رواية رسالة من زوجي الميت الفصل السادس 6 السيد عبدالكريم

الفصل السادس….رواية رسالة من زوجي الميت

يرويه نادر التاجي

لمّا شاهين قام بتصويري بالموبيل مكنتش عارف بيعمل كده ليه ، بس عم حسن نصحني إنّي لازم أطيعه ؛ علشان هو اليد اليمنى للبيه الكبير ولازم يكون مبسوط منّي على حد تعبير عم حسن علشان استمر فى الشغل ، وكمّلت شغلى في جني الثمار وحملها عبر أقفاص إلى شاحنات وعربات ضخمة تابعة لكبار التجار في محافظات القاهرة والإسكندرية ووجه بحري ، وعند المساء وقفنا طابور أمام شاهين لنحصل على الأجرة ، عرفت إنْ العمّال هنا بيحصلوا على راتبهم بشكل يومي ، ولمّا نادي شاهين على اسمي تقدمتُ وانقدني أجرتي وأخبرني أنّه لابد من الحضور مبكرا غدا ؛ لأن تاجر مشهور سيأتي لشراء حصة من الفواكه ، انتهي اليوم وخرجت من المزرعة وبدأت أتجول في القرية وشوارعها وسوقها ، وقمتُ بشراء ما يلزمني من طعام وعدت إلى غرفتي ، صعدتُ الغرفة وبدّلت ملابسي التى أعطاني إيّاها عم حسن ، وبدأتُ في تجهيز الطعام ، ثم سمعتُ طرقات على الباب ، كانتْ رحمة تبتسم في رقة، قالتْ :

ـ مساء الخير .

ارتبكت شوية ورددتُ التحية ، ثم سمعتها تقول :

ـ عرفت إنّهم بينادوك باسم غريب .

مكنتش عارف أرد أقول إيه بس قدرت أتشجع وقلت :

ـ اهو اسم وخلاص .

قالتْ :

ـ عارف … انا مش حابه الاسم ده …انا هناديك باسم ضياء .

قلتُ :

ـ ماشي .

ويظهر إنْ إجابتي مكنتش كافية ؛ لأنّها قالت :

ـ مسألتش يعني اشمعنا الاسم ده .

قلت :

ـ جايز يكون اسم حد من قرايبك أو حد عزيز عليكي .

ضحكت ضحكة مشرقة بدت فيها أسنانها الناصعة وضاقتْ عيناها في سعادة وقالتْ :

ـ لا .

قلتُ :

ـ طيب اومال إيه ؟

أجابتْ :

ـ هتعرف مع الأيام .

لم أرد ولم تتكلم هي وطال الصمت ثم قالتْ :

ـ طيب تعالى بقا علشان أنا مجهزة الأكل من بدري .

قلتُ :

ـ لا … أكل إيه … كفاية عليكم كده وانا جبت أكل من السوق على فكرة وهجهز لنفسي .

قالتْ في غضب واضح :

ـ طالما أنا موجودة يبقي مش هتاكل إلاّ من إيدي قصدي إلاّ معانا في بيت عمك حسن .

لم تمهلني لأعترض ؛ فذهبتُ معها .