رواية بيت البخت الفصل العاشر 10 بقلم اريج البغدادي

إنَزل الوِشَاح دَعني أرى

مَا تَخفي عَينَاك يَا تُرى؟

أرمِ الوِشاح دَعني أنَظرُ للَسُرى

مِني لا تَذهبي حَتى ولَو بالخطا.

-: الحوش چان مغسول

وردة وكعت من البايه مالت مقدمة البيت وجرتني

صرخت بأعلى صوتي

والكُل يصيح الله الله

-دُرر: يبووو

-: مهيمن سند ضهر وردة والعيون صارت تخوزر عليهم

واني رجعت وكعت من البايه واسمع صوت ضحك ناصي لكن من اباوع اشوفهم ساكتين

من الفشلة ابتسمت وباوعت للمضيف شفت سيد ضَهير يخزرني ورجع غطة وجهة بالبطانيه

-: طبينه سلمنه

شفت بيتهم جدا كبير وألوانه اسود وابيض والأضويه كأنو نجوم من كثرهن

وبستانهم الجميل والمنعش والطريق الدخول بعد أحلا الي بيه

-: بـمصافحة

-أبو دُرر: شلونك أبو ضَهير شخبارك شلونك وليدي ضَهير الحمدلله عل السلامة

-سيد ضَهير: الحمدلله الله يسلمكم عمي

-أم دُرر: الحمدلله على سلامتك يمة… اي عيني ام ضَهير شلونج اخبارج

-: صار سلام حار بينه وكعدنا

بس بعدني احس بكتمة مالت الفشلة واخزر وردة

تقربت منها وكلتلها بهمس

-دُرر: وردة اذا ما اشكج نصين خاف عبالج ذيج المره فوتتها هل مره مُحال

-وردة: اعلى ما بخيلج اركبي بابا

-دُرر: وبعدين شكو شمرتي روحج على مهيمن

-وردة: لا حبي هو حب يساعد مشهورته المفضله

-دُرر بصدمة: شنوو

-وردة بأبتسامة: دباعي ضَهير شلون يباوعلج

-: باوعت الضَهير أشوفه مغمض عيونه ع النص ويباوعلي

درت عيني منه وضليت اباوع الغير أماكن

باوعت لـ أحد الجدران شفت صورته مكبريها بالبيت واكف يم الخيل مالته المُفضل الأسود

والصوره البصفها خيل أبيض وصاعد عليه سيد سلام ويمة ضَهير وصاعد على الخيل الأسود

سألت مريم

-دُرر: هاي شنو الفرسين مالت منو؟

-مريم: هاي الاسود نثيه مالت ضَهير والبيضة مالت سلام

-دُرر: هاا وين يروحون بيهن

-مريم: بالبستان مالتنه ومرات يطلعون صحاري ومره حتى طلعو الصحراء حايل واخذوهن وضلو يهرولون بيهن

-وردة: الله اريد اجرب الفرس

-مريم: هسه اخلي سيد سلام يصعدج ع الخيل مالته

-دُرر: لا يمعودة كولي يالله هاي تمسلت

-مريم: هسه أجي بنات مرت سلام تصيحني

-دُرر: تمام بس ارجعي يمنه

-مريم: تمام

-: ضليت اباوع للصور وارجع اباوع الضَهير بنضره سريع وادير عيني

اخر نضره شفته اصابعه على شفته ويخزر ويباوع التفاصيل وجهي

قاطع نضراتة سيد عباس

-سيد عباس: سلام عليكم يابه

-ردفنا… وعليكم السلام

-سيد عباس: ضَهير آبية شردت

-سيد ضَهير بصدمة: شنو وين تشرد

-سيد عباس: اشاقة بس مو راضيه تاكل من أيدينه شلون

-سيد ضَهير: يابه كومني خل اوكل آبية زعلانة

-: اني صفنت عبالي بنيه ديحجون عليها تالي تذكرت الفرس مالته

-أبو ضَهير: لا يابة اكعد هسه اني أوكلها ميصير توكف على حيلك

-سيد ضَهير: يابه بلعباس مابيه شي بس خلوني اكوم متت من النومة

-سيد سلام: تعال اني أكومك

-سيد فرهود: دعوفة يابه ميصير

-سيد عباس: خلصتوها يابه ويابه آبية رح تلحك مهرته القديمة سُرر الي ماتت

-سيد ضَهير بخزره وحزن: وخرو اني أكوم

-سيد سلام: لا اني اكومك كوم كول ياعلي

-: كومو سيد ضَهير وراح يشوف آبية

وضلت العوائل تسولف وكعدت يمي مريم وكالت

-مريم: ضَهير يريدج دريره

-دُرر: شنو وين

-مريم: بس اطلعي كبل مو اول نخله ثانيه الثالثه ع ايدج اليسرة تلكيه واكف يم الفرس مالته

-: أستاذنت والدي ووالدتي ورحت وفعلا شفته واكف لازم بطنه ويوكل آبية ومنزل راسه ميقبل يرفعه ويخزر

سلمت عليه

-دُرر: هلو ضَهير

-سيد ضَهير بهدوء: رجلج بينت من وكعتي

-دُرر: شنو

-: رجع رفع عينه بعيني وكال

-سيد ضَهير بضغط على الكلمات: رجلج بينت دُرر والولد واكفين غير تنتبهين؟

-دُرر: مو اني الوكعت هاي وردة وجرتني

-سيد ضَهير: استغفرالله يا محمد شكو تمشين وره الفاهيه يعني مره بالموكب وهسه هنا لج انضغطت بلا منو باوع عليج

-دُرر: اصلا كلهم نزلو راسهم محد باوع عده مهيمن سند وردة واني الرحت بيها

-وشكو سندها

-شمدريني

-أي هو بعد جوارينكم

-أي واذا جوارينه شنو قصدك

-: يباوعلي بخزر وما جاوبني

-دُرر: شنو دزيت عليه حتى ترزلني؟

-سيد ضَهير: شوكت نتزوج

-دُرر: يعني برأيك هذا الموضوع هسه وكته؟

-سيد ضَهير: حددي الموعد بأسرع وقت

-دُرر: وترتني شكو خاف عندك شي

-سيد ضَهير: أشياء

-: ورجع يحضن آبية

ويباوعلي

-سيد ضَهير: تجربين تكعدين ع الفرس

-دُرر: مو هسه

-سيد ضَهير: شوكت لعد

-دُرر: من نتزوج حتى أخذلي وقت طويل بيها

-سيد ضَهير بأبتسامة: لوتيةة

-دُرر بتكبر: ها لعد شعبالك

-: تقرب مني… أني جمدت بمكاني

حط وجهة بخدي غمض عينه وضل يشم ثبت وجهة بركبتي وكال

-سيد ضَهير: دُرر

-دُرر بتوتر: هاا

-سيد ضَهير: دُرر روحي

-دُرر: لا اصلا داسمع صوت وردة اصيحني

-: رجع لـ وره وتبسملي

-سيد ضَهير: أموت عليج

-: ابتسمت وما رديت

-سيد ضَهير: اكيد دتكولين بكلبج واني هم يلا روحي

-دُرر: من وين جبت هل ثقه

-سيد ضَهير: من حچي عيونج الريحانتين

-: توادعت وياه وبعدين رجع سلم على أهلي بوداع وطلعنه

بـ هاي الليلة تحلم سيد ضَهير بنفس الشخص الي راد ياخذة

شفته يمشي بمكان مهجور لحكته وكلت

-سيد ضَهير: تعال تعال مو أنت الي ردت تاخذني؟

– ضَهير

-سيد ضَهير: اي اني ضَهير

-ليش رفضت تجي ضَهير

-سيد ضَهير: ليش منو أنت!

-أني أتبع قبيلة كبيرة ودزوني عليك أسالك اذا تقبل تنظم النه ولو ناضم كان انسرينا بوجودك

-سيد ضَهير: ألي افهمة منك أنتَ جن؟

-أي نعم

-سيد ضَهير: بس اني ماشتغل مع جن

-أعرف أنو انت تشغل خدام وتشغل ملائكة فقط صالحين لكن التجارب عظيمة

-: صفن على محبسي وجره من أيدي اني فزيت بصدمة

باوعت الأيدي ماكو المحبس

ضليت اتلفت بتوتر يمين ويسار لكيت سيد سلام يضوي على الشذرة مالت محبسي ومحبسه ويحاول يفرق بالألوان

سألته

-سيد ضَهير بعصبية: انت شدسوي شلون تجره من أيدي

-سيد سلام ببرود: شبيك ضَهير ليش فزيت

-سيد ضَهير: أحجي وياك ارفع عينك بعيني

-سيد سلام: هاك خاتمك

-سيد ضَهير: اي جيبه بعد لتجره من أيدي لا أجر روحك منك

-سيد سلام بكتمة: تمام

-: راح سيد سلام بحزن وبزعل عرفته زعل مني لان هو أقربلي من روحي واني رفعت صوتي عليه وتماديت وحسسته مو من حقه يتدخل بغراضي وهو يشاركني بكل شيء أجاني تأنيب ضمير

(صار صبح)

(بيت أبو ضَهير)

-أم ضَهير: يلا أمي كومو

-سيد عباس: يلا كلكم كومو اتريكو بوسوني اتباركو بيه تره سيد اني

-سيد فرهود يصيح من المطبخ: چا واحنا علاليك

-سيد عباس: ما أقصد سيد، أقصد سيادة بابا عليكم

-: سيد سلام وهو نازل

-سيد سلام: دنجب بابا أنت وهذولا المخمودين يمك

-سيد خاصر: رحم الله والديك هذا الصباح مالتك؟

-سيد قيس: نزل ذراع الثاني بكل بيت موجود واحد مثل ذراع وسلام شنو هل كئابه

-سيد سلام: دكومو أكلو ولدوخوني يلا

-: أنفرشت سفرة الريوك والكل كعد

نزل سيد ضَهير ببطء

فز سيد سلام وكام ساعدة حتى ينزله

-سيد سلام: منو كلك تكوم بدون ما تصيحني

-سيد ضَهير: مابيه شي اريد انزل وحدي

-سيد سلام: لا مو بكيفك تنزل وحدك

-سيد ضَهير: لعد بكيفك

-سيد سلام: اي لحد ما تصير زين

-سيد ضَهير: شنو البارحة اني صيحت عليك؟

-سيد سلام: لا

-سيد ضَهير: لعد شنو

-سيد سلام: كعدت بليل ولكيتك تون وماتكدر تنام ضليت كاعد يمك سويتلك كمادات بعدين شفت أيدك ترجف نزعتك الخاتم وضليت أفركها

نوب نمت وضليت اضوي اشوف الألوان بس انت مدري ليش صرت عصبي

-سيد ضَهير: يعني صرت عصبي عليك

-سيد سلام: هسه يلا مصار شي قابل خنكتني

-سيد ضَهير: نفس الشيء مدام حسستك ميصير تدخل بغراضي، لك والله بسبب الكابوس أعذرني

-سيد سلام بحضنه لـ ضَهير: مصار شي خويه مصار شي الحمدلله على سلامة روحك

-سيد ضَهير: سلام أنت لو تاخذ روحي مني أني ارضى مدام أنت الي رايد هل شي

-سيد عباس: واذا كلت الك اريد سبحتك تنطيها

-سيد ضَهير: اني احجي مع سلام مو وياك

-سيد عباس: مو كاتل ابوك اني غير

-سيد ضَهير: لك بابا روح اخذ السبح كلهن شنو تسألني

-سيد عباس: نجحت بالأختبار حبيبي جنت اختبرك تحبني لو لا

-سيد ضَهير: هاي شنو تقيس حبك بالخرز مالتي

-سيد عباس: اي والله اشوفك ماتنطيهن الا لـ الي تعزه وتحبه ومعتز بيهن كلش هواي

-سيد فرهود: عبيس عندي الك مشروع

-سيد عباس: أهوو

-سيد فرهود: دسمع هسه

-سيد عباس بعصبيه: شكو شكو

-سيد فرهود: أنت وخاصر وقيس تبيعون علاليك وشويه شويه نوب صابون شوي شوي نوب علج ابو سهم وتطورون صدكوني لان وجودكم ماله فائدة عالاقل فيدو نفسكم

-سيد خاصر: شنو هل بهذله من صبح

-سيد قيس: والله مادري طلع هذا هم ذراع

-سيد فرهود بضحكة عاليه: أشااقة يمعودين بس والله تلوكلكم العلاليك

-سيد قيس: ندري ندري بس انطوني خبزة

-سيد فرهود: سلام مرتك مادري شبيها هل فتره مرتي تكول حيل مريضه

-سيد سلام دنك راسه بحزن: مريضه

-سيد ضَهير بصدمة: شبيها

-سيد سلام: مرض خبيث بالدم

-سيد ضَهير بصدمة: جذابب

-سيد خاصر: لا حول الله زين اله علاج شي؟

-سيد سلام: يا علاج منتشر بيها

-سيد ضَهير: شوكت هذا الحجي شو متكول النه

-سيد سلام: هاي صارت بعد… أكلو انتو اني ما أشتهي

-سيد عباس بهمس القيس: حب حياتة هاي اذا ماتت لا سمح الله يموت وراها

-سيد قيس: شنو على حب؟

-سيد عباس: لا بس حبها بخلال الزواج وكلش

-سيد قيس: والله خطية الله يشافيها

-سيد ضَهير: يمة انتي متحجين صدك عود أم روان مريضه؟

-أم ضَهير: أي يمة شسوي شنو بأيدي

-أبو ضَهير: لو اعرف كل حالي ومالي اذبه حتى أعالجها ما رح اعوفها

-سيد ضَهير: خطية تره سلام هل فترة حيل مضغوط

-سيد فرهود: اي حتى كايم ميفضفض النه كله يكتم

-سيد ضَهير: انسدت شهيتي خل اكوم وراه

-: مر أسبوع وصار سيد ضَهير بخير وأتفق أبو دُرر وأبو ضَهير على زيارة سوه بين العوائل

وفعلا طلعو

حضروا نفسهم وصعدو السيارة وصارت سوالف بينهم

كعد سلام يم ضَهير

صعدوا السياره وكلهم بأيدهم سبح

ولافين الشماغ الأخضر والدشاديش السودة والمحابس الدينيه بكامل أناقتهم الرجوليه مع عطر المسك والعنبر

-سيد ضَهير: هلا هلا باع منو يكعد يمي

-سيد سلام: اي اني

-سيد ضَهير: وهذا العلگ ليش جايبه

-سيد سلام: رايح أعكدة هناك واطلب من ابو الحسن ومن الحسين والعباس عليهم السلام

-سيد ضَهير: شنو تطلب

-سيد سلام: تتشافى مرتي بأذن الله

-سيد ضَهير بحزن: أن شاءالله خويه أن شاءالله

-سيد سلام: اكلك خاف تريد تكعد خطيبتك يمك اني شعندي هنا

-سيد ضَهير: لا بالرجعة احسن

-سيد سلام: براحتك خويه

-سيد عباس: أيي شغلو لطميات شور

-سيد ضَهير: ولك انت والشور شنو

-سيد عباس: شغلو تره انزل

-مرت فرهود بضحكة: ونزلتهم هسه تشتغل المكينه مالتك الحد مانرجع

-مرت سلام: يونس والله عوفيه

-سيد عباس: أه شو انتن متعرفن تحجن هاي تكول ونزلتهم هاي تصيح يونس بزونه اني

-دُرر بضحكة: معليك بيهن ضل

-سيد عباس: على راسي كلكم شلع قلع

-سيد سلام: يعني شلع قلع؟

-سيد عباس: شلع قلعع حبيبي

-أبو دُرر بضحك: هنيالك أبو ضَهير على هيج ونسه بعباس

-أبو ضَهير: والله مسللني بالبيت

-أبو دُرر: يكبر يكبر

-سيد عباس: بلا هاي منو يسوق ما انتبهت

-سيد ذراع بخزرة التفت: أني

-سيد عباس: اهووو

-سيد ذراع: وسمو

-سيد عباس: ماكو غيرك يعني

-سيد ذراع: أبد ماكو غيري

-سيد ضَهير: أني جبته ادري بيك تحبة

-سيد عباس بصدمة: خاب صدك جذب سوولي مجال خل انزل

-سيد قيس: سلام عليكم ورحمة الله وبركاته

-سيد عباس: لك هلااا ما ارجع جذب

-سيد قيس: اني رح اكعد الي كدام علمود السياقه لان أندل اني وذراع

-سيد عباس: لك اهليين

-سيد قيس: ارجع ارجع نكعد سوه

-سيد ذراع: ياهو يكعد يمي مكان فارغ

-أبو دُرر: أنتضر ابني حيدرة هسه يجي يمك

-سيد ذراع: خوش عمي انتضره

-: أجى حيدرة كعد بصف سيد ذراع واخذتهم السوالف والطريق

وصلوا للنجف الأشرف

-سيد عباس: كلمن يكض زعاطيطة مالنه خلك نركض وراهم وندور عليهم

-سيد سلام: لا معليك كلمن يلزم بنته

-سيد عباس بغمزه: يلا ضَهير انت هم الزم بنتك

-سيد ضَهير صگ سنونة: لك العار احجي عدل لا يسمعك ابوها

-سيد عباس: مو تكللها أبويه لعد شنو جذب

-سيد ضَهير: دمشي لا أدفرك

-سيد قيس: دمشي بابا خل نمشي وحدنه

-سيد عباس: امشي عضيدي بعدك اني أضيع

-سيد ضَهير بصدمة: لك عباس

-سيد عباس: ها شكو

-سيد ضَهير: ربطت آبية؟

-سيد عباس: اي شلون مااربطها

-سيد قيس: شو احسك جذاب

-سيد عباس بهمس: اي والله جذب ما ربطتها

-سيد قيس: لك خاف تسرج وحدها؟

-سيد عباس: لا شبيك ما عليها شي

-: دخلنا صحن الامام علي عليه السلام

والكل لازمين بعض

وأبويه كالي روحي مع أهل خطيبج هم يزوروج بويه

وافقت بتوتر زرنا وطلعنه واتفقنا على مكان نكعد بي من نخلص زيارة

طلعنا اني وأم ضَهير ومريم ومرت سلام ومرت فرهود من ردنا نطلع تيهت البنات وضليت اني ومرت فرهود

كملن هن طريقهن بعدين انتبهن أحنا ماكو واني ومرت فرهود ضلينه نضحك بتوتر وندور

-سيد ضَهير: زيارة مقبولة

-سيد فرهود: وين مرتي؟

-أم ضَهير: هياته… وينهن

-مرت سلام: يمكن ضاعن جوه

-سيد ضَهير: هو شنو ضاعن جوه

-سيد فرهود: باع شلون ثنين فاهيات ضاعن

-سيد ضَهير: شلون يعني ضاعن من طلعتن لو من البداية؟

-مرت سلام: لا ضاعن بره من وصلنه للباب لان هوسه

-سيد ضَهير: يمة يصير اروح ادور؟

-سيد فرهود: دكعد هسه… روحي جيبيهن بربج مريم روحي وياها دورن عليهن

-مرت سلام: هسه اجيبهن

-: ضلينه واكفات يم الباب الحد ما شفناهن يتقربن بأتجاهنة

رجعنة وياهن نوب تيهنه مكانهم الاساسي

-مرت سلام: يا وين هذولا ماكو

-مريم: اوكفي خل نباوع عليهم من بعدين بس لحد تتحرك من وحدها

-مرت فرهود: وينهم هذولا

-سيد عباس: باع شلون يدورن الفاهيات نوب كلهن ضاعن

-سيد ضَهير: عوفهن عوفهن بلا

-سيد سلام بأبتسامة: استغفرالله عود كلت هذني النچرات

-سيد ذراع: رح اشرب مي واجيبهن

-: تقرب النه سيد ذراع شربنه مي ورجعنه وياه

-سيد ضَهير: هلا يمة هلا بالنچرة الضاعت

-دُرر بضحكة: والله دخت من النسوان بس يدفعن

-مرت سلام: نصي الكلاوات تره من طلعنه ضعتي انتي ومرت فرهود

-مرت فرهود: اسكتي يمعودة فضحتينه

-: صارت سوالف

الشباب كعدنه سوه والكبار سوه

وكلنا لاحظنا سيد ذراع كاعد وي الكبار بس يخزر صفح ويسنط النا يسوي نفسه مو منتبه

-سيد فرهود: بس باعو ذاك العقدة كاعد وي الكبار

-سيد ضَهير: عوفه دا يسنط طبعا

-سيد عباس: اي اي يغلس

-سيد سلام: أحجو بالزواج أحجو

-سيد ضَهير: أيي شكد حلو الزواج والحب

-سيد فرهود: أي بعلي افتخر بمرتي اني

-سيد سلام: شلون تفتخر بيها

-سيد فرهود: بكل مكان اكول اني متزوج وابو هدى

-سيد سلام: واني هسه عكدتلها علگ

-: شال غترتة الخضره سيد ضَهير وحطها على راس دُرر

-سيد ضَهير: واني هيج افتخر بدرتي

-سيد سلام بضحكة: هاي حلوة الفكرة

-سيد ضَهير بأبتسامة: مو قصة فكرة بس هي افتخر بيها لان رح تجيبلي ولد يحملون أسمي ويلبسون غترتي

-سيد فرهود: الله، على عناد هذولاك الناس المحموسين

-سيد قيس: خرب يعني انتو ما جبتو الا ذراع المرح؟

-سيد عباس: غلطة وماتتكر

-سيد ذراع وهو صاد وجهة: ترة أكوملكم

-سيد سلام: يا الله حجة

-سيد ذراع: بلا شنو هاي سوالف مال زواجات

-سيد ضَهير: تعال ذراع شوكت تتزوج أنتَ

-سيد ذراع: ياحب يا زواج

-سيد سلام: ليش هيج كابس روحك متفكها شويه

-سيد ذراع: ماعرف والله مادري

-سيد قيس: هو هذا عقدة نسيت اجيب رايه أعكدها واجي هنا افتحها بحضره الامام علي بلكت الله وها ها

-سيد ذراع: شنو قصدك

-سيد قيس بهمس الـ عباس: بي حاله نفسيه ماعرف شنو

-سيد عباس: عوفه اني أزوجه الوحدة

-سيد سلام: وانت قيس شوكت تزوج

-سيد قيس: من يزوج عباس

-سيد سلام: لاا تذكرت ميصير تتزوج انتَ

-سيد قيس:شنو ليش عود

-سيد سلام: بلا أحنا كلنا تزوجنا نكدر نزوج عباس بس انت بعدلك مهيمن وذراع لازم يزوجون يلا لان اكبر منك

-سيد قيس بهمس: يمعود اذا على مهيمن سهله يتزوج بس كول هذا العقدة رح يچبسني

-سيد سلام بضحكة عاليه: لك ضَهير تعال اسمعة شنو يكول

-سيد ضَهير: شبي

-سيد قيس: عوفه يمعود مو ماخذ جو وديسولف وي دُرر

-سيد ضَهير: بلا چذب دا اسولف وي عمتي أم دُرر

-سيد قيس: ها زين زين

-: خلصنا وقررنا ننزل الكربلاء

وأحنا نمشي ونفتر بين المحلات الخارج المرقد

عجبني سوار وضليت صافنه عليه حالي حال البنات ومريم ومرت فرهود وسلام

بس ما ألاحظ الا أنو اني أتاخرت وضليت اباوع التفت يمين يسار ماكو البنات وكلهم مشو

هنا لزمتني خنكة وردت أبجي ضليت جامدة بمكاني

-سيد ضَهير: أكلج دُرر… دُرر وينها

-أم دُرر: ياربي بس لا هم ضاعت

-حيدرة: خاب شني سالفه كلسع ضايعة هاي بعد لتطلعوها مو مالت طلعات

-وردة: يا خاف ضلت يم السوارات

-سيد ضَهير: لا حول الله يارب لحد يتحرك من مكانه أوكفو هنا

-: اني من شدة ذكائي ضليت اتقدم وارجع والتفت وعيون الناس كلها عليه ومن التوتر عكست الاتجاه وضليت امشي عكس اتجاهم على بالي هذا الاتجاه الصح الدمعة بعيني واحساسي يكلي هذا الاتجاه غلط بس مستمره بسبب الخوف بهل أثناء

وما أحس الا شخص يلزمني من جتفي بقوه…