رواية ارواح هائمة الفصل الثاني عشر 12 بقلم آثر توفيق
الحلقة 12
يوم الامتحان الاخير خرجت باسنت سريعا واسرعت الى كشك الشطائر واشترت بعضها مع كوب كولا كبير وجلست عند احدى نوافذ المكتبة تلتهم وليمتها حتى خرجت نرمين فاخفت كنزها خلف ظهرها ورسمت ابتسامة بريئة على وجهها ولكن نرمين جلست بجوارها فى صمت
باسنت :: عملتى ايه يا نرمين ؟
نرمين :: الحمد لله
باسنت :: اومال مالك ده حتى الامتحان كان سهل جدا
نرمين :: اه كان حلو كويس وانا حليت كويس
باسنت :: طيب فيه ايه ؟
قبل ان تجيب خرجت داليا تتقافز فرحا
داليا :: الامتحان كان سهل جدا باذن الله الماده دى جيد جدا
باسنت :: الامتحانات خلصت وخدنا الاجازه ناكل بقى
واسرعت تخرج كيس الشطائر قائلة
باسنت :: انا مستنياكم ما رضيتش احط لقمه فى بقى من غيركم
مدت داليا اصبعها تمسح شفاه باسنت وتقول ساخرة
داليا :: على اساس ان ده روج مش كاتشب مش كده يا دبدوبه ؟
باسنت :: كاتشب كاتشب ايه ؟ ده دم الحقونى انا اتعورت عاوزه غذا اعوض الدم
ضحكت الفتاتان وبقيت نرمين ساهمة فسالتها داليا
داليا :: مالك يا نرمين ما حليتيش كويس ؟
نرمين :: لا حليت الامتحان كان سهل كويس
باسنت :: اومال فيه ايه يا بنتى اتكلمى
نرمين :: الامتحانات خلصت وما عرفتش اشوف ثائر واتطمن عليه
شعرت داليا بالحنق وهتفت بحدة
داليا :: ثائر ثائر ثائر جرى ايه يا نرمين هو ما بقاش فى الدنيا غير زفت ده ؟
بهتت نرمين من ثورتها وقالت بخفوت
نرمين :: ايه يا داليا مالك اول مره تتعصبى عليا كده انتى عارفه انى ….
داليا :: عارفه انك ايه هو احنا جايين الكليه ندرس واللا نتمسخر ؟
وقفت مبهوتة وقد صدمها اللفظ الجارح
نرمين :: انا باتمسخر يا داليا ؟ مش ده الوحيد اللى دافع عنا وعنك انتى بالذات ؟ مش المفروض نتطمن عليه واحنا عارفين انه بيمر بازمه ممكن ما يلحقش الامتحانات ويضيع مستقبله ؟
داليا :: يا ستى يضيع مستقبله يلحقه هو حر فى نفسه واحنا مالنا وبعدين انتى يا نرمين لو ضحكتى على الناس كلها مش حتضحكى عليا
اقبلت امال مشيرة لهم من بعيد وكانت قد اتفقت معهم على ملاقاتهم للذهاب الى محطة الرمل للاحتفال بنهاية الامتحان
امال :: صباح الورد على اجمل بنات فى الجامعه واسكندريه كلها عملتوا ايه ؟
ولكنها فوجئت بالوجوم يخيم على الجميع فسالت بقلق
امال :: مالكم الامتحان كان صعب ؟
باسنت :: بالعكس الامتحان كان سهل جدا وكلنا حلينا كويس
امال :: اومال مالكم حد ضايقكم حد عاكسكم ؟
داليا :: قولى حد ما عاكسناش الانسه اشتاقت للغزل واغانى الست بقالها سنه
نرمين :: انا مروحه
امال :: احنا مش كنا متفقين ننزل محطة الرمل
نرمين :: معلش روحوا انتوا براحتكم انا ماليش نفس
داليا :: ولا انا كمان انا عاوزه اروح
باسنت :: الله جرى ايه مالكوا قلبتوها غم ليه ؟
نرمين :: اصل الانسه داليا شايفه انى باتمسخر وباضحك على الناس ويمكن كمان تكون شايفه انى ماشيه على حل شعرى
داليا :: يتقطع لسانى قبل ما اقول كلمه غلط فى حقك
نرمين :: كل ده وما قلتيش ولا كلمه غلط انتى عاوزه غلط ايه اكتر من كده ؟
داليا :: يا نرمين انا خايفه عليكى
نرمين :: انتى اللى خايفه عليا وانتى بقى اللى حتحمينى ؟ طول عمرى انا اللى باحميكى طول عمرى واخداكى فى ضهرى وباحط نفسى فى وش الخطر علشانك
امال :: صلوا على النبى يا بنات جرى ايه انتوا حتعايروا بعض ؟ انتوا لازم تخافوا على بعض انتوا اخوات
نرمين :: لا احنا مش اخوات احنا ولاد خاله بس
احست داليا بالدوار كما لو كانت روحها تنسحب من جسدها وقالت بضعف
داليا :: كده يا نرمين دى اخرتها ؟ على العموم انا اسفه وغلطانه فى حقك انا ماشيه ومش حاضايقك تانى ولا اعرضك للخطر علشانى
اخذت حقيبة يدها واسرعت بالذهاب والباقيات مشدوهات بينما اشاحت نرمين بوجهها للجهة الاخرى وهمت امال بقول شئ ما بينما فكرت باسنت باللحاق بداليا التى اختفت عن الانظار وقلبت امال كفيها قائلة بذهول
امال :: مش مصدقه اللى بيحصل ولو حد حكالى مش حاصدق ان ده يحصل بينكم فيه ايه ؟
باسنت :: انا حاروح ادور عليها وارجعها لازم تصالحوا بعض عيب كده
انصرفت باسنت للبحث عن داليا وانفجرت نرمين فى البكاء فربتت امال على كتفها تهدئها وبعد قليل قالت
امال :: تعالى معايا يا نرمين علشان تغسلى وشك وتفوقى
نرمين :: انا عاوزه اروح
امال :: ما خلاص حنروح كلنا بس اغسلى وشك الاول وناخد البنات ونروح
قامت مع امال للذهاب للحمام بينما وقف هو هناك فى الطابق الاعلى من المبنى المقابل مستترا بالزجاج ونظارة سوداء تخفى عينيه يتطلع متالما اليها لم يكن ثائر يعرف طبعا انه سبب هذا الخلاف الذى اشتد لاول مرة بين الفتاتين ولم يكن يعرف انه سبب هذه الدموع التى سالت من عينيها لتهبط على قلبه كجمرات من نار ولكنه لم يتحمل دموعها .
هو بطبعه لا يتحمل دموع النساء اما هى بالذات فانه يكتوى بدموعها ولكنه وقف هناك عاجزا قليل الحيلة لا يملك ما يفعله لاجلها ليته يستطيع ان يمسح تلك الدمعات العزيزة ويرسم البسمة على تلك الشفاة الغالية .
ربما يستطيع مستقبلا ولكن حتى يستطيع فعليه اشياء كثيرة يجب ان يفعلها والان لا وقت لديه ليضيعه
انطلق الى المصنع فورا ودخل معتذرا لشريكه
ثائر :: لا مؤاخذه يا احمد بس كان مشوار ضرورى لازم اروحه
احمد :: مش خير ان شاء الله ؟
تنهد وقال وهو يبدل ثيابه بثياب العمل
ثائر :: يا احمد احنا ورانا شغل كتير جدا المصنع لازم يقف على رجليه تانى لازم نرجع نشتغل ونبقى احسن من الاول
احمد :: اللى مجننى انى مش فاهم ايه اللى بيحصل لنا ولا ليه مين اللى بينكش ورانا ؟ لو اعرف مين السبب فى كل البلاوى دى اكل زمارة رقبته بسنانى
ثائر :: المشكله اننا مش لاقيين فرصه علشان ندور ولو حندور مين السبب مش حنشتغل
احمد :: طيب ريح النهارده وخليك ابدا من بكره
ثائر :: مافيش بكره ولا كمان ساعه حتى خلاص كل دقيقه بقى ليها تمن احنا اللى بنحاسب عليه
_________________
عادت الى بيتها وهى تشعر بصداع عنيف لاول مرة تشعر بصداع بمثل تلك القوة سمعت صوت نعمة تسالها
نعمة :: عملتى ايه يا نرمين ؟
نرمين :: الحمد لله
كانت تشعر بضبابية الرؤية حتى انها لم ترى نعمة فاستندت على الدرابزين واكملت صعودها لاعلى ودخلت شقتها لتلاقى امها فى الصالة
كوثر :: نونو حبيبة ماما عملتى ايه ؟
نرمين :: الحمد لله
كوثر :: ايه اللى رجعك بدرى مش كنتوا رايحين محطة الرمل
نرمين :: مش قادره يا ماما تعبانه وعاوزه انام
كوثر :: مالك يا حبيبتى هو الامتحان كان صعب ؟
نرمين :: كان حلو .. كويس والحمد لله حليت بس تعبانه عاوزه انام ومش قادره اقف
كوثر :: طيب يا حبيبتى ادخلى ارتاحى على ما …..
لم تنتظر ان تكمل امها وتركتها وذهبت الى غرفتها والقت حقيبتها جانبا وامسكت بجانبى راسا الذى يكاد ينفجر بكلتا يديها بقوة وبدا الدوار يزيد ودموعها تتساقط بدون وعى منها والقت بنفسها على السرير ولم تشعر بشئ بعدها
شعرت كوثر بالقلق اسرعت للشقة الثانية لتطمئن على داليا وتعرف منها ما خطب نرمين فالاثنتين سرهما واحد وهى قد لاحظت ان نرمين تتكلم بصعوبة ويبدو بوضوح انها بكت كثيرا قبل ان تصل وايضا داليا ابنتها وهى لم تفرق ابدا بينهما وهناك وجدت اختها وحدها فسالتها بلهفة
كوثر :: طمنينى داليا عملت ايه ؟
ثريا :: لسه ما رجعوش هم مش قايلين رايحين محطة الرمل
كوثر :: ما رجعوش ازاى نرمين جت دلوقت تعبانه على الاخر ومعيطه
اسرعتا الى هناك سريعا ودخلتا الغرفة فوجدتا نرمين تنام بعرض الفراش بكامل ثيابها حتى الحذاء
كوثر :: نرمين انتى نمتى بهدومك ؟
اقتربت منها لتوقظها ولكنها لم ترد
كوثر :: نرمين اصحى يا بنتى ردى عليا نرمين الله فيه ايه
ثريا :: نرمين فيه ايه يا نرمين ردى علينا
هزتها كوثر بعنف فلم تستيقظ وصاحت بصوت عالى
كوثر :: نرمين ردى عليا يا بنتى نرمين الحقينى يا ثريا بدكتور نرمين يا نرمين دكتووووووور
#ارواح_هائمة
اعطاها الطبيب مسكنا قويا لتنام وخرج مع كوثر ليجد حليم بانتظارهم وهو يدعو
حليم :: يا خفى الالطاف نجنا مما نخاف الهم الطف بنا وارحمنا واعف عنا
وظل يكرر المزيد من الادعية حتى راى الطبيب فساله
حليم :: خير يا دكتور
الطبيب :: ضغطها عالى جدا انا اديتها حقنه وحتنام بس خلوا بالكم علشان البنت اتعرضت لزعل شديد جدا
حليم :: يمكن يكون بسبب الامتحانات اصلهم لسه مخلصين
الطبيب :: ما اعتقدش اكيد البنت اتعرضت لموقف صعب مش موضوع امتحانات هو حد زعلها ؟
نظر حليم الى كوثر فقالت
كوثر :: ابدا والله يا دكتور دى رجعت من الكليه كده حتى اختها ما رجعتش وحنتجنن
كانت ثريا بجوار الهاتف تحاول الاتصال
ثريا :: الطف بينا يارب بناتى مالهم احسدوا ؟
انصرف الطبيب فسالها حليم
حليم :: هى داليا فين ؟
ثريا :: مش عارفه تليفون شيرين معلق واتصلت بكل زمايلها ما يعرفوش احاول تانى
رن الجرس اخيرا واجاب الطرف الاخر
شيرين :: الو مين ثريا ازيك باحاول اطلبك من بدرى
ثريا :: قوليلى باسنت رجعت من الكليه ؟
شيرين :: رجعت هى وداليا وداليا كانت تعبانه شويه عملتلها ليمون ودخلت تنام فى اوضة باسنت
ثريا :: طيب والنبى يا شيرين ادخلى بسرعه اتطمنى عليها وانا جايه فى السكه
شيرين :: فيه ايه قلقتينى
ثريا :: ادخلى والنبى اتطمنى عليها بسرعه
ووضعت السماعة واسرعت تبلغهم
ثريا :: البنت عند شيرين تعبانه ونايمه ياللا بسرعه يا حليم استر يارب
________________
وصلوا عند شيرين وفتحت تستقبلهم
شيرين :: اهلا اهلا يا ثريا اتفضلى اتفضل يا شيخ عبد الحليم
ثريا :: ازيك يا شيرين البنت فين هى كويسه ؟
شيرين :: بالراحه يا ثريا مالك البنت كويسه بس رجعت مع بسبوسه تعبانه شويه سبتها تنام هو ده مش بيتها برضه ؟
حليم :: اه طبعا بيتها يا مدام شيرين احنا بنتطمن عليهم عندك كانهم فى البيت بالظبط
ثريا :: اصل نرمين رجعت تعبانه قوى وضغطها عالى وجتلها غيبوبه
شيرين :: يا ساتر يارب ضغط غيبوبه ؟ من ايه ده كله ؟
حليم :: الدكتور قال زعل جامد جدا علشان كده قلقنا على داليا
شيرين :: لا داليا كويسه بس شكلها معيطه انا سبتها تنام تعالوا ده بيتكم
اصطحبتهم الى غرفة باسنت وطرقت الباب وفتحت كانت باسنت تجلس مضطجعة الى جوار داليا النائمة يبدو عليها الحزن والقلق وهى تبكى فى صمت وحين دخلوا ايقظت داليا برفق قائلة
باسنت :: داليا اصحى ماما جت
اسرعت ثريا اليها بينما عاد حليم الى الصالون بعد ان اطمان واعتدلت داليا ومسحت دموعها وهى تهتف
داليا :: ماما ؟
احتضنتها ثريا برفق قائلة
ثريا :: قلقتينا عليكى يا حبيبتى ايه اللى حصل فيه ايه ؟
داليا :: اصلى اتخانقت انا ونرمين وزعلتها وما قدرتش اجى البيت
ثريا :: حد برضه يزعل روحه ؟ لالا دى نرمين دى روحك وهى كمان روحها فيكى معقول طيب حتى لو زعلتيها الزعل يوصل لدرجة ان ضغطها يعلى ويجيلها غيبوبه ؟
داليا :: غيبوبه ؟ نرمين ايه اللى حصل لها ؟
قات مسرعة تختطف ملابسها وهى تهتف بانزعاج
داليا :: هى نرمين فين ايه اللى حصل لها ؟ انا لازم اشوفها
شيرين :: طيب اهدى يا داليا واحده واحده وفهمينا الاول ايه اللى حصل
داليا :: ولا حاجه انا لازم اروح اشوفها
ارتدت ملابسها على عجل وخرجت مع والديها وشيرين تودعهم قائلة
شيرين :: انا حالبس هدومى واحصلكم انا وباسنت
__________________
وقفت داليا على باب الغرفة تنظر الى نرمين التى ترقد فى فراشها وامها تضطجع الى جوارها تمسح على شعرها وتقبل جبهتها انتظارا لان تفيق فقالت بهمس والدموع تترقرق فى عينيها
داليا :: مالها ؟
كوثر :: قوليلى انتى مالها قوليلى مالكم انتوا الاتنين
وقفت كوثر فاقتربت منها داليا ووقفت منكسة الراس امامها ففتحت لها كوثر ذراعيها لترتمى فى احضانها فقالت لها
كوثر :: مالكم فيه ايه اتحسدتوا ؟ اختك مالها طمنينى
قبلت يدها وقالت برجاء
داليا :: سيبينا لوحدنا شويه علشان خاطرى
نظرت الى حليم الذى اشار لها فلحقت بالجميع الى الخارج واغلقوا الباب وتطلعت داليا الى نرمين بعيون دامعة وقالت هامسة
داليا :: انا اسفه انا عمرى ما قصدت ازعلك ولا اقول عنك كلمه وحشه ولا عمرى اصدق عنك كلمه وحشه انا عمرى ما كنت اتخيل ييجى يوم اشوفك راقده فى سريرك عيانه بسببى يا ريتنى انا مكانك يا حبيبتى قومى يا نرمين علشان انا لما باشوفك تعبانه باخاف
اقتربت اكثر وجلست بجوارها على حافة الفراش ورفعت يدها الى شفتيها تقبلها قائلة
داليا :: سامحينى والله ما كانش قصدى
____________________
دق جرس الباب ففتحت ثريا لتجد شيرين وباسنت وامال وسالتها شيرين بلهفة
شيرين :: مالها نرمين يا ثريا ؟
ثريا :: الضغط عالى عندها قوى والدكتور بيقول زعل جامد
امال :: انا كنت سايباها كويسه وروحت قلت اتغدى واكلمها ايه اللى حصل ؟
كوثر :: دخلت نامت ولما دخلنا عليها علشان نسالها على داليا لقيناها ما بتردش هم اتخانقوا مع بعض واللا فيه حاجه تانى
امال :: هم زعقوا مع بعض شويه بس احنا كنا فاكرين ان شغل البنات العادى احنا ياما بنزعق مع بعض لكن بنروق انما بصراحه هم زودوها شويه
كوثر :: وايه السبب ؟
زاغت عينا امال ونظرت نحو باسنت وقالت
امال :: مافيش حاجه هو بس ضغط الامتحانات وتعب اعصاب مش اكتر
كوثر :: امال انا ما باحبش اللى يكذب عليا انا باعتبرك زى بنتى وعلشان تفضلى زى بنتى يبقى خليكى صريحه معايا
صمتت امال ونظرت للارض مفكرة ثم قامت قائلة
امال :: ما اقدرش اقول حاجه الا لما نرمين تصحى وتقول بنفسها انا اسفه يا تانت مش حاقدر افتن على صاحباتى
كوثر :: يا بنتى انا عاوزه اتطمن عليهم وعليكم كلكم
امال :: اتطمنى حضرتك نرمين وداليا عمرهم ما عملوا حاجه غلط حضرتك اللى مربياهم وعارفاهم كويس دلوقت بعد اذنك
كوثر :: على فين مش عاوزه تتطمنى على صاحبتك ؟
امال :: عاوزه بس حاسسه ان حضرتك مش عاوزانى
نظرت لها كوثر بحزم وتجاهلتها ناظرة الى باسنت وهى تقول
كوثر :: وانتى يا بسبوسه طبعا لو سالتك حتقولى انا خارسه ما شفتش حاجه
باسنت :: يا ماما كوثر انا كنت فى الامتحان
كوثر :: يعنى فضلتى فى الامتحان على طول واللا خرجتى لقيتيهم متخانقين ؟
لم ترد باسنت فعقصت شيرين اذنها قائلة
شيرين :: مش لاقيه غير دى اللى تساليها ؟ دى رويتر تقول لك اخبار البنات فى الجامعه وبره الجامعه وتيجى عند نرمين وداليا ما تنطقش
كانت امال لا تزال واقفة بادب فقالت بصوت خفيض
امال :: امشى يا تانت ؟
حدجتها كوثر بنظرة قاسية وقالت بغضب
كوثر :: ما تقوليش يا تانت
ثم لانت قسماتها وابتسمت وهى تحتضنها وتقول
كوثر :: قولى ماما كوثر يا حبيبتى ده بيتك ماحدش يقدر يمشيكى منه اقعدى يا حبيبتى لحد ما تتطمنى على اختك
____________________
دخلت شيرين للاطمئان لم تكن المرة الاولى التى تدخل فيها لتطمئن ولم تكن هى الوحيدة التى دخلت وفى كل مرة كانت نفس الاسئلة والاجوبة
شيرين :: لسه نايمة ؟
داليا :: ما بتتقلبش
شيرين :: ما تخافيش هى بس واخده حقنه منيماها وحتصحى وتبقى كويسه
داليا :: يارب تصحى وتسامحنى او حتى تضربنى وتطردنى بس تصحى وتخف
شيرين :: طيب مش عاوزه تطلعى تقولى لماما اللى حصل ؟ ماما عاوزه تتطمن عليكم
داليا :: حنطلع مع بعض ونقول كل حاجه بس لما تصحى احنا عمرنا ما نخبى حاجه على بابا وماما حتى لو غلط حنقوله ونتعاقب ونتادب
شيرين :: احنا طبعا واثقين يا حبيبتى فى اخلاقكم بس عاوزين نتطمن عليكم
داليا :: اتطمنوا بس لما تصحى الاول
واخيرا خرجت شيرين تقول
شيرين :: انا مضطره اسيبكم علشان محمود ابنى راجع من السفر لو حصل جديد كلمونى
باسنت :: يا ماما حنروح ازاى ونسيب نرمين من غير ما نتطمن عليها ؟
شيرين :: هو حد قالك روحى ؟ خليكى ياختى اهو تريحينى
حليم :: انا حابقى اوصلها يا مدام شيرين بعد ما نرمين تفوق
شيرين :: وليه تتعب نفسك يا شيخ حليم خليها بايته عندكم انشالله على طول
قالت باسنت بمرح مفتعل
باسنت :: انتى بايعانى كده على طول ؟
كوثر :: احنا شاريينك بعينينا سيبك منها
احتضنتها كوثر وداعبت شيرين شعرها وقبلت خدها قائلة
شيرين :: يا اخواتى اكلك يا بكاشه ؟ واللا بلاش الدكاتره مانعيننى من الحلويات
امال :: طيب انا اعمل ايه مش قادره اسيبهم وما قلتش لبابا
حليم :: طيب خلاص انا حاروح اوصل مدام شيرين واعدى عليه فى المكتب اقول له
____________________
هدات الاصوات فى الخارج بعد ان نامت الفتيات فى غرفة كوثر وذهب حليم الى شقته تاركا كوثر وثريا يتسامران وكان الفجر قد اقترب وظنت داليا ان الجميع قد ناموا فقامت الى الحمام الداخلى وتوضات ووضعت اسدال الصلاة فوق ثيابها وفرشت على الارض مصلاة صغيرة وصلت ركعتين وبعد ان انتهت بقيت راكعة تدعو
داليا :: يارب خد بايدها واشفيها يارب انا عمرى ما حبيت حد قد ما حبيتها انا السبب يارب انا اللى زعلتها يارب قومها بالسلامه حتى لوتخلينى انا مكانها يارب اشفيها علشان خاطر بابا وماما وماما كوثر
ثم سجدت واغرقت بدموعها المصلاة وهى تهتف من قلبها
داليا :: يارب يارب اشفيها انا اللى غلطانه يارب سامحنى على قلته وزعلها وخلاها تتعب يارب خليها تسامحنى وحتى لو مش حتسامحنى بس تفوق وتخف
وبينما هى ساجدة تدعو وتبكى سمعت صوتا ضعيفا فاصاخت السمع وسمعت نرمين وقد بدات تفيق وتنادى بضعف
نرمين :: داليا داليا انتى فين
داليا :: انا هنا انا هنا يا حبيبتى انتى صحيتى ؟ الف حمد وشكر ليك يارب الف شكر ليك يا كريم
تعثرت فى الاسدال من تسرعها فسقطت بجوار الفراش فامسكت يدها بكلتا يديها وطفقت تقبلها قائلة
داليا :: الف حمد الله على سلامتك يا حبيبتى الف حمد الله على السلامه
نظرت اليها نرمين بضعف شديد وقالت لاهثة
نرمين :: انا يا داليا ؟ انا باروح الجامعه اتمسخر ؟
داليا :: لا يا حبيبتى انا اسفه اسفه انا غلطانه وقليلة الادب اضربينى موتينى والله انا اسفه واللى حتعمليه فيا انا قابله بس قومى
مدت نرمين يدها بضعف تمسح على راسها قائلة
نرمين :: طيب خلاص خلاص يا حبيبتى بطلى عياط بقى انتى دموعك دى غاليه عندى قوى ما حدش فى الدنيا يستاهل دموعك دى حتى ولا نرمين
داليا :: الا نرمين نرمين تستاهل روحى والنبى قومى بقى علشان خاطرى
اعتدلت نرمين واشارت لها فصعدت بجوارها على السرير واراحت راسها على صدرها واخذت تمسح على شعرها برفق واخيرا قالت وهى تتدلل كالاطفال
داليا :: بس انا برضه زعلانه منك
نرمين :: عارفه انا اسفه بس والله مش قصدى اقول كده انتى عارفه اللى فى قلبى
فقالت داليا كطفلة تتدلل على امها
داليا :: ولعلمك بقى انا اختك عصب عنك ولو انتى مش عاوزانى انا بقى ما اقدرش استغنى عن تراب رجليكى
________________
