رواية حب صباي الفصل العاشر 10 والاخير بقلم مرج البحر

تِلْكَ العيونُ قصائِدٌ لوْ تُرجِمَتْ ؛

لمْ يبقى عندَ القائِلينَ كلامُ…..

باهره. : درت عليه شفته لابس زيتوني ايجنن عليه وماكبرن جماله خارق يموت

راحن البنات واني اتبسمرت بمكاني معد اكدر اتحرك شفتهن وكفن يمه وحجن وياه بعدين بوسهن من راسهن والتفت الظاهر اشرن عليا وجوا كلهم بس اتمنئ اضمه بحضني مايهمني الناس بس استحيت من البنات وسلمنا عل بعض ومشينا سوئ يحجي مع البنات وفرحان كال

زاهد : تدرن بنات لو الحظ محالفني واخذت حب حياتي كان انتن هسه بناتي وكان هسه احنه عائله سعيده وكان هسه هاي طلعتنه عائليه وكانت اجواء مليئه بالحب والسعادة

باهره.: اني دائما ااخر بخطواتي حتئ اشبع اعيوني بطوله بجماله والله متت ياناس لاتلومني والتفت عليا

زاهد: ليش امشي ويانا تعالي يمي

باهره : وخلئ ايده عل كتفي بصراحه ذبت بلمست ايده وفتنا عل محل اشترئ فساتين للبنات وراد مني كلت شوفتك احلئ هديه وبعث بوسه بلهوئ بدون مايشوفن البنات متت من الخجل بس طرت بالجو من السعاده وبقينا اكثر من ساعتين لان لازم يرجع لكركوك وسلمنا عل بعض بوس البنات واخذ ايدي اسلمنا كال

زاهد: ان شالله ايصير عندي شغل واجي هم اشوفج

باهره: من مشئ اخذ روحي وياه واني ظليت اباوع وهو يلتفت وشمرلي بوسه بالهوئ

ومشت ايامي بسعاده بعد ضهور زاهد ونسيت كل همومي مجرد اتصال كفيل ينسيني تعب اليوم ويرجعني صبيه بعمر 20 سنه الى يوم واتصل عليه وكال

زاهد : باهره خلي انخفف من التصالات زوجتي حست وسوت مشاكل وعافت البيت وراحت لااهلها

باهره : اني مااريد اخرب بيتك اي وقت اتريد تتصل تعرف اوقاتي بالمدرسه وتعرف كلشي عني هي هم حقها لو اني بمكانها اسوي اكثر

زاهد: باهره لاتزعلين والله انتي حبج بكلبي جبير

باهره: عمري مازعلت منك سويت الاكثر ومازعلت

زاهد: لسه مانسيتي

باهره.: مانسيت اي لحظه عشتها وياك بحلوها ومرها عادي زاهد اي وقت اتريد تتصل حتئ لو بسنه مره تكفيني اعيش العمر كله مرتاحه

راح زاهد ورجع خيم عليه الحزن من جديد

مستحيل فرحتي تكمل ورجعت عل نفس حياتي عاديه يتصل بشهر مرتين ويطمن عليا وزوجي يوميا مع وحده علاقات وحبجيات بس صدكوني مااهتم لان ماله بكلبي شي بس مع احترامي للنساء الطيبات صديقاته كلهن استغلاليات بس ايقشمرن بي يعني الفلس اليمسك له وبس بس اني جنت مرزقه الحمدلله الكادر المدرسه مايخلوني احتاج اي شي ومره رحت للموصل عندي مراجعه عد دكتوره وجنت بسوق النبي يونس دك موبايلي وفرحت من شفت اسمه وجاوبت وسلام وكلام كال

زاهد: وين انتي

باهره: بالموصل بسوق النبي

زاهد.: اني هم

باهره.: ياربي اشلون صدفه حلوه والتقينا وتمشيني سوه كال

زاهد: والله لخاطر اولادي متحمل زوجتي

باهره: لاتقدم اعذار والله مو زعلانه يكفيني اعرفك بخير هذا يكفيني زاهد اني مو انانيه احبك صدك بس مااهجم بيتك

وودعنا بعض وكانت اخر مره اشوفه

وخلصت ايامنه اني و زاهد وكلمن شق طريقه

.

.

.

.

.

.

.

ومره جنت عل النيت وشفت حساب لاابن اخوه طبعا ابن بسام الاكبر من زاهد وراسلته وحجيت معاها وسالني كلت جنت حبيبة عمك فراس الله يرحمه وحبيت اسال عليكم كال

بيج الخير والله وفيه

باهره: ماردت اجيب طاري زاهد حرص عليه وعل عائلته

وكال عادي اظل اتصل عليج

باهره: اي عادي ثاني يوم اتصل طبعا اسمه احمد كال

احمد: انتي كلتي جنت جيران اجدادك وكلتي حبيبة فراس عمي الله يرحمه

باهره: اي

احمد.: بس ابويه ايكول جيرانا حبيبة زاهد مو فراس وابويه ايريد يحجي وياج

باهره: اتخربطت لايكشفني بس ماكدرت ارفض ومن حجيت مع بسام عرفني كال

بسام: هذا صوت باهره اعرفه زين بس والله بنت اصل تسالنين علينا

باهره: اي والله احبكم واعزكم وحبيت اتصل واطمىن عليكم وعزمني عل البيت من اروح للموصل بس كلت اذا صار مجال اجيكم وانتهت المحادثه بس احمد ابن بسام ايظل يحجي معاي ويطمني ومره كلته اريد اسمع صوت زاهد كال

احمد.: ظلي معاي ولاتحجين

باهره: اكيد مااحجي واتصل اويلي متت من صوت كال زاهد

زاهد: احمد احد ويانا

احمد: لا عمو ماكو احد

زاهد.: احس بنفس ويانا

احمد: لاعمو متوهم

باهره: واني بس ادموعي تنزل وسد زاهد الخ وظلينا اني واحمد من سمع صوتي

احمد: شنو من كلب عندج شايل كل هل الحب

باهره: حب صباي حب الجهل العشق الي ملك كلبي وروحي ويظل الي مااموت

احمد : خاله اني مثل ابنج تسمعين مني اذا احاجيج

باهره : اي ابني كول

احمد : خاله انتي جاي تعذبين نفسج على خالي

اول شي انتي وعمو زاهد عمركم مو زغير زوجتو ولدكم وثاني شي انتي على ذمه زوج وثالث شي هذا الي تسوينه ما وره بس المشاكل عمو زاهد جاي تصير مشاكل بينه وبين زوجته وكلهه مالهه داعي عذرا من كلامي بس لو تبتعدين وتنسين يكون افضل

باهره: شسوي بكلبي الي مايكدر ينسئ ويتوب

بس هاي هيه خلص اني راح اتركه براحته

وانهيت الاتصال وكلبي مليان حسره اني وزاهد تركنه بعض بس عندي امل بان يجي اليوم الي يجمعني بي من جديد بالاخص بعد ما كالي لو يبقه يوم بعمري اذا تركج زوجج او يموت اخذج

.

فيا ليتَ مَن أهوى يَرى ما أعاني

فَقد صِرتُ في بحرِ الهوى لا أَهيمُ

أُصارعُ أمواجَ الحنينِ وَحدي

وفي كُلِّ يومٍ يَزدادُ جُرحي الأليمُ

تَكالَبَت الأحزانُ حَولي كَجيشٍ

وَما عادَ لي بَعدَ الحبيبِ نَسيمُ

فيا لَيتَ قلباً يُدركُ ما في فؤادي

وَيعلمُ أنَّ البُعدَ داءٌ وخيمُ

.

.

.

.

.

.

.

.

مشت الايام

طلع ابني مصطفى من السجن وماخلوه ايظل باربيل لان فيشوه واحنا قررنا نرجع للموصل وانطيت خبر لمدرستي باني راح اترك حتئ يشوفون موظفه امبدالي وجانت صعبه عل الكل لان عشت 4 سنوات وياهم بكل تفصيل الحب والاحترام وجان المدير ايكول ام مصطفى هذا مدرستج اي وقت تريدين ترجعين مكانج محفوظ بالمدرسه وبگلوبنا ومن سمعو الطلاب كل اشويه يجون عليا عل المطبخ ويحنضوني ويترسلون بيا مااروح ايكول احنا اولادج ونحبج واتعلمنا عل وجهج بالمدرسه واني بس ابجي حبهم الي ماينوصف والكادر والمعلمين يكولون اتتي شيخة المدرسه والله مانريدج اتعوفينا واني فعلا مااريد اترك المدرسه بس مجبور ه ارجع بيوم الخميس جان اخر يوم الي بالمدرسه وصاحني المدير وانطاني 5 اوراق كال ام مصطفى مايسون بس هديه بسيطه لكشي قدميته لمدرسه والكادر والطلاب الي الكل يحبونج صعبه افراكج بس هذه حياتج وماانقدر نتدخل بيها بس اي وقت تحتاجينا احنا موجودين وننتظرج وقبل اخر درس كاعده بالمطبخ ابجي لان وسوو حفله توديع وجو الطلاب اخذوني للساحه المدرسه كلها وياريت ماطلعت عل الساحه جانت ادموع الطلاب قبل المعلمات موقف صعبه وجايبين كيكه واسمي عليها لاافضل انسانه قدمت خدمات باخلاص وبجيت وصورونا مع الكادر والطلاب الي ادموعهم مابطلت والهداياي من المعلمات والطلاب وطلعت من المدرسه مكسور كلبي بس شسوي هذه الحياة مااتدوملي الفرحه ورجعت عل البيت وحجيت لبناتي وابجي عل توديعهم الي وانتهت قصتي باربيل……

.

.

.

.

.

.

وثاني يوم مشينا للموصل ومخلي ذكريات جميله وسعيده

وصانا الموصل والتقيت باامي واخواتي فرحن لان رجعت و البنات لكو شغل بالموصل وعبد الرحمن والحمدلله العيشه زينه بس الي ماتغير طبع مصطفى وابوه الي عديمين المسؤاليه وجنت كل فتره اتردد اشوف امي واحس زوجته ابويه ملكاها عين وخد بس ماتهمني طبعا زياراتي قصير لااهلي اروح الصبح ارجع العصر وجنت اشوف اهتمام زوجته ابويه اهتمامها باقربها اكثر منا واني من طبعي مااحجي واتمرضت من الم ظهري وارجع الدكاتر وبقيت شهر نايمه بالفراش وبناتي مهتمات بيا ايجبون رواتبهن هن وعبدالرحمن ايخلون بيدي لان ابوهم مو مال مسواليه جان يحجي ويزعل ويكول بس امكم اني ماابوكم ايكولون يابه امي تعبت اكثر منك وصرت زينه الحمدلله اولادي دائما يزروع الفرحه عل وجهي كل مايصير عيد ميلادي يحتفلون بمكان حلو وطفون الشموع ماقصرو وياي هما عوضني بالدنيا وتيسير بالخارج يبعث كل شهر مبلغ مالي حتئ مااحتاج اما مصطفى اكل ونوم ماعند اي احساس

ومرت وكعت امي وانكسر المفصل ورادو عمليه انسويها وفعلا كلفت العمليه 2 مليون مع العلم العشيره كلها فزعت لاامي لان ماعدها ولد بس الها حقوق من راتب ابوي ولاسف اخواني من ابويه ياكلون حقها لان امهم حقيره وماتحب بس نفسها واولادها جانو خواتي يوميا وحده تجي عند امي بس اني مايخلوني لان عندي انزلاق ومااكدر اشيلها بس بنتي رفيف تروح يمي امي وتظل شهر حتئ اتعافت امي وكامت تمشي بفضل الله بيوم سمعت رفيف مرت ابويه تحجي مع بنتها اتكول مايخذنها بناتها عدهن وحجتلي رفيف وزعلت منهم امي قدمت كل حياتها بهذا البيت هسه صارت ثقيله عليهم واتصلت عل امي كلت تعالي عندي يوم اني بنتج وعندي بناتي يخدمنج بعيونهن وانقطعت من بيت ابويه بس الي انقهرت منه اخواني كلنا نحبهم وماانخلي خاطرهم وهسه يسمعون كلام امهم عل الغلط وفعلا امي كامت تطلع كل عشر ايام اتروح عل وحده من بناتها ونفرح بجيتها وانشالله مانقصر وياها للموت بعد عمر طويل وهسه حياتي مستقره مع عائلتي ومرتاحه بعد معرف شنو مغبي الي القدر و حب زاهد لا زال في قلبي

وهيج انتهت قصتي اتمنئ ان تعجبكم والحمدلله مرت عليا اسنين الم وحزن مع فرح اتمنئ من الله اشوف اولادي باحسن حال وانتظر عوده تيسير بفارغ الصبر لان صبري عد يقل ومااعرف اي لحظه اموت ومااشوفه الكم كل الاحترام وشكرا للغاليه مرج البحر لستماعها لقصتي تحياتي