رواية الم احل لك بعد الفصل السادس 6 بقلم الكاتبة بتول
وارث
…..حضرت مستمسكات للخدمة بالعتبة
دكيت على جدي حطيت عده خبـر ما كال غير
غياد…مسهل طريجك بوويه بس صفي نيتك وي ابوعلي واخـيه حتى تنال شفاعتهم ورضاهم من گلب و رب
صار الساعة بـ٨ ونص نزلت صبحت على ابو احمد وكملت طريجـي هالزلمه اتفائل بشوفته كلش
وصلت قدمت اوراقي للمسؤليين
ومتاني القبـول
اروحن وارد بـين الحـرمين روحي مرتاحـة جنهاا طيـر حـر من بعد سجـن اخذ سنين من عمـره
… جني جاهل ومكيف بهدومه الجديده والعيدية بمصباح اول يوم العـيد
دخلـت للمكتـبة اصدرات العتبة الحسينية واعاين الكتب كدامي اشكال والوان
مؤلفات لعلماء ومراجع كبـار اسماء يرجف يمها گلبك
اخـذت كتاب ((الغيبة))
((ومن المهـد الى الظهـور))
((من المهـد الى اللحد)) للسيدة الزهراء(سلام لله عليها
((سلسلة من المهد الى اللحد))
هيه سلسلة كتب تبدي من النبي محمد صل الله عليه وآله وسلم الى الامام القائم المنتـظر عجل لله فرجه
ضامه الاضنعش معصوم واكو للسيدة زينب هم
كل امام اله كتاب يشرح بي شرح مفصل وكامل عن حياة الامام المقصـود بالسلسة
من مؤلفات السيد محمد كاظم الموسوي القزويني
… ويساعد اي مبتدئ غايته يتعرف على اهل البيت سعره رخيص مابين الحرمين وموش كلش يكلف
وانه منا بدت رحلتـي كعدت جوه واحد من المساگف
ارتجيت بظهري على سياج و بـ وراي حديقه مسيجة
حتى مكينه الماي وتحليـه مغلفينها بورد وعشب اخـضر
…. فجيت الغلاف من يم كتاب السيدة الزهراء سلام لله عليها
وانطلقت بـ رحلة القراءة وواهس اجاني اقره وما كتفيت بس المن سمعت اذان الظهـر
بين الحـرمين يصيح
هزيت راسي وكمـت اخذت الكتب وطبيت للصحن بـ وراه ما خليت الكتب بالأمانات
…. فتت للصحـن العباسي اصلي صلاة جماعة
وكفت بين صفوف المصلين كملنه الصلاة بـ راحة المجان الجنت اتمنى اصلي بي
صليت بكل خشوع وتركيز بالايات
عاينت الساعة تقريب الوحده راح تصير
… كمت طلعت اخذتلي من مطعم قريب لفتين وبطل ببسي وكعدت اكل خلصت غسلت وطلعت
اخذت الكتب سلمت من بعـيد
وطلعت للدار وانه بكامل نشاطي لا تعبان ولا حاس بشي
غير بس اريدن اوصل للبيت واستقر حتى ارجع اكمل قرايـه بكل واهس
… فجيت الباب ودخلت ذبيت دشداشتي وانطرحت مرتجـي اقره وصلت لحد زواجها من الامام علـي
وشون الخواطيب اجوا الها گبل الامام وامتناع الرسول ينطيها
…. عمر وابو بكر وعثمان بن عفان….. وغيرهم هـواي
مهـر الزهـراء والدرع
شي اخذني لهذاك الزمن
… صدفة اجت عيني عالساعة بـ٤ ونص العصـر خليت فاصل وسديت الكتاب اتمغطت وجن ظهري متبنج من الكـعده تمددت حاط عجس ايدي على عيوني
وطرت عالبالي اول ما خطت رجلي عتبة الصحن الحسيني
سجدت وحجيت
…. سيدي ومولاي حسين ياحنـين اجيـتك وانه متروس من راسي لـ جدمي ذنوب وخطايا وسيئات وغفلات وسهووات
اجيتك مولاي وانه ادري بروحي غلطان وكلي غلط
عبن ادري مسوي شي ماترضه علـيِ انته
مولاي
… سامع حرام وانته ماترضه بي
…. ماخذ غيبة اخواني وانته ماترضه على هاي
…. سامع وناقل نميمه وانته ماتحب هاي
… حاط عيني على حلال غيري وهذا منبوذ عدك
… جذبت وانته ما تحب الجذب ولا تگرب اله
…. مولاي مسووي اغلاط وذنوب وانه محسووب عليكم
ابوو علي محسووب عليك شيعي واسمي عالـ اسمك
… لجن مولاي اجيتك وانه ادري بروحي عصيت وغلطت وغفلت واجيت بـ بابك يا باب رحمة لله بـ ارضه
… ادعيلي مولاي و اصلحني وعلي متعبتني نفسي الامارة بالسؤء بكل مجـان وزمان
… فتت للضريح ووصلت يم الشباج مسحت ايدي على گلبي ومديت ايدي للشبااج ودمعتـي عالخـدي بهظم عالروحي وضياعها
ابو علي هــذا گلبي المسود وجهة وياكم اخذه واصلحه و رده اليه مولاي ما يخيب الـﻤأمن روحه وگلبه ونفسه وعقله يمكم
… اريدن انصلح واصيرن منكم ووياكم بالدنيه والاخره
مااريد افارك اسمكم لا بدنيتي ولا بمنيتي ولا بلحـدي وانه وحيدي ومامش ويااي بس اعمـالي
وانته بكيفك ابو علـي تشوفني كفوو اقبلني وخلني يمـك
….. تشووفني موكفوو لا تقبلني بس انه اكلك من هساعة وعلـي وخـدر زينب راح اجاهد روحـي لحد ماا اسمع الـ عفيه من عدك
….طلـعت من الضريح مسلم مسحت دموعي وانداريت اعاين عالناس الكاعده بالضريح شفت سيد كاعد ولازم كتاب الزيارة يريد يقراها
الشيب والعمامة والعباية السوده الوقار والهيبة والسماحة البوجهة خلت رجليه تاخذنـي اله
بدون ماا افكر شنهي بالي وشنهي نيتي من اروحن يمه بس جن شوفته خذتني لـعالم ثاني
كعدت مكابلـه وهو توه يقره ويكول بسم لله الرحمن الرحيم اللهم صلِّ على محمد وآل محمد وعجل فرجهم واللعن عدوهم
رفع راسه اليه من حس بحركة يمه رجيت جفين اديه بحضني خجلان ومستحي شلون كعدت مكابله وبلايه اذن من عده جليت صوتي وسلمت
وارث…سلام عليكم
ابتسم و رد عليه بصوت هادي وملامح وجهة راخية
…وعليكم السلام ورحمة الله
تفضل تزور ويااي
…. فكيت عيني اغرب عزيمه انعزم عليها واحلاها
كعدت بسده وكاض نفس الكتاب البيده هزيت راسي بـ ايجاب وموافقة
وهو بده بالنية واسترسل يقره الزيارة بصوت شجن وهادي مريح للسمع ومهدي للگلب
خلص قرايه الزيارة تقريب وراه النص ساعة سد الكتاب واندار عليه مبتسم متانيني احجي وانه ما جان عدي شي اريد اكوله لجن رجليه هيه جابتني اله
صفن بعيوني يباوع متبسم
….شنو اسمك ابني
وارث…اسمي وارث
هز راسه ولم عبايته من يم رجليه
….عاشت الاسامي ويا محلاه من اسم
وارث…مولانه انته هنا تشتغل بالعتبة
….لا ما اخدم بالعتبة اشتغل نجـار انه بس درست هنا حوزة جنت طالب علوم قران
وارث…عود صدك مولانه… وما اثر عالشغلك دراستك
….لا وليدي شـ تاثر اذ الواحد مصفي نيته ومضبط وكته ماكو شي يأثر علـيِ
… هزيت راسي رجعت ظهىري اليوراه مندي ومترجي على اديه مدنـك راسي
وارث…مولانه هوو شون الواحد يطهر روحه ويرد لـ درب لله شنهي الطريق اله…؟ وين اروح واندل..؟ المن اسئل….؟
….لله موجود بكل مكان ابنـي انته بس انوي وكوول يارب عيني اريد اتووب هو يسهلك الدرب بس فتح عين كلبك وكوول يارب اريد اخلص وياك
وارث…وشون اخلص وياه مولانه وانه كلي اغلاط من راسي لـ جدامي
….طهر روحك من ذنوبك وعوفهن كلهن وسطرهن عالصفحة خليهن كلهن بغرفة واقفل عليهن وذب المفتاح بمكان ماا توصل اله
اكتبهن بورقة واحرك هاي الورقة وخليهاا رماد تتوقع من الرماد ينعدل ويرد يصير ورق لا اكيد هيج الذنوب خليها
…. هزيت راسي بـ لا كمل حجيه مسترسل ويفرك بجفين ايده سبحة من طين وبطرفها تربة زغيرونه معلكة
…. جيب الك كلاص مااي واقره علي ذنوبك واغلاطك وسيئاتك واكسره مو اهلنه يكولون الماي ما ينلم والكزاز ماايتعدل لو صاار اشلاء هاي الذنوب والسيئات هيج خليهن
…. جاهد روحك وليدي واتعب حتى تحصل رضا لله خلصت من ذنوبك وسيئاتك امشي هسه بالدرب العدل وهو درب رب العالمين ووصل اله عن طريق عبادته بس اهاا مو اي عبادة لا عبادة بـ اخلاص ونيـه صافيه
… الله تعالى من امر خلقه بعبادته وما يقبل منهم اي عبادة باي قصد انما راد منهم عبادة مخلصة حتى يكول عز و جل شأنه بسم لله الرحمن الرحيم(وما امروا الا ليعبدوا الله مخلصين له الدين) ومن فعل ذلك نال خير الدنيا والاخرة وصار حكيما فائزا بما عند الله تعالى اهم شي الاخلاص وي ربك والنيه الصافيه
…. وانته هسه بمرحلة الشباب وان فترة الشباب تعتبر من المراحل الحاسمة والحساسة بـحياة كل منا
وعن ابو جعفر (عليه السلام)
(واعلم انك ستسأل اذا وقفت بين يدي لله عن اربع… شبايك فيما ابليته وعمـرك فيما افنيته……)الى اخر الحديث
….. فان لم مراقبا لنفسك ومواضبا وملتفتا لخطواتك فيعني انك تزداد كل يوم بعداً عن لله بالاف المعاصي والعياذ بالله
وارث…مولانه والشيطان المرافكنه اربع وعشرين ساعة
…. وليدي الشيطان ضعيف ما دام انته طالب العون من لله بدليل رب العالمين عز ووجل گال (ان كيد الشيطان كان ضعيفا)
العدو الاول والمسبب الاول للذنوب هو النفس
الامارة بالسوء
…. بسم لله الرحمن الرحيم
{ وَلَقَدْ خَلَقْنَا الْإِنسَانَ وَنَعْلَمُ مَا تُوَسْوِسُ بِهِ نَفْسُهُ وَنَحْنُ أَقْرَبُ إِلَيْهِ مِنْ حَبْلِ الْوَرِيدِ }
احنه ليش كلشي يصير نكول الشيطان بينما
السبب العدو الحقيقي هيه النفس واحنه نىروح ونذب اللوم على العدو ضعيف
… العدو الحقيقي هو ( النفس ) نعم… فالنفس هي القنبله الموقوته، واللغم الموجود بداخل الإنسان
نفسه بدليل قول لله
بسم لله الرحمن الرحيم
{ اقْرَأْ كِتَابَكَ كَفَىٰ بِنَفْسِكَ الْيَوْمَ عَلَيْكَ حَسِيبا }
شووف هناا ربك گال نفسك ما كال الشيطان وبعد
… بسم لله الرحمن الرحيم
{ وَأَمَّا مَنْ خَافَ مَقَامَ رَبِّهِ وَنَهَى النَّفْسَ عَنِ الْهَوَىٰ }
نهي النفس وليدي هااي اول خطوة حتى تبدي الاخلاص وي رب العالمين اذ سيطرت عليها ربحت الدنيه والاخرة
وارث…شلون مولانه اكوو طريقة التزم بيهاا
ابتسم وحجه بتاكيد
….ااكيد اكوو انه اطيـك طريقة الاربعين يوم وان شاءلله منها والهداية
وارث…شنهي هاي مولانه
…. الرسول عليه وعلى اله افضل الصلاة والسلام
(ما من عبد يخلص العمل لله تعالى اربعين يوما الا ظهرت ينابيع الحكمة من قلبه على لسانه)
…. والاخلاص هو تجريد النية عن كل ما سوى الله في القصد ومن طلب غير الله في نيته فهو مشرك بالشرك الخفي (الرياء) فاي خاطر غير التقرب لله في العمل تجعله شائبا مردودا والخلاص مراتب وكل انسان حسب نفسه وسيطرته عليها وين تودي
وارث…شلون يعني مولانه مراتب يعني اكو انسان احسن من انسان ثاني بالخلاص وي لله
….سئلتني شلون انه اكلك
يعني تلكاه الك بشر ما يطلب غير لله
في فكره وسكونه وحركته وقوله غير الله ، فهو يريد الله لا غيره ويطلب بهاي الارادة الامتثال له والتقرب منه جل جلاله
…. واخلاص النية في كل فعل وقول لله تعالى وما دام القصد هو الله فلا ضير من باقي الضمائم كالتقرب اليه او طلب ثوابه او اجتناب عقابه او الامتثال لاوامره وما شابه ذلك هاي امور عادية
…. هاي الناس العاديه بس من نرجع نشوف الاولياء والانبياء من تجي يم اخلاصهم تلكاه مجرد من كلشي ما عدا لله سبحانه وتعالى
…..وان اولياء الله لا يعرفون ضمائما معه فهم يطلبونه هو هو…..يردون بس لله
عن مولى الموحدين علي بن ابي طالب عليه السلام قوله (ما عبدتك خوفا من نارك ولا طمعا في جنتك ولكن وجدتك اهلا للعبادة فعبدتك)
اتأمل العبارة والقول زين وجدتك أهلا للعبادة فعبدتك
….فتأمل هذه النية الجليلة والمرتبة العظيمة واسأل نفسك (اين نحن من علي بن ابي طالب)
ثم احمد الله سبحانه على نعمة اهل البيت ولله خلانه مواليين ومحببين الهم
صدك احنه ما نكدر نوصل لمرتبتهم بس نكدر نقتدي بيهم
…وهسه نرجع لموضوع الاربعين يوم بس اريدها منك وارث بالنيه مو اربعين يوم لا العمر كله بس التأهيل لنفسك اربعين يوم
…. لميت اديه وكعدت عدل ومستعد حتى اسمع حجيه كلش زين واسجله بدماغي
…الصلاة اول خطوة وارث عمود الدين ان قبلت قبل ما سواها وان ردت رد ما سواها
الالتزام بيها وباواقاتها اول شي واهم شي صلاة الفجـر الفجر الفجر وارث
…… لان اذ ماجانت أول قراراتك الاستيقاظ لصلاة الفجر بمـوعدها ماكو قيمة لتخطيط باقي يومك؛ لأنك راح تخسـر بداية النجاح اليومي والتوفيق الإلهيّ
وارث…صار مولانه الصلاة
….والقران كل يوم لو صفحة المهم ماا ينهجر ولا يمر يوم وانته ما قاري كلام ربـك مو قرايه حي لله لا قرايه وعقلك مفتوح وتستوعب الكلمة الجاي تحجيها
وارث..الصلاة والقـران مولانه
….زيارة عاشوراء يشهد لله عليه يا وليدي كل خيري ونعمتي ببركة قرايه القران الكريم وزيارة عاشوراء نعمة عظيمة على كل من يتوفق حتى يقره كل يوم بيومه وما يضيع اي فرصة لزيارة الحسين بهاي الزيارة
وارث…الصلاة والقران وزيارة عاشوراء حفظتهن بصم سيدنه
… ابتسم وهز راسه بـ رضا يفر بالخرز مالت السبحة
فركت جفين اديه سوه وحجيت خايف اضيع عليه صلاة الفجـر بيوم من الايام من هاي الاربعين
وارث…مولانه اخافن فد يوم اضيع صلاة الفجر عليه شون هذيج الساعة
…. ما تضيع ان شاءلله بس اطلب العون من صاحب الزمان عجل لله فرجه وكله مولاي اريد اكعد لصلاة الفجـر ما اريدنها تفوتني وشوف اذ فاتتك بيوم من الايام
…. واذ تكدر سبح تسبيح الزهراء عليها السلام گبل لا تنام بـ نيه الاستيقاظ للصلاة
… دك تلفونه اخذه من جيبه وگطع الاتصال وكف على حيله وانه وكفت وياه ماا اريدنه يروح من صدك الحجي وياه يشرح الصدر
….يله وليدي مثل ما وصيتك لا تنسه وديربالك عالصلاتك
وارث…لا مولانه هاي هيه حفظتهن وان شاءلله التزم بيهن مـشكور مولانه
…شكر لـ لله وليدي شمسوي انه يله في امان لله
مشه خطوتين ولحكته انه
وارث… مولانه وين الكاك بعدد اخاف اعتازك
…. ما تعتاز احد ان شاءلله غير لله واهل البيت ولو ردتني تلكاني ولله يسخرني الك
…حجه هذا الحجي ومشه بدربه مبتسم ايده عالصدره ويمشي بالعكس مطي وجهة للامام وظهره ليوراه وصل يم الدرج يله عدل مشيته واخذ اتجاة صحيح راح واختفه عن نظري بين افواج الناس الجاي تفوت للصحن مالت الامام
…انه هم سويت نفسه لجن ماادري شنهي معناه هاي الحركه لجن سويتها مثله وحسيت بيها معنى جبير لجن عقلي بعده ما مستوعبه
طلعت بوجهي للسوك
اشتريت مصلايه اليه وسبحة منقوش عليها لله محمد علي سوده بـ ذهبي
احذتلي قران وعطـر ودشداشة بيضة مطرزه من يم الياخة بداية جديدة الك وارث
… رديت للامام زرت وهنه وياي حتى اتبرك بيهن
وطلعت لداري رتبت الاغراض
اخذتلي ورقة وقلم خطيت الورقة واكتب ارقام الايام لحد الاربعين الصلاة والقران والزيارة وضفت تسبيح الزهراء عبن احبه
هجي تمام اضبط وضعي اكثر حتى اليوم اليفوتني بي صلاة اعاقب روحي بس بشنهي اعاقبها
…. كمت افتر وصوت القران بالتلفزيون تارس الدار
حطيت قوري الجاي عالنـار وافتر وافكر شنهي الروحي ما تريده
التعب بس بشنهي اتعبها…… دك صوت بـ راسي اتعبها بالعبادة…. اي اتعب روحي العبادة يوم التفوتني بي صلاة اسوي صلاوات محمدية الف مره
….ويوم التفوتني قرايه قران استغفر الف مره…. ويوم الما اقره بي الزيارة اصلي صلاة اليل مثل ما جدي يصليها….
….ضحكت لوحدي وفرحان بـ روحي ومتأمل خير وبركة بهاي البداية
اعاين الجاي فاار وطفت عين الطباخ وخرت القوري مسحت الطباخ وصبيت اليه كلاص جاي اعاين للساعة ما ضل لصلاة المغرب شي خضيت كلاص الجاي و رديته لمجـانه
… فتت تغوسلت وطلعت مديت المصلاية حطيت الها عطر ولدشداشتي لجديد وبـ نيتي اخليها بس للصلاة ما حاجة اطلع بيها
خليت القران بصـفها اعاين لـ لون القران والمصلاية جوزي بجوزي سوه نفس الشي
سمعت الاذان تانيته يبدي بالشهادة و بديت اصلي
….عودة
…. جريت تلفوني حطيت منبة لصلاة المغرب غمضت عيوني بـ راحة ونمـت وببالي انه كد نفسي من قدمتها لـ ابو علـي وعالوعد وياه
… وتمـر الايام شمـحلاهاا وياي دنيتي متروسه بـ اسم اهل البيت يصبح الصبح اكومن اخدم بالعتبة العباسية عالكيشونات مالت المدسات الرجالية
والعصـر افوتن للعتبة الحسينية طالب حوزة
الفقه والاخلاق والعقائد والقـران
… كلهن درستهن وبـجد وحب احبن روحي من اقره وافتهم المسائل الدينية وارد اعاين لواقعنه اشوفن الناس گالبة الاحكام الشرعية دقله
وغلط بغلط لجـن اتونس من اشوفن الاساتذة شيوخ
…. وسادة ويانه يدرسونه ويحببونه بالدين
ويوزعون هاي الطاقة علينه وبدورنه احنه هم نحبب الناس بالدين ما نرهبهم منه ولا نسوي فد شي مقعـد
وصعب المنـال و التعليـم
الدين «عقيدة» مو تعقـيد
عقيدة الالتزام بـ اوامر رب العالمين عز ووجل وما نخالفها
… الدين مصـدر راحة وسعادة وفرحة مو تعاسة وعبوس
انه رجل دين او مراة ملتزمة بـدينها تعلمت ما اعبس وجهي بـ وجهة شخص ثاني حتى يو جان هذا الشـخص عدوي
((الابتسامة في وجه اخيك المؤمن صدقة)) تدفع بلاء عنك
…. دين شي يقربك من رب العـالمين رب العزه والجلاله وياا محلاه القرب من الخـالق الرؤوف
تحس روحك نظيف من الداخل وشفااف جدام من لله وخلقه محبة لله تبين اذ شفت الناس من تمر من يمك تسلم عليك بحـب و ود بدون ابتسامة اصطناعية يو مجاملة بوجهـك اعرف هنا لله حبـك
… الدين نظـام حياة مو نـظام ممات
رب العالمين يحبك مرتب وماتضيع وقتك الثمين اليروح ومستحيل يرد يو تكتل روحـك
نظام و ربك مرتب الك كلـشي
حياتك العائلية وخله الك احلى واجمل مثال
… خديجة والزهراء والرسول( صل لله عليه واله وسلم)
علي والزهراء والحسن والحسين وزينب وام كلثوم
(عليهم السلام) خير مثـال عالحياة العائلية الهادئة الصالحة الترضي رب العالمين وادخلك الجـنة بدون تعـب همه مو عبط انخلقوا ولا حتى بس يبلفون احكام واوامر رب العالمين
ويستشهدون السالفة اكبر من هيج بـ هواي
نظم الحـياة الزوجية وكالك شوف
(علي والزهراء)
(الرسول وخديجة)
(زينب وعبدلله)
(العباس ولبابه)
النور من النور علي وفاطم
حتى وصل الحال الى ﻋـلياً انه قال (يا رسـوُل اللّـه إني
لا أطـيقُ الـعــيش بـدون فاطمـة)
رجعت اتاملت قوله عليه السلام
( فوالله ما أغضبتها ، ولا أكرهتها على أمر حتى قبضها الله عزوجل ، ولا أغضبتني ولا عصت لي أمرا ، ولقد كنت أنظر إليها فتنكشف عني الهموم والاحزان.) بعد رب العالمين شيخلينه من اناس نقتدي بيهم حتى نعتـدل
نظم الحياة والتعامل وي اولادك وخير مثال
علـي والحسن والحسين وزينب وام كلثوم
الرسول وام ابيها
الحسين وعلي الاكبر
نظم حياة شبابك وخير مثال عالشباب
علي الاكبر
القاسم بن الحسن
محمد الجواد
… حجج و اوصياء على الخلق ومن اعظم نسل واشـرف نسب علي الاكبر وتضحيته بنفسه وهو شاب توه بالعشرين علمود الدين والعقيده
شاب بالعشرين ويو سئلته تلكه علوم الدنيه والاخرة عنده وعن احد المراجع الكبار كال
….أن تكون شاب يُجاهد مِن أجل بقاء دين جد الحُسين وتصوم عن الملذات قبل الطعام وتدافع عن الحق حتى لو تطلب الأمر تقطع جسدك الى أوصال، ذلك هو الاقتداء الحق بعلي الأكبر وسائر الائمة
مرحلة الشباب هيه ضامنه لمراحل حياتك القادمة
هيه العطاء و الذروة والطاقة والعدو لمرحلة الشباب
هو اللهو
…. واذ بهذه الطاقة تحرق المعاصي والشهوات وتنفذ ذخيرة العمر فاذا بالشاب يواجه خريف الحياة بيدين فارغتين واصعب موقف يمر على الانسان عندما يتقدم بالعمر نحو الشخوخة ويقترب من حافة الموت ويرئ انه لم يقدم شيئا فحسرة ويا لها من حسرة فمن يمكنه ان يرجع عقارب الساعة!!!
…. نظم حياة عملك وكالك شوف الانبياء وشنهي اشتغلوا رغم ماهمه انبياء لله ومكانتهم ومنزلتهم
منها الحداد والنجار والراعي والتاجر
ماكو واحد بيهم كعـد وحط رجل عالرجل وكال انه نبي حاشاهم من هذا الفعل
.. نظم الك دين وعقيدة وقدمه للانسان عالطبق من ذهـب
… حياتك الاجتماعية والعائلية والعملية والعلمية
كلها ما الها اساس ولاتكدر تحافظ عليها اذ ما ترجع لدينك وتشوف وتتعلم من اوصياء وحجج لله على خلقـه
… الدين اساس قوي وثابت وبعيد عن الانهيار كل البعـد
ويزرع الثقه بالنفس ويخليها بعيده كل البعـد عن التشتت
…..طلـعت للدار ابدل سلاباتي خاطر اردن الساعة بـ٤ وكت دوامنه بالعتبة الحسينية
طلعت للشارع العـام امشي وايدي عالراسـي الشمس مجابلتني مجابل ثواني وجن ثكـل الدنيه كلهاا صار بـراسي وما وعيت عالشي بعد
…وين لـ وين فجيت عيوني والحيطان اول شي عاينت علي مبيضة كلها وصوت مياله الساعة يدك براسي
وبردات زرگ جنها مالت مستشفى
اندارت عيوني واعاين زلمه كاعد عالكرسي جدام مني لابس اسـود وعالجتافه نجمات ثلاثه تلالي
مدنـك عالتلفونه مبتسم
كعدت وصارت صوت بالقريوله اندار عليه سد تلفونه وگال
…..الحمدلله عالسلامة
غمضت عيوني بألم من ايدي ورديت فجيتهاا مبتسم كوه
….لله يسلمك ويخليك شنهي الصار شـ وصلني لهنانه
….مدري ولله حظي مدري حظك عرضت گبال سيارتي وطحت عالوجهك بنص الشارع اريد اعرف شبيك ماكو لا انته مدعوم لا انته مجروح لا مصاوب
دكات گلبك طبيعية ومعتادة
….يجوز طكت شمس ردت اليه عالعموم انه ممنونك منك كلش ومشكور وماقصرت انردها الك بالافراح ان شاءلله
….يمعود شسويت ما تكلي الناس للناس بس انه ردت اطمئن اهلك عليك اخاف ضل بالهم بس شفتك ما شايل تلفون وانتظرتك تكعـد يله
….انه مامش اليه اهل هنانه كل هلي بالكوت والتلفون مااشيله وياي مااليه عازه بي من اطلع
….اهلا وسهلاً وعالراس ونعم منك ومن اهلك
طالب اقسام داخلية انته
….لاله انه ادرس بالحوزه وخادم بالعتبات
….كل الهلا بيك انه اخيك ميمون هم من كربله بس بس دوامي بغداد
….لله يخليك
….يله اروحن اصيحن للدكتور يجيك حالتك حتى اوصلك لبيتك
…. لا مو معتازه السالفه واعذرني اخافن اخرتك عالنزلتك يو دوامك
انه اتوكل عالروحي واردن لداري
….لا اصلا انه نازل للبيت ومو اشكال لو تاخرت ساعات
….. خلاني وراح ينده الدكتور اجه جيك وضعي وكتب علاج وطلعنه بره اعاين اله فج باب سيارة عالية لونها ازرك مصفوطه كدام المستشفى
صعدت وانه اصلي على محمد وال محمد بيني وبين روحي
دليته عالمنطقة ووصلنه وهوه ويااي ماهدني
حدما فتت للهول مالت الدار
گال وهو بعاين بعيونه عالبيت
ميمون…وارث يعني انته نهائي ماعدك واحد عايش وياك
وارث…لاله مامش واحد وياي بحيدي عايش
ميمون…مرتااح موو
وارث… تريد الصدك مرتاح ومتروس راحة هم لجن ياخذني الحنين والشوگ لـ ديرتنه واهلنه لجن احسن حل هذا اضل بعـيد عنهم
ميمون…صارلك شكد ما رايح الهم جم يوم
وارث…يوو يا ايام كوول شهوور
ميمون…ماادري شـ اكلك صراحة بس لله يهدي بالك مبين لايك الك وضعك
وارث…امين هساع شنهي ماتكعد انضيفك
ميمون…لا تسلم مناك مرتي واهلي كلهم منتظريني انزل صارلي خمس وعشرين يوم بالدوام ما شايفهم
وارث…لله يسهل طريق وانه اعتذر عبن اخرتك
ميمون…مابينه هاي الكلافه ان شاءلله احنه ربع
انه اترخص هسه
هذا علاجك مأشر علـي وديربالك عالروحك
وارث…ممنون منك ياابه لله يگدرني واردها الك
………. ميـمون
نزلت من الشقه مستغرب ركبت سيارتي وافكر بي هذا شغلته مو خاليـه اكيد وراه سالفه بس ما يريد يحجي اوو انه شعليه بي زلمه محتاج مساعدة وساعدته بعد شكو ميمون حاطه بـ راسك
ركنت السيارة بالكراج مالت بيتنه بابه مفتوح هاي اكيد رغد فاتحته لان انطيتها خبر بـ جيتي دخلت
للبيت هدؤء ماكو هيج بس صوت الصرصر يصوصي وجن بس هوكاعد بالبيت
… نزعت بسطالي ذبيت جنطتي عالقنفه بالصاله
دكيت باب غرفة البنات وفتحتها
رغد مخليه السماعات بـ اذنها وكدامها لابتوب مفتوح وطامسه ماتدري بالدنيه شنوو
.. فريت راسي عالجرباية الثانية وحده متغطيه ونايمه بدون ما اسئل عرفتها شهد
… هزيت ايدي على هاي الوضعية الزفت لله يرحم ايام شام جانت توكفلي بالبااب ولو طبيت تركض الي جنها شايفة باب الجنة انفتح الها الاكل والحمام جاهز بدون ما افتح حلكي بحجايـه
مشيت ليمها رفعت راسها من شافتني بالمرايه ذبت السماعات وكمزت اليه
رغد….ميمون ااجيت
ميمون…لا بعدني بـ باب الكراج روحي شوفيني
ضحكت ودخلت لحضني مسحت عالشعرها بيدي
رغد…كلش اشتااقيت الك ولله طولت هواي ليش
ميمون…غير شغلي
رغد..خفت عليك ولله
ميمون…لا تخافين حبيبي شيلي هاي الافكار والوساويس من بالج ما كتيلي امي ابوي وين شو ماكو
رغد…معزومين بيت عمو غامد
ميمون…خير ان شاءلله
.. هزت راسها بـ نفي وحجت
رغد…لا سلامتك ماكو شي كالعاده عزيمه لان ليلة جمعة
…. قلصت عيوني اباوعلها بـ شك ما مقتنع ليش امي وابوي يرحون للعزيمه مو متعاركين وياهم من نهد طلاكي انه وشام على شنو هاي العزيمه
ميمون…ولج ررغد بس لاا امي وابوي رااح يرجعون شاام ااكلب الدنيه عليهم ومحمد
رغد…لا ابد ولله مو تدري بيهم همه اصلاً ما يردون يرجعونها الك
ميمون….خفتاّ وراحة ولا انه الميت عليها
وخرت عنها اريد اطلع بس وكفتني بحجايتها وهيه شايلة لابتوب تخلي عالشحن
رغد…ميمون ترا شام جااين الها خطابه وامي وابوي راحو لان اتوقع عمو غامد يريد يخصم السالفه وياهم
حتى لا تصير حجه علي بعدين اذ قبل زوجها
ميمون…خطااابه ليش هيه خلصت عدتها
رغد…لا بس هو صديق مقتدى اخوها ويصير اخو السيد الصار عده طلاكم وشايفها وحاجي بيها
هزيت راسي ببرود وحجيت وانه اصعد الدرج
ميمون…يصير خير
…. خليت وصعدت لغـرفتي بارده ما مشتغله بيها الدفاية مثل كل مره اباوع للجربايه ما عليها ملابسي ولا المنشفه ولا اكو بالغرفة العطر المتعود علي
شغلت الدفايه جريت هدوم من الكنتور ومشيت للحمام فتحت المااي باارد
نزلت وصحت عالـ رغد
ميمون….رغدددد
صعدت اليه بسرعة
رغدد….شكووو شبيك ميمون
ميمون…الـ…. ماا مشتغل
رغد…شنو هوه هسه انه شنو افتهمت منك غير بس الغلط
ميمون…السخاان
رغد…يو نسيت ولله اااسفه
ميمون…عوود صدك تحجين يعني رجااال راجع من الضيم مهدوود حيلي الكاااه البيت فااارغ الغرفة تلعب النفس وبردهاا بحيطانهااا ملابس ماا محضره السخاان ما مشتغل عوود هااي انه مووصي….
رغد…لا تعصب ياا حبيبي عيوني انته ولله نسيت ااعذررني ولله فلا تنعاد بعد تعاال اسبح جوه السخان مشتغل جوه وهسه احضر غرفتك ولله انته بس لا تعيط
ميمون…كلشي ماااريد منج بس ووخري عن وجهي وامي خلـ تجي وانه ااعلمهاا شنهي مخلفتني وناسيتني موو تدري بيه جااي من الضيم ووكت عزاايم
… صعدت فوك جريت هدومي من التعلاكات ونزلت اتناطح وي البيبان ماااحد يحـس ولا واحد يفتهم عليك من ترجع مهدود حيلك من الركض وىاه العصابات والجرايم والتحقيق والدم فااير بـ راسك
وتريد ترجع للبيت ترتااح بلكي تعوض ايام التعب يتلكاك بس صوت الصرصر هزيت ايدي عالوضعيتي استااهل اي ولله انه الجبتها لـ روحي طبني طوب
سبحت وصعدت لغرفتي دخلت طكيت الباب قفل تمددت عالجربايه جريت تلفوني بيدي جايتني رسايل من بغداد ابتسمت وجاوبت عالرسايل طمنتها وصلت لكربله وسديت التلفون
… حطيت راسي ونمت مافكيت عيني غير طربكه التلفون عالكومدي وصوت النغمة عاالي ينعل شكلك يالـ ايفون جريته وكعدت كوه مفتح عيوني احااول اشوف الاسم رقم مقتدى اخوو شام لزمت گلبي شغلت الفلاش اشوف الساعة بـ ١٢ ونص بليل
يالله دخيلك شنو السالفه فتحت الخط ماكووو صوت حجيت
…… الووو
سمعت شهكة موو غريبه عليه وعرفت صاحبة هاي النشغة وحبسة الصوت جريت شعري ومسحت وجهي بجف ايدي بلكي اصحصح
شاام..مـ… ميمون
ميمون…شعددج متصله شاام ماا تشوفين الساعة شكدد
شام…ميمون فدوه الك ما ااريد اتزوج فدوه
ميمون…تحجين صددك ولج تشوفين بيش الساعة لوو لا ددداكه عليه تكليلي ماا اريد اتزوج انه شعليه بالسالفه رجال مطلكج يعني موو ولي امرج ولا عليه بيج لا من گريب ولا من بعيد
شام…فدووه ميمون
… كمت شعلت كلوبات الغرفه جريت اليه بطل مااي واسمع صوت بجيها ونشغاتها
ميمون…كافي بجي شاام وافهمي الحجي انه ما عليه باليصير بيج بعدد البينه انتهئ هاي هيه
شام…بس انه مااريد غيرك ميمون مااريد اتزوج غيرك فدووه
ميمون…شـ شفتي منـي لـخااطر لله شوو كااالب حياتج جحيم وماا خليت شي مااسويته بيج عليش مجلبه بيه
…. سكتت وما حجت شي جريت نفس اصبر روحي وانكسر گلبي عليهاا طفله ما الها كل مقومات بالمره الكاملة
… شام ليش ما تزوجـين وتشوفين حياتج ليش توكفين حياتج عليه ترا انه مااافيدج ولله گلبي مو اليه مو ملكي ليش تردين تحمليني ذنبج وخطيتج كووه
تزوجي وعيشي حيااتج يجوز هذا المتقدم الج يطلع خوش وااحد ويدللج وتعيشين ويااه براحة
شعدج مجلبه بيه وانه كل خير ماابيه الج
شام…اي ميخالف ولله قابله بيك بس مااريد اانام بغير حضنـك ميمون اخااف وعلي
… ضحكت بقهـر وكعدت عالجربايه ورثت جكاره واضحك عالحجايتهاا
ميمون…دكج ومدكوكج حضني يابه يجووز يطلع ااحن مني عليج واحسن مني
…. خنست وما حجت شي بس انفاسها المتسارعة وجن دكات گلبها بـ اذني اسمعها
شاام اسمعيني
شام…اسمعك
ميمون…سدي التلفون هسه ورجعي يم مقتدى وروحي غسلي وجهج لا يطكع من البجي وتغطي بطانيه ثخينه ونامي خوش موزين السهر عليج
شام…ميمو… قاطعتها
ميمون…يله شاام شكلت اانه وبعد لا تتصلين فهمتي
شام…اي فهمت
ميمون…لعد مااتروحين ما دام فهمتي شعدج بعد بـ الاتصال
عددج بعد شي ما كلتي
شام…اي
ميمون…كولي اسمعج
جرت نفس وتمتم بين مابين نفسهاا ما فهمت بس ادري بيها طبيعه من تريد تكول شي ومتردده اضل دردم وما تفتهم شي من حجيها حتى هيه ما تستوعب التحجي
شام…ميمـون……
يتبع
