رواية بيت البخت الفصل الثامن 8 بقلم اريج البغدادي

تفاجئوا من شافوا أخوهم بحالة صعبه والد#م ماخذ طوله من بطنة ومغمي عليه

-سيد سلام: هاي شنوو لك فرهووود شيلة وياي

-سيد فرهود: خويه تسمعني خويه ضَهير

-سيد سلام: شيلة كول ياعلي كول ياعلي

-سيد فرهود بصعوبة: ياعلي

-: نقلوا سيد ضَهير للمستشفى اتصل سيد سلام على أهلة وخبرهم على الحادث

بعد نص ساعة

دخلوا أهل سيد ضَهير للمستشفى وملامح الصدمة والخوف واضح عليهم

-: صار وضع سيد ضَهير أسواء ونبضات قلبة تتسارع بشكل مو طبيعي تاخذ مدة وتصير بطيئه بشكل مُميت

والدكاتره ميكدرون يعرفون حالته لان ما جاي تستقر

-أبو ضَهير: فدوة الكلبك دكتور طمنه

-الدكتور: ماكدر صراحة بس انطوني وقتي أعرف ابنكم شبي

-سيد عباس: هو شنو انطوني وقتي شلون دكاتره أنتو

-سيد فرهود: عباااس ضب لسانك وخلي الدكاتره يشوفون شغلهم

-الدكتور: تره أعرف ارد عليك بس وضع أخوك عسير ومو وقت مناقشات

-سيد سلام: أحنا نعتذر دكتور بس شوف وضع أخويه

-أيناس زوجة سلام: سلام

-سيد سلام: كولي

-أيناس زوجة سلام: أحس وضعيتي مو بخير

-سيد سلام: هسه أخلي عباس يرجعج

-أيناس: تعال عباس فدوة رجعني أحس اني مو بخير

-سيد عباس: أمشي يلا

-: رجعت أيناس للبيت ووضعيتها مو بخير

وتلاشت الأمور مع عدم أستقرار سيد ضَهير وبين قلق عائلته وهم يفترون بالممر

أجو أبو دُرر ودرر فقط بعد ما سمعوا الخبر

-أبو دُرر: لا حول الله شكو شصاير

-أبو ضَهير بحزن ونضره غضب: جاي يموت ويرد حي

-أبو دُرر: على كيفك كول يالله خويه أبو ضَهير شسالفه

-دُرر بخوف وحزن: شبي ضَهير سلام احجيلي

-سيد سلام: أنخطف أمس واليوم لكينا ومربطين أيدة وطعنوه ببطنه تلاث طعنات والطعنه الثالثه أثرت خلته ينزف هواي

-دُرر: صدك تحجي؟ وهسة ميصير ندخله؟

-سيد سلام: اصلا وضعيته مو مستقره يعني ديروح الدكتور ويرجع يكول نبضات قلبه مو طبيعية ساعة سريعه ساعة بطيئة ونفسه صعب

-: تراجعت الي وره وكعدت ودمعتي بطرف عيني من القهر وحسيت شيء أنكتم بداخلي هو أمس أجاني يشاقيني ويسمعني كلام حلو وتذكرت كل كلامة الحلو وتصرفاتة الي تحسسني هو الرجُل الحقيقي الي بحياتي

وتلاشيت كلش هواي ووهجست الحد ما أجى الدكتور بعد نص ساعة وكال

-الدكتور: عيني سبب عدم أستقرار نبضه تنفسه الغير مستقر من الأساس وسبب نزيف حاد أدى إلى أغماء

-أبو ضَهير: شكد يستمر هل أغماء

-الدكتور: يعني ميطول ويكعد ان شاءالله بس كون يساعدنة بأستقرار نبضة

-أبو دُرر: أن شاءالله أن شاءالله ماكو الا الخير

-سيد فرهود: أكلك سلام

-سيد سلام بتعب: كول

-سيد فرهود: خل نرجع أمي واختي ومرتي والبنات شعدهن هنا وخلي حتى درر ترجع وي ابوها احنا نضل يمة

-سيد سلام: أحنا نرجع نسوانة وهاهيه معلينه بدُرر خاف متريد تروح وننحرج

-سيد فرهود: تمام براحتك

-: بأثناء تحضيرهن حتى يرجعن أجى عباس

-سيد سلام: أجيت بوكتك رجع هذن وياك

-سيد عباس بصدمة: تحجي صدك لو تشاقه؟ يمعود هستو…

-سيد فرهود: لتضل ادردم رجعهن أحنا ضالين وياه

-سيد عباس بغضب: أمشن يلا

-سيد سلام: واسمع، ضل وياهن بالبيت لاتجي منو يضل يمهن

-سيد عباس: خاب عود صدك؟

-سيد سلام: روح عبااس لتحجيني بيا حال أحنا

-: راح عباس وأخذ نسوانهم وضل بالبيت

صارت ساعة 12:00 بليل

-أبو دُرر: درة بنيتي

-دُرر بتعب: ها بابا

-ليش ما أرجعج للبيت بويه

-لا أضل هنا الحد ميكعد ضَهير

-ميصير بابا تره شكول شكولات بالمستشفى

-ميخالف اضل يمك

-بابا ميصير داكلج باع الشباب نظراتهم تذبح الطاير

-ماريد يابه لتلح عليه

-شلون أني بيج درةة شلون

-: رفضت أرجع

وصار صبح علساس أستقر نبضه والحمدالله

-الدكتور: صباح الخير عيني

-أبو دُرر: صباح نور يابه بشرنة

-الدكتور: أستقر نبضه الحمدلله

-أبو دُرر: أي يالله الف الحمدلله سمعتي دُرر بابا

-دُرر بفرحة: أي، سلام كوم ضَهير استقر نبضه

-سيد سلام: صدك؟ الحمدلله

-: والفرحة فوق الخيال

وقرر أبو ضَهير يفصل مره ثانية ويترك سلام وفرهود يم ضَهير

لكن العم عواد أبو ضَهير وشلون الدخيل يرجعه الأهله بسلامة

(السيد عواد أبو ضَهير صاحب الحظ

والبخت)

لكن رغم ذلك تقاطعه هواجيسه تجاه ضَهير

(تحت الچادر)

أجى سيد أبو ضَهير وأبو مهيمن وأبو مهد وأبو لبيد وبقيه العمام

بالسيارات السوداء العالية

وعيون الرجال تلاشت عليهم برهبه

نزلوا بكل فخامة وعزيمة

-: من بعد السلام والسموحة مِن الكبار للتحدث بشأن سيد ضَهير

-سيد أبو ضَهير بغضب: أنتم ما طعنتوا أبني أنتم طعنتوني أني شخصيا وبضهري بس قسما بالله وتالله لو ميت أبني ضَهير لا أخلي هل چادر ينصب الفواتحكم

-شيخ عشيرة الهواشم: أهدأ بويه أبو ضَهير وحقك احنا لو بمكانك چان سوينه الأسواء ونردها ألهم دم بدم بس أحنا ذات أخلاق ومفاهيم والحمدالله

-شيخ العشيرة الأخرى: مستحي أناظر الوجهكم الطيب، قسما بالله نزلوا راسنه كدامكم أمرونة يابه بس تره همة طاعنيه مره وحدة

-أبو ضَهير بعصبيه: شنو طعنة وحدة

-شيخ الهواشم: أعصابك أبو ضَهير

-أبو ضَهير: شنو طعنة وحدة بالقرأن نكسر ضهرهم واحد واحد أبني هسه بالمستشفى أذا صارله شيء أحرك الأخضر واليابس عليكم بس لو ما هاي الناس الخيرة الكاعدة

-شيخ الهواشم: أكعد بويه أعصابك هسه كل شيء يفض بس كول شروطك أوامر تفضل

-: صارت هدوء بعد مُناقشات حادة وأقناع السيد عواد أبو ضَهير لـ التكلم بهدوء

-أبو ضَهير: ألشرط الأول والأخير

-الشيخ الأخر: تفضل يابة

-أبو ضَهير: الدخيل رح يرجع الأهله بأمان وممنوع تطخون شعره منة، والفصل الباقي طايح، لكن يضلون تحت معاقبة القانون هذا الأمر ماندخل بي القانوني

-سيد عباس بعصبيه: لا مانطي دخيلنه

-سيد قيس: مأنطيه لو هسه تصير دموم

-شيخ الهواشم: بويه كعدوا وخلو الچلمة للكبار وعشيره الدخيل هيه بعدين يكضوها ويه الأبنهم مكتول

-: أخذولهم جانب أخر

وتحدث شيخ العشيرة الأخرى وكال

-شيخ العشيرة الأخرى: يابه رحم الله والديك صدك بيت الحظ والبخت مادري شلون شحاجيك لكن خلي تكاليف المستشفى علينه الحد ما يطلع السيد ضَهير أبنك وحقك لمن تحجي وتصير عصبي أنه لو هم مكانك چان ماخليت حي بس أني جاي اكلك ولدنه مو اوادم وحقكم علينه يابه

بس هم على كيفكم ويانة تره ما متبرين منهم أحنا

قانون أنه وياكم

لكن تفضلوا خلونة نحجي عشائرياً

-شيخ عشيرة الهواشم: عفيه أبو ضَهير بيضت وجوهنة

-شخص: صلوا على محمد وآل محمد باعلى أصواتكم

وأدعوا السيد ضَهير بالشفاء بصلواتكم أنو يكوم بألف سلامة

-الجميع: اللهم صلِّ على محمد وآل محمد اللهم أمين

-: بعد ما أستهدى أبو ضَهير وشاف كدام عينه بس مرض ضَهير أستحرم يفصل وضل كل همة يرجع الدخيل الاهله بسلام

وخله فقط التكاليف على العشيرة الأخرى ورجع الضَهير بكل لهفة وعينه

خاف أنو ينشغل عن ضَهير ويصيرله شي بغيابه حتى وأن ولده الأخرين وياه لكن قلب أب ومستحيل يتركه ألا كدام عينه

(بالمستشفى)

-أبو ضَهير: ها ولدي شلون صارت حاله أخوكم

-سيد سلام: بعد يابه

-أبو ضَهير: بعدة موجود عمكم أبو دُرر

-سيد سلام: اي موجود يريد يودي بنته ومتقبل تريد تطب الضَهير

-أبو ضَهير: هسه خلي اشوف الدكتور يقبل

-: أستاذنه ووافق الدكتور بدخول لكن شخص واحد فقط

دخلت دُرر على سيد ضَهير

لزمت أيدة وضليت صافنة عليه

دققت بملامحة وركزت حتى بأنفاسه

ردت أستوعب الي ديصير وياي وويا من بداية الخطوبه الهسه واريد استوعب المغمي عليه الان ولازمة أيدة خطيبي

وبنص التفكير وقاطعتني قبضة أيدة لـ أيدي

صحت فوراً

-دُرر: بابا ضَهير لزم أيدي

-أبو دُرر: يالله يالله صيحوا الدكتور يولد

-سيد سلام: دكتور فدوة أروحلك شوفلنه الوضعيه

-الدكتور: هاي أعصاب عيوني فـ تطلع بشكل غير أرادي أسف يعني لكن الحقيقة بعدة بالأغماء

-سيد سلام: ها يكول بخير يجماعة يكول بخير

-سيد فرهود بفرحة: الف الحمدلله خل اخابر امي

-سيد سلام: اكعد بعدين اكلك ع شغلة

(بيت أبو مهيمن)

أم مُهيمن: وين رايح أبني ليش مستعجل

-سيد مهيمن: وين يايمة غير لضهير

-سيد ذراع: انتضرني مهيمن جاي وياك

-سيد مهيمن: أنت هم نطيت

-سيد ذراع: ليش ياهو نط قبلي

-سيد مهيمن: ولد عمي مهد وخاصر ولبيد

-سيد ذراع: لعد روح واني اجي وراكم بسيارتي

-سيد مهيمن: خوش، يلا يمة مع سلامة

(بالمستشفى)

-سيد خاصر: شلونكم عمامي

-سيد لبيد: شلونها صحتكم يابه ضَهير شلون صار

-سيد مهد: عمت عيني خويه شصاير بيه الهسه ما كعد

-أبو ضَهير: هلا بيكم بوية، انتوا كولوا الحمدالله من أستقر نبضه

-أبو مهيمن: اي والله صارله شكد يلا استقر الحمدلله ع كل حال

-سيد لبيد: ان شاءالله ماكو شي عمي لاتخاف

-سيد مهد: شسالفة أبوية كلنا يمكم هسه أن شاءالله يكعد ونغيرله جو صارلنه هواي مشايفيه

-سيد خاصر: يرجع يتخربط بس يشوف وجه أخويه لبيد

سيد لبيد: مو اجيك لك

-سيد مهد: بربكم للتعاركون هنا ناس مريضه وانتو بيا حال

-سيد لبيد: مو هو يحارش

-سيد مهد: هسه عوفه هو مخبل انت هم مخبل

-سيد سلام بضحكة: انت جايب ريه وسكينه بربك

-سيد مهد: لا حول الله ياربي شلون تؤام شاخطين أبتليت جبتهم استحيت من أبوهم

-سيد خاصر: شلون عيني أبوهم شيصير منك

-سيد مهد: تاج راسي تاج راسي بس صم حلكك

-سيد لبيد: هسه اني اصم حلكة

-سيد خاصر: ها ملبود شبيك

-سيد سلام بضحك: أه ملبود شنو

-سيد فرهود بضحك: صار مثل عباس يصيحلنه نمرود وضفيره

-سيد لبيد: وعلي دفره ماكو اخليه ينام بصف ضَهير

-سيد خاصر: شو يلا

-أبو ضَهير: ولكم شكبركم بوية صار عمركم 20 شوكت تعقلون

-سيد خاصر: شنو عمي شايفني اركض بشارع مصلخ

-سيد فرهود بضحكة قوية: لك سلام دتسمع نفس حچي عبيس بالعباس

-سيد سلام بأبتسامة: أي أي هو عبالك نسخة مال عبيس كاعد كدامي حتى الشكل

-سيد خاصر: الف الحمدلله تؤام بس ما نشابه لو اشبهك ملبود ماكو؟

-سيد لبيد: أي أي؟

-سيد خاصر: جان حركت وجهي من زمان

-سيد مهد: خواصر ماتسكت زعجتنه

-سيد لبيد بشماته: هههاييي خواصرر

-سيد خاصر بنضره غضب: هيج صار الحچي مو بسيطة

-سيد مهد: لا أرجوك لا

-سيد سلام: لا دوريد لا الله يخليك دوريد

-سيد خاصر: يمعودين سكتوا مدشوفون مرضه هنا نايمة وانتو تسولفون وضحكون خرب بأبليسكم اي والله

-سيد لبيد: خرب أعور الدجال صارلك ساعة تتشاقه عبالك جاي الحفلة

-سيد مهد: عوفه بابا عقل هسه

-سيد لبيد بهمس: سلام

-سيد سلام: عيني

-سيد لبيد: ذيج الكاعدة منو ام عيون خضر

-سيد سلام: خطيبة ضَهير

سيد لبيد بتلعثم: ها الله يديمهم بس خطية شو مبين تعبانة

-سيد سلام: اي متقبل تروح تكول الا يصير زين

-سيد لبيد: شنو خطبها على حب

-سيد سلام: لا يا حب بس هو حيل حبها بفتره الخطوبه وهي اكيد حست بهل حب فـ ضلت

-سيد لبيد: ان شاءالله يارب يصير زين ونفرح بعرسهم

-سيد سلام: أمين يارب

-سيد مهيمن: اكلكم ما أجى ذراع؟

-سيد سلام: لا ليش يريد يجي؟

-سيد مهيمن: اي والله بس شو أتاخر، اوكف زينب ادك

-سيد سلام: ها هذاك أجى

-سيد مهيمن: ها ذراع تعال أخذ مكاني زينبه أدك خلشوف شبيها

-سيد ذراع: ماشي، يابه شلونهم الشباب، عمامي وين

-سيد سلام: هلابيك عضيدي هناك كاعدين ديشربون چاي

-سيد خاصر: هذا عمو لبيد مو بعينك؟

-سيد ذراع: شنو عمو لبيد

-سيد خاصر: دشوف شعراتو ولو شلون مشيب

-سيد لبيد: عود يحشش خواصر

-سيد سلام: باع سوالف خاصر مثل قيس وعبيس

-سيد ذراع بضحكة: خرب يومكم ضحكتوني

سيد خاصر: شعره مشيب

-سيد لبيد: لا جذاب لأن طالع على خوالي عدهم شعلة وراثيه اني اجيت عليهم

-سيد خاصر: ملبود لتجذب لك

-سيد لبيد: خرب تره اسحلك

-سيد خاصر: اتحداك خل نسويها طحين بره المستشفى

-سيد ذراع: دكعدو لا اجرم بيكم ولكم

-: أتصال من حبيبة روحي بتلفون خاصر

-سيد لبيد: هامنو؟

-سيد خاصر: شنو منو صديقي ابو المولدة

-سيد لبيد: لتجذب

-سيد مهد بترقب: شنووو

-سيد خاصر بصدمة: شنو شكو منو

-سيد مهد: هذا ابو المولدة اسمة حبيبة روحييي

-سيد لبيد: أه صدكك اليوم افضحك

-: أتصال من نويرتي الاحبها بتلفون لبيد

-سيد مهد: لك ألعبب كلها مرتبطة الا مهد بزر بطني

-سيد لبيد: بزر بطنك شنو

-سيد مهد: قصدي أصغر مني زعاطيط

-سيد خاصر: هو غير عمرك 24 شنو

-سيد مهد: خايب أنجب

-: صار ثاني يوم وأتجمعوا الأهالي

(بيت أبو مهيمن ودُرر وضَهير ولبيد ومهد)

نص نايمين ونص كاعدين بتوتر

قاطعهم ركض الدكتور بأتجاه غرفه سيد ضَهير

-سيد ذراع: ها دكتور شكو

-الدكتور: أسمحلي عيوني

-دُرر بتوتر: ها ذراع شكو

-سيد ذراع: ماكو شي عيوني اطمني

-دُرر: شأطمن ماكدر باوع الدكاترة شلون ديركضون الغرفته

-سيد ذراع: مادري ماكو شي اكيد لتخافين

-سيد سلام: هاي شنو يدفعون بي؟

-سيد فرهود بصدمة: لك الأنعاش هذا

-سيد سلام: شنوو

-أبو ضَهير: أنعاش مو

-سيد مهيمن بحزن: لا حول ولاقوة الا بالله

-: والدكاترة بركض نحو غرفه سيد ضَهير

حالة ضَهير صارت أسوء والدكتور ركض فوراً يجيب الأنعاش وأثناء الأنعاش

(يروي سيد ضَهير)

-: أثناء أنعاشي أشوف شخص يفتر عليه لابس أسود ووجهة مضلم وماكو ملامح وبيدة فاسه كبيرة ومشبك كفوف ايدة عليها

سألتة منو أنت وشنو تريد

ردف: خلص

-سيد ضَهير: أخلص شنو؟

-بكيفك

-سيد ضَهير بأستغراب: فهمني شنو ديصير ومنو أنتَ

-تريد تبقى لو تجي وياي هاي فرصتك

-سيد ضَهير: أجي وياك وين!

-نرحب بيك وأحنا نعرفك كلش زين شخص عبقري وذكي وعندك طاقه تجاهنة شلون أستغربتني

-سيد ضَهير: خليني أفكر بالموضوع

-: وبهل الأوان شوفني شلون ياخذني اذا وافقت

وصار ضوء مصدع وقوي وبي رعد

شق سبع أضويه

طب بأخر ضوء مد اليه أيدة وسألني

-تجي؟؟

-: بعد هل رؤيا صار جهاز الخط نبضات سيد ضَهير مُستقيم ….