رواية بين غمد السيوف الفصل السادس 6 بقلم زهراء السلامي

روايات ميكسآخر تحديث: 2026-07-07

رواية بين غمد السيوف الفصل السادس 6 بقلم زهراء السلامي

وداعت عيونج الاعزها
يومية اكتبلج رسالة وما ادزها..

━━━━━━ ⚔︎ ━━━━━━

“رزاق”
بلحظات الدنيا انكلبت والنار وجت بكل مكان، عفت بشير وواثق يرحون للنسوان واجيت يم الولد مكابلين سيف مانعرف شنسوي، سـعد يهدي بـ بلال المنتهي وچــفل ما يرضى يوخر شابكه على گلبه ويصيح و عـبد يتعارك ويانه يريد بس يشيله ياخذه لمكان هادئ..

-عـبد: تسودنتووو هدوا الزلمة لا يموت

ضرب چــفل من صدره يوخره من سيف وصاح بـ بلال يعاونه يشيلوه، عاونتهم وركضنا بي لغرفة عـبد طببناه جوه وحطيناه على الفراش بالكاع..

-عـبد: قوي گلبك بلال قوي گلبك شبييك كوم جيبله ماي

ظل بس يبجي على اخوه ما يكدر حتى يكوم من مكانه، كام سـعد جاب كلاص ماي واخذه عـبد وصار يغسل بوجه سيف وبده الباقي فوك راسه بس سيف ماكو لا حس ولا نفس يطلع منه هلكنا من الخوف..

-چــفل: ما جاي يكعد ولك ماا يكعدد شسووي

-رزاق: يحتاج طبيب لازم ناخذه للمستشفى

وافقني الرأي عـبد وكام ركض على الكروسة يحضرها، عفت الولد وطلعت وراه ندور على الكروسة وعلى شجاع ثنينهم ماكو..

-عـبد: الا الجان احتركت والفرس انهزمت شوفلنا غيرها

ركضت على بيت واثق جبت مالتهم ورجعت لـ عـبد حطيتها بالباب وصحت بيهم يطلعوه، تكابلوه عليه الولد شالوه واجوني بعدنا ما حطيناه بالعربانة واللتفتنا على صوت صياح وبجي نسوان، بنين وفضة وجليلة و وسام كاض بنين حيل ويصيحون متخبلين على اخوهم..

-فضة: شبيي اخوية شبييي يمة سيييف

**

“فضة”
شكد حاولت اسيطر عليهن اكعدهن بالبيت ماكدرت، وره الصوت القوي الرج شبابيج البيت نزلت بنين من فوك هي ورجب مخطوف لونهن ويصيحن..

-وجت النار بالولد وجت النار بالولد

طلعت باجي فوزية من غرفة شروق متخبلة والنسوان البقن هنا كلهن تسودنن، كلبي وكف من سمعت صوت صياح الولد جاي من وره البيت وريحة دخان ترست الدنيا..

-فضة: واثق

ركضنلي فاتنة وفرح يبجن شبكتهن وماعرف شسوي كلبي تعلك ويه صوته اميز صوته من بين الكل اعرف صوت اخوي واسمع ولد وياه يصيحون بأسم سيف.. جليلة وبنين سمعن بأسم سيف تخبلن ركضن يطلعن من البيت بلا عبايات وبفساتينهن..

عفت فرح وفاتنة يم انيسة ولبست عباية لكيتها مشمورة وركضت وراهن، تلاكينه ويه بشير وواثق بالباب يصيحون خلي النسوان كلهن يطلعن من البيت النار وجت بظهر البيت..

زبكن البنات من جواهم وهمه من الخبصة ما انتبهوا حاروا يطلعون بالنسوان ويصيحون على الفاهيات الكاعدات ياكلن، غافلتهم وطلعت وراهن عفت بنين تركض لاخوها ولزمت جليلة من ايدها حيل اوكفها..

-فضة: وين رايحة بهالحال انتِ وييين

-جليلة: هدينيي فضة هديني سيف

-ولج يا سييف تخبلتي جليلة تردين تفضحين روحج

فلتت روحها من ايدي وركضت تلحك ببنين ما مهتمة، غشيت وجهي ورحت وراهن طبن بنص الزلم يتلفتن يدورن عليه وبنين منهارة تبجي بجي مخابيل، شافنا وسام من بعيد واجه يركض عيونه صايرات حمر..

-وسام: شمطلعج بهالحاااال شمطلعججج

-بنين: سيف وين وسام عليك الله جاوبني اخوية وين شبيي

-وسام: امشي وياي امشي فضحتينننه

ضمها بجسمه ضم واندار علينا اني وجليلة يخزر بينه، رحت لجليلة ضميتها وياي بالعباية استرها ولحگناهم، امشي وجليلة ترجف بيدي وتبجي بصوت عالي خلت الما شافنا ينتبه علينا صرنا فرجة..

اخذنا لجهة غرف الطين يم بيت عمو مكي و وسام كضاهه يمشي ويهدد بينا اذا طلع صوتنا يطيح حظنا، بعدنا ما وصلنا وشفنا رزاق جايب وياه كروسه وانفتحت باب غرفة الطين وطلعو منها سيف شايليه لا ايد تتحرك منه ولا رجل..

بنين تخبلت على اخوها ووسام هم تسودن من شوفته بهالحال ركضوا وراهم وجليلة بعد رجليها ما حملتها وكعت على ركباتها بالكاع تباوعله وتبجي بحركة، بجيت ماعرف شسوي وكعدت يمها اتوسل بيها تسكت..

-فضة: جليلة فدوة رحتلج كافي لا تفضحين روحج بيناتهم ابوس ايدج كافي

اجر بيدها وهي منتهية ماعرف شلون اسكتها وجهها غرگ بدموعها وعيونها وخدودها صارن دم، اباوعلهم حطوا سيف بالكروسة ورتبوا نومته يردون يرحون وياه سـعد وبلال وچــفل والباقين يبقون هنا لان ما تكفيهم..

-بنين: اخذوني وياه وسام لا تخليني هنا

-وسام: كافي يابة هسة يرجعون مابي شي شبيچ يمعودة

يحجي وهو ما مقتنع بكلامه حابس الدموع بعيونه وبيده بنين مغطيها ضامها لجسمه وسادها من عيون الولد وهي دكت رجل الا تروح وما سكتت الا من صاح بيها چــفل وعيط علينا احنه هم حتى نرجع للبيت..

ما حجى شي وسام واخذ بنين وخزرني يأشرلي براسه حتى اجيب جليلة واجي وراهم، سويت مثلما يكول واسحل بجليلة متتحرك خبلتني رجليها نابتة بالكاع وعيونها على الكروسه الجاي تبتعد عنه..

-فضة: والله اكتلج هنا جليلة والله احطج واكتلج امشي

شلعت كلبي ياله مشت ورجعنا للبيت مو من جهة الزلم فرنه فره شكبرها وويه الحايط نمشي لا ننشاف، وصلنا وشفنا النسوان كلهن بباب حوشهم واكفات وقسم منهن بالشارع وباجي فوزية تفتر بيناتهن وتصيح..

-مِــسچ وينها مِــسچ يمة بنيني مِــسچ وينج ولج يمة وينججج

تصيح بعلو صوتها واللتمن عليها النسوان وهي تدفع بيهن وتدور بالوجوه ومـودة لازمة بطنها وتفتر وياهة وترجف على اختها، عفت جليلة وركضتلها كلبي وجعني خفت صاير بيها شي ومحد حاس..

-عمة نرجس: فوزية صلي على محمد هسة نلكاهة وين تروح

-فوزية: مِــسچ يمممة جاوبيني يبعد امج يمة بنيتي ولج وينج يمة

-مـودة: وينج فضة وين مِــسچ وين البنات ما شفتيهن؟؟ كحلاء بنين وين؟

اللتفتت على جهة بنين وين وكفت ما لكيتها بس جليلة كاعدة بالكاع وصافنة بالفراغ، على صوت الصياح طلعت انيسة من بيت اهل بنين ركضن كلهن عليها يسألن عن مِــسك وكحلاء وباقي البنات وطمنتنا من كالت..

-انيسة: مِــسك راحت ويه شجاع يوصلون كحلاء لبيتها وباقي البنات كلهن بخير هاي كاعدات هنا يم مرة خالي

هدأت باجي فوزية وارتاحت مـودة وكدرن يجرن نفس، عمة نرجس صاحت بالنسوان الواكفات بالشارع يطبن قسم لبيت اهل بنين والقسم الثاني لبيتنا واكو راحن ويه انيسة لبيتها.. اخذت جليلة وخواتي وياي وطبيت لبيتنا وبوجهي لغرفتي كعدتها وقفلت الباب وراي..

-فضة: جليلة كافي فدوة اروح لدموعج كافي لا ننفضح عمة نرجس وامج اجن ويانه

ولا كأن تسمعني ذبلانة وملخت روحها بالبجي، كعدت على ركباتي كبالها ولزمت وجهها امسح بعيونها وخدودها واحجي وياهة على كيفي..

-سيف مابي شي والله مابي لا تسوين هيج بروحج اموتج والله

زادت بالبواجي وصوتها اعتلى صميت حلكها بيدي وهمست ارجف من اندكت باب الغرفة علينا..

-لازم اطلع للنسوان جليلة عليج الله ابقي هنا ولا تتحركين لا تخلين وحدة تشوفج بهالحال تره تسويلنا قصة الها اول مالها تالي

عفتها وكمت فتحت الباب ورجعت طبكتها وراي، شفت نسوان واكفات بالحوش وبيدهن عبيهن يردن حمام دليتهن ورحت اتأكد على البيت لا يكون لايحته النار..

طلعت للترك واشوف الحايط كله صخام مبين لاحته نار بس مطفيها لان ريحة الدخان تخنك، رفعت راسي اباوع للسما شلون متغير لونها وضباب الدخان مغطي صفائها والنار لحد هاللحظة واجة جاي اشوف لهيبها منا وصياح الولد وهمه يطفون يكزبر الجلد..

-عمة نرجس: ماما فضة انتِ هنا

-اي عمة هاي اجيت

طبيت جوه وقفلت البيبان والشبابيج عدل ورحتلها واكفة بالحوش تمسح بدموعها ويرجعن ينزلن وكفت كلبي..

-عمة نرجس: رايحة لبيت مجتبى سوسن متخربطة والبنات حايرات بيها

-فضة: وصلكم خبر على سيف؟

-عمة نرجس: لا والله بس امه راح تموت وراه من سمعت سيف وكع لحد هسة هي ما صحت غايبة عن الوعي

-روحيلهم عمة روحي لا تخليهن محتارات واذا هاي شوية والحكج اني

-لا يمة انتِ ابقي ويه النسوان اليمج فشلة مو عرس صار علينا ضيم

-عرس الاكشر

هزت راسها متقبل هيج احجي وعافتني وطلعت من الحوش، رحت اكعد بالهول يم النسوان خطية هم محتارات ويردن يرجعن لبيوتهن بس زلمهن حايرين بالنار ويه ولدنا وقسم منهن من اهل باجي فوزية..

-ام جليلة: فضة وين جليلة راحت

-بغرفتي نامت شوية صدرها تحسس من الدخان

عوجت حلكها ما عاجبها وطبت فرح للهول بيدها صينية كلاصات مي وافترت عليهن توزعلهن ورجعت طلعت تجيب بعد وفاتنة كاعدة خاتلة بالزاوية تزرزر بعيونها على النسوان مستغربة..

-فضة: فاتنة تعاي يمة

اجتني تركض حضنتها على كلبي وترخصت من النسوان وطلعت بيها لغرفتي يم جليلة فتحت الباب لكيتها كاعدة يم الشباج صافنة وعيونها تجري..

نيمت فاتنة على الفراش ورحت اكعد يمها، لزمت ايدها بين ايدي وهمست..

-فضة: شلون صرتي جليلتي

-جليلة: راح اموت

صوتها مبحوح وكوة طلعت منها هالكلمتين، نزلت دموعي على حالها ومحتارة شلون اواسيها سيف صح ابن عمي وخوش رجال وادعيله يكوم بالسلامة بس شوفة جليلة بهالحال خلتني انذر بگلبي اذا سيف رجع لامه واخوته اسوي سفرة لام البنين وشرط جليلة توديله الاكل بيدها..

-فضة: امج ظل بالها عليج كلتلها تخربطتي ونمتي كافي يا حبيبتي لخاطر يمامة كافي من طبينه لهسه تسأل فرح عليج

غمضت عيونها ونزلن باقي دموعها، تقربت من يمي حطت راسها على رجلي وسكتت فترة طويلة ياله كالت بصوت كوة اسمعه..

-اموت روحي لو صارله شي فضة

-اشش ميصيرله شي ان شاء الله انتِ بس لا تفاوليله

-كلبي يوجعني ادعيله فضة انتِ خوش بنية ادعي كون من عمري على عمره

سديت حلكها بيدي اسكتها وحسيت بدموعها صارن على ايدي، سكنت بعد وما حجت شي لحدما غفت على رجلي وخرتها انيمها على الفراش الكاعدة عليه على كيفي وطلعت اشوف النسوان..

**

“مِــسك”
اعيد بالرسالة والحروف تضيع مني عيوني غوشت غمضت اعصرها وطاحن دموعي، مسحت وجهي ارجف كلني ورجعت اقرا بالكلمات اخاف فاتني شي اخاف عيوني غدرتني وما قرت زين.. تلفتت بالبيت عاجزة ماعرف شسوي ياربي شسوي..

رجعت ضميت الورقة بردن العباية وطلعت من الحوش لكيت شجاع يفتر قريب باب البيت، نزلت البوشية على وجهي وركضتله ملهوفة..

-شجاع وينك شجاع

-ها بوية ها خاتونه شبيچ

صعدت الكروسة بسرعة وهو كعد بمكانه، اللتفتلي يسمع شنو اريد احجي واني اريد الحجاية تطلع من حلكي ماكدر صوتي يرجف وكلمة تطلع وكلمة تنبلع عندي، ذبيت نفس امسح على وجهي من جوه البوشية وهدأت روحي حتى يسمعني زين..

-شجاع كحلاء مو بخير كحلاء صاير وياهة شي

-يا ساتر! شصاير؟ وينها هي جوه؟

-اخذني الها اخذني خليني اشوفها بسرعة

-وين اخذج البنية وين مِــسك!

-طلعت.. مادري طلعت لكيتها كاتبتلي رسالة غريبة امشي نلحك عليها

-شو وينها الرسالة انطيني اقراها خاف انتِ مفتهمة غلط

-مو غلط مو غلططط اخذني

-صووتج لا تصيحين بس فهميني وين اخذج بهالليل؟؟ وين اهجول بيج!

-لطريق تجمع المسافرين اخذني

-شتسوي كحلاء ويه المسافرين!!

-امشينا شجاع فدوة اروحلك بعدين اشرحلك

ماهتملي ولسع ظهر الفرس حتى يلوف ويرجع على جهة بيتنا، مديت ايدي حيل وزحت البرده الكدامي حتى اشوفه عدل ونترت محترك كلبي..

-شجاع والعباس ابو فاضل اذا ما لحكتني بكحلاء عمري وحياتي ما اعاين بوجهك بعد

-مِــسك لا تسودنيني من كل عقلج انتِ؟؟ بله صار قدر بالطريق واهلج افتهموا ترحين بين الرجلين والله

-معليك بيه اني اتحمل نتيجة افعالي وصدگني وغلاوتك عندي لو شنو يصير ما انطي بيك ولا احجي عليك بشي واوكفلك كدام اهلي وما اخلي احد يضرك

-ولج هي على هاي!! خلينه نرجع نبلغ اخوتج وهمه يتصرفون لو خليني اني اروحلج وحدي وين ما تردين واجيبلج كحلاء وام كحلاء هم

-عمو بداعتي عندك بداعة شيخ مكي وخوتكم اخذني ابوس ايدك وأي شي يصير اني اوكفلك واني اگلهم شجاع ماله علاقة والله

متت واني اتوسل بي وهو كضاهة عليه راح نتورط وراح يطيح حظنا وراح يسودنه ابوج ويطردنا من البيت ويزاعلني وبعد ما يباوع لوجهي، بجيت ودرت وجهي منه من شافني طنكرت تحسر ضايج كلش وضرب على الفرس حتى تمشي كدام، حطيت ايدي على كلبي يدك حييل ومن كدما سريعة دكته احسه راح يگمز من صدري..

-شجاع: شلون ورطة هااي شلون ورطة

اسمعله ساكتة وبس ادعي يارب اللحگها يارب لا تفجعني ببت عمتي وصديقة عمري يارب كحلاء تكون بخير واللحگ ارجعها وما تسوي شي يأذيها او يأذي سمعتها وتدمر نفسها يارب انتَ الساتر للعيوب استرني واسترها بسترك..

حاولت اهدأ نفسي ومسحت على وجهي جوه البوشية، زفرت نفس على كيفي وغمضت عيوني اهدأ من نفسي، گلبي شوية ارتاح من تخيلت اللكاهة مستحيل تلحك تنهزم بهالسرعة..

ظهر مستقيم وهامة قائمة، ملامح مغطاة بمنديل اسود ساترة، متسللة منه عيون كحيلة قاهرة لتظهر من شقان صغيران متذمرة، اللتفاتة فـ تنهيدة فـ رجفة مجازفة.. مجازفة اشبه بـ امرأة دخلت قصر السلطان وبحوزتها صُرة من الذهب العثماني المسروق..

ذهن شارد بضياع واصابع رفيعة ناعمة تلاعب خواتم الذهب المرصعة بالاحجار الكريمة المزينة يدها.. صوت صليل الحوافر التي تدق الارض بقوة هو الذي جذب انتباهها وأخرجها من زعزعة افكارها المجنونة..

-شجاع: ااخ خاتون راح تلفيلي مشكلة الها اول مالها تالي

لطمت رجلي ضايجة من نگه، تعبت من النقاش تعبت واني اعيدله نفس الحچي اذا صار عليه شي اني راح افزعله واوگف وياه وما اسمح لاحد يضره بعد على شنو خايف!..

-شجاع: ساكتة مو؟ ساكتة طبعاً تسكتين ماعندج رد!

-شجاع! جاي اگلك اني وياك شبيك متفهمني

-شجاع: نفس الحجي ينعاد ماكو شي جديد انه ادري نهاية شجاع شنو بعد شكو متعب روحي

رغم خوفي ووضعي الصعب بس ضحكت كوة على روحي ورفعت البوشية من وجهي اراقب حركاته وشلون يحرك براسه مأيس مني، ذبيت نفس جزعانة من هالرجال شكد متشائم ومتردد حتى لو ما راد يصير شي راح يصير من گدما فاوللنا..

-شجاع: نزلي البوشي على وجهج بساع هاي نقطة

سويت مثلما يكول وهو مد ايده يسد ستارة الكروسة حتى محد يشوفني من العسكر، ضرب بسوطه ظهر الفرس خلاه يستعجل حتى ننهزم من التفتيش وما نجيبلنا مصيبة بس للاسف استوقفنا صوت ضابط صاح بلغتنا العربية..

خفف شجاع من سرعة الحصان لحدما وگف ووگف وياه العربة، غمضت عيوني مهبوط گلبي وهمست بداخلي “يارب سهلها” وبقيت كاعدة بمكاني بدون لا افتح البرده المغطيتني وابيّن نفسي گدامهم..

-شجاع: انه عبد مأمور وخاتونتي كاعدة جوه اعذرني سيدي

-افتح الستارا

-شجاع: ماكدر والله الكاعدة جوه بنت باشا واذا عرف ابوها انكشف على بنيته يگص رگبتي ويشمر جثتي بالنهر

مركزة ويه صوت العسكري الحقير وحِس شجاع الراح ينجلط من الخوف عليَّ.. نزيت شاهكة على صوت سوط جلد ضرب الكاع كـ تهديد النه، عرفت ما راح يخلونه بحالنه فـ بدون تردد لزمت طرف البرده وفتحتها ظاهرة نفسي بدون لا ارفع البوشية من وجهي..

-مِــسك: نعم؟

گلتهه بصوت مسموع حاولت شگدما اكدر اخشنه حتى ميكدرون يعرفون اني شابة، حطيت عيني بعين العسكري ويه ما گال بلغة عربية مكسرة..

-العسكري: سيدي باشا يقول رفعي الخمار من وجه انتِ

-شجاع: بس ما يصير!

-العسكري: انتَ اصمت

رفع سلاحه بوجه شجاع يهدده وگبت هوسة مادري منين مصدرها، خفت لا يكون فيلق جاي فـ بسرعة رفعت البوشية بس الحظ والبخت سواها ولمحت واحد من الضباط الجنرالات محاوط بموكب من الحرس الخاص جاي يتقرب علينا وشافوني! نزلت البوشية على وجهي اللوب سودة بوجهي شافوني!!..

-مِــسك: اطلع شجاع اطلع!

-شجاع: كملتوا تفتيش يا افندي؟ نكدر نروح مو؟ ابوها منتظر رجعتها!

-العسكري: فتحي عباية انتِ

-مِــسك: لا تتجاوز حدودك!

زمخت بي ارجف اريد بس نطلع لا احد يعرفني واروح بين الرجلين، على اثر وگفتنا والجو المتكهرب بيناتنا سحب العسكري اقسام من سلاحه يريد يضرب بي شجاع بس ما لحگ بسبب صوت الجنرال العالي وهو يصيح..

-شنو الموضوع؟

تفاجأت من سمعت لكنته يحجي عراقي بدون تأتأه او تلكئ بس ما خليت مفاجأتي تطول ورجعت وره اخلي شجاع يكمل تفاهم وياهم، كاعدة واللوم بروحي واعض بأصابع الندم كله من وراج كله بسببج يا غبية! شلون امنتي ورحتي وياه! شلون انهزمتي ويه زلمة اجنبي غريب وخليتينا وخليتي اهلچ بهالوضع!!

-شجاع: خاتون انهزمي.. انهزمي..

طلعني من ندامتي ولومي لروحي صوت شجاع وهو يهمسلي بخفوت اكثر من مرة “انهزمي” ولك وين اروح وين انطي وجهي والعسكر حاوطنا من كل جهة؟ شلون انهزم والجنرال ما وگعت عيونه مني؟ شلون انهزم وحاط ايده على خصره يتلمس مسدسه!!

-شجاع: انهزمي ولج انهزمي راح ياااخذوووچ

متت بدمي وبدون تفكير كمت من مكاني وكمزت اطلع من الكروسه اشرد وفزيت من رمى جندي جوه رجلي، عطت ميتة خوف من جنديين تقربوا مني وقبل لا يوصلون شجاع ركضلي وجرني وره ظهره حيل وعوج ايده يشبكني بأيده الثنين بشكل عكسي..

-شجاع: محد يتقرب منها والله احرگها واحرگ روحي وما تجيسوها

عصب عسكري وضرب شجاع بطرف سلاحه على راسه حيل خلاه يكض راسه يصيح من الوجع، گلبي وكع لزمت بقميصه بكل حيلي اريد اسنده يوكف عدل وما جاي يكدر داخ وطاح على ركباته الثنين وراسه بأيده..

-مِــسك: شجاع كوم سودة بوجهي كله من وراي شجاع شو باوعلي بس باوعلي عليك الله

لزم بأصابعي بقوة يعصرهن بيده يطمني هو زين بس ما قبلوا اظل يمه اجاني عسكري يأشرلي اروح اوكف على صفحة، تبسمرت بمكاني اتلفت على الجنود الباقين والجنرال الواكف على بُعد مني ماعرف هذا جنرال لو ضابط عادي ما اعرف لرتبهم..

-مِــسك: ماروح لمكان بدونه ماتحرك.. ماتحرك وخر عنيي

صرخت بكل صوتي من لزمني جندي من زندي يريد يسحبني وتراجع بساع من صاح بي واحد يوخر مني، مهبوط كلبي وعيوني مغوشة كوة اشوف من الدموع كام شجاع على حيله وجهه اصفر من الدوخة ولزمني يرجعني وره ظهره كوة واكف على حيله..

-مِــسك: شجاع شنسوي شجاع

هز راسه ساكت ويعصر بأيدي من وره يسكتني، دنكت راسي مرعوبة من وخروا العسكر من الطريق واصطفوا كلهم على جانبين، كزبرت من مشه واحد بنصهم يتقدم وكف كبالنا بالضبط كدرت اشوف بسطاله العالي من ثبت بالكاع.. من الخرعة حتى راسي ماكدر اشيله اول مرة بحياتي اتعرض لهيج موقف..

-وين تردين ترحين؟

رجف گلبي من وجه سؤاله الي، ما خلاني شجاع احجي وهو جاوب نيابة عني..

-چنت ارجعها لبيتهم

رفعت عيوني اعاين للضابط ونزلتهن بسرعة من شفته مركز بيه، رغم لابسة بوشية وما مبين من وجهي غير عيوني بس حسيت روحي فرجة الهم ويكدر يشوف كلشي بيه..

-وين بيتج؟

رجع وجهلي السؤال ورد شجاع جاوبه، باوعتله بطرف عيني من فرك وجهه واردف يسأل بنفاذ صبر..

-بس هذا مو طريق بيتج وين چنتي رايحة؟

-شجاع: اي مو…

-جاي اسألها الها!!

نتر بشجاع بصوت عالي ورجع عاد سؤاله الي..

-وين چنتي رايحة خاتونه؟

الخوف اكلني اكل مستغربة ومصدومة ليش جاي يحاچيني الي ولح وياي ما مستغربة من استجوابهم لان يسووا ويه الكل وشي متعارف عدنا بس خفت لان جاي يستجوبني الي شخصياً بس خوفي على كحلاء اكبر، حمحمت حتى يطلع صوتي واضح بس ما فاد وطلع حسي ضعيف يرجف..

-جاي اروح لبيت بت عمتي وما لگيتها بالبيت خفت لا يكون صاير بيها شي وطلعنا ندورها اني وعمي

حجيت الحقيقة والصراحة لان لو لعبت بذيلي واكتشفوا جاي اجذب يطيح حظي وحظ عشيرتي وننسحل كلنا، رفعت راسي عليه من صار هدوء شفته يعاين عليه بوجه جامد بقى مركز بيه عبالك جاي يقراني شوية وكال..

-اكو منع تجوال على المناطق المجاورة وما تكدرين تطلعين منه واساساً بنت عمتج لو جانت رايحة لمكان راح تستوقف بنقطة جديدة ما يخلوها تعبر

-واذا عبرت

همستها همس احجيها بيني وبين نفسي بس هو سمعني وحرك راسه معترض وكال..

-ما تعبر اذا ماعدها اذن

سكتت اللوب واعصر بأصابعي، هزيت راسي والدمعة بعيني راح اموت من القهر الغصة ذبحتني ذبح وحتى حجي ماكدرت احجي..

-خليهم يرجعون للبيت

امر الجنود يعوفونا بحالنا وشجاع اشرلي اصعد بالكروسة بس ماكدرت رجليه ترجف راح اطيح من طولي، مديت ايدي اكمش بالكروسه حتى اصعد وبدون لا انتبه ردن العباية نزل وطلع نص معصم ايدي وشجاع بساع جرها يعدلها ويسولف وياي بصوت ناصي..

-عمو لا تخافين صدكيني مابيها شي خلي يصبح الصبح وانه بنفسي اطلع ادورلج عليها

شهكت بصوت ناصي ابجي بخوف وضياع، ضميت حلگي بأيدي فوك البوشية بدون لا اشيلها اريد اسيطر على روحي لا اللفي مشكلة جديدة ويكضونه ذولة بس ماكدر، رجليه يبست ما جاي اكدر ارفعها واروح روحي تعلگت هنا اريد اشوف كحلاء اخاف ما اشوفها بعد گلبي يوجعني اريد بس اتطمن عليها..

-شجاع: يلا مِــسك يلا جاي يعاينون

-لهدرجة الموضوع ضروري؟

اللتفت شجاع على صوت الضابط يحاچينه، تقرب من عدنا كلش صار بصف الكروسة ضرب على وجهه الضوا بينت ملامحه بوضوح واستغربت من ميزته هذا نفسه الحاچه سـعد گبل جم يوم كمال الدين!

ظليت اباوعله ويباوعلي وشجاع يحجي وياه يفهمه علاقتي بـ كحلاء وخوفي عليها وهذاك ابد ما دار وجهه من عيوني..

-شجاع: وهي تخاف عليها چن اختها

هز راسه متفهم وبعدها عينه عليه ما انشلع من مكانه الا من صارت بسبسة من الجنود اللتفت عليهم وهمه بسرعة سكتوا ووكفوا عدل بس ماعرف شنو لقطت اذنه لدرجة عافنه وتوجه على واحد منهم وسحله من ياخته للكاع..

شهكت مصدومة وهذاك بقى بالكاع جوه رجله ما تحرك، كمشت بقميص شجاع متوترة من صار يصيح عليه بكل صوته ما افهم شيكول والجندي باقي كاعد على ركباته منزل راسه ساكت..

درت وجهي منهم من رجع اللتفت علينا مخنزر، ضمني شجاع وره ظهره ويه ما نتر كمال الدين..

-تكدرون ترحون

-شجاع: صار صار

صعدت الكروسة وشجاع ركب لمكانه وضرب على ظهر الفرس تتحرك، رفع ايده كمال الدين يوكفنا لحظات ومد ايده الثانية على العسكري الي بصفه وهذاك راح يركض للصندوك طلع منه ختم وورقة حطها بيده وماعرف شنو كتب بيها وختم..

-كمال الدين: انطوها لاي نقطة تصادفكم

هز راسه شجاع واخذها من ايده يتشكر منه ويترحم على والديه وضم الورقة بجيبه، مشت بيه الكروسه وشجاع يستعجل بالفرس وصرنا نعبر النقاط الصادفتنا بكل سهولة بس يطلعلهم الورقة يأشروله روح..

وصلنا قريب تجمع المسافرين وبعد ما كدر شجاع يدخل الكروسة ما رضوا، اللتفتلي محتار ميكدر يخليني انزل وحدي وهم ميكدر ينزل وياي ويعوف الكروسة هنا تنباك..

-مِــسك: شجاع ما اتأخر بس اللكاهة وارجعلك

-لا مِــسك اوكفي..

ما خليته يكمل حچايته ونزلت اركض، صاح بيه ما راضي بس مو وكتها لازم اللكاهة گبل لا تروح واضيعها للابد.. امشي وادور بالوجوه شلت النقاب من وجهي اريد اشوف زين كومة نسوان وجهال وزلم اجانب واكفين ينتظرون واكو سيارة مركونة على جهة..

بديت افقد الامل ما جاي اللكاهة بيناتهم دموعي نزلت والنفس كوة اجره الهوا بارد والمكان متروس ناس وعيوني بس تدور كحلاء.. مسحت وجهي اريد اتذكر دعاء حتى ادعي اريد بس شي يجي على بالي ماكو عقلي صفر..

-كحلاء.. كحلاء وينج كحلاااء

اصيح مثل المسودنة بين الناس ابجي واعيط بأسمها بس اريد اشوفها لاخر مرة اشوفها احضنها واودعها، انضربت بجتف زلمة بالغلط لزمه متوجع ونتر بيه عفته ما مهتمة وعبرت للجهة الثانية ادور هنا وماكو..

طحت على ركبي اشهك وابجي اصيح بيها واتوسل بكل الاتعده منه يدور وياي على بنية مبوشة بس محد اهتملي حتى اليشتغلون هنا محد بيهم عنده غيرة وسأل شبيچ وبشنو نساعدج..

-شجاع: مِــسك!! مِــسك الختااام مِــسك

ضميت وجهي ابجي ويه صوت شجاع، ركضلي كعد بصفي وضمني لصدره يمسح على زندي وراسي ويهدي بيه..

-كافي بابا كافي بنيتي لا تبجين

-راحت كحلاء راحت راحت

-نلكاهة بس لا تبجين وكومي نرجع لا يحس احد على غيابج

كمشت بيده ابجي واتوسل..

-دور فدوة دورها يمكن عيوني انعمت وماشوف دور وياي

كومني من الكاع ومشاني وكفني بصف سياج ناصي من حديد، مسح دموعي بأيده ونزل البوشية على وجهي وكال..

-ابقي هنا اروح اسأل الموظفين وارجعلج اذا جانت مسافرة اسمها يجوز يكون من ضمن المسافرين

هزيت راسي وظليت واكفة وارجف هم برد وهم خوف، ما تحركت من مكاني بس عيوني تدورها وين ياله رجع شجاع يهز براسه ويذب حسرات..

-هاا بشر

-ماكو اسمها مو وياهم

-شنو يعني ما سافرت؟؟

-لا مو شرط يكول مو الكل يسجل اسمه يمنه اكو يطلعون على مسؤوليتهم الي يسجلون اسمائهم اغلبهم موظفين دولة او الي عنده فلوس ويخاف على روحه من الطريق

-هسة شنوو

-لو بس تخليني اشوف الورقة الكتبتها الج خليني افتهم يا بابا

هزيت راسي لا ومشيت كدامه ارجع منين ما اجيت، مشى وراي يتحسر ويستغفر لحدما وصلنا للكروسة ركبت والطريق كله ابجي كلبي معصور وبي وجع ما ينحمل چن عفت روحي ورجعت..

-شجاع: كافي بوية كافي عيونج انمردت

رجعنا نفس الطريق وصادفنا السيطرة الوكفونه اول مرة بس كمال الدين ما جان موجود، عبرنا بيت كحلاء وفطحت من البجي اباوع لبابهم واتخيلها تطلع منا مثل قبل..

تمنيت روحي بكابوس من كوابيسي تمنيت هسة تجي امي تكعدني، ميلت راسي على حديدة الكروسه وغمضت عيوني افكر بيها وبشنو دتحس هسة ومنو هذا الكدرت تأمن روحها وياه وباعت اهلها والدنيا وسمعتها علموده..

-هاي شنو هاي شصاير هنا

فتحت عيوني فازة على صوت شجاع، فتحت البردة اشوف شكو الشارع متروس زلم ملابسهم مصخمة ووجوهم سودة ونسوان اهل امي واكفات وياهم يلوجن ويأشرن على بيتنا..

نزل شجاع واندار ينزلني وسبقته طفرت من وحدي ورحت لبيتنا اشوف شبي.. مابي شي ليش الكل جاي يأشر عليه شفت خالتي واكفة يم رجلها تصفگ ايد بأيد وتكول..

-سودة عليه عليج يا خيتي ما تهملتي بعرس وليدج

-مِــسك: خالة شصاير؟

ركزت بيه ما عرفتني رفعت عن وجهي وشهكت تبجي وتحجي مافتهمت شي منها، فركت عيوني تحركني ريحة دخان تكتل انداريت على بيبي واكفة وحاطه شيلتها على حلكها تولول وتنعي..

-بيبي شصاير

مسحت عيونها بشيلتها وخزرتني ونترت..

-خفه هالحلك بيبي شني چم مرة متوبتج من هالچلمة الفاهية

-مِــسك: عذريني جدة هسة سولفولي شصاير

-جدة: يمة يفوزية يمة راح بيتج يا مسعدة عين ما صلت على محمد عين ولج يمة طگوكم وشتتوكم بيتكم والبستان والحلال كله احترك

فتحت عيوني مصدومة تلفتت اباوع لواجهية البيت ما لايحها شي عفتهن وركضت اريد اطب جوه وصار بوجهي وسام ما يخليني افوت..

-النسوان ببيتنا طبي وياهن

-امي وين؟ اخوتي ابوية وينهم اكو احد صارله شي؟؟

-امج ببيتنا روحيلها ولا تظلين واكفة هنا

عفته ورحت لبيتهم الباب مفتوح طبيت وتلكتني حوراء بت خالي تبجي وتلوب طاح كلبي بشوفتها وصحت من مكاني..

-شصاير حوراء فهمييني

-حوراء: احتركنا مِــسچ وينج انتِ بيتكم غده رماد حلالكم كله ضاع والويلاد احتركو

-يا ويلاد؟ اخوتي بيهم شي؟؟؟

-لا اخوي كاظم ايده احتركت وبعد ولد ثنين احتركوا وواحد منهم مات

عفتها تبجي وطبيت مثل المسودنة للهول امي كاعدة ومـودة وخالاتي داير مدايرها يبجن، مشيتلها رجليه ترجف كعدت كبالها مهدود حيلي كضيت ايدها اريدها تنتبهلي وبس شافتني بجت اكثر وجرتني لحضنها شبكتني..

تحجي وتبجي غير لو افهم شي عقلي فاصل، ركزت شكد ما اكدر وياهة واسمعها تحجي بواحد اسمه هادي تكول يصير صديق الولد احترك ومات واهله هدوا على ابوي متحلفين وسيف بالمستشفى مغمي عليه والولد حايرين بالنار الشتعلت..

ظليت بحضنها ابجي وياهة وادعي من الله كون بجاه الحسين هذا حلم، اول مرة اتمنى جاي احلم ويرجع كلشي مثل ما جان لا كحلاء انهزمت ولا هادي مات ولا بيتنا احترك ولا سيف بالمستشفى مغمي عليه وما يندرى يعيش لو يموت..

**

“فضة”
طلعن قسم من النسوان ويه زلمهن والباقي بقن نايمات بالهول، رحت اتأكد خاف وحدة تريد شي ومن تطمنت الكل نايم وجليلة وخواتي هم نايمات لبست عباتي وطلعت اشوف بيت عمي مجتبى..

طبيت لبيتهم الباب مفتوح وهدوء بس وسام كاعد بالحوش يدخن، غشيت وجهي منه وسألته عن حالهم بس شو هذا خزرني ووكف على حيله ونتر..

-وسام: شجابج؟؟

-اجيت اشوف نسوان عمامي

-وحدج؟؟

-تره هذا وينه بيتنه جيرانكم شبيك

-سهلة فضة سهلة لوما طيحت حضجن انتِ وذيج جليلة ما يطلع اسمي وسام

-شكو شكو شو واكفلي تهدد ليش انتَ منو خوية وشيخصك بينه

-سهلة اني الجن ما متربايات ادبسزيات

-شوف لك اني ساكتة ومحترمتك ومنصية صوتي احترام لمصيبتكم بس مال توكف وتهدد بيه وتتجاوز حدودك اكلب الدنيا على راسك

-مـودة: فضة!

درت وجهي لجهة الهول واكفة مـودة عيونها حمر وتباوعلنا، رجعت عيوني على وسام الوكف كبالي ونتر بحقد بصوت ناصي كلش..

-من اسولف لاخوج ولاخوان جليلة سوالفجن عود هم اوكفن هيج كبالهم ونططن

-اوي رجفت يمة رجفت روح شتريد تسولف سولف

-اني اعلمج يا فضة هذا لسانج اذا ما كصيته معتب!

-مـودة: فضة تعاي فضة

طلعت مرته من غرفتها ومن شافته واكف كبالي اجتنه تركض حضنت زنده بأيد والايد الثانية حطتها على وجهه تجره عليها وتحاجي..

-خولة: وسام عوفها وسام لا تطلع عصبيتك بيها شو باوعلي

تجر بوجهه تريده يباعلها وهو عينه ما وخرها مني مخنزر ومتحلف بيه وبجليلة متت قهر اني هذا الفاهي هيج يحاجيني وعلي الا اطيح حظه..

-خولة: عوفي فضة وفوتي جوه اني احجي وياه

-وسام: وخري خولة

وخر ايد مرته منه وطلع من البيت وطبك الباب وراه حيل، عافتني خولة وطبت جوه زعلانة ومـودة هم رجعت للهول واني بقيت واكفة بمكاني فايرة ودمي محترك..

هدأت روحي وطبيت لغرفة بنين لكيتها كاعدة ويه امها وحدة حاضنه الثانية ويبچن كعدت يمهن اصبر بيهن واسأل على سيف كالن محد من الولد رجع وجابلهم جواب..

-فضة: خير ان شاء الله حبيبتي باجي لا تبجين مو زين عليج كلبج يتعب

هزت راسها لا وايدها على كلبها يوجعها حرت وياهن مادري شسوي واخفف عنهن، سألتهن على مِــسك وامها كالن بالهول رحت اتطمن عليهن شفت باجي فوزية تنود ومِــسك حاطة راسها بحضن امها نايمة والدموع ناشفة على وجهها..

كعدت يمهن ساكتة شكول واخفف عنهم مادري، اهل باجي فوزية اغلبهن هنا مجطلات نايمات بالهول مسلماتها، دورت بعيوني على صولاغ شو ماكو لا هي ولا رجــب..

-فضة: اكلج مـودة صولاغ ورجب وين؟

-مـودة: مادري ما شفتهن

-وعروستكم شروق وين

-انيسة اخذتها وياهة لبيتها علمود شوية هدوء

مـودة صوتها مبحوح كوة تحجي سولفت وياهة شوية ورجعت لبيتنا، الليل كله ما نمت اتكلب وافكر شلون احتركنا وشنو هالصوت القوي الصار گبل لا نحترك وافكر بوسام هم شبي انجلب عليه هيج هذا عود الهادئ والفاهي مال ولدنا تاليها هيج يرزلني ويهدد بيه امداني..

كلبت انام على صفحتي وعيني صارت على جليلة النايمة وفجأة كمزت من مكاني مرعوصة.. صخام بس لا وسام عصب لان عاجبته جليلة وتسودن من شافها تدك وتلطم على سيف! عزا بعينك يا وسام ما يريد مرته ومتونس على زعلها وبنين تشكي منه اثاري عينك على جليلة يا طايح الحظ!!

انوب حرت اكثر شنو هالمصيبة ياربي جليلة تريد سيف ووسام عاشگ جليلة وباجي سوسن تريد تخطبني لسيف واني ماريد لا سيف ولا الخلف سيف.. عقلي تعب من التفكير وهستوها جاي تغفى عيني وحسيت على صوت دكة باب غرفتي على كيف..

فزيت اتلفت بالغرفة البنات نايمات، كمت على حيلي لبست الشال وفتحتها صار بوجهي واثق هدومه وايده وركبته كلهن صخام..

-فضة: ها كلبي الحمدلله على سلامتكم

-الله يسلمج شنو كعدتج من النوم؟

-لا ما نايمة بشر كدرتوا تطفون النار كلها؟

هز راسه اي تعبان ومشى للحوش، لحكته وطبكت باب الغرفة وراي كعد هو يم الحوض مهدود حيله جبتله كرسي يكعد عليه ما قبل يكوم تعبان كلش..

-واثق شنو صار؟

-مادري فضة مادري اول مرة بحياتي اشوف هيج نار اكلت الاكو والماكو

-لاحت بيتنه وطفيتوها مو؟

-اي بيتنا وبيت عمي مجتبى وجوارينه المنا ومنا كلهم لاحتهم وركضنا طفيناهة بس شنو الفايدة نطفي منا تشتعل مناك اكلت بساتين عمي مكي وبساتينه وبساتين ناس غرب وضاع حلالهم والدنيا انكلبت

-الحمدلله والشكر ميخالف فدوة المهم انتو سالمين بالمال ولا بالعيال

-مات واحد من جماعتنه

-يمةة

مسح على وجهه مقهور كلش وكال..

-والله صاحبنه هادي وحيد اهله خطية ابوه تخبل من شافه شلون يشتعل كدام عيونه وما كدر يطفي

نزلت دموعي ميتة قهر انوب سولفلي على ولد هم لاحتهم نار ما ماتو بس تأذوا هواي وختمها بـ سيف الي لسه مغمي عليه وما جاي يصحى..

-واثق: حضريلي هدومي فضة اسبح واروح للمستشفى

كام للحمام واني رحت لغرفته طلعلته هدوم ورجعت للغرفة يم البنات.. للصبح ما نمت كمت قبل الكل صليت وسويت ريوك وكعدت النسوان والبنات ما قبلن يكعدن عفتهن ولبست عباتي ورحت لبيت عمو مجتبى يم باجي فوزية والبنات على حطتهن كاعدات..

اجت انيسة من بيتها ووكفت وياي نسوي للموجودات هنا ريوك واخذنا الوكت نشتغل ونركض لفلانة تخربطت وفلانة اختنك صدرها من الدخان وباجي سوسن كلبها لزمها وبنين ومِــسك ميقبلن ياكلن وكعدنا نتوسل بيهن..

للظهر كامت مـودة تساعدنا بالغده واني عفت الجدر على النار ورجعت لبيتنا اشوف البنات، خواتي كاعدات بالحوش يلعبن ويه يمامة وصادق سألتهم على جليلة كالن بالغرفة ما طلعت..

طبيت عليها لكيت امها كاعدة كبالها مخنزرة ووجهها احمر وجليلة تبجي وخدودها صايرات حمر ومطبعة اصابع عليهن..

-فضة: شبيكم شصاير؟

-ام جليلة: تعاي شوفي هاي الحيوانة لا تقبل تكوم ولا ترجع وياي للبيت الادبسز شلعت كلبي

-فضة: خالة عوفيها صدك جذب هاي انتِ كاتلتها

-واذبحهاا هم طايحة الحظ الما مترباية اموتج جليلة اموووتج

جرتها من شعرها هلسته ركضت عليها افكها من ايدها بس متخبلة هاي شبيها، كوة دفعتها من بتها وجذبت عليها كلتلها باجي فوزية تريدها ببيت عمو مجتبى ياله عافتنه وراحت..

-فضة: شنو السالفة جليلة شبيها امج

سوتلي بيدها عوفيها ولمت رجليها لصدرها ورجعت تبجي عفتها على راحتها ما لحيت وطلعت يم البنات صحت لـ فرح افتهم شصاير وصدمتني من كالت..

-فرح: گبل شوية اجه واثق وسأل منو هنا كتله جليلة وامها هو كال شعجب باقيات هنا كتله جليلة مريضة وتبجي سألني عليها شبيها وشصاير وعلى صوته طلعت خالة صبا (ام جليلة) وكفتله بالباب شلونك عيوني ومحتاج شي واسويلك غده ومادري شنو وهو لبسها وسألها على جليلة اذا تحتاج طبيب لو لا واذا كلش مريضة هسة يأخذها للمستشفى وهي تخبلت طبت على جليلة ملختها تملخ وجليلة حتى ما دافعت على نفسها ظلت بس تبجي ساكتة

-فضة: اويلي منها ومن سوالفها

حركت كلبي هالخفيفة متأكدة سوايتها كلها لان غارت عبالها واثق يحب جليلة وتسودنت، رجعت جوه يمها بالغرفة ومن الباب سألتني على سيف كلتلها ماكو خبر عنه..

ثلاث ايام احنه حالنا مكلوب لا ولدنا شايفيهم ولا همه شافوا البيت داكين إقامة بالمستشفى ويه سيف كلها تتراجف عليه المشكلة ما جاي يصحى والاطباء كالو عنه عايش وديتنفس وبي نبض بس منعرف ليش ميكعد..

طول هالثلاث ايام استغربت لا اجتنه كحلاء ولا شفناهة، صولاغ باليوم الثاني جابت رجــب واجتنه تلطم وتبجي على الصار ببيت عمو مكي بس رجــب ساكتة وكلمة ما حجت ظاله بس تتصفن..

باليوم الرابع زفولنا بشارة سيف كعد بس ما يحجي يابه البيت احترك هوسات وهلاهل وجليلة ماتت من البجي صارلها ايام ما تاكل ولا تكوم من الفراش وامها تطب وتطلع ترزل بيها بس من افتهمت بي كعد من الصبح اجت وياي لبيت عمو مجتبى تعاوني وتعاون البنات..

واكفات بالمطبخ نشتغل ومـودة سولفتلنا على الولد هادي الله يرحمه كالت..

-صارت هوسة واهله متخبلين وابوي كلش متأذي وحاير شلون يواسيهم تالي وره فاتحته ابو الولد جايهم وكايله نريد فلوس الفاتحة وفلوس تعويض روح ابنه خلانه نصفن مصدومين بس ابوي ما تردد وانطاهم اليردوه وانسدت سالفته محد بيهم فتح حلكه بعد

-فضة: الحمدلله والشكر والله يرحمه راح يم رب كريم

-فرح: اكلج مـودة لعد مو كالو فلوس عمو مكي كلهن احتركن

-فضة: ولج فريححة

خزرتها ومـودة ضحكت وضربت ايدي متقبل اصيح بيها..

-مـودة: عوفيها ولج جا سؤالها مابي شي، فروحة ابوي اكثر فلوسه بالمحلات ما يحطهن بالبيت الي احتركن بالبيت شي قليل

-جليلة: الحمدلله، شوكت يرجعون سيف للبيت؟

-انيسة: سمعت كالو اليوم يخرجوه بعد مادري

-فضة: مـودة اختج شبيها؟ ليش معتكفة على روحها صارلها جم يوم

-مـودة: مادري والله امي تخطت حرك بيتنا وهي لا كاضيتها تبجي وصافنة

-انيسة: خلوها بنات لا تضغطون عليها مِــسك حساسة والصار بيهم مو هين

-فضة: صح، اكلجن كحلاء وين شو ما نشافت بعد

-انيسة: اتوقع ويه ابوها يجوز تعب وبقت تداري

-مـودة: انيسة ترحين تطمنين عليها اليوم؟

-انيسة: لا اليوم ماكدر عود باجر اروح ان شاء الله

اتفقنا باجر نروحلها نخلي واثق يوصلنا، للظهر طشينه كلمن لبيته واهل باجي فوزية كلهن رجعن لبيوتهن بقت بس بيبية مِــسك ما قبلت تروح رادت تظل ويه بنتها..

للعصر سمعت صوت هوسات الولد بالشارع، ركضنا اني وفرح وفاتنة مدينه روسنا من الباب نشوفهم گلبوا الشارع چــفل شايل سيف على چتافه يهوس بي وولدنا الباقين يصفكوله ويهوسون..

شكد فرحت وتمنيت لو ام جليلة قابلة جليلة تبقى يمي جان طارت بشوفته، جريت خواتي ورجعت جوه كلمن انطيتها شغل تسوي حتى المغرب نروح نساعد بنات عمو مكي ببيتهم جاي ينظفوه ويردون يعالجوه من الحريق..

-فاتنة: فرررح جيبي لعباتي فضة شوفيهاا شوفي راح تشلع رجليناتها

صحت بـ فرح وجريت منها لعابة فاتنة الحقيرة شالعة عين من عيونها خلت فاتنة تفحط من البجي انمطلت بنص الحوش ترفس برجلها وتصرخ وتبجي وهذيج تضحك عليها وتركص بمكانها على بجي فاتنة..

-فضة: ولج فريحة صخيمة اموتج اليوم

جريتها من شعرها وفلتت مني صعدت الدرج تضحك وتهزلي بخصرها الجلبة وذيج كلما تشوف فرح تتمركص تموت روحها بالبجي..

-فضة: نزلي لا اطيح حظج نزلي تره اذا صعدت ما اخلي بيج عظمة صاحية

-فرح: ههيهيييي تعالي يلا

-اجيج والله اكسر رجليج يا فرح

-تعاي خية تعاي

وتضحك بكل صوتها شعوطتني نزعت نعالي وصعدت وراهة ركضت تختل بوحدة من الغرف وقفلت الباب عليها واني حلفت ما اتحرك الا تطلع لو ابقى واكفة هنا لليل اني الج يا صخيمة..

-بناات وينجن بناات

مديت راسي من محجر الدرج شفته واثق طب ويدور بعيونه علينا، شاف فاتنة ممطولة بالكاع راحتله تشكيله بس هو باله مو وياهة كضاهة عليها يهز براسه، باوعت على الغرفة الختلت بيها فرح ورجعت باوعت لـ واثق مادري انزله لو اظل هنا..

-واثق: وين خواتج وينهن؟؟

-فضة: هنا اني

رفع راسه على صوتي وبدون مقدمات نتر..

-بت عمتج كحلاء وين؟

-كحلاء؟ غير ببيتهم

-لج ماهي ابوها اجه شايط عباله الايام الفاتت هي يمجن ببيت عمي مجتبى ومن راحلهم يريد يرجعها وياه للبيت كالتله بنين كحلاء ما اجتهم ولا شافتها

-عزا بعيني واحنه عبالنه ببيتهم هي

نزلت الدرج اركض وهو ظل يفتر بالحوش محتار ويفرك بوجهه..

-فهمني واثق وين كحلاء

-اندررري

صاح بوجهي وطلع من الحوش عافنه نضرب اخماس بأسداس حتى فرح نسيت اكتلها ظليت كاعدة وايدي على كلبي انتظر منه خبر.. لوره صلاة المغرب وهو ما رجع ماتحملت بعد جبت سكملي حطيته على الحايط صعدت عليه ومديت راسي على بيت عمي مكي الحوش فارغ..

-فضة: اكو احد هنا؟؟ مِــسك مـودة باجي فوزية منو بيجن هناا

طلعت مـودة من المطبخ وجهها اصفر، ركضت عليه تسأل على كحلاء عبالها وصلني خبر عليها ما تدري اني اجيت ادور اخبار يمهم..

-مـودة: لج ما ندري العصر اجوا ابوي واخوتي يرعدون ويتراجفون كحلاء ماهي وابوها سودة عليه متخربط وطاح بنص الشارع من عرف ما جانت ويانه كل هالايام

-ومِــسك متدري بيها وين؟

-هي وين مِــسچ ذبلانة وروحها رايحة لا تحرك ايد ولا رجل ما نعرف شبيها وحايرين بيها

-يمة بنيتي ولج شبيها ما تجيبولها طبيب

-امي كالت اذا لباجر ما رجعت على حيلها نجيب نشوف شنو علتها

هزيت راسي وكلتلها بس يوصلهم خبر تصيحلي تحجيلي واني نفس الشي، نزلت وكضيت اليوم كله افتر بالحوش وحسبة تجيبني وحسبة توديني خايفة على كحلاء وكل ساع اتخيل بيها شي وروحي تروح..

لليل كلش اجتني فرح اعتذرت مني وبوستني وكالت جوعانة حتى عشا ما سويتلهم مابيه، كلتلهن كل وحدة تلفلها لفة جبن تاكلها وتروح تنام..

اكلن وراحن غسلن ونامن واني ظليت انتظر واثق ما رجع الا ويه اذان الفجر متسودن، اسئله شبيك ما يجاوب طب للحمام سبح وطلع نار مشتعلة بي حتى ما يكدر يسولف..

-ما تحجي واثق كلبي ماات

-ماهي فضة ماااهي البنية فص ملح وذااب

-وين راحت؟؟

عض على اصبعه حيييل متحلف محترك كلبه، وخرت اصبعه من حلكه زرفه بأسنانه وما حاس..

-شاكين بشي انتو؟

ما جاوبني وطلع من البيت عايفني بحيرتي، طبيت للغرفة ومادري شوكت غفيت وحسيت على صوت مـودة وجليلة وبنين وانيسة يمي طلعتلهن وشفت فاتنة واكفة يمهن بالحوش صبحت عليهن ومحد بيهن جاوبتني اشوف عيونهن متروسة دموع وبس كلت شكو بنين انفجرت بالبواجي..

-فضة: شصار اخوج بي شي؟؟

-انيسة: كحلاء فضة.. كحلاء انهزمت

لطمت على وجهي وهنه يهزن بروسهن يبچن، حتى الحجي نسيته اريد اسأل شلون عرفتوا ماعرف شلون اسولف..

-مـودة: لكيت ورقة بعباية مِــسك شوفيها شوفي

مدتها الي قريتها وعيوني طلعت من وجهي صخام الصخمني انهزمت ويه زلمة اجنبي!!

-مـودة: جاي اعزل ملابسها ووكعت من عباتها وديتها لامي وبشير جان كاعد يمها محتار اخذها من ايد امي قراهة وتخبل طلع للولد فضحها وشهرها وحلف بس توكع بيده يذبحها ويذبها بالنهر

اسمعها واضرب على وجهي مادري ابجي مادري اصرخ مادري ادعي ترجع گبل لا يفوت الاوان، طلعن مني البنات ويه ما طب واثق الظهر تخربط حاله من شافهن وظل ما يعرف وين يروح تالي طب للهول وبعد ما طلع الا اني رحتله..

-واثق عرفتوا شي على كحلاء؟

-انهزمت العايبة انهزززمت

-واثق يجوز عدها تبرير لا تستعجلون بالحكم

خزرني عيونه راح تطك شكيت بشي بس خفت اواجهه وظليت كاعدة يمه ساكتة، تمدد على بطنه ينام على المندر واخذ مخدة يخليها جوه راسه من شفته بهالحال والحسرات تتراكع ما تحملت وسألته..

-شبيك مهموم واثق

ذب حسرة ضايج، حطيت ايدي على رجله هزيتها وهمست مترددة..

-تحبها؟

فز من مكانه فاتح عيونه مخروع، كعد على حيله وسأل متوتر..

-منو

-كحلاء

عقج وجهه وخزرني مطنكر، مسح على شعره بعصبية ونتر..

-ليش شايفها شايفتني كحلاء وأحبها

-شمدريني شو اشوفك تتراجف عليها

-ولج عرضنا هاي بت عمتي مرجوعها علينا الناس اكلت وجهنا وطيحت حظنا والشماتة تمشي وتشهر بينه

-اي حقكم

عبالي بس هو هيج ماخذته الغيرة عليها ويرجف بس طلعوا كل ولدنا متسودنين خوب ولد عمو مكي راح ينجلطون وبشير يطب ويطلع للبيت يتحلف ويقسم قسم بس يلكاها يذبحها ويغسل عارهم..

اسمعهم ومصدومة اصواتهم عالية واحنه حايط على حايط اسمع كلشي وارجف، حالنا انكلب كلاب نسينا سالفة الحريق واحتارينا بـ كحلاء شدوا حيلهم الا يلكوها يطلعون الولد من الصبح ما يرجعون الا ويه اذان الفجر ويرجعون يطلعون الصبح وهكذا..

عشرة ايام احنه لا ليلنا ليل ولا نهارنا نهار ومِــسك جثة هامدة عمو خاف عليها كلش وجابلها طبيب من فحصها كال مابيها شي ومتشكي من مرض يجوز وضعها بسبب حالتها النفسية..

باجر اول رمضان متعلمين فطورنا كل سنة اول يوم ببيت عمو مكي بس حتى فطور ما سووا حايرين بترميم بيتهم وسالفة كحلاء.. ابو كحلاء محد من الولد عافه ظلوا كل يوم واحد يروحله ويبات يمه بس الرجال شبه ميت لا حركة ولا بركة انتهى على غياب بنته..

خامس يوم رمضان اخذت البنات ورحت لبيت عمو مكي اتطمن على مِــسك دزيت فرح تصيح لـ بنين وانيسة وجليلة اجت من وحدها يمها كعدنا نسولف وياهة ونغير جو بس هي بغير عالم كضتها بس تتصفن..

-فضة: بنات باجر نرجع للدوام شنو تحضيراتكم؟

-جليلة: والله ولا محضرة شي اني اجيت لـ مِــسك حتى اغش منها اشوف ششترت

**

“مِــسك”
اسمعهن وماعندي حيل اجاوب بقيت بس ساكتة، ظلن هواي يحاولن وياي لحدما تعبن ورجعن لبيوتهن، المشكلة محد يحس بيه ويحس بالوجع الي بگلبي كحلاء اخذت روحي وراحت..

تمددت بفراشي افكر بيها ما تمر دقيقة من يومي بدون لا افكر بيها شلون حالها هسة تعبانة لو مرتاحة؟ متونسة لو حزينة؟ دتفكر بينه مثلما احنه نفكر بيها لو ارتاحت من عافتنا وراحت..

ظليت افكر لحدما غفيت وفزيت على ايد امي تمسح على وجهي وعيونها مدمعة..

-فوزية: كومي مِــسچ فطري ويانه

-مِــسك: ماشتهي

-يمة ما يصير تبقين صايمة يا حبيّبة كومي يا بعد روحي لا تهدين حيلي مِــسچ

غصة بصوتها وتتوسل بس ماعندي طاقة والله ماكدر حتى ارفع ايدي، عافتني على راحتي وكامت غفيت ورجعت حسيت على هوسة يم راسي رفعت عيوني واشوف ابوي واخوتي وبيبي وامي وحتى شروق كاعدين كلهم كبالي وكدامهم جاي وفواكه وكرزات..

-شيخ مكي: اللهم صل على محمد وال محمد كعدت مِــسك الختام

فركت عيني مستغربة من كعدتهم كبالي ونزلت عيوني على جسمي خايفة لا متكشفة لو نايمة نومة مرعبلة ارتاحيت من شفتني متغطاية عدل وما مبين مني شي..

-رزاق: والله كلت ما تكعد اليوم خايبة ما تشبعين نوم انتِ

-سـعد: خليها نايمة باجر يبدي دوامها وترجع للكراب

-چــفل: هاج حبيبتي اخذي من ايدي

بيده صم جوز ولوز قدمهن الي استحيت ارده واخذتهم من ايده بدون لا اكلهن..

-شيخ مكي: فطري بابا ما يصير تبقين صايمة

حطيت جوزه بحلكي اكلتها وظليت كاعدة وياهم، سـعد ورزاق حاروا شيسوون بس حتى اضحك واسولف وياهم وابوية كعد يسألني على الدوام باجر ومن كتله ما اداوم ما رضى وكال سالفة اترك الدراسة اطلعها من بالي..

-مِــسك: يابه اني تعبانة

-شيخ مكي: والعلم يزيح هالتعب

-فوزية: رجعي يا يمة ويه البنيات درسي وتثقفي غيرج تتمنى عدها ابو واخوة يسندوها ويشجعوها على الدراسة لا تدفرين نعمتج بيدج

-بيبي: صيري سباعية وفزي على حيلج النومة ما تلوكلج مسيچة

سكتت اهز براسي، كامت امي تسويلي صينية اكل ورجعت وكعدوا چــفل وسعد بصفي واحد منا والثاني منا ورزاق كابلني وبيده الخاشوكة يوكلني وكل ساع سـعد يدحس بحلكي خضرة ويكول..

-اكلي خضرة اكلي وجهج اصفر

-رزاق: هيووو هو هيج تترس بحلكها اشايفها معزة

-سـعد: انتَ شعليك حاط روحك بيني وبين اختي روح منا يلا ولي ولي

يكش بيده ورزاق تخبل شال الخاشوكة اليوكلني بيها وضربها براس سـعد وهذاك ليكول مو خاشوكة ضربته عبوة ناسفة هججنا بصياحه خله امي ما تندل دربها عبالها صدك متوجع واني ادري بي جذاب..

-فوزية: يمة وليدي سودة بوجهي يمة سعودي متوجع يا عين امك عسى الوجع بيه يا يمة

انخبصت بي ورزاق وچــفل وابوي يضحكون عليهم وسعد عاد سوه روحه فد مرة وحط راسه بحضنها يسوي روحه يبجي..

ابتسمت على سوالفهم وراحت عيني على شروق كاعدة وتكلب بعيونها مادري ضايجة مادري ملانه وبشير يباوعلنا ساكت ما حجى شي..

كاموا امي وابوية وجدة وبشير وشروق وظلوا الولد يمي يسولفون وياي ويغيرولي جو وچــفل كال بيده هو يوصلني باجر للدوام ورزاق يرجعني..

نمت من وكت ما تسحرت وياهم وناوية باجر اذا كعدتني امي الصبح اكللها بطلت ما اداوم واخليها امام الامر الواقع لا نفسيتي تسمح اداوم ولا عقلي يشتغل عدل ويخليني اكدر ادرس..

بس الصبح اجه ابوي يكعدني عبالك قرا افكاري وفني لو كتله ماروح هسة يلزمني محاضرة ام الساعتين، كمت كوة على روحي ادردم منو يداوم بـ رمضان وين صايرة هاي ليش هيج يبهذلونه..

سبحت وبدلت واجتني امي فرحانة تعدل بحواحبي وبوست خدودي وودعتني للباب، وصلني چــفل ووصاني على روحي وراح هو لدوامه..

طبيت للصف نزعت عباتي والبوشية صفطتهن وحطيتهن بحنطتي وكعدت، اكو بس كم بنية متطرشات ما انتظرت هواي وطبن فضة وجليلة تسالمنه وكعدنا على رحلة وحدة تصير عبارة عن دچة خشب طويلة وبيها دچه اعلى نخلي عليهن كتبنا والكراسات..

-فضة: شفتن بنين داومت لو غلست؟

-جليلة: اي شفتها هي وذيج المنكول اسمها بالغرفة البصفنا

ابتسمت ساكتة بنين ورجب بفد صف واني وفضة وجليلة بصف، لحظات وانترست الغرفة وطبت وراهم المعلمة، وكفنا كلنا نحييها سلمت علينا وكعدت على ميزها وبدت تتعرف علينا وعرفتنا على نفسها، ندستني فضة على كيفها وهمست..

-باعي عيونها شكد حلوة

-مِــسك: اممم

-فضة: تتوقعيها تركية؟

-مِــسك: مادري شو تحجي مثلنا

فزينا من ضربت على ميزها خازرتنا سكتنه بسرعة وطلعنه كتبنا عود منتبهات وياچ، كالت نفتح كتبنا على اول موضوع وطلبت من عدنا باجر نجي محضرات قصة قصيرة من حياتنا اليومية..

-جليلة: ايي هنا مِــسك تلعب لعب

حجتها بصوت عالي ضحكن البنات والمعلمة ضربت على ميزها مرة ثانية معصبة ورزلت جليلة..

-جليلة: اسفة مو قصدي بس عدنا طالبة اسمها مِــسك تحب الكتابة وكل سنة تتكرم على موهبتها

-المعلمة: اذاً ننتظر باجر ونشوف ابداع مِــسك

ابتسمت ساكتة اني وين وانتن وين، خلصت الحصة وبدينا بغيرها كاتلنه العطش وبطني تتمرد من الجوع بألف محمد يا علي خلص الدوام واخيراً راح نرجع للبيت..

لبسنا عباياتنا وطلعنا كلمن جاي اخوها عليها بس اني محد جاي عليه استغربت وظليت ادور على واحد منهم ووسام كال هو يرجعني..

-مِــسك: لا ماكو داعي رزاق كال يجيني خاف يظل باله من ما يلكاني راح انتظره هنا

لح يوصلني بس ما قبلت اريد رزاق يجيني حتى امر لبيت ابو كحلاء اتطمن عليه، اليوم كله هي ببالي وكوة لازمة روحي وبس راحن البنات بعد ماتحملت نزلت دموعي ابجي، چنه متحمسات نرجع للدوام سوه ونخطط شنو نسوي وشنو نشتري ويه بعض ليش هيج كحلاء ليش كسرتي ظهري..

-السلام عليكم

اللتفتت على صوت ولد صغير، ابتسمت من جوه البوشية وجاوبته..

-عليكم السلام

-هاج خالة

مدلي ورقة صغيرة اخذتها من ايده مستغربة وقبل لا يروح سألته..

-شنو هاي؟

-هاي من عمو كال وديها للحلوة مالتي

صفنت بوجهه ما مفتهمة وما لحكت اسئله شكو عافني وركض، تلفتت منا ومنا ادور على اثر رجال ومادري شبيه بطني خبطت متوترة..

عفصت الورقة بيدي وضميتها بجنطتي من شفت رزاق جاي لاتجاهي اشرلي بحواجبه يلا حتى ما سلم روحه رايحة وشفايفه يابسة، مشيت وياه مدنكة وافكر بالورقة الف حوصة صارت بيه اريد اشوف شنو بيها..

-مِــسك: رزاق اخذني لبيت كحلاء

اللتفتلي بسرعة مستغرب، عكد حاجبه وسأل..

-كحلاء؟؟

-اريد اتطمن على ابوها

انفلت عكدة حاجبه وهز راسه متفهم يجوز عباله نسيت كحلاء ما موجودة او يجوز عباله رجعت.. مشينه لطريق بيتهم ومثل العادة فتحت الباب من مفتاح الاحتياط، طبينه سوه ورزاق كالي انتظره بالحوش وهو راح لغرفة ابوها، طب شوية وطلع كال نايم..

اختنكت مادري ابجي على حال ابوها مادري على فراگ كحله الما جاي اتحمله، درت عيني على غرفتها اتخيلها تطلع وتتلكاني تضحك وتجي تشبكني حيل، مسحت دموعي وعفت رزاق واكف وطبيت لغرفتها شهكت ابجي ممرودة روحي من شفت هدومها على فراشها ممدودة دشداشتها مفروشة ومشطها وشالها على المخدة وماعندي شك ابوها مسوي هيج يتخيلها بعدها موجودة..

كعدت كبال فراشها ابجي واعاتب بيها شلون عفتيني كحله شلون هلچ كلبج تلوعين كلبي وكلب ابوج، بعتي ابوج اليفديج بروحه علمود عشگ؟ عمي انعل ابو العشگ اليبعدني من اهلي والناس الاحبهم..

على كعدتي تذكرت الرسالة النطاهة الي الولد، تأكدت من باب الغرفة مسدود وطلعتها من جنطتي اقراهة.. الخط مو واضح بصعوبة كدرت اقراهة الكلمات مو صحيحة كتابتهن، رجعت بطني تخبط من كدرت اركب الحروف وقريتها بشكل صحيح مكتوب..

“حيلي ينهد وي طيحة دمعتج
يـ تعب گلبي نهضيني بضحكتج”

رجفت كلني واصابع ايدي عرگت، تلفتت للباب متوترة وبلا شعور شككت الورقة سويتهن صغار صغار وشمرتهن بجنطتي وطلعت لـ رزاق..

-رزاق: ها شبعتي بجي

-اي رجعني للبيت

اشرلي براسه امشي طلعت كدامه اركض مو امشي، قفل باب البيت وراه واني وين طلعت ما حاسة على روحي الا من صاح..

-خاتون!

انداريت عليه لكيته بعده يم باب بيت كحلاء بلعت ريكي يابس ورجعتله، جر اصابعي بين اصابعه ومشاني وياه مخليني على جهة الحايط..

ما ادري بي جان يسولف وياي الا من عصر اصابعي بأيده ووكفني على صفحة..

-رزاق: شبيچ مو احاجيچ

-ها؟ شكلت؟

-اسألج على دوامج شلونه خوما تعبتي

-لا

-انتِ زينة حبيبتي؟

-اي

-تعبانة من الصيام؟

-لا

-شبيچ مِــسك

-ها

سكت يباوعلي حاير واني عقلي كله بالرسالة اريد بس انساها، تحسر وفرك وجهه دار عينه على جهة البساتين ورجع باوعلي وكال بأبتسامة..

-نروح للنهر تغيرين جو؟

-لا

-مِــسك كافي حبيبتي لازم تطلعين من هاي الكآبة امشي

جرني من ايدي وغير طريقنا على جهك النهر، مشيت وياه ساكتة وبالي يردد كلمات الرسالة ما حسيت بروحي الا من لامس الماي رجليه ورزاق واكف بصفي يضحك ويكول..

-هسة لو اشرب النهر كله ما اروى على العطش العطشته اليوم

-لان اول ايام تتعب

-لا ولج فرفحني سـعد بالدرس بايگ كتابي الچلب وخلاني بموقف محرج ويه الشيخ

-يااا

-والله تالي من اطلع من الدرس اشوفه ضامه بين كتبه ويركصلي بحواجبه متشمت

-يمة منه يمة كله بلا

-اخذتلج السوك طولة اركض وراه وهو جنه عتوي يتدحس منا ومنا وفلت مني ما لحكت اكتله ما شفتيني تأخرت عليج

ضحكت اتخيلهم يلعبون ركيضان بالسوك كدام الناس وهو من سمعني اضحك ابتسم فرحان، رفع البوشية من وجهي وكالي اللم عباتي واطب اطبش بالنهر..

-شنو لعد انتَ وين رايح؟

-ما دام النهر فارغ ظلي هنا انتظريني دقايق اشتري تمر للفطور وارجعلج

هزيت راسي وهو راح يركض متطمن ماكو احد غيري وغير نسوان ثنين بعيدات عليه كاعدات يترسن ماي لو اكو رجال وياهن لو يموت ما يعوفني ويروح..

اللتهيت اطبش بالماي وافرغ عقلي من كلشي اريد انسى كل همومي هنا واريح فكري صار ايام گلبي خلص من القهر..

-مرحبا

فزيت على صوت زلمة اجه من وراي وجفلت من شفته كمال الدين واكف كبالي على الجرف بلبسه العسكري وشفقته كاضها بيده..

خفت وصرت اتلفت ادور على رزاق وينه خاف يجي غفلة ويشوفني واكفة ويه هذا ويروح باله بعيد..

-لا تخافين عدنا وقت مطول بالرجعة اخوج

-شنو قصدك

رجعت كم خطوة بالنهر غاصت رجليه ووصل الماي لركبي، ابتسم وصار يتقدم لجهتي لحد ما الماي لامس بسطاله..

-ما اقصد شي مو زين لا تخافين اجيت بس احجي وياچ

درت عيني على النسوان محزمات عبيهن وملتهيات يترسن بالماي ووحدة منهن شفت جايبة هدوم هم تريد تغسل..

-شبيچ خايفة

عين عليه وعين على الجرف اخاف اطلع منا اركض ويسويلي شي وهذا واصل منو يكدر يفتح حلكه وياه..

-وين اخوي

-موجود رزاق بخير لا تخافين بس لهيته شوي حتى اكدر احجي وياچ

-شتحجي وياي منو انتَ اصلاً!

-اني كمال الدين

صفنت بوجهه ماعرف شحجي الرجفة البرجليه راح تخليني اطيح، كمشت بعباتي من يم الركبة اثبتها وعيني على الجرف متحضرة انهزم..

-صار هواي ما شايفج هنا بشريني لگيتي بنت عمتج؟

غمضت عيوني بقهر من جاب طاريها، بلعت ريگي اسيطر على روحي لا افقد هنا وارجع ابجي وبعد شيسكتني..

-كمال الدين: واضح لا

فتحت عيوني من كالها وهزيتله راسي لا، مسحت عيوني بأصابعي ومشيت اطلع منا شيسوي خيسوي وصلت للجرف وعبرته اروح لنفس الجهة الطلع منها رزاق ووكفني صوته من كال..

-كل يوم اوكف هنا انتظرج تالي من اللتقينا تردين تعوفيني وترحين بهالسهولة

درتله وجهي مصدومة وبلا ما افكر سألته..

-انتَ صاحب الرسالة؟

-أي رسالة؟

شكله مستغرب وما مفتهم عفته وكملت طريقي متوترة، عباتي تبللت وحذائي مبلل ويطرك برجلي اخاف لا اركض وينشلع واتورط..

-مسك خليني احجي وياچ

لزمتني رجفة صخام الصخمني حتى اسمي يعرفه دخيلج يالزهرة شيريد مني هذا، استعجلت بخطوتي وشهكت من انهمشت من عباتي من وره وبدون لا ينطيني مجال اللتفت جرني من زندي ودارني عليه..

-مسك لا ترحين

-هدني هددني شتريد مني ولك هدني

هدني بساع ووخر من طريقي رافع ايده بأستسلام، لميت عباتي على جسمي ارعش كلبي راح يوكف وريجي يابس حتى ماكدر ابلع..

-هديتج بشرط تنطيني مجال احجي وياچ

ما اهتميتله وركضت شاردة ناوية اصيح بأعلي صوتي لو قرر يجيسني بعد، اركض وما اللتفتت الا من صاح..

-اذا عفتيني ورحتي تحلمين يرجعلكم رزاق!

-شتريد شسوه اخوي واخذتوه

-ما مسوي شي وما راح نسويله شي لا تبجين كل ما بالموضوع ردت احجي وياچ بدون معوقات

سكتت جامدة اريده بس يفضها ويسولف بس شو طلع جكارة حطها بحلكه وشعلها، صفنت مستغربة احنه رمضان والدنيا صيام شو هذا فاطر.. اخذ منها نفس وزفره بهدوء عيونه ما نزلها مني..

-ليش اختفيتي الايام المضت؟

صفنت بوجهه مثل الطرنه وهو هم ساكت منتظرني اجاوبه هذا شبي والله لو انسان عادي جان طلعت حركة كلبي كلها بي بس اخاف لا يسجنوني..

-تمام تمام نغير السؤال بديتي دوام؟

-انتَ شمعرفك انه اداوم

-مسك لا تجاوبين سؤالي بسؤال

-شمعرفك بأسمي وشتريد مني

-بالنسبة لاسمج فـ مو صعب اعرفه اما شريد منچ جوابچ تلگي بالايام الجاية

-انه لازم اروح تأخرت على البيت عليك الله رجع رزاق الدنيا رمضان وهو صايم وعطشان لا تخلي يتبهذل هو ما مسوي شي

ابتسم ورفع ايده يحجب ضوه الشمس عن عيونه صايرة كبال وجهه، سحب دخان من جكارته ورفع حواجبه بحركة لا حرك كلبي..

-ليش لييش

-اعوفه بشرط

-شنو شرطك

-تلاگيني اليوم بـ ١٢ بالليل بنفس المكان

-شنوووو

-نلتقي هنا نسولف بهدوء ونتفاهم واعوف اخوج

-لو تموت

عفته وكملت طريقي ارجع للبيت وابلغ ابوي هو يتصرف، صحت ويه جرته لايدي دفعني يخلي ظهري على النهر ووكف كبالي يسد عني الطريق، درت عيني على النسوان البعيدات عني انتبهن علينا وظلن يعاينن..

-مو من صالحج تعانديني مسك اني اجيت احجي وياچ بكل احترام كونج بنت باشا والا اكدر اسوي اي شي يعجبني واتحده اكبر واحد يفتح حلكه وياي

-بنت باشا تكللها تعاي نتلاكه بـ ١٢ بالليل؟ يعني هسة محترمني حضرة جنابك من بلغتني بالوقت؟

-اكيد لان لو بنية غيرج اطب لبيت اهلها واجرها من حضن ابوها

فكيت عيوني مصدومة يحجي بهدوء وعيونه ما وكعن من وجهي، هزيت راسي معترضة ونزلت البوشية على وجهي..

-رفعيها ما شفتج زين

-وخر عني

-اعاقب اخوج!!

-شتريد تسوي سوي

عبرته ما مهتمة لو يطلع سلاحه ويفرغه براسي هم ما ارجع اوكف يمه هالنذل الخسيس المنحط..

-مسك والله بالله اندمكم!

منطيته اذن الطرشة وامشي وايدي على كلبي، ارجف كلني اريد بس اللمح شارع واشوف ناس واشرد منا..

رجليه طايرة احسها ما تدوس الكاع من سرعتي، يبس دمي علما وصلت الشارع وبلا ما اللتفت وراي ركضت لبيتنا.. وصلت لباب الحوش فحطانة اللهث واشهك نفسي مكطوع دكيت الباب بكل قوتي وادور وجهي منا ومنا خايفة..

-اجيت اجيت

فتحت الباب امي اني شفت وجهها وانهاريت شبكتها ارجف وابجي وهي تخبلت من شافتني بهالحال، طببتني جوه وجرتني للحوض رفعت البوشية وكعدتني على ركباتي تغسل بوجهي وتحجي وياي..

-بنيتي يمة عزيزة امج شبيچ ولج مِــسچ شصاير اخوج وين؟

-ابوي وين ابوي هنا؟؟

-لا لا ابوج عنده مجلس

-جا اخوتي بيهم واحد هنا؟؟

-لا بالمحلات شبيچ ولج منو وصلج رزاق؟ وين راح؟

-اي رزاق وصلني اي، ولد عمي وينهم موجودين؟

حركت راسها لا ما مفتهمة شي، عفتها وكمت للغرفة الوب لحكتني تسأل شصاير بس شيفيد لو حجيتلها تظل بس تلطم وتبجي وما بيدها شي..

-ما تحجيين شصايرر

-ما صاير شي يمة

-جا ليش طبيتي تبجين

-مشتاقة لكحلاء

ضميت وجهي بالمخدة ابجي محتركه روحي، كعدت يمي وجرت راسي تخلي بحضنها وتمسح عليه.. بجيت مقهورة وكلبي متكطع على رزاق اخاف لا يسويله شي اخاف لا يعذبوه اخاف لا ياخذوه وبعد ما اشوفه والله اموت لو صارله شي اموت..

-فوزية: ما كافي يا يمة بجي عيونج راحت عليها كافي بنيني مو زين تظلين هشكل لا توجعين كلبي مِــسچ

مسحت عيوني وكعدتني كبالها، نزعتني الشال وفلت شعري خلته يوكع على جتافي وابتسمت تباوع لعيوني..

-رجعي يمة رجعي مثل گبل تروشين بالبيت تفترين بيناتنه مثل الفراشة

هزيت راسي ساكتة، كامت مني تمسح بعيونها بالشيلة واشرتلي على الفراش مالتي..

-ناميلج شوية اذا مصلية ومن يصير الفطور اكعدج

تمددت بمكاني بدون لا اجاوبها طلعت وطبكت الباب وراهة، ظليت كاعدة وعقلي كله ويه رزاق كلبي خلص من المشاكل والله تعبت..

ما حسيت على روحي من غفيت وفزيت على صوت اخوتي جاي من الحوش..

كمت بسرعة لبست شال وطلعت من الغرفة وجان اشوف سـعد وچــفل ورزاق موجود وياهم يضحكون بصوت عالي وشروق واكفة على جهة تباوعلهم وتضحك..

-مِــسك: رزاق

اللتفتلي يضحك وبس شافني زاد بالضحك لدرجة حط ايده على كلبه، ضحك چــفل واندارلي يسأل..

-عود اعتمدنا عليه يرجعج تالي خلاج ترجعين وحدج

-رزاق: هههههه ولك اعتقلوني تورشعوني وما احجيلك الخوف والعباس ردت اسويها على روحي وتشاهدت كلت ضاع شبابك رزاق كون اهلك ما ينسوك بالثوابات

-فوزية: هههههه اسم الله ولك لا تحجي هيج، مِــسچ جا مو كتيلي رزاق وصلج؟

-رزاق: اي يمة انه وصلتها بس للنهر مناك رحت اجيبلكم تمر…

كال تمر وبعد اختنك بالضحك كعد بالكاع يضحك والولد يضحكون وياه وامي تمسح بدموعها شكدما ضحكوا ظلوا يبجون واني بس صافنة وكلبي يدك حيل..

-رزاق: رحت.. رحت اجيبلكم تمر بعدني ما ملكط واجاني عسكري كال انتَ رزاق ابن شيخ مكي ونفختلكم روحي وكلت بكل فخر اي نعم انه رزاق ابن الشيخ تالي صاح بجنوده “سحلووه” ظليت اللبط بيدهم مثل السمجة

رجعوا كلهم يضحكون بصوت عالي خلوا ولد عمو مجتبى يوكفون يم حايط بيتهم ويصيحون..

-وسام: ولكم شكوو عليكم كل هالضحك والدنيا رمضان

وواثق يصيح من جهة بيتهم وره الحايط..

-واثق: تسولفون لا اروح افطر والذنب بركبتكم

-چــفل: ههههههه تعالو للديوانية فطروا يمنه ونسولفلكم

راحوا چــفل وسعد للدوانية يفتحون للولد الباب مناك ورزاق اندار عليه مبتسم، اشرلي بيده تعاي رحتله شبكني على صدره وباس راسي..

-خفتي من ما رجعتلج مو؟

-اي والله تخيلت ما اشوفك بعد

-هههه لا عافوني كالو صار عدنا اشتباه بينك وبين واحد ثاني وخلوني اروح

-الحمدلله والشكر

رجع باس راسي وراح للدوانية ويه الولد اللتموا كلهم عدى سيف من يوم الحريق ما طلع من بيتهم بعد صايرة بي مثل الصدمة حتى للمحل ميروح..

صاحتلي امي بالمطبخ وسألتني اذا بجيت اليوم على رزاق وضميت عليها سولفتلها الحقيقة بس ما جبت طاري كمال الدين ماعرف ليش خايفة حتى افكر بي مو انوب احجي لاهلي عنه..

طبخت التمن بسرعة بسرعة وهي وكفت تسوي الشوربة، بعدنا نشتغل وصاح الله اكبر وكفت اريد اصب الاكل وامي كالت اعوف من ايدي واروح اصلي صايرة ابد ما تضغط عليه وحتى ما تسخرني..

توضيت ورحت اصلي واخوتي فرشوا سفرة بالدوانية ويه الولد يفطرون واني وامي وجدة وشروق بالهول، اللتمينه نفطر وجدة كل ساع تسمع شروق حجاية ليش ما تاكلين وليش تنكنكين مثل الدجاج وشبيج وجهج اصفر الرجال لا يروح من ايدج..

-شروق: ماكدر اكل جده نفسي تلعب

-جدة: يااااااا خاف حامل چنتچ ولج فوزية

-فوزية: اي يجوز

-جدة: صلوات على محمد يلا وره الفطور اجي افحصج

فكت عيونها شروق تباوع لامي وجده لكفتها..

-جدة: شو فكيتي عينج ولج لازم ما يعجبج

-شروق: لا جدة بس يعني انتِ تعرفين؟

-جدة: جا شني انه حبوبة مجيبة عمتج فوزية بـ بشير وچــفل ورزاق

-مِــسك: والباقين ليش ما جيبتي امي بينه؟

-جدة: جنت مزاعلتها عبنها ما نفست عدي ظلت هنا ويه جدتچ فضيلة

عوجت حلكها ما عاجبها ضحكت بدون صوت هي وبيبي فضيلة ام ابوي الله يرحمها ابد ما يتوالمن نار ونفط بس من ماتت شكت دشداشتها عليها ولطمت لطم بفاتحها الناس عبالهم هنه خوات..

كملنا فطور وكمت اغسل مواعين وشروق طبت لغرفتها، صاحتلها امي تجي تساعدنا وظلت تكول اي واي تالي ما اجت اني هم ما حجيت وكملت المواعين ومسحت المطبخ ورحت اكعد يم جده وامي..

-جدة: وين راحت جنتج شني ما افحصها؟

-فوزية: لا يمة عوفيها لا تعبين روحج هاي نحسة وتستحي اخذها انه لحبوبة ما تعرفها خاطر ما تخجل

-جدة: والله محد غيرج مگوي عينها تستحي شني امطلها بالكاع وافضها شينرادلها

لحت تريد تكوم وامي ما ترضى عرفتها تخاف لا تكتشف جدة شروق حامل گبل لا تتزوج وتصيرلنا سالفة، حطيت راسي على رجلين امي تلعب بشعري واسمعهن يسولفن بخالاتي وخالي جدة مشتاقتلهم وتريد ترجع وامي ما ترضى تريدها تبقى يمنه..

غفيت بمكاني وحسيت واني وحدي بالهول والبيت سنطة، طلعت للحوش اشوف وين امي وسمعت اصواتهم جاية من الغرفة امي وابوي كاعدين على القريولة واخوتي كلهم بالكاع مكابليهم، طبيت يمهم للغرفة واستقبلني ابوي مثل عادته أهل وسهل بيه وبوسني وكعدني بينه وبين امي..

-شيخ مكي: بت الحلال بذكرها هسة چنه بطاريچ

-مِــسك: خير ان شاء الله؟

سألته بفضول ولهفة كل ظني جايبلي خبر على كحلاء بس خابت امالي من سـعد نبز من مكانه وكال ووجهه مكلوب..

-سـعد: جاييچ خطابة

ويه حجايته اندكت باب الحوش كام چــفل يشوف منو وابوي رزل سـعد ليش يتعداه ويحجي من مكانه صاير مستهتر وسعد يسمعه وكالب وجهه ما عاجبه الوضع..

-چــفل: تفضلوا

كاموا الولد وابوي يشوفون منو وانه وامي انتظرناهم بينما طلعوا من الغرفة ياله مدينه روسنا من الشباج، طبوا كلهم للديوانية ما لحكت اشوف شي منهم بس ظهورهم..

-مِــسك: يمة جا لعد جدة وين؟

-شربت يانسون ونامت بالغرفة، امشي نسويلهم جاي

مشيت وياهة للمطبخ ما مهتمة منو بالدوانية، حضرت الستكانات بالصينية وصبيت الجاي وامي كالت اروح ادك الباب عليهم حتى يجينه واحد من الولد..

رحتلهم اهرول بس كبل لا ادك الباب ردت اتأكد همه چم واحد خاف الجاي ما يكفيهم فشلة، رحت للشباج الاراقب منه بالعادة ومديت عيوني متطمنة ما ابيّن وجفلت شاهكة من كل گلبي من صارت عيني بعين كمال الدين…..!

يتبع