رواية انثي في معتقل الحب الفصل الثاني 2 بقلم عطر الورد
البارت ٢
………..ديمة………
مر ٣ اشهر ع سفر ابوية واحنا يوميه مشكلة عماتي
يدرون الزلة ع امي بحيث شوفنه نجوم الضهر وكل
ما اكول لماما يمته نروح لبيت جدي اتكول اصبري
اما بنسبة اليه اني نسيت شي اسمه أب صار بنسبة
اليه شخص عادي بلبداية جنت يومية بليل ابجي ع
فراكه بس بعدين صار الوضع عادي حتى مرات احقد
عليه لان تركنه بين ناس اذيابه ماتخاف الله من
اشوف صديقاتي يحجن ع ابوهن اضل غصة عندي
احاول ما ابين هذا الشي جنت دائما اظاهر بقوة بس بداخلي انكسار خالاتي دائما يجن ع امي بدوام حتى فلوس ينطنها لان جان ما يكفي راتب امي واحنا طلباتنه هواي ومحد ينطيني فلوس …
رجعت من الدوام صادفت امتحانات أخير سنة الجوء حار واليوم اول امتحان جاوبت وطلعت من وكت …
وصلت لبيت لكيت خطار يمنه وشفت عمتي نضال وعمتي نهئ كاعدات يسولفن واصواتهن يمكن الشارع كله سمع ما اهتميت باوعت عليهن وطلعت….
بس عمتي نضال حجت
نضال:ماسالمين بلسانج عظم
ديمة:ما اريد اجادلها لان اعرف راح اسويها عركة
عمة ماشفتج تعبانه وداخيه من الشمس
نضال:شطولني وشعرضني وماشيفتيني خاف صرتي عمية
ديمة:بكلبها اي والله جنج برميل مال نفط
عمة مو كليتلج شمس بعيوني ماشفتج هسة شصار
وخليت ومشيت لغرفه امي …..
دخلت لكيتها نايمة شادة راسها بعلك اخضر رحت يمها اكعد بيها خفت صايرلها شي
ديمة:ماما اكعد شبيج ليش هيج شادة راسج شنو مريضة
سمية:وهي كوه تفتح عيونها راسها موتها لان بيها شقيقة ماتكدر تتحرك من الالم…
وبصوت تعبان ….ها حبيبتي رجعتي اشلونج بلامتحانات
ديمة:ماما اني زينه بس انتي ليش هيج وضعج شصايرلج …واحد محاجيج كليلي
سمية:لاحبيتي محد محاجيني بس راسي موتني حتى اخذت اجازة واجيت لبيت هسة شوي انام ارتاح لإيضل بالج عليه ……
ديمة:امي بعد مانامت اني بدلت ملابسي رحت غسلت ورجعت طلعت كتبي لثاني يوم لامتحان واسمع السوالف صوتهن عالي باذني كوه اقرا….
شوي …وصار هدوء 
كلت اكيد راحن رجعت أقرأ
كلت اكيد راحن رجعت أقرأ وما احس الا الباب اندفر…….بحيث فززني
نضال:عيني اليوم مسعدة كلشي ما مسوية شنو اتريدين احنا نخدمج من اجيتي لحد هسة نايمة
شنو فاتحيها فندق
ديمة:واني اشوف امي كوه تحجي من الالم….
رديت عليها….
وبصوت عالي …انتي شنو ماتخافين من الله ماشوفيها اشلون امي مريضة…
نضال:شبيها من اجت من الدوام مخلصتها نوم….
ديمة:وانتي شناقصج اشو بس بسوالف صوتج واصل لاخر الشارع…..وما احس غير راجدي بحيث فرني فر خدي… عمتي ضخمة كلش واسمينه واني ناعمة كمت ما احس بيه احس اكو شي دأفي ينزل من خشمي كام يجري دم …..اني دخت اسمع عمتي تغلط واسب كامتلها امي….
سمية:ولج انتي اشلون اكتليها ما تخافين من الله ولج لو ما هي بنت اخوج هيج اتعامليها الله واكبر عليكم مو بشر….
نضال:شوفي بنتج اشلون ما مترباية وتجاوز علينه…هاي انتي معلمتها هيج السانها متبري منها
سمية:بنتي مترباية احسن تربيه بس انتو سبب خليتوها هيج عدائية فوك ما خليتن أبوها يروح…وهم جهالي بامس الحاجه لابوهم جاية انتي تعلمني اشلون اربي…والله انتي الماعندج تربيه مو بنتي….
ديمة:ما اكدر احجي احس الساني خدر شفت عمتي اشلون تحاجي امي وبعدين اجت بيبتي وعمتي الثانية نهئ كملت السبحة وامي بوحدها ومريضة كوة تحجي وهنة استلمنها بحجي وغلط خطية عمتي بلقيس اجت اشوف وجهي لان صار كلش احمر…..
عمة فدوة شوفي امي لاتخليها بوحدها مريضة ماتكدر تحجي
نضال:اني ما مترباية اليوم اعلمج التربية الصحيحة انتي لو بيج خير ما هججتي الرجال….وخليتي يسافر
سمية:هو انتو من وراكم راح…غير انتن تقرا براسه.
ويومية عركة..بسبكم حسبي الله ونعم الوكيل بسجن
واشوف عمتي وبيتي اشلون ادفع بامي اتريد اطلعها من البيت
نضال:اليوم لو اني لو انتي بلبيت روحي لاهلج يلا اطلعي منا …
ديمة:شفت خطية امي اشلون طلعتها واني اسمع اصيح ….
سمية:خلوني اروح اني وجهالي ما اريد اخلي جهالي يمكم ياضالمين حرام عليكم …افتحو الباب..
وصارت ادك بلباب والناس التمت…
راحت يم الجوارين كعدت….
ديمة:من شفت الوضع هيجي…اخذت موبايل امي …
بقى بغرفه…خابرت عمي حاتم هذا احسن واحد بعمامي…كلش زين النا…ودائما يساعدنا ..هو مامزوج بس طالب يدرس ما عليه بشي….يطب ويطلع بدون صوت
ديمة:وهي تبجي عمو فدوة تعال هاي عماتي وبيبتي طردت امي وهي مريضة …تعال رجعها فدوة
حاتم:هسة جاي بسرعة …انتي اكعدي بلغرفة واني جايج..
ديمة:سديت الموبايل ضليت كاعدة بغرفة اسمع بيبتي وعماتي يغلطن ويدعن ع امي…عمي الجبير ما موجود واخواني دوامهم ضهري….اني ما بيدي شي اسويه …اخاف منهن لان اكيد راح يكتلوني…
ضليت كاعدة منتظرة عمي ….شوي وسمعت صوته
حاتم:نضال ولج انتي ما نخلص من مشاكلج……
نضال:اني شعليه…هي مرت اخوك ضاله تغلط واسب علينه وع امي
ديمة:سمعت صوت عمي طلعت اركضله
لا عمي جذب هنه عماتي صوج بيهن…
وحجيتله الصار……
شفت عمتي اشلون اتباوعلي وتخزر بيه…
ما اهتميت اهم شي امي…شيسون خلي يسون
شوي …ورجع عمي وجاب امي وياه شفتها رحت ركضلتها وحظنته……
حاتم:يلا ام منتظر روحي لغرفتج اكيد تعبانه
وانتو ما اريد اسمع اي صوت….كافي يومية مشكلة.
نضال :هسة يجي ثامر…وهو اله شغل وياك
حاتم:باوع ع نضال صفح وهز ايده وراح
ديمة:اخذت امي ودخلتها لغرفه خطية تعبانه وجها حار من الحر وعيونها تعبانة….
يمة بعد ما نضل اهنا خلينيه نروح..
سمية:وبصوت متعوب…هو اني بس اخلص امتحاناتكم نروح هناك بغداد …خالاتج نضفن البيت وطلعن المؤجر منه…نرجع لبيتي
هو اني المصبرني انتو…ما اريد اضيع منكم سنه هذا مستقبلكم….
ديمة:انتي احسن ام بدنيا شسوي ما راح نجازيج
بعد ما خلصت الامتحانات اليوم ودعت صديقاتي لان ما اعرف ايجوز بعد ما اشوفهن…..
رجعت لبيت ….دخلت لغرفه لكيت امي ومنتظر ومصطفى كاعدين…يلمون بغراض بجنط
منتظر:ولج ديمه سدي الباب…لايجي واحد يشوفنه
ديمة:رجعت سديت الباب ..واني احاجي منتظر..
شكو اشصاير..ليش هيج مفلشين الملابس…
مصطفى:نلوح بيت جدي(بعدة بلاول ابتدائي نص الاحرف يطيرهن)
ديمة:وهي توجه السوال لامها…
صدك راح نرجع لبغداد
سمية:اي يمه بس هسة محد يدري….انتو لاتكولون لواحد …لان اذا هسة درت بيبتج..ماراح اتخليكم وياي…تروحون..
ديمة:وهي الفرحانة من الخبر وأخيرا راح تخلص منهم…ياي صدك خليني اطلع شغلاتي كلهن
سمية:ماما ديمة ماراح اخذ هواي اشياء بس المهمة….
ديمة:اي ماما…وصرت ارتب بملابسي اخذت الاحتاجهن…وشغلاتي شفت صورة بابا….ضليت اباوعلها…خليتها بجنطي همين …بعدين امي حجت
سمية:روحو اطلعو خاف هسة يشكون…بشي
ديمة:طلعنه وكعدنه…ومر اليوم بسلام…
ثاني يوم الصبح كعدنه من وكت واحنا فرحانين لان راح نخلص من السجن لان صدك احسه سجن هذا البيت…والسجان عماتي
امي كعدت
ديمة:صباح الخير ماما وبستها
سمية:صباح النور يروح الماما
مصطفى:وخري اني همين ابوسها
ديمة:ههههه تغار هي تحبني اكثر منك
مصطفى:لا اني تحبني اكثر اني عنون
ديمة:ماما منو تحبيه اكثر
سمية:كلكم احبكم انتو روحي من الدنيا كلها انتو فرحتي…
ديمة:ماما يمته نروح لبغداد
سمية:هسة راح اطلع اكللهم شوفو انتو تبقون بغرفه ما اريدكم اطلعون لو اي شي صار لاتطلعون
ديمة:اي ماما….وطلعت امي واحنا خلينه اذانا ع باب نسمع شيحجون..مو بدينا فضولين
سمية:صباح الخير
ردت بس بلقيس
هلا ام منتظر صباح النور
سمية:عمة اريد اروح لبغداد
الحجية:اي جا ما تروحين منو الازمج
سمية:بس مو بوحدي اريد اخذ الجهال..
الحجية:اتريدين اتروحين روحي بوحدج ما مانعيج بس الجهال يبقون يمنا احنا اهلهم …روحي شكد ما تردين وعساج ما رجعتي
سمية:عمة لو بس افهم اني شمسويتكم اشو من بدايت عرسي واني شفت الضيم واكول ميخالف ما احجي يبقون بيت عمي واحنا اهل…بس ما هسة اتمنوعوني عن جهالي….لا والله هاي ما اقبلها
ثامر:شنو من الصبح هذا الصياح يعني الواحد ماينام بهذا المهيوم اشلون
الحجية:والله هاي شوف مريت اخوك متحزمه من الصبح اتريد تاخذ جهال وتروح
سمية:اي غير عطلة هسة اريد اونسهم اهناك لو حرام
…دخلت نضال
هلا هلا هسة شفت الجنط امحملتهن اهدوم اتريد تاخذهم واتهج…
ثامر:شوفي سمية اتريدن اتروحين روحي محد لازمج بس الجهال يبقون يمنه محد ياخذهم…
سمية:شنو هذا الحجي حرام عليكم اتمنعوني من جهالي الله يقبلها
ثامر:بوية منو المانعج انتي اتريدين اتروحين لاهلج روحي شوفيهم وارجعي…محد منعج
ديمة:واحنا واكفين ونسمع الصياح…صرت ارجف خاف اتروح امي واتخلينه…اني اعرف ماتخلينه..
بس اشلون اذا مايقبلون..معناته نبقى اهنا ونتحمل الذل والاهانة والضرب…
سمية:همه كبار ويفتمهون ومايريدون يبقون اهنا يمكم
ثامر:وبصوت عالي ديمة منتظر تعالو
انتو ماتريدون اتعيشون اهنا…
منتظر:عمي احنا نريد نروح بيت جدي واهناك بيت امي بوحدنه ملينه يومية مشكله
ديمة:عمي واني همين ما اريد ابقى اهنا
ع اقل انروح لبيت جدو اهناك …نشوف حياتنه بعد ابوية سافر وخلانه هنا …وبعد ما يرجع
ثامر:ضل يفكر اذا يروحون همين يرتاح من المشاكل وهمين يقل المصرف البيت لان كله عليه…
ثامر:روحو بس يا سمية اذا صار عليهم شي لاتوراريني وجهج
سمية:اني اكثر وحدة اخاف عليهم خليك مطمئن من هاي الناحية….
ديمة:وخلينه وطلعنه واني اسمع الدعاوي من عماتي وبيبتي…..خطية عمي..حاتم..وصلنه لكراج ودفع التكسي ماكدر يروح ويانه لبغداد….
وهيج راح تبدي صفحة جديدة من حياتي …
واني بسيارة واشوف الطريق واشوف المحافظة العشت بيها ….طفولتي كلها كانت اهنا…
طلعت منها واني مكسورة….لا أب لا عمام زينين
بس حظن الام هو الموجود وهذا الشي بنسبة اليه كافي…خليت راسي ع جتف امي واني اباوعلها
استمد منها القوة…لان لو وحدة بدالها من زمان اتخلت عنه وماسالت بس هي اتمسكت بينه ع اخر دقيقة….
وتستمر الحكاية….
_______________^^^^^^___
