رواية بين غمد السيوف الفصل الرابع 4 بقلم زهراء السلامي

روايات ميكسآخر تحديث: 2026-07-07

رواية بين غمد السيوف الفصل الرابع 4 بقلم زهراء السلامي

ليش تحچيهن اذا تتندم عليهن..
هنه اليوجعنك ياهو غيرك حاس بيهن!

━━━━━━ ⚔︎ ━━━━━━

“مِــسك”
رجفت خايفة ماشوف زين من الظلام معتمدة على ضوه الهلال، گلبي صار يدك حييل وتلفتت خايفة شلت عباتي ودشداشتي وظليت ارجف وامشي اريد بس اطلع من النهر حتى اشرد ويبست بمكاني من شفت شي يتحرك بين الگصب، لساني خشب وعيوني طلعت مركزة بكل حيلي ويه الظل الشفته مادري هذا صدك لو يخايلي من الظلام..

ما فكرت زايد شلت اللوكس والسطلة وانهزمت مثل المسودنة، اركض برجلين حافية حتى الشحاطة ما لحكت اللبسها..

بألف محمد يا علي وصلت لفرعنا اركض واتلفت وراي خايفة يلحكني الشفته هناك، اخر مرة اللتفتت وراي عطت فازه من انردمت بشخص كدامي درت وجهي عليه كلبي طايح..

-الله

عيوني شخصت عليه اريد اعرف احجي ماكدر اريد اشرد ماكدر رجلي يبست، زلمة ملثم بشماغ ما طالع منه شي غير عيونه احس بي جاي يحجي وياي بس اذني بيها طنين ما اكدر اسمع شيكول ما رجعت لوعيي الا من لزمني من زنودي حيل ونتر بوجهي يهمس..

-شمطلعج بهالليل ليش طالعة لييش

دفعته عني من استوعبت هو كاضني وخرت منه ارجع خطوات ليوره احاول اهدأ نفسي وعيوني تبحلگ بعيونه، لوكس البيت البصفنه يعكس عليه زلمة غريب ماعرفه ليش وكفني وشيريد..

-شبيچ ترجفين وين جنتي ما تحجين؟؟

-بـ.. بـ..

ما تطلع وياي الكلمة انبلع لساني خايفة منه اكثر من خوفي من الظل الشفته بالنهر خفت يسويلي شي لو يفضحني..

-تعاي

ما انتظرت اعرفه منو وطارت رجليه لاتجاه بيتنه، بعدني ما عبرت مسافة مترين وشهكت من حسيت بروحي انسحبت من زندي عليه صرخت استنجد بأي احد من منطقتنا حتى لو انفضح مايهمني بس حتى صوتي انكتم صم حلگي بأيده وجرني جر غصباً عليه..

انهاريت ظليت اعيط بحس مكتوم وادفع بي ابجي بخبال راح اموت من الخوف متندمة على طلعتي متندمة بكد شعر راسي لان فكرت اروح وحدي بهيج وكت دخيلك ياربي بس نجيني منه..

-اششش سكتي بس سكتي

جرني على صفحة ودفعني على حايط انضرب ظهري بي حيل صرخت موجوعة ورجع صم حلكي بأيده، مچتف ايدي ثنينهن بأيد وحدة والايد الثانية على حلكي ما جاي اكدر اتحرك ظلت بس عيوني تصب وعقلي يرسملي شنو راح يصير بيه بعد شوية..

-مِــسك بس اهدي ما اسويلج شي

فكيت عيوني على وسعها من كال اسمي وروحي طلعت ويه ما نتر بوجهي..

-شيخ مكي وين عنج اخوتج وين ما عرفوا يكضوچ

انكطع نفسي راسي احسه طار وعيوني من وحدها غمضت اسمع حسه واحس بأيده يشبگني حيل وماعندي قوة ادفعه مني ايدي ورجلي مكطعات..

-شبيچ شبيچ راح تطيحين؟ شبييج ما اسويلج شي لا تخافين حبيبتي ابقي وياي لا تغمضين عينج مِــسككك

گلبي بطأت نبضاته والهوا فرغ من ريتي، اخر شي حسيت بي هو صوت زلم هواي يحجون بصفي وغبت عن الوعي..

فزيت على ضربات قوية على وجهي وماي انشمر فوك راسي، شهكت مخروعة اتلفت اشوف انه وين واستذكر اخر شي صار وياي، انتبهت لروحي نايمة على فراش بالكاع ومن باوعت ليجاي شفت مخطوطة اية الكرسي معلكة انتبهت اني بمشتمل شجاع..

-شجاع: الحمدلله على السلامة

درت وجهي عليه فاكة عيوني على وسعها واتنفس سريع، كاعد كبالي خايف وبيده كلاص ماي..

-شجاع: شلون صرتي بابا احسن؟

-اني شجابني هنا؟

كعدت على حيلي اتلفت وادور عباتي وينها، كمت من الفراش ادور بالغرفة واحس بجسمي كله يرجف وطعم حلو بحلكي عبالك ماكله طن شكر لعبت روحي..

-شجاع: على شنو تدورين عمو شبيچ

-عباتي.. عباتي وينها؟ شجاع منو جابني هنا انتَ؟

-لا انتِ اجيتيني

-انه؟؟

باوعلي مستغرب وعاكد حاجبه، اللتفت على باب الغرفة ورجع ثبت عيونه عليه وكال..

-دكيتي باب المشتمل ومن فتحتها لكيتج طايحة بالكاع وعباتج ناكعة

صفنت بوجهه استوعب ومن الخوف عبالي جنت اتحلم وما رحت للنهر ولا شفت احد يراقبني ولا شفت زلمة ملثم بوجهي وصاحلي بأسمي..

لحظات واندگ باب المشتمل عافني وراح يشوف منو، مسحت وجهي بأيد ترجف افكر واستذكر الصار يجوز مو حقيقي يجوز احلامي بدت تطور وتخليني اعيشها لدرجة لهسه جاي احس بأصابع الزلمة من عصر متوني..

رجع شجاع بيده سچينتين وطبر، فزيت خايفة ورجعت ليوره ضحك من شاف ملامحي وگال بأستغراب اكبر..

-شبيچ بابا خوفتيني عليج

-شـ.. شنو ذني ليش ليش بيدك

-حديتهن يم صاحبي وهسة رجع جابلياهن

-يجيبهن بهيج وكت؟

-اي انه هم تفاجأت بس يجوز هسة تذكرهن المهم هذا مو موضوعنه مِــسك سولفيلي ليش اجيتيني؟ وشبيج طحتي بالباب مريضة انتِ؟ بشير مضوجچ بشي؟

-لا

-چا شنو

-تحلمت

-شنو تحلمتي سولفيلي حبيبتي

-لا.. اريد ارجع لبيتنا شجاع وصلني

سكت يباوعلي بنظرات قلقة بس من شافني مصرة على الروحة راح جابلي عباتي من الهول ورجع لبسها على راسي واخذني وياه، طلعنا سوه من المشتمل مكمشة بأيده بكل قوتي خايفة اهدها احس براسي بعده يدور وعيوني مغوشة..

فر من الجهة الثانية حتى يطببني من باب الديوانية وفزيت من شفت رجال مشه بخطوات سريعة منطينه ظهره لابس قميص رصاصي وبيده شماغ فتح باب غرفة الطين الصايرة شوية من بيت شجاع ودخل بيها.. شهكت عيوني عليه ما شلتها من الصدمة..

-شجاع: شبيچ مِــسك؟ شبيچ بابا والله خوفتيني عليج شجاي يصير وياچ

رجفت خايفة وتلفتت ادور بالبييوت التحيط بشجاع، ماكو جهة شجاع فضاء وبيها هواي نخل وشجر وبساتين واكو بس مشتمل صغير وغرفتين مبنيات من طين على صفحة وحدة منهن طب بيها هذا الزلمة..

-مِــسك: شجاع هذا المشتمل مالمن؟

اشرتله على المشتمل القريب عليه باوع لوجهي ورجع عاين للمشتمل وكال..

-مشتمل بيت سيد ونـاس هذا

-سيد ونـاس تقصد هذا الطالب اليدرس عد ابوي؟

-اي هو

-وهذن الغرفتين؟

-ليش تسألين بويه صاير شي؟

-لا لا بس جاوبني

-هاي غرفة لزلمة يشتغل حداد والغرفة الثانية فارغة محد عايش بيها

-الزلمة عايش وحده؟

-اي

-يعني محد يطب ويطلع عليه؟

سكت ضايج من اسئلتي بس ما استسلمت وظليت اللح وياه اريد اعرف..

-لا يجون جماعته يمه واوقات يباتون

-واليوم جايين؟

-شنو السالفة مِــسچ

-عمو شبيك مو انقهرت عليه چي كلت عايش وحده

-استغفر الله اي عنده خطار سمعت صوتهم

-شنو اسمه

-زودتيها وعلي

-فدوة كول

-اسمه عـبد

-يعرف ابوي واخوتي؟

-اي صاحبهم هو

-شلون شكله صاير؟

ضاج من اسئلتي ورفع حاحبه ما عاجبه، سكتت بعد ما حجيت ومشيت كدامه للبيت.. وكف كدامي فتحلي الباب لانه يقفلها من بره بالليل وسألني على عباتي ليش ناكعة گتله غسلتها ولبستها ما علق، اشرلي افوت ووصاني ممنوع اطلع وحدي بعد..

فتت للبيت عقلي ملحوس احس كلشي حواليه غريب عبالك جنت بعالم ودخلت لعالم، تمشيت لغرفتي ما مهتمة خاف واحد من اهلي كاعدين ردت بس فراشي ومخدتي حتى اكدر اجمع كل الصار بعقلي واستوعبه..

فتت للغرفة وتذكرت السطل واللوكس وينهم؟ وين راحن ما شفتهن ببيت شجاع ولا شجاع جاب طاريهن غلست عنهن بالوقت الحالي ونزعت العباه وعلكتها على شباج الغرفة وعلكت فوكاهة عباتي القديمة وجرجف فوكاهن حتى خاف امي تتحسسها وتبين عدها ناكعة وتفطن على طلعتي..

بدلت دشداشتي المبللة ونمت بفراشي مخلوسة وارجف افكر منو هالزلمة وشلون عرف اسمي وحسيته كال حبيبتي بس مادري صدك كالها لو تخيلت وهو نفسه الجان يراقبني بين گصب النهر لو غيره..

اظن جان لابس قميص رصاصي كدرت اميز لون قميصه والزلمة الفات لغرفة الطين هم لابس قميص رصاصي ومن لمحنه اني وشجاع طب للغرفة يركض..

كدما فكرت دخت وغفت عيني لحظات وفزيت من تذكرت كاظم ابن خالي هم اليوم لابس قميص رصاصي، كعدت على حيلي اكل بأظافري اقارن بين اجسامهم ماعرف نفس الاجسام لو لا ما جاي اركز دخيلج يا ام الحسن شيصير لو بس شايفه ملامحه لو بس داير وجهه من طب لغرفة الطين جان كدرت اميز واعرف افكر صح..

نمت ليلتي قلقة وفزيت الصبح على صوت صياح، ركضت افتح الباب على كيف مديت راسي اريد اسمع وانتبهت لصوت ابوي جاي من الهول انه سمعت صوته لو خرطت روحي خفت بي افتهم بسالفة البارحة..

لبست شال وطلعت اركض على اطراف اصابعي وكفت بباب الهول واسمعه يكول..

-شيخ مكي: هسة تطلعون تجيبون اخوكم مثل البهيمة واذا ما لكيتوه والله العظيم رجليكم اكسرها

رافع ايده ويهدد بـ چــفل ورزاق وسعد وهمه ساكتين بس يهزون بروسهم، ارتاحيت شوية من عرفت الموضوع ميخصني ودخلت للهول وكفت على صفحة..

مشوا الولد يطلعون من الهول هستوهم جاي يعبرون الباب ووكفوا بمكانهم، مديت راسي من الشباج لمحت بشير هستوه جاي يطب للبيت..

-شيخ مكي: منو هذا الاجه بشير؟؟ تعال ولك تعال

اشوف وجه بشير تغير وظل واكف بمكانه، ذب نفس قوي ومسح على لحيته وشعره واجه للهول..

شيخ مكي: شررفت شيخ بشير؟؟ شرفت يا افندي؟؟

-بشير: السلام عليكم

سلم هادئ بس مبين على وجهه شكد متوتر من شاف الكل واكف كباله، جاوبنه السلام عدى ابوي ظل مخنزر وعينه اليمنه مخبوطة بالدم شكدما محترگ دمه..

-شيخ مكي: وين جنت ولك

-بشير: يم واثق

-لا تجذذب

شمر سبحته عليه انركعت بصدره ووكعت بالكاع، مسح وجهه بشير مرتبك كلش بس يحاول يسيطر على روحه لا ينفضح..

-بشير: يابة رحت لبيت واثق ومناك طلعنا للبساتين يم صاحبنه

-شيخ مكي: اللحكني للديوانية

مشى كدامنه يرجف رجف من العصبية، راحت وراه امي وبشير وزع انظاره بيناتنه وخزر چــفل من دون الكل..

-بشير: بسيطة چــفل بسيطة

-چــفل: يخيس بروحه ويذب خياساته عليه

واحد خزر الثاني وراح بشير وره ابوي للديوانية، ظلينه اني وسعد نلوب نريد نعرف شيصير ورزاق عود مسوي روحه ثكيل ما مهتم وهو من جوه يحوص من الفضول..

-رزاق: يعني هسة شني

-چــفل: مادري، انه طالع للمحل لحگوني يا ولد

-رزاق: ها ها وين يا محل يمعود غير نفتهم شبي اخونا

ما جاوب چــفل وخلى وطلع، انداريت على سعد غمزتله بعيني افتهم عليه وهزلي براسه يوافقني.. مغط ايده لفوك وكال وهو يتثاوب..

-سعد: ما شبعت نوم وما متريك بعدني رايح اشوف امي ما ناوية توكلنا

راح للديوانية قبل لا يحجي رزاق وانه سويت روحي اركض وراه عود اگله اسويلك ريوك، وكفنه واحد يباوع للثاني محتارين شلون نسمع ونشوف..

باوعت للشباج خاف امد عيني منا كدامه ويكتشف اتجسس عليهم من يجون الولد فـ قررت اجازف واسلك الطريق الصعب، عفته ومشيت لحدما وصلت لباب الديوانيه لزك ركزت بكل حيلي واجاني صوت ابوي يحجي بهدوء شوية وعلت نبرته وصوت بشير هم اعتلى يرادد بي سميت بأسم الله وفتحت الباب على كيف كلش وكلبي يدك لا ينتبهون ويطبكنه ابوي ويه بشير برزالة وحدة..

-مِــسك: تعال تعال جاي اكدر اشوفهم

مد عينه وياي يباوع من الفتحة الصغيرة الفتحتها واكفين ابوي وكباله بشير وامي منطية ظهرها النا وواكفة لزك بيهم كل ساع وذابة روحها على بشير تفكه من ايد ابوي..

-بشير: متزوج يابة متزوج على سنة الله ورسوله مو زواج منقطع وهسة رايح اطلكها لا تخافون كلشي ما يصير

-شيخ مكي: ولك البنية حااامل

-بشير: ادوس بثربها اوكع الفرخ

شهكت كاتمة صوتي بأيدي من رفع ابوي ايده وصفگ بشير راشدي اني معليه واذني انسطرت، لزم بشير ايد ابوي ما راضي ورجع ابوي لزمه من ياخته يهز بي ويرزل ويكتل حييل وامي تتوسل يوخر منه بس ابوي فقد، جر عوچيته المتينة وصار يضرب بشير على رجليه وظهره وامي تبجي وبشير يصيح ويغلط على شروق وانكلبت الديوانيه وانه وسعد واكفين نتراعش..

-شيخ مكي: فضحتنا وفشلتنا ولك ما تخاف الله انتَ تريد تكتل ابنك بيدك يا زماال

-بشير: متفق وياهة انه ما تحمل متفقيننن

-شيخ مكي: طايح الحظ سودت وجهي ولك انتَ تربية علماء انتَ؟؟ دمرتنييي بشير دمرتنييي

ويضرب حييل كسر بشير تكسر وبشير ساعة يستسلم وساعة يدافع عن نفسه ويصيح ويرجع يغلط على شروق ويحلف بمية امام الا يطلكها ويشمرها بره العراق وفنها لو وصلت باب بيتنا لو فتحت حلكها وفضحتنا..

-شيخ مكي: البنية ماعدها اهل ماعدها عمام؟؟ شلون تزوجتها ولك شلوون تريد تخزينا انت!!

-بشير: ماعدها تتصور التزوج بالسر عدها اهل؟؟ يتيمة لطيمة ماعدها احد والعباس

-شيخ مكي: وخري فوزية لا تفزعين لابنج محد خربه غير دلالج الزايد

-فوزية: مكي عليك العباس ابو فاضل ابوس ايدك وخر منه وعلي مات الوليد مات

وابوي متخبل نادر ابوي يوصل لهذا الحد من العصبية ودائماً يكظم غيضه ويحاول يحل كلشي بهدوء بس هالمرة ما يكدر يحل شي بسكات بسبب شروق من اجت لبيتنا چنها تكول اذا ما اعترفتوا بزواجي من ابنكم افضحكم..

بعد عركة حامية وكف ابوي تعبان ذب العصا من ايده وكال وهو يهدد ببشير..

-شيخ مكي: شوف ولك راح ندور على اهلها ونفتهم سالفتها واذا طلع عدها اهل ناخذ مشية ونروح نخطبها من اهلها واذا طلعت صدك يتيمة الخميس تعرس عليها كدام الكل وروحه لابوية يا بشير لو فشلتني وسويتلك سالفة ظهرك اكسره وكول ابوية ما حذرني

ركضنا اني وسعد للمطبخ ولكينه رزاق واكف هناك عبالك جان منتظرنا، حرك راسه مستفسر بدون لا يحجي وسعد كال وهو يطك اصبعتين فرحان..

-الفرحة فرحتين هم ابوي فوخ كلبي ببشير وهم راح يعرس الخميس

-رزاق: صدك؟ يعني تفاهموا؟

-سعد: اي اي تفاهموا

-مِــسك: ولك يا تفاهم غير قامت القيامة جوه ابوي طيح حظ بشير بالكتل والمسبات

-سعد: شبيچ بابا خو التفاهم انواع

مدينا روسنا كلنا نباوع من شباج المطبخ طلع بشير من الديوانيه ومن دبچة حذائه مبين راح ينفجر من العصبية، طلع من البيت وركع باب الحوش قوي وراه.. شوية وطلعت امي تمسح وجهها وعيونها من الدموع..

-رزاق: ليش امي تبجي؟؟

-مِــسك: غير صارت معركة بدر جوه

تطشرنا كلمن يسويله شي من طبت امي للمطبخ، وكف سعد يم الميز يسوي روحه جاي يفحص الفاكهة الي بسلة الخوص يشيل بالتفاحة يكلب بيها ويرجعها انوب يشيل بالرمانة ويسوي نفس الشي..

-سعد: والله خوش فاكهة هاي ما شاء الله اللهم صل على محمد وال محمد الحمدلله والشكر على النعمة غيرنا يتحسر عليها اي والله الف الحمدلله والشكر

-رزاق: احممم، اي شكو ماكو

-سـعد: ماكو بس اني جوعان يمة جوعان

ورغم ضوجة امي اللتفتت عليه ودكت صدرها خفيف وكالت..

-عين امه جوعان؟ مِــسچ ركضي سوي لكمة لاخوتج

-مِــسك: عين امك بعدك تشتهي وره الصار؟

-سعد: اي

خزرته اأشرله يكول لا بس ظل يستفزني بأبتسامته المزعجة واندار لامي يكول..

-يوم وعلي جوعان مو مال ابقى للغده

-فوزية: مِــسچ سويلهم ريوك چا يظلون جواعة

هزيت راسي ساكتة ورحت جبت بيض وجبن ووكفت اسوي ريوك كيفت عبالي اليوم اخلص من الريوك بس عين امه كال جوعان شلون تتحمل امي تغلس عليه..

كملت الصينية وشلتها للهول حطيتها بالكاع وكعدنا اني و سـعد ورزاق حولها بس امي بقت كاعدة بعيد وسارحة بفكرها..

-مِــسك: يمة جا ابوي ما يتريك؟

-فوزية: كال ما يريد

-رزاق: يمة، شصار جوه على شنو صفيتوا؟

تحسرت امي ضايجة كلش وظلت تلطم على رجليها وتولول، سكت رزاق من شاف حالها هيج بس اني شيسكتني رجعت سألتها..

-يوم سولفيلنه

-فوزية: شسولف وابوكم يريد عكب باجر يعقدله والخميس يزوجه

-رزاق: بيها الخير

-فوزية: يا خير وهو جابلي بت مادري بكرعة ابوها منين ويريد يزوجها لابنه؟؟

-سعد: اي والله

-رزاق: سـعد!

-سعد: جا صدك حگها تضوج مالج علاقة يوم انه وياچ

عضلنه شفه عود جاروها بالحجي حتى ما تضوج اكثر ويصير بيها شي، هزيت راسي ساكتة وهو ظل يسولف وياهة ويهدي بيها سوالها لفة بيض وكام كعد يمها وكوة يوكل بيها، سعد صح شالع گلب امي بس كلش متعلق بيها ويتسودن لو صار بيها شي وهي هم تموت عليه بزر كعدتها هذا وعيونها الثنين دليل ما تصيحله سعد كله تكول “عين امه”..

-سعد: اي ام بشير هسة سولفيلي يمته العرس؟

-فوزية: ولك شني مو كتلك الخميس العرس

-سعد: ها.. اي اريد اكول شي بس اخاف انلزك بنعال

-احجي احجي

-راح اجيب فرقة حتى نتونس

-شنووووو ولك

طفر من يمها يركض وهي ركضت على نعالها نازعته بباب الهول تريد تركعه بي وهو فلت يطلع منا ويصيح..

-اي يوم جا غير عرس اخوي واريد املح كلبي

-تعااال املح گلبك بنعالي تعاال

ظلت امي تصيح وتعدله وتصفله من مكانها مبين كلش مالها خلك ومقهورة حيل، بقينه ساكتين نتريك اني رزاق لحدما خلص ريوك وطلع للمحل..

شلت صنية الريوك توضيت بسرعة ورحت اصلي الفجر قضاء ورجعت اغسل بالماعين وافكر بيني وبين روحي اكمل طبخ واكول لامي تاخذني لبيت جليلة (اخت انيسة من غير ام) اللتهي يمها وبلكت انسه الصار وياي البارحة عقلي تعب من التفكير..

ذبيت من ايدي على صوت باب الحوش يندك صاحت بيه امي من الحمام حتى اروح افتح بدلاً عنها حطيت الشال على راسي عدل ومشيت للباب وانه اصيح..

-منو

ما جاوبوا اكيد انيسة هاي مخبلتني بهالسالفة تخاف تتعب اوتارها الصوتية، ظليت واكفة وره الباب وفتحتها اضحك منتظرة تطب واستلمها بس محد دخل.. مديت بس عيوني اشوف شكو وجفلت من شفت سطل الماي واللوكس مال البارحة بباب بيتنه..

عيوني راحت على شحاطتي مطبوكة وحدة فوك الثانية وحاطيها بنص السطل، نفسي انكطع وكلبي ظل يدك حيل طلعت راسي كله من الباب اتلفت منا ومنا ماكو احد بس السطل والشحاطة واللوكس بباب البيت..

-فوزية: مِــسچ وينج

-جايه جايه يمه جايه

مثل المسودنة شلته اللوكس حطيته بالسطل وركضت بيه لغرفتي، طبكت الباب عليه وقفلتها ايدي على گلبي كعدت على ركباتي وطلعت اللوكس والشحاطة من بطن السطل وبس فرقت فردة عن فردة طاحت منهن ورقة..

شلتها ارجف من فوك ليجوه فتحتها اشوف محتواها وكدما عيوني مغوشة ما جاي اقرا الحروف، غمضت عيوني روحي رايحة همست “بسم الله الذي لا يضر مع اسمه شيء في الارض ولا في السماء وهو السميع العليم” ورجعت ثبتت عيوني على الورقة اقرا كلماتها المكتوبة بخط ما مرتب..

“اكو من جاي يراقبك وين ما تروح انتبه على نفسك”

صفنت بالكلمات ما مستوعبة رجعت قريتها من جديد اتأكد خاف اني الغلطانة بس لا ماكو غلط الكلام موجه لمذكر مو مؤنث، مسحت وجهي بأيدي محتارة اني المقصودة بهالرسالة لو واحد من اخوتي بس اذا واحد من اخوتي ليش حاطين الرسالة بشحاطتي؟

فزيت على صوت امي تريدني بسرعة بسرعة شككت الورقة كلش زين وذبيتها من شباج غرفتي بجهة الترك وطلعت لامي.. توقعت اذا اللتهي بالشغل راح انسى بس العكس تماماً ظلت الرسالة تاكل وتشرب وياي لحدما نمت..

**

“فضــة”
واكفة بالمطبخ اعصر برتقال وطب عليه واثق يلوب، وكف بصفي اخذ نص برتقالة كشرها ووكف ياكل منها ويتحسر..

-فضة: احجي احجي

-واثق: وينها فاتنة ليش ما تعشت ويانه؟

-مو كتلك نامت من وكت

-جذابة فضة جذب لا تجذبين جذذب لا تجذبين عليييه

-حبيبي ممچذبه شسالفة البنية تعبت ونامت من وكت اليوم

-من شوكت فاتنة تنام من وكت وما تشلع كلبي؟ بعدها زعلانة مو؟ كولي احجي زعلانة ولا تجذبين؟

-صراحة واثق اي هي زعلانة انتَ ما شفت روحك البارحة شلون صحت بيها وكسرت البيت على روسنا البنية خافت ومن وكتها لهسه ما طلعت من الغرفة

-من البارحة هي بالغرفة؟؟؟

-اي

-فضة ليش هيج فضضضة

شال الماعون الكدامي وشمره على الحايط فلشه، تحسرت اباوعله بقهر غير يخفف عصبية حتى نكدر نسولف..

-فضة: هسة شحصلت من كسرت الماعون

خزرني يتنفس سريع هسة اني شحجيت وجنح خشمه عليه، فرك وجهه متنرفز من شافني اباوعله ساكتة عباله راح اخاف نفس فاتنة الفطيرة ادري بي ما يسويلنه شي يظل بس يكسر ويصيح وما يطخنه يطلع حرگته بالاثاث..

-واثق: صلفة

-فضة: تربيتك خوية

دار وجهه مني يخفي ابتسامته ورجع باوعلي وكال بضوجة..

-هسة شدعوة تره البارحة صيحت وحدي مو عليها اعتبروني مخبل هم تعتبون على المخبل؟

-حشاك ابوية انتَ بس تعرف فاتنة كلش حساسة ومتتحمل الحجاية انتَ ما شفت روحك البارحة من طبيتلنه تركع وتكسر وتصيح بأسمها وتسألها شلون بگتي فلوس مضحي تخبلت الطفلة تخبلت واثق انتَ شكيت بأختك وهي بريئة

-اني غلطان واعتذر منها بروح امج وابوج صيحيها والله ما نايم من البارحة بس خليني احاجيها

-عوفها واثق ما راح تقبل تجيك بعدها خايفة، اذا تريد اخذنا لبيت جليلة شوية نغيرلها جو

-شتسون ببيت جليلة بهالوكت صيحيها اني احاچيها واغيرلها جو

-شتسوي بيك هي تريد تلعب وتسولف ويه يمامة اخت جليلة

-شلون ترحن للعالم بهالوكت شوكت اوديجن وشوكت ارجعجن

-عوفنا نبات يمهم

-لا بله؟؟؟

-والله اصلاً اخوان جليلة كلهم مو هنا طالعين بر وبس صادق موجود

-حتى لو عيب باجر اخذجن

ويه حجايته طبت فرح للمطبخ متخوصرة وتحجي بحركة..

-فرح: انتَ لو اخو صدك تهتم وتحبنا وتخاف علينا وعلى مشاعرنا الرقيقة جان قبلت تاخذنا بس انتَ متهتم عايف فاتنة نايمة ودمعتها على خدها

-واثق: ولج اني هيج!

-فرح: لا شوف انتَ مو هيج بس راح تكون هيج اذا متاخذنا

ابتسمت على جحظة عيونه شلون فاكهن عليها وهي ظلت تمتمت تجيبها منا وتحطها منا، كوة كوة قنعناه ياخذنا ويخلينا نبات من البارحة اني كلبي نار اريد بس اشوف جليلة واسولفلها محد غيرها تريح كلبي وتعلمني شتصرف ويه هاي الحقيرة صولاغ..

بدلنه بسرعة ورحت لفاتنة لكيتها تبجي ما نايمة بس كلتلها راح نروح لبيت جليلة كامت مثل الحصان تطفر كلشي مابيها..

طلعنا اني وفرح من الغرفة مكملات وهو واكف بالحوش كالب وجهه ويدخن ما عاجبه، وكفت بصفه فرح وكالت..

-فرح: اكلك واثق ليش ما تتزوج جليلة والله خوش بنية وتخبل

-واثق: انجبي وامشي كدامي

-فرح: والله انتَ الخسران تره متتفوت فد حبابة وتحبنه واهم شي مو حية راح تداري خواتك

جرها من راسها ومشاها غصب وكفها يم الباب قصاص حتى بعد متحجي، ضحكت على حركته يتخبل اذا وحدة جابت طاري الزواج كدامه لان اني ادري بـ واثق عاشگ بنية مسودنته مخليته يتحسر ويلوب عليها ليل نهار وواضح هالبنية متريده وما منطيته وجه..

اخر وحدة طلعت من الغرفة فاتنة منزلة عيونها متقبل تباوعله هو شافها هيج لو تخبل جرها لصدره حيل شبكها يبوس براسها ويعتذر منها وحتى ايدها بوسهن ويبررلها عصبيته البارحة ناتجة من قهر وغيرة لان جابوا اسمها كدام الولد وهانوها بيناتهم..

-فضة: يلا فتونه كافي حبيبتي سامحي اخوج انكطع كلبه

-فاتنة. مزعلانة منه اني بس انقهرت ليش صاح بوجهي

-واثق: سوودة بوجهي ساعة الصحت بوجهج

ضحكت وشبكته حيل وهو ظل يكزكز عليها يموت عليها المدللة هاي عنونته، ضحكنا كلنا من عض راسها وكفخها راشدي لزمت خدها تضحك بكل صوتها فدوة لكلبهم..

-فضة: واثق روح يم الولد لا تظل وحدك اليوم

-واثق: خيولون طايحين الحظ

-فضة: هاا هاا ليش شصاير

ما جاوب وطلع كدامنا ضايج سألته واني اعرف السبب هو عركة مضحي البارحة لان صارت كدام الولد حتى الولد حقد عليهم وضاج منهم بس عادي كله يومين ويرجعون حبايب..

وصلنا لبيت جليلة وهمزين ما لاكتنه أي سيطرة بيتهم قريب وهذا احلى شي كلنا بنفس المنطقة نتمشى لبعض، مديت ايدي اني دكيت الباب وطلعتلي امها سلمت عليها وردت السلام بساع بساع من شافت واثق سنحت ومالت بجسمها على الباب مبتسمة..

-شلونك عيوني

-واثق: هلا بيج خالة

كالها وشمر جكارته بالكاع داسها، عيونه ما تشوفها ولا معبرها وهي كطعت روحها بس تريده يشوفها ظلت واكفة وتمط بحجايتها والشال شامرته هيج على راسها ركبتها وشعرها طالعات لعبت نفسي منها..

-واثق: يلا يابة محتاجات شي؟

-ام جليلة: تعال تفضل ليش باقي بره

-واثق: لا رحم الله والديج ارجع للبيت

-ام جليلة: عليك الله تعال

-فضة: لا خالة ماكو زلم بالبيت المن يجي

-ام جليلة: واذا؟ لعد احنه شنو هنا منعجب

هستوه ديردها واجانه صوت جليلة من جوه تلعلع..

-جليلة: يمممةةةة تجييين لا اجيچ اني

اللتفتت على صوتها وعفست وجهها ضايجة، دخلتنه جوه وواثق راح وهو يفر بيده ويضحك على سوالفهن..

-ام جليلة: ماعندج ادب انتِ هيج تصيحين والرجال واكف هنا!

-جليلة: شسوي يا يمة غير تعلمت الادب منج

ضربتها راشدي ما راضية وعافتنه وطبت لغرفتها، درت لجليلة كالبة وجهها وتنافخ ضايجة..

-فضة: شبيچ ويه امج جليلة مو حرام عليج

سحبتني من ايدي تاخذني للهول وكالت للبنات يرحن يم يمامة وصادق اخوانها، ذبت الشال من راسها مختنكة ونترت بعصبية مكتومة..

-مفشلتني فضة مخزيتني راسمة على اخوج وميته عليه عجوز البين

سكتت ماعرف شجاوبها امها صدكت مطوختها ويه واثق وحتى هو يضوج يجيبنه هنا من وراهة يتسودن منها مع العلم ام جليلة مو عجوز ولا مبين عليها العمر مستحيل اليشوفها يكول عدها اولاد شباب..

-فضة: يمعودة عوفيها ولا تضوجين روحج واثق اصلاً ما ينطي مجال عنده وحدة متربعة بگلبه وعقله وما جاي تطلع منه

-جليلة: بشرفچ ماعرفتيها منو

-لا والله ميقبل يحجي بس احسها وحدة من بناتنه مو غريبة

-اويلااه تخيلي تطلع اختي انيسة

-هههههه لا لا انيسة اخته وهم مو اخته يكول احسبها حالها حال الولد

-جليلة: كبر حاصله انيسة تعبره هالاملح

-امشي لج صح احب انيسة واموت عليها بس اخوية ما عايز يخبل وجايبلنه العين

ضحكت تهز براسها اي وكامت تجيبلنه چاي بس مالي نفس اشرب شي اريد بس اسولفلها عن البارحة واريح گلبي..

-كعدي ماريد شي جايتچ مختنكة ورايد اسولف

-شكو شصاير

-البارحة مضحي رايح لديوانية عمو مكي وصايح كدام الولد كلهم فاتنة باكتني ويكول لواثق اللزم اختك الحرامية لا تفضحك وواثق من البارحة متخبل الليل ما نايمه اجانه يرعد رعيدة متسودن وفاتنة من شافته هيج خربت ووكعت من طولها

-جليلة: عمت عينه هالخايس الاجرب المعفن الوصخخ ولج فاتن تبوك؟؟ طفلة عمرها اربطعش سنة تبوك شنو مخبل هذا!!

-انوب اني من شفت حال واثق رحت لفاتنة طمنتها وكعدت اسولف وياهة كلت يجوز اكو شي ماعرفه لان تعرفين بصولاغ دومها تبسمر بينه وتضوج فاتنة تكللها امج ماتت من وراج بولادتها بيج

-اي؟؟

-من سولفت وياهة انهارت ظلت تبجي وتحلف وجابت القران حلفت عليه كالت اني لا شايفتهم ولا واصلتهم ومالي شغل بيهم والجلب مضحي سوه كل هالسالفة بس حتى يضوج واثق ويفضحه كدام الولد

-يا ناااقص

-شسوي جليلة كلبي نار وكلب اخوية محترك يطحن بهالجكاير وما ملحك

-صولاغ وبزرتها مال واحد يحطهم ببيت ويشعله بيهم ويخلص العراق من قذارتهم

لطمت على رجلي ضايجة والله الضوجة البكلبي ماكدر افسرها اشوف اختي تنهان بديوانية متروسة زلم واخوية ينهان على اهانتها والله جبيرة..

-جليلة: احم

رفعت عيني الها لكيتها تحوص عرفت عدها شي، تحسرت امسح بوجهي وسألتها..

-شكو

-باعي ببالي شي واذا كلتي لا وميصير ومادري شنو حظج اطيحه

-شكو ولج احجي

-خلينه نرجع اعتبار اختج واخوج منهم وندوس بگلبهم

-اي بس شلون

-نروح نبوگهم

-شنووو

-سمعيني فضة، اني فاتنة حبيبتي ودمعتها غالية عندي وواثق هم اخويه واعزه هواي واهانته كدام الولد مو شي قليل وصولاغ وبزرتها اني كلبي محمل منهم هالكد اريد اكسر خشومهم واخليهم يفرفرون بأذاناتهم فـ اختاري يا نروح نفطسها هي وبتها رجــب كتل لو نبوكهم ولا من شاف ولا من درى؟

-ولج نبوكهم ونحط بذمتنه المن؟؟ ليش عايزين فلوس احنه!

-غبية ما ناخذ الفلوس نبوكهن وندفنهن بحديقتهم يعني بس دنغير مكانهن ما مسويات شي احنه حتى احس مو حرام

-يمة يمة جليلة لا ماريد سكتي

-تجين انتِ لو اروح اجيب مِــسك وكحلاء وياي!

-ايييي وهيج راح تجيچ مِــسك تركض تبوگ وياچ مو تجيبلچ عمامة ابوها وتكعد تحجيلج محاضرة عن السرقة

-امشي وياي فضة عليج الله دا اتخيل صريخ صولاغ الصبح من تكعد ومتلكه فلوسها وذهباتها

-ولج مسودنة انتِ!

-هههههههه اي

فكيت حلكي مصدومة من حماسها انوب ما انطتني مجال احجي بعد كامت ركضت لبست بجامة جوه دشداشتها وشدت الشال على راسها زين واشرتلي..

-يلا تعاي

-ولج جليلة!!!

-نطفر منا لبيتهم اروح لغرفهن اجيب شكو ذهب وفلوس عدهن وادفنهن بترابة بيتهم ونرجع سهلة شبيچ

صافنة حتى ماعرف شحجي انوب تسولف من كل عقلها كلبها محمل عليهم وتريد تقهرهن بأي طريقة واليضحك جليلة وصولاغ وحدة متجرع الثانية وهنه جيران حايط على حايط..

-جليلة اخاف ماريد

-تره اطفر وحدي واعوفج

-ولج مبين متعلمة تطفرين على الحياطين!

-لا والله اول مرة اسويها بالعادة ادز صادق يطفرلي يخبث عليهم ويرجع

ضحكت ضامة حلكي اني شجاني وحجيت لهاي المسودنة، استسلمت من شفتها داكة رجل الا تسوي سوايتها وكلتلها عاد تنطيني بجامة حتى اكدر اطفر براحتي..

ضحكت ضحكة شريرة وركضت جابتلي بجامة واجت، خفت لا امها تحس كالت لا نامت ونومها ثكيل صعب تكعد..

-جليلة: والبنات ملتهيات ويه بعض وصادق نابص روحه بنصهن ميحسون

-وصولاغ!! خاف هي كاعدة لو رجــب كاعدة والاطكع خاف نلكه مضحي هنا!

-جليلة: لاا فضة ما اسمحلج اشايفتني ثولة واجازف بروحي علمود اخوتج الجرب اني حاسبة حسابي صولاغ ورجب صايرات ينامن من وكت هالايام مادري شعجب ومضحي ميرجع للبيت الا قريب الفجر

-وين يطلع والدنيا حضر تجوال

-يطلع للبستان ويه جماعته

-وانتِ شمعرفج ولج مراقبتهم؟؟

ضحكت بالخنسة وعافتني بدون جواب، تنگبت عدل بالشال ضمت وجهها كله بس عيونها تبين وكالتلي اسوي نفس الشي، عافتني جابت سكملي حطته يم الحايط وجابت تختة خشب حطتها فوكاه حتى يصير عالي وصعدت عليهن شلون راح تطفر صعب الحايط عالي..

-فضة: ولج شلون نطفر منكدر

-تشلبهي مثل البريعصية شبيچ

رفعت رجلها عالي وحطتها على دنگة صغيرة بنهاية السياج ونهضت كل جسمها عليها، اباوعلها واكول بكلبي احنه اليوم لو نموت لو نموت مابيها مجال..

طفرت على بيتهم وطلعت صوت كلش خفيف مال طبة رجليها على شي خفت يسمعوها بس هي ما اهتمت وهمستلي..

-يلا ولج فضة

-ماريد ماريد بطلت ماكدر جليلة ماكدر

-تجين لا اني اجيچ

-عليج الله عوفيني ماريد اخذ حق احد ولج اذا صولاغ لكفتنا والله تخزينه ومضحي يظل يعير بواثق طول عمره

-غبية غبية غبية ماعندج كرامة وتخلين هالخايسات يضحكن على اختج واخوج اهمداج

شو حجايتها جرحتني تخيلت رجــب من البارحة لليوم تضحك علينا وصولاغ تدكلها ويركصن سوه على دموع فاتنة..

تشجعت وصعدت على السكملي وتشلبهت على الحايط وانكطع نفسي ياله كدرت اطفر نزلت على دبات كبار مادري شتارسة بيهن صولاغ، ضحكت جليلة فرحانة وتصفك بيدها بدون لا تطلع صوت من شافتني وياهة..

رجفت خايفة من دورت عيوني بحوش بيت صولاغ والله بيتهم حلو ومتروس اشجار وزرع گبر ما تستاهل عايشة بجنة، جرتني جليلة تقربني منها وهمست..

-اني رايحة لغرفة صولاغ وانتِ فوتي لغرفة رجــب دوري بأغراضهن وجيبي شكو شي غالي وتعاي

-جليلة اشايفة روحج فارة؟ شلون نفوت عليهن بله حسن علينا

صفنت تفكر شافت كلامي منطقي وظلت تباوع على غرفهن محتارة، هزت راسها خوش وهمست..

-لعد بس غرفة مضحي ندور بيها امشي

سحلتني من ايدي واني امشي بيدها وارجف ساعة اتندم على الراح اسوي وساعة اكول يستاهلون، فتحت باب غرفته على كيف كلش ظلمة وكلشي مينشاف شلون راح ندور ما حسبنالها هاي..

-جليلة ظلمة

-تعاي نعلك اللوكس

-ولج والصوت والريحة خاف تتفطن صولاغ وتجينه!

-فضة راح اجيبج براشدي ولي راقبيلي بره اني اشتغل وحدي

عفتها بالغرفة واني وكفتلها بالباب اراقب عمت عيني ساعة القبلت اجي وياچ هسة جليلة كلنا ندري بيها مسودنة وما تهتم لاكبر واحد اني شجاني تسودنت على سوادينها..

عيني على بوب الغرفة اخاف ينفتحن، كلبي يدك حيل وايدي ترجف ما ثبتت.. عيني راحت على الشبابيج ظلام دامس جاي منهن ماكو أي دليل احد كاعد..

-ها جليلة خلصتي؟

همستها همس وهي ما جاوبت ظل بالي وطبيت يمها لكيتها ماده اصابعها وتركص بيهن وكبالها حاطة صندوك متروس ترس فلوس وذهب واحجار كريمة ولولو..

-جليلة: ولج باعي نعمة الله باعي ويشكون الفكر ويتلاطمون وين ما يرحون

-فضة: سديه ورجعي تراجعت ماريد اكمل امشي نطلع

-دوخري

سوت دشداشتها مثل چيس القماش وفرغت كل البصندوگ بيها وعكدت ذيالها على ركبتها، رجعت الصندوك لمكانه ورتبت كلشي مثلما جان وطلعت كدامي للحوش، تمشي بدون لا تطلع صوت ومدنكة راسها وظهرها خاف يلمحن خيال من الشبابيج..

كعدت يم شجرة التين ولكت شفل صغير مشمور على جهة، اخذته وحفرت يم الشجرة توخر بالتراب لحدما سوت حفرة مو كلش عميقة..

-جليلة: خرب ماكدر احفر بعد هذا حدها الجوه صبة، امشي لذيج الترابة نحفر بيها

-فضة: جليلة راح ارجع اني ما ابقى بعد

سوتلي بيدها روحي بس كلبي ما ينطيني اعوفها اخاف عليها، رحت وراهة وهي تحفر وسوت حفرة اكبر من ذيج وصارت تترسها ذهب وفلوس وطمتهن بالترابة وعدلتها ما تخليها تبين محفورة..

كامت للحفرة السوتها گبل شوية وهم دفنت بيها فلوس ورجعت طمتها واني اكنس التراب بيدي الي يصير على ارضية الحوش، كامت تسوي بعد حفرة جديدة حتى بعد تدفن وكلتلي اسبقها وارجع للبيت لان هي كملت..

ما ردت اعوفها بس شفتها صدك خلصت باوعت للدبات النزلنا عليهن ورجعت على وحدة ثكيلة وعالية كلت يجوز متروسة خل، صعدت عليها وتشلبهت على الحايط ورجعت لبيت جليلة..

ظليت واكفة على السكملي اباوعلها من الحايط وهي اخذها الواهس وراحت تحفر بعد حفرة بعيدة عن ذني الاشجار تخبلت من شفتها وصحت بيها اهمس بس ما تسمعني خفت عليها لا تنكلف وظليت اللطم على وجهي..

-ولج جليلة ولج رجعي لا تصخمينه جليلللة

هستوني اوخر الشال من وجهي بلكي صوتي يوصلها اعلى وفزيت من انفتح باب الحوش وانركع بالحايط حيل، شهكت من غمج روحي من شفته مضحي راجع كلبي طاح بحوش بيتهم من جليلة جمدت بمكانها ورفعت بس عيونها عليه..

-فضة: فلك فِلك حالي وحالج يا جليلة

وكفت هي على حيلها وهو ظال واكف كبالها مثل الحايط ما تحرك ولا حجه كلمة، عيوني ظلت تزغلغ عليهم فركتها اتأكد هذا جاي يسوي شي لو بس واكف شديصيررر..

-مضحي: انتِ منو

حجاهة بصوت خشن وناصي وجليلة دفعته هستوها جاي تنهزم ولكفها بين ايده حييل وجرها للحايط انضرب بي ظهرها.. لطمت على وجهي واچتافي وصدري مواجهة واجهتها من بعيد وهي ظلت تدفع بصدره حيل بلا صوت وهو هم خانس ولك شبييك مو زوعتني العافية شو ما تصيح..

-جليلة: هدنييي هدني وصخ

تصيح بكتمة كوة يوصلني صوتها وهو واكف مثل الجبل بوجهها وحس ما طلع منه، صدمتني من كدرت تدفعه حيل وهو طاح على ظهره بالكاع وصاح متوجع..

استغلت طيحته ورجعتلي تركض بعدها ما صاعدة الدبة وانفتحت باب غرفة صولاغ، زلغت روحي ميتة من الخوف وجليلة ما اهتمت لاي شي صعدت على الدبة وطفرت على الحايط لبيتنا وصوت صولاغ يلعلع تلعلع..

-صولاغ: يمممةةة حرامي ولكم حرااامي طب علينا حرامي يا نااااس وطك ابني يمممةةة

سحلتني جليلة سحل لغرفتها ترجف طبكت الباب علينا ونزعت الشال من راسها وراسي وضمتهن وبساع جرتني للفراش مدتني ونامت بصفي..

-فضة: انفضحنا انفضحناا

-اشششش ما شافوني اشش سكتي

-شافتج من طفرتي شافتج اكيد عرفت انتِ وحدة من اهل هالبيت

ويه صوتي سمعنا صوت باب حوشهم يندك حيل راح يتكسر وصولاغ تصيح من بره وصوت زلم طلعوا من بيتوهم على الهوسة، طفرنه ثنينه على شباج الغرفة مدينه روسنا نتراجف وشفنه خالة ام جليلة طلعت من غرفتها تركض تشوف منو..

-فضة: رحنه بيها اليوم راح ننكتل

-جليلة: بس سكتييي

طلعن خواتي واخوان جليلة من الغرفة وامها راحت فتحت الباب وطبت صولاغ للحوش تعربد كل صوت تركعه اقوى من الثاني جايتنا بطرك الدشداشة والشال مشمر منا ومنا على راسها وتحرك بيدها وتصيح..

-حرامية بواكييين حراميييية اجيتن شتبوكن من بيتناا ولجن معزاياات

دفعتها ام جليلة حيل وصاحت بوجهها..

-ولج صولااغ شلون تطبين بيتي هيج طلعي لا افضحج واشهرج ادبسزز صايعة

تلازمن بالحوش والجهال بيناتهم صادق يجر بأمه وخواتي يجرن بصولاغ وصياح زلم من بره جاي مادري مضحي وياهم لو لا، كامت جليلة فتحت شعرها وهوسته شوية وطلعت من الغرفة تفرك بعيونها عود جانت نايمة..

-جليلة: خيرر خير شكو شبيچ جايه لبيتنه تلعلعين متستحين على طولج مخزية روحج كل يوم

-صولاغ: هاا هاا اجت الملسونة تعاي ولج منوو بيجن طفرت على بيتنه هاا؟؟؟

-ام جليلة: منوو تريد تطب لبيتج الخاايس جيفته واصلتنه والسحورة فايحة من الحياطين

فشرت صولاغ ورجعت هجمت على ام جليلة وطبت جليلة بنصهن همشتها من شعرها وسحلتها للكاع، ركضت اطلع من الغرفة اهد وياهة وشفت نسوان الجيران و رجــب بت صولاغ هم اجت طبن يفاككن بيناتنه صارت مرادم ناس تعلس بناس..

جليلة حطت كل حيلها ويه صولاغ دمتها تدمي وذيج تفشر وتسب ولعبت لعب كامت تجيب حجي منا ومنا وتشوه بسمعة جليلة وامها وصاحت بين النسوان وبكل صوتها..

-صولاغ: تحجن بالعفة والشرف وانتن يومية طابلجن زلمة بعيني بعينييي اشوف الزلم طابة طالعة على بيتهن كل يوم بنصاص الليالي هااا اسكت لو احجي بعد

-جليلة: ايا بت الجلب يا جذااااابة

طفرت عليها وكعتها بالكاع وترفس بيها حيل ورجب والنسوان يجرنها عنها واني واكفة اباوعلهن حيل بيها حييل بعد ايدي جليلة بس انتِ التفوخين كلبي ما غلطت من اجيتج اليوم..

كوة سحلنها سحل من ايدين جليلة طلعوا صولاغ روحها رايحة ولسانها بعده يفشر ويألف جذبات عليهن، گلبي خلص علما طلعنها من البيت وام جليلة ركضت قفلت باب الحوش ورحعتلنا تسب وتلعن بيها..

-ام جليلة: الجذابة بت الجذابين تحيير شتسوي بس حتى تعاركنا وتفضحنا بهالليل..

-صادق: مسودنة هاي منو بحال بيتكم ويطفر عليه

-جليلة: ختولي ختولي تلكيها تحلمت وعبالها صدك واجتنه

هزت ايدها امها ورجعت لغرفتها وخواتي هم راحن ويه يمامة وصادق واني وجليلة رحنا لغرفتها، بس طبكت الباب علينا جليلة فطست من الضحك وكعت بالكاع ميتة ميتة ضحك وصامة حلكها بيدها تخاف تنسمع..

-فضة: مخبلة انتِ والله مخبلة

-جليلة: هههههههه افيييششش ارتاح گلبي ضوگتها كتلة بحياتها كلها ما ماكله منها

تحسرت وكومتها من الكاع بعدني خايفة خاف مضحي شافها وميزها سألتها عن الصار ضحكت وكالت..

-ولج ماعرفني ضامة وجهي عدل بس عيوني مبينة وهو مطي هم ما وخر الشال من وجهي طافي فد مرة

-فضة: شلون كدرتي تدفعي ولج وهو چنه ثور

-ولج طافي طافي اكلها سكران عيونه مغمضة ويمشي وشكدما عقله نايم ما كدر يوكف على حيله سويتله هيج وكع

ضجت من نفسي لان وافقتها تطب عليهم لو مسويلها مضحي شي وهو ما حاس على روحه وين أنطي وجهي، اباوعلها ولا مهتمة تضحك لحدما نمنا ثنينه هي فاكة حلكها تتذكر الصار وتضحك من كل كلبها…

**

“مِــسك”
من الصبح كعدتني امي كربتني بالشغل اليوم عقد بشير ابوية فر الدنيا على اهل شروق ما لگالها احد وين ما يسأل يكلوله البنية يتيمة وماعدها اهل..

انقهر اكثر وكال راح يسوي غده اليوم يعزم ولد عمي وعمتي والبنات كلهن بلكت هالشي ميحسسها بغربة..

كملت مسح وطبوا سعد وابويه شايلين بيدهم علاليگ السمچ جايب نوعين حرش وشانك، ما حچى شي ولا سلم مثل عادته وجهه كلش معصب وسعد هم حچاية ما حچى وطلع وره ابوي..

اخذت العلاليگ للمغسلة اطلع السمج وحطيتهم بصينية وكعدت انظف بيهن، انكسر ظهري عليهن كمية جبيرة كلش جايب واني وحدي تأخرت ورجعت امي تدردم عليه..

-شبيچ مِــسچ شو ونيده صايرة

-لا لا يمة هاي كملت ما بقى شي

فرت ايدها من شافت باقية علاكتين وجابت سچين وكعدت يمي تنظف بيهن، كملنه وراحت تغسلهن وتملحهن واني حضرت الجدر اطبخ تمن وياه خاف واحد يشتهي ياكل بساع بساع نشتغل خاف يجون على غفلة وما نلحك..

-اكلج يمة تذكرت واثق ما يحب السمج

-ياا خية شون نسينا

-مادري شنو نسويله؟

-مادري مِــسچ عقلي واكف ماكدر افكر

-اطلع بانية اطبخ؟

-خوش

جبت بانية وحطيتها على النار اطبخها وامي اللتهت بالسمچ.. شغل بشغل وركض لحدما صاح الله اكبر اذان الظهر، عفت من ايدي ورحت توضيت وطبيت لغرفتي اصلي بعدني ما مكملة صلاتي وطبن البنات عليه يهوسن بعبيهن ويهلهلن بالهمس..

-كلللوووش هاي فرحتنا الجبيرة فرحت كل العشيرة

وجليلة طبت تردح كبالي وتهلهل بكل صوتها واني اضرب على رجليه واصيح..

-الله اكبررر

-جليلة: الله اكبررر راح يصير عدنا عرس كلللووووش

-مِــسك: الله اكبرررر

وطبت فضة شايلة عباتها بأيد والبوشية بالايد الثانية تهوس بيها مثل الچفية وتلحن..

-وهاي الرادها وهاي التمناها بت المدري منو لابن الشيخ جبناها

-مِــسك: سبحان ربي الاعلى وبحمده الحمدلله الذي بنعمته تتم الصالحات

صفنت بنص السجدة شني انه شكلت؟ صفكت ايدي وكطعت صلاتي اني اعلمهن خلني اخربط حتى بالصلاة..

-مِــسك: وسمم خربتن صلاتي

خنسن ساكتات وظلن يباعنلي صفح الا جليلة ام لسان تخوصرت كبالي وكالت..

-شدعوة شدعوة عيني غير فرحانة لابن خالي الي هو اصلاً مو خالي

-بنين: اوكفي شو ما فهمت

-فضة: بنين لخاطر الله بطلي فهاوة

-انيسة: شبيچ شبيچ اكلتيها ولج فضة، بنين بشير ما يصير ابن خال جليلة لانها اختي مو من نفس الام

-بنين: يعني شلون

-جليلة: ولج انتِ من كل عقلج؟؟

-بنين: لا والله ادري ادري انتن خوات بس مو من نفس الام بس غير عمو مكي يصير هم خالج جليلة لان انيسة اختج؟

خزرنها كلهن وهي تبلعم وتدير بعيونها بيناتهن شكد فاهية، صفكت بيدي اجذب انظارهن الي واشرت ع السجادة..

-مِــسك: اذن تره اذن ما تصلن شبيجن

-جليلة: ما اصلي اني معذورررررة

تمد بيها وتسويلي حنيصة بأيدها فرت ايدها انيسة وغميناها كلنا..

-بنين: على شنو تحنصين بينه

-فضة: انوب تحجي بكل صوتها الغبية بله واحد من الولد جاي يتعده

ما جاوبتهن وراحت على شباچ غرفتي فتحته ومدت راسها تباوع منه، ما اهتمينه الها والبنات اخذن ترب من المجر مالتي واجن يصلن على زوليتي حتى سجادة ما قبلن يفرشن..

كملنه صلاتنا وكلنا ركضنا للحوش من اندكت الباب، الكل متحمس ومتفاجأ من هالخطبة بس محد علق او تسائل ليش كلشي صار سريع، فتحت الباب عمة نرجس وطب بشير منزل عيونه ووراه تمشي شروق مبوشة..

-عمة نرجس: اللهم صل على محمد وال محمددد

هلهلت وجرت بشير تبوسه والبنات واكفات بصفي مغشيات وجههن بشالاتهن وعيونهن على شروق، رفعت البوشية من وجهها من اجتها عمة نرجس تبوسها وماعرف ليش حسيت بيها شي شكلها عبالك زعلانة..

-بشير: يلا طبي جووه

ينتر بيها ويأشر بيده يكشها بعيد انقهرت من تصرفه ورحتلها سلمت عليها وجريتها من ايدها لغرفتي حتى البنات هم ياخذن راحتهن بالسلام..

كعدناها بيناتنه نسولف ونضحك وياهة وهي بس تبتسم لو تجاوب على كد السؤال لو اصلاً متجاوب عذرتها اكيد خجلانة وابوية وصاني اهتم بيها خطية يتيمة وماعدها احد..

شوية واجت عمة نرجس كالت ابوية يريد يعقدلهم، نزعت العباية شروق وظلت بفستانها لونه ابيض مخصر والشال فتحته وعافته على شعرها وهي اصلاً جايه مزوكة طالعة كلش حلوة..

راحت وحدها احنه ولا وحدة خلونه نروح وياهة بقينه بالغرفة ننتظر لحدما سمعنا صوت هلهولة عمة نرجس عرفنا تم العقد، طلعنا مكيفات هستونه جاي نهوس وامي ما رضت سكتتنا وكالت نروح نصب الغده..

دخلنا سوه وعمة صاحت لبشير وكومت شروق وطببتهم لغرفتي وحدهم.. كلنا تعاوننا على صب الغدة انيسة وجليلة يرتبن السمج ببلام كبار وبنين وكحلاء يصبن التمن وفضة تصب المركة وانه اخذ وانطي لاخوتي واكفين بالحوش ما يطبون للمطبخ..

كملنه نقل اكل الزلم وسوينه صينية لبشير وشروق واخذتها الهم امي واحنه البنات كعدنا ناكل بالمطبخ فرشنا سفرة واللتمينا حواليها..

-فوزية: بنين ليش ما اجت امج حبيّبة؟

-بنين: والله مالها خلگ سودة عليه صبحت معوشة

-فوزية: يا خية شجاها خطية ما تستاهل، چا انتِ ويامن اجيتي ويه اخوتچ؟

-بنين: اي باجي

هزت راسها امي ساكتة حسيتها ضاجت اكثر من عرفت عمة سوسن ما جاية كلش قريبات على بعض هنه بنات عم..

عيني راحت لـ فاتنة مبتسمة وتسولف ويه فرح مندمجة وياهة فرحت من شفتها زينة جان بالي يمها..

-فوزية: شني كحلاء وين كايمة يمه؟

-كحلاء: شبعت خالة كايمة اغسل

-شأكلتي حبيّبة

ابتسمت كحلاء وكامت تغسل، عيني ظلت وراهة الكعدة كلها مو طبيعية والله العظيم كحلاء مو طبيعية وخافية علينا شي..

كملنه غده وكمنا كلنا نتعاون على غسل المواعين وترتيب المطبخ ونسولف براحتنا من عرفنه الولد طلعوا وبشير اخذ شروق ورجعلها لبيتها، ضحكات جليلة وفضة واصلات لسابع جار وكحلاء حجاية ما حجت كاضيتها بس تتبوسم..

عفت من ايدي ووكفت بصف انيسة واكفة يم قوري الچاي تخدر، بلعت ريگي مرتبكة ماعرف احجيلها الصار وياي لو اغلس احتاريت..

-انيسة: غردي خية غردي

-مِــسك: شمعرفج اريد اسولف

ابتسمت بدون لا تلتفتلي واشرتلي براسها على المنور، افتهمت عليها ودخلت قبلها لحظات ولحكتني وجرتني لنهاية المنور، وكفت كبالي وگالت بصوت ناصي..

-انيسة: سولفي شبيچ

-كحلاء شبيها؟

-انيسة: ها انتِ هم منتبهة عليها؟

-اي انتِ شنو لاحظتي؟

-انيسة: عقلها مو وياي اسئلها ابوها وين تبتسم وتهز راسها عبالها جاي اسولف سالفة عادية مو اسئلها سؤال

-مادري أنيسة اني كلبي مخموش مشكلة كحلاء ما تحجي تعل حالي وما تطلع منها حجاية تشفي الگلب

هزت راسها اي وكالت نشوف قصتها شنو وره عرس بشير حتى نكون فارغيلها، طلعنا من المنور واستلمنه فضة وجليلة يلعلعن ويضحكن..

-جليلة: هاا هااا تسرن اسرار علينا

-فضة: الله يعلم شحچيتن علينا

-انيسة: شلعنا عليجن علما تعب لساني

ضحكن كلهن الا مودة الفاهية شهكت ودكت على صدرها مصدگة حچينه عليها..

-مودة: ولجن ليش تحچن علينا مو حرام عليجن تشيلن غيبتنا

-انيسة: ههههههه اتباره الذمة عود

ابتسمت مـودة وحطت ايدها على بطنها تمسح عليها وتكول..

-احچو عليه ميخالف بس ابني لا تجيبوه بطاري

صفگن ايدهن البنات كلهن وغمنها متت ضحك عليهن متحلفات الها من يوم عرفن بيها حامل لليوم وهي خابصتنا تغارن مني وراح تموتن من الحسد چي تزوجت ابن عمي واعشگه ويعشگني..

-فرح: الله يرحمك يا عمي مهدي ما عشت وشفت چنتك العوبة شلون شالعة گلب ابنك

-مودة: يوووه سكتن خوب عمتي موجودة وراضية عليه وهالشي كافي

-مِــسك: ووينها عمتچ شو ما جاية وياچ اليوم؟

-مودة: هاا؟.. ما رادت تجي

-جليلة: رجلج نديم كال انتِ غاسلة الحوش وعايفة چيحة ماي چبيرة وهي زالگ نعالها وواكعة على ظهرها

-مودة: يماا يا جذاابة يا جذابة لا مو هيج صار هي عثرت مو تزحلكت

-جليلة: رجلچ هيج كال لـ خالو مكي

-مودة: اني اعلمه خلي يصبرلي

متنا ضحك عليها انفخت وچتفت ايدها لصدرها معصبة، والله احلف عليها صدگ زالگة رجل عمتها بالماي وطايحة اختي واعرفها عدل واعرف شلون تشتغل..

سمعنا صوت نديم يصيحها واكف بالحوش وهي ولا چنها زعلانة منه طفرت من السكملي وراحتله تركض عبالك جانت بسجن واجاهة افراج.. مدينه روسنه البنات كلنا من الشباج نعاين عليهم استقبلها هو يضحك وهي تمشي كوة چنها بشه (بطه)..

-نديم: شلونهن بنياتي

-مودة: زينات بس يجوز حامل بولد مو بنية

-نديم: گلبي حاس بيج بنية

-مـودة: اهم شي ما تحبها اكثر مني

حچتها بزعل ومياعة وفضة واكفة بصفي سوت روحها عود جاي تتقيأ من حركات مـودة، ضحكت جليلة وكفخت فضة على راسها وهمست..

-اذا مو لزلمتها تتماوع المن ضامة دلعها

سكتتهن كحلاء تسمعهم وهمه يسولفون بس صوتهم ناصي كلش وماعرف شنو جاي يگللها وجهها صار طماطة من الخجل وبس منزلة عيونها وهو كلساع كاضها من حنچها يرفعه يخلي عينها بعينه ويكمل حچايته وترجع تنزل عيونها مبتسمة وتعصر بأيدها..

-جليلة: اصدك يجي يوم يصير عندي رجل وهم اطلعله هيج وارجف على شوفته

-انيسة: يصير ان شاء الله يصير

انتبهت لجليلة دارت بس وجهها لـ فضة وهمست “كون البالي بجاه الحسين” ولزمت دشداشتها من يم صدرها ورفعت راسها فوك تدعي، ايييي ولج جليلة طلعتي عاشگة وما تسولفين..

-جليلة: اكلجن هاي ليش هيج مستحية ما جاي افتهم

درت اعاين لانيسة المبتسمة وهي تكول..

-انيسة: لان تحبه

-جليلة: ولج بالعكس اذا تحبه تترعن عليه بالزايد

-انيسة: چؤ خاني التعبير، قصدي عدها حياء وطبيعي الحياء للبنية جليلة

-فضة: حگها مستغربة جليلة ما مجربته من گبل

هستوها جاي تمد ايدها تريد تكفخها وفزينا على صوت عمة نرجس تصيح من ورانه..

-ولجن على شنو متجمعات على الشباج

تطشرنا مبتعدات وجليلة بساع جرت الشباج سدته وسدت البردة، وكفت بنين متوترة وكالت..

-رنا: لا عمة هيج نباوع للحوش

-العمة نرجس: شو بله

-انيسة: ههه خالة تعاي خلينه نشرب جاي واشبع منج قبل لا اروح

جرتها انيسة تريد تطلعها من المطبخ وعمة نرجس عاندت الا تشوف، عضيت شفتي متوترة من راحت للشباج فتحته وشهكت وخرت من الشباج بسرعة واندارت علينا خازرتنه..

-نرجس: ولجن ادبسزيات تبصبصن على مرة هي ورجلها متستحن

-بنين: التوبة عمة التـ…

جرتها جليلة لصمت حلكها حتى متحجي وأنيسه تداركت الوضع ووكفت كبال عمتي وكالت..

-انيسة: ها يا لا خالة صدك جذب شعدنا هاي هسة اجه نديم صدفة

-نرجس: صدفة مو؟؟ اليوم اكرمعچن تگرمع

نزلت على شحاطتها نزعتها وصار الطفار ماله والي، ناس شردت بالمنور وناس لبدت جوه الميز وناس شبگت ناس يحتمن ببعض وانيسة طلعت للحوش تركض وتضمضم بشعرها جوه الشال وعمتي طلعت وراهة وبس نسمع صوتها وصوت انيسة وهي تحتمي بنديم (ابن خالها)..

-انيسة: مروتك نديم مرووتك احميني من شحاطتها

اسمع لنديم يضحك بصوت عالي وجر عمة يوخرها منها، ارتاحيت من وكعت براس انيسة وطلعت من المنور وصحت للبنات نفذنا من شحاطة عمة نرجس..

-جليلة: سودة بوجه بنين كل مرة انيسة توكع بيها

-بنين: اني شعليه تسودين بوجهي

ضحكنه كلنا وانيسة بقت واكفة شوية ويه نديم ومودة، هي صح تستحي بس عدها شوية ميانة ويه كل ولد خالها لانها جبيرة وكلهم يموتون عليها ويعزوها لان ربت وياهم وجانت حاطة راسها براسهم على كولة اخوي چــفل انيسة جانت ولد حالها من حالنه ومن كبرت انجبرت تصير بنية..

للمغرب كلهم رجعوا لبيوتهم محد قبل يبقى بيهم رغم اليوم رفعوا الحضر بالليل، انيسة وجليلة طلعوا ويه فضة واخوها وصلوهن وبقت بس كحلاء يمي تنتظر واحد من الولد يجون يوصلوها..

-كحلاء: لو راجعة ويه فضة لو بنين مِــسك شجاج چلبتي بيه

-شبيچ تلوبين هسة يجي سعد ياخذج

زفرت نفس كوة عليها واكفة وتفتر بالحوش، لابسة عبايتها والبوشية رافعتها من وجهها متحضره تريده بس يجي حتى بسرعة تطلع، شوفتها بهالحال قلقني كلش مستحيل هالتوتر كله لان تأخرت على ابوها هي اصلاً متعودة حتى تبات ببيتنا..

عفتها واكفة بالحوش وطبيت اني يم امي بغرفتها لكيتها بعدها كاعدة على سجادتها وبيدها قران جاي تقرا..

-يمة اروح ويه سعد من يوصل كحلاء لبيتهم؟

صدقت وهزت راسها اي، مسحت على وجهها وكالت..

-اي يمة ما يصلح يرحون وحدهم الدنيا ليل

-جا لعد كايمة اللبس انه

طفرت من قريولتها اطلع من الغرفة ورجعت من صاحتلي..

-وينج مِــسچ لا تتأخرين بساع توصلوها وترجعون اريدج تنظفين الديوانية الولد لاعبين بيها فلك

-اي والله شفتها مكلوبه

طلعت منها لغرفتي جبت عباتي وبوشيتي عفتهن بيدي ورجعت للحوش لكيت كحلاء على وكفتها بس شنو وجهها صاير اصفر وعركان..

-كحله شبيچ شنو مريضة؟؟

ذبيت عباتي من ايدي على السكملي وركضت عليها اكض وجهها لكيتها شوية حارة، وخرت ايدي من وجهها وضحكت بالجذب وكالت..

-لا يمعودة كلشي مابيه بس بالي يم ابوية وحده خطية

سكتت من انفتح باب الحوش وطب سعد بيده سبحة ويفر بيها بس لمح كحلاء واكفة بساع دار وجهه عنها وسلم يستحي من يلكه بس وحدة من البنات لو مجموعة عادي ما يهتم..

-كحلاء: عليكم السلام

-مِــسك: سعودي نريدك توصل كحلاء لبيتهم وامي كالت اني اجي وياكم

اللتفتت كحلاء عليه بفزه مبين ما انتبهت عليه من جبت عباتي، هزت راسها لا متوترة وكالت وهي تبلع بريگها..

-لا لا مِــسك ليش تتزحمين ماكو داعي هذا وينه بيتنا

-مِــسك: لا امي ما ترضى الا اروح وياكم

غيمت ملامحها وما جاوبتني بعد، لبست العباية والبوشية وطلعنا ويه سعد يوصلنا لبيتهم، شوية بيت عمتي ام كحلاء بعيد عنه يعني مو مثل بيوت البقية لان ابوها حالته المادية متسمح يشتري بيت بمنطقتنا يكول غالية عليه..

امشي وياهة چتف بچتف وهي صح لابسة بوشي على وجهها بس اكدر اقرا ارتباكها من مشيتها وعصرة ايدها، وصلنا لباب بيتهم وكف سعد على جهة مدنك وهي طلعت المفتاح من جيب نفنوفها ايدها ترجف رجف ما تسيطر تفتح الباب..

-كحلاء

ما جاوبتني وظلت تحاول تفتح بالقفل وما جاي تكدر، حطيت ايدي فوك ايدها اخذت منها المفتاح وهي ظلت تكول لا ولا اني افتحها بس ما قبلت وفتحتلها الباب وانطيتها المفتاح..

-كحلاء: رحم الله والديكم زحمتكم، شكراً مسوكة

هزيت راسي بدون لا ارفع عن وجهي وهي طبت للبيت وطبكت الباب بسرعة، ضحكت مصدومة من يمته نوصل كحلاء لبيتها وما تكول تفضلوا وتچلب بينا بالباب والعباس ابو فاضل ايدي اكصها اذا هالبنية ما مورطة روحها بمصيبة وخافيتها علينا..

مشيت ويه سعد يرجعني للبيت وبعدنا ما مبتعدين هواي من بيت عمتي وما تحملت بعد، وكفت على جهة من الحايط وسعد اللتفت عليه مستغرب ليش وكفت هناك، رفعت البوشية من وجهي من انتبهت ماكو احد وهمست..

-سعود نسيت انطي لـ كحلاء محبسها هسة من حطيت ايدي بجيبي حسيت بي

-وان شاء الله تردينا نرجعلها علمود محبس؟

-اي حباب خطية هسة يظل بالها عبالها ضايع وتكلب البيت عليه فدوة خلينا نرجع انطي الها ونطلع بسرعة

-لا مِــسك امشي باجر اني اودي الها

-ولك خاف يضيع يمي ما تدري بيه سريحية

استغفر ضايج وظل يفرك بوجهه، هز راسه خوش ومشينه نرجع لبيتها، وصلنا وسعد شال ايده يريد يدك الباب وكضيت ايده امنعه..

-لا لا تدك يمكن ابوها نايم ويفز احنه خلي نفتح الباب

-شلون

-شبيك مفتاحهم الاحتياط مدفون بالزرعة

باوعلي مستغرب واني تلفتت منا ومنا ما لكيت احد ونزلت للزرعة الي باب بيتهم انبش بيها علمود المفتاح، من زمان كحلاء معلمتني مفتاح الاحتياط ابوها هنا يحطه يخاف يصير ما يصير على الاقل عدنا مفتاح ونطلبهم..

لكيته وكمت فتحت قفل الباب وكلت لسعد يبقى واكفلي بره، هز راسه ما عاجبه يضوج من الانتظار.. شلت البوشية من وجهي ومشيت على اطراف اصابعي وطبيت للحوش اتسحب لگيته مضوا دورت عليها بعيوني ما لكيتها رحت لغرفتها ماكو فارغة، تمشيت للمطبخ هم ماكو مديت راسي من شباج غرفة ابوها لكيته نايم وحده..

گلبي ظل يوجعني خايفة دورت بعد بالبيت وبالحمام كحلاء مالها اثر وين راحت البنية، صفنت اتلفت وتذكرت المنور ما دورت بي.. طبيت للمطبخ على كيفي وعيوني عليه..

المنور يصير بظهر المطبخ لو بصفه يجيب ضوا للمطبخ وتهوية، وصلت لبداية فتحة المنور وفزيت من سمعت صوت شي انكسر وطاح..

فركت وجهي بيدي متوترة ولميت العبايه على جسمي وطبيت، مشيت بطيء وكلما اتقرب من فتحة المنور الثانية الي توصل للترك گلبي يدك اكثر، توترت سميت بسم الله وشلت البردة المغطية الفتحة وشهكت من غمج روحي واني اشوف…….

يتبع

….

━━━━━━ ⚔︎ ━━━━━━

نستقبل مصيبة كحلاء ونكول الووو؟؟؟

طلبتوا مني اشرحلكم عن الاولاد والبنات منو اخو منو، ردت من ذاتكم تحفظوهم من احداث قصصهم بس ميخالف

نبدي بأول ناس بيت شيخ مكي زوجته فوزية واولادهم (بشير، چــفل، رزاق، سـعد، مـودة، مِــسك)

بيت عمهم اهل واثق متوفين الام والاب وعدهم
(واثق، فضة، فرح، فاتنة، وبعد ثلاث خوات متزوجات)

بيت عمهم مجتبى (متوفي) وزوجته سوسن عايشة عدهم
(راهي، وسام، سيف، بلال واخت وحدة بنين)

بيت عمهم رسول (متوفي) وزوجته صولاغ عدهم
(مضحي، رجــب)

بيت عمتهم فاطمة (متوفية) وزوجها عايش عدهم
(انيسة، احمد)
وابو انيسة متزوج مرة ثانية “ميصيرون شي لبيت شيخ مكي” بس هم قريبين لان يعتبرون اخوان انيسة همه
(باقر، مجتبى، جليلة، يمامة، صادق)

بعد اكو يمكن نسيتهم بس راح ينذكرون بالاحداث الجاية ان شاء الله ونتعرف عليهم اكثر