭﺍﺳﻬﺎ ﺑﺤﻀﻨﻲ ﺗﺒﺠﻲ
ﺳﺎﻟﺖ ﺍﻣﻲ ﻭﺍﻧﻲ ﺍﻓﺮﻓﺢ ﻳﻤﻤﻤﻪ ﺍﺷﺒﻲ ﺍﺑﻮﻭﻭﻱ ﻣﺮﻳﻴﺾ؟
ﺍﻡ ﺍﺣﻤﺪﺩ،، ﺍﺑﻮﻭﺝ ﻣﻦ ﻳﻮﻡ ﺍﻻﻧﻄﺎﺝ ﺍﺗﻤﺮﺽ ﻭﻣﺎﻧﻌﺮﻑ ﺷﻨﻮ ﻋﻠﺘﻪ ﻻﻥ ﻣﺎﻳﺮﺿﻪ ﻳﺮﻭﺡ ﻟﻠﻄﺒﻴﺐ
ﻻﻳﺎﻛﻞ ﻭﻳﺎﻧﻪ ﻭﻻ ﻳﻜﻌﺪ ﻭﻳﺎﻧﻪ ﻭﺑﻠﻴﻞ ﻳﻨﺎﻡ ﻉ ﺍﻟﻜﺎﻉ ﻳﻜﻮﻭﻝ ﺑﻨﻴﺘﻲ ﻳﻤﻜﻦ ﻣﻨﻴﻤﻴﻬﺎﺍ . ﻉ ﺍﻟﻜﺎﺷﻲ
ﻭﻛﻄﻊ ﺍﻻﻛﻞ ﻣﺎﻳﺎﻛﻞ ﻭﺍﻟﻨﻬﺎﺭ ﻛﻠﻪ ﻳﺒﺠﻲ ﻳﻜﻮﻝ ﺍﺷﻠﻮﻥ ﻭﺑﻴﺎﻭﺟﻪ ﺍﻗﺎﺑﻞ ﺍﻟﻠﻪ ﻋﺰ ﻭﺟﻞ ﻭﺍﻧﻲ ﺿﺎﻟﻢ ﺑﻨﺘﻲ
ﻣﺎﺍﺍﺕ ﻭﻫﻮ ﻣﺤﻤﻞ ﺭﻭﺣﻪ ﺍﻟﺬﻧﺐ ﻣﺎﺍﺕ ﻭﻣﺎﻧﻌﺮﻑ ﺷﻨﻮ ﻋﻠﺘﺘﺘﺘﻪ
ﺯﻳﻨﺐ،، ﻟﻄﻤﺖ ﻋﻠﺊ ﻭﺟﻬﻲ
ﻛﺘﻠﻬﺎﺍ ﺍﻧﻴﻴﻴﻴﻲ ﻋﻠﻠﺘﻪ ﺍﻧﻴﻴﻴﻴﻲ ﻋﻠﺘﺘﺘﺘﻪ
ﻟﻠﺴﺎﻋﻪ 12 ﺑﻠﻴﻞ ﺟﺎﺑﻮ ﺩﺧﻠﻮ ﻟﻠﻐﺮﻓﻪ ﻭﻋﻤﻲ ﺍﺑﻮ ﻣﺜﻨﻲ ﻛﻌﺪ ﻳﻢ ﺭﺍﺳﻪ ﻳﻘﺮﻩ ﻗﺮﺍﻥ
ﺍﺗﻘﺮﺑﺖ ﻳﻤﻪ ﻭﻋﻴﻮﻧﻲ ﻳﺠﺮﻥ ﻭﺻﻮﺗﻲ ﻣﺒﺤﻮﺡ ﻛﺘﻠﻪ ﻋﻤﻲ ﻛﺸﻔﻪ ﺧﻞ ﺍﺷﻮﻓﻪ ﻭﺍﻟﻠﻪ ﻣﺸﺘﺎﻗﺘﻠﻪ
ﺍﺑﻮ ﻣﺜﻨﺊ،، ﻻﺑﻨﻴﺘﻲ ﻣﺎﻳﺼﻴﺮ ﺧﻠﻲ ﻻﺗﺸﻠﻌﻴﻦ ﮔﻠﺒﻪ ﻓﻮﻙ ﻣﺎﻫﻮ ﻣﺸﻠﻮﻉ
ﺯﻳﻨﺐ،، ﺟﺮﻳﺖ ﺍﻳﺪﻩ ﺑﺴﺘﻬﺎ ﻋﻤﻴﻴﻲ ﻓﺪﻭﻩ ﺑﺲ ﺍﺷﻮﻓﻪ ﻻﺗﺨﻠﻲ ﺷﻮﻓﺘﻪ ﺑﻜﻠﺒﻲ
ﻫﺰ ﺭﺍﺳﻪ ﻭﺑﺠﺊ ﺍﻣﻲ ﻛﻌﺪﺕ ﻣﻦ ﺍﻟﺠﻬﺊ ﺍﻟﺜﺎﻧﻴﻪ ﻟﻠﺘﺎﺑﻮﺕ ﻭﺍﻧﻲ ﻭﺍﺧﻮﺍﺗﻲ ﻣﻦ ﺍﻟﺠﻬﺎ ﺍﻟﻤﻘﺎﺑﻴﻠﻬﺎ
ﺍﻟﺘﻤﻴﻨﻪ ﻛﻠﻨﻪ ﺩﺍﻳﺮ ﻣﺪﺍﻳﺮﻩ ﺑﺎﺍﺧﺮ ﻟﻴﻠﻪ ﻧﻠﺘﻢ ﺑﻴﻬﺎ ﺳﻮﻩ
ﺟﺮ ﺍﻟﺒﻄﺎﻧﻴﻪ ﻭﺧﺮﻫﺎ ﺑﻤﺠﺮﺩ ﻣﺎﺷﺎﻓﺘﻪ ﺍﻣﻲ ﻣﻜﻔﻦ ﺍﻏﻤﺊ ﻋﻠﻴﻬﺎ ﻭﺍﻧﻲ ﻓﻘﺪﺕ ﻣﻠﺨﺖ ﺭﺍﺳﻲ
ﻋﻤﻲ ﺭﺍﺩ ﻳﻐﻄﻲ ﻛﺘﻠﻪ ﺑﺲ ﺍﺑﻮﺳﻪ ﻭﺍﻟﻠﻪ ﺑﺲ ﺍﺑﻮﺳﻪ
ﻓﺘﺤﻠﻲ ﺷﻮﻳﻪ ﻣﻦ ﻭﺟﻬﺎ ﺻﺎﻳﺮ ﺑﺲ ﺍﻋﻀﺎﻡ ﻣﺜﻞ ﺣﺎﻟﻲ ﺿﻌﻔﺎﻥ ﺑﺴﺘﻪ ﺑﺨﺪﻩ
ﻭﻛﺘﻠﻪ ﻭﺩﺍﻋﺖ ﺍﻟﻠﻪ ﻳﺒﻮﻳﻪ
ﻏﻄﺎ ﻋﻤﻲ ﻭﻃﻠﻌﻨﻪ ﺑﺮﻩ ﻛﺎﻝ ﺍﻟﻴﺮﻳﺪ ﻳﻘﺮﺍﻟﻪ ﻗﺮﺍﻥ ﻳﻀﻞ ﺍﻫﻨﺎ ﻭﺍﻟﻴﺒﺠﻲ ﻳﻄﻠﻊ ﺑﺮﻩ ﺍﻟﻐﺮﻓﻪ
ﺍﻧﻲ ﻛﻌﺪﺕ ﻳﻢ ﺭﺟﻠﻲ ﻭﻋﻤﻲ ﻳﻢ ﺭﺍﺳﻪ ﻧﻘﺮﺍﻟﻪ ﻗﺮﺍﺍﻥ
ﻃﺒﻌﺎ ﺍﺣﻤﺪ ﻣﺎﺍﺟﻪ ﻭﻻﺷﻔﻨﺎ ﻭﻻﻧﺪﺭﻱ ﻭﻳﻦ
ﻣﺜﻨﺊ ﺭﺟﻊ ﻋﺎﺩﻱ ﺑﺲ ﻣﻦ ﺭﺟﻊ ﻛﺎﻝ ﺍﺣﻤﺪ ﺭﺍﺡ ﻳﺼﻴﺪﻭﻥ ﺳﻤﺞ ﻭﻳﺒﻴﻌﻮﻥ ﺑﺎﻟﻬﻮﺭ ﻣﺪﺭﻱ ﻭﻳﻦ ﻫﻮ ﻭﻛﻢ ﻭﺍﺣﺪ ﻭﻳﺎﻩ
ﺑﻴﻮﻣﻬﺎ ﻣﺎﻧﻤﻨﻪ ﺳﻬﺮﻧﻪ ﻭﻳﻪ ﺩﻣﻮﻋﻨﻪ ﺍﻟﺼﺒﺢ ﺷﻴﻌﻮ ﻭﺍﺧﺬﻭ
ﻧﺴﻴﺖ ﺑﻴﺖ ﺍﻟﺸﻴﺦ ﻭﻧﺴﻴﺖ ﻛﻠﺸﻲ ﻭﺣﺮﺕ ﺑﻤﺼﻴﺒﻪ ﺑﻔﻘﺪﺍﻥ ﺍﺑﻮﻱ ﻻﻥ ﻓﮕﺪ ﺍﻻﺑﻮ ﻣﻮﺷﻲ ﻫﻴﻦ
ﺻﺎﺭﺕ ﺗﺠﻲ ﺍﻟﻨﺴﻮﺍﻥ ﺗﻠﻄﻢ ﻭﺗﻌﺰﻱ ﺻﻮﺕ ﻣﺎﻋﻨﺪﻱ ﻣﻦ ﺍﻟﺘﻔﺮﻓﺢ ﻭﺍﻟﺼﺎﻳﺢ ﺍﻓﻘﺪ ﻭﺍﺭﺟﻊ ﺍﻟﻄﻢ
ﺛﻼﺙ ﺍﻳﺎﻡ ﺍﻧﻲ ﻳﻢ ﺍﻫﻠﻲ ﻭﻣﺎﺍﺩﺭﻱ ﺷﻨﻮ ﻣﻨﺘﻀﺮﻧﻲ ﺍﺑﻴﺖ ﺍﻟﺸﻴﺦ ﻣﻦ ﺍﺭﺟﻊ
ﺑﻴﻮﻡ ﺍﻟﺮﺍﺑﻊ ﺍﻣﻲ ﻛﺎﻟﺖ ﻳﻴﻤﻪ ﺭﺩﻱ ﻟﻌﻴﺎﻟﺞ ﻻﻳﺴﻮﻭﻥ ﺑﻴﺞ ﺷﻲ ﺻﺎﺭﻟﺞ ﺛﻼﺙ ﺍﻳﺎﻡ ﻳﻤﻨﻪ ﻭﺍﻟﻨﺎﺱ ﻻﺍﺟﻮ ﻭﻻﺩﺯﻭ ﻋﻠﻴﺞ ﻋﺒﻨﻬﻢ ﺧﻮﺵ ﺍﻭﺍﺩﻡ
ﺑﻜﻠﺒﻲ ﻛﺘﻠﻬﺎ ﺍﻱ ﻛﻠﺶ ﺧﻮﺵ ﺍﻭﺍﺩﻡ ﺑﻌﺪ ﻛﻼﻡ ﻃﻮﻳﻞ ﺣﻀﺮﺕ ﻛﻢ ﺷﻐﻠﻪ ﺣﻄﻴﺘﻬﻦ ﺑﻌﻼﻛﻪ ﻭﺍﺧﺬﺗﻬﻦ ﻭﻳﺎﻱ ﺍﺧﺬﻧﻲ ﻋﻤﻲ ﺍﺑﻮ ﻣﺜﻨﺊ ﻣﺸﻲ ﻃﻮﻝ ﺍﻟﻄﺮﻳﻖ ﻳﺒﺠﻲ ﻋﻠﺊ ﻏﺼﻮﻥ ﻭﻳﺮﺩﺩ ﺍﻧﻲ ﻫﻢ ﺍﻣﻮﺕ ﻣﺜﻞ ﺍﺑﻮﺝ ﺍﻋﻠﻪ ﺑﻨﻴﺘﻲ
ﺳﺎﻟﻨﻲ ﻋﻠﻴﻬﺎ ﺍﺷﺮﺗﻠﻪ ﻭﺩﻭﺏ ﻳﻔﻬﻢ ﻣﻨﻲ ﻛﺘﻠﻪ ﺯﻳﻨﻪ
ﻓﺘﺢ ﺟﻮﺩ ﺍﻟﺒﺎﺏ ﺷﺎﻓﻨﻲ ﻓﺮﺡ ﻭﺍﻟﻀﺤﻜﻪ ﺗﺮﺳﺖ ﺣﻠﻜﻪ ﺻﺎﺍﺡ
ﺟﻮﺩ،، ﺍﺟﺘﺘﺘﺘﺖ ﺯﻳﻴﻴﻴﻨﺐ
ﺯﻳﻨﺐ،، ﻃﻠﻊ ﺍﻟﺸﻴﺦ ﻣﻨﻬﻞ ﺳﻠﻢ ﻋﻠﺊ ﻋﻤﻲ ﻭﺍﺧﺬ ﻣﺎﺑﺨﺎﻃﺮﺓ ﻭﺍﻟﺮﺟﺎﻝ ﻫﻢ ﻓﺎﺟﺌﻨﻲ ﻣﻦ ﻛﺎﻝ ﺍﻟﻌﻤﻲ ﻟﻴﺶ ﺟﺒﺘﻬﺎ ﻣﺎﺧﻠﻴﺘﻬﺎ ﺍﻟﺒﺎﺟﺮ ﻳﻤﻜﻦ ﺍﻟﺸﻴﺦ ﻳﺮﻳﺪ ﻳﻤﻮﺕ ﻭﻫﻴﺞ ﻳﺤﺠﻲ
ﻋﻤﻲ ﺭﺍﺡ ﻭﺍﻧﻲ ﺩﺧﻠﺖ ﻭﺭﻩ ﺍﻟﺸﻴﺦ ﻫﻮ ﺭﺍﺡ ﻟﻠﻤﻀﻴﻒ ﻭﺍﻧﻲ ﺭﺣﺖ ﻟﻠﻤﺨﺰﻥ
ﺍﻭﻝ ﻣﺎﺩﺧﻠﺖ ﺩﺧﻠﺖ ﻭﺭﺍﻱ ﻧﺬﻳﺮﻩ
ﻧﺬﻳﺮﻩ،، ﺍﺟﺖ ﺍﻟﺴﺎﺍﺍﻳﺒﻪ ﻟﻼﺗﻜﻮﻝ ﻛﺎﻋﺪﻩ ﻭﻳﻪ ﺑﺸﺮ ﻭﺍﻛﻠﻬﻢ ﺭﺍﻳﺤﻪ ﻣﻮﻟﻴﻪ
ﻟﺒﺴﺖ ﻋﺒﺎﻳﺘﻬﺎ ﻭﻃﻠﻌﺖ ﻭﻻﺟﻦ ﻭﺍﺣﺪ ﺑﻌﻴﻨﻬﺎ
ﺭﺩﺕ ﺍﻛﻠﻬﺎ ﻣﻦ ﻳﻤﻮﺕ ﺍﺑﻮﺝ ﺗﺤﺴﻴﻦ ﺑﻴﻪ ﺑﺲ ﺳﻜﺘﺖ ﻓﺎﺗﺖ ﺑﺘﻬﺎ ﺍﻟﻤﺴﻤﻮﻣﻪ ﻭﺭﺍﻫﺎ
ﺟﻨﻪ،، ﺍﺷﺮﻗﺖ ﻭﺍﻧﻮﺭﺕ ﺳﺖ ﺯﻳﻨﺐ ﺯﻳﻦ ﺍﺟﻴﺘﻲ
ﻳﺎﻟﻠﻪ ﻋﻴﻨﻲ ﺻﺎﺭﻟﺞ ﺛﻠﺚ ﺍﻳﺎﻡ ﻳﻢ ﺍﻫﻠﺞ ﻭﺍﻟﺒﻴﺘﻴﻦ ﻳﻨﺘﻀﺮﻧﺞ
ﺍﺭﻳﺪ ﻫﺴﻪ ﺗﻨﻀﻔﻴﻬﻦ
ﺯﻳﻨﺐ،، ﺍﺣﺲ ﺛﻮﺑﻲ ﺛﮕﻴﻞ ﻋﻠﮓ ﺟﺴﻤﻲ ﺭﻭﺣﻲ ﻣﺎﻃﺎﻳﻘﺘﻬﺎ ﺑﺴﺒﺐ ﻣﻮﺕ ﺍﺑﻮﻱ ﻣﻮﺍﺍﻧﻮﺏ ﻳﺠﻦ ﻳﺘﻌﻨﻄﺰﻥ ﻓﻮﻙ ﺭﺍﺳﻲ
ﻧﻌﻠﺖ ﺍﻟﺸﻴﻄﺎﻥ ﻭﺭﺣﺖ ﻭﺭﺍﻫﻦ ﺣﺘﺊ ﺍﺳﺘﻠﻢ ﺍﻟﻤﻜﻨﺎﺳﻪ
ﻋﺰﻟﺖ ﺍﻟﺒﻴﺖ ﺍﻟﺠﺒﻴﺮ ﻭﺭﺟﻌﺖ ﺍﻟﺒﻴﺖ ﻧﺬﻳﺮﻩ ﺣﺘﺊ ﺍﻧﻀﻔﻪ
ﺗﻮﻧﻲ ﺑﺪﻳﺖ ﺍﻧﻀﻒ ﺍﺟﺖ ﺟﻨﻪ
ﺟﻨﻪ،، ﻛﻤﻠﻲ ﻭﻛﻮﻳﻠﻲ ﺍﻟﺠﺒﻪ ﻣﺎﻟﺘﻲ
ﺯﻳﻨﺐ،، ﺷﻤﺮﺕ ﺍﻟﺠﺒﻪ ﻳﻤﻲ ﺑﺎﻭﻋﺘﻠﻬﺎ ﺍﻗﻤﺎﺷﻬﺎ ﻣﺜﻞ ﺍﻟﻨﺎﻳﻠﻮﻥ ﺗﻠﻤﻊ ﻭﻣﺒﻴﻨﻪ ﻣﺎﺗﻨﻜﻮﻱ ﻳﻤﻮﻋﻬﺎ ﺍﻻﻭﺗﻲ
ﻛﻠﺖ ﻳﻤﻜﻦ ﻛﺎﻭﻳﺘﻬﺎ ﻗﺒﻞ ﻭﻋﺎﺩﻱ ﺗﻨﻜﻮﻱ
ﺍﻧﻄﺘﻨﻲ ﺍﻻﻭﺗﻲ ﻭﺷﻜﻠﺘﻪ ﻫﻲ ﻉ ﺍﻟﻜﻬﺮﺑﺎﺀ
ﺟﻨﻪ،، ﻻﺗﻜﻮﻳﻦ ﻫﺴﻪ ﺧﻞ ﻳﺤَﻤﻪ
ﺯﻳﻨﺐ،، ﺍﻧﺘﻀﺮﺗﻪ ﺷﻮﻳﻪ ﻭﺍﻧﻲ ﺍﺻﻼ ﻣﺎﺍﻋﺮﻑ ﺍﻛﻮﻱ ﻛﻠﺶ ﺟﺎﻥ ﻋﺪﻧﻪ ﺍﻭﺗﻲ ﺍﺫﺍ ﺗﺤﻄﻪ ﻋﻠﺊ ﺟﺴﻤﻚ ﻣﺎﻳﺠﻮﻳﻚ ﻻﻥ ﺍﻧﻄﺘﻪ ﺍﻟﻨﻪ ﻣﺮﺕ ﻋﻤﻲ ﻗﺪﻳﻢ
ﺍﻭﻝ ﻣﺎﺧﻠﻴﺖ ﺍﻻﻭﺗﻲ ﻉ ﺍﻟﺠﺒﻪ ﻟﺰﮒ
ﺭﻓﻌﺘﻪ ﺑﺴﺮﻋﻪ ﺷﻔﺖ ﺍﻟﻘﻤﺎﺵ ﻣﺎﻳﻊ
ﻣﺎﺣﺴﻴﺖ ﻏﻴﺮ ﺍﻟﻜﻔﺨﻪ ﻋﻠﺊ ﺭﺍﺳﻲ
ﺟﻨﻪ،، ﺍﻟﮕﺒﺮﺭﺭﺭﺭ ﺍﺩﺑﺴﺴﺰﺯ ﺣﺮﮔﺘﻴﻬﺎﺍﺍﺍ
ﺯﻳﻨﺐ،، ﺭﺩﺕ ﺍﺣﺠﻲ ﺻﻮﺗﻲ ﻣﺎﻳﻄﻠﻊ ﺍﺣﺠﻲ ﻛﻠﻤﻪ ﻭﻳﺮﺟﻊ ﻳﺨﺘﻔﻲ
ﺷﻮ ﻫﺎﻱ ﺑﺴﺮﻋﻪ ﺟﺮﺗﻨﻲ ﻣﻦ ﺷﻌﺮﻱ ﻣﺒﻴﻨﻪ ﻣﺘﺤﺎﻣﻴﻪ ﻟﻠﻜﺘﻠﻪ
ﺷﺎﻏﺖ ﺭﻭﺣﻲ ﺍﺣﺲ ﻓﺮﻭﻩ ﺭﺍﺳﻲ ﺍﻧﺸﻠﻌﺖ ﺑﻴﺪﻫﺎ
ﻓﺎﺽ ﺑﻴﻪ ﺍﻟﺼﺒﺮ ﻭﻳﺎﻫﺎ ﻭﺗﻌﺒﺖ ﻣﻨﻬﺎ ﻭﻣﻦ ﺳﻮﺍﻟﻔﻬﺎ
ﺑﺬﻳﺞ ﺍﻟﺴﺎﻋﻪ ﺍﻟﻠﻪ ﻧﺰﻝ ﻋﻠﻴﻪ ﻗﻮﻩ ﻣﺪﺭﻱ ﻣﻨﻴﻦ ﺍﺟﺘﻨﻲ
ﻳﻤﻜﻦ ﺍﺭﻳﺪ ﺍﻓﺮﻍ ﻧﺎﺭ ﮔﻠﺒﻲ ﻋﻠﺊ ﻣﻮﺕ ﺍﺑﻮﻱ ﺑﻴﻬﺎ
ﻣﺎﻟﮕﻴﺖ ﺭﻭﺣﻲ ﻏﻴﺮ ﺩﻓﻌﺘﻬﺎﺍ ﻭﺭﮔﻌﺖ
ﺭﺍﺳﻬﺎ ﺑﺎﻟﺤﺎﻳﻂ،،،،،، ﻳﺘﺒﻊ
ﻫﺎﻱ ﺣﻴﺎﺓ ﺍﻟﻔﺼﻠﻴﻪ ﺍﻟﺠﺎﻧﺖ ﻣﺼﻮﺭﻳﻬﺎ ﺍﻟﻨﻪ
ﺗﻌﻴﺶ ﻣﻠﻜﻪ
ﻟﻼﺳﻒ ﺗﻌﺒﺖ ﻧﻔﺴﻴﺘﻲ ﺑﺴﺒﺐ ﻫﺎﻱ ﺍﻟﺮﻭﺍﻳﻪ
ﺭﺟﺎﺋﺎ ﺍﻟﻨﺸﺮ ﺑﻴﻦ ﻳﻮﻡ ﻭﻳﻮﻡ
ﺩﻣﺘﻢ ﻓﻲ ﺍﻣﺎﻥ ﺍﻟﻠﻪ
ﺍﺧﺘﻜﻢ ﺯﻫﺮﺍﺀ ﺍﻟﺤﺴﻨﺎﻭﻱ
