رواية دية الصلح الفصل السادس 6 بقلم مرج البحر
البارت 6
سولاف:جدي وعمامي كالو بنتي انتي مالج ذنب انتي
بنتنا بنت الغالي انتي واخوانج بعيونا نخليكم
مرت ٣ ايام وانتهى العزاء وجانو الكل وياي ذهب ومعاملتهم الي كلش طيبه
طلبت من عمي ياخذني للبيت محتاجه ملابس
اخذني و رحت طلعت ملابس الي ولخواني
وطلعت الذهب والفلوس لفيتهم بنص الملابس
واجيت لبيت جدو
فرغولي غرفه الي ولخواني
وبقيت وياهم عايشه كرست كل وقتي بعناية
اخواني تركت المدرسة بعد الاربعين مالت عمو
جدو كال بنتي خوالج يريدون يشوفوكم
اني رفظت وكلتله لا جدو اني بنتكم ومااعترف بأحد غيركم
وين جانو خوالي عن ماما ميعرفون بيها من
جان بابا عايش هيه مو راحه ليش ما تصرفو
وياهه
جد سولاف : تمام بنتي والله عجبتيني تعالي يبنت الغالي
سولاف : جدو حضني ويبوس بيه كتله جدو
اني مااريد ابتعد عنكم ابد
جد سولاف : لا بنتي انتي قطعه مني شلون اقبل تبتعدين عني
سولاف : لعد جدو اني عندي اقتراح
جد سولاف : ايي بنتي كولي شنو
سولاف : اكو عدكم مساحه ورى البيت بيعوها الي
واني ابيع بيتنا وانطيكم واليبقى ابني بي بيت
على كدي اني واخواني
جد سولاف : ههههه والله يابنتي انتي تفهميني اني
من البارحه قررت احجي هذا الشي ويه العائله
بس انتي سبقتيني
بيتكم لا ما نبيعه ابد احنا نسويلكم بيت بهاي القطعه وبيتكم يبقى ننطي للأيجار وتصرفون منه حتى اذا متت اكون مرتاح ومأمن عليكم
سولاف : اسم الله لتحجي هيج امانه.
كمنا طلعنا تغدينا وفعلاً جدو جمع العائله وكال
الهم والكل وافقو و رحبو بالموضوع
وفعلاً خلال شهرين ونص كملو البيت وانتقلنا عليه
سامر : بعد ما رجعت البيت دخلت الغرفتي
نزعت ملابسي ودخلت الحمام اسبح
فتحت المي وصرت جوه وجعت صوره
سولاف كدامي وهيه تحجي وصار كل تفكيري
بيهه نفضت الافكار من راسي وطلعت من الحمام غيرت ملابسي ورجعت دوامي
لان اليوم خفارتي وصلت المكتب عندي
قضيه فتحت ملف القضية ورجعت افكر بيها
شنو شبيك سامر شجرالك شنو اول مره تشوف بنيه هيه صارت كل همي وقررت
اراقبها واعرف عنها كلشي ..
سولاف:بقينا ٣ سنوات بس للأسف جدو مات بسكته قلبيه حسيت بالدنيا فارغه لا ام ولا اب
وجدو راح وتركنا اووف الاحزان مراح تخلص
ابد
*أنا فتاة اليوم التي نتمنا ان تمتلك
أب … يسندها ويكون عونها
أخ ….. يقف في ضهرها لا يسمح لاحد بكسرها
أم …. حنونه تمدها بالقوه والصبر
أخت … صادقه صدوقه تكون رفيقه دربي
حبيب… وفي يكون لي العالم ارى العالم به
أصدقاء وأقارب..
هذا أنا الذي اتمناه بيت دافئ حنون 🥀💔
✍#مرج_البحر
سولاف : قررت اغير شويه من الروتين وكمت طلعت الفلوس وفتحت محل هداية
وكلش حبيت التغير وصارو عندي صديقات
طبعا بعد موت جدو عمامي دخلو بالمشاكل على الورث وصارت بينهم مشاكل وصلت للضرب والمحاكم ف قطعت علاقتي بيهم خواتي واخوية يدرسون واني قايمه بالواجب
من المصروف والدراسه والاكل وكلشي
بعد ايام اني معندي بنات عمام من جيلي كلهم صغيرات
ونسوان عمامي ماعدهم وقت ملتهيات مع ازواجهم واطفالهم واني مقضيتها بالمحل مالتي ومتونسه كلش
وشغلي كل يوم للأفضل ودخلت دورات تعليم الخياطة وتعلمت وفتحت مشغل خياطه ازياء والحمدالله
توفقت بشغلي وصار عندي فلوس خير من الله
قررت اشتري سياره علمود اخذ اخواني للمدارس وهم اروح بيها لشغلي
لأن صار عليه ضغط منا محل الهداية ومنا المشغل خياطه ومقضيتها اصرف تكاسي وادفع للخطوط مالت اخواني المهم اشتريت سياره
سامر : طول هاي ٣ سنوات اني اتبع اخبار
سولاف وصرت اعرف عنها كلشي وهتميت
بيهه كلش وما تفارك تفكيري ليل ونهار
وعرفت فتحت محل الهداية والمشغل
الخياطة يوم بعد يوم انعجب بيهه اكثر
جنت اراقبهه من بعيد واراقب تصرفاتهه
لان كلت امهه كانت مو خوش اكيد هيه
نفس امها بس ثبتت العكس كانت بنيه
خلوقة ومحافضه على نفسه واعتمدت
على نفسه واشتغلت حتى تعيش اخواتهه
وهذا الشي الي خلاني احبهه اي حبيتهه
ل سولاف وصرت مهوس بيهه وقررت
اتعرف عليهه واعترفلهه بحبي الها
سولاف : جنت بمحل الهداية عندي طلبيات
جاي اجهزهم وصدفه دخل واحد المحل
وضل صافن عليه احجي وياه ما يجاوب
بالاخر تعصبت عليه وكتله تفضل شنو رايد
سامر : شلونج سولاف ؟
سولاف : نعم وانت منين تعرفني
سامر : اني اعرفج من زمان
سولاف : ممكن توضحلي اكثر انت منين تعرفني
سامر : اني ضابط سامر الي حققت بقضيه
مقتل عمج
سولاف : من سمعت بهت وجهي وكعت
الهدية الي بيدي هو اجه عليه كال
سامر : سولاف لا تخافين اني مااريد اذيج
سولاف: نفضت ايدي منه خير شرايد العفو
قصدي اكو شي اكو موضوع جاي عليه
سامر : لا بس هيج اجيت بالصدفه
سولاف : معقوله من بعد هاي السنين تذكرتني
بالصدفه وهيه كله ساعة حققت ويايه
سامر : سولاف ممكن نكعد نحجي بموضوع
سولاف : وشنو هو الموضوع
سامر : من نكعد راح تعرفين مو هيج احنه واكفين ونحجي
سولاف : اوك تعال نكعد هنا وراحنه مكان
مخصص الكعده
وهاي كعدنه اكدر اعرف شنو الموضوع
سامر : شوفي يا بنت الناس اني مااحب
اللف وادور واجيج من الاخير اني من يوم
الي اجيت بي عليكم يوم مقتل عمج وانتي
عجبتيني اني عبالي مجرد اعجاب حالج
حال اي بنيه بس بعدين يوم بعد يوم صرتي
ما تفاركين تفكيري واني طول هاي ٣ اسنين
واني متابعج طبتج وطلعتج كل يوم اجي
واشوفج شنو تسوين لحد ما حسيت بنفسي
اني احبج لا مو بس احبج اعشقج ووو
سولاف : اعتذر على مقاطعتك بس انت
تعرف عني كل هذا واني مو داريه عنك شي
وثانيه منو كالك اني مال هاي السوالف
اني حالي مو مثل باقي البنات اني اشتغل
حتى اعيش اخوتي اني عندي ايتام اريد
اربيهم اني مو مال حب وخرابيط
سامر : خرابيط يعني الحب بنظرج صار
خرابيط وثاني شي اني مو مال هاي السوالف
اني اجيت اكلج لان اني تعبت طول هاي السنين واني اتابعج من بعيد وثاني شي
فكري بالموضوع واني انتظر منج جواب
لان اني نيتي زواج
سولاف : واني مامفكره بهذا الشي نهائياً
وثاني شي انت تعرف ظروفي وسالفه
امي ومنو وره مقتل عمي والع
سامر : انتضري سولاف اني ما تهمني امج
ولا سوته امج انتي مالج ذنب اني كتلج
صار كم سنه اني وراج وعرفت كل تحركاتج
وشنو اخلاقج وشلون اشتغلتي وعيشتي
اخواتج وما خليتيهم يحتاجون احد وهذا
الشي خلاني احبج اكثر
سولاف : اوك عوفك مني اني زين اهلك
يعرفون الحقيقه يعرفون اني امي شنو
جانت يعرفون امي كانت مو زينه وهيه
وره مقتل عمي ما فكرت بكل هاي الامور
وثاني شي كتلك اني اخويه واخوتي
محد الهم بس اني ومستحيل افكر بنفسي
واعوفهم مثل ما سوت امي
سامر : اخواتج اخليهم بعيوني اني
ماكتلج تعوفيهم نكدر نكعد بيت وهمه
ويانه شي عادي
سولاف : لا مو عادي اكيد الناس راح
تحجي وراح تسمعنه وتسمعك حجي
لا مستحيل هذا الشي يصير
سامر : وليش لا شنو قابل انتي راح
تبقين طول عمرج بلا زواج
سولاف : اي ابقه وليش لا
سامر : سولاف فكري بالموضوع وفكري
اني شاريج واحبج اي سولاف احبج
وصعب بهل وقت تلكين الشخص
الي يحب بصدق صدكيني حبي اللج صادق
سولاف : واني الكلام الي عندي كتله ومااا
سامر : اني مااضغط عليج هسه اخذي
وقتج وفكري بالموضوع ومن توصلين
الحل المناسب رديلي خبر وهذا رقم
تليفوني وانتضر جوابج اني اترخص
سولاف : الله وياك ومشه وصل الباب
المحل والتفت عليه وكانت عيونه مدمعه
كال
سامر : سولاف احبج وروح ابويه احبج
ومن كلب صافي فكري زين ورديلي
خبر في امان الله
سولاف : طلع سامر وخلاني بتفكيري
هذا منين طلعلي اني ويني وين الزواج
وين الحب اني عندي اخواني بالدنيا
رجعت البيت والافكار تضارب براسي
هاي انت منين طلعتلي احسن شي
اعوف الموضوع وما افكر بي
رحت سبحت وطلعت صبيت اكل الاخواني
اكلو وناموا ورحت اني هم نمت خليت
راسي على المخده اجه بالي سامر وضليت
افكر بي وهو يكلي احبج واعشقج يبوو
عليج سولاف هو اني بيا حال خلي انام احسن
سامر : رجعت من يم سولاف واني كلبي
نار خايف بين انو ترفضني او لا شلون
اذا رفضت وشسوي هذا كلبي الي مثل
النار اووف يا سولاف شسويتي بيه
سولاف : مر اسبوع واني كل ساعة يجي
بالي سامر وكلامه وساعة ارجع اتعوذ من ابليس واكول اخواتي عندي باادنيا ومرت
عليه كم يوم واني كلبي كل مااذكر سامر
يكوم يدك دكه سريعه اول مره احس بهذا
الشعور شنو هذا مااعرف حطيت ايدي
على كلبي واحاجي خيرك يكلبي شبيك
لا تنسه صار وياي دخيلك لا تخذلني
ودك انتبهت على نفسي اني دموعي
على خدي ها يا سولاف بس لا وكعتي
بنار الحب واللج انتي شسويتي انتي مو
حمل كل هذا لا انؤ لازم انهي كلشي
اخذت التليفون وتصلت على سامر
سامر : جنت جاي من الدوام وسبحت
اريد انام ودك تليفوني شفت المتصل
واني كلبي كام يدك سريع وفتحت
الخط هلو سولاف شلونج
سولاف : هلو سامر الحمدالله وانت
سامر : صرت احسن من سمعت صوتج
سولاف : خليت ايدي على كلبي مااريد
اضعف كدامه وكتله سامر اني فكرت
بالموضوع مااكدر ارتبط بيك ونزلت دمعه من عيني
سامر : احس كلمتهه سجين بنص كلبي
احس الدنيا صارت ضلمه بعيني بالكوه
حجيت كتله واني وعتج ما اضغط عليج
هاي هيه الي تشوفينه بس صدكيني
اني حبيتج من كل كلبي وراح ابقه طول
عمري ومستحيل اكدر انساج واني راح ابقه
بضهرج وحتى وان رفضتيني واذا يوم من الايام حتاجيتي شي راح تلكيني يمج ولا
تترددين واذا ضاكت عليج بس صيحي باسمي
تلكيني يمج هسه اخليج اني مااريد اودعج
بس اكلج محروسه بالرحمن سولاف احبج
سولاف : سديت التليفون واني انفجرت
ب بجي واضرب على كلبي اكله ليش
هيجي وياي شنو هذا ضيم انظاف
الضيمي ورحت حطيت راسي على
مخده ودمعتي على خدي ومااعرف
شلون نمت ..
سامر : بعد ما سديت الاتصال وي
سولاف قررت ما اتقرب عليهه بعد
كلت خليهه الايام لا بد تغير رايهه
وخليت هذا الحب بكلبي اخ اني
متعلم على الشوغات
سولاف : مرات الايام وسامر ما فارق بالي
صرت بالنهار التهي بشغلي ومن ارجع واحط
راسي على المخده تهيج المواجع اخر شي قررت استسلم ولازم انسه بس هيهات اذا انسه
خليت هذا الحب بكلبي وضحيت بكلشي الخاطر اخواتي واخويه تركت الموضوع ومشت الايام واموري كل يوم للأفضل تقدمولي هوايه للزواج بس جنت رافضه هذا الموضوع نهائيا وحب سامر اندفن بكلبي
لحد ذاك اليوم الاسود الي تغيرت بي كل حياتي وصرت بين الرجلين ولعب بيه القدر ..
قدري … تعال الي ..
لاضمك هيا ياصغيري ، ساضمك ..
الي حتى وان لم اكن ارغب بك حتى
وان كنت بذره خاطئه في عيني
ساضمك .. لانك خلقت لأجلي’ وخلقت لأجلك’
لاني مجبره على مسك يدك والسير معك ال
النهايه الطريق …
ستبقى معي حتى مع تشوه خلقك وجمالك مع
كرهي وشوقي لك مع مرك وحلوك ..
مع الم عثراتك ودفئ ضماداتك ففي نهايه
المطاف تبقى انت قدري وكلانا مجبر على
تحمل الاخر ..
✍#مرج_البحر
سولاف : جدو جانت عنده قطعة ارض مشتريها من شخص ومن مات جدو هذا الشخص كال
كذب مااشترى مني شي عمي الصغير كلش
عصبي وصاحب شر تعارك ويا وقتل الرجال
اني كنت بامشغل الخياطه واتصلو بيه كالو سدي المشغل وتعالي للبيت سديته ورحت للبيت
لكيت الدنيا محتركه والكل شايلين سلاح
اخذت اخواني ودخلت لبيتي
اجى عمي كال ممنوع احد يطلع اهل المقتول
يريدون يهجمون علينا و…
…… يتبع
