رواية بين غمد السيوف الفصل السابع 7 بقلم زهراء السلامي
تعاي احچيلي شيحلها؟
عيونچ ما تحبني الفدوة اروحلها..
━━━━━━ ⚔︎ ━━━━━━
“مـسك”
رحتلهم اهرول بس كبل لا ادك الباب ردت اتأكد همه چم واحد خاف الجاي ما يكفيهم فشلة، رحت للشباج الاراقب منه بالعادة ومديت عيوني متطمنة ما ابيّن وجفلت شاهكة من كل گلبي من صارت عيني بعين كمال الدين..
وخرت من الشباج بسرعة اللطم على خدودي واكمز بمكاني شلون راحت عينه على هالفتحة المستحيل تنشاف شنو من عيون عليه هذا، عفتهم ورجعت للمطبخ يم امي..
-فوزية: ها صحتيلهم؟
-يمة ذولة عثمانيين هنا
بهتت امي صفنت بوجهي ما مفتهمة، صبيتلي كلاص ماي شربته كله وهي على وكفتها تنتظرني اكمل والله امي متغيرة هاي لو كبل جان دارت استكاين الجاي فوك راسي..
-فوزية: ما تحجين
-يمة عثمانيين اتراك اتراك جايين لابسين عسكري
-دخيلج يا ام الحسن
هزيت راسي اطفر بمكاني وهي عافت الستكانات على الميز وركضت على شباج الديوانية وكفت بصفه تسنط بدون لا تمد عيونها..
عصرت اصابعي متوترة ووكفت يمها اسمعلهم يسولفون اكثر شي صوت رجال مبين جبير بالعمر وعربيته مكسرة مو قوية، شوية وطلع سـعد من الديوانية تطافرنه اني وامي وكفنه بعيد وهو همس “جاي”..
-فوزية: تعال احاجيك
اشرتله يجيها، طلع وسد الباب وراه وجرته امي للمطبخ تسأله منو ذولة..
-سـعد: ذولة عسكر جايين يزورون ابوي ويسألون على الحريق الصارت ببيتنه هسة ياله تذكروا
-فوزية: وشون عرفوا اكو واحد موصلهم الحجي؟
-لا يكول همه مقرهم هنا قريب بيتنه وامس واحد فالتها كدامهم وكايللهم يجوز الحريق فعل فاعل واجو يسألون ابوي بس ابوي كال قضاء وقدر ما يريد ينفتح تحقيق
سكتنه وهو اخذ صينية الجاي ورجع يمهم، فرت بيدها امي مستغربة وهمست..
-اول تالي يجون علمود حرگ بيت
ما جاوبتها واشرتلها نروح نتسمع عليهم شو كلبي يلعب، وكفنه يم الشباج نسمع الزلمة العربيته مكسرة يكول..
-تسلمون شيخ مكي الشاي لذيذ
-شيخ مكي: بالعافية باشا
ماتحملت بعد مديت طرف عيني ودعيت كون محد جاي يباوع منا وصدك ملتهين يشربون بالجاي ويحجون بي عبالك اول مرة يشربون جاي.. حسبتهم منا يطلعون ست زلم كمال الدين وجاي وياه زلمة جبير لابس عسكري بس رتبه اكثر من كمال ووياهم اربع جنود..
-متأكد شيخ ما تحب نفتح تحقيق بخصوص الحريق؟
-شيخ مكي: اشكر اهتمامكم بس ماكو داعي الصار قدر مكتوب
-مثلما تحبون
دار عينه لكمال الدين ورجع باوع لابوية، حط الستكان على الطاولة الكدامه وكال بأبتسامة..
-نشكر حسن استقبالكم شيخنا الفاضل وانا صراحة سامع بسيرتك الحسنة من الناس كالو عنك عالم دين وتدرس وتنطي محاضرات لطلبة علم يعني بالمختصر انسان مثقف وتعبان على نفسك وجاي تفيد المجتمع بعلمك
-شيخ مكي: الحمدلله هذا فضل من رب العالمين
-نعم نعم، انتو اكيد منتبهين للنزاعات والتشتت الجاي يصير بين الناس وزراعة افكار غلط بعقولهم بالخصوص البعيدين عن المدينة بسرعة يتأثرون مو القصد نقلل منهم لكنهم ابسط من جميع النواحي
-چــفل: اذا تقصد يتأثرون من الناحية السياسية فـ ما اتوقع مو كل الناس عايشة مثلنا احنه رب العالمين منعم علينا وعدنا اموال وعلم وثقافة الحمدلله غيرنا ما يلحك ينام حياته عبارة عن شغل وتعب من الصبح لليل ويا دوب يطلع لگمة العيش
-كمال الدين: صحيح بس انتَ جاي تسمع شنو صاير بالجنوب؟ البصرة محترگه الاجانب ناوين على حرب وشبابكم العراقيين راح ينقتلون لانكم مفتقرين لجميع معدات الحرب
-شيخ مكي: زلم الجنوب سباع عدهم استعداد يحاربون العدو بسيوفهم وخناجرهم اذا اضطر الامر
سكتوا كلهم واني كلشي ما مفتهمة هسة شيردون ذولة بس ما طولت حيرتي لان رجع كال الضابط الجبير..
-شيخ مكي احنه عرفنا ان الك كلمة بين الناس ويحبوك ويسمعولك نطلب منك بكل احترام تحجي بينهم بالمجالس والكعدات وحسب علمي انت تصعد منابر نريدك تذكرهم بحكمنا العثماني والي قدمناه لشعبكم والرفاهية…
-رزاق: رفاهية؟ ههه
-شيخ مكي: رزاق!
-رزاق: يابة مع احترامي الك ولحضرة الباشا ولكل الكاعدين بس هسة لو نجيب طفل ونكله العثمانيين انطونا الامان والرفاهية هم يضحك علينا
-شيخ مكي: رزاق اطلع بره!!
سكت حسه ووخرت بسرعة من انفتحت باب الديوانية وچــفل طلعه بيده، دفعه للحوش ونتر بهمس..
-چــفل: انتَ مسودن!! منين جايب هالصلافة رزاق كاعد كبال ضباط تحجي على دولتهم كدامهم!!
-رزاق: جا لا يسمعلهم ابوي ويتأثر بيهم هالانجااااس
-چــفل: اسكت ولك اسكتت سد حلگك انتَ تريد تمووت
لطمت امي على خدها خايفة واشرت لـ چــفل يجر رزاق لغرفتها حتى يسولفون بدون لا يسمعوهم، طببوه للغرفة وچــفل بساع جر المفتاح وقفل الباب عليه، تخبل رزاق ظل يصيح ويدفر بالباب ويتوعد ويتحلف وچــفل ما مهتم..
-چــفل: بس تفتحيله الباب يكتلوه هنا ببيتج يكتلوه وما يرفلهم جفن!
نترها بعصبية وعافنه ورجع للديوانية، ظلت امي تلوب واكفة يم باب غرفتها وتتوسل برزاق يهيد بس علما يطلعون وهو متسودن ما يرضى..
عفتهم ورجعت اتسمع عليهم وهذاك الضابط الجبير بعده يلغي براس ابوي وابوي ساكت كلمة ما نطق..
-تدخلات خارجية جاي تأثر بالمجتمع وراح تدمرهم نهايتهم الموت اذا استمعوا الهم ووثقوا بيهم، شيخ دورك ودور امثالك تطرحون الوعي بين المجتمع تحجون بالحوزات وبالمجالس التقوموها وتنقذون بلدكم من الضياع
-شيخ مكي: باشا ماعرف شلون راح تتقبل كلامي بس اني رجل دين مو رجل سياسة نهائياً ما اتطرق للامور السياسية لاني انسان عايش لنشر الدين والتوعية بين الناس هاي رسالتي بالحياة ورسالة والدي ووالد والدي لحد جدي السطعش احنه علماء ومستحيل نتطرق للسياسة هذا مو دربنا ولا درب اولادنا
خنس الكل وره كلام ابوي الاخير وصمت مخيف توزع بالمكان محد فتح حلكه او علق على شي لفترة طويلة، خفت امد راسي بعد لا ينتهولي فـ بقيت واكفة بمكاني انتظر ردهم..
تعبت رجليه لحدما رجع كال الباشا برسمية..
-تمام شيخ شكراً على وقتك ولو تمنينه نسمع غير هالكلام بس مو مشكلة
-شيخ مكي: اهلاً وسهلاً
ودعهم ابوي طلعهم من باب الديوانية الخارجية واني ركضت اوكف يم الحوض انتظرهم يطلعون يسولفولنه..
رجعوا سـعد وچــفل وبشير ساكتين وبس اجه ابوي سأل على رزاق وامي كالتله بغرفتها قافلة عليه الباب، اشرلها تفتحله وعبالك هو ما صدك فتح الباب وصاح بكل صوته من شاف ابوي بالحوش..
-رزاق: شلون رضيت بهالشي يابة شلون!! شلون استقبلتهم وكعدتهم بيناتنه وهمه دمرونه وحرمونه من ابسط حقوقنا العالم صارت تدور بالزبل علمود اللكمة والنسوان صارت تشتغل شغل زلم حتى تعيش!
-شيخ مكي: بابا شبيك انتَ ما تكلي شبيك
-رزاق: شنو شبيك يابة اذا انه سكتلهم وانت ضحكتلهم وهذاك صفكلهم نطب على الاربعمية سنة احتلال ونظل بهالذلة والمهانة لاا فوكاهة جاييك يردوك تحجي بيهم على المنابر وتنگس منبر الحسين بطاريهم
-شيخ مكي: بابا اني مفتهم حركة دمك بس ذولة احتلال مو ناس عاديين! ميصير تحجي وياهم بهالعجرفة والعنتكة هاي مو سباعية هذا غباء!!
سكت رزاق ما ناقش بعد وابويه طب لغرفته مزعوج، رحت للديوانية لملمت الستكانات ورتبتها ورتبت المطبخ وسويت سحور فد مرة حتى ما يكعدوني من النوم..
كملت كلشي ورجعت لغرفتي فتحت القران اقرا شوية وتذكرت اني عندي واجب كتابة قصة قصيرة، صدقت ورجعت القران الكريم لمكانه وطلعت كراستي وكعدت اكتب..
كملت كتابة ورجعت كتبي بالجنطة وحضرت ملابسي لباجر، شربت ماي ونمت وكعدت الصبح على صوت ابوية الحلو وهو يقرا سورة البقرة..
كمت توضيت وصليت صلاة الفجر وطلعت ويه چـفل للدوام كل مرة اوصل اول وحدة مادري شعندي مغبشه، بدن البنات شوية شوية يوصلن لحدما طبن جليلة وفضة يدردمن بعلو صوتهن والله فلا يستحن ذني ولا يخجلن من احد..
-فضة: اووع اووووع اووووع على الدراسة اوووع
-جليلة: شوكت نخلص ياربي ونعرس ونكعد بالبيت نخلف ونربي جهالنه
-مـسك: ما تزوجين جا مو جاي يخطبون بيج ليش ترفضيهم؟
-جليلة: من تزوج فضة اني اتزوج
-فضة: دنجبي
كعدن بصفي وكلمن شمرت جنطتها بالكاع ما مهتمات، نامت جليلة على الرحلة وفضة سندت ظهرها على الحايط وغمضت عيونها..
-مـسك: كومن اجت المعلمة
وكفنا كلنا وكعدنا وره ما القت التحية، بعدنا ما كايلين بسم الله وصاحت طلعوا الواجب واجت تفتش وحدة وحدة وجليلة ظلت تلوب، ضربت على ايدها خفيف وهمست..
-مـسك: شبيچ
-جليلة: نسيت اكتب
-فضة: طبعاً ملتهية بالسوالف الطايح حظها
يتهامسن بين بعض وجليلة تدور بالوجوه منو بعد ما كاتبة حتى مو وحدها تتعاقب..
-مـسك: هاج اخذي هاي
-جليلة: لا مالتج هذا ما ارضى
-مـسك: لا ولج هاي كتاباتي العادية اخذيها وحطيها كدامج ولا تحجين شي حتى ما تطلعين جذابة
هزت راسها خوش واخذتها حطتها كدامها، وصلت المعلمة يمنه وما تقرا شنو كاتبات بس تباوع للكراسات بس شافت بيهن كتابة عبرتنا..
-جليلة: مـسك ابوسج بين عيونج
همستها وجرتني باستني بخدي من دارت وجهها المعلمة، ابتسمت وكلتلها تعوف الكراسة كدامها خاف تحجي عليها لان ضمتها..
-المعلمة: يلا عيني منو تقرالنا قصتها
كلنا خنسنا محد رفعت ايدها واني اولهن، تندمت كلش على كتابتي وحسيت بروحي جازفت، انه هيج كتابات اكتبهن لنفسي مستحيل اطلعهن لاحد مادري شبيه البارحة استمطيت وكتبتها..
-المعلمة: انتِ شنو اسمج؟
اشرت على جليلة والمسكينة لو اذبحها كطرة دم ما نلگه بيها، توترت وظلت تتلفت تباوعلي وتباوع لـ فضة ماتعرف شتسوي..
-المعلمة: انتِ بنتي اي انتِ شنو اسمج؟
-جليلة
-المعلمة: اقريلنا كتابتج جليلة
عصرت عيوني متندمة اكثر ليش انطيتها كراستي راح تضطر تقرا المكتوب بيها، باوعتلي مستحية درت وجهي منها متوترة اكثر منها وكلبي يدك.. وكفت على حيلها ولزمت الكراسة بيدها ترجف، جرت نفس وبدت تقرا المكتوب..
“سكون عميق يلف الشارع الخالي من أنفاس المارة، ونسيمٌ عليلٌ ينعش الروح، بينما تتزين السماء بقمرها المتناقص فيغمر الشارع وأسطح المنازل وقلبي بنوره.
تجرأت وخطوت خارج المنزل بخطوات مترددة قاصدةً النهر فهناك أتنفس الصعداء وأزيح عن صدري أثقال الدنيا، تنهدت… فابتسمت… ثم انهمرت دموعي حين تذكرتها”
تقرا واعصر بأصابعي والمعلمة عينها على جليلة مشدودة للمكتوب والطالبات هم كلهن صافنات عليها وجليلة بنفسها مستغربة من الجاي تقراه، حطيت ايدي على راسي من وصلت لمقطع..
“رأيتُ ظلاً يراقبني من بين قصب النهر فتملكني الذعر وانطلقت أركض بكل ما أملك من قوة باتجاه المنزل لكن حظي في هذا اليوم كان عاثراً إذ ارتطمتُ بجسد رجل ضخم البنية، ملثم الوجه، لا يظهر منه سوى عينين بارزتين، بينما كان جزؤه العلوي مغطى بقميص رمادي اللون….”
ظلت تقرا بالمكتوب وتوقفت لحدما وصلت للجزء الي غبت بي عن الوعي، رادت تكلب الصفحة تكمل والمعلمة عبالها خلصت وبدت تصفكلها حيل والطالبات يصفكن وياهة وفضة وجليلة وحدة تباوع للخ..
-المعلمة: احسنتِ جليلة احسنتِ المكتوب رائع حبيت شلون شرحتي تفاصيل المكان ومشاعر البنت وبشنو حست
-جليلة: شكراً
همستها وكعدت خانسة، تحمست المعلمة وكامت وكفت على حيلها وصارت تأشر على البنات يقرون كتاباتهن لحدما وصلتني..
-تفضلي اقريلنا كتابتج
ضجت كلش مو من المعلمة ضجت من نفسي لاني تهورت وكتبت شي مثل هذا وراح اضطر اقراه بصوت عالي، وكفت على حيلي وقررت اقرا وشيصير خلي يصير..
-مـسك: المكتوب من مخيلتي مو شي حقيقي
-تفضلي اقريلنا
دعيت بكلبي كون يخلص الدرس وما اللحك اقرا مسحت على وجهي متوترة وبعدني ما فاتحة حلكي واندكت باب الصف، عيوني تعلكت بالبنية الواكفة منتظرتها تحجي..
-عفواً معلمتي مـسك مكي موجودة هنا؟
-مـسك: اني
-جيبي اغراضج وتعاي يردوج الادارة
اللتفتت على المعلمة هزت راسها بطريقة روحي واني ما صدكت لملمت اغراضي جريت الكراسة من جليلة ضميتها بالجنطة وطلعت ناسية حتى اودعهن..
خفت من اجتني البنية خاف اهلي بيهم شي بس الله نقذني الحمدلله مادري وين جان عقلي من كتبت البارحة هيج شي للمدرسة!
كتبت عن كحلاء وشلون انهزمت، كتبت تفاصيل غبية ما لازم تنكتب ولا تنقرا كدام احد كتبت عن السيطرة الوكفونه وعلى شجاع وعن كمال الدين شلون انطانه الختم وخلانه ندخل كتبت حتى نظرات عيونه الخضر من ثبتهن عليه وشلون انعكس الضوه على شعره الذهبي، كتبت مشاعري، خوفي، ضياعي، حبي لبنت عمتي وانهياري عليها بأختصار كتبت كلشي..
طبيت للادارة بخطوات مستعجلة وشفت المديرة واكفتلي بالباب، دك كلبي مرعوبة من سألتني..
-انتِ مـسك مكي؟
-نعم اني
-تكدرين تطلعين ماما جاي ينتظروج بره
عفتها بلا ما اسأل منو اجاني خايفة والف فكرة وفكرة اجت براسي، طلعت من المدرسة ادور على واحد من اخوتي وفزيت مهبوطة من شفت كمال الدين بوجهي مبتسم..
-كمال الدين: اخيراً
-شتسوي انتَ هنا؟ وين اخوتي؟
-بالحفظ والصون
-شنو قصدك؟ وين يعني بالحفظ والصون اعتقتلتهم؟؟
-اي
-انتو شتردون من عدنا شتردون والله راح تخبلونه
-نريدج تهدأين وتثقين بيه مـسك
-المن صحتلي حتى تحرك كلبي؟
-تعالي وياي حتى نحجي بمكان هادئ وحدنه
-شنو مخبلة واروح وياك وحدنه اشايفني انتَ!!
-اختاري يا اما تجين برضاتج يا اما يجروچ منا جر
حرك كلبي يحجي بهدوء ومقتنع بنفسه، باوعت لجنوده ثلاثة وراه واكفين منتظرين منه حجاية وهو عيونه بعيوني..
-تايهتلك؟؟ اروح اشتكي عليك يم المديرة
-المديرة الشادة ظهرج بيها بنفسها طلعتج الي روحيلها حتى اجرها وياچ واحرمكم حتى من المدرسة
راح انجلط هذا شكد حقير وخسيس ونظراته الباردة ذبحتني، اشرلي على الكروسه يريدني اصعدلها من كل عقله، هزيت راسي بـ لا لو يكصبني هم ما اصعد وياه..
-ما اسويلج شي وما اأذيج لا تكونين السبب بحبس اخوتج
-ما اصعد وياك!!
-تمااام لا تصعدين تعاي نتمشى ونحجي!
-شلون اأمن بيك واجي وياك شلوون
-ما اسويلج شي لو اريد اسوي تتوقعين اوكف هالوكفة اتوسل بيج بس حتى احجي وياچ!!
نترها بصوت ناصي واشرلي بأصبعه امشي كدامه، شكد كرهته وشكد حقدت عليه ودعيت عليه بكلبي الله لا يوفقك ولا يسعدك.. مادري السويته غباء لو ذكاء بس استسلمت ومشيت كدامه ادعي الله يحفظني ويخلصني من هالزلمة..
مشه بصفي ساكت وجنوده وراه ابتعدت منه كلش صار هو بجهة وانه بجهة، عاينلي مطنكر ونتر..
-وين رحتي هناك
-جا لعد تريد العالم كلها تشوفني امشي وياك
-الشارع فارغ! ثانياً انتِ منقبة محد يعرفج!
-جا انته شون عرفتني
تحسر ضايج وظل يدردم عليه بالتركي يحجي سريع كلشي مافتهم ولا اريد افتهم اريد بس يفضها ويسولف مو روحي خرطت..
اشر على الجامع وكال..
-نكعد هنا
هستوني جاي اكله شلون اطب لمكان الرجال خاف يشوفوني وهو سبقني وكال..
-اكو حديقة صغيرة هنا كدام المسجد نكعد بيها والمسجد فارغ من الناس بس الشيخ كاعد جوه حتى تأمنين وتاخذين راحتج
ما اقتنعت بس من مديت راسي شفت الحديقة مو ختلة وبأقل عيطة العالم تلتم عليه، باوعت لجنوده وهمست..
-ماريد ذولة
هز راسه ميخالف واشرلهم بحواجبه يرحون، راحوا وظلينه وحدنا الحديقة صغيرة كلش وبينها وبين الشارع سياج طبيت بيها وظهري على السياج وهو وكف كبالي..
-تفضل كول شنو عندك؟
-دقيقة
حجه من مكانه ويه واحد من جنوده وهذاك اجه وبيده بطل ماي انطاه اله ورجع طلع..
-تفضلي اشربي
-برمضان!
“زازا: ماكو شي بس تذكرت رياكشن في رمضان
“
باوعلي مستغرب ثواني ومسح على وجهه يضحك ويهز براسه..
-نسيت لاني ما اصوم
-بارك الله بيك
-ممنوع عليه الصيام الطبيب مانعني
-ما يهمني احجيلي شنو تريد مني وخلصني
-رفعي عن وجهج خليني اشوفج
-لا تسودني انتَ اشايفني!!
-شايفج بنية كاملة دگلها گلبي
من الصدمة احس بعيوني طلعت من وجهي ما تخيلت اسمع هالجواب، خزرته متوترة وعفته وطلعت منا وما رضا يعوفني جرني من زندي حيل ودفعني على الحايط ووخر ايده مني يحجي سريع..
-لا تتهورين وسمعي شنو اريد اكول صار اشهر منتظر هاليوم!
-يا يوم يا يووم
-اني لا متسرع ولا مراهق ولا رجال ما يعرف شنو يريد وكل كلمة راح احجيها حقيقية ومسؤول عنها
-وخر عني لا تسببلي مشاكل
-الموضوع اصعب عليه مما هو عليج مـسك، اني ضابط عسكري بالجيش العثماني امثل مكان ابوية المرحوم وانقل صورته ومكانته مستحيل مجتمعي واهلي يتقبلون هالوضع
-جا شتريد مني عوفني روح
-المشكلة ماكدرر
نززني من ضرب على الحايط البصفي بقبضة ايده حيل وكمل يكول..
-ماكدر ماكدرر حاولت ماكدرت مـسك مااكدرت
وخرت من ايده خايفة صار كلش قريب مني وكفت على صفحة اعاين على فتحة السياج اريد بس انهزم منا..
-كمال الدين: شفتج مرة على النهر تبجين ومن هالمرة ما كدرت اشيلج من راسي شكد حاولت شكد ضغطت على نفسي حتى اطلعج من راسي فشلت
بلعت ريكي يابس لساني خشب والفضول كتلني اريد اعرف يمته شافني واخاف اسأل ما يصير اطوخ وياه هذا مسودن ومغرور وشايف الدنيا كلها جوه رجله..
سكتنه ثنينه هو يهز براسه عبالك متندم ليش حچه وانه صافنة على حركاته، درت وجهي بسرعة من رفع عينه الي وكال بتعب..
-كمال الدين: ماعندج فضول تسأليني شي
سكتت ورجعت عيوني عليه وهو من كدما مركز بوجهي احس عيونه اخترقت البوشية وجاي يشوف ملامحي، هز راسه خوش وذب حسرة عالية كبل لا يكول..
-اني احچيلچ بلكت گلبچ الجلد يلين شويه
هم اخذله لحظات ساكت منتظرني انطي ردة فعل هو ما يدري انه كوة واكفة على طولي من الخوف، تحسر ضايج وطلع من جيبه جكارة شعلها وكال بدون لا يباوع لوجهي..
-انتقل شغلي لمنطقتكم واني رافض وكاره هالنقلة بس قوانين عسكرية محد يكدر يتعداها، جنت اكره اكعد بمقري ما اطيق الوجوه التشتغل وياي واريد بس اتعارك، جنت اتهرب منهم خوفاً عليهم لا اطلع حرگتي بشخص ما يستحق..
حط عيونه بعيوني توترت من نظرته لون عينه تغير جان اخضر فاتح هسة صار طوخ..
-وبليلة من الليالي كلش اختنكت عفت مقري ورحت للنهر وصادفتج هناك جنتي كاعدة على الجرف تبجين وحدج وتحجين ويه روحج ولاول مرة بحياتي انشد لشخص يحجي عراقي
حجاهة بأستهزاء وما استغربت العثمانيين ما يهتمون لدرجة ما تعبوا رواحهم يتعلمون لغتنا طول هالسنين وكمال الدين من النوادر اليحجون عراقي بطلاقة..
-مـسك
ظليت ساكتة ومنزلة راسي السمعته اثر بيه كلش، رفعت عيني من تحسر ووخر مني يفرك وجهه وشعره وحط راسه بين ايده محتار.. حسيته تايه ما يعرف شيسوي چن الحچاه هسة مصيبة وكارثة حقيقية..
خنسنه ثنينه هو على وضعه واني على وكفتي مادري منين اجتني هالجرأة وباقية واكفة هنا شنو هالوكاحة والصلافة العندي..
-عفية رجعني للمدرسة
-ما كملت كلامي
خفت من نبرته صح يحجي بهدوء بس عبالك يهدد بيه، حرت ماعرفت شلون افلت روحي منه وما اجه ببالي غير ابجي عصرت عيوني ووكفت ابجي وموتت روحي، رفع راسه من سمعني ابجي واجاني متخبل..
-ليش تبجين؟ شحجيت اني؟ اول مرة اشوف وحدة تبجي لان واحد گاللها احبج!
-رجعني للمدرسة رجعني
-اي ارجعج بس خليني اسألج هالسؤال براسي شنو موضوع الرسائل السألتيني عنهن؟ اكو شخص جاي يدزلج رسايل؟
-لا لااا بس رجعني
ضرب الحايط بيده مرة ثانية ضايج وسوالي طريق حتى اكدر اطلع، زبكت كدامه اركض وهو يمشي وراي ويصيح بكل صوته لا استعجل غطيت حتى عيوني لا يعرفني احد من اليمشون بالشارع..
رجعت للمدرسة وركضت للصف روحي رايحة ما طولت دقايق وخلصت الحصة وجليلة وفضة استلمني وين جنتي وشنو صار وانوب بالفرصة اجن بنين ورجب هم بس رجــب ما تحجي بس واكفة ويانه…
**
“انيسـة”
ركض بينه رمضان ركض صلوات على محمد ما حسيت بي ولا ركبت جدر على النار الجوارين يومية وحدة عازمتني لبيتها وتدزلي فطور لابوية واحمد واني متونسة افرفر على البيوت…
اليوم كلت اطبخ بالبيت ما دام جليلة وصادق ويمامة يمي يباتون علمود باجر عزيمة بيت واثق فضة عدها نذر سفرة لام البنين..
عفتهم نايمين الظهرية وطلعت لبيت خالي مكي صار يومين ما شايفتهم، تلكتني باجي فوزية من الباب تبوس وتحضن وتشمشم عبالك صارلها شهور ما شايفتني..
-انيسة: هنه كلهن يومين ما اجيتكم هيج فراكي صعب
-فوزية: ليش شعندي غيرج اني بمعزة مـودة ومِــسج
ابتسمت وسألت على مـسك كالت نايمة، بعدها منطوية على روحها وما رجعت نفس گبل سالفة كحلاء كسرت ظهرنا كلنه مو بس ظهرها لليوم اني ما مستوعبة الصار وگلبي يوجعني احاول ما افكر بي وبس ادعيلها يارب تكون بخير ومرتاحة..
طبيت ويه باجي للهول خالو مكي كاعد يقرا قران وبيبية مـسك كاعدة مادة رجليها تسمعله، بس شافني صدق ومدلي ايدي بوسته وبست ايده وسحبها بسرعة ما يقبل..
سلمت على بيبي وكعدت يمها اسأل على احوالها وخالو مكي يباوعلي مبتسم جنت گبل استحي من يصفن بوجهي بس بمرور السنين تعودت وعرفت من يشوفني يتذكر امي ويشتاقلها..
-جدة: هسة شني تنطون لو لا
-شيخ مكي: حجية ليش مستعجلة منو يركض ورانه
مافهمت على شنو يحجون بالبداية بس بعدين عرفت ديحجون بخطبة مـسك، اخو باجي فوزية محاچيها من وكت عرس بشير كايللها يريد مـسك لابنه كاظم وعلى اساس بالعيد يعقدولهم بس چنه خالو مكي ما مقتنع واظن مـسك هم متدري بالسالفة..
-فوزية: يمة هسة غير هي مسيچه تقتنع لحد هسة ما فتحت الموضوع وياهة عود كلت لابوها يحاجيها شو غلس علينا
-جدة: من شني يشكي كويظم وما تردونه؟ زلمة خشنة وشاغول ويحبكم عايف اهله ومستقر ببيته هنا جريب منكم عمي كبعوا وانطوا
-فوزية: يمة كال اخوي مو على هذا العيد يردوها على عيد ضحية عبن كاظم عنده سفر
-جدة: مالكم غرض يعقد عليها ويسافر ليش هالمماطل
-شيخ مكي: حجية تردينه نجره من اذانه حتى يعقد على بتنه؟
-جدة: انه اجرنه مالكم غرض انتم بس حضرولنه البت
سكت خالو وهي ظلت شكد تحجي وتمدح بحفيدها شوية وتسوي نبي وباجي فوزية وياهة وحدة تجر طول والثانية عرض، حسب علمي كاظم لا شايف مـسك ولا هو مختارها السالفة كلها خطبة اهل ابوه رادها اله وهو ما ناقش وماعنده اعتراض..
-شيخ مكي: حجية من الاخير احجيها بوجهج هيج امور مابيها مجاملات وماريد تزعلين مني بس اني ما مقتنع بهالزواج لاسباب معينة
دكت صدرها بيبي وزحفت زحوف على كعدتها تقربت منه وكالت..
-اسبابيش ليش تلكون احسن من كويظم ومن خشونة كويظم
-شيخ مكي: زلمة خشن ومرتب وخوش ادمي ومتربي بس حجية كاظم لا يصلي ولا يصوم واني ما اكدر اجازف ببنتي ويه انسان ما يخاف من الخلقه؟ اذا هو واجبات ربه ما يسويهن وما يهتملهن تردي يهتم ببنتي؟
-جدة: شني هسة كلشي صلاة وصوم هاي انه اخذت ابو فوزية ما يعرف ربه من نبيه بس زلمة خشن صاني وصان العشرة
-شيخ مكي: قال رسول الله (ص) {اذا جاءكم من ترضون خلقه ودينه فزوجوه} ما كال زلمة خشن وزلمة ناعم حجية بعيداً عن كاظم وما نختلف على اخلاقه بس الما يخاف الله تردي يخاف الله ببنتي؟
سكتت جدة ضايجة وباجي فوزية هم خنست حسيتها اقتنعت بحجي خالو مكي، شوية وكالت جدة..
-نكله يصلي ويصوم سهلة جا هاي هم يرضي ربه وهم يرضيكم وتنطوه مـسچ
-شيخ مكي: اذا تغير واللتزم بواجباته ماعندي مشكلة بس كون مو يوم يومين ويرجع يكطع
-جدة: لا يكطع شني اكطع راسه خلي چـفل يراقبه وشوفه شون يتغير
اتفقوا ينطوه فرصة بشرط يتغير ويلتزم وجدة كيفت كعدت تصفك وتهلهل فرحانة بس خالو بعده ما مقتنع وحسيته حجاهة بس حتى يسدون الموضوع وطلب من عدنه محد يفاتح مـسك بهالسالفة الا تصير رسمية..
-جدة: عاين القسمة من تجي تلجم الحلوگ، لو خاطبها ابن شارع حشى مـسچ وجان قسمتها هم تصير لو انتَ والدنيا كلها وكفت ضدهم
-فوزية: يااا يمة اسم الله شنو ابن شارع لا ان شاء الله تصير لكاظم
-جدة: خيبة لو اطول لسان هم ينگص لو جان مكتبولها تتزوجه وانه من جبت طاري ابن الشارع حشى الشيخ جاي اضربلج مثل
عفتهم يحجون وطلعت للحوش شفت شروق واكفة تسگي الزرع وتدردم بصوت ناصي، ابتسمت وتقدمت اسلم عليها بس چنها ما حست بيه لان ظلت تحجي عبالك دتسولف ويه احد وهو محد ماكو يمها..
-شروق: الله ياخذكم كلكم امداني بيوم الاجيتكم كلكم نفس الخيسة وهاي مـسك ااخ لو اللزمج الا اطلع روحج مسوية روحها نادرة وشاغولة براسي الچلبة كلما شافوها تركض تشتغل صاحوا شبيچ انتِ فاهية وكوة تكومين اكلهم حامل البعيرة جدتهم تجاوبني كلنا حملنه واشتغلنه ليل نهار نخبز ونكنس ونشيل سطول الماي على روسنا بس والله مو صوجكم صوجي اني حطيت روحي بهالوضع الجايف
انصدمت بيها اسمعها وصافنة حارت شحجت على مـسك وعلى بشير وعلى باجي فوزية تسگي وتحجي بحقد، عفتها وحدها وفتحت باب الحوش وطلعت متأكدة حست بيه من طلعت بس ميهمني كلش انقهرت منها..
رجعت لبيتي وكضيت اليوم ويه اخواني، ثاني يوم من الصبح اخذت جليلة ولاكيت مـودة ومِــسك هم جاي يرحن لفضة يعاوننها بالطبخ، تسالمنه ببابهم بالنص ساعة طارت بس سوالف ياله دكينه الباب وفتحتلنه فرح..
-جليلة: وين فضة؟
-فرح: بالمطبخ تعالن
رحنه للمطبخ لكينه واثق كاعد يمهه يكسرلها جوز وهي حاطة المنخل مال الطحين وتفرك الجوزة بي تطحنها..
-انيسة: السلام عليكم
رفعوا روسهم ثنينهم وواثق من شافنه ترخص وطلع من المطبخ حتى ناخذ راحتنه، نزعت عباتي وكفيت ردان دشداشتي ومديت راسي بالجدر الحاطته على النار..
-انيسة: شطبختي فضة؟
-فضة: لفيت دولمة البارحة وهسة راح اكوم اسوي فسنجون وواثق كال نسوي كباب بعد
-مـودة: الفسنجون كافي خية منو ياكل بعد اذا هو بالسفرة
-فضة: ميخالف واثق كال نجيب على حب ام البنين وبعد لبن وشرابت عندي وتمر وحلويات وخير من الله
وكفنه نعاونها شوية واجت باجي فوزية تساعدنا كلمن لزمت حاجة تشتغل بيها، للعصر رجع واثق وبيده تمر وكرزات وحلقوم صاح من الحوش لفضة تروحله ما يرضى يطب للمطبخ حتى من صاحتله باجي وكالتله البنات كلهن لبسن عبيهن..
-فضة: ما يجي لا تعبن نفسجن
جابت الاغراض من ايده واحنه بدينه نحضر بعد راح يأذن بس فاجأتنه فضة من كالت ناخذ الاكل لبيت خالو مجتبى تريدنا نفطر ببيتهم..
-باجي فوزية: شيشيل الجدورة
-فضة: الولد يشيلوهن يلا باجي حبابة كلش بنفسي نفطر ويه باجي سوسن
طلعت باجي تصيح للولد واحنه ركضنا لغرفة فضة طبينه والولد خطية حاروا ينقلون بالجدورة والاغراض لبيت خالي مجتبى والبنات متشمتات بيهم..
-فرح: حييل خلي شوية يهزون طولهم
-انيسة: يا خبيثات
ضحكن وفضة جرت جليلة مادري شنو همست بأذنها وهاي اختي شو حالها كله انگلب ردت اسئلها شبيچ بس اعرف ما راح تجاوبني هسة..
سكتت عنهن وطلعنا لبيتهم بعدما كملوا نقل كلشي وتلكتنا بنين من الباب فرحانة وتبوس بوحدة وحدة بس من وصلت يم باجي فوزية سلمت عليها ببرود ودارت وجهها منها..
ظنيت بس اني منتبهة بس مـودة هم لاحظت هالشي لان ظلت اليوم كله تباوع لـ بنين ومقهورة، فرشنا السفرة بالهول وباجي سوسن مكيفة بينه تفتر بيناتنه وتضحك وتأهل وتسهل ووكفت يم فضة لزمت وجهها وباستها بخدها حيل وكالت..
-اروح فدوة للنادرة
ابتسمت من شفتها راحت تكعد ويه باجي فوزية وجدة يسولفن وعينهن على فضة اعرف نيتهن شنو باجي سوسن حاطه عينها على فضة وعلى العيد تريد تخطبها لـ سيف..
-فضة: بنين، جليلة تعالن اريدجن
راحن سوه للمطبخ شوية وطلعت جليلة بيدها صينية اكل سألتها هاي المن عبالي تريد تدز للجيران بس فاجأتني من كالت..
-هاي لسيف
-سيف؟
-جليلة: احم اي باجي سوسن كالت ميكدر يفطر ويه الولد وهمه ياخذون فطوره للغرفة كل يوم
-لعد انتِ تاخذيله؟
ويه سؤالي طلعت بنين من المطبخ مبتسمة..
-بنين: ردت اني اخذله بس الصينية ثكيله حيل خافت فضة اوكعها وكالت لجليلة تشيلها بس راح اطب وياهن ميرحن وحدهن
-انيسة: جيبي اني اشيلها انتن رجعن للهول
-فضة: لا لا انيسة اصلاً احنه گلنه لبنين نروح لان ما تحمدناله على السلامة وره الصار وگلنه فشلة كل البنات سلمن عليه الا احنه
-انيسة: خوش امشن نسلم عليه سوه
مشن كدامي ثلاثتهن وعيني على جليلة متوترة كلش وتتلفت عليه، دكت بنين الباب وسمحلها تفوت اشرتلنه تعالن وطبينه سوه عليه هبطنا الرجال..
-فضة: السلام عليكم، الحمدلله على سلامتك ابن عمي متشوف شر ان شاء الله
نزل عيونه وكال بصوت ناصي..
-الله يسلمج مشكورة
نزلت جليلة الصينية كباله وابد ما رفع عينه على أي وحدة بيهن، ندست جليلة بعكسي حتى تتحمدله على السلامة وهاي اختي فهت حتى حجي ما تعرف تحجي بعد ظلت مدنكة وخدودها صايرات طماطات..
-بنين: سيوفي البنات مستحيات لان ما تحمدنلك على السلامة واجن وياي، هذا فطورك حبيبي هسة بعد دقايق ويأذن بس صبينه من وكت حتى مننخبص
-سيف: عاشت ايدكم
جريت جليلة من ايد وفضة من ايد اريد اطلعهن من غرفته وتلاكينه بالباب ويه باجي سوسن كيفت من شافتنه هنا راحت لـ سيف وكالت بفرحة..
-باجي سوسن: سيف هاي فضة بت عمك مسوية سفرة لام البنين وطبخت وجابتلنه
هز راسه منزل عيونه احلى شي بسيف ثگله ما يرفع عيونه علينا لو مادري منو توكف كباله، رجعت غمزت وكالتله..
-فضة اخت واثق بت عمك صالح شوفها شلون تشبه امها الله يرحمها باوعلها زين
-سيف: شفتها يمة
-بنين: يلا يمة نعوفه هم ياله نصب الفطور
اخذت البنات وياي واشوف فضة تباوع لجليلة واختي ولا رفعت عينها من الكاع، فلتت نفسها من ايدي وراحت للحمام كالت تريد تتوضى وفضة وكفتلها بالباب تلوب..
-انيسة: شبيچ فضة
-فضة: انيسة شبيها باجي سوسن ليش هيج حرجتني كدام الرجال
ضحكت على شكلها شلون مقهورة وكلت بصوت عالي ما مهتمة..
-ليش ضايجة تريد تخطبج لسيف اول يوم العيد
-فضة: اشش اششششش سكتي هالموضوع كلت لـ بنين مينفتح بعد شبيهم مو كلتلهم ماريد
تهمس وتباوع لباب الحمام حسيت اكو ان بالموضوع خصوصاً من طلعت جليلة من الحمام وجهها راح ينفجر وعيونها مخبوطة بدموعها..
-جليلة: سيف يريد يخطب فضة؟
-فضة: لا لا جليلة لا والله ماكو هيج حجي
-انيسة: لا اكو شبيجن متسودنات واذا خطبج ابن عمج ورايدج شبيها هو اكو احسن من سيف
-جليلة: مهناية
حجتها بصوت يرجف وركضت للمطبخ وفضة عافتني وركضت وراهة، كلبي لعب واحساسي شكدما جان قوي حاولت اجذبه من زمان شاكة بـ اختي بالها ويه واحد من ولد خالي مجتبى واغالط روحي وهسة تأكدت من بجيها ورجفتها.. اخ يالقهر اختي عاشگة زلمة لو ندعي ليل نهار ما يلتفت عليها ولا يفكر بيها..
**
“رجــب”
طبتلي امي للغرفة تركض لابسة عبايتها وبيدها البوشية وتأشرلي بيدها مستعجلة وتكول..
-كومي كومي لبيت عمج مجتبى كومي
-وين شعدنا لعد والفطور؟
-ناخذه ويانه هناك نفطر وياهم كومي
كومتني غصب عني وخلتني اللبس نفنوف ميناسب زيارة عادية وطلعت وياهة، شايلة بيدها جدر التمن وجدر المركة وتتمركض.. من يوم الحريق حاولت قدر المستطاع ما احتك بيها واسوي كلشي تطلبه مني بدون نقاش..
مشيت وياهة كلبي يوجعني اباوع عليها شلون تهف كدامي تمشي بكل سرعتها وافكر شنو تريد تسوي هالمرة؟ هم تحركهم؟ لو هالمرة ناوية تكتل سيف خلاص؟!
ما جاي انسى شلون شفتها واكفه على سياج سطحهم، من اول ما لمحتها عرفتها امي اعرف جسمها من وره وعرفتها لابسة هاشمي مرة عمو مكي بس ما كدرت اكول لـ بنين هاي مو باجي فوزية وانهي علاقتنا بيدي..
امي سوسة شيطان تنهار لو شافت ناس مرتاحين وتحترك روحها لو شافت ضحكة مرة عمو محتبى باجي سوسن تكرهها كره مو طبيعي عجزت افهمه تتمنالها الموت وكل يوم تدعي عليها ما تفوت وكت غروب اذا ما رفعت ايدها للسما ودعت عليها وعلى خلفتها كلهم..
بيت عمو مكي صح تكرههم بس اشوى لان فايدها عمو مكي ينطيها فلوس كلما راحتله تبجي بس هالمرة حقدها عماها شلون من راحت تتوسل بي على فلس ما انطاهة حركت بيته وكلبه على حلاله وبساتينه.. ماعرف نيتها جانت تريد تأذي ابن عمو مجتبى لو هي صدفت وياهة ووكع ابنهم..
ليلي ما انامه من اتخيلها كتلت ولد شاب بريء وحركت شباب مالهم ذنب، اموت قهر وهي ولا هامها عايشة حياتها بالطول والعرض كضت رمضان كله عزايم وونسة وطلعات تالي الليل لبيوت صديقاتها..
وباليوم الما تطلع بي يجوها خوالي ومضحي يطبون للهول بالليل يتناقشون ويسولفون بالفلوس وبأشياء ما افهمها لحدما امل واعوفهم وأرجع لغرفتي..
وصلنا بيت عمو مكي ووكفت كباله تباوعله وتهز براسها عود متحسفة، دارتلي وكالت..
-حرامات شون بيت يشهگ اليتعده منه تاليته غده رماد
-رجــب: رمموا كلشي مابي رجع مثل اول
-نجبي نجبي ما تشوفين الصخام على الحياطين
-اي يمة بس راح يلبخوه
كرصتني ما عاجبها شون ما وكفت اتشمت وياهة، راحت لبيت عمي محتبى لكينه الباب مفتوح وجهال راهي بره يلعبون طبينه حوشهم وكل النسوان اندارن علينا مستغربات..
-صولاغ: السلام عليكم عيوني
رفعت بوشيتها مكيفة وراحت لوحدة وحدة تسلم عمة نرحس ومرة عمي ابو نديم هم هستوهن جايات بعدهن بعبيهن.. تسالمن وياهة والوجوه مكلوبة خجلت كلش وحسيتنا ما مرغوبات..
-صولاغ: افتهمت ملتمين اليوم عاد كلت اجيب فطوري واجي وياجن على الواهس
-نرجس: هلا بيج داده زين سويتي
انطت الجدورة لـ فضة اخذتهن وطبت للمطبخ ريحة الطبخ تخبل البنات ديصبن ويودن للسفرة بالهول، على وكفتنا واذن عمو مكي من الديوانية اخذت امي عباتي واشرتلي اروح ويه البنات..
طبيت للمطبخ سلمت عليهن جاوبني كلهن بس جليلة ساكتة وكاعدة بالكاع متچية ظهرها على الميز وساندة ايدها على ركبها وصافنة بالفراغ..
-انيسة: هلا بيج رجــب، تعاي اخذي من ايدي
اخذت من ايدها المركة ووديتها للسفرة، رجعت الهن وشفت جدورة امي مكترة ما صبن الاكل اخذت ماعين حتى اصب ولزمت ايدي مـودة وكالت بأبتسامة..
-الاكل خير من الله رجــب هواي حرامات خاف يزود رجعوا فطوركم وياكم يفيدكم فطور لباجر واخلصي من الطبخ
-رجــب: ميخالف نحطه بالسفرة ننقش بي يمكن واحد يعجبه ياكل
-انيسة: لا يمعودة هسة فضة تجي تلعلع علينا تريد تكسب اجر براسنا ونفطر بس من طبخها
ضحكن كلهن واني ابتسمت ونزلت الماعون من ايدي، حزت بكلبي خصوصاً واني اعرف ليش محد يرضى ياكل من طبخنه لو نجيبلهم عسل هم ما يحطوه بحلكهم ولا يضوكوه يخافون بي شي، كوة سيطرت على روحي ما اصرخ بيناتهن واحلفلهن اني طابخة الفطور وامي ما جاست الجدر..
اللتمينه النسوان بسفرة والزلم بالديوانية بسفرة وحدهم، كعدت وماكدرت اكل شي مستحية ونفسي تلعب من المواقف التفشل الامي تخليني بيهن..
-صولاغ: لعد وين اكلنا رجــب شنو نسيتي؟ كومي صبي كومي خوش مركة طابخين
-فوزية: عاشت ايدج خية بس الاكل هواي ما يحتاج
-صولاغ: لا لا كومي رجــب صبي وتعاي
كمت صبيت بمواعين وجبتهن حطيتهن بالسفرة ومثلما متوقعة محد منهن مدت ايدها وضاكت المركة، اختنكت كلش اكلتلي لكمتين وكمت غسلت وكعدت بالمطبخ انتظرهم يخلصون..
**
“فضـة”
عجزت افهم جليلة اني مالي علاقة وحلفتلها بروح اهلي كلت لـ بنين ما اقبل بسيف ولو يحطون سجينة على ركبتي هم ما اوافق، انقهرت منها تسمعني وتهز براسها ساكتة لا تعاركت وياي ولا حتى عتبت خبلتني..
وكفت اغسل مواعين وياهة واخطف منها نظرات فطور ما فطرت حطت بحلكها تمرة وبعد ما طخت الاكل ظلت بس كاعدة على السفرة حتى محد يحس بشي..
-فضة: جليلة عليج الله كولي شي أي شي بس لا تسكتين وتذبحيني
ماكو فائدة بقت ساكتة، كملنه ماعين وتنظيف المطبخ واجتنه مـودة تضحك وكوة تمشي..
-مـودة: ولجن اجو الولد سحلوا سيف سحل من غرفته واخذوه وياهم للديوانية تعالن سمعن يموتون ضحك
جريت ايد جليلة واخذتها ويه البنات شكد نحب من يلتمون الولد ونتونس وهسة من طلع عمو مكي اكيد ماخذين راحتهم على الآخر، مديت راسي من الشباج اني ومسك وانيسة نباوع بالختلات والباقيات وكفن بس يتسمعن..
-چـفل: شبيك عازل روحك وما ترضى تشوفنا سيف تره والله گلبي طگ
-رزاق: عليك الله خلصنا منه كل يوم يبجي عليك لعبت رواحنه
-سـعد: اطبله للغرفة اللكاه حاضن قميصك ويبجي عليك هواي متأثر بالنبي يعقوب عليه السلام
متنه ضحك عليهم وهمه هم لزموه چـفل حاروا شسووا بي طلعوا كل سوالفه وهو نار كل ساع لاطش واحد براشدي يسد حلوكهم وهمه ولا مهتمين مستمرين..
-واثق: لك بشير اني اذا مرضت هم تشمشم بقميصي وتبجي؟
-بشير: اتفل عليه
-واثق: لا يا زبالة شباب من هسة اعلن عن فصخ صداقتي ويه هذا العار منو يحتضني منكم
-سـعد: احنه احنه انه وبلال
-واثق: منو يحتضني منكم غير بلال وسعد
-رزاق: طايحة بيدك صداقة سـعد وبلال وعلي تنسى روحك من تكعد وياهم
-واثق: صح يعدوني بثولهم لهيج انسى روحي
-بشير: منيلك هاي وين اكو بذكاء سـعد ينضرب بي المثل من صغره فطن
-واثق: خلص ما دام ابليس حچه يعني صدك
-بلال: وينكم اخوتي شو محد بيكم فزعلي من الله لا ينطيكم
-راهي: شنسوي انتَ مطي كوة تريدنه نجذب عليهم
-وسام: بلال لو مو رمضان تدلل اسفطلك چذب للصبح بس بهالشهر اعذرني الشيطان مزنجل ونايم وكل الراح اچذبه هو اجتهاد شخصي وتضيع سمعتي بين الولد وبعد محد يصدكني
-نديم: ليش انتَ منو يصدكك اكبر جذاب عرفته
-وسام: شوف احتراماً لهذا الشهر الفضيل ولعلمك ودراستك وثقافتك وشخصيتك وثكلك ورزانتك راح اسكتلك نديم بس ذكروني من يخلص رمضان ادوس على راسه
-چـفل: كافي سكتوا خلي سيف يحجي ولك ما تحجي ورمت كلبي
-سيف: شكول
-واثق: كول چـفل انتَ طالق
-چـفل: كبر لهالحجي الخايس يا خايس الخايسين
-نديم: على كيفك لا تنهار لا يقع الطلاق الا بشروط معينة
ضحكوا كلهم وچــفل وسيف هم فطسوا ضحك وكملها راهي من كال..
-لازم اكو شهود عدول والموجودين كلهم مسربتين اولهم واثق
-واثق: لا عاب حلكك راهي صاير تعرف تسولف هاي من شوكت
-راهي: ولكم شكد سكط هذا
-واثق: اوكفو اوكفو نرجع على چـفل هسة اني ما مفتهم انتَ ليش ضايج يعني اني اتخيل بشير يصير بي قزرقط وينام بالفراش شهر واخلص من خياساته وعلي للصبح اهلهل واطش ملبس
-چـفل: عاد انتم واحد انكس من الثاني راضعين من صدر ابليس
-بشير: چـفل لازم مشتهي عركة صار هواي ما متمالخين
-چـفل: اسكت بس چفيني شرك
اللتفت على سيف واردف بجدية..
-چـفل: سيف باجر خلينه نروح نزور الحسين بلكت تتحسن وترجع نفس گبل
-سيف: ماروح
-چـفل: ما ماخذ رأيك غصباً عليك تروح شمتت ذولة الزبايل بينه وخليتهم يركصون على فراگنا
-واثق: بلال روح وياهم حبيبي
-بلال: ليش؟
-واثق: خلي يشدوك بشباج العباس بلكت يروح منك هالاستمطاء
-بلال: ولكم اخوتي جاوبوا ماكدرله اني من الله لا ينطيكم
-راهي: واثق لا تدوس وياه هسة يروح لامي يبجي
-وسام: وشيسد حلكه لو بچه
-بلال: يبووووووو من الله لا ينطيكم كلكم
ضحكوا يداهروه واحنه نضحك وياهم، اعرف واثق يموت على سـعد وبلال يشوفهم مثل اخوته الصغار ويحب يتحارش بيهم ويتونس لو ضوج واحد وهمه هم يعشقوه ويفدوه برواحهم صدك من كال البزون يحب خناگه..
-واثق: شوفوا من الاخير اني اول يوم العيد عندي شغل بالشمال تجون وياي كلكم هم نغير جو لهذا الخايس سيف وهم نتونس سوه اليعترض حلگه اشگه..
**
“رجــب”
رجعنا لبيتنه ومثل العادة امي بهدومها وعبايتها توكف بنص الحوش وترفع ايدها وتدعي بشهكة..
-الله لا ينطيكم ولا يوفقكم يا بيت مجتبى الله يحرك كلبج يا سوسن على ولدج عساهم بوجع بلا دوا وقهر بلا هوا وضيم بلا ضوا و هَم بلا سلوى
مسحت على وجهها ورجعت رفعت ايدها تكمل دعائها لحدما طبت لغرفتها، كعدت بالحوش انتظر مضحي حتى اسويله عشا حضرة جنابه ما يصوم ويكضيها تسربت لليل..
اجه بوكت متأخر كلت فد مرة اسوي سحور اكل وانام، كعد بالحوش يطحن بالجكاير ويدندن بأغنية شلت الصينية واخذتها للهول وصحتله..
-مضحي: امج وين
-نايمة عوفها هي من تكعد تاكل
هز راسه ساكت وكعد ياكل اليوم مبين ماله خلك وهادئ استغربت مو من عوايده بس غير لساني ينجب ويعوفه لا لازم اجيب الاذية لروحي..
-شنو شبيك مضحي
رفع عيونه الي ما مفتهم، حمحمت ورجعت سألته..
-شبيك شو ضايج
-ما ضايج
-مادري كلت يمكن اكو من مضوجك لان…
سكتت من خزرني ونزل الخبزة من ايده، وجهه بسرعة انكلب وطكت دمارات بكصته..
-شنو ولج؟؟
-شنو
-عيدي شنو كلتي؟
وكفت على حيلي خايفة اريد بس اشرد..
-ما كلت ما كلت شي
دفر الصينية برجله وتطشرت نعمة الله بالكاع، مشيت بأتجاه عكسي لباب الهول اريد افلت للغرفة بس اخاف انطي ظهري لا يسويلي شي.. شهكت من ركضلي وجرني من صدر دشداشتي ونتر بوجهي بصياح..
-شمعرفج اكو واحد مضوجني اليوم هااا؟؟ شمعرفج بت الچلبب
-ماعرف والله ماعرف اني بس هيج سألتك
صفكني راشدي سطر بي اذني وعتني من شعري حييل يهز براسي ويصيح..
-ادبسزز اطيح حظجج اذا ما حجيتي وكلتي شمعررفج
-والقران الكريم وروحه لابوية مادري انتَ ضايج من شخص مضحي والله حجيتها على لاهيتي
على صوت صياحنه اجتنه امي عاكدة حاجبها ووجهها معصب، شافتني بيد مضحي يكتل بيه صاحت..
-شكووو
-مضحي: بتج الساقطة ينرادلها تربية من اول وجديد
يحجي ويصفكني على وجهي ويدفع بيه للهول ويدوس على كلشي ما مهتم، متت بجي اريده بس يعوفني التوبة ماحجي بعد والله ماحجي.. لزمني من ركبتي يخنكني ويصيح منين عرفتي روحي راحت بيده..
-صولاغ: عوفها كافي تعال فهمني شبيك
-مضحي: احجي بتج شمفهمها؟؟ ولج تدزيها عليه تراقبني؟؟
-صولاغ: لا شبيك تسودنت هدها لا تموت بيدك وتبتلي
هدني ووكعت بالكاع اكح وابجي نفسي ضاك ردت اموت بيده، اشرتلي امي اروح عفتهم وركضت لغرفتي طبكت الباب وقفلتها عليه وركضت لفراشي دحست روحي بي وغمضت عيوني بس اريد انام تعبت اريد انام..
غفيت وحسيت الصبح على صوت ديچ بيت جوارينه كمت بسرعة غسلت وبدلت وطلعت للمدرسة ماريد اتواجه ويه مضحي لا هم يعاركني علمود الروحة يتخبل من اكله اخذني للمدرسة..
اتذكر اخر مرة كتله عليها كتلني كتل موت وكال لامي اكسر رجليها اذا راحت بعد بس امي ما رضت شلون بنات عمي كلهن يداومن واني لا يمكن غيرتها من بيت عمي هي المخليتني عايشة لحد هاللحظة..
طبيت للصف شوية واجت بنين مبتسمة سلمت عليه وكعدت تسولفلي على الواجب بنين بت عمي صديقتي الوحيدة احسها متقبلتني وحبابة وياي هي وانيسة اكيد..
بالفرصة يجن جليلة وفضة عليها ياخذنها وهي شكد تتوسل وياي اروح وياهن بس ما اقبل، على كم مرة اروح وياهن احسهن كارهاتني وميردوني وياهن صرت ابقى هنا انتظر الدرس يبدي..
خلص الدوام ورجعت للبيت بوجهي طبخت وغسلت الحوش والهدوم وطبيت لغرفتي انام شوية، فزيت من النوم على صوت صياحها تتعارك ويه مضحي وهم غلط وفشار واحد على الثاني ومضحي يلزم امي ويقسملها ويسبها ويسب اهلها لحدما يتعب ويطلع من البيت وهي تطب للمطبخ تبجي وتدعي على روحها..
المغرب اجوا خوالي يفطرون يمنه ما احب من يجون خصوصاً خالي عيسى كلش مو حلوة نظراته واخاف منه اتحجج بالشغل وافطر بالمطبخ من يجون..
طلعوا وره الفطور مباشرة وصاحتلي امي واكفة بالحوش، رحتلها لكيتها شايلة بيدها عباتي ونقابي شمرتهن عليه وكالت..
-لبسي وروحي لمكان شغله شوفي موجود لو سافر
-منو هو
-خطيبج
-خطيبي؟ يمة شبيچ وين صار خطيبي همه بس حچوا بيه ما صار شي رسمي
-مو قرا الفاتحة ويه خوالج صار اسبوع؟ لو يلعب علينا هالعار
-يمة فدوة رحتلج خيولي عوفي هو لو رايد يرجع لا تذليني وتذلين نفسج
همشتني من شعري بعصبية جرته حيل حسيت بقبق راسي راد ينشلع متت من الوجع بس صوتي ما خليته يطلع..
-ترحين تدوريلي هالعثماني وين ولى ادعي كون ما عافج وسافر رجيبة ادعي والله انحرچ بيدي اخلي دمج بطولج
دفرتني على الباب واشرت على العباية حتى اللبسها، بلعت غصتي ودموعي ولبست النقاب وفوكاه العباية وطلعت قبل لا تحجي حجي زايد..
-صولاغ: تندلين مكان شغله مو؟
-اي
طلعت من البيت ودموعي تجري امشي وابجي مختنكة وتعبانة وموجوعة مليت من هالوضعية وماعرف شلون تصفى، خطبني واحد تركي صار شهرين تحجي بي خبلتني ليل نهار وين صار “صفي” وين راح “صفي” من الله ياخذ صفي ويخلصني انوب هو شكله مو راحة وريحته تلعب الروح..
عبرت فرعنا وطلعت من جهة النهر اتمشى لحدما وصلت للسوگ الچبير امي بطرانة تريدني اروح لمكان شغله هو موظف يجوز حتى دوامهم خلصان منو يداوم بهالليل..
تمشيت لنص السوگ لمكان تجمع اغلب العثمانيين الطاگين مكان مثل الگهوة خاص بيهم ومعزول اتذكر مضحي مسولف لامي عنه.. وكفت ادور بعيوني عليه ماندل زين سألت ابو محل وكالي امشي بعد صاير يم حوض الماي..
وصلت للحوض وهم ما اندليت دخت وتهت رفعت البوشية من وجهي وغسلت وجهي من ماي الحوض وشربت منه، اللتفتت على صوت مرة تصيح وتتعارك ويه ابو محل اقمشة تعيط وتسب بي تكول باگهه ولعب عليها..
وخرت عيوني منهم مو وكتها لازم ادور على صفي، رجعت نزلت النقاب على وجهي وتمشيت شوية عن الحوض وجذبتني لافتة خشب مكتوب عليها “قشاني” صفنت من شفت يطلع منها ضابط عثماني يضحك بكل صوته عرفت هذا المكان اليحجي بي مضحي..
ظليت واكفة فترة محتارة شلون راح ادخل المكان صاير دفن بدربونة واكيد يكون كله زلم شيدخلني جوه، تحسرت ونويت ابقى انتظر هنا شوية اذا ما لكيته ارجع لامي اكلها موجود شسوي اجذب عليها واسلم على حياتي..
-محتاجة شي خيتي؟
درت عيني على الصوت الحاچاني وشفته رجال شاب واكف كدامي لابس صدرية وايده كلها اثار صبغ، عفته ممهتمة ورجعت اباوع على الدربونة وادعي يارب كون يطلع بس اللمحه ماريد شي بس حتى يرتاح كلبي..
-خيتي محتاجة شي اخدمج بشي؟
تأفأفت مغثوثة شبي هذا لزگ، درتله وجهي ونترت ضايجة..
-ماريد شي تسلم
رجعت انظاري على الدربونة وحسيت بالرجال بعده واكف ما كعد قلقني، درتله عيني انتبهتله يباوع للدربونة وياي شكد فضولي هذا..
-دام ما محتاجة شي الله يسر امرج
كالها بنبرة ناشفة مزعجة كلش ضجت شبي هذا شدها وياي، درتله بكل جسمي اريد ارده وانتبهت اني وين واكفة..غصت بهدومي من ركزت اني سادة طريق محله وعايقة حركة زبائنه ميكدرون يدخلون جوه..
وخرت بسرعة ووكفت على صفحة مفتشلة خطية هو مفتح على باب الله واني واكفة هنا مثل شمعة الفكر ساده الطريق وهو چنه افتهم حركتي غلط عباله قهرني او زعلت من اسلوبه بسرعة كال يبرر..
-عذريني بس لان ساده الطريق وهسة راحوا عليه زبونين
هالمرة نبرته اختلفت جانت الطف وبيها حس فكاهة شوية، ابتسمت من جوه النقاب وكلت بصوت ناصي..
-اني اسفة الله يعوضك ان شاء الله
-يعوض خيتي يعوض ان شاء الله كلمن ياكل رزقه بهالدنيا
كالها ودخل جوه بالمحل يكمل شغله، باوعتله منا اكدر اشوفه كعد على كرسي ولزم بيده شحاطة يعدل سيرها المكطوع..
شلون شاب و يشتغل قندرچي يبيع ويشتغل بالاحذية والشحاطات وكل ما ينلبس بالرجل مادري ليش من شفته تذكرت مضحي شكد يختلف عنه شبي اخوية ساطره العباس لا يقبل يشتغل لا يقبل يعتمد على نفسه كاضيها بس تخايم وعربده..
حسيته خوش رجال وكلبي ارتاحله وسبحان الله كلبي ميرتاح لياهو الجان الا اذا جان صدك ادمي يمكن هاي الميزة الوحيدة الاحبها بروحي..
رجعتله حتى اسئله عن الموجودين بهاي القشاني يمكن يطلع يعرف او يكدر هو يطب يتأكدلي.. مديت راسي لداخل محله وسألت بصوت ناصي..
-خوية ممكن سؤال
رفع عينه من الشحاطة ذبها من ايده ومسح ايده المتلفة بالصدرية..
-تفضلي جواب
-هاي القشاني يتجمعون بيها بس العثمانيين مو؟
-بلي
-اريد ادخل شلون
رفع حاجبه مستغرب باوع للبره ورجع عيونه عليه مثبتهن على عيوني حسيت بي شاك بيه لان نظراته مو طبيعية ابد..
-انتِ بت هالمدينة؟
-اي
-لعد شتسوين بالقشاني؟
-عندي شغل جوه
دار وجهه مني ورجع يشتغل بالشحاطة ما مهتملي ضجت من تصرفه وطلعت من محله، رجعت اوكف بمكاني الجنت اراقب منه وماعرف شكد مشه وكت واني على وكفتي رجلي وكعت وكوة صرت اتنفس من النقاب شلته من وجهي اتنفس عدل وما حسيت الا على صوت الرجال ابو الاحذية طالع من محله واكف بصفي وهمس بيني وبينه..
-خيتي كولي يا الله وكليلي شكد تحصلين يومية من هذا شغلج اني انطيج ورجعي لبيتج الله يستر عليج
مافهمت شديحجي وشيريد ينطيني، درتله اسأل وانتبهتله صفن بوجهي بطريقة وترتني حتى ما رمشت عينه، من شافني اهز راسي بحركة شكو بساع عكس عينه مني نزلهم وغمض..
-مافهمت شدتحجي انتَ؟
-انتِ مو تشتغلين هنا؟
مجاوبته درت عيني على صوت ضحك الزلم الطلعوا يضحكون من الدربونة وواحد منهم يمشي ويتطوطح..
عافني الرجال الجان يحاجيني ورجع لمحله يهز براسه مأيس، عفته وفكرت اسأل واحد من الطلعوا من جوه يجوز يعرفوه بس من شفتهم شلون يباعون لوجهي ويضحكون وواحد منهم سوالي بيده تعالي خفت وطبيت لمحل الرجال..
-رجــب: ماشتغل هنا اني اريد اسأل عن احد موجود هناك ومحتارة شلون افوت تكدر انتَ تسألي؟
-لا
-ليش؟ بس اسألي واطلع ماريد شي منك
-ما افوت لهيج اماكن
اللتهى يكمل شغله واني ضجت وطلعت من محله بعدني ما عابرة الباب وجفلت من شفت مضحي واصدقائه جاي يمشون لاتجاه القشاني، ظليت اراواح بمكاني ماعرف وين انطي وجهي ومن الخوف نسيت انزل النقاب على وجهي وركضت طبيت لمحل الرجال وسويت روحي اباوع للاحذية..
وكفت اتطاطگ ماعرف شسوي درت عيني بالختلات اشوف عبر مضحي منا لو بعد ومادري بالرجال عينه وياي ومنتبه لتحركاتي..
-اساعدج بشي؟
مسحت على وجهي ايدي ترجف، هزيت راسي لا ووكفت كباله ضبط وجهي عليه وظهري للشارع..
-رجــب: اكلك عفية اني هسة خايفة اكدر ابقى هنا شوية؟
-خايفة من شنو
-اكو واحد يضوجني وهسة شفته بالشارع يمشي اخاف يشوفني ويلزك
-غير عن الكاعد بالقشاني؟
-اي غيره
-هذا جم واحد تعرفين
-شنو؟؟؟
سكت ونزل راسه يكمل شغله متت قهر بس اخاف اطلع لا نتلاكه اني ومضحي، مشيت للباب بشكل عكسي ومديت عيوني ادوره ماهو اي يا الله بلكت راح.. ظليت بمكاني انتظرت شوية ولا ارادي راحت عيني على لافتة اسم المحل وقريت مكتوب “الاسكافي سيف مجتبى الـ^^^^”..
قريت اسمه مرة ورجعت قريته مرة ثانية وثالثة ورابعة وبكل مرة اقراه اني عيوني تريد تطلع من وجهي..
عزا بعينج رجــب خرب روحج خرب حظج هذا الرجال ابن عمچ هذا سيف ابن عمج مجتبى اخو بنين!!
رجعت طبيت لمحله مثل المخبلة من لمحت مضحي طلع من محل يضحك بصوت عالي ويحجي لهنا واصل صوته ومبين صوت رجال وياه هم يضحك..
بقيت ماعرف شسوي بروحي منا هذا سيف ابن عمي الما شايفته بكل حياتي ومناك اخوية اليريدله حجة حتى يذبحني شسوي بروحي..
-مضحي: ها لك سيف
عصرت عيوني منتهية راح اوكع من طولي مضحي واكف ورايه بالضبط جاي احس بي..
-سيف: هلا
-مضحي: شو من وره خشمك تجاوب ولك
سكت سيف ما جاوبه واني واكفة واتراعش تمنيت لو الكاع هسة تنشك وتبلعني ولا هالموقف، رجع مضحي يضحك ويكول بأستهزاء..
-هاا تذكرت مو انتَ مايع ما تتحمل وصارلك شهر واكع من طولك ونايم بالبيت واليوم ياله انفكت چبستك وطلعت
-سيف: مضحي روح منا روحي طاكة
-مضحي: واذا ما رحت؟
-سيف: لا تسويلنه سالفة منا عالم
طبيت للمحل جوه كلش وعيني على الاحذية منتظرة شوكت مضحي يميز طولي ويعرفني ويسحلني منا مثل الذبيحة..
-مضحي: ما تجاوب واذا ما رحت؟
-سيف: خوية انتَ مشتهي تتعارك اليوم؟! اذا مشتهي روح مناك مالي خلكك
-مضحي: مالك خلكي لو ما تكدرلي
ذب سيف الفرجه من ايده ووكف على حيله معصب، ما اشوف وجوههم بس اميز تحركاتهم واسمع اصواتهم..
-سيف: شوف لك هاي سوالف المزعطة ما تسويها وياي تسلم على روحك وتروح منا لا اضحك العالم عليك
-مضحي: جبان
-سيف: امشي طايح الحظ سربوت ذابين صرته يم محلي المدمغ
-مضحي: بحالك اني بحال محلك الخايس! اجيت اشوف نسيبي اليسوه راسك
-نافخ روحك بنسيبك هاي وهو كاعد بالقشاني لو كاعد بجامع شتسوي
-لا اهل الجوامع والكلاوات عفناهم الكم
-امشيييي منااا لا تطلع صوتييي
عافه مضحي يضحك بكل قوته وسيف رجع يكعد على الكرسي ويسب بي ويغلط عليه، توترت من دار عينه عليه وكال..
-مضحي التشردين منه؟
ذبيت حسرة مستسلمة ودرت اواجهه، نويت احجيله الحقيقة مهما يكون هو ابن عمي.. هزيت راسي اي ونزلت راسي ساكتة..
-سيف: اممم، لا تخافين ما يسوي شي انتِ بس لا تنطي مجال ما يتماده
-ماكدرله
-عذريني بس صوجچ توبن من هالسوالف ما تفيدجن بشي واذا تتأملين يتزوجچ فـ اكبر جذاب ومنافق هذا
فكيت عيني عليه مصدومة مادري اكيف لان ماعرفني اخت مضحي مادري ازعل لان عباله مصاحبته..
-تره اني ما مصاحبته وما متأمله يتزوجني!
-لعد ليش خايفة منه
صفنت ماعرف شجاوبه سكتت ادورلي على جذبة وهو سبقني وكال..
-عموماً شنو ما جان بينج وبينه بـ…
-مرة تعارك ويه اخوية وتحلفله بيه
عضيت على شفتي متندمة شدا اللوص اني انوب هذا خاف يشوفني فد يوم ببيتهم ويعرفني..
-سيف: نذل وكاسر وجوهنا مسحيها بوجهي ورجعي لبيتكم وانتبهي على نفسج لا تطلعين وحدج بعد
هزيت راسي اي وطلعت من محله بدون لا اتشكر منه، بعدني ما عابرته ووكفلي بالباب يصيح..
-خاتونة
اللتفتت عليه منتظرته يحجي بس حسيته متردد، نزل راسه ومسح على رگبته مستحي وكال شي ما سمعته.. هزيتله راسي ما فهمت وتقربت منه شوية حتى اسمعه زين..
باوع لعيوني ثواني ودار وجهه مني ورجع يمسح على ركبته صارت حمرة..
-ماسمعتك؟
-جاي اكول ذبي البوشي على وجهج هواي اكو ولد حرام
تذكرت اني رافعتها نزلتها بسرعة على وجهي وعفته اكمل طريقي للبيت، صار عندي فضول اللتفت على القشاني اشوف بلكي اشوف صفي يطلع درت وجهي وانتبهت لـ سيف بعده واكف يباوعلي من شافني اللتفتت رجع طب لمحله بسرعة..
وصلت للبيت ومن الباب امي استلمتني تحقيق، كيفت وفرحت من عرفت صفي موجود وما مسافر وحجيتلها شفت مضحي راح للقشاني علموده بس ابد ما جبت طاري سيف..
جبت كتبي من الغرفة وكعدت يمها بالهول ادرس وهي حاطه قوري الجاي يمها وكرزات تاكل وسرحانة تفكر بشي.. حطيت الكتاب بيدي وشكد ردت احفظ ولا كدرت موقفي ويه سيف ما جاي يروح من بالي..
-اكلج يمة
-هممم
-عمو مجتبى عنده ثلاث ولد مو؟
-اي عساهم بالمرض
-شنو اسمائهم؟
-نعال وقندرة وشحاطة
-وشكد اعمارهم؟
-ان شاء الله ما يعبرون الثلاثين بجاه الزهرة
سكتت وهي دارت وجهها عليه مخنزرة خفت من نظراتها ورجعت ادرس..
**
“چـفل”
باجر اخر يوم رمضان واثق ماتحمل اخذ الولد من البارحة وياه للشمال خلاهم يفطرون يومين بس اني كلتلهم اعيد واللحگكم..
صدقت من ختمت القران الحمدلله ورجعته على ميزي، شربت ماي وتمددت بفراشي اريح جسمي هستوها شكلت عيني جاي اغفى واجتني امي تركض..
-فوزية: چـفل كوم كوم
-ها يمة شصاير
-كوم رجعوا ذولة الاتراك يم ابوك وجايبين ضبة زلم وياهم
طفرت من فراشي وركضت اطلع للديوانية ابوي كاعد بالنص عوجيته الثكيلة بيده ساند ايديه ثنينهن عليها وهمه كاعدين متوزعين من الجهتين حوله..
سلمت وكعدت وياهم ما مفتهم سبب جيتهم هواي موجودين ترسوا الديوانية وجايبين وياهم العسكري والافندي وشيخ الدين..
سولفوا ويه ابوي سوالف عادية بالبداية واشرلي حتى اكوم اجيب الچاي، بعدني ما طلعت من الديوانية ووكفني صوت شيخ حيدر جاي من طرفهم اليوم..
-شيخ حيدر: اكعد وليدي چـفل لاحكين على الچاي احنه متعودين من گبل ما ناكل ولا نشرب شي الا ناخذ الموافقة صح لو لا
حجاهة بالضحك وهمه ضحكوا وياه نصهم ما يفتهمون شيحجي بس على الواهس يضحكون، عاينت لابوي مستغرب وهو هم حسيته مستغرب نفسي بس ما يبين وبقى مبتسم..
-شيخ مكي: تفضل شيخ حيدر امرني
-شيخ حيدر: والله اني لو عندي ولد ما اضيع نسبكم شيخ مكي بس هالمرة اني جاي واسطة خير ان شاء الله الكلام ويه الباشا يصير
اشر على باشا الاجانه گبل فترة هو وابن اخوه كمال الدين كاعدين ثنينهم مبتسمين ويباعون لشيخ حيدر، كلبي لعب من نظراتهم وما ارتاحيت جيتهم هاي ما تبشر بخير ووراهة مصيبة..
جله حنجرته باشا اورهان (الضابط الجبير) وكال بعربية مكسرة..
-شيخ مكي نحنا سألنا وتعرفنا على ثقافاتكم وتعلمنا هواي منكم وحسب علمي من شخص يريد يخطب لابنه يجيب وياه شي تسموه واجهة؟
-شيخ مكي: لا باشا مـ…
قاطع ابوي وحچه فوكاه..
-اني اليوم مو اب اني عم، كمال الدين يتيم الاب هو ابن جنرال باسل توفى من فترة طويلة الله يرحمه
كلهم ترحموله ونزلوا روسهم احترام، عيني ما نزلت من عين ابوي الراحت ابتسامته وبقى مركز ويه الباشا..
-واليوم ابن اخي يريد يكمل نص دينه وبالصدفة شاف كريمتكم وعجبته وحاب يتقدملها بشكل رسمي
فكيت حلكي مصدوم وابوي ما تقلّ صدمته من صدمتي، شنو شاف كريمتكم شنو عجبته وين شافها وين لكاها وشنو هالصلافة الشايلها هذا مسودن؟؟
كمت من مكاني فاير وابوي اشرلي بعيونه اكعد ما تحملت اظل كاعد جواي نار تچوي واحتركت اكثر من جنود ثنين شالو صندوك خشب جبير وحطوه كبال ابوي وفتحوه همه فتحوه لو چن فتحو روحي!!
حاطين بي قطع اقمشة نسائية وصندوك مجوهرات وذهب وعطور وكله حاجات نسائية هيج فتحوا كدام كل الزلم!!
-الباشا: شيخ مكي نحن نعرف ماكو نسب بين العثمانيين والعراقيين يعني هو اكو بس شي قليل ومو متعارف ونحن حابين نناسبكم ماعدنا مشكلة وهذي هدية لكنتنا (چنتنه) اتمنى تتقبلوها
غيم وجه ابوي من وكف كمال الدين گباله وكال بأبتسامة..
-هذا ولا شي بالنسبة لمهرها اوعدك اغرگها ذهب واعيشها عيشة سلطانات تستاهل كلشي بهاي الدنيا والله كل غالي يرخصلها
-الباشا: شيخ نحن جاي نبينلكم حسن نيتنا وياكم دليل ماعدنا مشكلة وخطبنا بنتكم لابننا
هز راسه كمال الدين مأيد عمه وانه روحي فرفحت، سكت ابوي يعاين للصندوك صافن وهذاك النكس مادري شون افتهم نظرته وكال..
-الباشا: اذا هذا الذهب مو كافي الكم نجيب اكثر ماكو اشكال
صار صميت ثگيل بالمكان، عيوني خازرة شيخ حيدر المنزل راسه مفتشل متمني لو بس ابوي ينطيني اذن واطلع حركتي بيهم اطردهم منا بالجلاليق..
-الباشا: ها شيخ شنو كلتوا؟
اخيراً ابدى ابوي ردة فعل رفع عوجيته بهدوء ودفع بيها الصندوك وكال..
-شيلوا صندوگكم
-كمال الدين: تردون اكثر؟
شهگوا كل الموجودين من رفع عصاته بعصبية وحطها بصدر كمال الدين، العيون كلها تركزت على ابوي مصدومين شون يهين ضابط عثماني هالشكل وكاموا الجنود يردون يدافعون وكمال رفع ايده يمنعهم..
ضغط ابوي عصاته بعصبية اكبر ودفع صدره بيها حيل ينتر من بين سنونه..
-اخذوا ذهبكم واغراضكم وطلعوا بره بيتي!
يتبع
….
━━━━━━ ⚔︎ ━━━━━━
توقعاتكم؟؟؟؟
اليعرفون القصة رجاءاً انتو لا تعلقون وتخربوها على الشبابات
رأيكم بشخصية كمال الدين؟ صراحة عن نفسي اشوف شخصيته بسبب عمله صارم ويتحده ويتأمر بس هالشي ميناسب بنيتنا مـسك
عيوني صاحب الرسائل راح تظهر البارت الجاي لو لااا
رجــب اءءءء؟
عيونچ ما تحبني الفدوة اروحلها..
━━━━━━ ⚔︎ ━━━━━━
“مـسك”
رحتلهم اهرول بس كبل لا ادك الباب ردت اتأكد همه چم واحد خاف الجاي ما يكفيهم فشلة، رحت للشباج الاراقب منه بالعادة ومديت عيوني متطمنة ما ابيّن وجفلت شاهكة من كل گلبي من صارت عيني بعين كمال الدين..
وخرت من الشباج بسرعة اللطم على خدودي واكمز بمكاني شلون راحت عينه على هالفتحة المستحيل تنشاف شنو من عيون عليه هذا، عفتهم ورجعت للمطبخ يم امي..
-فوزية: ها صحتيلهم؟
-يمة ذولة عثمانيين هنا
بهتت امي صفنت بوجهي ما مفتهمة، صبيتلي كلاص ماي شربته كله وهي على وكفتها تنتظرني اكمل والله امي متغيرة هاي لو كبل جان دارت استكاين الجاي فوك راسي..
-فوزية: ما تحجين
-يمة عثمانيين اتراك اتراك جايين لابسين عسكري
-دخيلج يا ام الحسن
هزيت راسي اطفر بمكاني وهي عافت الستكانات على الميز وركضت على شباج الديوانية وكفت بصفه تسنط بدون لا تمد عيونها..
عصرت اصابعي متوترة ووكفت يمها اسمعلهم يسولفون اكثر شي صوت رجال مبين جبير بالعمر وعربيته مكسرة مو قوية، شوية وطلع سـعد من الديوانية تطافرنه اني وامي وكفنه بعيد وهو همس “جاي”..
-فوزية: تعال احاجيك
اشرتله يجيها، طلع وسد الباب وراه وجرته امي للمطبخ تسأله منو ذولة..
-سـعد: ذولة عسكر جايين يزورون ابوي ويسألون على الحريق الصارت ببيتنه هسة ياله تذكروا
-فوزية: وشون عرفوا اكو واحد موصلهم الحجي؟
-لا يكول همه مقرهم هنا قريب بيتنه وامس واحد فالتها كدامهم وكايللهم يجوز الحريق فعل فاعل واجو يسألون ابوي بس ابوي كال قضاء وقدر ما يريد ينفتح تحقيق
سكتنه وهو اخذ صينية الجاي ورجع يمهم، فرت بيدها امي مستغربة وهمست..
-اول تالي يجون علمود حرگ بيت
ما جاوبتها واشرتلها نروح نتسمع عليهم شو كلبي يلعب، وكفنه يم الشباج نسمع الزلمة العربيته مكسرة يكول..
-تسلمون شيخ مكي الشاي لذيذ
-شيخ مكي: بالعافية باشا
ماتحملت بعد مديت طرف عيني ودعيت كون محد جاي يباوع منا وصدك ملتهين يشربون بالجاي ويحجون بي عبالك اول مرة يشربون جاي.. حسبتهم منا يطلعون ست زلم كمال الدين وجاي وياه زلمة جبير لابس عسكري بس رتبه اكثر من كمال ووياهم اربع جنود..
-متأكد شيخ ما تحب نفتح تحقيق بخصوص الحريق؟
-شيخ مكي: اشكر اهتمامكم بس ماكو داعي الصار قدر مكتوب
-مثلما تحبون
دار عينه لكمال الدين ورجع باوع لابوية، حط الستكان على الطاولة الكدامه وكال بأبتسامة..
-نشكر حسن استقبالكم شيخنا الفاضل وانا صراحة سامع بسيرتك الحسنة من الناس كالو عنك عالم دين وتدرس وتنطي محاضرات لطلبة علم يعني بالمختصر انسان مثقف وتعبان على نفسك وجاي تفيد المجتمع بعلمك
-شيخ مكي: الحمدلله هذا فضل من رب العالمين
-نعم نعم، انتو اكيد منتبهين للنزاعات والتشتت الجاي يصير بين الناس وزراعة افكار غلط بعقولهم بالخصوص البعيدين عن المدينة بسرعة يتأثرون مو القصد نقلل منهم لكنهم ابسط من جميع النواحي
-چــفل: اذا تقصد يتأثرون من الناحية السياسية فـ ما اتوقع مو كل الناس عايشة مثلنا احنه رب العالمين منعم علينا وعدنا اموال وعلم وثقافة الحمدلله غيرنا ما يلحك ينام حياته عبارة عن شغل وتعب من الصبح لليل ويا دوب يطلع لگمة العيش
-كمال الدين: صحيح بس انتَ جاي تسمع شنو صاير بالجنوب؟ البصرة محترگه الاجانب ناوين على حرب وشبابكم العراقيين راح ينقتلون لانكم مفتقرين لجميع معدات الحرب
-شيخ مكي: زلم الجنوب سباع عدهم استعداد يحاربون العدو بسيوفهم وخناجرهم اذا اضطر الامر
سكتوا كلهم واني كلشي ما مفتهمة هسة شيردون ذولة بس ما طولت حيرتي لان رجع كال الضابط الجبير..
-شيخ مكي احنه عرفنا ان الك كلمة بين الناس ويحبوك ويسمعولك نطلب منك بكل احترام تحجي بينهم بالمجالس والكعدات وحسب علمي انت تصعد منابر نريدك تذكرهم بحكمنا العثماني والي قدمناه لشعبكم والرفاهية…
-رزاق: رفاهية؟ ههه
-شيخ مكي: رزاق!
-رزاق: يابة مع احترامي الك ولحضرة الباشا ولكل الكاعدين بس هسة لو نجيب طفل ونكله العثمانيين انطونا الامان والرفاهية هم يضحك علينا
-شيخ مكي: رزاق اطلع بره!!
سكت حسه ووخرت بسرعة من انفتحت باب الديوانية وچــفل طلعه بيده، دفعه للحوش ونتر بهمس..
-چــفل: انتَ مسودن!! منين جايب هالصلافة رزاق كاعد كبال ضباط تحجي على دولتهم كدامهم!!
-رزاق: جا لا يسمعلهم ابوي ويتأثر بيهم هالانجااااس
-چــفل: اسكت ولك اسكتت سد حلگك انتَ تريد تمووت
لطمت امي على خدها خايفة واشرت لـ چــفل يجر رزاق لغرفتها حتى يسولفون بدون لا يسمعوهم، طببوه للغرفة وچــفل بساع جر المفتاح وقفل الباب عليه، تخبل رزاق ظل يصيح ويدفر بالباب ويتوعد ويتحلف وچــفل ما مهتم..
-چــفل: بس تفتحيله الباب يكتلوه هنا ببيتج يكتلوه وما يرفلهم جفن!
نترها بعصبية وعافنه ورجع للديوانية، ظلت امي تلوب واكفة يم باب غرفتها وتتوسل برزاق يهيد بس علما يطلعون وهو متسودن ما يرضى..
عفتهم ورجعت اتسمع عليهم وهذاك الضابط الجبير بعده يلغي براس ابوي وابوي ساكت كلمة ما نطق..
-تدخلات خارجية جاي تأثر بالمجتمع وراح تدمرهم نهايتهم الموت اذا استمعوا الهم ووثقوا بيهم، شيخ دورك ودور امثالك تطرحون الوعي بين المجتمع تحجون بالحوزات وبالمجالس التقوموها وتنقذون بلدكم من الضياع
-شيخ مكي: باشا ماعرف شلون راح تتقبل كلامي بس اني رجل دين مو رجل سياسة نهائياً ما اتطرق للامور السياسية لاني انسان عايش لنشر الدين والتوعية بين الناس هاي رسالتي بالحياة ورسالة والدي ووالد والدي لحد جدي السطعش احنه علماء ومستحيل نتطرق للسياسة هذا مو دربنا ولا درب اولادنا
خنس الكل وره كلام ابوي الاخير وصمت مخيف توزع بالمكان محد فتح حلكه او علق على شي لفترة طويلة، خفت امد راسي بعد لا ينتهولي فـ بقيت واكفة بمكاني انتظر ردهم..
تعبت رجليه لحدما رجع كال الباشا برسمية..
-تمام شيخ شكراً على وقتك ولو تمنينه نسمع غير هالكلام بس مو مشكلة
-شيخ مكي: اهلاً وسهلاً
ودعهم ابوي طلعهم من باب الديوانية الخارجية واني ركضت اوكف يم الحوض انتظرهم يطلعون يسولفولنه..
رجعوا سـعد وچــفل وبشير ساكتين وبس اجه ابوي سأل على رزاق وامي كالتله بغرفتها قافلة عليه الباب، اشرلها تفتحله وعبالك هو ما صدك فتح الباب وصاح بكل صوته من شاف ابوي بالحوش..
-رزاق: شلون رضيت بهالشي يابة شلون!! شلون استقبلتهم وكعدتهم بيناتنه وهمه دمرونه وحرمونه من ابسط حقوقنا العالم صارت تدور بالزبل علمود اللكمة والنسوان صارت تشتغل شغل زلم حتى تعيش!
-شيخ مكي: بابا شبيك انتَ ما تكلي شبيك
-رزاق: شنو شبيك يابة اذا انه سكتلهم وانت ضحكتلهم وهذاك صفكلهم نطب على الاربعمية سنة احتلال ونظل بهالذلة والمهانة لاا فوكاهة جاييك يردوك تحجي بيهم على المنابر وتنگس منبر الحسين بطاريهم
-شيخ مكي: بابا اني مفتهم حركة دمك بس ذولة احتلال مو ناس عاديين! ميصير تحجي وياهم بهالعجرفة والعنتكة هاي مو سباعية هذا غباء!!
سكت رزاق ما ناقش بعد وابويه طب لغرفته مزعوج، رحت للديوانية لملمت الستكانات ورتبتها ورتبت المطبخ وسويت سحور فد مرة حتى ما يكعدوني من النوم..
كملت كلشي ورجعت لغرفتي فتحت القران اقرا شوية وتذكرت اني عندي واجب كتابة قصة قصيرة، صدقت ورجعت القران الكريم لمكانه وطلعت كراستي وكعدت اكتب..
كملت كتابة ورجعت كتبي بالجنطة وحضرت ملابسي لباجر، شربت ماي ونمت وكعدت الصبح على صوت ابوية الحلو وهو يقرا سورة البقرة..
كمت توضيت وصليت صلاة الفجر وطلعت ويه چـفل للدوام كل مرة اوصل اول وحدة مادري شعندي مغبشه، بدن البنات شوية شوية يوصلن لحدما طبن جليلة وفضة يدردمن بعلو صوتهن والله فلا يستحن ذني ولا يخجلن من احد..
-فضة: اووع اووووع اووووع على الدراسة اوووع
-جليلة: شوكت نخلص ياربي ونعرس ونكعد بالبيت نخلف ونربي جهالنه
-مـسك: ما تزوجين جا مو جاي يخطبون بيج ليش ترفضيهم؟
-جليلة: من تزوج فضة اني اتزوج
-فضة: دنجبي
كعدن بصفي وكلمن شمرت جنطتها بالكاع ما مهتمات، نامت جليلة على الرحلة وفضة سندت ظهرها على الحايط وغمضت عيونها..
-مـسك: كومن اجت المعلمة
وكفنا كلنا وكعدنا وره ما القت التحية، بعدنا ما كايلين بسم الله وصاحت طلعوا الواجب واجت تفتش وحدة وحدة وجليلة ظلت تلوب، ضربت على ايدها خفيف وهمست..
-مـسك: شبيچ
-جليلة: نسيت اكتب
-فضة: طبعاً ملتهية بالسوالف الطايح حظها
يتهامسن بين بعض وجليلة تدور بالوجوه منو بعد ما كاتبة حتى مو وحدها تتعاقب..
-مـسك: هاج اخذي هاي
-جليلة: لا مالتج هذا ما ارضى
-مـسك: لا ولج هاي كتاباتي العادية اخذيها وحطيها كدامج ولا تحجين شي حتى ما تطلعين جذابة
هزت راسها خوش واخذتها حطتها كدامها، وصلت المعلمة يمنه وما تقرا شنو كاتبات بس تباوع للكراسات بس شافت بيهن كتابة عبرتنا..
-جليلة: مـسك ابوسج بين عيونج
همستها وجرتني باستني بخدي من دارت وجهها المعلمة، ابتسمت وكلتلها تعوف الكراسة كدامها خاف تحجي عليها لان ضمتها..
-المعلمة: يلا عيني منو تقرالنا قصتها
كلنا خنسنا محد رفعت ايدها واني اولهن، تندمت كلش على كتابتي وحسيت بروحي جازفت، انه هيج كتابات اكتبهن لنفسي مستحيل اطلعهن لاحد مادري شبيه البارحة استمطيت وكتبتها..
-المعلمة: انتِ شنو اسمج؟
اشرت على جليلة والمسكينة لو اذبحها كطرة دم ما نلگه بيها، توترت وظلت تتلفت تباوعلي وتباوع لـ فضة ماتعرف شتسوي..
-المعلمة: انتِ بنتي اي انتِ شنو اسمج؟
-جليلة
-المعلمة: اقريلنا كتابتج جليلة
عصرت عيوني متندمة اكثر ليش انطيتها كراستي راح تضطر تقرا المكتوب بيها، باوعتلي مستحية درت وجهي منها متوترة اكثر منها وكلبي يدك.. وكفت على حيلها ولزمت الكراسة بيدها ترجف، جرت نفس وبدت تقرا المكتوب..
“سكون عميق يلف الشارع الخالي من أنفاس المارة، ونسيمٌ عليلٌ ينعش الروح، بينما تتزين السماء بقمرها المتناقص فيغمر الشارع وأسطح المنازل وقلبي بنوره.
تجرأت وخطوت خارج المنزل بخطوات مترددة قاصدةً النهر فهناك أتنفس الصعداء وأزيح عن صدري أثقال الدنيا، تنهدت… فابتسمت… ثم انهمرت دموعي حين تذكرتها”
تقرا واعصر بأصابعي والمعلمة عينها على جليلة مشدودة للمكتوب والطالبات هم كلهن صافنات عليها وجليلة بنفسها مستغربة من الجاي تقراه، حطيت ايدي على راسي من وصلت لمقطع..
“رأيتُ ظلاً يراقبني من بين قصب النهر فتملكني الذعر وانطلقت أركض بكل ما أملك من قوة باتجاه المنزل لكن حظي في هذا اليوم كان عاثراً إذ ارتطمتُ بجسد رجل ضخم البنية، ملثم الوجه، لا يظهر منه سوى عينين بارزتين، بينما كان جزؤه العلوي مغطى بقميص رمادي اللون….”
ظلت تقرا بالمكتوب وتوقفت لحدما وصلت للجزء الي غبت بي عن الوعي، رادت تكلب الصفحة تكمل والمعلمة عبالها خلصت وبدت تصفكلها حيل والطالبات يصفكن وياهة وفضة وجليلة وحدة تباوع للخ..
-المعلمة: احسنتِ جليلة احسنتِ المكتوب رائع حبيت شلون شرحتي تفاصيل المكان ومشاعر البنت وبشنو حست
-جليلة: شكراً
همستها وكعدت خانسة، تحمست المعلمة وكامت وكفت على حيلها وصارت تأشر على البنات يقرون كتاباتهن لحدما وصلتني..
-تفضلي اقريلنا كتابتج
ضجت كلش مو من المعلمة ضجت من نفسي لاني تهورت وكتبت شي مثل هذا وراح اضطر اقراه بصوت عالي، وكفت على حيلي وقررت اقرا وشيصير خلي يصير..
-مـسك: المكتوب من مخيلتي مو شي حقيقي
-تفضلي اقريلنا
دعيت بكلبي كون يخلص الدرس وما اللحك اقرا مسحت على وجهي متوترة وبعدني ما فاتحة حلكي واندكت باب الصف، عيوني تعلكت بالبنية الواكفة منتظرتها تحجي..
-عفواً معلمتي مـسك مكي موجودة هنا؟
-مـسك: اني
-جيبي اغراضج وتعاي يردوج الادارة
اللتفتت على المعلمة هزت راسها بطريقة روحي واني ما صدكت لملمت اغراضي جريت الكراسة من جليلة ضميتها بالجنطة وطلعت ناسية حتى اودعهن..
خفت من اجتني البنية خاف اهلي بيهم شي بس الله نقذني الحمدلله مادري وين جان عقلي من كتبت البارحة هيج شي للمدرسة!
كتبت عن كحلاء وشلون انهزمت، كتبت تفاصيل غبية ما لازم تنكتب ولا تنقرا كدام احد كتبت عن السيطرة الوكفونه وعلى شجاع وعن كمال الدين شلون انطانه الختم وخلانه ندخل كتبت حتى نظرات عيونه الخضر من ثبتهن عليه وشلون انعكس الضوه على شعره الذهبي، كتبت مشاعري، خوفي، ضياعي، حبي لبنت عمتي وانهياري عليها بأختصار كتبت كلشي..
طبيت للادارة بخطوات مستعجلة وشفت المديرة واكفتلي بالباب، دك كلبي مرعوبة من سألتني..
-انتِ مـسك مكي؟
-نعم اني
-تكدرين تطلعين ماما جاي ينتظروج بره
عفتها بلا ما اسأل منو اجاني خايفة والف فكرة وفكرة اجت براسي، طلعت من المدرسة ادور على واحد من اخوتي وفزيت مهبوطة من شفت كمال الدين بوجهي مبتسم..
-كمال الدين: اخيراً
-شتسوي انتَ هنا؟ وين اخوتي؟
-بالحفظ والصون
-شنو قصدك؟ وين يعني بالحفظ والصون اعتقتلتهم؟؟
-اي
-انتو شتردون من عدنا شتردون والله راح تخبلونه
-نريدج تهدأين وتثقين بيه مـسك
-المن صحتلي حتى تحرك كلبي؟
-تعالي وياي حتى نحجي بمكان هادئ وحدنه
-شنو مخبلة واروح وياك وحدنه اشايفني انتَ!!
-اختاري يا اما تجين برضاتج يا اما يجروچ منا جر
حرك كلبي يحجي بهدوء ومقتنع بنفسه، باوعت لجنوده ثلاثة وراه واكفين منتظرين منه حجاية وهو عيونه بعيوني..
-تايهتلك؟؟ اروح اشتكي عليك يم المديرة
-المديرة الشادة ظهرج بيها بنفسها طلعتج الي روحيلها حتى اجرها وياچ واحرمكم حتى من المدرسة
راح انجلط هذا شكد حقير وخسيس ونظراته الباردة ذبحتني، اشرلي على الكروسه يريدني اصعدلها من كل عقله، هزيت راسي بـ لا لو يكصبني هم ما اصعد وياه..
-ما اسويلج شي وما اأذيج لا تكونين السبب بحبس اخوتج
-ما اصعد وياك!!
-تمااام لا تصعدين تعاي نتمشى ونحجي!
-شلون اأمن بيك واجي وياك شلوون
-ما اسويلج شي لو اريد اسوي تتوقعين اوكف هالوكفة اتوسل بيج بس حتى احجي وياچ!!
نترها بصوت ناصي واشرلي بأصبعه امشي كدامه، شكد كرهته وشكد حقدت عليه ودعيت عليه بكلبي الله لا يوفقك ولا يسعدك.. مادري السويته غباء لو ذكاء بس استسلمت ومشيت كدامه ادعي الله يحفظني ويخلصني من هالزلمة..
مشه بصفي ساكت وجنوده وراه ابتعدت منه كلش صار هو بجهة وانه بجهة، عاينلي مطنكر ونتر..
-وين رحتي هناك
-جا لعد تريد العالم كلها تشوفني امشي وياك
-الشارع فارغ! ثانياً انتِ منقبة محد يعرفج!
-جا انته شون عرفتني
تحسر ضايج وظل يدردم عليه بالتركي يحجي سريع كلشي مافتهم ولا اريد افتهم اريد بس يفضها ويسولف مو روحي خرطت..
اشر على الجامع وكال..
-نكعد هنا
هستوني جاي اكله شلون اطب لمكان الرجال خاف يشوفوني وهو سبقني وكال..
-اكو حديقة صغيرة هنا كدام المسجد نكعد بيها والمسجد فارغ من الناس بس الشيخ كاعد جوه حتى تأمنين وتاخذين راحتج
ما اقتنعت بس من مديت راسي شفت الحديقة مو ختلة وبأقل عيطة العالم تلتم عليه، باوعت لجنوده وهمست..
-ماريد ذولة
هز راسه ميخالف واشرلهم بحواجبه يرحون، راحوا وظلينه وحدنا الحديقة صغيرة كلش وبينها وبين الشارع سياج طبيت بيها وظهري على السياج وهو وكف كبالي..
-تفضل كول شنو عندك؟
-دقيقة
حجه من مكانه ويه واحد من جنوده وهذاك اجه وبيده بطل ماي انطاه اله ورجع طلع..
-تفضلي اشربي
-برمضان!
“زازا: ماكو شي بس تذكرت رياكشن في رمضان
“باوعلي مستغرب ثواني ومسح على وجهه يضحك ويهز براسه..
-نسيت لاني ما اصوم
-بارك الله بيك
-ممنوع عليه الصيام الطبيب مانعني
-ما يهمني احجيلي شنو تريد مني وخلصني
-رفعي عن وجهج خليني اشوفج
-لا تسودني انتَ اشايفني!!
-شايفج بنية كاملة دگلها گلبي
من الصدمة احس بعيوني طلعت من وجهي ما تخيلت اسمع هالجواب، خزرته متوترة وعفته وطلعت منا وما رضا يعوفني جرني من زندي حيل ودفعني على الحايط ووخر ايده مني يحجي سريع..
-لا تتهورين وسمعي شنو اريد اكول صار اشهر منتظر هاليوم!
-يا يوم يا يووم
-اني لا متسرع ولا مراهق ولا رجال ما يعرف شنو يريد وكل كلمة راح احجيها حقيقية ومسؤول عنها
-وخر عني لا تسببلي مشاكل
-الموضوع اصعب عليه مما هو عليج مـسك، اني ضابط عسكري بالجيش العثماني امثل مكان ابوية المرحوم وانقل صورته ومكانته مستحيل مجتمعي واهلي يتقبلون هالوضع
-جا شتريد مني عوفني روح
-المشكلة ماكدرر
نززني من ضرب على الحايط البصفي بقبضة ايده حيل وكمل يكول..
-ماكدر ماكدرر حاولت ماكدرت مـسك مااكدرت
وخرت من ايده خايفة صار كلش قريب مني وكفت على صفحة اعاين على فتحة السياج اريد بس انهزم منا..
-كمال الدين: شفتج مرة على النهر تبجين ومن هالمرة ما كدرت اشيلج من راسي شكد حاولت شكد ضغطت على نفسي حتى اطلعج من راسي فشلت
بلعت ريكي يابس لساني خشب والفضول كتلني اريد اعرف يمته شافني واخاف اسأل ما يصير اطوخ وياه هذا مسودن ومغرور وشايف الدنيا كلها جوه رجله..
سكتنه ثنينه هو يهز براسه عبالك متندم ليش حچه وانه صافنة على حركاته، درت وجهي بسرعة من رفع عينه الي وكال بتعب..
-كمال الدين: ماعندج فضول تسأليني شي
سكتت ورجعت عيوني عليه وهو من كدما مركز بوجهي احس عيونه اخترقت البوشية وجاي يشوف ملامحي، هز راسه خوش وذب حسرة عالية كبل لا يكول..
-اني احچيلچ بلكت گلبچ الجلد يلين شويه
هم اخذله لحظات ساكت منتظرني انطي ردة فعل هو ما يدري انه كوة واكفة على طولي من الخوف، تحسر ضايج وطلع من جيبه جكارة شعلها وكال بدون لا يباوع لوجهي..
-انتقل شغلي لمنطقتكم واني رافض وكاره هالنقلة بس قوانين عسكرية محد يكدر يتعداها، جنت اكره اكعد بمقري ما اطيق الوجوه التشتغل وياي واريد بس اتعارك، جنت اتهرب منهم خوفاً عليهم لا اطلع حرگتي بشخص ما يستحق..
حط عيونه بعيوني توترت من نظرته لون عينه تغير جان اخضر فاتح هسة صار طوخ..
-وبليلة من الليالي كلش اختنكت عفت مقري ورحت للنهر وصادفتج هناك جنتي كاعدة على الجرف تبجين وحدج وتحجين ويه روحج ولاول مرة بحياتي انشد لشخص يحجي عراقي
حجاهة بأستهزاء وما استغربت العثمانيين ما يهتمون لدرجة ما تعبوا رواحهم يتعلمون لغتنا طول هالسنين وكمال الدين من النوادر اليحجون عراقي بطلاقة..
-مـسك
ظليت ساكتة ومنزلة راسي السمعته اثر بيه كلش، رفعت عيني من تحسر ووخر مني يفرك وجهه وشعره وحط راسه بين ايده محتار.. حسيته تايه ما يعرف شيسوي چن الحچاه هسة مصيبة وكارثة حقيقية..
خنسنه ثنينه هو على وضعه واني على وكفتي مادري منين اجتني هالجرأة وباقية واكفة هنا شنو هالوكاحة والصلافة العندي..
-عفية رجعني للمدرسة
-ما كملت كلامي
خفت من نبرته صح يحجي بهدوء بس عبالك يهدد بيه، حرت ماعرفت شلون افلت روحي منه وما اجه ببالي غير ابجي عصرت عيوني ووكفت ابجي وموتت روحي، رفع راسه من سمعني ابجي واجاني متخبل..
-ليش تبجين؟ شحجيت اني؟ اول مرة اشوف وحدة تبجي لان واحد گاللها احبج!
-رجعني للمدرسة رجعني
-اي ارجعج بس خليني اسألج هالسؤال براسي شنو موضوع الرسائل السألتيني عنهن؟ اكو شخص جاي يدزلج رسايل؟
-لا لااا بس رجعني
ضرب الحايط بيده مرة ثانية ضايج وسوالي طريق حتى اكدر اطلع، زبكت كدامه اركض وهو يمشي وراي ويصيح بكل صوته لا استعجل غطيت حتى عيوني لا يعرفني احد من اليمشون بالشارع..
رجعت للمدرسة وركضت للصف روحي رايحة ما طولت دقايق وخلصت الحصة وجليلة وفضة استلمني وين جنتي وشنو صار وانوب بالفرصة اجن بنين ورجب هم بس رجــب ما تحجي بس واكفة ويانه…
**
“انيسـة”
ركض بينه رمضان ركض صلوات على محمد ما حسيت بي ولا ركبت جدر على النار الجوارين يومية وحدة عازمتني لبيتها وتدزلي فطور لابوية واحمد واني متونسة افرفر على البيوت…
اليوم كلت اطبخ بالبيت ما دام جليلة وصادق ويمامة يمي يباتون علمود باجر عزيمة بيت واثق فضة عدها نذر سفرة لام البنين..
عفتهم نايمين الظهرية وطلعت لبيت خالي مكي صار يومين ما شايفتهم، تلكتني باجي فوزية من الباب تبوس وتحضن وتشمشم عبالك صارلها شهور ما شايفتني..
-انيسة: هنه كلهن يومين ما اجيتكم هيج فراكي صعب
-فوزية: ليش شعندي غيرج اني بمعزة مـودة ومِــسج
ابتسمت وسألت على مـسك كالت نايمة، بعدها منطوية على روحها وما رجعت نفس گبل سالفة كحلاء كسرت ظهرنا كلنه مو بس ظهرها لليوم اني ما مستوعبة الصار وگلبي يوجعني احاول ما افكر بي وبس ادعيلها يارب تكون بخير ومرتاحة..
طبيت ويه باجي للهول خالو مكي كاعد يقرا قران وبيبية مـسك كاعدة مادة رجليها تسمعله، بس شافني صدق ومدلي ايدي بوسته وبست ايده وسحبها بسرعة ما يقبل..
سلمت على بيبي وكعدت يمها اسأل على احوالها وخالو مكي يباوعلي مبتسم جنت گبل استحي من يصفن بوجهي بس بمرور السنين تعودت وعرفت من يشوفني يتذكر امي ويشتاقلها..
-جدة: هسة شني تنطون لو لا
-شيخ مكي: حجية ليش مستعجلة منو يركض ورانه
مافهمت على شنو يحجون بالبداية بس بعدين عرفت ديحجون بخطبة مـسك، اخو باجي فوزية محاچيها من وكت عرس بشير كايللها يريد مـسك لابنه كاظم وعلى اساس بالعيد يعقدولهم بس چنه خالو مكي ما مقتنع واظن مـسك هم متدري بالسالفة..
-فوزية: يمة هسة غير هي مسيچه تقتنع لحد هسة ما فتحت الموضوع وياهة عود كلت لابوها يحاجيها شو غلس علينا
-جدة: من شني يشكي كويظم وما تردونه؟ زلمة خشنة وشاغول ويحبكم عايف اهله ومستقر ببيته هنا جريب منكم عمي كبعوا وانطوا
-فوزية: يمة كال اخوي مو على هذا العيد يردوها على عيد ضحية عبن كاظم عنده سفر
-جدة: مالكم غرض يعقد عليها ويسافر ليش هالمماطل
-شيخ مكي: حجية تردينه نجره من اذانه حتى يعقد على بتنه؟
-جدة: انه اجرنه مالكم غرض انتم بس حضرولنه البت
سكت خالو وهي ظلت شكد تحجي وتمدح بحفيدها شوية وتسوي نبي وباجي فوزية وياهة وحدة تجر طول والثانية عرض، حسب علمي كاظم لا شايف مـسك ولا هو مختارها السالفة كلها خطبة اهل ابوه رادها اله وهو ما ناقش وماعنده اعتراض..
-شيخ مكي: حجية من الاخير احجيها بوجهج هيج امور مابيها مجاملات وماريد تزعلين مني بس اني ما مقتنع بهالزواج لاسباب معينة
دكت صدرها بيبي وزحفت زحوف على كعدتها تقربت منه وكالت..
-اسبابيش ليش تلكون احسن من كويظم ومن خشونة كويظم
-شيخ مكي: زلمة خشن ومرتب وخوش ادمي ومتربي بس حجية كاظم لا يصلي ولا يصوم واني ما اكدر اجازف ببنتي ويه انسان ما يخاف من الخلقه؟ اذا هو واجبات ربه ما يسويهن وما يهتملهن تردي يهتم ببنتي؟
-جدة: شني هسة كلشي صلاة وصوم هاي انه اخذت ابو فوزية ما يعرف ربه من نبيه بس زلمة خشن صاني وصان العشرة
-شيخ مكي: قال رسول الله (ص) {اذا جاءكم من ترضون خلقه ودينه فزوجوه} ما كال زلمة خشن وزلمة ناعم حجية بعيداً عن كاظم وما نختلف على اخلاقه بس الما يخاف الله تردي يخاف الله ببنتي؟
سكتت جدة ضايجة وباجي فوزية هم خنست حسيتها اقتنعت بحجي خالو مكي، شوية وكالت جدة..
-نكله يصلي ويصوم سهلة جا هاي هم يرضي ربه وهم يرضيكم وتنطوه مـسچ
-شيخ مكي: اذا تغير واللتزم بواجباته ماعندي مشكلة بس كون مو يوم يومين ويرجع يكطع
-جدة: لا يكطع شني اكطع راسه خلي چـفل يراقبه وشوفه شون يتغير
اتفقوا ينطوه فرصة بشرط يتغير ويلتزم وجدة كيفت كعدت تصفك وتهلهل فرحانة بس خالو بعده ما مقتنع وحسيته حجاهة بس حتى يسدون الموضوع وطلب من عدنه محد يفاتح مـسك بهالسالفة الا تصير رسمية..
-جدة: عاين القسمة من تجي تلجم الحلوگ، لو خاطبها ابن شارع حشى مـسچ وجان قسمتها هم تصير لو انتَ والدنيا كلها وكفت ضدهم
-فوزية: يااا يمة اسم الله شنو ابن شارع لا ان شاء الله تصير لكاظم
-جدة: خيبة لو اطول لسان هم ينگص لو جان مكتبولها تتزوجه وانه من جبت طاري ابن الشارع حشى الشيخ جاي اضربلج مثل
عفتهم يحجون وطلعت للحوش شفت شروق واكفة تسگي الزرع وتدردم بصوت ناصي، ابتسمت وتقدمت اسلم عليها بس چنها ما حست بيه لان ظلت تحجي عبالك دتسولف ويه احد وهو محد ماكو يمها..
-شروق: الله ياخذكم كلكم امداني بيوم الاجيتكم كلكم نفس الخيسة وهاي مـسك ااخ لو اللزمج الا اطلع روحج مسوية روحها نادرة وشاغولة براسي الچلبة كلما شافوها تركض تشتغل صاحوا شبيچ انتِ فاهية وكوة تكومين اكلهم حامل البعيرة جدتهم تجاوبني كلنا حملنه واشتغلنه ليل نهار نخبز ونكنس ونشيل سطول الماي على روسنا بس والله مو صوجكم صوجي اني حطيت روحي بهالوضع الجايف
انصدمت بيها اسمعها وصافنة حارت شحجت على مـسك وعلى بشير وعلى باجي فوزية تسگي وتحجي بحقد، عفتها وحدها وفتحت باب الحوش وطلعت متأكدة حست بيه من طلعت بس ميهمني كلش انقهرت منها..
رجعت لبيتي وكضيت اليوم ويه اخواني، ثاني يوم من الصبح اخذت جليلة ولاكيت مـودة ومِــسك هم جاي يرحن لفضة يعاوننها بالطبخ، تسالمنه ببابهم بالنص ساعة طارت بس سوالف ياله دكينه الباب وفتحتلنه فرح..
-جليلة: وين فضة؟
-فرح: بالمطبخ تعالن
رحنه للمطبخ لكينه واثق كاعد يمهه يكسرلها جوز وهي حاطة المنخل مال الطحين وتفرك الجوزة بي تطحنها..
-انيسة: السلام عليكم
رفعوا روسهم ثنينهم وواثق من شافنه ترخص وطلع من المطبخ حتى ناخذ راحتنه، نزعت عباتي وكفيت ردان دشداشتي ومديت راسي بالجدر الحاطته على النار..
-انيسة: شطبختي فضة؟
-فضة: لفيت دولمة البارحة وهسة راح اكوم اسوي فسنجون وواثق كال نسوي كباب بعد
-مـودة: الفسنجون كافي خية منو ياكل بعد اذا هو بالسفرة
-فضة: ميخالف واثق كال نجيب على حب ام البنين وبعد لبن وشرابت عندي وتمر وحلويات وخير من الله
وكفنه نعاونها شوية واجت باجي فوزية تساعدنا كلمن لزمت حاجة تشتغل بيها، للعصر رجع واثق وبيده تمر وكرزات وحلقوم صاح من الحوش لفضة تروحله ما يرضى يطب للمطبخ حتى من صاحتله باجي وكالتله البنات كلهن لبسن عبيهن..
-فضة: ما يجي لا تعبن نفسجن
جابت الاغراض من ايده واحنه بدينه نحضر بعد راح يأذن بس فاجأتنه فضة من كالت ناخذ الاكل لبيت خالو مجتبى تريدنا نفطر ببيتهم..
-باجي فوزية: شيشيل الجدورة
-فضة: الولد يشيلوهن يلا باجي حبابة كلش بنفسي نفطر ويه باجي سوسن
طلعت باجي تصيح للولد واحنه ركضنا لغرفة فضة طبينه والولد خطية حاروا ينقلون بالجدورة والاغراض لبيت خالي مجتبى والبنات متشمتات بيهم..
-فرح: حييل خلي شوية يهزون طولهم
-انيسة: يا خبيثات
ضحكن وفضة جرت جليلة مادري شنو همست بأذنها وهاي اختي شو حالها كله انگلب ردت اسئلها شبيچ بس اعرف ما راح تجاوبني هسة..
سكتت عنهن وطلعنا لبيتهم بعدما كملوا نقل كلشي وتلكتنا بنين من الباب فرحانة وتبوس بوحدة وحدة بس من وصلت يم باجي فوزية سلمت عليها ببرود ودارت وجهها منها..
ظنيت بس اني منتبهة بس مـودة هم لاحظت هالشي لان ظلت اليوم كله تباوع لـ بنين ومقهورة، فرشنا السفرة بالهول وباجي سوسن مكيفة بينه تفتر بيناتنه وتضحك وتأهل وتسهل ووكفت يم فضة لزمت وجهها وباستها بخدها حيل وكالت..
-اروح فدوة للنادرة
ابتسمت من شفتها راحت تكعد ويه باجي فوزية وجدة يسولفن وعينهن على فضة اعرف نيتهن شنو باجي سوسن حاطه عينها على فضة وعلى العيد تريد تخطبها لـ سيف..
-فضة: بنين، جليلة تعالن اريدجن
راحن سوه للمطبخ شوية وطلعت جليلة بيدها صينية اكل سألتها هاي المن عبالي تريد تدز للجيران بس فاجأتني من كالت..
-هاي لسيف
-سيف؟
-جليلة: احم اي باجي سوسن كالت ميكدر يفطر ويه الولد وهمه ياخذون فطوره للغرفة كل يوم
-لعد انتِ تاخذيله؟
ويه سؤالي طلعت بنين من المطبخ مبتسمة..
-بنين: ردت اني اخذله بس الصينية ثكيله حيل خافت فضة اوكعها وكالت لجليلة تشيلها بس راح اطب وياهن ميرحن وحدهن
-انيسة: جيبي اني اشيلها انتن رجعن للهول
-فضة: لا لا انيسة اصلاً احنه گلنه لبنين نروح لان ما تحمدناله على السلامة وره الصار وگلنه فشلة كل البنات سلمن عليه الا احنه
-انيسة: خوش امشن نسلم عليه سوه
مشن كدامي ثلاثتهن وعيني على جليلة متوترة كلش وتتلفت عليه، دكت بنين الباب وسمحلها تفوت اشرتلنه تعالن وطبينه سوه عليه هبطنا الرجال..
-فضة: السلام عليكم، الحمدلله على سلامتك ابن عمي متشوف شر ان شاء الله
نزل عيونه وكال بصوت ناصي..
-الله يسلمج مشكورة
نزلت جليلة الصينية كباله وابد ما رفع عينه على أي وحدة بيهن، ندست جليلة بعكسي حتى تتحمدله على السلامة وهاي اختي فهت حتى حجي ما تعرف تحجي بعد ظلت مدنكة وخدودها صايرات طماطات..
-بنين: سيوفي البنات مستحيات لان ما تحمدنلك على السلامة واجن وياي، هذا فطورك حبيبي هسة بعد دقايق ويأذن بس صبينه من وكت حتى مننخبص
-سيف: عاشت ايدكم
جريت جليلة من ايد وفضة من ايد اريد اطلعهن من غرفته وتلاكينه بالباب ويه باجي سوسن كيفت من شافتنه هنا راحت لـ سيف وكالت بفرحة..
-باجي سوسن: سيف هاي فضة بت عمك مسوية سفرة لام البنين وطبخت وجابتلنه
هز راسه منزل عيونه احلى شي بسيف ثگله ما يرفع عيونه علينا لو مادري منو توكف كباله، رجعت غمزت وكالتله..
-فضة اخت واثق بت عمك صالح شوفها شلون تشبه امها الله يرحمها باوعلها زين
-سيف: شفتها يمة
-بنين: يلا يمة نعوفه هم ياله نصب الفطور
اخذت البنات وياي واشوف فضة تباوع لجليلة واختي ولا رفعت عينها من الكاع، فلتت نفسها من ايدي وراحت للحمام كالت تريد تتوضى وفضة وكفتلها بالباب تلوب..
-انيسة: شبيچ فضة
-فضة: انيسة شبيها باجي سوسن ليش هيج حرجتني كدام الرجال
ضحكت على شكلها شلون مقهورة وكلت بصوت عالي ما مهتمة..
-ليش ضايجة تريد تخطبج لسيف اول يوم العيد
-فضة: اشش اششششش سكتي هالموضوع كلت لـ بنين مينفتح بعد شبيهم مو كلتلهم ماريد
تهمس وتباوع لباب الحمام حسيت اكو ان بالموضوع خصوصاً من طلعت جليلة من الحمام وجهها راح ينفجر وعيونها مخبوطة بدموعها..
-جليلة: سيف يريد يخطب فضة؟
-فضة: لا لا جليلة لا والله ماكو هيج حجي
-انيسة: لا اكو شبيجن متسودنات واذا خطبج ابن عمج ورايدج شبيها هو اكو احسن من سيف
-جليلة: مهناية
حجتها بصوت يرجف وركضت للمطبخ وفضة عافتني وركضت وراهة، كلبي لعب واحساسي شكدما جان قوي حاولت اجذبه من زمان شاكة بـ اختي بالها ويه واحد من ولد خالي مجتبى واغالط روحي وهسة تأكدت من بجيها ورجفتها.. اخ يالقهر اختي عاشگة زلمة لو ندعي ليل نهار ما يلتفت عليها ولا يفكر بيها..
**
“رجــب”
طبتلي امي للغرفة تركض لابسة عبايتها وبيدها البوشية وتأشرلي بيدها مستعجلة وتكول..
-كومي كومي لبيت عمج مجتبى كومي
-وين شعدنا لعد والفطور؟
-ناخذه ويانه هناك نفطر وياهم كومي
كومتني غصب عني وخلتني اللبس نفنوف ميناسب زيارة عادية وطلعت وياهة، شايلة بيدها جدر التمن وجدر المركة وتتمركض.. من يوم الحريق حاولت قدر المستطاع ما احتك بيها واسوي كلشي تطلبه مني بدون نقاش..
مشيت وياهة كلبي يوجعني اباوع عليها شلون تهف كدامي تمشي بكل سرعتها وافكر شنو تريد تسوي هالمرة؟ هم تحركهم؟ لو هالمرة ناوية تكتل سيف خلاص؟!
ما جاي انسى شلون شفتها واكفه على سياج سطحهم، من اول ما لمحتها عرفتها امي اعرف جسمها من وره وعرفتها لابسة هاشمي مرة عمو مكي بس ما كدرت اكول لـ بنين هاي مو باجي فوزية وانهي علاقتنا بيدي..
امي سوسة شيطان تنهار لو شافت ناس مرتاحين وتحترك روحها لو شافت ضحكة مرة عمو محتبى باجي سوسن تكرهها كره مو طبيعي عجزت افهمه تتمنالها الموت وكل يوم تدعي عليها ما تفوت وكت غروب اذا ما رفعت ايدها للسما ودعت عليها وعلى خلفتها كلهم..
بيت عمو مكي صح تكرههم بس اشوى لان فايدها عمو مكي ينطيها فلوس كلما راحتله تبجي بس هالمرة حقدها عماها شلون من راحت تتوسل بي على فلس ما انطاهة حركت بيته وكلبه على حلاله وبساتينه.. ماعرف نيتها جانت تريد تأذي ابن عمو مجتبى لو هي صدفت وياهة ووكع ابنهم..
ليلي ما انامه من اتخيلها كتلت ولد شاب بريء وحركت شباب مالهم ذنب، اموت قهر وهي ولا هامها عايشة حياتها بالطول والعرض كضت رمضان كله عزايم وونسة وطلعات تالي الليل لبيوت صديقاتها..
وباليوم الما تطلع بي يجوها خوالي ومضحي يطبون للهول بالليل يتناقشون ويسولفون بالفلوس وبأشياء ما افهمها لحدما امل واعوفهم وأرجع لغرفتي..
وصلنا بيت عمو مكي ووكفت كباله تباوعله وتهز براسها عود متحسفة، دارتلي وكالت..
-حرامات شون بيت يشهگ اليتعده منه تاليته غده رماد
-رجــب: رمموا كلشي مابي رجع مثل اول
-نجبي نجبي ما تشوفين الصخام على الحياطين
-اي يمة بس راح يلبخوه
كرصتني ما عاجبها شون ما وكفت اتشمت وياهة، راحت لبيت عمي محتبى لكينه الباب مفتوح وجهال راهي بره يلعبون طبينه حوشهم وكل النسوان اندارن علينا مستغربات..
-صولاغ: السلام عليكم عيوني
رفعت بوشيتها مكيفة وراحت لوحدة وحدة تسلم عمة نرحس ومرة عمي ابو نديم هم هستوهن جايات بعدهن بعبيهن.. تسالمن وياهة والوجوه مكلوبة خجلت كلش وحسيتنا ما مرغوبات..
-صولاغ: افتهمت ملتمين اليوم عاد كلت اجيب فطوري واجي وياجن على الواهس
-نرجس: هلا بيج داده زين سويتي
انطت الجدورة لـ فضة اخذتهن وطبت للمطبخ ريحة الطبخ تخبل البنات ديصبن ويودن للسفرة بالهول، على وكفتنا واذن عمو مكي من الديوانية اخذت امي عباتي واشرتلي اروح ويه البنات..
طبيت للمطبخ سلمت عليهن جاوبني كلهن بس جليلة ساكتة وكاعدة بالكاع متچية ظهرها على الميز وساندة ايدها على ركبها وصافنة بالفراغ..
-انيسة: هلا بيج رجــب، تعاي اخذي من ايدي
اخذت من ايدها المركة ووديتها للسفرة، رجعت الهن وشفت جدورة امي مكترة ما صبن الاكل اخذت ماعين حتى اصب ولزمت ايدي مـودة وكالت بأبتسامة..
-الاكل خير من الله رجــب هواي حرامات خاف يزود رجعوا فطوركم وياكم يفيدكم فطور لباجر واخلصي من الطبخ
-رجــب: ميخالف نحطه بالسفرة ننقش بي يمكن واحد يعجبه ياكل
-انيسة: لا يمعودة هسة فضة تجي تلعلع علينا تريد تكسب اجر براسنا ونفطر بس من طبخها
ضحكن كلهن واني ابتسمت ونزلت الماعون من ايدي، حزت بكلبي خصوصاً واني اعرف ليش محد يرضى ياكل من طبخنه لو نجيبلهم عسل هم ما يحطوه بحلكهم ولا يضوكوه يخافون بي شي، كوة سيطرت على روحي ما اصرخ بيناتهن واحلفلهن اني طابخة الفطور وامي ما جاست الجدر..
اللتمينه النسوان بسفرة والزلم بالديوانية بسفرة وحدهم، كعدت وماكدرت اكل شي مستحية ونفسي تلعب من المواقف التفشل الامي تخليني بيهن..
-صولاغ: لعد وين اكلنا رجــب شنو نسيتي؟ كومي صبي كومي خوش مركة طابخين
-فوزية: عاشت ايدج خية بس الاكل هواي ما يحتاج
-صولاغ: لا لا كومي رجــب صبي وتعاي
كمت صبيت بمواعين وجبتهن حطيتهن بالسفرة ومثلما متوقعة محد منهن مدت ايدها وضاكت المركة، اختنكت كلش اكلتلي لكمتين وكمت غسلت وكعدت بالمطبخ انتظرهم يخلصون..
**
“فضـة”
عجزت افهم جليلة اني مالي علاقة وحلفتلها بروح اهلي كلت لـ بنين ما اقبل بسيف ولو يحطون سجينة على ركبتي هم ما اوافق، انقهرت منها تسمعني وتهز براسها ساكتة لا تعاركت وياي ولا حتى عتبت خبلتني..
وكفت اغسل مواعين وياهة واخطف منها نظرات فطور ما فطرت حطت بحلكها تمرة وبعد ما طخت الاكل ظلت بس كاعدة على السفرة حتى محد يحس بشي..
-فضة: جليلة عليج الله كولي شي أي شي بس لا تسكتين وتذبحيني
ماكو فائدة بقت ساكتة، كملنه ماعين وتنظيف المطبخ واجتنه مـودة تضحك وكوة تمشي..
-مـودة: ولجن اجو الولد سحلوا سيف سحل من غرفته واخذوه وياهم للديوانية تعالن سمعن يموتون ضحك
جريت ايد جليلة واخذتها ويه البنات شكد نحب من يلتمون الولد ونتونس وهسة من طلع عمو مكي اكيد ماخذين راحتهم على الآخر، مديت راسي من الشباج اني ومسك وانيسة نباوع بالختلات والباقيات وكفن بس يتسمعن..
-چـفل: شبيك عازل روحك وما ترضى تشوفنا سيف تره والله گلبي طگ
-رزاق: عليك الله خلصنا منه كل يوم يبجي عليك لعبت رواحنه
-سـعد: اطبله للغرفة اللكاه حاضن قميصك ويبجي عليك هواي متأثر بالنبي يعقوب عليه السلام
متنه ضحك عليهم وهمه هم لزموه چـفل حاروا شسووا بي طلعوا كل سوالفه وهو نار كل ساع لاطش واحد براشدي يسد حلوكهم وهمه ولا مهتمين مستمرين..
-واثق: لك بشير اني اذا مرضت هم تشمشم بقميصي وتبجي؟
-بشير: اتفل عليه
-واثق: لا يا زبالة شباب من هسة اعلن عن فصخ صداقتي ويه هذا العار منو يحتضني منكم
-سـعد: احنه احنه انه وبلال
-واثق: منو يحتضني منكم غير بلال وسعد
-رزاق: طايحة بيدك صداقة سـعد وبلال وعلي تنسى روحك من تكعد وياهم
-واثق: صح يعدوني بثولهم لهيج انسى روحي
-بشير: منيلك هاي وين اكو بذكاء سـعد ينضرب بي المثل من صغره فطن
-واثق: خلص ما دام ابليس حچه يعني صدك
-بلال: وينكم اخوتي شو محد بيكم فزعلي من الله لا ينطيكم
-راهي: شنسوي انتَ مطي كوة تريدنه نجذب عليهم
-وسام: بلال لو مو رمضان تدلل اسفطلك چذب للصبح بس بهالشهر اعذرني الشيطان مزنجل ونايم وكل الراح اچذبه هو اجتهاد شخصي وتضيع سمعتي بين الولد وبعد محد يصدكني
-نديم: ليش انتَ منو يصدكك اكبر جذاب عرفته
-وسام: شوف احتراماً لهذا الشهر الفضيل ولعلمك ودراستك وثقافتك وشخصيتك وثكلك ورزانتك راح اسكتلك نديم بس ذكروني من يخلص رمضان ادوس على راسه
-چـفل: كافي سكتوا خلي سيف يحجي ولك ما تحجي ورمت كلبي
-سيف: شكول
-واثق: كول چـفل انتَ طالق
-چـفل: كبر لهالحجي الخايس يا خايس الخايسين
-نديم: على كيفك لا تنهار لا يقع الطلاق الا بشروط معينة
ضحكوا كلهم وچــفل وسيف هم فطسوا ضحك وكملها راهي من كال..
-لازم اكو شهود عدول والموجودين كلهم مسربتين اولهم واثق
-واثق: لا عاب حلكك راهي صاير تعرف تسولف هاي من شوكت
-راهي: ولكم شكد سكط هذا
-واثق: اوكفو اوكفو نرجع على چـفل هسة اني ما مفتهم انتَ ليش ضايج يعني اني اتخيل بشير يصير بي قزرقط وينام بالفراش شهر واخلص من خياساته وعلي للصبح اهلهل واطش ملبس
-چـفل: عاد انتم واحد انكس من الثاني راضعين من صدر ابليس
-بشير: چـفل لازم مشتهي عركة صار هواي ما متمالخين
-چـفل: اسكت بس چفيني شرك
اللتفت على سيف واردف بجدية..
-چـفل: سيف باجر خلينه نروح نزور الحسين بلكت تتحسن وترجع نفس گبل
-سيف: ماروح
-چـفل: ما ماخذ رأيك غصباً عليك تروح شمتت ذولة الزبايل بينه وخليتهم يركصون على فراگنا
-واثق: بلال روح وياهم حبيبي
-بلال: ليش؟
-واثق: خلي يشدوك بشباج العباس بلكت يروح منك هالاستمطاء
-بلال: ولكم اخوتي جاوبوا ماكدرله اني من الله لا ينطيكم
-راهي: واثق لا تدوس وياه هسة يروح لامي يبجي
-وسام: وشيسد حلكه لو بچه
-بلال: يبووووووو من الله لا ينطيكم كلكم
ضحكوا يداهروه واحنه نضحك وياهم، اعرف واثق يموت على سـعد وبلال يشوفهم مثل اخوته الصغار ويحب يتحارش بيهم ويتونس لو ضوج واحد وهمه هم يعشقوه ويفدوه برواحهم صدك من كال البزون يحب خناگه..
-واثق: شوفوا من الاخير اني اول يوم العيد عندي شغل بالشمال تجون وياي كلكم هم نغير جو لهذا الخايس سيف وهم نتونس سوه اليعترض حلگه اشگه..
**
“رجــب”
رجعنا لبيتنه ومثل العادة امي بهدومها وعبايتها توكف بنص الحوش وترفع ايدها وتدعي بشهكة..
-الله لا ينطيكم ولا يوفقكم يا بيت مجتبى الله يحرك كلبج يا سوسن على ولدج عساهم بوجع بلا دوا وقهر بلا هوا وضيم بلا ضوا و هَم بلا سلوى
مسحت على وجهها ورجعت رفعت ايدها تكمل دعائها لحدما طبت لغرفتها، كعدت بالحوش انتظر مضحي حتى اسويله عشا حضرة جنابه ما يصوم ويكضيها تسربت لليل..
اجه بوكت متأخر كلت فد مرة اسوي سحور اكل وانام، كعد بالحوش يطحن بالجكاير ويدندن بأغنية شلت الصينية واخذتها للهول وصحتله..
-مضحي: امج وين
-نايمة عوفها هي من تكعد تاكل
هز راسه ساكت وكعد ياكل اليوم مبين ماله خلك وهادئ استغربت مو من عوايده بس غير لساني ينجب ويعوفه لا لازم اجيب الاذية لروحي..
-شنو شبيك مضحي
رفع عيونه الي ما مفتهم، حمحمت ورجعت سألته..
-شبيك شو ضايج
-ما ضايج
-مادري كلت يمكن اكو من مضوجك لان…
سكتت من خزرني ونزل الخبزة من ايده، وجهه بسرعة انكلب وطكت دمارات بكصته..
-شنو ولج؟؟
-شنو
-عيدي شنو كلتي؟
وكفت على حيلي خايفة اريد بس اشرد..
-ما كلت ما كلت شي
دفر الصينية برجله وتطشرت نعمة الله بالكاع، مشيت بأتجاه عكسي لباب الهول اريد افلت للغرفة بس اخاف انطي ظهري لا يسويلي شي.. شهكت من ركضلي وجرني من صدر دشداشتي ونتر بوجهي بصياح..
-شمعرفج اكو واحد مضوجني اليوم هااا؟؟ شمعرفج بت الچلبب
-ماعرف والله ماعرف اني بس هيج سألتك
صفكني راشدي سطر بي اذني وعتني من شعري حييل يهز براسي ويصيح..
-ادبسزز اطيح حظجج اذا ما حجيتي وكلتي شمعررفج
-والقران الكريم وروحه لابوية مادري انتَ ضايج من شخص مضحي والله حجيتها على لاهيتي
على صوت صياحنه اجتنه امي عاكدة حاجبها ووجهها معصب، شافتني بيد مضحي يكتل بيه صاحت..
-شكووو
-مضحي: بتج الساقطة ينرادلها تربية من اول وجديد
يحجي ويصفكني على وجهي ويدفع بيه للهول ويدوس على كلشي ما مهتم، متت بجي اريده بس يعوفني التوبة ماحجي بعد والله ماحجي.. لزمني من ركبتي يخنكني ويصيح منين عرفتي روحي راحت بيده..
-صولاغ: عوفها كافي تعال فهمني شبيك
-مضحي: احجي بتج شمفهمها؟؟ ولج تدزيها عليه تراقبني؟؟
-صولاغ: لا شبيك تسودنت هدها لا تموت بيدك وتبتلي
هدني ووكعت بالكاع اكح وابجي نفسي ضاك ردت اموت بيده، اشرتلي امي اروح عفتهم وركضت لغرفتي طبكت الباب وقفلتها عليه وركضت لفراشي دحست روحي بي وغمضت عيوني بس اريد انام تعبت اريد انام..
غفيت وحسيت الصبح على صوت ديچ بيت جوارينه كمت بسرعة غسلت وبدلت وطلعت للمدرسة ماريد اتواجه ويه مضحي لا هم يعاركني علمود الروحة يتخبل من اكله اخذني للمدرسة..
اتذكر اخر مرة كتله عليها كتلني كتل موت وكال لامي اكسر رجليها اذا راحت بعد بس امي ما رضت شلون بنات عمي كلهن يداومن واني لا يمكن غيرتها من بيت عمي هي المخليتني عايشة لحد هاللحظة..
طبيت للصف شوية واجت بنين مبتسمة سلمت عليه وكعدت تسولفلي على الواجب بنين بت عمي صديقتي الوحيدة احسها متقبلتني وحبابة وياي هي وانيسة اكيد..
بالفرصة يجن جليلة وفضة عليها ياخذنها وهي شكد تتوسل وياي اروح وياهن بس ما اقبل، على كم مرة اروح وياهن احسهن كارهاتني وميردوني وياهن صرت ابقى هنا انتظر الدرس يبدي..
خلص الدوام ورجعت للبيت بوجهي طبخت وغسلت الحوش والهدوم وطبيت لغرفتي انام شوية، فزيت من النوم على صوت صياحها تتعارك ويه مضحي وهم غلط وفشار واحد على الثاني ومضحي يلزم امي ويقسملها ويسبها ويسب اهلها لحدما يتعب ويطلع من البيت وهي تطب للمطبخ تبجي وتدعي على روحها..
المغرب اجوا خوالي يفطرون يمنه ما احب من يجون خصوصاً خالي عيسى كلش مو حلوة نظراته واخاف منه اتحجج بالشغل وافطر بالمطبخ من يجون..
طلعوا وره الفطور مباشرة وصاحتلي امي واكفة بالحوش، رحتلها لكيتها شايلة بيدها عباتي ونقابي شمرتهن عليه وكالت..
-لبسي وروحي لمكان شغله شوفي موجود لو سافر
-منو هو
-خطيبج
-خطيبي؟ يمة شبيچ وين صار خطيبي همه بس حچوا بيه ما صار شي رسمي
-مو قرا الفاتحة ويه خوالج صار اسبوع؟ لو يلعب علينا هالعار
-يمة فدوة رحتلج خيولي عوفي هو لو رايد يرجع لا تذليني وتذلين نفسج
همشتني من شعري بعصبية جرته حيل حسيت بقبق راسي راد ينشلع متت من الوجع بس صوتي ما خليته يطلع..
-ترحين تدوريلي هالعثماني وين ولى ادعي كون ما عافج وسافر رجيبة ادعي والله انحرچ بيدي اخلي دمج بطولج
دفرتني على الباب واشرت على العباية حتى اللبسها، بلعت غصتي ودموعي ولبست النقاب وفوكاه العباية وطلعت قبل لا تحجي حجي زايد..
-صولاغ: تندلين مكان شغله مو؟
-اي
طلعت من البيت ودموعي تجري امشي وابجي مختنكة وتعبانة وموجوعة مليت من هالوضعية وماعرف شلون تصفى، خطبني واحد تركي صار شهرين تحجي بي خبلتني ليل نهار وين صار “صفي” وين راح “صفي” من الله ياخذ صفي ويخلصني انوب هو شكله مو راحة وريحته تلعب الروح..
عبرت فرعنا وطلعت من جهة النهر اتمشى لحدما وصلت للسوگ الچبير امي بطرانة تريدني اروح لمكان شغله هو موظف يجوز حتى دوامهم خلصان منو يداوم بهالليل..
تمشيت لنص السوگ لمكان تجمع اغلب العثمانيين الطاگين مكان مثل الگهوة خاص بيهم ومعزول اتذكر مضحي مسولف لامي عنه.. وكفت ادور بعيوني عليه ماندل زين سألت ابو محل وكالي امشي بعد صاير يم حوض الماي..
وصلت للحوض وهم ما اندليت دخت وتهت رفعت البوشية من وجهي وغسلت وجهي من ماي الحوض وشربت منه، اللتفتت على صوت مرة تصيح وتتعارك ويه ابو محل اقمشة تعيط وتسب بي تكول باگهه ولعب عليها..
وخرت عيوني منهم مو وكتها لازم ادور على صفي، رجعت نزلت النقاب على وجهي وتمشيت شوية عن الحوض وجذبتني لافتة خشب مكتوب عليها “قشاني” صفنت من شفت يطلع منها ضابط عثماني يضحك بكل صوته عرفت هذا المكان اليحجي بي مضحي..
ظليت واكفة فترة محتارة شلون راح ادخل المكان صاير دفن بدربونة واكيد يكون كله زلم شيدخلني جوه، تحسرت ونويت ابقى انتظر هنا شوية اذا ما لكيته ارجع لامي اكلها موجود شسوي اجذب عليها واسلم على حياتي..
-محتاجة شي خيتي؟
درت عيني على الصوت الحاچاني وشفته رجال شاب واكف كدامي لابس صدرية وايده كلها اثار صبغ، عفته ممهتمة ورجعت اباوع على الدربونة وادعي يارب كون يطلع بس اللمحه ماريد شي بس حتى يرتاح كلبي..
-خيتي محتاجة شي اخدمج بشي؟
تأفأفت مغثوثة شبي هذا لزگ، درتله وجهي ونترت ضايجة..
-ماريد شي تسلم
رجعت انظاري على الدربونة وحسيت بالرجال بعده واكف ما كعد قلقني، درتله عيني انتبهتله يباوع للدربونة وياي شكد فضولي هذا..
-دام ما محتاجة شي الله يسر امرج
كالها بنبرة ناشفة مزعجة كلش ضجت شبي هذا شدها وياي، درتله بكل جسمي اريد ارده وانتبهت اني وين واكفة..غصت بهدومي من ركزت اني سادة طريق محله وعايقة حركة زبائنه ميكدرون يدخلون جوه..
وخرت بسرعة ووكفت على صفحة مفتشلة خطية هو مفتح على باب الله واني واكفة هنا مثل شمعة الفكر ساده الطريق وهو چنه افتهم حركتي غلط عباله قهرني او زعلت من اسلوبه بسرعة كال يبرر..
-عذريني بس لان ساده الطريق وهسة راحوا عليه زبونين
هالمرة نبرته اختلفت جانت الطف وبيها حس فكاهة شوية، ابتسمت من جوه النقاب وكلت بصوت ناصي..
-اني اسفة الله يعوضك ان شاء الله
-يعوض خيتي يعوض ان شاء الله كلمن ياكل رزقه بهالدنيا
كالها ودخل جوه بالمحل يكمل شغله، باوعتله منا اكدر اشوفه كعد على كرسي ولزم بيده شحاطة يعدل سيرها المكطوع..
شلون شاب و يشتغل قندرچي يبيع ويشتغل بالاحذية والشحاطات وكل ما ينلبس بالرجل مادري ليش من شفته تذكرت مضحي شكد يختلف عنه شبي اخوية ساطره العباس لا يقبل يشتغل لا يقبل يعتمد على نفسه كاضيها بس تخايم وعربده..
حسيته خوش رجال وكلبي ارتاحله وسبحان الله كلبي ميرتاح لياهو الجان الا اذا جان صدك ادمي يمكن هاي الميزة الوحيدة الاحبها بروحي..
رجعتله حتى اسئله عن الموجودين بهاي القشاني يمكن يطلع يعرف او يكدر هو يطب يتأكدلي.. مديت راسي لداخل محله وسألت بصوت ناصي..
-خوية ممكن سؤال
رفع عينه من الشحاطة ذبها من ايده ومسح ايده المتلفة بالصدرية..
-تفضلي جواب
-هاي القشاني يتجمعون بيها بس العثمانيين مو؟
-بلي
-اريد ادخل شلون
رفع حاجبه مستغرب باوع للبره ورجع عيونه عليه مثبتهن على عيوني حسيت بي شاك بيه لان نظراته مو طبيعية ابد..
-انتِ بت هالمدينة؟
-اي
-لعد شتسوين بالقشاني؟
-عندي شغل جوه
دار وجهه مني ورجع يشتغل بالشحاطة ما مهتملي ضجت من تصرفه وطلعت من محله، رجعت اوكف بمكاني الجنت اراقب منه وماعرف شكد مشه وكت واني على وكفتي رجلي وكعت وكوة صرت اتنفس من النقاب شلته من وجهي اتنفس عدل وما حسيت الا على صوت الرجال ابو الاحذية طالع من محله واكف بصفي وهمس بيني وبينه..
-خيتي كولي يا الله وكليلي شكد تحصلين يومية من هذا شغلج اني انطيج ورجعي لبيتج الله يستر عليج
مافهمت شديحجي وشيريد ينطيني، درتله اسأل وانتبهتله صفن بوجهي بطريقة وترتني حتى ما رمشت عينه، من شافني اهز راسي بحركة شكو بساع عكس عينه مني نزلهم وغمض..
-مافهمت شدتحجي انتَ؟
-انتِ مو تشتغلين هنا؟
مجاوبته درت عيني على صوت ضحك الزلم الطلعوا يضحكون من الدربونة وواحد منهم يمشي ويتطوطح..
عافني الرجال الجان يحاجيني ورجع لمحله يهز براسه مأيس، عفته وفكرت اسأل واحد من الطلعوا من جوه يجوز يعرفوه بس من شفتهم شلون يباعون لوجهي ويضحكون وواحد منهم سوالي بيده تعالي خفت وطبيت لمحل الرجال..
-رجــب: ماشتغل هنا اني اريد اسأل عن احد موجود هناك ومحتارة شلون افوت تكدر انتَ تسألي؟
-لا
-ليش؟ بس اسألي واطلع ماريد شي منك
-ما افوت لهيج اماكن
اللتهى يكمل شغله واني ضجت وطلعت من محله بعدني ما عابرة الباب وجفلت من شفت مضحي واصدقائه جاي يمشون لاتجاه القشاني، ظليت اراواح بمكاني ماعرف وين انطي وجهي ومن الخوف نسيت انزل النقاب على وجهي وركضت طبيت لمحل الرجال وسويت روحي اباوع للاحذية..
وكفت اتطاطگ ماعرف شسوي درت عيني بالختلات اشوف عبر مضحي منا لو بعد ومادري بالرجال عينه وياي ومنتبه لتحركاتي..
-اساعدج بشي؟
مسحت على وجهي ايدي ترجف، هزيت راسي لا ووكفت كباله ضبط وجهي عليه وظهري للشارع..
-رجــب: اكلك عفية اني هسة خايفة اكدر ابقى هنا شوية؟
-خايفة من شنو
-اكو واحد يضوجني وهسة شفته بالشارع يمشي اخاف يشوفني ويلزك
-غير عن الكاعد بالقشاني؟
-اي غيره
-هذا جم واحد تعرفين
-شنو؟؟؟
سكت ونزل راسه يكمل شغله متت قهر بس اخاف اطلع لا نتلاكه اني ومضحي، مشيت للباب بشكل عكسي ومديت عيوني ادوره ماهو اي يا الله بلكت راح.. ظليت بمكاني انتظرت شوية ولا ارادي راحت عيني على لافتة اسم المحل وقريت مكتوب “الاسكافي سيف مجتبى الـ^^^^”..
قريت اسمه مرة ورجعت قريته مرة ثانية وثالثة ورابعة وبكل مرة اقراه اني عيوني تريد تطلع من وجهي..
عزا بعينج رجــب خرب روحج خرب حظج هذا الرجال ابن عمچ هذا سيف ابن عمج مجتبى اخو بنين!!
رجعت طبيت لمحله مثل المخبلة من لمحت مضحي طلع من محل يضحك بصوت عالي ويحجي لهنا واصل صوته ومبين صوت رجال وياه هم يضحك..
بقيت ماعرف شسوي بروحي منا هذا سيف ابن عمي الما شايفته بكل حياتي ومناك اخوية اليريدله حجة حتى يذبحني شسوي بروحي..
-مضحي: ها لك سيف
عصرت عيوني منتهية راح اوكع من طولي مضحي واكف ورايه بالضبط جاي احس بي..
-سيف: هلا
-مضحي: شو من وره خشمك تجاوب ولك
سكت سيف ما جاوبه واني واكفة واتراعش تمنيت لو الكاع هسة تنشك وتبلعني ولا هالموقف، رجع مضحي يضحك ويكول بأستهزاء..
-هاا تذكرت مو انتَ مايع ما تتحمل وصارلك شهر واكع من طولك ونايم بالبيت واليوم ياله انفكت چبستك وطلعت
-سيف: مضحي روح منا روحي طاكة
-مضحي: واذا ما رحت؟
-سيف: لا تسويلنه سالفة منا عالم
طبيت للمحل جوه كلش وعيني على الاحذية منتظرة شوكت مضحي يميز طولي ويعرفني ويسحلني منا مثل الذبيحة..
-مضحي: ما تجاوب واذا ما رحت؟
-سيف: خوية انتَ مشتهي تتعارك اليوم؟! اذا مشتهي روح مناك مالي خلكك
-مضحي: مالك خلكي لو ما تكدرلي
ذب سيف الفرجه من ايده ووكف على حيله معصب، ما اشوف وجوههم بس اميز تحركاتهم واسمع اصواتهم..
-سيف: شوف لك هاي سوالف المزعطة ما تسويها وياي تسلم على روحك وتروح منا لا اضحك العالم عليك
-مضحي: جبان
-سيف: امشي طايح الحظ سربوت ذابين صرته يم محلي المدمغ
-مضحي: بحالك اني بحال محلك الخايس! اجيت اشوف نسيبي اليسوه راسك
-نافخ روحك بنسيبك هاي وهو كاعد بالقشاني لو كاعد بجامع شتسوي
-لا اهل الجوامع والكلاوات عفناهم الكم
-امشيييي منااا لا تطلع صوتييي
عافه مضحي يضحك بكل قوته وسيف رجع يكعد على الكرسي ويسب بي ويغلط عليه، توترت من دار عينه عليه وكال..
-مضحي التشردين منه؟
ذبيت حسرة مستسلمة ودرت اواجهه، نويت احجيله الحقيقة مهما يكون هو ابن عمي.. هزيت راسي اي ونزلت راسي ساكتة..
-سيف: اممم، لا تخافين ما يسوي شي انتِ بس لا تنطي مجال ما يتماده
-ماكدرله
-عذريني بس صوجچ توبن من هالسوالف ما تفيدجن بشي واذا تتأملين يتزوجچ فـ اكبر جذاب ومنافق هذا
فكيت عيني عليه مصدومة مادري اكيف لان ماعرفني اخت مضحي مادري ازعل لان عباله مصاحبته..
-تره اني ما مصاحبته وما متأمله يتزوجني!
-لعد ليش خايفة منه
صفنت ماعرف شجاوبه سكتت ادورلي على جذبة وهو سبقني وكال..
-عموماً شنو ما جان بينج وبينه بـ…
-مرة تعارك ويه اخوية وتحلفله بيه
عضيت على شفتي متندمة شدا اللوص اني انوب هذا خاف يشوفني فد يوم ببيتهم ويعرفني..
-سيف: نذل وكاسر وجوهنا مسحيها بوجهي ورجعي لبيتكم وانتبهي على نفسج لا تطلعين وحدج بعد
هزيت راسي اي وطلعت من محله بدون لا اتشكر منه، بعدني ما عابرته ووكفلي بالباب يصيح..
-خاتونة
اللتفتت عليه منتظرته يحجي بس حسيته متردد، نزل راسه ومسح على رگبته مستحي وكال شي ما سمعته.. هزيتله راسي ما فهمت وتقربت منه شوية حتى اسمعه زين..
باوع لعيوني ثواني ودار وجهه مني ورجع يمسح على ركبته صارت حمرة..
-ماسمعتك؟
-جاي اكول ذبي البوشي على وجهج هواي اكو ولد حرام
تذكرت اني رافعتها نزلتها بسرعة على وجهي وعفته اكمل طريقي للبيت، صار عندي فضول اللتفت على القشاني اشوف بلكي اشوف صفي يطلع درت وجهي وانتبهت لـ سيف بعده واكف يباوعلي من شافني اللتفتت رجع طب لمحله بسرعة..
وصلت للبيت ومن الباب امي استلمتني تحقيق، كيفت وفرحت من عرفت صفي موجود وما مسافر وحجيتلها شفت مضحي راح للقشاني علموده بس ابد ما جبت طاري سيف..
جبت كتبي من الغرفة وكعدت يمها بالهول ادرس وهي حاطه قوري الجاي يمها وكرزات تاكل وسرحانة تفكر بشي.. حطيت الكتاب بيدي وشكد ردت احفظ ولا كدرت موقفي ويه سيف ما جاي يروح من بالي..
-اكلج يمة
-هممم
-عمو مجتبى عنده ثلاث ولد مو؟
-اي عساهم بالمرض
-شنو اسمائهم؟
-نعال وقندرة وشحاطة
-وشكد اعمارهم؟
-ان شاء الله ما يعبرون الثلاثين بجاه الزهرة
سكتت وهي دارت وجهها عليه مخنزرة خفت من نظراتها ورجعت ادرس..
**
“چـفل”
باجر اخر يوم رمضان واثق ماتحمل اخذ الولد من البارحة وياه للشمال خلاهم يفطرون يومين بس اني كلتلهم اعيد واللحگكم..
صدقت من ختمت القران الحمدلله ورجعته على ميزي، شربت ماي وتمددت بفراشي اريح جسمي هستوها شكلت عيني جاي اغفى واجتني امي تركض..
-فوزية: چـفل كوم كوم
-ها يمة شصاير
-كوم رجعوا ذولة الاتراك يم ابوك وجايبين ضبة زلم وياهم
طفرت من فراشي وركضت اطلع للديوانية ابوي كاعد بالنص عوجيته الثكيلة بيده ساند ايديه ثنينهن عليها وهمه كاعدين متوزعين من الجهتين حوله..
سلمت وكعدت وياهم ما مفتهم سبب جيتهم هواي موجودين ترسوا الديوانية وجايبين وياهم العسكري والافندي وشيخ الدين..
سولفوا ويه ابوي سوالف عادية بالبداية واشرلي حتى اكوم اجيب الچاي، بعدني ما طلعت من الديوانية ووكفني صوت شيخ حيدر جاي من طرفهم اليوم..
-شيخ حيدر: اكعد وليدي چـفل لاحكين على الچاي احنه متعودين من گبل ما ناكل ولا نشرب شي الا ناخذ الموافقة صح لو لا
حجاهة بالضحك وهمه ضحكوا وياه نصهم ما يفتهمون شيحجي بس على الواهس يضحكون، عاينت لابوي مستغرب وهو هم حسيته مستغرب نفسي بس ما يبين وبقى مبتسم..
-شيخ مكي: تفضل شيخ حيدر امرني
-شيخ حيدر: والله اني لو عندي ولد ما اضيع نسبكم شيخ مكي بس هالمرة اني جاي واسطة خير ان شاء الله الكلام ويه الباشا يصير
اشر على باشا الاجانه گبل فترة هو وابن اخوه كمال الدين كاعدين ثنينهم مبتسمين ويباعون لشيخ حيدر، كلبي لعب من نظراتهم وما ارتاحيت جيتهم هاي ما تبشر بخير ووراهة مصيبة..
جله حنجرته باشا اورهان (الضابط الجبير) وكال بعربية مكسرة..
-شيخ مكي نحنا سألنا وتعرفنا على ثقافاتكم وتعلمنا هواي منكم وحسب علمي من شخص يريد يخطب لابنه يجيب وياه شي تسموه واجهة؟
-شيخ مكي: لا باشا مـ…
قاطع ابوي وحچه فوكاه..
-اني اليوم مو اب اني عم، كمال الدين يتيم الاب هو ابن جنرال باسل توفى من فترة طويلة الله يرحمه
كلهم ترحموله ونزلوا روسهم احترام، عيني ما نزلت من عين ابوي الراحت ابتسامته وبقى مركز ويه الباشا..
-واليوم ابن اخي يريد يكمل نص دينه وبالصدفة شاف كريمتكم وعجبته وحاب يتقدملها بشكل رسمي
فكيت حلكي مصدوم وابوي ما تقلّ صدمته من صدمتي، شنو شاف كريمتكم شنو عجبته وين شافها وين لكاها وشنو هالصلافة الشايلها هذا مسودن؟؟
كمت من مكاني فاير وابوي اشرلي بعيونه اكعد ما تحملت اظل كاعد جواي نار تچوي واحتركت اكثر من جنود ثنين شالو صندوك خشب جبير وحطوه كبال ابوي وفتحوه همه فتحوه لو چن فتحو روحي!!
حاطين بي قطع اقمشة نسائية وصندوك مجوهرات وذهب وعطور وكله حاجات نسائية هيج فتحوا كدام كل الزلم!!
-الباشا: شيخ مكي نحن نعرف ماكو نسب بين العثمانيين والعراقيين يعني هو اكو بس شي قليل ومو متعارف ونحن حابين نناسبكم ماعدنا مشكلة وهذي هدية لكنتنا (چنتنه) اتمنى تتقبلوها
غيم وجه ابوي من وكف كمال الدين گباله وكال بأبتسامة..
-هذا ولا شي بالنسبة لمهرها اوعدك اغرگها ذهب واعيشها عيشة سلطانات تستاهل كلشي بهاي الدنيا والله كل غالي يرخصلها
-الباشا: شيخ نحن جاي نبينلكم حسن نيتنا وياكم دليل ماعدنا مشكلة وخطبنا بنتكم لابننا
هز راسه كمال الدين مأيد عمه وانه روحي فرفحت، سكت ابوي يعاين للصندوك صافن وهذاك النكس مادري شون افتهم نظرته وكال..
-الباشا: اذا هذا الذهب مو كافي الكم نجيب اكثر ماكو اشكال
صار صميت ثگيل بالمكان، عيوني خازرة شيخ حيدر المنزل راسه مفتشل متمني لو بس ابوي ينطيني اذن واطلع حركتي بيهم اطردهم منا بالجلاليق..
-الباشا: ها شيخ شنو كلتوا؟
اخيراً ابدى ابوي ردة فعل رفع عوجيته بهدوء ودفع بيها الصندوك وكال..
-شيلوا صندوگكم
-كمال الدين: تردون اكثر؟
شهگوا كل الموجودين من رفع عصاته بعصبية وحطها بصدر كمال الدين، العيون كلها تركزت على ابوي مصدومين شون يهين ضابط عثماني هالشكل وكاموا الجنود يردون يدافعون وكمال رفع ايده يمنعهم..
ضغط ابوي عصاته بعصبية اكبر ودفع صدره بيها حيل ينتر من بين سنونه..
-اخذوا ذهبكم واغراضكم وطلعوا بره بيتي!
يتبع
….━━━━━━ ⚔︎ ━━━━━━
توقعاتكم؟؟؟؟
اليعرفون القصة رجاءاً انتو لا تعلقون وتخربوها على الشبابات
رأيكم بشخصية كمال الدين؟ صراحة عن نفسي اشوف شخصيته بسبب عمله صارم ويتحده ويتأمر بس هالشي ميناسب بنيتنا مـسك
عيوني صاحب الرسائل راح تظهر البارت الجاي لو لااا
رجــب اءءءء؟
الثامن من هنا
