رواية دية الصلح الفصل التاسع عشر 19 بقلم مرج البحر
البارت___19
+
ام حسين :اني اجيت حتى نتحاسب
+
سولاف :على شنو
+
ام حسين : اني من رحتي بديت اتسوك
وابيع وماتركت المحل وهذا الدفتر كتبت بي كلشي هاي امانه وانتي يتيمه ومستحيل اسوي شي غلط
لذلك هاج اخذي الدفتر و على مجالج دققي و اي استفسار اني حاضره
وهذا مبلغ من الدخل وبعد اكو مبلغ بالمحل
+
سولاف : فدوه لعمرج والله انتي بحسبة اختي الكبيره
+
ام حسين : يي كوليلي شلون اجيتي
+
سولاف : زوجي استشهد
+
ام حسين :ياا الله يرحمه شلون ولد خلوق وابن حلال
+
سولاف : شلون عرفتي خلوق وابن حلال
+
ام حسين مو هو شلون مو اجى اخذ ملابس الج وسئلته منين جبت رقمي كال اتصلت وجاوبوني اخوان سولاف ونكسر كلبي عليهم
+
سولاف : صدك تحجين
+
ام حسين : اي والله وماقبل ياخذ الملابس بلاش دفع حقهم وبزياده وسئلني عن اخوانج
وحجيتله حالتهم وتأثر كلش
ونطاني فلوس وشتريتلهم ملابس واكل
وكل اسبوع يجي ينطيني فلوس اشتريله ويوصيني بيهم ولحد من اجه كال روحي اخوان سولاف حتى خابرهم يحجون وياهه
+
سولاف : سوده بوجهي عزه العزاني فدوه لتكولين هيج وتزيديها عليه يعني جان يجي
ويطمئن عليهم
+
ام حسين والله هذا الصار بالحرف ليش اختلف لونج
سولاف : تدرين من ذاك اليوم الي اجى اخذ ملابس الي اتغير وصار حنون ويريد بس يشوفني مرتاحه تدرين اعترفلي بحبه قبل لا يستشهد عشقني عشق ونطاني وعد اصير زينه وي اهله
يخليني اجي الاخواني وراد نصير كا اي اثنين متزوجين عادي بس اني ما انطيته مجال
وراح استشهد وهو بنفسه هذا الشي حتى بليله من راد يروح الدوام الليل كله يشم بشعري واحسيته كلش يحبني
+
ام حسين : الله يرحمه خطيه هو الدنيا تاخذ بس الزين سولاف سؤال انتي حبيتي
+
سولاف : والله مااعرف بس بالفتره الاخيره حسيت بالامان ويا لان هو صار يفضفضلي
وصار زين وياي
+
ام حسين : لعد سامحي واعذري الرجال امره مو بيده من كان قاسي وياج
+
سولاف : والله سامحته و من هسه وعد راح اسويله ثواب عن روحه او صدقه جاريه
وعن قريب بس ارتب وضعي راح اروح لبيت اهله زياره و اخذ اخواني وياي وو
+
ام حسين و شنوو شو سكتي
+
سولاف : اني طلعت حامل
+
ام حسين : اي بالخير عليج انتي كلبج طيب وتستاهلين كل خير وهذا الطفل راح يكون اللج سند بالحياة
+
سولاف :تسلمين يله نتريك عندي كومه شغل
+
ام حسين: شعندج
+
سولاف : راح اوصلج وارجع اخذ زوجة عمي نروح للمديره نرجع اخواني للدوام
+
ام حسين : اوك بس تعالي للمحل شوفي شنو تقررين
+
سولاف : اوك
+
كمت وصلت ام حسين ورجعت اخذت زوجة عمي و رجعت اخواني للدوام ورجع كلشي مثل الاول واحسن
انكتبتلي حياة جديده
وهسه اني حامل بالشهر الخامس وعرفت حامل بولد وبين الفرحه والحزن والقلق
قررت اعتني بالطفل واعتبره هديه من الله يشيل اسم احمد بس بقيت حايره بين امرين
اكول لأهل احمد لو اخفي الموضوع
+
بعد تفكير عميق
رحت لأهل احمد واخذت وياي اخواني
الناس رحبو بيه وقامو بالواجب و زياده
بشرتهم بموضوع الحمل و رسمت الهم فرحه ماجنت اتصورها
+
من دخلت شهر السابع بالحمل كلش تعبت
ويوم من الايام المغرب انتضر الصلاه شويه
وندكت الباب طلعت اني لابسه ازار الصلاه
صحت منو كال اني اخيتي افتحي الباب
فتحت الباب باوعت ولد شاب شكله مرتب
وبين عليه العز لابس دشداشه خليجي وغتره
لافهه مثل الخليجين والعطر وصل يمي كتله
اتفضل منو وشرايد كال العفو اختي هذا مو
بيت سولاف كتله اي منو انت اني جاي احجي
وياه طلعت مره من وراه مبوشه وعكد حواجبي منو هاي رفعت البوشيه لان هاي امل
اخت احمد شافتني اجت عليه بوستني كامت تبجي الولد كال امل خلصي واطلعي مو تتاخرين اني انتضرج بسيارة هو راح واني دخلتهه البيت كتلهه شبيج شنو جابج بجت
كالت خيه امي ماتت واني بقيت وحيده اني نصدمت كتلهه الله يرحمها شبكتني وكامت تبجي موتت روحه من البجي كوه سكتته رحت جبتلهه مي شربت كالت خيه اسمعيني
اني اجيتج اليوم انطيج كم شغله واكلج كم حجايه قبل لا اروح
+
سولاف : خير حبيبتي كولي وشنو هاي الشغله
+
أمل : شوفي خيه أمي قبل لا تموت طلعنت ورث لأبن احمد اله قطعة ارض واله مبلغ
واجيت انطيهن اللج بس محد جان راضي من عماتي وعمامي تخبلو من عرفو بيج حامل
يريدون ياخذون الطفل وامي الله يرحمها
سوت كل هذا من غير مايدرون وصتني
واني هسه اجيت لان اني راح اروح بعد ماارجع لان اني من بعد ما ماتت امي عمتي
هاي الي جانت تضربج وتسمعج حجي تريد
تزوجني الابنهه اكبر مني ٢٠ سنه ومتزوج وبناته والده بعمري والله شنو
ما تريد الورث يروح الغريب هاي تفكيرهم بعد
وخيه الحجي بيناتنه اني احب واحد هذا هسه الي شفتي هو جان يجي البستانه يتصيد وهو وصحبانه واشافني من جنت بالزرع وحبينه
بعض طلبني من اهلي وابوي الله يرحمه رفض
هو من اهل الغربيه واني ضليت معانده مااتزوجت وهسه من ماتت امي وعمتي رادت
تزوجني ابنهه قررت اشرد لان بعد محد بقالي
امي ماتت اخويه واختي هم راحو اني صفيت
كل اموري بالسر ومن طلعت للزرع غافلتهم
وشردت لان اني جنت متفقه وي الولد وراح ياخذني الاهله ويعقد عليه واصير حرمته
وهو يكدر يحميني وهسه اجيت انطيج الامانه
وطلعت جنطه من جوه عبايتهه وطلعت من عدهه جنطه زغيره بيهه اوراق وفلوس انطتهم
الي كالت خيه عندي بعد امانه من امي طلعت علبه ازغيره فتحتهه كالت امي ناذره بس يصير ولد عد احمد تلبسه تراجي وهيه مشتريتهه من زمان وضامتهم وقبل لا تموت وصتني انطيجياهن تلبسيهن اله لان جانت تعرف ماراح تشوفه وهاي بعد ملابس هم مال اخوي احمد من جان ازغير تريد تلبسهم الابنه اول ما يجي الدنيا سولاف امانه الله تنفذين
وصيته امي وهو خيه ديري بالج عليه هذا ابن
الغالي
وسامحي امي واخويه وسامحينه فدوه سولاف والله احنه الي سوينه من قهرنه على ابوي الله يرحمه
+
سولاف : مسامحتكم الله شاهد على كلامي والله يرحم احمد وامج
+
أمل : مشكوره خيه والله انتي بنت أصل الله ينطيج على كد نيتج يله خيه اني اترخص
+
سولاف : حبيبتي وين رايحه ابقي هسه صار الدنيا لليل
+
أمل : لا يعمري لازم اطلع منا قبل لا يصبح الصبح لان اذا لزموني ما راح يرحموني خلي
اوصل الهله ويعقد عليه حتى اذا عرفو مكاني بعد محد يكدر يفك حلكه
+
سولاف : بيها خير حبيبتي الله يسهل عليج
ويفتحه بوجهج
+
أمل : مشكوره خيه يله اني اترخص
+
سولاف : الله وياج
ودعتني امل وراحت صفنت الله يرحمج ام احمد يارب لك بيهه اراده جانو همه مفكرين
اجيب الولد وياخذونه مني ويحرموني منه بس هسه تغيرت كل الموازين احمد مات واخته وهسه ام احمد حتى قبل لا يشوفونه
وامل شردت من عمامهه حتى تزوج الي تحبه
شوف شلون الدنيا دور والله مو قصدي اتشمت لا بس اكول هاي الناس ما تفكر هو ماكو شي بايدنه كلشي بيد رب العالمين الله يرحمهم ويغفر الهم يارب
فتحت الجنطة لكيت بيهه سند مال قطعة ارض وفلوس بيهن بل ١٥ مليون حمد الله وشكرته على هاي النعمه بعد التعب والشغل
ما خلاني احتاج شي وجنت حايره بعيشت ابني شلون بس الحمدالله اجه رزقه وياه
+
واني مع الايام مابقى بيه حيل للشغل
بعد المشغل والمحل اللبسه بقه بس محل الهداية لان خليت بي عامل وما حبيت اطلعه
خطيه عنده عائله واني هم كلت خلي يدخلي وارد استفاد منه والعامله العندي انطيتهه حسابهه وراحت
واني كعدت بالبيت ومشت الايام على نفس الروتين
لحد ما اجه ذالك اليوم الي صحيت بليل على اوجاع الولاده صحت على أيلاف حتى تكعد اخويه كافل يروح ويانه
صحيح هو مو جبير كلش بس على الاقل
ويانه واحد اخذت جنطه الطفل وخليت أيلاف
تسوق سيارتي وتاخذني لان اني بهاي الفترة علمته تسوق طلعنه المستشفى رفضو يستقبلوني لان ماعندي عقد محكمه ولا ابوية
موجود صدك احتاجيته بهذا اليوم ليش ربي
لا ام ولا اب ولا زوج عشت يتيمه وراح اربي ابني يتيم ضليت كل من مستشفى المستشفى ومحد يقبل يولدني واني اريد اموت من الوجع
اوووف الي ماعدهه احد اخر شي رحنه على مستشفى راح كافل جاب كرسي كعدت عليه
لان فد مره صارت حالتي دخلوني هم رفضو
هنا كمت ابجي واتوسل بس يجيبوني لان بعد
مااكدر راح اموت وأيلاف كام تبجي وتتوسل بيهم بس الأسف محد نكسر كلبه عليه خلينه وطلعنه
واني بهاي الحضه كتله ربي اخذ امانتك لان من صدك تعبت من الوجع نسيت حتى اخواني
وهيج دعيت وصلت الباب مال المستشفى الخارجي وصاحت علينه مره اجت عليه
كالت بنتي اني شفتج وكسرتي كلبي راح اسويهه الله اني قابله تعالي راح اخذج البيتي
واجيبج كلت ارحم بحالج ادري هاي مسؤوليه
بس اني اجيبج وروحي مااريد مشكله هو انتم تسون المصايب تعالوا بعدين خلصونه كتلهه
خاله والله اني متزوجه مو مثل ما مفكره
كالت اي كلجن هيج تكولن يله تعالي اجيبج
قبل لا يصير بيج شي اني سكتت لان مابيه
حيل احجي وابرر هاي هم بلوه ثانيه ما جنت حاسبه لهه حساب صعدت بالسيارة وهيه صعدت ويانه دلتنه على بيتهه نزلت يم بيت
زغير فتحت الباب ودخلتني بغرفه ازغيره معزوله بره البيت دخلت جان بيهه سديه وحماله مغذي وادويه صعدتني على سديه فحصتني
كالت انتي ولاده خلتلي مغذي وضربتني بي ابره زاد عندي الوجع احس روحي متت شكد
حاولت ماكدرت طولت تقريبا ساعة انتهيت
وهيه تصيح دفعي راح يموت ضليت اصيح
وادفع لحد ما فدم مره اجت الطلكه القوية
صرحت ياعلييي حسيت طلعت روحي وي طلعته
هنا سلمتهه بعد ماادري بنفسي
+
حسيت على نفسي كاعده بمكان ماواضحه الرؤيا
شويه اتضحت عندي الرؤيا اشوف احمد وياه
ابويه احمد جان لابس ملابس عسكريه وجهه وملابسه كلهن دم
اجه تقرب عليه اني جنت كاعده ومخليه
طفل بحضني والطفل كان ما لابس شي كله
دمايه واني كنت تعبانه حيل وجع الولاده بعده بيه شفت احمد
+
كتله احمد هذا ابنك شوفه شلت الطفل
اريد انطي اله هو ثنه ركبته ودنك عليه شاله باوع عليه ورجع باوعلي وبتسم وهو عيونه
مدمعه لتفت على ابويه وشويه اجه واحد
ثالث بس وجه وملامحه ما مبينه كان هم لابس ملابس عسكريه وكان جسمه بي اصابات
وحده من رجله مقطوعه احمد باوع عليه
كام شال الطفل وخله بيده وضل يباوعلي
ويباوع على الطفل اخر شي مسح على راسه
واخذ ابويه وراح واني كمت وراهم بس بسرعه اختفو من كدامي بقه هذا الي شايل ابني اجيت اريد اخذ ابني من عنده
+
هنا حسيت على صوت وحده تكعدني سولاف سولاف
فتحت عيني مفزوعه وين ابني كالت ماما
لاتخافين ابنج بخير بس خوفتيني صار ساعه انتي فاقده كتلهه وين ابني هو بي شي
كالت ارتاحي ما بي شي الحمدالله صحته كلش زينه انتي بس ارتاحي وبعدين اجيبه اللج
+
راحت جابتلي اكل كالت
اكلي حتى يصير بيج حيل لان انتي نزفتي
هواي تشكرت من عدهه كالت يمه اني سويت هذا الله راح اخليج يمي الصبح وراهه اخذي
ابنج وروحي هاي مسوؤليه واني مره ماعندي احد كتلهه خاله وراس ابني الي هسه ولدته وحتى بعدني ماشايفته اني متزوجه وابني
ابن حلال كالت لعد ليش ماكو احد وياج بس انتي وهاي الابنيه وياكم ولد زغير كتلهه خاله
هذوله اختي واخويه وعندي بعد اثنين احنه ايتام الاب ولام واني عمامي زوجوني بفصل عشائري وبس عقد سيد وزوجي استشهد
من بعدهه اكتشفت اني حامل وهذا كل الي
صار كالت الله يساعدج بنتي واعذريني واني راح اساعدج اني اعرف جماعه بالمستشفى وراح اخليهم يسولج اوراق الطفل وسجلي باسم ابوج حتى طلعيله جنسيه
+
تشكرت من عدهه وجابتلي ابني خليته بحضني واني اتذكر الحلم يمه ابني بس لا يصيره شي لاربي دخيلك
+
اخذت ابني ورجعت البيت والحمد لله كمت بسلامه وابني سميته (سند)
والمراه صدك ما قصرت
وسويت اوراق ابني وسجلته باسم ابوية
+
بديت حياة جديده مع سند واخواني
+
((مرت السنين ))
كبر اخوي كافل وصار شاب قررت انتقل لبيت غير هذا
تقدمولي هوايه للزواج رفضت توبه بعد
اختي رهف تزوجت ولد بالجامعه وسافرت
وياه خارج العراق تخلص دراسات عليا
واختي رفل تزوجت ابن جيرانه وهاي الثانيه
هم شافت حياتهه وراحت الشمال وي اهل زوجها
+
اما اخوي خلص دراسته ودخل كليه عسكرية وقرر يتزوج ما وكفت بطريقه بالعكس شجعته
وانطيته واحد من البيوت الي اجرتهن وطلعت لذهب الدفنته سابقا من جنت صغيره
ونطيته اله وخليته عيش حياته مثل مايريد.!
+
اني بقيت وي سند كل يوم انتظره يكبر و يصيرلي صدك سند
+
اما أيلاف اااخ يا أيلاف ….
+
يتبع..
+
انتضروني بالبارت الاخيير مع احداث غير متوقعه
وشخصيات جديده
+
