رواية امرأة في الاربعين الفصل السابع 7 بقلم نورا الرماحي

طبعا ظليت بنص هدومي وكمت اتلعثم من نظرات اهلي الية خاصةماما هي لحظات جانت لكن بالنسبة الي ولنظرات اهلي عبالك قرن لحد مانطقت ماجدة وانقذتنى

من كالت… اي ياسين تشكي من الرياضيات مثل ماكتلك عقدتها الرياضيات….

وبيبي هم فدوة من رحت لعيونها هم حجت وكالت… اي يمة ياسين يصيرلك قصربالجنة اذا ادرس اخيتك هيام الرياضيات تريد تخلص من السادس هلسنة لان اخوانها مثل ماتشوف ماعدهم مجال يدرسوها وهي تحجي وتباوع بعين لامي عود تتقصدلها الكلام حتى لاتمنعنى انو ياسين يدرسنى وعين على ساهر لان تعرف عصب من سالفةمثنى علية …

واني ساكتة طبعا جنت وفاكة حلكى على كلام بيبي وماجدة وفريق الانقاذ الي سووه الي من نظرة ساهروماما…

حتى نطق ياسين وكال… اي تدلل هي مثل خواتي وماكو فرق.. وباوعلي وكمل كلامه وكال جيبي كتابج وتعاي افهمج…

باوعت لبابا حتى اشوف شيكول.. عرف بابا بنظراتى اله شريد… رأسا ابتسملي وكال… كومي بابا جيبي كتبج وخلي يراجعلج ياسين… فتحت عيوني على بابا بفرح وشفت اخواني نظراتهم صارت عادية ورجعوا يحجون وية ياسين بسوالفهم الشبابية ويضحكون واثناء مااروح اصعدلغرفتى اندك جرس الباب رحت فتحت الباب والكى بيت اختى ام وليد كعادتهم كل خميس ورة العشا يجونا وكمت ابوسها وابوس جهالها ورة مادخلوا للهول واتفاجؤا بياسين وسلموا عليه كعدوا اجت ماجدة وسحبتنى للمطبخ وكالت فرصتج يالذيبة روحي جيبي كتبج ويلة كعدى يم ياسين وادرسي .

كتلها والجوكة الي اجو شلون

كالت.. بالعكس احسن جوكة حتى تنفردين بيه بالصالة وهم مقابيل الهول تكعدون والكل يشوفوكم ومحد يحجي بنفس الوقت واني اجيبلكم چاي وحب اهناك خلي نشوف ورة نظرات ياسين شكو حيل كاتلني الفضول

كتلها …اهااا علمود فضولج اني بعدين اكلها من ماما شفتيها شلون جانت تباوعلي اكيد ضمتها الي واطلعه بعدين بية..

ماجدة… عادي اتعودنا المهم انتي اكعدي وكابلي يسو هسة والله كريم بعدين..

كتلها… واجمالة ادلعين باسمه لا انتى حالتج ميؤسة فدمرة

ماجدة… دروحي روحي بدت تغار عليه من هسة لعد لوكلج معجب بيج شتسوين

كتلها… سويته معجب وهسة الولد يطلع حاسبني اخته وانتى منا ادلعيه الي

ماجدة وهي تدفعني للدرج دروحي يابة شكد تحجين الولد ينتظرج..

كتلها…اي لا ادفعين طالعة اجيب.

صعدت حطيت عطر ليزر (تتذكرونه بنات ) وعدلت شعري للمرة الثانية ونزلت وكتبي بيدى رحت بطريقي للهول واسمع ضحكاتهم وسوالفهم وية ابو وليد من دخلت لكيت ماما لابسة عبايتها هي واختى ام وليد متحظرات يروحن يزورن مريض من كرايب امي وبابا وابو وليد وياهم بسيارته ياخذهم ابو وليد ويخلون جهالهم يمنا فرحت بكلبي وكلت فكة اي

من طلعوا من الباب وراهم طلعوا اخواني وياسين للباب ورة ١٠دقائق دخلوا بس ماهر وياسين..

عاد ياسين بس شافني كال.. وين رحتى يلة انطينى كتابج خلي ادرسج..

عاد ماجدة نطت من مكانها وكالت.. روحوا هيومة كعدوا بالصالة حتى من صوت التلفزيون ومن صوت الجهال تبتعدون وتفهمين كلام ياسين..

وبيبي هم أيدت كلام ماجدة..

كتله تعال اهنا واني ادليه على مكان كعدتنا بالصالة مقابيل الباب مال الهول حتى يشوفونا ونشوفهم..

كعدنا وبلشنا وكمت افتحله بالكتاب المواضيع الي مافاهمتها..

هو حجي وكال… شلونج هيام

كتله… بخير وانت؟

ياسين.. زين وبخير شلون مااصير زين واني اليوم شفت ملاك على الارض…

كتله… منو الملاك؟

كال…. انتي اكو غيرج ملاك

ضحكت بسكتة واني حاطة ايدي على حلكى كتله بهمس… على كيفك لااصدك بروحي

كال… صدكي بعيني ملاك ومدى اشوف غيرج

خجلني بكلامه وسكتت وانطيته الكتاب وكتله… عفية هذا الدرس مدى افهمه وصعب واريد اعرف صيغةالاسئلة شلون تجي بهل موضوع ممكن تفهمني.

طبعا اكلمه واني مدنكة مدى اكدر اباوعله…

بس احس هو عينه علية ويفحصني بنظراته وساكت ولا عبالك انى احاجيه

كتله…ليش تباوعلي عفية دا تخجلني هيج اكوم اروح احسن

ردعلية وكال… اكو واحديشوف ملاك ومايباوع.

كتله… بلا مجاملة ارجوك ياسين احجي اريد الصدك ليش تباوعلي دوم بهل نظرات

كال… شحجى مثلا؟!!!

كتله.. شمدريني انت تعرف ليش تباوع علية اكيداكو سبب.. غيرك هم يباوعولي بس مو مثل نظرتك تختلف.

كال… اي اني معجب بيج هواي

كتله… اهاا اعجاب يعني!!

كال… اي لعدشعبالج..

كتله هيج ماكو شي..

كال… لا اكو شي اريد اكوله اني اريد اخطبج

اني بس سمعت كلامه دخت

من خجلي منه رجعت التفتت لماجدة وبيبي وماهر والجهال الي كاعدين بالهول ويتابعون تيفي بدون مايباوعون النا…

سمعته يكولي… هاااا اشو سكتى؟؟؟ شنو رائج جاوبينى… تقبلين بية؟؟؟

انداريت اله وعيني اجت بعيونه ونفسي ضعف.. كوة طلعت حجايه مني وكتله.. عفية ياسين خلي اكمل سادس وبعدين نحجي بهل سوالف.

كال …اني بس اريد اخطبج واحجزج الية وكملي براحتج وبس اتزوجج اخليج تكملين كلية وانتي يمي شتكولين.؟؟

كتله… ياسين عفية مو وكته هذا الموض….

قطع كلامي هو و كال…بس سؤال اسألج جاوبي بنعم او لا فقط انتي موافقةعلية؟؟؟!

كتله… ماكدر اجاوبك هسةبالي مشغول بالدراسة.

رجع عاد… سؤال مرة ثانية..

انتى موافقة علية

كتله… هسة اجي لحظة..

رحت صعدت جبت الورقةالي لكيته بجيبه وانطيته اله فتحها وكام يبتسم كال… هاي الج شمسي

استغربت من كال شمسي كتله اني وأشر باصبعي لنفسي.

كال… اي انتى شمسي من يوم شفتج بعرس مثنى وانتى تريدين تصعدين للسيارة جانت الشمس تضرب على وجهج ووجهج يشع نور مثل الشمس من يشع علينا وصرتى شمس حياتى

خجلت بالزايد منه ومن نظرة عيونه سديت الكتاب وردت اكوم منه واروح قبل لااتحرك لزمني من ايدي

وكال..جاوبيني على سؤالي… نزلت عيونى على ايده الي جانت لازمة ايدي فهم معنى نظرتى لايده شال ايده عن ايدي

وكال… العفوا ماجان قصدي بس ردت مااخليج تروحين قبل لاتجاوبيني..

وهسة يلة انسي وخلي افهمج الموضوع..

وفعلا كام يشرحلي وخلانى افهم الموضوع زين وساعدنى هم بالانكليزي اندمجت لشرحه لحدمارجعوا اهلي احنا مخلصين تقريبا عاد شفته تعب كتله كافي تعبتك خليه لغيرمرة من تجينا نكمل وفعلا وكفت على حيلي وكتله شكرا تعبتك وياي

كال… وهو يبتسملي تعبج راحة عاد دخل ماهر للصالة وكلي.. يلة هيام كافي استغليتى الولد وهو تعبان

كتله… خلصنا يلة كعدوا اروح اجيبلكم سمسمية سويتها الكم…

ورحت جبتلهم وحطيت للكل هم وراها راحوا بيت اختى وباباوماما راحو لغرفتهم وبيبي هم ظلينا اني وماجدة واخواني كاعدين لحد مانعسنا وصعدنا فرشنا لياسين بغرفة الولد ورحنا لغرفتنا احنا هم.

حجيت لماجدة كل كلامنا.. من صعدنا لغرفتنا

كالت… الله الله موكتلج عينه منج وهلا بالنسيب شوفي لج لاتصيرين مثلنا وافقي عليه وخلي يحجزج

كتله.. اي بس خلي اخلص السادس والله كريم… يلة تصبحي ع خير نعست

ثاني يوم جمعة.. كعدنا حظرنا ريوك وكعدوا الكل وصبينا الريوك وكملنا..

كعدت ماما تسوي كليجة من طحين الحصة بالتمر والسمسم لماهر حتى ياخذه وياه للكلية وكثرته علمود يكفي لياسين هم

وحظرنا خبز هم ماعدا الغدة الي جان تمن احمر وسمج مسكوف جانت ماما تسكفه بالبيت كلش نادرة ومعدلة جانت كلشي تعرف تسوي بالبيت ونفسها جدا طيب جان بالاكل واحنا اخذنا منها النفس الطيب بالطبخ وبالنظافةوالندارة…

طبعا طول النهار بذاك اليوم جنت اتجنب شوفة ياسين.. ورة ما كملنا الغدة ماجدة ظلت تلح على ماهر نطلع للسوك عاد ياسين سمعها وقنع ماهر واستاءذن ماهر من بابا وماما حتى يطلعنا وياهم للسوك الغريب ماما وافقت بدون اي اعتراض استغربت اني

وماجدة كالت يلة تعاي نتحظر صعدت وياها ورحنا نتحظر لبست تنورة سودة طويلة وعريضة وعليها بلوزة شتوية ثخينةحمرة من كدام مطرز عليه نمربالبللك وماجدةهم لبست كوستم اسود صوف ووياه بلوزة وردية سادة وحجاب وردي فاتح ونزلنا شفنا الشباب

ينتظرونا كال. ماهر كملتوا يلة نروح عاد طلعنا رحنا للكرادة بتكسي وكمنا نفتر ونباوع على الملابس وماجدة اشترت الها جم حاجة محتاجتهم وماهر هم ياسين هم اخذله شغلات مرينا من يم محل اكسسوارات وساعات فضية حلوة عجبني كلادة بحرفي بس سالته الولد بيش كلي سعر جان بوكته غالي بالنسبة الي مااخذته رجعته.

وصلنا يم مطعم للحم بعجين ماهر كال تعالوا ناكل..

دخلنا كعدنا بجناح العوائل…

استاءذن منا ياسين وكال… هسة اجي انتظروني وراح طلع كعدنا احنا اني وماجدةوماهر ننتظره وهم طلبنا لحم بعجين ورة دقائق اجي باسين وكعد مقابيلي وماهر جان مقابيل ماجدة وجابولنا اللحم بعجين كعدنا ناكل واحنا ناكل حسيت شي من جوة داس على رجلي باوعت لجوة شفت رجل ياسين الي ادوس على رجلي واستحي اشيل راسي اباوعله ولاعرفت شيقصد من تصرفه هذا ورجعت اكل ومااهتميت

رجع هو كام يحمحم حتى اشيل راسي اباوعله شاف ماكو فائدة كام يكح هم مااهتميت

وماهر مخبوص بيه ويكوله شبيك شلقصة هاك اشرب مي….

واني ولايمه ولاشلت عين بعينه..

تالي رجع داس على رجلي اقوي وبطريقة لا ارادية كلت آه

الكل التفت علية ماهر كال.. شبيج..

كتله اصبع رجلي الجبير يوجعني لان الحذاء تكرمون ظاب عليه.. (شكول طلعتلي عذر)

ماهر كال تحملي هسة نرجع للبيت

اما ياسين باوعلي بعيونه بنوع من الاعتذار بالعيون وشوفني علبة زغيرة بيده يريد ينطيني اياه كل هذا علمود علبة زغيرة.

ورة ماكملنا رحنا نغسل ايدنا حجيت بهمس لماجدة الي صار… كالت… هسة الهي ماهر عنكم وانتي احجي وياه…

وفعلا بس طلعنا ماجدة ظلت تلح على ماهر تريد تاخذ بوسترات للفنانين من المكتبة وجانت تحب اصالة نصري وراحوا دخلوا اثنينهم للمكتبة واحنا وكفنا برة اني وياسين ننتظرهم ونتفرج من برة على الصور…

اقترب مني ياسين وكال… هيومة تقبلي مني هاي الهدية البسيطة…

كتله… علمود هدية مردت اصابع رجلي ههههه

كام يضحك

وكال… ههههه غير انتى اريد اجذب انتباهج وانطيج اياه من جوة الميز بدون مايشوفنا ماهر وانت قفلتى ماتشيلين راسج حتى أشرلج على جوة الميز.

كمت اضحك وكتله…. ههههه اذا كل واحد مثلك وبهل طريقة يجذب الانتباه للهدايا بعدمحد ياخذ هدايا لاحد

كمنا نضحك سوة و اتشكرت منه حيل

وبهل لحظة طلعوا ماجدةوماهر كالوا على شنوتضحكون ضحكونا وياكم

كال ياسين… ضحكنا على واحد يضرب واحد جلاق علمود يقبل هديته..

ماهر كام يضحك كال… لعد شنو من هدية جلاقية هاي

وكمنا نضحك كلنا…

ولزمنا تكسي ورجعنا للبيت.

بس دخلنا لغرفتنا كبل طلعت الهدية من الجنطة و فتحتها لكيت الكلادة الفضية الي بحرفي H الي عجبتنى ومااخذتها هوماخذها الي لبستها وماجدة تضحك تكلي بعدشتريدين خطبج وجابلج النيشان كلادة

كتلها واحلى كلادة واتمددت بملابسي على الجرباية وكل لحظةوالثانية الزمها بيدي واتنهد واظمها على گلبي كلش فرحت بيها مااعرف ليش لان عجبتنى وماكدرت اخذها او لان من ياسين الي كلش ارتاح من اكون وياه…

غمصت عيوني وكمت اذكر كل الي صارمن كلام بينا بارحة بليل من جان يدرسنى..

لحدماسمعت صوت ماما تنادينا من جوة.. كمت بدلت ع سريع ونزلت وماجدة نزلت وراي لكيت الولد كاعدين كلهم كمنا نحظرللعشا كلي باذنجان وبتيتة وطماطة ملجوعة ومخلمة بيض وخضرة وطرشي الي جان بيتنا مايخلى منه دوم تسوي ماما بالبستوكات الفخاريةوسوينا چاي وصبينا العشاء…

اني وماجدة مااتعشينا لان اكلنا بالسوك…

وبيبي جانت تتعشي بس لبن وشوية خبز وتاخذ علاج المفاصل وماتاكل شي وراها.

رحت كعدت يم بيبي علما يتعشون الجماعة وكامت تحجيلي بيبي عن ماما وبابا مقررين يخطبون خوات ياسين لباهروساهر اليوم العصرحاجين بالموضوع من جنا احنا بالسوك

وكالت.. راح يروحون اهلي لكركوك الاسبوع الي ورة الجاي حتى يخطبون الهم…

كتلها… بيبي والله عرفت اخوانى عيونهم من البنات من اجونا وهن حلوات مشاءالله الله يتممه عليهم بالخير وتصير القسمة.

كالت بيبي… ان شاءالله

كتلها بيبي انتى ماترحين وياهم كالت ….لايابنتى مابيةحيل ابوج وامج واخوانج كافي يجوز انتي ياخذوج وياهم كتلها صدك تحجين بيبي كالت امج كالت احتمال ناخذ هيام ويانا وام وليد تجي للبيت اهنا حتى تبقي بالنهاروياي وانتى ترحين وياهم الخميس الي ورة الجاى..

فرحت لان اول مرة اسافر بحياتى…

دخلت ماجدةعلينا اني وبيبي وكالت ها مجتمعين شكوشتخططون من وراية…

كالت بيبي… تعاي وسمعي…

كامت تهلهل بسكتة

وكالت اخيرااا راح نچنن وتجينا چنات ونخلص احنا من انظباط ماما وتوكع بيها الچناين

كتلها صدكيني ماما راح تحصرنا احنا بالزايد وراح تشوفين.

كالت ماجدة… فالج ماقبلناه اشكد متشائمة بابا تفألوا بالخير تجدوه

كتلها نشوف اممم

واحنا نسولف يم بيبي اجتنا ماما كالت يلة تعالن لمن السفرة و اضربن اوتي لملابس اخوج وياسين الفجر يطلعون لديالى للكلية رحنا لمينا السفرة وغسلنا مواعين…

ورحنا نضرب اوتى ونصفط وحظرنا جنطة ماهر وصفطت ملابس ياسين على صفحة صعدلنا ماهر كال… ها حبيبات خلصتن ؟؟؟

كتله اي بس خلى يصعدياسين يحط غراضه بالجنطة حتى تحافظ على تصفيطها او خلي ينطينى اني اصفطله طلع ماهر صاح ياسين صعد واجي كله ماهر تعال شوف البنات يردن يصفطن هدومك بالجنطة..

كال… لا ماريد اسوي زحمة عليهن

جاوبته وكتله… لا رحمة انطيني جنطتك خلي اصفطه الك

اتشكر مني وانطاني جنطته حظرته اله وحطيت هدومه وغراضه وراه نزلنا جوة جانت الساعةبعدها ب٩ بليل وليل الشتا يصير طويل..

جانوا ماما وبابا كاعدين بعدهم وبيبي نامت واخواني بعدهم..

ماما وجهت كلامها لياسين وكالتله… يمة ياسين سلملنا على اهلك من تروح لكركوك وكللهم احنا راح نجيكم نزوركم مو هذا الخميس الجاي لا الي وراه زين يمة

رد ياسين على ماما وكال… راح تنورون كركوك بجيتكم كل الهلا بيكم

كالت ماما… الله يخليك ابني ويحفظك والنعم منك ومن اهلك بيتكم العامر ابني.

كال ياسين… الله يحفظج خالة انتى وعمي تسلمين.

وكعدوا يسولفون بالاوضاع والاهل لحد مانعسوا ماما وبابا وراحوا لغرفهم واني وماجدة هم نعسنا كمنا ودعنا ياسين وماهر لان بالفجر ماراح نشوفهم لان نايمات

كتله لياسين مع السلامة وسلملنا على اهلك واشكرك هواية على شرح البارحة وماقصرت.

كال… واجبي ماسويت شي

وماجدة سلمت عليه وكالتله…كرر زياراتك النا نفرح بيك والله ياسين

كال… ان شاءالله بعدمانكطع منكم وهويباوعلي ويحجي ويةماجدة.

وراه صعدنا لغرفتنا وهو عينه وراية وشكله ضائج.

كعدت الصبح ورة مانمت نومة كلش مريحة لكيت الساعة ب٨ وماجدةماكو رايحةللدوام واخواني هم وياسين هم رايح ضجت مااعرف ليش…

.

.

.

يتبع

.