رواية الشيطان اختي الفصل الخامس 5 بقلم انين الليل
الندم
كلمه نقولها نرددها نعلم معناها ونعرف لما نقولها
تارة ياتينا الرد سريعا واحيانا بعد فوات الاوان
ياتي الينا وحينها لانملك الا دموعا واهات نرددها باختناق
ولكن مهما ندمنا ومهما اعطينا من مبررات واعذار الا ان ندمنا له مسوغ وهو اننا اخطانا واخطأنا كثيرا
ضياء
وانا اسحب بالجكاره سالت سوسن :: وانتو رحتو للمستشفى
هي هزت رأسها يعني لا حسيت بيها خجلت رغم صار للقصه اكثر من 30سنه
:: لعد وين رحتو
بلعت ريگها = انا رحت ابدل وشفت قبيله خابرت بالتلفون هي دخلت للحمام وبدلت ولبست حجابها وعباتها وطلعنا
لزمتني من أيدي ورحنا صوب المستشفى وهي تكلي
-حبيبتي سوسن احنا رايحين المكان إذا سالتج أمي أو اي احد بالبيت كولي رحنا للمستشفى على مود بأجر
اشتريلج اللعابه الجبيره الي ردتيها (دارتني عليها وخزرتني بتهديد ) واذا فكيتي حلكج بغير هالكلام اموتج
مووت افتهمتي
انا جاوبتها بصوت ناصي =لا ما اگ
قاطعتها السوسن ::ليش انتي تخافين منها
هي هزت راسها يعني اي
:: شنو حجيتي وياها
= قبيله مو ذاك اليوم كتيلي اشتريها ألج وما اشتريتيها وهسه تگليلي باچر اشتريها
هي باوعتلي كالت //يعني انا اچذب عليج ذاك اليوم ما عندي فلوس اليوم عندي وكتلج اشتريها ألج بس إذا
تحجين ما اشتريها
انا جاوبتها بترجي = لا قبوله والله ما احجي
هي باوعتلي وابتسمت //عفيه السباعية
وصلنه قريب المستشفى اجرت تكسي وصعدنا وره وانطته العنوان نزلنه بعد ما انطته الكروه
مشينا مسافه قليله وصلنه يم عماره وهي لازمتني من أيدي دخلنه للطابق الأرضي وعلى اليسرى كان اكو باب
خشب من وصلنا الباب الشقه قبيله دنگت ومدت ايدها جوه الدواسه رفعتها وأخذت المفتاح وفتحت الباب ودخلت
وانا وياها متفاجئه
انا حچيت :: أكيد من خابرت هو دلاها ع العنوان وين يخلي المفتاح
= اي بالضبط
سوسن باوعتلي وگالت بتساؤل = استاذ ليش تريد تعرف قصتي من البدايه
انا حمحمت واستعدلت بگعدتي وكتلها :: إلغايه بنفسي بس إذا هذا الشئ يأذيج بلا منها
هي ابتسمت ابتسامة استهزاء وكالت = أياذيني هو من زمان آذاني وموتني خلاص هاي الي گدامك
(وبدا صوتها تتكسر بي العبرة ونزلت دموعها كانما حنفيه )
= هاي الكدامك إنسانه ميته تمشي بدون روح بدون شعور بس تتنفس وتآكل وتشرب
من شفتها هيج كمت جبت الها بطل ماي من الثلاجة :: انا اسف اشربي ماي وارتاحي اسف هوااي
أخذت الماي شربت شويه وأخذت منديل مسحت بي دموعها تدرون دموعها شي خرافي ينزلن بسرعه وبقوه
كتلها :: رجاءا ارتاحي و لاتكملين
هي بلعت ريگها = لا استاذ اسفه (بعدين هزت أيدها)شي راح وانتهى ليش من اذكره اضوج
انا رديت عليها :: بس أكيد اله صله بحياتج
هي اتحسرت = اي والله وصله جبيره
:: هسه مثل ما كتلج ارتاحي
مسحت خشمها وكالت = لا والله استاذ انا حابه احجي (باوعت وكالت )تشرب كهوه اسويلك
:: ياريت
وراحت للمطبخ وسوت حتى ما سالتني شلون احبها جابت فنجانين وقدمتلي انا شربت شفت الگهوه حلاتها وسط
شربت الفنجان وهي هم شربت جانت مدنكه وباوعتلي وكالت
= دخلت للشقه وانا صافنه عليها عبالي قصر جانت اشبه بالي اشوفه بالافلام النظافة والأثاث الي عمري ما شايفه
ولا كاعده على هالشكل اثاث جان اكو مدخل شفت حازم كاعد على قنفه من شافنا وكف جان لابس بنطلون وقميص
بصراحه لحد هسه اتذكر أناقته رحب بينا ونزل باسني بخدي وهويباوع القبيلة يعني ليش جبتيها وياج قبيله ابتسمت
تطمنا كالت
سوسن زعلانه تريد لعابه جبيره
حازم //اها بس لعابه تدلل سوني الحلوه
حازم كال //ليش واكفين اتفضلو اكعدو
كعدنا وانا أتحسس بايدي القنفه الي كان قماشها من القديفه الناعمة اتذكر چان لونها بنفسجي
حازم طلع ليبره ورجع كلي //سوسن عمو تعالي للمطبخ
هو مشى قبلي وانا باوعت القبيله وشفتها تبتسم وتهز براسها يعني روحي رحت هو فتح الثلاجة وكلي
أخذي شنو تردين الي يعجبج طلعي واكلي
أني بقيت مبهوره وانا اشوف المطبخ وألكاونترات وميز الطعام والكراسي والثلاجه لمن فتحها جنت بعقل طفله
ودي اكعد بيها
هو سووا كهوه فنجانين وأخذ گلاص ماي انا باقيه صافنه رجع گلي //اكعدي
وطلع من الثلاجه بطل ببسي كزاز واخذ صحن خلا بي فواكه وخلاها گدامي وكرزات وشفته أخذ كرزات بصحن
ثاني وكلاصين فارغات وراح انا فرحت وانا اشوف الببسي چان من يوديني عماد اجيبله من المحل اشرب شويه
وامسح حلكي بس هسه انا أميره يمي فواكه وكرزات وبيبسي
بقيت بالمطبخ بعدين طلعت للصاله وانا جاي اكل بالتفاحة وبطل الببسي بايدي سمعت الباب اندك بالايد اندك
اشو محد طلع انا ما فتحته رحت للغرفه اريد اصيح الحازم كان الباب مردود ع النص اجيت
سكتت جاوبتها :: ليش سكتي مو كلتي شيراح وانتهى يعني احچي
بلعت ريكها. :: شفت حازم كاعد ع قنفه ويمه قبيله بدون حجاب وهو خال ايده على جتفها وهي خاله رأسها بصدره
يمرر بايده على أيدها ويرفع كفها
ويبوسها هي حاضنته وصارت تبچي وتگله //حازم ما اگدر أعيش بدونك
حازم//كافي لا تبچين ياروحي
قبيله//ابچي على حظي ليش أني من دون البنات لا كملت دراسه واتزوجت حتى ما مكمله 12سنه واحد اكبر
مني بعشرين سنه وبالعشاير ومن حبيت حبيت واحد مستحيل بيوم يكون حلالي
حازم من سمع كلامها كام وركع كدامها وكلها //قبيله لا تحجين هچي انا أبقى وياج وما اتركج صدگي
اموت وما اتركج گليلي شنو تردين يجرالج
هي صارت تحضنه اكثر لمن ما صارت عينها بعيني وهي تباوعلي بتعجب وتخزر بيه انا رجفت من الخوف
وانا بالأساس چنت اشوف واسمع وانا ارجف حازم انتبه وباوع دار شافني وكف وسألني //شكو عمو ليش واكفه
انا بلعت ريگي = عمو الباب جاي يندك
حازم جاوبني//ها ما سمعته ادخلي يم اختج وهسه أجي
دخلت خايفه من قبيله لان تخزرني بقيت واگفه هي صاحتني انا رحت يمها گالت بنبره حازمه
– – سوسن غير تدگين الباب مو عيب هچي تتصرفين
انا خليت امتوني قريبات على وجهي يعني ما ادري هي حاچتني بهدوء // حبيبتي سوسن أنتي كل شي ما شفتي
مو واحنا رحنا للمستشفى وبعدين للسوك
انا هزيت راسي بيي بقيت كاعده وانا اباوع للغرفه بيها غرفة نوم حلوه كلش وبيها قنفه وكبالهم طبله وشفت عليها بطل
عرفت بعدين هو ودنكت
جاوبتها :: تره اكثر الشباب چانو يشربون بذاك الوكت بس قبيله تشرب ويا
هي ردت بسرعه كانما تريد تبعد التهمه = لا لا قبيله ما شربت ويه حازم بس هو
رديت بهدوء :: مفهوم كملي
سوسن = راح حازم فتح الباب و رجع بيده علاكه واجه يمي باوعلي وفتح العلاگه وطلع لعابه وكلي
حازم وهو مبتسم//هاج عمو هاي احلى لعابه لكوها وجابوها ألج
يمكن انا بوكتها راد ينغمي عليه لان بحياتي ما مشتريلي هيج لعابه حتى بالحلم ما احلم بيها بعدين طلع بدله وكلي
– – وهاي هم الج ياحلوه
انا صار بس گلبي يدك من الفرحة هو كلي
– – – روحي عمو بدلي بالغرفة الثانيه وتعاي خلي نشوفج
انا أخذت البدلة جنت فرحانه بيها جانت بيضه وضيقه من فوك ومن جوه كشكش قصير احمر بوقتها جانت روعه
بدلت بسرعه واجيت أراويهم سمعت قبيله تكله الحازم //لا ما اكدر اخذها تدري عماد من يعرف يموتني
حازم//حبيبي بس أني اشتريتها على مودج
قبيله //وهمه راح يسألوني منين جبتي فلوسها شنو اگللهم
حازم حاوطها بذراعه //زين لا تضوجين أني احلها
قبيله//وانت شنو ذنبك دزيت الحارس مال العمارة وجاب لعابه وبدله
حازم//مي خالف قبيله على مود ما تحجي
قبيله//لا انا اعرفها السوسن ما تحجي
حاجاها بضحك //هاا يعني تربايتج
هي بضحكه //اي تربايتي
قاطعتها وكتلها :: زين أنتي مو تكولين عدها ولد بگدج أو. اكبر منج
سوسن = اي هو اكبر مني بسنه
ضياء :: شنو وينه اشو ما اله فعاليات
سوسن= ابنها فقير همه بس يأكل حتى ما سجلته بالمدرسه اخرته سنتين چان دائما كاعد ما يكوم من مكانه
وإذا گام يخرب ما يعمر
سالتها :: يعني قصدج مختل عقليا
نزت راسها = لا بس كان استيعابه قليل
:: زين كملي سوسن
= من سمعت كلامهم ما افتهمت شي بس عرفت قبيله ما راضيه لان جابولي لعابه وبدله بدلت وچنت خايفه قبيله
تاخذ هذا الكنز مني هالمرة دكيت الباب
وسمعت حازم يگلي //فوتي عمو
انا دخلت وهمه شافوني اثنينهم همه اتكلمو بنفس الوقت
الله تخبلين
حازم باوع القبيلة وغمز الها //قبيله شوفي تخبل شنو هالجمال
هي كلتله //اي حلوه طالعه عليه
هو أتقرب الها بحيث حلكه يم خدها وكال //أنتي محد يشبهج بجمالج
هي ضحكت وباعتلي وكالت //روحي انزعيها للبدله والبسي ملابسج واذا سألوج كولي اشترتها الي اختي
من السوك هي واللعابه
چان بكلامها نبرة تهديد يعني اخذهن منج انا هزيت راسي ورحت بدلت وبقيت ما طلعت لازمه
البدلة بايدي كعدت بالغرفة بعدين غابت ساعه او اكثر أجت كالت
– – يالله خلي نروح
طلعت وهي أخذت البدلة وخلتها بالعلاكه وكلتلي الزميها وهي لزمت أيدي وطلعنا لكيت حازم منتظرنه بسيارته
صعدنا وره وتمينا ساكتين وهو وصلنا قريب البيت نزلت دكت الباب وفتحتلنه عايده ودخلت قبيله وانا وراها
وعايده عينها ع العلاكه أمي طلعت من المطبخ وكالت
امي//قبيله وين چنتي مو اتاخرتي
قبيله وهي تصطنع الوجع والتعب //لا يمه ما اتاخرت المستشفى سره وين يالله دخلت
امي//اي و الطبيب شكلج شبيج
قبيله//يووم ما حجى كتبلي هذن الحبوب
وطلعتهن من جيبها جان الدوه مخليته بجيس زغير
انااتعجبت وسالت نفسي = منين جابت الدوه واحنا ما رحنا للمستشفى
انا احجي ويه روحي ما حسيت الا أمي تكلي //ولج سوسن ثوله ما تسمعين
انا عبالك فزيت من النوم = ها ماما
أمي بعصبيتها المعتادة //وعمه ها ماما شو خلي اشوف علاكتج
انا انطيتها العلاكه وانا خايفه أمي فتحتها غمتني //أمدااج كونتي ع المكروده عنيلتي الا لعابه وبدله وهي باعت
المكينه على مود تشتريلها مكينه وأنتي تلحين عليها اشتريلي ما اشتريلي
انا باوعت والدمعة بعيني وباوعت القبيله هي كالت الامي //لا يوم لا تحجين على سوسو بأجر تصير
دكتوره وتعالجنه ابلاش
أمي هزت أيدها وكالت الهديه //اهديه اهديه هووي عليمن صافنه على اللعابه لو البدلة يالله صبي
غدا وخلي الابوج واخوج
خطيه جانت هديه وعايده يباعن للعابه وهي بايدي انا رحت ضميتها بالبوفيه ونزعت ملابسي وضميتهن هنه والبدلة
بعد ان كملنه غدا لمت هديه المواعين وراحت تغسلهن وعايده صبت چاي الامي وقبيله وبعدين قبيله راحت الغرفتها
وانا رحت وراها شفتها متمدده ع الجربايه اجيت اطلع لعابتي هي كعدت وكلتلي
قبيله//عفيه بالسباعية وكل ما ترحين وياي راح تأكلين فواكه وتشربين شربت واشتريلج هواي شغلات
انا بفرح = صدك قبيله
قبيله//اي حبيبتي انا كلت الحازم هاك فلوس واشتري السوسن الحلوه
لعابه وبدله وبعد وبعد أنتي بس اسمعي
كلامي ومو عبالج انا وحازم نسوي شي غلط باچر بس تكبرين
تفتهمين ليش هيچ اسوي وتعرفين شكد الزمن قسى عليه
وشگد اهلي ظلموني
انا ما فهمت كلامها أخذت لعابتي وانا فرحانه ودي يوميه تطلع واروح وياها ورحت يم اخواتي لكيتهن متمددات اجيت
يمهن كعدت وانا اشوفهن ضايجات كتلهن = كلنه نلعب بيها بس بالليل أنيمها يمي
هنه فرحن مثلي وره تقريبا ساعه اجه ابوي واتغدا ونام وبعدين اجه عماد ما يتحاجه لان مأخذ شفتين نام ما اتغدا
اكيد مأكل بالشركة
رن التلفون الكل نايم كلنه فزينا نريد نجاوب عايده كالت // هديه خلي انا اجاوب أنتي ماتعرفين تحجين
وباوعت عليه وكالت //وأنتي التهي بلعابتج
وشالت التلفون وصارت تحجي بدلع مثل المسلسلات بذاك الوكت
اللوو
أهلا اي موجود نايم
اي ومنو نكله
دقيقه إذا تسمح
وراحت الغرفة عماد وندهته //عماد عماد
اممم شكو
واحد يكول كليله استاذ حازم رايدك
عماد فز كلها // وينه
هيه اتاشر بايدها بخوف // لا عماد مو جاي عليك بالتلفون منتظرك لان كلي روحي اندهي
راح عماد يمشي بتثاقل وشال التلفون ويحجي بنعاس وتعب
الو هلا استاذ
اي تدلل شنو اجيبلك
ها مثل ذاك اليوم
تدلل استاذ ساعه وانا يمك
وراح للمغسلة غسل وجهه وأخذ قميصه لبسه وراح القبيله هي بالغرفة كاعده تخيط بجامه الابنها بايدها دخل يهز بايده
قبيله باعتله//ها عماد شو تهز بايدك
عماد //من هذا حازم اللزكه
قبيله//يا شبي هذا
عماد//خابرني جيبلي مسواك يعني كتب اسمي بالاوفر تايم راح يرجعها الجيبه مسواك تصدكين حتى مشروب أخذله
قبيله //شنو هو ما ينطيك فلوس
عماد //لا ليش الجذب ذاك اليوم من أخذت المسواك هو ما قبل الا ينطيني الفلوس بس انا ما قبلت
قبيله //اي وهسه هم لا تأخذ منه
عماد باستغراب //شبيج قبيله انا منيلي حتى ما قابض
هي راحت ومدت أيدها جوه دوشك مصفطته ع البوفيه وطلعت خمس دنانير وكلتله
هاك أخذ واتسوك مو تشوف الرجال زين وياك
عماد اخذ الفلوس وباعلهن //وأنتي منيلج
قبيله بارتباك//ها موهذني فلوس الخياط ظامتهن بس ما ينعزن عليك
وأخذهن عماد وهي تكله //هالمرة هم لا تقبل تأخذ منه خلي نشوف بالله وين تصفى ويا
وراح عماد وبقى لليل تقريبا الساعة بالعشره بالليل اجه دك الباب راحت قبيله عبالك چانت منتظرته انا طبيعة نومي
خفيف يعني احس باي حركه بسرعه أفز هي أجت للغرفه وعماد أتأخر بعدين كلها
عماد //قبيله تعالي ساعديني بالأغراض
هي راحت انا جوه الفراش وهي تدخل بالأغراض وتگله
قبيله //هذن منيلك عماد
عماد//دخليهن وانا أكلج
انا اباوع جانن عبارة عن كراتين اجه كعد قبيله عادت علي السؤال
قبيله//عماد هذن منيلك
عماد گال //من أخذت المسواك والمشروب ورحت كعدت شويه واترخصت منه هو شالي فلوس انا كتله ابد
ما اخذهن هو ما وافق بس انا كتله مره ثانيه من اجيبلك مسواك اخذ منك
حازم //لا ما طول ما تأخذ الفلوس ما بيها مره ثانيه
عماد//استاذ ما بيناتنا انت صاحب فضل عليه
حازم//ما مقبوله منك عماد اي فضل هذا شمسويلك بعد صدك ما اوصيك
عماد //بكيفك استاذ أني اترخص
حازم//وين أبقى اتعشى وياي
عماد //لا استاذ تسلم
حازم//انا مصر عماد أبقى تعشى واذا ما تبقى صدوك راح ازعل
وتعشينا لان هو وصى على عشا من المطعم وسوا جاي وشربنا بعدين گلي //عماد
نعم استاذ
حازم//اگلك ماطول انت هاي مرتين ما تقبل تأخذ فلوس اريد اگلك شي
اي استاذ اتفضل
حازم//بس لا تعتبره انتقاص منكم
لا استاذ اسمعك
حازم//اگلك انا هاي العمارة مالتي وأختي چانت ساكنه اهنايه قبل لا تسافر
اي استاذ الله يزيد ويبارك
حازم//الله يخليك قبل السفر اشترت شغلات ومن سافرت عافتهن اخذهن عماد يجوز تستفاد منهن
عماد//لا استاذ شكرا
حازم//هو شنو لا استاذ أني ما جاي أتصدق عليك اخذهن استفاد منهن بدل ما هسه يجي واحد وانطيهن اله
عماد//هاا بس
حازم//بابا لا بس ولا ابد تعال شوفهن هي مجمعتهن اهناك اذا يعجبنك اخذهن
ورحت للمطبخ كان بي مخزن زغير وشفتهن جانن جدد ما مستعملات هاي مكينة الخياط بالچيس وانوب ع الكهرباء
انا رأسا فكرت بيج
قبيله//يا بعد گلبي اخوي حبيبي
عماد //اي وهذا اوتي ومسجل وفير ( سشوار شعر قبل يسمونه فير ) وكارتون مواعين صيني
من شفتهن جدد جبتهن انا بالبدايه عبالي ملابس لو شي بس من شفت هذن بسرعه اخذتهن
قبيله//شفت مو كتلك هو مثقف ويعرف الأصول
عماد//اي والله قبيله طلع مثل ما گلتي
قبيله//اگلك عماد بس لا تگل الأهلي هذن من حازم
عماد //لعد شگللهم
قبيله وهي تعض على شفتها //گلهم الشركة باعتهن النه بالاقصاد كل شهر تخصم من عدنا دينارين وانت
جبتهن بفلوس الشفت الثاني
عماد //. وليش شنو خايف قابل بايگهن
قبيله //. شبيك عماد يوميه يسالوني اگلج ما تعرفين شگد يحسبوله بلكي ينطينه مصرف ويساعد بالبيت
– – ها جاي يعدون وراي
هزت راسها // اي عماد يوميه يسالوني وانا اكلله عاد انت امسر عيونهم بذني الغراض
عماد//اي والله جبتيها أخذي المكينه واستفادي منها
قبيله//همزين أجت بوكتها تدري هاي أم ليلى العلمتني خياط گالت اي وحده عدها مكينه تطرز انطيها قماشات
تخيطهن وتطرزهن وانا انطيها تكلفة الخياط يمكن عدها محلات تبيع بيهن
عماد//اي زين لعد نسقي وياها
وفعلا ثاني يوم گال الاهلي نفس ما فهمته قبيله اهلي فرحو لان عبالهم عماد حس بالمسؤوليه وصار يجيب شغلات للبيت
هي اخذت المكينه وهو أخذ المسجل والفير الغرفته والاوتي گال الهديه اتعلمي تكوين بدل ما اودي اهدومي للاوتچي
وصارت قبيله تطلع وتطب ومحد يگلها وين رحتي وين اجيتي
:: وأنتي
= انا تأخذني وياها
:: للشقه ؟
=اي اكثر الأوقات للشقه
:: ها يعني اكو مكان ثاني
هزت رأسها وكالت = اي مزرعه وهاي صارت تروح الها بيوم ما عماد شفت إضافي
سالتها :: تشوفين شيسوون
هي دنكت وجهه صار احمر وهزت راسها
:: گدامج
هزت راسها وگالت. = يبدون يگعدون وبعدين يسدون الباب
اخذت جگاره ودخنت :: زين زوجها شنو وضعه
= فد مره اجه زوجها وگال //نقلوني للحدود
:: شنو للحدود ؟
= يعني شرطة حدود هو كان ضايج بس عماد حچى ويا
– – وليش ضايج فالح بكل الأحوال انت تنزل كل أسبوعين تلاثه
فالح //بعيد الدرب
عماد //انت تعرف شنو شرطة حدود انا اگلك تلاحق المهربچيه
فالح //اي وهاي بيها خطر ورمي وضيم
عماد هز ايده //يا خطوره شوف هذا شيحجي بابا تعرف من تلاحقهم شكد تحصل من تلزم واحد شينطيك لو من تسهل
عبور ثاني شكد راح أتحصل من غيرذوله الي يدخلون ويطلعون هاي شبيك فالح اتلحلح
قبيله من سمعت فرحت وكلتله // فالح صدوك على كلام عماد اتلحلح خلي انلم نفسنا
وهاي المره قبيله ما اتمرضت لا دللت فالح حتى ما يشوف واسطه وما ينتقل
:: وانتقل فالح
= اي انتقل للحدود بالبصرة وبهذا الوقت صارت الحرب العراقية الإيرانية وبدو يسحبون
الشباب للتجنيد أمي جانت كلش خايفه على عماد بس هو بقى يداوم بالشركة اشوف امي مستحيه وتگل الابوي
اسكت خلف عيب من عماد
ابوي //شنو بايگينه حميده تره بعدج زغيره بلكي الله يقسملنه اخ العماد
واشوف قبيله تضحك وعماد سال شكو وعرفنا امي حملت
صارت قبيله هي وحازم تطلع وتدخل محد يكلها وين چنتي اتاخرتي ابد الكل ساكت
:: يجوز كانو يدرون
هي باوعتلي وكالت = لا استاذ ما يدرون بس همه ما اعرف ليش ساكتين
فد يوم بالليل اندك الباب جان شتا وجنا كاعدين كلنه ع التلفزيون ابوي ابيت عمي كاظم وعماد طالع محد قبل
يطلع يفتح الباب گاعدات ع التلفزيون لان هو ملاذنا الوحيد
رحت انا ادردم واتوعد اخواتي ما اخليهن يلعبن وياي فتحت الباب شفت فالح نازل من سياره جديده
فالح دنك عليه وباسني وانا رحت اركض كتلهم
= فالح اجه راكب بسياره جديده تخبل
أمي //فلشج منين جابها طلعله ورث بالحدود
هو دخل وراي وسلم قبيله ضاجت بس راحت سلمت علي وهو كللها //سوي جاي زين وياي خطار
أمي //هلا بي بس ياهو
– – عمه رجال مقيم بالكويت وصادف عده شغله لبغداد واجيت ويا
أمي //هلا بي متعشين
– – اي عمه أبو فهد ما قصر بأرقى مطعم عشاني عمه البسي عباتج وسلمي علي على ما يجي عمي وعماد
وراحت أمي وسلمت ورجعت وقبيله سوت چاي وفالح اجه وجاب علاليك واحنه بس نباوع الهن
أمي گالت //وانا چذبت سوسن طلع صدك جاي فالح بسياره
واجت قبيله فتحت العلاليك جايب فواكه وحلويات وكرزات وجكاير من هذا الغالي
شويه واجه عماد وبوجهه راح يسلم ويتعرف على أبو فهد اجه وگال
فالح صاير احوال يتعرف على مقيمين
أمي //اي والله
عماد //بس مبين ثگيل ساعه ذهب والدشداشه دگمها قراصات مبين مرتاح
قبيله تتصنط للحجي باهتمام وعماد أخذ الحلويات والكرزات يم الخطار الي طلب گهوه وراح جابوله من المحل الي يمنا
بالليل فالح نام بالغرفة وانا رحت يم البنات وامي وأبوي أما عماد نام يم أبو فهد
انا بأيام الدوام اكعد من غبشه ابدل الساعة سته وابقى انتظر بينما هديه تكعد تنظف البيت يالله تبدل وتروح
وعايده بطلت ماتحب المدرسه تبقى تشتغل وتغسل ملابس لمن ما شفت قبيله طلعت من الديوانية أمي خزرتها كلتلها
– – شعدج رحتي للديوان
قبيله بعدم مبالاة//اسكتي يوم سويتلي مصيبه شكد عيب
امي //شسويتي ياستار
قبيله//تدرين ماما نسيت عدنا خطار عبالي عماد فاته الخط مال الشركة ورحت ندهته ما حسيت الا رجال
گعد متعجب ويفرك بعيونه بعدين تذكرت الخطار
امي //يااشكد فشله
قبيله//اي يووم فشله وهسه شيكول
– – ما يكول شي واذا سمعو نگلهم سوسن راحت ندهته عبالها عماد
طبعا انا رغم زغيره بس اعرف انو هي ما راحت تنده عماد لا هي راحت تشوف أبو فهد
داومت للمدرسه ومن رجعت ريحة شوي السمج ماليه البيت عرفت انو أبو فهد يتغدا اهنأ بس هو ما موجود
وشفت قبيله كاعده بالغرفة ويمها فالح يگلها
فالح//ها قبوله شنو رائيج
هي بدون نفس لازمه بيدها قماش //اي هذني كافي
وراح انطيها مصرف الآمي وأختي
قبيله//اي بس فالح باجر نرجع افتهمت مو اهناك تبدل رائيك وخلينه بعد يومين تلاثه عندي خياط وما اريد اتعطل
فالح//اي بأجر من الصبح نرجع تأمرين امر
أمي دخلت وكالت //فالح يمته يجي صاحبك
فالح//عمه هو كال بالوحدة وحده ونص يجي
امي //زين احنا كملنه كل شي على مود بس يجي نصب
فالح//اي عمه تسلمين
وباوع القبيله //وأنتي حضري نفسج
– – وين على خير ؟
فالح//عمه اروح اشوف أمي وكلت ما طول أبو فهد على دربنا يوصلنه بسيارته
امي //اي زين تسوي
قبيله//شوفي يوم فالح جاب آلامه وأخته قطعة قماش
امي//شكو بيها يستاهلن سلمونا عليهم
واجه ابو فهد واتغدا هو وفالح لان بيومها عماد بالشركه وراحو قبيله وفالح وابنهم اخذو وياهم راحو ويه أبو فهد
راحو باتو ليله وثاني يوم رجعو بقى فالح سبع تيام وبعدين التحق الأيام الي اجه بيهن فالح خلصتها قبيله مريضه وهو
ياخذها من طبيب الطبيب بس مجرد ما راح هي صحت وثاني. يوم راحت الشقة حازم الي تلكاها بالأحضان
وگدامي صار الشئ عادي بالعكس صرت انطيها العذر لان فالح مو حلو وچبير
:: يعني انتي قابله على الشي الي يسوونه
سوسن باوعتلي = بربك استاذ ابنيه بعمري وتشوف وتسمع شنو شبيدها تسوي مثلا
وبقت هي وحازم يلتقون يوميه وصار ياخذها الأكثر من مكان مو بس الشقه وره أسبوعين اجه فالح چنا انا وقبيله يم
حازم لان عماد عنده شفت ليلي رجعنا وره المغرب نزلنا من التكسي وشفنا سيارة أبو فهد دخلنا للبيت وكبل للغرفه
اجه فالح صاير نار وهو يرجف
هي لاكته ولا كأنه شي صاير //. يا انت جاي الله يساعدك
فالح چان يرجف وعيونه ينطن شرار ويحجي بصوت عالي وينتر اول مره اشوفه هيچ
فالح//اي خاتون جاي ولكيتج مو اهنأ
قبيله //شبيك فالح ليش تتراجف عليه شكو
هو لزمها من شعرها ويكلها //ولج بر ……وين چنتي گولي
قبيله//أيي هدني شبيك تخبلت
فالح//اي تخبلت من انا اهنأ تخلصينها اخ هذا يوجعني وذاك يوجعني وفالح طبيب يصده وطبيب يرده اخذج وأخور بيج
قبيله //ها يعني انا اجذب عليك
هو بعده لازمها //اي تجذبين بس العتب مو عليج على اهلج
قبيله//ولك انت شتگول
فالح//أنوب تگليلي ولك اليوم اموتج تغلطين عليه
قبيله//وانعل والديك تتهمني يا ناقص
وصار فالح يضربها كامت تصرخ أمي أجت تركض وهي تكول
امي//ولكم فضحتونا گدام الرجال شصاير
قبيله //اليوم إذا فالح ما يطلكني احرك روحي
فالح//اي اطلكج على مود تمشين على حل شعرج يا گح……
قبيله بتهديد //شوفني احرك نفسي لو لا
وطلعت من الغرفه بدون حجاب چان قريب الباب مثل الدربونه خالين بيها درام النفط وحطب هي راحت
تمشي بسرعه وامي راحت وراها أخذت دبة نفط وامي صارت تعيط تاحنا البنات نبجي
طلع أبو فهد وهو يگول //شصاير خير ان شالله
أمي //الحك أبو فهد اترجاك قبيله راح تحرك روحها كله من وره هذا الناقص
أبو فهد وصل يم قبيله وهو يكلها //تعوذي من ابليس عطيني الشخاطه والي تبينا يصير
قبيله تبچي //عوفوني اموت روحي مليت من هالعيشه فوك ما مكسور ظهري بالخياط وأروح ادور القماش
الرخيص يضربني
ابو فهد//يبه عطيني الشخاط مو بزين الي تسوينه
قبيله وهي تبچي//مليت لحد يتقربلي فوك ما اخذته وانا بعدني ما مكمله اثنعش سنه وضيم العشاير هسه يغلط عليه
ابو فهد يتقرب منها ويمد ايده//مي خالف ساعة شيطان مو بقصده
قبيله//لا يقصد الا احرك روحي واتهمه الهذا آل …آه…آه
وكعت قبيله وامي صارت تكول //يمه بتي ماتت يبووي فالح قبيله الحك
اجه فالح يركض حافي وهي واكعه وأبو فهد طلع قبله للسيارة وامي جابت عباتها وشفت فالح شالها وصعدها وامي
هم صعدت وياهم واحنا بقينا نبجي وخايفات ولازمات ابنها معتز كعدنا ما نعرف شنسوي هديه نظفت البيت
وفرشت لأبو فهد بالديوان وانا لزمت اللعابه وخليتها بحضني وعايده أخذت معتز وانطته حب شمسي
لمن ما غابو اكثر من ساعتين واجو وهي بيدها كانونه
وساندتها أمي وصلتها للغرفه واجه فالح يمها
فالح//قبوله حبيبتي سامحيني
هي ما جاوبته
هو حاچه امي //عمه انا من ما لگيتها اتخبلت
امي //تكوم تضربها وتغلط عليها وتتهمها
عمه
امي//لاتكول عمه وروح جيبلها عشا وجيب وياك للرجال الغريب صارت بوجهه ما ادري هسه شيكول
انوب خاف عماد يجي ويدري ويسويلك مشكله
فالح//اي هسه اروح اجيب كباب وانا متسوك فواكه ومخضر
امي //. خوش روح ولا تتعطل زحمه
فالح // رايح وما اتعطل وأنتي عمه زحمه روحي يم أبو فهد كعدي على ما أجي
فالح طلع وامي راحت يم أبو فهد لمن ما قبيله كالت روحي صيحي الامي
ورحت صحتلها واجت قبيله تحجي بتعب //يوم اريد اروح اعتذر من أبو فهد زحمه صحت بوجهه وصارت
المشكلة گدامه
امي //اي يمه بس رجلج
قبيله//يمه خلي يولي فشلنه كدام الرجال الغريب هسه شيكول أنتي أوكفي يم باب الحوش ومن يندك الباب تعالي
كليلي وارجع الحجرتي ما اتعطل عيب منه
امي //روحي بس لاتتاخرين
قبيله//ما أتأخر بس اتعذر منه وارجع زحمه وكف ويانه بالمستشفى
لبست عباتها وخلت عطر جابه الها فالح وأخذتني وياها ودخلت للديوانيه بعد ان دكت الباب جان شبه متمدد ع الكرويته
هو استعدل وبس شافها گال وعيونه تلمع
هلا حياج الله شلي سويتي كبل شوي
انا قاطعت سوسن :: هو ليش يتكلم هيج
سوسن = لان هو عايش اكثر وكته بالكويت لهجته قريبه للهجه الخليجيه حتى شكله
:: شلون يعني ؟
= يعني عنده سكسوكه ويلبس عگال وچفيه ودشداشه بيضه وساعته ودگم الدشداشه فد شي
انا ابتسمت ::حافظه ابسط الامور
سوسن = لا تنسى استاذ ما عدنا اشياء نفكر بيها وحياتنا فقر وحرمان وجانت بسيطه
جريت نفس :: من راحت شافت ابو فهد شنو كلتله
= هي دخلت للغرفه وكعدت على الكرويته مقابيله وكلتله //سامحني عمي مو قصدي
هي من گلتله عمي أحسه ضاج گالتله قبيله //ارجوك سامحني والله انا تعبانه فوك الضيم والقهر والفقر
جاي فالح يحاسبني وين رحت وين اجيت
ابو فهد يباعلها ويگول //ما عاش الي يقهرج لا تتضايگين انا حاضر بالي تبينه
هي اتحسرت وگالت //وليش كل هذا شتعرف عني
ابو فهد //ياعمي مثل ما كلتيلي من ندهتيني وانا ليل ويه نهار وانا افكر فيج ما اعرف وش صارلي انا يا قبيله
هي بنتر وتحرك بايدها عود اسكت //لا تكمل انت افتهمت غلط
ابو فهد //انا ما بقصدي شي ولا فهمت غلط خلاص قبيله ألي تبينه بس اشري انا حاضر أنتي بس امري
هي باوعتله وابتسمت بخبث واتقربت يمه ودنگت (باسته بخده )وطلعت بدون ما تجاوبه
سالتها باستغراب :: باسته ؟
= اي استاذ بحيث الرجال ظل يرجف
:: مفهوم كملي
= واجه فالح جاب عشا وحضره لأبو فهد وامي جابت عشا القبيله الي من شافت فالح اتمددت وما تباوع بجهه
وگعدنا أكلنه وياها وانا اشوف فالح كل شويه يجي ويبوسها ويگلها سامحيني وهي ولا تنطي وجه
الصبح گامت قبيله سوت ريوك لأبو فهد وفالح وأبوي وطلع فالح وأبو فهد ما اجو عل الغدا وره الظهر رجعو
واجه عماد سلم على أبو فهد وكعدو جنه كأعدات كلنه بغرفة امي لمن ما اجه فالح وگال القبيله
فالح//قبوله وين دشداشتي الزركه
– – معلگتها ليش
فالح//انريد نطلع انا وأبو فهد وعماد نتونس ونرجع
قبيله //وهو هذا صاحبك شنو اهنأ باقي منو گله فاتحين فندق
فالح //شنو هو عايز بس الرجال راد يفيد ويستفيد
امي|/ليش بيش يفيدك عمه
فالح هز راسه // لا عمه مو انا يفيد عماد
قبيله باوعت //وشلون ؟
فالح//أبو فهد گل العماد اجيبلك أغراض من الكويت وأريدك تبيعها الي والك نسبه
قبيله //والله زين علوا تدري شغلات الكويت شگد مرغوبة
امي //وعماد قبل ؟
فالح//اي ليش ما يقبل بالعكس أصلا فرح عمه الأغراض بيهن خير من الله
قبيله //چا ليش ما اشتغلت ويا
فالح اتقرب منها //قبوله انا شرطي ومن يدرون بيه يفصلوني انا هم احصل خير من الله والي احصله انطيهن الج
امي باوعت القبيله الي گالت //يا فالح شمطيني على المية فلس ماتحسب طبيبي وطبيب ابنك
فالح//قبوله الي اگدر علي أجيبه الج والله حارم نفسي من كل شي
انا قاطعت سوسن وگتلها :: فالح چان يحبها
هي ردت =. مو بس يحبها دا گول يموت عليها وچان راضي بهواي امور
انا باستغراب :: يعني يعرف بعلاقاتها
= والله استاذ ساعات اشك بي يعرف وساعات اگول لا لان يحبها يسكت عن هواي امور
:: بس ياسوسن الرجال دائما تحكمه غيرته على زوجته وعرضه
هي غمضت وگالت =اي صحيح
:: وين طلعو فالح وعماد وابو فهد
سوسن رفع كتفها = ما اعرف همه طلعو ورجعو بالليل وثاني يوم راح أبو فهد ورا بخمس تيام راح فالح وصار
أبو فهد يجي ابحده يجيب أغراض العماد ويروح ويرجع يتحاسبون
:: قبيله سوت علاقه ويه ابو فخد
سوسن هزت راسها سالتها :: زين وحازم
= اتذكر فد يوم راحت قبيله الحازم وسولفتله على أبو فهد وشلون يحجي وشلون اخذها للمستشفى هو سمع وكف
على حيله لزمها كتلها كتله موتها بحيث انا صرت ارجف وهي تبجي بدون ان تدافع على نفسها بنفس اللحظة
استذكرت شسوت بفالح وعياطها وغلطها علي وهو زوجها وهذا كل شي ما يعود الها وشلون ساكته ومستقبله منه
كل شي بالعكس كامت تبوس بي وتحضنه وهي تبجي وهو يغلط عليها
:: شنو يگللها ؟
حازم//ساقطه حقيره ما مكفيج انا وفالح تردين اتصاحبين ثاني
هي سكتت ما جاوبت بس تبچي وهي گاعده بالكاع وهو على القنفه هو گعد يتشفى بيها لزمها من فكها حيل وهيه
بس فاتحه عيونها وهو يكللها // تبچين بت الكلب ولج اموتج والله إذا تفكرين تخونيني مو عبالج انا فالح اموتج
ومحد يدري بيح هسه اروح اودي هاي
( واشر عليه )اوديها الاهلها واخليج يمي ومحد يفك حلكه خاينه حقيره
قبيله بصوت متقطع //ليش انا وياك مو خاينين مو جاي اخون رجلي
حازم بنتر//انچبي لچ وياي اني مو ويه غيري
بس اني ما خنتك لو اريد اخونك ما چان سولفتلك
هي ظلت كاعده بالكاع تبجي وهو ع القنفه يدخن بعدين كام عليها وحضنها ويگلها
اني مو جاي اگلج اتطلگي واتزوجج وأنتي تگولين اهلي يذبحوني من اتطلك
قبيله وهي تبجي //اي والله حازم يذبحوني ويذبحوك
حازم//دا كافي لا تبچين اسمعيني هذا ابو قندره أبو فهد حده للديوانيه اموتج إذا عرفت واصله يمه
وظل حاضنها
سالتها. :: وقبيله شنو سوت ويه أبو فهد
سوسن وحچت باستهزاء = وطدت علاقتها بي
:: هااوشلون
= أبو فهد أو سلطان صار بالنسبة الها عبارة عن بنك چان يجي يجيب علاليك وهدايا أشكال والوان الها
ما چنا نشوف منهن شي وعماد اشتغل ويا مره يجيبله جكاير ومره ساعات ومره عطور وعماد يصرفهن
:: أمورها استعدلت
هزت راسها = لا ما استعدلت أمورها
: : ليش مو تگولين أبو فهد عبارة عن بنك
=اي چان ينطيها فلوس وحازم ينطيها وفالح يجيب الراتب ويخلي بايدها والهدايا الي يجيبونها الها لكن
ما اعرف وين تؤديهن
انا باستغراب :: يعني قصدج مصادقه واحد غير هذول وتصرف علي
= لا هي عدها شغلات ثانيه ما انتبهت عليهن الا بعد ما صرت عجوز
انا حجيت :: انتي عجوز !
هي ما جاوبت بدلت الموضوع وحكت خدها = چنه نباوع القبيله على انها فد شي فريد من نوعه وهي فعلا
هيج بس بالحقاره والمكر والفساد وهذا الشي وين يالله عرفنا
انا سالتها :: وين جانت تشوف ابو فهد ابيت اهلج
= لا مو ابيت اهلي
:: لعد شلون عرفتي هي سوت علاقه ويه ابو فهد هم جانت تاخذج وياها
= ابو فهد فد مره اجه وجايب بضاعه العماد وجان عماد عنده دوام مسائي وامي راحت البيت جوارينه مريضه
هي بس اجه ابو فهد انا فتحت الباب ورحت كتلها وهي طلعت شافته سرگت الباب واجت گالت العايده وهديه تگعدن
بالغرفه ما تطلعن
وخلت معتز يمهن وانا لزمتني من ايدي وگالت بس يندك الباب تجين تگليلي
هزيت راسي ودخلت ويا بالديوانيه وانا وگفت يم الشباك واسمع
:: شتسمعين ؟
هي مدنكه
رديت عليها :: ضحك وشقى او…
جرت نفس وگالت = بعدين اسمع ابو فهد يگلها
ابو فهد //قبيله بعد ما اكدر اتحمل ابي اشوفج
هي بدلال //وانا اكثر سلطان بس وين تشوفني
اسمعي قبيله باجر الصبح اوكف لج نهاية الشارع وانتي تجين
زين وين نروح
انا مدبرها صاحب فندق صديجي وانا اتفاهمت معا نروح ساعتين تلاثه ونرد
هي بدلاعة وضحكه بيها خبث // بس مو نتاخر
الي تامرين في انا حاضر ولو ودي ما اتركج العمر كله
– – وانا سلطان تدري من ينام وياي فالح اتخايلك انت
كزبر جسمي :: معقوله هالشكل تحجي
اتنفست بعمق = اي استاذ
:: وهو شنو رده عليها
ابو فهد من شاف دلاعتها // وانا الحين ملكج والي تبينه يصير بس اشري
فجاه اندك الباب انا رحت تلقائيا دخلت عليهم لگيتهم
دنگت سوسن وسكتت
جاوبتها :: اكيد لكيتيهم بوضع مخل
= اي هي باوعتلي رديت :: تره سوسن عادي الي شفتي ويه سلطان كنتي تشوفينه ويه حازم
حسيت بيها اتفاجات من كلامي وانا حسيت على نفسي يمكن اذيتها بالكلام گتلها
=اني ما اقصد انتي الي اقصده اي مره ورجل تصير ابيناتهم علاقه غير شرعيه اكيد ما يسولفون على احلامهم
والي يردون يحققونه بالمستقبل واختج علاقتها غير شرعيه سواء ويه حازم او ويه ابو فهد
هي استرسلت بالكلام = دخلت الي شفته بذاك الوكت عجبني
:: شنو شفتي ؟
= شفت قبيله متمدده لابسه بس اتك احمر قصير وابو فهد لابس فانيله وسروال وشفته وهو يبوس برجلها
من جوه
ابتسمت باستهزاء :: تحچين صدك ؟
= صدگني يبوس برجلها ويگلها اعتبريني خادمج اي شي بس لا تتركيني
صفنت والباب اندك حيل هي باوعت شافتني ما حچت بالعكس ابتسمت اخذت الدشداشه ولبستها وطلعت
بكل هدوء وثقه وگالت
– – انا رايحه الغرفتي شويه وافتحي الباب ومن يسالوج گولي نايمين ولا تگولين مسرگينا للباب
هي دخلت وانا فتحت الباب شفتها امي الي صارت تخزرني وليش اتاخرت انا گتلها نايمات ما سمعنا
ومن سالتني على ابو فهد گتلها قبلج بشويه اجه ودخل للديوانيه گلي ما اريد احد يزعجني
امي بوجهه راحت الغرفة قبيله وانا وراها ارجف عبالي تشوفها گاعده قبيله نايمه بسابع نومه
كعد ابو فهد وطلع ما رجع اله بالليل لكى ابوي وامي وبات واصبح خلا البضاعه بالبيت وكال عندي شغل وقبيله
طلعت ورا بس رجعت الظهر قبله
انا سالتها :: وحازم
=حازم بقت ويا
دخنت جكارخ وحاچيتها :: زين اريد اسالج سؤال منو يحب قبيله اكثر حازم لو سلطان
= سلطان يحبها اكثر چان كاتل نفسه عليها بس هي تحب حازم اكثر
انا باستهزاء :: هي تعرف تحب
سوسن باوعتلي وغمضت عيونها = بالحقيقه لا ما تعرف الحب هي تحب بس نفسها
انا جاوبتها :: تدرين رغم اكره الخيانه واكرها كثير لكن انا مشدود الهاي القصه
سوسن = استاذ هاي مو قصه هاي حقيقه اذا تعبان خليها الغير وقت
:: لا لو اعرف ابقى للصبح اريد اعرف كل شي
سوسن .= بكيفك استاذ تدري بذاك الوكت قبيله طلعت حامل وعماد يشتغل بالشركه ويروج بضاعه لابو فهد امي
ولدت جابت ولد ابوي گال سوسن تسمي لان وجهه علينا خير انا سميته( حسن )
وره فتره اجو على اختي هديه ناس يخطبوها
:: بيا صف چانت ؟
= هي متاخره سنتين چانت بالخامس ابتدائي بس لان سجلت متاخره صديقاتها بالاول المتوسط
:: ومنو اجه عليها ؟
= ناس بغير منطقه من اجو خطبو محد الا راي بس قبيله هي الي وافقت وقنعت امي وابوي
:: وعماد شنو چان رأيه
= بالبدايه گال خطيه بعدهي زغيره وچنهم عرب ما يفتهمون
بس قبيله گالتله //عماد وافق باچر انت شنو ما تريد تتزوج اقلها بالبيت بس وحده زغيره
عماد //ها ليش وعايده
– – بلكي احد هم يجي عليها عاد تبقى بس سوسن بالبيت هي زغيره تاخذ راحتك انت ومرتك
بعد كلام قبيله اقتنع عماد وافقو واتذكر رحت وياها القبيله جانت رايحه للسوك ومرت ابيت الولد جان كلش
چبير وجديد بس بي هواي جهال ورحبو بينا وانطتهم الموافقه واجو وخطبو وعقدو وهي استلمت الحق
مالتها وصارت هي تشتري الغراض. الذهب الملابس
سمعت امي تعاتب بقبيله تگلها// ليش انطيتي العماد من حگ هديه خطيه گدام الناس وهمه غربه
هي بنتر //وانا شنطيت العماد هنه عشرين دينار شنو ميه والف
– – بس هذا حگها يووم
– – اوو يمه ما تدرين بابنج خفت يخرب الخطبه وهديه فرحانه
– – والله ما ادري هسه هو حتى ما منطينه من راتبه من شغله ويه هذا البدوي
قبيله // ا ي همزين تعرفين ابنج بعد ليش تحجين دخليها تتزوج وتروح بحال سبيلها اقلها تفتك من كتلچ
وكتل عماد خوثتوها
امي // اي هم هو هيج بس همه عايله چبيره بنات او ولد والمره مسيطره وعرب
قبيله تهز بايدها //وهي عاد عايشه بقصر الشاهبندرلو شهادتها دكتوره اشو النهار كله تشتغل بالبيت وتكوي
الابنج من غير كتلج واوامرج سوي هذا وجيبي هذا
واتزوجت هديه چنت بصف الثالث وراحت وياها قبيله وبيبيتي وخالتي وامي بقت ماراحت بس انا رحت وياهن
ثاني يوم والله ……وصارت سوسن تبجي ……
سالتها :: ليش تبچين ؟
باوعتلي = صدك يا استاذ ثاني يوم شفت هديه وهي خايفه ومصكوكه جانو عايله چبيره ولد وبنات ما متزوجات
والام هي الي تحكم وجانو عشاير
:: زوج هديه شيشتغل
= موظف بالكهرباء
هزيت راسي هيه حچت = بعد اسبوع همه عزمونا ورحنا كلنه وهديه خطيه مثل ما چانت تشتغل عدنا هناك
صارت تشتغل مضاعف تشتغل واشوفها ترجف من الخوف وساكته
ورجعنا وقبيله بس تحمد بيهم وشلون سوو العزيمه وشلون گامو بالواجب
بعدها بفتره قبيله ولدت جابت ابنيه سمتها زينب
انا سالتها :: وعلاقاتها
اتحسرت = نفس ما هي تطلع وتمشي محد يكللها وين جنتي
:: زين ابوج امج عماد ما يسالوها
= اتذكر مره انا جايه من المدرسه اسمع ابوي يعيط على امي //حميده وين بتج شنو كل ما اجي ما الكاها انتي
تدرين بيها وين تطلع هيه
هم تگلج وين تروح
امي //خلف هسه تجي واحجي وياها
ابوي//اي احجي وياها واكسر راسها شنو محد بعينها
واجت قبيله واتذكر ابوي گل العايده افتحي الباب ومن دخلت شافت الوجوه مكلبه عليها
انا سالتها باهتمام :: اي شگلولها
سلهمت عيونها وباوعتليد= اتصدكني اذا اگلك ؟
هزيت راسي :: اسمعج
هي اتحسرت ونفخت = والله يااستاذ بس دخلت وكالتلهم مرحبا ابوي جان متوتر وعصبي بس صدكني
مجرد ما باوع الها هو ضحك ما حاجاها كلها هلا بحبيبة ابوها هلا بيج
امي //قبيله ابوج سووا مشكله يكول وين تروح يوميه
هي باوعت //صدك بابا
ابوي بحنيه // اي مو خطيه ابنيتج تبجي وهذا معتز عبث واخاف اياذيها
قبيله //بابا وين اروح اتسوك واخذ الخياط انطي الراعيته وهناك هم اخيطلي يمها قطعه قطعتين وتنطيني القاسمه الله
هاك بابا (وطلعت دينار ) حتى گلت اجيبلك جكاير بس ما لحكت هاك انت اشتري والباقي
جيبلنه كيك حب من زمان ما ماكلين
باوعتلي سوسن بحزن = صدكني استاذ ضياء ابوي ما يهمه اذا انطته فلوس او لا لكن المشكله بس تباوع الوجههم كلشي ينتهي
انا باستهزاء ::شنو ساحرتهم ؟
شفت بعيون سوسن جواب بس ما جاوبتني بدلت الموضوع وگالت
سنة 1981قرر عماد يتزوج
/////////////////////////
//////////////////
//////////////////القصه حقيقيه
تدور حول سوسن الي جاي تحجي قصتها بطلب من ضياء
لان يريد يفهم ليش رادت تنتحر
تره من شافها ضياء كان عمرها اكثر من 40 سنه
ضياءءراح يتعاطف وياها او هو اتعاطف وياها ويساعدها مساعده محد متوقعها هسه وهو
يسمع قصتها جاي يشتغل على قضيتها بدون ماهي تدري
القصه بيها مفاجات
لا تضوجون من طول السرد
ولانها حقيقيه واعرف بعض من اشخاصها
ارتايت اقصها بحذافيرها لان الحقيقه لازم تنعرف
حتى من نحكم يكون ضميرنا مرتاح وحتى ناخذ العبره من الاشياء الي تنذكر سواء كانت صحيحه او خاطئه
اعزائي جاي اتعب بسرد التفاصيل
