رواية امرأة في الاربعين الفصل الثاني 2 بقلم نورا الرماحي

أحيانا نعيش في ضبابية الطفولة…

ونتأثر ببيئات قديمة عشناها…

فنصنع عالماً خاصاً بنا…ونهمل الواقع….

نهمل حقيقة

نحن فيها….لذا…علينا ان نتشجّع لنكبر و نغادر

عالم الضباب

و نعيش الواقع الذي نحن فيه…..

.

.

صباح الخير احلى متابعين

.

.

خلي احجيلكم عن اهلنا… خوال ماعدنا لان امي جانت وحيدة اهلها.

عندي عمام ٢كلش علاقتنا بيهم قوية اصغر من بابا اثنينهم وعمات ماجان عدنا…

طبعا كل اسبوع الجمعة يلتمون يمنا ببيتنا حتى يشوفون حبوبتي وتصير لمة حلوة من بنات وولدالعم..

عندي عمي ابو مثنى مقاول بناء حالته زينة كلش…جان عنده ولد ٣وبنات ٢…الي ابنه مثنى

جان من مواليد١٩٧٣ طالب كلية هندسة معمارية وعلاقتى جانت به قوية وصداقة ودوم جان يشجعنى بالدراسة طبعا ضاج واتاثر من تركت الدراسة وكام يحاول يقنعنى ادرس وامتحن خارجي ومن انجح ادوام كليةاومعهد.. وبنفس الوقت بالبيت واساعد ماما… اقتنعت بكلامه..

وكتله بس اهلي شلون كال ماعليج هسة اني اكلمهم وطبعا اخوية ماهر جان كاعد ويانا وسمعه .

وبنت عمي اخت مثنى هم كاعدة اسمها ابتهال مواليد١٩٧٨ تشبه رغدة السورية وجانت نظراتها وية ماهراخوية احسها اعجاب وهو هم جان دوم يدفعني اجيبها واكعدهايمنا حتى يحاجيها الذيب يعرف يصيد جانت جدا جميلة …

وماهر اخوية جان يشبه ممثل عراقي اسمه فائزطه سالم وهو منا راح يصير ضابط جانن البنات بالمنطقة معجبات بيه ويومية

وحدة من الجيران تزور امي واظل تمدح ببناتها عود لولدنا بلكي نختار منهن لكن الحب كان اله رائ لان اخواني كل واحدمنهم جان عائش قصة حب مختلفة.

نرجع لسالفتي.. راح مثنى وكلم بابا واجى ماهر هم قنع ماما وياه لان ماما تخبلت من سمعت دراسة به لكن من عرفت ماراح اداوم وبالبيت اكعد ادرس بس وكت امتحان اروح امتحن وافقت بس طبعا شوفتنى الويل بذيج الايام المهم..

تكفل مثنى يساعدني بالدراسة طبعا رحت قدمت خارجي سادس وفعلا ظليت كوة ادرس وية شغل ماما وخطارها الي مايخلص ومثنى جان يجى هم يدرسنى من احتاجه.

نجحت من السادس بالشافعات بمعدل معجبني وقررت اعيد الامتحان لسنة الجايه طبعا اتحدى وحدة مثلي وبعمري تشيل بيت مساحته ٣٠٠مترعلى راسها وحدها ووية ام مثل امي الي جانت وسواسية مال نظافة حمدلله كدرت اعديها..

خلي احجيلكم عن بيتنا..

طبعا بيتنا اصلا ماجان يتوسخ قبل من جنت زغيرة

واختى ام وليد جانت ساكنة ويانا جان شوية يتخربط من ورانا اني وليدوعمار بس من طلعوا وسكنوا بعيد بغير منطقة عنا بيتنا صار ماكو ارتب منه لان ماكو جهال تخربط..

كلشي يبقي بمكانه ومانفوت للبيت بالمداس او الاحذية..

كلش مرتبين ومنظمين كلنا اثاثنا على السبعينات الصالة به تخم قنفات قديفة اصفر وسمائي وجهه والبوفية والطبلات خشب صاج اصلي يلمع والسجادة كاشان ايراني.

والهول به تخم قنفات بسيطة زركة مغطيها بجراجف مشجرة وتلفزيون مغطى ومحطوط على ميز زجاجى رجليناته استيل ورفوفه زجاج قوي اكيد جنتوا شايفين منه.

البردات جانت موجودة بكل بيت عراقي لونها يصير بيج به وردة زنبقة جبيرة على طوله.

والزولية هم كاشان طبعا هاى بالشتا الزوالي .

وغرفة ماما وبابا جانت خشب معاكس اسود يجنن عبالك توه ماخذيه هلكد ما ماما جانت محافظة عليه.

وغرفة الولد جانت كلمن اله جرباية حديد بي اعمدة ووجوه مخادات مكتوب عليها احلام سعيدة وجراجف اسرتهم نفس اللون سادة ازرك لونه وبرده نفسها مال الزنبقة لكل البيت سيت كامل . وكنتور ابو خمس بيبان ومراية طويلة وميز جبير لدراستهم وكراسي.

اما احنا البنات هم نفس غرفة الولد بس بلمسات انثوية .

غرفة حبوبة جوة يم غرفة ماما وبابا جان بيها بوفية او نضيدة حاطين عليها فراشات زايدة من دواشيك ومخدات وبطانيات مصفطين ومتغطين بتول للخطار.

وكنتور ابو بابين وجرباية حديد وزولية كاشان تلمع لمع وكرويته وحدة من كرويتات ام الخشب الي جانت تنحط بالگهاوي

المطبخ جان به كاونتر خشب صاج وطباخ عشتار بس جيل الطيبين يعرفوه وميز طويل مال ٨نفرات وكراسي ام الطبك الى تنطوي وسنك مواعين ومجمدة وثلاجة بابل اكبار.

الحديقة جانت ١٠٠متر ٥٠كدام و٥٠ورة البيت جنا ننشر هدومنا به بدل السطح ومرجوحة بيها والامامية كراسي وميز صغير لكعدات اخواني واصدقائهم من يجونا.

هذا جان بيتنا.

………..

بيوم نجاحي راح مثنى جابلي النتيجة واجى بشرني. جنت كاعدة اطبخ الغدة وية ماما وحبوبة كاعدة تلكط خضرة وهو اجى وبشرنا وجايب بيده قوطية جكليت وكام يطشرها علية وحبوبة تهلهل واني اكمز وفرحانة من كمزتى ردت اوكع رجلي طخت بالكرسي لزمنى مثنى وسندنى بيده من زندي وعيونى وعيونه التقت بنظرة مافهمت معناها بيومها

وماما طبعا خازرتنى و رزلتنى وكالت وثول شوفي كدامج جنج زرافة اشوية استحي من طولج واتفشلت كدام مثنى وحبوبة تركت المطبخ وطلعت فوك لغرفتنا وظليت ابجي كدرت تكلب سعادتى حزن وتكسر بخاطري بدل ماتبوسنى وتحظنى وتباركلي .

ورة نص ساعة صاحتنى انزل اصب غدةوياها ولكيت مثنى باقي الظاهر هي وحبوبة مامخليته يروح ويظل على الغدة اجوي اخواني وكعدوا يتغدون لان جانت عطلة الصيفية فجانوا يطلعون بالنهار لسوك لو لجماعتهم لو لمواعيد الحبيبات

كعدنا نتغدى كلنا بس اني فشلانة من مثنى كوة اكلت لكمتين وكمت للمطبخ اسوى جاي اجت حبوبة حظنتنى من ورة انداريت حظنتها كمت ابجي كالت مسحى دموعج لاتبجين كتلها حبوبة فشلتنى وعيرتنى بطولي قابل اني خالقةنفسي توبة استغفرالله كالت حبوبة ميخالف يمة هي امج واكيد ماجانت تقصد تجرحج وتفشلج كتلها بلي تتقصد كالت حبوبة مهما تكون هي امج واني رزلتها ورة ماصعدتى انتى يلة يمة لاتنسين اليوم فرحة نجاحج وماشفنا منج شي حلو نريد كيك وعصير راح اعزم عمامج بليل على حفلة زغيرة الج فتحت عيونى وحظنت حبوبة وبوستها وكمت اضحك ورحت طلعت بيض حتى ابدئ اسوى كيك.

طبعا حنان الام جنا دوم نستمده من حبوبة مو من ماما هى جانت الصدر الحنون الي يستوعبنا كلنا جانت الها معزةومحبة كبيرة بگلوبنا ازغار وكبار ولحد اليوم كلما اذكرها ابجي واقرالها الفاتحة .

ل٢البيت صار هدوء ماما راحت لغرفتها تتمدد وحبوبة هم راحت لغرفتها تتمدد. خلصت الكيكة واستوت واني اطلعها من الفرن دخل بابا حبيبي وماجدة للبيت رجعوا من الدوام كعدت صبيتلهم الغدة على ماغسلوا واتغدوا وراح بابا للولد بالهول وكعد وياهم طبعا نسيت اخبر بابا على نجاحي فجاءة سمعته يصيحنى رحتله وشفته وكف وحظنى وباسنى من راسي وكام يباركلي على النجاح وكال ليش ماكتيلي كتله بابا التهيت والله

رجع حظنى وكال راح نحتفل بيج بليل مثنى كال البيبسي علية اجيب صندوك وبابا كال واني راح اوصي على لحم بعجين وحلويات للعصر اروح اجيبهم واخواني كالوا احنا علينا نرتب الحديقة ونجيب جرزات ومثلجات لان صيف وحار ونفاخات للتزين فرحت بيهم كلهم والضحكة ترست وجهي.

وللعصر الكل جابوا الغراض واني سويت بعدكيكة وزينتهم بالكريمة

ورحت ارتب نفسي.. وساعدتنى ماجدة ولفتلي شعري جانت هي شاطرة بسوالف المكياج والشعر لكونها موظفة بس خطية جانت ماتحط لان بوكتنا جان البنت لاتحف ولاتحط مكياج نادرا ماتلكي بنت مامزوجة تحط مكياج

والي تحط يصير عليها نظرة موزينة لذلك جنا مانحط مكياج الا بالبيت بمناسباتنا وشي خفيف بس كحلة وحمرة خفيفة شفافة.

فحطتلي كحلة مكة وحمرة شفافة وبشرتى جانت صافيةمابيها اي حباية مثل المراية وشعري فتحته من الرولات لكيته ملفلف بشكل كلش حلو بيه كسرة صاير وهومدرج كصته على طوله الي يوصل لنص ظهري ولبست فستان برنسيسة احمر به نقط بيضة جان موديلهن بوكتنا اوووويلي طلعت اجنن بيومها وماجدة هم نفس تصميمي البرنسيسة لبست بس نيلي به نقط صفر وكحلة وحمرة شفافة نزلنا للحديقة وكمنا نرتب واجوا بيت عمامي طبعا ماجان عدنا خوال لان امي جانت وحيدةاهلها لذلك علاقتنا بعمامي جانت قوية بس مرت عمي ام مثنى جانت لئيمة ومرت عمي ابوعدنان جانت حبابة وجهالها ازغر مني بسنين.

فصارت لمة حلوة وركصنا بيها دبكة الجوبي وراها ردح كلنا احنا ولدوبنات واختى ام وليد هي وجهالها وجابتلي بيومها هدية كوستم راقي جدا كلش حلو وبيومها حيل تؤنست لحد الان اذكر ذيج الايام واتحسر.

وراه باسبوع الخميس اجى مثنى عدنا جان متفق وية ماهر يطلعون للزوراء واني بس سمعت بيها زوراء تخبلت جلبت بيهم وكمت اتؤسل يطلعوني مثنى قبل بس ماهر عقجلي حواجبه واشرلي اسكت مثنى شافه وعرف مايقبل عاد كال لماهر اكولك ترى طلعة الزوراء مومال نفرين الاحلى طلعة عوائل ماهر كله يعني شنو قصدك؟ كال مثنى ناخذ خواتنا ونروح طلعة شبابية كلنا شتكول طبعا ماهر علمود سمع بيها خوات عرف ابتهال معناها تجى گبل قبل واتفقوا على باجر الجمعة ياخذونا

ثاني يوم الجمعة كالعادة اللمة عدنا اتغدينا وكملنا اتحظرنا انى وماجدة وابتهال ونهي للطلعة وية ماهرومثنى واخوه الزغير مظفر واجي وليد ابن اختى هم ويانا ورحنا صعدنا باص للزوراء والسعادة مالية وجوهنا احنا البنات لان محد يطلعنا دائما الا نادرا.

وصلنا للزوراء وكمنا نفتر رحنا لحديقة الحيوانات وراها للالعاب كلمن يحب شكل لعبة اني ردت ديلاب الهوى ومحد يريديصعد وياي من البنات وطبعا الشباب مظفر ووليدراحوا للزوارق وظل مثنى وماهر ويانا ماجدة ونهى وابتهال كعدن فرشن فراش لان جنا ماخذين ويانا اكل وماي وحبشكلات ومن سمع ماهر بية اريداصعد ديلاب الهوى منعنى عاد كمت ابرطم وادردم طبعا منعنى لورايدة ابتهال تصعدجان صعدهابس اني لا. عاد مثنى شافنى ضجت كال كومي نصعد اني ووياج فرحت

وماهر كيف حتى يكعد يكابل السنيورة. رحنا اني ومثنى جان اكو سرة طويل للعبة وكفنا حتى نكص بطاقة

هو شاف شباب وبنات بنفس الطابور وكف وراية حتى يضمن محد يتحارش بية

وصلنا ومشى السرة صعدنا كعدنا واحد مقابيل الثاني من تحرك وكام يصعد كمت اسد عيونى ومثنى يضحك يكولي لج فتحى عيونج وباوعي لعدالمن صعدتى كمت افتح عيوني شوية شوية ومن وصلنا للقمة لا اراديا لزمت ايد مثنى

وكمت اضغط عليه وهو يعيط ويضحك ويخوفنى والديلاب يفتر بينا بعدين انتبهت على نفسي من شفته صافن علية ويباوعلي كمت اضحك كتله شبيك؟!

كال تدرين هيام احب تصرفاتج وضحكج لان كلها على طبيعتج وارتاح من اشوفج هيج على طبيعتج وماعدج اي تكلفة.

لدرجة ماريد اعوفج وتغيبين عن عيني مشاعرج نظيفة ماعدج تجربة باي شيء وكلشي بيج حلو طولج رشاقتج شعرج وجهج كلشي كلشي .. رغم طولج احسج قصيرة يمي . كتله لانك طويل وضخم افندي وتحس بية قصيرة كال لا انوثتج تخليج قصيرة يمي وفجاءة سحب ايدي و لزمها ونزل راسه لكف ايدي وباسها طبعا مااحجيلكم شلون انتفض گلبي بيومها لان اول مرة واحد يلمسنى هيج ومنو ابن عمي الي اتمنى بالمستقبل يكون زوجي..

وكمل كلامه ورة بوسة كفي وكال هيومة اني ماكدر الف وادور..وارد اكولج وبصراحة اني احبج وراح اتزوجج وراح اخلى ابوية يكلم عمي ويحجزج الية لحدمااكمل الكلية هاشكلتى؟

طبعا اني سكتت ماكدرت احجى من الصدمة وماحسيت من وكف الديلاب مدلي ايده ونزلني وكال تعاي نتمشي بعيد عنهم وفعلا رحنا لمكان شوية بعيد عن كعدة ماهر والبنات وكعدنا على مصطبة وكمنا نسولف سألني شنو جوابج خجلت

كتله بكيف اهلي

كال لا اريد اسمع منج تبادليني نفس المشاعر او لا؟

دنكت راسي..

كتله مثنى عفية كافي لاتخجلني اتقرب بكعدته بصفي وحط ايده فوك ايدي..

وكال صدقة للي يخجلون معناه تحبيني وضغط بكفه على ايدى

لا اراديا طلعت مني كلمة اه لان وجعنى من ضغط على كفي

كال اسم الله على گلبج من الوجع

وقرب راسه مني وانفاسه الحارة الي تكاد تحرك وجهي من حرارته..

وهمس بصوت جدا ناصي.. ااااااه اشكد احبج

طبعا بحة صوته وهو يكولها الي وانفاسه

خلت جسمي كله ينتفض ويرجف وية صوته

درت وجهي عنه..

كتله عفية خل نروح لا يكوم ماهر يدورنا

ظل صافن على ملامح وجهي..

واني الخجل مسيطرعلية..

واتنهد وكال يلا كومي..

وفعلا كمنا ورحنا وكعدنا يمهم

بس اني كوة لازمةنفسي مثل وحدة دايخة وخدودي يشتعلن نار..

ومن سألونا ليش اتاخرنا

كال مثنى صعدنا ٣مرات ماتشوفون هيام دايخة وهو يغمزلي

خجلت وكمت ابتسم وماهر يكول حيل تستاهلين حتى اتوبين

رجعنا ب١٢بليل للبيت جان وكت الامان وكتنا غسلت ودخلت فراشي وظليت احلم بمثنى واذكر سوالفه وانفاسه القريبة جانت مني وبحةصوته وهويكولي احبج جان ذاك اليوم.من.اجمل.ايام حياتي…

وحظنت المخدة ونمت واني احلم بحبنا كيف راح يكون بعد علاقة الصداقة الي جانت بينا وشنو مصيرنا.

.

.

.

يتبع