رواية سجينة خاصة الفصل الثاني 2 بقلم روز الحيدري
♕ـــــــــــــــــــــــــــــــــــــــــــــــــــــــــــــــــــ♕
التكملة…
ميار : زين وانت شنو احلامج؟
سحبت نفس وصفت ثواني يمكن افكر او ارتب افكاري
يمامة : اني؟ …
رفعت عيني عليها اريد احجي عن أحلامي …وشنو اريد من الحياة
بس دائماً الحياة ألها رأي ثانية مثل كل مرة تخلي أحلامي وكلامي
بسلة المهملات ماتسمحلي أبوح ولو بحلم او كلمة …
فجأة خلت إيدها على حلكها وعيونها جحظت ملامح الضحك والمزح اختفت تماماً
أشرتلي بذقنها ناحية الشباك لي يطل على حديقة وكالت
ميار : كووومي ولج صار ساعة يباوعلج …
تجمد الدم بعروگي، حسيت گلبي وگف بنص صدري. الكلمة ضربتني مثل الصاعقة.. “يباوعلج”
مو بس نظرة، كانها اقتحام مرعب لخصوصيتي، وتذكير بأني مو بأمان حتى بنص بيتنا نهضت
بسرعة
وله اشوف واكف يباوع من الشباك من الصدمة ثنينا وكفنا مرعوبات، اشر بأيده يعني فتحوا
الباب ميار تقربت فتحت الباب دخل يفر بسبحته
: شتسون كاعدات وحدجن؟
ميار : يمامة درسني
رمقني بنظرة تفحص ولازال يفر بسبحته كال
: أمچن وين؟
ميار : بالغرفة ضغطها مرتفع
صاح
: جميلةةةة وينج!
ماردت لتفتلي
: يمامة سويلي چاي
بدون كلام رحت لبست حجابي دائماً اتحجب كدامه
بس من يجفت للبيت لو يدخل مثل الحرامي مانحس
بي مثل هسه…
امي متمددة حست علية رفعت راسها
جميلة :اجه؟
يمامة :اي
هزت راسها عفتها وطلعت سويت الچاي وگلبي ينقبض
من شوفته جوده بينا يقيدني..
رجعت سويت الچاي بين ماكمل صبيته واخذته له جان
كاعد بالصالة أمي كاعدة يمة قدمت الچاي ولفيت ارد
اروح ستوقفني بصوته
: يمااامة
لتفت، أشر براسه يعني كعدي كبالي سويت مثل ماطلب
أمي ماحجت شي
كال
: تعرفي هذا الوالد؟
هز راسه
: وشكلتولهم؟
جميلة : كتلها نردلكم خبر بعد مااخذ موافقتك
هز راسه ورفع عينه علية
: طبعاً لان عمامهن ذابيهن
نزلت راسي “عمامهين ذابينهن” هضمتني وخنكتني بعبرتي هل جملة بس مابجيت
كال
: خوش كليلهم موافق بس…
سكت ثواني وكمل
: كليلهم المهر 30 بـ 30
رفعت عيني بصدمة هذا مد يزوجني ديبيعني مثل سلعة
باوعت الأمي ساكتة وأني مااكدر أحجي شي
جميلة : ماتوقع يوافقون!
: طبهم مرض قبلوا اهلاً وسهلا ماقبلوا كلعه خو مااربي
وانطي بلاش!
نزلت راسي هنا تأكدت فعلاً حاسبني سلعة يبيعها بالسعر
اللي يعجبه، قصص ماي هوبس وهو طول هل السنوات ماصرف علينا دينار عشنا براتب بابا الله يرحمه وكان وجودة اسوء شي بحياتنا
جميلة : باجر اكول لأم بهاء
: وغير هذا الحجي ماعندي بنات للزواج
نهض من مكانه وهو يفر بسبحته، كمل كلامه ببرود كأنه ينهي صفقة تجارية
: بعد ما عندي حچي عوفوني أرتاح
طلع من الصالة، وكل خطوة يخطيها، أحسها تضغط على صدري. بقيت بمكاني ساكنة مثل الميتة التفتت لأمي
يمامة : يعني خلص؟ بعتيني بـ 30 مليون؟
التفتت عليه بصدمة، صوتي چان يرجف مو من الخوف هالمرة من القهر
: اسكتي لو حبيتي الأسود
يمامة : شحبيت منه؟ وين اعرفه حتى احبه!
نهضت من يمها قبل مااطلع
يمامة : لو عندي عمام بيهم خير ماخلوني ذليلة بأيد
الغريب بس بسببج ــــــ
قاطعتني نهضت بهمه
جميلة : شو تراددين ولج ساقطة!
لتفت
يمامة : ماارادد بس هاي حقيقة بسببج عمامي ماردونا
وماعترفوا بينا
جميلة : تعاي ولج لنعل ابوج لابو البزرج
وكفت بوجها صكيت سنوني
يمامة : لاتغلطين…
أبوي لاتغلطين عليه ترا انسى انتِ أمي فهمتي لولا؟
قصص شيوخ ومشايخ وضباط وفصليات
ماحس له ضربتني على حلگي، بظهر كفها وهي لابسه
محبس بي شذرة، حسيت بطعم الدم بالساني
جميلة : لو ماساقطة وماتحجين هيج بوجهه أمج
عيوني ما رمشت بقيت أباوعلها عيوني مليانة نارقصص ماي هوبس مو خوف قهر، مسحت الدم بظهر إيدي وبكل برود
يمامة : أي اضربيني.. هذا كل اللي تكدرين عليه مو؟
لأن الحقيقة توجع ولأنچ تعرفين بداخلچ إن كلامي
صح
ضحكت بمرارة وأني أتراجع للباب
يمامة : أي ساقطة لان ادافع عن أبوي وروح وحق ترابة
اذا تجيبن طارية لو تسبي اسبج واسب أبوج
اشرت بأيدها
جميلة : يمةةة كل هذا الخاطر الأسود بعدج ماشفتي
وهيج فلفلتي
رديت بقهر
يمامة : اي مثلج مفلفة على زلم لو بيج خير ماتزوجتي
بعد مااستشهد ابوي شوفي النسوان تكعد تربي بزرها
مو مثلج
عفتها تغلط وتسب وركضت صعدت فوك بالبيتونة مكان
صغير مثل المخزن بقيت كاعدة بي اسمعها تصيح
جميلة : وينهااا!
ميار : شكو؟
جميلة : برابيك ماعرفت اربيجن ابوجن مات وبقيتن
عله على گلبي
ميار : شبيج؟ ليش تغلطين!
جميلة : لاتراددين علمتج!
بنبرة استغراب
ميار : ترا ماحجيت شي!
سكتت بعدها كالت
جميلة : صلاح وين؟
ميار : شعرفني، يمكن طلع
صار هدوء باوعت من المحجر شفت أمي طلعت، ميار هزت ايدها ودخلت الغرفة
ميار : طيييرة… وينج؟
صحت
يمامة : كش عااععع
اجت باوعتلي وضحكت
ميار : ولج شتسوين زاجل!
نزلت
ميار : شبيج؟
يمامة : ماسمعتي؟
ميار : سمعت بس امي تصيح جنت بالحمام
يمامة : خو مابيج شي؟
ميار : لا تعب بنات
يمامة : رتاحي لاتعبين نفسج
ميار : ماتخاف ربها شبيها والله عجيب امرها
يمامة : اني شكتلج مو كتلج مايوافق
فتحت عيونها
ميار : رفض؟
هزيت راسي
يمامة : سواها طردة يريد المهر 30 بـ30 على اساس
يحبنه ومربينا
ميار : يخسه يربينا والله احنا ربينا نفسنا بنفسنا
وعشنا بيت ابوي وبراتبه هو شنو؟!
يمامة : مااسمعه المثل الي يكول تتعلم الحجامة ب**
اليتامة، بس مو صوجه صوج الأماية
ميار : زين شمدريج بلكت يوافقون على مهر
هزيت راسي
يمامة : هسه تشوفين شنو قلت البنات؟ والله يرفضون
شماخذين حور العين نزلت من الجنة !
خلت أيدها على بطنها توجعت بلكوة ردت
ميار : والى متى نبقى هيج والله روحي بزعت
يمامة : رتاحي لاتعبين نفسج تهون
باوعتلي
ميار : يمتى تهون؟ مابقى عندي صبر
سحبت نفس ردت اهونها
يمامة : يمعودة شنسوي حالنا حال العالم
ميار : شكد اكرة الأم المثل أمي
يمامة : الله لايفجعنا بنصيبنا وكون بعد هذا التعب راحة
ميار : مابيدنا غير نكول ان شاءلله
هزت راسها
ميار : بس اريد انام
اخذتها للغرفة مددت صفنت بالسكف ودمعتها طاحت
يمامة : لاتهتمين ماتضيق له تفرج
ميار : متفرج… تعبت ريت الله ياخذ عمري واخلص
هي هاي هم حياة!
يمامة : نجبي أني يمج
ميار :خوفي عليج يارب يسهلج وتزوج وتخلصين منها
يمامة : يمعودة شريد منها خليها تحجي بس لاتجيب
طاري أبوي
ميار :لان تشبهين بابا الله يرحمة تضوج منج
يمامة : اعرف وتريد تقهرني..
تنهدت
يمامة : بابا غلط حياتها من تزوجها حقهم اهلة من رفضوها
ميار : اي والله من اشوف تصرفها ويانه اكول عدهم
نظرة بعيدة مادخلوا وحدة مثل أمي الحياتهم
يمامة : هم مابيهم خير لان خلونه بأيدها
ميار : يمعودة مايعرفون الله خالقنا لو لا، وحقهم عمي
ماتنجرع يكلك بناتها مثلها شلنا بهل بلوة
يمامة : مااريد اصير مثلها
رفعت عيني لها
يمامة : تدرين مفكرة اذا تزوجت ولاسامح الله زوجي
مات او نفصلت عنه واني عندي اطفال ابد مااتزوج لو اكدي الخبز ولااخليهم يشوفون غير ابوهم يمي
ميار : اني هم والله مستحيل اخلي يعيشون شعورنا
حتى لو ابوهم موزين اتحمله الخاطرهم ولا اخليهم
يعيشون مثلنا ويحسون احساسنا
مديت كفي
يمامة : متفقين؟
ضربت كفي
ميار : متفقين
يمامة : تردين اسويلج شي؟
ميار : خاف مابيج حيل
ضحكت
يمامة : بس طلبي
ميار : اريد كيكة كلها كاكاو وعليها علبة نوتيلا كون
من اكلها تذوب بحلكي
بتسمت
يمامة : من عيوني
نهضت دخلت المطبخ امي كاعدة رمقتني بنظرة انزعاج
بس ماهتميتلها جهزت شنو احتاج بس باودر كاكاو ماكو
رجعت لبست حجابي وعباتي واخذت فلوس، طلعت
يمامة : حروح اشتري واجي
جميلة : اكعدي شتردين اني اجيب
يمامة : لا اني اروح
يمامة : لا يمته لمتج؟
جميلة : طالعة بهليل شعندج؟
يمامة : متواعدة
عفتها وطلعت شفت صلاح كاعد بالسيارة ماهتميت
رحت للاسواق كلش قريب بنفس الفرع شتريت شنو احتاج ورجعت هي وصلاح كاعدين
اني كملت الكيكة مثل ماطلبت واعرفها تحب الكاكاو
ترستها نوتيلا وحشيتها موز ومكسرات ورشيت عليها
صارت تجنن وسويتلها كهوة …اخذتهم و دخلت كاعدة تدرس بس شافتها فرحت
بتسمت
ميار : يمةةة تموووت يربي …فدوة سويتلي كهوة هم!
عاشت أيدج
يمامة : بس حسبي حسابج باجر ماكو كهوة اليوم شربتي
كوبين كافي
ميار : اي والله يومين مااشرب
يمامة : يله كصيها
ميار : عيد ميلادددددي
ضحكنا واخذت كصتها اكلت اول لكمة واني اباوعلها
من ردت فعلها عرفت عجبتها غمضت عيونها وهي تتحسس الطعم بحلكها
ميار : شلون عرفت الله يحبني؟ من نطاني أخت مثلج
يمامة : اهم شي عجبتج
ميار : واكثر عمي هنياله الياخذج والنبي الله يحبه أم
بيت معدلة
بتسمت
يمامة : اوي اوي خجلت
ضحكنا وكعدنا ناكل هي اكلت لحد مانفجرت صاحت
ميار : شيليها من يمي گلبي ماينطيني اشيلها ولج حمووت
ضحكت وبعدتها لزمتها
ميار : اخر لكمة
اخذت قطعة صغيرة اكلتها
ميار : لاتسويها بعد ادمنها والنبي
ضحكت وطلعت خليتها بالثلاجة ورجعت بالغرفة
ميار : هذا يبات؟
يمامة : اهمم يمكن
ميار : قفلي الباب
يمامة : ولو توصيني!
تركت الكتاب من أيدها وصفنت
يمامة : شبيج؟
كعدت يمها
ميار : تعبت من القراية
يمامة : اتعب ولعب باجر ترتاحين من تنجحين
وتحصلين شهادتج
ميار : لا حبيبتي مااريد ادرس واتعين ونوب اصرف
على رجال غدي
يمامة : مابيها شي اذا المرة تساعد رجلها السيدة خديجة
انطت اموالها للنبي صل الله عليه وسلم
ميار : اي جيبلي مثل النبي انطي روحي مو بس اموالي
يمامة : ماكو الله خلقه وكسر القالب بعده
هزت راسها بحسرة
ميار : اي والله
ضحكت باوعتلي
ميار : ولج طيرة
يمامة : همم
ميار : ماجد تحبي؟
نظرتلها بصدمة
يمامة : ياا ولج شحبيت خبصتيني بي!
والله العظيم لو اشوفه بالشارع مااعرفه مجرد
نظرة ويمكن نص نظرة
ميار : لا يعني هم رسمتي حياتج ويا؟
يمامة : هههههههه …ولج شرسم؟ بس لا صراحة
ماعرف شلون افهمج هذا الشعور من تحسين هو
الشخص المناسب ألج تهوي او يمكن يتسمى اعجاب
ميار : موعگبةة مغرمةة انا مُش عايزة له هوا
ضربتها بخفة
يمامة : نجبي ولج
ميار : بس واضح هو نعجب دام وافق مبين ملهوف
سكتت ثواني باوعتلها
يمامة : مو علية ملهوف
ميار : عليمن؟
يمامة : مثل كل شخص يريد يتزوج ويكون عائلة
يستقر
ميار : برأيج يوافقون على مهر؟
هزيت راسي بنفي
يمامة : جؤ
سكتت
يمامة : كتلج من البداية أمي وهذا اعرفهم
ميار : ليش هيج يسوي؟
يمامة : حتى نبقى تحت رحمته لان ماعدنا سند وعمامنه
مو بحالنا وأمي شوف عينج تعتبرة اب حنون
هزت راسها
ميار : لا تعرف بي بس ماعرف شبيها
يمامة : تحبه
دمعت عينها
ميار : ياريت أمي ميته ولا أبوي
يمامة : حرام لاتحجين هيج مرات اعذر أمي اكول مارتاحت بحياتها، بعز شبابها ترملت وبركبتها بنات ثنين، وغير هذا هي هم ماعدها لا اخو ولا اهل ولا سند
تنهدت
يمامة : حقها تتزوج بس ختيارها غلط
ميار : واحنا شنو ذنبنا؟
يمامة : نعتبر نفسنا بأمتحان ولما يخلص هل امتحان
يجي العوض
ميار : وبلكي ماخلص؟ بلكي ماتحملت؟ ليش للي بجيلي
عايشات احسن عيشة عدهل ام واب واخوان وعمام له
احنا نتحسر على صلة عمامنا وعمرنا ماشفناهم
نزبت راسي
يمامة : اذا الله اخذ منج شي يعني انت مو بحاجته
وتكدرين تعيشين من دونه
ميار : اكو وحدة مو بحاجت ابوها؟
هزيت راسي
يمامة : حتى يعلمج شلون تسندين نفسج هواي اكو بس بالاسم مثل أمي او ممكن مايسألون على بناتهم وماعدهم حنيه عليهم
ميار : بس اني ماشبعت من حنية
باوعتلها، بتسمت والدمعة بطرف عيني
يمامة : ليش اني شبعت؟ بعد استشهاده عشت الذل
خاصة بعدما امي تزوجت هذا
رجعت باوعتلها
يمامة : والصدمة الاكبر من نطيتي مكان بابا وتصيحي
بابا
نزلت راسها وردت مهضومة
ميار : ماعرف جنت صغيرة واريد أب مثل البنات
لزمت أيدها
يمامة : أني اصير ابوج، اخوج، اختج، أمج حتى
صديقتج شنو تردين اصيرلج
رفعت عينها
ميار : الله لايحرمني منج لولاج جان اني لسه ـ
قاطعتها
يمامة : لا جنتي صغيرة
ميار : زين اخذتي بأيدي وعرفتيني الصح من الغلط
يمامة : مالنا غير بعض واهم شي ركزي بدراستج
ميار : مالي خلك أقرأ
يمامة : هسه رتاحي لاتعبين نفسج
رجعت مددت كمت فرشت يمها وكعدت
ميار : مشتهية حب
باوعتلها
يمامة : شنو السالفة!
ميار : مو اكلت حلا لازم أملح
يمامة : اكو مكسرات
ميار : أني اموت على مكسرات
ضحكت
ميار : روحي جيبيهن
نهضت خليت الحجاب على راسي وطلعت أسمع أمي
تقنع بي
جميلة : اي ليش؟ بلكي ماوافقوا؟
صلاح : تدرين اذا تزوجت راتبها ينكطع
جميلة : لا يصير الميار
صلاح : وهم تزوج!
جميلة : ياعيني شلون تاليهن يتزوجن
صلاح : واني أمسح أيدي بالحايط؟!
جميلة : ليش هذا البيت يبقى لنا
رخى صوته
صلاح : تبيعي؟
جميلة : لا بيع مابيع
صلاح : خلي قبلوا بالمهر قبلوا ماقبلوا طبهم مرض
جميلة : هاي هي بكيفك
هزيت أيدي ورجعت بدون ماينتبهون، ميار كعدت
ميار : اي خلينا نسهر سهرت خوات
كعدت يمها ناكل سوة
يمامة : اخذي هذا تحبي
ميار : حمامة
يمامة :همم
ميار : اذا تزوجتي شلون بية؟
هزيت راسي بنفي
يمامة : مااتزوج على كولت أمي بايرة ونايمة على گلبج
ميار : لا تحجين هيج
سكتت كملنا اكل بعدها طلعنا سوه فرشنا اسنانه ورجعنا
نمنا بس لما هو موجود نام وحدنا ثاني يوم أمي كاعدة ؏
وگت مجهزة الريوك
ندستني،وهمست
ميار : كل مرة تكعدنا بصياح
بهمس
يمامة : هصصص ولج
جميلة : ماتتريكن؟
يمامة : بالعافية مااشتهي
ميار : اني جوعانة
ميار راحت تتريك واني دخلت للمطبخ لكيت أمي مخلية الفاصوليا ولحم ؏ نار ومنكعة التمن
وكفت برطمت ورجعت للغرفة بس طلعت غسلت الماعين وسويت زلاطه وطرشي بين ما صبينا
الغدا كعدنا تغدينا كلنا،وصارلي زمان مماكلة من ايدها ياالله شكد احب طبخها يجنن..
جميلة : خابرت على ام بهاء وكتلها
وهو ياكل
صلاح : اممم… وشكالت؟
جميلة : كالت اتصل بيهم
صلاح : خوش …
بلع الكمة واشر
صلاح : بعد الغدا اروح وخاف يتجادلون لاطولين وياهم فهمتي انهي الموضوع
جميلة : ان شاءلله
كملنا غدا وامي سوت الچاي اني وميار عزلنا المطبخ بعد ماراح، كدرنا نتنفس للعصر
ندك الباب طلعت امي فتحت ام بهاء وام الولد وياها دخلوا واني جهزت الچاي قدمته
وكعدت، واضح أم الولد مزعوجة من هل شي كالت
: ام بهاء خابرتني واني حبيت اجي واتفاهم وياكم حتى من تصير المشية ان شاءلله
احنا متفقين بخصوص المهر
جميلة : اي لازم يصير اتفاق قبل المشية هذا المتعارف علية
: واني كتلكم البنية بيتها وحدها ومأثث اثاث كامل ونجهزها ذهب وفلوس وشنو تحتاج
جميلة : والله مالكه أحسن منكم بس يبقى الشور شور ابوهن
: اعرف سولفتلي ام بهاء بس مو مال ٣٠ بـ٣٠!
جميلة : هذا كلامه
: مثل باقي جنايني ١٠بـ ١٥
جميلة : خلي اخابرة
اخذت مبايلها واتصلت ثواني رد،
جميلة : اكلك عيني أم ماجد اجت وكالت المهر خلي ١٠،بـ١٥
صلاح : اني بنتِ عزيزة شوفتها بالبيت تسوة الدنيا وكذلك ضمان مستقبلها
ام الولد مدت ايدها
: نطيني احجي ويا
جميلة : هاي احجي وياها
نطتها المبايل بعد ماسلمت كالت
: اني بناتي زوجتهن الله شاهد بدون مهر غير كتاب الله ومهر رمزي حبر على ورق
وجنايني ثلاثه مهرهن خليته ١٠بـ١٥
صلاح : اني منطيكم طيرة
: بس ـ
قاطعها
صلاح : اني حالياً مشغول وكتلكم مهرها
المرة فهمت كالت
: مع سلامة
انطت المبايل لأمي ونهضت، نهضنا وياها ماحجت شي غير
: الله يوفقها مامقسومة
جميلة : رحم الله والديج
خلت وطلعت هي وام بهاء، اني ماحجيت شي بس ميار نفجرت من القهر
ميار : شلون تخلي هيج يتحكم بينا؟ هو منو؟ زوجج الج لا ابونا ولا له الحق بحياتنا
جميلة : نجبي واسكتي
صاحت
ميار : مااانجب اذا واحد ينجب فهو، يعني اني مااريد اتزوج بدون مهر النبي كال خير
النساء من قل مهرها بس هسه صايرين تبيعون بيع شايفتا كدامج؟
جميلة : اي هاي هي تنطين نفسج وفوكاج فلوس!
ميار : اذا يستاهل وشريف ليش لا اقتدي بزوجات الرسول خو مااخذلي واحد مايعرف
الله وين وشراب عـ***
ضربتها كف، بسرعة صرت بنصهن
جميلة : شنو قصدج ولج؟
ضحكت بقهقه
ميار : ليش نزعجتي عبن داست ع ذيلج ماخفتي الله من خليتي بناتج بنص واحد عركجي؟
ماكلتي ذني بنات ممكن يتحارش بيهن؟ لو يسويلهن شي؟
جميلة : هو حسبت ابوجن ورباجن
ميار : خـ* على هيج أب، وين رباناااا؟ وين؟ مو جنتي تذبينه يم بيبي الله وطيرين ويا!
جميلة : وشنو تردني اكسر ظهري عليجن!
نهضمت حيل ميار وكفت وعيونها تلمع بالدع
ميار : ليش مانستاهل!؟
جميلة : هذا حقي اشوف حياتي واكملها باجر عكبة تزوجن واني ابقى وحدي!
هزت راسها
ميار : خايفة؟ هااا…ماخفتي علينا من ذبيتينا يوم بيت خالتي ويوم بيت بيبي ماااخفتي؟
يمامة : كافي مياار عوفيها
باوعتلي وضربت على صدرها
ميار : ماافكرت بينا فكرت بنفسها، ماااخافت علينا خافت على نفسها تبقى وحيدة!
رجعت باوعت لأمي
ميار : كمليها بس اختاري زين عندج بنااااات اعرفي شلون تختارين! فكري بينا ولاتوكفين
بقسمتنا
ضحكت بستهزاء
جميلة : مادري بيجن هيج ميتات على رجل؟
ميار : ميتات على رجل؟ اي لما الاهل مابيهم خير نحاول نبني عائلة ماتشبة العشناها
وعلى اقل من يلزمني، يلزمني بحلال
باوعتلها
جميلة : شتقصدين؟
لزمت أيدها كرصتها
ميار : مااقصد شي
عافتنا وراحت للغرفة رحت وراها وسديت الباب عضيت اصبعي
يمامة : ولج سويتييي هسه تكول يغارن مني
ميار : ايييععع على شنوو؟ اسم الله
يمامة : ماتعرفيها؟ جديدة عليج؟
كعدت وسندت ظهري للحايط، باوعتلي
ميار : تبقين ساكته؟
يمامة : شسوي؟ احجي حرف تكول ميتة عرجل
كعدت يمي
ميار : اي عادي خلي تكول
يمامة : مالي خلكها والله گلبي يوجعني من حجيها تحسسني وحدة سز وماعندي اخلاق
ميار : لاتهتمين الحجيها
باوعتلها
يمامة : شلون مااهتم وحجاياتها يدكن بالعظم؟! اقبل تضربني ولاتحجي وتغلط وياي
نزلت راسها
ميار : الضربة اثرها يروح بس الكلمة تبقى بالگلب
تنهدت
يمامة : خاصة الام لازم تكون سند وقدوة البناتها
ميار : له امنا خلتنا نكبر بعمر أكبر من عمرنا
سحبت نفس
يمامة : تهون
ميار : لا والله ماتهون دام هل ططوة بحياتنا
سكتت، وميار صفنت شوية وكالت
ميار : ليش مانروح العمامنا؟
بتسمت ابتسامة جانبية باستهزاء
يمامة : كلش ياخذوج بالاحضان.. والله بطرانة هم يموتون من امي ويكرهونا على كرها
ميار : والله هاي مشكلتهم نحجيلهم كلشي صار ويانا
باوعتلها
يمامة : وترديهم يتحملون مسؤولينا؟ لا غلطانة يبقون يعايرونا، جنتي بوحدة وصرتي بثنين
خلينل على اقل امي نعرفها شوية وتروح منها
ميار : وهذا شلون؟
يمامة : حشا الله ماينسى عبده
التفت عليها
يمامة : ولو ماجد نصيبي والله كاتبة الي يصير بس
ماكو نصيب
ميار : ماجد مو نصيبج والراح هم ونصيبج والي يجي
هم مو نصيبج!
بتسمت ورفعت كتافي
يمامة : الله اعلم شوف المكتوب مامنه مهروب
ندستها بضحك
يمامة : ولج ليكون مليتي مني وترديني اتزوج؟
ميار : عمت عيني اذا امل منج يوم بس اريدج ترتاحين
اريد اشوفج احلى عروسة ومستقرة بحياتج
بتسمت
يمامة : الله كريم
سكنا من سمعنا امي تحجي ويا خالتي بالمبايل، طلعت
وهي تحجي
جميلة : هلا بيج..الله وياج
سدت الخط التفت
جميلة : خالتج راح تجي
يمامة : هلا بيها اليوم تجي؟
جميلة : لا باجر
فرحت هاي خالتي حيل احبها، هي اكبر من أمي عدها بنات ثنين ولد واحد متزوج منفصله
ومتزوجة
قصة ماجد صفحة ونطوت مثله مثل غيرة تقريباً تعودت على هل شي وصار الرفض عادة ،ثاني
يوم اجت خالتي وبناتها وحدة بعمر ميار والثانية أصغر كلش نفرح بيها
نخلصها سوالف وضحك، لما اجت طلعنا للمنتزة تعشينا وكملنا ورحنا نمشي شفنا مراجيح
البنات ركضو ردت اركض وياهن أمي سحبتني بقوة
جميلة : شكبرج تصيرين بعد تناينج خلفن!
حتى أضيع خجلي بتسمت والغصة خنكتني، نزلت راسي ردت خالتي
قدر : عوفيها محد اكو متشوفينها فارغة
جميلة : بره اسمها مفشلتني شكبرها وتركض!!
سكتت وبقيت منزلة راسي
قدر : ياا حمدي ربج عمي وين اكو مثلها؟ ماتشوفين البنات وشوفيها ماترفع عينها
باوعتلي وهزت ايدها
جميلة : هم عوزها ماعندي بنية تتهيلك اكسر ظهرها
قدر : يووو تعاي خالة تعاي معليج بيها
اخذت ايدي
يمامة : لا مااريد
قدر : تعاااي ولج وارد اشوفها شلون تحجي!
باوعت لأمي غمتني، بتسمت بوجها وگلبي يتگطع مشيت وياها البنات يضحكن ويتمرجحن
بس ميار كاعدة بالمرجوحة تباوعلي ضحكت
يمامة :اهزج؟
قربت يمها اهزها منعتني
ميار : شنو …أمي شكالتلج؟
عقدت حاجبي
يمامة : مكالت شي …يله خليني اهزج
ميار : لا خليني هيج
اجت أمي يمنا تسولف وتضحك ويا بنات خالتي،ميار باوعتلي ونهضت
ميار : حمامة تعاي كعدي
كعدت بمكانها، امي باوعتلي برطمت شوية كالت
جميلة : يله نرجع تعبت
بنت خالتي
ضحى : يااا خالة هستونا اجينا
جميلة :لا خالة دخت ارد انام
نهضت كعدت بين خالتي وأمي
قدر : خليهن خطية
جميلة : يله شوية ونروح
بقيت كاعدة اجت ميار كعدت يمي
قدر : ماتكومن تلعبن؟
جميلة :وحدتهن بعيرة وينها وين العب
اني وميار تبادلنا نظرات الأنكسار، بتسمت بس ميار بوجهه قهر مكتوم لزمت ايدها
يمامة : كومي لعبي
بغصة وقهر
ميار : حسبي الله عليها
يمامة : نجبي ولج تبقى أمج
مسحت طرف عينها وسكتت كتمت قهرها وماحجنا طول الطلعة لحد مارجعنا
لفينا راسنا ونمنا بفراشنا بس اني مانمت جنت خايفة ع ميار كلش نقهرت ومااريد
تتأذة مشاعرها هي بعمر المراهقة بس ماعاشت مراهقتها صح مو بس هي ثنينا
ماعشنا لا طفولة صحيحة ولا مراهقة..
مرت الأيام ولأسابيع نتبهت ميار صارت تتجنب أمي بشكل واضح ولما تكلها شبيج؟
تكلها اريد ادرس عندي متحان، حتى لو ماعدها بس تريد تتجنبها لكت بالدراسة مهرب
من واقعها، حتى ماتنام تبقى اما بغرفتنا لو بالمطبخ اجي الكاها نايمة عالكتاب، بس اعدل
نومتها واخلي راسي يمها وانام اعرفها مرات تفز وتخاف وحدها …وصلاح يروح ويرجع مثل
كل مرة
وبيوم جنت واكفة اسوي صابونية جسم، ابرش صابونة دوف برش ناعم واضيف ماي المفروض ماي
من الصيدلية بس ماعندي اضيف ماي شرب عادية، واخلط وياها بُن الگهوة وزيت جسم قليل وخليها
عالنار حتى تذوب الصابونة واخليها بعلبة وبالثلاجة،لان مابيها مواد حافظة،حتى متخرب، مرات ناخذ مبايل أمي ونشوف وصفات باليوتيوب وهل وصفة ادمناها اني وميار مانستغني عنها
اجت أمي مرعوبة
جميلة : خالتج بالمستشفى
بدهشة
يمامة : منو؟ شبيها؟
خالتي اسراء تكون اكبر وحدة بيهن كلش جبيرة بالعمر عدها اربع ولد وخمس بنات كلهم متزوجين
بس بنية وحدة ممتزوجة بعمر ميار ويمكن اصغر
امي اخذت فلوس والتفت
جميلة :راح اشتريلجن مبايل وخط وخلي عندج خاف ابقى يمها يصيرمايصير اتصلي
يمامة : تمام
طلعت، بقيت وحدي بالبيت قفلت البيبات ودخلت اسبح،قربت اكمل واسمع الباب يندك بقوة
مخيفة رجفت من خوفي، وهمست
يمامة : بس لاهوو!
الثالث من هنا
