رواية الشيطان اختي الفصل الرابع 4 بقلم انين الليل
البارت الرابع
ضياء
رحت بعد ما خابرتني نور انو اختي سمره جايه زعلانه ومتعاركه ويه زوجها زوجها اتذكر من وكفت وكالت
هي موافقه علي رغم أمي الله يرحمها نصحتها بس هي اصرت تتزوجه لان فريد من عائله مرتاحة ماديا انا سامع
عنه هو عنده علاقات وانو يشرب لكن هي وافقت وانا بوقتها خليت كل شي أمام عينها لذلك هي دائما تجي زعلانه
من زوجها وتبقى كم يوم ويجي يصالحها وترجع ويا
هي صار عدها اثنين أولاد وبعدين صار عدها ابنيه انا من طلعت خابرت نور
الو ها بابا
:: نور من يوصل جعفرخابريني
صار بابا
:: ها ولا تگليله خابرتيني
اي بابا
أبو منتظر گلي /وين نروح استاذ
انا ما جاوبته اتصلت بفريد زوج سمره
:: الو أبو عصام شلونك
فريد //أهلا أبو نور تمام الحمد لله
:: فريد انت وين
هو جاوبني وكانما منتظرني //بالبيت وين اروح
:: زين جايك ولو الوقت متاخر
فريد//بيتك ابو جعفر تشرفنا أهلا وسهلا
وصلنه البيت فريد اتلكاني وسلمت علاقتي ويه فريد شفافه جدا من تجينه سمر زعلانه احچي وياها ولان اعرف هيه فتره
وترجع اني اكتفي اوصي عليها
نزلت وبقى أبو منتظر بالسياره گعدت بالديوان هو صاح على الخدامه تجيب
گهوه وشربت شويه وباوعت وكتله :: شنو فريد ما ناوي تكبر
فريد //ها أبو نور شبيه اني
:: ياخي شبيك ويه سمر
فريد//ضياء اختك وتعرفها مخبله
انا جاوبته باستهزاء. :: وانت العاقل فريد مو كافي عاد ولدك صارو بكدك
فريد باوعلي بعتب //هالمرة ظلمتني أبو نور انا ما مسوي شي انا افكر اتزوج مره ثانيه والي اسبابي
استغربت كلامه :: انت شتگول؟
فريد//أبو نور لا عيب ولا حرام رجال اريد اتزوج مره ثانيه والشرع محللي واكيد اني راح اعدل
لملمت حلكي :: بس ممكن اعرف شنو السبب اختي بيش مقصره وياك
هو جاوبني//أبو نور أختك احبها وعلى راسي رغم عصبيتها بس اني صار عندي ظرف خاص وأريد اتزوج
:: فريد والعمر والعشره والصبر الي صبرته سمر وياك
فريد //ما انكر اي صبرت واتحملتني بس اني اريد اتزوج وأختك تبقى زوجتي وأم بيتي وما راح اقصر وياها
صحيح ضياء قبل چان عندي علاقات لكن اسألها انا بطلت من زمان واكدر اتزوج بدون ما تعرف بس
انا ما حبيت اضم عليها خليتها بالصوره
جاوبته :: شوف ابو عصام ما راح أكلك ليش ومنو الي راح تتزوجها لان اعرف الرجال إذا راد يسوي شي يسوي
فريد//ضياء أرجو ان تقدر ظرفي
هزيت راسي :: عادي مقدر ظرفك هسه خليها يمنه وبعدين تعال عليها وحلو مشاكلكم بهدوء وانت تعرفني اني
ما اجبر اخواتي على شي هنه ما يردنه لكن هم تعرف بيه من يخطىن اجبرهن على اشياء غصبا عليهن يسوونها
فريد جاوبني وگال //سمره يمته ما يعجبها تجي البيتها وانا اطلع منه وتعرفني أبو جعفر ما اقصر وياها
سالته :: اولادك وين
فريد//جنه وياها وعصام وحسام راحو البيت جدهم
التفت يسره ويمنه وهزيتله راسي :: ها وانت ابحدك
فريد بابتسامه باهته //اي والله أبو جعفر الله يساعدك شلون تحملت الوحدة بدون مره
رفعت تك حاجب وگتله :: ولا تجوز من سوالفك مو كبرت ولدك بطولك
فريد // واني ما مسوي شي عيب او حرام تعرفني ما اضم شي حتى على نفسي مفضوح
جاوبته بابتسامه :: بهاي صدگت انا الي اعرفك هالايام خليها يمنه هي صحيح مثل ما تگول عصبيه بس
بنفس الوكت گلبها حنين وبسرعه ينضحك عليها
فريد //ها ضياء قصدك اني اضحك عليها
جاوبته :: اي والله فريد وهي الغبيه بسرعه تصدگك ومجرد ما ترجع وياك يومين تنصدم بالواقع المرير
فريد //احسن اكذب عليها اني دائما اخليها بالصوره بس والله ابو جعفر احبها واموت عليها
:: اي مبين والدليل راح تطگها بمره لخ يالله تصفى ابحدها وانت هاليومين اسكت عنها
وبعدين طيب خاطرها بكلمتين خابرها وبرد الموقف تره اولادك مو زغار اتصور فاهمني
فريد //والله صحيح وانت هم احجي وياها
:: اكيد راح احجي ولا يهمك
فريد //تسلم ابو جعفر
::فيمان الله
فريد//الله وياك
ورجعت للبيت لاگتني نور وايه وشفت سمره كاعده اجتني جنه وباستني وهي تگلي /اشلونك خالي
انا باوعت النور يعني وين جعفر افتهمت منها هو فوك كعدت يم سمره وسألتها
:: اشلونج أم عصام
هي ما جاوبت رأسا صارت تبجي بصوت عالي حاجيتها :: هاها أم عصام على كيفج مو زين عليج
سمره جاوبت وهي تبچي / النذل شكد تحملته اخر شي يريد يتزوج عليه
انا باوعت الآيه وكتلها :: ايوته بابا أخذي جنه الغرفتج
وراحت ايه وجنه وبقيت انا وياها ونور بعدين اجه جعفر
جعفر //ها حجي الله يساعدك
باوعتله ورديت :: هلا يأبه
باوعت السمر وكلت :: شنو أنتي من عفتي بيتج واجيتي اهنأ عبالج يبطل ما يتزوج
جعفرراسا جاوب //يبطل وغصبن ما علي بعدين شلون يمد ايده على عمتي
هي صارت تبجي بقوه باوعتلها وكلت :: كافي سمره كافي مؤهذا ..
هي قاطعتني //اعرف شتريد تكول أبو نور مو هذا الي وكفتي بوجهنا وأخذتي واحنه ما موافقين
اعرف هاي الديباجة لان كل ما أجي اسمعها بس وين اروح ضياء المن اروح
نور راحت يمها وتطبطب على چتفها //عمه حبيبتي شنو هالحجي البيت بيتج بابا مدا يقصد شي
انا حجيت :: نور اقصد بس هالمرة الرجال ما سووا شي حرام ولا ضم عليها كلها اريد اتزوج
سمر تباوعلي //ها يعني تشوفها ما بيها شي
اتنفست بعمق :: لا بيها أم عصام بيها بس الرجال ما نكدر نمنعه اسمعي أم عصام هذا بيتج اني هاي جيتي من
يم فريد وكال بالحرف الواحد يريد يتزوج على سنة الله ورسوله واني ما اكدر امنعه
جعفر //انمنعه وننعل والدي
انا خزرته وكلت :: لاتسب الناس مالها دخل وانتي سمر فكري وارتاحي ومن بأجر إذا يعجبج اشتريلج بيت ألج
والأولادج ولا تكولين اخوي يستثقل مني بس ما اكدر امنعه الفريد
أتقربت يمها وحضنتها وكلت :: سموره تذكرين لمن أنتي حامل بعصام واجيتي زعلانه وهو ضاربج تذكرين
شسويت بي الله عليج مو نومته أسبوع بالمستشفى لكن هسه الوضع اختلف الرجال يريد يتزوج وهذا الشئ رب
العالمين محلله
هي جاوبتني وهي تبچي // والله ضياء اني ولا مقصره ويا بشي
:: ام عصام اعرف وهو هم يعرف هذا الشي وما ناكره واكيد هو عنده اسبابه و ما اكدر اجبره الا هو يحجيلي
وكفت وأريد اطلع الغرفتي وأشرت بعيني الجعفر يعني الحكني باوعت الاختي شفتها مقهوره رجعت عليها كتلها
:: سموره وداعتج ماكو احد يستاهل دمعتج اعتبري ماموجود بس اريدج انتي القويه الي ما تهتمين وخلي فريد يفهم
الي باعج بذهب انتي اشمري ابلاش مو تبيعينه وتكبرين راسه
خليتها بالصاله وانا دخلت للغرفه واجه وراي جعفر گلي //بلي بابا
انا عضيت شفتي بغضب :: اكلك انت كل شويه تغير كلامك شنو قضيتك
جعفر رافع حواجبه //. شنو بابا
:: يعني انت وعمتك دلال ما اعرف مره لهجتكم جنوبيه مره بغاده
رد عليه بضحك //. واعرف كل الاطوار
لملمت حلگي :: انت شلون تروح وتاخذ وائل وياك ؟
جعفر // وين يابه
:: ها وين باالله انت جاوبني
حمحم // احم يأبه من شفت عمتي تبجي وضاربها انا فقدت كلت اروح اعرفه منو احنا وشنو وراها من أهل
انا بيني وبين نفسي فرحت لان عرفت انو انا مخلف رجال اكدر اعتمد علي بس ما بينت اله حجيت بهدوء وبحزم
:: شوف بابا عمتك صحيح مجروحه بس لاتنسى عدها أولاد وابنها عصام اكبر منك يعني انت من تهد على زوجها
شتتصور ولدها يسكتون من يشوفونك معتدي على ابوهم فكر مره ثانيه قبل لا تخطي هيج خطوه
جعفر باوعلي //صار بابا تدلل وانا اسف
:: لا تتاسف الي اريده منك اوزن الامور قبل لا تتهور افتهمت
جعفر//صار حجي افتهمت
وطلع جعفر وبقيت بالغرفة ما گدرت انام افكر بسوسن وكلامها ودموعها والفقر الي مرت بي صحيح كلنه مرينا
بهيج وضع وفقر وظروف لكن هي عدها سر كلش چبير
بقيت افكر وخابرت احد أصدقائي وكتله
:: الو اشلونك مصعب
مصعب //أهلا أبو جعفر شلونك
::الحمد لله مصعب انت والأهل اشلونهم
مصعب //الحمد لله كلنه زينين
:: دوم ان شالله رايدك بخدمه
مصعب //اامرني أبو جعفر
:: راح ادزلك اسم وأريد معلومات وافيه عنها
مصعب//تدلل ان شالله
:: مصعب ابيناتنا مو احد يعرف
مصعب //اعتمد ابو جعفر باجر او عكبه يمك
دزيت اسم سوسن الرباعي اني بليلة الي نقذتها نزلت أخذت الجنطه من السياره وفتحتها وشفت محتوياتها
وصورت اسمها وشحنت نقالها وأخذت كل الأرقام الي بي لذلك دزيت المصعب اسمها
نمت الصبح رحت للفاتحه كان يوم الثالث وسوى الختمه الظهر وره الغدا بدت الناس تروح كعدنا انا وإخوان هيفاء
لمن ما اجاني محمد اخوها وكلي
محمد//اتفضل ضياء
انا رفعت راسي شفت بايده فلوس وباوعتله : شنو هذني
محمد//مليون ونص من الفلوس الي انطيتهن للفاتحه ذني زادن وانت شفت بعينك احنا كل شي سوينا على
احسن وجه وانت أبو جعفر ما قصرت
جاوبته وانا مقهور :: شنو هالحجي هذا محمد هيفاء زوجتي وشنو اسوي الها انا مقصر وياها
محمد جاوبني بكلام خانكته العبره //لا أبو جعفر والله ما قصرت بشي بعد هذا الشئ الله كتبه عليها
انا ما اتحملت دموعي لا إراديا جاي تنزل أخذت الفلوس وانا اشوف ليث ابن اختها وأولاد اخوها وهمه يحملون
بالأغراض مال الفاتحه صرت ابجي بصوت لان جنت أتمنى يكون الها ولد وياهم اخوانها هم صارو يبچون
بعدين انا دزيت على ليث الي اجه وهو لاف چفيه على رأسه ومغطي وجهه اجه كتله :: استريح
هو كعد انا طلعت المليون ونص وانطيتهن الليث
هو كلي //شنو ذني عمي
:: ليث هذني آلك
ليث باوعلي وگال //لا عمي مشكور
:: ليث بابا انت مثل ابني وهيفاء چانت تحبك ومعتبرتك ابنها
هو جاوبني //وانا ابنها هي ربتني وما خلتني احتاج احد
:: اي ابني لذلك أريدك تأخذ هذا المبلغ لان اعرف هيفاء راح تفرح
ليث رد ايدي وجاوبني //أبو جعفر صحيح انا يتيم وحالتي على كدي بس انا ما وصل بيه الحال أخذ حسنه بثواب خالتي
انا جاوبته :: لا ابني انت لا تفهم الموضوع غلط انا اعتبرك مثل جعفر وانت عزيز عليه هذا المبلغ شتريد تسوي
بي سوي بس لا تردني حتى لو تنطي بثوابها بس مثل ما انا زوجها انت ابنها
ليث مكدر يصبر صار يبچي اخذهن وهو خال ايده على عيونه وراح يم سياج البيت وخله وجهه على ايدينه
وظل يبجي رجعت العصر للبيت وانا كلش تعبان لاكتني نور وهي تكلي //الله يساعدك يأبه انت مبين عليك التعب
:: هلا بابا اي اريد ارتاح وين عمتج
فوك بابا بغرفتها
:: زين انا راح أخذ حمام وارتاح شويه
اي بابا براحتك
ورحت الغرفتي وانا حزين على هيفاء اليوم اتاكدت انو هيفاء بعد ما الها رجعه دخلت ورحت للحمام وسبحت
وانا ابچي ما اعرف على هيفاء لو على نفسي الي احس بيها فارغه ما بيها حياة رغم وجود اولادي واخواتي واصدقائي
بس ما اعرف واتمددت ما حسيت بنفسي من نمت كعدت الساعة ثمانية بالليل لان بردت من السبلت اتعجبت على نفسي
هلكد نمت كعدت توضيت وصليت وخابرت أبو منتظر الي گلي هو بالباب نزلت لاكتني نور
ها بابا صح النوم
:: هلا يأبه
اصبلك عشا
:: لا حبيبتي خابروني عندي شغل انتم نامو يجوز انا أبقى بالمكتب
الله وياك
:: نور ليش اليوم ما رايحه ويه عمه للفاتحه
بابا لان عمتي سموره اهنأ انا اليوم حتى ما داومت
:: بابا بأجر داومي سمر مو غريبه
صار بابا
:: يالله مع السلامة
نور مو بس بتي لا صديقتي تشبه أمي الله يرحمها وأحسها كل شي تعرف عني حتى لو انا ما احجيلها
شخصيتها قويه ،وهادئة مثل شخصية امي ردت اسميها ليلى بس امي گالت كل ضياء بنته نور وسمتها امي
نور وكانت اتدلعها نواره
طلعت ويه أبو منتظر ومرينه على مطعم وأخذنا للحرس عشا همه دائما يجيبولهم اكل بس انا دائما اخذلهم أبو منتظر
جان بوده يسألني ليش ما أخذت اكل السوسن لكن هو سكت وصلنا انطيت الأكل للحرس وكلت لأبو منتظر
أخذ السيارة وروح البيتكم من احتاجك اخابرك
راح وانا دخلت للبيت كعدت بالصاله ما دكيت باب للغرفه
عليها جنت متشوق تكملي قصتها ولان بصراحه من تحجي يمكن شويه أنسى مرارة الهموم الي عشتها واحس
انو اكو ناس يمكن حامله هم اكثر من همي بهواي طلعت جگاره وصرت ادخن لا اراديا كحيت الظاهر هي
سمعتني فتحت الباب وطلعت جانت لابسه دشداشتها السودة وخاله شالها ولابسه جواريب هي كالتلي بنفس الصوت
المنكسر والخجل الي مرافقه
= الله يساعدك
انا باوعت الها ورديت :: أهلا
بقت واكفه اباب للغرفه ومدنكه انا كتلها :: ليش واكفه تعالي اكعدي
أجت كعدت ع القنفه مقابيلي انا ردت اكسر الجمود والخوف سالتها
:: اتعشيتي
هي هزت رأسها بلا
جاوبتها :: تدرين حتى أني ما متعشي وحتى ما اشتهيت اكل بالغدا
سوسن فزت من مكانها = تحب اسويلك شي وتآكل
:: اي سويلي اي شي
حسيت بيها راحت للمطبخ كانما نقذتها من موقف محرج خليتها تقريبا ربع ساعه ورحت وراها شفتها
مخليه ماعون بيض وطمأطه ومحميه خبز وكوب جاي هي باوعتلي وكالت
استاذ اصبلك جاي
=::لا خلي اكل وبعدين اشرب جاي
-زين بالعافية
:: وين وين طالعه
ما خليتها تجاوب كتلها :: جيبي صحن وتعالي تعشي
= بس انا ما اشتهي
انا جاوبتها بحده =:: لا تشتهين لان إذا ما اكلتي انا هم ما اكل
وجابت ماعون وخلت بي شويه بيض وطماطه وصبت كوب جاي وبدت تأكل صرنا ناكل واحنا ساكتين من كملت
رحت اغسل وكتلها :: جيبيلي جاي
مجرد ما كعدت بالصاله انا بديت ادخن وهي جابتلي كوب الجاي وخلته ودارت تريد تروح للمطبخ انا كتلها
:: وين رايحه
دارت عليه وردت =استاذ اروح اكف المطبخ
خليت رجل على رجل وحچيت :: عوفي المطبخ وتعالي اكعدي
هي اتكلمت كانما تتوسل = هنه ماعونيين اغسلهم واجي
:: زين روحي بس استعجلي
وراحت شويه ورجعت انا كتلها :: جيبيلي بعد جاي
وراحت جابت كوب جاي وخلته كدامي اخذته واتنفست بعمق
:: اي سوسن كملي دا اسمعج
هي كاعده وحاضنه اديها ومدنكه = يعني افهم من كلامك انت مصدكني
انا بلا اهتمام :: اسمع واصدق الشئ الي اقتنع بي
هي باوعتلي = والله استاذ انا كل الي احجي صدك والله شاهد عليه
واختنقت بعبرتها وصارت تبجي وتشهك انا باوعت عليها وحجيت
:: سوسن دا اكلج كملي أني اسمعج
هي استرسلت بالكلام
:: اشتغل عماد بشركة النفط موظف وجان لازم تجنيد إلزامي ولانه وحيد بس كمل التدريبات خلو يرجع الشغل الي
ما شفنا منه شي بس اله يلبس ويعزم أصدقائه ويطلع احنا البنات فرحانات لان هو من الصبح للعصر ما موجود
ومن يجي ينام وبالليل يطلع جنت انا بصف الثالث أما عايده فأهلي بطلوها مجرد ما نجحت الصف الرابع
لان هي ما تحب المدرسه ولان من راحت أمي تسال عليها المعلمة كلتلها أصلا بتج ما تدخل للدرس الا متأخره
والبنات يگولن تبيع بالحانوت ويه العاملة
:: اتذكر بيومها أمي لزمتها كطعتها من الكتل وبطلتها ومن سال عماد ليش بطلت أمي كلتله لان مو شاطره
وما تحب المدرسه يعني بس خساير عاد خليها بالبيت تساعدنا جنت حاله من المدرسه الظهر واتغدينا قبيله
جانت بغرفتها واندك الباب رحت فتحته شفت عماد جاي ويا رجال يجي عمره 30 سنه جان انيق جدا
ولبسه مرتب بشكل جان اسمر حنطي ورشيق وحالق لحيته وشاربه خفيف عماد گله
– – اتفضل استاذ البيت بيتك
ودخل الديوانيتنه كان بيها كرويتات خشب وعليهن دواشك اسفنج وفوكهن جراجف صح قديمات بس نظيفات
عماد سالني //تعاي وين أمي وأبوي كتله
= نايمين بالغرفة
– – وأنتي ليش كاعده ما نمتي
=جاي ادرس
جاوبني بحده //والله ثبرتينا شنو جاي اتدرسين كليه كلج بالابتدائيه روحي بسرعه جيبي جك ماي وكلاص
انا رحت للمطبخ ما لكيت جك رحت الغرفة قبيله لان أمي خلت اكثر مواعين الصيني بالمحمل الي اشترا فالح
هي چانت متمدده كالت
– – ها سوسن شرايده
انا حچيت بسرعه = قبيله اريد جك ماي وكلاص بسرعه من غراض أمي الجدد
– – اها وشتسوين بيهن
= موكالي عماد روحي بسرعه جيبي مي لان اجه ويا رجال وهو يكله اتفضل استاذ
هي كعدت وباوعتلي وكالت //وين هسه همه
= بالديوان يالله قبيله انطيني الجك عفيه خلي اروح لاعماد يصيح عليه
كامت للمحمل وطلعت جك كزاز حلو وكلاص ويا وبهالاثناء اجه عماد وعيونه عليه شرار وكلي
– – ولج نمتي صار ساعه منتظر
هي كلتله //على كيفك وياها انا عطلتها على مود انت تجي وراحت طلعت ثلج من الترمز وخلت ماي
وانطته وكلتله /ودي الماي وتعال اكلك
هو أخذ الماي ورجع سالته //عمودي منو هذا الجاي وياك
عماد // هذا مهندس حازم مدير القسم مالتي سيارته عطلت وانا اخذتها ويا العمي كاظم ولان دنيا ظهر
وبيتهم بعيد اصريت علي يجي يمنا للقصر مالتنا …گالها باستهزاء… على ما تكمل سيارته لان عمي كله
بأجر تخلص بس هو رادها اليوم وعمي كله العصر كلش تخلص
قبيله لملمت حلگها // ها عماد بس لازم غدا مو
عماد//اي شنو غدانا
قبيله//ياغدا انت تكول مديري دروح للمطعم ع السريع جيب دجاجه وخبز ولبن عيب من الرجال
عماد حك شعره//هم صحيح
قبيله//ياالله رووح بدون ما تكله بسرعه لا تتأخر
عماد//اي هسه صار
وراح عماد وانا اباوعله اشلون يأخذ كلام قبيله بس طلع عماد كلتلي
قبيله //روحي سركي باب الحوش واوكفي يمه من يندك لا تفتحينه
رحت سركيته وبقيت واكفه شفتها طلعت من غرفتها بدون الحجاب وخاله مكياج خفيف وعطر ولابسه دشداشه
خضره بيها نقطه سوده وجوه الركبة انا اباوع هيه راحت للديوان جان اكو شباك داخلي اخذني فضولي وكفت اباوع
منه بدون ما تشوفني دخلت للديوان وهي تحجي بصوت عالي
قبيله //اووف منو فاتح الديوان مو توني منظفتها أكيد هاي سوسن
هي تحجي وعلى أساس ما تعرف بحازم موجود هو أتفاجأ بيها وهي هماتين شفتها خلت أيدها على صدرها وهي تگله
—العفو منو انت
هو وكف وهو مذهول اعرف من جمالها كلها
حازم //انا اسف جدا بس أني صديقه العماد وعطلت سيارتي
قبيله وهي ترسم الخجل //العفو ما جنت اعرف اعذرني أهلا وسهلا بيك استاذ استريح
حازم//شكرا وأسف زاحمتكم
قبيله//لا استاذ ألبيت بيتك وصبت ماي واقتربت علي وقدمته اله بطريقه اكدر أگول عنها مغريه وهي تبتسم
وطلعت من الديوان وراحت فتحت السركي مال الباب
واجت للمطبخ بعد ما گلتلي جيبي الربطه وشدت شعرها ومسحت المكياج حضرت الصينية واندك الباب
ورحت فتحته واجه عماد جاب علاكه وانطاها الها هي كلتله روح ومن اكمل أصيحك وراح عماد هي باوعتلي وكالت
—دكي باب الديوان على كيف ولا تكولين الأحد انا رحت للديوان على مود بس يرجعون الصينية اسويلج احلى لفه
فرحت ورحت دكيت الباب واجه عماد أخذ الصينية وهي سوت الجاي وشفت حازم طلع يغسل وبعدين عماد جاب الصينية
وراح غسل وأخذ الجاي وانا رحت يم قبيله سوتلي لفة دجاج اخذتها وكأني ملكت الدنيا
وهي بقت بالمطبخ لمن ما أمي كعدت واجت للمطبخ سالتها
امي//منو عدنا
قبيله بصوت ناصي //المهندس مدير عماد سيارته عاطله وجابها يم عمي كاظم
امي//ها وهو عماد جاب الغدا مو عوايده
قبيله//اي يوم حتى الولد ما اكل روحي انتي هسه اجيبلج الباقي أنتي وأبوي واتغدو
امي//اي انا اليوم ما تغديت جئ مركة هوا
قبيله باستهزاء//على أساس احنا يوميه غدانا محمر ومشمر
و قبيله اخذت الباقي لامي وابوي
وبقى حازم وعماد كاعدين وقبيله غيرت الماي بجك ثاني نظيف انطته الي اخذته الهم العصر طلع
عماد وكال //احنا راح نروح نشوف السيارة
قبيله وكفت واتعمدت تحجي بصوت مسموع //هسه ياعماد لوعدنا تلفون جا خابرت عمي واستفسرت منه ع السيارة
عماد //ها اي هم صحيح بس شايفه المعاملة وشكد يرادلها ركضه
قبيله بحسره //انا احجي هيج تمني
وطلعو عماد وحازم عماد بقى لليل وبعدين رجع واستفسرت أمي منه كال
اي عمي صلحها وما أخذ منه الخاطري
امي //الله يطول عمره ابو جواد ما قصر
ثاني يوم عماد مراجع بسيارة الشركة لا رجعه حازم بسيارته بس ما دخل يوم ثاني هم حازم وصل عماد
اهنا عماد اصر علي حازم يشرب جاي عدنا انا شفته رحت كتلهم قبيله سمعت وكفت قريب الباب وهي لابسه
عبايتها دخل عماد شافها كلها
– – وين قبيله طالعه
– – هلا عمودي رايحه البيت أبو فاضل على مود اخلي ابنهم يجي يشيلي مكينتي مال الخياط أؤديها للمصلح
لان انكسرت وما صارت تخيط
عماد جاوبها |/ هسه ارجعي وياي خطار عود تالي روحي
هي دارت وجهها ورجعت طلعت جك ماي وكلاص واجه عماد اخذهن كلها
سوي جاي زين
ليش عماد منو وياك
عماد //وياي استاذ حازم
ها هلا بي هسه دقايق
وراحت سوت الجاي وصلته ودكت الباب وره نص ساعه اجه عماد كلها //
قبيله راح اطلع ويه استاذ حازم إذا تردين تعالي نوصلج أخذي المكينه للمصلح
قبيله بفرح //اي والله علوا بس خاف نسوي زحمه
– – لا اصلا هو اصر الا تاخذين المكينه للتصليح بس قبيله أخذي وياج احد على مود ما ترجعين ابحدج
– – اي هسه ابدل السوسن
وبدلتلي قبيله وهي تتنفس بسرعه ومبين عليها الفرح ورحنا صعدنا بسيارة حازم چانت جديده ونظيفه تخبل انا
مو عبالك صاعده بسياره لا عبالك مالكتها الي متسجله باسمي
انا قاطعتها :: وليش كل هذا
هي رفعت عيونها بوجهي وجاوبتني وهي مبرطمه = لان الفقر يا استاذ الفقر والحسرة وشلون چان البشر يتعجب بكل شي
جريت حسره ::أيي هم صحيح كملي بدون لا تبچين شي راح وانتهى وانا الي غايه بحديثج كملي سوسن اسمعج
وكل شي احجي لا تخافين
(الصراحه بحكم عملي والامور الي شفتها بحياتي حسيت بهاي الانسانه صادقه هي حچت)
= صعدنا انا ويه قبيله وره وبقينا ساكتين وانا أتمنى وحده من الطالبات الوياي بالمدرسه تشوفني راكبه السيارة
ونزلنا بالسوك وهي شايله المكينه كانت يدويه قبل لانوصل للمصلح قبيله كلتلي
سوسن شتردين اشتريلج حبيبتي گولي
انا بخوف جاوبتها = لعابه چبيره شفتها معلگه
قبيله //صار حبيبتي انا اشتريها الج بس ابد لا تحجين الأحد اي شي تشوفينه وتسمعينه زين حبيبتي وانا اي
شي تردي اشتريلج أي شي مو بس اللعابه
انا طرت من الفرح وصلت يم المصلح كلها شبيها مكينتج
كلتله //عمي ما بيها شي اريد أبيعها
واشتراها منها المصلح وكلتله //عمي إذا يجي وياي ولد لو مره كبيره كلي ما يصير الها تصليح انا اشتريها
منج تفصيخ
الرجال گلها //وليش
قبيله // عمي لان اريد اشتري مكينه كهربائيه مليت من هاي
وافق خصوصا وهي خلت الفلوس كلتله
– – – يومين تلاثه وارجع آلك اخذ الفلوس بس انت شوفها وجربها
المصلح فحص المكينه وشافها واتفاصل وياها بالسعر ورجعنا وهي فهمتني كالت
– – فد ينطيني الفلوس اشتريلج اللعابه بس انتي كدام أمي وأبوي وعماد كولي المصلح كال بعد تلث تيام ها
ولا تگولين راح اشتريلج لعابه افتهمتي لان هديه وعايده البرعه ياخذنها منج
انا هزيت راسي وصلنا للبيت وسألوها وكالت من أمي سالتها
– – الرجال عده شغل كلي غيبي شكم يوم وتعاي
بعد انا محد سالني ثاني يوم الضحى اندك الباب وطلعت أمي واسمعها تكلهم اتفضلو يمه دخلو هاي الديوان خلو بيها
شفت تلث رياجيل بيدهم تلفون ودخلو ظلو يركبون بي جنا نباوع بفرح لان احنا نشوف التلفون بس بالتلفزيون
خو عايده چانت كل ما تشوف فلم تخلي أيدها على اذنها وتسوي روحها تخابر بصديقاتها واجت قبيله من السوك
وشافت العمال دخلت راحت يم أمي وسالتها وهي مستغربه
– – يمه منو ذول
أمي //يگولون هذا تلفون بأسم عماد
قبيله //يا يعني عماد سووا معامله بس شو بساع جابو
امي//والله ما ادري همزين طلعت من عماد
قبيله//يمه مي خالف هسه تكدرين تخابرين بيت خوالي بدل ما ترحين للبريد تخابرينهم
امي //ومنو يدفع كل شهر
قبيله//شوفي أمي هسه بس اول مره احنا نخابر وانوب الي يريدنا يخابرنا وما تنحسب علينه فلوس
امي //. انا شمدريني عبالي كله بفلوس
من كملو العمال شفت واحد منهم خابر بالتلفون وكله استاذ كملته
العامل انطى الامي ورقه بيها رقم وگللها //خاله كملنا وهذا رقمكم اخاف احد يريده
وراحو العمال وامي انطت الرقم القبيلة صرت وراها وحفظته رأسا هديه عزلت المسواك وامي راحت تطبخ
وانا وعايده نباوع للتلفون بلكي يرن وصحيح رن احنا طفرنا ما اعرف من الفرح من العجبه بالتلفون راحت قبيله
وشالته وهي تكول
الو
هلا بيك
اي هسه عرفت انت شكرا
صدك على مودي
مشكور
اي ان شالله
تمام
الله وياك
وراحت الغرفتها ماحجت عايده كالتلها
قبيله منو اتصل
هي خزرتنا كلنا مو بس عايده بحيث ما حجينا وياها صبينا الغدا وامي راحت البيت خالي واجه عماد شاف التلفون
هي لاگته بفرح // هلا عمودي عاشت أيدك اي هيج اقلها إذا تريد تخابر صاحباتك تتمندل كدامهن
عماد وهو يبتسم//والله قبيله الله ينطي استاذ حازم هو سالني كلي //ليش ما عدكم تلفون اخاف احتاج اخابرك
انا كتله //استاذ معامله أو واسطه ومو الكل واحد ينطو
اليوم كلي راحو يشدولكم خط وباسمك
قبيله كالت //الله ينطي خوش إنسان لازم تخابره وتشكر منه وعلى راس الشهر اعزمه غدا عشا يستاهل
عماد //وانتي گلتيها يستاهل بس خلي افتهم منه شيحب ياكل تدرين قبيله هذوله المثقفين أيدققون بااكلهم
وخابر عماد حازم واتشكر منه
وره يومين العصر كلش خابر حازم عماد وكله تعال جيبلي أغراض وأجر تكسي وانا أحاسبك
واجه عماد اسمعه يكل الامي انطيني فلوس استاذ حازم يريد أغراض
أمي //ما عدي يأدوب يكفنه عشا وغدا الباجر
عماد //وهسه اشلون عيب الرجال يريد اغراض شگله
امي //يووم طلع من رواتبك
عماد //لو عدي أجي اطلب منج
قبيله رفعت بردة الباب وكلتله //شبيك عمودي
عماد بعصبيه // ما بيه اريد فلوس لان استاذ حازم خابرني يريد مسواك حتى كلي جيب تكسي وانا احاسبك
وامي تكول ما عندي وانا بس اوصل وينطيني ارجعهن
قبيله //تعال انا انطيك
عماد //صدك تحجين
قبيله راحت الغرفتها وانا وراها واشوف عماد اجه هي طلعت فلوس من جوه نضيدتها وانطتهن العماد وگلتله
هاك وروح أخذله زايد مو ناقص لا يعتبرنا فكر وما شايفين ولا تأخذ منه اي شي
عماد / وأنتي منيلج
قبيله جاوبته رأسا //فلوس المكينه عود من يجي فالح يچملني واشتريلي وحده نص عمر
وراح عماد وانا بقيت كاعده بالديوان اريد بس التلفون يدك وفعلا دك التلفون وكلنه أجينا نركض نريد نشيله وجانت
عايده اسرع مني
الو //الو//الو
أجت قبيله منو ع التلفون
عايده //نكول الو محد يجاوب
قبيله اتكلمت بتهديد //لحد يشيله اخاف صحبان عماد وانتن تعرفن ما يقبل احد يحجي ويه اصدقائه
الكل خاف لان عماد اذا لزمنه ما يرحمنه وطلعت عايده وهي تسولف على هديه تگلها
قبيله عبالك مديرة المدرسه بس تهدد وتخزر
انا بقيت كاعده بالديوان واتصل مره ثانيه وجاوبت قبيله
– – الو هلا ها اي يمته وعماد شلون امر ضروري زين وين العنوان اي اجاك زين بأجر الله وياك
واجت أمي وسألتها منو ع التلفون
هي باوعتلي يعني اسكتي وكالت //يمه صاحب عماد راده وانا كتله ما موجود طلع
أمي //ياهو منهم
قبيله خلت ايدها ع خدها //يا يمه تصدگين نسيت ما سالته يالله من يجي عماد هو يعرفه لو يرجع يتصل مره ثانيه
بالليل اجه عماد وجانت قبيله منتظرته بس اشوف عماد مو طبيعي يمشي اعوج وعيونه حمر ويغني ويضحك قبيله دخلته
للديوان ونيمته ع الكرويته وراحت جابتله فراش وكلتله
اششش اسكت لا اهلي يگعدون نصي صوتك
عماد وهو يضحك //وليش انصي صوتي اخاف يطردوني من قصر الزهور أنتي شايفه الناس شلون عايشه
وج قبيله احنا مدفونين بالحياة افتهمتي وتكليلي لا يسمعون اهلي خلي يسمعون انا اريدهم يسمعون تدرين يا اختي
انا مستعد اصير خادم ابيت استاد حازم ولا هاي العيشه
قبيله //اسكت عماد ونام بأجر عندك دوام
عماد //اي هو انا راح انام ليش انا شعدي غير النوم
انا قاطعتها :: الي جاي اسمعه منج أنتي دائما يم قبيله ليش
سوسن = لا مو بس اني احنا كلنه يمها ابوي وامي وعماد واني واخواتي وكلامها هو الماشي وهي دائما
تنيمني يمها بغرفتها وانا تعلقت بيها
::تحبج چانت
ما جاوبت بس حركت شفايفها انا گتلها ::وبعدين شصار
باعت ريگها = ثاني يوم كعد عماد الصبح واتريك وبدل وكال اليوم يبات بالشركة شفت مسائي
ابوي كله //ينطونك حوافز مو
