رواية انتقام اشلول كاملة وحصرية بقلم السيد عبدالكريم

الفصل الاول …رواية فتاة أشلول

من أكبر المكاسب اللى كسبتها من سنوات الجامعة هو صديقى شاكر … كان دمه خفيف وابن بلد واجتماعي … ورغم اننا تخرجنا من سنين لكنه لسه بيزورنى فى قريتى …عامة هو ساكن فى قرية قريبة مننا ناحية الجبل … مفيش عيد ييجى الا أما ألاقى شاكر جاى يقضى معايا يوم… ونفضل بقا نتكلم ونهزر ونضحك ونفتكر أيام الجامعة … المرة دى جالى قبل العيد بـ 3 أيام الساعة 9 بالليل …وقالى انه هيسافر القاهرة بكرة الصبح علشان كده جاى يعيد عليا ويشوفنى قبل ما يسافر … وبالصدفة واحنا بنحكى قالى ان القرية بتاعته مقلوبة بسبب اختفاء سيدة اسمها سعاد شوقى … والشرطة حققت مع جوزها لأنه ديما كان على خلاف معاها وكان بيقول انه هيجوز عليها …المهم تكلمنا فى حاجات كتير وقضينا السهرة وعلى الساعة 12 بالليل شاكر مشى … تانى كنت سهران بالليل واسترجعت زيارة شاكر في دماغي …لاحظت ان شاكر كان متغير شوية المرة دى … شاكر اكل معايا سمك وانا عارف ان شاكر مش بيحب السمك ولا بيطيق ريحته … كمان هو اول مرة ييجى يزورنى بالليل … لان الطريق بين قريتى وقريته تعتبر مهجورة وكلها ارض زراعية ومحدش بيمشى فيها بالليل …المهم قلت لنفسى جايز هو اكل سمك علشان معملش له اكل مخصوص …وجايز جه بالليل لانه بيستعد للسفر ومعندوش وقت …المهم جه العيد ونسيت الموضوع …وتالت يوم العيد اخدت فراخ ولحمة وفواكه ورحت ازور اختى المجوزة …هى مجوزة فى قرية بعيد عننا بحوالى 20 كيلو … وقعدت عندها لحد الضهر … وقبل ما امشى جوزها جه وحلف لأقعد معاهم اتغدى …وعيال اختى مسكوا فيا واضطريت اقعد … والغدا جاب عشا والوقت اتأخر …انا كنت عاوز اروح بدرى علشان الطريق كلها مقطوعة …وانا من النوع اللى بترعب من الطرق المقطوعة …ومشيت من عندهم على الساعة 10 بالليل … ركبت الموتوسكيل بتاعى وتوكلت على الله … وعديت أول قرية بين الزروع والغيطان وانا مولع النور العالى بسبب الضلمة اللى فى كل مكان … وبعدين الموتوسكيل وقف فجأة …طيب ده وقته ؟ نزلت اشوف فيه ايه …وحاولت اشغل الموتوسيكل لكن مفيش فايدة … عدت ربع ساعة والموتوسيكل مش عايز ينطق … بصيت حواليا واكتشفت انى فى مكان مقطوع كله ضلمة وسكوت ..لا فيه بيت قريب ولا حد معدى ولا اى حاجة … فضلت اجر في الموتوسيكل لمدة نص ساعة …. وبعدين قلت أجرب أحول البنزين على الاحتياطى وفعلا الموتوسيكل اشتغل …طيب ازاى مجتش على بالى الفكرة دى ؟ لانى كنت خايف ومرعوب …ركبت الموتوسكيل وانا بحمد ربنا …وبعد شوية شفت عربية مركونة شكلها مخيف اوى … وشفت واحد بينزل من العربية وبيبص حواليه … انا كنت بعيد عنه بس شايفه … الغريب ان الراجل طلع من العربية شوال مربوط …انا طفيت نور الموتوسيكل بسرعة علشان كنت خلاص قربت منه …وطفيت الموتوسيكل وانا بترعب …انا كنت خايف يشوفنى …ومش عارف ده اصلا انسان ولا عفريت …الراجل ركب العربية تانى ومشى … شغلت الموتوسكيل ومشيت وانا اقرأ قران لحد الحمد لله ما وصلت البيت … غيرت هدومى ..وبدأت افكر فى اللى شفته …بس حسيت ان اللى شفته ده مجرد تهيؤات … وقبل ما نام لقيت اختى وجوزها بيتصلوا بيا بيطمنوا انى وصلت ولا لسه … طمنتهم ونمت …وصحيت الساعة 2 بالليل على صوت جرس التليفون … كان رقم غريب … ولما فتحت وقلت الو …سمعت صوت واحدة بتقولى (عند العربية ) …. قلتلها النمرة غلط وقفلت السكة …بس رجعت أركز فى الجملة اللى قالتها …(عند العربية ) ؟

معناها ايه ؟… اترعبت لما افتكرت العربية اللى شفتها فى الغيطان … حاولت انام لكن خلاص النوم طار من عينى ..مسكت التليفون واتصلت على الرقم ..لقيت اللى رد عليا جوز اختى اللى كنت عندهم ..اعتذرت ليه انى رنيت عليه بالغلط لان الساعة كان 2 ونص … وفضلت ادور على الرقم اللى اتصل بيا لقيته اختفى ..اخر المكالمات عندى كلها اسماء ناس اعرفها …مفيش ولا رقم غريب موجود فى سجل المكالمات المستلمة خالص …بسم الله الرحمن الرحيم …هو انا اجننت ولا ايه ؟

فضلت صاحى لحد ما صليت الفجر ونمت ..وعدى اليوم عادى ونسيت كل اللى حصل …بس تانى يوم بالليل رن عليا رقم غريب …مسكت التليفون وانا ايدى بتترعش وقلت الو …سمعت نفس الصوت بيقول ..(عند العربية ) …. قلت وانا صوتى مبحوح من الخوف :

ـ انتى مين ؟

قالت : انا سعاد شوقي .

===============================

يتبع .